7626
خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
الا ينطقٌَ عن الهوا سموه
ماغمض اعيونه بعد هجروه
اهل السقيفه بالغدر جازوه
....................
القصه ابتدت باخر صفر
من سممو طه الفخر
واتأمرو عالبيعه
من راد يوصي اوصيته
اعترضو وكالو صحبته
امرك محال انطيعه
عوفو الرجل يهجر صبح
احجاها النكر زاد وملح
امن ابليس اخذ تشريعه
تحت السقيفه اجمعو
حرمت نبيهم ما رعو
كلمن برز توقيعه
اول وثيقه اموقعه بدموم
النه الخلافه مو الى المعصوم
هذا الكلام اول سطر كتبوه
..................
نكرو جهاده اهل الغدر
جازو تعب جازو كسر
مو صحبه طلعو نقمه
بانت حقيقتهم بعد
موت النبي المخفي انوجد
موش اهل دين ونعمه
كشفو وجهم للمله
للكرسي مبدأهم حله
خانو نبي الرحمه
عالباطل انجمعو سوه
وتركو علي راعي اللوه
بهاي المصيبه العظمه
عافو علي بموت النبي الوحده
بيده يغسله وينزله اللحده
وهمه التهو بالمنصب الرادوه
. ......................
هجمو على دار الوصي
الجان مهبط للوحي
وكسرو ضلع غاليته
عالباب كالو فاطمه
كلهم وأن تنزف دمه
وضحت شنو تربيته
بيده الحطب جابه وشعل
نار المصيبه ابلا خجل
معروفه جانت نيته
يقتل طفل ما منولد
خاف اوية ابو اليمه يهد
باجر ويكبر صيته
طف سوه كبل الطف لان معروف
محسن اذا يبقى تظل اجفوف
عباس كافل زينب يهابوه
.......................
كل ما يدور ابهل الزمن
من ظلم من جور وفتن
وزره اعله ذاك الظالم
النصبها روحه اعله البشر
حاكم بمر شيطان اغر
راعي الهجوم الغاشم
كل دم نزف فوك الثره
كل راس حزو منحره
بركبت العاده فاطم
لومه السقيفه منذبح
الحسين لا دمه انسفح
لا دارت اعليه وادم
جا لسه عايش راسه وي نحره
بدار الرسول وفاطمه الزهره
وعليه تحوم اطفاله والحبوه
.................
باجر المهدي بطلعته
تتعاله بالحق صيحته
ياثار كل اجدادي
يبتدي ايحاسب من ظلم
عترته وخد امه لطم
وين المفر للعادي
ما ينسه ثاراته اشكثر
حاسبهن الحد الخدر
عالتل يكف وينادي
يا جد يصاحب لوعتي
اعتذر طالت غيبتي
ثارك أبروحي بادي
يدخل ضريح حسينه بالدمعه
وطفل الرضيع بنبلته .يطلعه
وينادي ياذنب الجنه وذبحوه
...............
كلمات
موسى الخادم
نعي
أبوذيات
علامات الحزن بانن ولاحن
وبعدك هالدهر قاسي ولاحن
يريدوني عليك اسكت ولا حن
لحن اعليك كل صبح ومسيه
عليك الحزن مايبطل ونوحاي
اجافي اللايم ابوّني وانوحاي
تنام الناس يابويه. ونوحاي
اسامر بالحزن ليل الاسيه
————
نعي مجردات+ عاشوري
شايل يبويه ياضوا الدار
ابعيني اشوف ودمعي مدرار
مايكفي اصب الدمع انهار
عني ياهيبة فاطمه تروح
تخلي الحزن والهم والجروح
وايظل دليلي عگبك اينوح
وينك تعال ومحمل افراگ
مني الفرح من عگبك انباگ
وسفه يطه وتسكن اقبور
وظلمه صفت بخلافك الدور
لاگضى العمر بفاد مكسور
——
گرناوي
ياقلب ون وابچن يالعيون
شالوا اعزازك مايردون
لاسفره ونقولن يوم يومين
سفرتهم طويله ومايرحعون
للمقبره راحوا يگلبي
وابوسط اللحد عنك ينامون
شيصبر الگلب من يفقد اعزاز
غفله يخلونه ويروحون
وطه يشيعه غمض العين
عني يشيل وبيّه اشلون
————-
تمت بحمد الله تعالى
بقلم:بنت الشمري
نعي للرسول الله محمدص
عيوني تجري/لجل يابويه مصابك
عيوني تجري/انه مااحمل غيابك
عيوني تجري/انتظروابقه عله بابك
وين ناوي / والرحيل يعم عليه
وين ناوي / مدلاله هم تدري بيه
وين ناوي /احجي ياروح الزجيه
اشلون بيه /الونمت جوه التراب
اشلون بيه / باجر يزود المصاب
اشلون بيه /عمري اكظيه بلعتاب
بنيتك انه /تعوفني باجروحيده
بنيتك انه / اصبح اولهم شهيده
بنيتك انه /كلبي يابويه شيهيده
حيلي طايح /بده من هسه الحزن
حيلي طايح / عيوني الليله عمن
حيلي طايح /روحك انه ام الحسن
خادمةالسيده الزهراء والسيده رقيه ع
(( ا لشاعره ام زهراء الفاطميه ))
لايجوزحذف الاسم أسم الكتاب لبيك
يازهراءبتاريخ السبت/2022/9/24
٢٧صفر سنة هجري ١٤٤٤
نسالكم🙏🙏🙏🙏الدعاء بتوفيق
نعي بطور الحدي للنبي( ص)
وحي الله ينعى والعرش
وتبچي السما ومتغيره
وي فاطمه وحيدر نون
والدمعه سحت ناثره
لجل النبي شال ورحل
جد الحسن چوى الثرى
ماجت الارض من الحزن
كل المدينه مكدره
والزهره تنده يالابو
نومك صعب بالمقبره
ياشمعة البيت انطفت
مني الگلب شيصبره
غيابك صعب لاموسهل
و كل الفتن متحضره
ضلعي يكسرونه العدى
وابابي نار موجره
وجنيني بالعصره يگع
وبأمري اظل محيره
……… ..تمت………… .
بقلم ام زهراء العامري
نعي گرناوي للنبي ص
مر عليه شلون يومك يالحنين
النار بضلوعي احس متوجره
بالنعش شالوك بويه بلارجوع
غمضت عينك بترب المقبره
يتيمه واولادي يتامه هم وراك
نور وجهك صار جوات الثرى
بيتنه شمحلاته بيك اصبح ظلام
خلاف عينك ظاله متحيره
رايده الحنيه البگلبك امان
ايدك المدمع تنشف لوجرى
آه ياخيمة الچبيره المنه شال
غاب طولك وانا روحي محيره
ياهو يدگ باب بيتي بكل صباح
وشخصك بتابوت جدامي سره
بالهظايم ابقى تدري من تموت
والعمر ينعاش كله مكدره
…… ..تمت… .. … ..
بقلم ام زهراء العامري
نعي
بَكَتكَ السَماءُ يا رَسولُ بــارِئَها
وأحَـــــدَّ العَرشُ عَلــيكَ حِدادِ
فَمِنا عَليكَ السلامُ يا أبا قاسِماً
يا شافِـــعَ الأُمةُ ونَيــلِ مُـرادي
يا سيدي الزهراءُ بَعدَك تَعَذَبت
والكونُ أمسى بِعيّــنِها سَــــوادِ
سيهَجَـموا عَليها بِـنارٍ وعَصــرَةٍ
ويَــقتِــلونَ مِـحـــسِنِها الأعادي
تَلوذُ بِالباب وتَتَستر بِعَصــــرَتِها
وخَلفَــهُ لأحبـــــابِــــهــا تُــنادي
أهكَذا يُردُّ الجَميلُ مِن صَحابـةٍ
لِخِـــلافةٍ عـَــمو فَقَتَـلوا الهادي
◾جاء الحسين ع يخاطب جده ص
يجدي ليش ناوي انته ع الفــراگ
بعدني مشبعت من صدرك اشباگ
راح الـــفرح من شفتــي ينبـــاگ
واضل مناطـــــــرك هم الك جيه
◾الرسول ص يكلم الحسين ع
لا تبچــــي يبعــــــد الگلب والعين
ماكو امصاب مثل امصابك حسين
بلا ناصــر تضــل ومامش معيـــن
وثلث تــــــــــيام ماضـــايگ اميه
كلها أهـون ولا سحگـــة اعضامك
ولا تســـعر بنار وتلهب اخيـــامك
ولا حفاي تركض بالفـله ايتامـــك
وتــــروع الگلب خيـــــل ال اميه
◾بقيت الزهراء ع بحيرة وحسرات ودموع
من هســـه وصفت دنياي ضلمه
ابوي شلـــون حدر الگـاع اضمه
شــــــلون الولي يفارگ زهرتـــه
وبـــــيا حيل اصبر من فرگـــتـه
چنت عايشه اعله الله وضحكته
شلون اليشـــرب ابيـــــته يسمّه
لا تغمض عيونك بويه ارجـــاك
الــــــمن عـفتني رايده اويـــاك
من ترجع لبيتك بويـــه محلاك
يريت عيــوني من مبچاي تعمه
هـــــاي المــا حسـبتلـــها يبالي
ابوي اتعــــودت الگاه اگبـــالي
يروح وياك حيلي وكل دلالـي
واصفه بحيرتي بدونك وهمي
عبد العليلـه
✍حيدر ابو كيان الفاطمي
قصيدة عن استشهاد الرسول الاعظم محمد صلى الله عليه وعلى آله ،،،،
يلرايح والدرب بعــــيد
كل خطوه الاحـزان تزيد
تارك جچم لوعه چـم آه
لا ترحـــــل يا رسـول الله
*
عليك تنادي مهضومه بنــــــتك والدمع جـــاري
يبويه تروح مني شلون جفـــــت بعدك انهاري
صرت صحراء ببعادك متت من لوعة اقداري
شكلك ما يفيد اصبر بعد ما يـــــــنفع اصراري
عشت وبدمعه محبوسه عفتني ونزلت اسراري
ما اعرف شحجي بفركاك
تصعب كلمة الله ويـــاك
مو ذكرى بلحــظه وانساه
لا ترحـــل يا رسـول الله
---------------------------------------
على فراگك بچى العالم وحي من السما ينادي
نزل جبريل وبلوعه على صدر النبي الهــادي
هــــذا آخر لقاء وياك كله وهذا ميـــــــــــعادي
الك مـشتاگ رب الكون ردك شنهو يــــــلحادي
كله الروح ملهوفه اخذها وحـــــــــقق مرادي
مشتاگ لوجه المعبـــود
اهلا بالــيــوم الموعود
روحي تريد تكون وياه
لا تــــرحل يرسول الله
-------------------------------------
اجاك امر الله يـــلهادي وعيــــــــنك رادت الكرار
من عندك دنى وگتله شكو بــــــهلعالم من اسرار
باچر ظلم راح تشوف لوعة بــــــاب والـــبسمـار
انقلاب اعلى الشرف والدين بقيادة زمرة الاشرار
اصبر يا ولي الله عليــــــــــك شــما ظلم يندار
حتى يعيش ويحيا الدين
اصبر حيدر يا بو حسين
بعالم واضح من منفاه
لا ترحل يــــا رسول الله
--------------------------------------
يحيــدر باچر حسينك على صدره تدوس الخيـل
وهاي ام الخدر زينب على جروح المنايا تميــــل
عباس البطل مذبوح جربته ودمه راح يسيــــل
علي الاكبر يـگطعونه هذوله النكرو التــــــــــنزيل
على ارماح الكفر مرفوع كتاب الله والتــــــــــأويل
زينب تندب يا مذبوح
يلدمك بالطف مسفوح
ناديتك تحضر ويـــاه
لا ترحل يا رسول الله
كلمـــــــات الخـــــادم
رعــــــد الفريــــــجي
عن لسان فاطمة الزهراء عليها السلام تخاطب ابيها رسول الله صلى الله عليه وآله وسلم
ماتغيب أحزاني وتعوف الگلب
ولايردك بويه ويجيبك درب
★★★★★
چنت يابويه علداري من تمر
تواسي گلبي لورحل عني الصبر
بفگد امي وهسه شلي بالعمر
مااشوفك من اجي الدارك وطب
★★★★★
يابدر سعدي المثل بدر السمه
شلي بالدنيا بغيابك مظلمه
گالوا شگد تبچي بعدك فاطمه
شكثر لاموني على دمعي اليصب
★★★★★
أبنيت عگب النايبه دار الحزن
مَلّت الوادم ونيني من احن
وانته لأجلك ينحب الكون ويون
وتبچي بعدك صحف يابويه وكتب
★★★★★
گالوا الحيدر يحيدر مايصح
لوبليل الزهره تبچي لوصبح
الگوم زادوا علجرح مية جرح
چن غريبه وعايشه ابديرة غرب
★★★★★
شگد نوايب ظَمَّت الدنيا الي
بعد عينك گلبي بيهن مبتلي
بلاضوه وليلي حلف ماينجلي
الدنيا بس وياي چن شدَّت حرب
★★★★★
أيامي گربت بويه من عني رحت
لحظه وحده كون عگبك ماعشت
يوم فگدك يوم مثله ماشفت
بعمري هذا اليوم مامثله صعب
الشاعر حسن لعيبي الحريشاوي
#جديد
استشهاد #النبي_الأكرم و #الرسول_الأعظم صلى الله عليه وآله
طور : ونة وداع ، علي بو حمد
https://youtu.be/KDZ2jH89H1o?si=TrsHzeto_hSRqbD0
.
.
آه .. وألِف آه .. على اوداع نبينه
ليلة اوداع نبينه ومن اسمومه يون
لونه مگلوب اشوفه ووجهه منطعن
اشلون اشوفه يلوج ودليلي يستچن
الهوا اينوح معانه وغشى الدنيا حزن
آه .. يبو حسين .. عليه اشبدينه
گام ایوّصي ابوصيته ودمع عينه جره
بعد عينـه يگلهم يصيــر المــا جــره
وتهجم اعداي يزهره او ضلعچ تِكسره
وانته يا حيدر اتروح ابهـامه امطبره
وزينب .. تبگه .. يحيدر حزينه
ويا حسن إنته بالسم مثل چبدي ابغدر
وينمنع يمي دفنـــك يِبِعدونه الگبــر
وانته يحسين ضلوعك او ظهرك ينكسر
وفوگ الإتراب يمظلوم رُگبْتك تِنِّحـــر
وإختك .. اتناديك .. لحّگ علينه
غمّض العين والإحسين تعالت ونته
وحيدر ابآه على الآه تجارت دمعته
وطاحت اعليه تناديه وتِشمه بضعته
اتنادي بالهون يبو الكون يروحه ومهجته
لَتروح .. يا بوي .. وتِخْله المدينه
فاضت الروح والأصحاب على البضعه اهجمت
شبوا النار على الدار وزهرتنه اهضمت
آيمختار على العين وچفينه اسطرت
آيبويه ورا الباب وضلعيني اكسرت
يمختار .. خفه اشلون .. لبو احسين ونينه
بعدك اشلون على الآل تطول النايبه
فاطمه اتروح كسيره ابلحدها غايبه
بلطمة العين والإجنين تجيك امغربه
بنفس الإجروح على الناگه زينب بالسبه
تورثها .. أمها .. بصبرها ووتينه
__
تمت ببركات مولاتنا الزهراء عليها السلام
#فاطمة_كريم #بنت_الشمري
٢٠٢٤
#جديد
في استشهاد #النبي_الأكرم والرسول الأعظم صلى الله عليه وآله
وزن : الموشح
.
.
نــايــم الهــادي او محّــد كفّنــه
وين أبو الحسنين يحضر يدْفنه
لـه ثلث تيــام هادينـه طريــح
بالسموم اگليبه مفطور وجريح
اعليه دمعات الحزن من دم تطيح
والخلايگ كلها ونّت محزنه
___
وين ابو الحسنين والنعشه يشيل
كاشف اكروبه چنت همه تزيل
بين نحرك والوجه صار الرحيل
طلعت الروح وبيدينك تحضنه
___
عجب يا بو احسين خليته عجب
وادري غسّلته ابدمع عين اليصب
ظل ثلث تيــام يَمه تنتحـــب
نايم الهادي ليش ابمسكنه
____
ظل ثلث تيام وافادك جمر
وكسرك بفگده أبد ما ينجبر
ايعظم الله يا علي ليك الأجر
وبعد جرحك محّد اللي ايسكّنه
____
مثل هاي الغربه بيكم ما جرت
اجنازة المختــار تالي اتــأخرت
وبيكم الأمـــة بعـد عينه جِفَت
جرحه يا مختار شِلّي ايهوِّنه
____
تمت ببركات مولانا رسول الله صلى الله عليه وآله
#بنت_الشمري و #فاطمة_كريم
٢٠٢٤ م
ميمر لشهادة النبي الاكرم صلى الله عليه واله
——————
مات النبي ،، گومي انحبي ،، ابدمع الحزن يالكوثر
@@@@
مات النبي وگلب الطهر ذاب الها
زهره وبعد ما ينوصف ذابلها
هذا الدهر چم نايبه ذاب الها
وامسى العمر لوعه وجمر ناب الغدر يتكشر
@@@@
راح الأبو الچان ابگلب ياهلها
بالله عليها اتحننوا يا هلها
من بعد ابوها فاطمه ياهو الها
غيرك علي وانته الولي لا تنولي ياحيدر
@@@@
ياهو اللي جرّع فاطمه من مُرها
هاي الاعادي ياخلگ من مَرها ( أمرها )
گال احرگوا دار الهدى من مَرها
باب الطهر ظل يستعر نار وجمر يتوجّر
@@@@
ظيم الزمان ابكل حقد دار الها
هجموا عليها هالعدا دار الها
الكل الكواكب بالسمه درّ الها
تالي ابحقد ليها يرد بيد العبد تتنثر
@@@@
من هجمت ارجاس العدا ومارِدها
ماگام الچ حيدر علي وماردها
حبل الوصيّه مهجته ماردها
بعد العصر ،، صار الامر ،، ابحبل الصبر يتصبر
@@@@
يافاطمه طول البعد چاوِينه
يمته الزياره و الگبر چا وينه
لو يأذن الله للگبر چا ونّه
من يرتفع ،، لن ينسمع ،، صوت الضلع يتكسر
—————————————-
ثامر بوجبارة الأحسائي
صاح جبريل في السموات العليه
ينعى النبي ومحنته بهاي المسيه
والعرش واللوح ينعى سيد البريه
راح المصطفى واويلي على المختار
〰️〰️〰️〰️〰️
وگامت تنحب وتنادي آه الزهره
عيني يبويه بهالحال شلون تنظره
وبرحيلك يبويه الگلب صار جمره
راح الأبو راح من ادينه يا كرار
〰️〰️〰️〰️〰️
آيبويه… منهو من بعدك إلينه
آيبويه… ظلمه هالليله المدينه
آيبويه… وتارك الزهره حزينه
لا تسافر… تسكن الليله بـ لحدك
لا تسافر… اسمع البضعه تنشدك
لا تسافر… هالعمر ما اريده بعدك
خادمة آل محمد✍🏻
#في_الخدمة_المقدسة
#استشهاد_الرسول (صلى الله علیه وآله)
لسان حال الإمام الحسين (ع) عند رحيل
جده (ص)
(طور الجفيري)
١)بوداعِةَ الله يالرسول
حزني على فگدك يطول
وگلبي همومه ماتزول
لمصيبتك يعلا النحيب
٢) أهِلّ دْموعِ المُقلتين
آيا جدي يانور العين
إنت لگلت منّي حسين
يفجعني فراگك يلحبيب
٣)نبكي أنا وخويه الحسن
صعبه نشوفك بالكفن
وتسأل الزهرا المؤتمن
شلون النبي جسمه تريب
٤)إنتَ الحبيب ومن تروح
أرض وسِما صارت تنوح
وريحِ المصايب هم تفوح
هالعمر بعدك مايطيب
#منال_بجيجي
عشت بدموع الرزيه.....
بويه محنيه الزچيه.....
والمدينه امست خليه..... .......وامحمداه
*******
تنزل ادموع المصيبه........والحزن قصة جراحي
تنرسم بعيوني حسره........ماهدئ ليلي وصباحي
والمصاب يعيش بيه......يبتدي جرحي ونياحي
والهضيمه مات حيلي......ينكسر ظلعي ورواحي
باب حزني والليالي
الفاگده ابدنيتهه غالي
والظلع چان عله بالي.........وامحمداه
*******
بلهفتي لحضانك اسعى.....والدمع جّرّح خدودي
چانت ايامي سعيده.....وانت تدري بكل وجودي
اشخلفت بعدك زماني......والحزن صاير شهودي
لو انام الليل وحدي........برکعتي انعه وسجودي
ميته احلامي العشتهه
بويه بعدك ما ردتهه
والمصايب من شفتهه.........وامحمداه
******
اتوالمت بيه النواعي........يا حزن اگدر اعوفه
والفگد بعدك عيونه.........للنظر ماباقي شوفه
چلمه البويه اشگبرها.......والحلم ياخذ طيوفه
والعطر بثيابي باقي........لو اشم نسمة چفوفه
فرگتك يصعب حچيهه
اشلون دارك اعتنيهه
روحي بعدك شلي بيهه.......وامحمداه
*******
حضرت بيت النوايب.....والنفس بالگوه يسري
الغايب الوالد عليهه.....كل وكت دمعتهه تجري
انهض بفرگة محمد.......بالوسن ودعته عمري
چانت اسوالفنه حلوه....ونتهت بالحسره تدري
من غيابك احني ظلعي
وبهمومي تدري وضعي
بالمصايب يجري دمعي .......وامحمداه
*******
اتزاحمت بيه المصايب.....والحزن فاتح لي بابه
نايم انت وتدري بعدك.....صارت انواع الذيابه
والحرك داري بحقدهم.....ينحسب من الصحابه
ياوسف بنتك غريبه.......والظلع يحچي بمصابه
نار تسعر وانه نوحي
راح اسولف كل جروحي
بويه عگبك ميته روحي......وامحمداه
*******
حدبت مابيه نهضه....والمصيبه ابروحي تحدي
افلان وفلان الدفعني ...والدمع يچوي عله خدي
والظلع بعدك تشوفه.....بالمصيبه اولهه يبدي
ونتظر للثار باچر.........بالفرج ننتظره مهدي
يبدي محكمته العظيمه
ايّطلع احقاد الجريمه
گلبي يشفه من الهضيمه.......وامحمداه
*******
#تمت بعون الله تعالى
الشاعر.......يوسف الفتلاوي
⬛️◼️القصيدة-3-◼️⬛️
جبريلُ ينحبُ في السمآءِ مناديا
ينعىٰ لإملآكِ الجليل ِ الهاديا
وتزلزلَت أكوانُنا في موتهِ
والكلَُ أصبحَ للمصيبة ِ باكيا
وعليٌ الكرارُ غسّلَّ جسمَهُ
ومُجهّزاً نعشَ الرسولِ ِمُواريا
والبضعةُ الزهرآءُ تصرخُ خلفَهُ
ياوالدي كيفَ استطبتَ فراقيا!
أبتاهُ فارحم عبرتي وتكدُري
يا أحمدٌ هلاّ نظرتَ لحاليا !
من بعدِ فقدِكَ مُهجتي في لوعةٍ
والحزنُ آذآني ومضَّ فؤآديا
{صُبّت عليَّ مصآئبٌ لو أنها
صُبّت علىٰ الأيامِ صِرنا لياليا}
{مَن شآءَ بعدَكَ فليَمُت} أما أنا
شوقاً أشُد ُ إلى المنونِ رحاليا
#سمير_الصالحي
#النجف_الأشرف
#رحيل_رسول_الله_محمد_ص
🏴اللحظات الإخيرة لرحيل الرسول ص
أوصيچ يازهره وصيه
واريدنچ تنفذيهه ليه
بالحسن ويه حسين اخيه
أحسن دنت مني المنيه
واريدن احضننهم بديه
رايح ويمكن هاي هيه
وفراگهم يصعب عليه
---------------------
🏴 ولما قضى نحبه صرخت فاطمة ع
گامت تنادي الزهره ياياب
تمسي يبويه تحت التراب
وجهك تراهو عني ما غاب
لنوح عليك ياخير الاحباب
دمعي يظل اعليك سچاب
وبعدك اصير بولية اجناب
#سمير_الصالحي
#النجف_الأشرف
i
🏴 أبوذية
رايات الكفر طه وطاها
وجميع اصنامهه برجله وطاها
يوسفه تصرخ الزهره وآطاها
تموت شلون ياخير البريه
#سمير_الصالحي
#النجف_الأشرف
#في_الخدمة_المقدسة
#استشهاد_الرسول (صلى الله علیه وآله)
لسان حال الإمام الحسين (ع) عند رحيل
جده (ص)
(طور الجفيري)
١)بوداعِةَ الله يالرسول
حزني على فگدك يطول
وگلبي همومه ماتزول
لمصيبتك يعلا النحيب
٢) أهِلّ دْموعِ المُقلتين
آيا جدي يانور العين
إنت لگلت منّي حسين
يفجعني فراگك يلحبيب
٣)نبكي أنا وخويه الحسن
صعبه نشوفك بالكفن
وتسأل الزهرا المؤتمن
شلون النبي جسمه تريب
٤)إنتَ الحبيب ومن تروح
أرض وسِما صارت تنوح
وريحِ المصايب هم تفوح
هالعمر بعدك مايطيب
#منال_بجيجي
نعي الى الرسول (ص)
عن لسان الزهراء (ع)
****
تنادي الزهره تبچي اگـبـال محرابه
بعـد موت الرسول وحزنه ومصابـه
تنوح الزهره تنعه الفگــده وغـيابـه
ونـيـران السرت بـالــروح لـهـابـــه
تحس نـار بگـلبهـا جـمـرة اصوابه
*****
يمحراب الرسول ارجوك ساعـدهـا
بعـد فگـد النبي كلها صفــت ضـدها
مارادوا الــزهــره تـنـعـه والــدهـا
رغم دمع الحزن ظل يحـفــر بخدها
عليها اتجاسروا من وصلوا الحدها
****
بعـد شـيـل النعـش من طوح الحادي
تظـل أم الـرســول بـلـوعـه وتـنـادي
يـريـت ويـاك ارحـل يــالنبي الهـادي
بـعــد عـيـنـك يبـويه انـظر اشسادي
عليه الصار هـــذا شيجـري لـولادي
*****
يمحراب النـبـوه الصوت متسمـعـــه
تنادي الزهره تبچي وتسچـب الدمعه
وتحس بالروح جمره فاطمه البضعه
لاچـن الـنــواصـب خـالـفـوا شـرعــه
من منعــوا الــزهـره تـنحـب وتـنـعـه
*****
تـرضه الگـوم يالمحـراب تهضمها
على امصاب الـرساله تنحب بهمها
وتـذكـر ياحـضن يـاجـنـه لـتـشـمها
من چان الـرسـول المصطـفى يمها
تحس الكون يمها بعـطفه ويضمها
****
خادمكم
رياض الرسل الجابري
لمناسبة وفاة النبي الأعظم (ص) ١٤٤٣هـ
(١)
اوداع النبي ويّا الوصي والله فجيعه
امفارق أخوه وسلّمه الزهرا وديعه
**
بوداعة الله ياعلي والله يصبْرك
وان كان ما شفْت النصير الله يعذرك
لكن يداحي الباب يا حيدر اخبرك
ايحرقون بابك ينكسر ضلع الشفيعه
**
بوداعة الله ياعلي وقدّامك اهوال
ما تشبه اهوال الحرب واملاقى لبطال
تطلع وراك الزهرا وانت ابقيد لحبال
امسقْطه حمِلها يا علي ابحاله مُريعه
**
قلبك الما هزّه بطل في سوح حربَك
من تطلع الزهرا وراك اشحال قلبك
هذي وصيه بالصبر والصبر حسبَك
حتى ولو محسن وقع جثه صريعه
**
أوصيك يا كفؤ الزكيّه ويا حصِنها
لا اتسلّ سيفك حتى لو ضربوا متنها
وانا اجيها بالقبر ساعة دفنها
وانت تقلّي استُرجعت هذي الوديعه
**
تمت
سجاد البيابي
٢٧/٢/١٤٤٣
(٢)
خلّي الحسن واحسين
ابصدري يبوالحسنين
من بعدي مظلومين
يا طبرة الهام
**
چنّي ابحسن مسموم
يقذف حشاه ادموم
وترمي الجنازه القوم
واتشيْعه بسْهام
**
واحسيني آه يحسين
ظامي وبليّا امعين
وامعفّر الخدّين
ومهتوكه لخيام
**
من سمْعت الزهرا
ضمّتهم ابعبره
اتقلّه يبو العتره
هالعتره تنضام
**
تمت
سجاد البيابي
٢٧/٢/١٤٤٣
(٣)
يبويه لا تروح
اشيضّمد هالجروح
**
اجا الما يحجبه بوّاب
واللي ايفرّق الأحباب
سمَعها وواقف اعلى الباب
تقلّه عنّا روح
اشيضمّد هالجروح
**
إذا ما تأذن الزهرا
الملَك ما يدخل الحجره
الملَك خادمها واتأمرها
إذا لزهرا تنوح
اشيضمّد هالجروح
**
لبوها ردّت ام حسين
سليمه وضمْها بالإيدين
وباچر تنكسر ضلعين
وجنين ابلايا روح
اشيضمّد هالجروح
**
أويلي من يجي باچر
تصيح ابكسرة الخاطر
يبويه عاين اشصاير
أنا ابجفني قروح
اشيضمّد هالجروح
**
تمت
سجاد البيابي
٢٧/٢/١٤٤٣
(٤)
مأجوره يمّ السبطين راح النبي راح
راح النبي راح
**
ابحجْر الوصي وجاله الموت
وقلبه عَليكم مفتوت
راح النفس راح الصوت
**
غمّض يزهرا العينين وابقلبه اجراح
راح النبي راح
**
قام الوصي ودمعه ايسيل
ومدّ النبي للتغسيل
وعزّا الزكيّه جبريل
**
عزّا علي والحسْنين ابقلب السما صاح
راح النبي راح
**
بالكفن لفّه ونادى
ودْعوا النبي يالسّاده
وجت له تودْعه اولاده
**
يفجع حسن وامّا احسين ضمْ جدّه وناح
راح النبي راح
**
وابفاطمه مدري اشصار
من شاله بيده الكرار
اتنادي ودمعها مدرار
**
يا عزْنا ماشي لاوين طاح العمد طاح
راح النبي راح
**
وباتت بعَد عزها الآل
ليلة مَخافه وأهوال
باچر علي ابإيده احبال
**
والزهرا تلزم ضلعين مكسوره واصياح
راح النبي راح
**
تمت
سجاد البيابي
٢٧/٢/١٤٤٣هـ
مات النبي المختار هاي المسيه
ناح الحسن وحسين ويه الزجيه
****
مات النبي المختار صــارت فجيعه
تبجي السمه والكون تنعــه الشريعه
وناح الحسن وحسين ويـــه الوديعه
ويبجي بجمر عبرات حامي الحميه
****
يبجي بجمر عبرات راعي المحنه
ايكَله يخويه اليــــوم والله انهظمنه
بعدك يبو ابراهيـــــم اتشتت شملنه
حل الكدر والنوح بــــــعد الرزيه
****
حل الكدر والنوح تنعه بجمرهـــه
الزهره تلوج بآه عبره بصدرهــه
اتكَله يبو الزهراء تعلــم كسرهــه
وضلعي يبويه يلوج من هسـه بيه
*
*
ضلعي انكسر هاليوم من فاركــتنه
وراح اجذب اللوعات يوم العفــتنه
اكعد يبويه اليوم ريـــــــتك شفــتنه
هذا الحسن وحسين بأكبر عزيـــــه
*
هذا الحسن وحسين يفجع بجـــــيهم
لطمو على الخدين والله بنعـــــــيهم
اسمع يجدي بنوح والله ابحجـــــيهم
ونو يجدي بآه ونه شــــــــــــــجيه
*
ونو يجدي بآه يا مصطفانـــــــــــه
لاتترك الحسـنين يامرتجانــــــــــه
والله الهظم والنوح بعدك جوانـــــه
صعبه اعله دار الخير امست خليه
***
صعبه اله دار الخير شالت اهـــلهه
براعي الوفه المختار زاهي محلهه
سيد الهواشــــــم راح والساده كلهه
غرب خله العين بعده جــــــــــريه
ابو علي الركابي
نعي
السيده الزهراء اتخاطب دار المصطفى
يـادار الـوحـي وين الـوحـي صار
اويّـن الـصـورتـه بالعين تـذكـار
ضـلـت دمــعـتّـي يـادار مـدرار
راح الـچـان وجـهـه اليزهـر انوار
*-----------*-----------*
فـارگـتـي الرسـول وگـرت العيـن
يـا دار الـوحـي بـيـمـن تـزهرين
اصـدلّـچ مـوحشه ومكدرچ البين
عگـب راعي الرساله الثبت الدين
*------------*------------*
يـالـبـابـچ گـبـل للناس مـفـتـوح
والمحتاج مـنـه بـحـاجـتـه ايـروح
سـلـوتـنـه يـدار الـهـادي بـالـنـوح
وعگب المصطفى عاشرنه الجروح
*-----------*--------------*
✍ خادم الحسين ع
الشاعر رعد الجريخي
#نعي
لمصاب رسول الله محمد صلى الله عليه وآله
غالي الأبو ويكتل رحيله
ولو غاب مايحصل مثيله
يجرح گلب بنته وخليله
راح اللذي همي يزيله
ضليت من بعده عليله
راح المصطفه سيد البريه
راح الكل وكت ينشد عليه
انه ام الحسن بنته الزچيه
يريت بداله تاخذني المنيه
ولاشوف من بعده الاذيه
ودعني ابوي وراح منّي
تراب الگبر اخفاه عنّي
ابچي عله گبره وطال ونّي
ظني انگطع ياناس ظنّي
بعده المصايب هالأجنّي
ابويه المصطفه توسّد. ترابه
راح الچانت عيوني. ترابه
يون گلبي وصحت حگه. ترابه
جرح ما يشفه ينزف للمنيه
#سيد_زيد_الفحام
#اللهم_عجل_لوليك_الفرج
تودع ابوها ودموعها هماله
يا شايل نعش ابوي بالهون
تنادي الزهراء وتصفج ابراح على راح
تنادي بيويه اليوم عزي كوض وراح
من بعد عينك يبويه اشلون ارتاح
عكبك فلا يهنه الشرب والعيش ليه
نصبت الزهره لبوها في دارها عزيه
واهل المدينه في العزى كلهم اتوها
والله لقيم النوح في صبح ومسيه
واجعل شرابي مدمعي وزادي عزائي
تخاطب محراب ابوها ودمعها يسيل
كالت له يامحراب وين امصلي الليل
يا منبر ابويه من ابويه صرت خالي
بالله يمنبر وين راح عنك الوالي
يبو إبراهيم من عكبك مظلمه الدار
تدري ابيوم بويه هجمت الاشرار
البيت ابحطب رادت تحرجه ابنار
كمت للباب لاكن ماعليه احجاب
واحس بيه الرجس من لذت خلف الباب
عصرني واسكطه المحسن وصدري انعاب
اكسروا ضلعي وجنيني ايست منه
(تخميس)
فأما الذي يحيى الهدى بحياته
وكان لباني الدين سر نجاته
على راسه انهالت سيوف عدائه
وراس هوى لله في صلواته
يدار به بالرمح بين الشعائر
( الفاتحه نهدى ثوابها للرسول )
الأعظم (ص)
(كتبته خادمة اهل البيت
ام اشرف
#جديد
#هتافات استشهاد النبي الأعظم صلى الله عليه وآله ومواساة الزهراء عليها السلام
.
.
أبد والله يا زهراء ما ننسى الرزيه
ولا ننسى جرح سيْد البريه
أبد والله يا زهراء ما ننسى الرزيه
على الهادي نون صبح ومسيه
أبد والله يا زهراء ما ننسى الرزيه
ونواســي دمعتــچ آيالزچیــــه
أبد والله يا زهراء ما ننسى الرزيه
ونظل انقيـــم يالزهــره العزيه
أبد والله يا زهراء ما ننسى الرزيه
على امصيبة غريب الغاضريه
أبد والله يا زهراء ما ننسى الرزيه
وتظل ادموعنه دايـــم جريه
أبد والله يا زهراء ما ننسى الرزيه
على الهادي وعِتِرْتـــه الهاشميه
أبد والله يا زهراء ما ننسى الرزيه
وعلى الصار وجرى بحامي الحميه
أبد والله يا زهراء ما ننسى الرزيه
وعلى جرح الحسن واحسين أخيه
أبد والله يا زهراء ما ننسى الرزيه
وعلى اجروح العقيله وكل أذيه
أبد والله يا زهراء ما ننسى الرزيه
وعلى عباسچ وعينه الجريه
أبد والله يا زهراء ما ننسى الرزيه
خـــدم ننعـــاكـــم لحـــد المنيــه
أبد والله يا زهراء ما ننسى الرزيه
ونريـــدن بس رضاتچ يالزچیه
أبد والله يا زهراء ما ننسى الرزيه
___
#فاطمة_كريم
٢٠٢٤ م
قصيدة فصيح
المستهل/ بحر الوافر (نصاري)
النصوص/ من وزن التجليبة
.
عرشُ السَماوات.. يَنُوحُ اليومَ والحزنُ تَجَدَّد
تَنعى المَجَرات.. عليكَ يا أبا الزَهرَا مُحَمَّد
حُزناً قَد عَلاها .. على طه بُكاها
...............................
١/
ضَجَّ اليومَ كلُ العالمِ الأعَلىٰ
دُمُوعاً فِيها واسَىٰ فاطِمُ الثَكلَىٰ
مُصابٌ قَد أصابَ الشرعَ والعَدلا
غابَ مَنْ عليهِ الخالقُ صَلَّىٰ
صوتُ الجراحات.. عَلا في الرُّوحِ والقَلبُ نَعاهُ
هلْ يا تُـرىٰ مات.. حبـيـبُ اللــهِ و الكَـونُ بَكاهُ
و الرُّوحُ شَجاها .. علىٰ طه بُكاها
...............................
٢/
رسولَ الرحمةِ يا عِلَّـةَ الإيجَاد
بفَقدكَ قَد فَقَدنا النُـورَ و الإرشَاد
عادَ اليومَ نهجُ الجهلِ و الإفسَاد
وعادَ الظلمُ والتَضلِيلُ والأحقَاد
في القلبِ آهات.. ودمعاً في عُيونِ المؤمِنِينَا
هـٰذِي بِدايات.. لحُزنٍ مُنذُ ألفٍ و هوَ فِينا
ولا زالَ عَزَاها .. على طه بُكاها
...............................
٣/
أرَى أمَ القُرى مَكرُوبة تَنعَىٰ
و بينَ المَشعَرينِ بحُزنها تَسعَىٰ
و بيتُ اللهِ صارَ يُذرِفُ الدَّمعا
وزَمزمُ بالأسَىٰ قَد هُشِّمَتْ ضِلعا
خيرُ البَرِيات.. فَقَدناهُ كفقدِ النَّبتِ للمَاءْ
نَعِيشُ أموَات.. بعدَ المُصطفى والروحُ أشلاءْ
لقَد ماتَ رَجاها .. على طه بُكاها
...............................
٤/
ناحَ العرشُ والكرسيُ والأكوَانْ
كذَا التَّوراةُ والإنجِيلُ والفُرقَانْ
و لَـمَّـا بالحِبـالِ قَـيَّـدوا القُــرآنْ
ضِلعاً هُشِّمَوا مِنْ سُورةِ الرَحمٰنْ
مَن ياتُرى آت.. لدارِ البَضعةِ بالجُندِ هَدّا
فَتِلكَ جمرَات.. ونيرانٌ لهُ النمرودُ أهدَىٰ
تإنُ بنتُ طه .. على طه بُكاها
...............................
٥/
غابَ اليومَ نورُ العالمِ الأكبَر
وكسرٌ حلَّ بالإسلامِ لا يُجبَر
فالأثنيـنُ لَـمَّـا صبحُـهُ أسفَـر
جارتْ أمةُ السُوءِ على حيدَر
أقسَى الرَزيات.. لَمَّا أهمَلُوا الهادِي مُسَجَّىٰ
هيهَاتَ هيهَات.. خيـرٌ منهـمُ للناسِ يُرجَىٰ
بحزنٍ لمْ نَرَاها .. على طه بُكاها
...............................
٦/
وما زِلتَ بِلا غُسلٍ ولا كفنِ
سارُوا مُسرِعينَ لحَومَةِ الفِتَنِ
سَقِيفَتُهُـم تكونُ أولَ المِحَـنِ
وفِيها غَيَّروا التَّشرِيعَ والسُنَنِ
إوُلـىٰ المُصِيبـات.. ما شُـيِّـعـتَ يا نُــورَ الإلـــهِ
في العَينِ دَمعَات.. وكانَتْ تلكَ مِنْ أدهَىٰ الدَواهِي
و العيـنُ أسَاها .. على طه بُكاها
...............................
٧/
قالَ اللهُ و القرآنُ ذَا يَشهَدْ
و سُورةُ آلَ عِمرانَ بها أكَّدْ
فإنْ ماتَ مُحمدُ بَعضُهُم يَرتَدْ
لمَّا تُغمِضُ العَينَينِ يا أحمَدْ
بالدارِ صَيحات.. قالُـوا إنَّمـا المُختارُ يَهجُر
صَحَّتْ رُوايات.. لِضلعِ فاطمٍ بالبابِ يَكسُر
وهيَ فِي عَزَاها .. على طه بُكاها
...............................
✍🏻 علي نوري الحلفي
🔻الاثنين.. المقصود به (يوم الاثنين) وهو اليوم الذي استشهد فيه رسول الله صلى الله عليه و آله..
فائزي مقارنة بين مصيبة النبي يحيى والإمام الحسين
مابين يحيى والسبط شتان ياناس
امصيبة نبي الله ابوليه شلون تنقاس
ماحول يحيى بالذبح اطفال ونسوان
وماكان يصرخ والنبي العدنان عطشان
وماكان حوله امذبحه ياحيف شبان
وحسين حوله الأكبر وجاسم وعباس
والله فرق يا هالخلق مابين لثنين
ماصاب يحيى امن الطبر مثلاة لحسين
ألف وتسع مية جرح مو جرح جرحين
فوق الثرى مرمي يويلي ايصعد انفاس
رغم المصيبة الزلزلة ذيچ الوطيه
ماصار بالمقدس مثل بالغاضريه
ماداس يحيى ابن الخنا بالأعوجية
وحسين صدره يا وسف بالخيل منداس
يحيى انذبح بس ما سمعنا عن خواته
بالبر سبوها اوفرهدوها امدللاته
وماطلّعوا فوق الهزل جملة بناته
واقبالهم فوق الرمح مرفوع له راس
يحيى عقب مافرق الفاجر كريمه
ماطلعوها لليسر ناسه او حريمه
وأعظم مصيبة ياخلق وأعظم جريمه
امسير الضعينه بالمذلة دون حراس
واما المصيبة ياغيارى التدهش البال
ادخول زينب والحريم ابمجلس ارجال
مثل العبيد امچتفه اوبيدينها احبال
بعد المعزة والخدر تدخل على ارجاس
رَبِّ اشْرَحْ لِي صَدْرِي وَيَسِّرْ لِي أَمْرِي وَاحْلُلْ عُقْدَةً مِّن لِّسَانِي يَفْقَهُوا قَوْلِي
السيد موسى الأحسائي
رثاء آل عدنان للسيد موسى السلمان
والفاتحة لروح والدي الحاج السيد جعفر السلمان وذويه والمؤمنين والمؤمنات مسبوقة بالصلوات
لحن الجفيري♪ الزهراء ع عند قبر رسول الله ص تشكو محنتها
جيتك يبويه بلوعتي
گبرك أغِسْلَه بدمعتي
اسمع يبويه شكوتي
الظالم هشم مني الضلع
〰〰〰
جمعوا على بابي الحطب
وببابي مشتعلة اللهب
قتلو جنيني بيا سبب
ومحسن على العتبة وگع
〰〰〰
اطفالي تبكي من الرعب
مفجوعه يا ويلي الگلب
وطايح جنيني عالترب
وزينب گلبها منفجع
〰〰〰
شفت الحسن گلبه انكسر
شاف الكسر ضلع الصدر
وخيّه الحسين دمعه نهر
وكل أنّه مني يستمع
〰〰〰
اما الوديعة بت علي
صاحت يا يمه تمهّلي
ادري الألم ما تحملي
صعبه اشوفن هالوضع
〰〰〰
شحكي وعدد من محن
يابويه مرمرني الزمن
شفت بعيوني ٱبا الحسن
بقيوده من بيتي طلع
〰〰〰
خادمة آل محمد✍🏻
الشاعر الحسيني ظاهرالهليجي
(أستشهاد رسول الله ص)
من بعدك يل هادي اخباري
كسرو ظلعي وحركو داري
يوصف وظعي هلت دمعي
*. * *
يم گبرك اجيت بلوعه لعتابك
حرموني البجي يل هادي لمصابك
اصحاب الظﻻله النكروا اكتابك
عدواني صفوا من بعدك اصحابك
هل ليله بمحرابك نوحي
وشكي مصابي وهاي جروحي
لكبرك اسعي هلت دمعي
*. * *
شسولفل ياعذاب بغيبتك عني
هظم والنوح مايقبل يفاركني
برسومك محرابك يذكرني
اظل انحب عليك بلوعتي وني
فكدك يلوالد مايرحم
يخلص ليلي وانه تهظم
اصبح طبعي هلت دمعي
*. * *
بحلم يل ماشي عني كون اشوفنك
وبلهفة حنيني حيل اظمنك
ومن صدرك يبويه ريت اشمنك
وروح وياك بويه وما اعوفنك
وشرحلك حالي واهاتي
ودموعي اتسولف جلماتي
اصرخ ونعي هلت دمعي
*. * *
ياشمعة حياتي الظوة اسنيني
رحت والدنيه ظلمه صارت بعيني
وينه الموت بعدك كون يلفيني
ماريدن حياتي أوياك خلبني
ريت الليله تصير اجالي
واتوسد گبرك يلغالي
للباري ادعي هلت دمعي
*. * *.
ليل انهار بعدك دمعي بعيوني
خذو حقي غصب من گاعي حرموني
أصحاب السقيفه الويل راووني
وره الباب الصحابه بغيض
عصروني
شفت بعيني وليدي المحسن
غسلته بدمعاتي السجبن
كسرت ظلعي هلت دمعي
*. * *
*نعي مجرد للرسول من ديوان📚 دموع وعبرة في رثاء العترة الجزء2*
❥━──➸➽❥❂❥━──➸➽❥❂
هاليوم حزنانه الزچيه
واعله الابو نصبت عزيه
نادت يبويه شلون بيه
❥━──➸➽❥❂❥━──➸➽❥❂
شلون بيه عگب عينك
شنسه گعداتك لو سنينك
اولادي يبويه فاگدينك
❥━──➸➽❥❂❥━──➸➽❥❂
فگدناك يا هيبة زماني
دهري بفگدك مرمراني
وخلاني بالحسرات اعاني
❥━──➸➽❥❂❥━──➸➽❥❂
ضليت بالحسرات والهم
يا حيلي من عگبك تهدم
شملنه اطشر وما بعد يلتم
❥━──➸➽❥❂❥━──➸➽❥❂
طش الشمل فلت العشره
فرگه النوده حيل مره
تهدمني ولگلبي تكسره
❥━──➸➽❥❂❥━──➸➽❥❂
*بقلم ✍🏻خادمة اهل البيت ع*
*الشاعرة العلوية مريم النور نسألكم الدعاء الفاتحه الى روح اختي ولأمواتكم:🍃*
الك حزنت سمه الدنيه والافلاك
الف حسره على فكدك والافلاك
الك اللطم عـلى راسي والافلاك
وأدورك بالنفس يابو الزجيه
......
الشاعر
اياد الفرح المهدوي
▪️نشر جديد
في تعزية أمير المؤمنين صلوات الله عليه باستشهاد النبي الأعظم صلى الله عليه وآله
أعظَمَ الله لكَ الأجرَ بطَٰهَ
ماتَ مقتولاً بسُمٍّ منْ قِلاها
أيُّ فقدٍ يا عليٌّ فقْدُهُ
وبهِ جُذَّتْ عنِ الأرضِ سماها ؟! *
أيُّ صبرٍ فيكَ والشُّمُّ إذا
مَسَّها مِنْ بعْضِهِ هُدَّتْ ذُراها ؟! *٢
جاءكَ الخِضْرُ يُعزِّيكَ كما
أعولتْ تُنشي المراثي أنبياها *٣
جازعاً لمْ تختضبْ منْ بعدِهِ
يا لها من نكبةٍ دامَ عزاها !
أظلمَ الإثنينُ في عينيكَ مِنْ
غدرةِ الإثنينِ في شمسِ ضحاها
والذي آلَمَهُ منْ أُمَّةٍ
آجَرَتْ خيرَ البرايا بِجفاها
غصبُهمْ إيَّاكَ يا وارِثَهُ
وهوْ ملْقىً لمْ يُوسَّدْ في ثراها
هجموا جهراً على الدارِ التِّي
حَفِظتْ مِنْ ثغرِهِ آيَ عُلاها
كسروا نَصْبَكَ ضِلْعَيْ فاطمِ
وبعصرٍ أسقطوا حمْلَ حشاها
أنتَ سيفُ اللهِ لوْ تنظُرُها
بقِرابِ السيفِ كمْ أجْرَوْا دماها
أنتَ درعُ اللهِ لو تحضرُها
بيديها تتقي سوطاً علاها
أنتَ حبلُ اللهِ لو تسمعها
كيفَ جرُّوكَ بحبلٍ يا فتاها ؟!..
تمت بعناية صاحب الزمان عجل الله فرجه في مرقد أمير المؤمنين عليه السلام
*ورد في زيارته (صلى الله عليه وآله) : فما أعظم المصيبة بك حيث انقطع عنا الوحي..
زيارة النبي (ص) في مفاتيح الجنان
*٢إشارة إلى قوله (عليه السلام) : فنزل بي من وفاة رسول الله (صلى الله عليه وآله) ما لم أكن أظن الجبال لو حملته عنوة كانت تنهض به.
البحار ج ٢٢ ص ٥١٢
*٣ عن الثعلبي انه قبض حين زاغت الشمس فلما قبض رسول اللّه (صلى الله عليه واله)جاء الخضر فوقف على باب البيت وفيه عليّ وفاطمة والحسن والحسين (عليهم السلام) ورسول اللّه (صلى الله عليه واله)قد سجِّي بثوب فقال: السلام عليكم يا اهل البيت، كل نفس ذائقة الموت وانما توفون اجوركم يوم القيامة…
الأنوار البهية للشيخ القمي ص ٤٢
الشاعر علي عسيلي العاملي
#الرسول_الأعظم
#اللهم_عجل_لوليك_الفرج