Telegram-канал zemedkunbekelez - Zemedkun Bekele (ዘመዴ): Неотсортированное

Zemedkun Bekele (ዘመዴ)

31 октября 2024 13:44

Zemedkun Bekele:
"ርእሰ አንቀጽ"

"…ለፍቶ፣ ጥሮ፣ ደክሞ ባገኘው ሀብት ከተማ ላይ ጥሩ ቤት ገንብቶ፣ ትዳር ይዞ፣ ልጆች ወልዶ ይኖር ነበር አሉ አንድ ሰው። እየቆየ ሲመጣ የሀብቱም መጠን ሲጨምር የከተማው ግርግር መንፈሱን ይረብሸው ጀመር አሉ። እናም አንድ ውሳኔ ወሰነ። ውሳኔውንም ለክብርት ባለቤቱና ለውድ ልጆቹ አማከረ። "እንደምታዩት ነው። ብዙ ደክመን ሀብት ንብረት አፍርተናል። ቤትም መኪናም አስተማማኝ ድርጅትም አለን። ነገር ግን በከተማው መሃል ያለው የሕዝብ፣ የመኪና ጩኸት በእረፍት ቀኔ ማረፍ ብፈልግ እንኳ ሊያሳርፈኝ አልቻለም። እናም ለምን ከከተማ ወጣ ብለን ቤት ሠርተን በዚያ አንኖርም? ብሎ አማከራቸው አሉ። ቤተሰቡም በደስታ ሓሳቡን ተቀበለ።

"…ከጥቂት ዓመታት ድካም በኋላ የሚፈልጉት ዓይነት ቦታ፣ የመሬት አቀማመጥ፣ ፏፏቴው ቅርብ፣ ሜዳው፣ ወንዙ፣ ጨፌው፣ ጫካው ያማረ፣ ትንሽዬ ኮሬም በአቅራቢያው ያለ የቤት መሥሪያ መሬት አግኝቶ ቤቱን ገንብቶ ጨረሰ አሉ። ከዚያም ቤተሰቡ ሁሉ የከተማውን ኑሮ ትቶ ከከተማው ውጪ ወደተሠራው ወደ አዲሱ መኖሪያ ቤቱ ለመግባት ዝግጅቱን ጀመረ። የቤቱን ምርቃትም ወዳጅ ዘመድ ሁሉ ቤተሰቡ ወደ አዲሱ ቤት በሚገባበት ቀን በእኩል ቀን እንዲመርቅ መርሀ ግብርም ተያዘለት። እናም እኩል በአንድ ቀን ምርቃቱም ተካሄደ፣ ቤተሰቡም ወደ አዲሱ ቤት ገባ። ፌሽታ ነበር። አድናቆትም ነበር። ይሄን ቦታ፣ ይሄን ስፍራ እንዴት አገኘኸው? አቤት ሶፋው ሲያምር፣ የቤቱ ቀለም ውብ ነው፣ አድናቆቱ፣ ሁካታው፣ ጭፈራው፣ መብል መጠጡ ሁሉ ልዩ ነበር አሉ። መርሀ ግብሩም ሲያልቅ ሁሉም ወደ ቤቱ ሲመለስ፣ ባለቤቶቹም ወደየመኝታቸው ሄዱ። ከድካም ብዛት እንዴት እንደተኙ ሳያውቁትም በየፊናቸው ተንጋለው ነጋላቸው። የዚያን ዕለት የመኪና ጡሩንባ የለ፣ ጩኸት የለ፣ አምቡላንስ የለ፣ ምንየለ ለሽ ብለው አደሩ።

"…መሸ ነጋ ሁለተኛ ቀን። ቤተሰብ ፀጥታ የሞላበት ሰላማዊ አየር እየማገ፣ እየተነፈሰም ዋለ። መምሸት አይቀርምና መሸ። ከራት በኋላም የግድ ነውና ወደ መኝታ ቤታቸው ገብተው ለመተኛት በሞቀው፣ በምቹው አልጋ ላይ ጋደም አሉ። እንቅልፍ ግን ከወዴት ይምጣ? ሰዎቹ ደክሟቸዋል፣ መተኛትም ፈልገዋል፣ እንቅልፍም እያዳፋቸው ነው፣ ነገር ግን እንዴት ይተኙ? የሆነ ድምጽ፣ ከዚህ በፊት ሰምተውት የማያውቁት ሰቅጣጭ፣ ረባሽ ድምፅ ይበጠብጣቸው ጀመር። የሚያውቁት ከከተማ ያስወጣቸው የመኪና ጥሩንባ አይደለም። ከቤተ ክርስቲያን የሚወጣ ማኅሌት፣ ቅዳሴም አይደለም። አዛንም አይደለም። አምቡላንስም፣ የእሳት አደጋ መኪና፣ የፖሊስ መኪናም ድምጽ አይደለም፣ ሞንታርቦ ከፍተው ካሴት የሚሸጡ፣ ለታመመ ሰው የሚለምኑም፣ ሰው ሞቶ የዕድር ጡሩንባ፣ ቆሻሻ አውጡም የሚሉ አይደሉም። ቆራሌው፣ ልዋጭ ልዋጭ፣ አለ ሱፍ ሲፍ አለ የሚሉም አይደሉም። ብቻ ጩኸት፣ ርብሽ ርብሽብሽ የሚያደርግ ጩኸት።

"…መስኮት በር በደንብ ቢዘጉም። ትራስ ጆሮአቸው ላይ ቢጠቀጥቁም፣ ጥጥም ጨርቅም በጆሮአቸው ላይ ቢወትፉም ኧረ እሱ እቴ። ወይ ፍንክች። በር ከፍተው አዩ፣ ሰቅጣጭ ጩኸቱ አላቆመም። የዚያን ቀን እንደምንም አደሩ። ነገ ይሻላል ብለውም በተሰፋም ዋሉ። በሁለተኛውም ቀን እንደዚያው። እየቆዩ ሲመጡ ነፍሳቸው እስክትወጣ ድረስ የወደዱትን ስፍራና አካባቢ እየጠሉት መጡ። የሚረብሻቸው ድምጽ ከተማውን የሚያስናፍቅ ሆነ። ቀን ቀን ቢፈልጉት አይሰማም። ሌሊት ግን እሪ ነው። ግራ ገባቸው። ከብዙ ድካም በኋላ ግን የችግሩን ምንጭ ደረሱበት። ችግሩ ያለው ከቤታቸው አጠገብ ካለው ኩሬ ውስጥ እንደሆነ ገባቸው። አዎ ኮሬው ውስጥ የሚኖሩ እንቁራሪቶች ነበሩ ሀገር ምድሩን ቀውጢ ያደረጉት። እናም እነዚህን እንቁራሪቶች ለማስወገድ እንቅስቃሴ ተጀመረ። የነጋዴ ነገር መቼም መላ አያጣምና አንድ መላ ዘየደ። ለምን እንቁራሪቶቹን አጥምጄ ለእነ እንትና ሬስቶራንት አልሸጥም ብሎ አሰበ፣ አሰበናም ወሰነ። ወሰነናንም ወደ ሬስቶራንቱ ባለቤቶች ዘንድ ሄዶም አነጋገረ።

"…እንዲያውም ወጋ ጨምረን እንገዛሃለን። የአቅርቦት ችግር ስላለብን እባክህ ፍጠን አሉት ባለ ሬስቶራንቶቹ። ሰውየው መንጠቆ ገዛ፣ ማጥመጃ መሣሪያዎችንም ሸመተ። ለገንዘቡም ብቻ ሳይሆን በዚያውም ልዝናና ብሎም አሰበ። ለሚያጠምዳቸው እንቁራሪቶች መያዣ፣ ማቆያም የሚሆን በርሜል ሁላ አዘጋጀ። እናም ወደ ኩሬው ሄዶ በአንድ ድንጋይ ሁለት ወፍ ለመምታት ተሰየመ። ጠዋት የተቀመጠ እስከማታ ተጎልቶ ሁለት እንቁራሪት ብቻ አጠመደ። ቦታ እየቀያየረ ቢሞክር፣ ፀሐይ እየመታው ሲገላበጥ ቢውል ሌሎች እንቁራሪቶች ድርሽ አልል አሉ። ዓሣም እንቁራሪትም ማጥመድ ትእግስት ይፈልጋል ይባላል እና በትእግስት ቢጠብቅ ቢጠብቅ ከሁለቱ እንቁራሪቶች በቀር ወላ ሃንቲ ሀባ እንቁራሪት ጠፋ። የእነእንትና ሬስቶራንትም በጉጉት እየጠበቀ ነው። ሰውየውም ሲደክም ውሎ ሁለት እንቁራሪት ብቻ አጥምዶ ሲመሽ ወደ ቤቱ ገባ። የዚያን ቀን ሌሌት ቤተሰቡ ሳይረበሽ በሰላም ተኝቶ አደረ።

"…በሁለተኛው ቀንም እንቁራሪት ለማጥመድ ሰውየው ወጣ። እስከምሽት በኩሬው አጠገብ ውሎ ምንም እንቁራሪት አንድም ሳያጠምድ ወደ ቤቱ ተመለሰ። እሱ ወደቤቱ በምሽት ሲመለስ ቤተሰቡ በጊዜ ተኝቶ አገኘ። እሱም በጊዜ ተኛ። በማግስቱ ግን ከቤተሰቡ ጋር መከረ። የሚገርም ነው። እኒያን ሁሉ ቀናት እንቅልፍ አሳጥተው ከወደድነው፣ ደስም ካለን ሰፈራችን ሊነቅሉን፣ ሊያሰድዱን የነበሩት፣ ትራስ ስር የወሸቁን፣ በጆሮአችን ጥጥና ጨርቅ ያስወተፉን፣ በርና መስኮቱን ያስዘጉን፣ እንዲያ እረፍት የነሱን፣ የካምቦሎጆ ደጋፊ ድምፅ አውጥተው እንቅልፍ የነሱን እነዚህ ሁለት እንቁራሪቶች ብቻ እኮ ናቸው በማለት ከእኒያ ትናንሽ ሁለት ፍጥረታት የሚወጣ ድምጸፅ እንዴት የካምቦሎጆ የቅሪላ ደጋፊዎች ድምፅን ሊበልጥ ቻለ ብለው በመደነቅ ተነጋገሩ። ለእነ እንትና ሬስቶራንትም የሚያቀርቡትም ቀረ። ሁለቱን እንቁራሪቶች ከኩሬው አጥምደው ካወጡ በኋላም በሰፈሩ ሰላም ሰፈነ።

"…አሁን ባለው የዐማራ ፋኖም ትግል የማየው እንደዚያ ያለ ነገር ነው። ጎንደርም፣ ጎጃምም፣ ወሎም ሆነ ሸዋ ላይ የሚታየው እንደዚያ ነው። የትግሉ ረባሽ እንቁራሪቶች ከሁለት ሦስት አይበልጡም። ይታወቃሉ። ድምጻቸው ግዙፍ ነው። ዓለም ይነቀንቃል። ጨክኖ እነሱን በብዙ ድካም ማጥመድ ከተቻለ ሰላም ይሆናል። መፍትሄው እሱ ብቻ ነው። እንዲያ ማድረጉ ላይ ነው መበርታት። የችግሩ ቦታ ኩሬው ከታወቀ። ኩሬው ውስጥ ሆኖ እንቅልፍም፣ ሰላምም የሚነሣው ነገር ከታወቀ፣ በቃ እሱን ችግር ፈጣሪውን ተሟሙተህ አጥምደህ ያዘው። ከያዝከው በኋላ መልሰህ ይበጠብጥህ ዘንድ በሽማግሌ ውትወታ አትልቀቀው። በእጅ ሰጥተህ በፈረስ ለፍለጋ አትድከምም። የጎንደር ዩኒቨርስቲው የአቢይ አምላኪው የዶር አሥራት አባት መምሬ አጸደወይን ቢመጡ እንኳ አትሞኝ። እሺ በጄም አትበል። ሌባ ይዞ ዱላ ይጠየቃል እንዴ? በስንት መከራ የያዝካቸውን እንቁራሪቶች መልሰህ ወደ ኩሬው ለቀህ ድጋሚ የምን እየዬ ነው? ተረበሽኩ፣ ተጨነቅኩ፣ ወየው ወየው ብሎ ለቅሶ ምን የሚሉት ፈሊጥ ነው? …👇 ① ከታች ይቀጥላል…✍✍✍