Telegram-канал tajalzahraa1 - 🌴تجمّع الزهراء ع العاشورائي🌴: Неотсортированное

🌴تجمّع الزهراء ع العاشورائي🌴

27 января 2024 18:54

نظلُمُها عِندما نصَوِّرها ، يائسة ً بائسة
وهيَ مثالُ الصبرِ والجَلادة..
------------------
كالجَبل بِنت النَبي
عَلى التَل الزَينبي
جبَل فوگ التل ينَادي آ يالحسين
وَعدِي ويَّاك الصَبر ماتِدمَع العَـين
***
الصَبر رَاد اَلله يخِـلقَـه ابصُورة اِنسَـان
ويرسِم اَوصَافه ويخطـَّـها ابإيد فنـَّـان
آيـَـه مِـن عِـندَه وسَبيل الرِفعَـة الشَـان
خِـلَـق زينَــب للبَريـَّـــه وكان ماكـــــان
صَبر وبصُورة بشَــر
زينب وكِـل الصُــوَر
تشرَح اشلون الصَلابه ابدِنيه وبـدِين
وَعـدِي ويَّاك الصَبر ماتِـدمَع العَـين
***
هَـذا مـُـو تَـل فاجعَــه تَـل مَرجعـيـَّــه
البطَل سَـوَّا إِلهَـه مِـن رُوس آل اُميـَّـه
فـُـوﮔـه صِـدرَت فَـتـوَه مِن الهاشــميه
السِـتر وَاجب باصعَب اَوقـَـات الرزِيه
والصَبر يُـوم الشِـدَد
مِثل رَاس امِن الجسَد
والفَـواطِم نـفـِّـذت كِــل المَضـَــامين
وَعـدِي ويَّاك الصَبر ماتِـدمَع العَـين
***
أَبَـد ماطَاحَت عَـبَـايه ولا انكِشَف رَاس
واليـﮔول اِخــلَاف هذا مِن اَخَـس نَاس
زينب اِحجَـاب السِمه وللعِــفه مِقيَـاس
وحَاشَه لِحجَاب السَماء ابرِيبَه ينجَاس
اِلحفَظ بالقدرَه الذِكِـر
حَارِس ابعَـينه الخِدِر
وقـدرَة البَاري نـَـفَــاذ وأمـرَه تَـمكِـين
وَعـدِي ويَّاك الصَبر ماتِـدمَع العَـين
***
الـﮔالَت اَقبَـل بالقضَاء وشِـنهي مَكتوب
ومَارَأيـت إلّه جَميـل ابهَــاي الخطـُـوب
تِلطم اعلَى الرَاس ﮔلّي اِتشِـگ الجيُوب
إِتـَّـقـي البَـاري ابحَديث وكِلّـه مَكـذوب
أبَـد ماخُمشَـت وَجه
الـﮔـال هذا مِـشتِـبه
لو حَـقود اوهِيـَّـه وِحدَه مِن الاثنـين
وَعـدِي ويَّاك الصَبر ماتِـدمَع العَـين
***
ولُو فرضنا ابيُوم عَاشِر دَمعَت اعيُون
للعَــقيله اِخـت الكَـفيل اوَّالِـدة عُــون
أبَـد ماخَلـَّـت دَمعها ايشُــوفه مَلعُـون
وللدَمع ﮔـالته اِبقى اِبجِفني مَسجون
واَبد ماصَاحَت جَزَع
ورِجفت وشَافت فَزَع
وخَلّت اجيُوش المَذلـّه ابحِيرَه باقِين
وَعـدِي ويَّاك الصَبر ماتِـدمَع العَـين
---------------------------------

لقمان البدران