7626
خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
لاستشهاد الامام علي بن الحسين السجاد عليه السلام (وزن عگيلي )
ذل اليردون ايذلونه
يلرايد تعرف مضمونه
★★★★★
يلرايد تعرف أخباره
معروفه ومشهوده آثاره
بس الله اليعرف اسراره
وأملاك الكون يعرفونه
يلرايد تعرف مضمونه
★★★★★
من طه ومن طبع الكوثر
هذا النور ايعود الحيدر
ومن أحسين أخبار ومصدر
سجاد العتره ايسمونه
يلرايد تعرف مضمونه
★★★★★
بلطف صح ذبحوا خِوَّانَه
وذبح حسين الزاد أحزانه
أرعبهم لاچن عدوانه
وماتطبگ علذل أجفونه
يلرايد تعرف مضمونه
★★★★★
فگد الحرگه وليل مصابه
وفگد حسين يزيد صوابه
حَيَّرَهَا الگوم السَلَّابَه
عالي ومايهتز يدرونه
يلرايد تعرف مضمونه
★★★★★
لحد الموت بآخر لحظه
الفعل العايل أكد رفضه
وعن فعل الظالم مايرضه
رغم السم أمغيَّر لَوَنَه
يلرايد تعرف مضمونه
★★★★★
بصولاته اعلومه المعروفه
صارت ساحتهم مكشوفه
من يرفع للباري أچفوفه
وينزل للطف دمع اعيونه
يلرايد تعرف مضمونه
الشاعر حسن لعيبي الحريشاوي
قصيدة بحق السجاد عليه السلام
نجري الدمع عالسجاد جد وابو والاحفاد
من يمر يوم ابن حسين عـــن الحزن تحچي العين
-------------------------------
اعله فطرتنة نحب حسين واولادة
وتعلمــنة من اهلنة نخدم السادة
النبي ســيد علينة هوة واحفادة
سادتنــــة وأئمتنة ولنة القادة
علمني ابوي وجدي للهادي اوفي بعهدي
اعله ابنة نظل حزنـــاين عـــن الحزن تحچي العين
--------------------------------
رظعنة من صــدر امنة محبتهم
وهلنة علمونة شـــلون خدمتهم
نحزن من تمر بينة مـــصيبتهم
اهل بيت النبي والدنيا خانتهم
زين العباد الليلة دمع الحزن يجريلة
لمصابة حزنان الدين عن الحزن تحچي العين
---------------------------------
صبر صَبر وتعدة كل وصف صبرة
شاف اشـــلون ابية منكَطع نحرة
وعمة ابلا جفـوف ومرمي عالغبرة
وشاف عظيـدة الاكبر جثة متوذرة
وبعينة شاف القاسم أمخلي عرسة ونايم
بالدمع كَظاهه ســــنين عن الحزن تحچي العين
--------------_---------------------
ما بطل ونينة ولا دمـع عينة
وتعلمنة الحزن من حزنة والينة
نريد انساعد المظلوم بــونينة
نقيم ابكل سنة وننصب تعـازينة
نقيم العزة للمظلوم وللحشر هالعادة ادوم
يومك علي ماناسيـــن عـــن الحزن تحجي العين
------------------------------
شاف من الزمان امصايب واهوال
وحمل من المصايب والقهر اشكال
حزن البيه ماتكَدر تحمــلة جبال
الم حزنه شديد ايشيب الاطـــفال
خالد يظل ما ننساه بكل سنة نجدد ذكراه
شما انقدم احنة مقصرين عن الحزن تحچي العين
-----------------------------------------
لبس ثوب الحزن وتحمل الآهات
شكثر كَلبة حمل من دنيته شوغات
ليل انهار عينة تسچب الدمعــات
مجرة دموع صار ابوجهه مرسومات
دموعة تصب ليل انهار بخدودة حفرت انهار
حزن الكلب عالطيـــبين عـــن الحزن تحچي العين
-------------------------------------------
اسالكم الدعاء
رائد الاسدي
استشهاد الامام السجاد ع
يالباقر وصيه اوصيك / لون غمضّت هاي العين
طش فوگي يبويه تراب / من گبر الغريب حسين
1
عشت والعايش بجرحه دمعته تنومس بعينه
والمثلي يشوف امصاب يدّور عل اجل وينه
انه وعالم طفوفي ذاك عله الونه تخاوينه
بيه كربله شخلت
روحي امن الحزن ملت
منيتي هل مسه حلت
يبويه موتي اتمناه / لاوين الصبر لا وين
2
مات الحيل وعيوني تموت اوياي احسنّها
حياتي بلا بچي اعله حسين يبويه ما اريدنها
بقت عندك وصيتي هاي بوفاتي ارد اعيشنها
الگبر حسين بالعبره
تعنه وخاطرك كسره
وجيب اتراب من گبره
كون اتراب بي دمّه / وتطشه اعليه كونك زين
3
علامه اعله الگبر خليت يبويه لمن ادفنته
نجيع الدم لون شفته نحره اهنانه وسدته
وتلگه اعله الگبر دمعات تره هذا الدمع لخته
حين امن السبي جينه
اعتنينه الگبر والينه
شكثر دمعات هلينه
اثر دمعات زينب هاي / تراها اعله الگبر للحين
4
حين اتگوم عن حسين تعنه الكافل الحره
وحين اتشوف جود اعليه انه حدره ادفنت صدره
حظن جوده بلايه چفوف او ودع عيليته بنظره
بس بعين عاينها
وحده السهم حاظنها
وزينب من سمع ونها
گل حسين خليني / بمچاني وغطي هالچفين
5
يبني للمخيم روح ولو ما تلگه بويه اخيام
ولكن عالترب تلگه رماد وفوگه كثره اسهام
وحبال اعله الرمال تشوف بيها اتچتفت ايتام
ما ظنك نسيت الصار
تچتفنه زغار اكبار
ويخطفنه لهيب النار
مشينه بنوگ صوب الشام / سبايه ابيا ذنب ماشين
6
بس اخر نفس هذا وبعدها يختفي صوتي
اسم حسين الفظنّه وريدن يعتني موتي
سلام اعله الذبيح اوصيك تكتب فوگ تابوتي
بعد ما غمظت عيني
بتراب حسين غطيني
اريدن هيچي تچفيني
وقره ازيارة المضلوم / بعد الغسل والتچفين
****
الشاعر اياد الديراوي
ابرحيلك.......عجب ونتك خفيه
ابرحيلك........اجت تنعه الزجيه
كل ونه سهام
من نار الخيام
*******
بسمك .... سبحت انفاسي وبحبك تشهد
ياثاني..... علي هز العرش اسمك تخلد
يازين..... العباد وياك ناري شلون تبرد
عايش..... بالگلب ومصيبتك عاشر تجدد
بجروحك......الوحي متعني بيتك
بجروحك.......يگلك حسره جيتك
بدموعك كلام
من نار الخيام
*******
عليك الگيد صلى بدمعتك ويعاتب الروح
اشگد عمرك اجيت الكربله والعالم النوح
شفت حسين نحره من الگفه ياويلي مذبوح
عليل وعلتك فوك الهزل تحچيلك
اجروح
ابدموعك........يبو الباقر عجيبه
ابدموعك.....شفت زينب غريبه
محروم المنام
من نار الخيام
********
بدموعي.... رسمتك سيدي حسره ومناحه
يم زين العباد..... ودمعتي تكتب جراحه
من كثر المصايب والهضم ماخذ مساحه
چن.... سباح كلبك ينشلع لو طر صباحه
عجيبه......نشوف اشكد نحيبك
عجيبه.......شفت جثت حبيبك
نوح بلا ختام
من نار الخيام
*******
حتى الليل يتفگد شعورك وانت غالي
ديوان المدامع والحزن هالليله خالي
چم نار الشفتهه اتوجرت سود الليالي
تنظر عمتك عالناگه ماظل عدهه والي
شفتهه.....على أطراف المخيم
شفتهه........تعاين لوحة الدم
حاطوها اللئام
من نار الخيام
********
عينك ماخذت نوم وأبد لاساعه
متنام
كل ساعه وتفز زينب مشت مسبيه لشام
مذبوحه الفواطم بالعطش محتاره الايتام
لسه بخيمتك من شاهدت حرگوهه ظلام
ابعذابك.....جرح محترگه خيمه
ابعذابك.....تنوح اشگد هضيمه
مذبوح الحمام
من نار الخيام
********
تمت بعون الله
خادمكم...... يوسف الفتلاوي
الامام زين العابدين عليه السلام
.
.
بالطف احسن اهواي ، ميت كون عالماي
تمنيت المنيه ، بيوم الغاضريه
.
.
صح الراح مني بعد شيرجعه
هذاك اليوم ضاكت بيه الوسعه
وي حسين ابوي الما نشف دمعه
تشيط الروح مني توصل السبعه
عمر خلصته الام ، جفني ماهده ونام
الله يدري بيه ، بيوم الغاضريه
.
.
بـالـدنيه يعالم جـا بعد شلي
بفراك العزير و صحبتي وخلي
الموت امن الحياة هواي احسلي
انا املاك السماء بـدموم يبجلي
دنيه خلصت هموم ، اذا كل لحظه ملجوم
من انضر رقيه ، بيوم الغاضريه
.
.
مصايب كربله ما رحمن ابحالي
اخـذن جـم عزيز العل كلب غالي
عكبهم بس حـزن والـنـوح يصفالي
ابد ما ساعه يصفه امن الحزن بالي
مصايب شافت العين ، لمن الطاح الحسين
يمه يالزجيه. ، بيوم الغاضريه
.
.
شفت زينب لمن عالناكه ركبوها
وشفتها من سرو بيها ويشتموها
بكلام المو عذب عمتي يسمعوها
اذا طفله بجت بالسوط ضربوها
كلبي شكد حمل ضيم ، همي يعادل الغيم
ضيم المر عليه. ، بيوم الغاضريه
.
.
زين وقاومت ما خمدت انفاسي
من شفت الرمح من شال عباسي
هذي قصتي الراحو اعـز ناسي
انه السجاد شامخ مايطخ راسي
من راحت اسيره ، على الناكه الاميره
اخذوها سبيه ، بيوم الغاضريه
.
.
حسن صالح العيساوي
.
وفايه .. منطينك عهد
والرايه.. ماتنزل إبد
**
جينه نتوافد الك بعهودنه
نغلق البوب وتركنه بيوتنه
بأبِي أنْتَ اْو اُمِّي ونفسي وأموالي
انته ياأول ذبيح هوايه شاغل بالي
من طحت مو للأرض خلاك ربك عالي
ياأيه .. بالسجده وسِجد
والرايه.. ماتنزل إبد
**
يا تجاره منين ماجيلك ربح
يامُطر ومفيض بخيره الفِلح
واحد وسبعين بالطف نصرتك
بكد نجوم الليل هسه الگصدتك
جينه مشايه وتنومس رايتك
مشايه .. صرنه أكبر عدد
والرايه.. ماتنزل إبد
**
هالمواكب چنها بطفوفك خيم
تحترگ بالشوگ يحسين الخدم
عدنه ماي الموكب اغله أمن الذهب
من رحيق الجنه هنياله الشرب
الچاي بيه قُدسية لأسمك انتسب
بفيايه ... هنياله الگعد
والرايه.. ماتنزل إبد
**
الـ مشالك بيدك تعبره السراط
من سُليمان النبي وارث بساط
انته يا وارث جميع الأنبياء
انته إلي اتخدمك أملاك السماء
الدنيه ضلمه وإنزلك ربك ضياء
ويايه .. اشوفنك مدد
والرايه.. ماتنزل إبد
**
إذن آذان العشگ حان النشور
الف حجه والف عمره لليزور
اليزورك چنه عارج للسمه
ياخذ امراده وتبشره فاطمه
المايشوف الشمس بعيونه العمه
بدرايه .. هالكلمه وبعد
والرايه.. ماتنزل إبد
**
علي محسن الفرطوسي
يا صحيفة وسجده وارسالة حگوگ
وياشعاير مصرع او سبي اعله نوگ
وانته حبل الله المتين
ياعلي بن الحسين
@@@
كلمة الله وباب علمه ونور لسلام
ودعوة مجروحه اعله چف اگيود ليتام
انته اول كربلائي مأسس اعلام
ابجامعه شال اعله چتفه اتهد لعظام
…
انته اول دمعه عالمصرع تطيح
ياجريح ابونّته احيى الذبيح
مابطل صدرك ونين
ياعلي بن الحسين
@@@
يشهد لحربك يفارس يوم لطفوف
انته والعباس عمك باس معروف
والله راد اطيح مثخن بين لزحوف
وعلتك چانت جروح ابضرب لسيوف
…
واليظن غير الحچي بالله شيظن
مخطي من ظن علتك من البطن
يا بن لنزع والبطين
ياعلي بن الحسين
@@@
الله شاء اتكون حربك گيد واغلال
وجامعه اتهد ابثگلها راسي لجبال
من بعد عباس كون اتصير كفال
وتبري لضعون ابگيود اتجرها لحبال
…
اعلنت ثوره عظيمه عالطغات
بس على هزل تشيل امحجبات
ورايتك راس ابوتين
ياعلي بن الحسين
@@@
ابدواووين الاعادي موقفك چان
ثابت وكل طاغي وجهه يگلب الوان
ولو خطبت الكون يفتح ليك لاذان
ومنطقگ اصبح عليهم سيف بلسان
…
الماعرف قدرك عرف من خطبتك
ذللت روس الاعادي ابكلمتك
منأسر عالي الجبين
ياعلي بن الحسين
@@@
يلي بس يبچي يضربوا راسه برماح
وبالاسر متنك جرح من فوگ لجراح
معرفوا انك اسير وطار بجناح
وصرت لبواب الشعاير تالي مفتاح
…
ابدمعتك يبقى الحسين وكربلاء
ويبقه للعاشر ابد حزن وعزاء
الطف لعيونك مدين
ياعلي بن الحسين
@@@
ابكل كتر سويت مأتم عالغريبه
وباقي بدموعك نزف شيب الخضيبه
يلي خلد عاشر ابصرخة نحيبه
الكفر دس سمه يمك مو غريبه
…
لمن ابنوحك عله حس الشهيد
لازم ايسمك غدر طاغي عنيد
ويقتلك سم اللعين
ياعلي بن الحسين
@@@
اسرك الچان ابحكم شمر وخولّه
باقي ظلمه اعليك وابگبرك ادله
ابن مروان ابزمنه لو تجله
يكون ذاك الگبرك المهدوم خله
…
يومك ابسمه وهدم گبرك فجيع
ويامته ترجع مبانيها البقيع
وخضره نبني گبتين
ياعلي بن الحسين
@@@
علي أحمد الحمود
٢٨-٧-٢٠٢٤
شهادة السجاد ع
سلام علیکم
مدیر قناة تجمع الزهراء ع العاشورائي
ممكن مراسلت مدير دعم شكرا لكم
@ansar_313_m
قصيدة الإمام السجاد عليه السلام
العنوان /#جرح_كلش_چبير
جرح كلش جبير. مشه السجاد اسير
وتتلفت عيونه
بس مايخلونه ......يودع حسين
ويباري عماته
يتلفت عليهن........ يدير العين
جرح كلش جبير
ن___
عگب ذاك الضعن وحمول أهلنه اجواد
مشه بگيد السلاسل منحني السجاد
گبل جانت دلال وهسه بس ارماد
وشيعيد الزمن والجَمعه ماتنعاد
عگب ذاك الدلال
جدم يچوي الرمال
والهم شكه حواله
وحسيني ينعاله ....جرح ويعيل
من يجرع العاشر
حافر عله الحافر.... تدوس الخيل
ن____
مشه وقائد ضعنها مبينه ريشاته
وعلي السجاد يمشي بصفه عماته
وگرب ذاك الوداع محزمة ساعاته
وعينه اعله الجثث وتلالي دمعاته
وگرب وكت الوداع
الدمع صاير متاع
وتوَدعه احبابة
وتتنگع اثيابة... دمع ويطيح
بالصحره مدفونه
لا تسأل شلونه... جواب الريح
ن___
عليل ويچهب الخيل اعله ابوه ادوس
ويشوف اعله الرماح اتعلگت بس روس
الله يعين كلبه من الحزن متروس
وحقدهم من علي وليهسه ظل مغروس
بوسط هاي الرماح
منو يظل مستراح
وعدوانه معروفه
تكرهنه بالكوفه... منهد حيدر
وضلوعه مطحونه
كلهم يسحگونه... ابو الأكبر
ن___
حرگو خيمته وبيده السلاسل حط
وبقت عينه تباري الواگع اعله الشط
وبقت روحه ترف يم ذاك المكمط
واليعطش يِگلهم ماي يتورط
النهر يمهم بقة.
منو البيهم ثقه
يعطش يذبحونه
وعمداً يمنعونه... لذيذ الماي
مسبيه نسوانه
متكتله خوانه ...يتيهه الرأي
ن_
وگع من شاف اخوته من النحر تنحز
بصدر حسين حافر خيلهم غرز
المثلث يحطه بگلبة من ركز
عليل وگلبه يم حسين ماينعز
والمثلث يصيب
زرف گلب الحبيب
واتحمل اوداعه
ياربي كل ساعه.... تروح الروح
واجروحه ملچومه
من عملت الحومه ...يظل ينوح
#خادم_رقية_عليها_السلام
#الشاعر_مهند_الدريساوي
#الامام_السجاد_ع
يا منهال ... لو شفت ذيچ المصيبة
يا منهال ... عالهزل عمتي سليبة
يا منهال ... ابلا ولي ظلت غريبة
~~
يالردت تسأل علية اشلوني من ذاك السفر
گمنة نفتر ديرة ديرة من محرم حد صفر
وماكو واحد يفزعلنة اولا گلب النة انكسر
والرسول اموصي بينة من علي للمنتظر
بينة اشگال ... إي رسول الله وحبيبة
يا منهال ...... عالهزل عمتي سليبة
يا منهال ....... ابلا ولي ظلت غريبة
~~~
[كيفَ أمسَيتُم] تِگلي يامسية گلي تقصد
وهية مو وحدة المصايب بالله يامنهال شنّعد
نملك احنة الدنية كلها وبالخرابة صرنة نگعد
وليزيد انروح أسرى بروس اهلنا انروح ونرد
بگيد احبال ... رحنة للطاغي عجيبة
يا منهال ...... عالهزل عمتي سليبة
يا منهال ....... ابلا ولي ظلت غريبة
~~~
تدري يا منهال تدري بسلسلة شدو إدية
وكل خواتي چتفوهن بالحبل سكنة ورُقية
وزينب ام كُلثوم يمها گيدو چفهن سوية
وعفنة كل الأهل صرعة والجثث كلهن رمية
فوگ ارمال ... جثةت احسيني تريبة
يا منهال ...... عالهزل عمتي سليبة
يا منهال ....... ابلا ولي ظلت غريبة
~~~
جدنة هوة النبي الخاتم والعرب مفتخرة بينة
و تفتخر منهم مُحمد أهل مكة والمدينة
ما رعو حق اهل بيتة وللسبي چتفو إدينة
قَتّلّوّنّة او شَرّدّوّنّة وراس ابونة امعلگّينّة
برمحة انشال ... وشيبتّة ابّدَمّة خضيبة
يا منهال ....... عالهزل عمتي سليبة
يا منهال ........ ابلا ولي ظلت غريبة
~~~~
چم مسية البيها مَيّت دهري ماخذ كلشي مني
ومّنَّهّد ذيچ المصيبة ظهري بعدة لهسة محني
الشيب ماهو لكبر عمري هالمصايب شّيّبَنّي
عمري طف اوشام خَلَّص هنّة ذني التعبَنّي
بذاك الحال ... ينسمع گلبي نحيبة
يا منهال ... عالهزل عمتي سليبة
يا منهال ... ابلا ولي ظلت غريبة
~~~
أحمد عباس الحساني
(الامام السجاد ع)
لمولانا علي بن الحسين السجاد ( صلوات الله عليه )
جاني الموت ... يـاخـذ روحي
وابلا صوت ... اتصيح اجروحي
آنه الميت عمره وحيله
من عاشور وسبي العيله
اتصيح اجروحي~~~~~~~
آنه الگبل مـوتـه اشكثـر ميت نوح
آنه العاش گلبه اعله الرمح مجروح
وياروح التضـل عگـب الأبـو يـاروح
من شفت الخيول ادوس عالمذبوح
بويه حسين ... اتصيح دموعي
كـون البين ... رض اضلوعي
ماخذ روحي الطف وخيله
من عاشور وسبي العيله
اتصيح اجروحي~~~~~~~
عطاشه اهلي گضو منحور يم منحور
الدلال اوي الخيم صارن رماد ابخور
و فر ضعن الحسين وبالبراري يدور
ضامي ومحترگ وامجرح ومكسور
بالبر تاه ... الچان امدلل
وقصة الآه ... يرويها التل
وللكـافل عين امداليله
من عاشور وسبي العيله
اتصيح اجروحي~~~~~~~
انسبيت آنه وعيال حسين والحادي
يصيح أجرح ( علي ) هاليوم والهادي
مشينه وعفنه اهلنه اجساد بالوادي
( ويلاه عالحسين ) ادموعنه تنادي
شدهة بال ... لجرح افراگه
اطيح اطفال ... منّ عالناگه
گيد وهزله وعثره ومِيله
من عاشور وسبي العيله
اتصيح اجروحي~~~~~~~
گبل قصر الأماره وطبت الديوان
فزعت چم عشيره وأخذت النسوان
وشفت عمتي بدمعها ولوعة الحيران
لا فـزعت هـواشم لا أجـت خـوّان
ابلا حمّاي ... بهاي الديره
وشح الماي ... بوجه الغِيره
بغضاً كلشي بحامي ادخيله
من عاشور وسبي العيله
اتصيح اجروحي~~~~~~~
كـل اجـروح گـلب المنسبي المحتام
كلها اضعاف صارت من دخلنه الشام
الفرح صوبين چان بملگه ضعن ايتام
وذرية محمد ويل صارت بالخرابه تنام
بهاي الگاع ... ماتت طفله
هَم ووداع ... وشوگ وعِله
ماتت عالراس وتشكيله
من عاشور وسبي العيله
اتصيح اجروحي~~~~~~~
عشتهن وحده وحده والدموع اشهود
اعله هامة حيلي نزلت ضربة العامود
وشضمد يـا جرح حته التنوح اتهود
صبرت بـ( ياعلي ) عِين الگضاها ينود
الموت الجاي ... بيه شيلگه ؟
اجروح اهواي ... بعازة ملگه
راحه الموت الروحه اعليله
مـن عاشور وسبي العيله
اتصيح اجروحي~~~~~~~
سجاد الگريزي
للأمام السجاد ع
........
هذه انه المشه من دون روحه
وانه الما غفه من كد جروحه
اصيح ياهلي لحكو عليه
شوفو فراكم شمسوي بيه
عليل وليله مل من كثر نوحه
..........
يالمخليني بين الاه والويل
تره من فراكم ماظل بعد حيل
شمع ودموع الكم تارس اليل
ورتلهه البواجي ويـــــاه ترتيل
الحركه بكلبي مادري شكبرهه
الروح بلا اهـــــل شلهه بعمرهه
عليل وليله مل من كثر نوحه
........
مصايب كربله كسرتلي ضهري
ومثل عمر الدمع خلتلي عمري
مالاح الشمس فديوم فجري
بس الله بحصرتي وحالي يدري
كل مغرب يجي ويمر عليه
يلجم كلبي جرح الغاضريه
عليل وليله مل من كثر نوحه
.........
وره لحدي النوايب رافكتني
اعتن بالنفس والموت عتني
بعده ازرك تره من سوط متني
من درب السبي ذاك الكسرني
نخر خدي الدمع من البجيته
انه الروحه من سنين ميته
عليل وليله من كثر نوحه
.........
صعب درب المشيته ويسروني
الشماته شكد شماته عيروني
مثل ولية كفر بي من ولوني
انه وعمتي بحبل بي جتفوني
دخلت لمجلس ابن زياد كوه
ومابين الحبل والمستحه اتلوه
..........
الشاعر مصطفى الحسني
أرحم حالي (زينب والسجاد)
ارحم حالي لاتبجي اهواي ارحم حالك
ارحم حالي من اتون اتـــــون اعيالك
ارحم حالي ياعمه ادري الشاده بالك
ارحم حالي ارحم حالي
***
يعمه اشكَد بجيت وعليك اتعذبيت
زينب آنه وكلبي اعليك ياذيني اهواي الياذيك
بس انته الله امخليك يعمه يعمه
يبن الغالي يالوجهك عمــــه ايسليني
يبن الغالي يالتشبه نظرات احسيني
يبن الغالي آهاتك كلـــــــش تاذيني
أرحم حالي أرحم حالي
***
جرح كلبك جبير وحزن روحك جثير
يالسجاد اتغـــــــير لونك اهواي اتنوح ارحمه اعيونك
شيبك واصل حتى اجفونك اشوفه اشوفه
عمه اعيونك تنظـــر للمذبــــوح وتحجي
عمه اعيونك اتسولف وي الراس وتبجي
عمه اعيونك ياحيره اتسولفلــــه وتشجي
أرحم حالي أرحم حالي
***
تشاركنه الجروح اريــــــدك لاتروح
خاف اتموت الكثر اجروحك الخاطر زينب ارحم روحك
نشف عينك بطل نوحك اريدك اريدك
راحت اهلي انت الباقـــي الزينب عمه
راحت اهلي وعطر الغالي بيك اشتمه
راحت اهلي كلبي بس انته الظل يمه
أرحم حالي أرحم حالي
***
صعب درب اليسر مصايبنــــــــــه اشكثر
شد حيلك لاتعوف ايتامي من اتروح اتزيد آلامي
امشيه اعليك انفاس الضامي حبيبك حبيبك
يابو الباقر ياخيمه وفي العماتك
يابو الباقر ارحم دمعات ابنياتك
يابو الباقر حيل اتبجينه بدمعاتك
أرحم حالي أرحم حالي
***
آنه اهمومي ثكال بجت ليها الجمال
مكسورة خاطر تدريني غير جامنهو ايسليني
ميته بيوم الطف اسنيني سبيه سبيه
شيب راسي ودمعي امبلل ظهر الناكَه
شيب راسي لأعزازي الراحو مشتاكَه
شيب راسي مرمرني الغايب وفراكَه
أرحم حالي أرحم حالي
***
ابو علي الركابي
يابو الباقر يابو الباقر
عينك لينـــــه يابو الباقر
***
بجـــاه آلام البمـــــتونك
وبالدمع المابين اجفونك
اسمع دعوات اليدعونك
بالمجلس نلطــــم نادينه
***
يالماميت حـــي وخالـــد
نعلم حاضــر انته وشاهد
كل خادم تســمع وشرايد
بالنيه اشـــــنطلب تدرينه
***
اقبل دعوتنـــــه بأيامـــــك
سجلنه بدفــــــتر خدامـــك
نحي امصابك نحي آلامك
واجفو الســــــــائل مدينه
***
بجاه اعزازك يابـــو الباقر
انمشي اعليك الداسه الحافر
والظلت مكســــورة خاطر
بخيمتكـــــــــم نخدم خلينه
***
انحلفك بالراحـــت مسبيه
ام عون الحـره العلـــويه
اختم هالعمــــــــر وتاليه
بلخدمه اريدك تهــــدينه
***
ياهنياله ومكــــبر حــــظه
اليلزم هاي النعمه ويحضه
وانته تبارك بيـــه وترضه
نترجـاك انته ادليــــــــــنه
***
ابو علي الركابي
.... استشهاد الامام السجاد ع......
وحشه الدنيه بويــه ابدونك
هاي الليلـــه الكَــه اعيونك
عطشانه الروح ابلياك راحل يابويه الملكَاك
هاي الليله هاي الليله
***
يبو السجاد سجادك عطش كَــــلبه
وصارت دنيتي يابويه جن غربه
صعبه اهواي والله حيرتي صعبه
ظلت ذكرى اليـه اهدومك وتربه
ضايك صدري جــي ماشمك
شالت روحــي ورادت يــمك
دوم اكبالي وما انساك راحل يابويه الملكَاك
هاي الليله هاي الليله
***
ليلي امساهره واعيوني ماتغفه
اشلون اينام بويه الحالته كــلفه
بيه اجروح ماطابــت ولاتشفه
وكَلبي امكطع ولاماوكف نزفه
يافــي عمري وياعافـــيتي
خنكَه انفاسي وماتت ريتي
كلبي المتوجع ناداك راحل يابويه الملكَاك
هاي الليله هاي الليله
***
كلشي اظلم اشوفه صار بعيوني
من كثر البجي مانشــفن اجفوني
بفاتحتي عليك اهــــواي لاموني
وجثير النوح والونه يســـــموني
اعليك ادموعي لامانشـــفن
اتزيد اجروحي كلمــا اونن
حلم العاشك يتمناك راحل يابويه الملكَاك
هاي الليله هاي الليله
***
أنه الميت يبويه من غبت عني
ولالحظه فتــــــر لوبطلت وني
المنايا اســــهام بالدلال صـابني
الوجن بالمواجع حــــيل لجمني
يالماترجــع غمضت عيني
رايد شوفك واتلاكَـــــيني
يروى العطشان بطرواك راحل يابويه الملكَاك
هاي الليله هاي الليله
***
وي وني تحن اونــــــــــت الناكَه
الرايح منه غالـــي ايشيب افراكَه
الله اليدري روحي اشكثر مشتاكَه
عطشانه يبويــــــــه اليوم الملاكَه
ماشي وراحل هاي الساعه
وعمري الليله حان اوداعه
عايف اهلي وجاي اوياك راحل يابويه الملكَاك
هاي الليله هاي الليله
***
ابو علي الركابي
الامام السجاد عليه السلام
القصيدة : على حسين وعلى خواني
محرم الحرام
▫️▪️▫️▪️▫️▪️
الحزن اذاني خلاني __ اعيشن طفي من ثاني
عشـــت لوعـــات وسحـــك جمـــرات
على حسيـــن وعلى خوانـــي
ــــــــــــــــــــــــــــــــــــــــــــــــــــــــــــــــ
عشت طــف المصيبه بطيحت الوليان
وشفت بيه المواجع واليضل عطشان
وقـــرآن اعلى رمحـــه ايرتــل ابقرآن
مـــريض الغاضريـــه والمــرض نيشان
مريض وحيلي متهدم __ على البلخيل متهشم
علـــي السجـــاد بحـــرك وارمـــاد
على حسيـــن وعلى خوانـــي
ــــــــــــــــــــــــــــــــــــــــــــــــــــــــــــــــ
اشـــد موقـــف يمر وخنّكتي ابذكـــره
ومنظـــر خلـــه بيه الكســـره والعصره
امن اشوفن والدي واكـــع على الغبره
وشمر فـــوك الصدر كاعـــد يحز نحره
تمنيت اشكثر موتـــي __ وتمنيته قبل خوتـــي
كســـر وجـــروح على المذبـــوح
على حسيـــن وعلى خوانـــي
ــــــــــــــــــــــــــــــــــــــــــــــــــــــــــــــــ
السجــاد انه والشفته اخـــذ روحـــي
ومن طـــف المصيبه كلهن اجروحـــي
على الضلوا عطاشه يانفـــس نوحـــي
وبسرار الدمـــع فـــوك الجرح بوحـــي
من دخان الخيم نشتم __ هوئ والشارد اتشتم
بـــدرب شمـــات اجـــر ونـــات
على حسيـــن وعلى خوانـــي
ــــــــــــــــــــــــــــــــــــــــــــــــــــــــــــــــ
اموتن هســـه هوه انه المتت بالطف
وجـــرح الفركــه بالـــدلال ما انصف
وعمري من بعد ذيـــج المصايب جف
نطبع بيه الحزن مالحضه عنـــي خف
من حزن الغريبه انحب __ بكل لحظة هضم زينب
اجانـــي الليـــل واشـــوف الخيل
على حسيـــن وعلى خوانـــي
ــــــــــــــــــــــــــــــــــــــــــــــــــــــــــــــــ
اليشوف على الهزل عمته اشتضنه ايعيش
اليعثـــر بالـجثث وناتـــه تصـــرخ ليش
اليضربونه ويشوف اخيامه عند الجيش
كلهن بالكلـــب ماضــل جـــرح بالريش
شفت اللوعه والجمره __ شفت الخيمه مستعره
بصفـــوف النـــاس برمـــح عباس
على حسيـــن وعلى خوانـــي
ــــــــــــــــــــــــــــــــــــــــــــــــــــــــــــــــ
الشاعـر : فيصل عاشــور المنصوري
قصيدة للإمام السجاد عليه السلام الإمام الباقر عليه السلام ينعى والده.....
انـــحب واجري عيني وما اگطع ونيني
روحي اعله الابو تذوب رايح ما يجيني
======================
انه الفاگد وحگي من انوحن حيل
عيني اعله الابو ما تســتراح الليل
انه الباقــــر وگلبي علــــيك اعليل
بوية ابشوفتك چانت همومي اتزيل
انسى غيابك شلون ساكن وسط العيون
بوية بغيـــبتك دوم اتچوة بحــــنيني
__
الفاگدلة ابو ايحــــس ابالم گلبي
اطـــــيني الصبر عالفـــرگة يا ربي
ياعيني اعله ابوي اجري ودمع صبي
عيـــني اعله الدرب ظلت الك تربي
نايم حدر التراب عن عيني الابو غاب
آه ياوكت الغروب ياخذ كل سنيني
----------------------------------------------
شمعة واحــــتركَ يا بوية بغيابك
ياخـــذني الحنيـــن واوگف ابابك
ارسم صورتك وانحب على مصابك
وأكثر احتركَ من تنـــشد احبابك
تبچي وتنشد عليك احبابك تناديك
نعقد مجلس انياح انه وكل بنيني
----------------------------------------
راح الچان الي ذخر والي تچوة
چان ابكل حياتي والدي سلوة
المفاركَ ابو انياحة وبچي يهوة
الحياة ابلا ابو صعبة وفلا تسوة
رايح سلوة الروح يسوة الونة والنوح
أظل مطلوب الك دين ما وفيتة ديني
---------------------------------------------
ما اصـــدكَ تغيب وتــــبتعد عني
أشعر انتة عايـــش تســـتمع وني
صوتك دوم اسمعة وانظرك چني
يا وسفة الدهر خان وخذك مني
ما عني غبت يوم انه بعازتك دوم
عشرة ابطول السنين بين الهم وبيني
--------------------------------------------
أسألكم الدعاء رائد الاسدي
الأمام السجاد ( ع)
. ذكـريـاتـه جـروح بالـطـف والـسـبي
وشينسّي الـمـنـچـوي ابـنـار الـعـبـي
هذا حاله وهذا وضعه * عمره يخلص دمعه دمعه
*---------------*---------------*
ابـتـدت رحـلـة عـذابـه اويـه الـسـبـايـه
وچـانـت الـقـصـه طـويـلـه ابـلا نـهـايـه
عـمّـتـه بـعـينـه نظرهه و صـعبـه هـايـه
تـركـض و نـار الـعـده بـطـرف الـعبـايه
عاشر اجفونه المخيم والدمع
وصارت اسنينه تشابه للشمع
هيچي عايش چـنـه شمعه
*---------------*---------------*
بـگـلـبـه نـيـران المخيم صـعـبـه تطفــه
وبـمـحرم يجـري دمـعـه ويـبـدي طـفّـه
يـذكــر ايــام الـمـآسـي وذاكـه ضـرفــه
الـعـليـل وهـذا حـالـه شـلـون اوصـفـه
الخلـص بدمعاتـه ايـام الـعـمـر
الذكرياته احبال وسياط الشمر
الذكره صـعبـه و هم تـوجّـعـه
*---------------*---------------*
صـورة الطـف ابـخـيـالـه و تـجـري عينه
و الاشــد جـرح الـسـبـي الـهـيّـج حنينـه
اگـبـالـه ويـشـوف الشـمـر يحدي الضعينه
و فـوگ عـلـتـه ونـار حـزنـه امـچـتـفـيـنه
اتحمل الشمات واحزان وغرب
والعقيله اگباله وسفه وتنضرب
خصمه سبهه و ما يمنعه
*---------------*---------------*
حـالتـه بذيچ الصحـاري شحچي عـنـهـه
ايـشـاهـد الروس الغوالي اقـمـار چنـهــه
وعـمـتـه زيـنـب شـاركاهه بكل حـزنـهــه
امـچـتـفينـه ويمشي گـوه وي ضـعـنـهــه
صوره للخيمه نظرهه وللحرگ
و للمتون اليجرن ادموم وزرگ
الـيِـمـه اخـتـه وعـمتـه تـنعـه
*---------------*---------------*
الـجـامـعـه الحزت رگـبتـه اتقص مصابـه
ورحـلـة الـشـام أوگـفّـتـه بـنـص خـرابــه
خـارجـي ايـگـولـون عـنـه والـلـه جـابـــه
صـبـت عـيـونــه مـثــل صـب السـحـابـه
يسمع السب وجرّوحه اتلچّمن
وجارن اعليه المصايب والزمن
بكل سـنـه امـحـرم يفـجـعـه
*---------------*---------------*
يـذكـر الـشـام وجـروحه بـكـل مـسـيـه
و مـا يـشـاهـد غـيـر مسلوبه و سـبـيـه
سـاگـنـه بـروحـه بـقـت لـوعـة رقـيــه
يـَمـه مـاتـت بالـخـرابـه و طـفـلـه هـيـه
لـلـمـمـات وعـايـش بنار الالم
ودمعته لحسين ولراعي العلم
الشاهد اهله گباله صرعَه
*---------------*---------------*
✍ خادم الحسين ع
الشاعر رعد الچريخي
شهادة السجاد ع
يا عــلـــي الـســجــاد اللـه يعــيـنــــك
الصار بالطــــف انـت شـفتـــه بعيـنك
===========================
آه يالمـسـمــوم يا زيــــن الـعــــــبــاد
بنـــوح عـمــرك خلّــص بلبس السواد
انت ياديـــن اللـــه يـــــا باب الـمـراد
ادمـــوع خلـصـت الـعــمـــر وسنينك
===========================
مـــن فـعــل ذاك الـولـــيد ابن الزنات
اتموت بالسم تجـــرع امـــرار الحياة
هز وجودك ضعضع اعروش الطـغـاة
يالعمر خلـصـتــه حـــامـي الديـنـــك
===========================
ايــسـاعدك الله اعــلـه عـمـلـة كربله
كــلـهـا جــدامك تطـيـــح امـچــتلـه
شحال ذاك الوحـده ماتــو كل هلــه
نومــه صــارو وحـــدك امخـليــنـك
===========================
بيوم عاشـــر شاهـــدت كــل الجره
گلـبك امصـاب الذبـيــح ايـمـرمــره
كل اخــوتك نامــت بــذاك الـثــــره
وانت بـحــبال العــده امـچـتفيـنك
===========================
انت شفت احسين طايـح عـلتـراب
كثره بيه اجروح من دمـه الخضاب
ايعينك الله شلون تحـمل هلمصاب
الخيل چــدامك تـــدوس احسينك
===========================
يا فـــرار العيله ياحــــرگ الخـيــم
يا سبي النـــســوان زادك بالألـــــم
بين گـــوم انجــاس ماعدهم شيم
وانت وحـدك والعــده محوطينك
===========================
اثر باقي الجامعـه اسلال الحديـد
ابرگبتك مــــولاي وصلـت للوريـد
واحد ومچـتوف ومخــوف يزيـد
حتى وسـط المجـلس امگيدينـك
===========================
✍️عباس مالك العفريت
#محرم_الحرام١٤٤٦هـ
نسألكم الدعاء
اللحن 👇
السلاسل بيده حد العضم وصلن
الجروح اصيام صامن بيه وصلن
هذني اخفاف عـل سجاد وصلن
الثجيله من خذو عمته سبيه
.
.
.
حسن صالح العيساوي
عشاق الحسین
🏴🏴🏴
کُلُّنا للموتِ عُشّاقِ الحسینْ
کُلُّنا للموتِ عُشّاقِ الحسینْ
🏴🏴🏴
نندب او نار المآسي بالگلب
ونلطم اعلی الراس والمدمع یصب
ونبچی اعلی الظل ذبیح اعلی الترب
وصدره داسته خیول الظالمین
🏴🏴🏴
ابد ماننسه ابوالیمه الشهید
کل سنه ننصبله ماتم من جدید
ونلعن ابن ازیاد وی شمر ویزید
ونلعن الحرموه من مای المعین
🏴🏴🏴
والله حد الموت یبقی هالنداء
دوم الک یحسین کلنا اوفیاء
ارواحنه لجلک نضحیها فداء
ومایهمنه اعناد کل التاصبین
🏴🏴🏴
نبقی عشاقک یبن سید المله
وکل وکت عاشور عدنه وکربله
هالأمــر بـــرواحنه نستقبله
ابمنهجک مولای دائم سائرین
🏴🏴🏴
للحشر های المسیره دائمه
العین تبچیلک یبن حامی الحمه
دموعنه تجري اویه امک فاطمه
وبل بچی انواسي امیر المومنین
🏴🏴🏴
ابد ماننساک یبن الطاهره
لا ولاعباس سبع الگنطره
والذی بالسهم ذبحو منحره
والشباب ال علیٰ الگاع امطبرین
🏴🏴🏴
ابد ماننسه العقیله ام الخدر
ولامتون السود من ضرب الشمر
ولا علي السجاد هظمه بالأسر
ولاطفال الّي بحبل متگیدین
🏴🏴🏴
(سیدناصر الموسوی)
اداء
الرادود الحسيني ابوجليل الدردوشي
لسان حال
سهل بن سعد الساعدي
ابوذيه
نطب للسوگ گمت استمع يشرون
بضعن عباس وأعله الضعن يشرون
المحبس صحت مامش ناس يشرون
تراچي اشتري المولاتي الرقيه
....
الشاعر محمد حسن ضيغم
/channel/alnaay2022
#موشح
حرت بين اطفالي بويه وعـــــــلتي
وعــلى الناگه مــــــن يرچب عمتي
ـــــــــــــــــــــــــــ
حــــــرت بين اطفالي وبين الحرم
خـــــــاف يحرگهه جمر نار الخييم
وانه حته من المرض حيلي.انهدم
من المصيبه جفني غرگ وجنتيي
ــــــــــــــــــــــــ
جـــــابوا النوگ وأمر جيشه.الشمر
الظعن يطلع بالسبـــي گبل.الفجر
وأمر حادي النووگ يسرع بالسفر
وجامعه وگييد بچــفوفيي ورگبتي
ــــــــــــــــــــــــــ
چتفونه وچتفوا حـــــــتى الاطفال
وگـام ينزف دمنه من شد.الاحبال
وانه اعاين عــــــمتي چنهه.خياال
وتوون سكته مــن تشاهد دمعتيي
ـــــــــــــــــــــــــ
ســـار حادي النوگ للكوفه بعجل
وچن خوارج من دخلنااعله الهزل
استقبلونه الكــوفه بدفوف.وطبل
وبحجر وبنار.ضــــــــربوا.عيلتيي
ـــــــــــــــــــــــــــ
ردت ذيچ الساعه اموت ولا.اطب
النار فـــــوگ عمامتي بويه.تشب
ناس تضحك ناس مدمعهه يصب
وناس رادت كــــــون تعثر.ناگتيي
ــــــــــــــــــــــــــ
هاي حاله وحاله من رحنه اليزيد
كلهه ترگص للامير وعـدهه عيد
حين شافوا عالرمح راس العميد
هذا موجز مــــن سفرتي وقصتي
ــــــــــــــــــــــــــ
بقلم خادمكم ابوباقر الصالحي
20محرم 1446هــ2024/7/27م
•••~•••(•«﷽»•)•••~•••
"اللهم عجل لوليك المنتقم الفرج"
نزلة لاستشهاد الإمام السجاد عليه السلام
عليل وفاكد أحبابه
آه يحسين ومصابه
ء_
گبل چانت حنان ولمة الخوة
وعلى السفره اتجمع كل المروه
وعلي السجاد چان بخوته يتگوه
ريت الطف يعاين باهلك شسوه
ماترحم النشابه
اه يحسين ومصابه
ء_
عمت عيني العليل اجروحه تتبده
ومنو تحمل مصايب تذبح بگده
وعينه من الدموع تغرگ بخده
عليل بعلته بحبله الشمر شده
وگبال الحرم جابه
اه يحسين ومصابه
ء_
يشوف اخوانه كله اعله الترب طاحت
وعمته مگيده بدرب السبي راحت
وناس تسب علي وبسم الشمر صاحت
وعمته اگباله تبجي من الهضم ناحت
ماتوا كلهم أصحابه
اه يحسين ومصابه
ء_
والهزت كيانه وبچت السجاد
من شاف العقيلة بالحبل تنگاد
وعبد الله انذبح طير بسهم صياد
البچي يفيد الگلب للفاگد ويراد
وادم كله سلابه
اه يحسين ومصابه
ء_
تخيل هم عليل وناس تضرب بي
واحد مايرحمه الثاني ظل يِسّبي
واحد گله اخوك الأكبر مگطعي
واحد كله ابوك مگطع ومرمي
وهاي الناس طلابه
اه ياحسين ومصابه
ء_
تخيل حالته ينظر على عياله
كله مصرعه ومحد دره بحاله
ودُوس اعله صدر حسين خياله
ولاوالي اليظل بالحومه يبراله
بس اذري الترابه
اه يا حسين ومصابه
#خادم_رقية_عليها_السلام
#الشاعر_مهند_الدريساوي
ياأيُها السلاسلْ صلِ لهُ نوافلْ
لا تجرحـي معصم القرآن
الله اكبر عظمهُ بان
ياأيُها السلاسلْ
ــــــــــــــــــــــــــــــــــــــ
ياسلاسل ذوبي من شدة بلائه
بالمباشر هذا وي الله دعائه
هذا ابن السلبو بالطف ردائه
مثل حيدر جان بس لله انحنائه
كجدهِ الوصيُ عليٌ من عليّ
وخلفهُ تُصرخ النسوان
اللهُ اكبر عظمهُ بان
ياأيُها السلاسلْ
ــــــــــــــــــــــــــــــــــــــ
ياسلاسل طلع عظمه من رگبته
لاتلجمينه حرام اتصب دمعته
بالسياط اكباله ويطگون عمته
والحوافر بايكه اعيونه وصفنته
حنَّ على اباهُ بحزنهِ ينعاهُ
والسوط لا يرحمهُ كان
الله اكبر عظمهُ بان
ياأيُها السلاسلْ
ــــــــــــــــــــــــــــــــــــــ
كل عليل وعلته ماالهه نهايه
هذا طبعاً راحه يحتاج وعنايه
چا علي السجاد سوّه ياجنايه
بالخرابه ايشوف عمّاته سبايه
وظهرهُ تقوس امامنا المقدس
وشابَ من شدةٌ الاحزان
اللهُ اكبر عظمهُ بان
ياأيُها السلاسلْ
ــــــــــــــــــــــــــــــــــــــ
آه يادرب الصحاري اشگد يتعبه
ايطيح من الناگه بس محّد يرگبه
لا عشيره ولا اهـل والديره غربه
ذاكه الايشتمه بقه وهذا اليضربه
بئساً لتلكَ الامه من غربة الأئمه
فذا عليٌ خيرُ برهان
اللهُ اكبر عظمهُ بان
ياأيُها السلاسلْ
ــــــــــــــــــــــــــــــــــــــ
دمه يجري امن الحديد ومايمسحه
عله احسين ايباوع وحزنه يذبحه
الحادي حبل الناگه يتعمد يفتحه
حته بالسجّاد من تعثر تطيحه
والناقةُ السريعه لأمرهِ مطيعه
ياويلكم يابني سُفيان
الله اكبر عظـــــمهُ بان
ياأيُها السلاسلْ
ــــــــــــــــــــــــــــــــــــــ
بالقصر شاهد رقيه الكلهه حيره
أمن الحسين امتانيه النظره الاخيره
صاح ارحمو هذه الطفله الصغيره
هاي ابوها احسين شالوه ابحصيره
والرأس مّذ اتاها فكلّمت اباها
ياابتي موتي لقد حان
الله اكبر عظمهُ بان
ياأيُها السلاسلْ
محمد الجماسي
استشهاد الامام السجاد ع
جرحي لو جرحك يلكبر
ياهو بيهن يوجع اكثر
خناجر كربله
وجروح السلسله
+++++++++
هذا اول واحد انته بگبري يا خويه الاجالي
اعرض جروحك يلكبر وانته قارنها اويه حالي
مو عطش ماي بدليلي گلبي عطشان اعله غالي
من إخوتي اليبچي فوگي ويحني ظهره ما بقالي
لا اخو يحضن اخيه
وينكسر گلبه عليه
ودموعه هامله
وجروح السلسله
++++++++++
تذكر الخيمه يالاكبر بيها اجيت او ودعتني
بالمرض ثگلانه جدمي ونار اجتني حاوطتني
صارت العوچيه جمره والزمت بيها چوتني
وبين دخان المخيم عمتي تسحبني اجتني
هيه تسحبني بأديها
والسياط اتدگ عليها
ابهظمها مايله
وجروح السلسله
++++++++
ما اقارن انته تحكم ياهو بينه الجرحه اكبر
انته برماح وخناجر والطعن جسمك توذر
لو الف سيف اعله نحري اولا حبل بچفوفي وانجر
آه يا صوت اليصيحه ابوجهي من اجدامي تعثر
زلمه مو سهله بچفوفه
احبال واعياله تشوفه
سبيها العايله
وجروح السلسله
++++++++++
عن رمح خاصرتك ابلغ لو الم حچي الشماته
اشينزف امن اعروگه گلي التنضرب يمه خواته
آه ماصاحن عليه حال اخوهن عاذراته
امضيّگين ابگيده عنقي اتجرحه ابسط التفاته
مادرت عيني عليهن
ساكت واسمع بچيهن
بچي لمدلـله
وجروح السلسله
++++++++++
الشام آ يالشام بيها ابگلبي چن محترگه خيمه
بكل نفس تطلع واردها روحي من گد الهظيمه
ديره ديره ايدخلونه وليه يولوها اليتيمه
واسمع ايصيحوني هذا عايش وسلبوا حريمه
ياكبر چلمه الحچوها
روحي بيها گطعوها
چبيره المسأله
وجروح السلسله
++++++++++
اسنيني والفتره وراكم غربه يا خويه العشتها
الدمعه لحسين ومصابه ليله ابد مافارگتها
من اجت ساعة وفاتي الكربله اعيوني درتها
خويه يالاكبر چفوفك تحمل النعشي ردتها
هسه اجيت واني يمك
ضمني ياخويه واضمك
بقدومك يا هله
وجروح السلسله
ثائر الربيعي
من تفكد غالي ...تفكد كل عمرك وياه
والاصعب منهه ...من تحتاجه وماتلكاه
والكلام الجارح
من يكلك رايح ...في امان الله
.........
رايح يابعد كلبي وعيني عله الدمع شدت
يبعد العافيه بفركاك بيه العافيه شضلت
اناطر واكفه بالباب والاطفال علي عدت
وكلمن رد لهاليته وكلمن بي هله فرحت
بس انته ولا رديت
وننتظرك انه والبيت
..........
انام من التعب ع باب وسافر بالحلم يمك
يشوكي شكد غميج وياك طابع بالجفن رسمك
خنكه دنيتي بلياك الهوه بس لمن اشتمك
بويه الغرب كتلتني يمن فدوه رحت لسمك
ارحم حالتي ورجع
لو روحي تره تطلع
.............
يسئلوني هلج جا وين وحيرن من يسئلوني
المتى والوين خلتني يشيب حاجب عيوني
جرعت المحد يجرعه و غريبة دار سموني
يبس عودي وذبل حيلي وتغير بالهجر لوني
الفركه تغير هوايه
البجي بس يرهم وياي
.............
يدار العز صفت ضلمه طفت من بعد اهاليهه
ماخلت دمع بالعين حته بشوكي ابجيهه
ريشه روحي والحصرات تاخذهه وتوديهه
ماضل للعتب كلمه وكولن بيهه وحجيهه
العتب شيفيد ياكلبي
غير المشتكى لربي
.............
شكد ابجي عله المصلاه وكولن ربي سلمهم
بجاه الطبره والمحراب عليه بساع رجعهم
ملت روحي من الضيم مامتعوده افاركهم
راحو مني غفلة موت مالحكت اودعهم
هلي ردو اتانيكم
وسط عيوني اخليكم
...........
الشاعر
مصطفى الحسني
الامام السجاد
دمعي يجري
شيطيبه جرح المنذبح ضامي
***
دمعي اعله ابو السجاد ماينشف ايسيل
وآنه ابنه مني اهــــــواي متهدم الحيل
بعيوني شفت اضلوع داســـنهن الخيل
وي عمتي عيناي ماطبكــــــــــن بليل
دمعي يجري
شيطيبه جرح المنذبح ضامي
***
آنه العلــــــــــــيل الشاف يوم الشريعه
وعمي اعله شاطي الموت جفه كطيعه
ضاكت بعني اهناك منـــــــي الوسيعه
واهلي اعله ذيج الكاع ظلت صـــريعه
دمعي يجري
شيطيبه جرح المنذبح ضامي
***
ظهري اعله اخوي اهواي والله تكسر
راح ورجعلي اشلون ياحـــاله الاكبر
كل جسمه دم ايفــــــور ينزف امطبر
حاجيته ساكت جان كلــــــــب الموذر
دمعي يجري
شيطيبه جرح المنذبح ضامي
***
شيطيبه جرحي بنار كل ساع ملجوم
من العرس جســــام ياوسفه محروم
حنته بالميـــــــــدان وبفيض الدموم
لانصب عزى ونات لمصابه كل يوم
دمعي يجري
شيطيبه جرح المنذبح ضامي
***
من اذكره دمعات تجري اعله الخدود
عبد الله مني راح مايرجـــــــع اردود
مافكه حزني اعليه وثيابـــــي السود
ماضن زماني الجــــان هم بيهم يعود
دمعي يجري
شيطيبه جرح المنذبح ضامي
***
وبعد الجره بعاشــــــور والغاضريه
صعدتي بذيج النوك مجتوفـــــه اديه
بعيوني شفت اشلون زينـــــب سبيه
آه اشكثر آهات مــــــــــــــرن عليه
دمعي يجري
شيطيبه جرح المنذبح ضامي
***
ابو علي الركابي
صعب موتك يبو الباقر
تولج ومن يدك بابك غريب وشالت احبابك
صعب موتك يبو الباقر
***
يبو الباقر جروحك سيل نهر امن الحزن والهم
جثيره اهموم كلبك حيل غميجه ومااضــن تلتم
بعيده احبابك العافـــوك هجرهــم بالجـبد خذم
انهدم حيلك يبو الباقر
جبير شيجبر امصابك غريب وشالت احبابك
صعب موتك يبو الباقر
***
عشت بين الصبر والنوح عشت مكسوره جنحانك
ضكت مر الهوان وضيم فركــــــــت ذيج وليانك
حسيت وجرعت اوداع لمن راحــــــت خوانك
شالت كل اهاليكــــــــــم وظلت تبجــــــي ديرانك
فرغ بيتك يبو الباقر
غميج وينزف اصوابك غريب وشالت احبابك
صعب موتك يبو الباقر
***
كَلبـــــك هاكثر يحـــــمل يعنه الله يبـــــــو الباقر
محد ســــــــــولف وكلك شفت بعـــــينك العاشر
سمعت اتكسراضلوعـــه ابوك ابسحكت الحافر
وكف كلبك يبو الباقر
داسوه العده اطنابك غريب وشالت احبابك
صعب موتك يبو الباقر
***
حسيت بهظـــم زينب من ظلت بلايا اخيام
كوه ابلا وداع امشيت رافكت الضعن للشام
مجتوفين أيـــد الأايد عالهزل نســــه وايتام
انحنى ظهرك يبو الباقر
يشتمك ويــــلي سلابك غريب وشالت احبابك
صعب موتك يبو الباقر
***
منهو الي يجــــيك اليوم وراحــــت كل اهل بيتك
راح الواهس امن الروح من شـــــــــالت اهاليتك
بعدو مابعد يلفـــــــــــون الجانو همــــــــه عافيتك
كلف جرحك يبو الباقر
سهم النايبه صابك غريب وشالت احبابك
صعب موتك يبو الباقر
**
ابو علي الركابي
اللـــيالي الســـجاديه
ليت أُمي - لم تِلدني - كِم تِمّنيت
ليت أُمي - لم تِلدني - كِم تِأذيـت
ء - - - - - - - - - - - - - - - - -
مِن بِعــد دِرب السِبي وجر الحِبّل
والعِـذاب السِده بيّــه اعله الهِزّل
عِله عمـتي الدمّع مـــن عيني يهّل
الســــــوط مايرحم چِبير لا طِفل
ليت أُمي - لم تِلدني - كِم تِمّنيت
ليت أُمي - لم تِلدني - كِم تِأذيـت
ء - - - - - - - - - - - - - - - - -
أمنيتي لو حــــانِت وفّاتي أبكربِله
كون طلعت روحي لحضِت مقْتِله
أو لا أشـاهد يحــدي بينه حِرمِله
الســــوط ياذينه وتأذي السلسِله
ليت أُمي - لم تِلدني - كِم تِمّنيت
ليت أُمي - لم تِلدني - كِم تِأذيـت
ء - - - - - - - - - - - - - - - - -
من دِفنـــت الوالِد أبكلبي أنه ألم
والِدي مخضّر أبجسمه چم سِهّم
لا چِفّن لا مـاي جِســــمه كِله دِم
صِحت وينك كــوم يا راعـي العِلم
ليت أُمي - لم تِلدني - كِم تِمّنيت
ليت أُمي - لم تِلدني - كِم تِأذيـت
ء - - - - - - - - - - - - - - - - -
رحنه عالهِـــزّل خِذونه أشكم دِرُب
من أشاهد حال عمتي شكد صِعُب
عمتي زيـنب مات من عدهه كِلُب
محني منهه الظِهر من كِد الضِرُب
ليت أُمي - لم تِلدني - كِم تِمّنيت
ليت أُمي - لم تِلدني - كِم تِأذيـت
ء - - - - - - - - - - - - - - - - -
حيل ألّــــم كلبي من طبينه شام
نضرت الشِــمات لينه چن سِهام
بسوك وكــفنه أشكثر أبن الحِرام
ألليل مـــــر أعلينه لكن ما ننــام
ليت أُمي - لم تِلدني - كِم تِمّنيت
ليت أُمي - لم تِلدني - كِم تِأذيـت
ء - - - - - - - - - - - - - - - - -
للقصر لِمّن دخــــــلنه والحظُور
صح زِلـم موجوده مابيهُم غيّــور
فاح من عدنه العطّر أجمل عطور
ذِن عفّـــــيفات الله ربّات الخدّور
ليت أُمي - لم تِلدني - كِم تِمّنيت
ليت أُمي - لم تِلدني - كِم تِأذيـت
ء - - - - - - - - - - - - - - - - -
علي محمد الساعدي