Telegram-канал tajalzahraa1 - 🌴تجمّع الزهراء ع العاشورائي🌴: Неотсортированное

🌴تجمّع الزهراء ع العاشورائي🌴

13 января 2024 21:46

بحق الامام علي الهادي "عليه السلام"
الشاعر الشيخ كاظم المنظور الكربلائي
"رحمه الله تعالى"

بالسم غدر چتلوني يبني إوينور إعيوني
والعهد هاك أسراره وإخذ الصبر وأثماره
يبني إو ينور إعيوني
* ١ *
گوس الـدهر صوبني سهمه إو رمي نشابه
وإجروح گلبي كثره
وإبجمرته عطبني وإبمهجتي لهابه
إو ما تنطفي هالجمره
دگرب لـي يبني يبني إو ضمد الگلبي إصوابه
والصبر هين أمره
لم أهلك إيودعوني ساعات وإتفگدوني
مالي بعد كل چاره وإخذ الصبر وأثماره
يبني إو ينور إعيوني
* ٢ *
سباح گلبي إتگطع وأشفاره اليگطعنه
من الزمان إو جوره
إو سهرانه عيني إو تدمع للديـن وأجذب ونه
إو حارس عله دستوره
ألهم صبر وأتجرع إو لا روحي تجزع منه
إو صابر عله كل صوره
مثـل السليم أتگلب بالنايبات إمصوب
من الدهر وأخطاره وإخذ الصبر وأثماره
يبني إو ينور إعيوني
* ٣*
من شده أطيـح إبشده وأنهض إبثگل إهمومي
وأمشي إبضوه إيماني
وياي دهري إشعنده محرمني لـذة نومي
وأرعه النجم خلاني
يبني اليضدك ضـده وإنهج إبنهج إعلومي
وإبني عله بنياني
إوشيد إلدينك مجـده إو ضحي الحياة إبحده
لو قلّت العمّاره وإخذ الصبر وأثماره
يبني إو ينور إعيوني
* ٤ *
دگرب يريع أُفـادي ساعات إلي إبدنيايه
وياك خل أگضيها
وأنظـر علي إشسادي إو شوف العلل بحشايه
والجمرتي طفيها
ساعه إو گرب ميعادي هم تبتلي إبلوايه
والعلتك تخفيها
وحدك تظل إتجـاهد لا ناصر إو لا إمساعد
إو قلّت الدين أنصـاره وإخذ الصبر وأثماره
يبني إو ينور إعيوني
* ٥ *
سهم المرد دلالي بي ينمرد دلالك
وإگلوبنه تتفطر
والصـابني إو چتالي عگبي تره چتالك
إو هذا العلينه إمگدر
وإبذلت يبني حـالي وإيكون تبذل حالك
عالدين عينك تسهر
ليكون يبني تجزع من چبدتك تتگطع
من شفرة الغداره وإخذ الصبر وأثماره
يبني إو ينور إعيوني
* ٦ *
إو لو غفت عيني إبحجرك گطرلي ماي إعيونك
إو غسلني إو چفني
إو للصبر وسـع صدرك إو رحمة الباري دونك
وإتغيب يبني عني
إو لاتظل حـاير بأمرك خل شيعتي إيعينونك
وإبحفرتي نزلني
من عگـب متشيعوني وإبحفرتي إتنزلوني
علمي يظل تذكاره وإخذ الصبر وأثماره
يبني إو ينور إعيوني
* ٧ *
إو بإسم الرسـاله إتقدم للدين والديانه
وإحفظ كرامة جدك
إو من علم ابـوك إتسلم وإتظاهر إبسلطانه
والزم إزمامه إبيدك
لا تحزن إو لاتهتم من قلة العوانه
علم ألإمامه إيمدك
إو علم ألإمامه إحـدوده منشوره مو محدوده
وإمخلده آثـاره وإخذ الصبر وأثماره
يبني إو ينور إعيوني

الشاعر الشيخ كاظم المنظور الكربلائي