خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
نزله للرضيع
هـــرش ﮔلبي خــــذاه بيوم فـــارﮔني
حڴي لـــو صحـــت آه يالــــولد يبني
*
خـذاها اهروش ﮔلبي وصاب دلالــي
من يوم الجفـــاني أوليــدي الغالــي
يبـــرالي ردت مــو دمعـــي يبرالــي
أمــل روحي ابجفــاه أسهام صوبني
*
بجفاه أسهام صوبني وذبـح روحي
ومــا يبطل عليه لا دمعـي لا نوحي
يا جــرح اليفـــزز صفـنت اجروحي
كلف جـرح الولد كل ساعه يلچمني
*
يلچمني الولــد وجــروحـه تاذينـي
لان ردتــه تچيــه لتــالـي اسنيــني
سهم فڴــد الولـد طفــه نظر عيني
وعلــى النوح الدهر بجفاك علمني
*
علمنــي الدهــر بجفاك اجــر ونـه
يا مــاي العــذب مــا ينشبــع منه
ييمه اوياك راح انه اﮔطـع الظنه
يمن فرﮔاك يمه ابنار تضـــرمنـي
****
نــار افراﮒ هجـرك مـا اظن تطفه
اذكــر بين اديـه مـــن چنت تغـفه
يريت الصــاب نحرك ينڴطع چفه
لان منك يمــاي العين يحــــرمني
****
يحــرمني يمــاي العـين مـن طرواك
يريته ابنص دليلي سهمــك الصابك
كـــون افد لحــد نندفن انـــه ويــاك
ولحــدك يالولـــد يــا ريته اليضمني
*
الشاعر
موسى البديري
وزن حمزه الزغير دهري ذبني دارمي إلى القاسم ابن الإمام الحسن عليه السلام
يوليدي يــا جسّــام بالحــومـه عمك
انهض يا مــاي العين رخصله دمـك
يبنــي جـاســــم
حگ الـــربه هــل اليــوم أريـدنــه
****
يوليدي حگ ارباي هــل يــوم أريـده
والحسن يـا جسـّـام وصَه ابعضـيده
روحــك يـــا ماي العين خليهـا بيــده
ومنـــك أريــد اليــوم حـيل الصميده
ضحــــي دمــــــك
حگ الربـــه هــــل اليـــوم أريدنه
*
ربيتــك ازغيــرون ساهــرت ليلــي
وتعبني يبني أربــاك ما گلت ويلي
حيلي نــذرته أعليك يا بعــد حيلي
عمـك وحيد اليوم يـا عيني سيلي
وافـــــي عمـــــك
حگ الربــه هـــل اليـــوم أريدنه
****
يبنــي العمـــر لحسـين خليــه هديـه
وخلينــي احنّـي أبفيض دمك أديــه
يوليدي ا دري اليـــوم يـــوم الـرزيـه
ينفجـــع يبني أعليــك گلـب الزچيــه
دونـــــه عمـــــرك
حگ الـــربه هــل اليــوم أريـدنــه
****
شمعــه العمــر لحسين أشعـل شبابك
والحنّه يبني أتصير مــن دم خضابك
لــو عمــك أيناديــك يصعـب مصابـك
فــدوه ألك گله يروح عمــري بجوابك
عـمـــري فـــــــدوه
حگ الـــربه هــل اليــوم أريـدنــه
****
سيف الحـسن هاليوم شيلــه بيمينـــك
يبن الحــسن يا حيـــد واحمـي عرينك
دينك حسين يصير حـــامي عـن دينك
ولسبـــط أبو الــزهراء رخـص أسنينك
لجلــــه عمـــــرك
حگ الـــربه هــل اليــوم أريـدنــه
**
جــاسم ييمه أتشوف خيل أل آميـه
متجمعـــه ضـــد حسين بالغـــاضريه
يوليدي دونـــه اليــوم محلـه المــنيه
تحيا تـــرى مــن تمـوت نفسـك أبيــه
لعمـــــك دمــــــك
حگ الـــربه هــل اليــوم أريـدنــه
****
الشاعر
موسى البديري
هوسات للقاسم ع
لگيتك طايح ابدمك يجاسم والعرس ماتم
ابدال الحنه شو خليت. حالي عليك يتألم
ابروحي ما افكرت دوم بس لفرگتك اهتم
تحوم الحسره ابروحي . وخذيت انفاسي
🩸🩸🩸🩸
يانجم اليضوي الليل اظلم وكتي بخلافك
انرميت انه بمرار النوح ريت الگلب ماشافك
گلي بيا طريقه انوب.. حته انساهن اوصافك
بدلة عرسك يبني.... ظلت عصابه
🩸🩸🩸🩸
سويت المناحه اليوم يم راسك يبعد الروح
كلبي انذبح بالوعات مو بس نحرك المذبوح
حاچيني ييمه ارجوك امك بعد وين تروح
البدر اشلون اتصوب.. واطايح بالحومه
🩸🩸🩸🩸
ابني بعز شبابه يموت ويفارك نظر عيني
يجاسم جا شلي بعمري شلي بعد بستيني
لاحنه وعرس سويت وفرح من تلاكيني
الدنية اخلافك جاسم. ظيم اتراويني
🩸🩸🩸🩸
لجمني الجمر يالعريس وانه بعازت الفرحة
عذاب الكلب بالدمعات حته الدمع ميشرحه
يبني اليوم تدري الروح من اجفاك منذبحه
الموت اخلافك يحله.. يالضاوي ايامي
🩸🩸🩸🩸
يماخذ دليلي اوياك احجي وياك حاجيني
بلكت ترجع الانفاس ويكف الدمع عيني
هو العمر شنهي ايفيد.. عكبك شنهي وسنيني
الدمعة طول وتعرض.. لجلك يالغالي
🩸🩸🩸🩸
✍🏻الشاعره مريم العبوديه اسيرة الاحزان 💔
نزله ليلة علي الأكبر ع
شمحله الأخبار . لمن غار . شبيهك طاهه
...........................................
بالحومه انذار . مانعرف شصار
أحتار العدو وكال رد ألنه كرار
هالفارس أمنين . طشرهه صوبين
والأكبر يكول آنه أبن الحسين
وبسيفه . وبكيفه . من يقره الحمد
كل غاره . أبتاره . يحصدهم حصد
بطل مغوار . والأشرار . وذر سواهه
شمحله الأخبار . لمن غار . شبيهك طاهه
...........................................
صار الظهر ليل . راواهم الويل
شط أحمر اللون دم العده يسيل
مكطوعه الأنفاس . تتسائل الناس
هذا أبن الحسين لو هذا عباس
غاراته . وحملاته . جن عمه الكمر
ما يتعب . من زينب . ما مره أعتذر
يرخص الروح . والجروح . فلا غطاهه
شمحله الأخبار . لمن غار . شبيهك طاهه
...........................................
الما يشرد يموت . يرعبهم الصوت
والراسه ما طار حضّرله تابوت
بصولاته معروف . تشهدله الطفوف
تتراجف أعداه عيشهم بخوف
كل هامه . بصمصامه . تصعد للسمه
من كبّر . جن حيدر . حماي الحمه
هاي الأفعال . والأبطال . منو الينساهه
شمحله الأخبار. لمن غار . شبيهك طاهه
...........................................
ظل عزمه بركان . قائد عالأركان
من يضرب أعداه مايخطه نيشان
الكابله يطيح . ويسابك الريح
تترادم الروس من ياعلي يصيح
واعلومه . بالحومه . كدام الأبوو
ما قصّر . والاكبر . نعمين وكفوو
بأغلى الأحباب . والأطياب . أبوه يتباهه
شمحله الأخبار . لمن غار . شبيهك طاهه
.........................................
يا ثاني عباس . تشهدلك الناس
بن غانم أشصار لا ركبه لاراس
بالحومه زلزال .مثل الأسد صال
كده الحرب هاي جن ثوبه تفصال
بجّاهه . وخلاهه . محتاره الزلم
وحسينه . تصد عينه . كفيت ونعم
يبني ياحيد . يصنديد . نجم بسماهه
شمحله الأخبار . لمن غار . شبيهك طاهه
.........................................
مثل البدر لاح . جن وجهه مصباح
من شافه الحسين كل التعب راح
ما مثله موجود . والعالم أشهود
بلامت حرب شاب أحلى من الورود
عالحاسد . عالحاقد . نقره القل هوه
بطعناته . وضرباته . كل عشره سوه
بعلو الجبال . لمن صال . جثث خلاهه
شمحله الأخبار . لمن غار . شبيهك طاهه
..........................................
حيدر مطر العبادي
بسيف الحسن وعمامته
جسام طب الحومته
عفيات لامه الربته جسام جسام
--------------------------------------------
صعدت الغيره الهاشميه
جسام شاب الرافضيه
فوگ الدرع خله الوصيه
وكت الوفى بالغاضريه
من شاف عمه الوحده ومحد يعينه
طب يركض بنص الحرب سيفه بيمينه
ظل يرتجز چن حيدره بچفه وجبينه
جسام انه ابن الحسن من المدينه
علم عالي ،، شهم غالي
صبح فارس ،، على الوالي
صاحو هذا خيال البر
أبن الكريم المجتبى
من سادةٍ أهل العبى
لوذوا بأكتار الخبى جسام جسام
------------------------------------
جسام يا ليث الروافض
بامر الله روح اعداك قابض
درس الكرم والزود حافظ
رافع صرت للجيش خافض
لبيك يبن المرتضى خادم لوائك
أقبلني جندي بعسكرك وبكربلائك
جيتك فدائي بخدمتك سامع ندائك
هاي الارض ارضك تره وهايه سمائك
انه الدارس ،، نهج فارس
انه الحامي ،، آنه الحارس
دك روس الناس العياله
صوت الكفيل الهاشمي
في نحرهِ طافَ دَمي
يا ثورةً تكلمي جسام جسام
---------------------------------------
أذن أذان الموت بيهم
فارس شجاع ومعتنيهم
ابن الحسن سير عليهم
رجفت ترى سيوف البديهم
من جده ماخذ شمرته البچه النواصب
ما تعرف اسلوب البطل لمن يحارب
هذا الفتى الما ينحني الذل الشوارب
قاسم ظهر من يعتدي هذا المحارب
غضب نازل ،، درر قائل
شبه عمه ،، ابو فاضل
سوى سوايه عباس وهد
وعدٌ بحرب انجزه
موت الشهاده الجائزه
يُدعى بأسم المعجزه جسام جسام
------------------------------------------
ما ينتهي الفذ الفدائي
يتسمى فارس كربلائي
صاح آنه ايماني أولائي
لحسين تضحيتي وفنائي
راح استعد للمعركه ونحري التحيه
تحيا القياده الثائره والهاشميه
يا كربلاء العاصمه الذلت آميه
بيهه الحسين الرافضي ابن الرافضيه
بني هاشم ،، على الظالم
الى المهدي ،، الى القائم
حيل وياهه بعد ايد امك
قد قام نحر وارتقى
بل كان سيفآ ناطقا
للسبط في الحرب الوقى جسام جسام
-----------------------------------------
نستشهد ونرجع غيارى
والهاشمي واضح قراره
مو النه للغير الخساره
دمنه ترى كاتب عباره
بعد الممات وننتصر شاره بدمانه
هيهات للذله صفت لوحه بسمانه
ما يطفى جمره بكل گلب باقي عزانه
هاي الارض النه صفت هذا هوانه
قمم هايه ،، هنا الغايه
هلي الصارو ،، صدگ رايه
رايتنه اترف ما ننطيهه
يبقى الحسين للأبد
من مثله لا لم يٌلد
قد جاء للسبط المدد جسام جسام
كلمات الخادم / رعد الفريجي
ثوابها الى روح والدتي
يا يمه جسام
لا يمه لتنام
هلحضرت حنه وشمع
يا يمه مو وكت الدمع
يا يمه جسام
،،،،،،،،،،،،،،،،،،،،،،،،،،،،،،،،
ربيت وانطر يلولد من تكبر تباريني
يلما يشبهك اي بشر جاوبني بس حاچيني
متحيره لا يا سلوتي مرعوبه لتخليني
حگي من احلفك بالربا يا دنيتي ويسنيني
لتغمض العين
وين الوعد وين
يلونتك ما تنسمع
يا يمه مو وكت الدمع
يا يمه جسام
،،،،،،،،،،،،،،،،،،،،،،،،،،،
أم وتحاچي الربته وتفرح تريد بعرسه
يبني الشمع من يشتعل شو چنه يحرگ نفسه
شو لا نفس فوگ الرمل لا گال يمه بحسه
هو الخسر مثلك ولد بس گلي بله شينسه
ها يلولد گوم
شو طول النوم
يلفرگتك ما تنجرع
يا يمه مو وكت الدمع
يا يمه جسام
،،،،،،،،،،،،،،،،،
ليل اهدعش ما بي ضوه والحومه كلش سكته
بهداي اصيحن والتفت والدمع طول وكته
شفت ابني نايم علثرى بس ريت لا ما شفته
كل طوله تربان ودمى ما ردلي من حشمته
امك انه اهناه
يوليدي ويلاه
امك عفتهه بيا وضع
يا يمه مو وكت الدمع
يا يمه جسام
،،،،،،،،،،،،،،،،،،،،،،،،،،،،،
مديت طولي اعله الولد حد ما تغطه بطولي
حاچيته بس ما رد علي لا گلي أمري اوگولي
يمه اعله بختك شو متت ياهو اليعدل حمولي
يهل المگابر حشمت بس الچفن ودولي
ويه العزيزين
خل تغمض العين
وبگبر واحد ننجمع
يايمه مو وكت الدمع
يا يمه جسام
،،،،،،،،،،،،،،،،،،،،،،،،،،،،،،،،
خلصت بعد يبني الشهم والضعن رايح منك
للشام وبدرب السبي راح امشي وابعد عنك
يوليدي يربات الدمع يلگمر نايم چنك
خليتك انه بكربله وعيوني ما ينسنك
ما بطل النوح
يلماخذ الروح
گتلك تره محضره الشمع
يا يمه مو وكت الدمع
يا يمه جسام
✍️✍️✍️✍️✍️
كلمات خادم الحسين
رعد الفريجي
االيوم يوم العباس نشلع صدرنه الليله
---------------------------------------------
الليله يا عالم ثگيله الليله
الليله مخصوصه لكفيل العيله
الغتره تبچيله و تنوح الشيله
ماهو منا الما يدگ بحيله
علتراب ينام خده
شده بلعباس شده
ايده ماكو بطرگ زنده
بلوه هايه ،، ما كو رايه
ياهو اليحامي العبايه
لا چفوف ولا جربته
يا اللهي اتعين اخته
يا ظهر تدري الكسرته
يا گمرنه ،، اگعد النه
وين چفك يفزعلنه
جاب الخبر وجه حسين والنهر ماخذ حيله
االيوم يوم العباس نشلع صدرنه الليله
-----------------------------------------
السابع الماخذ عمرنه وروحنه
بطيحت العباس زايد نوحنه
زغار والسابع سبب لجروحنه
ويلي يلعباس يا مذبوحنه
ضعنه يا عباس چلمه
والحچاهه شلون زلمه
حسين بيده آثار دمه
صاح اخونه ،، فارگونه
يا عزيز ابگلب ابونه
شنهي نايم وانه يمك
انت ميت وانه اشمك
فرهدوك شلون ألمك
يا كشختي ،، وكافل اختي
شو صرت خويه كسرتي
يابو الفضل يلخيال ها يلترد العيله
االيوم يوم العباس نشلع صدرنه الليله
------------------------------------------
بمجلس العباس نرفع رايه
نكتب اعليهه الگمرنه حچايه
هذا واحد ما تبدل رايه
هذا سوى ابكربلاء أسوايه
هذا يسوى هواي يسوى
والحسين ايگله فدوه
الخوه بس وياه خوه
ما نعرفه ،، موته وسفه
علتراب ايطيح چفه
طايح اليگضي الشدايد
دمه فوگ عيونه جامد
راح من حسين قائد
محني ظهره ،، من يجبره
كسره بالعباس كسره
طاح العمد يا هلناس حتى الخيم تبچيله
االيوم يوم العباس نشلع صدرنه الليله
------------------------------------------
يله خلي إنوح نلطم روسنه
طاح هيبتنه الگمر ناموسنه
هالعزاء صاير چبير دروسنه
ليلة العباس كل قاموسنه
بيهه نتعلم نوافي
والدليل ايصير صافي
شافي يلعباس شافي
بابه باقي ،، چفه ساقي
هوه قائدنه العراقي
يا حلاتك وانته دامي
يا غلاتك يا أمامي
اسمك امحلي الاسامي
بالمجالس ،، يمنه جالس
شذره يا تاج المحابس
لو صحنه ها يلكفال كل همنه راح ايزيله
االيوم يوم العباس نشلع صدرنه الليله
------------------------------------------
هذا يوم الهيبه شيخ القاده
ياهو منكم عنده حاجه وراده
يله بسم الله يحچي امراده
تگضي بأذن الباري يم الساده
والدعاء بچفوف كافل
يصعد لاعلى المنازل
والنعم من ابو فاضل
ما يردنه ،، هوه عدنه
طحنه بس لا ما يهدنه
نعمه عباس و مناره
حتى باوقات الزياره
نشعر بهيبة وقاره
من نصيحه ،، من ضريحه
يشفى الارواح الجريحه
ما تبطي حاجات الناس وايد الخلگ توميله
اليوم يوم العباس نشلع صدرنه الليله
كلمات الخادم / رعد الفريجي
ثوابها الى روح والدتي
خُويَه وِينْ....طَايِحْ عَلَمْنَه
خُويَه گُومْ...حِرْگَوْ خِيَمْنَه
يَا گُمَرْ...........آنَه الْغَرِيبَه
مَا تِشُوفْ...زِينَبْ سَلِيبَه
----------------------------------
خُويَه چَا وِينَه الْكِفَلْنِي حَضِّرَوْ لِاخْتَكْ حَبِلْ
لِلسَّبِي يَرْدُونِي أَطْلَعْ أَمْشِي وِبْوِلْيَةْ نَذِلْ
لَا تِظِنْ جَابَوْ مَحَامِلْ جَابَوِ النُّوگِ الْهِزِلْ
يَا بُو فَاضِلْ عِينِي تِجْرِي وِانْتَه مَيِّتْ مُو عَدِلْ
وِالْحِجَابْ.....بِالطَّفْ تِسَلَّبْ
وِالْحِجَابْ...عَالْغَبْرَه يِنْحَبْ
هَاذَه حَالْ....أُمِّ الْمُصِيبَه
مَا تِشُوفْ...زِينَبْ سَلِيبَه
----------------------------------
مَا گِلِتْ يَخْتِي وَدَاعَاً گِتْلِي رَايِحْ لِلنَّهَرْ
تَالِي رَدِّ حْسِينَ اخُونَه مَحْنِي مَكْسُورِ الظَّهَرْ
رَاحَ اظَلْ عَطْشَانَه بَعْدَكْ حَتَّى امُوتِ مْنِ الْقَهَرْ
وَآنَه أَحْزَانِي لْمُصَابَكْ مَا يِكَفِّيهَه دَهَرْ
كُونَ اطِيحْ...عَالشَّاطِي يَمَّكْ
كُونَ اطِيحْ.......كَاتِلْنِي هَمَّكْ
يَا حَبِيبْ.....فَارَگْ حَبِيبَه
مَا تِشُوفْ...زِينَبْ سَلِيبَه
----------------------------------
#العباس
#محرم_١٤٤٧هج
الشاعر حسن خنافر العاملي
ياجسام .. ياجسام .. ياجسام
🛑🛑
بعد وجهك يصبح الله .. صبح مايطلع بعمري
ربيع ايامك الحلوات .. رايح وانكسر ظهري
اذا مامرني منك طيف .. تكبر حسرتي بصدري
واظلن حالي حال الصيف .. جمر دمعاتي التجري
ياروح الروح .. شيهود الروح
بعيوني اهناك .. شفتك مذبوح
ياجسام .. ياجسام .. ياجسام
🛑🛑🛑
على زفة موت هم حسدوك .. مارادوك تتهنه
لو تدري الصبر بجفاك .. يتطشر والمّنه
الفرح يبني اندفن وياك .. وعرسك ايّست منه
عليك يصلّن عيوني .. وعليك اتسلم الحنه
بفاتحتك صار .. الماجان يصير
من السابعه وجاي .. ماشفت الخير
ياجسام .. ياجسام .. ياجسام
🛑🛑🛑
نطيت حجايتك وفيّت .. يبني المطلب بمطلب
ترد عطشان اذا عطشان .. وعمك ماي مايشرب
و ارد مذبوح من كتلي .. الج ما ارجع مصوّب
بالمزامط حسيني وحار .. وبارد عالگلب تنصب
يالجفك جان .. متروس احساس
ومدوخ الناس .. مثل العباس
ياجسام .. ياجسام .. ياجسام
🛑🛑🛑
يظل مكسور مثل الطير .. الغريب ويفگد اولاده
الدنيا فاهيه بلياك .. غصن وتذبّل اوراده
حبيبي وجنت اكلنلك .. يفدوة المشيت الساده
يجاسم يزعل القران .. اذا يتشكك اجلاده
القران حسين .. واجلاده اخيام
نفديله ارواح .. واحنه الخدام
ياجسام .. ياجسام .. ياجسام
🛑🛑🛑
ثواب عيوني لصورّك .. يبعد الروح اوزعهن
اثنعش بخت اثنعش معصوم .. الك شمعاتك اشعلهن
ترف طايح گبل وكتك .. بأديه ايامك احسبهن
العرس يوليدي مو للموت .. اثيابك جنت اخيطهن
لابس بالجيش .. يااجمل شاب
يالعرسك صار .. بس دم وتراب
ياجسام .. ياجسام .. ياجسام
🛑🛑🛑
علي حسين المنصوري
قصيدة ( عمر الطفوله ) قصيده تحكي نظرت والتساؤلات عندما كنا اطفال في قضية حنة القاسم
من عمر الطفوله أبالي ألك راســم
حنّه وعرس بي شمعات يا جاسم
كبرت ومرت أعـوام
لگيت العرس جسام
شـــــــــهاده شـــــــــــهاده
*----------*----------*
بزغري ألك بالي رسـم
عــرس والكون ابتسم
وفـــرحــه مـا بيها الم مئآتم
وأمـــك أتهلـهل اجـــت
بعرسك اتصفگك مشت
من الفـرح ضني بچـت يجاسم
كـل شي يا جاسم تغير من وصل عمري الشباب
عرسك الچان أعلى بالي بالأصل دمعه ومصـاب
وأمك الگلت انه فرحت الفرحه چانت بس سراب
ماتت بالطفوف أهناك فرحتها
ساعة ما جـرت للفرگه دمعتها
تنوح بگلب محتــام
لگيت العرس جسام شـــهاده
*----------*----------*
بكثـر مـا طيـب گـلــب
چنــت اظنن بالحــرب
عرس بس مدمع يصب عجيبه
ليش يومك مـن يمــر
بيّـدي الطــم عالصدر
ومن كبّـــر بي العمــر مصيبه
شفت عرسك مــن يجينه يگضي دمعــات وانين
والشمـــع يطفــه يجـــاسم من تمر بيه السنــين
لـيش يومــك مــن يجينــه مــا نحنيــها الاديــن
يا جاسـم ننـادي وبالگـلب جمره
يالمضحي بحايته من زغر عمره
ولا مــرت بالأحـلام
لگيت العرس جسام شـــهاده
*----------*----------*
بگلبي چــانت اسأله
ليش رملــه معـوّلــه
بعرسك ابطف كربله حزينه
وانته واحدها وتوٓن
گلبت الفرحه حــزن
بيوم ثامن من يجن علينه
من كبّــر بي زماني لگيت عــرسـك بالطفــوف
زفتـــك للحـومــه أمـــك للـرمـــاح وللسيـــوف
ومن رجعت الحنّه دمك چان واضح عالچفوف
من تنظر دمّـــاك تنــادي يا يمه
يالضحيت دمـك دون ابو اليمه
امحّنه ابوسط الخيّام
لگيت العــرس جسـام شـــهاده
*----------*----------*
كــــل محـرم ننفجـــع
بيومــك يهـل الدمـــع
ويطفه يا جاسم شمع شبــابـك
شلون يومك نوصفـه
الفاگده بس تعــرفه
من تصد شمعك طفـه لمصابك
من يمر يومــك يجاسم بينه يرجــع چم مصاب
شگد صواني عـــدنه ظلت تنتظر جيت الشباب
وألف رمله أبهمْ تتاني بلكي يخلص هل الغياب
من يوم الطفت من رمله شمعتها
ويانـــه بقـــت للــــدوم ونتــهـــا
صعبه الفاگـــده اتنام
لگيت العــرس جسـام شــــهاده
*----------*----------*
كل شي بفكاري اختلف
مــن عرفت انـه الهدف
دمــــك أبيــوم النــزف وريـــــده
حسين چــانت غايتك
مــن السيوف الحنّتك
والشــهــادة زفتــــك عقيــده
رســم دمــك للعقيــده بالطفــوف الانتصـــار
وحنــّتك كل مغــربيه انشوفها أبتـالي النهار
يالدمــائك شعله صارت مـا تعـرف الانكسار
دمـك بعده ينــزف كــل وكت بينه
فــدوه انگــول لجل حسين والينه
شعله أتضّوي كل عام
لگيت العرس جسام شـــهاده
*----------*----------*
الشاعر
موسى البديري
#واعباساه~ لحن قلب امك يبني مفتت♪
طاح العباس من ٱعلى مهره
ومنه طاحت يمنه ويسره
عينه بسهم البين انصابت
وايلي براسه هنانه الطبره
عباس عباس عباس عباس
〰️〰️〰️〰️〰️〰️
صاح بصوته خويه يا حسين
وينك تحضر تشوف الچفين
سال المال وما من قربة
اسقي الأطفال يخويه منين
خويه خويه خويه خويه
خادمة آل محمد ✍🏻
نعي(وزن نصاري) لسان حال الحسين عليه السلام يخاطب ابن اخيه القاسم
دمعه ايسيل ابو السجاد مهموم
برز شبل الحسن غاير على الگوم
ياعمي يگله الگلب ملچوم
الاكبر راح خله الحيل مهدوم
★★★★★
ياجاسم ردت بوجودك ارتاح
ياشبل العضيد ال من وكت راح
صدگ طايح يعمي بيد ذَبّاح
وجسمك صار تالي مهبط ارماح
★★★★★
يبدر الليل يزهي الليل بضواك
يا جاسم مشيت وجاني فرگاك
متوذر يماي العين الگاك
تراب الگاع يلمهيوب غطاك
★★★★★
على التربان عمي مو وكت نوم
شباب ومن شبابك صرت محروم
شگل لمك چتيل وتنزف ادموم
ودوس الخيل ماخلالك ارسوم
★★★★★
شگل لمك اذا للخيَّم رديت
يعزوتها وضواها التارس البيت
أسكت لو أگلَّها بحيره ضليت
گبل چتلك ردت موتي وتمنيت
الشاعر حسن لعيبي الحريشاوي
لشهادة القاسم بن الحسن المجتبى عليهما السلام على طور (حرم عندي) لباسم الكربلائي
يصب دمي لأجل عمي
أمامي وقرة أعيوني
★★★★★
انا ابن النبي المرسول رحمه وخير للوادم
وابوي المجتبى الطاهر امام ومن بني هاشم
أصلنه على الارض رحمه وعالم من بعد عالم
وجدي المرتضى الكرار وانا الباسل ( القاسم )
أحاربكم واعرَّفكُم
بنفسي لوتجهلوني
★★★★★
هظمتوا حسين ابواليمه ومنكم ياخلگ همي
بشهر واحد نكرتوها رسايل وصلت العمي
جهل لوماتعرفونه لولمع الذهب يعمي
انا ابن الحسن روحي لبواليمه وفداه دمي
إله أسنيني ونظر عيني
النصرته ماتمنعوني
★★★★★
أنا القاسم اتعنيت للحومه اواجهكم
أحمي عمي وعياله وخيام الحرم منكم
شتنكرون بالمحشر لوتشهد رسايلكم
يلكل رحمه مابيكم وغير الغدر ماعدكم
العمر ذمه لبواليمه
حب حسين مضموني
★★★★★
قليله بعيني كثرتهم شماتكثر عساكرها
الحومه ماتهد عزمي ولاكثرة مخاطرها
بوادم علطمع والمال مبيوعه ضمايرها
كسروا هيبة الاسلام ياهو البعد يجبرها
مثل عمي يضل عزمي
الحرب ماغيرت لوني
★★★★★
رخص عمري لبواليمه وشبابي وزهرة أيامي
للضل لامعين وناس ومهموم الگلب ضامي
ومن اسهام تتخاطف جبينه للاسف دامي
البواتر ماتألمني غربته زادت آلامي
يوصوني ويذكروني
للطف اهلي رَبوُّني
الشاعر حسن لعيبي الحريشاوي
#كَفُّ_الكَفيل
زَينَبٌ دونَ المُعيل
في العَرا كفُّ الكَفيل
يا لَرُزءٍ حَلَّ فينا
حانَ مَولاتي الرّحيل
واشَهيدًا واشَهيد
واذَبيحًا في الوَريد
🏴🏴🏴🏴🏴
أينَهُ العبّاسُ أين!؟
قد قضى دونَ اليَدين
يا بُدورُ اليَومَ غيبي
إنطَفى نورُ الحُسين
ليتَني أُعطي الكُفوف
لِقطيعِ الوَدَجين
واشَهيدًا واشَهيد
واذَبيحًا في الوَريد
🏴🏴🏴🏴🏴
مَن سَقى الماءَ المَعين!؟
بعدَ أن حَزّوا الوَتين
في الخَرابَه ذي رُقيَّة
قد بَدا مِنها الأنين
مَن لها حِضنٌ عَطوف
إن دَنا مِنها اللّعين
واشَهيدًا واشَهيد
واذَبيحًا في الوَريد
🏴🏴🏴🏴🏴
حَدِّثينا كربَلاء
عن ذَبيحٍ في العَراء
يا حبيبي يا حُسين
قد عَلا منهُ النِّداء
مُذ هوى بَدرُ الطُّفوف
عَزَّتِ الأرضُ السّماء
واشَهيدًا واشَهيد
واذَبيحًا في الوَريد
🏴🏴🏴🏴🏴
قد أتَت لِلطَّفِّ فاطِم
مُذ رَأَت بَدرَ الهواشِم
سَهمُهُ في العَينِ نابِت
كفُّها للرّأسِ لاطِم
قد غَدا نَهبَ السُّيوف
فمَتى المَهديُّ قادِم؟
واشَهيدًا واشَهيد
واذَبيحًا في الوَريد
🏴🏴🏴🏴🏴
زينب الموسوي
#بنت_الزهراء
هوسات بحق ابا الفضل العباس ع
مــن صار الـعـرك وتقـدم الـوفـاي
زينب صاحت أعله حسين شنهي الراي
اخاف اعله الخيم من الدموم اتفيض
خـل عباس يرجــع مـا اريـد المـاي
ها ها
يمحيهه من صوول گالت
=================
رفـت رايت العباس فـوك الحد
طبهم والهـوئ من الخشوم أنسد
حمره الدنيه صارت والقتال اشتد
مثل الحجر خله الروس ماتنـعـد
ها ها
خلاها تترادم بالطف
=============
گالو طب گمر عدنان لو حيدر
خـلـه اخيولهم بالجثث تتعثر
گال احسين ريض لاتخلص الگوم
اعزل حصتي لاينتهي العسكر
ها ها
شد رايه الكافل يفنيهه
=================
گال الماي اجيبه اليوم لخيامچ
وروس الزلم كلهه اتصير جدامچ
يزينب بالعطش ماريدچ أتهمين
كون اليوم بالطف يرتفع هـامـچ
ها ها
يازينب مايچ بچفوفي
فاخر الشبيبي
نزله إلى القاسم ابن الإمام الحسن عليه السلام
جســام طب للمعركه ... شمّـرة علـي حيدر
جســام طب للمعركه ... شمّـرة علـي حيدر
**
جســام يا شبل الحسن يا شمره من حيدر
بــركان ثــار أعلى العــده وبعــزمـه يتفجر
يـا موت طــب أعلى الزلم مـن أيده تطشر
هل الشبل من زود الحسن سيفه لضى ويسعر
جسـام من زود الحسن...وسط الحرب كبّر
جسام طب للمعركه ... شمّرة علي حيدر
*
من شاف عمه ابكربله وحده انتفض عزمـه
هاي الشجاعه من الحسن دونه رخص دمه
جيش ابسراياه مجتمـــع وحشوده مـا همه
ســاواه وي شسع النعــل زلمــه وابــن زلمه
جسـام بي هيبة علي ... چنه أسد يزأر
جسام طب للمعركه ... شمّرة علي حيدر
*
يعرف أبدمه لـو جــره بالطف يرف رايه
الديــن چانـت غايتـــه والنعم مــن غايه
أيه أترتــل كـــربله محفـــوظه هل الايه
وكـــل عام تقراها أبفخر لحسين مشايه
جسام والطف يرتجف... خلاه مثل خيبر
جسام طب للمعركه ... شمّـرة علي حيدر
*
الينظــر لهيبت طلعته چنــه الحسن قــادم
نكّسها رايـــات الكفـر مــن جــرد الصــارم
چنه علي وسط الحرب ابن الحسن جاسم
جده علــي ليــث الوغـى عمّـه گمــر هاشم
جسـام واليسأل تره ... منْ هاشم المصدر
جسام طب للمعركه ... شمّـرة علي حيدر
**
كل شخص تحچي أهل العلم يتوارث الجينه
عن وعي وعن فكره هدف حامه لجل دينه
أبــدم الشهــاده أبكل فخــر حنّـاهــا چفينه
طينت محمد طاهــره ويا نعـم هـل الطينه
جسـام ﭽنه بصولته ... حيدر فِنّه العسكر
جسام طب للمعركه ... شمّـرة علـي حيدر
**
أبدمه التفايض عالارض وضح اجــلْ فكره
الينصر الــدين ابمهجته ربــه الذي ينصره
جســام لجل المعتقــد رخص دمِّــه نحــره
أصبح منــار أبكل وكت مو عاطفـه وذكره
جسـام فكـره للبشر ... كل جيل تتجــذر
جسام طب للمعركه ... شمّرة علي حيدر
**
الشاعر
موسى البديري
#من_ديوان_قربان_الطف_ج15
قصيدة للعباس مقدمتهه نعي(ذب العمامه)
تقرأ فزاعية بهوسات وألحان أخرى
❥━──➸➽❥❂❥━──➸➽❥❂
اجه حسين العضيده وهلت العين
يصيح بصوت ياخويه طحت وين
بعدك ياعضيدي ما الي امعين
لگاه اعله النهر وبلايه چفين
القصيدة
حسين اعله الشريعه ذب العمامه
طاح حزام ظهره وارتخه احزامه
❥━──➸➽❥❂❥━──➸➽❥❂
ذبت عمامته ومنه الدمع يجري
يصيح بصوت ياخويه اكسرت ظهري
اظل محتار بعدك يالاخو بأمري
ياعباس ناده ويلطم الهامه
((يومك يالكافل هد حيلي))
❥━──➸➽❥❂❥━──➸➽❥❂
يقائد عسكري وياحارس اخيامي
عليه اليوم اصعب يوم بأيامي
يم النهر ميت يا وسف ظامي
يالبين بعضيدي صوب اسهامه
((مغدور توذر بالحومه))
❥━──➸➽❥❂❥━──➸➽❥❂
يابعد العمر والروح والريه
جربتك ياعضيدي ليش مچفيه
بيك امزامطه زينب العلويه
شگلها من اردن خلصت ايامه
((اختك ياوسفه تخليهه))
❥━──➸➽❥❂❥━──➸➽❥❂
خويه الخيم بعدك من يحاميها
تون الأطفال عطشانه بگت بيها
وسكنه مناطره والدمعه تجريها
گلبي ياگمرنه زادت الآمه
((ياموتك يحنيهه اضلوعي))
❥━──➸➽❥❂❥━──➸➽❥❂
كون بدال عينك صوبو عيني
وانه الگطعوهن كون چفيني
ولا بعدك اظل بنوحي و ونيني
الميتله اخو يجر گوه بجدامه
((ولوحدي شلون اتخليني))
❥━──➸➽❥❂❥━──➸➽❥❂
*بقلم ✍🏻خادمة اهل البيت ع*
*الشاعرة العلوية مريم النور نسألكم الدعاء الفاتحه الى روح اختي ولأمواتكم:🍃*
🌑🌑🌑🌑🌑🌑🌑🌑🌑🌑🌑🌑🌑🌑🌑🌑🌑🌑🌑🌑🌑
لطميه لأبي الفضل العباس
----------------------
وين العَلَم والرَّايه
وين العَلَم والرَّايه
عبَّاس ياضَنْوَةْ علي
وين العَلَم والرايه
----------------------
وين العَلَمْ ياخويه
والرّايةِ المنشوره
گلَّه اوگَعَتْ في الحومه
واچفوفيِ المبتوره
شيل السَّهم من عيني
والگربةِ المطروره
واغسل ياخوية دمومي
بدموعك المنثوره
........
حاطت بي الرَّمَّايه
والجود صَبَّوا مايه
عبَّاس ياضَنْوَةْ علي
وين العَلَم والرايه
............
وين العَلَم والرَّايه
وين العَلَم والرَّايه
عبَّاس ياضَنْوَةْ علي
وين العَلَم والرايه
----------------------
گلَّه آنا باشيلك
خلِّ الوديعه تشوفك
خوفي ياخوية اتسايل
عن رايتك واچفوفك
يصعب عليَّه ارجوعي
ويمِّ الشريعه اعوفك
چيف البُصُرْ لو أَرْجع
واشرَحْ اليها اظْروفَك
.............
تسألني وين الرايه
وانتَ على المَسناية
عبَّاس ياضَنْوَةْ علي
وين العَلَم والرايه
............
وين العَلَم والرَّايه
وين العَلَم والرَّايه
عبَّاس ياضَنْوَةْ علي
وين العَلَم والرايه
----------------------
گلّه ياخويه اتركني
فوگ الثَّرىٰ والحومه
گِلِّلْوَدِيعه خَيِّچْ
في المشرعه بِدمومه
تِعْذُرْ أَخوها الكافِل
لمّنْ تِجيها اْعلُومه
عافِ الشِّرُبْ مِنْ چفَّه
واستَحْلىٰ ذيچِ النُّومه
..........
خاضِ النَّهرْ في مايه
واتْذَكَّر البكَّايه
سِكْنه واخوها تنادي
وين العَلَم والرايه
............
وين العَلَم والرَّايه
وين العَلَم والرَّايه
عبَّاس ياضَنْوَةْ علي
وين العَلَم والرايه
----------------------
وحسين خَلَّىٰ راسه
في حِجْره ظَلِّ اِيشِمّه
وعَبَّاس مَرَّغ راسه
وَاخْلَطْ ثراه اِبْدَمّه
آنا أَموتِ ابْحِجْرَك
وانتَ تموتِ ابظُلْمه
وتدوسَك الخيَّاله
وتِلْتَمْ عليكْ اللُّمَّه
.........
وَاسيتَكْ ابْهَلْغايه
وِاچْفوفي لَكْ وَفَّايه
ناداه ياضَنْوَةْ علي
وين العَلَم والرايه
............
وين العَلَم والرَّايه
وين العَلَم والرَّايه
عبَّاس ياضَنْوَةْ علي
وين العَلَم والرايه
----------------------
گلَّه ياخويه خَلني
بوَّاب اِلىٰ زُوَّارَك
گُبَّه تصيرِ ابگبري
وتسطع عليها انوارك
فازِ الَّذي يگصِدْها
وِبْخِدْمِتَكْ يِتبارَك
هذا الشَّرفْ ياخويه
بالطَّف اصيرَنْ جارَك
..........
لمَّنْ تيجي المشايه
يِلْفُون اِلِي عنَّايه
ناداه ياضَنْوَةْ علي
وين العَلَم والرايه
............
وين العَلَم والرَّايه
وين العَلَم والرَّايه
عبَّاس ياضَنْوَةْ علي
وين العَلَم والرايه
----------------------
گام ورَجَعْ للخيمه
وزينب اِجَتْ له اتنادي
وين البطَل ياخويه
وين العَلَمْ وِاسنادي
گَلْها وَگَعْ يازينب
مُخَّه اعْلىٰ چِتْفه بادي
وظهري انكِسَر ياحوره
واظلمْ عليَّه الوادي
..........
گالت له وين الرايه
وچفِّينه الوفَّايه
جاوبني ياضَنْوَةْ علي
وين العَلَم والرايه
............
وين العَلَم والرَّايه
وين العَلَم والرَّايه
عبَّاس ياضَنْوَةْ علي
وين العَلَم والرايه
----------------
فاضل فتيل الجمري
المطروره : المشقوقه او المقطوعه بالسيف
يندارلك فدوى الهوى
يوليدي يلوجهك ضوى
نااااام ،،، نااااام
نوم العوافي اوليدي جسام
----------------------------------------
يلماخذ عيوني ارد انشدك
چلمة وداع وليدي اگلك
هنه اليربن مثلي لو لا ؟
يگضن عمرهن آه وي آه
خوف وتعب ومناطره الليل
خافن يفز خل أگعد حذاه
مو مثلي يمه الربن هواي
اعطش اشمك واترك الماي
لمك صرت راحه ودوى
يوليدي يلوجهك ضوى
نااااام ،،، نااااام
نوم العوافي اوليدي جسام
---------------------------------------
غمضت عينك وانتهى الحيل
جيتك ييمه ويشهد الليل
ما هودت عيني بغيابك
عايفني متوسد ترابك
يل من وكت رايح شبابك
الله اليصيبه شلون صابك
خلاني ما نامن ولا هيد
خلى المناحه تزيد وتزيد
شيرجع الگعده سوى
يوليدي يلوجهك ضوى
نااااام ،،، نااااام
نوم العوافي اوليدي جسام
-------------------------------------
هذا الوجه مو مال تربان
وكت العرس مو وكت دفان
اسم اعله طولك من الگبور
مهنى بشبابك يمه مأجور
ظليت خشبه بحلگ تنور
شمر الهدم يا گلبي مشمور
حرگ الگلب ما يطفى يا ناس
يظل مشتعل من گلبي للراس
گلب امك الليله انچوى
يوليدي يلوجهك ضوى
نااااام ،،، نااااام
نوم العوافي اوليدي جسام
-----------------------------------
گعدت امسامر ام وابنهه
بس للأسف فارغ حظنهه
ياهو اليرجع ضحكة الشاب
من وجهه ياهو يزيح التراب
بعده يون من جرحه لو طاب ؟
امشيله اجيت بحيل شياب
هذا الحنين امغمض العيون
هلبت يفز ويه اليگعدون
تعبان من نومه ارتوى
يوليدي يلوجهك ضوى
نااااام ،،، نااااام
نوم العوافي اوليدي جسام
--------------------------------------
الچلمه الاخيره ومنهه نمشي
كلشي انتهى وما باقي كلشي
مودع ييمه وصعبه شنساك ؟
لارض البعيده نسافر هناك
موصيه الحسين وباقي وياك
عمك تشوفه اعله الرمل ذاك
من عنده سحگت كلشي الخيول
حتى النفس بالحومه مكتول
شيرجعه شيال اللوى ؟
يوليدي يلوجهك ضوى
نااااام ،،، نااااام
نوم العوافي اوليدي جسام
رعد الفريجي _ محرم 1447
ثوابها الى روح والدتي
ظهري انحنه بتعب الضنه
لا شهر لا لوعة سنه
يوليدي تسمع جسام امك تريد رباهه
------------------------------------------
جسام لو بعدك عدل لوحنه
هاي الدموم ابيمنتك لو حنه
يا ريت متنه وحضرو لوح النه
ولا موتتك يلزفتك
ظلت حلم للربتك
هيه الحرب گاع الموت يا فرحه تحلى وياهه
----------------------------------------
ونيت وانظر للحرب شيردك ؟
وانه ادري فارس يلولد شيردك
شي واحد وترجع ألي شي يردك
من تنذبح مو تنجرح
يوليدي يا وجه الصبح
يلموتتك وي حسين عند أمك شمحلاهه
-----------------------------------------
ناطور عيني اعله الولد تانيته
تانيت دمعه برجعته تانيت آه
تاني الگلب ها يلولد تاني تاه
لمن رحت واتحيرت
وعيونك بظهرك متت
من اعرفت راح اتموت لا عشت هاي انساهه
--------------------------------------------
ظليت يرجع؟ ما يرد ؟ ماشوفه ؟
من راح دمعي اعله الوجن ماشَوُفه
وافاني عن ذاك الربى ماشي أوفى
من وگفته من صولته
مفتخره أمه الربته
خله أمه فوگ النجمات عفيه أبني من خلاهه
----------------------------------------
وياك ما ترهم واموت بعيده
بس اني يمك لا تظن بعيده
ميت واصيح وليدي كشخه بعيده
من موقفه ،، جرحي شفه
نار الگلب بس لا طفه
من ضحى لابن الزهراء بأرض الحرب سواهه
كلمات الخادم / رعد الفريجي
ثوابها الى روح والدتي
هاشمي شمحلاته
بالحرب صولاته
نسمع حچايـــاته
هذا جسام يرمله هذا جسام
------------------------
طوله اكبر من غدرهم والوجه نوراني
بيده سيف يهزله دنيا وگلبه عالم ثاني
يا أمير اعلى الاماره ويا نبض وجداني
والله حي اصل التنومس بالولي الرباني
حيدر بترتيـــــــــبه
بس نقصهه الشيبه
يا منيه تصيـــــــبه
هذا جسام يرمله هذا جسام
------------------------
رخصه من حسين ماخذ والعمامه براسه
عوزه بس رايه وجربته ويوصل لعبــاسه
زينب الكافل رجعلچ والغضب بانفــــــاسه
راجع وشايل شريعه ونهر ميــــــت داسه
يا عطش يلفيكم
والله اليحاميكم
يا فضل طاريكم
هذا جسام يرمله هذا جسام
،،،،،،،،،،،،
وابتدت رحلة شجاعه من المـــهد لطفـــوفه
بين ابوه وبين عمه الدنيا كلهه تشــــــوفه
خل ابو الحسنين يرجع خل يعوف الكـــــوفه
خل يشوف أبنچ يرمله ويمسح اعلى چفوفه
حالف ويگضيهم
ابد ميخليهم
اول وتاليهم
هذا جسام يرمله هذا جسام
،،،،،،،،،،،،،،،،،
صاح بيهم انا ابن الما يرد خطــــــــــــاره
عمي اعظم من كلامي وبالعرش اخـــباره
لو صحت عباس تشرد هالزلم محتــــــاره
جدي بيده الطبر مرحب وابن ود وانصاره
اهلي معنى وغايه
بالحرب حچـــــايه
انا ابن الرايـــــــه
هذا جسام يرمله هذا جسام
،،،،،،،،،،،،،،،،،،،،،،،،
بويه والله اتمنى يمي وتنظر لجسامـــك
بويه يلمسموم گلي شلون ارد اعضامك
هيچ حاضر وانا اجيب المشرعه گدامك
واخذ بثار الجنازه وألم ذيچ سهامــــــك
يلحسن وعيونك
ذوله اليعادونك
ابد ليهمــــــونك
هذا جسام يرمله هذا جسام
لخادم الحسين / رعـد الفريــــــــجي
عَمِّي يَا حْسِينِ الْإِذِنْ مِنَّكْ أَرِيدْ
مَگْدَرِ بْعِينِي أَشُوفَنَّكْ وَحِيدْ
غَايِتِي بْصَفْ عَسْكَرَكْ أَصْبَحْ شَهِيدْ
لَا تِخَيِّبْ طَلْبِتِي وِظْنُونِي
----------------------------------
آنَه جَاسِمْ آنَه إِبْنِ الْمُجْتَبَى
سِيفِي يِطْفَحْ مَرْجَلَه زُودِ وْإِبَه
مَا يِهِمْنِي بْحُومِتِي عُمْرِ الصِّبَه
خَلْ أَرَاوِيلَكْ يَعَمِّي فْنُونِي
----------------------------------
وِالْعِرِسْ عِنْدِي يَضَيْ عِينِي الْعِرِسْ
مِنْ أَقَدِّمْ دُونَكِ الْيُومِ النَّفِسْ
جِيتَ ا سَطِّرْ بِالْوِفَه أَعْظَمْ دَرِسْ
لِلْمَعَارَه وِالْأَجَلْ زِفُّونِي
----------------------------------
جَاوَبَه حْسِينِ وْدَمِعْ عِينَه يِصُبْ
شْلُونَ اشُوفَكْ نَايِمِ بْحِضْنِ التُّرُبْ
هَالطَّلَبْ يَا جَاسِمِ هْوَايَه صَعُبْ
إِنْتَه رِيحَه مْنِ الْحَسَنْ يَعْيُونِي
----------------------------------
أَرْدَ انِشْدِكْ يَبْنِي عِنْدِي مَسْأَلَه
شْلُونْ تِنْظُرْ لِلْمِنِيَّه بْكَرْبَلَه
گَلَّه أَحْلَى مْنِ الْعَسَلْ طَعْمِ الْبِلَه
هَالْعَقِيدَه رَاسِخَه بْمَضْمُونِي
----------------------------------
مِنْ نِزَلْ لِلْحُومَه نَادَه بِالْعَلَنْ
وِارْتِجَزْ إِنِّي أَنَا نَجْلُ الْحَسَنْ
وَحُسَيْنٌ كَالْأَسِيرِ الْمُرْتَهَنْ
مِنْكُمِ الْيَومَ ارْدَ اوَفِّي دْيُونِي
----------------------------------
سَاعَه لَنْ صُوتَه اعْتِلَه عَمْ يَا حُسِينْ
عَمِّي أَدْرِكْنِي وْوِصَلْ لِيثِ الْعَرِينْ
شَافَه طَايِحْ وِاعْتِلَه مِنَّه الْوِنِينْ
يَبْنِي بَعْدَكْ مَا تِطِيبِ جْفُونِي
----------------------------------
#القاسم
#محرم_١٤٤٧هج
الشاعر حسن خنافر العاملي
جاسم يابعد أُمك زفَّك للحرب عمك
عطشان ويريد الدِّين يبني يِرتوي بدمك
———
للسفر يبني بعد يلَّه إستعِد
وآنا ليامك أضل أحسب وعِد
يبني ماأنسى وإن لفني اللِحد
عله ماتشفه أبد فرگت ولد.
آه
يبني صحِت
يمه حرِت
جاسم نحِت
كل ساعه التمر يبني دگاته الگلب بِسمك
———
يلله ياجاسم دِشِد عَزم الرَّحيل
وختِصر ونهي بعد عمر الطِّويل
دين الله عطشان وإله دمك يسيل
وآني مني يالولد ياخذله حيل.
آه
إبني مذبوح
دمه مسفوح
راحت الروح
ها يبن الحسن يعني. من دم الحسن دمك
———
يا هوا الرِّيه اليهب إنته إلي
بشوفتك يمه أحس شوفة هلي
ياگمر فوگ الگمر وجهك ولي
يبني أشوفن هالشبه چنك علي. چنك علي
آه
غيمه وهوت
عظمي لوت
مني إرتوت
ماي وبالصحاري طاح صعب يبني بعد لُمك
———
يبني ياجاسم ترى حان الوداع
يا حلم عمري بعد عني وضاع
يلشوفتك نور وكحل يبن الأسباع
مني يايمه رحت مني شِبساع.
آه
يبني الشهم
كلبي انجسم
عمري انختم
الغالي وسلوتي بدنياي صعب ماينحمل همَّك
———
الفاگده مثلك ولد تبچيله دم
تبقه ليل إمساهره تنعى وتهم
يبني ياجاسم ترى بيك العزم
إنطيتك آنا يالوادِ در الشهم.
آه
ليل إسهرت
تكبر ردت
مافكرت
مني ياخذك هالبين يبني ونحرم شَمك
كلمات
الملا أحمد السالمي
———
نعي للقاسم (ع
◾◾
غفت عينك صدك ياحلو العيون
يالفگدك ثكيل يطيح المتون
بهيده وياك وصيت اليدفنون
يجاسم يمه جرحك لايلجمون
✳✳
عيوني على طيوفك نواطير
من يوم الرحت ماابشر بخير
عليّ يبجي اذا شافني الطير
اليشوف ارسوم وجهي بحالتي يحير
✳✳
وياي الدهر ظل يمشي مگلوب
من دموع عيني مبلل الثوب
و روحي من تسلم شمس الغروب
ابديلك نواعي بكل الدروب
✳✳
اخيطلك جنت حلوات الثياب
تلبسهن بعرسك مو بالتراب
راحت روحي بدرك يمه من غاب
وراك اسنيني طشرها الهوه الهاب
✳✳
سنين سنين الوليك واداري
يل من عيوني ضيعتك و اداري
عليك انهدمت آمالي و داري
وعليك جروحنه يلطمن سويه
✳✳✳✳
علي حسين المنصوري
وزن اهوازي إلى القاسم ابن الإمام الحسن عليه السلام
*----------*----------*
يا جاسم نطرتك ماي
گلب امك مثل صحــره
أظل برجاك يوليدي
گــاع امتانيــه المطره
*----------*----------*
يا جاسم ييمه اشلون حال الــراح واحـدها
تبقى امتانيه الغياب والمدمع علــى خــدها
عالونه التتاني اتعيش يبني الله اليساعدها
وتــدري الـراح للميدان يبني ينگطع نحـره
*----------*----------*
يا جــاسم غصن ذبلان بغيابك يبعــد أمـك
يالطولك نهــر بي ماي اشبـع منه لو أشمك
يوليدي دليلي يــريد يمــه لصـدره أيضمك
نار بگلبي مــن فرگـاك يبني تبقى مستعره
*----------*----------*
ردتــك للعمر جسام يبني لــو لفانـي الشيب
مو وكتك يحلو الطوال عن عيني ييمه تغيب
ياجرح الفلا ينراف ياجرحي الأبد ميطيب
يبني يــا نبع ريحان ليش امــوسد الغبــره
*----------*----------*
يبني بيش اصبــر الــروح لــو تتأخر الجيه
جفني يصاحب الدمعـات خـافن يعمه تاليه
يمه ابطيحتك عالگاع يوليدي ابقى محنيه
يتچاية ظهر وتـروح حگه الينحني ظهــره
*----------*----------*
باچر من امرن بيك واشوفن جسمك أمدمه
حگي لو هويت أعليك واصرخ يالولــد يمه
حتى بموتتك مهيوب وليدي أبصف ابواليمه
واشاهد خنصره المگطوع وحوافر هشمت صدره
*----------*----------*
يوليـدي أمنية كــل ام أمــه التعجــن الحنه
وعــمــات الــولد جســام يــوليــدي يهننـــه
وانظــر للــولــد عــريس وانــه ألـــي ازفنـه
صعبه اعلى التـرب يبني متحني ابدمه نحره
*----------*----------*
تهدم حلمي يــوم الطف گلبي يا حلم رايـد
يتّوســـد ييمـه ويــاك دلالــي بلحد واحــد
الله يســاعد المكسور گلبه بيا كتــر گاعــد
لا يمّــه الولـــد ويهيد ولا گبله خلص عمـره
*----------*----------*
الشاعر
موسى البديري
#للشاعرة_ام_رائد_زوين
#هوسات_للعباس_وزينب ع
✿〰✿〰✿〰✿〰✿〰✿〰✿
زينب لوكلت يعني كلت عباس
ياهو الكال ذلت زينب الارجاس
هيبت علي بيها ماتطخ الراس
زينب لوحجت تخمد النفاس
من بت حيدر ✨ حته الكاع تصيح ادخيل
✿〰✿〰✿〰✿〰✿〰✿〰✿
ياهو الكال زينب راحت ايسيره
وهيه برايت العباس
جيش العالم
اديره
زينب هاي زينب اخت ابو الغيره
هيبت علي بيها ونفس تفكيره
مصفنه الكون بهيبتها
مصفنه الكون بهيبتها
✿〰✿〰✿〰✿〰✿〰✿〰✿
اخت عباس هاي التجدح عيونه
صكار الزلم شحدهم يدنونه
كلها تفر لومجبل يشوفونه
بطل ومايهاب الموت يدرونه
يصفيها لوطب للحومه
يصفيها لوطب للحومه
✿〰✿〰✿〰✿〰✿〰✿〰✿
الشاعره 🖌
ام رائد زوين📓
⠀
لسان حال القاسم بن الحسن يخاطب أمه (وزن هجري)
يمه ذكريني يرملة. من تمر زفة شباب
لموت لجل حسين يحله وبالدمه يحله الخضاب
★★★★★
احله زفه الموت عندي. غير هذا مااريد
اسعد الشبان كلها. اليوم يايمه. سعيد
من تگول الناس عني القاسم توذر شهيد
مايهمني بعد هذا. لوصرت تحت التراب
★★★★★
زفتي محلاها يمه. من الحرب ارجع خضيب
النصرة المظلوم عمي الوگف بالحومه غريب
أَمَرْ مِنْ الَأَمَرْ عندي. من ينادي. ولامجيب
ايعز عليه من ينادي. ومالگه الصوته جواب
★★★★★
ماإلي بالدنيا مطلب. ولاحياة بهلوجود
غايتي نصرة محمد. وأوفي لحسين العهود
نصرته الفوز المؤكد. يعني معناها. الخلود
ونصرة الباطل خيانه. الدين طه والكتاب
★★★★★
اتذكري يمه الوصيه. والدي ايوصي ويعيد
حسين بيه الگوم تغدر. هذا يوم الموبعيد
القاسم ابني درع لأجله. بلحرب لوضل وحيد
هذا يوم الچنت اريده. قربة لله موثواب
★★★★★
اليوم يوم الوفه العمي. من بعد ذيچ السنين
ابحجره رباني ورعاني. عاطفه وطيب وحنين
عمري وأيامي وشبابي. فدوه. كلهن للحسين
باب للجنه الوسيعه. وشافع بيوم الحساب
الشاعر حسن لعيبي الحريشاوي
في شجاعة القاسم بن الحسن عليه السلام
زهت بيه الحومه
من طلع جسامها
ناده وين جيوشها
الحرب وين أزلامها
★★★★★
حسين عمه يشوفه.
على القاسم خوفه
الساحته مكشوفه.
وبالخطر محفوفه
الصولته معروفة.
بالصبر موصوفه
المايهاب الصعبه. ولاغدر ايامها
★★★★★
مايهاب الصعبه.
شماتصادف دربه
علشجاعه أَتْرَبَّه
عهد منطي الربه.
لهل بيت القربه.
يفدي روحه وگلبه
الحرب جنه يشوفها. عشگ عطر انسامها
★★★★★
سمع عمه ابليله.
الربه من يشكيله
هلامر تعجيله.
من تقل الحيله
دنه ودمعه يسيله
الحاربك ياويله
وفدة الزينب روحي ومنهو يدنه خيامها
★★★★★
يانبع وجداني.
بصبر امي اتاني
لبستني اچفاني.
گبل كل إخواني
اوالدي رباني.
بنصرتك. وصاني
أشكرت ابوي وامي. الجنه تحت اقدامها
★★★★★
صابر على المحنه. .
للمنيه اتعنه
من لگاها الجنه.
للشهاده اتمنه
بالدمه الغطنه.
بدلاها الحنه
وللمنايا. أَتْصَبَّر من تخط اقلامها
الشاعر حسن لعيبي الحربشاوي
كافلي لا تعتذر هذا من الله الامر
انت بالطف تنقتل وانه اروحن باليسر
ــــــــــــــــــــــــــــــــــــــــــــــــــــ
كافلي من الزغر وانت متفارگني ابد
من بعد حيدر علي انت صايرلي سند
خويه بيك انه افتخر راح ابقى للأبد
ما يجي مثلك بشر اشما يمر بينه الامد
واجب اعلينه الصبر هذا من الله الامر
ـــــــــــــــــــــــــــــــــــــــــــــــــــــ
من رحلنه الكربله وياي تمشي انت گمت
ما تفارگني ابد لحضه عني مبعدت
اعليه خايف يالگمر تمشي خطوه وتلتفت
انت متردلي طلب تنطي روحك لو ردت
انت صايرلي ستر هذا من الله الامر
ـــــــــــــــــــــــــــــــــــــــــــــــــــ
من وصلنه نينوى والعدو اعلينه نوه
يعني الموادع وصل بعد مانبقى سوه
گمت ماجر النفس گام يخنگني الهوى
لو عفتني انجرح وما الي غيرك دوه
والموادع ينتصر هذا من الله الامر
ـــــــــــــــــــــــــــــــــــــــــــــــــــــ
من رحت صوب النهر من وصلت المشرعه
الماي گالو ماشرب شاله بيده او رجعه
طاح گالو عالأرض والچفوف امگطعه
والاسهام ابكل كتر هاي اكبر فاجعه
انت بالطف تنغدر هذا من الله الامر
ــــــــــــــــــــــــــــــــــــــــــــــــــــــ
ياگمر والدنيا ليل جيتك ومابيه حيل
جيت اودعنك يخوي والدمع عالخد يسيل
وجيت اقدم اعتذار اعتذرلك يالكفيل
انت وفيت الوعود يبو فاضل يالأصيل
لا تقدم اي عذر هذا من الله الامر
ــــــــــــــــــــــــــــــــــــــــــــــــــــ
خادم اهل البيت
حسن عامر الزيادي
عندي يازينب وصيه وصيه وصيه
خلي بالج يم رقيه رقيه رقيه
زينب وجدنه محمد والخلق ارض وسمه
عندي هالطفله عزيزه وتسري ويه مسره الدمه
صوتهه يشبه يزينب صوت امنه فاطمه
عينج عليهه يخيتي من تصير ميتمه
من اطيح اعلى الوطيه الوطيه الوطيه
خلي بالج يم رقيه رقيه رقيه
عندي يازينب وصيه وصيه وصيه
😔😔😔😔
وياج يا مهجت دليلي مااطولج كلام
لوغمض يالحره جفني ويكطع وريدي الحسام
من تدوس الخيل صدري وحركو عليج الخيام
عوفي كلشي بس رقيه كون باحضانج تنام
بحضنج النومه هنيه هنيه هنيه
خلي بالج يم رقيه رقيه رقيه
عندي يازينب وصيه وصيه وصيه
زينب اتكله يخويه والله اني بخدمتك
لون عنه اتروح خويه والمنيه وافتك
وانه ابروحي ودليلي راح اضمن طفلتك
عهد وامي الزهره والله ما اعوف وصيتك
راح احافظ على الوصيه الوصيه
خلي بالج يم رقيه رقيه رقيه
عندي يازينب وصيه وصيه وصيه
شائت الاقدار ويلي تروح زينب لليسر
عكب عباس الكفلهه يصير حاديهه الشمر
العمر من غير خوه من عمت عين العمر
هذا كلب اليفكد اهله اشلون يتحمل صبر
ومشت ويه زينب سبيه سبيه سبيه
خلي بالج يم رقيه رقيه رقيه
عندي يازينب وصيه وصيه وصيه
خلي بالج يم رقيه رقيه رقيه
زينب الجانت اميره مشت مسبيه ليزيد
لاجن بذيج الخرابه وال ابو اليمه شهيد
من التعب نامت رقيه وفزت الطفله اشتريد
ادكول اريد حسين ابويه وكلشي غيره مااريد
وينه شومارد اليه اليه اليه
خلي بالج يم رقيه رقيه رقيه عندي يازينب وصيه وصيه وصيه
خلي بالج يم رقيه رقيه رقيه
ادكول زينب كون ميته ولا هل منضر شفت
ودو الراس لرقيه راس ابوهه بالطشت
حضنته وماتت ياويلي ريت وياهه متت
ويه عزيز حسين اخيي هسه يا موقف صرت
وينكم يا اهل الحميه الحميه الحميه
خلي بالج يم رقيه رقيه رقيه
عندي يازينب وصيه وصيه وصيه
خلي بالج يم رقيه رقيه رقيه
والله دوهني زماني وصرت ويلي محيره
ياابو عبدالله اعذرني اني خجلانه تره
منك ومستحيه والله خاف خويه مقصره
حسين امر الله شبديه خويه على الصار وجره
هذا امر الله شبديه شبديه شبديه
خلي بالج يم رقيه رقيه رقيه عندي يازينب وصيه وصيه وصيه
خلي بالج يم رقيه رقيه رقيه
منقولة