Telegram-канал tajalzahraa1 - 🌴تجمّع الزهراء ع العاشورائي🌴: Неотсортированное

🌴تجمّع الزهراء ع العاشورائي🌴

13 мая 2024 20:41

(( ارحمها يَهلال ))
في ذكرى هلال المحرم الحرام

إرحمها يَهْلال خافَن تموت
ريت السِمَه تزال بس لا تفوت
طيفَك شِجَنْها … ارحم حزنْها
       ❃❃❃❃❃❃❃❃❃❃❃❃❃❃❃
بيا وجه يَهْلال وجهَك بالسِمَه يظهر يبان
كل مُحَرَّم يبچي مِنَّك و الحزن هَزْ كل مكان
هاذي مو بس تِنْعَه زينب اُوْياها ينْعَه كل كيان
يإللي طيفَك سيف شامخ و يگطر ألْوان إمْتِحان
…………….
ما تدري لو جيت تهيج الجروح
و چم عبره هَلّيت و مِنَّك تنوح
و يتْعالىٰ وَنْها … ارحم حزنْها
       ❃❃❃❃❃❃❃❃❃❃❃❃❃❃❃
هالسِمَه لا تبدي بيها و ارْحَم الگلب الكسير
هوايَه زينب تدري عانت و شالَتْ الهَمّ الكبير
لو تشوفَك ليها باين مَدْري يَهْلال اِشْيصير
تحيي ذِكْرىٰ هالغوالي و ذِكْرىٰ مَذْبوح و عَفير
…………….
ليتك تواريت خلف السحاب
شگد بيها خَلّيت زَفْرَه و عذاب
ضيمَك سِكَنْها … ارحم حزنْها
       ❃❃❃❃❃❃❃❃❃❃❃❃❃❃❃
كل نَجِمْ حولَك يحَلْفَك يا هِلال إسْتر ضِياك
لا تِفَجّر عين زينب بالدَمِع لَمَّن تَراك
تشوف خوها الوافي لَمَّن بالعُلا تشخص سَناك
و عَ الوجن يجري فُراتَه و رايتَه شَهْگَة هَلاك
…………….
چم مَرَّه عباس صارت تصيح
مَخْنوگَة أنفاس تگوم و تطيح
كافل ظَعَنْها … ارحم حزنْها
       ❃❃❃❃❃❃❃❃❃❃❃❃❃❃❃
زيح وَجْهَك لو تُوِدْها و اِتْرك الدنيا سَواد
بالعقيله اِشْباگي تدري غير موت اُوْيَه الرَماد
بس صُوَر مَرْسومَه بيها الكوفَه وَيَّه بن زياد
و صورَة الشام الأليمَه بالحبل وسفه تگاد
…………….
ضامرها مَحْروگ بذاك المَسير
صورَتها عَ النوگ و أقسىٰ مَصير
الباغي رهَنْها … ارحم حزنْها
       ❃❃❃❃❃❃❃❃❃❃❃❃❃❃❃
تدري بيها تشوف طيفَك و تذكر امْصاب المريع
تذكر احسين و تشوفه عَ الثرىٰ طايح صريع
و حوله أسياف الأعادي و كل جَرِح ينزف وَجيع
و عَ الصدر بعد العوادي داسه هالشمر الوضيع
…………….
عَ المَنْحَر السيف دَمَّه اِسْتباح
و تاليها يا حيف روس و رِماح
ذِبْحو أمِنْها … ارحم حزنْها
       ❃❃❃❃❃❃❃❃❃❃❃❃❃❃❃
في لياليك الكئيبه ما نِسَتْ أصعب لَيال
ليلة اِحْدَعْشَر عليها صَعْبَه تِنْساها مُحال
حرمه مفجوعه و غريبه وما بُگَتْ ليها رجال
ترعىٰ أيتام و أرامل اِمْسَلّبَه و حالتها حال
…………….
ما ظَلَّتْ اِخْيام عگب إللي صار
ياوسفه لأزْلام شَبّوها بالنار
طايح ركنها … ارحم حزنْها
       ❃❃❃❃❃❃❃❃❃❃❃❃❃❃❃
حسره ياهي حسره تدري خَلَّفِت وسط الگلوب
و جمره ما يخمد لَهَبْها تسْتعر رغم الخطوب
نبگه لحسين و مُصابَه نكتوي لضيمَه نذوب
نواسي زينب بالنوايح و عن ألَمْنا ما نتوب
…………….
في كل عزا يگوم نواسي البتول
و نصرخ يَمَظلوم يبن الرسول
وما حِدْنا عَنْها … ارحم حزنْها
❃❃❃❃❃❃❃❃❃❃❃❃❃❃❃
الشاعر : أبو شهيد الأحسائي
السبت ١٤٤٥/١١/٢هـ
════════════
*لا يجوز و محاسب شرعاً حذف او تغيير التوقيع*