7626
خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
وداعاً للزنازين
وداعاً .. للقيود الهدت الحيل ..
يطامورة سنين ابوحشت اليل ..
بعد ماتسهر العين .. وداعا للزنازين
…………………………………
وداعاً ياسهر يغفه عله صرخات
سياط امتون من تترك جراحات
بعد ما كو وجع لا ماكو أهات
بعد ماكو توالي الليل دمعات
بعد ماتسمع ونين .. وداعا للزنازين
…………………………………
وداعاً.. للقيود الرضت الساگ
وداعاً للحديد وذيچ الاطواگ
وبعد ماكو ليالي ووحشه وفراگ
ولا حسرة ابو لعياله يشتاگ
نگضت بالغربه السنين .. وداعا للزنازين
…………………………………
وداعاً يانعش شالو حماميل
وداعاً ياجنازه براهب اتميل
ودعا للقيود ودمها اليسيل
غريب ولا اهل تفزعله وتشيل
بعد ماكو هلك وين .. وداعا للزنازين
…………………………………
وداعاً ياچبد ذاب وتمرد
وجسم مرمي بقه او ماله احد
ميت والحديد بجسمه منشد
وعلى حـر الجسر عافوه مدد
مثل جده الحسين .. وداعا للزنازين
…………………………………
وداعاً من عذاب الغربه ارتاح
وعليك الصوت بالهم والحزن صاح
بالسم عمر ابن جعفر غدر راح
يلوج من الالم وسط السجن طاح
غدر من غافله البين .. وداعا للزنازين
…………………………………
وداعاً ياغريب المات مسموم
ياراهب بني هاشم يمـظلوم
وعلى الجسر المصايب گاعده تحوم
خلص سجنك جنازه وتطلع اليوم
ويشيعوك المعزين .. وداعا للزنازين
الشاعر عقيل الحسناوي..
استشهاد الامام موسى الكاظم ع
بسجنك لحظه متنام
شـسوت بـيك الخيام
ليلـك دمـع ضيم وقـهـر ماتهـجـع بـتاليه
تصرخ تون عمرك خلص ياعمتي المسبيه
…………………………………
بالسجـن عمـرك يطـيب خـلـص وانـته بحـزن
شنهي من امصاب هذا اليطحن بروحك طحن
من البـچي عـيونك اظنـها يابومعصومه انعمن
لـيـل ونـهــارك تـنـادي لـيش عـمـاتـي انـسـبـن
تصـرخ آ يا عرض النبي .. أشلـون بالطـف تـنسبي
صعدن على ظهور الهزل .. وحادي الفواطم اجنبي
تگـعد تبچـي باليل
تصرخ ويلي ياويل
شلون الشمر سوطه يضل يلعب على العلويه
تصرخ تـون عمـرك خلـص ياعمـتـي المسـبـيه
…………………………………
لگـيدك اتعايـن ليـالي والدمع عالخد يـهل
حلق گيدك حيل ضيگ والحديد ايدك اكل
وتبچـي لكن مو الأيدك لأيد ماكلها الحبل
تبچـي للمسبيه ذيچه مچتفه صعدت هزل
عينك يمـولاي التصب .. مو من سجـن لا من غـرب
تبچي على الما عدها چف .. تتحامه بي من الضرب
من عندك دمع سال
عالمچـتوفـه بحبال
الله اليعـينـك سـيـدي شگـد احملت اذيه
تصرخ تون عمرك خلص ياعمـتي المسبيه
…………………………………
چم سجن طبيته انته شكد عشت عمرك غرب
ماتعـادل لوعـه عـندك عمـتـك مجـلس تـطـب
مجـلـس اتـطـب العقـيله وتـنـظر علـيها الغـرب
ومن خـجـلها ومستحـاها مـاي گـصتـها يـصب
والكاسر العـمـتك ظهر .. موذاك محـزوز النحـر
الحدب ظهر لبوة علي .. شامت عليها من نظر
الما مشيوفه بخيال
وگـفت بيـن الرجال
وبـين الزلـم حـدب ظهر بت عفة الزچيه
تصرخ تون عمرك خلص ياعمتي المسبيه
…………………………………
سجـنـك اظلـم حـيل كـلـش ومايمـر بيك الضوه
وبالسجـن عـمـرك گـضـيـتـه تحـلـم بـشـم الهــوه
وزيـنـب بـظُـلـمـــة خـرابــه حـايـــره ادور دوه
چـم ضلع مكسور عدها شچـم جـدم عدها انچوه
ليل الخرابه بلا شمع .. بس البچي بي ينسمع
محـتاره زينـب يامـتن .. أداوي ظلـت ياضلع
گعدت تجري الدموع
كـلـها تـصيح الضلوع
طفله تصيح من المتن طفله تصيح اديه
تصرخ تون عمرك خلص ياعمتي المسبيه
…………………………………
يعينك الله يالچـبدتك تسري بيها نار سَّـم
ويه كل شوغه وأذيه ويه كل حرگه والـم
تذكـر شصار برقييه يـوم الشتـعلت خـيـم
شگد چوتها النار ذيچه وموعت جلد الجدَم
ركضت رقـيه عالجمر .. ونـار بعـباها تستـعر
سلبو تراچيها وبعد .. خدها نوله طگ وسطر
حـتارت ألمـن اتروح
ابوها الغالي مذبـوح
تدور اعله بوها خايفه ومذبـوح ابو رقيه
تصرخ تون عمرك خلص ياعمتي المسبيه
…………………………………
من مـتت يالكاظم انـته الشيعه اجتك شَيعـتك
ومـا بقـيـت ابـلايـه والـي ومـحـد الـهـا جـثـتـك
عله الجسر تشييعك اصبح وعله الروس اجنازتك
ومـا حـصل واحـد يشـيـع حـيـن مـاتت عـمـتك
طبع اليموت ابلا وطن .. محد اله لو اندفن
محـد يجـهز حفـرتـه .. ومحد يلـمه بالچفن
الميت ماله خـوان
يموت وماله دفان
ومحـد يجـيله للگـبر ويسـوي الـه تعزيه
تصرخ تون عمرك خلص ياعمتي المسبيه
الشاعر عقيل الحسناوي..
مقدمه
يموسى الكاظم .. اجيت بحزني
اصـيرن خـــادم .. الــك وفـقـني
يامـولاي .. يـبن جـعـفـر
……………………………
وحگ گيدك والسجن .. هواي الك مولاي احن
عمـر ابچـي الغربـتك .. ولمـصابـك حـيـل اون
ومن يمـر اسمك علي .. گـلبـي لسمـك يطـحن
انه وي حزنك عـشت .. ولاگـلي علـيك الحـزن
الدمع لمصابك .. يعـاشر جـفـني
اصيـرن خـــادم .. الــك وفـقـني
يامـولاي .. يـبن جـعـفـر
……………………………
يالعشت غربه وألم .. وانگضه بسجن العمر
وبالسـلاسـل سيدي .. عـظـم ايـدك منكـسُر
شلون تبقـه بلا اهـل .. جنازتك فوگ الجسُر
وانتـه للـشـده فـرج .. وبيك يسهل كل عسُر
لمصابك نوحـي .. يطـول ووني
اصـيرن خـــادم .. الــك وفـقـني
يامـولاي .. يـبن جـعـفـر
……………………………
شلون گـضيته العمر .. سيدي بديـرة غـرب
وبالسجـن ذاك يمـر .. اللـيال ونهـارك صعب
جـيـتك ودمع الحزن .. يابو معصومه يصب
وحاجه عندي لخدمتك .. الك يحچيه الگلب
بـجـرح دلالـي .. ودمـع متـعـني
اصـيرن خـــادم .. الــك وفـقـني
يامـولاي .. يـبن جـعـفـر
……………………………
خدمـتك راد الگـلب .. وغير حاجه ماردت
رايد ابقـه بـهل درب .. منك بدمعـي اطلبت
خدمتك هـيه الشرف .. هواي بيها تنومست
خيري كله بسفرتك .. وخادم بجاهك صرت
وعليك الوادم .. صفت تحسبني
اصـيرن خـــادم .. الــك وفـقـني
يامـولاي .. يـبن جـعـفـر
……………………………
بخيرك مفضل علي .. بجاهي واسمي وسمعتي
اوجـدتـنـي مـن الـعـدم .. وارفـعـتلـي هـامـتي
بخـدمـتك جـاهي كــبر .. بـين ربعي وصحبتي
جـيـتك وكـلـي امــل .. لا تــردنـي بـحـاجـتـي
بلطف توفيقـك .. ردت تشمـلني
اصـيرن خـــادم .. الــك وفـقـني
يامـولاي .. يـبن جـعـفـر
……………………………
خـادم اني الغـربـتك .. ريت مولاي انقـبل
ارزق اعيوني الدمع .. وخلها لمصابك تهل
من عـزاك ومجـلسك .. والله ابد لا ما امل
احـترگ خلـيني الك .. وبخدمتك اشـتعـل
اشـب وادمـوعي .. الـك يطفني
اصـيرن خـــادم .. الــك وفـقـني
يامـولاي .. يـبن جـعـفـر
الشاعر عقيل الحسناوي..
تتسابگ اجـــــــدامي أله
مـشـاي چـــــــني الكربله
بدموعي واكف عالـجسر
نــــــــعش الامام استقبله
~~
ودعت اخــــوتي والاهل
كلشي عفت حتى العمل
والبيت سديته ورحــت
للكاظم امشي بلا مـــلل
نيتي للراهب ازوره عن عقيده ومعتقد
قربتا ل الله تعالى جيت اوفيله الــعهد
للكاظميـــــه متــجــــــه
والموسى وجهت الوجه
گاصد اطوف ابدمعتي
للـي يــــــحل المعضله
~~
شديت الاحزام ورحت
وعالباري ربي توكلــت
اوصلـــه لازم سيـــدي
لو الف موته آنه مــتت
واهدي خطوات بطريقي للي يسألني الدعـه
كون يتقبــلها مني رحــــــمة الله الواسعــــه
معروفه بالفزعه الخدم
كــــــالنار اشهر من علم
راحــــو يواسون الرضه
بـدم الدمـــــوع السايله
~~
من امـشي بهذا الـدرب
منـهم اريد آنه اقــترب
كون آنه اصيرن ملتزم
واعله الذنب اعلن حرب
والدرب كون استغله بين تـــسبيح وذكر
وسبحة الطين بيمنتي وما أمل من الشكر
گـاصد هـــيامي ومـــــعتني
ومدنگ امشي ومــنحـــــني
ومن امشي حافي ومنكسر
اسمي الامـــــــــام ايسجله
~~
عدنا عقيده بهل أمر
بيها الروايات شكثر
السادتنا نتعنه زحف
شما الله منطينا عمر
بالمشي نلگه الهدايه وبيهه اصلاح النفس
ومن اطب الكاظميه طاب للجنه احـــــس
وبـصايــــــته راسي ارتفع
اسمي اويه خدامه اجتمع
كل عمري للكاظــــم وقف
راعي الهله ومــــيت هـــله
~~
لتلومني يــــــــا عاذلــي
بعد الله بس هُمه ألـــي
ماعوفهم طول العـمـــر
بالكـاظم اقـسم وبعلــي
الدنيا سوگ وبيها وادم همها بالمال النقد
واني في حبهم اتاجر وهي تنفع باللـــحد
ياربي كحـلي النــــــظر
وبدربي اشوف المنتظر
مشاي للكاظــــــم گصد
والبيــــرغ بــــچفه عله
~~
حيدر بشار الدراجي
مو على اگيود وسجن دمعاته
ما نسـه الكـاظم ابــد عـمّاته
وا اماماه .. وا اماماه
……………………………………………………………
اتودعه معصومه ابمدامع حايره
انعرضت أگباله العليله الطاهره
عل درب تگعد لبوها اتناطره
ابذكرياته الليل تبقى مساهره
دوم مشتاگه لدفو احجاياته
مانسه الكـاظم ابـد عـمّاته
وا اماماه .. وا اماماه
……………………………………………………………
الكاظم وفروه من سجن السجن
هم سبي ولا واحد اعليه اليحن
وبخياله اتعيش دوم ام الحزن
يذكر السوگ ويظل يدمي الجفن
على زينب يشمر حجاراته
ما نسـه الكاظم ابد عـمّاته
وا اماماه .. وا اماماه
……………………………………………………………
ليل ونهار الدمع عالخد يهل
هالحديد ايذكره بجتاف الحبل
وحده من وحده الحبل فوك الهزل
كلهن ايطيحن اذا مال الحِمل
خشن وصلت للعظم شدّاته
مانسـه الكاظم ابـد عمّـاته
وا اماماه .. وا اماماه
……………………………………………………………
سجن وحشه وليل ما شايف كمر
باله راح الليلة الحادي عشر
حرم بالهيمه و رعب صار السهر
زينب ادير ابوجها اعل النهر
وين ابو فاضل يجي الخيّاته
ما نسه الكاظم ابـد عمّاته
وا اماماه .. وا اماماه
……………………………………………………………
السندي مثل الشمر عار ابلا نسب
يجرح الكاظم بسم فاطم يسب
سوط نفسه ونفس متن المنضرب
سوط و لـ أم الحسن كاسر گلب
اشد من كسر ضلع ضرباته
ما نسه الكاظم ابد عمّاته
وا اماماه .. وا اماماه
……………………………………………………………
ابلايه فرشه وعل ترايب كعدته
للخرابه اتذكر وهل دمعته
امترّبه ايشاهد عباية عمته
يذكر ارقيه و ابوها الشافته
الراس لبنيته وشبح نظراته
مانـسه الكاظم ابد عمّاته
وا اماماه .. وا اماماه
……………………………………………………………
✍️ ( سيد خضر الزاملي )
قصيدة..... نزله.... اعكيلي.....
&&&&&&&&&&&&&
عالكاظم نجريها العبره
&&&&&&&&&&&&&&&&&&&
علمسموم العاش بغربه
عاش بسجنه حاله صعبه
ابن الصادق ابن البضعه
هو السابع ولد الزهره
&&&&&&&&&&&&&&&&&&&&
هاليوم الشيعه يودعونه
حظرو تشييعه يشيعونه
ويلي بيا حال ايسمونه
فكد امصابه نار وحسره
&&&&&&&&&&&&&&&&&&&&
باب الحاجه عند الكلفه
والحاجه ينطيها بجفه
أهل الشيمه لا مو صدفه
جرب وادخل ذيج الحضره
&&&&&&&&&&&&&&&&&&&&
مشاية اتكصدك احبابك
يالكاظم سجل خدامك
عالموعد كل عام ابابك
مانتراجع مانتبره
&&&&&&&&&&&&&&&&&&&&
يارب عجل ثار المهدي
ما عندي غيره ماعندي
طال اغيابه دمعي ابخدي
بيا جمعة يظهر انتظره
&&&&&&&&&&&&&&&&&&&&
الخادم أبو فدك الشامي
قصيدة .. الى الامام الكاظم عليه السلام
يتذكر الامام داخل السجن ماجرى على عمته زينب. ع. ....
..............................................
بالسجن وحشة مصابه ** والاشد جرح الخرابه
عمتي بديار الغرب ** اتذكر ودمعي يصب
والاشد جرح الخرابه
..................................................
آنه الغريب البلسجن * خلصت حياته
دمعي على طول الزمن * خط ذكرياته
ياريت ملك الموت اجه * يجعل مماته
وسط السجن شفت الألم واللوعه
حته حياطين السجن مفجوعه
يا الاهي بالزجيه ** بالفرج عجل عليه
موقف ألمني صعب ** اتذكر ودمعي يصب
والاشد جرح الخرابه
................................................
وبسجن هارون الشفت ** ظلمه وعذابه
طاموره وحشه بغربتي ** مسدوده بابه
ويه الكيود انزف جرح ** جرحي ومصابه
والكيد ضل ينزف دمه والكلب يلهب
واتذكرت حبل اليسر وانحب يزينب
قصتي تهون المصيبه ** مو مثل عمتي غريبه
عيوني تشبح عالدرب ** اتذكر ودمعي يصب
والاشد جرح الخرابه
.................................................
كل لحظه اتخيل صور ** اتخيل اخيام
بعيوني لوعة كربله ** وانظر للايتام
والعين اهودها ابدمع ** ماتقبل تنام
كل ساعه اعيشن كربله والدمع بالعين
عباس اشوفه عالنهر وبكتره الحسين
كربله بعيوني تقره ** مستهل ضل دامي نحره
جسم عاري عالترب ** اتذكر ودمعي يصب
والاشد جرح الخرابه
................................................
ولرقيه انه انزف جرح ** ايا الحزينه
هل الطفله هايه مدلله ** والله هظيمه
تنحرم من شوفت ابو ** تبقه يتيمه
ماتت على راس الابو ذيج المسيه
هل المحنه اتخزن الم كل مغربيه
لسه صوت اسمع يبابا ** من اثر جرح الخرابه
والكلب آه الكلب ** اتذكر ودمعي يصب
والاشد جرح الخرابه
.............................................
لشام جان اخر جرح ** زينب سبيه
كل مغرب ايمرني الم ** ابجي الرزيه
والله هظيمه تنسبي ** هل الهاشميه
ابسوطه يضربها النذل ويورم امتون
ماعنده غيره ولاحمه مايرحم ام عون
والاميره الهاشميه ** هناك وافتها المنيه
وسفه عمتي تنضرب ** اتذكر ودمعي يصب
والاشد جرح الخرابه
.............................................
الخادم ...... ابو فدك الشامي
قصيدة( نزله ) إلى الامام الكاظم عليه السلام ...
بالكاظميه هل اليوم && جينه نعزي المسموم
...............................................
جينه نعزيك بألم ** ياسيدي والينه
خدام كلها نادتك ** عالموعد اتعنينه
ماننسه يوم مصيبتك ** يالكاظم وتدرينه
يشهد علينه سيدي ** حاضرنه وي ماضينه
والدمعه اتسيل ادموم && جينه نعزي المسموم
.............................................
هارون وينه وزمرته ** كبتك ذهب مبنيه
انت الذهب يابو الرضا ** والعادتك ممحيه
حكم الرشيد ومايضل ** دولة علي شيعيه
ضل عالي شامخ مرقدك ** زوار الك يوميه
باقي تضل وللدوم && جينه نعزي المسموم
.............................................
هاي الزجيه الطاهره ** حضرت تواسي الليله
جتك بظلع المنكسر ** حسرت دمعها اتسيله
والفاكد احبابه يون ** جف الدهر يوميله
وتنادي يمه الظالمك ** يوم الحشر ياويله
تنعه بدمعها المالوم&& جينه نعزي المسموم
............................................
بالنعش حضرت شيعتك ** ياسيدي ايشيعونك
كل رجب نبقه عالعهد ** يابو الرضا ايواسونك
انشيل الجنازه العل جسر ** لا ابد ماينسونك
وبصرخه وحده تعتلي ** لمصابك يندبونك
انت الغريب المظلوم && جينه نعزي المسموم
............................................
يمته تظهر يابو صالح ** يمته تاخذ ثارك
والكسر ضلع الزجيه ** تبقه تلهب نارك
سيف حيدر هو بيدك ** سيفك بفقارك
بالفرج نرفع ادينه ** شيعتك وانصارك
يالمهدي وبهذا اليوم ** جينه نعزي المسموم
..............................................
الخادم ...... ابو فدك الشامي
قصيدة لطم( استشهاد الامام الكاظم ع)) طور( هذا الغريب منين )
يالجاي الي مشاي.... ياشيعي ياوفاي
رغم الخطر والاه..... تصيح بحزن ويلاه
&&&&&&&&&&&&&&&&&&
انه أبو طلبه يشيعه بالسجن خلصت حياتي
ما اعوفه الي اجاني واليعزيني بوفاتي
اقسم بشيبة محمد بالحشر يضمن نجاتي
الكاظم الغيض انه اسمي وهل الاسم اجمل صفاتي
صيحو بحزن هاليوم... ويلي على المسموم
حته العرش ينعاه..... تصيح بحزن ويلاه
&&&&&&&&&&&&&&&&&&
من تهل دمعك عليه وتبجي لمصاب الرزيه
صيحو هاي الليله كلكم ياغريب الكاظميه
والفجعني بهل مسيه من شفت امي الزجيه
تنعه يوليدي وتكلي والاشد الغاضريه
ويلي مصاب حسين... صوبني سم البين
ذكرو المصيبه بآه.... تصيح بحزن ويلاه
&&&&&&&&&&&&&&&&&&
عالجسر مرمي ثلاثآ ما وصل واحد اليه
والمنادي ينادي بسمي هذا امام الرافضيه
مثل جدي حسين من ضل وحده بالغاضريه
لكن اني شيعوني ولطمو وناحو عليه
اني بأثر مسموم.... وجدي بنحر مظلوم
كل عمري ما انساه.... تصيح بحزن ويلاه
&&&&&&&&&&&&&&&&&&
بابي باب امراد كلمن كاصد وليه يجيني
والمصيبه الي تهمني وبالدمع يشتد ونيني
من تذكرون السبيه لكربله يسافر حنيني
ريت حاضر انه بالطف عسن لا طالت سنيني
واتذكرت بالكيد..... ذاكه الحبل بالايد
نزفت اثرها ادماه.... تصيح بحزن ويلاه
&&&&&&&&&&&&&&&&&&
احيوا هل ذكره الاليمه عالامام الرافضيه
مانسيتوني بمصابي والنعم ياجعفريه
يامن اتحبونه اكلكم لا تهابون المنيه
والله هنياله الخدمنه والرضت عنه الزجيه
الخادم يضل سلطان..... ذكره مدى الازمان
كل دمعه تبجي وياه.... تصيح بحزن ويلاه
&&&&&&&&&&&&&&&&&&
الخادم
أبو فدك الشامي
وين هاشم وينهم اعوانه
ليش فوگ الجسر ظل جثمانه
..
شيخ هاشم ليش وحده على الجسر
من العسر للعسر ما مر بي يسر
اضعف الأيمان ودو للگبر
مايصير جنازته حيرانه
..
هذا باب المكرمه وباب المراد
ليش محد ناصب عليه الحداد
يابني العباس المن هالعناد
تغيرت من السجن الوانه
..
خل يشيعونه الهواشم والأهل
ليش يمه ابد ما واحد وصل
باب الله من الشمس والحر ذبل
وسفه الله تحاربت بيبانه
..
يا بني العباس يا اهل النفاق
خل يرد لعوانه مو طال الفراق
خلي ننعاله على طور العراق
" هل غريب منين " هاي احزانه
..
شيستفـاد اليمنعـه من الدفـن ؟!
خلي بترابه ينام اْو يطمأن
حتى بالتابوت ما هده الحزن
لان ما فارگ الحـگ السانه
..
هالضريبـه انفرض يدفعها تره !
لأن دمـه بي شرارة حيـدرة
غصباً عليهم قسيـم الأخـره
هناك تلگه اوجوهم خسرانه
..
عالجـسر چان الضوه بي يستجيـر
والنوارس يمه تبچـي وما تطـير
نهـر دجله شكثر سلم عالأمـير
الهاشمي وچان الوجع عنوانه
..
هذا بي نور الألهه النبـوي
هذا بي سر الوقار العلوي
وحشه ظل نعش الامامه الموسوي
وما حظر زاتوت من اخوانه
الخادم
حسن ميثاق الربيعي
يا شيال...نعش الكاظم
°°°°°°°°°°°°°°°°°°°°°°°°°°
على هونك يمن شايل نعش موسى
مشاعر شيعته كسرات متروسه
يموت ابلا ضوه الچان الضوه يبوسه
الچان يبوسه حتى تراب اليدوسه
بهاذه الحال...ماضن سالم
ياشيال...نعش الكاظم
----------------------------------
يمن شايل نعش موسى ابن جعفر
الجسر والناس الك بكل لهفه تتنطر
لأن متريده يبقى مثل ابو الأكبر
يضل حر الشمس ابچثه يصهر
صار اوصال...بفعل الظالم
يا شيال...نعش الكاظم
----------------------------------
يشياله لون تشيعه هاذه الحين
ماتسمع حشه "هاذه الغريب امنين"
اهل بغداد توگف وگفت امعزبين
وچوادرهم ينسجوها برموش العين
وهاي امال...هاي الوادم
ياشيال...موسى الكاظم
----------------------------------
وتصير الدنيا خضره بكثرت الرايات
ونسوي دجله اخرى لكن ابدمعات
وعلى جسر الألم تتعاله هلصيحات
"يضل موسى بدليل الشيعة لا مامات"
الدمع السال...ضل متزاحم
ياشيال...نعش الكاظم
----------------------------------
نشيعه والحزن ضل تارس الواهس
نشيعه والأم كل الگلب تارس
عابس جننه البيه الفرس دايس
لجل موسى ابن جعفر گلي چم عابس
نذب البال...ونجزع لازم
ياشيال...موسى الكاظم
----------------------------------
ونريد بهلزمن بتشيعه من نبدي
نريد القائم بشيعة علي يحدي
يتقدم صدرها التعزية المهدي
وينادي"ما نستك شيعتك جدي"
طال وطال...هجر القائم
ياشيال...موسى الكاظم
#الخادم
حسن ميثاق الربيعي
سيد الأمجاد يا أسد بغداد
بيا سجن مسموم يبن الطاهرين
بيا سجن مسموم يبن الطاهرين
......................................
هاي مو اول مصيبه والسبب نفس السبب
بغضاً ابنهج الرساله حاربوكم لا عجب
ألحسن سممو جبده وجسم الحسين انسلب
ومن علي السجاد بيكم حاربو هذا النسب
كل جبد معصوم هالصبح مسموم
والاماكن تختلف عالسائلين
بيا سجن مسموم يبن الطاهرين
......................................
بالسجن مولاي وجهك سيدي ابنوره اختلف
اظلم ومن نور خدك هذا سجنك وانعرف
تفرش الكَاع ابعباتك بالصلاه والدمعه طف
وحاكم الدوله ابقصوره عايش انواع الترف
وانت يالكاظم فرصه للظالم
ينتقم من نهجك الحق المبين
بيا سجن مسموم يبن الطاهرين
......................................
تجرع اهموم الرزايا وكَلبك اعله اهلك يحن
سكته وناتك عليهم من يسمعك من تون
عايش احزان ومأسي ومن حزن طحت ابحزن
ماشفت راحه ابحياتك لا سعاده ولا أمن
بالسجن عمرك يخلص ابصبرك
بين جور اهل الظلم والحاقدين
بيا سجن مسموم يبن الطاهرين
......................................
بالسجود ابكل صلاتك تدعي ربك بالفرج
بالحجج ترفع جفوفك وانت من نسل الحجج
وبنهج سجن وعباده انت سنيت النهج
نازعت انفاسك انت وكل نفس بيك اختلج
وخلصت انفاسك باعذب احساسك
وانت للأسلام خير العاملين
بيا سجن مسموم يبن الطاهرين
......................................
عالجسر مطروح نعشك هذا أمام الرافظه
صاحو وشيعة محمد ترست ارضين وفضه
كاظم اهل البيت هذا عمره بالسم انكَظه
بس حسافه الفزعه جانت بعد ماصارت قضه
بالسجن سموك بعد ما حرموك
صاحت الناس اعله نعشك يالامين
بيا سجن مسموم يبن الطاهرين
ياسر العارضي
يم ظلام السجن تضوي شمس احروفك
من على اهلك تون دمعتك متشوفك
ليلك ابعز النهار
وتشهك انفاس احتظار
يا إمامي يا إمامي
.....................................................
عاشت اطيوفك غريبه وبأمانيهه الجفن
ماتحس بانفاس بحرك عكس مجراهه للسفن
والهوه اليحتاج دمك خلص عمره من الحزن
لا نوافذ منهه يدخل كله حيطان السجن
مختنك تحت الأرض **** ابلا هواك اتعاني
من الفرض حد الفرض **** ساجد انت امتاني
للفرج تبني انتظار
وتشهك انفاس احتظار
يا إمامي يا إمامي
.....................................................
مركبة عمرك كَصيره والسجن جان الفلك
رغم هذا انت ابوجودك جن تعيش ابمنزلك
دنيه تارسهه ابعبيرك وانت مبعد عن هلك
صوتك احساس المؤذن باب الكَلوب امتلك
وي نسيم الهوه **** باقي صوت اجروفك
عايش ابلا ضوه **** والشمس موصوفك
رغم هذا ابكل وقار
وتشهك انفاس احتظار
يا إمامي يا إمامي
.....................................................
رهبتك بعيون خصمك جن علي وعمر بن ود
تنجلي الاحزاب كلهه ابنظره لو عينك تصد
همه لو ماسَم غدرهم ياهو منهم يستعد
يوكَف اكبالك ويبرز يعرف امكَطع يرد
إي وحك هل أتى **** لا فتى وسط السجن
جاءَ بامراً مُلفِتا **** إلا انت بكل زمن
بلونك وذايب سمار
وتشهك انفاس احتظار
يا إمامي يا إمامي
.....................................................
جم أمر من غيظ كاظم كل حياتك هالأمور
هوه لو دفتر يخلّص عمرك بأول سطور
صابر اكثر من ربيعك يالخريفك ضل يدور
جن ضلع للزهره غصنك مايطيب من الكسور
مره تنشاف الحسن **** مسموم بين الغربه
وجن حسين من المحن **** عطشان واشتد حربه
جبدك ابنار وشرار
وتشهك انفاس احتظار
يا إمامي يا إمامي
.....................................................
كل جسر بغداد نعشك واجه التشييعك نهر
واللي فزعو نهر ثاني من جَمِع شيعه الحظر
حسين وحده وطعنه طعنه اسيوف وارماح ونظر
هذا يضحك ذاك يفرح ذره ماعدهم قهر
وعينه صوب الخيم **** الزينب المشدوهه
مايهم باي سهم **** ابجيشهم حاطوهه
شافهه اتلم الزغار
وتشهك انفاس احتظار
يا إمامي يا إمامي
ياسر العارضي
صيحاتي بالشدة اعتلن
وضعي صعب يابا الحسن
......................................
على باب السجن يتلولح الموت
عدل واشعر اعيشن جوه تابوت
علي ضاگ النفس گوه الهوى يفوت
يجدي احسبني يونس والسجن حوت
واچتافي من همي انحنن
وضعي صعب يابا الحسن
.......................
يمر كل يوم ليل ابلايه مصباح
وتدري الظلمة تاكل حيل الأرواح
السجن طاموره شيدبرلها مفتاح
السكوت اغتال صبري الممتلي صياح
والظلمة تذبح بالزمن
وضعي صعب يابا الحسن
.......................
منك ياعلي تعلمنه شيصير
ماينشاف منه بيوم تقصير
لچن يا سيدي محتاج تفسير
ليش اسمع خيول وطگ مسامير
صوت الكسر بأذاني رن
وضعي صعب يابا الحسن
.......................
يأذي الگيد ايدي وانا رجال
واعيش ابسجن مو بالغربه رحال
على عماتي ردت توصيف ينگال
تحاوطهن شمات وحالهن حال
من السبي كلش جزن
وضعي صعب يابا الحسن
.......................
ابعثت مرسال الك من جوه لتراب
لبو تراب ارد دز مراسالي بتراب
يجدي الوحشه چنها بالگلب ناب
يأذي الروح حيل افراگ الاحباب
بالوطن وابعازت وطن
وضعي صعب يابا الحسن
....................
لمن سمهم اجه استشعر البين
واحس ياجدي ترجف هاي الايدين
قبل موتي اسلم هالاسلامين
واحد للنجف واخر للحسين
وغربت روحي من البدن
وضعي صعب يابا الحسن
#الخـــادم
حسن ميثاق الربيعي
*طامورة ظلمة يعني* 😭
طامورة ظلمة يعني~~~ حفرة بسجن من تراب
طامورة ظلمة يعني
قيود وسلاسل والعذاب
طامورة ظلمة يعني
قلبه امامي من السم ذاب
〰️〰️〰️〰️〰️
قيد وسلاسل يعني ~ تلك علامات الاسر
قيد وسلاسل يعني~ الكاظم تمرمر بالقهر
قيد وسلاسل يعني ~ ميّت ومرمي عالجسر
〰️〰️〰️〰️〰️
جنازة غريبه يعني~ جنازة رمية بلا دفن
جنازة غريبه يعني ~ عباته صارت له كفن
جنازة غريبه يعني ~ ميّت امامي بالسجن
خادمة آل محمد ✍🏻
استشهاد الامام موسى ابن جعفر ع
بين الزنازين .. خذ روحك البين
السم مردلك چبدتك .. عمرك گظيته بغربتك
بين الزنازين
……………………………………
يالماشفت راحه ابد من بني العباس
يوميه مسجـون ابـلـد ودورك الناس
يوميه مسجون بكـتر
والشيعه تطلـع تنـتظر
تاليها يخلص هالعمر .. بطامورة ارجاس
عمرك گضه وراح .. يالكاظم ارتاح
من گيدك الي برگبتك .. عمرك گظيته بغربتك
بين الزنازين
……………………………………
مابين قضبان السجن وبغربة ايام
خلصته عمرك بس تون وتصيح يالشام
بطاموره ونك ينسمع
وشگد جره منك دمع
بروحك كسرة شچم ظلع .. لمصاب الخيام
ماهادت الروح .. نهار ومسه تنوح
لمصاب زينب عمتك .. عمرك گظيته بغربتك
بين الزنازين
……………………………………
شيب البراسك مو كبر كل شيبه الف اه
مشتعل گلبك بالجمر چن خيمه جواه
بگلبك تشب نار الخيم
حيلك على حسين نهدم
كاتلتك الحسره وندم .. ماچنت وياه
بگلبك تشب نار .. تطلب الك ثار
چا كربله شگد اذتك .. عمرك گظيته بغربتك
بين الزنازين
……………………………………
كلما يمر بيك العـطش يالكاظم اتذوب
چم عصره گلبك ينعصر لو صار الغروب
بهذا الوكت مارد ابو
لعماتـك ولا رد اخـو
بس جاهن بسوط العدو .. ويروع الگلوب
ومن تذكر احبال .. دمعك دمه سال
لطاري السبي تصب دمعتك .. عمرك گظيته بغربتك
بين الزنازين
……………………………………
متحملت هذا الجره بعيال الحسين
ولهالسبب من الحزن مت بزنازين
بطامورة السندي متت
مصاب السبي متحملت
يابو الرضا چا لو شفت .. طبت الدواوين
ياطبت الشام .. شگد ذبحت احلام
وصار بسببها موتتك .. عمرك گظيته بغربتك
بين الزنازين
……………………………………
حتى لمن انته متت اونعشك انشال
كل فكرك بجسم البقه عاري عله الرمال
ضليت يالكاظم تون
عالعشره فوگاه اصعدن
وصدره بحوافرها انطحن .. وجسمه غده اوصال
مسلوب الثياب .. ضل فوگ التراب
عاد انته شالو جثتك .. عمرك گظيته بغربتك
بين الزنازين
الشاعر عقيل الحسناوي..
غـربـة سجـن ،،
يالعـايش بـغـربـة سجـن .. ليانـايـبـه ليـلك تــون
عالمـات فـت گـلبـه العـطـش ..
عـالگـوطـرن صبح اهـدعـش
……………………………
يالغـربـتك غـربة وطـن لا ديـره عـنـدك لا اهـل
جوه الارض عشت بسجن ولطلعـتك مات الامل
گـيدك على اچفوفك كبر گـد ماشرب بيك واكل
وطـامـورتـك شربـت ضـوه لونـك لمـا نورك افـل
مصلايـتك بادت لأن .. اركـبك عليها اتكسرن
وطولك يبـو الطول انكـمـش ..
عـالگـوطـرن صبح اهـدعـش
……………………………
بـيــن العبــاده والـذكــر تـقـره مصـايـب كـربـلـه
مجلس تسوي بس دمع تبچي السجن من تقره اله
تـقـره عـلـه ذاك المنـذبــح وبحـافـر الخـيل انـوله
وابحـظـنـه طـفلـه ينـفـطم اتـذبحـه نبلـة حرمـله
المذبوح بحضينه طفل .. نشـدت بنـاتـه بالحبل
وجـسمه علـه الغـبره انفرش
عـالگـوطـرن صبح اهـدعـش
……………………………
تنصب عزه بروحك گمت وتبچي وتون وتنهضم
عـالمـات عـطشـان ابفـلــه مابـطلـت نــوح ولـطم
بخــدك حـفر سچــه الدمـع عالماسلـم منه عـظم
بحـوافـر الخـيل انسحگ جـسمه يويلي ومنـثـرم
الخـيل لمـن داسـته .. عالـغـبره جسمه طشته
ابنـينـوى كـل جـسمـه طــش
عـالگـوطـرن صبح اهـدعـش
……………………………
يابو الرضا ياهو الاشد وگلبك على مصابه نفـطر
الخـلاك تبـچـي بالسجـن وتـنـوح كل هذا الدهر
لـ عبدالله للأكـبر نحــت لجــسام لمـصـاب النـهر
للخـيـمه للنـوگ الـهزل لخـد العفـاف الي انسطر
ادري المصيبه الهـدتـك .. چـف السطر خد عمتك
تمـنـت يشــيلــوهـا بـنـعــش
عـالگـوطـرن صبح اهـدعـش
……………………………
عمـتـك عـقـيلـة مُـطَـلـب امـخــدرت آل النبي
من حرگوا الخـيمه الظهر طلعت تطفي بالعبي
المالها طـول انعـرف ركـضت اگـبال الأجـنـبي
الشمات اجوها بالحبل يصيحون يازينب سبي
الماسامعه احچايت زعل .. يسبون امها والفحل
واحـسـاسـها حـيـل انخـدش
عـالگـوطـرن صبح اهـدعـش
……………………………
المنشـاف ظـل الـها گـبل المـامـر عـبايتـها الـهوى
عالهـزلـه يالكاظم مشـت طرت صحـاري بنـيـنوى
اليرجـف گبل من ظل علي تالي وعلى زينب گوه
يشتمها ويجرها بحبل وفوگ المتن سوطه التوه
الچانت عزيزه اخت الحسن .. ذلـت لمن دار الزمن
وغـيض وزعل چفـها ارتعـش
عـالگـوطـرن صبح اهـدعـش
الشاعر عقيل الحسناوي..
مقطع صوتي من حيدر بشار الدراجي
Читать полностью…
هوسات للإمام الكاظم عليه السلام
وحگ گيد البچفك يـــــا أسد بغـداد
نگصدلك زحف يـــــا وارث الأمجـاد
ورثنـاهــه محبــتك مــن أبــو لاولاد
(نسحگ روس العادو نهجك ــ
يــا كعــبه ونگصد ونحجك)
* * *
يا كعبة صــبر وتگصـــدك الكونيـن
مشايه ألك نقســـم بنحــــر حسين
يالحبك فرض يا سيدي مـن الدين
(مشايـــه لگبــرك نتعنــه ــ
يالگبرك روضه من الجنه )
* * *
نگصدلك بلهفه وخلــــي نتفجــر
نار الشوگ بينه بكل وكـت تسعر
عشاگ وننادي موسى أبن جعفـر
(عشاگ ويا موت يردنه ــ
وبدمنه الكاظم عاهدنه)
* * *
يا جسر المصايب والنحــب والنـوح
ياهو الفوگ ظهرك گلي ظل مطروح
نعش موسى أبن جعفر للعوالم روح
مطروح الدين وأركانــه ــ
ونشيعه وتنظر عدوانه )
* * *
يالكاظــم گصدنــه بحرگـــــه هــــذا اليوم
سمعنه أعلى الجسر جسم الولي المسموم
نشيعه ولو جرى مـــــن عدنه نهـر أدمــوم
(بدمانه نشيــع والينــه ــ
يالكاظم بسمك نادينه )
* * *
يا بـاب الحوائـــــج ما تـــــرد عنــاي
أجيت أنه أشتكيلك من هضم دنياي
أعرفــك للحوائـــــــج سيدي گضـاي
( الحاجات الكاظم يگضيهه ــ
والحــاجــه أبيــدك ينطيهه )
الشاعر
موسى البديري
قصيدة ( استشهاد الامام الكاظم عليه السلام )
جديد ( جنة الكاظِمين ) 1445.هج.
أدخِلوها بسلامٍ آمنيّن
جنة الفردوس أرض الكاظِمَين
-------------------------
أشهدو أنَ الدمع بالحضره كَبّر
السلامُ عليكَ يبنَ جَعفر
انموت احنه بالعشك علمنه قَنبر
الخدمة هايه مثل أُمنه نحبها أكثر
صوت كل خادم ينادي بالحنين
جنة الفردوس أرض الكاظِمَين
-------------------------
عالوعد هاي الزياره عدنه كل عام
جاي زاير جاي شاعر جاي لطام
صحنه ياباب الحوائج احنه خدام
اي وحك ذاكَ النحر وذيج الِخيام
اي وحك الكافل ودم الوتين
جنة الفردوس أرض الكاظِمَين
-------------------------
نشتم احنه بضريحك طف الحسين
يلي عمرك كربله كضيت السنين
شكد صحت مولاي انت بدمعة العين
مره عالمذبوح تنعه ومره جفين
انت ياسابع ضوه ولدِ الحُسين
جنة الفردوس أرض الكاظِمَين
--------------------------
كل وكت هذا عزانه للمنيه
نريد نظرة فاطمة الزهره الزجيه
روح كل خادم تنادي هالمسيه
ياغريب وياغريب الكاظميه
ياطبيب كلوب كُل المُؤمنين
جنة الفردوس أرض الكاظِمَين
------------------------
نلطم احنه عالصدر ياسيدي اليوم
هذا نعشك يبن جعفر آيا مظلوم
نصيح وا ويلاه عاللي مات مسموم
نصيح وا ويلاه عاللي بسجنه محروم
كل رَجَب هذا الحزن مِن الأنين
جنة الفردوس أرض الكاظِمَين
--------------------------
الخادم _ ابو فدك الشامي ✍
قصيدة نزله( استشهاد الامام الكاظم ع))
ننخاك ....... يابو الرضا
.........................................
اليوم لأرض الكاظميه بهل عزاء
انجدد اليوم التعازي والولاء
ارواحنه فدوه لعد موسى فداء
لحضرته هذا اللطم نهديله
..........................................
للامام السابع تعزي السمه
والدمع مدرار تنعه فاطمه
مانسينه امصابه نحيي كل سنه
انت سر الله يا تأويله
........................................
بالسجن مسموم كضاها المحن
بعيد عن اهله وغربته والوطن
ما رحم بحالته ويلي الزمن
حته حيطان السجن تبجيله
.........................................
من ظلم هارون شاف شكد عذاب
وحده بزنزانه وبعين المصاب
15. عام بسجن عن الاحباب
يقره قرآن ودمع ترتيله
..........................................
يشوف ينظر عن يساره وعن يمين
اتذكر الطف الجره بجده الحسين
دموعه هاي لكربله يبجي وحزين
والدمع عن الجره يحجيله
..........................................
نكصد احنه لحضرته نزور الغريب
نلطم اعله الصدر ونزيد النحيب
والدعاء بقبته حتمآ يُجيب
نحضر ابمجلس عزائه الليله
.........................................
الخادم... ابو فدك الشامي
قصيدة ..الى الامام الكاظم (ع)
قصيدة( حكاية الطف)
على لحن ( توفوني واعتوني ) التي قرأها
المرحوم شيخ( وطن النجفي )
..............................................
موسى الكاظم ابسجنه ** وعيونه تجري ادموم
ينحب ساعه لحسينه ** وللعباس وجفينه
وعيونه تجري ادموم
...............................................
هذا الغريب البلسجن حسره وآه
يذكر حسين وتجري دمعة عيناه
قرآن رتل بالكهف بسم الله
راسه يشوفه عالرمح وا ويلاه
يتصور هاي الحاله ** والدمعه وسط العين
بالعبره تهمل عينه** وللعباس وجفينه
وعيونه تجري ادموم
..............................................
اكباله الشريعه تنرسم ياحاله
واجبود كاتلها الضمه لعياله
تتنطر ايعود الكمر واهلاله
والنار تلهب بالكلب جتاله
منظر عايش بأحلامه ** ويلي ويلطم عالراس
ماينساها بسنينه ** وللعباس وجفينه
وعيونه تجري ادموم
..............................................
بحافر الخيل حسين رضو صدره
والدم تفايض جا النهر من نحره
واثنعش طبره طبره فوك الطبره
الله يساعد حالته ويا صبره
تتخيل هاي الحاله ** من ايحزون الراس
وا ويلي يابو سكينه ** وللعباس وجفينه
وعيونه تجري ادموم
..............................................
تنعه مصايب منها اتشيب الراس
وبطور عاشوري يون بيه احساس
من ضل غريب حسين و بلا عباس
طاح اعله وجه كوه جر الانفاس
تعقد مجلس بآلامك ** يابو الرضا المسموم
صوتك عالي بونينه ** و للعباس وجفينه
وعيونه تجري ادموم
..............................................
تنعه الخيام التستعر بيها النار
شاهد عيان بدمعته عالطف صار
جوت اجدام العايله وهمه ازغار
لا ناصر الهم يفزع ولا نغار
بكلبك حسره لخيامه ** ماتطفي هاي النار
لحسينك الله يعينه ** وللعباس وجفينه
وعيونه تجري ادموم
................................................
الخادم ...... ابو فدك الشامي
قصيدة نزله إلى الامام الكاظم عليه السلام..........
انه كلبي هايم ** للامام الكاظم
للامام الكاظم ** للامام الكاظم
...........................................
بين دمعاتي كتبت اجروحي
واللطم صار سلوتي ونوحي
والمجالس تعيش ا بروحي
جرحي عاشور اون مذبوحي
نعزي احنه القائم ** للامام الكاظم
للامام الكاظم ** للامام الكاظم
...........................................
يابو طلبه جيت انه بطلبه
تكضي عندك كل حوائج صعبه
تنطي الامراد و تزيح الكِربه
امن ادخل اهناك واشوف القُبه
وبدمعتي ساجم ** للامام الكاظم
للامام الكاظم ** للامام الكاظم
............................................
عل الامام الكاظم اجري العبره
ولمصابه نعزي احنه الزهره
وبدليلي أنه تسعر جمره
كلبي بغيابه بعد شيصبره
عالزياره عازم ** للامام الكاظم
للامام الكاظم ** للامام الكاظم
............................................
اجمل امنيه اشم اترابك
خادم وجيت كعدت ابابك
وبدمعتي انه احيي امصابك
والاجتك هاي كلها احبابك
وبعزائي لاطم ** للامام الكاظم
للامام الكاظم ** للامام الكاظم
...........................................
بالمجالس دوم اكضي اسنيني
بهل الخدامه ريت تعمه عيني
لاخر انفاسي اصيح احسيني
هذا ديني وما اغير ديني
وبطريقي دايم ** للامام الكاظم
للامام الكاظم ** للامام الكاظم
............................................
الخادم ..... ابو فدك الشامي
عظم الله اجركم بمصاب الامام الكاظم عليه السلام....
اريد ابجي بدمع عيني، وسيله
على العاش بسجن مظلم، وسيله
غير الخدمه ماعدنه .... وسيله
( اجينه ازحوف لأرض الكاظميه )
الخادم.. ابو فدك الشامي
......................................
سدل ادينه .. ويعرگ جبينه
المحد عرف معناه
رايح يلاگي الله
بروحه الحزينه
......
كلفه وهالكنـز مسجون والمايسوه حر بره
وادم ما وعت للصار نفس الغلطة كل مره
صعدو كل فحم عالغيم وچانت بيدهم دره
موسى ما خسر هالناس بس الناس لتخسره
جهلوا مقـامة .. بحر الكرامة
والجرحته دنياه
رايح يلاگي الله
بروحه الحزينه
.......
ادينه تحله بالقرآن ليش بگيد ملفوفه
يگدر كلشي يصنع چان كاف ونون بچفوفه
من نلگه بزمن حيدر نلگه بهالزمن كوفه
يجهلونه وينكرونه وباقي القصه معروفه
لو يعرفونه .. ويقدرونه
شافوا فعل يمناه
رايح يلاگي الله
بروحه الحزينه
.....
عمت عيني بقه بلا حيل سجنه ياكل بحيله
ابخنگه وظلمة چن تابوت چانت تعبر الليلة
ولكن من يمر الليل سوادة يشوف توميله
نشدها على الاسم بس ما تقبل هيه تحچيله
بليلة حداده .. هاي السواده
چانت تون وياه
رايح يلاگي الله
بروحه الحزينه
.......
السواده من اجاه الموت وخرت عنهه الاصفاد
وترتل بالكهف يمه وهالترتيل ضل ينعاد
تگله يا غريب انا الغريب حسين ابو السجاد
يالتبچي عليه اليوم اجيتك احضر ابغداد
جثتك مصيبه .. مثلي غريبه
يم راسه ضل ينعاه
رايح يلاگي الله
بروحه الحزينه
الخادم
حسن ميثاق الربيعي
لاستشهاد الامام موسى بن جعفر
الكاظم عليه السلام
گالي فوگ الجسر شبه الگمر
اربعه منزلينه ماعندك خبر
گتله هذا النور من قبل الأزل
ساطع الانوار من نور الدرر
گال يم جنازته ماكو أهل
ليش من اهله ولاواحد حظر
گتله مطلوبين اهله بكل وكت
مالهم بالارض دار ومستقر
گال شنهي المشكله وشنهي الجره
وليش هذا الخوف منه والحذر
گتله هلأسباب دين ومعرفه
وعلمه مابين الخلگ علمه انتشر
گالي شكبر ذنوبه وحاربوه
والحقد هاگد عليه ليش استمر
گتله عابد ذاكر وصاحب علم
وتشهد بهذا البوادي والحظر
گال مامعقوله يمكن حاربوه
لان ضدهم طلع بسيوف الخطر
گتله اسلاحه العباده ودمعته
وبالعلم سلطان ولربه شكر
گالي اشكد علجرم هذا انحكم
دخلوه يامحكمه القاضي شئمر
گتله لامحكمه ولاقاضي الحكم
قررت ينحجب بالظلمه الزمر
ابسجن بن شاهك تجرح بلقيود
دَمَّن أچفوفه أنطبع بيهن اثر
ينشد السجان عن وكت الصلاه
مايميز الليل من وكت السحر
گال من اصدر حكم قاسي عليه
وبقرار الجائر ابحقه صدر
گتله من سن الظلاله والظلم
الحاقد الغدار من سابع ظهر
صاحب اقيان وملذات وطرب
وبمجالس لهو وسهرات وسمر
گال لاساعه رحم بيه وعفاه
گتله طبع الشوك لاعطر وثمر
گال ليش الوانه متغيره شجاه
گتله بالسم ختموا ايام الگمر
گال يامظلوم هذا ومبتلي
المات بالسم وصبر هاگد صبر
گتله المظلوم موسى على الجسر
هذا ابن جعفر وابن خير البشر
الشاعر حسن لعيبي الحريشاوي
يمسموم جينه الحظرتك
يمسموم نبجي المهجتك
مشايه اعتنينه
بالدمعه الحنينه
هاك اسمع بجينه
يمسموم يمسموم
................................................
ويه ما تبدي الاخيره العشره من شهرك رجب
جن مؤذن بينه يهتف صوته عالي ومنحجب
كَومو ياشيعة محمد عوفو كلشي لأي سبب
واعتنو المرقد الكاظم سيدي ونفزع شعب
بالهموم والحسره والآه
بالهموم شخصك اجيناه
وانحس ما وفينه
ياحامي المدينه
هاك اسمع بجينه
يمسموم يمسموم
................................................
اربعينيه ابعزمنه وكَاصدينك يالأبي
بينه جن زينب وصرخت فوك تل الزينبي
مايرد ممشانه طاغي ولا حقود ولا غبي
وجن سكينه هالقضيه مارضينه تنسبي
ولا يوم ننسه الشعائر
ولا يوم نفني الضمائر
يالكاظم واجينه
نرفعلك ادينه
هاك اسمع بجينه
يمسموم يمسموم
................................................
راحه لا مو تعب دربك لجلك ايهون الصعب
اشما مشينه خطوه خطوه نشعر الجنه الدرب
شكَد مواكب للخدامه لجل يومك تنُصُب
هله بالزوار تهتف والمجالسهم نطب
يمظلوم هذا العزائك
يمظلوم ننصر دمائك
ونشعر بالسكينه
يالروحك أمينه
هاك اسمع بجينه
يمسموم يمسموم
................................................
بالسجن خلصو عمرك يالوفاتك بالسجن
سمموك اهل الخيانه باخر انفاسك تون
امصيبتك جداً عظيمه والهه نلطم عالوجن
ونبحر بأحزان يومك والبحر حزنك سفن
يمهضوم يومك فجعنه
يمهضوم أسبل دمعنه
من واحدنه عينه
تبجيلك سنينه
هاك اسمع بجينه
يمسموم يمسموم
................................................
من نصل يم كَبرك احنه انسلم انسمعك ترد
وتكتب اسم اللي يزورك انت واكف مستعد
اشما دمعنه ايطيح يمك سيدي انشم الورد
جا شباب انت ابضريحك نشتم اتراب الحشد
يمن دوم باقي بمهجنه
يمن دوم جيشك حشدنه
لجلك ياولينه
ارواحنه حزينه
هاك اسمع بجينه
يمسموم يمسموم
ياسر العارضي
يا شيال...نعش الكاظم
°°°°°°°°°°°°°°°°°°°°°°°°°°
على هونك يمن شايل نعش موسى
مشاعر شيعته كسرات متروسه
يموت ابلا ضوه الچان الضوه يبوسه
الچان يبوسه حتى تراب اليدوسه
بهاذه الحال...ماضن سالم
ياشيال...نعش الكاظم
----------------------------------
يمن شايل نعش موسى ابن جعفر
الجسر والناس الك بكل لهفه تتنطر
لأن متريده يبقى مثل ابو الأكبر
يضل حر الشمس ابچثه يصهر
صار اوصال...بفعل الظالم
يا شيال...نعش الكاظم
----------------------------------
يشياله لون تشيعه هاذه الحين
ماتسمع حشه "هاذه الغريب امنين"
اهل بغداد توگف وگفت امعزبين
وچوادرهم ينسجوها برموش العين
وهاي امال...هاي الوادم
ياشيال...موسى الكاظم
----------------------------------
وتصير الدنيا خضره بكثرت الرايات
ونسوي دجله اخرى لكن ابدمعات
وعلى جسر الألم تتعاله هلصيحات
"يضل موسى بدليل الشيعة لا مامات"
الدمع السال...ضل متزاحم
ياشيال...نعش الكاظم
----------------------------------
نشيعه والحزن ضل تارس الواهس
نشيعه والأم كل الگلب تارس
عابس جننه البيه الفرس دايس
لجل موسى ابن جعفر گلي چم عابس
نذب البال...ونجزع لازم
ياشيال...موسى الكاظم
----------------------------------
ونريد بهلزمن بتشيعه من نبدي
نريد القائم بشيعة علي يحدي
يتقدم صدرها التعزية المهدي
وينادي"ما نستك شيعتك جدي"
طال وطال...هجر القائم
ياشيال...موسى الكاظم
#الخادم
حسن ميثاق الربيعي
⬛️🔳القصيدة-5-🔳⬛️
وعرجْ علىٰ بغدادَ والدمعُ يُسكَبُ
ففيها رهينُ الحبسِ موسىٰ المُغيّبُ
وما زالَ في الآفاقِ كالنجمِ مُزهِراً
بأنوارِه ِ إذ تستَنير ُ الكواكِب ُ
إمامُ الورىٰ ما عاشَ يوماً براحةٍ
وبينَ طوامير ِ الطُغاة ِ يُعَذَب ُ
فكم حارَ سجّانُوهُ من عُظمِ شأنِهِ
وكم ظهَرَت بينَ السجونِ العجآئِب ُ
لـهُ سجدةٌ حتىٰ الزوال ِ يُطيلُها
من الفجر ِ أما في المسآءِ فرآهب ُ
سنيناً قَضاها بين َ حبسٍ وظالم ٍ
بِـحِقد ٍعن الأهلين َوالناس ِ يُحجَب ُ
وهارونُ يسعىٰ جاهداً لاغتيالِه ِ
بأيدٍ من الإجرام ِ حيث ُ النواصب ُ
وقد أمَـرَ السنديًَ شُلّت يمينُهُ
بدَس ِ زُعاف ٍ مثل َ نار ٍ وتَلهَب ُ
قضىٰ منهُ وآويلآه ُصبراً بغُربة ٍ
عليه ِالرِِّضا في حُرقةٍ ظلَّ يندب ُ
أيا والدي نادآه ُوالوجد ُ طافح ٌ
ومِـن نَـوحـِه ِ كُل ٌ ينوحُ وينحب ُ
فأينَ نِزار ٌ بعد َ قتل ِ عميدِها
بثأر ِابنِها من عِند ِ هارون َ تطلب ُ
#سمير_الصالحي
#النجف_الأشرف
🏴نعي -مجردات
من بغداد طارش خل يودون
لارض المدينه لو يلحگون
لهاشم يبلغهم يگومون
لسيوفهم كلهم يسلون
باخبار ابنهم كون يدرون
موسى ابن جعفر علة الكون
مسموم ميت وسط السجون
———————
🏴نعي- مجردات
عن لسان السيدة الزهرآء ع
آانه الزچيه وحزني ماهاد
يا ناس ادور عن الاولاد
منهم الكاظم باب المراد
مسموم مات بسجن بغداد
#سمير_الصالحي
#النجف_الأشرف
*بين الخرابة والطامورة*
لسان حال مولاتنا الزهراء ع تحضر عند ولدها الكاظم ع تگله~
محتارة انا ما بين السجن والخربة بٱرض الشام ~
من انظر سلسلة واغلال اذكر بالسبي الأيتام~
الطامورة تذكرني برقية عالتراب تنام~
صعبه محنتك يبني تبكي عليك هالقضبان
〰️〰️〰️〰️
لكن زادت المحنة بالخربة الطشت جابوه~
ودارت حوله ايتامي وحسين انذبح شافوه~
مخضب ويلي بدمومه
وصاحت طفلته خلوه~
مشتاگه لابو اليمه وموعدنا بخرابة حان
خادمة آل محمد✍🏻