Telegram-канал tajalzahraa1 - 🌴تجمّع الزهراء ع العاشورائي🌴: Неотсортированное

🌴تجمّع الزهراء ع العاشورائي🌴

16 июля 2024 00:16

*|جديد شهر محرم الحرام ١٤٤٦|*

(( وصل الأخوّه ))
يوم العاشر محرم الحرام ذكرى إستشهاد الإمام الحسين عليه السلام

يَإللي گاصد للمنيّه .. و رايح اِبْروحي
خويَه لا تِعْتِبْ عَلَيّه .. لو كثر نوحي
آنه أبْگه هالغريبه … و إنته هالجثّه السليبه
           ❃❃❃❃❃❃❃❃❃❃❃❃
مو سهل وصل الأخُوَّه ينگطع حَبْلَه
شلون و آنه إلْخوها ماكو بالخلگ مِثْلَه
عيوني دنياها تشوفك و العمر كِلَّه
يَلْ بُگالي من أهَلْنَه و أنتهي اِبْچَتْلَه
………………..
يل أشوفك ذِكْرَياتي .. و عُمري و سنيني
لو بإدَيَّه يا حَياتي .. ما تِخَلّيني
فَرْگِتَك جَمْرَه لَهيبَه … و إنته هالجثّه السليبه
           ❃❃❃❃❃❃❃❃❃❃❃❃
خويه لو رايح و ناوي تدخل الحومه
و الأجَل گَرَّب حسامه و الوَعَد يومه
خَلني يا غالي أوَدْعَك بعبره مسجومه
تالي بَتْسَمّىٰ الغريبه إلْخَيْها مَحرومه
………………..
خل أشِمْ نَحْرَك و ألِثْمَه .. و أشْبَع اِبْشوفَك
تالي گلبي يزيد هَمَّه .. لَمَّن اِنْعوفَك
تُبْگه عاري ع التريبَه … و إنته هالجثّه السليبه
           ❃❃❃❃❃❃❃❃❃❃❃❃
حسين تدري آنه مَيْتَه لو رِحِتْ مِنّي
بس جَسَد أبْگه لِعَذابي و إلْبُگه اِبْحرني
و بخَيالي طيف أشوفَك فراگه يوجَعْني
و أنْعَه بِسْمَك يا حَبيبي لو كِثَر وَنّي
………………..
صورَه آنه ع الهزيلَه .. و فكري ظل يَمَّك
أمْشي بَسْفاري الطويلَه .. و أهْمِسْ بإسْمَك
مهما باعَدْنَه گريبَه … و إنته هالجثّه السليبه
           ❃❃❃❃❃❃❃❃❃❃❃❃
صوت ضيمَك لو أسِمْعَه بساحَة المَصرع
آنه عَطْشان و حَشايَه لَهْفَه تِتْگَطَّع
و الشمر جاثي إعْلَه صدرك وسفه و اِتْرَبَّع
ينادي لو تِنْخَه و تندب كِلْشي ما ينْفَع
………………..
تدري أتْگطَّع يَخويَه .. من ألَمْ صوتَك
و أنْخىٰ وينك يا أبويَه .. يا علي اِمْروتَك
ماي ما أگدَر أجيبَه … و إنته هالجثّه السليبه
           ❃❃❃❃❃❃❃❃❃❃❃❃
و لو يجي مهرك خِيَمْنَه و السَرِج مَلْوي
و اِبْصَهيلَه هالفجايع صارَت اِتْدَوّي
لِحْگي يا إخْت الهَواشِم و الأرض إطْوي
شوفي بحسين العساكِر اِشْگاعِدَه اِتْسَوّي
………………..
من طحت فوگ الوطِيّه .. داسِتَك عَشْرَه
و مَغْشي تنزف يا خَطِيّه .. و الگلُب جَمْرَه
و حولَك أفْواج و كتيبَه … و إنته هالجثّه السليبه
                ❃❃❃❃❃❃❃❃❃❃❃❃
عيوني لو بيها أشوفك تنذبح ظامي
و هالشمر نحرك يحِزّه خويه گدّامي
و ترجع العشره تدوسك أشْهَگ آلامي
لَدْعي الله عيوني تِعْمىٰ باگي أيّامي
………………..
وما أشوفَن غير دَمْعي .. يجري بِعْيوني
و الحزن يا خويه طَبْعي .. و عالَمي اِشْجوني
و عُمري ما أنْسىٰ المُصيبَه … و إنته هالجثّه السليبه
                     ❃❃❃❃❃❃❃❃❃❃❃❃
و چيف يا خويه ألِمَّك يا وذر مَرْمي
و بالحوافر باگي لَحْمَك ويلي يَبْن اُمّي
خنصرَك و ينه و گلْبَك بيا سهم مَدْمي
يا جَسَد غابَت رسومَه ع الثرىٰ يَمّي
………………..
هالمُثَلَّث دَلْني وينه .. و باگي أوْصالَك
وين إيدينَك يا ولينه .. شگد صعب حالَك
وين عبدالله و أجيبَه … و إنته هالجثّه السليبه
               ❃❃❃❃❃❃❃❃❃❃❃❃
وين راسَك لا تِگِلّي ع الرمح عالي
و لعبه ما بين الأيادي اِتْفُرَّه اِگْبالي
و أنْشتِمْ لَنّي وَحيده و راحَت اِرْجالي
و الخِيَم مَحْروگه ويلي و تاهَت اِعْيالي
………………..
شلون لو صاح المُنادي .. هالخِيَمْ شبّو
و صاح ربطو هالأيادي .. و الحَرَم سِلْبو
منهو حولي و ألْتجيبَه … و إنته هالجثّه السليبه
           ❃❃❃❃❃❃❃❃❃❃❃❃
الشاعر : أبو شهيد الأحسائي
الأثنين ١٤٤٦/١/٨هـ
════════════
*لا يجوز و محاسب شرعاً حذف او تغيير التوقيع*