7626
خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
(لسان حال لبابه زوجة الامام العباس ع)
شلون بيه ...... شلون بيه
رحت من عندي شبساع
عباس وتعاشر الكاع
شلون بيه... شلون
............
عباس عينك غمضت وانه البجي عاميني
اصفن ورسمك بالدرب وبصفنتي تجويني
ماادري تاليته العشك يعذبني ويبجيني
يابعد عيني بغيبتك جا شلي بعد بعيني
ام الفضل انه لبابه
صار الكلب بعدك خرابه
شلون بيه
.........
محسوده جنت بعشرتك يا سكف بيتي وظلي
بيك انه نسوان السلف هنيالج يكللي
منين ما عيني تصد بس عينك التعرضلي
يالتارس الدنيه ضوه جا للكمر شمخلي
هاك اخذ روحي وكلشي بيه
بس ترد يا عباس اليه .....شلون بيه
.......
ياموطن الحب والحرب جرحك بعد شيسده
مشتاكه من تزعل علي وحاجب العين تعكده
ارحم دليلي المنذبح جا غيرك انته شعنده
انخاك هاي انه ام فضل خلصني من هالشده
انطيك جفي وكوم وياي
يهلال عمري شوفتك ماي....شلون بيه
.......
حركو الخيمه وطلعت جيتك ركض ملهوفه
محتاره وين انطي الوجه وانه الدرب ماشوفه
كلبي سكت من النبض من كثر مابي خوفه
ابيا وكت مرت الكمر أمسلبه ومجتوفه
عباس جابو نوك لينه
للسبي يردون بينه...... شلون بيه
..............
من الله لا ينطي النهر وريته يجف من مايه
كالولي جفك من نزف بلل خضار الرايه
عباس ياحلم الصبه وانته ادره بيه بهاي
مشتاكه الك كد العطش وتعده شوكي هوايه
وينك يخيمه بيتي وينك
مكسور كالو سهم عينك.... شلون بيه
الشاعر
مصطفى الحسني
#محرم_ليلة_الانصار
ياهلا ابربع الحُسين
ياهلا ابربع الحُسين
،،،،،،،،،،،،،،،،،،،،،،،،،،،،،،،،
قبل لا ينطق لساني وقبل لا ابدي الكلام
حسين لو ذكرينه ربعه كلشي يوگف بحترام
انهم بالطفِ فتيه امنو ابرب الخيام
كل شمس للحومه طلعو ونكسر وجه الضلام
للمخيم طائعين
ياهلا ابربع الحُسين
،،،،،،،،،،،،،،،،،،،،،،،،،،،،،،،
لمهم حسين ابخيامه وگال ابن خير العمل
طفو فانوص المخيم واجعلو اليله جمل
فزو ازلام الحرايب جن وحي اعليهم نزل
صوت لانخشه المنيه للسمه السبعه وصل
اگباله مارفعو جبين
ياهلا ابربع الحُسين
،،،،،،،،،،،،،،،،،،،،،،،،،،،،،،،
رسمو الخطه الجبيره وقدم الحر منحره
يلزم اليمنه حبيب وابن قين الميسره
واحد من الزلم صاح النهر المن يا تره
الله من العرش گال انطو السبع الگنطره
الزلم ضلو خاشعين
ياهلا ابربع الحُسين
،،،،،،،،،،،،،،،،،،،،،،،،،،،،،،،
اذن العباس بالطف والفرض منه انجوه
نطاهم حسين الأشاره والضوه يتبع ضوه
هدت ازلام المنايه ورفعو البيرغ سوه
للخيم ماينطي ضهره ضل يرف عكس الهوه
أدخلو الطف أمنين
ياهلا ابربع الحُسين
،،،،،،،،،،،،،،،،،،،،،،،،،،،،،،،
وين يالرايد تصاحب صاحب الزلمه الصدگ
قبل لا نارك تلوحك كون قبلك يحترگ
تمعن ابعابس ادخيله وتعرف انواع العشگ
گطع اجدام الخيول حسين خايف ينسحگ
قدم اگباله السنين
ياهلا ابربع الحُسين
العبد ابوفايز الرافضي
قصيدة في أنصار الإمام الحسين وأصحابه . لسان حال الإمام الحسين عليه السلام ..
ـــــــــــــــــــــــــــــــــــــــــــــــــــــــــــــــ
عنكم يالٱصحاب والجَمرة لَهّابَة
تِسألني أم عون والدمعة سَچّابَة
ـــــــــــــــــــــــــــــــــــــــــــــــــــــــــــــــ
يَهل الدراية
وبيكم كفاية
يسباع الموزمة
وياي ٱجيتوا
وكِلكم وِفيتوا
يا شيعة فاطمة
يا خِيرَةِ الناس
يا أهل الٱحساس
هالليلة مظلمة
بيها العقيلة
المدمع تِسيله
وشكواها مؤلمة
بِت حَيدَر اليوم يا خوتي مِرتابَة
تِسألني أم عون والدّمعة سَچّابَة
ـــــــــــــــــــــــــــــــــــــــــــــــــــــــــــــــ
گالولَه يحسين
يَبن الميامين
زينب تؤمُر أمُر
وَدّينه يَمهَه
وخَل تِحچي هَمهَه
ما ظَل بَعَد عِذُر
لخَيمتهه أجوهَا
جملة وحِچوهَا
بالشّدة واليِسُر
ويّاكُم إحنَه
كِلّحنا صِحنَه
فِدوة ٱلكُم العُمُر
نِقسِملِچ بهاي بالباري وِكتَابَه
تِسألني أم عون والدّمعة سَچّابَة
ـــــــــــــــــــــــــــــــــــــــــــــــــــــــــــــــ
وضَنوة مُظاهِر
صاح آنه حاضِر
وَانَه ٱلكُم السّنَد
شِلّي بحَياتي
وما تِرضه ذاتي
لو أخلِف الوَعَد
يا بِت عَلِينه
حَيدَر وِلِينه
ذاك الوَصِي الأسَد
لا لا تِهِمّين
ما أترِك حسين
وما أنقُضِ العَهَد
بالِچ تَخافين إحنا أهل الطلابَة
تِسألني أم عون والدّمعة سَچّابَة
ـــــــــــــــــــــــــــــــــــــــــــــــــــــــــــــــ
هَوّس إبِن قَين
يا إختِ الحسين
لِيش إنتي خايفة
ما أقبَل ٱيصيح
دَمعاتِچ ٱطّيح
عالوجنة ذارِفَة
باچِر تشوفين
فِعلِي وتِشهدين
لجروحي النازفة
ما أخشى السيوف
أسحگهَا الحتوف
وبالحَومة عاصِفة
ما يِرجَع السيف يظَل فارِغ ٱگرابَه
تِسألني أم عون والدّمعة سَچّابَة
ـــــــــــــــــــــــــــــــــــــــــــــــــــــــــــــــ
بَين الفوارس
صاح آنه عابس
وبنَبرتَه الخَجَل
يابِنتِ الٱشراف
صَدگيني ما خاف
لو گرّب الأجَل
إلكُم فلا عوف
وبالعاشِر ٱنشوف
عابس گال وفَعَل
ما أريد الدروع
ظَل صوتي مسموع
خادِمكم آنه أظَل
جِسمي ٱمنِ السيوف خَل يِنزِف ٱصوابَه
تِسألني أم عون والدّمعة سَچّابَة
ـــــــــــــــــــــــــــــــــــــــــــــــــــــــــــــــ
صاحَوا فَرِد صوت
يا مَحلَى هالمَوت
يا مَوتَةِ الفَخَر
نِرخُصهَه العيون
كون وتِسِلمون
وما يَوصَلكم خَطَر
نِفديكم بروح
ونِتمَنّى الجروح
وما نِبخَل بنَحَر
نِتگطّع أوصال
وِنريد الٱجيال
تِتناقَل الخَبَر
أنصار الحسين ذوله أحنَه وَصحَابَه
تِسألني أم عون والدّمعة سَچّابَة
ـــــــــــــــــــــــــــــــــــــــــــــــــــــــــــــــ
بقلم الأستاذ / ستار عذاب الحچامي
هوسات للأنصار …
ـــــــــــــــــــــــــــــــــــــــــــــــــــــــ
فزعة غِيرة كلهم فِزعَوا
يَم الخيمة مِنّ ٱجتِـــمعَوا
والمحشومة خافت سِمعَوا
وسفة ٱعلينه .. زينب خافت
ــــــــــــــــــــــــــــــــــــــــــــــــــــــــ
صاح بـصوته ضنوة ظاهر
أفدي حسيني من كل خاطر
بنص الحـومة أهتــف باچر
إلنه ٱشتاگت … أدري الجنة
ــــــــــــــــــــــــــــــــــــــــــــــــــــــــ
يَم الخيمة هوّس هوسـة
جيش الكوفة إلاّ ٱندوسه
بسيف الغيرة نگطع روسه
باچر شوفي ... عابس ياهو
ــــــــــــــــــــــــــــــــــــــــــــــــــــــــــ
يابت حيدر ٱتسمعيني
عَمّچ آنه إبن القــــَينِ
مخلّي حسينچ آنه بعيني
يَم الخيمة … فِنّه اليوصل
ــــــــــــــــــــــــــــــــــــــــــــــــــــــــــ
يالمحشومة إحنا ٱهنانة
جَون ودومي خادم آنه
لبن الزهرة ننطي ٱدمانه
وتشوفيني … يوم العاشر
ـــــــــــــــــــــــــــــــــــــــــــــــــــــــــــ
بقلم الأستاذ / ستار عذاب الحچامي
قصيدة في أنصار الامام الحسين عليه السلام ....
ـــــــــــــــــــــــــــــــــــــــــــــــــــــــــــ
ثِـلّة بالــطف آية
دگّوا ٱلـــهم ثاية
ـــــــــــــــــــــــــــــــــــــــــــــــــــــــــــــــــ
ضجّت الـطف بيهم
ونـــعم مـن طاريهم
لو تگـــلي ٱشــبيهم
حسين اللي مربّيهم
ذوله تربــات الحــمولة ذوله زلــم النيـبة
ذوله ما حضروا مجالس للحـقد والغيـبة
ذوله طينتهم خليط ٱمن الشرف والطيبة
ذوله بحـــسين وقضـــيته ما لِفَـتهم ريبة
بكل زمن وفــاية
دگّــوا ٱلــهُم ثاية
ـــــــــــــــــــــــــــــــــــــــــــــــــــــــــــــــــــ
أخلِـصوا نِيّـــتهم
طلّــگوا دنـــيتهم
والصدق شيمتهم
وكربله جمـعـتهم
ويه أبو السـجاد طلعوا للمصــير الواضح
واليصـــير بـصــفه حـتماً هـو هذا الرابح
عن قــناعة ومو تعصّب أو تســرّع جامح
دقّت أجراس التنافس والوقت مو سانح
للچـــتِل عَنّاية
دگّوا ٱلهُم ثاية
ــــــــــــــــــــــــــــــــــــــــــــــــــــــــــــــ
چنّه ليـــث الـغابة
من نـَـظِرته ٱتـهابه
وصَـرّح لأصــحابه
بغــيرته اللّـــــهّابة
هذا ٱبن ظاهر حبيب وبيده شايل سـيفه
صاح حيهم يالنشامى حسين لا منـــعيفه
هذا مــــيدان الشـــــهادة واليــريد بكيفه
من غريم حسين سيفي اليوم ياخذ حيفه
وبيميني الراية
دگّـوا ٱلهُم ثاية
ــــــــــــــــــــــــــــــــــــــــــــــــــــــــــــــــ
يحچي ويّه ٱخوانه
الله بـــس ويّــــانه
بِـت علي تنـــخـانه
بــمدمـع الحــيرانة
نادى ٱبن قَــين بأخوته والعزم يبراله
گلهم اليـنصر إمـامه بهالوضع هنــياله
هذا بَـتّاري ويـفارگ عمـره من يـدناله
هنانه توقيع المفازة ويا بخت من ناله
الباري هُوّ الغاية
دگّـوا ٱلهُــم ثاية
ـــــــــــــــــــــــــــــــــــــــــــــــــــــــــــــــــــ
لَـف بُرير ٱلثــامه
يمشي رافع هامة
بجـــمرته وآلامـه
بعزّة شَدّ ٱحزامه
وگفـته وگفة عرندس من خِـطَب بالحومة
ما أهـــاب ٱمن المنايا وكــلمن وحَد يومـه
إبن أبوي وثـــاري آخــذ مـن يزيد وگــومه
أفدي الحسين وأريد بسيفي أجلي همومه
وآنه أمشي برَايه
دگّــوا ٱلــهُم ثاية
ـــــــــــــــــــــــــــــــــــــــــــــــــــــــــــــــــ
يا أخـــوتي وربــــعي
مــا أريـــــدن درعـــي
يا ســيـوف ٱجتـــمعي
حسين شوفي وسمعي
وگف جــدام العساكر والغضب بعيونه
آنه ذايب بالحـسين وأصبحت مجنونه
إلاّ أسحگ عالجماجم عابس ٱتـعرفونه
حســين قــرآن الإله وفِــنكم ٱتمـسّونه
إحنا بينه ٱكفاية
دگّــوا ٱلـهُم ثاية
ـــــــــــــــــــــــــــــــــــــــــــــــــــــــــــــــــ
بقلم الأستاذ / ستار عذاب الحچامي
حسين طبو للحرب صحبانه
الهلا والحياهـــم اعله السانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هـــلا يامـــن بالحرب مالك نضيـر
ياحبيب گلوبنه وشيــــــخ الچبير
هلا بهاي الشيبـــه الطفي السعيــر
يبن ضاهـــــــر تسلم ويسلم زهير
بيكــــــــــــم گلوب الحرم فرحانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا صاح بعابس وحي الله جــون
وضلو السبعيـــــن الف يتراعشون
اليوم طبهم عابس وطــب بجنون
الموت لجـل حسيــن گاللهم يهون
حسيــن راواني العشگ بالوانـــــه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا بهاني ومسلم وعمرو وشبيب
الخلو جروح الگلـــب منهم تطيب
هلا بالحــر القريـــب المو غريــــب
هلا بيحيئ المازني وجبله الحبيب
الگلــــــــب بيكـــم مبتشر يخوانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا بسيـــــف البالحرب مايستراح
هلا بكردوس اليحـب طـگ الرماح
هلا بأسلم والسبط كل حيله صاح
هـــلا بكلمن بالحرب لعيوني طاح
هــــــــــلا ببطال الوغئ وشجعانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا يالبيكم اشــــــد عزمي وگفاي
هـــــــلا يالشوفتـــكم تعادل الماي
هـلا بسلمان اليسـد عوزي وضماي
وبرير المشتري المــــــوت الرضاي
الصحبه هاي الصحبــه ماخسرانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا بيكـــــــم والهلا اعليكـم قليل
هلا بالأدهم ابـــــو السيف الثجيل
هــــلا بربعي الدوم ماألهــم مثيـل
اليوم ضلـــــت كربله تموج وتميل
الزلــــــم منكم هاكثــــــر فحطانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا يالتمشــــون وي دم الوريــــد
بيكم الوي اليوم ابو ذراع الحديد
هلا برايــــة حنضله اوراية سويد
هلا بالنصراني والطائي وسعيــــد
بيكــــــــــــم الطف اسعرت نيرانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هــــــلا بالضحولي بالغالي ونفيس
وهـــــــــب ماقصـر ولاقصر انيس
هلا بعبد الله وهلا وحي الله قيس
هــــــــلا بكلمن عايش بوجـــــدانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
مصطفئ الصالحي
،،،فزعة الانصار،،،
(الانصار )
مجلس بسم العطشان
نصبو وسط الميدان
انصاره ...انصاره
........١..........
والله تهظم .يثلم اشفافه العطش ياناس صعبه
والله تهظم .المنخلق ماي الله لجله مايشربه
جان مجلس والدمع ترجم حجيهم
بلكت يمر بيهم ويشرب بجيهم
بجف مالطمو بحساس
خاف يمرهم عباس
واخباره ..انصاره
.......٢........
مستهلهم .باجر ايظل الهوه معقوله وحده
مستهلهم .كل طفل يعطش يمد شفته علئ خده
باجر النار بخيم زينب تسافر
باجر ادوس علئ ابو اليمه الحوافر
هيه التهظمهم وين
زينب وبلايه حسين
محتاره ..انصاره
.......... ٣.........
العمايم .كبل لازيينب تسولف شمروهه
العمايم بيهه جا شيصير اذا باجر سبوهه
عابس وجون وحبيب ابن مظاهر
اسسو اول عزاء بهلشعائر
اول مائتم بلكون
وربع حسين يحظرون
خطاره ..انصاره
.........٤.........
سولفلهم .كلشي كلب حسين وشلون المنيه
سولفلهم .ومن وصل عباس صاح انطيك اديه
ركظو العباس كالوله انتخينه
واحد انطه اجفوفه والثاني انطه عينه
وياك الحد الهيهات
خنرف وي الريشات
كلغاره ...انصاره
.........٥.......
المصيبه .بحرك الخيام الخدر من ينتخيله
المصيبه ..من يجتفون بحبل جف العقيله
من تدوس علئ الصدر خيل ال اميه
من تطيح علي الجمر باجر رقيه
سمعو بلترجيات
زين وعابس مامات
سطاره ....انصاره
........٦.........
بلمخيم .باجر وتسمع كسر بظلوع اخوهه
بلمخيم ..حتئ تطلع كالو عليهه احركوهه
باجر بكل الجثث زينب تمر
الينحلف بخيالهه اطب القصر
صاحو زينب نفداج
خيجتفون امنه وياج
نطارهه ....انصاره
...........
بشار السامي
هوسات للأنصار …
ـــــــــــــــــــــــــــــــــــــــــــــــــــــــ
فزعة غِيرة كلهم فِزعَوا
يَم الخيمة مِنّ ٱجتِـــمعَوا
والمحشومة خافت سِمعَوا
وسفة ٱعلينه .. زينب خافت
ــــــــــــــــــــــــــــــــــــــــــــــــــــــــ
صاح بـصوته ضنوة ظاهر
أفدي حسيني من كل خاطر
بنص الحـومة أهتــف باچر
إلنه ٱشتاگت … أدري الجنة
ــــــــــــــــــــــــــــــــــــــــــــــــــــــــ
يَم الخيمة هوّس هوسـة
جيش الكوفة إلاّ ٱندوسه
بسيف الغيرة نگطع روسه
باچر شوفي ... عابس ياهو
ــــــــــــــــــــــــــــــــــــــــــــــــــــــــــ
يابت حيدر ٱتسمعيني
عَمّچ آنه إبن القــــَينِ
مخلّي حسينچ آنه بعيني
يَم الخيمة … فِنّه اليوصل
ــــــــــــــــــــــــــــــــــــــــــــــــــــــــــ
يالمحشومة إحنا ٱهنانة
جَون ودومي خادم آنه
لبن الزهرة ننطي ٱدمانه
وتشوفيني … يوم العاشر
ـــــــــــــــــــــــــــــــــــــــــــــــــــــــــــ
بقلم الأستاذ / ستار عذاب الحچامي
#محرم1446
كافل
بس ابو فاضل
الهاشمي الباسل... أبا الفضل
قائد
من ظهر قائد
هوه بس واحد... أبا الفضل
صمصام السماء … محراب الوفاء
حمال اللواء.... كبشٌ للفداء أبا الفضل
قسور ومـن ظـهـر قسور طالع
الخوذة والريشه منارة وجامع
ياهو مثله هوا بعده بظهر أبوه
الگمر ضوه بنور وجهه الساطع
___.
القاهر
الناصح الناصر
الخوتّه مئازر ...أبا الفضل
الغاضب
لو نوة أيحارب
بخزرة الحاجب... أبا الفضل
ريشاته النصر... قتال الكفر
يكر وما يفر ... يذبح بالخزر ...أبا الفضل
صـار حـيـل الله القوي بيمينه
طفح عرجه الهاشمي بجبينه
دخيل خزرة عينه لو حان النزال
الشرد من سيفه يذبحه بعينه
__
يندم
الطگه مايسلم
امن أيده لجهنم... أبا الفضل
كاسر
جم خشم ماذر
شگد زلم ناحر ....أبا الفضل
حلاّل الشدد... أيات الوعد
مامثله أحد... نهتفله المدد... أبا الفضل
الراجفه أتحل لو نزل للحومه.
شهم حيد ومرجله وجيدومه.
لو غضب والغيظ يطفح يعني گول
ينـفتح بـاب القـيـامه بـيومه.
،__
رايه
بيها دگ ثايه
من حچه أحچايه ... أبا الفضل
يكتل
للحرب يدخل
بشاربه يفتل.... أبا الفضل
يغدو بالسقا .. في سوح الوغى
يوم الملتقى... والموت رقا..... أبا الفضل
مـن يـطب يتـلثم أبچفيته
أيدمر الجيش أوله وتاليته
من يطب عالحومه مايبقى شجاع
يامحارب گدر يوصل صيته
__""_
هايم
عبده وخادم
القاضي والحاكم ...أبا الفضل
بلطفه
وارتجي بعطفه
مغرم بوصفه.... أبا الفضل
كفال الخدم ... يتناثر شيم
من أيده النعم... شيال العلم.... أبا الفضل
باب للرحمه التصب عالخدمه
بشكره يتجسد دوام النعمه...
عنه مو معصوم گالو وانا أگول
بذكره يتجلى كمال العصمه.
__$$_"
✍️#حسين #حمدان #الدلفي
اجـيتك للنـهر واعـتب گـوم انـهض تـلگاني
غريبه ودمعتي حمره وراحوا كلهم اخواني
»»»»»»»›»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»
1️⃣
ظلام وغربه تعميني وشوف خيامي محترگه
وحـشه الدنيا بغيابك احس بروحي مخـتنگه
ادورك يا گـمر هاشم وكـلبي يصيحك بـشهكه
~~~
ضواك مـسافر ورايـح
ويـن ابـيا كـتر طـايح
اريدك والحزن واضح
~~~
ادورك يا امـل روحـي واريـد اتبـرد احـزاني
»»»»»»»»»»»»»»»»»»»»»»»»»»»»»»»
2️⃣
ادورك بالجـثث واعثـر وامـيز عـطرك ولونك
اشوفك يا كمر واضـح ضـاوي الدنيا بعيونك
اريدك تعرف احـوالي اصدلك وأسأل شلونك
~~~
أقرب واسـمع اونـينك
العلامه السهم البعينك
يخويه وتـعبت الوينك
~~~
حزينه والدرب يجـرح وبعدك راحـت الواني
»»»»»»»»»»»»»»»»»»»»»»»»»»»»»»»
3️⃣
وصلتك مختلف حالي طـايح عالارض طايح
تباوعلك غصب عيني أشوفك والحزن واضح
شعجب ما تعرف بزينب وعنها بهلوكت رايح
~~~
اصد الجسمك ابخوفه
تعمه عيوني ما اشوفه
الگفيل مگطعه جفوفه
~~~
وحالك تعب احـوالي هـضمني وحيل بجاني
»»»»»»»»»»»»»»»»»»»»»»»»»»»»»»»
4️⃣
اسولف واشرح احـوالي لو تحجيلك دموعي
يعايف زينب بحيره نخيتك وانت موضوعي
دكـوم انـهض يـكفالي طاحن بعدك ضـلوعي
~~~
انـهـض يا گـمـر زيـنـب
راسـي والگـلـب شـيب
انحب وانت هم تنحب
~~~
ضاگت بعدك الـوسعه وكثره والله عدواني
»»»»»»»»»»»»»»»»»»»»»»»»»»»»»»
5️⃣
اعاتب والعتب جارح وانت مگطعه جفوفك
يروحي وحنت تريدك وعيني رادت تشوفك
اودعك وارجع بشوگي ونسافر باجر نعوفك
~~~
غـربه والشـمر يـحدي
وتـنزل دمـعتي بخدي
غير الحـسره ما عندي
~~~
الزمن بخلافه شيبني امشي بغربه خلاني
»»»»›»»»»»»»»»»»»»»»»»»»»»»»»»
6️⃣
الحادي ونيته يـسافر باجـر يا درب نـمشي
وبعـدك تنـهضم روحي أبيض بالقهر رمشي
يريته الموت يلفيني الناگه تنـحسب نعشي
~~~
راسـك عـالرمـح شـفته
واحجي بدمعتي سكته
وروحـي ابـكربله مـيته
~~~
ولا انسه الحصل بيه وعاجز وصف الساني
»»»»»»»»»»»»»»»»»»»»»»»›»»»»»»»»»›»»»»»»»»»»»
محمد خشان ✍️.
»›»»»»»›»»»›»»»»›»»›»»»»»»»»»»»»»»»»»»›»»»»»»»»
دمع عيونك يسوه الماي
عوف اجفوفي واحجي وياي
خويه بأخير ايامي //اعذرني عفتك ضامي
**
يمحلي ماي المشرعه ومخلي بي طعم ولون
وبرياگك يعيش العطش ماشارب الماي شلون
لجفوفي لتباوع بعد فدوات كطعتهه تهون
اليكسرلي ضهري مو رمح من الشماته يضحكون
الشيب بشعرك جنه الغيم
ميت جنك شابع ضيم
محني عمود اخيامي // اعذرني عفتك ضامي
**
حاسبني ابنك مو اخو عشرتنه ماجنه اخوان
عفتك شباب بخيمتك لحظات شفتك كبران
يل تارس اعيوني السهم متقصد يلوحك جان
اشبگني اريد اتنفسك عطشان يشبگ عطشان
متعبك وني وضهرك مال
موذر جسمي شلون انشال
وطولك ذبل كدامي // اعذرني عفتك ضامي
**
بكل حيلي خويه من صحت ادركني شفتك يمي
مو مره اموتن لا الف كون اسمع اليبن امي
اعذرني لوبس قصرت وجروحي ترست جسمي
حلمي يخويه احجيهه الك والموت حقق حلمي
وصتني امي بزغري هواي
گل لحسينك يامولاي
يلجمني جرح اسهامي // اعذرني عفتك ضامي
**
هوه الجفوفه مگطعه ماعنده واهس ملگه
اعذرني چي ماگمت الك صدري السهام تخنگه
عن جسمي ياخويه ابتعد خاف الخيول تسحكه
المتربي بجفوفك وسف مابي مجان تشبگه
تباوع بيه ودمعك طاح
بيني وبينك بس ارماح
محيرك يجسمي الدامي // اعذرني عفتك ضامي
**
بهاي المسافه امن النهر للخيمه خلص عمري
ادركني صحتك من طحت يابو علي من مهري
اتلگه بيش الكاع اذا كثره الاسهام بصدري
حيره اعله ضهري لوطحت طالع رمح من ضهري
هاي اجروحي كلهه تهون
كل تفكيري يم ام عون
ضعني بقه ابلا حامي // اعذرني عفتك ضامي
**
محمد خضير الزيدي
شمسويه بيك الخيل والناس
معقوله هذا انته يعباس
حاجيني عالجفين وسهم الي صاب العين
**
يا ابوفاضل بيه ضاگت واخو مثلك وين اكو
انته غير احزام ظهري ليش شمتّ العدو
عازة الخوان عازه ينولي الماعنده اخو
استوحدوني خويه عگبك وبعد لحسينك منو
بطيحت الرايه طاح الحسين
دليني خويه اليوجعك وين
وبگلبي احس نارين وسهم الي صاب العين
**
حسين صاحو مات اخيك كلت ابو فاضل عدل
غيرة الله براسك انته تنطي روحك مو سهل
ما مصدك تمشي عني وتنجتل يا ابالفضل
مال ظهري من عفتني ومال وياي الحمل
عباس اشوفنك جنت جيش
تتركني وانه بعازتك ليش
ظهري انكسر مرتين وسهم الي صاب العين
**
الرايه من مالت شفتها ملت كلي ونحنيت
صحت توه انكسر ظهري المصرعك اركض اجيت
من المخيم للشريعه خلص عمري وشيبيت
بحجري من خليت راسك ليش نزلته وبجيت
ياهو الك بآخر انفاسك
وياهو اليخلي بحجره راسك
الحيل اجيبه منين وسهم الي صاب العين
****
ياهو انته من گلتلي خويه كل حيلي انهدم
عين شفت السهم بيها وعين جامد بيها دم
تحيرت خويه وعذرتك اهنا يشيال العلم
عينك اويه السهم تطلع منها شيطلعه السهم
بالعمد راسك حيل ممرود
ولا عين لا جفين لا جود
والرايه طاحت وين وسهم الي صاب العين
***
انته اخوي وانته جيشي وخويه من عندي خذوك
طول عمرك ماعفتني وعن اخيك فرگوك
بيك شمسوين خويه وليش هيجي گطعوك
انته ذاك الگمر جنك حيل خويه غيروك
شسوت يخويه بحالك اعداي
مو الاولي متغير اهواي
صوب دليلي البين وسهم الي صاب العين
***
والله دنيه وفرگتنه وجنه ابد ما نفترگ
انته جنت النفس خويه لوعفت ريتي اختنگ
الخيل من يبعدها عني صدري لمن ينسحگ
وخويه زينب ياهو الها الخيمه لمن تحترگ
عباس گلي بزينب شلون
يسبونها وتروح المتون
ومجتفه الايدين وسهم الي صاب العين
****
تمت
#ميثم #العمري
قصيدة في شهادة أبي الفضل عليه السلام .. لسان حال زينب ع …
ـــــــــــــــــــــــــــــــــــــــــــــــــــــــــــــــــــــــ
صوت أسمعت من جانب الضفّة
طـــــايح كفيلِچ وٱنگطع چـــفه
ـــــــــــــــــــــــــــــــــــــــــــــــــــــــــــــــــ
گلبي ٱنخمش من روحتك هايه
يَـمّ النــــــهر دَگّــــيت إلك ثاية
تسگي العطــاشا چــانت الغـاية
ولخــيامي ترجع رايد بلهـــفة
ـــــــــــــــــــــــــــــــــــــــــــــــــــــــــــــــــ
گالو معـــاجز ســوّه بيــمينه
غيرة وشرف يتلاهب ٱجبينه
بالحـومة تـشبح للخيم عينه
وهيبة محمد بالوغى ٱتحِـفّه
ـــــــــــــــــــــــــــــــــــــــــــــــــــــــــــــــــ
صوت ويگلي طاح أبو الغيرة
معــناها زيـــنب إختك بحِيرة
چـن يوسف آنه وواگع ٱبّــيره
مو سهلة خويه وفرگتك كلفة
ـــــــــــــــــــــــــــــــــــــــــــــــــــــــــــــــــ
گالو خِزَر ماي النــهر خــزرة
ويگلّه جودي العيلة منتظرة
ما ضوگك آنه وداعة الزهرة
حاشاني منك أشرب الغَرفة
ــــــــــــــــــــــــــــــــــــــــــــــــــــــــــــــــ
هـاتف يگـلّي چفوفه مبتورة
بدر العشيرة ومنخسف نوره
وحـسين حاير منـهدم سوره
مجروح أخوك وما وگف نزفه
ـــــــــــــــــــــــــــــــــــــــــــــــــــــــــــــــــ
صوت ويصيح الكافل ٱتگنطر
ومكسور ظهره ظل أبو الأكبر
فرگــاك تذبــح خـويه ما أگدر
مسبية عنك أمشي يا وسفة
ــــــــــــــــــــــــــــــــــــــــــــــــــــــــــــــــ
بقلم الأستاذ / ستار عذاب الحچامي
ابزودك يعباس ابزودك
طلع مــن الخيمه ناوي
زلم يذبح للعــــــلاوي ابزوده
سمعو العباس مجـبل
علي گالو راح يحمل عــوده
اتگرمت وادم جدمهه
ووادم اليبست بدمهه اشهوده
غير حته العدله طمها
الزلم ضوگهه طعمها ازنوده
من يوصل يعباس لحدودك
+++++++++++++++
اتعله ابن هاشم عليـــــهم
طيح اسيوف امن اديهم بيــده
الحرب حربه ومن يچهبه
الخيل زلمــــــــــتهه تذبه اتريده
زينب اتحـــــــيي الكفلهه
هلا بالفحط فحـــــــــلهه البيده
علي يشطر زلـــــم خشنه
اعضام وادم صفــت منه اوليده
موسيف شايلك موت بزنودك
++++++++++++++++
شوّر العـــــــــباس بيهم
همه اجــــو ماراح ليهم رادهــه
العركه يم الخـــيم تنجر
حدر زينب زلــــم شمّـر شــادهه
رايه شدهه وأجــه راهي
گال اشــوف الزلم ياهي اسيادهه
ابن زلـــــــمه ودبچ بيهه
وركّــــــب المهره عليهه وگـــادهه
والروس ظلت عالگاع اشهودك
++++++++++++++++
ثنّــــه عالحومه وگسمهه
وراد ياخـــــــذهه بزلمهه وخيلهه
امن الهواشم گـال فشله
بضهري ضلت زلم كلــفه بحيلهه
الجيش ذله وعاف نصه
لبو الاكبر هـــــاي حصه ايشيلهه
علي وجاسم عــزل الهم
الف كل واحد حصصهم ويـــلهه
والخيم محميه بزود من زودك
++++++++++++++++
گـــــــــــصد للماي وتعّنه
صــــــــــورته بينت چن خناگهه
الماي صافي وطلع شكله
هدل جرف النــــــهر كله وراگهه
شكو خشم العـله ايفركه
ســـــــبع ومنشف العركه ارياگهه
الخيل والخـــــياله شلهه
الزلم للكوفه سحــــــلهه وساگهه
والماي يتراجف حيل من جودك
شاكر الصيمري
عن لسان انصار الامام
الحسين عليه السلام
يجمعنه هلمصير النصرت الغريب
علميمنه زهير علميسره حبيب
كلنه عشك للحتف
الواحد يقابل الف
النصرت الغريب
★★★★★
انا حبيب اوالدي مظاهر
دمي لجل نسل الرسول الطاهر
ايماني يسعه يتبع المشاعر
احمد الباري ماتركني حاير
للموقف السليم ياراحة الظمير
مسلم ونافع صاح وي عابس وزهير
علدنيا والله العفا
بگلوب كلها وفه
النصرت الغريب
★★★★★
اني زهير وصارمي بيميني
صافي العقيده ثابت بيقيني
روحي فده للموت لجل حسيني
للموت اهلا ياسيوف خذيني
كل عمري بالحياه متقوي بالدليل
ماارتبط واصير بالموقف الذليل
انا وحبيب ابعهد
واحد نضل للابد
النصرت الغريب
★★★★★
عابس آنا الي ماردت حياتي
عندي حلم طول العمر مماتي
لاجل الصنعلي والبنالي ذاتي
اتكطع وصل للدين امنياتي
كل حبي للحسين وصلني للجنون
عن فطرة واعتقاد ما اعرف الظنون
امشي على هلدرب
يامحله وكت الحرب
النصرت الغريب
★★★★★
نافع انا وقوسي يعاهد سهمه
كلنه فده لحسين فدوه الأسمه
عن وجه ابوالسجاد أزيل الغمه
واليوم وكت الوفه ويوم الهمه
وبكل فخر سعيت النصرت الحسين
عن معرفة الجهاد وبلفطره واليقين
لحوض الرسول اقترب
يسگيني من العذب
النصرت الغريب
★★★★★
بصوت الشرف يوم اعلنوا للزهره
جينه نوافي بكل عزم للعتره
هذا جمعنه عن عقيده وفكره
من حسين لوصدر امر ننتظره
اكتبنه بالدماء اسطورة الوجود
للابد كربلاء ماتنتهي بحدود
لحسين كل الأمر
ونضحي هذا العمر
النصرت الغريب
الشاعر حسن لعيبي الحريشاوي
يبو فاضل يخوي
يبو فاضل يخوي
ـــــــــــــــــــــــــــــــــــ
يخوي اكعد
هاي الدنيه مو مالت اخو وحده
يخوي اكعد
سكينه تصيح وينه عمي اوعده
كوم ولا تخليهم يشوفوني
امشي لوحدي ولحيره بعيوني
شكل لخيامي لو عنك يسئلوني
حيره
وين امشي حيره
الدنيه من غيره... ضلمه و زغيره.... حيره
كوم ورد يخويه وباي تجيلي واتجيلك
يل ماشايف عيوني هاي عيوني تبجيلك
لو ما بيك حيل تكول اخذ من حيلي لحيلك
ـــــــــــــــــــــــــــــــــــــــــــــــــــــــــــــ
جيت يمك
طحت من طــولي ما لــــــــزمتني رجليه
جيت يمك
بين ضهري وضهـــــــــرك فترقن اديه
يالمعــدل التمـــــــيل وراعي للخوه
نكسر ضهري عليك وثكلت الخطوه
الخوه بلا وجودك كلشي ما تسوه
اصيح
ببو فاضل اصيح
كمت اوكف وطيح... بعد وين استريح...
بعد وين الكه اخو مثلك شريج بضيمي وحزاني
طلبت من الله كون ويـــاك ينطـيني عمـر ثاني
يالواي وبــــــــــعد شيبي ويحصتي بين خواني
ــــــــــــــــــــــــــــــــــــــــــــــــــــــــــــــــ
شوف حالي
بساعة راحو مني غالي بعد غالي
شوف حالي
الماعنده اخو خويه يبقه ضهره خالي
وحدي وما الي بالحومه ناصر
وزينب للسبي يردوهه باجــر
رحت مني وبقيت لوحدي حاير
راح
الجان اليه جناح
المن اشوف ارتاح.... بلا جفوفه طاح.. راح
رجعت من النهر مكسور ومبين علي كسري
وشوفن زينب من بعيد غيمه من الدمع تجري
عرفت فاكد العباس من شافه حنه ضهري
ـــــــــــــــــــــــــــــــــــــــــــــــــــــــــــ
ماعرفتك
عين دمعة وعين يجري منهه دم
ماعرفتك
وتزحف بصدرك عله درب المخيم
الحمدلله وبعد ماداستك خيل
يالفكدك كسرني وهدم الــحيل
الخيم باجر تنادي وتصرخ الويل
سبايه
تمشي اهلنه سبايه
يبو فاضل ورايه....... زينب بلايه رايه.... سبايه
من طاح العلم عبــــــــاس بين بالخيم فـــكدك
شافوني وحيد الكوم وجيش انته جنت وحدك
بالمني خذاك المـــــــــوت بعد ياخويه شيردك
ـــــــــــــــــــــــــــــــــــــــــــ
الشاعر
مصطفى الحسني
#محرم_ليلة_الأنصار
حي الله الأنصار حي الله الأنصار
.............................
شالو الرايه الجبيره .. وهوسو بالميدان
هدو بسوح المعاره .. وخلو الطف حيران
هجت الحومه بزلمها .. وعالي صار الدخن
والله كلهم شجعان ،، وللمخيم قربان
حي الله الأنصار حي الله الأنصار
..............................
اذن اذان الحريبه .. وهدلت ضهور الخيل
عيت وهبتو رسنها .. وكربله انگلبت ليل
عثرت الگوم بهدمها .. ومابعد زلمه يعيل
الحومه صارت طشار ،، وعتلت بيها النار
حي الله الأنصار حي الله الأنصار
.............................
شالو البيرغ نشامه .. وترسو الطف هوسات
غيمت شيبت حبيب .. شمحله هاي الشيبات
وطبها وتمرجل زوهير .. الكابله مگبل مات
هتزت وجون ختاض ،، وشبعت الخيل ركاض
حي الله الأنصار حي الله الأنصار
.............................
عابس تمرجل دخيله .. وثوبه بالطف نيشان
شردت الخيل بزلمها .. ومابقه اعليها امجان
ماشرب ماي بطلعته .. اتضامن او يالعطشان
الله يستر لوصاح .. يقبض بسيفه ارواح
حي الله الأنصار حي الله الأنصار
.............................
طبهم الحر الرياح .. ومسلم ربات الزود
صارت الفزعه الاصيله .. وردو الگوم ردود
من وهب اخذ الوفاء .. الضحه للخيمه زنود
كلشي صاير محتار ،، ودخلت الحومه نذار
حي الله الأنصار حي الله الأنصار
العبد ابوفايز الرافضي
قصيدة في بطولات أنصار الإمام الحسين عليه السلام …
ـــــــــــــــــــــــــــــــــــــــــــــــــــــــــــــــ
بالروح ٱنوَفّي الدّين
إحنا أنصارك يحسين
يَبنِ الكرار
يَبنِ الكرار
ـــــــــــــــــــــــــــــــــــــــــــــــــــــــــــــــ
يحسين يا روح النبي والدّين عندك كِلّه
هيهات واحد يوصَلَك يالماقِبَلت الذّلّة
عالموت نِسحق سيدي شِنسَوّي بيها المُهلة
والگاع كاتلها الظّما ودَمّ المناحِر دِهلَة
بَس أشّر بالإبهام
نِگطَع روس الظّلّام
يَبنِ الكرار
يَبنِ الكرار
ـــــــــــــــــــــــــــــــــــــــــــــــــــــــــــــــ
والشيخ ونعومه هِتَف بيهم حبيب الهيبة
بالناس شاعت سيرته معروف صاحب شِيبة
هاليوم يوم المرجلة والحگ لزوم إنجيبه
بإيمان ثابت وبعزم ما يوم حَسّ برِيبة
وَيل اليوصل لحسين
وِحنا هنا موجودين
يَبنِ الكرار
يَبنِ الكرار
ـــــــــــــــــــــــــــــــــــــــــــــــــــــــــــــــ
وزُهير بِن قَين ٱرتِجَز ويصيح وسط الحومة
لحسين ناذر مهجتي والروح بي مهيومة
هاليوم لَترِك هالجِثَث مِتچَدّسَة و مركومة
مولاي ظَلّت صورته بالبال ها مرسومة
مَحلاها الموتة ٱوياه
شنهو الدنيا ٱبلَيّاه
يَبنِ الكرار
يَبنِ الكرار
ـــــــــــــــــــــــــــــــــــــــــــــــــــــــــــــــ
ويصيح عابس يا خَلَگ بحسين جَنّ جنوني
ماعوف مهجة فاطمة هالكون لو تنطوني
ما ريد درعي ولامِتي بسيف الحقد گطعوني
بحسين جَنّني العِشِگ يا ناس لَتلوموني
ٱشما أنذِبح أرتاح
بنحري ويطگ سِبّاح
يَبنِ الكرار
يَبنِ الكرار
ـــــــــــــــــــــــــــــــــــــــــــــــــــــــــــــــ
مِن بين أنصاره نِطق وياك يَبنِ الزهرة
يحسين رايد يِختلِط دمّي بدمايه العِترة
لَئيم أصلي وأرتجي مولاي مِنّك نظرة
مبخوت كلمن يِخدمك خَلّص حياته وعُمرَه
حَد سَيفَه بيهم جَون
مِن ضربته يشردون
يَبنِ الكرار
يَبنِ الكرار
ـــــــــــــــــــــــــــــــــــــــــــــــــــــــــــــــ
أبرار كِلهُم صُحبِتَه
وبالغيرة إلهُم حِصّة
أحرار لِلموت بشَرَف
بالطّف إجَتهُم فُرصة
أنصار واحدهم غِده
بحلگ النواصب غُصّة
ثُوّار سووا كِل عَجَب
وحسين بيهم وَصّى
يحسين إلَك هالروح
فدوة لثراك تروح
يَبنِ الكرار
يَبنِ الكرار
ـــــــــــــــــــــــــــــــــــــــــــــــــــــــــــــــ
بقلم الأستاذ / ستار عذاب الحچامي
طور العگيله ( نزله الانصار)
يحسين بدربك ظلينه
يحسين انته القائد النه
لا تحسب سوينه المنه
كل عمرك ما رايد جنه
ونته بزغرك المسوينه
يحسين بدربك ظلينه
احنه انصارك دنيه ودين
لذراعك نصبح جفين
نفزع گبلك مو بعدين
بس اشر تعرف ماضينه
يحسين بدربك ظلينه
يحسين نبوس جفينك
وصبي نصبح احنه لعينك
وداعت عباس وخدينك
بس جرب مره وهد بينه
يحسين بدربك ظلينه
باجر كل علومك تبقه
تنطي لصاب صيته وحقه
منل كوفه وتوصل للرقه
كل اطباعك ذيج الزينه
يحسين بدربك ظلينه
نسحك فوگه الرايد ذبحك
مننطيح احنه عود يطيحك
صاير شيخ وجاي ينصحك
ونته الشيخ عليه وعلينه
يحسين بدربك ظلينه
تمت كتابتها في ( ١٠/٧/٢٠٢٤/م)
قلم خادمكم : حسين علي الدليمي
دكت اطبول الحرب حل القتال
وبرزت الأنصار كلهم للنزل
تعنو وصارت عيايه ومغبره
سبعين لاجن قاتلو ابلا محال
حسين عنده نصار كلها مسنعه
خلو روس وجثث متكطعه
هاي تربات اليحب بلواقعه
حسين انصارك هد بينه
صاحو وبصوت اتعنينينه
نجيب العسكر والشط لينه
نجيب الطائر بالجو
لو اشر بيده
@@@@@@@@@@@@@@@@@@
لف حبيب عمامته وهد مرتجل
وكال هاذ الجيش شدو بلحبل
هوه هاذ اليوم يوم المفخره
هنا تبين إلزلم ما تبقى عدل
هدو عله الميمنه وعل ميسره
الجيش والخياله لزموهم سره
الحومه خلوها قيامه الاخره
عابس شك هدومه وناده
فدوه نروح الشيخ الساده
هدو كل واحد بعناده
زلم حسين اليوم تبين
@@@@@@@@@@@@@@@@@@
سمعو بزينب تخاف من النصار
وگبت عمايمهم وادوت نار
وهوسو يم خيمت الحر مفرعين
ااركاب نطي للخدر يا بنت الخيار
عيب تبقه ركاف فوك جسامنه
مادام زينب خايفه من اجدامنه
كومو طيحوها يخوتي اخياامنه
ذبو رباط وعلكوها
الحومه اليوم يطيحوها
ومعمايم منهم شالوها
شلون تخاف الحره
وحنه اركبنه طيح اليوم
@@@@@@@@@@@@@@@@@@
روس خلو كربله وكثر الدمه
صريخ واصل صوتها لسابع سمه
ذب صليبه وهب من شاف الحسين
الله يكون ابعونه من شافه انعمه
من حبيب اتعلم شلون العشك
دره بيضه وكلبه بلحب يدك
تريد تعرف بصدك همه الصدك
لحسين انطو معنه الصحبه
لكابلهم رد واكف كلبه
وليشرد ما يندل دربه
خياله شردت من عدهم خياله
خادم القصيده
عباس اللامي
اليوم شيبة كربله وشبانها
تحزمت والخيل طگ اعنانها
****
وصلت لحد الركب دم الرگب
ورگة الموت انقرت والكل شطب
خيولهم تسحگ زلم سحگ الگصب
وهاي اول مره نار بلا حطب
فايره ونسمع رجيف اسنانها
****
دلهمت وسيوفهم برگت برگ
والگرب يم نارهم هم يحترگ
زلم عالعفيه ابد ما تنسبگ
يوم طبوا عالزلم صار الخفگ
لهسه ما ساكت بعد ميدانها
**
فزعه فزعه تگابلو والطف هله
وبيسو بنحورها ذيج المله
الليله هاي الليله بس للمرجله
وحگها تشيم اراضي كربله
وتنحسد بين المدن بمچانها
****
هز حبيب الرايه لمثگل العزم
والشگر صهلت وطبتها الزلم
وفگره بين اسيوفهم من يلزم
مو فقط بس ينذبح لا ينعدم
والوجود احسين عالي بشانها
**
اخذ من انصار الحسين العبر
وراح انقل جزء وتجسده الصور
بيهم الشگ روحه من گد الفخر
وبيهم الراجع ندم للمستقر
اعيون ابو اليمه أصل عنوانها
**
كلمات
علي خزعل الصالحي
هوسات للإمام العباس عليه السلام …
ـــــــــــــــــــــــــــــــــــــــــــــــــــــــــــــــــ
يابوالشـــــيمة يا عباسي
دومك خويه رافع راسي
وإنته ٱحزامي يا نبراسي
مِنّ الغيرة .. دمك حامي
ــــــــــــــــــــــــــــــــــــــــــــــــــــــــــــــ
خويه ٱعلينه دارت كلهه
هـاك الراية گوم ٱحملهه
شوف أم عـون المـدللهه
چفوف الحيرة .. تصفج بيهه
ـــــــــــــــــــــــــــــــــــــــــــــــــــــــــــ
هاي العيلة گوم ٱرويهه
الشدة ذراعك التّـــلويهه
كـرّة حـيدر وكُر بيــهه
هاي اطفالي .. تنطر جودك
ـــــــــــــــــــــــــــــــــــــــــــــــــــــــــــ
هاي ٱسكـــينة تنشد وينه
عمـي الــكـافل امتــانينه
بچف الغيرة خل يسگينه
مايك وينه … صاحت سكنة
ــــــــــــــــــــــــــــــــــــــــــــــــــــــــــ
گلـــبك داوي تلــهب ناره
عگبك خويه شنهو الچارة
من عدواني شنوا غـــارة
عوف الشاطي … يابن حيدر
ـــــــــــــــــــــــــــــــــــــــــــــــــــــــــــ
بقلم الأستاذ / ستار عذاب الحچامي
تحجي دنيانه اعله جودك يابو فاضل
شاهدك بالطف زنودك يابو فاضل
ترفع الراس. انته عباس يابو فاضل
=======================
حاير امنين ابدي اوصفك والله حيره
زغير اني وانته اسمك وحده ديره
زينب توصفك بدر ذيج العشيره
انته كافل وحده عالعالم اميره
تمشي غيره بنص وريدك يابو فاضل
شحجي وحسينك عضيدك يابو فاضل
تنكط احساس. انته عباس يابو فاضل
======================
لو حجينا اعله الشجاعة انته فارس
ماكو بالزود لحضرتك اي منافس
بابو فاضل والله تاريخك مدارس
نرفع الروس ونذكرك بالمجالس
انته بس اسمك حضاره يابو فاضل
صارن اجفوفك مناره يابو فاضل
يشمك الياس. انته عباس يابو فاضل
======================
حتى التراب التسحكه اترسه هيبه
انته مو ثامن عجيبة اول عجيبه
الغيم لو ناديته ينزل مو غريبه
يعشكك حسين ويجلك يا حبيبه
شوفة اعيونك علامه يابو فاضل
زينب اتحس بالسلامه يابو فاضل
عطرك انفاس. انته عباس. يابو فاضل
=========================
شرف التاريخ اسمك من تخلد
وكفتك عالنهر بالطف ايه تشهد
قمة بالايثار شخصك مالك اي حد
جفك يباهي الخلائق بي محمد
منين ما صدلك مأثر يابو فاضل
بالمواقف كلها حاضر يابو فاضل
ايه تنباس. انته عباس يابو فاضل
========================
انته ابو الجود وطفوفك تبقى شاهد
جيش جنك وحدك انته وهمه واحد
لن اخوك الحسن جان وعلي الوالد
الجيش من طكَة يمنتك كله شارد
والعزم عندك عقيده يابو فاضل
للسمه اليشرد تصيده يابو فاضل
تبقه نبراس. انته عباس يابو فاضل
===================
حكَنه لو بيك انتفاخر وانتباها
الغيره رادت غيره منك وانتباها
الكابلك ينشغل فكره وانتباها
الجنه تفخر بيك باجر وانتباها
ربنه كلشي مخلي عندك يابو فاضل
وفي وما اخلفته وعدك يابو فاضل
قبله للناس. انته عباس. يابو فاضل
===============حسين المحامي
محد اخذ حجيي وخسر // اعطش دهر تروي بنهر
تضحيتك الامك فخر // يعباس
**
ضحي يبني بكلشي ضحي بعينك بجفك براسك
من الزغر ناذرتك انه للحسين بكل حواسك
خدمه هايه وفخر عندك بيهه تتباهه اعله ناسك
افزع بروحك يروحي لو عطش لحسين جاسك
حان الوفه وحل موعده //طش ع الخيم جفك نده
بالصحره صيرلهم مطر.//يعباس
*
حسين تارس بالي اسمه وتارس عيوني امامي
حيل يمه اعليك ازعل لوسمعت حسين ضامي
ريحتني بحجي الغيره من گلتلي رغد نامي
اطمأنت روحي كلش عطش مايوصل خيامي
لو للخيم يوصل عطش // اعتبري شالوني بنعش
ضلت على الله وعالقدر // يعباس
**
يمه تحت اجدامي جنه وبين ادين حسين موتك
استغل هل فرصه واركض لاتخليهه تفوتك
شمايلوحك سهم اصرخ حسين احبه بعالي صوتك
لوتحس روحك مقصر ثوب بنحرك واخوتك
كلي فخر من انسأل // مارد الج واحد عدل؟
يل تعبي بيكم ماخسر // يعباس
**
ماادليك الحقيقه انه اعرفك انته تندل
تدري بالماينطي روحه لجل اخوته هذا ينذل
السهم عزبله عينك خلي وجه السهم يخجل
لون ماگطعت ادينك يابو فاظل والله ازعل
بفي وجهك امأمنه الخيم // لايوصل الزينب سهم
ماارضه اذا واحد عبر // يعباس
**
عالضعن طش امنياتك يمه وانسه وحده وحده
الزلم تنقاس بمواقف كلمن وفعله اعله كده
لاتجامل ماي بل طف وطينته خلهه اعله خده
فياي صير اعله المحامل ووجه عين الشمس سده
خطواتك امشيهه بحذر // بالك يمس ضعنك خطر
راح انتظر منك خبر // يعباس
**
اكطع اجفوف الوفائي وخلي يكبر بيك اسمي
ومن اذكرك راح اشكرك حققت يايمه حلمي
مقصره مطيه حسين ولدي كون انطي حتى دمي
شكبره حضي تگلي زينب كعدي يم عباس يمي
ترفعلي راسي لو متت // شكرآ الك ماقصرت
بتظيحتك اسم امك كبر // يعباس
**
محمد خضير الزيدي
زلزل الكاع عليهم من تطب
يمه عباس يعرفونك صعب
====================
يمه اوصيك واعرفنك شهم
سيف الحسين وابد ماتنثلم
تشتري الموت يخيال الزلم
تخزر الجيش زلمهم تنهزم
ويه الدموم دمعهم خليصب
يمه عباس يعرفونك صعب
===================
ازآر وعيد معاجز حيده
سوي الطفوف كانها الاخره
وزع الموت عليهم بالسره
وازرع الكاع جنود مطشره
بالملمات تَكَشفّها الحجب
يمه عباس يعرفونك صعب
==================
اعرفك زين واعرف امروتك
تحلف الناس ييمه ابغيرتك
امك لهاي يكافل ربتك
تبذل الروح لاخيك رادتك
بالبطولات ابد ما تنغلب
يمه عباس يعرفونك صعب
=================
امك وبيك افاخر وابتشر
اعرف ارباك وانه البيك افتخر
فارس وحيد وابد ما تنكسر
ترعد اتصير اذا تسمع خدر
غيرتك نار تجويه الترب
يمه عباس يعرفونك صعب
=================
تعرف اعداك اذا مرك زعل
انته تربات علي الحيد الفحل
ساعة الموت ولا تعرف وجل
جنه بالغيض يجي وياك الاجل
مشنقة موت يسيفك ينّصب
يمه عباس يعرفونك صعب
==================
نينوى تصيح اريدن واستمع
منك اخبار صرت لختك درع
نخوتك نار تذوبهم شمع
كون الانفاس عليهم تنكطع
عالشياطين تظل تمطر شهب
يمه عباس يعرفونك صعب
=================حسين كاظم
يا ابا الفضل
القصيدة : بالطف اشوفك عباس
محرم الحرام 1446 هــ
▫️▪️▫️▪️▫️▪️
بالطف اشوفك عباس قائـداً ونصرا
وللخيــم فـــيّ ومــاي ساتراً وسترا
ياعبــــــــــــــــاس يابا الفضــــــــــــل
ــــــــــــــــــــــــــــــــــــــــــــــــــــــــــــــــ
بالطــف اشوفـك مهيوب شيخ الزلم بالحومه
معــروف صيتك عبــاس مثل الكمر ونجومه
بيوم الكلت يمــي الماي زدت النهر معلومه
من مثلك ايلـــوح الغيم منه تخاف اخصومه
للخوه جفـــك عبـاس حارساً وذخرا
وللخيــم فـــيّ ومــاي ساتراً وسترا
ياعبــــــــــــــــاس يابا الفضــــــــــــل
ــــــــــــــــــــــــــــــــــــــــــــــــــــــــــــــــ
يابطـل ياخـــيّ حسين للحرب كشخة ساده
من تخزر اتهز الجيش ورجفه تصيب القاده
ولو شـاف طولك عباس يكضيها كله اشــراده
يالجفك يعــادل كـــوم سبيعن الـــف وزياده
انه اختك وردتك دوم شامخاً وفخرا
وللخيــم فـــيّ ومــاي ساتراً وسترا
ياعبــــــــــــــــاس يابا الفضــــــــــــل
ــــــــــــــــــــــــــــــــــــــــــــــــــــــــــــــــ
يابا الفضــل تمطر غيض بس ارعد ايهابونك
سل سيفك وصيح بصوت فنهم اذا يدنونك
انـه اختك وروحـي اوياك ومأمنه بين اعيونك
للخـــوه قدمت ادروس جان الوفه مضمونك
من نذكر اسمك سكاي غيمــةً ونهرا
وللخيــم فـــيّ ومـــــاي ساتراً وسترا
ياعبــــــــــــــــاس يابا الفضــــــــــــل
ــــــــــــــــــــــــــــــــــــــــــــــــــــــــــــــــ
شايل نهر فوك العين يعرك شهامه وخوه
كلب اليشوفك عباس ينبض شجاعه وقوه
بالغيره عنوانك صــار للغيره تبقى القدوه
ولمثلك ايحير النــاس تارس حياتــه امروه
يالمنطي للعيله اهـواي ناظراً وعمرا
وللخيــم فـــيّ ومـــــاي ساتراً وسترا
ياعبــــــــــــــــاس يابا الفضــــــــــــل
ــــــــــــــــــــــــــــــــــــــــــــــــــــــــــــــــ
ام الوفـــه ام عبـــاس مشكوره والله اهوايه
نذرت سنينك لحسين زود وفعـــل وكفايـــه
وفت عهدها ابهل يوم وانطتنه هاي احجايـه
من يرفع الرايه حساس يحلى رفيف الرايـــه
ماتحلــى الا العبــاس رايـــةً وصبرا
وللخيــم فـــيّ ومــاي ساتراً وسترا
ياعبــــــــــــــــاس يابا الفضــــــــــــل
ــــــــــــــــــــــــــــــــــــــــــــــــــــــــــــــــ
الشاعـر : فيصل عاشــور المنصوري
ابوذيات نعي لأبالفضل العباس ع
يخويه الرايه طاحت مال اخينه
رحت والگيت جسمه مالـخـيـنه
ومـن مـهـره يزيـنب مال اخينه
بدون اچفوف طاح اعله الوطيه ..
تعـب من النزف حيلـه وگـل باه ـ قل حيله
اشيلـه اشلـون حيرني وگـلبـاه ـ
السهام ابظهر وبصدره وگـلبـاه
رمح نصين طـر گـلبه يخيه..
عله الناگه ودرت وجهي ورايه
شفت جود الكفل طايح ورايه
شني شوره بسبي زينب ورايه
اضل لويرضه اروح اني سبيه..
شني الحصلته من فرگاك وجناي
غير اسياط خويه وسطر وجناي
الشمر من وج خيمنه النوب وجناي
احترگت وليلى گام اطفي بيه.
الامام الحسين ع يخاطب ابا الفضل ع
خبر موتك وصلني وصار علماي
عگبك ياهو خويه يشيل علماي
نايم لا تـضــل عـباس عـالماي
بعـد سـاعـه تـدوس الخـيل بيه..
موتـك خله گـلبي بجـرح يدماي
هدم حيلي وشلـّل صابالي يدماي
طحـت بيدك عـلم عباس (يد ماي)
العـلم والمــاي مـارجـعـن الــيـه..
الشاعر عقيل الحسناوي
بين الخيام شكد صحت دخيلك
شوفتك ماي بس عطش رحيلك
--------
سكتة وسولفت نضراتي وياك
يل حتة شمسنة تغازل لواك
رايح للنهر والموت يتناك
بطعم الماي واكثر عندي طرواك
رايح بعيد وسكنة تندعيلك
شوفتك ماي بس عطش رحيلك
-------
يالوجهك نلقبة بسمة حسين
علة درب الشريعة انشبحت العين
سمعت الموت يركض ياخذ الزين
من عدها وبقيت اصفك ب الايدين
رايد تروح وابقة اشتكيلك
شوفتك ماي بس عطش رحيلك
--------
مو واحد اعيوني تشوفك هواي
ياماي التجيبة وضحكتك ماي
انسة الدنيا لمن تكعد وياي
اختك ودعتها وفكدت الراي
تدري بالكون مايصح مثيلك
شوفتك ماي بس عطش رحيلك
--------
بوجه حسين اقرة كل الاخبار
اذا شفتة تغير اشتعل نار
لزم ضهرة وصحتلة سولف شصار
ماكلي وركض للشاطي محتار
بخوف حسيت وصعبة اعتنيلك
شوفتك ماي بس عطش رحيلك
--------
رجع دم اعلة جفة ويلطم الراس
صاح ابجي يزينب راح عباس
اخيج مات يعني مات الاحساس
حكها اليوم من تضيك الانفاس
صعبة يلكون بالكلب بديلك
شوفتك ماي بس عطش رحيلك
--------
بعيدة المشرعة وماضل بعد حيل
بسيف المو عطر ذبحوك ياهيل
بعد ساعة لخيمنة توصل الخيل
بدخان وحرك استقبل الليل
شفت الرماد وفكرت اجيلك
شوفتك ماي بس عطش رحيلك
--------
الشاعر / سيد معتز الحسيني
أَصْحَابِ الصِّدِگْ..........وَارْبَابِ الْعِشِگْ
مُسْلِمْ..حَبِيبِ..وْعَابِسِ..وْجُونِ..وْزُهِيرْ
أَقْطَابِ الْوِفَه...................أَهْلِ الْمَعْرِفَه
شَوْذَبْ...سَعِيدِ...وْنَافِعِ....وْحُرِّ....وْبُرِيرْ
وَآنَه ادِّعِيهَه مْحَبِّتَكْ...وَاجِبْ أَكُونِ بْخِدْمِتَكْ...
يَا حُسِينْ...يَا حُسِينْ...
-----------------------
الْيِحِبْ مِنْ گَلْبَه مُو بَسْ يِحْچِي بِلْسَانَه
تِدَوْرَه شْمَا تِدَوْرَه هْنَانَه وِهْنَانَه
فَقَطْ يَمِّ الْيِحِبَّه تِلْگَه عِنْوَانَه
يِعِيشِ وْيَاهْ كِلْ أَفْرَاحَه وَاحْزَانَه
يِتْنَفَّسْ هَوَاهْ.............وِيْدَوِّرْ رِضَاهْ
مَا عِنْدَه بِالدِّنْيَه شُغُلْ عَنِّ الْحَبِيبْ
وِبْطَفْ كَرْبَلَه...............لِلْحُبْ قَافِلَه
نَامَتْ عَلَى حَرِّ الثَّرَى دُونِ الْغَرِيبْ
هَاذَه دَرِسْ مِنْ صُحْبِتَكْ...وَاجِبْ أَكُونِ بْخِدْمِتَكْ...
يَا حُسِينْ...يَا حُسِينْ...
-----------------------
(سَعِيدِ) اللِّي تِلَگَّه دُونَكِ سْهَامَكْ
مِنْ خِلْصَتْ صَلاتَكْ طَاحْ گِدَّامَكْ
يِگِلَّكْ يَا حَبِيبِي فِدْوَه لَاجْدَامَكْ
أَرُوحَنْ بَسْ تِرِدْ سَالِمْ عَلَى خْيَامَكْ
لَاچِنْ هَلْ وِفِيتْ.......يَحْسِينِ وْرِضِيتْ
لُو تِرْضَه خَلْ تِمْطُرْ عَلَى عْيُونِي سِهَامْ
يِحْلالِي بَعَدْ........................يِزْدَادِ الْعَدَدْ
مَا دَامَكِ انْتَه بْعَافِيَه وْخِيرِ وْسَلامْ
لُو بِيدِي شَايِلْ رَايِتَكْ...وَاجِبْ أَكُونِ بْخِدْمِتَكْ...
يَا حُسِينْ...يَا حُسِينْ...
-----------------------
أَنَا وْيَه النَّاسْ أَگُولِ حْسِينْ مَحْبُوبِي
لَاچِنْ تِخْتِلْفْ عَنْ دَرْبَكِ دْرُوبِي
أَذْنِبْ وِانْتَه لِتْطَّيِّحْهِنِ ذْنُوبِي
وْتِجِيكِ سْهَامْ يَا بُو الْيِمَّه مِنْ صُوبِي
أَرْمِيكِ شْكِثُرْ...وَارْجَعْ أَعْتِذُرْ
چِي إِنْتَه طَيِّبْ خَيِّرِ مْسَامِحْ كَرِيمْ
تْگِلِّي يَا هَلَه...عُذْرِي تِقْبَلَه
مَتْرِدْنِي عَنْ بَابَكْ يَبُو گَلْبِ الرَّحِيمْ
يَالْمَا تِعُوفِ لْعَافِتَكْ...وَاجِبْ أَكُونِ بْخِدْمِتَكْ...
يَا حُسِينْ...يَا حُسِينْ...
-----------------------
(حَبِيبِ) شْگَدْ بِچَالَكْ مِنْ خِلَصْ عُمْرَه
لِأَنْ هَجْرَكْ صَعُبْ يَا مُهْجَةِ الزَّهْرَه
وَانَا أَنْسَاكْ لَا يُومِينْ لَا عَشْرَه
الْهَجُرْ عِنْدِي وِسَافَه شُو سَهِلْ أَمْرَه
چَا يَمْتَه أَصِيرْ........عَبْدَكْ لِلْأَخِيرْ
وَاتْنُومَسِ وْأَتْهَنَّه يَحْسِينِ بْهَوَاكْ
وَادْعِيهَه بْهَيَامْ....مُو بَسْ بِالْكَلَامْ
يَا لَيْتَنِي يَا سَيِّدِي كُنْتُ مَعَاكْ
كُونَ انْلِچِمْ لِمْصِيبِتَكْ...وَاجِبْ أَكُونِ بْخِدْمِتَكْ...
يَا حُسِينْ...يَا حُسِينْ...
-----------------------
يَمَنْ ضَحِّيتْ لَجْلِي وْقَدَّمِتْ طِفْلَكْ
أَنَا خَجْلَانْ مَدْرِي شْقَدَّمِتْ لَجْلَكْ
عَجِيبَه بِالشَّمِسْ عَارِي يِظَلْ مِثْلَكْ
وَانَا بْدِنْيَايْ أَتْفَيَّه تَحَتْ ظِلَّكْ
چَمْ مَرَّه گِلِتْ...........يَا يُومَ الْتِفِتْ
عَايِشْ تَرَانِي مِلْتِهِي وِانْتَه تِصِيحْ
لِخْيَامِي تَعَالْ...........هَالدِّنْيَه زَوَالْ
مَاكُو أَهَمْ مِنْ جَنَّةِ حْسِينِ الذَّبِيحْ
رَايِدْنِي أَدْخِلْ جَنِّتَكْ...وَاجِبْ أَكُونِ بْخِدْمِتَكْ...
يَا حُسِينْ...يَا حُسِينْ...
-----------------------
#الأصحاب
#محرم_١٤٤٦هج
الشاعر حسن خنافر العاملي
قال مولانا امير المؤمنين علي ابن ابي طالب (ع)
«طريق الحق موحش لقلة سالكيه»
#محرم_2024
#ليلة_٥_محرم_١٤٤٦هـ
#ليلة_سفير_الحسين_ع
مسلم الحق دوم موحش هالطريق
طوعة بس وياك مـا ضلك صديق
**١
عـمـك الـكــــرار وضـح فــي مقال
كلـمـة الحـق هي التبــين الــرجال
اخــــــذ من الكوفة يا مسلم مثال
تـجـمـعـــو الاف بــس بــــلا فعال
لوحــــــدك ضليت سـاعات النزال
طوعـــــة بس وياك ضلت للقتال
هــــي للحق هـــــم للباطل رفيـق
**٢
ناس اهــل شيطان والـيـهـا الكفر
عـافــت الاسلام ردت لـــــلـحــفر
لان حــق الناس مـن عـنــدك تفر
لـــــــوحدك عافوك ما ضل لو نفر
طوعه بس الحازت اوسام الضفر
خذت عشرة و هـم ناتـجهم صـفر
هـذا حـال اليمسك بـركـن الوثيق
**٣
لوحــــدك ضليت مـــا عـندك دليل
يالـغـــــريب بـدار غربة و دنيا ليل
اباب طوعة وكفت دمـعاتك تسيل
انطيني ماي و الج يتسجل جميل
جزاج عند المصطفى وربنه الجليل
انـــه مسلم كـلـــــت والوالد عقيل
انـــــه مسلم والـــدي لحيدر شقيق
***٤
كالــت اهلاً بـيــك يا طيب الحسب
يـابـن اخي المرتضى و افضل نسب
ياللي علمه الــكــون منكـم مكتسب
اليحبكـم نـجـح و الضدكــــم رسب
الكوفة اهـــــل خذلان لا مـا تـنسب
طوعة بــــس وياك بـاجر تـنـحسب
ناصرة ويـــــاك فـي وقـت المضيق
*٥
انــته نور و حاوطك جـيش الظلام
ابـحـجـر يرمـيــك و بـــنـار و سهام
و الـي جـان ويـاك اخـلـف بـالـكـلام
صار ضــدك و استل اعليك الحسام
طوعة بـس المـيزت مـعـنى السلام
بطاسه مالت ماي حصلت عـالوسام
او وســـام الشرف بـس الهـا يليق
***٦
الطبــرت الكرار في وضــع السجود
عادة عــد هـالناس تخـلــف بالوعود
حــــــاوطــوك بغدر و بغـل و حـقود
نسو انـتـه الحـيد ابــن ذيـج الأسود
طوعة بس تشجعك وسط الحـشود
گـــــــوم بـيـن يـبـن سادات الوجود
ياهو انــتـه و ياهو مرجانه الطليـق
***٧
مـــو جديد الغدر من ذيـــج السنين
ابـتــدى من الباب و ضلوع و جنين
التطلب بثارات من بـــدر و حـــنين
اليوم غـــدرو بـــيك باجر بالحسين
ربـع وي حسين و اخــــوان و بـنين
انته طوعة وياك بـــس هي المعين
صدگ وكفــت رغم كل هذا النعيق
***٨
نــــــاس وي الـباطل اعـالحق تجور
بلا حمية تعـيش مـا بــــــيها الغيور
جـثـتـك يالحــيد من فــوگ القصور
انرمـــــــــــت للگاع ضــل دمها يفور
جــثـــتــك وي هـــاني بالكوفة تدور
بـالـحـبـل يـنـجـرن ابــدال الـــــقبور
بدال دفنـك تنسحب في كل طريق
***
كلمات: عباس شريف الخفاجي