Вясна / Правы чалавека ў Беларусі

13 мая 2025 14:00

🇧🇪У Брусэлі адбылася акцыя ў падтрымку Вікторыі Кульшы і ўсіх палітзняволеных Беларусі

Акцыя была прымеркавана да Дня Палітвязняў Беларусі, што будзе адзначацца 21 траўня.

Падчас акцыі адбылася паэтычная імпрэза «Вершы з-за кратаў!», дзе беларусы былі голасам палітвязняў і чыталі іх вершы, напісаныя ў наволі. Таксама ўдзельнікі напісалі лісты і паштоўкі, тым хто за кратамі, каб яшчэ раз паказаць што «Нам не ўсё адно».

✍️Калі ласка, паведамляйце пра анонсы акцый і мерапрыемстваў у сваіх гарадах праваабаронцам на @Viasnainfo

👀Падрабязную інфармацыю пра ўсе мерапрыемствы можна паглядзець на prisonersday.info

Вясна / Правы чалавека ў Беларусі

13 мая 2025 11:10

Чарговае папаўненне «Спіса экстрэмісцкіх матэрыялаў»

У яго трапілі Telegram-каналы «Зеркало – Новости | TUT.ВY», «Dark Baron», Instagram старонкі «zmitr_ok», «kalinouskipolk», старонка ў Facebook «Pavel Latushka», а таксама старонка ва «Укантакце» «Зробiм Беларусь лепей».

Вясна / Правы чалавека ў Беларусі

13 мая 2025 09:41

❗️Сілавікі пачалі прыходзіць да сябраў партыі БСДП, якую прызналі «экстрэмісцкім фармаваннем»

Пра гэта паведамляе @BSDP_Hramada.

«Стала вядома аб першым візіце праваахоўнікаў да былога сябра БСДП, які знаходзіцца за мяжой. Сённяшняй раніцай, 13 траўня, супрацоўнікі ў цывільным завіталі да бацькоў актывіста. Папрасілі паказаць асабістыя рэчы.

У выніку забралі партыйны сцяг, партыйны білет, перадвыбарчыя плакаты, буклеты, Статут партыі і іншую партыйную літаратуру. Да ведама партыйная сімволіка з ружай таксама прызнана "экстрэмісцкай"».

Вясна / Правы чалавека ў Беларусі

12 мая 2025 19:25

Памерла 39-гадовая экс-палітзняволеная Ганна Кандраценка. У калоніі ў яе знайшлі рак, але не вызвалілі

«Нашай Ніве» стала вядома пра смерць экс-палітзняволенай Ганны Кандраценка. Яе не стала 5 лютага 2025 года. Ганна не дажыла некалькі месяцаў да свайго 40-годдзя.

12 ліпеня 2022 года суддзя Наталля Панасенка прысудзіла Ганне 3 гады калоніі, а таксама штраф у памеры 100 базавых паводле арт. 369 КК (абраза прадстаўніка ўлады), арт. 368 КК (абраза Лукашэнкі) і арт. 391 КК (абраза суддзі). Жанчыну затрымалі за каментары ў тэлеграм-каналах.

У калоніі ў Ганны дыягнаставалі рак шыйкі маткі. Няглядзечы на цяжкую хваробу, Кандраценка не вызвалілі датэрмінова.

Больш за тое, жанчыну ў чарговы раз судзілі паводле арт. 369 КК. Суддзя Вольга Краўчанка прысудзіла Ганне год пазбаўлення волі і 50 базавых штрафу, але новы тэрмін быў паглынуты ранейшым, больш строгім.

Ганна адбыла свой тэрмін цалкам. Яна вызвалілася 20 чэрвеня 2024 года. На свабодзе жанчына прабыла трохі больш за паўгода, змагаючыся са сваёй хваробай.

Вясна / Правы чалавека ў Беларусі

12 мая 2025 16:04

🎥«У жаночай калоніі я лячылася куркумай». Гісторыя Антаніны Канавалавай

Як лечаць зубы без абязбольвання? Што робяць з вошамі? Хто аказваецца побач, калі жанчына рашаецца на суіцыд?

Антаніна Канавалава правяла амаль 4,5 гады за кратамі. Калі садзілася — у яе было двое дзяцей. Калі выйшла — ужо чацвёра. Развод у турме, выжыванне ў калоніі, адаптацыя на волі — сумленная і шчырая размова Антаніны з Вольгай Вялічка.

https://www.youtube.com/watch?v=opjGVVql0sY

Вясна / Правы чалавека ў Беларусі

12 мая 2025 15:13

❗️Праваабаронцы заклікаюць дакументаваць факты катаванняў і парушэнняў правоў чалавека ў Беларусі

«Вясне» вядома, што ў Беларусі працягваюцца масавыя катаванні і збіванні, утрыманне ў нечалавечых умовах у ізалятарах. Мы разумеем, што праз страх і рызыкі пераследу людзі баяцца звяртацца да праваабаронцаў для дакументавання гэтых фактаў. Але мы заклікаем з дапамогай фота і відэа самім фіксаваць сляды катаванняў і збіванняў. Акрамя гэтага, звяртайцеся да лекараў, каб зафіксаваць траўмы і захаваць медыцынскія дакументы. Гэта дапаможа ў будучыні прыцягнуць да адказнасці ўсіх датычных да рэпрэсій.

✍️Вы можаце самастойна задакументаваць ваш выпадак, дзякуючы «Практычнаму дапаможніку для пацярпелых»

🔹Калі вы пацярпелі ад катаванняў з боку сілавікоў ці сутыкнуліся з бесчалавечным і жорсткім абыходжаннем у месцах зняволення, парушэннем правоў чалавека — калі ласка, пішыце @ViasnaDOC ці viasnadoc@spring96.org

Вясна / Правы чалавека ў Беларусі

12 мая 2025 12:31

🗣Паведамляйце праваабронцам прозвішчы вызваленых па памілаванні палітвязняў

7 траўня стала вядома пра вызваленне 42 палітвязняў па памілаванні — паведамлялася, што сярод іх 18 жанчын і 24 мужчыны.

Папярэдняя хваля памілаванняў палітвязняў адбылася 24 студзеня 2025 года. Тады вызвалілі восем чалавек, з якіх тры жанчыны. Усяго на сённяшні момант з ліпеня 2024 года па памілаванні вызвалілі 300 палітвязняў.

🔹Калі вам вядома пра людзей, якія выйшлі на волю, калі ласка, паведамляйце праваабаронцам на @Viasnainfo

Вясна / Правы чалавека ў Беларусі

12 мая 2025 09:52

⚡️У Беларусі прызналі «экстрэмісцкім фармаваннем» Беларускую сацыял-дэмакратычную партыю (Грамада)

Адпаведнае рашэнне было прынятае МУС 7 траўня.

Паводле ведамства, дачыненне да партыі маюць Ігар Барысаў, Ігар Маслоўскі, Ганна Канюс.

Беларуская сацыял-дэмакратычная партыя (Грамада) — палітычная партыя, якая была ўтворана 2 сакавіка 1991 года. БСДП працягвае традыцыі Беларускай сацыялістычнай Грамады (1902—1918) і Беларускай сацыял-дэмакратычнай партыі (1918—1924).

20 верасня 2023 года Вярхоўны суд Беларусі ліквідаваў Беларускую сацыял-дэмакратычную партыю (Грамада).

Вясна / Правы чалавека ў Беларусі

12 мая 2025 09:00

📝Нагадваем кантакты Праваабарончага цэнтру «Вясна»

🔹Паведаміць пра затрыманне, даслаць інфармацыю з судовых пасяджэнняў: Telegram-бот @viasna_bot | @ViasnaSOS, @SOSViasna;
🔹Звярнуцца па дапамогу па юрыдычных пытаннях, абскардзіць дзеянні дзяржаўных органаў: @zvarot96 | zvarot@spring96.org;
🔹Калі вы пацярпелі ад катаванняў з боку сілавікоў ці сутыкнуліся з жорсткім абыходжаннем за кратамі: @ViasnaDOC | viasnadoc@spring96.org;
🔹Распавесці сваю гісторыю журналістам «Вясны»: @Viasnainfo | viasna@spring96.org.

📍Кантакты рэгіянальных прадстаўніцтваў «Вясны»: Бабруйск — @babrujskspring; Барысаў — @Spring_help_r; Брэст — @Nadbuzanski, @BrestSOS; Гомель — @homelspring; Магілёў — @maydayhelp, @mspring_help; Маладэчна — @Maladecza_help; Наваполацк — @impaynes; Віцебск — @Viciebsk_spring; Светлагорск — @svietlahorskspring

❗️Афіцыйныя кантакты ПЦ «Вясна» можна паглядзець у апісанні @viasna96 ці на старонцы «Кантакты» на spring96.org

⁉️«Вясну» прызналі «экстрэмісцкім фармаваннем»: як цяпер супрацоўнічаць з намі?

Вясна / Правы чалавека ў Беларусі

11 мая 2025 14:02

✊ Падтрымайце «Вясну» на Patreon альбо аднаразовым данатам

На сёння за кратамі знаходзіцца чацвёра праваабаронцаў «Вясны» — іх асудзілі да пазбаўлення волі толькі за тое, што яны абаранялі правы беларусаў. Нягледзячы на гэта, праваабаронцы і валанцёры «Вясны» працягваюць сваю працу па абароне і фіксацыі парушэнняў правоў чалавека ў Беларусі.

Акрамя магчымасці падтрымаць «Вясну» падпіскай на Patreon, ёсць магчымасць зрабіць і аднаразовы данат праваабаронцам.

Усе сабраныя ахвяраванні будуць накіраваныя на падтрымку дзейнасці арганізацыі, а таксама палітзняволеных вясноўцаў.

❗️Калі ласка, рабіце пераводы толькі, калі для вас гэта бяспечна. Мы настойліва просім не рабіць пераводаў з картак беларускіх ці расійскіх банкаў

💵Падтрымаць «Вясну» аданаразовым данатам
💶Падтрымаць Вясну на Patreon
⁉️«Вясну» прызналі «экстрэмісцкім фармаваннем»: як цяпер супрацоўнічаць з намі?

Вясна / Правы чалавека ў Беларусі

11 мая 2025 09:04

📄 Што пачытаць у нядзелю? Сабралі для вас галоўныя матэрыялы «Вясны» за тыдзень:

🔹Cалідарнасць супраць рэпрэсій! 21 траўня — Дзень палітвязняў

🔹Супраць Ніны Багінскай узбудзілі крымінальную справу за адзіночныя пікеты

🔹У Беларусі за кратамі — мінімум дзевяць палітвязняў з інваліднасцю

🔹Былы «каліновец», настаўнік фізкультуры, майстрыца па манікюры: каго прызналі палітвязнямі ў красавіку

🔹У Беларусі памілавалі яшчэ 42 палітвязня

🔹Сітуацыя з правамі чалавека ў Беларусі. Красавік 2025

🔹Мінімум 26 палітвязняў у красавіку цалкам адбылі тэрміны, яшчэ аднаго — памілавалі

🔹«Гэта тэндэнцыя». Звычайным зняволеным у жаночай калоніі № 4 пачалі прысвойваць «экстрэмісцкі статус»

💳Падтрымаць «Вясну» на Patreon | Аднаразовым данатам

Вясна / Правы чалавека ў Беларусі

10 мая 2025 12:34

Абмежаванні ў атрыманні адукацыі для «злосніц» і «экстрэмістак» гомельскай калоніі

Пра гэта распавядае былая палітзняволеная, якая адбывала свой тэрмін у ПК №4.

«Адзін званок на месяц — дадатковае абмежаванне ў жаночай калоніі якое было ўведзена начальнікам калоніі для злосна парушаючых рэжым унутраным указам. У мужчынаў, наколькі я ведаю, такіх абмежаванняў няма.

Атрыманне адукацыі ў калоніі для 10-й катэгорыі — рэальная праблема. Нам не дазваляюць вучыцца ў калоніі, нават на курсах, якія дазволілі ладзіць адной асуджанай па ангельскай мове. Туды запісваліся ўсе жадаючыя, але 10-й катэгорыі не дазволілі. Ці курсы, якія ладзіць праваслаўная епархія па дамоўленасці з ДВП для ўсіх калоній з Жыровіцкім манастыром; ці курсы "ЕШКА"».

Вясна / Правы чалавека ў Беларусі

10 мая 2025 09:03

🗣Калі вы знаходзіцеся ў бяспецы — распавядзіце пра палітычны пераслед, з якім сутыкнуліся вы ці вашыя блізкія ў Беларусі

Для людзей у Беларусі камунікаваць з праваабаронцамі небяспечна, таму апошнім часам можа здавацца, што сітуацыя ў Беларусі стала лепш і рэпрэсіі спыніліся. Аднак гэта не так.

Чаму гэта важна?

• Кожная гісторыя дапамагае дакументаваць злачынствы рэжыму. Гэта доказ, які застаецца.
• Чым больш сведчанняў, тым цяжэй свету ігнараваць тое, што адбываецца ў Беларусі.
• Без дакументаваных фактаў немагчыма будзе прыцягнуць вінаватых да адказнасці.

❗️Па вашым жаданні, інфармацыя, якую вы дашлеце, не будзе нідзе апублікаваная і будзе выкарыстоўвацца толькі для статыстыкі. Мы не патрабуем ад вас асабістай ці ўразлівай інфармацыі — паведамляйце толькі тое, што лічыце важным і бяспечным для сябе і для людзей у Беларусі.

Кожная гісторыя — гэта кавалачак вялікай карціны таго, што адбываецца ў Беларусі.

@ViasnaSOS | @SOSViasna | @Viasnainfo

Вясна / Правы чалавека ў Беларусі

09 мая 2025 14:00

💔Чаму менавіта 21 траўня абраны Днём палітвязняў?

Менавіта ў гэты дзень у шклоўскай калоніі № 17 у 2021 годзе загінуў Вітольд Ашурак — мужны актывіст, асуджаны да пяці гадоў за ўдзел у мірных пратэстах. Вітольд мусіў выйсці на свабоду сёлета — 9 чэрвеня 2025 года, аднак гэтага не адбудзецца.

Афіцыйная прычына смерці — спыненне сэрца. Аднак яго сваякі сцвярджалі: да зняволення праблем са здароўем у Вітольда не было. Пасля яго смерці Следчы камітэт апублікаваў відэа, на якім палітвязень ледзь стаіць на нагах.

Яго цела перадалі з забінтаванай галавой. Справу па факту смерці не завялі дагэтуль.

🔹Cалідарнасць супраць рэпрэсій! 21 траўня — Дзень палітвязняў

Вясна / Правы чалавека ў Беларусі

09 мая 2025 11:31

📍Умовы ўтрымання для «злосніц» і «экстрэмістак» у гомельскай жаночай калоніі

Прафулік і статус «злосніцы» прадугледжваюць шэраг абмежаванняў, якія ўскладняюць жыццё зняволеных і без таго цяжкае зняволенне. Ва ўмовах, калі жанчына не мае вольнага часу і асабістай прасторы, палепшыць сітуацыю можа спортзала і клуб, але гэтага «экстрэмісткі» ў большасці выпадкаў пазбаўлены.

Паводле былой палітзняволенай, з «экстрэмісцкага» прафуліку, як правіла, зняволеных не здымаюць — ён з імі да канца тэрміну.

«10-я палітычная катэгорыя прафуліку не здымаецца — яна з табой на ўвесь твой тэрмін. Калі, напраклад, на прафуліку па суіцыду, то праз год пры адсутнасці спагнанняў і пры добрых характарыстыках яго магчыма зняць, і такія выпадкі я ведаю. Зняць 10-ю катэгорыю ты не маеш шанцаў. І з ёй ты дакладна не маеш права прэтэндаваць на ніякае ўмоўна-датэрміновае вызваленне, ні на змякчэнне пакарання».

Вясна / Правы чалавека ў Беларусі

13 мая 2025 12:02

«Добра, што людзі выйшлі раней». Што вядома пра новую хвалю памілаваньняў палітвязняў

Юрыст «Вясны» Павел Сапелка пракаментаваў «Радыё Свабода» апошнія вызваленні палітвязняў па памілаванню.

«Я не стаў бы абясцэньваць працэс памілавання. Кожны дзень, праведзены за кратамі, — пекла для людзей. Безумоўна, добра, што людзі выйшлі раней.

Праваабаронцы падкрэсліваюць, што многія вызваленыя і праз памілаванне, і па поўным адбыцці тэрміну кажуць, што яны знаходзяцца пад татальным кантролем, ціскам. Такі ціск можна расцэньваць як пераслед з палітычных матываў.

Для некаторых выезд з краіны быў умовай памілавання, а гэта дэ-факта — дэпартацыя, што таксама злачынства. Для многіх татальны кантроль і процьма абмежаванняў сталі прычынай таго, што людзі вымушаныя з'ехаць за мяжу. Часта з вялікімі цяжкасцямі. Некаторым, наадварот, чыняць усялякія перашкоды, каб яны не маглі выехаць з краіны.

Хоць усё гэта, магчыма, мае на мэце прымусіць чалавека выязджаць нелегальна, каб ён у бліжэйшы час не мог вярнуцца ў Беларусь».

Вясна / Правы чалавека ў Беларусі

13 мая 2025 10:15

💔«Узімку без цёплых рэчаў, недаядала, была галоднай». Суседкі расказваюць пра памерлую экс-палітзняволеную Ганну Кандраценка

Былая палітзняволеная рэдактарка канала «Мая краіна Беларусь» Ірына Шчасная, якая ў калоніі была ў адным атрадзе з Ганнай, распавяла «Нашай Ніве» пра жанчыну.

«Яна сказала мне, што дзетак і мужа ў яе няма, у яе ёсць толькі маці. Яна ніколі падрабязна не расказвала пра яе (і агулам пра сям’ю), нібыта абараняючы, але мы зразумелі, што маці ў яе хварэла. Было бачна, як Аня за яе турбуецца. Калі Ані прыйшоў мамін ліст (а ёй рэдка прыходзілі лісты), яна проста дрыжэла над ім! Гэта для яе была сапраўдная падзея.

Яе шкадавалі, нават крымінальніцы намагаліся яе накарміць. Мы таксама дапамагалі чым маглі — нейкімі рэчамі, дробязямі, проста ўвагай. Нават праз забарону адміністрацыі — знаходзілі шляхі».

Вясна / Правы чалавека ў Беларусі

13 мая 2025 09:03

Збор сродкаў да Міжнароднага дня абароны правоў людзей з інваліднасцю

«Хуткая гуманітарная дапамога» запускае новы збор для падтрымкі людзей з інваліднасцю, якія апынуліся ў складанай сітуацыі праз палітычныя рэпрэсіі.

Куды пойдуць сродкі?

🔸медыкаменты і медыцынскія сродкі (напрыклад, вазкі, бандажы, прылады для рэабілітацыя і іншае);
🔸аплата медыцынскіх маніпуляцый, умяшанняў і кансультацый медыкаў;
🔸аплата сацыяльных таксі і іншых транспартных паслуг, што неабходныя для атрымання медыцынскай дапамогі.

Арганізатары плануюць сабраць 10 000 еўра. Памер выплат для кожнай сям'і будзе залежаць ад іх патрэб. Максімальная сума выплат — 300 еўра.

Падтрымаць збор можна па спасылцы

Вясна / Правы чалавека ў Беларусі

12 мая 2025 16:30

🌿У Сейме Латвіі адкрылі выставу з малюнкамі беларускіх палітвязняў «Мастацтва з-за кратаў»

У Сейме Латвіі адбылося адкрыццё выставы «Мастацтва з-за кратаў», якую арганізавалі Праваабарончы цэнтр «Вясна» і асацыяцыя беларусаў Латвіі «Суполка». Мерапрыемства ладзілася ў межах Канферэнцыі Балтыйскай Асамблеі і Савета міністраў краін Балтыі «Межы дыпламатыі і дыпламатыя за межамі межаў».

У адкрыцці выставы прынялі ўдзел дэмакратычная лідарка Святлана Ціханоўская, віцэ-спікерка Сейма Латвіі Антаніна Нянашава, дэпутатка латвійскага парламента Лэйла Расіма, якая з'яўляецца сімвалічнай хроснай грамадзянкі Латвіі Алы Сакаленкі — усе яны выступілі з моцнымі прамовамі.

«Наша салідарнасць сёння — гэта падтрымка барацьбы палітвязняў і напамін усяму свету аб правах на свабоду, годнасць і будучыню».

Вясна / Правы чалавека ў Беларусі

12 мая 2025 15:30

КДБ апячатаў дзверы мінскай кватэры беларускага фотажурналіста Генадзя Верацінскага

Пра гэта мужчына, які знаходзіцца ў вымушанай эміграцыі, паведаміў @pozirkonline.

На пячатцы можна прачытаць: «Апячатана. Накладзены арышт. Уваход забаронены». Папера падпісаная супрацоўнікам КДБ Смірновым Н.Э.

«Калі апячатана тымі, хто надрукаваў, то ў мяне крымінальная справа і ўсё астатняе. Я яўна не проста сведка. Мне пры гэтым нічога не паведамлялі», — адзначыў Верацінскі. Паводле яго слоў, не было папярэджанняў і ў паштовай скрыні.

«Калі з’язджаў у 2023 годзе з Беларусі, мне прыходзілі позвы, пастаянна тэлефанавалі. Тады я быў у шпіталі, у рэанімацыі. Калі іх набралі па тым нумары, перапыталі, то даведаліся, што гэта быў Следчы камітэт», — прыгадаў журналіст.

Верацінскі адзначыў, што сябры тады расцэньвалі сітуацыю як вельмі небяспечную і раілі з’ехаць. «Пасля гэтага ніякіх справаў з сілавікамі я не меў», — дадаў ён.

🔗Хроніка палітычнага пераследу

Вясна / Правы чалавека ў Беларусі

12 мая 2025 13:40

📝Чыгуначнік, інжынерка, бізнэсоўцы: каго дадалі ў «спіс тэрарыстаў» на мінулым тыдні

Камітэт дзяржаўнай бяспекі 8 траўня ў чарговы раз абнавіў спіс «асоб, якія маюць дачыненне да тэрарыстычнай дзейнасці». У яго трапілі яшчэ дзесяць чалавек: Павел Лашчанка, Андрэй Варонін, Аляксандр Кендысь, Уладзімір Карней, Максім Солап, Вячаслаў Дземянчонак, Таццяна Марыніч, Анастасія Хамянкова, Яўген Пугач, Ірына Суржык.

Цяпер у спісе 1286 чалавек, з іх 592 — беларусы.

Распавядаем, каго КДБ уключыў у «спіс тэрарыстаў» і за што яны былі асуджаныя.

Чытаць па спасылцы 👉 https://spring96.org/be/news/117939

Вясна / Правы чалавека ў Беларусі

12 мая 2025 11:28

Дапамога экс-палітвязню, які адбыў тэрмін за фота расійскай вайсковай тэхнікі

Дзмітрыя Шувалава абвінавацілі ў тым, што ён адпраўляў у чат-бот «Nexta» фота і відэа вайсковай тэхнікі. Пракурор Аляксей Ярошык запрасіў для Дзмітрыя 2 гады 6 месяцаў калоніі агульнага рэжыму. Менавіта такі прысуд і вынес Дзмітрый Куроўскі.

«Калі я вызваліўся, ціск на нас не скончыўся. Праз тры тыдні мяне зноў затрымалі і пасадзілі на 15 сутак за «экстрэмізм». Пасля гэтага мы канчаткова вырашылі з'язджаць. Стала зразумела, што жыць спакойна не дадуць, кожны дзень быў у стрэсе і страху. Мы баяліся любога званка, кожнай машыны, якая праязджае, нікому не давяралі.

Некалькі тыдняў таму мы ўсе разам выехалі з Беларусі. Узялі з сабой дзве валізкі самага неабходнага (у асноўным гэта дзіцячае адзенне, лекі, крыху нашых рэчаў) і паехалі.

Цяпер мы жывём у шэлтары, шукаем кватэру, думаем, як і што рабіць далей. Хочам знайсці жыллё, працу, уладкаваць дзяцей у садок і школу і наладзіць далейшае жыццё».

Вясна / Правы чалавека ў Беларусі

12 мая 2025 09:45

🌿21 траўня — Дзень палітвязняў у Беларусі. Паведамляйце пра акцыі салідарнасці і мерапрыемствы ў сваіх гарадах!

Чатыры гады таму ў шклоўскай калоніі загінуў мужны Вітольд Ашурак. Ён быў чалавекам сумлення. Ён быў не адзін.

У 2020-м беларусы паказалі, што такое салідарнасць: лісты, паштоўкі, данаты, флэшмобы, акцыі, словы падтрымкі. Нават калі лісты не даходзілі — іх пісалі. Бо ведалі: гэта важна. І гэта бачылі.

Таму цяпер рэжым палюе на тых, хто падтрымлівае. Але гэта не спыняе людзей — толькі паказвае, якая моц у салідарнасці.

21 траўня зрабі тое, што лічыш важным, каб пра палітвязняў не забывалі. Каб іх галасы былі чутныя. Бо праўда — не экстрэмізм. А салідарнасць — не злачынства.

✍️Калі ласка, паведамляйце пра анонсы акцый і мерапрыемстваў у сваіх гарадах праваабаронцам на @Viasnainfo

👀Падрабязную інфармацыю пра ўсе мерапрыемствы можна паглядзець на prisonersday.info

Вясна / Правы чалавека ў Беларусі

11 мая 2025 16:31

🌿Cалідарнасць супраць рэпрэсій! 21 траўня — Дзень палітвязняў

Праваабарончы цэнтр «Вясна» вызначыў 21 траўня Днём салідарнасці з палітзняволенымі Беларусі на знак памяці з загінулым у калоніі Вітольдам Ашуркам. Гэта ўжо чацвёртая гадавіна смерці палітвязня. З таго часу за кратамі памерлі яшчэ шасцёра чалавек. Усе яны — ахвяры рэжыму, для якога салідарнасць стала злом.

У Беларусі каля 1200 чалавек несправядліва ўтрымліваюцца ў няволі па палітычных матывах. Іх імёны цяпер не так часта не гучаць у навінах, сацсетках, на міжнародных трыбунах, як раней, але яны — ёсць. Таму сёлета тэма Дня палітвязняў Беларусі — салідарнасць, каб паказаць, што людзі за кратамі не забытыя.

«Вясна» заклікае 21 траўня выказаць падтрымку ўсім палітзняволеным і ў чарговы раз запатрабаваць ад рэжыму іх вызвалення.

Чытаць па спасылцы 👉 https://spring96.org/be/news/117913

Вясна / Правы чалавека ў Беларусі

11 мая 2025 11:33

🧹Шукаем людзей, якіх прымушалі ўдзельнічаць у суботніках

Для прадастаўлення звестак у ААН, збіраем інфармацыю аб суботніках і аб мерах, якія прымаюцца супраць тых, хто ўхіляўся ад такой працы.

Калі вы гатовы падзяліцца інфармацыяй, напішыце, калі ласка, нам — @zvarot96

Вясна / Правы чалавека ў Беларусі

10 мая 2025 15:05

✊Падтрымаць — значыць не здавацца: салідарнасць, што перамагае цішыню

Рэжым прыкладае шмат высілкаў, каб схаваць палітычных зняволеных ад грамадства, а таксама каб пераканаць іх саміх у тым, што яны засталіся сам-насам са сваімі праблемамі. Падаецца, што ўжо не засталося аніякіх магчымасцяў падтрымаць іх, але гэта не так. Мы заклікаем рабіць палітвязняў бачнымі, а іх галасы — чутнымі на ўвесь свет!

Нядаўна вызвалены высілкамі амерыканскіх уладаў палітзняволены Юрась Зянковіч пасля чатырох гадоў за кратамі ў розных месцах няволі Беларусі адзначыў:

«Вязням <...> вельмі важная грамадская салідарнасць. Нават калі не даходзяць лісты, мы ўсё адно адчуваем падтрымку людзей. Галоўная задача грамадства — гэта дабіцца вызвалення несправядліва асуджаных».

Вясна / Правы чалавека ў Беларусі

10 мая 2025 10:23

У Магілёве на 9 траўня падлеткі паказалі сярэднія пальцы падчас святочнага салюта — іх шукае міліцыя

Што менавіта інкрымінуюць дзяўчынкам — невядома.

Праўладныя тэлеграм-каналы сцвярджаюць, што міліцыянты ўжо шукаюць іх.

Вясна / Правы чалавека ў Беларусі

09 мая 2025 16:31

🎥«Цень радасці»: Фільм «Вясны» пра рэсацыялізацыю былога палітвязня

Праваабарончы цэнтр «Вясна» прэзентуе кароткаметражны фільм «Цень радасці» пра 36-гадовага былога палітвязня Артура, які пасля трох гадоў зняволення пачаў жыццё з нуля ў Польшчы. Праз яго вочы глядач бачыць цяжкасці адаптацыі: моўны бар’ер, пошук працы, сацыяльную ізаляцыю, настальгію па радзіме і спробы захаваць надзею.

«У мяне да гэтага часу — быццам бы як 11 месяцаў таму я выйшаў — а ў мяне да гэтага часу пачуццё параноі захоўваецца, хай яно і фаніць дзесьці там на заднім плане, але яно ёсць, яно не праходзіць».

Вясна / Правы чалавека ў Беларусі

09 мая 2025 13:20

❗️Палітвязням адной з калоній пачалі актыўна прапаноўваць пісаць прашэнні аб памілаванні

Праваабаронцы атрымліваюць сведчанні таго, што апошні час палітвязняў адной з папраўчых калоній масава заклікаюць пісаць прашэнні аб памілаванні на імя Лукашэнкі. Вядома, што раней такіх прапаноў у калоніі не было некалькі месяцаў — усё змянілася з пачатку мінулага тыдня.

Нагадаем, 7 траўня стала вядома, што па памілаванні на волю выйшлі 42 палітвязні.

🗣Калі вам вядома пра такія выпадкі, калі ласка, пішыце праваабаронцам на @Viasnainfo

Вясна / Правы чалавека ў Беларусі

09 мая 2025 11:15

Мікіту Лосіка вінавацяць у перасылцы фота «Беларускаму гаюну»

Паводле інфармацыі @radiosvaboda, Мікіту вінавацяць у «садзейнічанні экстрэмісцкай дзейнасці» за нібыта перасылку некалькіх фота перасоўвання вайсковай тэхнікі ў 2022 годзе тэлеграм-каналу «Беларускі гаюн».