836
«مهد تمدن» گۆننامه‌سی‌نین تۆرکجه صفحه‌لری بیزیمله بو آدرسدن ایلگی قۇرا بیلرسینیز: @Susenrazi @Buqday @tansu6252 تۆرکجه تایپ، کؤچۆرمه ترجمه سفارشلرینیز قبول اوْلونور. @Susenrazi
⚫️ قوْجامان شاعر اوستاد «آیرێلماز» حیاتێـنی دڲیشدی.
اوستاد «یعقوب احمدوند اردبیللی» آیرێلماز تخلّوصو ایله اوزون مدّت مریضلیکدن سوْنرا مهر آیی‌نین ۲۴.جۆ گۆنو تهراندا «ایرینده» دۆنیاسێـنی دڲیشدی.
مهد تمدن و اوْنون تۆرکجه صفحهسی - سانجاق - مسئوللاری و اکیپی بو ایتگینی ملّتیمیزه و ادبیاتچێ‌لاریمیزا تسلیت دئییب، مرحومون عائله‌سینه باش ساغلێغی وئریر و جناب حقدن صبر و تسلّی ایسته‌ییر.
******
🔳 داغچی یوْلداشیم
✍️ #آیریلماز
تمیزله داغلاری داغچی یوْلداشیم،
بلکه گؤزللیکلر قالا داغلارا،
سنی آلقیشلاسین گؤزل داغ – داشیم،
گئدنده اوجا بوْی، بالا داغلارا،
بلکه گؤزللیکلر قالا داغلارا
گزه‌نده داغلارین دره‌سین – دۆزون،
اؤزۆن تک یوگیلان طبیعت اۆزون،
گۆللره پای آپار بۆلبول‌لر سؤزۆن،
وێرسین اؤز بزه‌ڲین لالا داغلارا،
بلکه گؤزللیکلر قالا داغلارا.
چالیش گؤزللشسین گؤزل طبیعت،
زیر – زیبیل داغلارا اوْلماسین محنت،
آشیق‌لار آراسی باشلانا صحبت،
یئنی بیر هاوانی چالا داغلارا،
بلکه گؤزللیکلر قالا داغلارا.
قار یاغیب ائل داغی اوْلا چال پاپاق،
توتا اینجه‌بئللر داغلاردان سوْراغ،
«آیریلماز» دا گله ائل‌لره قوْناق،
قارتال تک سسینی سالا داغلارا،
بلکه گؤزللیکلر قالا داغلارا
@SancaqDergisi
/channel/Sancaq_media/8520
■ 2864 مین شماره روزنامه سیاسی واجتماعی مهدتمدن در 8 صفحه به زبان‌های ترکی و فارسی روز شنبه 25 مهرماه 1405
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
⭕️ هفته‌لیک فالێـنیز
✍ حاضرلایان: #اوْلجای_مرآتی
🔶 آزر (یای، آذر): سوْروشماق، اؤڲـره‌نمک و چئشیدلی باخێـش آچێـلارینی ائشیتمک، یئنی یوْللار اۆزوزه آچار. لاپ بئله اؤنجه‌دن اوْلان قرارێـزدا دورساز دا، یئنه هر زادی اینجه‌لیین، سوْنرا قرار وئرین. تئزلیکده ایشلریزین بهره‌سینی گـؤرۆب، باشی اوجالێـغا چاتاجاقسێـز. نیازی اوْلانلارا یاردێـم ائدین، انسان بیر الی ایله باغێـشلاسا، او بیری الی ایله آلار. دئمه‌یین منیم نه‌ییم وار نه باغێـشلاییم؟ پیامبر بویورموش کیمی، نه‌ییز وار اوْندان باغێـشلایێـن. علم، سئویملی داورانێـش، خوْش دانێـشیق هامێـسی انسانێـن وارلێـغی حساب اوْلور.
🔶 چیلله (اوْغلاق، دی): اؤزۆز یا باشقاسێـنی دانلاماق یئرینه، بیر ایش گـؤرۆن. اڲـر بیرزاد برنامه اۆزویله قاباغا گئتمه‌ییب، علتینی تاپێـن و گلن سفر همان سهوی تکرار ائتمه‌یین. هرزادا اوْلومسوز باخماق و اوْلومسوز دۆشونمک انسانی اۆمودسوزلوڲه دوْغرو آپارار. آما اوْلوملو باخێـش، سئوینج و قازانج گتیره‌ندیر. استرس و اضطرابدان اوزاق اوْلون، یوْلداشلار و عائله‌نین اۆستونده حساب گئدین و لازم اوْلان زمان اوْنلارا سؤیکه‌نه‌رک آغێـرلیغیزی آزالدێـن.
🔶 دوْندۇران آی (قـوْوا، بهمن): سئچیم سیزینله‌دیر. هر کسین سؤزلرینی دینله‌یین، نظرلرینی ائشیدین، آنجاق سوْن قراری دوروم، باشاری و حقیقی ایستکلریزه باخاراق، اؤزۆز وئره‌جکسیز. سیز تجربه‌لی و بیلگین بیر انسان‌سیز. تئزلیکده کـؤنلـۆزده اوْلان ایسته‌ڲـیزه چاتێـب، بئله‌لیکله آرامشه یئتیشه‌جکسیز. فقط بیر سؤزۆ اونوتمایێـن، انسان نه قدر خرج‌لسه یئنه ده آز گتیرمک احتیمالی وار، بو اۆزدن لوطفاً قازانجلارێـزین بیر مقدارینی گلهجک گـۆنلره ساخلایێـن.
🔶 بایرام (بالێـقلار، اسفند): کیچیک الده ائتدیکلریزی جدی توتمالێـسیز. چالێـشمالاریزین دڲـرینی بیلمک اۆچون، بـؤیـۆک یئرلره چاتماغێـز لازم دڲـیل. دؤزۆم و اؤڲـره‌تیم ده حیات سۆره‌جینده باشاری حساب اوْلور. فکریزی بیر یئره یێـغماغا چالێـشین یوْخسا ایشین کنترلو الیزدن چێـخار. یاشامێـزا اوْنملی تصمیملر توتمالێـسیز، بونا گـؤره بیلگین و تجربه‌لی آداملارلا دانێـشین و اوْنلارێـن سؤزلریندن فایدالانێـن. انسان هر زادی اؤزۆ تجربه ائده‌جک قدر فرصت و امکاناتی یوْخدور.
@SancaqDergisi
/channel/Sancaq_media/8516
⭕️ هفته‌لیک فالێـنیز
✍ حاضرلایان: #اوْلجای_مرآتی
🔶 آغلار- گـۆلر (قـوْچ، فروردین): آماجلارێـزا چاتماق اۆچون کیچیک آددێـملارلا باشلامالێـسیز. یوْلون هامێـسینی اؤنجه‌دن بیلمک لازم دڲـیل. یئتر ایلک ایشی بیلیب، اوْنو یوْلونا سالا بیله‌سیز. داها سوْنراسی دوروما گـؤره ایره‌لی‌لمک اوْلار. بو هفته معنوی گۆجلر سیزه یاردێـما گلیب، آرامشه چاتدێـراجاق. ایش و مالی باخێـمدان گـؤزل گلیشمه‌لر گـؤرۆنور طالعیزده. سیز گـؤرستدیڲـیزین ترسینه اؤرکده اؤرکک بیریسی اوْلاراق، اؤز باشارێـلاریزی آز گـؤرۆسوز. آنجاق نه ائشیکدن گـؤرۆندوڲـو قدر چوْخ، نه ده اؤزۆز قبول ائتدیڲـیز قدر آز دیر. یئتر کی اؤزۆز اوْلاسێـز و اؤزۆزه ایناناسێـز.
🔶 گـۆلن‌آی (بۇغا، اردیبهشت): بو هفته اؤزۆزه فرصت وئرمه‌لیسیز. بیر قوْنو سیزه آیدێـن‌لاشمایینجا، اوْنا گـؤره قرار وئرمک مجبوریتینده دڲـیلسیز. داها آرتـێـق اینجه‌لمک، سئچیم‌لریزی راحاتلاشدێـرار. اۆمودسوزلوڲـو اؤزۆزدن اوزاقلادێـن، نه قدر خوشبین اوْلا بیلسز، بیر او قدر خوشبخت‌لیک و آرامش سیزه ساری چکیلر. کاش انسانێـن دۆشوندوکلری‌نین نه قدر اؤنملی اوْلدوغونو بیله‌سیز، اوْندا بیرده هئچ زمان پیس دوروملارا فکرلشمزسیز.
🔶 قیزاران آی (ائکیزلر، خرداد): سؤزلریزی آچێـق- آیدێـن دئیین. ایسته‌مه‌یین چئورزده‌کیلر سیزین اۆره‌ک سؤزۆنو اؤزلری بیلسینلر. ایستکلریزی سایقێـلی اوْلاراق، هر بیر کنایه‌دن اوزاق دیله گتیرین. حیاتێـن چتین‌لیکلریله ساواشێـب، اؤزۆزو ایسته‌دیڲـیز یئره چاتدێـریب، آرامشه یئتیشه‌جکسیز. بورا کیمی سارسێـلماز روحیه‌زی هر کس گـؤرۆب و سیزین باشارێـلاریزا اینانێـب، آنجاق اوزون مدت آغێـرا دۆشدوڲـوزون یوْرقونلوغونو چئورزده‌کیلره یانسێـتمایین، هر کسین حیاتی‌نێن خوشلوغو دا، تورشلوغو دا اؤزۆ اۆچوندور، بیرینی چتین‌لیکلریمیز اۆچون سوچلایانمارێـق.
🔶 قـوْرا پیشیرن (یئنگج، تیر): آرامشیزی جدی توتمالێـسیز. بیرآز خلوت، استیراحت و شلوغلوق‌لاردان اوزاقلاشماق باعث اوْلار فکرلریزی سهمانا سالاسێـز و ایشلریزه داها آرتـێـق اوْداقلاناسێـز. باشێـزدا بعضی فکرلر وار، بو فکرلر سیزی آماجلارێـزا دوْغرو آپارێـر. اوْنلارا چاتماق و ان یاخێـن زماندا سئوینجینی دادماق یالنێـز اؤز الیزده‌دیر. اوْلا بیلر آدامێـن یاخێـنلاری- یوْلداشلاری بعضی وقتلر الیندن توتسونلار، آما سوْنوندا هر ایش اوْنون اؤزۆنه باغلێـدیر.
#آردێ_وار...
@SancaqDergisi
/channel/Sancaq_media/8516
⭕️ قوْنشودان گلن سسلر ندیر؟
✍️ یازان: #دکتر_شایان
ایکینجی بؤلۆم
نردیوان گتیریرلر، یئنیدن پئتی‌نی تایا باشێنا قوْوزایێریلار. پئتی‌نین گؤزۆ قاماشێب، آرخاسێ اۆسته یئره اوچور! آللاه رحم ائله‌ییر بو دفعه سامانلێغا دۆشور.
آلتی بارماق گۆموش: هه قاغا، بو دفعه نه گؤردۆن؟
تای‌قولاق پئتی: اوْن قات خانلار، آغالار!
سوْخولجان تاراو: ایه! قوْناقلاردان دئگینن، کیملردی؟
تای‌قولاق پئتی: بۆتون دۆنیا اؤلکه‌لر بـڲی، خانێ، آغاسێ!
سوْخولجان تاراو: نه؟!
تای‌قولاق پئتی: هه، دده‌م گوْرو حاققی دۆز دئییرم.
سؤزبازلار دۆشونمه‌دن بیر بیری‌نین جانێنا دۆشورلر؛
آخساق قولو: دده یاناسان، اینـڲیمیز دوْغدو.
چئری زئدی: آللاه آمان اوْی، کارکاسێبین فاتیحه‌سی اوْخوندو.
دوْمباگؤز قێـزقاییت: آللاه ظۆلوم ائلییه‌سن، ظالیملر یێغینجاغیندان قان قوْخوسو گلیر.
توْخماقلێ گۆللو: اوْلوب قالان یئر – یوردوموزو بیزه چوْخ گؤردۆلر، کسین یئنی پیلانلار قورولاجاق.
چه‌ول قالسین: دۆنن آخشام کند ایچینده قاب – قاشێق یێغیلیردی، دئمه خانلێـقدا اسکیکلیک وارایمیش.
چئری زئدی: هه قالسین باجی! من‌ده گؤردۆم قوروت، آیران، قارتره‌سی، یوْغورت، گؤی، گیردکان، اریک، یئمیش، بۆتون تره‌وزلر یێغیلیب آغا گیله گؤندریلیب.
مرێق میرواری: په دۆبردین داغێلسین آغا، منیم آزغامێ قوْناقلارێـنا یئدیردیرسن؟ آللاه بوْیونونا قوْیسون!
سوْخولجان تاراو: تێـفاغین دارباداغێلسین خان! گئده به سن قوْناقلێغا کندین اوْلوب قالانێن گرک یوْخ ائتمه‌لیسن؟
تای‌قولاق پئتی: فیتیل – فیتیل بورنوزدان گلسین، کؤپک اوشاغێ، یئیین کاسێبین یاوانلێغین پئیسر بسله‌یین، بیزی ده یاوان چؤره‌ڲه محتاج قوْیون.
آخساق قولو: آللاه، حرضه‌تاباس! (حضرت عبّاس) یێخ بئله خانلێغین ائوین. کارکاسێبا آج – سوسوز، یئر – یئتیمه ده بیر گؤز آچدێر، بلکه ظالیملرین ظۆلمونو چکه‌بیلک.
کوْر قوبو: نه خانێ؟ نه آغاسێ! هامێسی آرالێق اوشاغێ‌دیلار!
تای‌قولاق پئتی: نه!؟ کئشگه آرالێق اوشاغێ اوْلسایدێلار. اۇلان! بونلار هالای‌‌پوْزاندێلار، آت اوْغروسوندان، تای باشێ، یوْل‌کسن، دوزاق قورانلارداندێلار. هئچ بیری دده‌سی اوْغلو دئییللر، چوْخون تانیێرام، قدیم منیم بؤیۆک بابامێن نؤکر، چوْبانی‌ایدیلار.
سوْخولجان تاراو: تای‌قولاق! سنین بؤیۆک بابان قدیم بیر بئله حشملی، وارلێ – کارلێ اوْلاراق ایندینی دئه، ایندینی! یازێق! آجێندان قارنێن بئیلیوه یاپێـشیبدی.
تای‌قولاق پئتی: کس سسینی! آخماق کوْله فساد، ایچین فساددی، ایچین قارنێ قورتدو.
کوْر قوبو: داش اوْلوم دۆشوم باشێـزا، نه اۆسته بیر بیریزی آلچاقلایێرسیز؟! باخێن گؤرۆن سیز نه گۆنده‌سیز! خان اؤز گۆلون وورماقدا.
توْخماقلێ گوللو: به اؤزۆن نه گۆنده‌سن، خانا یالتاقلێق ائدیرسن!؟
کوْر قوبو: الیمه دؤنۆم، خان ایله قان باغلانتێـمیز وار.
مرێق میرواری: نه قان یالاتاقلێغی، گئده؟
کوْر قوبو: بی‌بی قێـزیم، خان چوْبانێن کۆلفتی‌دیر.
چه‌ول قالسین: خانێن چوْبانێ‌نین آروادێ، سنی خانا باغلاداندێر؟ عاغلێوا داش باغلایێم، گئده کۆل باشدێ سن‌ده بیزه تای قارا گۆنلوسن، نه خان باغلێسی؟
تای‌قولاق پئتی: دوْغور دئییر، خان باغلێسی‌دیر. خان بعضی ایت‌لرین قودورماسێن، خالقێ قاپباسێن دئیه، آیاق یوْلوندا باغلار.
کوْر قوبو: کس سسینی ائششک اوْغلو ائششک! گئت کسیلمیش قولاغێنی تاپگینان....!!!!
تای‌قولاق پئتی: کؤپولو! آغزێـندان چێخان... ایله بورانی مێندارلاما.
سوْخولجان تاراو: اَیه قوْدوقلانمایێـن! دورون خانلێقدان بیر خبر بیلین گتیرین، گؤره‌سن ایندی نه دئییرلر؟ نه یئییرلر؟ نه ایچیرلر؟ خوْش حاللارێـنا؟
مرێق میرواری: قادام دۆشسون اوْنلارین حاللارێنا، حارام یئییب، حارام ایچیرلر.
آلتی بارماق گۆموش: آللاه هردن ظالیملره میدان وئرر، سوْن‌اوجو گؤزله‌یین.
توْخماقلێ گۆللو: قاغا وآللاه، آللاه هر کسه‌نین اۆره‌ڲیجه وئرر، یۆز ایلدن سوْنرا دا خان ائله خاندێر، کاسیب ائله کاسێبدیر.
کوْر قوبو: رحمت آتاا، سؤزۆن جؤهرین تاپدێن. آللاه داغێـنا باخار، قارێـنی سالار.
#سون
@SancaqDergisi
/channel/Sancaq_media/8512
ٰ«#سانجاق»، سیاسی- اجتماعی مهدتمدن گۆنده‌لیگی‌نین ۲۸۶۳. سایینداکی تۆرکجه صفحه
@SancaqDergisi
🌐 https://www.instagram.com/sancaq2
🌐 https://instagram.com/asanews.ir
■ 2862 مین شماره روزنامه سیاسی واجتماعی مهدتمدن در 8 صفحه به زبان های ترکی و فارسی روز چهارشنبه 22 مهرماه 1405
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
⭕️ تۆرکیه‌ده شعر آخشامێـندا شاعر «شاه اسماعیل آتش»یله گؤرۆش
✍️ یازان: #حمید_احمدزاده – استانبول
شاعرین آدێ «شاه اسماعیل آتش»دیر. بو آد منی ماراقلاندێردی، او شاعری ایران مطبوعاتێـندا تانێدیم. منجه بئله ادبی ایلیشگیلر چوْخالدێجا، قارداشلێقلار دا اۆزه چێخیر.
«شاه اسماعیل آتش» تونجعلی (درسیم) ولایتی‌نین، پرتک بؤلۆمونده، سوماق کندینده 1334.ده دۆنیایا گؤز آچدێ.
«شاه اسماعیل آتش» ایلک اوْخولو «تونجعلی – درسیم» ولایتینده بیرینجی صینیفی بیتیردیکدن سوْنرا عائله‌سی ایله «هارپوت (آلازێغ)» ولایتینه یئرلشیب، اوْرادا اوْخوموش. دیپلم آلدێقدان سوْنرا، تۆرکیه‌نین بیر چوْخ ولایتلرینده، ابتدایی صینیف شاگردلرینه درس وئرمیشدی.
«شاه اسماعیل آتش»ین دیلی آذربایجان دیلینه چوْخ اویقوندور. اصلینده آذربایجان، کرکۆک، شانلێ‌اورفا و هارپوت منطقه‌سی مین ایللردن بری قره‌قوْیونلو و آغ‌قوْیونلولارین یاشادێغی یئرلر اوْلدوغو اۆچون، دیللری و دب‌لری‌ده بیر بیرینه یاخێندیر. تعجّبله دئمه‌لییم، هارپوت‌دا «تبریز»ده تانێنان قێـزیل گۆللره، تبریز گۆلو دییرلر.
تبریزین «حسن پادشاه» مسجدینی، و شاهگؤلۆنو و بیر چوْخ تجاری مرکزینی کی، ایندی یئر آلتێـندا قالێبدیر، آغ‌قوْیونلو و هارپوتلو اۇزون حسن یاپمێشدی. «اوزون حسن»نین اوْغلو اردبیل شهرینده «زینال شاه» مسجدی و «زینال شاه» محلّه‌سینی یاپمێشدی.
شاعر «شاه اسماعیل آتش» آلازێغ – هارپوت‌دا اوْلان زامانلاردا، اؤز معلّمی اوْلان «سليمان بکتاش»ێن یوْل گؤسترمه‌لری ایله شعر صنعتینه ماراقلانێب و اللّه وئردیڲی استعداد و ایلهام ایله شعر سؤیله‌میشدی.
«شاه اسماعیل آتش»ین شعرلری زامان – زامان تۆرکیه‌نین ادبی درگیلرینده یازێلماقدا و یایێلماقدادیر. او جمله‌دن؛ «امید، حیات، اؤزجان، آخشام، فسون، اؤز بیلگی و...» درگیلرینده یایێلیب و ایندیلیکده شاه اسماعیل آتش «مَرسین» شهرینده، «اؤلکه‌م» درگیسی‌نین ادبی بؤلۆمونده اؤز گؤره‌وینه دوام وئریر.
«شاه اسماعیل آتش»دن گۆنوموزه قدر اوْن شعر کتابی اێـشیق اۆزو گؤرۆبدور:
«بئشینجی مؤوسوم‌ده آچان گۆللر» کتابێـندان بیر اؤرنک اوْلاراق، او شاعره داها آرتێـق باشاریلار دیله‌ییریک.
🔷 آل بو قلبیم سنین
✍️ شاعر: #شاه_اسماعیل_آتش
کیسراق* باشلێ بو گؤک آلتێـندا
گۆنش سسلی یاپراقلارا
قوْنار مکتوب گؤیرچین‌لری
خزان یاشێلیندا، ماوی‌دن
آل قلبیمین خبرینی
دویقولار، آتموْسفرینده
بیر کاچ هرجایی کیرلانقێچ*
گزینیر، گۆنش سسلی یاپراقلار
قابارێر ایچیمده حزۆنلو رؤیالار
آل بو قلبیم سنین، قوْی قلبی‌نین ایچینه
بیر گؤز گۆنون آلتێـندا گزدیردیم
بیر کپنـڲین قانادلارێندا بؤیۆتدوم
زامانێـن آیناسێـنا قویلادێم خیاللارێ
مؤوسوم روحونو، دامێـتدیم قلبیمه
آل بو قلبیم سن‌ده قالسین
🔶 آچێقلامالار؛
كيسراق: اۆچ یاشێندا جوان، سرعتیله قاچان آت‌دیر
کیرلانقێچ: پرستو – سێغیرچین، سرعتیله خبر گتیرن قوش
@SancaqDergisi
/channel/Sancaq_media/8506
ٰ«#سانجاق»، سیاسی- اجتماعی مهدتمدن گۆنده‌لیگی‌نین ۲۸۶۱. سایینداکی تۆرکجه صفحه
@SancaqDergisi
🌐 https://www.instagram.com/sancaq2
🌐 https://instagram.com/asanews.ir
■ 2860 مین شماره روزنامه سیاسی واجتماعی مهدتمدن در 8 صفحه به زبان‌های ترکی و فارسی روز دوشنبه 20 مهرماه 1405
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
⭕️ «شمس تبریزی» دۆنیا شخصیتیدیر، امّا کؤکسۆز دڲیل!
✍️ یازان: #علی_رشتبر
خوْی شهرینده «شمس تبریزی» مقبره‌سی‌نین آچێلیش مراسمی کئچیریلدی. بو تدبیر خوْیون تاریخینی، مدنیّتینی و آذربایجان کیملیڲینی، همچنین بو شهرین «شمس تبریزی» کیمی بؤیۆک بیر شخصیتله باغلێلیغینی تانێتماق اۆچون دڲرلی بیر فرصت اوْلا بیلردی. آمّا مراسمده ان چوْخ دقّت چکن مسئله، پروْگراملاردا آذربایجان دیلی‌نین و مدنیّتی‌نین اوْلماماغی ایدی. بو مسئله‌نین سس‌سیزلیکله قارشێلانماسی مۆمکون دڲیل.
خوْی آذربایجانێن قلبینده یئرلشن بیر شهردیر. بو شهرین تاریخی، جغرافیاسی، مدنیّتی و جمعی یادداشێ آذربایجان دیلی و مدنیّتی ایله آیرێلماز شکیده باغلێدیر. شمس تبریزی ده یالنێز دۆنیا مشهوری اوْلموش بیر شخصیت کیمی تقدیم ائدیله بیلمز! او، تصوّف و ادبیّات ساحه‌سینده دۆنیا مقیاسێندا تانێنمازدان قاباق، عیناً آذربایجانێن بو تاریخی و مدنی جغرافیاسێندان یئتیشمیش بیر شخصیت ایدی. اوْنون آدێ تبریز، آذربایجان و بو توْرپاغێن مدنی میراثی ایله سێخ باغلێدیر.
دۆنیا شخصیتی اوْلماق کیملیکسـیز اوْلماق دئمک دڲیل. عکسینه، دۆنیا مقیاسێندا تانێنان شخصیتلر اؤز تاریخی و مدنی کؤکلری ایله بیرلیکده تانێدیلیبلارسا، داها دوْلغون شکلیده تقدیم اوْلا بیلرلر. اڲر دۆنیا «شمسی»نی تانێمالی‌دیرسا، بَس نه‌دن آذربایجان خالقێ اوْنو اؤز دیلی و مدنیّتی ایله تانێتماقدا اشتراک ائتمه‌سین؟
خوْیدا «شمس تبریزی»نین یادێـنا حصر اوْلونموش مراسمده پروْگرامین معیّن بیر حیصه‌سی‌نین آذربایجان موسیقی‌سینه، آذربایجان شعرینه، یئرلی صنعتکارلارین چێخیشلارینا، آذربایجان ادبیّاتینا و منطقه‌نین مدنی میراثی‌نین تانێدیلمسینا آیێریلماسی بؤیۆک طلب دڲیل. بو ایسته‌ک نه سیاسی‌دیر، نه ده افراطی؛ بو، طبیعی بیر مدنی طلبدیر.
خوْی شهرینده بو جغرافیا ایله باغلێ اوْلان بؤیۆک مدنی و تصوّفی شخصیتلردن بیری‌نین شرفینه مراسم کئچیریلرکن، همان جغرافیانین انسانلاری‌نین دیل و مدنیّتی‌نین پروْگرامدان کناردا قالماسێ جدّی سواللار دوْغورور. خوْی اهالیسی‌نین دیلی یالنێز گۆنده‌لیک ارتباط واسطه‌سی‌دیر و رسمی مدنی تدبیرلرده اوْنا یئر یوْخدورمو؟ آذربایجان مدنیّتی یالنێز یئرلی شَنلیک‌لرین موضوعسو اوْلدوغو زامانمی دڲرلیدیر؟ سؤز دۆنیا مقیاسێندا تانێنان بیر شخصیتدن گئدنده، آذربایجان مدنیّتی کنارا چکیلمه‌لیدیرمی؟
اڲر شمس دۆنیایا عاییددیرسه، آذربایجان دا اوْنون دۆنیاسی‌نین بیر پارچاسێدیر.
شمسی جغرافیاسێندان و مدنیّتیندن آیێرماق اوْلماز. بیر مدنیّت مجموعه‌سی‌نین گیریشینه «شمس تبریزی» آدێنی یازێب، اوْنون خاطیره‌سینه حصر اوْلونموش تدبیرده بو جغرافیادا یاشایان، اوْنون مدنی میراثێنی قوْرویوب ساخلامێش انسانلارێن دیلینی و صنعتینی گؤرمزلیکدن گلمک اوْلماز.
«شمس»ین دۆنیا مقیاسێندا تانێدیلماسی باخێمیندان دا بو یوْخلوق الدن وئریلمیش بیر فرصتدیر. آذربایجان موسیقی‌سی، شعری و صنعتلری رسمی چێخیشلارلا یاناشێ، منطقه‌نین مدنی محیطینی داها جانلێ و داها حقیقی شکلیده تقدیم ائده بیلردی. بیر عاشیق ایفاسێ، آذربایجان دیلینده شعر سسلندیریلمه‌سی، آذربایجان عنعنه‌وی موسیقی‌سی و یا خوْیون و آذربایجانین مدنی میراثێ حاقّیندا قێسا تقدیمات مراسمه هیچ بیر رسمی پروْگرامین عوض ائده بیلمه‌یه‌جڲی بیر کیملیک و رنگ قاتا بیلردی.
یئرلی کیملیڲه احترام دۆنیا مقیاسێندا تانێنماغا ضدّ دڲیل؛ عکسینه، حقیقی و کؤکلۆ شکلیده تانێنماغین شرطیدیر.
بیز «شمس»ین دۆنیا مقیاسیندا تانێنماسینا قارشێ دئییلک. عکسینه، حساب ائدیریک کی، شمس دۆنیادا داها گئنیش تانێدیلمالیدیر. اعتراضێمیز اوْنون دۆنیایا تقدیم ائدیلمه‌سی پروْسه‌سینده مدنی و دیل کؤکلری‌نین آرخا پلانا کئچیریلمه‌سینه‌دیر.
شمسی خوْی‌دان دۆنیایا تانێتماق لازیمدیر، آمّا خوْیو شمس‌دن سیلمکله یوْخ.
اڲر «شمس»ین مقبره‌سی خوْی‌دادیرسا، بو شهرین انسانلارێ عصرلر بوْیو اوْنون آدێ و خاطیره‌سی ایله یاشاییبلارسا، خوْی آذربایجانێن تاریخی یادداشێ‌نین بیر پارچاسێ‌دیرسا، دئمک، «شمس»ین مراسمینده آذربایجانێن سسی ده ائشیدیلمه‌لیدیر.
بو، ساده بیر طلبدیر: خوْیون مدنی تدبیرلرینده خوْیون اؤز مدنیّتی گؤرونمه‌لیدیر؛ «شمس»ین مراسمینده آذربایجانێن سسی ائشیدیلمه‌لیدیر؛ دۆنیا مقیاسێندا تانێنان بیر شخصیت تقدیم اوْلونارکن، اوْنون یئرلی کؤکلری اونودولمامالیدیر.
«شمس تبریزی»نی دۆنیادان آیێرماق اوْلماز، آمّا اوْنو آذربایجاندان دا آیێرماق اوْلماز.
شمس دۆنیا شخصیتیدیر، لاکین اوْنون دۆنیا شهرتی آذربایجان کؤکلرینی آرا‌دان قالدێرمیر. بلکه ده بئله تدبیرلرین تشکیلاتچێلاری اؤزلرینه بو سوالی وئرمه‌لیدیرلر: اڲر خوْیدا شمس تبریزی‌نین مقبره‌سی‌نین یانێندا آذربایجان خالقێ‌نین دیلی و مدنیّتی تمثیل اوْلونمایاجاقسا، بَس هارادا تمثیل اوْلونمالێدیر؟؟
@SancaqDergisi
/channel/Sancaq_media/8502
ٰ«#سانجاق»، سیاسی- اجتماعی مهدتمدن گۆنده‌لیگی‌نین ۲۸۵۹. سایینداکی تۆرکجه صفحه
@SancaqDergisi
🌐 https://www.instagram.com/sancaq2
🌐 https://instagram.com/asanews.ir
■ 2858 مین شماره روزنامه سیاسی واجتماعی مهدتمدن در 8 صفحه به زبان‌های ترکی و فارسی روز شنبه 18 مهرماه 1405
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
⭕️ هفته‌لیک فالێـنیز
✍ حاضیرلایان: #اوْلجای_مرآتی
🔶 آزر (یای، آذر): وئردیڲـیز قرارا یئتیشمک یوْلو چتین دیر. گئرچکدن بو آماجا چاتماق ایستییرسیزسه، اؤزۆزو بو چتین‌لیکلره حاضر ائتمه‌لیسیز. اصلینده بو چتین‌لیکلر سیزین کاراکتئریزین دۆزلمه‌سینه لازمدیر. هئشزاتدان قوْرخمایێـن، آللاه هر زمان سیزین آرخازدا دوروب. بو چتین دوروم گئچدیکدن سوْنرا، یئنیدن بیر آرامش بۆتون یاشامێـزا چؤکۆب، سیزی راحاتلاشدێـراجاق. اوْندا اؤتوروب هرزادی گـؤزلجه مدیریت ائدیب، آرخادا قوْیدوغوز اۆچون سئوینه‌جکسیز.
🔶 چیلله (اوْغلاق، دی): ذهنیزده اوْلان آماجا یئتیشمک اۆچون، مالی دوروموزو دۆزنلمه‌لیسیز. نگران اوْلمایێـن، سیز اؤنجه‌دن بونلارێـن هامێسینا لازم اوْلان تدبیرلی ایشلری گـؤرۆبسوز. ایشیزی دڲـیشدیرمک فکرینده‌سیز، باشاری و چالێـشمالارلا ایسته‌دیڲـیز ایشلری گـؤره بیلرسیز. بو گـۆنلر خوش بیر اوْلای سیزی چوْخ سئویندیره‌جک. دۆزون ایسته‌سز گئچمیشده چکدیڲـیز زحمتلر و ائتدیڲـیز تدبیرلر ایندی بهره وئریر و هر کس چیتن‌لیک چکسه ده، سیز راحات- راحات برنامه‌لریزهیئتیشیرسیز.
🔶 دوْندۇران آی (قـوْوا، بهمن): حاشیه‌دن اوزاق اوْلون یوْخسا حیاتـێـن اصلیندن اوزاق اوْلارسیز. عائله ایچینده اوْلان بیر سوْرون بو هفته یوْلون تاپێـب حل اوْلاجاق. آماجلارێـزا هم زمان آیـێـرین همی ده غیرت و جسارت گـؤرسه‌دین. سیز بو آماجا چاتماغا لاییق‌سیز. شۆبهه‌لندیڲـیز بیر قوْنو حقده آناز یا آیری تجربه‌لی بیری ایله دانـێـشین. بـؤیـۆکلر- تجربه‌لی‌لر، بیز آینادا گـؤرمه‌دیڲـیمیزلری، چیی کرپیجده گـؤره بیلرلر.
🔶 بایرام (بالێـقلار، اسفند): اوْلایلار چوْخ حێـزلی اۆز وئریر. بو اۆزدن سیز ده حێـزلانماغی دۆشونورسوز یوْخسا یاشام کروانـێـندان اوزاق دۆشرسیز. یاراقلانێـب حیات سوْرونلارێـیلا مجادله‌یه گئتمه‌لیسیز. بو گـۆنلر خوش بیر اوْلایێـن سئوینجینی یوْلداشلارێـزلا پایلاشا بیلرسیز. باشقالاری‌نـێـن تجربه‌لریندن فایدالانـێـن، حیاتـێـن چتین‌لیکلریندن قاچماق اوْلماز، آما نگران اوْلمایین سیزین طالعێـز اێـشیق‌دیر. فرصتلری دڲـرلندیرین، بیر گـۆن هرزاد دۆزله‌جک و سیز یاخێـندا بو سئوینجی هر کسله پایلاشاجاقسێـز.
@SancaqDergisi
/channel/Sancaq_media/8498
⭕️ هفته‌لیک فالێـنیز
✍ حاضیرلایان: #اوْلجای_مرآتی
🔶 آغلار- گـۆلر (قـوْچ، فروردین): آغێـر بیر مالی بحران ایچینده‌سیز. نظره گلیر بو دورومدان هئچ بیر قورتولوش یوْلو یوْخدور. انسان هر زمان چتین‌لیک چکه بیلر، آنجاق بیلمیرم ندن بو قدر اۆمودسوز اوْلوبسوز! اۆمودسوزلوڲـو اؤزۆزدن اوزاقلاداراق، اؤزۆزده یئنی بیر گـۆج و اراده گـؤرۆب، یئنی یوْللار ذهنیزه گتیره بیلرسیز. بو گـۆنلر کیمین مالی سێخینتی‌دا اوْلمادێـغینی دئمک اوْلار کی سیز بو قدر اؤزۆزه چتین توتوبسوز؟! بو هفته یئنیدن چالێـشمالارا باشلاماق هفته‌سی دیر آللاها توکل ائلییب، آیاغا قالخین.
🔶 گـۆلن‌آی (بۇغا، اردیبهشت): ایشیزده یارانان مانع‌لرین تکلیفی بو هفته مشخص اوْلاجاق. گئچمیشده ائتدیڲـیز آلێـش- وئریشدن یئترینجه قازانێـب، سئوینه‌جکسیز.یاخێـنلاردان بیری سیزدن اینجییب، حق سیزنن اوْلسا دا، آدام دیل یاراسی وورماز. منجه دانـێـشیب کـؤلـۆنو آلا بیلسز یاخجی اوْلار، اوْندا او دا اؤز سهوینی بیلر. بیر سؤز وئریبسیز، یا بیر نذر وارێـزدی، تئزلیکده بو عهدیزه عمل ائلیین و ائتگیسینی یاشامێـزدا گـؤرۆن.
🔶 قیزاران آی (ائکیزلر، خرداد): بیر قوْناق یا بیر کـؤرپه‌نین آیاغی سیزه دۆشرلی اوْلاجاق. بو فرصتی دڲـرلندیرین. بیر نفرین خسته‌لیڲـی سیزی چوْخ اۆزور، اوْنا دعا ائلیین آما بو قدر اؤزۆزو اینجیتمه‌یین. پیس فکرلر ده ائتمه‌یین، عؤمۆر آللاه الینده‌دی. چئورزده اوْنلارێـن اؤزلرینه گـؤره ایش- گـۆجلری وار، چوْخ دا اوْنلاردان هر گـۆن سیزدن سراغ توتماق، هر گـۆن سیزه یئتشمک انتظارێـز اوْلماسێـن. منطقلی اوْلون و بۆتون اؤنری‌لره منطق‌له جواب وئرین.
🔶 قـوْرا پیشیرن (یئنگج، تیر): گئچمیش کیمی اۆمودلو و انرژیلی اوْلماغا چالێـشین. حیاتـێـن آلچاق- اوجاسی اوْلار. آللاها توکل ائلییب، اؤز آیاقلارێـز اۆسته دورانلار، هر تـۆرلو دوروما دؤزلرلر. ائولنمک ایستیینلر بو هفته‌دن جدی اوْلاراق بو حقده دۆشونه بیلرلر. دکتر وقتی اوْلانلار اونوتماسێـنلار و درمانلارێـنی جدی توتسونلار. مالی دوروم یئرینده دڲـیل، آنجاق ایشی چتین توتماغێـن هئچ فایداسی یوْخدور. زمان هر زادی دۆزلدر دارێخمایین.
#آردێ_وار....
@SancaqDergisi
/channel/Sancaq_media/8498
⚫️ آجی خبر
🔳 دکتر «آقشێن آغکمرلی» (محمد قاسمی) مع‌الاسف دۆنیاسێـنی دڲیشدی!
سوْن خبر اساسێندا دکتر قاسمی چهارشنبه (٢٢ مهر ١۴٠۵) آذربایجان جمهوریتی «باکی» شهرینده قان تانسیوْنو (قان فشارێ) نتیجه‌سینده وفات ائتمیشدیر.
دکتر قاسمی، «آقشێن آغکمرلی» آدێ ایله ایللر بوْیو دیلیمیز، ادبیاتیمیز و مدنیتیمیز یوْلوندا چالێشمیشدی.
او، اوزون ایللر تهراندا یاشادێ و مطبی شاعرلر، یازیچێ‌لار و مدنی یوْلدا چالێشانلارین گؤرۆش مکانێـنا چئوریلمیشدی.
دکتر قاسمی سوْنرالار قوزئی آذربایجانا گئدیب، اوْردا ادبیات و مدنیت یوْلوندا چالێشاراق دیش حکیم‌لیڲی ایله ایلگیلی ایشینه داوام ائتمیشدیر.
سایێـن دکتر «آقشێن آغکمرلی»نین وفاتێـنی حؤرمتلی عائله‌سینه، قوْهوم – اقربالارێـنا و ادبیات دۆنیامێـزا باش ساغلێغی وئریرم.
ابدی یئری جنّت و مزاری اێـشیقلی اوْلسون.
*******
آقشێن آغکمرلی (محمد قاسمی) شاعر و یازێچی، میشوْو کۆلتور درنـڲی‌نین قوروجوسو، میشوْو داغێ درگیسی‌نین باش رئداکتوْرو.
١٣٣٩. هجری شمسی ایلینده گۆنئی آذربایجانێن مرند شهری‌نین ایسکمر (سفید کمر) کندینده دۆنیایا گلمیشدیر.
🔶 بیر نئچه کتابێـن مؤلیفی و ترجمه‌چیسی و کؤچۆرنی اوْلموشدور:
«دنیزدن بیر داملا» شعر و حکایه توْپلوسو
«کیربیتچی قێـز» هانس آندرسن‌دن ترجمه
«دوْندورماچێ» اوشاقلار اۆچون یازێلان حکایه
«شنگول – منگول» کؤچۆرمه
«بیزی یاشادان تاریخ – ایسکمر» تحقیقی کتاب کیمر تۆرکلری و بیر کند اۆزره آراشدیرما
«سؤیۆد آغاجی» نریمان حسن‌زاده
«۸۰ ایللیک عؤمۆر یوْلو»
دکتر آقشێن قاسمی «دیش حکیمی» ایدی و قوزئی آذربایجاندا بو حرفه ایله مشغول ایدی.
🔻 قایناق؛ @yurddash
@SancaqDergisi
/channel/Sancaq_media/8518
ٰ«#سانجاق»، سیاسی- اجتماعی مهدتمدن گۆنده‌لیگی‌نین ۲۸۶۴. سایینداکی تۆرکجه صفحه
@SancaqDergisi
🌐 https://www.instagram.com/sancaq2
🌐 https://instagram.com/asanews.ir
⭕️ هفته‌لیک فالێـنیز
✍ حاضرلایان: #اوْلجای_مرآتی
🔶قۇیرۇق دوْغان (آسلان، مرداد): اؤز باشارێـلاریزی دڲـرسیز سانمایێـن. گئریده قوْیدوغوز تجربه‌لره بیر داها دقت ائدین، اوْندا اؤزگـۆوه‌نیز چوْخالار و اؤز گۆجلریزه اینانارسێـز. یاخێـندا بیر قوْناقلێـغا دعوت اوْلوناجاقسێـز. اوْردا سئودیڲـیز بیرینی گـؤرمکدن چوْخ سئوینه‌جکسیز. بو گـؤرۆشون گلهجک اوْغورلارێـزا چوْخ ائتگیسی اوْلاجاق. بلکه همن آداملا بیر ایش اوْرتاقلێـغی یا عاطفی بیر ایلیشگی، سیزی آماجلارێـزا دوْغرو گئتمکده گۆجلندیردی و حیاتێـزی باشقا بیر مسیره سالدی.
🔶 زۇمار (باشاق، شهریور): نظملی و دۆزه‌نلی اوْلماق ایشلری راحاتلاشدێـرار. ایشلرین هامێـسینی بیرلیکده گـؤرمک یئرینه، اوْنلاری اولویت اساسێـندا دۆزه‌نله‌یین و اؤنجه اۆچ اؤنملی اولویتدن باشلایێـن. دۆز یئرلرده اقتصادی یاتێـریم ائتمکله، داها چوْخ آرامش و آسایشه چاتماق اوْلار. بو هفته‌دن اعتیباراً ایشلریز آزالاجاق و سیز داها چوْخ سئوینج‌له اوغور یوْللارێـنی طی ائده‌جکسیز. دئمک ایلین ایکینجی یارێـسی سیزه داها اوغورلو اوْلاجاق.
🔶 خزل (ترازی، مهر): اؤزۆزو یاددان چێـخارتمایین. باشقالارێـنا فکر وئرمک یاخجی‌دێـر آما اؤز نیازلارێـز داها اؤنملی‌دیر. سیزه انرژی باغێـشلایان هر بیر زادا آز دا اوْلموش اوْلسا زمان آیێـرین. یاواش- یاواش قازانجلارێـزین چوْخالماسێـنی گـؤرۆرسوز بو دا حیاتێـزین آراملاشماسێـنا سبب اوْلور. سیز چتین‌لیکلره غلبه ائتمه‌ڲـی اؤڲـره‌نیر، اوْنلاری حیاتێـزدا ایشه توتورسوز. بو اۆزدن ده، مانع‌لری بیر- بیر اوْرتادان قالدێـریب، آداق- آداق آماجلارا یاخێـن‌لاشێـرسیز. آفرین سیزه.
🔶 قیروْو (عقرب، آبان): هر بیر دڲـیشیم بیر سئچیمدن باشلانار. بعضی عادتلردن یوْرولوبسوز سا، اوْنو بیردن- بیره ترک ائتمک چتین اوْلار، کیچیک و عملی دڲـیشیملرله باشلایێـن. حیاتێـن آلچاق- اوجاسی اوْلار نگران قالمایێـن، تئرلیکده بو دوروم گئچر و سیز بیر داها آرامشه چاتارسێـز. البته بو آرامش مالی باخێـمدان قناعت، احساسی باخێـمدان دؤزوملو اوْماق و اجتماعی باخێـمدان سارسێلمازلیغا باغلێ‌دێـر. یوْخسا حالوا- حالوا دئمکله آغێـز شیرین اوْلماز.
#آردێ_وار...
@SancaqDergisi
/channel/Sancaq_media/8516
🔳 سئون انسان
✍️ شاعر: #سوسن_نواده‌رضی
📸 عکاس: #تبریزلی_اۆلکر
یئنه- قالخا اۇزون یوْللار گلمیشم
گاه آغلایێب، گاه یاشامدا گۆلموشم
من سئوگینی اینانمێشام، بیلمیشم
سئون انسان گؤزللشیر گۆن به گۆن
نیفرت ساچان اؤلۆب، دۆشور تۆن به تۆن!
@SancaqDergisi
■ 2863 مین شماره روزنامه سیاسی واجتماعی مهدتمدن در 8 صفحه به زبان‌های ترکی و فارسی روز پنجشنبه 23 مهرماه 1405
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
⭕️ قوْنشودان گلن سسلر ندیر؟
✍️ یازان: #دکتر_شایان
بیرینجی بؤلۆم
خانلێقدا گؤره‌سن نه خبردی؟ بیر بئله گل – گئت، وور – سێندیر، چئشیدلی آراجلار، قوربانلێقلار، آت اوْیناتمالار، هالای چکمه‌لر، گؤزآلێجی تدارۆکلر، قاپ‌باجا سولامالار، سۆسلنمه‌لر، بزه‌مه‌‌لر، گۆللو چیچکلی ماسالار، زێرنا قاوال چالێنمالار، هالایلار، یاللێ‌لار چکمه‌لر، فیلم یێـغمالار، شکیل چکمه‌لر، قازان آسمالار، دادلێ دوزلو قیدالار، کابابلار، کۆفته‌لر، بالێق‌لار، بریانی عطیرلی قوْخولار، آغێز سولاندێران بیشمه اییسیلر.
کند اتڲینده‌کی یئرسیز – یوواسێز، چلیمسیز، چولسوز یێغینتی، چێپیلداق، دال‌بورون، آج آوارا، اوْغرو، یالانچێ، سؤزباز کندین هر ایشینه گیرن، هر دلیڲه بورون سوْخانلار، اللریندن بیر ایش گلمه‌دن کۆزه یوْخ کی، قولپ قوْیمایالار. سوْنوندا دا ایش – ایشدن کئچندن سوْنرا، کوْر پئشمان بارا قوْیوب، آغزێ یانێق، قێوریلیب سیچان دلیڲین ساتێن آلێرلار.
کوْر قوبو، تای‌قولاق پئتی، آخساق‌قولو، چئری زئدی، سوْخولجان تاراو، آلتێ بارماق گۆموش، دوْمباگؤز قێـزقاییت، چه‌ول قالسێن، مرێق میرواری، توْخماقلی گۆللو، خانلێـق تؤره‌نینی ائشیدیب، اؤز ایچلرینده دئدی – قودولاشێرلار؛
تای‌قولاق پئتی: منجه توْی تؤره‌نی اوْلمالێ!
آخساق قولو: یوْخ ائلچیلیک حاضێرلیغی!
چئری زئدی: عاغلێـزا بانلایێم! نه توْیو؟ نه ائلچی‌لیڲی؟
آخساق قولو: به نه؟
چئری زئدی: اۇلان! دؤلتلی‌یه آللاه بالام دئییبدیر دا! هر شنلیک تؤره‌نینه، بیر ماهنا قاباغا هیتیلتمزمی؟
سوْخولجان تاراو: اۇلان! بو سن اؤله‌سن، او سن اؤللره بنزه‌ین دڲیل، منجه آغێر بیر آشێرمادیر.
آلتی بارماق گۆموش: گؤره‌سن خانلێغین وارلێغینا، یئنیدن نئچه پارا کند داها آرتێلیبدیر!
دوْمباگؤز قێـزقاییت: یوْخ ای گۆموش خالا، من بیله‌نی بیلدیرلریمه دؤلته آغێر حاصیل دریب، یئتیشدیریب، وئردیکده، وزیرلر آغانێن ال اؤپمه‌سینه گلیبلر!
چه‌ول‌قالسین: آ قێـز! من دئییرم گؤره‌سن خانێـن هانسێ کنده زیانلێغی توْخونوب، یازێق کتدی‌لری گتیریبلر آغانێن ال اؤپمه‌سینه بلکه اوْنلاری باغێشلاسین!
مرێق میرواری: دئییرم بلکه یئنی اکینجک قورغولار، شرکتلری اۆرونلرینی خانا ساتماق اۆچون، اوْنا قوْناق گلیبلر.
توْخماقلی گۆللو: آی پئتی قاغا! بیر چێخ داما، تایا اۆستونه بوْیلان گؤر نه های – کۆیدو؟
تای قولاق پئتی دێرماشیر داما، قوْناقلێغین باسا‌باسێندان، گل – گئدین چاخناشماسێندان بیر شئی آنلامایێـر، اوْردان دێرماشیر تایا اۆستونه، بیردن الی سیریلیر تپه‌سی اۆسته توللانێـر یئره، کارکاسێب – سؤزباز قوْنشولار تای‌قولاغێن تاپپێلتیسینا چؤله آغنایێرلار. چئوره‌سینی آلێرلار، آللاه اۆزونه باخێب، بیر آز بئل – بوخونو، ازیلسه ده هله‌لیک ساغ قورتارێب.
چئری زئدی: ایه! نه گؤره بیلدین؟
تای‌قولاق پئتی: یالنیز خان!
آلتێ بارماق گۆموش: ایه! نه خانێ؟ هامێمیز خانێن آنادان اوْلما رعیتی اوْلاراق، دئییرسن به خانێش‌خانی تانێمیریق؟
مرێق میرواری: خان‌دان سووای نلر گؤردۆن؟
تای‌قولاق پئتی: یالنێز خان!
آخساق قولو: ایه! بونون بئینی یئریندن اوْینایێب ای، عاغلی پوْزولوب ای، گئده خانلێقدا نلر گؤردۆن؟
تای‌قولاق پئتی: خان، خان، خان هر یانا باخێردیم خان گؤرۆردوم. دۆنیانێن خانێ بورا یێغیلیب!
چه‌ول‌قالسین: من دئییرم، پئتی‌نین کلّه‌سی لاخلایێب، سیز اینانمێرسیز.
سؤزبازلاردان بیر ایکیسی چؤل بایێرا چێخیب، نه قدر بوْیلانێرلار، بوْیلارێ قێسا اوْلماق سببیندن، آغێر یێغینجاقدان بیر شئی آنلامێرلار! یالنێز خانلێغین بۆتون چئوره‌سینده بوْی – بوخونلو ایری یئکه‌پر، قوْروجولارێن گؤرۆنمه‌سی اوْنلارێ چاشدێریر.
تای‌قولاق پئتی دئییر:
- یاردێم ائدین بیر ده چێخیم تایا باشێنا...
#آردێ_وار...
@SancaqDergisi
/channel/Sancaq_media/8509
ٰ«#سانجاق»، سیاسی- اجتماعی مهدتمدن گۆنده‌لیگی‌نین ۲۸۶۲. سایینداکی تۆرکجه صفحه
@SancaqDergisi
🌐 https://www.instagram.com/sancaq2
🌐 https://instagram.com/asanews.ir
■ 2861 مین شماره روزنامه سیاسی واجتماعی مهدتمدن در 8 صفحه به زبان‌های ترکی و فارسی روز سه‌شنبه 21 مهرماه 1405
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
⭕️ لای لای چالدێم یاتاسان
✍️ یازان: #عزیز_سلیمانی (آراز)
بیرینجی بؤلۆم
گئجه کئچیب آی، اۆستونه بولودلاردان یووْرقان چکیب. اولدوزلار کؤزه‌ریر. ائولرین چێراغی سؤنۆب، کۆچه‌یه قو وورسان، قولاق توتولار. آنجاق سانای، گؤزلری یومولورسا دا یاتمێر! یئرینده چوْیویور – چوْیویور، سوْنرا قالخێب چێراغی یاندێریب، آناسێ‌نین باشێ‌نین اۆستونه گلیر شێلتاق وئریر:
- آی آنا، آی آنا، من آجێخمیشام.
آناسێ دورور اوْتورور: «آی بالا، گئجه کئچیب! نه یئییرسن؟» - دئییر.
سانای بیر بارماغێنی دیشله‌ییب: «آنا جان، دووارێن جێریغیندا منه سۆتدو آش بیشیر!»
آناسی «آی بالا، دووارێن جێریغیندا سۆتدو آش بیشمز!» - دئییب، اوْنا باجاردێغی لای لایلاردان چالێر:
لای لای دئییم یاتاسان،
قێزیل گۆله باتاسان،
قێزیل گۆلون ایچینده،
شیرین یوخو تاپاسان...
سانای «آنا جان، لای لای منه آش اوْلار، یئیه‌رم آخی؟!» - دئییب، یئنه شێلتاق وئریر.
آناسی «جئیرانێم! سن گؤزلرینی یوم، من دوروم سنه سۆتدو آشێ بیشیریم. سوْنرا سنی اویادێم.» - دئییر.
سانای گؤزلرینی یومور. آنجاق کیپریکلری‌نین آراسێندان آتدان – آتدان باخێر.
آناسێ سۆتدو آشێ بیشیریر گتیریر. سانای بیر قاشیق ایچیب، «یوْخ! بو سۆتدو آش دووارێن جێریغیندا بیشنه اوْخشامێر؟ من بوندان یئمیرم!» - دئییر.
آناسێ یئنه «سانای»ێن بوْیون اوْخشایێـر:
بالاما قوزو قوربان،
قوْچ قوربان قوزو قوربان،
قوربان قبول اوْلماسا،
قوْی آنان اؤزۆ قوربان...
نازلایێر – نازلایێر، اؤزۆ یوخویا گئدیر. پاه‌آتاونان! سانای یئنه یاتمێر! بیرآز دا چوْیویوب، چوْبالایێب قاچێب آتاسێ‌نین قوجاغێنا گیریر. یوخولو آتاسێ‌نین او اۆزوندن اؤپۆر، بو اۆزوندن اؤپۆر. آتاسێ یوخودان اوْیانێر: «آی جانا، آی جانا» - دئییر.
سانای «آتا جان، ایستی‌له‌میشم، یوخوم آپارمێر.» - دئییر.
آتاسێ قالخێب دوروب: «نازلێ قێزیم، توْزلو قێزیم عیبی یوْخ! گل گئدک ال ایاغێنی یویوم، سرینلش یوخون آپارسێن.» - دئییر.
آتاسێ حامامێن چێراغینی یاندێراندا «سانای»ێن ایاغێنی بۆتون جؤهرلی گؤرۆر! سن دئمه سانای ال ایاغێندا ماژیک‌له رسیم چکیب، سوْنرا قارالایێب ال ایاغێ بۆتون جؤهر اوْلوب. آتاسێ «وای وای! نه ایش گؤرمۆسن قێزیم؟!» - دئییر.
سانای بیر آن دینمه‌ییب، آتاسێ ال ایاغێنی یویاندا جؤهرین بوْیاغێ سویا قاتێلیب، لۆله‌لر ایله آخێب گئدیر. سانای یئنه شیلتاق وئرسین دئیه «آی آتا، بس منیم قارا چکمه‌لریم هارا گئتدی؟!» - دئدی.
آتاسێ «نازلێ قێزیم، دوزلو قێزیم! لۆله‌لر ایله آخێب بارزێلا* گئتدی.» - دئدی.
سانای «وای وای، یئیین اوْل آتا جان! قاچ بارزێل‌دان منیم قارا چکمه‌لریمی سودان توت، تاپ گؤتۆر گتیر گل.» - دئییر.
آتاسێ یالوارێب یاخاریێر «قێزیم او سویا قارێشیب گئتدی. داها منیم اوشاقلێق زامانێـم کیمی قایێتماز! سن گؤزلرینی یوم یات، من سحر گئدیب سنه یئنی بیر چکمه بازاردان آلێب گتیررم.» - دئییر.
سانای «یوْخ کی یوْخ! سن ایسته‌ییرسن منیم قارا چکمه‌لریمی آغ دوْوشان تاپێب گئیه، من ایاق‌یالێن قالام؟!»
سانای دئدیکجه آتاسێ اوْنو نازلایێب، تومارلایێب سوْنرا آتاسێنی دا یوخو آپاردێ! آنجاق یئنه سانای یاتمادێ! سانای بیرآز دا اوْیاق قالێب، بو دؤنه گئدیب قارێ آناسێ‌نین بؤیرۆنه گیردی: «ایپک ننه‌م، خان ننه‌م! یوخوم آپارمێر جان ننه‌م»
قارێ آناسێ اوْیانێب، اۆزوندن اؤپۆب: «گل قوجوما سنی یوخلادێم.» - دئییر.
«یوْخ یوْخ! من یاتا بیلمه‌رم منه ناغێل دئنن یاتێـم.» - دئییر.
قارێ آناسێ «یاخشێ اوْندا گل سنی ناغێل‌لارین کانێـنا* آپارێم، اوْردا داها یاتارسان» - دئییب، «سانای»ێن الیندن توتوب، یان اوْتاقدا قوْجا آتاسێ‌نین یانێنا آپاردێ.
سانای: «من دئییردیم بلکه کاندا تۆلکولر، آیێ‌لار، جناورالار، دوْشانلار... قالار! سن منی قوْجا آتامێن یانێنا گتیردین خان ننه؟!» - دئدی.
قارێ آناسێ گۆلومسونوب، الینی قوْجا آتاسێ‌نین الینه وئریب، قوْجا آناسێ: «سانای»ـێ ان گیزلی کانلارا، یووالارا، مئشه‌لره آپار گزدیر گتیر، یوْرولسون یوخوسو گلسین! یوْخسا یوخوسو گلمز!» - دئییب گئدیر.
🔶 آچێقلامالار؛
بارزێل: خیاو شهرینده کند آدێ
کان: کوْل
#آرێ_گلن_سایێـدا...
@MuncuqAz
/channel/Sancaq_media/8504
«#سانجاق»، سیاسی- اجتماعی مهد تمدن گۆنده‌لیگی‌نین ۲۸۶۰. سایێنداکی تۆرکجه صفحه
«مونجوق» صفحهسی، تۆرکجه یازێب - اوْخوماغێ سئون اوشاقلار و یئنی‌یئتمه‌لریمیز اۆچون چێخیر.
@SancaqDergisi
@MuncuqAz
■ 2859 مین شماره روزنامه سیاسی واجتماعی مهدتمدن در 8 صفحه به زبان‌های ترکی و فارسی روز يكشنبه 19 مهرماه 1405
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
⭕️ شاپالاق
✍️ یازان: #دکتر_شایان
«میتیش» بۆتون چوْخ بیلمیشلیڲیندن دوْلایێ قوْرخاق، اۆزو یوْلا، دۆزه‌لیشلی، آزجانا دا احتیاطلی ایدی.
بالاجا «میتیش» گۆنده کۆچه باجا اوشاقلارێنا قوْشولوب اوْیناردێ. میتیش چرخ سۆرمکدن خئیلک سئوینجه دوْلوب، داد آلێردی، آنجاق هاردا چرخ گؤرسه‌یدی، مینه بیلمه‌سه‌یدی ده، باش – قولاغێنا بیر ال اوزالداردێ! پئدالێـنی بوراردی!
نئچه دفعه ده چرخین پئدالێن بورارکن، جولو بارماغێ چرخین زنجیر ایله دیشله‌نیب، چرخی‌نین آراسێندا سێخیلیب قالێب دریسی سوْیولاردێ. بارماغێنی چێخارتماق اۆچون گرک بیری گلیب، دال تکری قالدێرایدی بلکه بارماغێ‌نین دریسیندن سووای نارین سۆموک‌لری ده ازیلمه‌یه‌یدی.
بیر گۆن ایکیندی چاغێ چرخچی قوْنشو، «میتیش» گیله گلدی. قوْناق «میتیش»ین آتاسێ ایله اوْتوروب چایلاشێنجاق، میتیش اوْغروم – اوْغروم حیطده چرخه یاناشدێ! چرخی سۆروب، کۆچه‌یه چێخارتدی، بوْیو چاتمادان، چرخین اوْرتاسێندان بورولوب، ساغ قێچینی قیقاجی اڲیب، بیر ال فرماندا، او بیری ال ده چرخین یَهریندن برک – برک یاپێشیب، سوْل آیاغێندان دا یارارلانێب، پئدال ووروب کئفینه کئف قاتێردی.
چرخ کۆچه‌نین اۆزو آشاغا‌سێنا سارێ سۆروشوب، آخێب اوچوردو، «میتیش» چرخین گؤوده‌سینه برکدن سوواشمێش‌ایدی. نئچه دفعه یێخیلاندان سوْنرا، چرخین پئدالی اڲیلدی! بیر داش گؤتۆروب، پئدالی تاپدایێب، آزجانا دۆزلتدی. یئنه اۆزو آشاغا قاناتلاندێ.
ایکینجی کۆچه‌دن کئچدی، اۆچونجو بوروغون دیبیندن دؤندۆ. اۆزو یوخارێ سۆرمـڲه گۆجو چاتمایێردی، ایکی اللی زوْراکی چرخی سۆروب، اۆزو یوخارێ قایێدارکن، «تاخجاجێقلی»لار طایفاسێ‌نین اوشاقلارێ‌نین گؤزلری «میتیش»ـه ساتاشێنجاق، چێغیر – باغێر سالێب، اوْنو هوولایێب قاچاراق قوْمارلادیلار!
«میتیش»ین اۆره‌ڲی توْرا دۆشن قوش کیمی برکدن چرپێنیردی. او ایتدن – قورتدان «تاخجاجێقلی»لارجا قوْرخماز ایدی، جن‌باش تاخجاجێقلی‌لار اوشاقلارێنی گؤررکن، جین دمیردن اۆرکوب قاچارکن، «میتیش»ده قویروق جَله‌یه وئرمزدی. آنجاق بو دفعه قورتولماز جله‌یه دۆشوب، ایلیشمیش‌ایدی، تؤووشنه‌دن آغزێندا تۆپرجـڲی قوروموشدو...
«تاخجاجێقلی» اوتانماز یێرتیجیلاری بیر آن دایانمادان، بالاجا آولارێ‌نین جانێنا داراشێب، یێرتماغا باشلایێب، چکه – چکده‌یدیلر.
«میتیش»ین بیردن بیره دۆشونجه‌سی اوْنون جانێنی قورتاردێ.
- چؤلۆ، جینگیز، بوْزوو، جوروق! بیر آز دایانێن، قولاق آسێن! من، بو چرخی وئریم سیزه.
- هه جانێندان دوْیمایێبسان، تئز وئر قورتول.
- من، بو چرخی قوْناغێمیزدان گیزلین گتیرمیشم. یاردێم ائدین آپاراق یئرینه قوْیاق، من گئدیم قوْناغێن باشێن قاتێـم، بو دفعه سیز گلین چرخی چالێن.
«تاخجاجێقلی»لار بو سؤزدن سئوینیب آتێلیب دۆشوب، چێلدیریب چێلغینلادیلار.
هامێسی بیرلشیب، «میتیش»ـه یاردێم ائدیب، چرخی ایته‌لییه – ایته‌لییه اونلارێن بوروقلارێ‌نین باشێناجاق گتیردیلر. میتیش اۆز توتوب، اوْنلارا دئدی:
- اوشاقلار! بوروغون باشێندا گیزلنین، بیریز تکینه منیم‌له گلسین. من ائوه گیرنده چرخی قاچێرتسین.
«تاخجاجێقلی»لار چوْخلو سئویندیلر، بو آرادا «جینگیز» اؤزۆنو قوْرخماز قاچاقچێ سانێب، اوشاقلاردان آیرێلیب «میتیش»ین دالێنا دۆشدو. میتیش یئکه چرخین آغێرلیغینی دۆشونمه‌دن، اؤز قاپێلارینا چاتماقدایدی، دۆشونجه‌سی بیرده چاخدێ. باشارێلی دۆشونجه‌سینه چوْخ گۆوندی.
حرامی‌لری آلداتماقدان چوْخ سئوینجک، چرخی حیط دووارێنا دایادێ. ائوین یئرینه «جینگیز»ه سارێ قایێتدی. فاتح بیر ساواشچێ کیمی حرامینی قارشێلاییب، دوردوغو یئرده برک دایانماق اۆچون قێچلارینا گۆج آرتدێ.
- تئز اوْل! گل یاخێنلاش.
«جینگیز» سئویندی. یئیین‌لشیب «میتیش»ـه یاناشدێ. میتیش بیردن اێلدیریما چئوریلیب، برکدن چاخدێ! بۆتون گۆجونو قوْلوندان، ساغ الینه یێغیب بیر شاپالاغا چئویردی. یئریندن بورولوب، فێرلاندی فێرتینایا دؤندۆ. ال آتدێ «جینگیز»ین قولاغێ‌نین دیبینه بیر شاپالاق شاپپێلدادینجاق، «جینگیز» مازراق کیمی فێرلانیب آغزێ اۆسته یئره یێخیلدی.
بۆتون «تاخجاجێقلی»لار، «میتیش»ین اینانێلماز تایماز گۆجونو گؤرۆنجه قوْرخودان آرخا دوراغێ بوراخێب، «جینگیز»ین اؤلۆسونه ده یییه دورمادان گؤتۆرولوب قاچدێلار.
«میتیش» اینانێلماز گۆجونه، اؤزگۆونلیڲینه دایاق، ایکینجی دفعه «جینگیز»ین اۆستونه جومولونجاق، جینگیز قوْرخودان زوْرلا یئردن قالخێب قاچاراق ایلیم – ایلیم گؤزدن ایتدی.
او گۆندن سوْنرا داها یوْل‌کسنلر «میتیش»ین گیزملی اێلدیریم گۆجوندن قوْرخوب، اوْنا ساتاشانمادێلار.
#سون
@MuncuqAz
/channel/Sancaq_media/8500
ٰ«#سانجاق»، سیاسی- اجتماعی مهدتمدن گۆنده‌لیگی‌نین ۲۸۵۸. سایینداکی تۆرکجه صفحه
@SancaqDergisi
🌐 https://www.instagram.com/sancaq2
🌐 https://instagram.com/asanews.ir
⭕️ هفته‌لیک فالێـنیز
✍ حاضیرلایان: #اوْلجای_مرآتی
🔶 قۇیرۇق دوْغان (آسلان، مرداد): سیزه ساری اوزالدێـلان یاردێم الینی گـؤرمورسوز. بونو بیلمک همان، هر زاد دڲـیشیله‌جک و یاشام او بیری اۆزونو سیزه گـؤرسده‌جک. ایلیشگی‌لری اۆز لیاقتیز اساسێـندا دۆزنله‌یین، اؤزۆزه آشاغی الدن باخمایێـن، سیز ساندێـغیزدان داها لاییق داها باشارێـلی بیر کیملیڲـه مالک‌سیز. البته چئورزده اوْلان اۆره‌ک یاندێـرانلارین دا قدرینی بیلین و تانرێـدان گلن هدیه‌لرین شـۆکرونو قێـلین. ائتدیڲـیز یاخجێـلیقلاری آللاها تاپشێـرین او اۆزۆ جوابیزی وئره‌جک.
🔶 زۇمار (باشاق، شهریور): باشارێـلاریز هر کسین گـؤزۆ اؤنـۆنده دیر. لازم دڲـیل ایستییه‌سیز اوْنلاری هر کسه گـؤرسده‌سیز، بو عبث بیر چابادێـر، گـؤرمک ایستیین گـؤرر! گئچمیشدن اوْلان بیر یوْلداش گـؤرۆشوزه گلهجک بو گـؤرۆشدن چوْخ سئوینه‌جکسیز. بو هفته اوغورلارێـز چوْخ اوْلاجاق، اۆره‌ڲـیزده اوْلان آروزیا یئتیشمڲـه آز قالێـر بیرآز داها دؤزۆملو اوْلمالێـسیز. ظاهره باخێـب اوْنون اساسێـندا داورانانلارا فکر وئرمه‌یین هئچ اوْنلارلا یوْلداشلێـغین دا فایداسی یوْخدور. چوْخ دڲـیشم یاراتماغا دۆشونمه‌یین و فرصتلری دڲـرلندیرمڲـه چالێـشین.
🔶 خزل (ترازی، مهر): دۆز یئرده دورماق چتین دڲـیل، یئتر کی کـؤنلـۆزه مراجعه ائده‌سیز. زمانێـزدان یئترینجه بهره آپارێـن، دؤزۆموزو چوْخالدێـن و قرارلاری دقتله وئرین. ایلیشگیلر گـۆنو- گـۆندن یاخجێـلیغا دوْغرو گئدیر. داها دا گـؤزل گـۆنلر گئچیرتمک اۆچون بیرآز ظرافت سؤزلریزه قاتـێـن، چوْخ جدی اوْلماغێـن فایداسی یوْخدور. بیرینه چتین توتمالی اوْلاندا دا، خوش اۆزلو اوْلون. نه قدر گـۆلر اۆزلو- خوْش دانـێـشیقلی اوْلساز، بیر او قدر چئورزده‌کیلر سیزه اؤنم وئررلر. ایندی هئچ کسین قاش- قاباغا حوصله‌سی یوْخدور!
🔶 قیروْو (عقرب، آبان): اوْنون- بونون سؤزۆنه گـؤره آغزی آجێـلیق سالمایێـن. اوْتوروب فکرلشیرسیز فلان کسه نه دئییم؟ بهمان کسه نه ائلییم؟ بوراخێـن اوْنلاری اؤز یاشامێـزا فکر وئرین. یئنی بیر آداملا تانـێـشلیغیز پیس اوْلمویاجاق. اوْنون تجربه‌لریندن فایدالانـێـن. قـێـسسا بیر سفر احوال- روحیه‌زه یاخجی اوْلاجاق. عائله یا یوْلداشلێـق اوْرتامێـندا بیر کدورت اوْلاجاق، من اوْلسا م سؤزۆن اوزانماسێـنا یوْل وئرمه‌ییب، بارێـشیغا چالێـشارام. اؤره‌ک سؤزلریزی کیمسه‌یه دئمه‌یین، گـؤرۆسن آدامێـن اؤز سؤزۆندن اؤز ضررینه استفاده ائله‌دیلر.
#آردێ_وار....
@SancaqDergisi
/channel/Sancaq_media/8498
⭕️ نوبل ادبی اؤدۆلو «آن کارسون»ا وئریلدی.
✍️ حاضرلایان: #گـۆنش_امانی
🔶 سوئد آکادمی‌سی جمعه‌آخشامی ۲۰۲۶. اکتبر (۱۶ خزل- ۱۴۰۵) ۷۶ یاشێـندا کانادالی یازێـچی «آن کارسون» (Anne Carson) ۲۰۲۶. نوبل ادبی اؤدۆلونو آلان شخص تانێـتدیردی.
🔶 بو کانادالی یازێـچی یونان اسطوره‌لری، سئوگی، یوْخلوق کیمی آنلاملاردان فایدالاناراق، ادبیاتدا یئنی‌لیک یارادان بیر یازاردێـر. او گاه رمان، گاه شعر و گاه اسطوره و نمایش سبکینده یازێـر. بو ایل اوزون ایللردن سوْنرا نهایت نوبل اؤدۆلو بو یازێـچی‌یا یئتیشدی.
🔶 سوئد آکادمی‌سی بو اؤدۆلو آن کارسونا وئردیکلری‌نین آچێـقلاماسێـندا، اوْنون اثرلری‌نین کلاسیک ادبی اثرلرین سنتی ایله اوشاق‌یانا بیر دیالوْگا گئچدیڲینی و بو گـۆنون ادبیاتێـنا یئنی شکیل‌لر دۆزلتمه‌سینی وورقولادی.
اوْنون اثرلرینده ادبی بیلگی‌لر ساده‌جه آچێـقلاما حدّینده یوْخ، بلکه روایتین اۆزو اوْلور.
🔶 آن کارسون ۱۹۵۰. ۲۱ ژوئن توْرنتو دا دۆنیایا گلدی. او کلاسیک ادبیات شاعر، چئویرمن، آراشدێـران و یازێـچی‌دیر. اوْنون قدیم یونان اثرلری ایله تانێـشلیغی، اوْرتا اوْخول ایللریندن لاتین اؤڲـرتمنی‌نین یاردێمی ایله باشلاندی و بو سوْنرا کی ایللر توْرنتو بیلیم‌یوردوندا تحصیل آلماق و ۱۹۸۱ ایلینده دکترا درجه‌سینه چاتماسێـنا باشلانقێـج اوْلدو.
🔶 آن کارسون یازێـب – یاراتماقلا یاناشی، «پرینستون»، «مک‌گیل» و «میشیگان» بیلیم‌یورلارێـندا اوستادلێـق دا ائدیبدیر. کارسون‌دان چوْخلو اثرلر یایێنلانیب و بو یازێلار چوْخلو اؤدۆل‌لر اوْنا قازاندێـریب.
@SancaqDergisi
/channel/Sancaq_media/8495