Telegram-канал maison88 - كن جميلا ترى الوجود جميلا: Unsorted

كن جميلا ترى الوجود جميلا

08 June 2026 12:02

🔴 هل المرأة هي السبب ⁉️

📍#مقالات_مركز_الفتح 📍

🔵 الشريعة لا تتهم المرأة، ولا تترك الرجل على هواه، لكن من مقاصدها إنها تحمي القلوب والبيوت قبل ما الخراب يدخلها.

ربنا خلق في الرجل ميل (طبيعي) للمرأة، وخلق في المرأة ميل (طبيعي) للرجل، وده مش عيب ولا تهمة، ده جزء من الفطرة. لكن الفطرة دي لازم يكون لها ضابط:
غض بصر، حياء، ستر، وخوف من ربنا.

عشان كده ربنا أمر الرجال بغض البصر، وأمر النساء بغض البصر.
يعني المسؤولية على الاتنين، مش على المرأة وحدها ولا على الرجل وحده.

فالغلط إننا نقول: المرأة هي سبب الفتنة وخلاص.
والغلط برضه إننا نهوّن من التبرج والتعطر وإظهار الزينة والكلام اللي فيه ميوعة أو لفت نظر.

الحقيقة إن الفساد غالباً بيبدأ لما الرجل يسيب عينه على راحتها رايحة جايه على النظر الحرام، وامرأة تسيب سترها وحياءها وكإن دا شيء عادي، ومجتمع بيسهّل الفتنة (بالنظر والتبرج ثم الاختلاط) ويعتاد عليها.

والحجاب مش معناه إن اللي قصّرت في حجابها يجوز إن حد يضايقها أو يؤذيها، أبداً.
الظلم حرام على كل حال.
لكن الحجاب علامة حياء وصيانة، وسبب من أسباب تقليل أذى أصحاب النفوس المريضة.

وفي الزمن بتاعنا ده، الفتنة بقت داخلة علينا من كل باب: صور، فيديوهات، سوشيال ميديا، تعليقات، تعطر، تبرج، وكلام يحرّك القلوب.
والخطر مش بس إن الواحد يغلط، الخطر الأكبر إنه يتعود على الغلط ومايبقاش حاسس إنه غلط.

الخلاصة: الشريعة لما منعت النظر الحرام، والخلوة، والتبرج، والخضوع بالكلام؛ ماكنتش بتضيّق على الناس، لكنها كانت بتقفل الباب قبل ما المصيبة تحصل.

فالحياء مش تخلف، والستر مش كبت، وغض البصر مش ضعف، دي كلها أسوار بتحمي القلب والبيت والمجتمع.

واللي يكسر الأسوار دي بأي اسم: عادات، حرية، زمالة، زي الإخوات، أو إحنا نيتنا صافية؛ مايزعلش لما يلاقي القلوب اتعلقت بالحرام، والبيوت اتخربت، والثقة ضاعت.

(وما ظلمناهم ولكن كانوا أنفسهم يظلمون)

والله المستعان.

✍ الشيخ محمد سعد الأزهري ✍