308
Оҳанг ва сўз уйғунлиги дунёларингизни нурафшон қилсин! Ёш шоира Нозима Ҳабибуллаеванинг ижодий каналига хуш келибсиз!
Nima deb ovutay
guldonda
oyog‘in tush ko‘rgan gullarni?
... men jimman
@Nozima_Habibullayeva
#retro
* * *
Наҳиде* бўғзимдан ўтар сирғалиб,
Ақрабнинг ўзини чақа бошлар тун.
Тонг ели қўшиқдан баттар судралур,
Нега айнан бугун?
Тўлқинлар селидан сўрайди ёрдам,
Ўзига қуйила бошлаган сасим,
Гўё сидирилиб тушар торлардан
Титроқ хўрсиниқлар унган нафасим.
Дераза ечинар,
борлиқ шеър ташир,
Дарахт улоқтирар ёнган вароғни.
Нигоҳим таратган гунглик нотаси
Аллала-аб кузатар сўнгги япроқни....
Манов оғир бошда икки тирқишдан
Наҳиде пичирлар
ва айнан бугун.
Барини кўз юмиб тинглайверишдан
Жуда чарчаганман, тушун...
II.
Ноябрь барига шўнғир кўз юмиб,
Азизим, кўз очиб англаганимдек,
куй ҳам тингласайди мени бир умр
Сен мени,
мен сени тинглаганимдек.
О, сенга шунчалар ярашган вафо!
Кипригим гуллари – тўкилмаган шеър.
Ёнимда сен борсан,
тепамда Худо,
Нега йиғлаяпман, сабаб топиб бер...
*Наҳиде – хонанда
@Nozima_Habibullayeva
* * *
Менинг ҳеч кимим кўп ўзимдан бошқа,
Энг яқин дўст бўлмас сўзимдан бошқа
Ўзимнинг ичимга қамалиб қолдим
Калитим топилмас кўзингдан бошқа.
Ётволган тўрттала томоним девор,
Товоним девордир,
осмоним девор.
Анов юриб кетган тошлармиди-ей
Токай нураб ётган забоним - девор?
Баъзан хаёлимдан ўчиб кетаман,
Кипригимдан қанот бичиб кетаман.
Уйғониб кетаман сукутларимдан,
Шарқироқ кулгумдан чўчиб кетаман
Учаман ўзимни этгани обод
Семурғ қанотида менким Паризод
Ташқари,
ташқари жуда ичкари
Боғланганим сари озодман, озод!
Фалакнинг денгизга танбеҳи - ёмғир,
Қонимнинг ранги, ишқ ташбеҳи - ёмғир
Бир гўзал тўкилар саловат айтиб,
Осмон ҳамда ернинг тасбеҳи - ёмғир.
Сўнг иси келади буюк қадамнинг,
Ўзингдан ўзингга элтажак дамнинг.
Шу онда ҳавони маҳкам қучоқлаб
Йиғлагиси келар одамнинг ...
#Туғилган_кун
Устозга ва сармаст қаламларига узоқ умр тилаймиз!
🔷 САРХУШ ЭМАСМАН, ЭЙ ЁР
Чайқалаётир руҳим,
Тахти равон равонмас.
Сархуш эмасман, эй ёр,
Кўксим тешган камон маст.
Лабинг теккан қадаҳда
Қасам қалқар, аламмас.
Сархуш эмасман, эй ёр,
Расмим чизган қалам маст.
Итга ташлаб талаттинг,
Оғриётган яраммас.
Сархуш эмасман, эй ёр,
Бўғзимдаги нолам маст.
Рақсга тушдим ой билан,
Энди қушман, одаммас.
Сархуш эмасман, эй ёр,
Изинг излаб қадам маст.
Расмим чизган қалам маст...
➡️ Азиз САИД
Nozima Habibullayeva. Oblivion. Hikoya & Oʼtkan Kunlar. Simfonik orkestlar uchun musiqiy miniatyuralar | Xurshid Davron kutubxonasi
https://kh-davron.uz/kutubxona/multimedia/nozima-habibullayeva-oblivinon.html
"Iltimos, dil chetida turmang"
✍ Nozima Habibullayeva
🎤 Nozima Nizomova
_____
@Nozima_Habibullayeva
#retro
***
Ўн асрми, юз аср,
Каҳкашонлар узра сир.
Бир ғафлатки муттасил...
Ғорлар бу – мудраётган
Тоғларнинг ҳомузаси,
Уйғонасизми-йўқми!?
Узлатига босиб лаб,
Сукутга ўзин созлаб,
қақраётган овозлар,
Бир-бирига ўраниб
бетоб ётган қоғозлар,
Аё, Ҳазрати Сўзлар,
Аё, Ҳазрати Сўзлар
Уйғонасизми-йўқми!?
Эй, соҳиби дилим як,
Умрим умрингиз ичра.
Минг йиллар у ёғидан
Минг йиллар бу ёғига
Қўшиқларимиз учар
Ва улар қанотидан
Томар анвойи чечак.
«Ҳақ ҳадяси – тақдирдан...»
Эртак айтгум минг кеча –
Уйғонасизми-йўқми!?
Ўртан-эй руҳи Аюб,
Илоҳий туйғуларнинг,
Аржуманд кулгуларнинг,
Ифори нечук заиф?!
Субҳидамга юз чайиб,
Асл гулин тополмай,
Сандулочлар йиғлаюр!..
Уйғонасизми-йўқми!?
Эй! Покиза ранг қани?
Таъмасиз жаранг қани?
Осий сиёҳдонига,
Бегуноҳлар қонига
Чўмилмаган тонг қани?
Уйғонасизми-йўқми!?
Ўз онаси бир замон
алла айтгандан буён
Элиниб мудраётган,
Ҳалиям ухлаётган,
Аё, ғафлати инсон!
Уйғонасизми-йўқми?
Yodda tut,
o‘zingni qutqaray desang—
Muqaddas ruhingga etma xiyonat.
@Nozima_Habibullayeva
#retro
* * *
Ёмғирли кечада осмонни ҳидла-аб
ўлтирдим,
кипригим ўпди юлдузлар.
Шу ҳолда кимнингдир тушига кирдим
музтар...
Аммо,
учаётган ифорла қайтдим,
Бандаргоҳ мисоли ҳамал ҳориган.
Нозланиб ярим ой юзини артди
Ариқнинг бурмали кўйлакларига.
Елкасин қайириб йиғларди дарахт,
Таҳажжудда эди жамики борлиқ.
Ўйладим – нимани ўйлаш ҳақида,
Минг йилки вужудсиз елнинг оҳори.
Мен эсам...
...Дунёнинг ёдидан чиқдим мен эсам,
Сипқориб-сипқориб ёмғирни ичдим.
Худо пешонамдан силаётган дам
Муҳташам дунёда йўқ эди ҳечким...
Samoga avval ovozi yetgan,
ortidan o‘zi ketgan odam...💔
____
https://www.youtube.com/watch?v=8CkXJwFt858
Тарихдай эскидир кўзёшларимиз,
Тариқдай дардларни кўзмунчоқ қилма.
Хотира, унутма унутганларни,
Унутилма!
Қанча қадамларни орқага отдик,
Илдизлар қучоқлаб йиғлади ерни.
Дунё бир шеър билан оёққа тургай
Шоирим,
Ёз ўша шеърни!
Сувлар эриётир тупроққа сингиб,
Дарахтлар бирлашиб борар оловда,
Халқим, ....
Халқ?
Миллионлаб айро елкалар,
Қуёши думалаб борарди тоғдан.
Лолалар тоғлардан сўзларга кўчмиш,
Менинг борлигимга кўзгу қай битик? -
Бобомнинг соясин пана қилганлар
Боламнинг кўзига қарай олса тик.
Мудроқларга тушмас самонинг кўзи,
Тушларимнинг ниши курагимдадир.
Момомнинг камони қўлимда, аммо,
Нишон кўп.
Маркази юрагимдадир...
___________
@Nozima_Habibullayeva
Ochiq mikrofon loyihasining 2-sonini kutib oling!
🔸Nazm yo‘nalishi bo‘yicha:
Nasrullo Ergash,
Feruza Xayrullayeva,
Shahriyor Shavkat,
Hilola Jo‘raqulova;
🔹Nasr yo‘nalishi bo‘yicha:
Javlon Jovliyev,
Sevara Alijonova,
Furqat Alimardon,
Doston Usmonov.
🔥 Kecha mehmonlari — shoir Aziz Said hamda repper Shaka.
Keling, tinglang, his qiling! O‘z she’r va hikoyalaringiz bilan ishtirok eting.
⏰ 26-avgust, 19:00
📌 Book.uz
/channel/ochiq_mikrofon
"Open Mic" ga bordik. Chiroyli o‘tdi (biz borganimiz uchun 😃)
Vaqtliroq qaytishga majbur bo‘ldik. Yo‘qsa, Begali akadan mikrafonni opqo‘yardi Shahrinoz 🙃😎
Open Mic-ommaviy davra emas. Xos atmosfera. Kosmopolitan bo‘lsangiz har shanba albatta boring!
______
@Nozima_Habibullayeva
***
Йўлма-йўл
ўзини излайди фурсат,
Кўрсат,
кўзгуларда қотганин кўрсат.
Сувларда жилмайиб ётганин кўрсат.
Йўлма-йўл
ўзини излайди фурсат.
Йўлма-йўл
аёлнинг қадри тўшалган...
Яшалган
бировнинг умрида - сукут.
Босиб ўт, сени аёл туққанин унут.
Йўлма-йўл...
Йўлма-йўл...
Заминнинг либоси ямоқ.
Тупроқми?
Не қипти бир кафти, Дўстим?
Яланғоч қолгунча Ватаннинг усти
бериб юборамиз, йўлма - йўл.
Йўлма-йўл,
Изларга ташлайсан назар,
Aлҳазар,
бу йўлдан ўтмаган Одам?
Додламоқчи бўласан...
... Овозингни ютиб юборар қадам.
Йўлма-йўл...
***
Бир соҳилда
дунёдан нари...
Фурсатларинг китобга қулаб
Вароқласанг саҳифаларин
Тўлқинларнинг нафаси билан.
Мўралайди олислардан бир
Алвонланиб боради елкан.
Китобларга шўнғиган умр
Китобларга айланар экан.
Юлдузли тун пойида қалқди
Иқрорларнинг бошида чидам.
Ғойиб бўлди болалик балки
Оқ кемалар чўккан жойида.
Бир қўлимда оқ байроқдир тик
Ўткан кунлар тарозисида.
Чиқиб келдим,
кўнглимда ҳадик
Марғилоннинг дарвозасидан...
Faxriyorxonlik davom etadi...
👉 Faxriyor, “Izlam” to‘plami (yangi nashr)
📘 @akademnashr
ЯНА БУХОРО ҲАҚИДА
О, Бухоро...
Кўзларимга кўчиб ўтдинг,
Замонлардан гоҳ яёв,
гоҳ учиб ўтдинг.
Гавҳарларинг кўмиб, баъзан кечиб ўтдинг...
О, Бухоро...
Қамал бўлдим,
чиқолмадим ўз аркимдан,
Аркдан тушсам ҳам, тушмагайдим таркимдан.
Тамаддуни тошбўронлар бўлгач билдим –
Очун иборатдир ҳеч ким ва ҳар кимдан.
Минорамас,
оримдан дарз кетди дунё,
Қайта қурдим,
етолмай, арз этди дунё.
Пешонамдан ўқиб ўзи ҳақда илм,
Неча авлодларимдан қарз кетди дунё...
Туяларнинг ўркачида чўккан тарих,
Чўкиб,
ёлғон кўзёшини тўккан тарих.
Оғир-оғир хўрсинаман,
енгилламас
Руҳим – тарих, нафасиму, ўпкам – тарих...
Шамолларга ғубор минди, мозий чанги,
Тупроқларнинг манглайида шўрлар жанги.
Эски дардларнинг малҳамин топмай туриб,
Биз яралар очаяпмиз – “Янги-янги”...
О, Бухоро...
***
Солиҳа тонгларнинг арафасида
Руҳимни симирар «СубҳанаАллоҳ!»
Осмоннинг қадимий аравасида
Кундуз кетиб борар либослари оқ.
Яноғим босаман этакларига
Хиноланиб борар шафақлар гулгун
учсин , учаверсин қош қорайгунча,
Кутгум.
Илҳақлик умримга кўчган лаҳзадан,
Соғинчинг кўнглимга тақилган тумор
Икки дунёйимга ватан бўл, ватан,
Ҳовучда уйғонган мустажоб дуо!...
🎤 Sohiba Abdurahmonova
✍ Nozima Habibullayeva
Farg‘ona Tvda efirga uzatilgan ekan. Minnatdorman ❤
@Nozima_Habibullayeva
СУРАТ
Мусаввир, чиз орзуларимни –
Архидея бўйи ва денгиз...
Кўйлагимни ўпсин тўлқинлар
Қанотларим ҳавога менгиз.
Мусаввир, чиз туйғуларимни –
Бўёқлари Ҳаққа ишорат.
Бўлсин ҳечким кўрмаган рангда
Ёки фақат оқдан иборат.
Мусаввир, чиз уйқуларимни –
Сочларимни паришон айла.
Тушларимдан йиқилсин қўрқув,
Киприкларим посибон айла.
Мусаввир, чиз қайғуларимни –
Оғриқларим ёпинчиқ тунга
Муҳтожлигим ранги қандайдир
Илтижойим унгадир, Унга.
Мусаввир, чиз кулгуларимни –
Кулгичимни чуқурроқ чизгин.
Лаҳза ранги юзимда бўлсин,
Бармоғимда Темур узуги
БУХОРО ДАФТАРИДАН...
Лаби ҳовуз бўйида
ўлтирар Моҳи Хоса,
Осмон лаби – ҳилолга
мўлтирар Моҳи Хоса,
Паришон сочларида
қанча лайли чайқалиб,
Толларни чуқур ўйга
толдирар Моҳи Хоса.
Қароғин атрофида
томчилар парвози бор,
Ҳуснини ўлчамоққа
на тош-у тарози бор.
Гарчи баҳор қайтган-у
гуллашга қўрқар борлиқ,
Турналар тумшуғида
қайчилар овози бор.
Ситоралар тўкилмиш
қон гуллаган вароққа,
Ай дунё, ўзинг айт-чи,
ҳушим йўқдир саноққа.
Иффат-у, покиза ном
амирдан буюклигин
Қанча қизларинг қурбон
бўлсин исботламоққа?
Лаби ҳовуз бўйида
ўлтирар Моҳи Хоса,
Осмон лаби – ҳилолга
мўлтирар Моҳи Хоса.
То бор экан мазлумлар –
нафсининг нишонлари,
Ҳар кеча ўзин такрор
ўлдирар Моҳи Хоса…
ZANJIR
Buvim-sodda ayol,
farishta ayol,
Qancha kavsar oqdi ajinlarida.
Dunyoga nigohi, qalbimi abdol,
Hayotining oltin qoidasi - chidam.
Sinov qaysi boshda topmagan qo‘nim,
Ammo ko‘rganmisiz siylanganini?
Bir nobop o‘g‘ilning zulmiga ko‘nib
Xudoga ham aytmas qiynalganini
Irodasi metin,
tanti buvimning
Iztirob sudragan umrida baxtmi?
Rahmi kelaverar hammaga uning,
Unga esa kelar Xudoning rahmi.
***
Ona, merosmi bu tarbiya degan?
Yanglishlik ufurar qismatingizdan.
Yigirma yildirki,
hech kim, hech qachon
Minnatdor bo‘lmadi xizmatingizdan.
Asab tomiringiz uzgan ilonlar,
Haliyam shaytonga bermoqda firib.
Qo‘llaringiz o‘pay,
chiqmadi jomdan
Ona, tugamaydi dunyoning kiri...
***
Xola, sen o‘qigan ilm ne, aytchi?
O‘zingni davolay bilmasang,
Har gal
ignalab,
hastalar dardini yanchib
Ko‘ksingni tutasan qaysi o‘qlarga?
Yuzingga xiyonat bosgan izlardan
qon sizar,
sen undan gul chizasan,
Va
Shart qadding ko‘taray desang tizlardan
Mo‘ltirar to‘rt bolang- to‘rt tomon qibla.
***
( Shahrinoz alla eshitsa tinchlanish o‘rniga yig‘lab qoladi )
Qizim,
Sen allani xushlamading hech,
Hayratim taraldi,
ortdi quvonchim.
Sen shunday qaramlik zanjirlarni yech.
Boshingni ko‘tarsang osmon- suyanchiq.
Uyg‘oq bo‘l, to umring ketmasin munkib
Ruh turar taqdirning qorachig‘ida
Eng avval o‘zingni seva ol, chunki
Tangrining eng buyuk yaratig‘isan.
Sevil,
Zamin-u koinot qadar yoyil,
Yuksal,
Yulduzlarni ayla qiroat.
Yodda tut,
o'zingni qutqaray desang
Muqaddas ruhingga etma xiyonat!
__
@Nozima_Habibullayeva
#retro
***
Ой тутилди.
Ким тутди уни?
Ҳолалари мисоли зичман.
Сипқорилган жамийки туним
Кўзларингнинг гирдоби ичра.
Унда уммон ҳайқириғи жо,
Юлдузларнинг ухлар жимири.
Ундан боқиб турарди Худо,
Кипригингда ишқнинг шивири.
Ўн саккиз минг олам-да яқин,
Менда бори фақат фасоҳат.
Кўзларимдан кўзингга қадар
Оғирлик қилади масофа!...
* * *
Дарахтлар шамолни отиб ўйнайди,
Олов вужудини елпиб ётар боғ.
Соғинмачоқ ўйнар
хотирга қайтиб,
юрагим – юрагинг ортида вароқ...
Сатрлар югурди уфқнинг лабига,
Дераза – бўшлиқнинг тутқун кемшиги.
Мен чиқиб кетаман, овозим йиғиб,
Чайқалиб қолади сукут эшиги...
Излаганим эди бепоён оҳанг,
Куйлаганим эди осмоннинг ранги.
Фақат ёмғир бўлдим шеърга ҳамоҳанг,
Сенга юқмасин деб дунёнинг чанги.
Сўқмоқлар қалқиди қадамларимда,
Ернинг белбоғида арғимчоқ учдим.
Учдим,
учавердим,
кипригим – қанот,
Ниҳоят, кўзингга – осмонга тушдим...
Afsonalar o‘lmaydigandek tuyiladi a?😭
Dadamning radio kasetalari bilan uyimizga kirib kelgansiz. Har o‘zbekning shunday oila a'zosiga aylangansiz. Birdan hamma judo bo‘ldi...
"Yaqinlariga" degan so‘z naqadar ojiz. Butun O‘zbekistonga sabr bersin.
O‘lmas ovoz, oltin fond, bolalik xotiralar uchun rahmat!
Makoningiz jannat bo‘lsin...
@Nozima_Habibullayeva
***
"Кўзлари-мўжиза"-деди, денгизлар,
Денгизни севдим.
Соҳилга сув сепди ўйноқи қизлар,
тенгсизни севдим.
Ёпинсам,оловлар " соғинчмиз"- деди,
Самандар бўлдим.
Учирган кипригинг қўлимда эди-
Қаландар бўлдим.
Сўзлар келаверди шунчалар тотли,
"Тилим чайнадим".
Кўзларим четидан тоша бошладим-
қайнадим!
Мени чорлар эди муҳташам гирдоб-
Оҳанграбоми?
Ё ҳар бир ҳалқаси- битта коинот,
Бутун самоми?
Тасдиқлар экансан киприк қоқишда,
Мени найладинг?
Заминнинг жамийки дов-дарахтлари
таъзим айлади.
Мўжизалар ичра ғойиб бўлмоқни
қанчалар кутдим,
Қай куни қайдадир келдик юзма-юз-
Боқишни унутдим...
Қарасам, юрагим қоларди тўхтаб,
Қўрқувни тутдим.
Бир умр кўзингда яшаб, кўзимдан
чиқолмай ўтдим.
УЧРАШУВ
Тиззаларим қалтираётир,
учар гилам, муҳташам гилам.
Пардоз қилдим кўзингга боқиб
севгим билан, ҳаяжон билан.
Сен ҳақингда сўйлар олти ёқ,
қуллуқ қилдим кўксим қармоқда.
Юрак эса сенли борлиқнинг
эшигини тақиллатмоқда.
Ва йўл очдинг, ташаккур айтдим,
Ич-ичкарим, ҳужайрам чаман.
Қачон келдим? Ўлдим?
Билмадим
Аммо аниқ тирилмоқдаман!
Оҳ, бунчалар улкан ишқ бердинг!
Изинг излаб бошимни эгиб
изҳор айтсам пичирлаб,
ернинг
қулоқлари кетади эриб...
Бу учрашув шавқим бугуннинг
беш лаҳзалик буюк ташбеҳми?!
Қўлларимга тақиб қўйдинг энг
қимматбаҳо маржон – тасбеҳни! ...
🎤 O‘z ovozingni kashf et!
Mustaqil ijodkor yoshlar birlashmasi va Book.uz dan yangi loyihani kutib oling:
💥 Ochiq mikrofon!
✅ Bu — har shanba oqshomi she’r, hikoyalarni mualliflaridan tinglash imkoniyati;
✅ Bu — vaqtni mazmunli o‘tkazish, his qilmoq va zavq onlari!
✅ Bu — jonli muloqot va yoshlar davrasi.
📍Uchrashuv manzili: Shu yerda
⏰ 19.08.2023
19:00
/channel/ochiq_mikrofon
***
Ҳаяллади кўзимнинг ёши
На- да қувонч келар онда йўқ.
Оғирмиди биллур Бахт тоши.
Меъёридан ортиқ суйдикми?..
Кўзёш -олмос,
кўзим - хазина,
Хазинани кўмиб қўйдикми?
Азизим, кет!..
Атай соғинтир.
Қалам билан қўлимдан тут сан
Дахшат ахир!
Ва ғоят оғир,
Наҳот энди йиғламай ўтсам?!
____
@Nozima_Habibullayeva
***
Ё чиндан тизгиндан чиқди коинот,
Балки биз ундаги сўнги асотир.
Тоғ эрсанг, ўссанг ҳам,
чўксанг ҳам, ҳайҳот,
Ўприлиб тушади осмон –
Xавотир.
Хотирлар потирлаб тирнар бўғизни,
Минг йилки нўноқмиз ё шундай ғариб.
Ҳақиқат, оқибат каби сўнгсўзнинг
Чинаккам маъносин ахтариб
топдикми?
Қай бири адлнинг роҳи?
Ҳамонки сарф бўлиб лаҳзама-лаҳза,
Бирликнинг занглаган эшигин қоқиб,
Кўксингда мушт бўлиб уради ларза.
Алмисоқ белбоғи бўлган Кайвонга
Кўп оғир, биламан,
бас, энди бунча
Кучингни ҳайфлама, токи майдонга
Бирга-бир тушгучи мард келмагунча.
Ғурурим, бир зарра тўкилма асло,
Ё Ҳақ, де йўлласин саодат сари.
Кафтимда исмингни кўтарар дуо,
Елкангни – эгамнинг фаришталари!..