1407
📚 Жаҳон ва ўзбек адабиётидан энг сара тўртликлар ва рубоийлар канали. 🌐 Twitter: @turtliklar_uz ©️ Мурожаат учун: @Mening_pochtam_bot Бошқа каналларимиз: ✓ @kungil_kundaligi ✓ @sport_xabarlari
ATIRGUL VA YULDUZLAR
Qismat umidlarim sovurib butkul,
Esganda bagʻrimga dam-badam muzlar,
Yerda - nigohimni oʻpar atirgul,
Koʻkda taskin berar menga yulduzlar!
UMR...
Umr shundoq shitob -
Tuyganing chog'da
Qoningga daf'atan yuguradi muz.
Qara, ma'suma qiz
Gul tergan bogʻda
Bu kun xayol surar g'amgin ayol - Kuz...
©️Mirpo'lat MIRZO | @turtliklar
Гул ғунча маст этиб мени тўхтатди,
Тиконлар бағридан уфуриб атир.
Демасман тикондек тиғни ким отди,
У тиғнинг тагидан анқиса меҳр.
✍️ Шукрулло
©️@turtliklar
Лол бўлиб атрофга қарайман секин,
Улар кулишади, демак, улар ҳақ.
Менинг тасаввурим уфқида лекин
Ёнаётган дала, ёнаётган халқ...
26 апрель – Ўзбекистон халқ шоири Жамол Камол (1938-2022) туғилган кун
✍️ Жамол Камол
©@turtliklar
Шайх деди: Аёлга «Ҳижоб кий қизим».
Аёл дер: Эркаклар яширсин кўзин.
Шайх деди: Пашшалар кўзин ёпайми,
Ё ёпган маъқулми асалнинг юзин....
@turtliklar
Сиз томон кетмоқда нурли инсонлар,
Кўзимни улардан тиёлмаябман,
Қандай уммат бўлдим Я Росулуллоҳ,
Сизни бир кўргани боролмаяпман...
✍️ Хонзода Бегим ¦ @turtliklar
Иш. Чой. Суҳбат. Овқат. Яна иш.
Ҳамма нарса ўйланган. Пухта.
Сўнг сен келдинг. Бошланди ёниш.
Мувозанат йўқолди. Нуқта.
© Усмон Азим | @turtliklar
Сизларга Аллоҳнинг раҳмати бўлсин,
Қалбингиз иймоннинг нурига тўлсин.
Шукурким етказди улуғ кунларга,
Ҳайит айёмингиз муборак бўлсин!
🌙 Рамазон Ҳайити (“Ийд ал-Фитр”) муборак бўлсин! Бу улуғ кунда қилган ибодатларингиз қабул, дуоларингиз мустажоб бўлсин!
©️@turtliklar
ҚАНОАТ
Асл айбим –
Текис йўлда қоқинмоқдир.
Асл бахтим –
Ўзинг кўрмай соғинмоқдир.
Еру кўкдан мудом излаб
Хато қилдим.
Сени топмоқ йўли –
Доим топинмоқдир.
✍️ Аъзам ЎКТАМ
© @turtliklar
Шундоқ эди бу дунё, шундоқ бўлур ҳамиша,
Кўҳна бир ҳақиқатнинг дўкони ёпилмайди:
Доно одам жуда кам, гарчи кўп илм пеша,
Бисёрдир таниш-билиш лекин дўст топилмайди.
✍️ А.С.Пушкин (А.Орипов таржимаси)
Ташна қултум сувни орзу этгайдир,
Олтин пиёлани ахир нетгайдир?!
Беморга мол-дунё ваъда айлама,
Бир оғиз ширин сўз унга, етгайдир.
✍️ А. Орипов
© @turtliklar
Биласанми тилинг недур оғизда,
Ақл хонасига калит доимо!
Эшик ёпиқ бўлса билиб бўлмайди,
Хона ичра девми, фариштами ё!
© Ибн Камолпошшо | 💬@turtliklar
Чексиз қувонч билан гўдак кулади,
Бахт қуши қўнди унинг бошига.
Омад етаклайди, даврон суради,
Қандай ярашибди унинг ёшига.
☆ ☆ ☆
Дунё ташвишлари энг олий неъмат,
Фарзандинг соғлиги -- бошингнинг тожи.
Ҳаётда борлигинг -- бахту саодат,
Онангнинг дуоси -- умрингнинг божи.
✍️ Олия Равшанова
® #muxlis_ijodidan
© @turtliklar
21-март — Абдулла Орипов(1941 — 2016) таваллуд топган кун
Ўтиб кетар экан барибир дунё,
Ёмоннинг умри ҳам ўчган нафасдир.
Мен унинг исмини билмайман, аммо
Яхши одам бўлган, десалар басдир
© Абдулла Орипов
💬 @turtliklar
МАШРАБ
Энагаси алла айтар Машрабга боз-боз,
– Катта бўлсанг Хон бўласан, аллаё алла.
Ўша заҳот эшитилар бешикдан овоз:
– Алдаё алда!
✍️ А. Орипов
👉 @turtliklar
“Рўза тутмайман” деди менга бир эркак,
Дедим: Мусофир ё беморсиз демак?!
“Йўқ” деди. Шунда мен топқирлик қилдим:
“Унда ҳомиладор бўлсангиз керак”.
© @turtliklar
Афандига бир кун мақтанди подшо:
''Ҳеч қандай камим йўқ, ҳамма нарсам бут''.
У деди: ''Тақсирим сўзлари хато –
Йўқку ўзларига аталган тобут''.
✍ Шафоат Раҳматуллаев
© @turtliklar
"Ё мени танлайсиз, ё онангизни!" -
Шарт қўйди эрига бир соҳибжамол.
Эр деди: "Эшикни қаттиқ ёпиб кет,
Онам совқотмасин, кўчада шамол!
✍️ Х. Ҳамидов
© @turtliklar
...Ўлса ўзи ўлар,
Сўзи ўлмайди,
Ҳамиша барҳаёт насл шоирлар.
Ҳақиқий шоирнинг қабри бўлмайди,
Юракка кўмилар асл шоирлар...
© Бугун 26 - апрель халқимизнинг севимли шоири - Муҳаммад Юсуф (1954—2001) таваллуд топган кун.
❓ Сиз шоирнинг қайси шеърини ёддан айтиб бера оласиз?
© @turtliklar
Бир кўнгил истайман кўнглимдай бўлсин,
Баҳордай соғинай адоларини.
Кўнглимдай йиғласин, кўнглимдай кулсин,
Кечириб яшайин хатоларини.
✍️ Амир Худойберди
©️@turtliklar
Қаерга қарама - қалби қоралар
Покиза зотларнинг қалбин қоралар.
Шифтга оппоққина пахта илиб кўр,
Шамдондан барча ис шунга ўралар!
© Бедил | @turtliklar
〰️〰️〰️ Тўртликлар 〰️〰️〰️
Кимники бор эса бир бурда нони,
Ўзига яраша уй-ошиёни,
На биров унга қул, на у бировга,
Айт, шод яшайверсин, хушдир замони.
* * *
Шайх фоҳишага дер: Нима бу ишинг,
Маст бўлиб, қўлма-қўл қўниб юришинг?!
У дер: Мен шундаймен, аммо сен айт-чи,
Сиртинг кўрсатгандай покми қилмишинг?!
* * *
Бизга фалак иши — фақат ташвиш-ғам,
Бирини тикласа, бошқаси барҳам,
Ҳали келмаганлар бундан бехабар,
Хабар топа қолса келмас эди ҳам.
© Умар Хайём (Ш. Шомуҳамедов таржимаси)
© @turtliklar
Хушвақт бўл келмоқда Ҳайит айёми,
Шай бўлғуси бутун қувонч анжоми.
Сустликдан ой сариқ, озғин ва синиқ,
Вақтида бу дардлар битар тамоми.
✍️ Умар Хайём
© @turtliklar
Мева берма болангга,
Асра меҳмон холангга.
Маҳкам беркит, яшавор,
Қорайтириб ташавор.
✍️ Эркин Воҳидов
©️@turtliklar
Сени ёндирдилар, айт-чи, шам, нечун,
Ёндириб, унутиб кетдилар бутун?
Ўзинг айт, найласин, инсон ўзи ҳам,
Яралган бўлса гар ёнмоқлик учун?
✍️ Маҳсатий Ганжавий (А. Орипов таржимаси)
©️ @turtliklar
ЮЛҒУЧНИНГ ЎҒИЛЧАСИ
Сочишим керак Ҳотамдек,
Яшашим керак одамдек.
Бунинг учун одамларни
Шилишим керак отамдек.
✍️ Анвар Обиджон
©️ @turtliklar
Яхши ният билан ёруғдир диллар,
Талпинсанг, манзилга элтади йўллар.
Умид бу – Аллоҳнинг азиз неъмати,
Англай бил, дарахт ҳам умид-ла гуллар.
✍️ Қурбон Қарлиқий
©️ @turtliklar
На бўлғай яшашни сал осон кўрсанг,
Қил сиғмаган кўнглинг шуълага тўлсин.
Ҳар намоз орасин Рамазон билсанг,
Бир кунда беш ҳайит муборак бўлсин!
✍️ Аъзам Ўктам
© @turtliklar
🎤 🎼 Наврўз келибон
✍ Жуманиёз Жабборов
____
💐 Наврўзи айём муборак бўлсин. Йил давомида хонадонингиздан қувонч, файз-у барака, тўкин сочинлик аримасин. Барча эзгу ниятларингизни Аллоҳ ижобат айласин. Кейинги янги йил, янгиланиш байрами — Наврўзи айёмига ҳам барчамизни хурсанчиликда етказсин.
Наврўзи айём муборак!
____
© @turtliklar
Қалб – турмуш қуруми қорайтган қозон,
Остин кул, ичини тўлдирган хазон.
Қулай фурсат келди: ювгил тозалаб –
Рамазон ғанимат, эй дўст, Рамазон!
✍️ Н. Жонузоқ
©@turtliklar
Ўтди неча йиллар — очилмас қалби.
Кўнгил қалб сўзларин айтиши ёлғон.
Ҳар туннинг бир тонгги бўлгани каби,
Кетган баҳорларнинг қайтиши ёлғон.
✍️ Муҳаммад Жасурбек ўғли
👉 #мухлис_ижодидан
© @turtliklar
