tajalzahraa1 | Неотсортированное

Telegram-канал tajalzahraa1 - 🌴تجمّع الزهراء ع العاشورائي🌴

7626

خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد

Подписаться на канал

🌴تجمّع الزهراء ع العاشورائي🌴

موشح لشهادة سيدي ومولاي امير المؤمنين علي صلوات الله عليه

اصواب راسك صوب الدين القويم
كيفَ لا وانته الصراط المستقيم
__

آه يصواب البچت منه السماء
او زلزل الگيعان واتعله النداء
طاح يا وسفه علي باب الرجاء
ركن دين الله انهدم واصبح سقيم
__

طايح ابمحرابه واصوابه ثجيل
عله الشيبه الطاهره دمه يسيل
دمع ما ينفع ولا صبرن جميل
كسر ظهر الشرع والآي الحكيم
__

كسر ظهر الشرع من طاح الامام
عگب حيدر اقرو عل دنيا السلام
راح ابو گلب الحنين اعله الانام
والحزن والنوح من عگبه لديم
__

والله اديم النوح والون والدمع
وي گلب زينب وِجب ان ننفجع
امس امها راحت ابكسر الضلع
واليوم صوبها علي اصوابن اليم
__

صوباها اصواب ما صحله دوه
وأَنحلت والعود من عدها التوه
اتگله بويه منهو ليه ابنينوه
من تدور اعليه ازلام الرجيم
__

ريت راسي ابدال راسك منضُرب
بويه لا تمشي او تخليني ابغرب
عله فراگك ياعلي مالي گلب
وانه گلبي امضعضع اوصاير حطيم
__

آخ يصوابك ادوّر طِبّه وين
شاب راسي . والدمع ماخله عين
اگعد او باصرني بويه يل حنين
دلني اعله دواك خليني اهيم
__

بويه ساكت ليش مترد الجواب
بويه گلبي من سكوتك والله ذاب
امنين اجاني هل بلاء او هل مصاب
وآنه ماعندي صبر موسى الكليم
__

انچان ما تگعد بعد واترد الي
للگبر وياك اخذني ياعلي
أنه ابهل دنيه بعد عگبك شلي
ابنار اضل او لا يمر بيه النعيم

__

ابو فاطمة الطائي

Читать полностью…

🌴تجمّع الزهراء ع العاشورائي🌴

قصيدة جديدة بحق الامام علي عليه السلام عن السيدة زينب عليها السلام


راح امن ادية حامي الحمية
دلالي مجروح هاي المسية
===================
عيني اعله عينك من تصد / ذابل اشوفك يالورد / يا رايحة ليمك وارد / والدمعة بالعين

صاباني بمصابة الدهر / حزنك وسط گلبي استقر / ابكل بيتي اشوفلك اثر / ما يهدة الونين

أغلى الحبايب يالعني غايب
دلالي مجروح هاي المسية
======================
يالبيتي وحشة ابغيبتك / واگبالي اشوفن صورتك / اشتم يبوية ريحتك / وابالي ذكراك

صعبة من اظلن وحدي / وما اشوفة يمي والدي / يومي ابنياحة يبتدي / مجروحة وانعاك

يا اغلى مني بُعدك كتلني
دلالي مجروح هاي المسية
====================
يغمر حنانك عيلتك / وسفة يبوها فگدتك / تنحب عليك او رادتك / تدرينا نشتاكَ

اكبر بجالك حسبت / وتحظرني انت لو متت / دولاب بوية ادولبت / ما احمل فراكَ

محتارة بامري ذوبني صبري
دلالي مجروح هاي المسية
====================
ايتامك اعله الباب اجت / وروحي ييوية تمرمرت / يا وسفة عينك غمظت / عن هاي الايتام

تگصد الك صبح ومسة / كل الارامل والنسة / هاي اعله بابك جالسة / صار الها ايام

راح الكفلها صعبة امن اگلها
دلالي مجروح هاي المسية
=====================
مثلك يبوية ما يصح / فگدك جرح گلبي بجرح / سهرانة عيني للصبح / لجلك يوالي

من اغفى جرحي يلچلم / طيفك يجيني بالحلم / مرسوم الة بعيني رسم / أغلى الغوالي

بعيوني رسمك شيبني همك
دلالي مجروح هاي المسية
====================
أسالكم الدعاء رائد الاسدي

Читать полностью…

🌴تجمّع الزهراء ع العاشورائي🌴

لشهادة سيدي ومولاي امير المؤمنين علي صلوات الله عليه

دموعي سكته ايسولفن
عـل گـبـر يـابـو الـحسـن
اعاتب .. شعاتب .. يابو المحنّه
____

بل عيون دمع لاج اوحسرتي خذت عافيتي
چنت وين صرت وين عليّه تهدّم بيتي

دنياي كلها بس علي اويا عشت احلى اسنيني
لو يوم عن عيني ابتعد امن الصبح تذبل عيني

ابويه ما مثله ابو
چفه حنين او بي دفو
اويلاه .. ون الگاه .. يا بو المحنّه
____

عل تراب الي اعتاب عليمن كسر دلالي
انشدك اشجنيته ؟ افجعتني او خذيت الغالي

ماتدري بعيوني انعمن او ظهري انجسم بفراگه
لا بيك باب او ينفتح حتى اويه ابوي اتلاگه

امروه ما ضلت بعد ؟
مو گلبي يتراب انمرد
الف داي ... صفه اوياي ... يا بو المحنّه
____

ترجيت اشكثر بيك يل تراب ولا تسمعني
ردت كون گبل ما تغطيه انا التدفني

چا دنيه ما بيها علي تسوه او اضلن بيها !؟
لا والله لو جنه اصبحت چن مگبره انظر ليها

غم الحياة ابلا علي
بس الگلب بيها ايغلي
فقط نوح ... والجروح ... يا بو المحنّه
____

أمانه يل اتراب أوصيك ابدمعتي الحمره
ابونه جرح بي اخافن تهيّج الطبره

يتراب لا لا تلچمه جرحه غميج او موجر
مفطوره ابونه هامته او يحمل الم ما يگدر

لا تلچم اجروح الولي
أمانه خل عندك علي
تره أيام ... فلا نام ... يا بو المحنّه
____

لون طاح بديه طبرته درتها ابراسي
وافدّيه بالعيون وفدّي إنفسه ابأنفاسي

ياريت الف موته متت او لا شوف ذاك اصوابه
الوجهه مثل وجه الگمر اصبح دماه اخضابه

ريع اليتامه ياوسف
متوسد اتراب النجف
مشه او راح .. بالجراح ... يا بو المحنّه
____

الدموع والاونين ابدما تِسكن اجروحي
علي مات خذه اوياه اماني او اخذها الروحي

ضليت عگبه بس جسد او خاوي او ويون يوميه
زينب چنت وياه گبل امن اليوم انا المسبيه

الردته يضل الكربله
او يشگف مرامي حرمله
وسف مات .. حرامات ... يا بو المحنّه
____

ابو فاطمة الطائي

Читать полностью…

🌴تجمّع الزهراء ع العاشورائي🌴

لاستشهاد أمير المؤمنين علي عليه السلام

دنيا رادت ونعرف مظمونها
نور حيدر مايمر بعيونها
★★★★★
فعل هلدنيا عجب بعد العجب
چن طبعها انكتب بس حيره وتعب
حاربت اهل المفاخر والنسب
بوجه اهل الخير مغبر لونها
★★★★★
بصبر حيدر من غدت متحيره
بلجبال البيه لوصار وجره
مثل صم اتراب طاحت علثره
دنيا مايل كل وكت قانونها
★★★★★
بهاي دنيا الغدر دومك مبتلي
امحزمه ومتريد همك ينجلي
چنها تطلب ثار منك ياعلي
اجت تاخذ يبوالغيره اديونها
★★★★★
ماملت وي ريحها وتابع صرت
وبحبلها مثل غيرك ما طحت
غري غيري عنها من يوم الگلت
حشمت ضدك الميجافونها
★★★★★
دَلَّت اعليك العده يا بوالحسن
بساعه صعبه مامثلها بكل زمن
غيضهم يمطر حقد اهل  الفتن
بسيف باتر هامتك  يلفونها

الشاعر حسن لعيبي الحريشاوي

Читать полностью…

🌴تجمّع الزهراء ع العاشورائي🌴

هوسات تأبينيه لاستشهاد امير المؤمنين علي عليه السلام

شنهي المابچالك يا ابوالايتام
بچه الكون المصابك ناحت الأحكام
بچه المحراب لفراگك بچه  الاسلام

(مهظوم الدين وأحكامه )
★★★★★★
على فراگك يون وينوح ياحيدر
محراب الصلاة والدين والمنبر
بنوايا السود خصمك معتني ويفتر

(ضم سيف الشر تحت اكتاره)
★★★★★
شنهي المابچالك ياعلي الكرار
الجن والانس يبچي يحامي الجار
والمي والأرض والطير والأشجار

(حيدر بچه الكون مصابه )
الشاعر حسن لعيبي الحريشاوي

Читать полностью…

🌴تجمّع الزهراء ع العاشورائي🌴

الشاعر حسن لعيبي الحريشاوي:
لاستشهاد أمير المؤمنين علي عليه السلام

ياعلي واگف ابابك  يجرح بخدي الدمع
وذابت من الآه روحي شلون ميذوب الشمع
★★★★★
روحي لمصابك حزينه  وگلبي الف چويه انچوه
من الهوه حرموك وسفه  وانته نسمات الهوه
يلرويت الدنيا رحمه   ابدمك السيف ارتوه
جهل لواحقاد منهم  ينضرب راس الشرع
★★★★★
والله ياحيدر جريمه  فوگ راسك تنطبر
شلون ياكون المحبه  ايضمك اتراب الگبر
وعفيه ياگلب اليحبك   ضال عد روحه صبر
هذا يوم الماكو مثله   الكون كله منفجع
★★★★★
نزل جبريل بدمعته  وروحه مهظومه صفت
ناده غاب الفرح عني  ايام عمرك من گضت
اليوم غاب الخير كله  الهدى اركانه اتهدمت
احبابك ينوحون ظلوا  عن شمل ماينجمع
★★★★★
صعب حال الموت لمن   قبض روحك حيدره
والثرى خجلان منك  من صرت تحت الثره
واگف ابابك ودمعي    جمر لمصابك جره
بدونك الدنيا  يحيدر    دنيا مابيها نفع
★★★★★
شنهو ذنبك يبوالطيبه  بهلنوايب تبتلي
حيف ياسيف المرادي  فوگ راسك يعتلي
انظر الحال اليتامه  تصيح كلها ياعلي
ابد موسهله  عليهم  حبل وصلك ينگطع

الشاعر حسن لعيبي الحريشاوي

لاستشهاد أمير المؤمنين علي
عليه السلام ( وزن الحدي ملمع)

(لأي ذنب ضربوا    بالسيف رأس المرتضى )

★★★★★
ياذنب سوه المرتضى  روح العلم والمعرفه
أشبدل ابنهج النبي   اشغير بدين المصطفى
هاكثر شاف من الحقد من ناس مابيهم وفه
بالظلم ردوله الفضل  وذيچ الموده بالجفه

(أهكذا العدل إذن  بالسيف مقتولاً قضى)
(لأي ذنب ضربوا بالسيف رأس المرتضى)
★★★★★
اسمى المعاني  لخصت  ابتضحياتك ياعلي
لهذا السبب طول الوكت بهاي العناصر مبتلي
سيفك نهايه لكل بشر  باطل  لئيم وجاهلي
وصبرك بدايه لكل عهد  بخير المگاصد ينملي

(شيطانهم بقتله  ابدى لهم عين الرضا  )
(لأي ذنب ضربوا  بالسيف رأس المرتضى)
★★★★★
طيحتك بفراش المرض لامو إلك يابو الحسن
ياعلم كل حد ما إله   خلوك ياوسفه أبچفن
وبجنازه تنحط ياعلي  وتنشال ياجنة عدن
من الگوم كل هذا الذنب لوكل ذنب من الزمن

(ماقصة الدهر معك  حتى تولى مُعْرِضا )
(لأي ذنب ضربوا بالسيف رأس المرتضى )
★★★★★

بدر الليالي ضيعوا  وماصانوا  أنوار الشمس
سدوا العين على الضوه ردوا على ليل الأمس
رادوا اورود المعرفه  بصدورهم ماتنغرس
ضاعوا ابليل المايفض ماخذوا من علمك درس

(بعد النبي أصبحت  في القلب نيران الغضا )
(لأي ذنب ضربوا      بالسيف رأس المرتضى)
★★★★★
باس وشجاعه ومعرفه   شافوا ولايهتز أبد
لاخذوا من علمه درس  ولا وفوا وياه ابعهد
ولما عشر علمه وصل  ماعنده بس غير الحسد
لاجاهليه غرته    ولاخشع لأصنام  وسجد

(من شر سيف حاقد     حراً  شهيداً قد مضى)
(لأي ذنب ضربوا   بالسيف رأس المرتضى )

الشاعر حسن لعيبي الحريشاوي

Читать полностью…

🌴تجمّع الزهراء ع العاشورائي🌴

في ذكرى استشهاد الأمير (ع)

ليلة الوفاة

يشيعه الليله زينب كوموا واسوها
او دَمْعَتْكم على الكرار هلوها

زينب فكدت ابـ هالليله ركن البيت
لذلك يا بشر بالونه عَزّوها

دِكّوا اعله الصدر بثنين ايديكم حيل
أو كل هاي العمايم بالله فلّوها

أشرار البريه ابغِلْها هذا اليوم
أركان الهدايه وسفه هدموها

و الشيبه اللي جانت دوم تنضح نور
او هيبه .. بالدِّمه يا ويلي خِضْبوها

خَلّوا جِبرائيل ايصيح بالآفاق
(بالمسجد العروه الوُثقى فِصْموها)

او زينب يتِّموها او يتِّمَوا لسلام
و (القُربى) اعله مرأى الدنيه داسوها

غيبةْ حيدره تعني اللطُف منحور
او تعني ابكربله ام الحزن يِسْبوها

او تعني اللي كفلها عالشريعه ايطيح
اُو بِسْياط الضغينه لن يِضِرْبوها

يشيعه ابـ هالمجالس حاضره الحوراء
لهذا اعيونكم يا شيعه غِضُّوها

& & & & & 

خادم الأمير (ع) : إبراهيم الدريس

Читать полностью…

🌴تجمّع الزهراء ع العاشورائي🌴

في ذكرى استشهاد الأمير (ع)
ليلة الوفاة

يكرار .. وَيَّاك اِخِذْني
يكرار .. إلمَن عِفِتْني ؟!

&&&&&

يبويه امْن اِغْمَضِت عينك .. تصلي ادموعي بعيوني
او منِّ اتشَيَّعِت أشعُر .. سوط ايألِّم امتوني
بعد عِزَّك يبو زينب .. يتيمه اَسْمَع ينادوني
او بَدَل ما عيدِج امبارك .. ابعيد الله يعَزُّوني

يكرار .. بُعْدك كِسَرْني
يكرار .. إلمَن عِفِتْني ؟!

&&&&&

ابليلةْ وَحْشِتك بويه .. بسَّ الله اِيْعَرِف حالي
المدامع تاكل بروحي .. إذا طيفك تِراوالي
اهوايه اَتلوَّع امْن اَنْظُر .. مكانك يالأبو خالي
بعدك ظلت الدنيه .. ابشِماته اتشاهد اِخْيالي

يكرار .. هَجْرك هِظَمْني
يكرار .. إلمَن عِفِتْني ؟!

&&&&&

ترى امْن اتنامَن ابلِحْدك .. يداحي الباب أظَل وَحدي
على اِحْجاياتك آنه اَصْفِن .. و الدمعه تَرِس خَدِّي
مِنِ اتسافِر عَنِ اِبْنَيْتك .. تِصيرَن دنيِتي ضِدِّي
او عليَّه اِسْهامْها تِرْمَن .. او رِحِلْتي اِوْيه الحزن تِبْدي

يكرار .. دهري امتِحَنِّي
يكرار .. إلمَن عِفِتْني ؟!

&&&&&

ابجروحه اشلون أسِألَنَّك .. حبيب ايخَلّي محبوبه ؟!
بكيت اِخْلافك ابدَمْعي .. أوِنِّ او أبجي مرعوبه
أحِس من هسه مسبيه .. او مِشيتَن بالسبي ادروبه
و اذا يتسلَّب احسيني .. ابغيابك روحي مسلوبه

يكرار .. مذبوحه جَنِّي
يكرار .. إلمَن عِفِتْني ؟!

&&&&&

لـ آخر لحظه و اعيوني .. يحامي الجار بعيونك
شالوك او أحِس روحي .. يشَيْعوها او يِشَيْعونك
تِظِن يا والدي أكدر .. أعيش الدنيه من دونك ؟!
على خُوتي صِحِت بويه .. ابدِليلي كونِ اِيْدِفْنونك

يكرار .. فكدك عِمَنِّي
يكرار .. إلمَن عِفِتْني ؟!

&&&&&

خادم زينب (ع) : إبراهيم الدريس

Читать полностью…

🌴تجمّع الزهراء ع العاشورائي🌴

في ذكرى استشهاد الأمير (ع)
ليلة الوفاة

امْن اتغيب يالكلبك وطن
سلّم على أم الحسن

او كلّلها زينب غافْيه
بين الجروح الدافْيه

&&&&&

مثِل ما وصّيتْني إسمَع إذن
من تصير انته يبو الفِقره ابجِفن
سلّم اعله الغالْيه أمِّ الحسن
او كِلْها من راحت او عيناي انعِمَن

او كلّلها زينب بالدمِع
كل لحظه تنحب عالضلِع

بعدِج مَشافت عافْيه
بين الجروح الدافْيه

&&&&&

كِلْها من شافت أبوها الغالي مات
اتمنّت اشكد بيها متطول الحياةْ
الـ يمه لا أم لا أبو يهوى الممات
او بالمدامع و الحزن يصحى او يبات

لمّن تشاهد فاطمه
زينب دَكِلْها امألّمه

او شمعَةْ عُمُرْها طافْيه
بين الجروح الدافْيه

&&&&&

لُـ امي كِلْها ابروحي أذّن جم بِلال
اليوم عن زينب هِتف راح الدَّلال
او عنها والِدْها علي شَدِّ الرِّحال
هذا مَن إلها النجِم بجفوفه شال

فاطم مِنِ اِتْجِيك الكبُر
كِلْها عِفِتْها للشِّمُر

او جم لوعه زينب خافْيه
بين الجروح الدافْيه

&&&&&

اتمُرْني بسمه بويه بعدك مستحيل
او هذا كلبي من رِحِت أصبَح عِليل
أبجي منَّ اَسمَع يحمَّاي الدِّخيل
كُل شِي يجَرَحْني غِده بعْد الرحيل

كلبي اِبْغِيابك يا علي
متعوب نبضه او مِبْتِلي

آهاته تبجي وافْيه
بين الجروح الدافْيه

&&&&&

يا علي يالماخِذ اوْياك العُمُر
من بعَد عينك إِلِي ما ظَل خِدُر
روحِتك تعني يِطِكـ متني الشِّمُر
يا علي و اجفوفي اِيْكَيِّدْها زَجُر

بانت يحيدر كربله
من غِبِت يا عَقْد الوِله

دَمْعاتي تشرَح كافْيه
بين الجروح الدافْيه

&&&&&

خادم زينب (ع) : إبراهيم الدريس

Читать полностью…

🌴تجمّع الزهراء ع العاشورائي🌴

في ذكرى شهادة أمير المؤمنين (ع)
ليلة ٢٠ رمضان

يا علي يا علي
حال اليتامه ايصدِّعك

يا علي يا علي
إلليله فجَّر مدمعك
&&&&&

إرحم ادموع اليتامه و الگلوب الذابله
ابابك التمت يحيدر و الحزن منها اعتلى
اتقبِّل اچفوفك حلمها ابشوفتك متأمله
لاكن المجتبى گلها يعتذر عقد الوله

يا علي يا علي
چانت تريد اتباوعك

يا علي يا علي
حال اليتامه ايصدِّعك
&&&&&

الليله أصوات اليتامه يا بو زينب تندبك
يا هو يرعانه خلافك بالدموع اتخاطبك
صاحت اخبرنه دخيلك عنه يا هو الغيَّبك ؟!
انته سيف الموت إنته اشلون سيف ايصوّبك ؟!

يا علي يا علي
اتريد اليتامه تسمعك

يا علي يا علي
حال اليتامه ايصدِّعك
&&&&&

الليله أيتامك حزينه او تنتحب يا با الحسن
تدري بس اتغيب عنها اعليها تترادف محن
يا علي لـ اصواب راسك كل گلب صاح او حِزَن
و الوحي ابرمح المصيبه هذا دلاله انطعن

يا علي يا علي
صوت الملائك يفجعك

يا علي يا علي
حال اليتامه ايصدِّعك
&&&&&

كل شي يجري اعليك دمعه الليله يا حامي الحمه
و الحجر هل المدامع على امصابك من دمه
وضعك الليله يغالي الأرض صدَّع و السمه
او خله بو الزهره ينوحن ويه بنته فاطمه

يا علي يا علي
الليله الصلاةِ اتودِّعك

يا علي يا علي
حال اليتامه ايصدِّعك
&&&&&

هذا خوَّاض المنايه السيفه بس يشطر شطر
صاير اعله افراشه ينحب و الفجر يبچي الفجر
هدَّم أركان الهدايه ما دره سيف الغدر
او صاب عرش الله ابضربته او صدَّع اليالي القدر

يا علي يا علي
يذبحنه والله مصرعك

يا علي يا علي
حال اليتامه ايصدِّعك
&&&&&

إبراهيم الدريس

Читать полностью…

🌴تجمّع الزهراء ع العاشورائي🌴

في ذكرى استشهاد الأمير (ع)
ليلة الضربة

منهو الصاب الراس ؟!
و اختنكت الأنفاس

منهو الغَيَّر بويه أحوالك ؟!
جاوبني فدوه الـ دلاَّلك

منهو الصاب الراس ؟!

&&&&&

يا بويه .. معقوله إنته حيدره ؟!
يا بويه .. هامك اشبيها امطبَّره ؟!
يا بويه .. اشلون اللي حيَّر خيبره ؟!
يا بويه .. يمشي او يطيح اعله الثره

معقوله انته الحيد ؟!
او ذاكه أشجع صنديد ؟!

اتسندك ليش أنظرها اعيالك ؟!
جاوبني فدوه الـ دلاَّلك

منهو الصاب الراس ؟!

&&&&&

ما أصدِّكـ .. ابـ عِلْم آنه لُو آنه ابـ حِلِم ؟!
ما أصدِّكـ .. يزحف اليتفجَّر عَزِم !
ما أصدِّكـ .. هذا الجِسَم روس الزِّلِم
ما أصدِّكـ .. راسه أباوع منجِسِم !

ابنظراتك جلمات
حلمِج زينب مات

أصفر بويه اشماله اهلالك ؟!
جاوبني فدوه الـ دلاَّلك

منهو الصاب الراس ؟!

&&&&&

جاوبني .. راسك علي منهو الطبَر ؟!
جاوبني .. مو وَن على حالي الحَجَر
جاوبني .. بَسْمِتك وين الـ عالثَّغَر ؟!
جاوبني .. او لا تعتذر لي بالقَدَر

وين البسمه وين ؟!
كلي يا بو احسين

منهو ابسيفه حيدر غالك ؟!
جاوبني فدوه الـ دلاَّلك

منهو الصاب الراس ؟!

&&&&&

جا وينه ؟! .. صوت التِّرَس إذني تَرِس ؟!
جا وينه ؟! .. هالليله ما أسمع له حِس !
جا وينه ؟! .. الـ مِن سيفه كلها تنخِلِس ؟!
جا وينه ؟! .. شو ورده بالوَن منغِرِس !

صعبه الغالي اتشوف
لونه أصفر مخطوف

يِجْتِلْني حيدر جَتَّالك
جاوبني فدوه الـ دلاَّلك

منهو الصاب الراس ؟!

&&&&&

لا ترحل .. اعليك ابـ علي آنه اِحْلَفِت
لا ترحل .. او من ترحل احسبني مِتِت
لا ترحل .. لو كلبي يا بويه عِفِت
لا ترحل .. بالطف يضربوني اشكِلِت ؟!

لا ترحل أرجاك
لُو تاخذني اوياك

لا ترحل خليني ابجالك
جاوبني فدوه الـ دلاَّلك

منهو الصاب الراس ؟!

&&&&&

يا يُمه .. وينِج تعالي بالدمِع
يا يُمه .. خلِّينه نلطُم عالضلِع
يا يُمه .. حيدر علي ابأخطر وَضِع
يا يُمه .. خوفي يموت او ننفِجِع

يا يُمه او لُو غاب
تسلب خدري أجناب

خَلِّي هاي الجلمه ابَّالك
جاوبني فدوه الـ دلاَّلك

منهو الصاب الراس ؟!

&&&&&

خادم زينب (ع) : إبراهيم الدريس

Читать полностью…

🌴تجمّع الزهراء ع العاشورائي🌴

في ذكرى شهادة أمير المؤمنين (ع)
على لسان ابنته السيدة زينب (ع)

طبره لو صاعقه .. نزلت ويلي عَلَي
صابوا جدي النبي .. لُو طبروا هُم علي

ابگلبي يدوي صايح
رايح بويه رايح
&&&&&

هيه طبره لو قيامه .. او علي صابوا لو هِيْ بنته
من شفت يا شيعه راسه .. كسر ضلع أمي ذكرته

روحي جرح المرتضى كلش ضهدها
خيمتي اليوم ابألم طايح عمدها
ما أَصَدْگ الشطر مرحب و ابن وِدْها
گاعد ايون او أحس روحي مردها

صدّيت الـ هامته .. او دمع اعيوني جرى
او حسّيت ابـ هالسنه .. عيدي بالمگبره

أعيادي فواتح
رايح بويه رايح
&&&&&

من شفت دم راسه نازف .. صرت أصيحن يُمه يُمه
منهو صاب الأغلى عندي .. امن الهوه هذا الأشمَّه

صبحي لو يمشي حياتي تنگلب ليل
بويه حاله يا بشر هدَّملي كل حيل
الحسن من صدلي أنوحن ظل يون حيل
و أبو اليمه يشعر ابصدره ألف خيل

حيدر يوم السمع .. نوحي دمعه همى
او گلي ادموعچ ترى .. اتذكِّرني ابفاطمه

گلبي يَمه طايح
رايح بويه رايح
&&&&&

الليله أصفر ويلي صاير .. يا بشر وجه المحنَّه
صار ايون من جرح راسه .. او كسر ونَّه گلب أهلنه

بويه أشوفنَّه يون صعبه عليه
كون أموت او لا علي اتضمه المنيه
هالرزيه فزِّزت كل جرح بيه
طبرةِ الكرار أول غاضريه

أتحسَّر و أنهضم .. كلما أنظر إله
او هوه من صد الي .. صاح آ يا كربله

متغيره الملامح
رايح بويه رايح
&&&&&

بويه گلي يالغريبه .. دمعتچ تعِّبت روحي
جرحي فدوه الضلع أمچ .. كافي زينب لا تنوحي

بويه زينب خليِ اچفوفچ بديني
او من حناني شِبْعي ها يا ضوه عيني
گرُّبت يا أم الخدر تخلص سنيني
او على سبيِچ يالحبيبه ايظل ونيني

يِسْبوچ أهل الغدر .. وآنه مالي گلب
أنطگ برويحتي .. متنچ من ينضرب

شيبه ابدمه سابح
رايح بويه رايح
&&&&&

علي ظل وياي ايسولف .. او ضمني بعد الحچي الصدره
گلي تَرْحين انتي للطف .. و آنه أروح أشبگ الزهره

گلي زينب و الدمع صاير بريده
ضربةِ الغادر على راسي شديده
كلها يومين او علي يِسْبِلْها إيده
او تنطفي البسمه او عزيه ايصير عيده

يومين او تنطفي .. بسمةْ حيدر علي
بعده اتهل دمعتي .. او محَّد يمسحها لي

فگده اهوايه جارح
رايح بويه رايح
&&&&&

ألله يا جرح الصميده .. هوه لـ أُمْنِيَّاتي غَرَّب
كربله من بعد حيدر .. تنتظر يا ناس زينب

باچر العباس ماي او يذبحه الماي
و ابعيال احسين أحيرن بالسبي اهواي
لا أبو فاضل و لا بو اليمه وياي
بين ضرب او شتم قاسي تگضي دنياي

بعد اعيون الأبو .. يهضمني هالدهر
او تصبح أم الخدر .. فُرجه الكل البشر

جرحه الگلبي ذابح
رايح بويه رايح
&&&&&

إبراهيم الدريس

Читать полностью…

🌴تجمّع الزهراء ع العاشورائي🌴

ابوي وخيمتي.        ضواي بدنيتي
رحل وبعيني اصبح ميت النور
احس رمضان صاير جنه عاشور


ابويه الكله رقه وكله احساس
روحه عايفها يفكر دوم بالناس
سخي مارد اليطلبه حته انفاس
ليش يتجازه حنانه بطبره عالراس

جبيره امصيبته.      جريحه هامته
يون موسى المصابه بجانب الطور
احس رمضان صاير جنه عاشور


انه حسينك يبوبه سولف وياي
سكوتك هذا خنجر كطع اعظاي
يبويه أأمرني كلي جيبلي الماي
اجيب الماي وركض ركض حفاي

حياتي بشوفتك.         اموت بموتتك
تركها الموت كلها او يمك ايدور
احس رمضان صاير جنه عاشور


بعد هذا الحجي حيدر كعدله
رغم جرحه شبك ابنه ويقبله
يبويه  احسين لا تبجي يكله
افكر بيك انه. الطبره سهله

يمهجة فاطمه.      المصايب قادمه
كأن يحسين اشوفك ونته مغدور
احس رمضان صاير جنه عاشور


جن اشوفك منذبح والخيل يمك
تعوف كل الكاع تسحك فوك جسمك
راسك ايشيله الشمر ويشتم امك
وزينب او باقي الحرم يوليها خصمك

عظامك تنكسر.       واصبعك ينبتر
وابو فاضل عضيدك جفه مبتور
احس رمضان صاير جنه عاشور


انه بجفكم يبويه نعشي ينشال
وعله موتي دمعكم من دمه سال
لجن بالطف يبويه يصعب الحال
بلايه اثياب تبقه فوك الرمال

بحرارات الضهر.    خدودك تنصهر
وعليك ابجنة الله تلطم الحور
احس رمضان صاير جنه عاشور



خادم علي ع.
الشاعر الحسيني / علي الاصبحي

Читать полностью…

🌴تجمّع الزهراء ع العاشورائي🌴

نزال. أستشهاد امير المؤمنين ع



كلبي مغرم بالصميده
عن قناعه وعن عقيده


الله لجل عيون حيدر ياخلك سواني
شلون يردوني اعوفه واعتني للثاني
غير حبه وداعت الله ما اكو بوجداني
اشهد أن عليا هذا ورد الساني

روحي بمحبته عنيده
عن قناعه وعن عقيده

مو مهم عندي التسلسل مايشكل دافع
حب علي بشرياني يمشي وبمحبته قانع
بس كلام الحك اكوله لون روحي اتنازع
علي بأمر الله ومحمد اول ومو رابع

القصه معروفه وفريده
عن قناعه وعن عقيده


غير ابو الزهره محمد والله لا مالك نضير
يا امير المؤمنين اوما يجي مثلك امير
دولتك جانت امان اوعايش بخير الفقير
تجوع انت وجت تطعم حته التأسرو اسير

هوايه افضالك عديده
عن قناعه وعن عقيده


عايش بخيرك يحيدر ما اعوفك مستحيل
بالعقل لو ردت اعوفك وين الكالك مثيل?
جدمي ابترنه وحكك كون عن دربك يميل
هوايه يامولاي انت وكلشي بالدنيا قليل

الدنيه عن علمك بعيده
عن قناعه وعن عقيده


لأخر انفاسي وحياتي ابقه انادي ياعلي
ما اعوفنك يحيدر خله يحلم عاذلي
حته لو اتخير انه ابهالخيار الما يلي
بين اهلي وبينك انت راح اعوفنهم هلي ❤️

الما يريدك ما اريده
عن قناعه وعن عقيده



خادم امير المؤمنين ع
الشاعر/ علي الاصبحي

Читать полностью…

🌴تجمّع الزهراء ع العاشورائي🌴

مقدمه. أستشهاد الامام علي


ابو الروح الحنينه.      رحل من بين ادينه
غفه مابين التراب.       يكلبي كثر العتاب
           مات ابويه  مات ابويه


راح ابو الضحكه التسكن كل الالام
راح ابويه الجان هوه شمس الايام
يا جفن يرفض دمعته ويقبل اينام
جربة العباس كلبي  وفركته اسهام

اعز ناسي يناسي .       مشه وشيبلي راسي
شصد بعيوني عالباب.    يكلبي كثر العتاب
          مات ابويه  مات ابويه


والله مشتاك اكعد وياه بس ثواني
ارد اخبره ابغيبته  اشسووه زماني
شوفة اعيونه صفت   كل الاماني
الموت ليش وي الاحبهم ما خذاني

صرت ادعي بقنوتي.     يعجل ربي مووتي
الكبر ماخذلي الاحباب.   يكلبي كثر العتاب
        مات ابويه  مات ابويه


الراح ابوه ياكلمه  تشفيله جروحه
ويه كل مغرب تروح الكبره روحه
راح ابويه وسري ال يابير ابووحه
وجبل احلامي وسف ميته سفوحه

ردت يرجعلي مره.      وذب روحي اعله صدره
واهل دموعي تيزاب.     يكلبي كثر العتاب
          مات ابويه.  مات ابويه


اليمه ابوه خل يشكر الله الف مره
ابلا ابو هالدنيا تصبح.  والله مره
المنكسر بوداع ابوه. ياهو اليجبره
كل صبح تلكاه يموت ابأثر حسره

يرمضان الكرامه.         شفت بيك الندامه
برمح دلالي انصاب.     يكلبي كثر العتاب
          مات ابويه. مات ابويه


انروحلك انه وخوتي.  بويه فدوه
يالجنت خيمه علينه وجنت سلوه
كبل وياك الليالي. . بويه حلوه
حيلي راح وماكو الي. يابويه تجوه

عجب مترد علينه.        بلا خيمه بقينه
جرح فكدك ولا طاب.    يكلبي كثر العتاب
       مات ابويه.  مات ابويه


خادم امير المؤمنين ع
الشاعر / علي الاصبحي

Читать полностью…

🌴تجمّع الزهراء ع العاشورائي🌴

نزال


عباس  يا ذو الفقار
عباس طاح  الكرار

*
*

طاح الهيبه   ،،   حگك جيبه
الحگ حيدر  ،،  شوف المنظر
دم الشيبه  ،،    طاح  الهيبه

أخذ رخصه امن اخوتك   وأگلب الگاع
طبرو  راس    ابوك       وهالخبر  شاع
حگك   ما    يضيع      ولا   گبل   ضاع
اخذ    راس    المرادي      بچفك  متاع

انته بكيفك
جرد سيفك

عباس هاي الاخبار
عباس طاح الكرار

*
*

الله  يعينك    ،،      غدرو   دينك
طبرو راسه     ،،      يا      عباسه
وينك وينك     ،،      الله   يعينك


تحزم  من   وكت      حضرهه    الچفوف
ازعل   يابو    فاضل      خوف    الخوف
الجتف  حيدر   نريده     اليوم   مچتوف
ياخذ   روح   سيفك       يسلب   الشوف


وين   الظالم
سيفك حاكم

يا نار تطفى بهالنار
عباس  طاح الكرار

*
*

يابو الشاره   ،،  چفك   غاره
كلهم بيدك    ،،   الله  يزيدك
من اسراره   ،،   يابو  الشاره

يسبع     الگنطره      ويا  صاحب  الراي
تره الظلمو  محمد     عالو           هواي
دسويهم     حطب    للنار   مو       ماي  
ترد  خيبر  عليهم     والغضب       جاي 

ظالم    شوفه
شال   چفوفه


عباس  بيدك    بتار
عباس   طاح  الكرار


*
*

ما    معقولة  ،،،     طايح  طوله
واحد  لاحه    ،،،    شال اسلاحه
لتگلوله          ،،،     ما    معقوله

علي اتلوحه السيوف   وراسه  مطبور ؟
هذاك الشطر مرحب     چفه    منصور
الأ    بحاله    وحده     وبيهه   معذور
ساجد  چان     لله      وذبحو  النور


بهاي   الحاله
موش أگباله

غدروه  معروف   الصار
عباس   طاح       الكرار


*
*

لتخليهم     ،،،    غدر  البيهم
خله الزهره  ،،   ضلع وعصره
هسه افنيهم  ،،    لتخليهم

رد    ثار    السقيفه       وغدر  الاصحاب
اخوك المحسن وهم      عصرة       الباب
فدك  ارض الرسالة       بچف    الاغراب
بعد   عندك  الطف        وحسب  حساب

تعطش خيمه
نار      وهيمه

وحسين ما عنده انصار
عباس    طاح     الكرار

*


كلمات الخادم  /  رعد الفريجي

Читать полностью…

🌴تجمّع الزهراء ع العاشورائي🌴

ياعلي تبچي اليتامه      
يمتى ترجع بالسلامه

فَگِد وجهك يبو الشيبه علي فَتره طويله
على بابك تره ايتامك دمع احمر تِسِيله
علي معقوله ذاك انت ابو الحمله الثگيله
وصلت المرحله ماتگدر الچفك تشيله

صرخه اجت من القيامه.    
يمتى ترجع بالسلامه

الجرح مو هَيّن الطبره لـ أُم راسك مصيبه 
وگفنه ابابك الايتام ما تطلع غريبه !
نِحِس بالدنيا خَنگة موت اي بالله كئيبه
على افراشك علي ممدود ماتنهض عجيبه

خطره يا هاي العلامه      
يمتى ترجع بالسلامه

على اعصابه الوكت يوگف ولايمشي نريده 
شوكت يصحه ابو الطِيبه نريد انقبل ايده
بعده وجهك علي تصبح حياة المو سعيده
يليل الموت يارب ليلته بلكي  بعيده

ردنه لو بس ابتسامه.      
يمتى ترجع بالسلامه

الضَحُوك الدنيا من تضحك علي الدنيا تبسم
البليغ الماكو مثلك ليش بالگوه إتِّكَلَمْ
العمامه الصفره حمره صارت من الطبره  والدم 
ابعلاة الصوت نصرخ الله يلعن ابن ملجم

ويلي طبروها العمامه        
يمتى ترجع بالسلامه


اسد الله  واسم الله.  وكلام الله  بجبينك
الف وسفه الف حسره  بعد مَتشيل عينك
گضيت العمر هم تعبان ذابل كل  سنينك
لذالك احنه ندعيلك نگول الله اليعينك

والحزن اِنْحل لِجامه
يمتى ترجع بالسلامه


تموت اشلون نتحمل يكسرتنه هالايام 
اذا تذكر علي چنه حبيبي ابحضنك إنام
الوكت هذا تره والله ابد ما يرحم ايتام
اجانه العيد چنه وياك نگول بخير كل عام

كل طفل صاح بهيامه  
يمتى ترجع بالسلامه



للشاعر محمد الظالمي

Читать полностью…

🌴تجمّع الزهراء ع العاشورائي🌴

لاستشهاد أمير المؤمنين
علي عليه السلام

الدنيا وحشه  والزمان
من رحت يابو الأمان
الدنيا وحشه
★★★★
الدنيا وحشه   ياعلي ودارك خليه
الدنيا وحشه  اليوم ياحامي الحميه
الدنيا وحشه  كل صباح وكل مسيه
الدنيا وحشه   اتمر على بنت الزچيه

رحت ياگلب الحنان
الدنيا وحشه والزمان
الدنيا وحشه
★★★★★
الدنيا غربة   صارت بعين اليتامه
الدنيا غربة  منفجع  بيت الإمامه
الدنيا غربة   ومابعد بيها سلامه
الدنيا غربة   وليل مايرحل ظلامه

والفرح ماله مكان
الدنيا وحشه والزمان
الدنيا وحشه
★★★★★
صفت لوعه   وغربه واحزان ومناحه
صفت لوعه   وليل مايطلع صباحه
صفت لوعه    ومابعد لاحبابه راحه
صفت لوعه    من بعد ذيچ السماحه

الدهر  يابوالغيره خان
الدنيا وحشة والزمان
الدنيا وحشه
★★★★★
ايساعد الله   الحسن مابطَّل ونينه
ايساعد الله  حسين نار دموع عينه
ايساعد الله  گلب عباس وحنينه
ايساعد الله  زينب الظلت حزينه

من بعد كل فرح چان
الدنيا وحشه والزمان
الدنيا وحشه
★★★★★
من غيابه   الزمن وَدَّعْْ أمانه
من غيابه   الفقه ينحب والديانه
من غيابه   الهدى انهدمت أركانه
من غيابه   العلم حاير  بيانه

والبلاغه بلا بيان
الدنيا وحشه والزمان
الدنيا وحشه

الشاعر حسن لعيبي الحريشاوي

Читать полностью…

🌴تجمّع الزهراء ع العاشورائي🌴

لاستشهاد أمير المؤمنين علي عليه السلام

جبريل النزل مكسور الجناح
انهدم ركن الهدايه ياخلگ صاح
علي مطبور راسه على الارض طاح
لاطب النفع لافاد جَرَّاح
حل وكت البواچي او وكت النيَّاحَ
علي هليوم  ياشيعه علي راح

الشاعر حسن لعيبي الحريشاوي

Читать полностью…

🌴تجمّع الزهراء ع العاشورائي🌴

لاستشهاد أمير المؤمنين علي عليه السلام

الكون لمصابك حزين   ياامير المؤمنين
ياعلي يابوالحسن
ياعلي يابوالحسن
★★★★★
هذا جبرائيل ناره اتوجرت
وللحزن والنوح روحه اتوجهت
ناده اركان الهدايه اتهدمت
روحه مذهوله وحزينه اتحيرت
ابلوعته ينادي الأمين   ياامير المؤمنين
ياعلي يابوالحسن
ياعلي يابوالحسن
★★★★★
صاح جبرائيل تهمل دمعته
انشطر دين الله الكريم بضربته
وبدت من هليوم ساعة غربته
وناح الاسلام  الحنيف الفرگته
ناده ياحق يامبين   ياامير المؤمنين
ياعلي يابوالحسن
ياعلي يابوالحسن
★★★★★
ينحب المحراب غارگ بالحزن
والفقار انغمد    بگرابه يون
واليتامه الشوفته ضلت تحن
گلوبهم مكسوره كسرات الغصن
يلچنت إلهم معين    ياامير المؤمنين
ياعلي يابوالحسن
ياعلي يابوالحسن
★★★★★
اصعب الساعات واصعب كل خبر
گالوا الكرار  علهام  انطبر
صايم وماكمل اصيام الشهر
مصاب لوعاته تضل طول الدهر
بنوح صحنه وابونين  ياامير المؤمنين
ياعلي يابوالحسن
ياعلي يابوالحسن
★★★★★
واحد وعشرين من هذا الشهر
علحسن ساعاته لوعات وقهر
وهذا حال حسين مكسور الظهر
زينب تنوح ويون يمها  الگمر
تصيح رايح بويه وين    ياامير المؤمنين
ياعلي يابوالحسن
ياعلي يابوالحسن

الشاعر حسن لعيبي الحريشاوي

Читать полностью…

🌴تجمّع الزهراء ع العاشورائي🌴

راح خيمتنه التلمنه
وابتدت ساعة يتمنه
راح أبونه يزينب راح أبونه
................................................
شدي حيــــــــــلـــج يزينب هالمسية
بعد ساعات وعلــــــي ايلاكي المنية
كومي خل نكعد سوه ونبجـــي سوية
مدري أبجي اعليج مدري أبجي علية
هاي ساعاته ألأخيرة      هاي كسرتنه الجبيرة

راح أبونه يزينب راح أبونه
.......................................................
أمخضب أبدمه علــي وشيباته حمرة
ويابس الدم أبلحيته ومحني ضهره
الحسن يـــــــم راسه زينب كعد يقره
أحــــــروف آيات العديله الله يصبره
أيطيح من طوله ونشيله      الطبرة باكت نجم ليله
راح أبونه يزينب راح أبونه
......................................................
من رحت خويه لكيته أيسيل دمه
مدري أحضنه مدري أشيله مدري أشمه
طحت من طولي يزينب خويه يمه
نازل السيف أعله راسه بلايه رحمه
عاينت عباس أجاله.    لزم جفينه وحجاله
راح أبونه يزينب راح أبونه
..............................
عمت عيني ها يبويه أشلونه حالك
عفت كلشي ومات كلشي وطيفي أجالك
مو دمع لا دم جفن عيني بجالك
يالعفتني ورحت محتاجه الدلالك
زينب أنه يالعفتني.    بحضنك أغفه عودتني
راح أبونه يزينب راح أبونه
...................................
كون ينباع العمر جان أشتريته
وماي عيني الجيتك جا ثوبيته
زينب أنه عدله بويه مدري ميته
كبل نعشك نعش زينب شيعيته
جلمة حاجيني وغلاتي.      يالخذت روحي وحياتي
راح أبونه يزينب راح أبونه
...................................
خادم خدمة الحسين
الشاعر
محمد الموالي

Читать полностью…

🌴تجمّع الزهراء ع العاشورائي🌴

في ذكرى استشهاد الأمير (ع)

حبك بالدمه .. يا حامي الحمه

& & & & &

حبك يا أمير المؤمنين أشرف هويه
اوهذي اولايتك يا با الحسن أعظم قضيه
غيرك ما أشوف الهذا روحي حيدريه
او يا حيدر (علي) بس اهتف اليوم المنيه

ماي انته اوظُمه  .. يا حامي الحمه

& & & & &

يا حيدر أبيع الدنيه حبك ما أبيعه
اوحته اعله المشانق هم إلك أعلنها بيعه
يالطولك جَرِح وابرِيِّتك شلْت الشريعه
آنه اوكل هلي الآخر نفس لك نبكه شيعه

تُرْبك نِلْثِمه .. يا حامي الحمه

& & & & &

إنته يا علي سر (هل أتى) و(اللهُ أكبر)
اوبس انته الصراط اوبالقيامه إنته محشر
جفك عالوجود ابأسره خضره اوتجري كوثر
اوكالاها الوحي ما من فتى غيرك يحيدر ..

من سابع سِمه .. يا حامي الحمه

& & & & &

من دونك يراعي الموزمه اجهنم حياتي
يا تسبيحة العشاكـ او يا صومي اوصلاتي
يا حيدر إذا تأمر أضَحِّيلك بناتي
بس عندي طلب تحضر إلي ابساعةْ مماتي

اعليك ابفاطمه .. يا حامي الحمه

& & & & &

يا حيدر على حبك يمحلاها المنيه
والحَبك صدكـ ما تتركه الزهره الزجيه
خادم حيدره بيْه تفخر الجنه العليه
واعله هالكرامه اتْغِبْطه كل هاي البريه

اوكل شي يخدمه .. يا حامي الحمه

& & & & &

إنته اول أمير اوعرشه صاير من حصيره
والدنيه ابعيونك يا علي كلش زغيره
ما شايف أمير ايوصِّي باللحظه الأخيره
موش اعله الأهل وَصْحابه بل وَصَّه اعله اَسِيره

كلبك مَرْحَمه! .. يا حامي الحمه

& & & & &

خادم الأمير (ع) : إبراهيم الدريس

Читать полностью…

🌴تجمّع الزهراء ع العاشورائي🌴

في ذكرى استشهاد الأمير (ع)

ليلة الوفاة

أخيراً يزهره .. اجْمَعَت بينه طبره
او لِكيتِج يا زجيه .. على اجناح المِنيه

أخيراً يزهره

& & & & &

أخيراً راح اشوفِج آنه يـ ام زينب
أو تطفه ذيج ناري الـ بالكلب تلهب
يزهره اسنين يا رب أدعو بس يا رب
مته موعد لقائي ابـ فاطمه يكرَب

سِنينِ ابغيابج .. أنوح اعله بابِج
أشوفِج هالمسيه .. على اجناح المنيه

أخيراً يزهره

& & & & &

بعد عينِج بكت بس روحي مجوِيَّه
أو هاي الدنيه كلها اتِّحْدَت اعليَّه
لأن أدري صعُب تحصَل إلِج جَيَّه
يفاطم جيت اِلِج و الهامه مِتْحَنْيَه

إجيت ابطَبُرْتي .. او على الخد دَمِعْتي
اِلْتكينه و التحِيه .. على اجناح المنيه

أخيراً يزهره

& & & & &

يفاطم لا تِنَشْفِين ابـ دَمِع عيني
وَ لا تبجي عليه او لا تنوحيني
على ضلعِج أوِّن ابحِركه خليني
و اذا روحي اطْلعَت هم ما تكفِّيني

أخافن أشوفِج .. اعله عينِج جفوفِج
لَتِخْفين الأذيه .. على اجناح المنيه

أخيراً يزهره

& & & & &

ابغيابِج فاطمه ما ضاكـ جفني النوم
او صِرِت مثل اليتيم امن العَطُف محروم
ابـ سَهَم فكدِج صُبَح هذا الكلب مفطوم
مظلومه يزهره او آنه هم مظلوم

أنام ابجروحي .. و اذا اصحه اعله نوحي
اِلْتكينه ابـ هالرِّزِيه .. على اجناح المنيه

أخيراً يزهره

& & & & &

كبُل موتي مِتِت يا زهره بغيابِج
ذَنِّي اعيوني ذبلن من وره امصابِج
ابتدت رحلةْ عذابي امن اندِفَع بابِج
و اذا اشتاكيت اشمِّج أشتَم احجابِج

إذا مرني طيفِج .. أصيح اعله كيفِج : ..
(الوَعَد يا هاشميه .. على اجناح المنيه)

أخيراً يزهره

& & & & &

خاوَت كلبي هذا .. الونه و الحسره
أو كل لحظه أشوفن ضلعِج او كسره
سِطَر خدي الزمن من ساعةِ السطره
وَ لا عن إذني غابت صرخةِ العصره

عِشِت يالأميره .. العمر كله حيره
اجْرَحَت كلبي الدِّنِيّه .. على اجناح المنيه

أخيراً يزهره

& & & & &

عِشِت يا فاطمه كل العمر مجروح
او على افراش الحزن بس هالكلب مطروح
لأنْ عن بالي صورة عصرِتِج مَتْروح
كِلِت لـ الله إِخِذ من عندي هاي الروح

بُرَد بس غَليلي .. يزهره ابرَحيلي
لأنْ بسِّ انتي رِيّه .. على اجناح المنيه

أخيراً يزهره

& & & & &

خادم الأمير (ع) : إبراهيم الدريس

Читать полностью…

🌴تجمّع الزهراء ع العاشورائي🌴

في ذكرى شهادة أمير المؤمنين (ع)

لو ما سيف حيدر ماكو إسلام
هوه الـ دين ربنه چان الإحزام

ماكو عالأرض دين
لو ما چف أبو احسين
&&&&&

علي حيدر لو رفع بـ اچفوفه رايه
الأرض تجفل منه و اتخاف المنايه
علي ويه السيف آيه اتشيل آيه
او حملته هيه البدايه و النهايه

من يمشي علي الكرار أبو اتراب
تحت اجدامه يتراجف هالتراب

محَّد شال سيفين
لو ما چف أبو احسين
&&&&&

الدنيه خلف المرتضى اتصلي جماعه
و الوجود ايقدِّم الـ حيدر الطاعه
يغشي عين الشمس بو الحمله شعاعه
او عن جحيم الحاطمه حبه مناعه

من گد ما علي الكرار شفَّاف
لا مو بالبصر بالگلب ينشاف

ما يتجارى نهرين
لو ما چف أبو احسين
&&&&&

علي أكبر هوه منِّ الطائفيه
او علي للأملاك مو بس للبريه 
الدنيه بالأول او لآخر حيدريه
أعمى ذاكه الما يحب حامي الحميه

الما يعشگ علي او يعلن ولاءه
تنزل بيْه من الله (براءه)

لا ما ينگضي الدين
لو ما چف أبو احسين
&&&&&

من تحيطن بيَّه يا ناس النوائب
أندب الكرار فلال الكتائب
للحشر متعجِّبه بيْه العجائب
و اعله حبه اتوحِّدت كل المذاهب

كرار الوغى و الحرب تشهد
لو ما صارمه منوجد معبد

ما چانت مسلمين
لو ما چف أبو احسين
&&&&&

علي علَّم هالزمن معنى الرجوله
او غمّضت أجفانها اوياه البطوله
أنفاسه تسبيح او ضوه او قرآن طوله
علي ديني صار و افروعه و أصوله

لولا امحبِّته هالگلب ما عاش
جفن لـ اسمه غطا و الثانيِ افراش

كلنه كون ميتين
لو ما چف أبو احسين
&&&&&

ربنه واحد هوه و الكرار واحد
و اعله عزمه ضربته ابـ الأحزاب شاهد
ما سمعنه اعله الأرض يا ناس قائد
ربعه فُقره او لليتامه چان والد

ما يختار سيفه بس الأصعب
نصين انشطر من شافه مرحب

ما يجسمها نصين
لو ما چف أبو احسين
&&&&&

إبراهيم الدريس

Читать полностью…

🌴تجمّع الزهراء ع العاشورائي🌴

في ذكرى استشهاد الأمير (ع)

صرخه دايم تعتِلي .. لا فتى إلا علي

& & & & &

اشما تمر اسنين يا حيدر عليه
للنجف والله يزيد الشوكـ بيه
روحي يا حيدر تظلن حيدريه
او للمذله ما أمدِّ اثنين اِدَيَّه

يبكه حبك منهلي .. لا فتى إلا علي

& & & & &

ياللي حد الآن يجري ابزود خيره
إنته بس حيدر سماي او كلبي طيره
او من أصير ابمعضله او تسكنِّي حيره
للنجف هذا النظر حيدر أديره

بسمك الهم ينجلي .. لا فتى إلا علي

& & & & &

عندي كبرك جنة الفردوس او مأوه
او كل غصن لولاك يا بو الحمله ذَوَّه
جانت ابإسمك تناجي الباري حَوَّه
يا علي و العمر من دونك ميسوه

يَغله من روحي عَلَي  .. لا فتى إلا علي

& & & & &

آنه يا حيدر إذا يدنالي وعدي
حبك انته بس حرز يالغالي عندي
ابخدمتك يا با الحسن وَصَّاني جدي
و آنه بس يمك أريد ايحفروا لحدي

أول انته او ما يلي .. لا فتى إلا علي

& & & & &

الما يحبك يا علي أعمى دِليله
و احنه غيرك والله ما عدنه وسيله
إلنبي ابراهيم ايذكرك طول ليله
و لذلك صار للباري خليله

خله يسمع عاذلي .. لا فتى إلا علي

& & & & &

خادم الأمير (ع) : إبراهيم الدريس

Читать полностью…

🌴تجمّع الزهراء ع العاشورائي🌴

في ذكرى شهادة أمير المؤمنين (ع)
ليلة الضربة

الليله طبروا علِينه
وسفه غدروا ولينه

ابفيض الدماء
طاحت سماء
&&&&&

الليله مجروحه السمه او مفجوعه الأكوان
والملائك بالسماء اترتِّل أحزان
انطبر ويه علي بالسيف الآذان
او من علي مو هامه تنزف هذا قرآن

بالغدر ويه حيدر
طِبْروا (اللهُ أكبر)

صاح الضياء
طاحت سماء
&&&&&

ابمسجد الكوفه علي اتقرَّر مماته
او كون بالمحراب يگضي آخر حياته
سابح ابدم طبرته طاح ابصلاته
او جرح راسه جرَّح الليله بناته

امن انطبر راس أبو احسين
للبچي ما بقت عين

ما ظل بُكاء
طاحت سماء
&&&&&

علي يوم اللي ابصلاةِ الفجر كبَّر
گامت اتنوح او تون سورةِ (الكوثر)
او من سِجَد .. سيف الغدر طاح اعله حيدر
نزف راسه او صار وجه الدنيه أحمر

طاح حامي الحميه
او طاح گلب السبيه

هذا الجزاء ؟!
طاحت سماء
&&&&&

راد من دم هامته يصبح خضابه
او دمه عاللحيه يظل شاهد عذابه
صعبه يتوصَّف علي جرحه او مصابه
ماكو واحد مثله يتَّمنه ابغيابه

ابراس أبو الحمله طبره
او تشتعل بينه حسره

ابـ بَّحر العزاء
طاحت سماء
&&&&&

على جرح المرتضى اتنوح الشهامه
او بعد حيدر حاشه ما تحصل سلامه
بالطفوف احسين تتلاهب خيامه
او زينب ابدرب السبي اتحير ابيتامه

بعد أبوها الوديعه
اتضيع بالدنيه ضيعه

في كربلاء
طاحت سماء
&&&&&

حيره طبرةْ بو الحسن و اشلون حيره
خلت أملاك السمه اتحسِّ ابكسيره
و العقيله اتحس كأن صارت أسيره
تمشي لاچن لا أهل عدها او عشيره

إلأبو  هوه خيمه
او علي بنته يتيمه

و ابلا لواء
طاحت سماء
&&&&&

إبراهيم الدريس

Читать полностью…

🌴تجمّع الزهراء ع العاشورائي🌴

ابوذيات استشهاد الامام علي ع 💔


اناطر لو أأيس بعد.  منطر
يبويه والكلب نصين. منطر
وفجر الواحد وعشرين. من طر
خذاك ولا عطف لحظه عليه

لون مو سيفك الاسلام. ماتم
نصبنه بنص كلبنه اعليك. ماتم
شهر رمضان ليش وياك.  ماتم
رحت وعيونه اخلافك جريه


الشاعر. علي الاصبحي

Читать полностью…

🌴تجمّع الزهراء ع العاشورائي🌴

نزال. أستشهاد الامام علي ع



ياعلي ياعلي يا امير المؤمنين



رحت للمسجد يحماي الحمه
لاتروح الكاع صاحت والسمه
الليله نشتم ياعلي ريحة دمه
والمنايه امفتحه بيبانها



ابن ملجم منتظر جيتك تره
الغدر ياحيدر تملك ضامره
ناوي وي السجده راسك يطبره
والهدايه تنهدم اركانها

بقت زينب حايره تقره الفلق
حته دكات الكلب مو بالنسق
حست ابراسك يواليها انفلق
ياحزنها مجرحات اجفانها

كلب زينب يابو زينب منلجم
ليل جنه وجلجل اعليها اليتم
طبرتك تتمنه مو واقع حلم
ياشمسها النورت اكوانها

واليتامه اتناشد ابدمع الصبر
صدك زينب راس ابونه منطبر
ان شاالله يكوم ويرد بينه يمر
واليتامه تندعي بحزانها

باوع الجرحك طبيبك وانسحن
بجه اوكلهم ياحسين وياحسن
كومو من هسه دحضروله الجفن
والمكابر خل تفك ديوانها



خادم علي ع
الشاعر / علي الاصبحي

Читать полностью…

🌴تجمّع الزهراء ع العاشورائي🌴

اوياك ودعت الصبر.     واكرهت كل العمر
صارت الدنيه كبر.       ها يبويه
__
جفنك من اطبكته بويه ضاع صبري
عيني بعيون السمه ودموعي تجري
يابعد عمري بوداعك شنهوو عمري
ابحالتي المتسر نواظر  الله يدري

بكلبي مذبوح الامل.    وجمر الوداع اشتعل
دمعي مايطفي الجمر.     ها يبويه

اوي الهوه كل ليله الك ابعث سلامي
ومثل راسك ياعلي.   امجرح كلامي
ابشوفتك جنت افطر واختم صيامي
افطر ابدمعي بقيت.  وكلبي ضامي

جنه نتفطر سوه.      ضوه ومكابل ضوه
منين اجت ريح الهجر.    ها يبويه


بعد فيك ماكو في يسترلي حالي
روحي ماتت من اثر ضيم الليالي
عيني مشتاكه الضوه عينك يغالي
ويعتني الكبرك مع  المغرب خيالي

واطرق بجفي اللحد.    رد اصيح او ماترد
وخاف اجرحك اعتذر.     ها يبويه


من يجي وكت الفجر اذكر رزيتك
واذكر الدم الترس.  شيبة لحيتك
ابكثر بجييك عالنبي. بويه بجيتك
بيك يزهر جان هسه. وحشه بيتك

بغيبتك صار الوضع.    حزن وجروح ودمع
الموتي احسب ونتظر.     ها يبويه


شلوني من تكلي ماكو لون عندي
كلشي يابويه ابرحيلك صار ضدي
يمي اخوتي ها يبويه  ويمي ولدي
لكن افراكك جعلني.  احس وحدي

والنعم من الاخو.       لجن شيعوض الابو
الحظنك الدافي افقتر.    ها يبويه


خادم علي بن ابي طالب ع
الشاعر الحسيني/ علي الاصبحي

Читать полностью…

🌴تجمّع الزهراء ع العاشورائي🌴

جنه نتفطر سوه.       ضوه ومكابل ضوه
          منين اجه الموت وخذاك
             واني ما عندي سوواك
                بويه. بويه



الموت اجه غفله وخذاك ويتماني
ويه ابويه كتله اخذني وما خذاني
يتم واشواك اوحزن.  ينزف حناني
جفت كلبي الفرحه من وجهك جفاني

يافرح بيه يمر.        وانته ممدود ابكبر
         فزز اجروحي جفاك
    وانه ما عندي سواك
          بويه. بويه

الخنسه لو تنظر عليه.  ابحيره تبكه
صرت من هجرك يبويه.  جني وركه
الراح عن عيونه ابوه. شيسوي حكه
الابو خيمه اوفركته.   ما منها فركه

الوالد افراكه كلف.       والله لا ما ينوصف
         رحت من موتك دعاك
        واني ما عندي سوواك
        بويه.    بويه


يرجع اليمشي ابسفر.  شووكه يرده
ولجن شيرجعه الينام ابوسط لحده
الما يشوف بصبحه ابوه. ميت نعده
جرح ال مفاركله ابو.  محد يضمده

من عسن كبلك متت.       اولا الم هجرك عشت
           تدري اموت بلا هواك
           واني ما عندي سوواك
               بويه.    بويه


إن جان ناوي ترتحل . ما تبقه يمي
فدوتك وصل سلامي.   بويه لمي
احجيلها من اتركتني. اشكبره همي
والاسيره يصير باجر.  كلها اسمي

اوياها رايح تجتمع.      وانه اعيش اعله الدمع
           كلبي مو جفني البجاك
          انه ما عندي سوواك
             بويه.     بويه




رايح واطلب رجوعك. يوم الطفوف
من عله احسين اتجمع كل السيوف
من ابو فاظل اشوفه ابغير الجفوف
من شمر يحرك خيمنه ريتك تشوف

باجر امشي للسبي.       حادي ضعني الاجنبي
          هناك اريد انظر ضواك
          وانه ما عندي سوواك
         بويه.       بويه




خادم زينب ع
الشاعر / علي الاصبحي

Читать полностью…
Подписаться на канал