Telegram-канал xazon_rezgi - XazonRezgi (Official Channel): Неотсортированное

XazonRezgi (Official Channel)

29 ноября 2024 18:35

#СЕНСАН_СЕВАРИМ

Шаҳноза шу ётганча пешиндан сўнг кўзини очди. Унинг кўзлари уйқули эди-ю , аммо тиниқиб ухлашга қайтадан танасида бош кўтариб келаётган оғриқлар монелик қила бошлаганди. Оғриқлар аста- секин авжига чиқа бошлаган пайтдан Шаҳноза яна тимирскилаб дори қидира бошлади :

" Қуриб кетгур , у ер бу ерда қолиб кетгани йўқмикан ?- инграганча шивирлади Шаҳноза ,- қайдан ёпишди менга бу дард? Менга нималар бўляпти ? Илгари сира бундай бўлмаган эди-ю ? Охирги кунларда кўп сиқилганимга бўлдимикан бу ўзгаришлар? Аммо ... Ойижоним дард билан олишган вақтларидаям , дунёдан ўтганларидаям бундан кўп йиғлаган эдим- ку ? Тўғри у вақтлар юрагим безовта қиларди. Аммо ҳозир- чи? Бутун танам бурда-бурда бўлиб ёниб кетяпти. Этимни қузғунлар ўткир тумшуқлари билан узиб-узиб олаётгандек бўляпти. Оҳ, чидай олмаяпман. Қачон кун кеч бўлади-ю, қачон Қаҳрамон ака келар экан? Асабни тинчлантирадиган дорисидан қолдимикан ? Келса укол қилиб қўйишини сўрайман. Ишқилиб бугун келсин-да! Ўтган сафаргидагидек уч кун даф бўлиб кетса бу оғриқларга қандай чидайман? Аксига олиб телефон ҳам йўқ. Қўнғироқ қилиб чақирар эдим..."

Қаҳрамон шундай бўлишини тахмин қилган эди. Шомга яқин квартирага қайтганда Шаҳнозани меҳмонхона остонасида беҳуш топди. Афтидан қиз оғриққа чидай олмай хонама-хона эмаклаган , охири оғриқдан хушини йўқотган эди.
"Кеча кайфда яхшигина дозада укол уриб қўйибман шекилли. Шунинг учун хотинжоним иккинчи кундан "жингала" бўлиб қолибди. Менимча дозани оз-оздан камайтириб ўргатишим керакка ўхшайди. Бўлмаса бу кетишда бошимга бало бўлади бу қиз"
Қаҳрамон Шаҳнозани даст кўтариб ётоқхонага олиб кириб жойига ётқизди.
Бу сафар ҳотиржамлик билан қизнинг билагига укол қилди. Шунда унинг кўзи кеча Шаҳнозанинг укол урилган ўнг билаги бинафша рангда моматалоқ бўлиб қолганига тушди .

"Оббо,- ғижинганча ўйлади у,- эртага Дадажонимиз суюкли қизларини кўришга келмоқчи эди. Уни қўлини кўрса бир зумда гап нимада эканлигига тушунади. Бир чорасини топиб Шаҳнозани оғзини гапирмайдиган қилиб маҳкамламасам бўлмайди".
Шаҳноза бу сафар кечагидан барвақт уйғонди. У уйқудан кўзини очганда соат тунги йигирма учларни кўрсатаётган эди.

- Уйғондингми , Шашо...- ўзича хотинини эркалаган бўлди Қаҳрамон ,- мен бўлсам уйқудаги гўзалга уйландиммикан деб ўйлаётгандим.
Шаҳноза ётган жойида ўзига қулоқ солди: ҳеч қаери оғримаяпти. Танасида ёқимли чарчоқ ...
У кундуз куни бутун танаси қақшаб , тириклайин ўтда қолгандек ит азобини кўрганини эслади. Шунда чап биқини бир неча ари баравар чаққандек "жиизз" этиб санчиб кетди.

- Қачон келдингиз? - юзлари буришди Шаҳнозанинг

- Кечга томон келдим. Келсам ухлаб ётибсан. Бундоқ хотин бўлиб эр деган жанварга бир коса шўрва ҳам пишириб қўймагансан. Яхшиям ўзим билан озроқ кабоб олиб келганим . Сен ўзи овқат пиширишни биласанми ?

- Ҳмм,- деди Шаҳноза хўрлиги келиб ,- аммо бугун тобим бўлмади. Марҳамат юзасидан тавсия қилган оғриқ қолдирадиган дорингиз ҳам бир дона экан. Таъсири унча узоққа етмади.
- Эсим қурсин ,- Қаҳрамон шимининг чўнтагидан дори тўла флаконни олиб Шаҳнозага кўрсатди-ю яна қайта жойига солди ,- уни ўзим билан олиб кетиб қолган эканман.

- Номи нима шу дорини ? - Шаҳнозага жон киргандек бўлди ,- менгаям уч, тўрт дона беринг.

-Албатта бераман, нима мен хотинидан арзимас дорини қизғанадиган одамга ўхшайманми ? - деди тантилик билан Қаҳрамон ,- аввал овқатланиб олайлик. Сени билмадим- у, аммо мени қорним оч . Юрақол...

Шаҳноза дори илинжида итоаткорлик билан Қаҳрамонга эргашди.

- Шашо... Биламан , сен мени ёмон кўрасан. Аммо мен ҳам сенга иродангга қарши уйланишни истамаганман,- Қаҳрамон овқатланиш жараёнида қизга маъноли тикилар экан ,- буларнинг бари дадангни ҳоҳиши бўлган.

- Буни биламан,- деди Шаҳноза ўксинганча ,- дадам сизнинг отангиздан қарздор бўлганликлари учун ...

- Ва сен бу чўпчакга ишондинг! Буларнинг бари сафсата! - Қаҳрамоннинг овози бир парда кўтарилди ,- даданг буларни барини бир аёлни деб режалаштирган...

Хазонрезги

@Xazon_Rezgi /29