7626
خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
گعدت الحره ام عون. يم العليله
تبچي بگلب محزون. المدمع تسيله
شده وشيحلهه. ياعمه تگلهه
المدمع تسيله. المدمع تسيله
$$$$$$$$$$$$$$$$
زينب ليله التوديع گلبهه منجسم نصين
تگلهه صبري ياعمه اهلج عالسفر ناوين
انتي حالتچ صعبه. علهذا التعب متگدرين
ابوچ حسين من قرر. ابيت اهل الرحم تبقين
حالتچ تدمي الروح. كلش عصيبه
ارسوم المنايا تلوح. ولون المصيبه
بهظم ماكو مثلهه. يا عمه تگلهه
المدمع تسيله. المدمع تسيله
$$$$$$$$$$$$$$$$
من سمعت حچي زينب. يذوب الصخر من الحال
تغير لونهه بسرعه وهمهه جبال ماينشال
شلون اصبر الفرگه إسهام. أبد ماترحم الدلال
أظل بوحدي ياحيره. اهي مو چلمة التنگال
اظلم اشوف البيت. عمه بعدكم
ميته چنت ياريت. ولا فارگتكم
گعدتگم شيملهه. ياعمه تگلهه
المدمع تسيله. المدمع تسيله
$$$$$$$$$$$$$$$
حظنتهه بألم ودموع. وگلبهه من الهظم مالوم
السفر يراد حيل وراي. عليه وهالامر محتوم
ياعمه بصبر اوصيچ. شدي الصبر من هاليوم
القدر لابد تقبلينه. الطارش من يجيب علوم
بالغاضريه الناس تفزع علينه
وراعي الوفه العباس اموذرينه
ولروحي تسلهه. ياعمه تگلهه
المدمع تسيله المدمع تسيله
$$$$$$$$$$$$$$$$
ماصح كل عذر لارأي ابوچ عله الترب مطروح
وبيه الف وتسعميه. كلشي بداخله مجروح
راسه عله الرمح ينشال. ودمه عله الأرض مسفوح
بحوافر خيلهم ينداس. ولجل الوحي ظل اينوح
وحته الطفل ينصاب. ينگطع راسه
بچفوف ليث الغاب. ماتت أنفاسه
روحي ايموت املهه. يا عمه تگلهه
المدمع تسيله. المدمع تسيله
$$$$$$$$$$$$$$$
من تفزع علينه الگوم. يحرگون الخيم بالنار
وعماتچ بذاك اليوم. بطفال وحرم تحتار
نتراكض ابين الخيل وعمچ عالنهر طشار
وشسولفلج ببوج حسين. بكل الطف اله اثار
ياعمه بين اجناب. ايچتفون ادينه
والشكر ذاك اليوم. يحدي الظعينه
منو جروحي يشلهه. ياعمه تگلهه
المدمع تسيله المدمع تسيله
$$$$$$$$$$$$$$$$
الخادم عبدالمعين الشمري
#مجالس_محرم_الحرام_١٤٤٦هـ
لــ 💫
مولاتي ام البنين (عليها السلام)
💫💫
الله رزقني بخدمته .. وهواي اشكرنه
الف انعم الله من اخدمت .. سيد الجنه
للخدمه اشد اوزاري .. وقرايه اسوي بداري
لسيد الجنه
🔵🔵🔵🔵
من خالي ظل وجه السمه .. أربع اقمار انطيته
اول گمر اسمه انكتب .. رب الوفه بجنسيته
چنه علي احساسه ترف .. يتفايض بحنيته
بالكون ماتلگه مثل .. عباسنه بتربيته
انذرته فدوه لفاطمه .. وهواي اشكرنه
الف انعم الله من اخدمت .. سيد الجنه
بالطف رسم آثاري .. وقرايه اسوي بداري
🔵🔵🔵🔵
موسى الكيلم بسيرته .. بهارون شد آزاره
والله لمحمدنه علي .. خلاه يبات بداره
وبكربله ابني الگمر .. الله لحسين اختاره
مو غار لو عصه لزم .. كض سيفه بي شن غاره
وبالرايه هوس عالنهر .. وهواي اشكرنه
الف انعم الله من اخدمت .. سيد الجنه
وبس عالحسين اخباري .. وقرايه اسوي بداري
🔵🔵🔵🔵
بجفوفه زينب من مشت .. عباس مثل السبحه
ماطاحت من ايده أبد .. شايف جبل هد صرحه ؟
چن طير واكف عالخيم .. ويفيي الها بجنحه
بعينه بسهم من انجرح .. خجل الدنيا بجرحه
وفّه ونعم من خوّته .. وهواي اشكرنه
الف انعم الله من اخدمت .. سيد الجنه
ماتنطفي اعليه ناري .. وقرايه اسوي بداري
🔵🔵🔵🔵
يسموني آنه ام الوفه .. للزهره فدوه احبابي
ام البنين و أفتخر .. ماارده ليدگ بابي
ويه الزجيه انصب عزه .. مصاب الحسين مصابي
على حسين حتى بالگبر .. الطم وسود اثيابي
خادمه الكلمن يخدمه .. وهواي اشكرنه
الف انعم الله من اخدمت .. سيد الجنه
واقره عليه اشعاري .. وقرايه اسوي بداري
🔵🔵🔵🔵
الگال ماكو بهالسنه .. لطم وعزاء يخصنه
خيجيبه دربه وياخذه .. وبحچيه لايخبصنه
مانصيد بالماي العكر .. بالعسل نشمر شصنه
الماكل بماعون الشمر .. گلوله لايوصلنه
واليحضر بكل تعزيه .. اهواي اشكرنه
الف انعم الله من اخدمت .. سيد الجنه
والبالعزه خطاري .. وقرايه اسوي بداري
🔵🔵🔵🔵
علي حسين المنصوري
مقدمه
يامن نويتو ترحون. گبل السفر سمعوني
انه بنص نهاري وبيتي صار اضلم
شما حاول اضمها الدمعه ماتنظم
اخذوني يبويه الدنيا ماترحم
ذبلانه وعليله بكل مكان ارهم؟
اخذ مكان زغيرون يهل الرحم جربوني
انه اتمنيت اموتن ياالابو احسلي
خواتي اعله الهوادج من يصيحلي
مكانچ هذا ويانه يگللي
وچف عبدالله شاله يريده يوصلي
مدالي چفه تشوفون. عينه تصد لعيوني
**
شنهو يصير اذا وياكم انه ارحل
خلي امشي مشي لوما يصح محمل
لو ساعه انتظرني بضعنك اتعطل
منا للعصر بلكت بعد اذبل
ماريد اتعب اليمشون. لو رادو يصعدوني
**
اسأل ضلتي باالدار شنهيه
وانه الوحدي وكل اهلي ماهيه
البيت يضل خرابه بغير راعيه
وسفرتكم احس ما الها تاليه
مااشوف اليه اتردون. وبغربتي تعوفوني
**
مشيتو والدرب خطواته جرحني
ورقيه وعمتي راحن مشن عني
بسوالفهن اگولن هم يذكرني
بساعات الوداع هوايه بچني
مدري اهلي من يلتمون. وكت المسه يذكروني
**
سعد العبودي
سافروا عني ونسوني ومااجوني.
وبين دمعاتي وحسرتي ضيعوني
اغله الاحباب. عني غياب.
مااجوني
حملوا ظعن المناية وتاريكيني
وآنه بعيون الدمع يبجي حنيني
كتله يابوية تجي لوما تجيني
كلبي لاجمني بسفركم تهمي عيني
شفته نزلت علوجن حمرة دمعته
والجواب اعرفته حالا من سكته
يعني ميعود كلبي ممرود
مااجوني
احجي وي الدار انوح وناري بيه
هنانه جان حسين يكعد وي رقيه
هنانه جنت اشتم ركبة ابن الزجية
والله لو اندل رحت للغاضرية
بين جدرانج يدار اسمع حسرتي
ومن مشوا عني الاحبهم وحشه صرتي
كولي يادار. كلبي شب نار
مااجوني
كولي يدار الاحبهم هم يجوني
واكعد وياهم واكولن مانسوني
شكد طويل الليل ويهيج شجوني
ياكلب يذبح حنين الفاركوني
مارجع منهم جواب ورد اليه
خاف ابوي اتمرضت عنده رقيه
شنهي الأسباب ماكو اجواب
مااجوني
تربي عيني اعله الدرب يوصل خبرهم
بلكي طارش جايني ايخبرني عنهم
جائز احبابي نسوني مااظنهم.
عمري راح اكضي اعيش انا ابأملهم
آنه عافوني وحيده وي الاماني
مااصدك يرجع ويصفه زماني
صارت احلام. ذيج الأيام
مااجوني
اه يادار الاحبهم وشبكالي
انه فاركت ابحياتي اغله غالي
بعد ماترجع ابد ذيج الليالي
ولايرد حسين ويشوف الجرالي
مايجيني يشوف دمعاتي الاكتها
ويسمع الونه الابد مافاركتها
الدنيا يحسين. بي صفت وين
مااجوني
يالعفتني وسافرت هايالعفتني
وبين جمرات المدامع ودعتني
غيرتني الفركه بعدك غيرتني
وبين مرضي وبين فركاك اتركتني
انه وي الدار اسولف واشكي حالي
خالي يادار الاحبهم ليش خالي
ياهوى الروح. كلبي مجروح
مااجوني
عندي وردة وجنت اساكيها بدمعتي
كلت من يرجع ابوي انطيه هديتي
تكبر الوردة واحس تكبر حسرتي
ليمت ايعود واقدمله وردتي
تكبر الوردة وامل وي روحي يطلع
حتى اقدمها لبوي بيوم يرجع
راحت ايام. وردت ايام
مااجوني
من اجه الناعي ونعى دمعاتي صبن
هدم اركاني واحس رجليه ماتن
طاحت الوردة من ادية وكل شي سكن
واظلم الكون واحس اعظامي بادن
يااهل ياثرب يصيح احسين ذبحوه
صحت لو ميت اريده اليوم جيبوه
بس احاجيه. واشبك اعليه
مااجوني
شاعر اهل البيت: حسين العبودي☆●#
محرررم 1444 هـ ( فاطمة العليلة )
بمان الله تردولي بمان الله
اويه عبدالله ترجعولي بمان الله
دعيت المغربية . يربي احفظ رقية
بمان الله
افرشت دمعي .. ودعيت آنه السلامتكم
يربي ادعي .. تردون الحبيبتكم
گمت أنعي .. واشمن بيدي ريحتكم
هلي يالرحتوا من دنياي صحت اهواي الله اوياكم
دعائي ابكل وكت وابصوت كون الموت ما يدناكم
الهجر ذابحني يالأحباب يم الباب گمت انعاكم
لون بيدي أرافگهم لون بيدي
ويجي عيدي واشابگهم لون بيدي
رفعت اشگد ادية . يربي احفظ رقية
بمان الله
__
على بابي .. كتبت اشگد اساميكم
يغيابي .. صحت للموت اتانيكم
على اثيابي .. عطركم ظل واشم بيكم
أرشن عتبتي بدموع والموجوع گلبي اعليكم
أريد اشتم هواكم حيل وكت الليل وين اللگيكم
ردت طارش يمركم ريت واتمنيت يوصل ليكم
رسايلكم أناطرها رسايلكم
أون الكم وادورها رسايلكم
واصيح ابكل مسية . يربي احفظ رقية
بمان الله
__
تعالولي .. صحت يهلي تعالولي
تردولي .. ردت واختي تجيبولي
ولا لوي .. بعد عبدالله ما لولي
صحت عبدالله بس خلوه لتعذبوه واتعذبوني
الحضن خالي من امناغاه أحچي اوياه بس خلوني
تعود چفي يشبگ بيه وايغطيه بين اعيوني
حبيب اختة رحل گوه حبيب اختة
يجي ردتة اشكثر توه حبيب اختة
رغم حزن اللي بية . يربي احفظ رقية
بمان الله
__
على صدرة .. أبوي اشگد اريد اغفة
انه ابكثرة .. أحن كل يوم اكظ چفة
شنو عمره .. اليفارگ بالزغر ولفة
أبوي الما نسيتة ابيوم ردتة الدوم يبقى اوياية
عدل ميت ولا أدريه شنهو البيه حرت ابهاية
ترك بنتة العليلة اتلوب كل اغروب دمعي اهواية
البلا والد تون تالي البلا والد
الگلب فاگد نفَس غالي البلا والد
اوية دمعاتي الجرية . يربي احفظ رقية
بمان الله
__
رجف گلبي .. انه ابظهرية العاشر
كثر تعبي .. واحس اهلي بلا ناصر
صحت ربي .. ببوي الغالي وشصاير
انكتب فوگ التراب إحسين طايح بين خيل او خيمة
وحيد اموذر اعله الگاع طاح ابساع وسفة ابهيمة
واخية ابإيدة راد اهواي ينطي الماي چم ايتيمة
وعد خية ابو فاضل وعد خية
إله امية يرد شايل وعد خية
بجاه الراح اخية . يربي احفظ رقية
بمان الله
حيدر الحلفي
قصیدة:رساله
ـــــــــــــــــــــــــــــــــــــــــــــ
رساله حزینه..من ادموع العلیله
کـتبها ابونیـنه..گلبها التشـتکیله
بدت تکتب..لچن تعتب..علیمن ماخذوها
مـدامعها...تلـوعها...عـلیله و فـارگوها
رساله رساله
ــــــــــــــــــــــــــــــــــــــــــــــ
کتبت اسطور الرساله من دمعها الما نشف
یاهلي عفتوني شمعه ذابت ابنص الکهف
گلبي یوجعني علیکم حاضن اجروحه و رجف
یا جرح یلهیني عنکم بس أحشْمکم نزف
تحاچي گلبها..بعدماکو وسیله
یسجل عتبها..گلبها التشتکیله
بچت سکته..غفت حته..ابحلمها ما لفوها
تعاتبهم...تراقبهم...یجوها و ما اجوها
رساله رساله
ــــــــــــــــــــــــــــــــــــــــــــــ
نایبات الدنیا تجرح من یجي وکت الغروب
عین عالباب و تناطر عین تشبح عالدروب
اتصیـح یا اهـلي تعـالو نـارکم بـیْه تلوب
اشلون عفتوني علیله گلبي من ناره یذوب
مواقد دمعها...تشب ماتطفه لیله
گـعد یسـتمعها..گلبها التشــتکیله
دمع خدها...ثگل عدها...تألمها المدامع
گلب طفله..الحزن کله..تشوفه ابعین واقع
رساله رساله
ــــــــــــــــــــــــــــــــــــــــــــــ
ضّلت اتحاچي صورهم لیش دون اللي مشن
ما خذیتوني ابضعنکم الله لا ینطي الزمن
آنه بتکم لو نسیتوا عفتو طفله ابهالوطن
وین عبدالله و رقیه اعیوني اعلیهم عمن
تسولف أملها...سمه الفرگه ثجیله
یسکّـن وجلــها..گلـبها التشـتکیله
ابأسامیهم...تنادیهم...تحشّم بالغوالي
یولیاني...یخوّاني...منو الیرحملي حالي
رساله رساله
ــــــــــــــــــــــــــــــــــــــــــــــ
صاحت اشتاگت عیوني عندي چان اشگد خوات
هسه لو أجیبن أسمهن شو أحسْن حایرات
مدري آنه الروحي ضاعت لو خواتي الضایعات
احنه سـترالله سـترنه مو بنات امیسّرات
حزنـها الـتلوحه..گلبـها ما یـشیله
یضمها ابجروحه..گلبها التشتکیله
تگول أفجع..من المدمع...وداعي وي خواتي
أحن الـهن...مشـن کلهن...بقیت ابنایباتي
رساله رساله
ــــــــــــــــــــــــــــــــــــــــــــــ
هذه واقع و هیه تعلم ما یرد کل الزمل
عالثره توگع زلمهم بین السیوف و نبل
تدري عمتـها سبـیه ترجـع ابچفها حبل
ابناگة العباس راحت بس ترد اعله الهزل
تضیّع عمرها...عله الرحله الطویله
یعظّم اجرها..گلــبها التــشتکــیله
اعله گد الهم...منو الیهتم...یوصّل هالرساله
لأهالیها ...یواسیها...ابذبح لحسین و آله
رساله رساله
ــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري...المحمره
قصیدة:مشکوره یأم البنین
ــــــــــــــــــــــــــــــــــــــــــــــــ
مشکوره یاأم الوفه یاأم البنین
ــــــــــــــــــــــــــــــــــــــــــــــــ
یل جبتي عباس الگمر مشکوره
نعم الأخو ونعم العضید أبدوره
صـولاته ضـلت بالزمن مـذکوره
عاشوره منّـه و هوّه من عاشوره
نعم الولد جبتي وبکبرته أتعبتي
مشکوره یاأم الوفه یاأم البنین
ــــــــــــــــــــــــــــــــــــــــــــــــ
مــا طلــگن و لا جــابن الوفّــایه
مثلچ ولد من زغره عنده احچایه
کــل الفــخر یاأم البنیــن أبــهایه
ابضعن الحسین أبنچ یشیل الرایه
أبنچ رفـع راسچ حي الله عبّـاسچ
مشکوره یاأم الوفه یاأم البنین
ــــــــــــــــــــــــــــــــــــــــــــــــ
بس أنتي جبتي هیچ أخو الخوّانه
یفــدیهــم ابدمــه و یعــظّم شـانه
لمّن ســمع ضــنوة علي عطــشانه
شال الشریعه و یمـها ذب ذرعانه
جاب النهر بیده یم خیمة اعضیده
مشکوره یاأم الوفه یاأم البنین
ــــــــــــــــــــــــــــــــــــــــــــــــ
ماشفــنه أم عـدها وِلِـد تهـدیهم
واتـگـول لو عنـدي الف افـدیهم
بس انتي اولادچ نجـحتي بیـهم
یکفي الفخر لحسین باچي اعلیهم
کل أربع أولادچ جابولچ أمرادچ
مشکوره یاأم الوفه یاأم البنین
ــــــــــــــــــــــــــــــــــــــــــــــــ
باچر یجـازیچ الحـسین أبروحه
عندچ أجر عند الله گد أجروحه
یل جبتي عمرچ بالصبر مذبوحه
نعم الله لو عینچ بچت مسموحه
باچر یکض أیدچ یشفعلچ أولیدچ
مشکوره یاأم الوفه یاأم البنین
ــــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري....المحمره
قصیدة:نحسب ایام
ــــــــــــــــــــــــــــــــــــــ
نحسب ایام..گمنه الخدمتک
کلنه خدّام..عـشنه ابخیمتک
یل ربینه أبّین أیدیک
ألف نعم الله علیک
کلنه خدّام
ــــــــــــــــــــــــــــــــــــ
نحسب ایام الي عشناها اعله مودک
والله کل الخیر عدنه من وجودک
یاحسین أنت الامیر و هذه زودک
ألف نعم الله أحسبتنه من جنودک
صحنه یحسین..من اول نفس
والهویٰ أسنین..بالـریّه أنحبس
أبغالي دمعه نشتریک
ألف نعم الله علیک
کلنه خدّام
ــــــــــــــــــــــــــــــــــــ
الخیر کلّه اباب الحسین الله گایل
واحنه جینه انجدّي خیرک ما نجامل
رزق عام انریده من هالشهر کامل
خل یجیب أرزاقنه چف ابوفاضل
کلشي منک ..ینـعدلي رزق
حتی حزنک..أطهر کل عشق
حزنک الدلّاني بیک
ألف نعم الله علیک
کلنه خدّام
ــــــــــــــــــــــــــــــــــــ
من عرفناک العمر ضل عدنه یسوه
آه یا ریحت محرم حیل حلوه
کلها شدّتلک حزم عالصعبه تگوه
کلها لهفانه علیک و عدها منوه
یل خدمتک..أوسع من نظر
من نعمتک..عشنه ابهالدهر
وین ما رحنه نجـیک
ألف نعم الله علیک
کلنه خدّام
ــــــــــــــــــــــــــــــــــــ
لهفت الخادم علیک أبگد جنونه
لو یذکرک ینخطف من وحده لونه
گالوا احسین انذبح تدمع عیونه
والحوافر رضت اضلوعه و متونه
ابهذه حالک..گطعوا منحرک
دم بـچـالک.. هسه مـنبرک
منبرک ضل یرتجیک
ألف نعم الله علیک
کلنه خدّام
ــــــــــــــــــــــــــــــــــــ
نحرک العطشان یاسیف اعتناله
وضلت اتفیض الجراح ابدم وصاله
لیـش چتّـالک علیٰ صدرک تعاله
ضل یجر اوداجک و هالحاله حاله
ضـل یأذیک .. حتی بـالذبح
یسحگ اعلیک..جرحک ینفتح
دمعي لا ما یرتویک
ألف نعم الله علیک
کلنه خدّام
ــــــــــــــــــــــــــــــــــــ
صدرک الچان ابحنانه أیلم ترافه
هسه بین الخیل صدرک یا حسافه
راسک ابراس الرمح حتی الله شافه
و الجسد بالمقتل و دمک تجافه
صح بلا راس..أنت ابمقتلک
لاچن أحساس..کل خادم الک
یل تعوّدنه البچـیک
ألف نعم الله علیک
کلنه خدّام
ــــــــــــــــــــــــــــــــــــ
کلمات خادم الحسین ع
عبدالامیرالناصري
قصيده لاول یوم
((الوزن فایزي))
ــــــــــــــــــــــــــــــــــ
طوح ضعنه وغربت عن دار الاحباب
عیني علی ادیاري اشبحت، والدمع سچاب
┉━━•✿🪬✿•━━┉
یادار اهلنه امودعه عنچ مشینه
رحنه بجبر عن الوطن ماهو بدینه
لو ما امر من الله چا یمچ بگینه
مکتوبلی امشي الکربله، من ربي اکتاب
✍️ام ضيغم المحنا
┉━━•✿🪬✿•━━┉
تنهظم روحي ومهجتي من تصد عيني
لااركانج الضلمه بقت زايد ونيني
يادار باجر افگد اخواني وبنيني
اهلي وهلج يبقون صرعى فوك التراب
✍ام مرتضى الخفاجيه
┉━━•✿🪬✿•━━┉
مكتوب إليه امشي ابدرب واگضيه بالون
ادري بمصايب كريله لعيوني يعمن
مالومه لاچمني الگلب وجروحي كثرن
يوميه گلبي ياخلگ متصوب اصواب
✍️ام محمد تقي الموسوي
┉━━•✿🪬✿•━━┉
فگد الاهل ماينحمل يمرد الدلال
الفرگه تمرد بالگلب واتغير الحال
ضليت امشي والتفت والدمع همال
خبروني من هذا سفركم شنهو الأسباب
✍العلويه ام محمد الخطيب الموسوي
┉━━•✿🪬✿•━━┉
انظر عن ايساري علي واليحدي عباس
مهيوبة ياناس طلعت مرفوعة الراس
كل خوفي بعدك يالولي تحديني الارجاس
گلبي لزمته يالگمر وخوفي أعلى الحجاب
✍ام علي الرضا الخرسان
┉━━•✿🪬✿•━━┉
موكبنه من انوه وضعن رفت الاعلام
ياهيبته هيبت نبي ومعلي الهام
صوره تضل بالذاكره من امشي للشام
وتحدينه من بعد الاهل ظلام واجناب
العـ✍🏻ـلويه ام مرتضى الموسوي
┉━━•✿🪬✿•━━┉
تـــمـ بعون الله تعالى ـــت
بقلم شاعرات اهل البیت ع
في رابطة دموع العقیله ع
لانجيز حذف الاسماء✋
☘️نسالكم الدعاء☘️
قال مولانا ابا عبدالله الحسين ع عند خروجه من مكه:::
(وإنِّي لم أخرج أشِراً ولا بَطِراً، ولا مُفسِداً ولا ظَالِماً، وإنَّما خرجتُ لطلب الإصلاح في أُمَّة جَدِّي(صلى الله عليه وآله)، أُريدُ أنْ آمُرَ بالمعروفِ وأنْهَى عنِ المنكر، وأسيرَ بِسيرَةِ جَدِّي وأبي علي بن أبي طَالِب)
ساعد الله قلب مولاتنا زینب یوم خرجت من دیارها ودیار اجدادها 😭😭😭😭😭
نعي لخروج اهل البیت من الوطن
┉━━•✿🪬✿•━━┉
یروحي الوطن لناس حسبه
الوادم علی الفطره تحبه
مشیت وخذت من عنده تربه
✍️ام ضيغم المحنا
┉━━•✿🪬✿•━━┉
مرازیب دمع عیونی سچاب
یوم الجفیت ادیار الاحباب
غرب ظعنه والگلب ذاب
✍️ام ضيغم المحنا
┉━━•✿🪬✿•━━┉
شالو اعزاز الگلب لاوین
ردو ظعنه خویه یحسین
اخافن علیکم یا میامین
✍️ام ضيغم المحنا
┉━━•✿🪬✿•━━┉
يالماشفت مثلك بالاخوان
من الفرگه خويه الگلب خلصان
خوفي اضیعکم یشجعان
┉━━•✿🪬✿•━━┉
من رحت عنج يرض طيبة
حسيت روحي أمست غريبة
لو راح خدري منين اجيبه
✍️ام علي الرضا الخرسان
┉━━•✿🪬✿•━━┉
ردو الضعن يهل الحميه
لايب دليلي اشلون بيه
يمشي الجدم غصبن عليه
┉━━•✿🪬✿•━━┉
عيني الاثركم دوم تربي
خايف عليكم حيل گلبي
ومن الوجل ماشوف دربي
✍️ام محمد تقي الموسوي
┉━━•✿🪬✿•━━┉
مولحت من السهر
عيني
تاخذني حسبه وتوديني
وزايد يخال ابني ونيني
┉━━•✿🪬✿•━━┉
الونات ماخلت بحالي
من هسه صار النزل خالي
وضايع يعزي ويادلالي
✍️العلويه ام مرتضى الموسوي
┉━━•✿🪬✿•━━┉
تـــمـ بعون الله تعالى ـــت
بقلم شاعرات اهل البیت ع
في رابطة دموع العقیله ع
لانجيز حذف الاسماء✋
☘️نسالكم الدعاء
نشرت قميص وليدهه ** وعالظلع خلت ايدهه
خاطرهه مكسور ======= بجاهه عاشور
////////////////////////
بده شهرالحزن والنوح ابدمعهه فاطمه صاحت
وينه الي يواسيهه المصاب المنذبح ناحت
قميص اوليدهه البي دم تنشره بل سمه راحت
اليشمه تنزل ادموعه چمرت خيمه بي طاحت
من دم بچيتي ادموعچ وماطايبات اضلوعچ
غاليهه منحور بچاهه عاشور
مصيبتهه چبيره اهواي شما وصفنه مانوصل
يدوس وليدهه الحافر وسهام ابصدره ماتنفل
وزينبهه تگوم اتطيح وين اتحصله ماتندل
مابيهه العقيله اتگوم ابجرحهه صعدت اعله التل
صاحت يخويه اتشوفني يمك شمر ميعوفني
ياخويه معذور بچاهه عاشور
الحوافر خشنه ماترحم وصدرك ورده جواهن
طبعن بل گلب ويلا محد منه شالاهن
اجروح احسين من نزفن التراب الحار داواهن
الشالع گلبه خيماته يشبن نار شافاهن
طيحت خيامه ايشوفهن وخيول غربه اطوفهن
ضل حزنه منشور بچاهه عاشور
بل طف كلشي يجرح صارالسمه والگاع بي تشهد
كلشي انسد عليهم غاد اشلون الماي ماينسد
السهم لو يخطي جسم احسين ابميه اعله الگلب ينعد
شفاف اليعطش يذبلن ويصيح ادركني ها يا جد
عطشان مات احسينهه امن الدمع نشفت عينهه
والخدهه مسطور بچاهه عاشور
تلاگن فاطمه وزينب عذب فوگ النحر طاحن
اگعد ياعزيز الروح يم نحره اشكثر صاحن
امگابل لمن اعله احسين تعب وعيونهن راحن
والشافن جروح احسين گلي اشلون يرتاحن
فوگ الرمل ضل طايح وچم حافر اعلي رايح
بشفافه الفطور بچاهه عاشور
سلام البهادلي
لاستشهاد الامام محمد الباقر عليه السلام
يابحر الفضل (وزن نصاري )
يابحر الفضل يامنبع النور
بعيوني المدامع لجلك تفور
يبو الصادق يمظلوم
اليوم الدين مهظوم
بعيوني المدامع لجلك تفور
★★★★★
يانور الهداية وشمعة الدين
ياثاني بدر من نور الحسين
لجلك كل جرح يندار جرحين
يامنهل عذب شفت الأمريين
يبوالصادق يمولاي
يبن الماشرب ماي
يوم الطف غريب وگلبه مكسور
★★★★★
كلمن حاربك وانت السلامه
مايجني ابد غير الندامه
شخصك من سطع نور الامامه
شالوا حقد عدوان الكرامه
كلمن حاربك صار
حطب ملموم للنار
وعلى الباغي النوايب لازم ادور
★★★★★
يلبطف شفت مولانا لوعات
من عدوان ماترحم وشمات
عساكر للعلم نظمت حملات
نهج حسين شامخ بيك مامات
تشهد دوم الايام
عزمك يبني الاسلام
وعلم آل النبي بكل بلد منشور
★★★★★
الطمعوا بالمناصب والإمارات
المعارف شافت من الگوم ويلات
صارت بس عناوين وشعارات
گضيت ايامك وياهم معانات
صاروا حرب للدين
گوم الذبحوا حسين
أمية بچفها صار الدين منحور
★★★★★
ينعاك الشرع والدين مولاي
ياطيب عهد للخلگ وفاي
الناس بدون رايك مالهم راي
بيك الموت عنهم صار حداي
الصادق عاش الايام
بعدك حزن وآلام
گلبه من القهر واللوعه مفطور
الشاعر حسن لعيبي الحريشاوي
ليلة العليله
.
.
.
وي ما ضعنهم گام يمشي
حسيت رأساً شاب رمشي
اويــلاه .. هــلي راحــو .. اويــلاه
***
عليله بس ابين الهم صحيحه وكلشي مابيه
الحقــيقه واگـــفه انـي بالـگوه اعــله رجليه
گلت بلكت يصيحولي اويانه امـشي يعلويه
اهديــماتي بدياتـي بــس مــحد نـــده لـــيه
بساعتها چن انگطع هرشي
حسـيت رأسا شاب رمـشي
اويــلاه .. هـــلي راحو .. اويـــلاه
***
بعد ماودعونــي وصار نيتـهـــم يخــلوني
وي ماشالت الناگه رجلها طاحن اعيــوني
هلي وحنان ادريهم هلـي مومال ينسـوني
وراهم حافيه اركض بلكــت لن يشوفوني
من مالتـــفتــو راح كلـشي
حسيت رأسا شـاب رمشي
اويــلاه .. هلـــي راحــــو .. اويــلاه
***
بــده يبــعد ظـعن اهلي وشـوفي بعد ميلوحه
وافرفح گمت من راحو چـني طويره مذبوحه
الروحه رايــحه العاشــور شله مچــلب بروحه
اليلوحه الــف وتسعميه شيطــيبهن اجــروحه
بدلالي نـابت رمح وحشي
حسيت رأسا شاب رمشي
اويــلاه .. هلـــي راحو .. اويــلاه
***
شـــلت ايدي اودعهـــم وچــن انشــــال تــابوتي
مــدري اشــمات بيه وگام مايطلــع بعـــد صوتي
مــن ماصدو اعلـيــه حيــلي استـــشهد وقــوتي
طحت عالكاع چن جثه وصحت توه بتده موتي
عالكاع اهيس طاح نعشي
حسيت رأسا شـاب رمشي
اويــلاه .. هلي راحـــو .. اويــلاه
***
العـوده شــوكت ماگالو يوم ثنين عــشر أيام
حتى اعــرف اتانيهم واتـجرع غصـص والام
وين الله ويردولي نـحور وماكــو بيها اسهام
وين الله ويــردولي وعليــهم ماتـوج لــخيام
بروحتهم نهد صرح عرشي
حســيت رأسا شـاب رمشي
هلي راحو اويلاه
***
حيدر تركي الكربلائي
ليلة العليلة
.
.
.
حسين بس هوه الصدگ صاحب طويله
واحنــه غيــر حســين ماعـدنه وســـيله
***
الله يرحـم حجـــي مـهـــدي الامـوي
گــال هالجـــمله وبقـــت تـدوي دوي
حسين صاحب لچن هالصاحب قوي
واليســنده حسيـــن لامـــــاينـــــلوي
ابحـثنه وبحـثنه وطــلعنه بهالحصيله
واحــنه غيــر حسـين ماعــدنه وسيله
***
حسين ماهــد ربـعه يوم من الأيام
بالــضــوه لازم ادينــــه وبالـــظلام
امرار ياخــذنه الهوه وحــلو الكلام
نبــتــعد وتـــردنه نفــحات الامــام
مستـحيله يعــوف ربـعه مستــحيله
واحنه غير حسيــن ماعــدنه وسيله
***
عـــن ابوالـــسجاد نـــبعد مســـتحيل
بيـــتـنه وعـــن بيـــتنه لامـــانـــشيل
حسين حيـل هواي والبـــاقي قـــليل
غــير هـــوه المن اجلنـــه انـطه كفيل
حسين مو صم ينطي من ينطي بشليله
واحنــه غيـــر حــسين ماعـــدنه وسيله
***
حســين واليتــمسك بحـبـله المتين
مايــــزل جــدمه شـــمال ولا يـمين
حسين ونعـرفه شنو من چـنه طـين
ولــِهــذا السبـــب بــــي متمـســكين
نحيــي بي يــاناس ونموت بسبيله
واحنه غير حســين ماعـدنه وسيله
***
حـسين جـــننه وحـــلو بيــه الجنـون
حســـين ايــاتً لقــــومــن يعـقــــلون
حسين لـو ما هــو احــنه مــَن نــكون
حسين بس هوه السكن وسط العيون
باقـي وســـط گــلوبنـــه ولامانـــشيله
واحنــه غير حسين ماعــــدنـه وسيله
***
الدنيــا ياهــالناس مابيــها ضمان
شيلگه بلله الي يــعوفه بـهالزمان
حسين من نلــوذ بي نلگـي الأمان
هـــوه أبو الحنـيه بـل رب الحنان
شما نوصفه اوصافنه تبـقى قليله
واحنه غير حسين ماعدنه وسيله
***
بصاية الله وصاية حسين الحنين
حســين أصــحابـه دلال مـــدللين
بفضله وبجوده وعطائه عايــشين
الــف نــعمــلله وشــكراً للـــحسين
شيخـنه المهيوب طبــعن مـنتميله
واحنه غيـر حسين ماعدنه وسيله
***
حيدر تركي الكربلائي
عافوني هلي وما حنّو اعليه
ومن كل گلبي ادعي راشده النيه
………………………
چنْت متانيه اوياهم يصعدوني
ضعنهم راح وانه الدمعه بعيوني
عليله شلون وبوحدي يعوفوني
المرض تعبني شيسوي الهجر بيه
………………………
شگد توسلت بيهم ولا نفعت
طلعت روحي من اضعونهم طلعت
وراهم راحت وليهسه ما رجعت
جسد ظليت بس وروحي ماهيه
………………………
ابوي الما مفارگني ولو ساعه
يناس شلون انه اتحمل اوداعه
راح وما دريت شصار بوضاعه
كل خوفي يروح وما اله جيه
………………………
اليطيح بمرض كون اهله يدارونه
مو يمشون وبغربه يخلونه
ماريد المْداره وروحي ممنونه
اريد اضعونهم هسه ترد ليه
………………………
لو امشي مشي هم ارضه واتحمل
والحگ عمّتي من تصعد اعله التل
وباچر وي خواتي اركب الهزّل
يمر بيه اليمر بسكينه وارقيه
احمد العگيلي. شور او نعي
أبدور الهواشم والنعم حياهم
ألله ومحمد وعلـــــــي وياهم
كلهم حمية
............................................
بسملة وقربان خـــــــــــــوه وآية العز والأباء
قدموا بالطف ركبهم وجسدوا معنــــــى الوفاء
كتبوا بدمهم رواية مــــــــــــــن ملاحم كربلاء
ورسموا أخيام وشريعة وجربة وأجفوف ولواء
ومثل الشمس خالد يضل ذكراهم
ألله ومحمد وعلـــــــــــــي وياهم
كلهم حمية
.................................................
من وحـــــــــــــي عرش الوفية فاطمة أم البنين
جانت أحروف الوصية آيــــــــــــة الفتح المُبين
أستبشر حسين وتبختر عـــن يسار وعـــن يمين
من قــــــــــــره بعيون أخوته يا حبيبي يا حسين
أحزام الضهر بالشدة يا محلاهم
ألله ومحمد وعلــــــــــــي وياهم
كلهم حمية
......................................................
نزلوا وشدوا عزمهم يا علـــــــــــي وكت النزال
ورجت الكــــــــــاع بحملها تبين أصناف الرجال
وكفوا وعباس هـــــــــــــوس وأبتدى سوح القتال
رفت الراية وعجيبة أهنانه يتولد ســـــــــــــــؤال
عباس من نزلوا شنـــــو وصاهم
ألله ومحمد وعلـــــــــــــي وياهم
كلهم حمية
........................................................
أبتدت تدوي المعاره وبينت حدهــــــــــــا الركاب
عـــــون عبدالله أويه جعفر كتبوا أحروف الجواب
وقعوا بالــــــــــــدم عهدهم وترسوا أعيون التراب
لحد ما طاحوا ضحاية وصبــــــغ شيبتها الخضاب
هوس كمر هاشم ورف ألواهم
ألله ومحمد وعلـــــــــي وياهم
كلهم حمية
.......................................................
حان وكته كمر هاشم وأرتجل شال اللــــــــــوه
ولمع فقاره أخو زينب وأنكطع حتــــــــى الهوه
هندس الكون وضلامه وأرتعب طــــــــف نينوه
والزلم لاوين تشرد صحرى وأتلاكي ضـــــــوه
جرة النفس كوه الكمر خلاهم
ألله ومحمد وعلــــــــي وياهم
كلهم حمية
.................................................
قرب ميعاد المنية وحـــــــــــــــــان ميعاده النذر
ولازم العباس دمــــــــــــــه أيحني جف أم الخدر
فاطمة عدها الوصية وربته الزينب ذخــــــــــــر
وتدري ضهر حسين باجــــــــر عالشريعه ينكسر
الهذا الوكت حيدر علي رباهم
ألله ومحمد وعلـــــــــي وياهم
كلهم حمية
...............................................
خادم خدمة الحسين
الشاعر
محمد الموالي
الليلة الثالثة
#قصائد_محرم _ع_١٤٤٥_ه
العليله
يا آل الله يكتل فرگاه
لاخذني الموت لارحت وياه
يمته احسين ايرد الي
____
زغيره او اهلي عافوني ابنار العلّه والفرگه
لا عـنــدي صـبـر ايـوب ولا بـيهم امل ملگه
ذبلانات اعيوني ياعالم رحموني
گلبي المشتاگ كاس المر ضاگ
وينك يحسين مو كافي افراگ
يمته احسين ايرد الي
____
طالـت غيـبـة احبابي گلـب ماعـندي يـتحـمل
لا طارش وصل منهم ولا درب الطفوف اندل
ماعندي كل چاره دمعي جف مداره
ماضلت روح تعبني النوح
لا وده اخبار لا طيفه ايلوح
يمته احسين ايرد الي
____
عيني اعله الدرب وانعه يريته يسمع اونيني
اشـوغ ابـكـل مغـربيه يبـويه اشــعطلك عني
يا اغله امن انفاسي هجرك شيب راسي
ابنيتك يحسين شيبها البين
وانت ابهل ليل مااعرف وين
يمته احسين ايرد الي
____
مر بيه حلم يحسين اسويعه او كحل اعيوني
عليه خل اسولفلك واشوفك حالتي او لوني
لا بالماي اتهنه لا للزاد اتدنه
كل ليلي هموم وانشد لنجوم
احسين بيا حال او يرجع يايوم
يمته احسين ايرد الي
____
عليه ضاعت اخبارك مثل عافيتي من ضاعت
مناشير او تگص بعضاي هيچي ابنيتك لاعت
يل امّرمر حالي ليل انهار ابالي
هم ليه اتعود ؟ واتهنه اردود
وانسه الشوغات وايام السود
يمته احسين ايرد الي
____
اناطر دربك اچم ادوب واضل اعله الدرب لشگد
يبويه الموت وازاني واحس حيلي تعب وانهد
ما احسب نتلاگه كلمن ضل بشواگه
من عني امشيت ابموتي حسيت
اخلافك محتوم لوما رديت
يمته احسين ايرد الي
____
ابو فاطمة الطائي
وين تردون بضعنكم وين بويه يحسين
*
عني مشيتو بويه وجزيتو
واشكد صحت وراكم بس ما اجيتو
من سارن النوك جن كلبي مبيوك
وكل ما يبعد ضعنكم يتكاثر الشوك
ضليت اون عليكم وصفك باليدين
وين تردون بضعنكم وين بويه يحسين
**
انشد عليكم روحي انه بيكم
حته الهوه الاشمه ياخذني ليكم
اكعد عله الباب وترجه الاحباب
حسرات اكضي ليلي وبكلبي الصواب
عكبك طحت اعله وجهي بالعتبه مرتين
وين تردون بضعنكم وين بويه يحسين
***
انه العليله وياهو اشتكيله
رحتو وليلة سفركم ما منها ليله
يمته ترجعون وشلت العيون
غير بويه انه العزيزه عدكم تكولون
ريضو صحت وراكم ودموعي بالعين
وين تردون بضعنكم وين بويه يحسين
***
نار بدليلي وسهرانه ليلي
تدري الهجر كتلني وهد بويه حيلي
عفتوني وحدي ودمعي اعله خدي
رحتو وضلن صوركم بس هنه عندي
كلش طول سفركم يالعني ماشين
وين تردون بضعنكم يابويه يحسين
**
بيه الحمل مال وتغير الحال
وجدمي ضل بجفاكم بالكوه ينشال
بطيفي شفتكم وتذكرتكم
كل عمري بويه تدري ما زعلتكم
حادي الضعن يكلي لازم ترجعين
وين تردون بضعنكم وين بويه يحسين
*
بيه الوكت دار وكلبي يشب نار
وحشه وضلت عكبكم ما تنطب الدار
لميت الهدوم وترجه كل يوم
ومن عادت اليتاني ما يعرف النوم
ضلمه الدنيه شفتها عكب البعيدين
وين تردون بضعنكم يا بويه يحسين
*
تمت
تحسين الخفاجي
عفتوني عفتوني ويحبابي ضيعتوني
تانوني تانوني مو راح تعمه عيوني
يهل المحنه يهل المحنه
**
بيدي الهدوم وكلبي ملجوم بلكت اكسر خاطر الحادي ويردلي
وحدي بالدار وفكري محتار ليش محد امشي ويانه يكلي
كل ساع اطيح اعله الوجه ويكلي ابوي اسم الله
تدرون مو يم المرض ضل بالي يم عبد الله
بجاني بجاني والحادي ما صاحاني
خلاني خلاني من دون كل اخواني
مغربين اهلنه يهل المحنه
****
من تروحون اصبر اشلون يهلي تكتلني بجفاكم كعدت الباب
ليش اليروح ياخذ الروح ينعصر كلبي عصر لو طال الغياب
اشلونج يكلولي الخلك وانه يبويه اشلوني
والدنيه كلها من رحت طلعت تره امن عيوني
نتلاكه نتلاكه مدري اشوكت نتلاكه
مشتاكه مشتاكه وطول ابوي افراكه
ونه اعله ونه يهل المحنه
*
وحدي ضليت واظلم البيت والحزن دك باب بيتي وصاحباني
تغير الحال ودمعي همال انه ابوي اعله الهجر ما عوداني
ليش اليتاني اعله الدرب تيبس الدمعه بخده
من وحده اخلص يا هلي والنوب اطيح بوحده
سهرانه سهرانه عيني امن امس سهرانه
حزنانه حزنانه ومن امن القهر ذبلانه
كل شيبي منه يهل المحنه
*
وحشه الليل تاخذ الحيل ينكطع سباح كلبي من تكطعون
ذيج الايام صارت احلام يهلي اطيب امن المرض لو بس ترجعون
بالطيف يابويه امس وكت المسه اتلاكينه
اشلونج كلتلي بددمعتك وكتلك ابد مو زينه
تدريني تدريني افراك الاهل ماذيني
ناسيني نايني وبغربتي مخليني
ضايع املنه يهل المحنه
****
عكب الاحنان كلبي خلصان وجرحي عالحيطان من راحو رسمته
صار الغروب وسدوا لبوب وانه بالباب انتظرهم وبجي سكته
محد اجاني من هلي واحجيله ضيم البيه
والحادي عني من مشه ما كال هاي بنيه
يالغالي يالغالي يابويه عاين حالي
دلالي دلالي اعليك انفطر دلالي
ومكوع ضنه يهل المحنه
*
تمت
تحسين الخفاجي
اخر عتاب . ماكو جواب
——
ياللي طالع بالضعن ارد اروح اوياكم
اسرج الخيل وامد بالخيام افراشكم
بويه لو رحتو بعد كلي وي الكاكم
الله ينساني اذا بويه لحظه انساكم
وكت الغياب. ماكو جواب
——
عيني ما نامت ابد ما تشوف اعيونك
بويه روحي اتحيرت خايفه ايذبحونك
لون ما بيه بعد بس اكول شلونك
لا رساله ولا خبر. وصلت امن اضعونك
بعد العتاب. ماكو جواب
——
بويه ذابحني المرض بس مرض فقدانك
بيا ارض وبيا وطن ماعرف عنوانك
خاف بويه بكربله ارد اشوف امجانك
تبجي بعدك سبحتك وي بچي قرآنك
حتى الكتاب. ماكو جواب
——
وي رقيه اتوسلت خل اروح اوياهه
اختي اغله امن العمر والله ما انساهه
ليش بويه الفاتحه دمعتي تقراهه
يعني اكو موت وبعد اختي ما الكاهه
صاح التراب. ماكو جواب
——
ما نمت ساعه ابد خايفه ومرتابه
اي وحك دم فاطمه والضلع ومصابه
بيتك اظلم بس بقه بويه فاتح بابه
والفقير اللي سئل ما يشوف اجوابه
وين المجاب. ماكو جواب
——-
بويه اخاف امن القدر من يمر ابالي
كل اخوتي بالذبح ما يضل كل والي
ساعد الله دمعتك ياحبيبي الغالي
تشوف ولدك للاسف عالترايب تالي
دم الشباب. ماكو جواب
——
بويه شخبار الضعن والخدر والحاصل
صدك زينب تنسبي والله ما تستاهل
لا اراديه البچي اينادي يابو فاضل
ليش زينب عالهزل انته انته الكافل
ام الحجاب. ماكو جواب
——-
حمزه السماوي
قصیدة:أربع نشامه
في حق ام البنین س
ـــــــــــــــــــــــــــــــــــــــــــــ
خل یسمع المیدان..مني البشاره
ربـیت أله شـجعان..کلـهم غیـاره
أربع نشامه و فُرّاس
ودّت الک أم عباس
کلهم غیاره
ــــــــــــــــــــــــــــــــــــــــــــــــــ
خل یسکت اگبالي الصوت
بأولادي گــلبـي مـبـخـوت
عندي أربـعه احیـود الیوم
مـتنـسیـه بیـهم بـالمـوت
مـن الـزغــر هـالـفــرسـان
یـمها الهـوه ایخاف ایفوت
بـیهـم عــزم داحــي الـباب
گـول و فـعلـهم مـنعـوت
ذوله أربعه و سوح الحرب.. تعرف نوایه البیهم
وگفـتهم اتسـجل أسم..بالحومه عن ماضیهم
بنت أبدوي والراد...یعرف قراري
خـل ینـظر الأولاد...بیـهم وقـاري
نبراس و یتبع نبراس
ودّت الک أم عـباس
کلهم غیاره
ــــــــــــــــــــــــــــــــــــــــــــــــــ
مـا خـلّفت مــثلي النـاس
هیچ اربعه و شالت راس
یکــفیني لـو کلهـا اتـگول
خــیعـونـچ أم الـعبـاس
آنـه أم الما عـاف السـیف
من زغره و یمـلک نوماس
من حگی و لو افـخر دوم
اتـزامـط بـأبني الـفَراس
من حگی افخر بالولد..و آنه اربعه اولادي
ما جابن و لا ینجبن..مثلي أمّـهات الوادي
هیچ انجبت آیات...فنّه الوصلهم
ذوله اربعه و هیهات..اربع مثلهم
اشرف ضیاغم بالناس
ودّت الک أم عـباس
کلهم غیاره
ــــــــــــــــــــــــــــــــــــــــــــــــــ
آنــه ابــرباهــم تـعـبیـت
یامـا ســهـرت و حنّیــت
بـس الحــمد لله الــیـوم
شفـت الـثمر مـن ربــیت
لا تـعــتـقد یـالـمــیـدان
راح انـحـنیلک لو جــیت
أبعبدالله وعون و عـباس
وأبـجـعفر صـوبک هدّیت
ما تنحني العدها ظهر..متحزْم ابفرسانه
بأربع حزم متحزّمه...بأبني الگمر واخوانه
سوح الحرب عنوان...تعرف زلمنه
بالطــف گـمر عدنان...رافـع عـلمنه
های اربعه و ماتنقاس
ودّت الک أم عباس
کلهم غیاره
ــــــــــــــــــــــــــــــــــــــــــــــــــ
کل واحـد البــیهـم حیـد
ما بیهــم شــک و تـردید
راحــوا یخــلّون الگــوم
یم خیـمة لحسین اعبید
لـو زیــنب اتــرید الــمای
بس تحچی یمهم شترید
اولادي و أنعــم مـن گال
مایصــعب یمهــم لبـعـید
بس کافي زینب بالخیم.. تطلب نهر من عدهم
ایشیلون کل المشرعه... و فنه الي یوصل حدهم
ماي النهر مـلزوم...مایحچي حاشه
اربع سقایه الیـوم...تروي العطاشه
بیهم شجاعه و نوماس
ودّت الک أم عبــاس
کلهم غیاره
ــــــــــــــــــــــــــــــــــــــــــــــــــ
خل نفرض اصواب البیـن
مـن عــندي یاخـذ لحنیـن
فـدوه أربعــتهـم مقــبـول
بس ســالم أیـرد لحـسـین
آنــه أم الـوصــیت ابــهاي
عالحـاجب ما تـعله العـین
یــولیــدي لعـضیدک کـون
یـم الــشط تگــطع چفیـن
وصْیته یبني ابکربله...توفي الوعد بوریدک
أنسه الحیات ابلا أخو..ولاتنسه یوم اعضیدک
کلشي و لا مذبوح...اسمع حبیبي
والنایحه و النوح...تصبح نصیبي
اربع وِلد رفعة راس
ودّت الک أم عباس
کلهم غیاره
ــــــــــــــــــــــــــــــــــــــــــــــــــ
خـل تنــذبح هــالأبـطال
وبیـهــم تمــوت الآمــال
بس لا أشــوفن بالــعین
زینــب تچــتفها أحبــال
بت حیدر و ستر الکـون
تهظـمني لـو بـین ارجال
دگلــها صــدره الــعبـاس
والرایــه الزیـنب تفـصال
رایة علي ابچف الگمر...لا ما تطیح الرایه
یاخذها چف المنتظر...واترفرف ابهالثایه
غیرة علـي الکـرار...ابدمهم سریّه
زینب تضل عتبار...حامي الحمیه
حد الشرف ماینداس
ودّت الـک أم عـباس
کلهم غیاره
ــــــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري
قصیدة:دموع المهدي عج
ـــــــــــــــــــــــــــــــــــــــــــــ
وصل شهر المـعظّم
وجناح الدنیا اظـلم
یمـهدي عــظّـم الله
لکَ الأجــر ابمـحرم
ــــــــــــــــــــــــــــــــــــــ
یابوصالح..ها وصـل موعد نیاح الغاضریه
یابوصالح..عظم الله اجرک ابدمعة رقیه
یابوصالح..یامکان ابکـربله تنصب عزیه
یابوصالح..بالمـخیّم لوله تـل الزینــبیه
وصل وکــت الــمناحه
علی احسین و جراحه
ســمعــنه مــنک الآه
لکَ الأجــر ابمــحرم
ــــــــــــــــــــــــــــــــــــــ
هذه حالک..کل محـرم دمعتک تصبح رخیصه
هذه حالک..وانته روحک عالحزن دایم حریصه
هذه حالک..أتّاني امک تنشر ابچفها قمیصه
هذه حالک..احسین مذبوح و جرح گلبه خلیصه
تشــم ریــحة دمــائه
اذا تــنــظر ردائه
أبثیابه املطخه أدماه
لکَ الأجــر ابمــحرم
ــــــــــــــــــــــــــــــــــــــ
یل ونینک..یـعله اکثر یم علایم یامصیبه
یل ونینک..للسـبي لو للذبـح لو للنـهیبه
یل ونینک..یستقر یم جثه مسحوگه و خضیبه
یل ونینک..خطوه خطوه یتبع الراحت غریبه
تـضـل بــأبي وأمـي
جروحک کلها تدمي
مـصابک انــته ویّاه
لـکَ الأجـر ابـمحرم
ــــــــــــــــــــــــــــــــــــــ
هیّه صعبه..تدري ماتوا کل هلک بالطف ضمایه
هیّه صعبه..والتراب ایلامس اجسوم الضحایه
هیّه صعبه..المثل ابوفاضل یصیر ابلا رایه
هیّه صعبه..عالنـهر چفـین تـوگع بالبدایه
سهم عینه و چفوفه
الـک تشـرح ظـروفه
من أیده طایح الواه
لـکَ الأجـر ابـمـحرم
ــــــــــــــــــــــــــــــــــــــ
یامصیبه..ماتـوا اشـگد من شبیبة آل هاشـم
یامصیبه.. وین الأکبر طاح جسمه و وین جاسم
یامصیبه..یا طـفل لمّن عطش رد نحره سالم
یامصیبه..مات عبـدالله و هوت کل العـمایم
رجع ظعن العقیله
عله اظهور الهزیله
تنادي الحـره أحّاه
لکَ الأجر ابمـحرم
ــــــــــــــــــــــــــــــــــــــ
کلمات خادم الحسین ع
عبدالامیرالناصري..المحمره
قصیدة:الخدمه
ـــــــــــــــــــــــــــــــــــــــــــــ
هم کبر عمري سنه وجیت الخدمتک
الله لا یحـرمني من واسـع رحمتک
یانصیبي....واحسیناه
یاحبـیبي....واحسیناه
ــــــــــــــــــــــــــــــــــــــــــــــ
کبر عمري و بعدني عایش ابخیرک
کثر شیبي و بعدني ما احب غیرک
ابسجل اعیوني بس تحصل تصاویرک
یمن عطشانه روحي و تروه من بیرک
اشما تمر ایامي یکثر شیبي بالراس
مره اصیـحن یاحسین و مره عباس
حدمشیبي....واحسیناه
یاحبـیـبـي....واحسیناه
ــــــــــــــــــــــــــــــــــــــــــــــ
عنایه امن الله وامک فاطمه و حیدر
یــیوالیــمه ابعزائک هالســنه أحضر
احبن عمري یخـلص و آنه عالمنــبر
ویجیلي ایغمّض اعیوني علي الاکبر
اشگد احب من هالمجالس لا افوتن
کون اگـولن یاحـسین و تالي اموتن
یامجیبي....واحسیناه
یاحبـیبي....واحسیناه
ــــــــــــــــــــــــــــــــــــــــــــــ
الجوارح کلها صاحت سیّدي ابأسمک
و نصبنالک مواکب توگف اتخدمک
عقیــدتنه ابمــجالسـنه تجـی امـک
علیک الزهره لا تحـرمنه من لطمک
ایـدی لو ماتلـطم اعلیـک ابمصـابک
اشلون امدن ایدی یحسین اعله بابک
یا رقـیبي....واحسیناه
یاحبـیبي....واحسیناه
ــــــــــــــــــــــــــــــــــــــــــــــ
رخیص الدم الک یالرخّصت کلشي
تضل غالي ابعیوني و حارسک رمشي
الف نعم الله جدمي اویه الخدم یمشي
الحسـینیه مـزاری و منبـرک نعشي
وین اروحن لو گلت عن خدمتي روح
وین اشوفن واحد ایشبهک بالجروح
یاصحیبي....واحسیناه
یاحبـیبـي....واحسیناه
ــــــــــــــــــــــــــــــــــــــــــــــ
اعیـش ابکل جرح خلینـي و اتألّم
علیک وماأذب حزني وأعیش أبهم
الذبـح نـحرک اکید ابفــعله یتـوهّم
مایـدري ابـگلب کـل حُــر الک مآتم
کل محـرم ترتــفع صیــحة ألمنه
هالله هالله یاشباب انشد حزمنه
کل نحیبي....واحسیناه
یاحبـیبي....واحـسـیناه
ــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري...المحمره
: فزاعیه لاول یوم محرم
للرحیل من الوطن
ـــــــــــــــــــــــــــــ
اشگال گلب ام الخدر
لمن حده حادیها
حمـل ظعـنـها وغـربت
لـدار صـدت وانحـبـت
صاحت ومدمعها یکت
یحـ
سیـن ردنــي لیها
✍️ام ضيغم المحنا
المحنا
┉━━•✿🪬✿•━━┉
وشگال گلب الطاهره
نيران شبت مسعره
تبقه وحيده مرمره
عگب الولي تاليها
✍العلويه ام فاطمه
┉━━•✿🪬✿•━━┉
صاحت ودمعتها تصب
ياخويه ما احمل غرب
هناك موقفنه صعب
هل عايله خليها
ام✍🏻 زين العابدين لمحمداويه
┉━━•✿🪬✿•━━┉
خلي اعيالك يالولي
خافن هناكه ننولي
ودموعنه تصب هاملي
بتك منو يسليها
ام✍🏻 رحمه الگاظميه
┉━━•✿🪬✿•━━┉
گالتله يابعد النظر
ميشوم تدري ابهالسفر
والله الگلب صاير وذر
روحي الحزن غاطيها
✍️ام محمد تقي الموسوي
┉━━•✿🪬✿•━━┉
روحي حزينه ملوعه
الايتام يمي مروعه
وعباس ضل عالمشرعه
واختك منو ياواسيها
✍خادمة العقيلة ام احمد
┉━━•✿🪬✿•━━┉
تـــمـ بعون الله تعالى ـــت
بقلم شاعرات اهل البیت ع
في رابطة دموع العقیله ع
لانجيز حذف الاسماء✋
☘️نسالكم الدعاء☘️
محرم من اجانه نسولف بي لگانه
غيرالخدمه ابدماعدنه موضوع
وجرح گلب الحسين وذيچ الضلوع
تانينه وحسبنه ايام هله بل خدمه والدمعه
اجه شهرالحزن ياناس الماسامع بچي انسمه
كلشي خلص ويگضي ونضل احنه بجرح ننعه
الزهره تحضر المجلس وبديهه تشعل الشمعه
نواسي الزهره واحسين بلطم وبدمعت العين
بضلمتهه نصير الزينب اشموع
وجرح گلب الحسين وذيچ الضلوع
انعم الله ابكل سنه مولاي ارزقتنه نبچي لخيامك
السنه ايامهه ابلا لون الحلوه بيهه ايامك
ابداعت بنتك ارقيه تسجلنه احنه خدامك
يل طايح عله التربان بصدرك ضلت اسهامك
كل عام اليمرنه الك ننذر عمرنه
عله نار الخيام الگلب موجوع
وجرح گلب الحسين وذيچ الضلوع
نشم ريحت محرم اه ووعله الدمعات نتلاگه
نترك كلشي مانهتم المجلس يكتل افراگه
الخدم من كل گلبهه تصيح لمحرم والله مشتاگه
يهضمنه السبي وضيمه الشماته وصعدت الناگه
اعله فطرتنه بچينه وغيرك مالگينه
وماتخلص عله المذبوح الدموع
وجرح گلب الحسين وذيچ الضلوع
خدمتك نعمه من الله النعمه اتريد اليقدر
حسين المايقصر ليش بقليل اشياء اله انقصر
طايح والخيام اطيح وبناته ابموقف يحير
اضلوعه انطحنت اويه الگاع اعله جثته عيلته ادور
ابعزائه تصفه الگلوب رداء الغالي مسلوب
بلرماح اخو زينب راسه مرفوع
وجرح گلب الحسين وذيچ الضلوع
عطش بس ماقبل نعطش شفافه ابحسرت الگطره
وموتت طفله بحضانه روه عبدالله من نحره
اشصار ابحالتك مولاي گلبك ياكبر صبره
نلطملك عمر ونوح ماتكفينه بس عشره
الحزن بين بلجفون دمع نبچيلك اعيون
الحبك تلكه گلبه اعليك مفجوع
وجرح گلب الحسين وذيچ الضلوع
سلام البهادلي
بصوت. مسلم المطيري
چم محنه شفت ياسيدي الباقر
كلمات الشاعر
حسن لعيبي الحريشاوي
برنامج محرم الحرام 1446 هـ
قصيدة زيارة الحسين ع (6)
اللهم ارزقني في الدنيا زيارة الحسين
وارزقني في الاخره شفاعة الحسين
ربي اجمع مابيني ومابين الحسين
يارب الحسين. يارب الحسين
……
إبتهالاتي ودعائي و دمعتي
جيتك وشايلهن بچف خدمتي
والله سفره من العمر لمن اجيك
ليلة الجمعه شحلات زيارتي
كل صاحب يكثر جيته يملونه ربعه
بكل جيه تگلي ياهلا البعيونه دمعه
ثمن بيبان الك ويه الكمر مفتوحه تسعه
اللهم اكتبني وارزقني خدامة الحسين
اللهم اجعلني منظوراً بحرمة الحسين
ربي اجمع مابيني ومابين الحسين
يارب الحسين.
…….
وصل لانفاسي عطر من حضرتك
وهيّج بكلبي عشك لزيارتك
اعقد النيه واجي اشتم هواك
راحه نفسيه من اشوفن كبتك
ياصاحب ابد عن صاحبه لا مايجافي
رغم اني اجي مذنب واقدم اعترافي
هنياله اليموت بحضرتك موت العوافي
اللهم اختم لي انفاسي بحضرة الحسين
ياربي ياربي ياربي بمنحر الحسين
ربي اجمع مابيني ومابين الحسين
يارب الحسين.
…………
ماترد سائل واعرفك من اجيك
بحاجتي من اجي واوكف بين اديك
كبل ما احچي البكلبي تكلي هاك
ياسلام الله وملائكته عليك
يل مثل الابو للخادم بأبنه اهتمامه
أديت القسم خادم ولا عوف الخدامه
يا امن يجيب المضطر بيوم القيامه
اللهم الحقني في حشري بصحبة الحسين
واجعلني مسرورا ياربي برؤية الحسين
ربي اجمع مابيني ومابين الحسين
يارب الحسين.
…………..
غابه كلبي ومن دخل حبك اكيد
مملكة حب صار يحسين الشهيد
من اموت بصفنتي واسمع حسين
اصحه بسمك وارد ميت من جديد
ياسادس فرض يابو علي يا احله طاعه
ارزقني خدمتك اربعه وعشرين ساعه
بلساني يمر اسمك واحس طعم الشفاعه
اللهم احفظني من نفسي بغربة الحسين
واهديني في الدنيا وجاهة الحسين
ربي اجمع مابيني ومابين الحسين
يارب الحسين
………
زيارتي عندك امانه يالحبيب
ياحسين ولو صبح موتي قريب
الكبر غربه ولا عرف الكالي غاد
سيدي وحگ الغريب اعله الغريب
اتلفت اظل لامن اهل لا اخوه يمي
بس عندي امل انته تجي وتنادي بسمي
ادخيلك يابو الاكبر لوصحت بأبي وامي
اللهم اوزعني ان اشكر مواقف الحسين
اللهم ارحمني واشملني برحمة الحسين
ربي اجمع مابيني ومابين الحسين
يارب الحسين
……..
حسين صادق العقابي
ليلة العليله
.
.
.
اشبگني حيل / خلـي راسـي عله صدرك
اشبگني حيل / خاف ماشــم بعد عطرك
تگلي انطري شلون اناطر
وعطرك اتــدوره الحوافر
بويه بويه
***
حنيـــنه وهاجـت الحنيـه نــص الليل
عليـــله وجيت اجر بالويــل والياويل
اشتاگيت ارد اشم صدرك الچنه الهيل
خـافن باچــر اتطـشره يبـــويه الخيل
الخيل هناك صلفه .. وضـلوعك بويه ترفه
الخــياله يـدورون .. المــكان البيــه اغــفه
اشبكني حيل / الليله اخر ليله اشبگك
اشبكني حيل / وادري سالفتي تخنگك
تروح ويضل فكري حاير
وعطرك اتدوره الحـوافر
بويه بويه
***
اتريد اتروح والمعــلوله تتحسر
يَـمبخر بيتنه ونضل بــلا مبخر
بلا عرضــه يبــويه لـون تـتأخر
أخافن على صدرك بويه يتكسر
بالطف كلشي ينداس .. الناس هناك مو ناس
طبيـــعـية يــگـــولون .. عـدهم كطعة الراس
اشبگني حيل / وبعد ماتحچي وصيتك
اشبگني حيل / ارد اشــم بويه لحــيتك
گلبي مثل الجمره صاير
وعطرك اتدوره الحوافر
بويه بويه
***
اناطر بويـه عادي جــداً وما هم
بس كون بشرط ترجع الي سالم
تطــمع بيك خاف بـكربله الوادم
اذا شـافوك بــويه عالتــرب نايم
بنحرك تغفه الاسهام .. بمكان بنيتك اتنام
ادعيلي بويه بالموت .. ولا ابقـه الـهالايام
اشبكني حيل / اشبكني وانته بشوگي تعرف
اشبكني حيل / وشوفني شگــد بـويه ارجف
فـــدوه بـــويه لاتـــسافر
وعطرك اتــدوره الحوافر
بويه بويه
***
بديني اعله صدرك شوگ بديني
ونــداوه الكـربله ويــاك وديــني
بلكت لو عطش ثغـرك تــلاگيني
اصيــرنلك عذب وي ماتــناديني
اذا ماصيـــرلك مـــاي .. اصــيرن بلكت فياي
الشمس خافن تأذيك .. وانته جروحك هواي
اشبكني حيل .. يالوداعك بويه شده
اشبكني حيل .. شبــكت المـا أله رده
بهالشــعور وهالمـشـاعر
وعطرك اتدوره الحوافر
بويه بويه
***
الزغيره بعمري بويه امـرار تحچي كـبار
خصوصاً لو حـچت بالفرگة تحچي بنار
گـــتلي بــــدارنه ابقـي وباقيـــه بــالدار
يبـــو الخاطر باچــر شـــحچـي للخـطار
تجري بساع الدموع .. وتچوي بويه الضلوع
واگولن صعبه للنـاس .. راس الابـــو مگطوع
اشبكني حيل .. شــبگــت بـــنيه زغيره
اشبكني حيل .. وتلچم الشبگة الاخيره
اتطشــرت هـاي النواظر
وعطرك اتدوره الحوافر
بويه بويه
***
حيدر تركي الكربلائي
ليلة العليله
.
.
.
اليعيش ابلا هله العمر بالنسبه اله
كأنه كربله
كأنه كربله
***
بتكم زغيره معلعله وحيل المـرض باليها
النسمه الذي بيـها تـمر تلچـــــمها وتأذيها
ماگول ناســــيها لان مااعتـــــقد ناسـيها
چاليش يااهل الرحم مستوحشه مخليها
عشت عيشة جرح وكــع فوگه ملــح
بمسير القافله
كـــأنه كــربله
***
العنده مريض بهالوضع لابــد يأجـــــل السفره
وحالة مريضتكم هلي تــــــــدرون بيها خطره
ساعة هجركم للذبح من رحتــو ساعه الكشره
بوجوهكم اقره الحچي وتهمل دموعي الحمره
على وجهي طحت وراكم من صحت
فراق العايله
كـــأنه كربله
***
بطف كربله يهلي الخطر جاي انا احسه زياده
گالولي اكو هناك شمر يكـــــطع بروس الساده
من رحتو يهلي بهالســـفر گلبـــــي وراكم ناده
والدي بــــس لا هالثـــره حدره يصير اوساده
ذبح خدي البچي وخلص كل الحچي
كلامي اوله
كأنه كربله
***
گوطر ضعنهم والضـــــعن فت گلبي من اتعده
وي ما شلت ايدي الحزن كله اعله وجهي تبده
النوگ الــــــتروح الكربـله مابيـــــها يمـكن رده
ويلاه والراحــــو هله تحفر ادمـــــــوعه بخده
الهجر لمن يهب سبي هم ينحسب
كلامي اتأمله
كـأنــه كربلـه
***
ياوجعة افراگ الاهل ماتنـــــــــحمل چتاله
الفارگ بخت اهل البخت فارگ جميع اماله
الضيع اخو چنه البدر هم حــــــرمله بدلاله
شيصبره والماعنده اهل كل مغــربيه اكباله
بدون اهل الشيم صرت متروسه هم
العمر وبأكمله
كـــأنه كــربله
***
حيدر تركي الكربلائي
تسافر من دوني... يانور عيوني
بغيابك اني... يتغير لوني
............
تكسر ضهري واكسر ضهرك وگلبك مايرتاح اعليه
رايح ماخذ كل اعيالك وعايفلك بالدار ابنيه
هواي اشتاك الشوفت عينك روحي اعليك تضل مجويه
اشتم انفاسي بحنيتك وين الكه بهاي الحنيه
جنت انه اتصور.... كدامك اكبر
ويمك تلكاني.... شمحلاته المنضر
.....................
يادمعه تفيد وابجيهه من ماشوفنك كدامي
يابويه ومن بعد عيونك ليل ايصيرن كل ايامي
تسافر من حضنك تحرمني وبس بحضنك انه أحلامي
بشوفت عينك بويه اتعافه وتخمد يمك نار الأمي
ياخيمت روحي... شيطيب اجروحي
واعليك احزاني... ومايبرد نوحي
...................
تمشي واني بطرك ادموعي ولااخوه اليمي تسليني
ماخذهم كلهم يالغالي جاالمن بويه مخليني
فدوه العينك وياك امشي فراكك والعله تأذيني
ماريدن كلشي امن الدنيه بويه وبس صوتك يشفيني
وين تخليني... يانور اسنيني
البيت الرباني .... مايحله بعيني
....................
خليني امشي كبال عيونك وشوف شلون امشي ومااتعب
يابويه وضحكت عبدالله. لو عفتوني هواي اتعذب
من يطلع ضعنك كدامي تطلع روحي وداعت زينب
مااتحمل كسر الخاطر وفركاكم يلجمني وانحب
من تودعني... ماينشف جفني
ايضل گلبي متاني... بهمومي وحزني
...................
راح اتنطر انه وجرحي جرح الغربه اليكسر ضهري
الله يصبرني اعله غيابك وشلون اتحمل ماادري
لو غابت عينك عن عيني فدوه العمرك شلي بعمري
صحتي وعافيتي واحلامي وياك ايروحن ياذخري
گلبي شما صله... ادعيلك الله
سالم تلفاني.... انته وعبد الله
محمد هادي العقابي