8111
خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
رد عليه .. ياهو اليه ..
حسين بس طرت الفجر واختك سبيه
.................................................
يمي اخوتي وما يمر خوف اعلى بالي
منين اخاف وكافلي مرافك خيـــــــالي
حسين يمي الليله علعاشر حجالـــــــــي
من تروح اخواني وابقى بلا دلالـــــــــي
ليلة وداع وبجي ..... وخلص بعيني الحجي .....انا الغريبه
والخيم ما تنوصف.. كلشي احسن مختلف .. هاي المصيبه
هالمسيه .. ياهو اليه .. حسين بس
طرت الفجر واختك سبيه
**
حسين معقوله نتفارك وابقى وحــــدي
وتنزل دموعي وتدوس بكاع خـــــدي
لا تكلي برمح راسك راح يحـــــــــدي
خويه فدوه ولا تكلي بدونــــــــي ردي
ريت لا طر الفجر .....ولا شفت سيف الشمر ....يذبح وريدك
ولا تظل ارض وسما ..... ويغرك العالم دما ..... وادفنه بيدك
مو سويه ... ياهو اليه .. حسين بس طرت الفجر واختك سبيه
****
يعني باجر ماكو كافل بيده رايـــــــــــه
ذاكه جف اللزم جفي من البدايــــــــــه
حسين يعني العيله مجتوفه وسبايـــــه
ونار تكتب عالخيم هايه النهايــــــــــه
نارهم تاكل عبي ..... ويحترك كلب النبي .... لو شاف حالي
تحضر الها ورادتك .... خويه زينب حاجتك .... ما عدها والي
لوعه بيه .. ياهو اليه .. حسين بس طرت الفجر واختك سبيه
*
خلي اشم نحرك يخويــــه واذكر امي
صعبه لو باجر تكلي يسيـــــــــل دمـي
يعني بالعاشر اشوفه يــــــموت حلمي
همي بيك حسين راح يزيد همــــــــــي
اختك انا مدلله ...... عذبتني كربله ..... وكل ضيمي بيهه
كاع تاخذ كافلي .....كون تخجل من علي .. شدعي عليهه
غاضريه ... ياهو اليه .. حسين بس طرت الفجر واختك سبيه
**
مالي حيل وداع وادريهه الاخيـــــــــــره
حيرتني الليله تدري شلون حيــــــــــره
بلا اهل باجر اظل ولا عشيــــــــــــــــره
حسيـــــــــن باجر نفترگ كلمن مصيـــره
تبقى نايم علترب ... وانا امشي ويا الغرب ... ودموعي تجري
وانته راسك علرمح..... كون لا طر الصبح... .. ويموت عمري
مو بديه .... ياهو اليه .. حسين بس طرت الفجر واختك سبيه
لخادم الحسيــــــــن
رعـــد الفريــــــــجي
عمه الخيل داست صدره لحگيله
****
زينب هالوصل ذباحه يا عمه
ظل يطبر بنحره وعلرمل دمه
لو ذبحو ابونه منين نشتمه
عطشان انذبح يا مصعب الچلمه
ماي منين اجيب شلون اوديله
عمه الخيل داست صدره لحگيله
***
عمه اثنعش طبره وعلگفه مخليه
ما عنده رحم يا عمه يذبح بيه
بويه الله واكبر شنهي المسويه
هذا الحجر ليش الفوگه ومأذيه
اريد امسح أدمومه بطارف الشيله
عمه الخيل داست صدره لحگيله
**
شالو راس ابونه وچثته مدميه
عمه جروح جسمه الف وتسعميه
راسه اعله الرمح بس باوع اعليه
ها بويه صرت يحسين مسبيه ؟
خل نمشي لابونه هناك نحچيله
عمه الخيل داست صدره لحگيله
**
سحگو بالحوافر جثة الهيبه
دم فوگ التراب وتارس الشيبه
خنصر منگطع ياهوه اليجيبه
برماح وسيوف الوادم اتصيبه
ها يم عون عمه فياي سويله
عمه الخيل داست صدره لحگيله
**
عشر خيول سحگت صدره وعظامه
هاي اعله الارض مدميه العمامه
خلينه انتگابل لطم علهامه
على المحد فزعله وصار گدامه
توزع عل ترب يا چف اليشيله
عمه الخيل داست صدره لحگيله
****
يا حافر الخيل اسحگني يلحافر
اترك صدر ابوي أچم ضلع كاسر
أموت وياه خلني بشدة العاشر
خايب هذا ابوي شبيك يلكافر
تدري بفاطمه هل يمه تبچيله
عمه الخيل داست صدره لحگيله
✍️✍️ رعد الفريجي
محرم الحرام
يحسين اه يحسين اه يا خويه
جيتك يبعد الما مغمضات
فوگ الرمل چن رايد تبات
أگعد يخويه العندي صعبات
كلفات كلهن والله كلفات
يحسين اه يحسين اه يا خويه
منين ابدي لمن طحت علگاع
بلخيمه واسمع كسر الاضلاع
لمن تصيح وماكو فزاع
تفرهدت مني حسين شبساع
يحسين اه يحسين اه يا خويه
راس برمح يا خويه شفناك
واطفال تصرخ ها رجع ذاك
مذبوح يحسين وندبناك
بحماك كلهه تصيح بحماك
يحسين اه يحسين اه يا خويه
صارت بواچي وخنگت انفاس
واطفال تبچي اتصيح عباس
نار بخيمنه وهجمت الناس
الما ينضرب بالخيل ينداس
يحسين اه يحسين اه يا خويه
ياخذنه ضرب السوط للماي
ها هذا چف الراح ما جاي
ما باقي من الكافل شواي
ويه الركض گمت الطم اچلاي
يحسين اه يحسين اه يا خويه
ياهو اليرد الحافر الهاد
صار السحگ بالطايح عناد
حشمنه بيكم ها يلولاد
ردو الخيمكم صارن رماد
يحسين اه يحسين اه يا خويه
ثاري الطفوف اتخلص الاعيون
تاخذ الحيل اتهد المتون
جابو حبلهم وين يردون ؟؟
وبچفوفنه گامو يشدون
يحسين اه يحسين اه يا خويه
كلمات الخادم/ رعد الفريجي
ثوابها الى روح والدتي
#ليلة_العاشر
جديد محرم الحرام قصيدة لوداع الفواطم ليلة العاشر بعنوان (ليل الوداع)
طول ياليل طول ما ريد يطرلك فجر
تدري ياليل باچر لو طلع صبحك يا قهر
ياليل طول هاي وياهم الي اخر مسيه
طول ياليل ولا يطر صبح الغاضريه
زينب ترى ياليل احاچيك انه الهاشميه
خل اشبع اوداع ياليل من اولاد الطهر
▪️〰▪️〰▪️〰▪️〰▪️〰▪️〰▪️〰
ياليل طول وشوف لمتهم بهاي الخيام
باچر لو يطر فجرك يصبح نهاري ظلام
باچر العريس يتحنى من الدمه جسام
باچر ليلى بالخيام تصيح اوليدي يالاكبر
▪️〰▪️〰▪️〰▪️〰▪️〰▪️〰▪️〰
ياليل طول بهاي المسيه وأترقب الحالي
من خيمه لخيمه أتصفح وجوه الغوالي
اسبعطعش گمر ياليل بيهم عزي ودلالي
تفجعني بيهم ياليل باچر لو فجرك يطر
▪️〰▪️〰▪️〰▪️〰▪️〰▪️〰▪️〰
ياليل طول واسمع تراتيل ابو السجاد
شوف ياليل يرتل بالدمع آيات رب العباد
باچر چم آيه ينسفك دمها ياليل بالوهاد
وتدري چم گلب باچر من المصايب ينكسر
▪️〰▪️〰▪️〰▪️〰▪️〰▪️〰▪️〰
ياليل طول خل املي النظر من صورهم
تدري ياليل باچر اخوتي بيا حال انظر الهم
جسوم مطروحه بالفلا موذره والغسل دمهم
وباچر كل هاي النسه والاطفال بالمچاتيل تتعثر
▪️〰▪️〰▪️〰▪️〰▪️〰▪️〰▪️〰
ياليل طول تدري باچر وش تشوف العين
عگب ذبح الأهل والأنصار مفرود الحسين
وعلى صدر العزيز باچر يرتقي شمر اللعين
ومن القفا ياليل البهيم يحز لحسين النحر
▪️〰▪️〰▪️〰▪️〰▪️〰▪️〰▪️〰
ياليل طول باچر لو تدري بينه شيصير
عگب ما يظل حسين وعزوته نومه بالهجير
يحرگون الخيام وتفر النسه وبحالها تحير
وانه ياليل من النار الم اطفال واتحزم بالصبر
تمت بعون الله تعالى
✍🏻 خادمة الزهراء // ليلى زغيب
دموع الأنين في رثاء الطاهرين 💔 الشاعرة ليلى زغيب
فزاعيه 🏴
للامام الحسين عليه السلام
يوم العاشر من محرم
ضجه بالارض وسماها
وامامي ذابحينه
—-
حزوا الشيبه الكريمه
امن القفا اولاد اللئيمه
امصيبته والله عظيمه
ابرمح راسه رافعينه
——-
التموا اولاد البغايا
كلهم اعله ابن النبايا
نعمة الله والعطايا
ليش جسمه اموذرينه
——-
هذا خير الله ونِعِمْته
اشلون يمْثلث جسرته
صدره قرآن وكسرته
ضامي ماتسمع ونينه
———
اسيوفكم المن توذره
ما كفا امثلث ابصدره
واللعين ايحزه نحره
وزينب انت تنظرينه
——-
اتدوسه لخيول وتكسره
تطبگه صدره اويه ظهره
اشلون دين الله تجسره
وكلبه ويلي املوعينه
——-
اعليه كون الله تغير
يبجي دم وصاو احمر
كلشي لمصابه تفطر
والسما ناحت حزينه
———
#بنت_الشمري
في حق عبد الله الرظيع ع
من السهم شوفزيت
حسبالي يبني ترويت
مذبوح لمك رديت. عبدالله يبني
--------------
يالجنت تغفه عله صدري يبني وتنام
ظامي نحرك يمه اشوفنه عله السهام
بحظن ابوك وفرفحت بيدك والجدام
نابت. ابنحرك سهم يالعمرك. ايام
ستشهر وليدي زغير
ابني انذبح مثل الطير
صملله ييمه ناديت عبدالله يبني
-------------
حسبت ترجع يغالي بصدري اظمك
حرمله بسهمه رماك ونزف دمك
كون كبلك يبني سهمك ذبح امك
مثل ورده وذبلت يوليدي جسمك
شفتك ذبيح ومنحور
وسهم المثلث مكسور
لظحكتك يبني اشتاكيت. عبدالله يبني
---------------
صرت لسهام المنايه يبني نيشان
ياذنب كلي الجنيته ونته عطشان
رجعوك مخظب ومنحور ظميان
يمه من شفتك احس بكلبي نيران
لخيمه يبني ردوك
واهل الغدر مارحموك
يمك لطمت ونيت. عبدالله يبني
---------------
عمرك اشهور ويذبحونك يمظلوم
والسهم يرويك يبني بفيظ الدموم
ادري راح اظل حسرتك بيه لدوم
من اصدن. مهدك. يزيدلي. الهموم
تعبي يبعد امك راح
نايم اشوفك مرتاح
وانه بحسرتي ظليت. عبد الله يبني
---------------
كون اتمنه. السهم. كبلك. ذبحني
وتدري بعدك ماغمض يوليدي جفني
بعيني ظلت صورتك مرسومه يبني
عليك اظل ابجي ونوح ويجري جفني
عندي بعد ماظل حيل
يعذبني يايمه. اليل
ياما سهرت وباريت. عبد الله يبني
-----------------
الخادم رحيم الصالحي
يبن امي طايح وين ها يالضامي
...............
حركوا عليه الخيمات
واليحرس اخيامي مات
هجموا عليه الشمات
واتراكضن البنيات
ماظل ستر عندي انه وايتامي
يبن امي طايح وين ها يالضامي
...............
وسط البراري النسوان
نهبونه خوية العدوان
حرمه انه وابلا وليان
يالنايم اعله التربان
ماعندي واحد من اخوتي ايحامي
يبن امي طايح وين ها يالضامي
.................
كاموا عليه ايسبون
واكبالي بس يضحكون
اي والله بيه ايعيلون
جم سوط ورم المتون
من الضرب مالومه حيل اعظامي
يبن امي طايح وين ها يالضامي
.................
بالبر لكيتك عريان
والمنحر ايون عطشان
صاير وذر عالتربان
ياخوية جسمك خلصان
كل جسمك اموذر وسافه ودامي
يبن امي طايح وين ها يالضامي
.................
ياخوية جنك مو زين
واشجم جرح بيك حسين
امتوزع اعله الصوبين
كلبي انه صاير نصين
نص يمك ونص يم هذيج اخيامي
يبن امي طايح وين ها يالضامي
......................
يبن امي ذبلان هواي
ماعندي اشربنك ماي
بس دمعتي بنص عيناي
ماكو عليك اي افياي
من هالوضع مابيه اشيل اجدامي
يبن امي طايح وين ها يالضامي
..................
الخادم عمار الساعدي
ونسالكم الدعاء
طور قصيدة :
( أبيح الماء ياويلي )
ملا وليد البطي
https://youtu.be/OxFW1_UuaEg?si=F_PM3Ce8Pm1uWaJl
آه على فقد الشباب ..😭💔
*_آه على فقد الشباب_*
😭💔ـــــــــــــــــــــــــــــــــــــ
وضعت ايدي اعله ايده وخدي يم خده
صعب منظر ابو وايودع بولده
اناديه يبني يبني وانتظر رده
اموت انا وتموت الدنيا من بعده
آه ...... واريد اسمع جواب
آه ...... على فقد الشباب
😭💔ـــــــــــــــــــــــــــــــــــــ
علي اسم الله اعلى طولك بالله قوم وياي
اذا نايم تكلم وانظر بعيناي
بقت زينب تحاتي وتسألك موجاي
ترى تزعل عليك وترضى انته بهاي
ذاب ..... دمع عينيه ذاب
آه ..... على فقد الشباب
😭💔ـــــــــــــــــــــــــــــــــــــ
جمالك ايه يويلي عالترب مطروح
اجيتك وانته عالغبره بقايا جروح
اذا يوليدي مني تبتعد وتروح
ترى ابقى بغيابك لا قلب لا روح
ليش ..... اشوفك عالتراب
آه ..... على فقد الشباب
😭💔ـــــــــــــــــــــــــــــــــــــ
يزينب ابني منهو اللي نظر حاله
ولا واحد رأف قلبه وإجه وشاله
علي بالغاضريه امقطعه اوصاله
انا اللي اقبال عيني امذبحه عياله
راح ..... علي بهذا المصاب
آه ..... على فقد الشباب
😭💔ـــــــــــــــــــــــــــــــــــــ
نــســــــألكم الدعـــــاء وبرائـــــــة الذمـــــه إن وجـــــــــد أخطـــــاء اثنــــــاء نقـــــل القصيـــــده
خــــــادمه لخدمـــــة الزهــــــراء وابنائهـــــــا عليهم الســـــــلام
_*خـــــــــادمتكم ( أمينـــــــــه) تسألكم الدعـــــــــاء🌹🍃*_
لا اجيـــــــــز حذف اسمـــــــــي
الرادود .... ابورضا البخيتان
الشاعر ... اسامه محمد الناصر
موشح لعلي الاكبر عليه السلام (( وين ينباع الصبر ))
وين ينباع الصبر دلوني
گلبي مهضوم وتهل عيوني
ماتنام العين وادموعي تهل
ردت الاكبر للخيم يرجع عدل
ياحسافه ايطيح ضامي وينچنل
خاب رجواي وگطعت ضنوني
وين ينباع الصبر دلوني
خاب رجواي وگطع ضني بعد
من شفت راسه تهشم وانمرد
لاضخر هاليوم عندي ولاسند
فجعوا حسين العده وفجعوني
وين ينباع الصبر دلوني
فجعوا العدوان گلبي وگلب ابوه
هشموا راس العزيز وطبروه
راد شربت ماي لاچن ماسگوه
كون لاحوا هامتي وصابوني
وين ينباع الصبر دلوني
كون صابوني ولاصابوا علي
يفجع الدلال صيوانه خلي
بالعمر والروح والدنيه شلي
ومااواطن فرگته اتعرفوني
وين ينباع الصبر دلوني
مااواطن غيبته ولافرگته
امطبر ومچتول جابوه اخوته
زينب تنوح وتون اتلگته
هاي هيه اتصيح ضيعتوني
وين ينباع الصبر دلوني
هاي هيه انصيح يهل المرجله
گلبي ياضيم وقهر يتحمله
باچر اعليه ايتهدد حرمله
بين خولي والشمر عفتوني
وين ينباع الصبر دلوني
لاصبر باچر يضل ولا دلال
ليش نايم ياعلي الاكبر تعال
تقبل يچتفون زينب بالحبال
بالسياط وبالعصي يضربوني
وين ينباع الصبر دلوني
✍شاعرة اهل البيت
الملة ام هجران العمارچيه
غير مبري الذمه من يحذف اسم الشاعرة او ينسب الرثاء لشخص اخر
لسان حال ليلى أم ألأكبر
أبنـي اليوم مـــــا مرلــي وجاني
وخبر فگده شعــل گلبـي وجاني
الگلب شمسوي يوليـدي وجاني
أنتظر جيتك تمر لو هاي هيـه
**
أله أزغار الدهر ضــــدي وأله أكبار
مصايب كافي يا دهري ولك بـــــر
سيف الهـم طبـــر گلبـي والأكبـــــر
تتطبر جسمـه بسيوف المنيه
***
السيف الحــــز وريدك ريت حَـــزّنه
وعلى الدمعـــه يلب احشاي حـــزّنه
دليلي أعليك شـوف اشلون حـِــزنه
مثل يعگوب صار اضعاف ميه
***
تعال لحالــي يبنــي اشلــون شــوفه
يمنْ مــن طــه جـــدك بيـــك شــوفه
النظــــر بعــــدك عسنه راح شـــوفه
وعسن گبلك توسدني المنيه
الشاعر / موسى البديري
سيف الأكبر بيها من كر شمرته شمرت علي
للمنــايــــا بيده رايـــه عالكتــايــب تعتلــي
رايه من فارس بدر بالحرايب مـن يكر
*----------*----------*
چن عصا موسى بيمينه تلقـف النظرتله عينـه
وين درب الشرده وينه حـارت أجيوش العده
موسى ظهرت معجزاته كربله طرها ابعصاته
سالــم الفــر بحيـــاتــه ربنــا چـفـــه مـــأيـده
يدري خصمه چفه نقمــه لــو يجـرد صارمه
يــردها خيبر چفه يكـدر والله ذيچ الملحمه
يعجز يوصفه الشعر بالحرايب مـن يكّــر
*----------*----------*
هيبتــه هيــبت محـمــد چنــه حيــدر ما تــردد
هالحــرايب بيـها عيّــد عالكتــايب مـــن بــرز
نــاده انــه ابن العقيده رابي بفنون الصميده
بكيفي اختــار الاريـده بيهم أبصـوته ارتجــز
جــدي حيدر ياهوه يگدر يطلع يبــارز علي
الشمره بيّه حيــدريـــه نفسه چفه الأولي
سيفه يتلاهب جمر بالحرايب مـن يكّــر
*----------*----------*
سيفه موت ومن يجيهم زلـزله ونـزلت عليهم
كــربلــه حيــرهــا بيهم چـن جهنــم صــارمــه
ترهب الــرايه بشمــاله وسيفه بالطف رتلالـه
بسملـه بالتــوبـه لا لا بي غضب رب السمه
أيـــه بيـده والـيـريـده يبلعه خوفه والدرب
عزمه حيدر سيف طشر كل زلمهم بالحـرب
چــن جهنــم تستعــر بالحـرايب مـن يكّــر
*----------*----------*
سـورة الرعد بحسامه نــزلت وبيها علامـه
كـــربله چنــها القيـامـه هيچي طشرهــا الزلم
گطّــــع أنحــور وأيـادي بعثر جيوش الأعادي
انه الأكبـر ظـل ينـــادي من علي أصل العـزم
الرايه بيده بدم وريده يفدي دينه ورايته
هذا الأكبر صوته يزأر والحرايب رادتــه
يذكّــر بفارس بدر بالحرايب مـن يكّــر
*----------*----------*
بكر ابن غانم برزله سيفه بالهامه تعلى
بالحرب خلاها مثله والله ضــربــة يمنـته
جيش أميه بي تحيّر هـذا حيدر هـذا الأكبر
ياهو اليميزها يگدر بالجماجــم ضـــربته
عزمه رتل سيفه سجل ملحمة عـز وإبــاء
ظل ذكرها مخفي سرها من عجايب كربلاء
بحيدره من ينذكر. على الحرايب من يكر
*----------*----------*
رايه من چف الامامه خصها ربنا بالكرامـه
للنصر رفعة وسامـه مــن بدر والله و أحــد
عـزت الدين أوجوده سر بقائه وسر خلوده
بالدمه خطت صموده تبقى مــرفوعـه بمجد
تبقى حره بيها ثوره راية حسين الشرف
للمعالــي تبقى عالي رافعه أعظـم هــدف
المهدي بيها ينتصر بالحرايب مـن يكّــر
*----------*----------*
الشاعر
موسى البديري
مات النَفس بيّه .. واعيُوني مَعمِـيّه
مِن دَخنة الحُومه .. گوم الحَگ اعليّه
كِثر الهَضُم مُوت
والغُربه تابوت
گوم الحَگ اعليّه
**
يهَيبَـتنه .. النَفِس حسره .. بصحاري الطف
ولوَن تدري .. اختِنگ كلشي .. بقسَاوة چف
وفوَاطِمكم .. اعلى رگبَتها .. الحبل يلتَف
تجِر ونـّه .. وعدُو ايشتِّم .. عليها اصطَف
صار الحلِم خيمه
للتاهَت ابهَـيمه
وهَم نِعمه بالصحراء
لو صحَّت الغَيمه
وللعَافن ابيُوت
كِثر الهَضُم مُوت
گوم الحَگ اعليّه
**
على الماضي .. يَـبَعد اختك .. أوِن كِلّي
ويرَافگني .. صُفه المامِش .. مثل ظلّي
الهِضَم روحي .. بأذَى الحاضِر .. واخَذ عقلي
الگِطع راسك .. ضِحَك سِنّه .. وإجه ايگلّي
من بَعد ابو فاضل
آنا الكُم الكافِل
وخل يشرَب الظامي
من مدمَعه النازل
وماأقبَل اي صوت
كِثر الهَضُم مُوت
گوم الحَگ اعليّه
**
الأمان إنتَ .. ومكانَك ما .. يسِدَّه احَّد
سَخي ومامَر .. تِفشَّل چف .. إلك يمتَد
رمَاد الهَم .. مِله عيوني .. وبعَد أزوَد
دِخَل گلبي .. بسجِن خُوفه .. وعَلِيهِ انسَد
جُود ابوَصل روحي
واگطَع نحَر نوحي
بسيف الگُرُب مني
مو زادَت اجروحي
وظل حِزني مكبُوت
كِثر الهَضُم مُوت
گوم الحَگ اعليّه
**
على الناگه .. أمِيل آنه .. اويه مِيلَتها
كِثَر شيبي .. وگِضت روحي .. اعلى صَفنَتها
وانا ابرَهـبَه .. مثل شمعه .. الدهر فَـتها
أصِد للرُوس .. أجِر حسره .. اعلى حالَتها
روس بنحَر دامي
وبيها الثغَـر ظامي
دم تنزِف وتبچي
عالناگه گدَّامي
وگليبي مفتُوت
كِثر الهَضُم مُوت
گوم الحَگ اعليّه
**
ينُور الله .. انطُفَت عيني .. برمَاد وحَر
شنو امأخرَك .. تلاحَگني .. وانا ابهالـبَر
السِلَب ثُوبَك .. إجه ايسِبني .. ولاأگـدر
أرِد شرَّه .. وانا الحُرمه .. بحبل أنجَر
حي لوچِنت أدرِيك
مَترِدَّه لينَـاديك
شلون اختك بهالحال
لمّن تحشِّم بيك
وينك يمَبخوت
كِثر الهَضُم مُوت
گوم الحَگ اعليّه
===============
لقمان لعيبي البدران
الامام الحسين ع عند مصرع القاسم لما وصل اليه ورآه بتلك الحال صاح واقسماه ~ولسان حاله / لحن الفراق~
آيجاسم… صعبه اشوفك عالترب
آيجاسم… معفّر ودمك يصب
آيجاسم… يا جرح وسط الگلب
يِعز عليّه… بيدي ٱزفّك للمنيه
يِعز عليّه… دمعتي لاجلك جريّه
يِعز عليّه… يا عريس الغاضريه
لحن يم الولد راح الولد~ للشيخ الحسناوي راح الولد يم الولد~
نوحي على غصن الورد
گومي وزِفّينه بعد
حَضْري الكفن لاجل اللحد
وجيبي له شمع لزفته
✾✾✾✾✾✾✾
نوحي على حلو الشباب
ابنچ تعفّر بالتراب
حنّته من دمه خضاب
وبيدچ دنِصْبِي حوفته
خادمة آل محمد ✍🏻
ياللي على النهر نايم !
انهض يا قمر هاشم!
تعال إلزفة الجاسم !
[وجيب إلنا خضاب
بنزف هالشباب ]
يالطايح بلا جفين !
يا ضنوة اخوك حسين !
تعــال إلزفـته الحـيــن !
[وجيب إلنا خضاب
بنزف هالشباب ]
ياللي السهم في عينه !
أخوك انت الذي تعينه !
جيــب الثـوب لسكيـنة !
[وجيب إلنا خضاب
بنزف هالشباب ]
ياللي قطعو زنوده !
خل الراية مشــدودة !
ومجدك يالأخو عوده!
[وجيب إلنا خضاب
بنزف هالشباب ]
تعال انت وعلي لكبر !
وجيب الورد والعمبر !
وخل قـلب الولد يستر !
[وجيب إلنا خضاب
بنزف هالشباب ]
يا ضنوة علي الكرار !
تعال انت مع الأنصار !
وخل بخيمـته الأنــوار !
[وجيب إلنا خضاب
بنزف هالشباب ]
يا شايل لوانا قوم !
انت ساعد المظلوم !
بنزف الولد هاليـوم !
[وجيب إلنا خضاب
بنزف هالشباب ]
ي قمر بني هاشم 💔
https://youtu.be/mRiHGm0mivE
الامام الحسين في لحظاته الاخيره قبل الاستشهاد وهو ينظر للخيام
****
ما همني سهم البلگلب
لا ظلتي مفرد بالحـرب
بس لا يشوفون الغرب زيــــنب
أقصدوني بنحري واتركو زينب
**
وكت الذبح وانه النحر
وسهامهم مثل المطر
عطشان وبعيد الگمر
يم النهر مـــات النهر ضااااامي
بضلـــوعي مدري شكسرو فوگ الرمل دامي
طعنوني برماح وردت بس اوصل اخيــــامي
اذوني من ضرب الحجر وانطحنت اعضامي
صاعد على صدري الشمر بس عيني لايتامي
درت الوجه صوب الاخت
بآخر نفس بس سلـــمت
يحسين تانيني اسمعت زينب
أقصدوني بنحري واتركو زينب
***
سهم المثلث والعطــش
والدم على رمال انفرش
والسيف طبراته اثنـعش
يا زيــــنب سهام النعش حيـــره
ما بيه حيل اعله الرمل والنفس ما شهگه
يا شدة ايتــــــــــام وحرم ودموع مختنگه
علتله شو صاعد جبل وخيــــــامنه مدنگه
زينب يخويه اتشاهدي قد حـــــانت الفرگه
لحظة وداعي وناطري
سيف الشمر يم منحري
الله اكبر كبري زينب
أقصدوني بنحري واتركو زينب
*
كلتلهم يهون الذبــــــــح
والراس لو شاله الرمح
خلوني دامي ومنطرح
بس همي اذا لاح الجرح أختــي
ما اريد خنصر لا ضلع للموت هالحاضر
فوضت أمري لخالقي من صبــح العاشر
يا زينب مصابچ أشد من سحگة الحافر
لو راسي يبقه اعله الرمح ولحالچ يناظر
هاي العمامه ودرگتي
والسيف هذا بيمنتي
اخذوهن وبس هيبتي زينب
أقصدوني بنحري واتركو زينب
****
لحد يــروح اعله الخـــيم
انه انذبح تركو الـــــحرم
طعن الرمح ضرب السهم
أهون علي من تنشتــــــــم حرمه
توجعني زينب حالتچ بين الغرب وســـفه
طايــــــــح كفيلچ عل النهر ياهوه النكلفه
وانه ادري ما عدهم رحم وسياطهم صلفه
المتعوده تدفه بشبگتي هسه بجمر تـدفه
سكنه ورقيه بلا دفو
مذبوح ميرد الاخو
گليلهم مات الابو زينب
أقصدوني بنحري واتركو زينب
**
فوگ الرمح يــــا حيرتي
مذبـــوح حرگو رايـــــتي
محد عدل من اخــوتــــي
والناس گصـــدو خيــــمتي وآني
لا صوت يوصل للحرم گمت احچي بعيوني
زينب تره حسين انذبح علغبرى خلــــوني
وصلولكم نار و سبي من جثه عافـــــوني
ركضن يخويه بلا ولي زينب تسمــــعوني ؟
يلمـــــــــا بقه بدارچ حمى
موت وسبـــــي وآه وضمه
زينب ضلع من فاطمه زينب
أقصدوني بنحري واتركو زينب
رعد الفريــجي
محرم الحرام
عزيزات ،، بناتي وانتي اعز منهن عزيزات
غريبات ،، يزينب راحن يصيرن
غريبات
بناتي ،، بناتي
--------------------------------------------
بقيت الوحدي وبس انتن وياي
مشى العباس اخوي الچان حماي
راح الماي زينب ذبحو الماي
العطش والموت واصل للخيم جاي
بناتي الدللتهن راح اخليهن
يمچ خويه زينب لا تعوفيهن
اذا صار الركض واحترگن الخيمات
دليهن عليه النحري وديهن
وحيدات ،، ابوهن ما يظل يمهن وحيدات
غريبات ،، يزينب راحن يصيرن غريبات
بناتي ،، بناتي
-------------------------------------------
اخر لحظه زينب تنتهي بساع
خلص كل الكلام بدمع الاوداع
وجع تارس خيامي وخانگ الگاع
الگلب من الوجع يرفس بالاضلاع
ودعيني يزينب بعد ما نلتم
الارض ما ترضى تروى بغير هذا الدم
رقيه بحظني واحس بيهه تموت
واحس صوت الانفاس يصيح ما نسلم
حنينات ،،البنات هواي يا زينب حنينات
غريبات ،، يزينب راحن يصيرن غريبات
بناتي ،، بناتي
------------------------------------
اروح ويبقى يصرخ صوت الخيام
البواچي بظهر مبعد مثل الاسهام
اعرف(صوت سكنه)(واعرف الشام)
وادري بهالحرب تطحن بالاعظام
لذلك راح اگلكم الله وياكم
ألم كل العطش خاف يتعناكم
مثل ما چنت الم الشوك ليل الفات
واباوع علخيم واتفگد اغطاكم
قريبات ،، سياط متونچن خويه قريبات
غريبات ،، يزينب راحن يصيرن غريبات
بناتي ،، بناتي
------------------------------------
وحده بأيد وحده وركضن بعيد
يزينب خويه شگف السوط بل أيد
اركضن للشريعه وندهن الحيد
ترى الميت وليهه عيونهه اتبيد
لا توگع رقيه وهالرمل جمره
ترفه ولا تلوح خدودهه السطره
زغيره وچانت تذكرني بأمي هواي
الظلم بالطف لحگهه التشبه الزهره
معانات ،، بعد محد يظل الهن معانات
غريبات ،، يزينب راحن يصيرن غريبات
بناتي ،، بناتي
-----------------------------------------
اذا صاحو يزينب وين الاخوان
آشري اعله الرمح والراس عنوان
خليت الجسد متروس تربان
واروح وياچ حامي لوين ما چان
عالي وما ادنگ حتى لو مذبوح
اوزع ڤي عليچن والجسد مطروح
تعبتن من كثر ما بالسبي لوعات
اصبرن قربه للبيده العمر والروح
نهايات ،، انتن راح تنتصرن نهايات
غريبات ،، يزينب راحن يصيرن غريبات
بناتي ،، بناتي
رعد الفريجي _ محرم 1447
ثوابها الى روح والدتي
#ليلة_عاشوراء
يا ليل ..
انه يا ليل العقيله وانته حاضر كربلاء
لو يطر فجرك اكيد عيني مدمعها دماء
باچر بعيني اشوف من دمه عيون السماء
خيط فجرك من يطر حسين يبگه بالعراء
باچر وعگب المصيبه عالهزل اول عزاء
باچر نودع اهلنا وسكته يا ليل البكاء
✍🏻 خادمة الزهراء // ليلى زغيب
#يا_ليل_طول_ساعاتك 💔
#عظم_الله_لكم_الاجر_ياصاحب_الزمان_بمصاب_جدك_الحسين
#الوداع
في وداع زينب للهواشم
زينب ابهاي المسيه اشلونها
ليلة اوداع وعمن ي اعيونها
——
ليلة اوداع وگلبها اتفطر
ابلوعه لوجوه الغوالي تنظر
اشلون بالله اشلون گولوا تصبر
بس ظلام الليل وايودعونها
——-
ليلة اوداع وحزنها وافي
كافي يا دنيا عليها كافي
بس سواد الليله كلها اتجافي
والمهج مالومه وايفطرونها
——-
بس سواد الليل عباس وتروح
عايف اختك يابَعَدها للجروح
ريت گبلگ ريت طِلْعت مني روح
خويه واختك انتم ادّفنونها
———
اشلون يابعد العقيله وحيلها
گلي من تگضي المسيه ابليلها
خويه واتهد الاعادي ابخيلها
وبلمثلث روحك ايطلعونها
——
بس سواد الليله وانعوف الدلال
لا خيم تبگه ولا تبگه رجال
باجر اتشوفين كلهم عالرمال
ما يطوَوْل الليل وايذبحونها
——-
شبعي يا زينب من اخوانج حنان
لاتظل فرحه بعدهم لا امان
ليله وايشيلون لدبار الجنان
ومهجتك باجر اسى ايلوعونها
——-
شمي شمي اخوانج وهوْدي الحنين
صبح باجر ابد مايهدا ويلين
كلمن اتشوفينه مذبوح وطعين
عالرماح الروس وايرفعونها
——-
شرّبيهم دمعج وماي العيون
صبح باجر وابضماهم يرحلون
اعمي عينج لاتراهم يُقتلون
روحج ابهضم واسى ايكتلونها
———
#بنت_الشمري
بنظرة فـراگ التقينـه
بـلا كــلام توادعـيـنــه
سكته ويسولف بچينه
ليلة اوداع
---- ---- ---- ----
اتلاگينه سكته ولا صوت بس الدمع يتلاله
شيحچي الذي بعينه يشوف دمعات عين اطفاله
وكل خيمه يتركهه يريد حرمه تكض بذياله
يا حال ابو عبد الله يكسر الخاطر حاله
دنيا ظلمه وسَيل مدمع
وبس ونين ونوح تسمع
حسين باچر روحه تطلع
ويبدي الضياع
---- ---- ---- ----
اتگابل حسين وعباس وكل العيون اعليهم
وكلمن يصدهم بالعين يبّچونه ويبّچيهم
ام الرضيع العطشان بشفايفه تراويهم
وسكنه العطش عمي تصيح واخواني ضاگت بيهم
وبينهم صارت رقيه
وناحو اعليهه سويه
ويلي يا آخر مسيه
شتحمل اوجاع
---- ---- ---- ----
هناك ام الاكبر بالنوح ضمت ولَدهه وضمهه
بنحره تشم وتجر آه وحب ايد امّه وشمهه
وصاحتله يا تعب ارباي امك تموت بهمهه
لو غطه جسمك التراب ومن شوفتك يحرمهه
وفتح ليه حسين باعه
وضم علي اوليده بذراعه
شگد صعب الاكبر وداعه
يحني الاضلاع
---- ---- ---- ----
من خيمة القاسم صار اسمع نحيب وونه
وچلمة شهيد او عريس ودم وزفاف وحنّه
وانه بحسرتي اتعنيت انظرته وبدر تَم چَنه
ورمله اتحَچِي نضيعه شلون وهذا جماله وحِسنه
حسين شافه ومسح راسه
اتذكر المجتبى وباسه
هذا امانة اغلى ناسه
هضمه لو ضاع
---- ---- ---- ----
انصار اخوي يهوسون يم خيمتي يسمعوني
برگابنه نفدي حسين نيّتهم يطمنوني
وآنه ارد وانظر لحسين والشوف رك بعيوني
باچر شلون من يطيح وبالسوط يتولوني
يعتلي راسه اعله رمحه
ويحدي بضعوني اليذبحه
الليل لاحل كون صبحه
تلمني يا گاع
---- ---- ---- ----
خذت الگلب يم عباس يمه اگعدت ملهوفه
وصديتله وعندي احساس وبي رجفه گلبي وخوفه
بچفوفه مكروه يصير وظليت احب بچفوفه
وحاچيته اديك من تطيح تلگاهه ادَي مچتوفه
عازتك گتله چبيره
وحيره يابو الغيره حيره
باچر يگودوهه اسيره
اخت الاسباع
---- ---- ---- ----
ياسر حسن
محرم ¹⁴⁴⁶
خدرك يبو فاظل مسبي وبلا كافل
جبريل من سابع سمه حجبهن ابجنحه
🔴🔴🔴🔴
امن السمه صادر بيان امن الجليل
انگطـعن اچفـوف الگمـر يجبرئيل
زينــب المهيـوبة تنــــمس مستحيل
للخـدر روح واخــــذ دور الڪـفيل
هاكم خبر عاجل من السمه نازل
جبريل من سابع سمه حجبهن ابجنحه
🔴🔴🔴🔴
كربله اتعطرت من مسك النحور
ولأن بالخيـــمات سڪنتها البدور
لمن احترگت نشم ريحــــت بخور
اليوم يم زينب خـــــدر هاشم يدور
مثل الورد ذابل ضعن النبي جافل
جبريل من سابع سمه حجبهن ابجنحه
🔴🔴🔴🔴
اليوم تنزل ڪل ملائكة السماء
اوياهـــم ينزلون ڪــل الانبياء
ڪلهم ايحــرسون سيدت النساء
هاذي زينب بت امير الاوصياء
وابحكمة العادل رب السمه گايل
جبريل من سابع سمه حجبهن ابجنحه
🔴🔴🔴🔴
من بعد ماحـــرگوا اعليها الخيام
ابلا ڪفيل الـيوم تمشي ولا امام
حافية فوگ الرمل وابنص ظـلام
بالخـــــرايب بت علي الليـلة تنام
يمشي الخدر راجل حزن ودمع شايل
جبريل من سابع سمه حجبهن ابجنحه
🔴🔴🔴🔴
مستحيل الصــــوط يوصل للمتون
وڪــــون تعمة لو تصدلها العيون
هاذي موش اخدور كائن من يكون
هذا خدر الله والــــــــه الله اليصون
لجله الدمع هامل ويسمعني كل سائل
جبريل من سابع سمه حجبهن ابجنحه
🔴🔴🔴🔴
الله ناده المـــلك نزلــــوا عالصــــعيد
حرسوا زينب هذي اخت اعظم شهيد
وچــان اخـــوها الگمر بالطف العميد
من يمــــــرها الهــــوه يســـتأذن اريد
ميمسها اي عايل غصباً على العاذل
جبريل من سابع سمه حجبهن ابجنحه
🔴🔴🔴🔴🔴🔴🔴🔴🔴🔴🔴🔴🔴🔴
وليد المندلاوي
ليلة الوداع
ليل العاشر. محد يتصور مأساته
والد حاير. گاعد ويودع ابنياته
كل كلمه تحمل جرح. ماضل وكت للصبح
**
صفت ليلة مأسي بكل معانيها
اليريد يودع اهله دموع يگضيها
بقت حته الخيم تبچي اعله اهاليها
ليلة نايبه شتريد سميها
شنهو يصبره،،،، الناوين احبابه يودعونه
يخلص عمره،،،،، بس الدمعه بطرف عيونه
عنده الفرح مايصح،، ماضل وكت للصبح
**
يفتر عاالخيم بعيونه دمعاته
ويتحضر بده يودع عزيزاته
ماتتوصف اليله معاناته
من العبره تموت بصدره كلماته
كلش صعبه،،، هاي تشمه وهاي تشبگه
اصبح گلبه،،، مثل الورقه النار تحرگه
باچر وداع وذبح ،، ماضل وكت للصبح
**
زينب لاگته متألمه وتنعه
شماله اليل رايح يركض بسرعه
علي الردالشمس! مو يمي ويرجعه
دمعهم صار دمعه تسولف الدمعه
هدمت حيله،، اخته وماتگدر لوداعه
واخر ليله،، والزينب ضلن چم ساعه
راسه يصير برمح،،، ماضل وكت للصبح
**
گابل مهد ابنه وضل يناغيله
وي امه يلولي من تلوليله
عبدالله العطش غير تفاصيله
نحره للذبح ساعات باقيله
سهمه ينطره،،، والمنحر من هسه يريده
تكسر ضهره،،، من يذبحون ابنه بأيده
باالدنيا ماكو ربح. ماضل وكت للصبح
**
يعاين للعضيد وصاحب الخوه
اذا طاحن اچفوفه تموت المروه
عكب عباس بيمن بعد يتگوه
يرد من يمه لكن چنه موهوه
بعد اعظيده،،، حسين تضيگ الدنيا بعينه
يمشي وبيده،،، من عاالشاطي يلم چفينه
دمع الحزن خل يسح. ماضل وكت للصبح
سعد العبودي
أُبِيحَ الماءُ ياوَيلي
وظمآناً قضى طِفلي
أأشرَبُ أمْ
أموتُ بهَمْ
وظمآناً قضى طِفلي
***
أنا أمٌّ لطفلٍ ما
تعدّى عُمرهُ الأشهُر
أمانُ الكونِ في عَينَيهْ
أرى لمّا بها أنظُر
سهرتُ الليلَ أرعاهُ .. كبدرٍ حينَ ألقاهُ
تذوبُ العَين
لطفلٍ حُسين
نهارٌ قربَهُ ليلي
أُبِيحَ الماءُ ياوَيلي
**
لقلبِ الأمِّ رَجوَاهُ
ترى زَرعاً لها أزهَر
وُروداً عطّرَت دُنيا
وغُصناً يانِعاً أخضَر
فكيفَ الحالُ إن أذوَى .. وسارَت عكسَ ماتهوَى
رياحُ الفَـقد
وجاءَ البُعد
ليقتلَها بلا مَهلِ
أُبِيحَ الماءُ ياوَيلي
**
بحَثتُ بظُلمةِ الليلِ
ووحشةِ هذهِ الصَحرا
عن الوجهِ الذي دَوماً
ينافِسُ حُسنهُ البَدرا
وقلتُ سألتَقي إبني .. ليَسكُنَ مأمنَ الحِضنِ
شعَرتُ الآن
مُحالٌ كـان
يجودُ الدهرُ بالوصلِ
أُبِيحَ الماءُ ياوَيلي
**
بقلبي جمرةٌ حَرّى
كمثلِ حَشاهُ إذ عَانا
ومازادَ الضَنا فيهِ
حبيبي ماتَ عطشَانا
بسِنِّ النَبلةِ القاسي .. سَقتهُ شَقاوةُ الناسِ
وكانَ المـاءْ
مَسيلَ دماءْ
وكانَ الرِيُّ بالنَبلِ
أُبِيحَ الماءُ ياوَيلي
**
أتاني الماءُ محمُولاً
بكفِّ الشَانئِ الأبتَر
رأيتُ المهدَ والسَهما
بكأسِ الماءِ والمنحَر
دفعتُ الكأسَ يالَهفي .. رَواءي كانَ أم حَتفي
وفاضَ الدمعْ
كجَاري النَـبعْ
فمَن ذا قد رأى مِثلي
أُبِيحَ الماءُ ياوَيلي
============
لقمان لعيبي البدران
لطمية لعلي الاكبر عليه السلام ( الفارگ عيونه )
سبعين الف خيال واكثر
كلهه اعله ابو السجاد تفتر
ويصيح يوليدي يالاكبر
مابيه الم جسمك توذر
( اللطمية )
اشلون ايشوف دربه الفارگ عيونه
حگه حسين يعتب لاتلومونه
حگه حسين يبچي امضيع اولاده
وگف بيناتهم وامهدمه افاده
يسباع الحرب يهل الشيم ناده
وبالميدان ناموا مايحاچونه
اشلون يشوف دربه الفارگ عيونه
نامو عالرمل كلمن بميدانه
والعدوان تتباشر وفرحانه
ابو اليمه انهضم ويحشم اخوانه
علي الاكبر تگطع ماتشيلونه
اشلون ايشوف دربه الفارگ عيونه
علي الاكبر يطيح امنين ماشيله
امگطع بالسيوف اشلون اتچيله
دمه يفور حاچوني شسويله
ماچنه علي ولاينعرف لونه
اشلون يشوف دربه الفارگ عيونه
بس جروح صاير مو علي چنه
والله احتار گلبي اشلون المنه
متنك وين اگله وماشفت متنه
كل وذره بنويه امعزله امتونه
اشلون يشوف دربه الفارگ عيونه
كل وذره بكتر وامتون ماعنده
خدك وين اگله ردت اشم خده
اشلون ارجع واعوفه بمصرعه الوحده
والكفار من ارجع يدوسونه
اشلون يشوف دربه الفارگ عيونه
من ارجع تطب الخيل بضلوعه
گلبي اليامصاب يصير يالوعه
ضل بس العليل يهلن ادموعه
ايس من اخيه وخابت اضنونه
اشلون يشوف دربه الفارگ عيونه
كلهه امذبحه وبس الحرم يمه
ايس من اخوته ومن ولد عمه
گومن للوداع ايصيح ابو اليمه
لو طر الفجر راسي يحزونه
اشلون يشوف دربه الفارگ عيونه
✍شاعرة اهل البيت
الملة ام هجران العمارچيه
غير مبري الذمه من يحذف اسم الشاعرة او ينسب الرثاء لشخص اخر
نعي للقاسم بن الحسن عليهما السلام
انا لله وانا اليه راجعون .. ولاحول ولاقوة الا بالله العلي العظيم ..
عظم الله اجورنا واجوركم بمصاب القاسم بن الحسن عريس الطفوف ..
حبايب اليوم رمله ام القاسم حاضره وياكم بكل عزه وكل مجلس اتريد دمعه اتريد ونه اتگول وين الفاگده ولد وين الفاگده اخو وين الفاگده شباب خل تذكر مصاب وليدي لان ماتحس بألم ومعاناة الفاگده غير الفاگده واحنه هواي فگدنه شبان وشهداء وهاي رمله تگول عازيني واعازيچ وبعد شتگول ؟ ( تگول ) :
يالفاگده اتدني عليه
الونه الچ والونه اليه
نار الولد كلش سريه
نار الولد بيش اطفيهه
يالفاگده تحسين بيهه
طلعي الهدوم وگابليهه
طلعي الهدوم بليلة العيد
واشبعي هضم يالفاگده اوليد
وبطلي العتب والعتب شيفيد
عاتبت وعتابي شنفعني
باللحد نام وماسمعني
ورديت للبيت وفجعني
لو بيدي مارديت للبيت
واعزاز بالتربان خليت
بطرگ التعب والهضم ضليت
بطرگ الهضم ماجبت كلشي
واتوچه عالحيطان وامشي
الولد ردته يشيل نعشي
شيال للتابوت ردته
اشلون گليلي دفنته
وجوه التراب الولد عفته
خليته جوه الگاع مدفون
افراگ الولد چتال تدرون
مثل السهم ويبز العيون
مثل السهم بگلوبنه يبات
ويلاه يفراگ الشبابات
ونن والطمن يالمضيعات
ونن يالمضيعات كلچن
امنومين شيالت حملچن
بالمگبره وشيردهم الچن
شيعودهم ناموا بالگبور
كلهم شباب وچنهم بدور
ظلمه المباني وغرب النور
ظلمه المباني الگبل حلوه
نمشي جهد ونگوم گوه
وننشد عله البيهم امروه
ننشد عليكم وين صرتوا
توكم ازغار وماكبرتوا
ومن نومة المظلم خربتوا
گطعتوا وصلكم من وصلنه
اشگد حملنه اشگد سهرنه
والبين اخذ ثمرة تعبنه
البين اخذ ثمرة اربانه
وافراگكم حار وعمانه
وكله لهل زينب عزانه
✍شاعرة اهل البيت
الملة ام هجران العمارچيه
غير مبري الذمه من يحذف اسم الشاعرة او ينسب الرثاء لشخص اخر
قصيدة ( رايح ) لسان حال ليلى ام علي الاكبر عليه السلام
رايح چنه ما يرجع بعـد
رايح آه يــا فگد الــولد
رايح بيتي ظل بلا عمد
مــن راح الاكــبــر
****
رايــح اوليدي اصــدلــه للــمنـــيه
چـــن محمد مــن بـــرز للغاضريه
صحت ربي الراد يوسف رده اليـه
وللسما بدمعــات شلت اثنين اديـه
ربي رد علــي الاكبــر الي
ربي يرجـــع وليـدي علي
ربي احس راحو كل هلي
من راح الاكبر
****
راح وحسين آنه اصدله گلبه حاير
مـو علي الرايــح محمد للعســاكر
راح وبدلالي احــس كـانون شاجر
يطفــه الا يعــود ويكحــل النواضر
عيني لشوفت وليــدي تصــد
عيني تخاف من طاري البُعد
عيني ريــت لا ضيــها يـــرد
مــــن راح الاكــبــر
*
راح وبگلبي تــرك لفــراگه جمـره
مثل جمــرة والــده الضلت مسعره
بحيره مثل حسين بالحسـره انطره
گلبي يعلــم مــا يـــرد ليه وانظــره
حيره حيره لو ظل عالترب
حيره بعــده اروحن للغرب
حيره خيمّنه راحت تنسلب
مــن راح الاكـــبـر
****
ادركني يا بويه اجه والصوت اسمعه
من المصيبه حسين ظل دربه يضيعه
اه يــا فجعــت دليلي شلــون فجــعــه
انــه وي عمته ســوه بالخيمـه ننعنه
ويلي طــاح مــا بيـن العـــده
ويلي شلون ابوه من شاهده
ويلي مـــات گلــب الــــوالده
مــن راح الاكـــبـــر
*
يبني راح انعاك كــل صــبح ومسيه
واحد انته ورحــت يوليدي من اديه
يساعد الله حسين شافــك عالــوطيه
شـــاف جــده امغــسل بــدم المــنيه
جدي نـــــاده هــــذا بكربله
جدي والـــمدامـــع هاملــه
جدي صوت الحسين اعتله
مــن راح الاكـــبر
*
الشاعر
موسى البديري
*
محرم الحرام ١٤٤٧ ليلة الاكبر
طور قصيدة :
( مات النفس بيه )
ملا وليد البطي
وينه ابني… هذا عرّيس الهواشم
وينه ابنه… عالترب گالولي نايم
وينه ابنه… من العطش ما اتروّا صايم
عالترايب… شافته ولطمت عا خدْها
عالترايب… تودع الغالي يا وسندها
عالترايب… اتعفر الجاسم ولدها
*الله يساعد گلب الام شلون شافت ولدها بهاي الحاله*
انت جاسم… منهو الي هشّم جبينك
انت جاسم… جاوب امك ٱجت تعينك
انت جاسم… يالولد بطل ونينك
خادمة آل محمد✍🏻
وصية القاسم ع لامه رملة قبل استشهاده
… ..ثم راح القاسم يوصي امه بهذه الوصية ولسان حاله…
يا يمه ٱسمعي وصيتي
لا تبچي ساعة ذبحتي
ولو شفتي يمه جنازتي
كفي دموعچ والعتاب
✾✾✾✾✾✾✾
لو شفتي جسمي باللحد
گولي فدا الزهره الولد
موتي مثل طعم الشهد
فدوا حسين كل الشباب
✾✾✾✾✾✾✾
لو شفتي هامي منطبر
زفيني يمه للگبر
بورد ورياحين وعطر
نلت الشهادة والثواب
✾✾✾✾✾✾✾
لو شفتي راسي عالرمح
خليني اواسي المنذبح
خيطي بصبرچ كل جرح
لو شفتي جسمي عالتراب
خادمة آل محمد✍🏻
#واقاسماه~
تغسيله من فيض الدمه
بالونّه نوحي لاطمه
يا للمصيبه الؤلمه
طلعت واويلي شافته
الله ما حال الأم ترى ولدها على هذه الحاله؟
صاحت يا ذخري ودنيتي
لوّعته گلبي بغربتي
مشهد يفتت مهجتي
يا جاسم اسمع صيحتي
ولدي قاسم حبيبي قاسم مهجة قلبي جاوبني / لحن. اسمع عتابي~♪
يمه اسِمعيني ~ يمه ذِكْريني
لو شفتي شبابي~ يمه ذكريني
الهامه طِبروها~ ضلوعي هْشَموها
شمعة شبابي ~ يمه طفوها
واقسماه واشهيداه~
خادمة آل محمد✍🏻
#واقاسماه
حال الأم مسحت الدم عن وجهه القاسم وضعت خدها على خد ولدها تجذب ونينها وحنينها على مصاب الولد تگله~
ليش يبني ~ كلها مجرّحات عيونك
ليش يبني ~ ليش مگطّعات متونك
ليش يبني ~ شاحب اصفر يبني لونك
الوداع يا ولدي~
واشهيداه~ يا شباب الفرحة محروم
واشهيداه ~ معفّر بدمك دموم
واشهيداه~ رايح من ايديه هاليوم
يمه يمه~ كان العهد تحضر بموتي
يمه يمه ~ تشيله عا اكتافك تابوتي
يمه يمه ~ جاوب واسمع لصوتي
يبني يبني~ اتبّددت يمه احلامي
يبني يبني ~ تجددت كل آلامي
يبني يبني ~ يا شهيد وچبده ظامي
خادمة آل محمد✍🏻
#واقاسماه
بحر طويل ~
ابدال العرس ياوليدي بدموع العين زفّيتك
يلي عالترب ممدود بدم مغسّل لگيتك
ردتك تحمل بنعشي بكبر سني تمنيتك
خذاك البين. من ايديه مفجوعه بعد امك
جاسم يا بعد روحي جريح ومنفضخ هامه
شضمد يا جرح گلي جسد مصيوب بسهامه
بحوافر خيل داسنّك اگبالي وروحي ملتامه
يا فرحة عمري ما دامت شهيد معفّر بدمك
خادمة آل محمد✍🏻
#واقاسماه
رملة عند مصرع ولدها القاسم ع
حلم أمك يا جاسم كان أزفّك يبني بيديّه
ما حسبت اشوفنّك جثه اگبالي مرميّه
عريس وافرح بعرسك سالم يبني رد ليّه
بدمك تالي محنّه والحنه بعد الخضاب
〰〰〰〰〰〰〰
هذا حال الأم التي تودع ولدها النظرة الاخيرة
لحن اسمع عتابي♪
نومه هنيّه~ فوق الوطيّه
ودعتك الله~ رحت من اديه
يا ذخر الٱيام~ يا حلمي ما دام
يصعب فراگك ~ يبني يجسّام
خليني اضمّك ~ يبني واشمّك
افتح عيونك~ وودعها أمك
خادمة آل محمد✍🏻