Вясна / Правы чалавека ў Беларусі

28 июля 2025 11:04

70-гадовую гамяльчанку асудзілі да двух гадоў пазбаўлення волі

Праваабаронцы даведаліся падрабязнасці судовага працэсу ў дачыненні да Сафіі Бачурынскай. Як паведамляе «Гомельская Вясна», жанчыне прызначылі 2 гады калоніі.

Сафіі інкрымінавалася ч. 3 арт. 361-1 КК (удзел у экстрэмісцкім фармаванні), ч. 1 арт. 367 КК (паклёп на Лукашэнку), ч. 1 арт. 368 КК (абраза Лукашэнкі), арт. 369 КК (абраза прадстаўніка ўлады). Суд адбываўся ў закрытым рэжыме.

Цяпер Бачурынская знаходзіцца ў ПК-4 у Гомелі. На сёння гэта найсталая з усіх вядомых жанчын, якія ўтрымліваюцца ў няволі паводле палітычных матываў.

Чытаць па спасылцы 👉 https://spring96.org/be/news/118362

Вясна / Правы чалавека ў Беларусі

28 июля 2025 09:34

62-гадовую намесніцу дырэктара мінскай гімназіі адправілі ў калонію па палітычным артыкуле

Марына Петражыцкая працавала завучам па выхаваўчай працы ў мінскай гімназіі №34, якая знаходзіцца каля вуліцы Арлоўскай, насупраць Кіеўскага сквера.

Жанчына скончыла Беларускі дзяржаўны педагагічны ўніверсітэт (тады Мінскі дзяржаўны педагагічны інстытут) у 1984 годзе, пасля чаго выкладала матэматыку, піша «Наша Ніва».

У ліпені 2021-га Петражыцкай прысудзілі 15 сутак. У яе тады правялі ператрус дома, забралі ў КДБ, а пасля аформілі пратакол за «непадпарадкаванне». Калі дакладна завуча звольнілі з школы, невядома.

Настаўніцу арыштавалі ў кастрычніку 2024 года. Як паведамляе Belarus Women Foundation, нядаўна Петражыцкай прысудзілі 2 гады калоніі. Яе абвінавацілі ва ўдзеле ў «экстрэмісцкім фармаванні».

Вясна / Правы чалавека ў Беларусі

27 июля 2025 16:34

Мінскую лекарку з 30-гадовым стажам адправілі ў калонію па трох палітычных артыкулах

У Мінскім гарадскім судзе асудзілі пульманалагіню Алену Рудую. Лекарцы інкрымініравалі тры палітычныя артыкулы: ч. 3 арт. 361 КК (заклікі да прычынення шкоды нацыянальнай бяспецы Беларусі), ч. 3 арт. 361-1КК (уваходжанне ў склад экстрэмісцкага фармавання), ч. 1 арт. 368 КК (абраза Лукашэнкі).

Мінімальнае пакаранне, якое пагражала Рудой па іх, 4 гады калоніі, піша «Наша Ніва».

Алена Рудая нарадзілася ў 1969 годзе. Скончыла Беларускі дзяржаўны медыцынскі ўніверсітэт (1992). Працавала ў 10-й бальніцы Мінска (1992-2022), загадвала аддзяленнем.

Вясна / Правы чалавека ў Беларусі

27 июля 2025 11:32

🔗Перавод палітвязняў на турэмны рэжым

Турэмны рэжым — гэта камерныя умовы ўтрымання, дзе, у адрозненні ад калоніі, вязні ўвесь час сядзяць у чатырох сценах. У камерах людзі гадамі могуць сядзець у рэжыме 24/7 з аднымі і тымі ж людзьмі ў колькасці ад трох да дванаццаці чалавек.

На гэтых палітзняволеных ціск аказвалі адразу пасля этапу ў калонію. Некаторыя ў калоніі не змаглі атрымаць ніводную перадачу да пераводу на турэмны рэжым праз тое, што іх амаль адразу пасля этапу змяшчаюць у ПКТ. Адміністрацыя калоніі спецыяльна стварае невыносныя ўмовы ўтрымання, а потым яшчэ і пагаршае іх стан пераводам на рэжым з максімальнымі абмежаваннямі, пазбаўляючы іх нават свежага паветра.

На дадзены момант праваабаронцам «Вясны» вядомыя прозвішчы 178 палітвязняў, якіх па «надуманых правінах» адміністрацыя калоній карае за «парушэнне ўстаноўленага парадку». З іх 110 палітвязням узмацнілі рэжым і перавялі ў турму.

Чытаць па спасылцы 👉 https://spring96.org/be/news/107185

Вясна / Правы чалавека ў Беларусі

26 июля 2025 16:35

Паведамляйце праваабаронцам інфармацыю пра суды за ўдзел у пратэстах

Праваабаронцы атрымліваюць інфармацыю, што ў апошнія месяцы сталі актыўней прад'яўляць абвінавачванні паводле «народнага» арт. 342 КК (арганізацыя або ўдзел у дзеяннях, што груба парушаюць грамадскі парадак). Толькі ў адным Мінску вядома пра сотні чалавек, што абвінавачваюцца ва ўдзеле ў пратэстах.

Гэта звязана з тым, што хутка міне 5 гадоў з моманту акцый пратэсту, а значыць скончыцца тэрмін даўніны прыцягнення да адказнасці паводле гэтага крымінальнага артыкулу, пасля чаго іх ўдзельнікаў нельга будзе асудзіць. Але, адзначым, што працягнецца пераслед паводле арт. 293 КК (удзел у масавых беспарадках).

Калі ласка, паведамляйце пра суды і іншы пераслед. Паводле вашага жадання, інфармацыя будзе непублічнай. Дзеля бяспекі, вы можаце перадаць звесткі праз вашых сяброў, што жывуць у бяспечных краінах.

@viasnainfo | @viasna_bot | @ViasnaSOS

Вясна / Правы чалавека ў Беларусі

26 июля 2025 13:18

‼️Брэнд упрыгожванняў «Belaruskicry» прызнаны «экстрэмісцкім фармаваннем»

Пра гэта паведамляе сам брэнд у Instagram.

Адзначым, што ў Рэспубліканскім Спісе экстрэмісцкіх фармаванняў «Belaruskicry» пакуль няма.

Вясна / Правы чалавека ў Беларусі

26 июля 2025 11:34

«Расплюшчваеш вочы, а ў камеры 20-30 мышэй». Былы палітвязень пра ўмовы ў ШІЗА наваполацкай калоніі

«Самае страшнае трапіць у ШІЗА ў міжсезонне, калі адключаюць ацяпленне і ты сядзіш у падвале з такім надвор'ем, што і на вуліцы — холад і волкасць. Ежу, якую прыносяць, не адчуваеш, бо арганізм яе перапрацоўвае ў энергію, каб сагрэцца. Было вельмі шмат мышэй. Памятаю, спіш на падлозе — расплюшчваеш вочы, а ў камеры 20-30 мышэй, некаторыя па мне бегаюць. Хлебам затыкаў адтуліны, праз якія яны залазяць, — яны пакуль яго грызуць, не так хутка дабіраюцца ў камеру.

Таксама не хапала кіслароду. Калі мяне выпусцілі з ШІЗА, то ад свежага паветра я проста на парозе паваліўся. Знаходзячыся ў ШІЗА, я шмат страціў вагі ды проста стаў зялёнага колеру. ШІЗА — гэта не проста ізаляцыя, як яно мелася на ўвазе, гэта фізічная шкода твайму здароўю. І ўсе выдатна гэта разумеюць».

Вясна / Правы чалавека ў Беларусі

25 июля 2025 17:00

«Экстрэмісцкімі» прызналі старонкі праекту «Чын Чын Чэнэл», кнігу Джына Шарпа і песню «Беларусь»

Сёння адбылося чарговае абнаўленне «Спіса экстрэмісцкіх матэрыялаў». У яго трапілі:

📍Старонкі праекту «Чын Чын Чэнэл» у сацыяльных сетках;
📍Старонка ў Instagram «dzianisurbanovich»;
📍Кнігі Эрыха фон Манштэйна «Згубленыя перамогі», Эрвіна Рамэля «Баявыя аперацыі ў Паўночнай Афрыцы і на заходнім фронце ў Еўропе», Джына Шарпа «Ад дыктатуры да дэмакратыі»;
📍Музычная кампазіцыя «Беларусь» Карнея Тарасава;
📍Сайт і Telegram-канал праекту «planeta.prеss»;
📍YouTube-канал «ЛАМПА»;
📍Старонка ва «Укантакце «МЫ ПРОТИВ ЛУКАШЕНКО И ЕГО ДИКТАТУРЫ»;
📍Сайт і старонкі ў сацсетках праекту «Скорая взаимопомощь».

🔗Хроніка палітычнага пераследу

Вясна / Правы чалавека ў Беларусі

25 июля 2025 14:45

❗️У Беларусі +8 новых палітвязняў

Гэта Аляксандр Мядведзеў, Дар’я Семашкевіч, Віктар Іваньковіч, Андрэй Андрашчук, Пётр Лунёў, Яўген Невар, Сяргей Шацілаў, Карына Зяленская.

Хто гэтыя людзі і чаму праваабаронцы лічаць іх справы палітычна матываванымі 👉 spring96.org/be/news/118353

Спіс усіх палітвязняў Беларусі 👉 prisoners.spring96.org

Вясна / Правы чалавека ў Беларусі

25 июля 2025 13:45

70-гадовую жанчыну з Гомеля асудзілі за каментары

Сафія Бачурынская апошнія гады займалася сеткавым маркетынгам. Жанчына жыве актыўным жыццём. Яна любіць падарожжы і за апошнія гады пабывала ў некалькіх краінах ЕС і Украіне. Яшчэ адно хобі Сафіі — маляванне.

Бачурынскую затрымалі ў снежні 2024 года. А ў 2025 асудзілі па чатырох артыкулах — «абраза Лукашэнкі» (ч. 1 арт. 368 КК), «паклёп на Лукашэнку» (ч. 2 арт. 367 КК), «абраза прадстаўніка ўлады» (арт. 369 КК) і «ўваходжанне ў склад экстрэмісцкага фармавання» (ч. 3 арт. 361-1 КК).

Сутнасць абвінавачанняў невядомая, але выглядае, што справа ў каментарах у тэлеграме, піша «Наша Ніва». Акаўнт жанчыны быў не абаронены і цалкам адкрыты, таму сілавікам было нескладана яе ідэнтыфікаваць.

Бачурынскай прысудзілі пакаранне, звязанае з пазбаўленнем волі. Сёння яе дадалі ў спіс «экстрэмістаў» МУС.

Вясна / Правы чалавека ў Беларусі

25 июля 2025 12:00

💔Шматдзетныя бацькі, хворая на анкалогію жанчына, былы вайсковец: каго прызналі палітвязнямі ў ліпені

Сёння ў Беларусі налічваецца 1156 палітычных зняволеных. У ліпені да спісу палітвязняў дадаліся ўжо 21 чалавек.

20 чалавек былі абвінавачаныя паводле артыкулаў, звязаных з «экстрэмізмам» — сярод іх пераможца прадметных алімпіяд, настаўнік, IT-спецыялісты, адміністратарка беларускай Вікіпедыі і іншыя людзі. Асобна выйшла заява пра прызнанне палітвязнем музыкі Алега Хаменкі.

«Вясна» распавядае пра людзей, што былі прызнаныя палітвязнямі ў ліпені.

Чытаць па спасылцы 👉 https://spring96.org/be/news/118347

Вясна / Правы чалавека ў Беларусі

25 июля 2025 10:32

🔗Турэмны рэжым і новыя справы: як палітвязняў працягваюць пераследаваць у калоніях

Калі палітвязні трапляюць у калоніі, ціск на іх працягваецца: іх пазбаўляюць званкоў, спатканняў і перадач, змяшчаюць у штрафны ізалятар (ШІЗА) або памяшканне камернага тыпу (ПКТ). На палітвязняў «вешаюць» шматлікія парушэнні, за што іх пераводзяць на турэмны рэжым або ўзбуджаюць новыя крымінальныя справы па арт. 411 Крымінальнага кодэкса (злоснае непадпарадкаванне патрабаванням адміністрацыі папраўчай установы).

Па даных праваабаронцаў, па стане на 25 ліпеня як мінімум 110 палітзняволеных перавялі на турэмны рэжым і яшчэ 68 чалавек асудзілі паводле арт. 411 КК.

«Вясна» распавядае, якія метады пакарання выкарыстоўвае адміністрацыя калоній супраць палітвязняў і хто з палітычных вязняў прызнаны «злоснымі парушальнікамі рэжыму».

Чытаць па спасылцы 👉 https://spring96.org/be/news/107185

Вясна / Правы чалавека ў Беларусі

25 июля 2025 09:01

Былы палітвязень Дмітрыйс Міхайлаус атрымаў у СІЗА дубінкай за тое, што заступіўся за беларускамоўнага зняволенага

Грамадзянін Латвіі, правёў у беларускай турме тры з паловай гады за свае выказванні ў закрытым чаце ў адным з месенджараў. Яго пакаралі 4 гадамі калоніі за «абразу Лукашэнкі», «заклікі да дзеянняў супраць нацыянальнай бяспекі» і «распальванне варажнечы». Вызвалілі мужчыну 21 чэрвеня разам з іншымі беларускімі палітычнымі зняволенымі пасля візіту спецыяльнага пасланніка Трампа ў Мінск.

Міхайлаус засведчыў @radiosvaboda, што ў беларускіх турмах людзей пераследуюць за лісты і размовы на беларускай мове. За спробу заступіцца за беларускамоўнага чалавека латыша нават ударылі дубінкай.

Вясна / Правы чалавека ў Беларусі

24 июля 2025 16:00

⁉️Праваабаронцы прэзентавалі Дапаможнік па мірных сходах для беларусаў і беларусак за мяжой

Яму прысвечаны адмысловы сайт 👉 dapamozhnik.com. Дапаможнік, як адзначалася раней, адкажа на найбольш актуальныя пытанні, як арганізоўваць мірныя сходы за мяжой і ўдзельнічаць у іх.

У ім абраныя пакуль тры краіны — Грузія, Польша і Літва. Менавіта там адбылася найбольшая міграцыя беларусаў. Надалей гэты пералік краін плануецца пашыраць.

«Але для таго, каб і зрабіць тое, што мы зрабілі па трох краінах, і пашыраць гэты Дапаможнік, нам заўсёды трэба ведаць практыку, і таму мы як збіралі, так і збіраем досвед розных людзей як у арганізацыі сходаў, так і ўдзелу ў іх: з чым яны сутыкнуліся, наколькі пазітыўны гэты быў досвед, наколькі просты ці няпросты. Таму думаем, што ў будучыні можа закрыем яшчэ нейкую краіну, напрыклад Латвію, ці іншую, дзе жыве шмат беларусаў і беларусак».

Вясна / Правы чалавека ў Беларусі

24 июля 2025 14:08

✊ Падтрымайце «Вясну» на Patreon альбо аднаразовым данатам

На сёння за кратамі знаходзіцца чацвёра праваабаронцаў «Вясны» — іх асудзілі да пазбаўлення волі толькі за тое, што яны абаранялі правы беларусаў. Нягледзячы на гэта, праваабаронцы і валанцёры «Вясны» працягваюць сваю працу па абароне і фіксацыі парушэнняў правоў чалавека ў Беларусі.

Акрамя магчымасці падтрымаць «Вясну» падпіскай на Patreon, ёсць магчымасць зрабіць і аднаразовы данат праваабаронцам.

Усе сабраныя ахвяраванні будуць накіраваныя на падтрымку дзейнасці арганізацыі, а таксама палітзняволеных вясноўцаў.

❗️Калі ласка, рабіце пераводы толькі, калі для вас гэта бяспечна. Мы настойліва просім не рабіць пераводаў з картак беларускіх ці расійскіх банкаў

💵Падтрымаць «Вясну» аданаразовым данатам
💶Падтрымаць Вясну на Patreon
⁉️«Вясну» прызналі «экстрэмісцкім фармаваннем»: як цяпер супрацоўнічаць з намі?

Вясна / Правы чалавека ў Беларусі

28 июля 2025 10:30

❗️У Брэсце затрымалі дызайнера Дзмітрыя Царука

Пасля трох сутак у ізалятары часовага ўтрымання яго перавялі ў СІЗА № 7 горада Брэста.

Па непацверджанай інфармацыі, яму інкрымінуюць артыкул 361-4 КК (садзейнічанне экстрэмісцкай дзейнасці).

Дзмітрый — дызайнер, таксама ён меў дачыненне да PR, медыя і сацыяльных праектаў. Ён уваходзіў у склад кампаніі «Fajno», якая ў тым ліку распрацавала дызайн лампы-птушкі.

🗣Паведаміць пра затрыманне
⚖️Атрымаць бясплатную юрыдычную кансультацыю
📝Абскардзіць дзеянні дзяржаўных органаў
✍️Звязацца з журналістамі «Вясны»

Вясна / Правы чалавека ў Беларусі

28 июля 2025 09:02

💌Беларусы Бельгіі напісалі лісты палітвязням, што адзначаюць свой Дзень Народзінаў у ліпені

У нядзелю, 27 ліпеня, беларуская дыяспара ў Брусэлі правяла акцыю ў гонар Дня Незалежнасці Беларусі — у гонар прыняцця Дэкларацыі аб дзяржаўным суверэнітэце ў 1990 годзе.

Удзельнікі сабраліся, каб ушанаваць гэты важны гістарычны дзень, а таксама выказаць салідарнасць з палітычнымі зняволенымі.

Падчас мерапрыемства прысутныя падпісалі паштоўкі для беларускіх палітвязняў, якія маюць Дзень Народзінаў у ліпені, але не маюць магчымасці адсвяткаваць яго з роднымі і блізкімі.

Вясна / Правы чалавека ў Беларусі

27 июля 2025 14:04

«Расцягнулі каля сцяны і проста пачалі збіваць дубінамі». Як катуюць вязняў у наваполацкай калоніі

Былы палітвязень распавядае, што збіццё ў штрафным ізалятары наваполацкай калоніі — распаўсюджаная з'ява:

«Знаходзячыся ў ШІЗА невялікую колькасць часу, я чуў, як збівалі іншых. У суседнім ШІЗА хлопец таксама падчас абыходу казаў, што холадна, ён прасіў зачыніць акно, таму што баяўся, што не вытрымае і памрэ. Але яго проста ў камеры пачыналі збіваць. Пры гэтым хлопец гучна крычаў і маліў, каб яго не білі. Гэта значыць, за звычайнае пытанне або просьбу там могуць збіць. У асноўным, гэта робіцца на прагулачных дворыках, каб ніхто не бачыў і нікуды гэта не сышло. Таму можна дакладна сцвярджаць, што фізічная сіла ў гэтай калоніі ўжываецца».

Вясна / Правы чалавека ў Беларусі

27 июля 2025 09:04

📄 Што пачытаць у нядзелю? Сабралі для вас галоўныя матэрыялы «Вясны» за тыдзень:

🔹Ціхі тэрор: як рэжым у Беларусі змяніў паказальныя рэпрэсіі на нябачныя

🔹Да маці палітвязня Дзяніса Сальмановіча прыйшлі з ператрусам

🔹Шматдзетныя бацькі, хворая на анкалогію жанчына, былы вайсковец: каго прызналі палітвязнямі ў ліпені

🔹Заява праваабарончай кааліцыі аб недапушчальнасці сексуалізаванага пераследу і неабходнасці сістэмнага рэагавання на выпадкі гвалту і злоўжывання ўладай

🔹Праваабаронцы прэзентавалі Дапаможнік па мірных сходах для беларусаў і беларусак за мяжой

🔹Палітвязня Мікіту Самарына асудзілі да 6 гадоў калоніі

🔹«Дручкамі па нагах, па спіне». Былы палітвязень распавёў пра збіццё і жорсткія ўмовы ў наваполацкай калоніі

💳Падтрымаць «Вясну» на Patreon | Аднаразовым данатам

Вясна / Правы чалавека ў Беларусі

26 июля 2025 14:02

Палітвязню з Маладзечна, у якога няма адной нагі, прысудзілі 4 гады калоніі

53-гадовы жыхар Маладзечна Ігар Сідаровіч атрымаў прысуд ужо па трэцяй палітычнай крымінальнай справе.

Вясной 2021-га яго асудзілі спачатку за ўдзел у пратэстах — тады абмежаваліся штрафам. Летам 2021-га Сідаровіча асудзілі за «абразу» начальніка Маладзечанскага РУУСа Вадзіма Прыгары і далі паўтара года «хатняй хіміі».

У канцы 2024 года Сідаровіча арыштавалі зноў — цяпер за «садзейнічанне экстрэмісцкай дзейнасці» (арт. 361-4 КК). Палітвязня ўтрымлівалі ў СІЗА нягледзячы на інваліднасць — у яго няма адной нагі.

У ліпені Сідаровічу вынеслі новы прысуд — чатыры гады калоніі, піша «Наша Ніва».

Вясна / Правы чалавека ў Беларусі

26 июля 2025 13:02

🌿Праваабарончая праграма «Вясна»

1:34 Лячэбна-працоўныя прафілакторыі: эфектыўнае лячэнне ці ўзаконенае рабства?

16:40 Праваабаронцы прэзентавалі Дапаможнік па мірных сходах для беларусаў і беларусак за мяжой

27:21 Акцыя з нагоды гадавіны затрымання вясноўцаў прайшла ў Варшаве

Вясна / Правы чалавека ў Беларусі

26 июля 2025 09:04

Дапамога былому палітвязню Мікіце Лосіку аднавіцца пасля СІЗА і пачаць новае жыццё

25-гадовага Мікіту асудзілі да трох гадоў абмежавання волі з накіраваннем у ПУАТ («хіміі») паводле арт. 361-4 КК (садзейнічанне экстрэмісцкай дзейнасці). Яго вызвалілі ў зале суда.

Лосік быў затрыманы ў красавіку за нібыта перасылку некалькіх фатаграфій перамяшчэння ваеннай тэхнікі ў 2022 годзе Telegram-каналу «Беларускі Гаюн».

BYSOL збірае грошы на аднаўленне Мікіты — падтрымаць яго можна па спасылцы

Вясна / Правы чалавека ў Беларусі

25 июля 2025 16:00

«У зняволеных зубы гніюць, а ім ніхто не аказвае меддапамогу». Былы палітвязень пра лекараў ПК №1

Медычная дапамога ў калоніі — фармальнасць. Начальніцай медчасткі ў наваполацкай калоніі з'яўляецца Фурс. Са словаў былога палітвязня, яна не падпісвае медычныя бандэролі, а ў самой медчастцы часта адсутнічаюць неабходныя апараты і складана трапіць на прыём да лекараў:

«Родныя два або тры разы дасылалі ў калонію медбандэроль, а яе мне так і не аддалі. Яе проста не прымалі і адпраўлялі назад. Памятаю, як яшчэ адзін палітычны хадзіў да Фурс падпісаць медбандэроль — яна штораз не падпісвала. І калі ён у чарговы раз да яе прыйшоў, сказала, што націсне трывожную кнопку і скажа супрацоўнікам, што ён да яе дамагаецца, калі ён яшчэ раз да яе з'явіцца».

Вясна / Правы чалавека ў Беларусі

25 июля 2025 14:17

❗️«Дручкамі па нагах, па спіне». Былы палітвязень распавёў пра збіццё і жорсткія ўмовы ў наваполацкай калоніі

З 2020 года на волю выйшлі больш за 1,5 тысячы палітвязняў, за кожным і кожнай з якіх стаіць вялікая гісторыя пераследу, выжывання за кратамі і адаптацыі на волі. Аляксандра (імя змененае ў мэтах бяспекі) затрымалі за каментар і асудзілі да некалькіх гадоў зняволення. Свой тэрмін ён адбываў у двух калоніях і выйшаў на волю пасля заканчэння тэрміну.

У наваполацкай калоніі мужчына зазнаў збіццё за тое, што прасіў закрыць акно зімой у штрафным ізалятары. Былы палітвязень распавёў «Вясне» пра ўмовы ўтрымання, пра галюцынацыі ад холаду ў штрафным ізалятары, пра тое, як зняволеным з «белымі біркамі» прысвойваюць «экстрэмісцкі» прафулік, а таксама пра цяжкасці адаптацыі на волі.

«"Жоўтабірачнікі" заўсёды пад прыцэлам. Кажуць, што звычайныя зняволеныя сядзяць год за год, а палітвязні — год за два ці нават тры, таму што рэжым вельмі адрозніваецца».

Вясна / Правы чалавека ў Беларусі

25 июля 2025 12:45

За першыя тры месяцы года пракуроры Брэсцкай вобласці накіравалі ў суды 119 заяў аб прызнанні інфармацыйнай прадукцыі «экстрэмісцкімі матэрыяламі»

У прыватнасці, гаворка пра 65 Telegram-чатаў і каналаў, 37 старонак у «Аднакласніках», 34 акаўнта ў Facebook і 34 старонкі ў Instagram, 7 каналаў на YouTube, 6 акаўнтаў у TikTok, 4 інтэрнэт-сайта і 4 старонкі ва «Укантакце», 2 акаўнты ў «X» (Twitter).

Акрамя таго, «экстрэмісцкімі матэрыяламі» прызналі плакаты, стыкеры, налепкі з выявай абразоў, намаляваных у стылі анімэ.

Вясна / Правы чалавека ў Беларусі

25 июля 2025 11:32

Рэпрэсіі не спыняюцца — з красавіка ў «спіс экстрэмістаў» дадалі 22 жыхароў Бярозы, асуджаных па «народным» артыкуле

Усім ім быў інкрымінаваны арт. 342 КК (удзел у дзеяннях, якія груба парушаюць грамадскі парадак). Таксама адзначым, што ў «спіс экстрэмістаў» за гэты перыяд дадалі і іншых жыхароў Бярозаўскага раёну, асуджаных паводле іншых палітычных артыкулаў.

Як раней паведамлялі праваабаронцы, з лета 2024 года ў Бярозе пачалі судзіць па крымінальным артыкуле 342 за мірныя пратэсты лета 2020 года. Суды праходзілі групамі па 2-4 чалавекі, на пачатак красавіка праваабаронцам было вядома пра 26 асуджаных мясцовых жыхароў.

Калі ласка, паведамляйце пра суды і іншы пераслед. Паводле вашага жадання, інфармацыя будзе непублічнай. Дзеля бяспекі, вы можаце перадаць звесткі праз вашых сяброў, што жывуць у бяспечных краінах.

@viasnainfo | @viasna_bot | @ViasnaSOS

Вясна / Правы чалавека ў Беларусі

25 июля 2025 09:45

У «Спіс экстрэмістаў» дадалі яшчэ 16 прозвішчаў — цяпер у ім 5559 чалавек

25 ліпеня МУС зрабіла традыцыйны пятнічны апдэйт «Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».

Сярод іншых, у спіс дадалі асуджанага па «справе Гаюна» Віталя Чавусава, а таксама малодшага брата палітвязня Ігара Лосіка Мікіту Лосіка.

Да допіса далучаны апошні «Пералік грамадзян, якія маюць дачыненне да экстрэмісцкай дзейнасці».

⁉️«Мама, я экстрэміст». Якія абмежаванні накладаюцца на асоб, уключаных у «Спіс экстрэмістаў»

Вясна / Правы чалавека ў Беларусі

24 июля 2025 16:45

У «Спіс экстрэмісцкіх матэрыялаў» дадалі дзве пазіцыі

Там з'явілася старонка ў Facebook «Асацыяцыя Палiвязняў Беларусi», а таксама Telegram-канал «BelVarta» — экстрэмісцкім таксама прызналі ягоны чат і лагатып.

🔗Хроніка палітычнага пераследу
🗣Паведаміць пра затрыманне
⚖️Атрымаць бясплатную юрыдычную кансультацыю
📝Абскардзіць дзеянні дзяржаўных органаў
✍️Звязацца з журналістамі «Вясны»

Вясна / Правы чалавека ў Беларусі

24 июля 2025 15:05

📝Заява праваабарончай кааліцыі аб недапушчальнасці сексуалізаванага пераследу і неабходнасці сістэмнага рэагавання на выпадкі гвалту і злоўжывання ўладай

У сувязі са з’яўленнем інфармацыі пра выпадкі недапушчальных паводзін з боку Андрэя Стрыжака, сузаснавальніка Фонду салідарнасці BYSOL, які, паводле заяў некалькіх беларускіх актывістак, рассылаў няпрошаныя фотаздымкі інтымнага характару і здзяйсняў іншыя няпрошаныя сэксуалізаваныя дзеянні, прадстаўнікі беларускай праваабарончай супольнасці выступілі з супольнай заявай.

«Мы хочам нагадаць, што праваабарончая дзейнасць і любая іншая дзейнасць, звязаная з дапамогай людзям, накладае асаблівую сацыяльную адказнасць на тых, хто яе ажыццяўляе. Умовы вымушанай міграцыі, у якіх сёння знаходзіцца значная частка дэмакратычнай і праваабарончай супольнасцяў, ствараюць дадатковыя ўразлівасці, а адказнасць набывае яшчэ большае значэнне».

Вясна / Правы чалавека ў Беларусі

24 июля 2025 11:51

У гомельскай папраўчай калоніі №4 для жанчын ужо некалькі дзён не працуе ніводны таксафон — зняволеныя не могуць патэлефанаваць родным

Пра гэта паведамляе @MAYDAYMog.

Праблему прызналі ў гомельскім аддзяленні «Белтэлекама». Рамонтнікі спрабуюць аднавіць сувязь, але спецыялістаў бракуе.

Адзначаецца, што пры гэтым відэазванкі з дапамогай IP-тэлефаніі ажыццяўляюцца ў ранейшым рэжыме. Але кампутараў так мала, што датэлефанавацца могуць толькі пару дзясяткаў чалавек за дзень.

Паводле інфармацыі праваабаронцаў, у ПК-4 свае тэрміны адбываюць 120 палітзняволеных жанчын.