Telegram-канал reda_allah - رضا الله غايتي.: Unsorted

رضا الله غايتي.

17 May 2026 22:37

لو اتقال لك إن قدامك ١٠ أيام بس تغيّر فيهم مجرى حياتك بالكامل، هتعمل إيه؟

الأيام دي هي اللي ربنا أقسم بيها في القرآن، والعبادة فيها أحب إليه من أي وقت تاني في السنة كلها.

عشان ما تدخلش الأيام دي وتخرج منها بنفس النسخة القديمة، دي الخطة الذهبية لـ ١٠ أيام هيقلبوا حياتك إن شاء الله:

١- الصلوات الخمس في وقتها:
مع تثبيت ٥ دقائق بعد كل فرض لأذكار ما بعد الصلاة.

٢- ١٢ ركعة سُنّة راتبة:
(٢ قبل الفجر، ٤ قبل الظهر و٢ بعده، ٢ بعد المغرب، ٢ بعد العشاء).
يُبنى لك بيهم قصر في الجنة يوميًا، فحافظ عليهم.

٣- صلاة الضحى:
صلاة الأوابين.. بتبدأ بعد الشروق بربع ساعة تقريبًا لحد قبل الظهر بربع ساعة.
(أقلها ركعتين وإنت وهمتك).

٤- أذكار الصباح والمساء:
حصنك اليومي الثابت.
(أذكار الصباح بعد الفجر، وأذكار المساء بعد العصر).

٥- القيام والوتر:
لو الهمة عالية خليها في الثلث الأخير من الليل، ولو خايف تنام صلّيها بعد العشاء مباشرة زي التراويح.
(من ٣ لـ ١١ ركعة)، ويا ريت تسيب ركعتين تخليهم في آخر ساعة قبل الفجر.

٦- الصدقة اليومية:
تصدّق بما يليق بك وبيقينك، وافتكر دايمًا إنك أنت اللي محتاج أجرها وثوابها أكتر من الفقير.

٧- حجة وعمرة كاملة.. كل يوم!
للرجال:
صلِّ الفجر في المسجد، واقعد في مكانك اذكر الله واقرأ قرآن لحد بعد الشروق بربع ساعة، وصلِّ ركعتين.
للنساء:
صلِّي الفجر في أول الوقت في مُصلّاكِ بالبيت، وافضلي في مكانك قولي أذكارك واقرئي قرآن لحد بعد الشروق بربع ساعة، وصلِّي ركعتين.. وليكِ نفس الأجر إن شاء الله، ربنا كريم.

٨- ورد القرآن:
لأصحاب الهمم:
ختمة كاملة في العشر.
(بواقع ٣ أجزاء يوميًا).
للمبتدئين وأصحاب المشاغل:
مش أقل من جزء كل يوم.
(يعني تقرأ ١٠ أجزاء في العشر).

٩- الذكر المقيد والمطلق:
لسانك ما يقفش ويفضل شغال، وخصوصًا التكبير طول العشر:
(الله أكبر الله أكبر الله أكبر، لا إله إلا الله، الله أكبر الله أكبر ولله الحمد)
ومعاك كمان الباقيات الصالحات.

١٠- الصيام:
صيام الـ ٩ أيام كلها.
(تنبيه: لو في أيام قضاء من رمضان وعاوزه تصوميها، صومي بنية القضاء فقط، ولو عاوزه تقدّمي التطوع وتؤجلي القضاء فلا مانع، والأجر واسع والتطوع وقته ممتد).

١١- ساعات الإجابة السحرية:
ركّز جدًا في الساعة اللي قبل الفجر، والنصف ساعة اللي قبل المغرب وإنت صايم.

١٢- يوم عرفة (المعركة الكبرى):
صيام يكفّر ذنوب سنتين، فضّي نفسك تمامًا في اليوم ده للدعاء والعبادة وبس.
اجمع كل أدعيتك وألحّ في الدعاء، وما تنساش تكرر كتير:
(لا إله إلا الله وحده لا شريك له، له الملك وله الحمد وهو على كل شيء قدير)
واتفرج على جبر ربنا بعدها.

١٣- الأضحية:
طالما قادر ومستطيع، دي من أعظم شعائر الأيام دي.
وما تنساش كمان صلة الرحم 🤍

💡العبادات دي "نقطة تحول"، لو داومت عليها هتخرج من الموسم ده إنسان تاني خالص، والأيام دي هتكون نقطة انطلاقك الحقيقية بإذن الله. 👌

اللهم اجعلها عشرًا مباركات تحثّ خطانا نحو الجنان. 🤲