Telegram-канал xazon_rezgi - XazonRezgi (Official Channel): Неотсортированное

XazonRezgi (Official Channel)

18 октября 2024 18:02

#СЎНГГИ_НАФАСГАЧА

- Эсинг жойидами, сен боланинг? Нима илонни албатта ўлдиришинг шартмиди? Узоқроққа ташлаб келсанг бўлмасмиди? Униям оила, бола-чақаси бордир? Жони бор бўлган! Қарғаган бўлса нима қиласан!?

- Ҳавотир олманг, ойи,- беўҳшов ҳиринглади Ҳаким ҳуддики бир қаҳрамонлик кўрсатиб қўйгандек керилиб, - қарғашга улгурмади.
- Сен буни қаердан биласан? - деди Қумрихон бўшашганча,- ўз қарғамаган бўлса хотиними, болаларими, барибир қайси биридир албатта қарғайди. Замон нотинч бўлиб турган мана бунақа маҳалда қарғиш олмай тинч юрсанг яхши бўларди.
Ҳаким бир кўнгли онасига "Замон тинч бўлганда қарғиш олаверсам бўларкан-да?! " демоқчи бўлди-ю, аммо Қумрихоннинг яна қайта бошдан жаврашга тушишини ўйлаб гапиришга ҳафсала қилмади.
Ҳаким кўрпачалардан иккитасини битта қилиб тўшади-ю, бошига ёстиқ тортиб қўл-оёғини чўзди. Ташқарида қуёш лов-лов ёниб теварак-атрофни қиздириб тобора забтига олар, ланғиллама оташ билан атай ўйнашгандек чайланинг ичи муздеккина, танга роҳат бағишларди. Ҳакимнинг бебош хаёллари эгасини ҳар ёқларда улоқиб олиб юргач, кўп ўтмай уни ўз ҳолига қўйди. Йигит пинакка кетди.
Кун пешиндан оғганда уйқудан кўзини очган Ҳакимнинг ёдига ёнғоққа боғлолиқ от тушди. У апил-тапил ўрнидан туриб ташқарига отилди. Отнинг устига офтобнинг айланиб келиб қолишига бир баҳя қолган, шундан бўлса керак, сояда ётишига қарамай унинг силлиқ сағрини куннинг дамида тер босиб ялт-ялт қилиб кўзни оларди.

Ҳаким отни арқонидан бўшатиб келган йўлидан пастликка олиб тушди. Пастда оқаётган сойнинг бўйидаги ҳар доимги салқин жойга етаклаб терини қотирган бўлди-ю, кейин обдон тўйгунича сув ичишига қўйиб берди. Тўйиб сувга қонган отнинг ортиқча ўтлашга ҳуши келмади. Ҳаким уни яна қайтиб қир устига олиб чиқиб олдинги бойлаган жойидан берироққа арқонлади.
Ўзи чайлага қайтиб самовар жўмрагидан сув бураб қўл чайган бўлди-ю ичкарига кириб яна ўринга чўзилди. Бу сафар қорни очгани ҳис қилган Ҳаким ўтирган жойида тугунга қўл узатди.
Бошланганига икки ой бўлмай уруш баҳона аллақачон кўп оилаларнинг дастурхонидан барака кўтарилиб қолган бир вақтда Қумрихон ҳали ҳануз рўзғорида қилдек етишмовчилик сезмаганди. Мана ҳозир ҳам Ҳаким ўз ёғига пиёз қўшиб қовурилиб босиб берилган бир товоқ иштаҳа очар шўртаккина гўштни кўриб оғзининг суви келди. У товоқ устига ёпилган тандир нонни ушатиб гўштга қўшиб ея бошлади. Орада қайноқ чой ичгиси келди, бироқ самовар қўйишга эринди. Қорни тўйгач ўрнидан туриб чайла четида турган тўртта сопол косанинг бирини олиб ташқаридаги самовар сувидан қуйиб ичиб ортига қайтди.

"Қорин тўйди, ғам йўқ,- ўйланди у яна ўринга чўзилар экан,- энди адамларни кутиш қолди. Қачон келар эканлар-а? Мабодо бугун келмай шу ерда қоладиган бўлсам кечаси оч қолишим аниқ. Сабаби нафсим ўйнаб гўштниям чангини чиқариб юбордим. Ҳа майли, жуда кеч қолсалар ўзим уйга қайтавераман. От билан бир қадам йўл" ...

Шом қоронғилиги атрофга ёйилиб кела бошлаганда Шермат раис агроном Ҳамидулла аканинг отида чайла ёнида пайдо бўлди.
- Ҳакииим! -деди у отда туриб қўлидаги тугунни ўғлига узатар экан,- ол буни! Эҳтиёт бўл! Синадиган нарса бор!
Шермат раис отдан тушиб уни шундоққина чайла ёнидаги ёнғоққа боғлар экан ўғлига сўз қотди:

- Дастурхон туза! Қорин ҳам пиёзнинг пўсти бўлиб кетди.

Ҳаким чайладаги лампа шишани пилигини баландлаганча тугунчани ечди. Унинг ичидан нон, алоҳида ўраб товоққа солинган ош ва икки бутилка ароқ чиқди Тез орада чайлани паловнинг иштаҳаочар иси тутиб кетди.
Ҳаким ароқни кўриб ҳайрон бўлди. Одатда Шермат раис болалари ёнида ҳеч қачон ароқ ичмаганди. Ҳаким ҳатто отасини туззук-қуруқ маст бўлиб юрганини. ҳам эслай олмасди.
- Пиёлаларни обке!- деди Шермат раис нон ушатар экан,- қошиқларниям ол.
Ҳаким отасининг буйруғига сўзсиз бўйсунди. У димоғини қитиқлаётган ошдан тезроқ егиси келарди.

📌@xazon_rezgi /48