7626
خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
ياسيد الاكوان يالمصطفى
بفقدك على الحياة العفى
يبن اشـرف عشيره وعمه ابوطالب
وابن عمـــــــك مقاتل خيبر الغالب
الك ڪل هالعرب رفتــلك الشارب
والك بالمصحف الباري بقه يخاطب
أَلَمۡ نَشۡرَحۡ لَكَ صَدۡرَك وَوَضَعۡنَا عَنكَ وِزۡرَك
بحرُ الندى رمزُ العلى والوفا
بفقدك على الحياة العفى
يخـــــــــاتم الانبياء وســـيد العالم
ابــو الڪـــــل آدم وانت ابو آدم
الكرم بسمك يصير ومو بسم حاتم
يمن بالرحمه ݘفـــك للخلگ سالم
لَعَلَىٰ خُلُقٍ عَظِيمٍ قَالَهَا رُب عَلِيمٍ
وذكرك للداء صار الشفا
بفقدك على الحياة العفى
ابمحبتك رضّعتنه امن الصغر امنه
وترانه ابخلــقـك وخُلقـــــــك تعلمنه
محمـد يـــامحمـد انتـــه مُلهــــــــمنه
الصلاة اعليك تجـــري سيدي ابدمنه
ارسل الله نبينا رَحْمَةً لِلْعَالَمِينَ
قد انزل الله لك المصحفا
بفقدك على الحياة العفى
اذا يم يوســـــف انجـوم السمه سجدت
الگمر لجله انحـنه ويمه الشمس ركعت
الك كــــل هالخلايق يالنـــــــبي صلت
وضمايرنه الخـــــدمتك تعرف اتشوگت
شوقنا بالقلبِ يبقى لرسول الله نلقى
كشوق يعقوب الى يوسفا
بفقدك على الحياة العفى
كلام الله نزل يالمصطفى لجلك
لَهُمْ لَوْ ڪُـــنْتَ فَظًّا ربك يگلك
غَلِيظَ الْقَلْبِ لَانْفَضُّوا مِنْ حَوْلِكَ
عليهم رحمة الله انت وي اهلك
اية التطهير انتم بالعلى والخلد فزتم
للدينِ صار اسمك المسعفا
بفقدك على الحياة العفى
وليد المندلاوي
في ذكرى استشهاد الرسول الأعظم (ص)
فرگتك هدَّتلي حيلي
او ذبِّحت حلمي اودليلي
يا رسول الله هِظيمه
فاطمه تصبح يِتيمه
يا هِظيمه يا هِظيمه
&&&&&
يالچنت ليَّه دُفُو
اشحالةِ الما عدها أبو
يهجم اعليها العدو
اويكسر الها چم ضلع
ابنيِّتك لمدلله
ادموعها بس هامله
صارت ابشدَّه او بَلَه
اوخدها بعدك ينصفع
من تحل بيك المنيه
يحترگ بيتي عليه
انته خيمه اومالي خيمه
فاطمه تصبح يِتيمه
يا هِظيمه يا هِظيمه
&&&&&
يبو اچفوف الدافِيَه
روحي بعدك طافِيَه
اوياك أخذت العافِيَه
والفرح ويه الهوه
ليل بعيوني الصبِح
من بعد وجه السمِح
والجرح بعد الجرح
ينزف ابگلبي سوه
الدهر ما عنده مشاعر
صار بضلوعي حوافر
هذا دهري اوهذْ ضيمه
فاطمه تصبح يِتيمه
يا هِظيمه يا هِظيمه
&&&&&
إلك أرفع شكوتي
ابهظم مطرت غيمتي
شوف عالخد دمعتي
بالحزن صارت تسيل
أصرخ ابصوت الألم
بيتي يا بويه انهدم
اغيابك ابگلبي سهم
او سَحِگ يشبه بويه خيل
اغيابك ايشيِّبلي راسي
اويجرح ابضيمه حواسي
دنيتك تدري لئيمه
فاطمه تصبح يِتيمه
يا هِظيمه يا هِظيمه
&&&&&
بعدك آنه اتيتَّمت
او حيل بويه اتعذَّبت
مثل ورده اتذبَّلِت
امن المدامع والسهر
من تسافر للسمه
ينغدر حامي الحمه
اويوگع اجنيني ابدمه
اوتسمع ابضلعي انكسر
بويه حيَّرني زَماني
موتتي ظليت أتاني
كلشي بعدك بويه هيمه
فاطمه تصبح يِتيمه
يا هِظيمه يا هِظيمه
&&&&&
إسمي سيِّدْةِ النِّسه
والدهر بيَّه قِسَه
اعليك أون صبح او مِسه
بويه يا خير الرِّسِل
صرت باب الكل حزن
اوگلبي بالهم مندفن
ليلي بويه من يجن
أذكرك والدم يهل
إنته بس ابگلبي غالي
ليش تجرحلي خيالي ؟!
اِلغياب أكبر جريمه
فاطمه تصبح يِتيمه
يا هِظيمه يا هِظيمه
&&&&&
ساكْته اوبيه جمُر
اوعلي يتجرَّع صبُر
اوخدُر ما ظلِّي خدُر
بعد عينك يا أبي
بويه هاي العايله
من عفتها معوله
تنتظرها كربله
اوينتظرها أعظم سبي
من بعد عينك يبويه
زينبك تصرخ يخويه
دم على الشيبه الكريمه
فاطمه تصبح يِتيمه
يا هِظيمه يا هِظيمه
&&&&&
إبراهيم الدريس
في ذكرى استشهاد النبي الأكرم (ص)
بويه بويه .. دمعتي ابعيني
بويه بويه .. فدوه حاجيني
لُو رحت من بين إِدَيَّه
يحتركـ بيتي عليه
بويه بويه
&&&&&
فركتك يا بويه صعبه .. اموادعك أكبر جَرِح
اشلون ترحل عني بويه ؟! .. او هالزمن تدري وَكِح
بس تِغَمْضِ اعيونك انته .. ابعصره صدري ينجِرِح
اعيوني ما كفَّت دمعها .. او عالجرح ذبَّوا مِلِح
بويه بويه .. بعدك أتيتَّم
بويه بويه .. ضلعي يتهشَّم
من تخاويها المنيه
يحتركـ بيتي عليه
بويه بويه
&&&&&
إبتِدت قصةْ عذابي .. بويه من كلمةْ (هِجَر)
او هيه ما إلها نهايه .. حته لو ضلعي انكِسَر
احجايةِ اغيابك يبويه .. حفرت ابخدي نَهَر
او كرّبت ساعةْ أكلك .. خدي يا بويه انسِطَر
بويه بويه .. بنتك الزهره
بويه بويه .. تنتظر سطره
من بعد هاي الرزيه
يحتركـ بيتي عليه
بويه بويه
&&&&&
بعدك أكضيها الليالي .. بويه مجروحةْ كلُب
او دمعي بعيوني يكلك .. افراكك انته أصعب صعُب
من تغَمْضِ اعيونك أنظر .. حكِّي جهراً ينغصُب
و أنضرب بالسوط و آنه .. عاده ما عندي الضرُب
بويه بويه .. جالورد أذبَل
بويه بويه .. أنضرب تقبَل ؟!
و أجرَع ألوان الأذيه ؟!
يحتركـ بيتي عليه
بويه بويه
&&&&&
يوم شالَوا بويه نعشك .. روحي صارت مقبره
او ضاكت ابعيني الوسيعه .. او مدمع اعيوني جره
أرد أخبرك بس تروحن .. تنكلُب أُمْتك تره
يهجمون اعليه كلهم .. و آنه بس وحدي مره
بويه بويه .. حلميِ اتبدَّه
بويه بويه .. عصرَوا الورده
فوكـ لجروح اللي بيه
يحتركـ بيتي عليه
بويه بويه
&&&&&
بعد عينك يا حبيبي .. و اشكثر تهظُم (بعد)
عَمَد إنته و انته تدري .. الخيمه تهوي ابلا عَمَد
هسه صار اسمي اليتيمه .. او صار ما ليه سَنَد
اجروحي تتنازَف شفتها .. لنَّه ما يمها الضُّمَد
بويه بويه .. رايده أشتمَّك
بويه بويه .. و أندفن يمَّك
او كبرك ايضُمْنه سويه
يحتركـ بيتي عليه
بويه بويه
&&&&&
بعد عينك بويه حيدر .. اهوايه تجرح حالته
بالحبال ايجرَّه حاقد .. و اهوه يجري دمعته
جَرَّوا المصحف عجيبه .. شنهي بالله اجنايته ؟!
او من حبل أهل الظغينه .. دم تسيلن ركبته
بويه بويه .. يكسر الخاطر
بويه بويه .. ابفركتك حاير
جَرْجِرَوا حامي الحميه
يحتركـ بيتي عليه
بويه بويه
&&&&&
خادم الزهراء (ع) : إبراهيم الدريس
في ذكرى استشهاد النبي الأكرم (ص)
من شال النعِش حيدر
ضلع الفاتحه اتكسَّر
السكينه اتودِّع اليوم السكينه
علي ابفكد النبي ألله يعينه
ألله يعينه
&&&&&
هذا أبو الحسنين لمَّن شال بجفوفه النعِش
ضجَّت ابحسره المدينه او مال عالهادي العرِش
الفاتحه آهات صارت من بعد طه تِطِش
و ابدمِع عالهادي أحمر امبلَّل أنظُر كِل رِمِش
عالهادي بِجَه المصحف
او حسراته مَتِتْوَصَّف
بآياته تِصِد آيَةْ وِنينه
علي ابفكد النبي ألله يعينه
ألله يعينه
&&&&&
والله حكه الكون يبجي او يذبَل ابحزنه الوَرِد
هذا شمْس الله او أمانه الراح او لا يمكن يِرِد
اشلون عرش الرحمه هوه اتراب ايضُمَنَّه او لِحِد
و اللي وجهه امرايَةَ الله اغيابه ما واحد يِسِد
لِغْياب النبي الكعبه
اتونِّ او حسَّتِ ابغُربه
زمزم صاح هاليوم ابـ حَنينه
علي ابفكد النبي ألله يعينه
ألله يعينه
&&&&&
مدمع الزهره الجَليله عالأبو من ينسِجِب
آية أحزان الكواكب بالمدامع تنكِتِب
من بعَد عين أبو القاسم دار بنته يلتِهِب
او ينسطر خدها او مَتِنْها ابسوط ويلي ينضِرِب
بعْد المصطفى الزهره
يهديها الزمن عصره
حمامَةْ غاره هالليله حَزينه
علي ابفكد النبي ألله يعينه
ألله يعينه
&&&&&
من بعد طه نبينه صار أبو الحمله غريب
تجذب الوَنَّه الكنائس تجري دمعات الصليب
ابغيبةِ المختار حيدر اتيتَّم او خاوَه النحيب
ايكضِّي كل عمره ابصَفِنْته اليدفِن ابجفَّه حَبيب
ابروحــــهْ تاكل الوَنَّه
من غاب النبي عنَّه
وَطَن لِجْروح صارت هيه عينه
علي ابفكد النبي ألله يعينه
ألله يعينه
&&&&&
حيدر الكرار لمَّن طه فوكـ المُغتَسَل
إبتِدَه ابتغسيله لاجن ابسرعه وكَّف مَحْتِمَل
علي يسأل علي فِعلاً هل أبو الزهره رِحَل ؟!
هوه خير العَمَل هذا ايجَفِّن ابـ خير العَمَل
ساعات الغِسِل حيره
والله يا هَلِ الغيره
روحه اللي يغَسِّلْها علِينه
علي ابفكد النبي ألله يعينه
ألله يعينه
&&&&&
اغياب أبو الزهره الزجيه لوَّع ابجرحه القَلَم
او سطَّر ابكلب الليالي احروف تتنازَف ألم
اغياب طه يعني حيره او ضيعةَ أيتام او حَرَم
و ابظُهُر عاشور يعني ابصَدْر أبو اليمه سَهَم
اغيابــهْ يعني مسبيه
اتصير الكِلْها حِنِّيَّه
او تِعُود ابلا أَهَل لَرْضِ المدينه
علي ابفكد النبي ألله يعينه
ألله يعينه
&&&&&
خادم النبي (ص) : إبراهيم الدريس
في ذكرى استشهاد النبي (ص)
على لسان الإمام المهدي (عج)
ماتَ الهُدى .. غابَ النَدى
والدنيه بعدك بس صوايح
يالساكن ابكِل الجَوارح
& & & & &
يا جدي كُل شِي ونِّ الك .. او هاي الكلوب انْكِسْرَت
او من كد عَظيمه امصيبتك .. حته الصخور اتْفَسْرَت
يوم اللي غمَّضْت الجِفِن .. جبْد السماءِ انفِطْرَت
و ابعين متروسه دمع .. شفْت النجوم انْكِدْرَت
يَبكي الهواءْ .. تنعى السماءْ
و ابكُل شِي صرْت أسمَع نوايح
يالساكن ابكِل الجَوارح
& & & & &
أبجي الغيابك سيدي .. والله مثِل رقيه
ذيج اللي ما شافت أبو .. شافت سياط اميه
إلليله بنتك فاطمه .. ابحبْل الحزن سبيه
تبجي الزجيه الغيبتك .. وآنه ابجي عالزجيه
دمعُ البتولْ .. يجري سُيولْ
دمْع الزجيه الـ حزني شارح
يالساكن ابكِل الجَوارح
& & & & &
يا شمِس وَ أرقى امن الشمِس .. موَّتْني حيل اغروبك
بعدك يجُرِّ ابونِّته .. او يلطُم صدر .. محبوبك
صرْت انته يا جد يوسفي .. وآنه صرِت يعكوبك
او حته النظر يا جد يِرِد .. إِبْعَثْ لي يا جد ثوبك
صِرْتُ كمَنْ .. بِلا وطنْ
هيجي صُفَه حال ابو صالح
يالساكن ابكِل الجَوارح
& & & & &
ابمجلس عزاءَك سيدي .. دمْع القهر ظل يجري
وابجَرِح فكدك يالأبو .. ظل سارح اشكد فكري
بِغْيابك الما ينحمل .. أحمل جنازَةْ صبري
او تختصر أحزان الكلب .. يا جدي لطمةْ صدري
مدى الحياةْ .. ألصبرُ ماتْ
و ابغيبتك ظل فكري سارح
يالساكن ابكِل الجَوارح
& & & & &
بعدك أذانَ الله انجِرح .. وانجِرح مني لِحْساس
او ضاكت الوَسْعه ابغيبتك .. او وَيَّاها ضاكت لنْفاس
مرَّه أدِكِّـ اعله الصدر .. مرَّه أدِكِّـ اعله الراس
او نبلةْ غيابك لو تِصِد .. بِعْيوني مثْل العباس
طالَ الفِراقْ .. متى التَلاقْ ؟!
بُعْد الحبايب سَهَم جارح
يالساكن ابكِل الجَوارح
& & & & &
جرحك فِتح باب الألم .. او خلّف جروح اهوايه
واحد وره الباب انرِسَم .. والثاني عَمْسَنّايه
و الأعظم ابطف كربله .. شيبه ابدِمَه امحنّايه
لاجن وحَكـ سبيِ الحرم .. كل ثار اَرِدَّه ابآيه
يومَ الظُهورْ .. ثأرُ النُحورْ
يا رايِح او موش انته رايِح
يالساكن ابكِل الجَوارح
& & & & &
خادم المهدي (عج) : إبراهيم الدريس
في ذكرى استشهاد النبي الأكرم (ص)
الإمام علي يخاطب السيدة الزهراء
راح اَبو المرحمه .. فاطمه فاطمه
هِلِّي دَمْعِج دِمَه .. فاطمه فاطمه
&&&&&
راح يـ ام الحسن .. ذاكه راعي الوِفه
او بعد ضَي كِصِّته .. عالوُجود العَفَه
كُل شِي نادى ابحزن : .. (ويلي عالمصطفى)
والعَرِش عالنبي .. دمعه شفته هِمَى
هِلِّي دَمْعِج دِمَه .. فاطمه فاطمه
&&&&&
هِلِّي يا فاطمه .. عالعزيز الدَّمِع
و اِنْصُبي فاتحه .. لاكن ابلا شَمِع
بعده هذا الزمن .. لِج يكسِّر ضِلِع
او جَفَّه فوكـ الوَجِهْ .. بالحقد لاطِمه
هِلِّي دَمْعِج دِمَه .. فاطمه فاطمه
&&&&&
ابعيني شفْت الوحي .. وَيْ وِنينِج يوِن
و الملايك صُفت .. (يا محمد) تِحِن
كلبِج أوَّل كلب .. إسمه (بيت الحزن)
لاكن امْن الضُوه .. خالي واِبْلا حِمَه
هِلِّي دَمْعِج دِمَه .. فاطمه فاطمه
&&&&&
من بعد والِدِج .. تنحب البسمله
او مصحف النايبه .. بالدموع انتِله
بيِّنت من رحل .. والِدِج كربله
او لاح بفْقِ الحزن .. خيل او سيف او ظِمه
هِلِّي دَمْعِج دِمَه .. فاطمه فاطمه
&&&&&
كلبي هذا اِدْفَنِت .. ما دِفَنْت النبي
او غَرَّكِت بالدمِع .. جالعقيله العِبي
اغيابه شَدْ لي النَّفَس .. هذا أوَّل سَبي
او بعده (أم الحزن) .. تنسِبي جالأَمَه
هِلِّي دَمْعِج دِمَه .. فاطمه فاطمه
&&&&&
ماكو بعد الأبو .. إلا كومَةْ شِدَد
عصره لطمه او حَرِكـ .. باب او طيحَةْ وَلَد
الماكو عنده أبو .. ما يرُحْمه أَحَد
او داره دايم تظل .. مُوحِشه او مُظلِمه
هِلِّي دَمْعِج دِمَه .. فاطمه فاطمه
&&&&&
خادم الأمير (ع) : إبراهيم الدريس
١١٧٦- سيدي يارسول الله
اسنينك من اذه اهـل الكفر خوّان
وچم صاحب بصاحب طلع خوّان
مــــــالك يارســـــــول الله خوّان
عله اجنازتك بس حــامي الحميه
✍ فراس المحمداوي
١١٧٧- جراح محمدية
كظيم وچــم جرح گلبي ترابي
وعيوني اعله اهل بيتي ترابي
تره ياناس بعــده اخضر ترابي
وانصبتو السقيفه وخــنتو بيه
✍ فراس المحمداوي
راحل محمد للمنيه وترك قرآن
ولفاطمه تارك ورثها بيت الاحزان
*------------*-----------*-------------*
امدد على فراش المنيه وحاله
رايد يوصي لأمته بأقواله
بس اللعين اتصبه إله ووكفاله
النبي يهجر عمر هذا الكاله
يوم الرزيه بالخميس ووكف شيطان
هذا ابن صهاك الشعلها بحقده نيران
*-------------*------------*--------------*
فاطمه شنهي السوته وعادوها
شرادت ورث والناس ما نصفوها
اية القربى شعجب ماقروها
اتفقو على بنت النبي وظلموها
يابن قحافه شلون ورثك جائز وجان
وورث الزجيه اتحرمه عنها بدون برهان
*--------------*-------------*--------------*
اجتمعو على بيت النبي أصحابه
عدوان جنهم للملك طلابه
لاجن رساله ولا وحي باعتابه
وكفو نواصب للوحي بابوابه
يردون حكم الجاهليه وحكم الاصنام
نكرو وحي رب الجلاله وماكو إسلام
*------------*-------------*--------------*
امه عجيبه والجهل واليها
ماشافت الأنوار واليهديها
بس الجهل متربع وعاليها
رجعت للاصنام اتبرك بيها
امه عجيبه اتعلمت تمشي بمتاهات
وارتدت لذاك الجهل معبوده للات
*------------*------------*--------------*
وكفو على بيت النبي عدوانه
عدوان لكن مثلو صحبانه
هالامه مخدوعه وتضل حيرانه
بثوب المكر تبعو جميع ألوانه
اليتبع محمد مايضل بمكره حيران
لكن آسف طلعو نواصب موش صحبان
*-------------*---------------*-------------*
محمد دعبل النوري
شوط كربلائي
محمد يهجر يكولون
وصيته هيجي رفضوها
عن الهوى ماينطق
بكتاب الله سمعوها
*-------------------------*------------------*
رزيه وبالخميس اتصير
وامسجى نبي الرحمه
طلب منهم دواة ايريد
وصيه يخطها وبرسمه
لونهم بيها يتمسكون
ابد ما تظل هالامه
لجن الجبت والطاغوت
منعو تطلع الكلمه
عمر كال النبي يهجر
بجساره عالنبي يقرر
وبكيفه بدى يصدر
خانو سيد الكونين
الوصيه أصحابه عافوها
*------------------------*--------------------*
بالتاريخ تقرا اهناك
نبي وأصحابه ماتبعوه
بحياته اعترضو ووكفو
وبعمره اشكثر اذوه
جفوه وضيعو حقه
وحتى لبيته ما راعوه
نكرو اية القربى
باهل بيته اشكثر فجعوه
لا من تبعو اوصيته
ولا رحمو أهل بيته
نكرو حقها ذريته
طلعو مو صحابه وياه
بحقد هالامه جازوها
*-------------------*------------------*
ماينطق رسول الله
من كيفه ولا يعلن
كلامه من الوحي يكوله
من رب العلى ملقن
كل شي وبيه نزل قران
من رب السما مقنن
ولكل شي شرع موجود
نهج من السما متقن
وكفو بالظهر خنجر
مو اصحاب طلعو شر
من صحبانك اتحذر
رحمة من اله الكون
راد وربعه رفضوها
*-------------------*--------------------*
الباري موصي بالقران
على طاعة رسول الله
والما يمتلك أمره
ربنا بطاعته وصاه
بعكس العاده والمألوف
واحد للنبي اعترضاه
راد يوصي بالإسلام
بس السامري عاداه
ضل الوادم بعجله
يهجر لللنبي يكله
اختار لموقف الذله
تعدا أعلى النبي ويكول
وصيته لاتتبعوها
*--------------------*---------------------*
صوت الوحي ماسمعوه
ولا سمعو ابد قرآن
حكم الجاهلي يردون
واستعباد للانسان
محمد للهدايه ايريد
يهدي الامه بالاحسان
ابو القاسم هدم الاصنام
لكن مارضه الشيطان
تلهب ثورته تلهب
محمد سيف المجرب
منه العدى تتهيب
اعلنها الرساله بزود
حيف أصحابه بغضوها
*------------------*-----------------*
محمد النوري
فزاعيه لرجوع زينب ع الدار
خليه وين خواني يهالدار
وين حسين والخوه يهالدار
كلبي بنار وتجوه يهالدار
اجيتج امشي بالكوه يهالدار
اليوم البين صاباني يهالدار
ماعندي اهل ظلت يهالدار
بس نسوان هالطبت يهالدار
عداي وكلشي ماخلت يهالدار
وحيده بهاي خلاني يهالدار
ماظلو اهل عندي يهالدار
حزينه ودمعتي بخدي يهالدار
مات بضعني واليحدي يهالدار
مصاب الخوه اذاني يهالدار
وين حسين كليلي يهالدار
كاضي ومنهدم حيلي يهالدار
احسب اكظي كل اليلي يهالدار
الزمن جم بلوه راواني يهالدار
وحشه وهسه خلوانه يهالدار
خلاف حسين وخوانه يهالدار
على الزينين خلصانه يهالدار
زادت ليهم احزاني يهالدار
خادمة الزهراء والسيده رقيه ع
✍️الشاعره ام زهراءالفاطميه
لايجوزحذف الاسم أسم الكتاب لبيك يازهراءبتاريخ الثلاثاء/2024/8/27
٢٢صفر سنة هجري ١٤٤٦نسالكم
الدعاءلي ولوالدي🙏🙏 اللهم عجل
لوليك الفرج 🙏🙏
قصیده لسان حال مولاتنا زینب عند رجوعها الی المدینه
✍ام ابوالفضل الملایه
*شگل للناس لو نشدو على احسین*
*عفته اعلی التراب ابغیر تچفین*
شگل للناس لو طبیت الدیار
وحشه وخالیه بس بیهه تذکار
مذهوله بگیت و فکری محتار
یحیرنی الیگول احسین چا وين
وین احسین اخییچ وین عباس
محتار العگل شیرد علی الناس
عفته اعلی النهر مگطوع الا نفاس
مطبور ابعمد مصیوب بلعین
شگل للناس لو نشدو علیهم
شنطی من جواب و شحچی لیهم
من غصباً تره احنه امفارگیهم
بلگوه مشینه موش راضين
بلگوه و غصب شیلونه عنهم
مو راضین ما شبعینه منهم
الغربه اخلافهم تحدی ابظعنهم
و عنهم یا وسف صرنه بعیدين
اشلون ارجع و اطب لدیار اهالینه
ضلمه وخالیه توحش تره اعلینه
ظیعنه المحنه و های تالینه
ردینه حرم و الدمعه بلعين
عفنه اولادنه و ازلامنه الشجعان
بحرور الشمس نومه علی التربان
بس نسوان ردینه بلا ولیان
عفناهم علی الغبره امنومین
ماجوره یازینب بهلچ...
✍بقلم الشاعره و خادمه اهل البیت ع
ام ابوالفضل مقدم
موشح لرجوع السبايا الى ديار الامام الحسين عليه السلام (الدار ظلمه)
الدار ظلمه ... وماحلت بعيوني
وين شلتو ياهلي وعفتوني
الدار ظلمه وشال من عدهه الضوه
وانفطر گلبي وتصدع وانچوه
لابعد نلتم ولانگعد سوه
حايره بدنياي خليتوني
الدار ظلمه ... وماحلت بعيوني
حايره وكلش چبيره حيرتي
وداركم ظلمه وعمتني يخوتي
وين اسولف ضيم گلبي وهضمتي
وانتم ابعيدين ماجيتوني
الدار ظلمه ... وماحلت بعيوني
كلكم ابعيدين عني بكربله
بجالكم هيبه چنت وامدلله
تالي ماتالي ضربني حرمله
خله نيشان واثر بمتوني
الدار ظلمه ... وماحلت بعيوني
صار بمتوني اثر فوگ الاثر
والجدم للدار جاباني وعثر
چا شگول حسين خليته وذر
عن اخوي الوادم ينشدوني
الدار ظلمه ... وماحلت بعيوني
تنشد الوادم عله ابن امي وشگول
فوگ صدره الخيل شفناها تجول
اشلون اوصف فرگته صعبه وتطول
عالحنين امعلمه تعرفوني
الدار ظلمه ... وماحلت بعيوني
روحي ماتسكت تون اعله الحنين
چا شگلهه لو اجتني ام البنين
والبطل مهشوم راسه والجبين
گطعو اچفوفه العده وفجعوني
الدار ظلمه ... وماحلت بعيوني
عالنهر عفت الچفوف امگطعه
للنزل رديت روحي اموجعه
ماجبت بس الحزن والفاجعه
بس حرم واطفال اجت بضعوني
الدار ظلمه ... وماحلت بعيوني
✍شاعرة اهل البيت
ام هجران العمارچية
غير مبري الذمه من يمسح اسم الشاعرة او ينسب الرثاء لشخص اخر
قصيدة لرجوع السيدة زينب للمدينة ولقائها مع ام البنين عليهما السلام
يمة يازينب انشدچ ياضــوة العـين
شغير رسومچ ييمة وماهو الحسين
عباس واخوانة اربعتهم وفوا حليب الرضعتهم
--------------------------------------------------
احســــــين كَليلي اعلى حالة يالعـقيلة
تچوي الكَلب عدچ احــس ونة ثجيلة
بعيــــــونچ ايبات الســهر ما نمتي ليلة
شنهي الجرالة وسفرتة صارت طويلة
ظنيت وياكم اشوفة واتنة الظعون
فركَاه تجرحلي دليلي وتاخذ عيون
الحيود شنهي سالفتهم وفوا حليب الرضعتهم
------------------------------------------------
شحچيلچ وابدي يطــــيبة ابيا مصــــيبة
العباس ما ظاكَ العــــذب طاهر حليبــــة
كل اخوتي انچتلوا ظلم وانة غريــــــبة
وظليت مكسورة جنح صرت السليبة
بحبال مچتوفة واحشم ويـن الاخوان
حادينا چتال اخـوتي وحراس عدوان
عالغبرة اخوتي عايفتهم وفواحليب الرضعتهم
------------------------------------------------
ربيــــت واسهرت اللــيالي اجر ليالي
يايمة ابن ام الحــــــسن تدرون غالي
يولادي توفــــون الربة چان ابتـــهالي
وافوا اخيهم مانســوا تعبي ودلالي
فدوة كَليـلي ييـمة بكربلة اشصار
ماشفت طول العزيز ابكَلبي النـار
اولادي كلهم فاديتهم وفوا حليب الرضعتهم
------------------------------------------------
يم الوفــة ما كَصــــروا ولـدچ يحــــرة
هالكَد حليبچ بي وفة وعيــــون حمرة
العباس كافل محمــــلي مكَطوع نحرة
شحچيلچ حسينچ بقى مكسور ظهرة
تدرين ياكــل بالكَلب يافكَد الاحــباب
وفراكَ خواني سهم لب الكَلب صاب
واحد الواحد ودعتهم وفوا حليب الرضعتهم
------------------------------------------------
للدار طبيـــــتي ودليلي اعليچ مفجـوع
محفور بخــــدودچ شفت انهار الدموع
شفت القميص ادوهنت اشلون منزوع
آثــــار بي دم ولحــــم وتكسر اظــــلوع
اشلون داســــتة الحوافر وين الاولاد
چا موش كَلتهم اخوكم لب الفــــواد
لحسين كلهم ناذرتهم وفوا حليب الرضعتهم
------------------------------------------------
خافن تموتين من سولف شنهي وضعة
سهم البچــــبدة تحـيرت اشلون اطلعة
الخيل تـســحكَ عالصدر ويون اسمعة
ابن امي فاركَتة وبـــــقى بالعين دمعة
ودعتة وانة اعلى الهزل والعين حمرة
والراس مرفــوع برمح مكَطوع نحرة
مسبية اخوتي مفاركَتهم وفوا حليب الرضعتهم
------------------------------------------------
أسألكم الدعاء رائد الاسدي
فزاعية للرسول الأكرم محمد(ص)
~
عيني ام الحسن عالمصطفى اليوم
ودگي اعله الصدر وعازي المظلوم
~~~~
دگي اعله الصدر والونه عليهه
زهره بالنبي هاليوم عازيهه
وبدمعة حزن فاطمه نواسيهه
( مغرب عنه... شال بهل لليله)
~~~~
مغرب ياحسافه مرسل الامه
دنيه خلاف عينه موحشه وظلمه
ابو ابراهيم غاب وغيبته عظمه
(لبنيه اتنوح... امخليهه)
~~~
تنوح الطاهره عالوالد بحسره
بعده يروح محسن يالنبي بعصره
مگيدين الوصي ياريتك تنظره
(يا وسفه الحيد... مگيدينه)
~~~
مگيدينه علي وضلوعي كسروهه
بتك يا لرسول اعداك اذوهه
وبنار الحقد دارك يشبوهه
( اصحابك بويه... يظلمونه)
~~~
يظلمونه يبويه بعدك اصحابك
وبنار الحقد يحرگونهه بابك
ما خافو الباري وراعو اغيابك
(بتك يالهادي... ايصطروهه )
~
تمت والحمدلله ✍ خادمة أم ابيها الشاعرة أم علي الحلفي
نسألكم الدعاء
قصيده للرسول محمد
تقرى مربعه وبعدة اطوار
المستهل
شيلي ايدج لبو ابراهيم شيليها
وزهره ام الحسن هاليوم واسيها
•───✧◐🕊🌻🕊◐✧───•
رسول الله توفه وخالي امجانه
وابنيته عليه هاليوم حزنانه
كلنه نصيح نهتفله يمولانه
اللطمه اعله الرسول اليوم عدليها
•───✧◐🕊🌻🕊◐✧───•
يستاهل لطمنه وكل تعازينه
الون والنوح يحلالك يهادينه
ننوح اعليك يالشخصك امضيعينه
الدنيه اخلاف عينك لاطعم بيها
•───✧◐🕊🌻🕊◐✧───•
صدرج بالطم هاليوم وسعيه
على امصاب الرسول الصدر كسريه
تعبانه الزجيه وتلطم اعليه
اليوم ام الحسن بالونه عينيها
•───✧◐🕊🌻🕊◐✧───•
عيني الزاجيه وتكابلي اوياها
ابو ابراهيم راح وكطع رجواها
ياروح النبي وهالأسم سماها
حزنانه وتون كل حيل مابيها
•───✧◐🕊🌻🕊◐✧───•
كلمن لاطمه الزهره تسجله
وبالمحشر رسول الله تقبلهه
وحاجاتج الصعبه بيده سهلهه
الدمعه اعله النبي كل نار تطفيها
•───✧◐🕊🌻🕊◐✧───•
بقلم ✍🏻المله والشاعره ام علي الأماره
غير مبري الذمه اليحذف اسم الشاعره وينسب الكلام له
ابوذيات شهادة الرسول " ص"
..........
البـرية بنور طه من براها
يون أصل النبوة من براها
جروح الألم بعده من براها
ولا تبره جروح الفاطميه
.......
ثبـت هسه الألم بينه يجدنه
صدك ترحل تودعنه يجدنه
ويتامى خلافك العالم يجدنه
واه بكل وكت ننصب عزيه
........
العـقيلة تنسبي خلافـك يجدها
شمر حادي ضعن بيها يجدها
وبدواوين الغرب زينب يجدها
اليريد يشوف زينب وين هيه
........
النعم بيك أنت يالهادي يتمها
برحيلك سيدي الزهره يتمها
الوديعة تحـضر وياها يتمها
خديجه بالهضم تلكه الزجيه
........
حسن وحسين بغيابك من الهم
وتشاهد يا حزن بيهم من الهم
يريدونك طلب عدهم من الهم
ترد الهم يبويه بهل مسيه
.......
بألم ون الخلق ميت وحيها
محمد وادع ألزهره وحيها
جبريل بحزن يبجي وحيها
والله يعظم أجرج يالزجيه
........
أبأنين الشجن وينوح يانوح
ينوح الحزن هم بنوح يانوح
لحبـيب الله يـأدم نـوح يانوح
بمحـمد كوم وستقبل عـزيه
.......
أهل بيت النبي المعروف ياهم
خبر موت الرسول اليوم ياهم
ورحيله بيا هضم يا نوح ياهم
يحل بيها الحزن زهره الزجيه
.......
الك حزنت سمه الدنيه والأفلاك
الف حسره على فكدك والأفلاك
الك اللطم عـلى راسي والأفلاك
وأدورك بالنفس يابو الزجيه
........
عظمتك كل جبل راسي رسلها
وحـروفك بالرسل ربك رسلها
رسالات الوحي بنورك رسلها
العرف نورك عرف رب البريه
.......
عظيم ومحـد اليعـرف عظمتك
الوعـظ ما فاد ابامتـك عظمتك
لان كسرو يبو الزهره عظمتك
لمـن كسرو ضلع من الزجيه
........
يمولاي العرش صله بصلاتك
ولا واحد وصل عنده بصلاتك
يوصي الباري الوصل بصلاتك
النكًـر وصلك نكًـر رب البريه
.......
الشاعر
اياد الفرح التميمي
في ذكرى استشهاد النبي الأكرم (ص)
الزهراء تخاطب أباها الرسول
يبويه .. دخيلك لا تفاركني .. يبويه
بعدك دهري يسطرني .. يبويه
خيمه انته لي .. يا عِز هَلِي
&&&&&
بين الجروح ابنيِّتك .. لا لا تظل وَحيده
كلبي تَرِف ما يحتِمِل .. هَضْمََةْ ألم شِديده
ابجف الزمن لو أنسطر .. تدري ثجيله إيده
او عمري لو اتغَمْضِ الجِفِن .. الدمعه تِحِز وريده
يبويه .. بيش اِتريد اَحلفَنَّك .. يبويه
لا لا اتغَمُّضَن جِفنك .. يبويه
ابهَظْم اَمْتِلي .. يا عِز هَلِي
&&&&&
كالَوا بِلَمْثال البشر .. الوالد وجوده خيمه
او هاي البنِت من يرتحل .. عنها الأبو هظيمه
كلمةْ (يتيمه فاطمه) .. اعليَّه اشكثر أليمه
و انته اتعَرُفها دنيتك .. يا والدي لئيمه
يبويه .. اليتم يكسِر لي دلاَّلي .. يبويه
او خِلافك ينكلب حالي .. يبويه
دمعي اِيْهَلِي .. يا عِز هَلِي
&&&&&
بس عني ترحل يالأبو .. اتحاوطنِيِ الرزيه
او منِّ الرَّفِس حَمْلي يِكَع .. بالدم على الوطيه
يا بويه داري هالزمن .. ايحِرْكه ابحقد عليَّه
او سوطه اليِسَوِّد لي المتن .. آنه اَشْكُفه ابإيدَيَّه
يبويه .. يِعْصِرْني الزمن بعدك .. يبويه
او يِخون ابكل حقد عهدك .. يبويه
اِيْوِن مِغْزَلي .. يا عِز هَلِي
&&&&&
عني إذا اتغيب اَخبرك .. وَيَّاك اِخِذ حياتي
بعدك يظل هذا الدمع .. سَجَّادِتي او صلاتي
أَسْكِت لون منِّ البجي .. شيسَكِّت الـ بناتي ؟!
او باجر إذا ايطِكْني الزمن .. حيل ألزَم ابـ عَباتي
يبويه .. أصيحن من أشِم تُربك .. يبويه
او يسلِّيني الدمِع عكبك .. يبويه
كلبي اِيْغَلي .. يا عِز هَلِي
&&&&&
بعدك يبويه أنضرُب .. و اَسْمَع حجي الشِماته
صارت يتيمه فاطمه .. او حَلِّ النبي مماته
(وَإِنْ) يكولون ابضِحِك .. فاطم غِدت وِصاته ..
نكسِر ضلعها و ابدِمَى .. انخلِّي يِهِل (فُراته)
يبويه .. حتى السِدره كِطْعُوها .. يبويه
او فَدَك منّ اِيدي أَخْذُوها .. يبويه
الهم يعتِلي .. يا عِز هَلِي
&&&&&
خادم الزهراء (ع) : إبراهيم الدريس
في ذكرى استشهاد النبي الأكرم (ص)
غيابك يا رسول الله
يعني موتي و الطبره
او تره من تغمَض اعيونك
تُعصَر بنتك الزهره
ميِّت آنه أَنْعَد
ابغيبتك محمد
&&&&&
يعاشر دمعته الفارَكـ خَليله
و أنا امفارِكـ بشر ماكو مثيله
ابراحه أشعر جنِت كلما أجيله
او هسه العافيه خَذْها ابرحيله
بعد فركةْ أبو الزهراء
ظلت تنزف اجروحي
او كأن من جسمه يا هالناس
مو روحه اطلعت روحي
ناري حاشه تِخْمَد
ابغيبتك محمد
&&&&&
مثل فاطم بنيته بيتِ الأحزان
او بعد وجهك صرت كل عمري عطشان
أنا فاكد تره مو زلمه قُرآن
و أشد لوعه إذا تصبح له دَفَّان
إذا غاب الحبيب او راح
تحِسِّ ابكل نَفَس هَظْمه
او تموتن من تشوف العين
اثيابه امعلِّكه او هِدْمه
جرحي لا مَيِنْشَد
ابغيبتك محمد
&&&&&
ابنعش من صارت الشمس او ضُحاها
شفِت جَن كلبي بالحيره تَلاها
يريت آنه المشيت او يبقه طه
وَ لا ليل الهظُم فاطم غِشاها
يربِّي حيدر الكرار
تمنّيتك لون خَذْته
تره أتعذَّب آنه اهواي
حبيبك لو بِجَت بنته
حيلي والله ينهَد
ابغيبتك محمد
&&&&&
ما أُوْذِي نبي مثله ابأذيه
قبل ما يندفن تحت الوطيه
ربعه كسِّرَوا ضلع الزجيه
او جَرَّوا بالحبل حامي الحميه
قبل ما يندفن طه
ربعه وَجِّرَوا بيته
عصرَوا فاطمه الزهراء
او خانَوا كلهم اِوْصِيْته
انسطرت اهيه عالخَد
ابغيبتك محمد
&&&&&
يبو الزهره يمن ساكن بالكلوب
على امصابك يحِكْـ لي لو أشِكـ ثوب
أذكرك من يجي و ايلفيني الغروب
و أنادي وينك انته كلبي متعوب
أذكرك آنه كل مغرب
او تهل لغيابك أجفاني
ما أدري متت إنته
لو ميِّت بعد آني
حزني صعبه يبرَد
ابغيبتك محمد
&&&&&
من أذَّن بلال او بالسِّمه صاح
ركن عزم الزجيه او ركني هم طاح
كل شي ابروحتك يالمصطفى راح
او على الدنيه العَفَه بعدك يمصباح
ابرحيلك ينكسر ظهري
يطه او ينجرح الإحساس
و أحير ابروحي مثل احسين
يوم اليوكَع العباس
او هذي عيني تنسَد
ابغيبتك محمد
&&&&&
خادم الأمير (ع) : إبراهيم الدريس
في ذكرى استشهاد النبي الأكرم (ص)
يالمختار .. كل جفن .. دمعه ايسيل
يالمختار .. نندبك .. وي جبريل
&&&&&
رحيلك .. كل قلم يا سيدي يعجز يِوَصْفه
رحيلك .. بَحَر من أحزان بس من دون مَرْفه
رحيلك .. هوه لو لحظه يصد شالسوَّه خلفه
رحيلك .. جان نصفه ينذهل و اينوح نصفه
يالمختار .. فركتك .. حسره او ويل
يالمختار .. نندبك .. وي جبريل
&&&&&
إجينه .. يا حبيب الباري إنته او يا نبيه
إجينه .. المجلسك و الدمعه عالوجنه جريه
إجينه .. (و امحمداه) هتفنه ابكل عزيه
إجينه .. بالدموع انواسي يا طه الزجيه
يالمختار .. يبجي لك .. ميكائيل
يالمختار .. نندبك .. وي جبريل
&&&&&
مُحمَّد .. من غبت تصرخ صفت بالعين عبره
مُحمَّد .. يا نبينه ابكل كلب مشبوبه جمره
مُحمَّد .. فركتك نبجيها صرنه حسره حسره
مُحمَّد .. إلحياةِ ابغير وجهك والله مُرَّه
يالمختار .. فَطَّرِت .. كلب الليل
يالمختار .. نندبك .. وي جبريل
&&&&&
يخيمه .. بعدك الزهره تصير اهيه يتيمه
يخيمه .. اخلاف عينك إلها لا ما تبكه خيمه
يخيمه .. ورده هيه او هذا بُعدك عدها هيمه
يخيمه .. إلفرح تنساه او تترقَّب جريمه
يالمختار .. فاطمه .. عنها اتشيل
يالمختار .. نندبك .. وي جبريل
&&&&&
مكانك .. بنتك الزهره تصيحن بويه خالي
مكانك .. حاشه ميسدَّه أحد بعدك يغالي
مكانك .. آنه كلما أنظره ادموعي تلالي
مكانك .. او ذكرياتك لوِّعت كل لحظه بالي
يالمختار .. ظل يونِّ .. التهليل
يالمختار .. نندبك .. وي جبريل
&&&&&
عَلِينه .. الليله لجروحك صبح دمعه يسيله
عَلِينه .. او كام ايواسي ابحسرته البضعه الجليله
عَلِينه .. اشلون ما أدري كِدَر يدفن خليله
عَلِينه .. بعد أبو الزهره صفه مهدوم حيله
يالمختار .. بالحزن .. صار ايميل
يالمختار .. نندبك .. وي جبريل
&&&&&
خادم الرسول (ص) : إبراهيم الدريس
في ذكرى استشهاد النبي الأكرم (ص)
يالمختار يالمختار .. حاشه جرحك ننساه
&&&&&
عالوعد جينه إلك .. حاشه ننسه مقتلك
إنته جرحك بينه عايش .. او عالصدر نلطم إلك
تنحب الليله السمه .. و الأرض هم لاطمه
كِل شِي يبجي اعليك والله .. او واسه بنتك فاطمه
كل سنه انقيم العزاء .. او يرتفع صوت البكاء
إحنه ما ننساك حاشه .. يا ختام الأنبياء
ليل انهار ليل انهار .. هذا فكدك ننعاه
&&&&&
إنته يا أكرم نبي .. سابي هالوادم سبي
لو بدينه من نزورك .. جان نحبي لك حبي
الليله مفجوع الوحي .. و العدو خل يستِحي
هالبجي و اللطم لجلك .. إستحاله ينمحي
رحمةَ الله انته او هوه .. لحظه وحده ما غِوه
لوله شخصك كِل شِي ماكو .. او جان مَعْرَفْنه الضوه
او هالأقمار او هالأقمار .. ضيها جا ما شفناه
&&&&&
إحنه من دونك عَدَم .. نصحه و انَّام ابوَهَم
امن الحياه مَنْرِيد كل شِي .. بس تِعِدْنه امن الخَدَم
ايسلِّم اعليك العرِش .. إسمك ابساكه نَقِش
فدوه لا تنساني فدوه .. من يخلوني ابنَعِش
يمك اتدَنْكِـ الرِّسِل .. ياللي ما مثلك مِثِل
لوله إنته يا نبينه .. إلفَضِل شنهو الفَضِل ؟!
جالأنهار جالأنهار .. إلفضايل واللــــــــــه
&&&&&
عَلِّمانه اعله الهظُم .. امصابك الدكـ بالعظُم
ابلا لطمنه اعليك كلي .. شنهي قيمةْ هاللطُم
كلنه فدوه الـ بسمتك .. الشمس عدنه كبِّتك
خَضِّرَت لكلوب هيه .. ياللي خضره اعمامتك
إنته حاشه ما مِتِت .. جَوَّه كل نبضه عِشِت
كعبةِ العشاكـ ذاتك .. او بيك بس آنه طِفِت
بالأعبار بالأعبار .. كبرك احنه طِفْناه
&&&&&
عيسى بحروفك قَرَه .. يا فَخَر للمفخره
و أحيى لموات ابيمينه .. او لبرَص او لكمهْ بَرَه
عَلَّمِتْنه اعله العُلا .. و المجد و المرجله
إسمك اعله الساني يبكه .. سيدي ما أجمله
إنته لمحلِّي العُمُر .. بيك طه نفتخُر
اعليك دوم انصلي احنه .. من ذِكِر إسمك يمُر
نور او نار نور او نار .. حُبك انته اِعْرَفْناه
&&&&&
امنجِّي موسى امن البَحَر .. و ابن مَتَّه امن الخَطَر
تحضر ابكل شده انته .. ابحيره متعوف البَشَر
الكون كله بسِّ الك .. ابخدمتك كل المَلَك
لجلك او خاطر مَحَبْتك .. يسري بس هذا الفَلَك
هوه ربك طهَّرك .. بـ أحلى صوره صوَّرك
آنه من يعطش دِليلي .. فقط يروه ابكوثرك
بيك احتار بيك احتار .. إلوجود او معناه
&&&&&
خادم الرسول (ص) : إبراهيم الدريس
في ذكرى استشهاد الرسول (ص)
واويلي على الهادي
&&&&&
فاطم صارت اتنادي
دمعي اعله الأبو زادي
وَنِّ المرتضى بادي
جدكم راح يولادي
دفنَوا بالثرى افَّادي
يصرخ كل گلب صادي
راح اليوم أعز حادي
ضج اليوم كل وادي
&&&&&
إبراهيم الدريس
راحل محمد للمنيه وترك قران
ولفاطمه تارك ورثها بيت الاحزان
محمد النوري
محمد يهجر يكولون
وصيته هيجي رفضوها
لحن ١
محمد النوري
#قصيده_للرسول_محمد
#المستهل
ابو الزهراء مات وغمض اعيونه
نوحو اويه الزجيه بدمعه محزونه
•───✧◐◐✧───•
ونو اويه الزجيه مات واليها
حزينه اخلاف أبوها الدمعه تجريها
وخل نلطم سوه والزهره واسيها
{ ويستاهل ونه / لمولانه }
•───✧◐◐✧───•
يستاهل لطم مولاي ابا القاسم
شيد دين ربه من ايد كل ظالم
يبجي الكون كله واهل العمايم
{ والشيعه اليوم / يفكدونه }
•───✧◐◐✧───•
ركن الدين صبح لجله مهدوم
وعلي الكرار يبجي الفكده مالوم
يواسي فاطمه والحال معدوم
{ واليفكد مثله / يعزونه }
•───✧◐◐✧───•
نون اعله النبي ونه خفيه
ندك وانوح وي زهره الزجيه
ابوها شال عنهاابهل المسيه
{ واليلطم همه / يجازونه }
•───✧◐◐✧───•
المله خادمه وتكتب لمولانه
تريدك سيدي بالحشر تحمانه
وتحفظ كل وليها التلطم اويانه
{ بالدفتر يمكم / سجلونه }
•───✧◐◐✧───•
بقلم ✍🏻المله والشاعره ام علي الأماره
غير مبري الذمه اليحذف اسم الشاعره وينسب الكلام له
#الطميه_بديوان_بحر_الولاء_الجزء_٢٤_.
لطميه للأحباب
صار اغروب واتذكرت الأحباب
بعد هيهات واسمع دكت الباب
❥━──➸➽❥💔❥━──➸➽❥💔
صار اغروب اصد لمجانكم خالي
فركاكم يهلنه مرمر احوالي
ضلت بس صور وامعلكه اكبالي
( اتبجيني الصوره اكبالي )
❥━──➸➽❥💔❥━──➸➽❥💔
بعد هيهات ترجع ذيج لمتنه
اويه اعزاز الكلب محلاهه كعدتنه
امسامرنه كضه واليوم فركتنه
( حنّينه لحباب الشالوا )
❥━──➸➽❥💔❥━──➸➽❥💔
حنّينه ونريد اليوم اهالينه
ضيم اهواي ما واحد نشد بينه
نندهمن بعد لو عالو اعلينه
( عن حالي جا وينه الينشد )
❥━──➸➽❥💔❥━──➸➽❥💔
صار اغروب والديران توحشني
لا طارش الودولي او نشد عني
عليه ضيم ما كعدو خوال ابني
( مهضومه الحرمه الضلت )
❥━──➸➽❥💔❥━──➸➽❥💔
يحبابي بعد شيردكم عليه
نمتو ابكربله او عفتوني مسبيه
هذا امجانكم وحشه المغربيه
( ايبجيني امجان حسين )
❥━──➸➽❥💔❥━──➸➽❥💔
*تـــمت والـــــفضـــ🤲ـــل لله تعالى*
*بقلم✍الشاعره أميره أم محمد الكناني*
*صاحبه ديوان📚أقل الوفاء في مصائب كربلاء*
*❌لايجوز شرعاً وغير مبرء الذمه كل من يحذف أسم الشاعره وينسب القصيده اله علماً أن القصيده قد سجلت بدفتر الزهراء عليها السلام❌*
اليوم كل اهل السمه
تواسي حماي الحمه
**
خيمت الاسلام صعدت للجليل
اليوم كل عيونه دمعه تسيل
طاح هذا اليوم للعالم كفيل
فاطمه تجري الدمع
بسكته لا ما ينسمع
مو دمع طايح دمه
اليوم كل اهل السمه
***
يعينك الله يا علي بطيحت علي
طاح اخوك شلون بله يلولي
ألك لجمه بل گلب ما تنجلي
طاح ظهرك والكفو
ما ألك بعده اخو
حزن هاي الخاتمه
اليوم كل اهل السمه
***
اليوم يبچي الكون جرحك ما يطيب
يا حبيب لما يصح مثلك حبيب
هسه دين الله مجروح وخضيب
بقى وحده حيدره
بچه يم الطاهره
بدمعه گام تكلمه
اليوم كل اهل السمه
*
اليوم يم باب الولي طاح الدمع
هسه كلهه هموم يمه تچتمع
تحضر الزهراء مكسورت ضلع
شيب تتعنه وشباب
يم علي تهيل التراب
النحر لجله نقدمه
اليوم كل اهل السمه
****
الشفاعه نريدهه وانته الشفيع
يا حبيبي الله غيرك ما نطيع
بل ذبيح نحلفك ودم الرضيع
نظره منعندك نريد
الخاطر حسين الشهيد
هسه ناحت فاطمه
اليوم كل اهل السمه
الخادم حيدر ناجي الدراجي
#حصريا 🔥💔😭
نعي خروج السيده زينب من كربلاء الى المدينه
اخت وتريد توادع اخوها شلون تودعه وترجع للديار الخاليه لرض المدينه شلون حالها 💔💔💔
كعدت يم الكبر وصاااااحت
يخويه مودع الله اليوم ماشين
ماتكعد تكوم ويانه يحسين
لرض المدينه تردنه يحنين
•───✧◐◐✧───•
يحسين خويه كوم ليه
لبيوتنه نرجع سويـه
وترجع ليالينه الزهيه
•───✧◐◐✧───•
حملي ثجيل يريد والي
وانتم على الغبره الغوالي
واختكم نحيله وهذا حالي
•───✧◐◐✧───•
ثلث تيام يمك ماشفتنـي
ولا كلت هايه عمت ابني
حنينه اخيتي وجايـتني
•───✧◐◐✧───•
دربنه طويل يريد شجعان
وانتم صفيتو حدر تربان
واختكم ترد والحيل تعبان
•───✧◐◐✧───•
شينسه عشرتي اويه العزيزين
ياروحي موتي ولا تظليـن
عليهم يكون اعميچ ياعين
•───✧◐◐✧───•
بقلم المله والشاعره ام علي الأماره
غير مبري الذمه اليحذف اسم الشاعره وينسب الكلام له
العمل مهدات الى مولاي صاحب الزمان عج
*زينب تصبح في كربلاء يوم الحادي والعشرون من صفر*
*يا موالي مولاتنا زينب ع كيف نصبت عزاءها عند قبر الحسين ع صبيحة يوم الحادي والعشرون هل أطبقت جفنيها عند قبر اخيها المظلوم الشهيد المذبوح تبلل قبره بدموع عينيها ~* لحن ساعة وداع الرچيه للشيخ المعاتيق~
راحت بونّه تِودعه يا ضيا العين ~ يا ضيا العين~
صاحت وهلّت الدمعه خويه يا حسين خويه يا حسين~
شلون افارگ هالگبر
يا ضيا عيون العمر
〰️〰️〰️〰️〰️
شمّت التربه الزكيه آيمظلوم آيمظلوم~
يا ذبيح الغاضريه ظامي محروم ظامي محروم~
ما ذقت ماي الشرب
يا ذبيح على الترب
〰️〰️〰️〰️〰️〰️
دارت العين ببچيها حان الوداع حان الوداع
وعالگبر نادت وليها بصرخة اوجاع بصرخة اوجاع
عنك انه راحله
والمدامع سايله
خادمة آل محمد✍🏻
نعي سيدة النساء تنعى أبيها محمد صلى الله عليه واله وسلم
ها يانبي الرحمن خانوك
ربعك الجانو من يصحبوك
بعدك امدد واجو طلبوك
ارتدو لاصلهم أهل الأصنام
لملمها ابن صهاك عدوان
ولصاحبه يطلب السلطان
يطلب البيعه على البيبان
ارتد ونكر كل دين الاسلام
بعدك يبو الزهره ولوها
صحبك يبوها ومارعوها
اشكد بظلمهم لوعوها
عيالك صفو يالهادي أيتام
ياعلي فاطم ونت شلون
ياسيف يالتعبت المتون
شلون العدى لبابك يحركون
وانت الوصي ياليث الإسلام
ال من كبل بالحومه يشردون
صارو على بابك يهجمون
ليث الحرايب بيك يدرون
بسد الوصيه صارو ازلام
جن مانزل بالزهره قرآن
ولا وصى بيها نبي الرحمن
كسرو ضلع خيرة النسوان
الكالو صحابه اصبحو ظلام
محمد النوري
#فزاعيه_للرسول_محمد
#المستهل
اليوم مفكود النبي
والمسجد يسدونه
•───✧◐🕊🌻🕊◐✧───•
مفكود ياركن الهدى
واظلمت انوار السما
يبجي عليه المرتضى
اليوم النبي يفكدونه
•───✧◐🕊🌻🕊◐✧───•
نبجي ونون يم بابه
فاجعني آ يمصابه
خالي صبح محرابه
واحبابه ايشيعونه
•───✧◐🕊🌻🕊◐✧───•
الشيعه اصبحت حزنانه
نصبت عزيه اويانه
تكول النبي خلانه
والفكدك يعزونه
•───✧◐🕊🌻🕊◐✧───•
دار الكرم مزدوده
راح النبي شيعوده
وروحي عليه ممروده
وضيوفه ايريدونه
•───✧◐🕊🌻🕊◐✧───•
ياحيف سدو داره
المن يجي خطاره
غابت علينه انواره
وبالمقبره يودونه
•───✧◐🕊🌻🕊◐✧───•
الزهره تون وتنادي
شايل اليله الهادي
وحالي صبح مترادي
والوالدي يودعونه
•───✧◐🕊🌻🕊◐✧───•
بقلم ✍🏻المله والشاعره ام علي الأماره
غير مبري الذمه اليحذف اسم الشاعره وينسب الكلام له