-
مهد تمدن گوندهلییینین تورکجه اوشاق ادبیاتی صفحهسی
👇
⭕️بالاجا داشین آرزۇسۇ
🔷یئنییئتمهلر اۆچۆن
✍یازان: #سحر_خیاوی
آیتکین گؤزۆ لاپبادان آرخین ایچینده تر – تمیز کیچیک داشا دۆشدۆ:
- «آااای... نه گؤزل شۇمار، یۇوارلاق داشدیر بۇ، من سنی قیزیل رنگی بوْیایاجام، سنه قاش - گؤز، آغیز - بۇرۇن چکهجَم، سنی بزهیهجم، آلتۇن ساچاقلی گۆنشیم اوْلاجاقسان، سن منیم اؤز دوْستۇم، مَلَـڲیم اوْلاجاقسان.»
داشی اؤپۆب، باغرینا باسیب، اوْیۇندان وازکئچیب، ائولرینه طرف قاچدی. اوشاقلار اوْنۇن نه تاپیب، بئله سئوینجک اوْلدۇغۇنا شاشیریب قالمیشدیلار!!
قیزجیغاز بالاجا داشی چوْخ سئویردی، اوْنۇ بزهییب، ائوجیکلرینین بیری ائتمیشدی، چانتاسینا قوْیۇب اوْخولا دا آپاریردی. اوْنۇ شیرین سؤزلرله اوْخشاییردی، «سن منیم اۇغۇر داشیمسان» - دئییردی.
داش، قیزین چانتاسیندا اؤڲرتمنین، سێجاق، مهربان سسینی، اۇشاقلارین نارین گۆلۆشلرینی ائشیدیردی. قیزین باپبالاجا، توْپبۇش اللرینده اوْلاندا، ایستی - ایستی بیر شیء، ایچینده یاغ کیمی اریییردی، سئوگی مُعجزهسیندن گۆن به گۆن سانکی جانلییا چئوریلیردی!!
اوْ، ایندی چوْخ خوْشبخت بیر بالاجا داش ایدی. داها بیر آنلیق دا قیزیل اوْلماق ایستهمیردی. چۆن یاخشی آنلامیشدی: داش، ویترین آرخاسیندا اوْلسا بئله، قیزیل دڲیل، «داش»دیر! آما اؤز قدر - قیمتینی بیلسه، قیزیلدان دا «باش»دیر.
🔸آچیقلامالار؛
عادیجه: معمولی
قیاس: مقایسه
اَدیال: یۆنگۆل یوْرغان
#سون
@MuncuqAz
/channel/Sancaq_media/5994
■ 2101 مین شماره روزنامه سیاسی واجتماعی مهدتمدن در 16 صفحه به زبان های ترکی و فارسی روز دوشنبه 9 بهمن ماه 1402
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
«#سانجاق»، سیاسی- اجتماعی مهد تمدن گۆندهلیگینین ۲۱۰۱. سایێنداکێ تۆرکجه صفحه
«مۇنجۇق» صفحهسی، تۆرکجه یازێپ- اوْخۇماغێ سئون اۇشاقلار و یئنییئتمهلریمیز ایچۆن چێخێر.
@SancaqDergisi
@MuncuqAz
👇
⭕️دشمنینی اۇنۇتما
✍یازار: ییلماز گۆنئی
رسملهین: هاسلت سوْیدۇز
کؤچۆرن: #محمود_بنیآدمدیزج
- من دشمنلرین عکسینی دۇوارا یاپیشدیرمیشام، بۇنا گؤره یوْخ کی، اوْنلاری سئویرم، بلکه ایستهمیرم اۇنلاری هیچ وقت اۇنۇدۇم. چۆنکی، دشمنلرین اۇنۇدان آداملار، یوْلداشلارینین یوْلۇنۇ دا تئز اۇنۇدار. من اوْنلاری گؤزۆمۆن اؤنۆنده ساخلامیشام کی، بیر لحظه ده اوْنلار یادیمدان چیخماسینلار. سحر ایشه گئتمهمیش اوْنلارا باخیرام، اوْنلار دئییرلر: «عبداللّه! سنین تَمللی دشمنلرین بیزییک؛ اوْندا کی، گؤرۆرسن اَت باهالاشدی، اتچینین باشینا باغیرما! اوْندا کی، چؤرک باهالاشدی، چؤرکچییه حرصلنمه! حتی یوْلداشین ایله کارخانادا ساواشماغین سببی ده بیزییک!» دوْغرۇدان دا اوْغلۇم، یوْخسۇللارین بیر تیکه چؤرک اۆچۆن بیر بیرلری ایله ساواشماسینین سببی بۇنلاردی. بۇنا گؤره هیچ وقت اوْنلاری اۇنۇدما؛ اوْنلارین گؤرکملیکلرینه باخما، اوْنلارین اۆز – گؤزۆنۆن الوانلیغی سنی آلدادتماسین. اوْنلارین گۆلۆشلرینه اینانما.
اوشاق آتاسینین سؤزلرینی چوْخ یاخشی دۆشۆنمهدی، آما اوْنون دۇیغۇلاری ایله اوْینادی. اوْنۇ بیر آز فکره سالدی. اوشاغین ایچینده بیر سێرا دۆشۆنجهلر باشلاندی. اوْ سوْرۇشدۇ:
- اوْ عکس کی، اوْنون مِدال واریدی کیمدیر؟ ندن اوْیاندان قوْپاردیب، بۇیانا یاپیشدیردین؟
- اوْغلۇم! آداملارین دۆشۆنجهلری دَڲیشیلر، اوْنلار کامللَشر، من ایندیهجن بؤیله بیلیردیم، اوْ بیزیم یوْلداشدیر، آما سوْنرا بیلدیم، بؤیله دڲیل، بلکه اوْدا بیر دشمندیر. باخ!... بیز ایشچیییک. ایللر بیزه بیر سێرا سؤزلر دئییردیلر کی، فکر ائلهییردیک دوْغرۇدۇر. سوْنۇندا بیزیم ایستکلریمیز بؤیله اوْلدو، اؤزۆمۆز فکر ائلهیک. اؤزۆمۆز گرچکلری تاپاق، یئنی شیئلر اؤڲرهنک. بۇنا گؤره فکر ائلهدیک، قرار وئردیک.
اۇشاق چوْخ دقّتلی عکسلره باخیردی، اوْ سوْرۇشدۇ:
- آتا!... بۇ آدام نه ایش گؤرۆبدۆر کی، بیر بئله مِدال آلیب؟!...
سوْن
@MuncuqAz
/channel/Sancaq_media/5986
⭕️Tiq tiq xanimin nağili
⭕️Kiçik dinozorun nağili🦕🦖
⭕️تیق تیق خانیمین ناغیلی
⭕️کیچیک دایناسوْرۇن ناغیلی
🔷ناغێللار! اۇشاقلار و یئنییئتمهلر ایچۆن! (آذربایجان تۆرکجهسینده جیزگی فیلملر)
@MuncuqAz
/channel/Sancaq_media/5983
⭕️قۇلاغی قێسا دوْشان
✍يازان: #حسين_فتاحی
تۆرکجهیه چئويرن: #ارسطو_مجرد
🔷«قصههای كوچك برای بچّههای كوچك» کتابیندان قێسا بیر حکایه
گۆنلرين بير گۆنۆنده، بير مئشهده باشقا دوْشانلاردان سئچيلن بير مهربان دوْشان واريدی. بۆتۆن دوْشانلارين قۇلاقلاری اۇزۇن اوْلۇر، آنجاق مهربان دوْشانين قۇلاقلاری قێسا ايدی. اوْ ايستهييردی باشقا دوْشانلار كيمی اوْنۇن دا اۇزۇن قۇلاقلاری اوْلسۇن، آنجاق اوْلمۇردۇ.
اوْنۇن قۇلاقلاری اوّلدن قێسا ايدی. بۇنا باخمیياراق مئشهنين بۆتۆن حيوانلاری، مهربان دوْشانی سئويرديلر. نهيه گؤره؟ اوْنا گؤره كی، اوْ مهربان ايدی. هر كيم ياردێم ايستهييردی، اوْ تئز ايشه باشلاييب، اوْنا ياردێم ائديردی. آنجاق بۆتۆن حيوانلارين ايچينده يالنێز قوْجا تۆلكۆ، دوْشانين دشمنی ایدی و اوْنۇ قێساقۇلاق دييهرك چاغيريردی.
قوْجا تۆلكۆ نئچه دفعه نقشه چكهرك مهربان دوْشانی ائوينه چاغيريب، قاپينی دالدان باغلاييب، اوْنۇ يئمك ايستهدی. آنجاق مهربان دوْشان، تۆلكۆنۆن سؤزلرينه اينانماييب، اوْنۇن ائوينه گئتميردی.
آرادان چوْخ زامان كئچندن سوْنرا، قوْجا تۆلكۆ بير باشقا نقشه چكدی. گۆنلرين بير گۆنۆ، قوْجا تۆلكۆ اؤز – اؤزۆنه دئدی: «بئله اوْلماز! من جيققيلی دوْشانا اۇدۇزمامالييام. نئجه اوْلۇرسا اوْلسۇن اوْنۇ تۇتۇب گؤز قيرپيميندا اۇداجاغام. ايندی اوْنا گؤسترَرم.»
تۆلكۆ اوْتۇردۇ، دۆشۆندۆ و باشقا پيلانا باشلادی. تۆلكۆ ائويندن ائشيڲه چيخدی. يوْل گئده – گئده آه چكيب، اؤسكۆرۆب، آسقيريردی. اوْ بۇ ايشلری ائله گؤرۆردۆ هامی ائله بيلسين اوْ مریضدير. سوْنرا ائوه قاييديب، يئرينی ساليب ياتدی. بيری ائوینين قارشيسيندان كئچن كيمی تۆلكۆ اۇجادان زاريييردی. داها هامی اينانميشدی قوْجا تۆلكۆ دوْغرۇدان مریضدير.
بير گۆن، تۆلكۆنۆن قوْنشۇسۇ توْسباغا، اوْنون ائوينه گئديب حالينی سوْرۇشماق ايستهدی. توْسباغا بير آز تۆلكۆنۆن يانيندا اوْتۇرۇب، حالينی سوْرۇشۇب اوْنۇنلا دانيشدی. دۇرۇب ائوينه گئتمك ايستهينده قوْجا تۆلكۆ دئدی:
- آی قوْنشۇ! منيم حاليمی گۆنۆمۆ گؤرۆرسن. قوْجالميشام. مریض و چارهسيزجه يوْرقان - دؤشَڲه دۆشمۆشم. زحمت اوْلماسا اوْ مهربان دوْشانا دئه گلسين منه بير آز ياردێم ائلهسين.»
توْسباغانين اۆرڲی تۆلكۆيه يامان ياندێ. ائويندن چيخدی، مئشهده گزيشيب مهربان دوْشانی تاپيب، قوْجا تۆلكۆنۆن سؤزۆنۆ اوْنا چاتديردی.
مهربان دوْشان اؤزۆ ايله دانيشدی: «قوْجا تۆلكۆ منی هميشه اذيت ائلهييب. اوْ دشمندی، آنجاق ايندی مریضديرسه، اوْنا ياردێم ائلهييب، ايشلرينی گؤرمهلیيَم. آنجاق اڲر يئنه ده نقشه چكمیش اوْلسا، گرك اوْنون سؤزلرينه آلدانمييام.»
هۇشلۇ دوْشان بير يوْل تاپماق اۆچۆن فكرلشدی. اوْ، قوْجا تۆلكۆنۆن مریضلیڲینين يالان يا دوْغرۇ اوْلدۇغۇنۇ اؤڲرنمهلی ايدی. اوْنا گؤره ده دريندن فكرلشيب، بير يوْل تاپدی.
هۇشلۇ دوْشان تۆلكۆنۆن ائوينه دوْغرۇ يوْلا دۆشدۆ. آنجاق ائوه ياخينلاشان كيمی ياواشجا باشينی پنجرهدن ايچهرييه سالدێ. قوْجا تۆلكۆ، ساغ سلامت ياتاغێندا اوْتۇرمۇشدۇ.
هۇشلۇ دوْشان اؤزۆنه دئدی: «هه، اوْندا يئنه منی آلداتماق ايستهييرمیش! آی حُقّهباز يئنه نقشهن واريميش!»
بيردن بيره قوْجا تۆلكۆنۆن گؤزۆ دوْشانا دۆشدۆ. تۆلكۆ تئز سێچرايێب، پنجرهنی اؤرتۆب دوْشانی تۇتماق ايستهدی. آنجاق هۇشلۇ دوْشان تۆلكۆنۆن نقشهسينی دۇيۇب، تئز باشينی ائشيڲه چيخاردی. پنجره سرعتله اؤرتۆلدۆ. آنجاق دوْشانين قۇلاقلاری پنجرهنين آراسيندا قالدی. يازيق دوْشان تۆلكۆنۆن ائوینين پنجرهسینين داليندان ساللاق قالاراق داها قاچا بيلمهدی. دوْشان ال – آياق چاليردی و اللريله پنجرهنی دارتاراق قوْلاقلارينی پنجره آراسيندان چيخارماق ايستهييردی. اوْنۇن قۇلاقلاری دارتيليب اۇزۇنلاشيردی. دوْشانين سس – كۆيۆ ايله باشقا حيوانلاردا گليب، تۆلكۆنۆن ائوینين قاباغينا توْپلاشديلار. داها هامی تۆلكۆنۆن يالان دانيشماسينی و مریض اوْلماديغينی بيلميشدی. بئلهليكله اوْنلار دوْشانا ياردێم ائتديلر پنجرهنی آچيب، دوْشانين قۇلاقلارينی قۇرتارديلار. آنجاق هامی حيرانليقلا دوْشانين قۇلاقلارینين اۇزۇنلاشديغينی گؤردۆلر. اوْنۇن قۇلاقلاری اوْ بيری دوْشانلارين قۇلاغيندان دا آرتيق اۇزانميشدی. مهربان دوْشان چوْخ سئوينيردی، اوْ آرتيق آرزۇسۇنا چاتميشدی.
قوْجا تۆلكۆ اۇتانديغيندان اۇزۇن زامان ائويندن ائشيڲه چيخمادی. اوْ داها هۇشلۇ دوْشانی اله سالا بيلمير، اوْنو قێساقۇلاق چاغيرا بيلميردی.
@MuncuqAz
/channel/Sancaq_media/5977
⭕️آذربایجاندا رایج اوْلان اوشاق ادبیاتیندان بیر نمونه
✍یازان: #محمدعلی_اوجاقی
شفاهی ادبیاتیمیزین مهم بیر حصّهسی ده اوشاق ادبیاتیدیر.
اوشاق ادبیاتی چوْخ گۆجلۆ و قوْل – قانادلی اوْلسا دا تأسفلر اوْلسون کی، اوْلدوغو کیمی اهمیت وئریلمهییبدیر.
تخمیناً ۳۰ ایل بۇندان قاباق قیش گئجهلرینین بیرینده، اۆستۆنه نیمداشت بیر پالاز اؤرتۆلمۆش کۆرسۆ توْوۇندا بیر قوْجا آنادان ائشیتدیگیم اوشاق ادبیاتیندان حکمتلی بیر ناغیلی قۇللۇغۇنۇزا چاتدیرماق ایستردیم.
بیر قاری ننه قیش فصلینده دانانێ سۇوارماق اۆچۆن کندین قیراغیندا اوْلان بۇلاغا آپاریر. یوْلدا قاری ننهنین آیاغی سۆرۆشۆب ییخیلیر. اوْ بۇزا اۆز تۇتۇب دئییر:
آی بۇز سن نه گۆجلۆسن؟
بۇز: گۆجلۆ اوْلسایدیم گۆنشین ایستیسی منی اریتمزدی.
قاری ننه: آی گۆنش سن نه گۆجلۆسن؟
گۆنش: گۆجلۆ اوْلسایدیم یوْلۇمۇ بۇلۇد آلمازدی.
قاری ننه: آی بۇلۇد سن نه گۆجلۆسن؟
بۇلۇد: گۆجلۆ اوْلسایدیم مندن یاغیش یاغمازدی.
قاری ننه: آی یاغیش سن نه گۆجلۆسن؟
یاغیش: گۆجلۆ اوْلسایدیم اوْت مندن بیتمزدی.
قاری ننه: آی اوْت سن نه گۆجلۆسن؟
اوْت: گۆجلۆ اوْلسایدیم قوْیۇن منی یئمزدی.
قاری ننه: آی قوْیۇن سن نه گۆجلۆسن؟
قوْیۇن: گۆجلۆ اوْلسایدیم چوْبان منی کسمزدی.
قاری ننه: آی چوْبان سن نه گۆجلۆسن؟
چوْبان: گۆجلۆ اوْلسایدیم سیچان چؤرڲیمی یئمزدی.
قاری ننه: آی سیچان سن نه گۆجلۆسن؟
سیچان: گۆجلۆ اوْلسایدیم پیشیک منی یئمزدی.
قاری ننه: آی پیشیک سن نه گۆجلۆسن؟
پیشیک:
گۆجلۆیم آی گۆجلۆیم
دمیر داراق دیشلییم
تندیر اۆستۆ قیشلاغیم
یۆکۆن اۆستۆ یایلاغیم
قادین هر نه پیشیرسه
اوْ دا منیم بۇغ یاغیم!
@MuncuqAz
/channel/Sancaq_media/5971
«#سانجاق»، سیاسی- اجتماعی مهد تمدن گۆندهلیگینین ۲۰۹۶. سایێنداکێ تۆرکجه صفحه
«مۇنجۇق» صفحهسی، تۆرکجه یازێپ- اوْخۇماغێ سئون اۇشاقلار و یئنییئتمهلریمیز ایچۆن چێخێر.
@SancaqDergisi
@MuncuqAz
⭕️سئرچه
✍یازان: #رسول_قدیری
🎤سسلندیرین: #نیره_اردلانی
@nayyereh_ardalani
@MuncuqAz
⭕️ال
✍شاعر: #نورالدین_مقدم (آیدین دومان)
بیرجه بؤیۆک سالوْندا
وار ایدی بیر ییغینجاق
چیخیش ائدهجکدیلر
قاش، گؤز، بۇرۇن، دیل، دوْداق
کیپریک، آیاق، باش، بوْغاز
اۆرک، دامار، قۇلاق، دیش
هره ایستیردی دئسین
مهمدۆر گؤردۆڲۆ ایش
دیش دئدی: چئینهییرم
آغیز دئدی: یئییرم
گؤز سؤیلهدی: گؤرۆرم
دوْداق دئدی: دئییرم
آیاق گئتمکدن دئدی
دیل ایسه دادماغیندان
بۇرۇن نفسدن دئدی
بوْغازسا اۇدماغیندان
اۆرک جانین دیرَڲی
باش، باشقان اوْلماسیندان
دامار بدن یۇردۇنۇن
بۆتۆنۆن آلماسیندان
ال هر بیر دانیشانا
میکروْفوْنۇ یئتیردی
یازانا قلم وئریب
سۇسۇزا سۇ یئتیردی
آرادا میوه سوْیدۇ
اوْنۇ وئردی آغیزا
هردن ده یادداشت یازدی
میز اۆسته کی کاغیذا
عینَـڲی گؤزه قوْیدۇ
آلیندان تری سیلدی...
اؤزۆ دانیشماسادا
هُنرین هامی بیلدی
@MuncuqAz
/channel/Sancaq_media/5963
⭕️اوشاقلیق خاطرهلری
✍شاعر: #عزتی_آتشبیگ
رسمی چکن: #علی_میری
اۇشاقلیق گۆنلرین یادی
قالیبدی آغزیمدا دادی
واللّه دادلیدی هرزادی
هم گۆلۆشۆ آغلاماغی
دوْلانماغی اوْیناماغی
دئدیم گئدیم اۇشاقلیغا
هئچ اوْلماسا بیرآزلیغا
توْپراقلیغا هم داشلیغا
بَلییَم من بیر اۆزینی
دئیم اۆرکدن سؤزینی
چاغیریم بیر تای تۇشلاری
محبّتلی یوْلداشلاری
قوْوالییاق بیر قۇشلاری
کۆچهلرده بیر هاپپێلاق
دام باجالاردا های سالاق
ییغیشاق بیر جَمه قۇراق
نه اوْینۇیاق اوْینامییاق
یا کۆچهلرده دوْلاناق
گؤرک بیز بیر گلیب گئدن
جوْراب توْخۇیان یۇن دیدَن
قاهقاه گۆلۆش چَپیک چالاق
یوْلداشلاری شوقا سالاق
یاناقدان بیر اؤپۆش آلآق
ایندی نئجه یاددان چیخیب
ائویمیزی کینه ییخیب
یا باشلییاق بیر اوْیناماق
کۆچهلرده آتاق شێللاق
اوّلده قوْوالا قاشماق
من قاچیم اوْ قوْوالاسین
اوشاقلیغۇز یوْرۇلماسین
دئیم سیزه اوْیناماقدان
گۆلۆشلردن گۆل دوْداقدان
اوشاقلیقدان آل یاناقدان
نه توْز، نه توْپراق بیلردیک
اَیاقیالین کِیف ائلهردیک
چیلینگآغاج اوْینایاردیق
گیزلینپالانچ گؤز یۇماردیق
اۇتۇزاندا دا تۇماردیق
گلن دفعه گرک اۇتاق
بَره باشیندا بیز دۇراق
اوْینایاردیق بیز گی گالا
قۇشۇم واردی بۇ خاراتانا
دیمدیڲی قدی اۇزانا
تئز دئسهیدی آدین هرکیم
اوْلاردی هامییا حکیم
اوْینایاردیق قوْناق باجی
قوْناق گلردی کیم باجی
خالا، عمه ده باش تاجی
من اوْلاردیم عمی، دایی
پایلاناردی کؤکه پایی
نه اوْلارمی آخشام باشی
بیرآز اوْلا اوْماج آشی
من ده ییغام یار یوْلداشی
اوْینایاق بیر قوْناق باجی
گئتسین کؤنۆللردن آجی
اوشاقلیغین دیل داماغی
قوْناق باجی اوْیناماغی
کۆچهمیزده ناهارچاغی
دۆشدی یادا ایندی گنه
خاطره اوْلدۇلار منه
اَزّلی ده اوْینایاردیق
اوْن نفرجه صف دۇراردیق
بئللریندن هاپپیلاردیق
گؤڲده قۇشتک بیز اۇچاردیق
هایلا سالیب هی قاچاردیق
پیشیک مَعَیلاغی دئمه
اوْینایاردیق گۆله گۆله
کِیف ائلهردیک هئچ زاد ایله
ویراردیق بیز معَیلاغی
داملاردا بیز آخشامچاغی
توْولا دۇدی اوْینایاردیق
جێزێق ایچینده دۇراردیق
قَییشینن بَرک وۇراردیق
قییش یئری آغرییاردی
دردَن چوْخۇ آغلییاردی
دؤرت آشیغی چالدیم دیزه
دئدیم گلر توْخان بیزه
جیکی بوْکی گلر سیزه
من اۇتارام شاد اوْلارام
اۇتدۇغۇمدان دا پایلارام
دنیا چوْخ اوْیناتدی بیزی
قوْیمادی بیر گؤرک سیزی
چوْلاق ائتدی قوْلۇ دیزی
دئدی دای اوْیناماق بسدی
اؤلۆم یئلی بیزه اَسدی
@MuncuqAz
/channel/Sancaq_media/5957
.
⭕️قشنگ خوْرۇز
✍کؤچۆرۆب، سسلندیرن: #شبنم_توحیدی
@MuncuqAz
⭕️قشنگ خوْرۇز
✍کؤچۆرن: #شبنم_توحیدی
بیرینجی بؤلۆم
بيری وار ايدی، بيری يوْخ ايدی. گئچميش زمانلاردا ايکی اۇزاق قوْهۇم وار ايدی. بۇنلارین بيری يوْخسۇل ايدی. اؤزۆ ده مئشهده، بالاجا بير داخمادا یاشایێردێ.
اوْ بيری دولتلی ايدی، شهرده قشنگ، بؤيۆك بير ائوده ياشايێردێ.
گۆنلرين بير گۆنۆ يوْخسۇل، مئشه ايله گئديردی، بيردن آغاجێن آلتێندا پارێلدايان قێزێل بير لَلَک گؤردۆ. باشێنێ قالدێرێب يۇخارێ باخدێ، گؤردۆ، آغاجدا قۇيرۇغۇ قێزێل بير خوْرۇز اوْتۇرۇب. يوْخسۇل قێزێل لَلَـڲی گؤتۆرۆب، بيرباش شهره، دولتلی قوْهۇمۇنۇن يانێنا گتيردی. دولتلی قێزێل لَلَـڲه باخێب، دئدی:
- گؤزل شیءدير! آنجاق دڲری چوْخ آزدێر. من سنه بۇ لَلَک اۆچۆن بيرجه مانات گۆمۆش پول وئررم.
يوْخسۇل ايسه عُمرۆنده قێزێل گؤرمهميشدی، اوْنا گؤره ده بيلميردی، بۇ لَلَک خالص قێزێلداندێر. اوْ ائیله بيليردی، بۇ نه ايسه قشنگ پارێلدايان بير شیءدير. اوْنا گؤره ده اوْ ائیله بيلدی کی، اوْنۇن قێزێل لَلَـڲی اۆچۆن گۆمۆش پۇل ياخشێ قيمتدير. يوْخسۇل کيشی اوْ بيری گۆن گینه ده مئشهيه گئتدی. همين آغاجێن آلتێندان گینه ده قێزێل لَلَک تاپدێ. اوْنۇ گؤتۆرۆب دولتلینين يانێنا آپاردێ. گینه ده عوضينده گۆمۆش پول آلدێ. بير نئچه گۆن دالبادال بو احوالات بؤیله باش وئردی. بير دفعه ده يوْخسۇل هميشهکی کيمی آغاجێن آلتێنا گلدی. گؤردۆ کی، قێزێل قۇيرۇقلۇ خوْرۇز برکدن بانلايێر:
- کيم منيم اۆرڲيمی يئسه، اوْ آدام هر گۆن یاستێغێنێن آلتێندان ايکی قێزێل يۇمۇرتا تاپاجاق! کيم منيم اۆرڲيمی يئسه، اوْ هر گۆن یاستێغێنێن آلتێندان ايکی قێزێل يۇمۇرتا تاپاجاق!
يوْخسۇل بو ايشه لاپ معطل قالدێ! تئز شهره قاچێب، احوالاتی دولتلی و آجگؤز قوْهۇمۇنا دانێشدێ. اوْ ايسه جوابێندا دئدی:
- اڲر سن اوْ خوْرۇزۇ منيم اۆچۆن تۇتا بيلسن، سنه اوْنۇن اۆچۆن مين گۆمۆش پۇل وئررم!
يوْخسۇل اوْنۇنلا بؤیله شرط کسدی:
- سنين پۇلۇن منه لازم دڲيل! ياخشێسێ بۇدور، منيم ايکی اوْغلۇمۇ اؤز يانێنا آپارێب، اوْنلارا اؤز اۇشاقلارێن کيمی باخ. من ايستيرم، اوْنلار عقللی و سوادلێ اوْلسونلار.
دولتلی اوْ ساعت سؤز وئردی کی، يوْخسۇلۇن اۇشاقلارێنێ يانێنا آپارار و اوْنلارێ اوْخوماغا قوْيار. بۇنۇن عوضينده ده يوْخسۇل کيشی دولتلييه سؤز وئردی کی، قێزێل قۇيرۇقلۇ خوْرۇزۇ اوْنون اۆچۆن تۇتسۇن. يوْخسۇل سحر تئزدن مئشهيه، همين آغاجێن آلتێنا گلدی.
قشنگ خوْرۇز دينمهدن يۇخارێدان اوْنا باخێردێ. يوْخسول نشان آلێب، اوْخلا قێزێل قۇيرۇقلۇ خوْرۇزۇ وۇردۇ. يوْخسۇل کيشی خوْرۇزۇ گؤتۆرۆب، اوْغلانلارێنا وئردی. اوْنلاری شهره، دولتلی قوْهۇمۇنۇن يانێنا گؤندردی. دولتلی، قێزێل قۇيرۇقلۇ خوْرۇزۇ گؤرۆب، سئوينجيندن آتێلێب دۆشدۆ. اوْ اؤزۆ خوْرۇزۇن قێزێل لَلکلرينی بير بير يوْلدۇ، سوْنرا اوْنو يوْخسولۇن اوْغلانلارێنا وئردی کی، خوْرۇزۇ بيشيريب ناهارا اوْنا وئرسينلر. اوْ اؤزلۆڲۆنده بؤیله قرارا گلميشدی، يوْخسۇلۇن اوْغلانلارێنێ درسه گؤندرميیهجك! قوْی |وْنون يانێندا قالێب نؤکرچيليک ائیلهسينلر!
اوْغلانلار مطبخه (آشپزخانه) گئچيب، خوْرۇزۇ بيشيرمَڲه باشلادێلار. اوْنلار چالێشێردێلار، خؤرک دادلێ اوْلسون، دولتلی قوْهۇملارێ راضی قالسێن. آنجاق بختلری گتيرمهدی! خوْرۇز بيشيب لاپ حاضر اوْلانا ياخێن، اتين سۇيۇ بيردن قازاندا پێققاپێق قاينادێ، خوْرۇزۇن اۆرڲی سێچرايێب، بيرباش دؤشمهنين اۆستۆنه دۆشدۆ!
وای!! بو نه بلادێر باشێمێزا گلدی؟! - دیيه بؤيۆک قارداش ديللهندی. ايندی گرک خوْرۇزۇن اۆرڲينی تۇللاياق. بير باخ ها! لاپ چيرکلی دؤشمهنين اۆستۆنه دۆشۆب! ايندی اوْنو گؤتۆرۆب آغزێمێزا وۇرا بيلمريك...
#آردی_وار...
@MuncuqAz
/channel/Sancaq_media/5948
«#سانجاق»، سیاسی- اجتماعی مهد تمدن گۆندهلیگینین ۲۰۹۰. سایێنداکێ تۆرکجه صفحه
«مۇنجۇق» صفحهسی، تۆرکجه یازێپ- اوْخۇماغێ سئون اۇشاقلار و یئنییئتمهلریمیز ایچۆن چێخێر.
@SancaqDergisi
@MuncuqAz
⭕️سئرچه...
✍یازان: #رسول_قدیری
اۆچۆنجۆ بؤلۆم
اوْ گئدندن سوْنرا بۆلبۆل یئنه یالنیز قالیب دؤزۆمسۆزلۆکله سئرچهنین بیر داها گلیشینی گؤزلهدی. اوْنۇن گؤزلهمَڲی اۇزۇن سۆرمهدی. سئرچه گلیب یئنه پنجرهنین هِرهسینده اوْتۇرۇب سلام وئردی. سوْنرا آرتیردی:
- گؤزل، گؤیچک سارێ بۆلبۆل
دۆنن بیر آز دۆشۆندۆنمۆ؟
سؤزلریمی دۆشۆنرکن
اَسارتدن اۆشۆندۆنمۆ؟
بۆلبۆل جواب وئردی:
- منی یامان درده سالدین
منه چیخیش یوْلۇن گؤستر
قراریمی اَلدن آلدین
منه اۇچۇش یوْلۇن گؤستر...
سئرچه باخدی کی، سارێ بۆلبۆل ذهنی اسارتدن قۇرتۇلۇب، آزادلیق یوْلۇ آختاریر. اوْ بوْینۇنا بؤیۆک بیر سوْرۇملۇلۇق دۆشدۆڲۆنۆ دۇیدۇ . بیر آز فیکرلشیب دئدی:
- بالیقلاردان ائشیتمیشم
قاراجیق بیر بالیق وارمیش
خیردا آرخدا یاشاییرمیش
آنجاق آرخین هارالارا چاتدیغینی-
گئدیب گؤرمک ایستهییرمیش
باشقا بالیقلارا آرخین
دۇستاغیندان دانیشیرمیش
ایریبدن اوْلماسا دا
آرخ ایچینده داریخیرمیش
دوْستلارینی گئتمک اۆچۆن آلقیشلیرمیش
آنجاق اوْنلار، یوْلا دۆشمکدن قوْرخۇمۇش
خیردا بالیق قوْرخماز ایدی
قوْرخاقلاری دانلاییردی
یوْلداشلارا اؤڲۆد وئریب
اوْنلارا بؤیله دئییردی:
«یوْلا دۆشمکدیر چتینی
سوْنرا قوْرخۇ تؤکۆلهجک»
کیمسه اوْنا اینانمادی
بیر گۆن اوْنلاردان آیریلدی
سحر – سحر یوْلا دۆشدۆ
دایانمادان اۆزدۆ، اۆزدۆ
گئتدی، گئتدی چایا چاتدی
چای ایله آرخ آراسیندا
شلالهیه یئتیشمیشدی
دوْستلاریێله ساغوْللاشدی
اۆرَڲینه اۆرک وئریب
شلالهدن آشاغییا اؤزۆن آتدی
جۇمۇب درینلییه باتدی
هاندان – هانا اؤزۆن تاپیب، گؤله طرف یوْلا دۆشدۆ
یوْل اۇزۇنۇ حیوانلارین بیر نئچهسی
اوْنا سارێ یۆگۆردۆلر
بعضیسی ده یاردیم ائتدی
گئدیب دنیزه چاتینجا
نئچه حیوانلا دانیشدی
گۆوَندیڲی حیوانلاردان
قارشیداکی خطرلردن
چتینلیکلردن سوْرۇشدۇ
هفتهلرله چایدا اۆزدۆ
چایی گؤل ایله دَڲیشدی
یئنه اۆزدۆ
سوْنۇندا اوْ نهایتسیز
بیر دنیزه یئتیشمیشدی...
بۆلبۆل بۆتۆن بۇنلارا قۇلاق آسیب دئدی:
بالیق کیمدیر، دنیز نهدیر؟
مگر من بیر بالیقمییام؟!
باجارسانسا بیر یوْل گؤستر
بو قفسده داریخمایام...
سئرچه گۆلۆمسۆنۆب آرتیردی:
طوطیلردن ائشیتمیشم
أسکیلرده
شهرلرین بیریسینده
بیر بَزیرگان یاشاییرمیش
انسانلارین دیلین بیلن طوطیسینی
قیزیل رنگلی قفسینده ساخلاییرمیش
بیر گۆن تاجر قرار وئریر آلوئر اۆچۆن هندۇستانا سفر ائتسین
الیآچیق اوْلدۇغۇچۆن،
غُلاملاری، کنیزلری دانیشدیریر
نه ارمغان ایستهییرسیز؟
هامیسینی سوْرۇشدۇرۇر...
هره بیر شیء تاپشیرمیشدی
سوْنرا تاجر قفسدهکی طوطیسینه اۆز تۇتمۇشدۇ
طوطیدن ده ایستهڲینی سوْرۇشمۇشدۇ
طوطی اوْنا بو سؤزلری دانیشمیشدی:
- «هندۇستانا گئدیرسنسه
آغاجداکی طوطیلرله بیر گۆن گؤرۆش
قفسدهکی حیاتیمدان
سیخینتیمدان
نوْلۇر اوْ قۇشلارلا دانیش
اوْنلارا دئه:
- روادێرمێ سیز آغاجدا
طبیعتده اۇچۇشارکن
اوْینایارکن
سوْیداشینیز
قفسدهکی یوْلداشینیز
حیاتینی سیخینتیدا وئره باشا؟-
باشقا آرزۇم یوْخدۇر سندن
تکجه منه اوْ قۇشلاردان
بو دارلیقدان بیر قۇرتۇلۇش یوْلۇ سوْرۇش»-...
ائرتهسی گۆن، تاجر دۇرۇب یوْلا دۆشدۆ
بیر آی سوْنرا هندۇستانا یئتیشمیشدی
غُلاملارین، کنیزلرین
هدیهسینی آلیب، یۆکه یۆکلهمیشدی
قاییدارکن طوطیسینین ایستهڲینی خاطیرلادی
یوْل اۆستۆنده بیر آغاجدا
طوطیلرین دستهسینه گؤزۆ دۆشدۆ
آتین سۆرۆب اوْ قۇشلارا یاخینلاشدی
سلام وئردی...
طوطیسینین احوالینی نئجه طوطی سؤیلهمیشدی
بیان ائتدی.
#آردی_گلن_ساییدا...
@MuncuqAz
/channel/Sancaq_media/5944
⭕️بالاجا داشین آرزۇسۇ
🔷یئنییئتمهلر اۆچۆن
✍یازان: #سحر_خیاوی
باغلارا آخان، دۇرۇ سۇلۇ آرخین ایچینده، آناسی ایله یاشایان کیچیک داش، هر دفعه قیزیللارین ویترینینه باخدیقجا اۆرڲی قان اوْلۇردۇ. آناسینا قارغاشا وئریردی:
- آی آنا! من ده بیر گؤزل - گؤیچک، شۇمار، یۇوارلاق داشام، آخی اوْ قیزیللاردان منیم نهییم اسکیکدیر؟! اوْنلار زَر - پۆلک ایچینده، ویترینده، ایشیقلی نئون لامپالارین آلتیندادیرلار، گلن - گئدن اوْنلارا حسرتله باخیر، من ایسه گئجه - گۆندۆز، بۇ آرخدا سۇلار تاپداغییام، یوْخسا تپیکلر آلتینا دۆشۆرم!! بو نئجه یاشامدیر؟! منی نهدن داش دُنیایه گتیردین آنا؟!
آنا داشین، بۇ همیشهکی تکرار سؤزلردن باغری قارالیردی. آما بالاسینا اۆرک وئرمکدن باشقا، چارهسی یوْخ ایدی:
- «منیم بالام! هر کسین بیر یارانیشی وار، اوْنلار باهالی داشدیلار. اوْنلار قیزیلدیلار، بیز ایسه عادیجه* داشیق. البته قیزیل اوْلماق دا، بو آسانلیقدا دڲیل، اوْنلار ایستی - سوْیۇق گؤرۆب، اذیّت چکیب، بئله اۆرک آپاران، گؤز قاماشدیران اوْلوبلار. بیز ده اوْ قَدَر قدر - قیمتسیز دَڲیلیک، یئری دۆشَنده البته سئویلیب، کارا گلهریک. سن اؤز داشلیغیندا قدر - قیمتینی بیل، اؤزۆنۆ قیزیللارلا قیاس* ائدیب، اؤز باغرینی قان ائدیرسن، منی ده داریخدیریب، حیاتدان بئزدیریرسن. البته هر کس مُمکن اوْلان آرزۇلارینین آرخاسینجا قاچمالیدیر، آما ممکن اوْلمایان آرزۇ، شخصین اۆرَڲینی قارانلیق ائدر و یاشامینین لذّتینی آنماقدان ساخلایار. بئله مُمکنسیز آرزۇلارلا یاشامینی زَهَرلَمه قادان آلیم!!»
آما کیچیک داشین بو سؤزلر قۇلاغینا گیرمیردی کی گیرمیردی! سانکی قۇلاغیندا آری ویزیلداییردی.
«نهدن یارادان منی ده قیزیللارین طالعینده یاراتماییب؟!» - دئییردی.
ایکی آیاغینی بیر باشماغا قیسنامیشدی کی، من ده گرک قیزیللارلا ویترینه قوْیۇلام!
آناسی ناچار اۆزۆنه اۆز باغلاییب، قوْنشۇ زَرگره، کیچیک داشین ماجراسینی، اۆرک آرزۇسۇنۇ دئدی. اوْنۇن بیر نئچه گۆن ویترینه قوْیۇلماسینی خواهش ائلهدی. زرگر قوْنشۇلاری دئدی:
- «اوْنون کؤنلۆ بۇنۇنلا خوْش اوْلاجاقسا، سوْرۇنۇ یوْخ، اوْنو بیر نئجه گۆن ویترینه قوْیارام. آما باشقا بیر حادثه باشینا گلسه، اؤز بوْینۇزادیر!!»
آنا داش، زرگردن بو لطفۇ اۆچۆن تشکّر ائدیب، ساغوْللاشیب، آرخ ائولرینه دؤندۆ.
کیچیک داشین اَل - اۆزۆنۆ بیر داها تَر - تمیز یۇدۇ. اۆستۆ - باشینی تمیزلهدی. آخێ اوْ صاباح قیزیللارلا بیرڲه ویترینه قوْیۇلاجاقدی!!
نهایت کیچیک داش آرزۇسۇنا یئتیشدی. زرگر قوْنشۇ اوْنو قیزیللارین یانیندا ویترینده اَڲلشدیردی.
کیچیک داش بیر اؤزۆنه، بیر ده قیزیللارا باخدی. اوْنلارلا قیاسدا، زر - پۆلک ایچینده، ایشیقلی لامپالار آلتیندا دا، گؤزل گؤرۆنمۆردۆ!!
قیزیللار لامپالار آلتیندا پار - پار پاریلداییب، گؤز قاماشدیریردیلار، بۇنۇنسا رنگی تۇتقۇن ایدی، پاریلدامیردی، کؤنۆل اوْخشامیردی.
هله اوْندان علاوه مُشتریلر اوْنۇ بارماقلا بیربیرینه گؤستریب، گۆلۆشۆردۆلر:
- اوْ داش بۇرادا نه ایش گؤرۆر گؤرهسن؟! مثلاً فکر ائدیر کی، قیزیلدیر؟!
کیچیک داشین بو آتماجا سؤزلردن اۆرڲی داها قان اوْلۇردۇ. کئفی پوْزۇلۇردۇ، گۆنۆ آغلار کئچیردی.
آناسی دا آرخدا اوْنسۇز داریخیردی. اۆچۆنجۆ گۆن بالاسیندان خبر تۇتماق اۆچۆن گلدی. کیچیک داش اۆرکلهنیب، هؤنکۆرتۆ ایله آغلاییب:
- «من داها بۇرادا قالمیرام، منی ده اؤزۆنله آپار، من ویترینه قوْیۇلماقدان پشیمانام!» - دئدی.
آناسی نهیین نه اوْلدۇغۇنۇ سَزدی. بالاسینی باغرینا باسیب، زرگرخانانین بؤیرۆندهکی آرخ ائولرینه دؤندۆلر. بالاسی اۆچۆن آجیسا دا، اوْنون حقیقتی درک ائتدیڲینه سئویندی.
صاباحیسی گۆن، اۇشاقلار آرخین قیراغینداکی پیاده یوْلۇدا، یئره اَدیال* سالیب، ائوجیک قۇرمۇشدۇلار. بیردن پنجره اوْیۇنۇ کؤنۆللرینه دۆشدۆ.
بیری حیطلریندن بیر پارا گچ گتیریب، پیاده یوْلۇندا تئز نئچه پنجره چکدی. باشقالاری اوْیۇن اۆچۆن یاستی داش آختاریردیلار.
آردینی اوْخۇیۇن 👇
@MuncuqAz
/channel/Sancaq_media/5994
«#سانجاق»، سیاسی- اجتماعی مهد تمدن گۆندهلیگینین ۲۱۰۱. سایێنداکێ تۆرکجه صفحه
«مۇنجۇق» صفحهسی، تۆرکجه یازێپ- اوْخۇماغێ سئون اۇشاقلار و یئنییئتمهلریمیز ایچۆن چێخێر.
@SancaqDergisi
@MuncuqAz
⭕️اؤردک
✍#نعمت_مسگری
اؤردک ده هیچ اۇچانماز
اوْ هیچ یئیین قاچانماز
اؤردک بتر لێغ سئور
لێغ اوْلماسا، زێغ سئور
اؤردڲین وار قانادێ
قۇشلۇقدا وار تک آد
دریسی تئیخا یاغدیر
آلا، قارا یا آغدیر
یئلَکلری قشنگدیر
اۆزمکده چوْخ زرنگدیر
اؤردک دیلَر سۇلۇ گؤل
اوْ نئیلهییر قۇرۇ چؤل؟
گؤلده گؤرسن بیر اؤردک
اوْنا تئز وئر سن چؤرک
اؤردک سۇیا هیچ باتماز
سۇ فکرین باشدان آتماز
سۇسۇز قوْیما اؤردڲی
اوْندا سێنار اورڲی
یئدیرت، اؤردک اوْلسۇن توْخ
اینجیتمه، سئو اوْنۇ چوْخ
@MuncuqAz
/channel/Sancaq_media/5990
⭕️دشمنینی اۇنۇتما
✍یازار: ییلماز گۆنئی
رسملهین: هاسلت سوْیدۇز
کؤچۆرن: #محمود_بنیآدمدیزج
اۇشاق چوْخ دقّتلی آتاسینا باخیردی. آتا عکسی دۇواردان ائندیریب، چالیشیردی بیردن اوْ عکس پارالانماسین. عکسده بیر کؤک کیشی گؤرۆنۆردۆ. اوْ کیشینین اۆزۆ اَتلی، گؤزلرینین آلتی شیشیک، ساللانمیش گؤرۆشۆردۆ. اوْنۇن دؤشۆنده چوْخلی تاخێنمالار (زیورآلات) وار ایدی. بۇ عکس بیر قزئتهدن کسیلمیشدی. آتا یئنیدن اوْنون دالیسینا بیر آز یاپیشقان یاخدی، سانکی دۇوارا یاپیشدیردی. بو دۇواردا چوْخلۇ عکسلر گؤرۆنۆردۆ. بیر یاندا بؤیۆک ددهسینین عکسی، عمیلری، آتاسینین عکسی کی، اوْنلاری ایشچیلر بۇراخیمیندا گؤستریردی. بیر سێرا عکسلر ده وار ایدی چوْخلۇ آداملاری گؤستریردی کی، اوْنلار بؤیۆک توْپلۇم دا یوْل گئدیردیلر.
دۇوارین اوْبیری طرفینده ده تانینمیش آداملار، جمهورباشقانی (رئیسجمهور)، آکتیوْرلار (بازیگرلر)، سیاسی گروهلارین رهبرلری گؤرۆنۆردۆ. اۇشاق کی، بۇنلارین بیر سێراسێنێ قزئتلر، تلویزیوْندا گؤرمۆشدۆ، اوْنلاری تانیییردی. اوْ بیر گۆلۆشلۆ کیشینی گؤستریب دئدی:
- آتا! بۇ کارتِر دڲیلمی؟
آتا دۇوارین اوْ یانیندان تزه قوْپارتدیغی عکسی، «کارتِر»ین عکسینین یانینا چوْخ سلیقهلی یاپیشدیرماسی، اۇشاغین دقّتینی چکمیشدی! بۇ عکس بیر کیشینی گؤرستریردی کی، اوْنون چیڲینلرینده بیر سێرا نِشان وار ایدی و اوْ بیر الینی اۆزۆ یۇخاری ساخلامیشدی.
اۇشاق سوْرۇشدۇ:
- بۇ کیشی کیمدیر؟ اوْ نِشان ندیر؟
آتا دئدی:
- اوْغلوم! بو آدامی یاخشی تانی! بۇ آدام میلیوْنلارجا انسانی یالان یئره اؤلۆمه وئریبدیر. بۇنۇن آدی «هیتلر»دی. اوْنۇن چیڲینلرینده اوْلان نِشان بیر سینیق صلیبدیر. اوْ نازیلرین نِشانیدیر.
- بۇ ایتلِر بیر بیری ایله نه سببلری واردیر؟
- ایتلِر یوْخ اوْغلۇم! هیتلِر!... هیتلِر!...
- هیتلِر نهچیدیر؟
- هیتلر و هامی اوْنۇن کیمی دۆشۆنن آداملار، بیزیم، بۆتۆن انسانلارین دشمنلریدیر.
اۇشاق تعجّبلۆ سوْرۇشدۇ:
- ایندی کی، اوْ بیزیم، بۆتۆن دنیا آداملارینین دشمنیدیر! ندن اوْنون عکسینی دۇوارا وۇرۇسان کی، گۆنده اوْنو گؤرهسن؟
آتا دئدی:
ـ باخ اوْغلۇم! دۇوارداکی عکسلر، اوْنلارین آشاغاسینداکی یازیلارا دقّتلی اوْل! بۇیانداکیلار، سنین بؤیۆک آتان، عمیلرین، ایشچی یوْلداشلاریمیزدیلار اعتصاب ائلهییبلر، اؤز حقلرینی آلماق اۆچۆن. بۇنلار بیزیم اؤڲرنجی قارداشلاریمیزدیلار، بۇدا بیزیم انقلابی شهید قارداشیمیزدیر. داها بو عکسده آفریقا خلقینی گؤستریر کی، آیاغا قالخیبلار، اؤز یانمیش، داغیلمیش حقلرینی آلماق اۆچۆن! بۇنلار هامیسی بیزیم یوْلداشلاریمیزدیلار، فرق ائیلهمز هارالی اوْلسۇنلار، کیم اوْلسۇنلار.
آما اوْبیر دۇواردا نهلر گؤرۆرسن؟ اوْردا تانینمیش آداملار، آبیرسیز آداملار، بیر سێرا اؤلکهلرین باشقا آداملاری، سیاسی آداملاری. بۇدا هیتلِرین عکسیدیر. بۇنلاردا اؤلکهلرین پاراسینین عکسیدیر.
اوشاق سوْرۇشدۇ:
- بۇنلار هامیسی بیزیم دشمنلریمیزدیلر؟
- اوْغلۇم! بۇنلاری کی، گؤرۆرسن، بیزیم قانیمیزی ایچیرلر، بیر خلق شاعردی دییر: «مین قیچلی حیوانلار..!»، «اوْنلار»، «زهرلی ایلاندیلار..!» ....
- بس اوْندا بۇنلارین عکسی ندن بیزیم دۇوارلاردادیر؟ اوْنلاری پارالا، یاندیر. قوْی بیرجه یوْلداشلاریمیزین عکسی قالسین دۇوارلاردا.
آردینی اوْخۇیۇن 👇
@MuncuqAz
/channel/Sancaq_media/5986
⭕️بیرلیکده گۆلهلیم اۇشاقلار!
🔷فعلی صرف ائلمک
معلم: اۇشاقلار! «من گئدیرم، سن گئدیرسن، اوْ گئدیر...» دییهنده، هانسی زمان اوْلۇر؟
شاگرد: اوْ زمان اوْلۇر کی، زنگ وۇرۇلۇب، ناظِم ده دۇرۇب قاپی قاباغیندا!
🔷انشا
معلّم شاگردلردن ایستهدی فوتبال یاریشماسینا (مسابقه) گؤره انشا یازسینلار.
هامی باشلادی انشا یازماغا، بیر نفردن سوْوای! معلّم اوْندان سوْرۇشدۇ:
- بس سن نیه یازمیرسان؟
شاگرد دئدی:
- یازمیشام!
معلّم اوْنۇن دفترینی آلیب باخدی. اوْ یازمیشدی:
«هاوانین یاغیشلیق اوْلدۇغۇنا گؤره فوتبال مسابقهسی اوْلمایاجاق!»
🔷آی
معلّم شاگرددن سوْرۇشار:
- نیه هر آیێن سوْنۇندا آی گیزلهنر؟ بیلیرسنمی هارا گئدر؟
شاگرد دییر:
- آقا حتماً گئدر آیلیغینی آلسێن!
🔷جمله دۆزلتمک
معلّم:
- علی، محمد و حسین ایله بیر جمله دۆزلت.
شاگرد:
- علی، حسین ایله پارکا گئتدیلر.
معلّم:
- بس محمد نوْلدۇ؟!
شاگرد:
- محمد یۇخۇیا قالدێ، گلمهدێ!
@MuncuqAz
/channel/Sancaq_media/5980
⭕️قێش ماهنێسێ
✍شاعر: #علی_دلپاک
سارێ پاییز گئتدی، آپپاغ قێش گلدی
سارێ قۇش یئرینه، آپپاغ قۇش گلدی
خزل آیی قێروْو آیی، آذرله
آرخادا قالدیلار، کؤچدۆلر بئله
آغ آپپاغ قار یاغدێ، آغاردێ داغلار
کۆچهلر، شهرلر، تپهلر باغلار
ال اله کرتنکله، کرتنکله
گلین دۆزلدک، قارلاردان گۆلله
اوْینایاق قارتوْپۇ، شن گۆله گۆله
قار توْپۇ قایێراق، قار توْپۇلاشاق
تۇشلایاق آتێشاق، شیرین وۇرۇشاق
سوْنرا دا قاردان، بیر آدام قایێراق
آدامی قوْرۇیاق، دالێندا دۇراق
قوْیمایاق آدامین، قلبین قێرالار
آدامسێز گؤرهلر، اوْنۇ وۇرالار
آلاق دکانلاردان، بوْل شیرین بادام
بیز اوْلاق آدامسیز، آداما آدام
سئوهجن کؤمکچی، آنلاقلێ آدام
آنلاقسیز، قانماز، پیس آداما قادام
🔹بعضی کلمهلرین فارسجا معناسی:
آپپاغ: بسیار سفید
آنلاقسیز: بیشعور
قانماز: نَفهم
گۆلله: گلۇله
قار توْپۇ: گلۇلهی برف
@MuncuqAz
/channel/Sancaq_media/5973
■ 2096 مین شماره روزنامه سیاسی واجتماعی مهدتمدن در 16 صفحه به زبان های ترکی و فارسی روز دوشنبه 2 بهمن ماه 1402
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
«#سانجاق»، سیاسی- اجتماعی مهد تمدن گۆندهلیگینین ۲۰۹۶. سایێنداکێ تۆرکجه صفحه
«مۇنجۇق» صفحهسی، تۆرکجه یازێپ- اوْخۇماغێ سئون اۇشاقلار و یئنییئتمهلریمیز ایچۆن چێخێر.
@SancaqDergisi
@MuncuqAz
⭕️سئرچه...
✍یازان: #رسول_قدیری
دؤردۆنجۆ بؤلۆم
ماجرایا قۇلاق آسان طوطیلردن بیری آنجاق
حکایهنی ائشیدرکن
تیترهیهرک هۇشدان گئدیب یئره دۆشدۆ
اوْ آن تاجر دئدیڲیندن پشیمان اوْلدۇ
چوْخ اۆزۆلدۆ
«بلکه یئره دۆشن طوطی
قفسدهکی طوطیم ایله قوْهۇمۇمۇش» دۆشۆنۆردۆ
داها بیر ایش قالمامیشدی
اۆزۆنتۆیله یوْلا دۆشۆب قاییدیردی
یئنه بیر آی داها کئچدی
اۇزۇن سفر سوْنا چاتدی
اوْ ائوینه قاییتمیشدی...
غُلاملارین، کنیزلرین هدیهسینی
بیرر - بیرر آییراراق تسلیم ائتدی
سیرا طوطییه چاتینجا
طوطی تاجری گؤرۆنجه سلام وئردی
سوْنرا سوْردۇ:
«یاخشی أرباب!
سوْرۇشدۇنمۇ یوْلداشلاردان دۇرۇمۇما چیخیش یوْلۇ؟»...
تاجر اوْلۇب – بیتنلرین هامیسینی بیان ائتدی
بیر آن گؤردۆ قفس ایچره طوطی قۇشۇ
تیترهیهرک شاپپێلتێیلا اوْتۇردۇغۇ دایرهوی مفتیلیندن
یئره دۆشۆب جانی چیخدی
تاجر یئنه غمه باتدی
اوْلانلاری سؤیلهمَڲه پشیمان اوْلدۇ
کؤنلۆ دوْلدۇ
ایکی طوطی حیاتینا قییدیغینا ،
دایانمادان کندیسینی دانلایاراق قارغیش ائتدی
اۆزۆنتۆلۆ بیر حال ایله
قیزیل رنگلی قفسینین قیفلین آچدی
أل اۇزادیب ترپنمهین طوطیسینی تئز چیخارتدی
طوطی بیر گؤز قیرپیمیندا قیوریلاراق اۇچۇب گئتدی ...
ایندی منیم گؤزل دوْستۇم، ساری بۆلبۆل
اوْ بازرگان طوطیسینی
انسانلارین دانیشدیغی سؤزلرینی یامسیلاماق نهدنی ایله قفسینده ساخلامیشدی
سنه باخیب دۆشۆنۆنجه اوْ حکایه
منیم اۆچۆن چوْخ تانیشدی
اوْ قیز سنین جهجهینه
قانادینین گؤز اوْخشایان بوْیاسینا وۇرۇلمۇشدۇر
باخ بو ایکی اؤزللیڲی
اۆزَریندن اۇزاقلاتماق قۇرتۇلۇشدۇر
هئچ اۇنۇتما بیز ده بۆتۆن یوْلداشلارلا
هر گۆن سیزین پنجرهنین هِرهسینده
بۇندان بئله یاردیم اۆچۆن دایاناریق..
سؤز قۇرتارینجا هر ایکی قۇش سۇسدۇلار. یئنه ناهار اؤینهسی، قیزین قاییدیش چاغی گلیب چاتمیشدی. قیز اوْتاغین قاپیسینی آچیب ایچری گیردی؛ آنجاق اؤتن گۆنۆن عکسینه، سئرچه اۇچۇب گئتمهدن، هِرهنین اۆستۆنده اوْ تای – بۇ تایا آتیلاراق جۆککۆلدهییردی. سارێ بۆلبۆل آما داها هوْپ تۇتۇب دایانمیشدی. قیزین ماراغی های-هارای سالان سئرچهیه طرف یؤنلیب اوْنۇ دانیشدیرماغا باشلادی. قاییدیب چانتاسینی ماسانین اۆستۆنه قوْیاندان سوْنرا، بۆلبۆلۆن دارێسێندان بیر اوْوۇج گؤتۆرۆب هِرهنین اۆستۆنه تؤکدۆ...
اوْ گۆندن سارێ بۆلبۆل لال اوْلدۇ. داها ائو اهلیندن کیمسه اوْنۇن سسینی ائشیتمهدی؛ یئییب ایچمهڲینی دایاندیردی. دیمدیڲی ایله اۇچۇشۇنا گرکلی اوْلمایان لَلکلرینی یوْلۇب قفسین تکینه تؤکدۆ. بو دَڲیشیملری گؤرن قیز، مسألهنی آتاسی ایله آرادا قوْیدۇ. آتاسی بۆلبۆل ساتان دکانچیلاردان چاره یوْلۇ سوْرۇشدۇ. اوْنلار - قفسین میلهلرینین آراسینا بیر – ایکی دنه قند تیکهسی یئرلشدیر؛ بۆلبۆل اوْنلاری دادینجا سسی آچیلار- دئدیلر. آنجاق اوْنۇن دا بیر یاراری اوْلمادی. نئچه گۆن بو دۇرۇم یاشاندی. بو نئچه گۆنۆن ایچینده، سئرچه داها پنجرهنین هِرهسینه تکباشینا گلمیردی؛ بیر سوْرۇ سئرچه همیشه اوْرادا حاضر دایانیب، سارێ بۆلبۆلۆ دایانماق اۆچۆن آلقیشلاییردیلار. نئچه گۆندن سوْنرا سارێ بۆلبۆل هم جاندان دۆشمۆشدۆ، هم ده قیزین گؤزۆندن. بیر گۆن، آخشامچاغی قیز بۆلبۆلۆن قفسینین قارشیسیندا دۇردۇغۇ چاغ، بۆلبۆل تیترهمَڲه باشلاییب دایرهوی میلهنین اۆستۆندن قفسین تکینه دۆشدۆ. پنجرهنین هِرهسینده حاضر دایانان سئرچهلر قیشقیریشماغا باشلادیلار. قیز چیغیراراق آتاسینی چاغیردی. آتاسی گلیب قفسین قاپیسینی آچیب بۆلبۆلۆ ائشیڲه چیخارتدی. سارێ بۆلبۆل اوْ آنی دَڲرلندیریب قالان گۆجۆنۆ توْپلایاراق بیر گؤز قیرپیمیندا اۇچۇب پنجرهنین هِرهسینهدک اؤزۆنۆ چاتدیردی. سئرچهلر یۇبانمادان بۆلبۆلۆن یاریمجان قانادلارینی دیمدیکلرینه آلیب، اوْرادان اۇزاقلاشدیردیلار. سوْنۇندا سارێ بۆلبۆل بۇنجا آجی چکندن سوْنرا، آزادلیغینا قوْوۇشمۇشدۇ. قیز آغلاماغا باشلادی؛ آتاسی اوْنۇ اوْوۇداراق دئدی:
- آغلاما قیزیم؛ اوْ قۇش داها وئجدن دۆشمۆشدۆ؛ نه گؤزللیڲی قالمیشدی نه ده اوْخۇیۇردۇ. صاباح بیر باشقا گؤزل بۆلبۆل آلیب سنه گتیرهجَڲم...
🔸آچیقلامالار؛
اۆزۆنتۆ: ناراحتی، اۆزۆلمک کؤکۆندن. اۆزگۆن: ناراحت، پریشان
دۇرۇم: وضعیت، حالت
اوْلۇب - بیتن: وقایع اتفاق افتاده، ماوقع
قییماق: راضی شدن، روا داشتن، باعث شدن
کَندی: (آنادوْلۇ تۆرکجهسیندن آلینمیش کلمه) خود
مولانا جلالالدین رومینین «بزیرگان و طوطی قوشو» اؤیکۆسۆ
یؤنلمک: جهتگیری کردن، رو برگرداندن.
وئج: اعتنا، توجه
#سون
@MuncuqAz
/channel/Sancaq_media/5967
⭕️ Əhməd və Məleykə-nin nağılı/
Səsli nağıllar
⭕️احمد و مَـلِیکهنین ناغێلی/ سسلی ناغێللار
🔷ناغێللار! اۇشاقلار و یئنییئتمهلر ایچۆن! (آذربایجان تۆرکجهسینده جیزگی فیلملر)
@MuncuqAz
/channel/Sancaq_media/5960
⭕️داریخیرام
✍#الهه_ابراهیمیفرد
شێر - شێر، شێر - شێر آخیرام
ماوی گؤڲه باخیرام
هر ایکیمیز بیر رنگده
گؤی اۆچۆن داریخیرام
سسیم شَنلیک هاواسی
قۇلاقلارین شفاسی
سۇیۇم باغلار صفاسی
کؤی اۆچۆن داریخیرام
هم دایازام، هم درین
نغمهسییَم سحرین
همیشه سۇیۇم سَرین
توْی اۆچۆن داریخیرام
باغلار منیمله آباد
تارلالار، مئشهلر شاد
منسیز حیاتدا برباد
خوْی اۆچۆن داریخیرام
گزیرم شاعیرانه
دؤنۆرم ماهیرانه
منسیز اوْلار ویرانه
بوْی اۆچۆن داریخیرام
حزین - حزین آخیرام
طبیعته باخیرام
داشی - داشا چاخیرام
سوْی اۆچۆن داریخیرام
@MuncuqAz
/channel/Sancaq_media/5954
👇
⭕️قشنگ خوْرۇز
✍کؤچۆرن: #شبنم_توحیدی
بیرینجی بؤلۆمۆن دوامی
کيچيك قارداش ايسه يالواردێ:
- خوْرۇزۇن اۆرڲینی تۇللاما! من سحردن هیچ بير شیء يئمهميشم. ياخشێسێ بۇدۇر کی، گَل اوْنو گؤتۆرۆب يۇياق، اؤزۆمۆز يیيَک.
قارداشلار بؤیله ده ائیلهدیلر. خوْرۇزۇن اۆرڲينی يۇيۇب، ايکی يئره بؤلدۆلر. هره بير پارچاسێنێ يئدی. سوْنرا دا بيشميش خوْرۇزۇ دولتلی قوْهۇملارێنێن يانێنا آپاردێلار.
دولتلی، اوْ ساعت باشلادێ بوْشقابێن ايچينی قۇردالاماغا کی، خوْرۇزۇن اۆرڲينی تاپسێن. آختاردێ، آختاردێ، خوْرۇزۇن هامێسێنێ يئدی! آنجاق اۆرڲی هیچ يئرده تاپمادێ. اوْندا دولتلی، اۆزۆنۆ قارداشلارا تۇتۇب، سوْروشدو:
- خوْرۇزۇن اۆرڲی هانێ؟ اوْنو نئيلهميسينيز؟
قارداشلار بۇ وقت احوالاتێ اوْلدۇغۇ کيمی اوْنا دانێشدێلار. تاماحکار دولتلی اوْنلارێن اليندن ائیله حرصلندی کی، آغاجێ گؤتۆرۆب اوْنلارێن ايکيسينی ده ائودن قوْودۇ.
قارداشلار آغلايا آغلايا مئشهيه، اؤز يوْخسۇل، بالاجا کۆمهلرينه قايێتدێلار. اوْنلار هیچ باشا دۆشه بيلميرديلر، بير خوْرۇزۇن اۆرڲی ندير کی، اوْنون اۆستۆنده دولتلی بو قدر حرصلنيب اوْنلارێ ائويندن قوْودۇ. گئجه گئچدی، سحر قارداشلار هرهسی اؤز یاستێغێنێن آلتێندان بير قێزێل يۇمۇرتا تاپدێ. اوْنلار قێزێل يۇمۇرتالارێ دا گؤتۆرۆب آتالارێنێن يانێنا گئتديلر و باشلارێنا گلنی اوْنا دانێشدێلار. آتاسێ اوْنلارا دئدی:
- منيم اوْ دولتلی قوْهۇمۇمدان اۆرڲيم برک اينجيدی! سيزی ائويندن قوْودۇغۇ اۆچۆن من بو پارێلدايان يۇمۇرتالارێ هرکس اوْلسا ساتارام، تکجه اوْنا يوْخ!
ائله بو وقت ياخێنلێقدان بير تاجر گئچيردی. يوْخسۇل کيشی يۇمۇرتالارێ گؤتۆرۆب، اوْنون يانێنا گئتدی. تاجر دئدی:
- آآآآ..! بۇ يۇمۇرتالار کی، خالص قێزێلدێر! من بۇ قێزێل يۇمۇرتالارا گؤره سنه ياخشێ پول وئررم.
تاجر بۇنۇ دئييب، يوْخسۇلۇن اتڲينه اوْ قدر پۇل تؤکدۆ کی، اوْ هیچ عُمرۆنده بو قدر پۇل گؤرمهميشدی. يوْخسول کيشی آنجاق ايندی باشا دۆشدۆ، دولتلی قوْهۇمۇ اوْنو هميشه آلدادێرمێش، قێزێل لَلک اۆچۆن اوْنا گۆمۆش پۇل وئريردی!
عيبی يوْخدۇر! - دیيه يوْخسول اؤز – اؤزۆنه دۆشۆندۆ. - بيزلرده بير مثل وار، دیيرلر کی، «باشقاسێنێ آلدادان، اؤزۆ ده آلدانار!»
ائیله بئله ده اوْلدو. اوْ گۆندن بری قارداشلار هر گۆن اؤز یاستێقلارێنێن آلتێندان هرهسی بير دنه قێزێل يۇمۇرتا تاپێردێلار. آتاسێ بو قێزێل يۇمۇرتالارێ ياخشێ قيمته ساتێردێ. اوْنلار ايندی لاپ ياخشێ دوْلانێردێلار. آنجاق ان مهم اوْلان، قارداشلار اؤز آرزۇلارێنا چاتمێشدێلار؛ ايندی اوْنلارێن ايکيسی ده علم اؤڲرنيردی و چوْخلو شیء ده اؤڲرنه بيلميشديلر.
#سون
(چهارشنبه ۲۲ دی ۱۴۰۱ – خیاو شهری)
@MuncuqAz
/channel/Sancaq_media/5950
■ 2090 مین شماره روزنامه سیاسی واجتماعی مهدتمدن در 16 صفحه به زبان های ترکی و فارسی روز دوشنبه 25 دیماه 1402
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
«#سانجاق»، سیاسی- اجتماعی مهد تمدن گۆندهلیگینین ۲۰۹۰. سایێنداکێ تۆرکجه صفحه
«مۇنجۇق» صفحهسی، تۆرکجه یازێپ- اوْخۇماغێ سئون اۇشاقلار و یئنییئتمهلریمیز ایچۆن چێخێر.
@SancaqDergisi
@MuncuqAz
⭕️آذربایجان فوْلکلوْرۇندان بیر منظوم حکایه
🔷سارساق ایت
✍شاعر: #علی_دلپاک
بیرگۆن بیر تۆلکۆ، گؤردۆ بیر ایتین
آغزیندا یاغلی، بیر سۆمۆک واردیر
ایستهییر تۆلکۆ، سۆمۆڲۆ آلسین
هاوا سوْیۇخدۇر، بۆتۆن یئر قاردیر
دئییر:«ایت قارداش! بیر ایت قۇیۇدا
سنین بابانی، یامانلاییردی!»
ایتین آغزیندا، سۆمۆک گئدیرلر
تۆلکۆ بیر کَلَک، سهمانلاییردی
ایت سۆمۆڲۆنۆ، قوْیۇر قێراغا
باخیر قۇیۇیا، عکسینی گؤرۆر
ائله بیلیر اوْ، بیر آیری ایتدیر
قۇیۇداکینا، هاپ هاپ هاپ هۆرۆر
بۇ ایت هۆردۆکجه، قۇیۇداکی دا
ائلهجه هۆرۆر، آجیخلانیر ایت
تۆلکۆیه دئییر: ساخلا سۆمۆڲۆ!
آتیلیر ایتی، ائلهسین شیلکۆت
قۇیۇدا هیچ ایت، تاپانمیر یازیق
کلَڲی بیلیر، هِی وَنگیللهییر
یاغلی سۆمۆڲۆ، تۆلکۆ تک یئییر
قۇیۇدا آخماق ایت زینگیللهییر
(اؤزۆن تانیماق گرکلی ایشدیر
بئلهدیر اؤزۆن تانیمایان کس
سارساق ایت کیمی اؤزۆنۆ قاپار
اؤز جَمدڲینه اوْلار بیر کرکس
یالان کیملیڲه یانداش چیخاندا
الیندهکینی الیندن وئرَر
اؤزۆنۆ تانیماز، آخماق ایت کیمی
اؤزۆنۆ گۆزگۆده، اؤزگهسی گؤرر
اؤزگه قازدیغی بیر، دۆشر قۇیۇیا
کیملیڲێ تالانار، دؤنر آیێیا)
🔸بعضی کلمهلرین فارسجا معنالارێ؛
سارساق: احمق - شیل
کۆت: لَت و پار
گرکلی: واجب
یانداش: طرفدار
@MuncuqAz
/channel/Sancaq_media/5942