7626
خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
آه يوليدي.. شسوت بأمك مصايب كربله
آه يوليدي.. عگب فيك ما اضل مدلله
__
يالرحت للماي بس ماي السراب
يمه سهمك نابت بگلب الرباب
يبني نشاب الاجه ريت اعمى كون
ويخطي نحرك يلولد وبنحري صاب
امن ايدي ليد حسين سرت امن الخيم
وچان عطشان اعله نحرك چم سهم
واني ادري الراح يتخطى اعله موت
آه يعزي ومن رحت عزي انهدم
آه يوليدي.. شلت ايده ولا يذبحك حرمله
آه يوليدي.. عگب فيك ما اضل مدلله
____
يبني اطيحن عالمهد ورجع افز
ادري خالي بس گلب امك يهز
يبني عاده ومتني متعود عليك
وعاده اگول اوليدي نايم لا يفز
ريت اداويك ويصح ليك الدوه
يبني يالمفطوم حتى امن الهوه
چلمه اليمه ردت اسمعها عاد
وضاعت اليمه اسلبتها نينوه
آه يوليدي.. ماكو ابعيني مثل رسمك حله
آه يوليوي.. عگب فيك ما اضل امدلله
__
الله لا ينطيه يا يمه الضمه
عطشاك ونحرك ايروي السمه
عميه ريت اعيوني كون ولا اشوف
من وريدك جيتني مخضب دمه
ما صرت دون البعمرك يبني شاب
برد حضني يالنمت فوك التراب
يبني واليفرغ حضنها المن تعيش
شاب گلبي اعليك مو بس رمشي شاب
آه يوليدي.. رخصت عمري وبس عمرك غله
آه يوليدي.. عگب فيك ما اضل مدلله
_
ياهو ينشدي اگله الولد نام
وصرت اسكت ياهو يحچي بالخيام
هيج شادهني يعبدالله عليك
وكلشي يوجعني بغيابك كلشي گام
صرت بيني وبين روحي اعليك اصيح
وهيج امك گامت تگوم وتطيح
وگلت باچر تكبر وتچوتي اتصير
وباچر اعله ارماح اشوفنك ذبيح
آه يوليدي.. گطعيت انياط كل العايله
آه يوليدي.. عگب فيك ما اضل امدلله
__
ساعت حصت النار يصبح هل مهد
شلون ما ناغيك لا لولي بعد
بيا علي ويا علي ست اشهر كضيت
بعيني تكبر وين رايح يالولد
حتى ما لحگت تكبر لا مشيت
بسرعه اجيت ومني ابسرعه مشيت
احلم بساعت التلزم چف ابوك
وتمشي. مو للموت يالضلعي حنيت
آه يوليدي.. الما حضه السانك بگطره اتبلله
آه يوليدي.. عگب فيك ما اضل مدلله
__
خاف اروح وما احصلك طبيب
الجرحك الماله ضماد ولا يطيب
آه يا اول ولد والاول عزيز
حالت النسوان مثلك ما تجيب
شلون لو عنك مشيت ابهازله
وانته عالتربان تبقى بكربله
شلون بشلون امشي جسم ابلايه روح
ريت اضل يمك وبيك امعلعله
آه يوليدي.. عاجر ابدونك تسير القافله
آه يوليدي.. عگب فيك مااضل امدلله
__
حسين سعد البهادلي
محرم الحرام1446
طلعته بيدي امن الخيم چي عطشان
عبدالله ايروونه
يبست لهاته والگلب يرجف چان
من العده ايذبحونه
آه~ من گد الضمه.. تفطرت شفته ولسانه منفطر
آه~ وضايع مبسمه.. ريت من عمري الولد انطي عمر
حُسين حُسين.. گتله عبدالله وشفت دمعه يهل
حُسين حُسين.. عنده اخر شي بقه بس الطفل
گلي يالرباب.. ترسي عينچ بالولد
گلي يالرباب.. خاف مايرجع بعد
گلي يالرباب.. ومن علي يخله المهد
____
راح وحلم عندي الولد گطرة ماي
يرحمونه ويشربونه
ساعه وشفت رد بالمهر فاگد راي
حسين وتبدل لونه
آه~ من رد للخيم.. طاح الحسين وطحت وي طيحته
آه~ مذبوح بسهم.. جاب عبدالله ودمه تصب رگبته
حُسين حُسين.. اوليدي ابدل نحري بنحره اريد
حُسين حُسين.. وانذبح كون ابداله امن الوريد
ويتيه السهم.. بطيف مايندل يجيه
ويتيه السهم.. اسم الله والزهره عليه
ويتيه السهم.. وريت ما نسمع بچيه
____
ضليت اسكت البلخيم من يحچون
نايم اگول الغالي
وضليت اهز وما بقن بيه متون
مهدك ييمه الخالي
آه~ يالبعدك زغير.. بيا ذنب حضني فرغ منه خذوك
آه~ ما شفتك چبير.. وتلزم ايدي وأيد تلزم جف ابوك
حُسين حُسين.. گلي نام اوليدچ اشويه ويفز
حُسين حُسين.. وداعت الأكبر عمر اسهر اهز
نايم لا يفز.. گمت أللولي بالخيم
نايم لا يفز.. واحلم اوليدي سلم
نايم لا يفز.. وينده احلامي السهم
___
ياتعبي ورباي وسهر تالي الليل
وما لحگ ايتم حلمي
لباچر گلت فدوه اله ايروح الحيل
من يمشي ويگول اسمي
آه~ مذبوح الحلم.. وطشر النشاب ست اشهر هدر
آه~ كون اگدر ألم.. عمرك ويالضل حليب امك يدر
حُسين حُسين.. ياشريچ امصابي اشكبره المصاب
حُسين حُسين.. ارد اموتن شنهي ضلتها الرباب
حضن امك برد.. كون وياك انذبح
حضن امك برد.. يبني اموتن للصبح
حضن امك برد.. ونفرش حضن الرمح
__
حسين سعد البهادلي
محرم الحرام 1446
ليلة العاشر..( عبد الله الرضيع )
يمه نام .. سهمك وغافي بوريدك
والظلام .. خــيـم اعليه واريــدك
هذا وكت التغـفه بيه يمه عله صدري
ويـن ادورك تـــاه يـا عـبد الله فـكري .. بالظلام
……………………………
هذا وكت ارضاعك ودر صدري يمه
ويـن ادورك كربلـه يولــيدي ظلـمه
اعـثـر ابـين الجـثث عـبد الله زحمه
ضاع عطرگ بالحرگ ما گمت اشمه
انته وين .. بيا كـتر دليني صاير
بالدخان .. ضعت وبعج الحوافر
ضعت وشلون الگه جسمك والله مدري
ويــن ادورك تـــاه يـا عـبـد الله فـكري .. بالظلام
……………………………
يمه من ابـعيد ناغيني ارد اسمعـك
بلـكـت انـدلك يـعـبد الله واتـبـعـك
حيل مشتاگه يروحي وارد ارضعك
خاف باچر امشي يوليدي واودعك
الــــوداع .. يا حبيب امك يغالي
كلشي راح .. تعبي ومساهر ليالي
ياحـرامـات الـلـبــن ضل هسه يجري
ويـن ادورك تـــاه يـا عـبد الله فـكري .. بالظلام
……………………………
ويـن نـايــم ارد اجـي يا يـمـه يمـك
ارد اطلـع من رگـبـتك بـيـدي سهـمك
يمه اريدن شيبي اصبغه بفيض دمك
وخاف هاي الخيل تمرد يمه جسمك
ارد اجــيـك .. حـتـلـو يا يـمــه باللـيل
عليك اخاف .. تنسحگ يوليدي بالخيل
بـلـيـل اجـيك وفوضت للباري امري
ويـن ادورك تـــاه يـا عـبد الله فـكري .. بالظلام
……………………………
يبني يالما عيني شبعت شوف منك
النـار ما تـطـفه بـدليلي الا احـظنك
ليـش فـارگـنـي زمـاني يـمــه عـنـك
ريـت يـمـه ابگـلـبي السـهام الرمـنك
ريت اموت .. شلي بالدنيا بـدونك
نظره اريد .. يمه من نظرة عيونك
نظرتـك تطفي يـيـمه بروحي جمـري
ويـن ادورك تـــاه يـا عـبد الله فـكري .. بالظلام
……………………………
بحظني متعود گبل يوليدي اخليك
خالي مهدك يمه واني ارد اهـز بيك
نايـم بهـيـمه يروحي خايـفـه عليك
حـار يوليدي الرمل وادري يجـويك
والـتـراب .. يـمه لا ياكـل اخدودك
ردلي عاد .. تواسي ليه بذبح عودك
فراگـكـم كـاسـرلي يمـه حـيل ظهري
ويـن ادورك تـــاه يـا عـبد الله فـكري .. بالظلام
……………………………
فـراگ ابـوك امصيبة يا يمـه چـبـيره
تهنه من بعده وصفت حيرتنه حيره
لا اهـــل ضلـيـنـه بـعـده ولا عـشـيره
وعالـنـهر مـذبـوح عـمـك ابــو الغـيره
خايفات .. والشمـر يفـتر علينه
معذبات .. حـرم يايمه شبـدينه
حـرم ضليـنه بمدامـع حـسره تـجـري
ويـن ادورك تـــاه يـا عـبد الله فـكري .. بالظلام
الشاعر عقيل الحسناوي..
.
▪️يا ام الرضيع▪️
نخوه للرباب عليها السلام
نخوه يا ام الرضيع
اقضي حاجاتي سريع
جيت احلفك بالزجيه
وليدها ضامي الاميه
ابذبيح الغاضريه امصابه والهم الفجيع
———-
بجاه طفلج وي مصابه
لوعته وهمه وعذابه
همي اتسدين بابه للنخه ورايد جميع
———
جيتك ابدمعه جريه
انتظر منج عطيه
ابجاه من جثتَه رميه
والجرى اعليه ومريع
——-
انخيتك امرادي اريده
اعليج بالضامي ووليده
واللي مد الليله ايده
ابجاه خالقنه السميع
———
ابجاهج الليله دعينه
وماترد ابهم ادينه
اتفضلي ستي علينه
وزيدي بالخير الوسيع
———-
بقلم:بنت الشمري
قصيدة رثاء عبدالله الرضيع ع السلام
خادمكم عبدالهادي العريفاوي
عبدالله وليدي شلونه ساكت مايحجي وياي
شو ذبلانات عيونه من فيض الدم يروونه ساكت مايحجي وياي
---------------'------------
وكت الفجر من تكعد تناغيني
كلشي اتعرف مابينك ومابيني
خالي المهد يبني وغبت عن عيني
من فركتك بس دمعتي تسليني
راح ومارد اوليدي زادت نبيران احشاي
ليش الطفل يذبحونه من فيض الدم يروونه ساكت مايحجي وياي
-----------------------------
انته الأمل غيرك بعد ماعندي
بس الحزن وسط الكلب ظل يحدي
لمن يجن ليلي واظلن وحدي
من فركتك حالي بحزن متردي
ليش اتأخر ماجاني زادت بالطف بلواي
بلكت ماي ويسكونه من فيض الدم يروونه ساكت مايحجي وياي
--------------------------
هلبت يرد ابني واظل اتنطر
واتصبرت من فركتك مااكدر
انخه علي وجفه القلعها لخيبر
هالنايبه اعله امك مثلها مامر
خابت منك آمالي عبدالله يارجواي
من هالناس الملعونه من فيض الدم يروونه ساكت مايحجي وياي
-------------'------------
تعيش بحزن أمك اظن تاليها
وسيف الدهر مااعتقد يخطيها
تتنطرك تالي العمر تفديها
انه امك ومااعتقد ناسيها
هاجت يوليدي جروحي ماظل عد امك راي
وسفه وليدي يجيبونه من فيض الدم يروونه ساكت مايحجي وياي
----------------------------
بدمعه وحزن امك تظل منتظره
ماتنتهي وسط الكلب هالحسره
بكليبي عنوان المصيبه شكبره
ليش الطفل سهم المنيه بنحره
تترك امك ياوسفه ماظنت منك هاي
ربهم لا ميخافونه من فيض الدم يروونه ساكت مايحجي وياي
محرم الحرام #1445هـ
(( عبدالله الجرح الثاني ))
……………………………………………………………
ما طاب جرح المحسن وبسماره
والنوب جرح الثاني اعظم ناره
عبد الله جرح العتره •• نامت النبله ابنحره
عبدالله يا عبدالله
……………………………………………………………
شهود الجريمه المؤلمه
في ذبح محسن فاطمه • زينب والحسين
بيهم اخوهم ظل جرح
بس الظلام وكل صبح • ما مر على العين
ابعبد الله حيل اتعلقو • واطّول يمه الگعده
يناغونه والهم يبتسم . تنرسم ورده ابخده
حسين ويهفيله الهوه . وزينب تهز ابمهده
ما مات محسن عدل معتبرينه
يشوفون صورة فاطمه ابنص عينه
عبدالله روح الزهره •• نامت النبله ابنحره
عبدالله يا عبدالله
…………………………………………………………
ابغض النظر حجه او ولي
بس هم ابو و هم منملي • حب ومشاعر
يشوف ابنه ميت بالبچي
من ايده رايد ينسگي • وحسين حاير
يشوف ابنه يتلوه ابعطش . يا ناس كلش صعبه
مايدري شيسوي الـ عبد . ظل ما يوچّد دربه
مو بالحوافر يا خلگ . اهنا انداس ابگلبه
ويگله يا بعد العمر يوليدي
لو ينشره مايك لبيع اوريدي
واشفافك المتفطره •• نامت النبله ابنحره
عبدالله يا عبدالله
…………………………………………………………
عبدالله مقتل وحّده
يا ناس لا صار و سِده • ابكل الطوايف
وأتخيّل الموقف عدل
ماخذ اوليدك للچتل • واعليه خايف
بحضينك و ضاوي الولد . امن البدر احله واحله
وبلحظة تنظر منذهل . شچّت ابنحره النبله
وازغار اديّاته وصُبح . بيهن أگماطه ايحلّه
يحسين الله ايعينك الهل شوفه
مات ابنك وداير عليك اجفوفه
الحضنك بقت بيه حسره •• نامت النبله ابنحره
عبدالله يا عبدالله
……………………………………………………………
رد بيه ويخط بالجِدِم
امغطّيه بطراف الهِدِم • ومحدب اعليه
ويخط وراه دم الطفل
وياه غده ايفور الرمل • وتبچي الارض ليه
محتار لو شال السهم . تنفصل خاف الرگبه
امشعّب و داير بالنحر . مثل العصابه امعصبه
مو زين ما مات الولي . الله يساعد گلبه
كل طفل ورد وياس يمه إتخلّه
بس ابن الحسين انفطم بالنبله
طبگة جفن يا عمره •• نامت النبله ابنحره
عبدالله يا عبدالله
…………………………………………………………
ما نست حايط والجذع
ومحسن اخيها المنصرع • مهضومه زينب
شافت اخوها المنجرح
ينطيها ابنه المنذبح • وگابلها ينحب
للخيمه وأحتارت تطب . لو بالعبايه اضمّه
ابهل الحال لو تنظر اله . يحسين تنجن امه
حسبالها ايرد بالعذب . مو يرد فايض دمه
يا يمه وين الضحكه وين ارسومك
وانصبغن اهديماتك امن ادمومك
وين العصابه الخضره •• نامت النبله ابنحره
عبدالله يا عبدالله
…………………………………………………………
اكثر جرح بيه انفطر
گلب الامام المنتظر • ويبچيله من دم
ايعيش الرضيع ابمهجته
والسهم چنه ابچبدته • منه إيتألم
يطلع و يرفع هالطفل . وينادي كل الوادِم
ما ذنبه وبنبلة حقد . راس وجسم متجاسِم
موش ابوساده ابنص مهد . وسط الرمل ظل نايم
مانام ليلي واذكر ادميعاته
ولجود عمّه شابح اعويناته
رايد ولو بس گطره •• نامت النبله ابنحره
عبدالله يا عبدالله
…………………………………………………………
✍️ ( سيد خضر الزاملي )
قصيده للطفل الرضيع عليه السلام
###########
عبد الله يبني اشذنبك اوبالنبله فطموك
حرموك من شم الهوى يوليدي حوموك
#############
شنهو الذنب يمه الجنيته يعبد الله
من العطش فرفحت واگليبك اتسله
تيهت دربي يالولد الشاهد الله
ترفس على نگطة اميه العده خلوك
###########
عبد الله يبني مادريت انحرم منك
لبالي تكبر يالولد واگعد ابفيك
اشهور ستة اوفرفحت يوليدي لنك
ظلموك من الزغر ياعبد الله ظلموك
############
حرموني يبني شوفتك ياسلوة الروح
امك جويه اوعاينت نحرك المذبوح
بصوتي صحت والدمع عالخدين مسفوح
ابدال العذب بالسهم ياعبد الله رووك
###########
للخيمه جابه حسين والدمعه يهلها
بصوته نده يم الولد گومي يگلها
مذبوح ابنج يارباب ابشر نبلها
ضمت ابنها عالصدر صاحت مرحموك
###########
زينب اجت يمها يويلي اوگابلتها
امصاب الولد يم الرضيع الروحي فتها
ياريتني نبلة وريده ماشفتها
انشلت اديتك حرمله وابداله صابوك
############
نعي للطفل
//////////////////
شذنبك يعبد الله اوفطموك
اومن الهوى يوليدي حرموك
تنازع بالسهم يايمه خلوك
///////////////
شنهو الجنيته يعبدالله
اگليبي على افراگك تسله
ماوجد الدربي يشهد الله
///////////////
مدريت يبني انحرم منك
گلت تكبر يالولد واگعد ابفيك
فرفحت من العطش لنك
///////////////
جابه ابوه والدمعه هلها
يم الولد گومي يگلها
مذبوح عبد الله ابنبلها
///////////////
لام الطفل زينب گابلتها
مصاب الولد للروح فتها
اوحياتي بعده ماردتها
///////////////
ماريد عگب الولد روحي
اوخزنت يبعد امك جروحي
طول العمر مايهده نوحي
///////////////
تمت بعون الله للشاعره خادمة الامام الحجه عجل الله فرجه ام منذرالحجار ✍✍✍
قصيده رجاليه بحق الرضيع عليه السلام
**
ياعبد الله. شذنبك بالنبله ايفطمونك
ياعبد •اللّـہ
صابوا دلالي اوخلوني
منك يوليدي حرموني
ياعبد •اللّـہ @ ياعبد •اللّـہ
*
ابسهم الصابوك @ صابوا گلبي
يوليدي اصيح @ والباري حسبي
الدربي ماشوف @ يشهد ربي
اتوجه وين @ تيهت دربي
ماادري وين همت اوحسراتي تبعتني
ماادري وين
نشفت دمعات البعيوني
منك يوليدي حرموني
ياعبد •اللّـہ. @ ياعبد •اللّـہ
***
غارت العيون.@ وآنه احتاريت
الصدري ضميتك@ الحالك حنيت
تفرفح عالماي@ شذنبك سويت
هم مثل گلبك@ صحت اوناديت
مثلك عطشان يابس گلبي اومايتحمل
مثلك عطشان
من دمع اعيوني رووني
منك يوليدي حرموني
ياعبد الله @ ياعبد الله
**
العمتك جيت @ انشد شلراي
يزينب لحسين @ گومي وياي
اثلثت ايام @ ماضگت الماي
مابيه اشوف @ سلوة دنياي
مانام الليل. سهرانه اسكت بوليدي
مانام الليل
ماغمضت لاوالله جفوني
منك يوليدي حرموني
ياعبد •اللّـہ @ ياعبد •اللّـہ
**
شلت يسراك @ شلت يمناك
يالصبت اوليدي@ اوسهم ابعيناك
اسٲل الباري @ حرمله يبلاك
گلبي گطعته @ الباري حسباك
گلبي اتگطع سباحه اودلالي اتفطر
گلبي اتگطع
ابدال ابني ريت يصوبوني
منك يوليدي حرموني
ياعبد •اللّـہ @ ياعبد •اللّـہ
**
لو ادري الصار @ ماوديتك
من دمع العين@ جان اسگيتك
ياغصن عمري@ اشگد باريتك
تالي ترجعلي @ امدمه اوريدك
ترجع مذبوح. يبني ماحسبت احسابي
ترجع مذبوح
تمنيت ابدالك ذبحوني
منك يوليدي حرموني
ياعبد •اللّـہ @ ياعبد •اللّـہ
*
تمت بعون الله للشاعره خادمة الامام الحجه عجل الله فرجه ام منذرالحجار ✍✍✍
عبد الله عطشان انذبح.
ابدم منحره. اوليدي سبح.
نايم ومرتاح الولد
وانعه واهزن بالمهد.
،،،،،،،،،،،،،،،،،،،،،،،،١،،،،،،،،،،،،،،،،،،،،،،،،،،،،،،،،،،،
جابه ليه حسين. ساكت وذبلان
گماطه احمر صار. لسه ظل عطشان.
نايم المذبوح. من امس نعسان.
ليله كله ينوح. من البچي تعبان.
بطل يناغي الماشرب
ماي وينام من التعب.
عبدالله خافنه انحسد.
وانعه واهزن بالمهد.
،،،،،،،،،،،،،،،،،،،،،،،،،،،،،٢،،،،،،،،،،،،،،،،،،،،،،،،،،،،
اشگد رخيص الماي. والطفل غالي..
السهم ما اجاني.انطيه دلالي.
ولايصيب ابني. ويذبح هلالي.
منحره ازغيرون. ينگطع تالي،،
بسكته أسولف لايفز.
كلساعه اقراله حرز.
وتحرسه عين الله الاحد.
وانعه واهزن بالمهد.
،،،،،،،،،،،،،،،،،،،،،،،،،،،،،،،٣،،،،،،،،،،،،،،،،،،،،،،،،،،،
من العطش والحر. غارن عيونه.
عمره ست شهور. مايرحمونه.
ابيش اذاهم. حتى ياذونه.
لاسگوه گطره. ولا يخلونه.
الله يساعد والده.
بحضنه يرفرف شاهده.
عبد الله مايگعد بعد.
وانعه واهزن بالمهد.
،،،،،،،،،،،،،،،،،،،،،،،،،،،،،،،،،،٤،،،،،،،،،،،،،،،،،،،،،
حسين ماگتلي . السهم هم بچاه
شفته يتألم. والألم اذاه.
گلي حتى أني. أمچانه اصيحن اه.
زغير ما يحچي. وتنسمع شكواه.
گاللها من صابه السهم.
گطع أگماطه من الألم.
والنفس ودعني وخمد.
وانعه واهزن بالمهد.
،،،،،،،،،،،،،،،،،،،،،،،،،،،،،٥،،،،،،،،،،،،،،،،،،،،،،،،،،،،،
بروحه قصت ماي . هجرت شفافه.
يابس اللسانه . وذبلت أوصافه.
بعينه شاف الموت . الماي ماشافه.
عافني وليدي . وگلبي ما عافه.
من الهوه ليش أنفطم
ومن امه ياوسفه انحرم.
عن امه ساكت مانشد.
وانعه واهزن بالمهد.
،،،،،،،،،،،،،،،،،،،،،،،،،٦،،،،،،،،،،،،،،،،،،،،،،،،،،،،،
المگبره ظلمه. شلون بيها ينام.
طفل مايعرف. وحشت الاحلام.
من يلوليله. بعده بس الآم.
روحي يم گبره. وانسبي للشام.
بكربله مدفون الضوه.
لوبيدي ابقى ويا سوه.
فراگ الولد من موتي أشد.
وانعه واهزن بالمهد.
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
حيدرموسى الرميثي
ـــ
عمر الورد عمرك ليش أنكطع نحرك
عبدالله يبني عبدالله يبني
......................................
دللول ألولد يبنــــي ويضي عيناي
عدوك غـــــاد يمه وسكن بيه الداي
يا سباح كلب أمــــــــك يبعد أجلاي
نام بحضني يمه وأغفى بين أعضاي
خليني أشم عطرك ليش أنكطع نحرك
عبدالله يبني عبدالله يبني
...................................................
يتعب أرباي يبني ويا سهر ليلـــي
ليش أمن العطش ثغرك يبس ويلي
شنهو اليوجعك يوليدي دحجيلــــي
أهز مهدك يعبدالله انهدم حيلـــــــي
ضامي ويبس ثغرك ليش أنكطع نحرك
عبدالله يبني عبدالله يبني
.............................................
لبوك حسين شلتك بيدي وديتـــك
حرز بجفوفه يا عبدالله شديتـــــك
قريت القُل أعـــــــوذُ ويمه تانيتك
ومثل أهلال فجرك أنحني الجيتك
ترجعلي أنتضرك ليش أنكطع نحرك
عبدالله يبني عبدالله يبني
.........................................................
شفت بعيوني أبوك حسين من شالك
شمس وبجفه شفته أفيــــــاي سوالك
طفل كلهم لجن مـــــا رحموا أبحالك
وبدال المــــــــاي سهم رواك جتالك
كسرة كلب كسر ليش أنكطع نحرك
عبدالله يبني عبدالله يبني
.....................................................
رجع للخيمة محني ضهر أبوك حسين
وكلـــــــــــــــي يالرباب أبنج لفاه البين
ست أشهور عمرك لا سنـــــــه وسنتين
ليش بيا ذنب ذبحوك يضــــــــــي العين
الله اليعضم أجرك ليش أنكطع نحرك
عبدالله يبني عبدالله يبني
.........................................................
خادم خدمة الحسين
الشاعر
محمد الموالي
هاج اخذي الولد لحسين زينب ذبلت شفافه
گبل اشويه ابوه وياي هملت عينه من شافه
زينب اخذي عبدالله بلكت يشرب ميه
حيرني وحرت وياه ونشف كل عرج بيه
خوفي من يروح انوب روحه وما يرد ليه
من هسه الگلب محتار. .ما ادري شتواليه
يموتني القهر بجفاه وذكر شكله ووصافه
ماشايف شمس وشلون خافن هلشمس تاذي
وصي حسين كون يروح بجماغه الي اغطي
لو بيدي يخت عباس انه ومستحيل اطي
بس خافن يظل وياي وخاف من العطش يعمي
وگلبي تعلگ انه وياه وما لحضه ابد عافه
اردن للمهد وشلون كون الكه المهد خالي
الولي وماشوفه وياي وبجي برهدنه الحالي
رته وللكبر وياي يصبحلي السند والي
مو غفله ويروح اليوم وانه امرد بدلالي
هذا الحال هيج يصير وزود باجر خلافه
راح وشفت ابوه حسين دنك ونحنه ظهره
خافن طاح منه شلون طاح وسحكته المهره
ادعي الله ورسوله اليوم سالم والله ليستره
مااحمل ابد فركاه ويصعب من صدك هجره
وشفت الوالي دنك كام جابه واليه ماعافه
جابالي الولد مذبوح وسهمه البنحر وياه
شفته المن بعد يحسين جرح وليدي لو غاطاه
ريت بگلبي كون يصير سهمه وكون اموت وياه
ولاعيش الدهر بهموم راح وماضل برجاه
وگلبي منلحزن مفطور مارد الولي رافه
ابو سلام الجابري
#محرم1446
جم دللول بدللول عالمهد لولت يمدللول
امك اشگد صاحت اسم الله نوم العوافي يمه عبدالله
*
يعبدالله حسين اذكره بيده جابك للخيم نابت بنحرك سهم
صاح زينب الماي خويه بكربله عله وليدي شح وضامي عبدالله انذبح
حار السهم خويه وچوه اوريده
من شدته من اگماطه حل ايده
فرفح وصحت الماي ماريده
المن يظل الميت اوليده
زينب تگله الطفل غطيه مالي گلب يحسين اصد ليه
وآنه عله نار بخيمتي انتظرك ترجع لي تالي منگطع نحرك
*
مدري نايم مدري ميت اثنينهن نفس الألم گلي شيطلع السهم
شسوه بيه گطع نحرك بحضني خليتك ذبيح اهنا يعبدالله اصيح
ماتت دللولك وظل نوحي
عبدالله بعدك كثرت اجروحي
من شفت نحرك صحت ياروحي
طلعو السهم ونطوني مذبوحي
ذبحوك ضامي وبعدك ازغير اميه لو منطيك شيصير
تبجي ورضيع الكل يشوفونك ما حن گلبهم ماي ينطونك
***
يعبدالله ظلت امك تلولي وتهز بالمهد نام يمه يلولد
صحت وينك نشف دمعي لازمه گماطك وون الشوفتك يوليدي احن
خليتك بذاك الرمل غافي
مليت يبني من البجي كافي
مشتاگه انومنك على جتافي
ليش انحرم من صوتك الدافي
ارجع الحضني خل ادفيك حضن السهم مو دافي ياذيك
من فارگتني كبرت اجروحي ماريد روحي يالخذت روحي
*
يعبدالله تعب گلبي الك مشتاگه شكثر يبني تعبني الهجر
فارگتني وعذبتني بعد مابيه انتظر شظال بي يمه العمر
يبني بغيابك ماغفت عيني
نحرك يصبحني ويمسيني
يوميه اموت وذكره تحييني
من اذكر اناغيك وتناغيني
الشوفتك گلبي اهواي مشتاگ يوليدي ماينراد الفراگ
ماتدري يمه بحال المضيعه ما ألها غير الحسره والدمعه
*
يافرحتي من عفتني صارت ايامي عذاب ارجع الحضن الرباب
الفرگه صعبه بديره غربه شحال المضيعه ولد وتدري ما يرجع بعد
ارجعلي اصيح وارحم بحالي
عبدالله تكتل فرگت الغالي
بمهدك اهزن والمهد خالي
اشلون الوحك والرمح عالي
نزلو الرمح عبدالله عطشان يبست اشفافه وحيل ذبلان
ازغير نحره وشكبر رمحه ودري الرمح راح اشگد ايجرحه
**
تمت
#ميثم #العمري
📝 #محرم_1446هـ
💔 #عبدالله_الرضيع_ع
💔 #لسان_حال_الرباب
💔 #نعي
عمت عيــن السهــم مارحـم حالي
جنت ليّــه الضـــوه يمــه و تلالـي
سهمـــك ليش اجــالك مــاإجالــي
وبعــدك بالعمـــر ما كمّــلت عــــام
💔آه يمه يالولد ياعبد الله يايمه..
ـــــــــــــ ✿༺✿༻✿ ـــــــــــــ
رجــعت الخيمتـي يبنــي بــلا راي
أناغي لصورتــك بس ظلت ويــاي
واصيحـن آه يــا محــروم الفيــاي
هم عطشان هم تحت الشمس نام
ـــــــــــــ ✿༺✿༻✿ ـــــــــــــ
اويلي اعليــك يا مفطــوم بالـــدم
أمّــــك ثاكــلة وترثيـــك بالهــــــم
و دليل احسين ابــوك اشكد تألّــم
لمّــن صوبّــــوا نحـــرك الظُــــلّام
ـ... 💔 ...ـ
ـــــــــــــ ✿༺✿༻✿ ـــــــــــــ
💔 #طور_الفراق
ياصغيري.. يابعـد روحــي ودليــلي
ياصغيري.. ذَبحِتك هدت لي حيلي
ياصغيري.. اتخيّلك تِحبـي وتجيلي
ــــــــــــــ ✿༺✿༻✿ ــــــــــــــ
ياملاكي.. يالرِحَــلت ابغيــر اوانــك
ياملاكي.. دهري شو من هسه خانك
ياملاكي.. منهو يملـي لـي مكانـك
ــــــــــــــ ✿༺✿༻✿ ــــــــــــــ
📝 #الشاعرة_زينب_الخفاجي
🌿 #اللهم_صل_على_محمد_وآله
نعي ( عبد الله الرضيع ) 1446
****
تعب الضنى وسهر الليالي
خلاني حال الضيم حالي
غالي الولد يا يمه غالي
للشيب مامش بعد والي
لوليت وانطر تغفى وتنام
بس العطش للنحر محتام
ها يا عبد بالروح تنسام
يمه الولد ما تحمل سهام
يا ماي سير لابني رويه
يرجف عطش لا لا تخليه
موت وحرب چا وين أوديه
غمض عيونه وماد رجليه
فرفح لحد ما طلعت الروح
مذبوح رد وليدي مذبوح
بچف الحسين الغالي مطروح
هسه اللطم ينراد والنوح
موهيچ تالي لا يلولد مو هيچ تالي
تعبي ودلالي رايح بعد تعبي ودلالي
شمسويه بيه هذا السهم شمسوي بيه
هاي المنيه خلصت ترى هاي المنيه
مصايب كربله يحسين شلحال
عطش عبد الله شنهي الراي شلحال ؟
اذا تنشد يبو السجاد شلحال ؟
الرضيع بطرگ نفسه أبين أديه
كلمات الخادم / رعد الفريجي
محرم الحرام 1446
ثوابها الى روح والدتي
▪️هاي الليالي▪️
في مصاب السيده الرباب عليها السلام
والرباب اشحالها بهاي الليالي
ابعينها شافت مصايب هالغوالي
———-
ابعينها شافت ياويلي جم مصيبه
وصعبه عالدلال من يفقد حبيبه
شافت احسين وبعد جثته السليبه
هم تظن وتستجن تحت الظلالي
———-
شافت حسين وتدوسه الاعوجيه
وظلت الجثه على الرمضا رميه
وانفطم عبدالله بانبال المنيه
فطّر الدلال ويلي سل احوالي
———
المن المن هالمهد بعدك نهزه
ومنهو مثلك يالولد عندي اعزه
اشلون شفت الراس يايمه يحزه
جرحك اضلوع وقلب يمه حنالي
————
بعدك ازغيرون واتفطر دليلك
لادمع ظل وضما هدهدلي حيلك
بلايا راس اشلون يايمه اشيلك
عميه عين امك يعبدااله يغالي
————
يمه نام واغفه بيد الهادي جدك
ادري بحضينه اجا يمه يوسدك
يمه نار ابگلبي من انظر المهدك
والمن المن يارضيعي اشلون الالي
———-
يمه نام واغفه بحضين الزجيه
وارتوي منها ييمه هالمسيه
اشلون يمه لو ثقل صدري عليه
يمه بعيونك تعال وشوفه حالي
———-
بقلم:بنت الشمري
ليلة عبد الله الرضيع ع
عبد الله يبني لا تروح من أيدي ..
يالوجهك أحله من الكمر يوليدي ..
ليش يبني الغالي .. ظل مكانك خالي
............................
طبع كل أم على أبنهه تبني آمال شكثر ..
تذرع بطوله وتكمطه أصبع أصبع موشبر ..
أتكول كل صبح ومسيه الحمد لله والشكر ..
وتقره يم راسه دعاء وتقره آيه من الذِكر ..
لو يبجي تمسح دمعته من خدوده ..
تحس بأمان وبالأمل بوجوده ..
يالضواك أيلالي .. ظل مكانك خالي
...................................
ياحبيب أمك يغالي جنت ألوليلك وأظن ..
تكبر وغصنك يوّرد باجر وأنسه الحزن ..
جنت أناغيلك وألولي لحد مايغفه الجفن ..
العمره ست أشهر يعالم والله مو مالت دفن ..
مو للدفن عمرك يماي أعيوني ..
جنت آنه أكولن بيك ياخيعوني ..
يكبر أبني الوالي .. ظل مكانك خالي
...................................
العطش يبّس لهاته وذابله أرسوم الطفل ..
بحسره يوليدي أشوفك والدمع عالخد يهل ..
بحضن أبوو عبد الله غافي وفززاه سهم النذل ..
وآنه أدعي يا آلهي ردلي عبد الله عدل ..
مرفوعه أيدي وأدعي يا معبودي ..
شلال دمعي يجري فوك أخدودي ..
ودعت آمالي .. ظل مكانك خالي
...................................
هذا آخر يوم لأبني من الصبح أشعر وأحس ..
وأبني لا راضع حليبي ولا شرب ماي من أمس ..
منحره ضاوي ويلالي ويعكس بنور الشمس ..
بسهم المثلث بنحره صوبوه أهل الرجس ..
كطّع دليلي هالسهم وأبتوته ..
جي ماخذ من أيدي أعز ياقوته ..
الأوّلي والتالي .. ظل مكانك خالي
....................................
وحشه والكاروك خالي يبجي وينوح المهد ..
وآنه أحسب دمعه دمعه عمرك شكد يالولد ..
أبد ماجان على بالي تروح من أيدي أبد ..
غفله سهم الموت أجاك وفرهد أيام السعد ..
أبحضني أشوفك كل وكت كدامي ..
ما فاركتني أبصحوتي و بأحلامي ..
يابزر دلالي .. ظل مكانك خالي
.................................
يانظر عيني وحياتي يبني يا وجه الصبح ..
فاهيه الدنيه بغيابك وأنت للدنيه ملح ..
كون أحطه بمزهريه الورد مو مالت ذبح ..
منحرك خليني أشمه كبل مايعله برمح ..
أشلون أشمّك والرمح مالوحه ..
مو للرمح عمرك تره المرجوحه ..
دمعتي تحلالي .. ظل مكانك خالي
...............................
حيدر مطر العبادي
عبدالله ماي العين امك انه امك
اكعد يبعد جـــلاي جيت انا يمك
*
اكعد يماي العــين وفتح عيونك
ليش المنيه بساع غمضت جفونك
شتسوى بعد دنياي يوليدي دونك
وشيطفي جمر الاه شيطفي همك
*
ماشوف عدهه ذات كوم اللعينه
بنبلة غدر ذبحوك كلهم ضغينه
ودمك رماه ليفوك عودك ولينه
وماوكع فوك الكاع عبدالله دمك
*
ابجي ونوح اعليك وبكلبي حسره
وعبراتي لجلك دوم عبره اعله عبره
الفاكد عزيز الروح يبني شيصبره
احنلك حنين النوك وتمـــــنه اشمك
*
عبدالله بيك البين بالطف فجعني
خله الحزن والاه بــــعدك اجني
اليوم المنيه وياي زيـــــدلي وني
ووجهي الطمه حيل لومرني اسمك
*
مصابك يحز بالروح ومصاب الحسين
خلولي نص حشاي خولي جرحين
جرحك وجرح حسين صعبات الاثنين
وحالتي بعدك هاي جيت انا اعلمك
*
المات ابنه بالدلال ناره سريه
يبقه يجر حسرات حد المــــــنيه
والونه اله اوي النوح تصبح سجيه
ريتك ترد لحظات وبصدري اضمك
*
خادم اهل البيت / ابومحمد العاشور
قصيدة للطفل عبدالله الرضيع.ع.
تون ام الطفل ونت حمام الدوح
تكله يبني ليش تعوفني وتروح
✍✍
يا عبد الله انت دنيتي يبني
صواب الصوبك يا ريته صوبني
يوليدي الدهر عكبك ترى ذبني
وما ظنيت اشوفك يا الولد مذبوح
✍✍
ذبحوك الكفر مدري شنو ذنبك
لا رحموك يبني ولا اتقوا ربك
ولا اطوك ماي وبردوا كلبك
ضربوك بسهم خلوا ابوك ينوح
✍✍
رد حسين بيك الصوب المخيم
ونحرك فوك زند حسين يكطر دم
من شفتك ييمه حيلي اتهدم
عنك ليش يبني غيبوهه الروح
✍✍
ابدال الماي يبني بالدمه رووك
ييمه اشكال كلبك يبني من ضربوك
شنو ذنبك ترافس بالرجل خلوك
يبني خاب ظني يا عزيز الروح
✍✍
خذاك البين يمه وغربت لبعيد
الدنيا اعليك ظلمه يا هلال العيد
ابجي اعليك يمه والدمع شيفيد
اضل اعليك اون يبني بكلب مجروح
✍✍
تناغيني يعبد الله بعد هيهات
ترد اردود الي يبني ويرد الفات
يسباح الكلب شخصك تلوه ومات
ما اكدر اشوفك والدمه مسفوح
✍✍✍
تمت بعون الله وبحمده بقلمي المتواضع خادمة الحسين ع أم علي الحسناوي.. الفاتحه إلى شرف النبي وعترته الاطهار عليهم السلام وإلى أرواح المؤمنين جميعاً والى روح والدي وروح خادمة الحسين ع أستاذتي المرحومة العلوية ام حسام 🙏🙏
قصيده كعده ل عبدالله الرضيع ع السلام
خادمكم عبدالهادي العريفاوي
---------------------------
ياطفل جابوه صريع هذا عبدالله الرضيع
امه صاحت من بعيد ابني مكطوع الوريد
هذا عبدالله الرضيع
----------------------------
عفيه صبر أمك يغالي من اجيت بفيض دمك
وبو اليمه بحضنه شالك جابك لزينب يسلمك
ومن شفت زينب ييمه وهيه عن عيني تظمك
مشتاكه روحي لشوفتك امك تراني الربتك ليش ال أميه جازتك
سدد النبله ويألمك
بالسهم صار الفطام هذا عد الله حرام
من اسألك يايزيد ابني مكطوع الوريد
هذا عبدالله الرضيع
------------------------------
من خذاك حسين مني وكاصد لذاك الملا
ونته شربت ماي تطلب يامصيبة كربله
بالسهم يكطع وريدك ألله يلعن حرمله
تخسه الجيوش الظالمه من نحرك يفيض الدمه حضرة مصابك فاطمه بالطف سلت جم معضله
عالجثث كامت تطوف جم صريع اللي تشوف وتسأل بيوم الوعيد
ابني مكطوع الوريد هذا عبدالله الرضيع
--------------------------------
عيني تتنطر تردلي مااجت هاي اعله بالي
شنهو عذره المرد كلبي هذا ياربي سؤالي
غفله راح وليدي مني والمهد ياوسفه خالي
يوليدي مو عقلي انذهل ياوسفه جن خاب الأمل شوف الدهر بيه شعمل
والصخر يبجي اعله حالي
شلون يوليدي عفتني وبغيابك دوهنتني
والدهر مني شيريد ابني مكطوع الوريد
هذا عبدالله الرضيع
---------------------------------
شنهو عذره الكطع نحرك يبني يم سيد البريه
بالحشر يبني تشوفك فاطمه الزهره الزجيه
جم مصيبه اللي لفتها من أراضي الغاضريه
دلالي يوليدي انمرد تاه الفكر مني وشرد
راح اصبر ليوم الوعد
اشتكي لرب البريه
باجر يكول القلم منهو سدد بالسهم
ربنا عالدنيه شهيد ابني مكطوع الوريد
هذا عبدالله الرضيع
🌑السلام على الرباب ورضيعها
🏴لوّن اعليك دهري يالولد يبني
🏴ما لوم الخلگ لمن تعاتبني
يمر الليل سهرانه والوليلك
يطر الفجر يايمه واناغيلك
كل يوم انتظر وعيوني تربيلك
هذا الحال هو اليّ يتعبني
ساعه الزم اگماطك بيدي أشدنه
وساعه المهد يوليدي أهزنه
أرد اردود اشمه ونوب احضننه
واكولن ياوسف فرگاگ شيبني
من تسمع ونيني الناس والوفاد
تعاتبني وتگلي عاد بسچ عاد
على فگدك ييمه حرميت الزاد
تعال وشوف دهري شلون دولبني
رحت عطشان يبني ماشربت الماي
واجاك السهم ويلي وگطعالي إحشاي
ترد دامي النحر مفطوم يارجواي
مصابك ياوليدي العگل سالبني
تظل صورة ضحكتك وسط عين امك
متبارح خيالي و عايشه بحلمك
شلون اصبر ييمه ويا عظم همك
آه امن الهجر والهجر عذبني
#سمير_الصالحي
#النجف_الأشرف
————————————-
🏴مناغاة الأم الثاكلة لرضيعها ..
⚫️يبني وينك
أمك واشتاگ اشمك
⚫️يبني وينك
لويصح أندفن يمك
⚫️يبني وينك
ماترد يوليدي لامك
⚫️يبني وينك
چنت اناغيلك يروحي
⚫️يبني وينك
ضحكتك تشفي جروحي
⚫️يبني وينك
كثر همي وزاد نوحي
⚫️يبني وينك
صدگ نحرك گاطعينه
⚫️يبني وينك
بالوريد مصوبينه
⚫️يبني وينك
أبگه ولهانه وحزينه
⚫️يبني وينك
من اهز مهدك ييمه
⚫️يبني وينك
عطرك يفوح وأشمه
⚫️يبني وينك
أحضِنه ولصدري اضمه
⚫️يبني وينك
مساهره والنوح فني
⚫️يبني وينك
أندبك عبدالله يبني
⚫️يبني وينك
فرگتك زيدت وني
⚫️يبني وينك
من ألوليلك وأنعه
⚫️يبني وينك
أهجسك صوتي تسمعه
⚫️يبني وينك
تنزل من عيوني دمعه
⚫️يبني وينك
آه ياشمعة سنيني
⚫️يبني وينك
بعد مايبطل حنيني
⚫️يبني وينك
أنطر وما اظن تجيني
#سمير_الصالحي
#النجف_الأشرف
قصيده للطفل الرضيع عليه السلام
+++++++++++++++++++±++
گلب امك صبح مجروح
عبداللة الطفل يبني
+++++++++++++++++++±++
اگعد يبني تالي الليل
اصرخ والدموع اتسيل
على فرگاك اصيح الويل
اومايبطل ابد وني
+++++++++++++++++++±+
لعد مهدك اهزنه
خالي من اشوفنه
تظل ابگلبي الونه
يلي ارباك شيبني
+++++++++++++++++++±++
راح التعب راح ارباي
ماوحده ابتلت بلواي
مثل الطير رف عالماي
عطش گلبك امروعني
+++++++++++++++++++±++
نص الليل افز وانعي
ميسوره اوكلف وضعي
شدعي الحرمله شدعي
من شوفتك يحرمني
+++++++++++++++++++±++
گلت حسين لو ذبحوه
اوليدي يكبر ايخلوه
من دم النحر رووه
تالي خاب كل ضني
+++++++++++++++++++±++
يادنيه فجعتيني
ذبحوا يمي اجنيني
عطشان اويبجيني
مصايب دهري اذني
+++++++++++++++++++±++
اصيحن يالولد يمه
اظل لفراشك اشتمه
علي دهري رمه سهمه
سهم غدار فارگني
+++++++++++++++++++±++
تمت بعون الله للشاعره خادمة الامام الحجه عجل الله فرجه ام منذرالحجار ✍✍✍
ــــ السلام على عبد الله الرضيع ــــــ
ضل يبني وياي ـــــــــــ ماأحمـــل يوليـــدي الفركه
ضل يبني وياي ـــــــــــ تدري بروحي اتحب الملكه
ضـل يبني وياي ـــــــــــ ضل يبني وياي
ـــــــــــــــــــــــــــــــــــــــــــــــــــــــــــــــــــــــــ
چم شهكت امـــــــوادع تارسة ايامي
وچم تابوت بيه الشيــــــع أحــــلامي
شله بروحه النهر لو مايه ضل ضامي
تعــــال الليل حزنك عثرت أجدامي
ضل يبـــني وياي ـــــــــــ ياكـــعبة عمري وتربيتي
ضل يبنـي وياي ـــــــــــ يا محبوبي وشمعة بيـتي
ضل يبني وياي ـــــــــــ ضل يبني وياي
ـــــــــــــــــــــــــــــــــــــــــــــــــــــــــــــــــــــــ
يخنـــكني الهوة وبس عـــــطرك اشتمه
وبعـــيوني النــــجم مـــتخــظب بــــدمه
گلبي يشوف مايــه اومــــــا وصـل يــمه
وخذ عمره العطش ضــــل منتضــر عـمه
ضل يبني وياي ـــــــــــ رويت الكاع ابدمعاتي
ضل يبني وياي ـــــــــــ ونه حسره كل لحظاتي
ضل يبني وياي ـــــــــــ ضل يبني وياي
ــــــــــــــــــــــــــــــــــــــــــــــــــــــــــــــــــــــ
ياعبدالله العــــــطش مافارك اسنيني
اوشلي بعمري اذا ماشـــــافتك عيـني
بچفوفك ييمه احلـــــــم تغــــــطيني
بتــــــــراب اللحد خاطــــــر توافيني
ضل يبني وياي ـــــــــــ تحمل تابوتي على متونك
ضل يبني وياي ـــــــــــ ولاشـــــوفن عني يبعدونك
ضل يبني وياي ـــــــــــ ضل يبني وياي
ــــــــــــــــــــــــــــــــــــــــــــــــــــــــــــــــ
بيه اتسافر احـــــــــزاني مــن أذكرنك
وحلم ترجــع بعــــــد يبنــي واشوفنك
يماي وطــاح مـــــنــي اشلـــــون المنك
ويا نســــــمة اعـــذيبي اشلون اشــمنك
ضل يبني وياي ـــــــــــ وتنـــــــفس يوليد انفاسك
ضل يبني وياي ـــــــــــ احجايت امك خلها براسك
ضل يبني وياي ـــــــــــ ضل يبني وياي
ـــــــــــــــــــــــــــــــــــــــــــــــــــــــــــــــــــــــــــ
بس الــــــفاگد اوليده يـــــــــحس بيه
اويــــعرف ونـتــي المــــفگــــود واليه
اوياليل المــــــوادع طـــــول اشـــويه
گبــــــل ماروح عـــن ولــيدي مســـبيه
ضل يبني وياي ـــــــــــ من أشتاك اشتم قمصانك
ضل يبني وياي ـــــــــــ دلالـــــــي يرتــــــل قرانك
ضل يبني وياي ـــــــــــ ضل يبني وياي
ــــــــــــــــــــــــــــــــــــــــــــــــــــــــــــــــــــــــ
الشاعر خالد جودي العارضي
#محرم1446
يوليدي يالغالي ..... ظل المهد خالي
عبد الله يبني بموتتك
ذبحولي امالي
...... 1 ......
يوليدي تدري بموتتك باكو فرحتي
ما ظلي كلشي بدنيتي تشهد عبرتي
ما حسبت تمشي وتخليني ابحسرتي
خابت ضنوني يلولد بالغاضريه
يا فرحت ايامي .... باكوهن احلامي
من رجعوك الخيمتك ... مذبوح كدامي
..... 2 ....
سهر الليالي والتعب ذاكه التعبته
من عندي راح ابفركَتك ماي وشربته
من الله بس انت بدمع عيني طلبته
حاربني دهري وباكَك بسهم المنيه
بعدك يمحبوبي ... اسود صبح ثوبي
رحت وعفتني للمحن ... هذا انه مكتوب
.... 3....
اه شكثر مشتاكه الك بيك افجعوني
بكماطك اثار الـدمه تنظــر عيوني
ريت انه كَبلك بالسهم يمه اذبحوني
ولا شفتك ابدمك تخضبت المسيه
من جرحك اجروحي ... يا مصدر النوحي
سهم الي صابك بالنحر ... صوبني ابروحي
...... 4 .....
كل ساعه اصد المهدك وما بيه اشوفك
لا بيه اصدك ذبحتك لا بيه اعوفك
متعوده اناغيلك جنت والزم جفوفك
وبحضني اضمك يالولد بثنين اديه
موحش صبح ليلي ... موتك اخذ حيلي
جلمت دللوه يالولد ... حرموني يا ويلي
....... 5 .......
لو أدري ما ترجع ألي ما عفتك اتروح
جا بالدمع يبني رويتك وانت مطروح
شنهو الجنيته بروحتك يا سلوة الروح
فوك العطش ذبحوك يا فرحت رقيه
كل ضني يرونك ... مو نبله يرمونك
ما حسبت هيج الحقد .. بالما يحبونك
... تمت ...
......
موسى الخادم
سهرت أشكد على ارباك
يماخذ روحي وياك
*
يعــبد الله… المهد خالي … اسمعــنّه يـــون
يمحبوبي… على افراكك ... ييمة راح اجــن
صور رسمك… على بالي … اكلبهة واحن
خلص صبري…ركد ثوبي…عليك امن الحزن
هويتك وابقى اهواك
يماخذ روحي وياك
***
خذك مني…غصب دهري … تركني بلوعتي
بعد مـوتك ... فـلا نشفت … يغــالي دمعــتي
شسولفلك… سهم فكدك ... رمــاني بحيرتي
عليك اكظي ... العمر انحب ... يصاحب قصتي
ابد ما لحظة انساك
يماخذ روحي وياك
***
جـرح فكدك … يظل نازف … فـلا يشفة ابــد
بعد عينك … ذبل غصني ... يـ أحله امن الشهد
الك يبني … اريد امشي … وحك ربي الصمــد
حياتي بلا ... وجــــودك ما ... اريـــدنهة بعــــد
اريــدأ يبني ملكاك
يماخذ روحي وياك
***
دعاء ميت ... الك اقـــرأ ... صعب كلش صعب
رحت مني ... بعمر وردة ... يسباح الكـــلب
اجر ونه … والف حسرة ... الغرفتك من أطب
فلا يكفي … دمع عيني … عليك اشما يصب
لخلّص عمري أنعاك
يماخذ روحي وياك
****
امنذكرنك … يعبد الله … اصير ابلا فكر
المهد خالي ... عفت عندي ... امن شوفنه انعصر
عسن ميته… كبل موتك… شلي بهذا العمر
ليالي الهم … وراك اشكد … لفتني يا بدر
ذبح ذابحني فركاك
يماخذ روحي وياك
**
الحمد الله رب العالمين
اللهم صل على محمد وال محمد
موسى الخادم
1446 هـ
#قصيدة_لعبدلله_الرضيع_ع
كأني بمولاتي الرباب ع تخاطب السهم المثلث الذي ذبح طفلها الرضيع عليه السلام و تقول
بعـــده مـــا گايـلي يُمّه
و ابسـهم ماريد افطمه
لا تمر بي يَمّنه مـــا شافـــك قبل
يعرف اهله و منّك ايخاف الطفل
يسهمه يسهمه
ـــــــــــــــــــــــــــ ـــــــــ
عِطَش لـــب الگلُب. وضـــــع طفلي صعُب
وآنه احفرت الجفن . ردتـــــله مي شُـــــرب
بالخيم ظليت احـــوم ابلايه راي
دورتهن خيمة خيمة و ماكو ماي
و انه حتى ابلا دمع صــاير بچاي
ذابــل و يبســــت لهاته
و فرفحت روحه لخواته
لا يفــز نايــــم اتـــــــــركه يالنبِل
يعرف اهله و منك ايخاف الطفِل
يسهمه. يسهمه
ـــــــــــــــــــــــــــ ـــــــــ
سكت مــــن الضمه و صحت يأهل السمه
دخيــــلك يـــــا علي. و دخيـلچ فاطـــــــمه
شما اشــــــوفه وجـه للاصـفر يميل
أركض لصـــوب الگمر ركضة دخيل
ناسية ابلا عين ظـــــل عمه الكفيل
وينه عَمّه خـــل يشـــوفه
و چني ما ادري ابچفوفه
وضعي صاير عالــــولد ما ينعقل
يعرف اهله و منّك ايخاف الطفل
يسهمه يسهمه
ـــــــــــــــــــــــــــ ـــــــــ
شِفـــاهه اتفَطِرَن . و ضلوع امـه انحنَن
صرت انخه النبي. بكسرته اعله الحسن
شما سألني حسين گتله وليدي زين
و انه اشــوفه مــا ترفـله حتى عين
وين چانت هالمصــــايب عنّي وين
گلبه حــار و جسمه بارد
غافي مدري يموت گاعد
يُمه گتله لخاطر امــك ظل عدل
يعرف اهله و منك ايخاف الطفل
يسهمه. يسهمه
ـــــــــــــــــــــــــــ ـــــــــ
شِبَح وجه الضوه و احس گلبي انچوه
أشوفه مخــــتنگ و اعــــارك بالهــــوه
شايطة و اجدامي ظلت ما تسير
أمه انه و حيلي چـــا بله شيصير
يا سهــم مـــو لذبح نحره الزغير
ترفة روحه لا تجــــرحه
هذا گلبي و هاك اذبحه
و اگطع أوداجه ابداله امن الاصِل
يعرف اهله و منـك ايخاف الطفل
يسهمه يسهمه
ـــــــــــــــــــــــــــ ــــــــ
ردت وگـــت السبي يظَل يَمِّي ايحَبي
و اذا طلعت شمس أغــــطي بالعبي
صورة من حسين يصعد عالجمال
ابحضن عمــاته ينــام اويه العيال
و الهزيلة اتهزه و تگمــطه الحبال
يا سهـــم لا تــــدنه يَمَّه
خله غافي ابحضن امه
و انه الوليله و اسكته اعله الهزل
يعرف اهله و منك ايخاف الطفل
يسهمه. يسهمه
ـــــــــــــــــــــــــــــــــــ
الحمدلله
#علي_حسين_الكناني
#الرضيع
#ليلة_الرضيع
#شهادة_الرضيع (ع)
جفيري:
مَرّه أخيره يالولَد
خلّيني اْهِز بيك المَهَد
أشعُر مَتِرجَعلي بَعَد
يالعُمري فِدوَه لْضِحكِتَك
يالتِّمشي عَنّي مْنِ الزُّغُر
عْلى مْصابَك شلون الصَّبُر!
خلّيني اْضُمّك للصَّدُر
خلّيني اْقَبِّل وَجنِتَك
نَحرَك مَيِتحَمَّل سَهَم
و گلبَك زِغير عْلى الألَم
شْلون عْلى صَدرَك يِجري دَم!
مَتْحَمَّل آنه ذَبْحِتَك
خَلّيني اْشيلَك عالإدين
يابني و يَضَيْ عين الحُسين
وين آنه صير و إنته وين!
أوّل مُصابي مْصيبِتَك
آنه امَّك و إسمي الرّباب
بعدك أعيش اكبر عذاب
تدري يِسِلبوني الحجاب
وْ يِسبوني وَيَّه عمِّتَك
#عظم_الله_أجوركم ◾️
فاطمة رزق
بتوفيق الله وصاحب الأمر كله❤️
محرم ٢٠٢٤
لسان حال الرباب بعد استشهاد الرضيع
إبــجنح جــبريل لــفَّه إكـماطة
والـشِمر دكـَ حيل بيَّه إسياطه
آه يادم الرضيع آه يادم الرضيع
ذبـحو عـيون الصـبح صـارت ظـلام
ليــش ينزف مَنحـرك يَـبـن الإمـــام
انت بالخــيمة جـنـت مــثـل الـحمام
جـنت أشوف الخوف بس يمك سلام
كسر ظهري من صِرخ بـعـياطه
إبــجنح جــبريل لــفَّه إكـماطـه
آه يادم الرضيع آه يادم الرضيع
مــن غـٌفه الليـل وطلـع وجه الكٌمر
نــاغيته يــَوليدي عِمـه حتى النَظر
روحــي ويه عــيونكم تــجمع صور
وهـذا حـِضني يـريدكم مو بَس أثر
اه يا ضيم الـ الكلب ونيــاطــه
إبــجنح جــبريل لفَّـه إكـماطـه
آه يادم الرضيع آه يادم الرضيع
حـــسين جـان هــواي كَلـبه يِدللك
ويِـشهـك ابطاريـك لو حَــد زَعلـك
كلـــمة البــابــا صِغيرة و تــِسألك
لو رحـت بــس كـولها مَـرَّة الهـَلك
حرك كلبي وبس أشم اشياطه
إبــجنح جــبريل لفَّـه إكـماطـه
آه يادم الرضيع آه يادم الرضيع
ليش كلبك حـار يِنــبض بــَس ألـــم
هــو صح إكمــاط بـَس طِيـحة عَـلـم
يـَل ردت بس مــاي ذبــحـــوك بـسهم
روح بس شـوكك نِـبش روحي وهِدَم
ماسكت جرحي الغميج خياطه
إبــجنح جــبريل لــفَّـه إكـماطـه
آه يادم الرضيع آه يادم الرضيع
لٌــــبَابــَة آلــ يــاســين
من يدي ليد صاحب الزمان
بتوفيق الله وصاحب الزمان
محرم ٢٠٢٤
لسان حال الرَباب بعد استشهاد عبد الله الرضيع ع
وَلــولــيـلـَك يَــــعـبــد الله
وألـــولـي وِيــاك كِـل هَمَّي
يَــدم حــســين بِـــعروكَـك
يِــجـري ويِـــشــتِعل دَمـي
تَـــرٍف عـــودك يَـبـعد امك
كَـبـٌـل لاتــِنـذِبـِح سَـــمٍّــي!
يَـشجرة ووكـعت أغصانك
ذِبــْحــوا نــَـشـوِتــَك يَـمّي
راح الــوَجــنِــتــه اتـــلالي
وتـــكـلي دمــوعـكٌم لِــمّي
حِضن خالي يحس طاريك
يِخطها أحروفكم بأســمي
وَمـشي بهالدرب ماشـوف
وَحسها إتكطـِعَت جِــدمي
يَــعـبد الله اللِــبـَن بايِّـــت
يــرِضَـع هـاللبَــــن غَــمِّــي
بــِكـمــاطـَك أوَزِر الـــروح
وكِل لـِثـيـابـــكــٌم شِــمِّــي
أنـــام اللــيل بَــلكي اللـيل
يِشـوّف رسـومـكم حِلـمي
ووِّن آنه ابطريـج الـخوف
ودمعي من الحزن يِعـمي
وأبــكَه أتــذَكـَـرَك يَــربـاي
مـــاتَت ضِحكِــتك يـمِّي
لٌبــابة آلــ يــــاسين
وزن: طويل
من يدي ليد صاحب الزمان❤️
نعي گرناوي
《وزن نصاري》
++++++++++!+++
اهز مهدك والوليك واناغيك
واگلك هاك در ثديك يغالي
اهز بالمهد ما انام باليل
واهدومك اسطرهن اگبالي
واگدر علی طولك ثوب واگماط
واگول اشگد حلو اولیدي ودلالي
واحضرلك منامك وافرش اعطور
وحچبیک وانه راسي عالي
عندي اوليدي چنه لیلة العيد
ومثل شمس الضحه جيده يلالي
رضیع اوليدي ياهو الگال مذبوح
اشوفه ایصیحلي يمه تعالي
اثاري عالرمح راسك يمفطوم
واثاريني اهز بالمهد خالي
♡♡♡♡♡♡♡♡♡♡
✍...تمت بقلم الشاعره العلويه ام ضيغم المحنا لا نجیز حذف الاسم یتقابل مع العباس ابو فاضل✋
نعي في مصاب السيده الرباب عليها السلام
▪️ابوذيات▪️
مصابك فطر اگليبي وسله
ومثل سل السيوف ابروحي سله
ييمه اشلون انسى گلي واسله
يموتني الصدر من يثقل عليه
————
الدمع بالروح مو من عين اصبه
رضيعي امن الهوا خفت ويصبه
تاليها الرمح ضامي يصبه
ويصيب الروح واكليبي سويه
———-
▪️نعي▪️
اشحال الرباب ابيوم عاشر
بعد المصاب وعينها اتاظر
شنو بعد يجبر الخاطر
ميت ضناها وعمره اشهور
ضامي ياروحي القلب مفطور
واعله الرمال الجسد مشمور
تمشي ومعاها الراس مقطوع
وفوق الرماح اتشوفه مرفوع
ضيم وقلبها والله مشلوع
در الصدر وي دمعة العين
وتشلع قلبها شوفة احسين
نار وتشب بالروح للبين
—————
بقلم:بنت الشمري