7626
خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
حاچيني ياوجه الصبح .. شيسوي راسك عالرمح
مالايگ اعليك الذبح
ياخويه ياخويه
*
ينور الله ويوجـه العافــيه اليزهر
چنت البارحه مورد وهسه اصفر
اگعـد مو وكت نومك يــبو الاكبر
مروتك حاچي زينب كونك تگدر
أتبــده گــدامك حچي .. بلكت يصحيك البچي
وعينك عليه تنفحت
ياخويه ياخويه
***
ها يا من ضوه الله بجــبهتك شايل
اول تالــي وجــهـك يالاخـــو ذابل
الدم من منحرك فوگ الرمح سايل
يالـكامل اشــو مابــيك شـــي كامل
بخدك اثر حافر فرس .. والدم على الحيتك يبس
مابيك شي مامنجرح
ياخويه ياخويه
***
شفتك من عــسن ميـــته ولاشفتك
من گـــد العطـش متفـــطره شفتك
يالمتــرب يالمــدمه يبـــعد اخــتك
تره اني البارحه موهيچ من عفتك
شو مو على بعضك احس .. مغيرتك هواي الشمس
ماصدگت عني تشح
ياخويه ياخويه
***
استذكرت السوالف ونچفت عيني
احتـرگت اگــبالك ومحد يطفــيني
اذا متعوب لو بـس كلمة حاچـيني
انه زينــب انچــانك انــته ناسيني
خلي السوالف بالنظر .. لاينلجم جرح الحجر
وتدري بحچي زينب ملح
ياخويه ياخويه
***
يوجه العافيــه الچنــك ضـوه المصباح
اليصــبح بيك مــوش ايصــبح ابــذباح
جابوني لعــد رمحــك ضرب وصياح
طحت وي ماشفت راسك ياخويه طاح
شميته نحرك وشهگت .. حاچيني ياخويه صحت
من اختك اتهدم صرح
ياخويه ياخويه
***
دورت الشمس ولگيــتك اگــبالي
مدري شلون ناشو راسك العالي
السيف الحـز رگبــتك ذبح دلالي
يغــالي ومابقــالي بدنيــتي غالي
براسك رمحهم من نبت .. اختك يابو اليمه انتهت
محنيه مكسورة جنح
ياخويه ياخويه
*
حيدر تركي الكربلائي
لليلة الحادي عشر 💔 #اساسية
بيش المّــك ... عندي بس هاي العبايه الساترتني
وين اضمك ... خاف لو غطيك بيها تشوف متني
شلون ألمك وأنت كل وصله بكتر
وبيش اشيلك وانـه هد حليلي الشمر
كون اراويك السياط الكاتلتني
ــــــــــــــــــــــــــــــــــــــ
جيت ونده وين اخوي الدلل اختـه ارد اسولفله علـى الضيم الجرعتــــه
وين وجهه اوين مكَفـاه ماعرفتــه لاعبــات الخيــل ميـدان اعلـى جثتــه
كل شي مابي ينعرف بلكَـوه شفته بس عرفته حسين من عطره وشبكَته
عمت عيني مكَطع وصاير وذر
شمــالهــم ماخلــو لجسمك اثــر
ريتـهــــا ويــاك الحــوافــر وذرتنـــي
ــــــــــــــــــــــــــــــــــــــ
شلون ألمك وأنت كل وصله بنويه
ومخاذات ضلوعك خيول ال اميـه
منيـن مـــا اشيلنــك اطيــح منـديــه
بلّــه كَلــي شلــون اراويـك لرقيــه
نيمتهــا وجيتــك ومـاتـــدري بيـــه وهســــه يمكـن طلعت ادور عليــه
الدمع شكَ خدودها الجانت ورد
وسكتتهــا بجلمـة الهلبت يــــرد
يــــابعــــد كَلبــي ابنـاتك حيرتنــــي
ــــــــــــــــــــــــــــــــــــــ
شيبت راسي شكثر تنشدنــي عنك
ويـــن مااوديهــا تشتــم ريحـه منـك
شرد اكَلها الخيل بالطف طشرنك
ومـدري يـاصوب بحوافرهن خـذك
حتـى يــم خيمتهـا يمكـن وصلنّك
جنه نسمع صوتهن من رضرضنك
تنشــد شمــا ينكسـر منـك ضلــع
عمه ليش منسمع الصوت انوجع
وشيبــت راس الكَـلب مــن نــاشدتـنــي
ــــــــــــــــــــــــــــــــــــــ
خويـه بنتك كَلبت الدنيــا ابحـزنهـا
فات وكت المغرب وفكَدت حظنها
مدري ياهو الجر تراجيهـا منذنهـا
ومـدري ياهو الطاكَهه وورم جفها
حتى فوكَ جفوفها احتركَت ردنهـا
وساحكَه برجليها فوكَ النار اضنها
خويه كسرة كَلبي ملجومه وتون
ذابلـه وحاجبهـا طـايـح ع الجفـن
حسيــن بتـك هدمت حيلي وعمتنــي
ــــــــــــــــــــــــــــــــــــــ
والمهـم يحسيـن بنتــك سكتتـهــــا ونايمه اعلى رماد المخيم عفتهــا
وجيت الم اوصالك وماوجــدتهــا وصله منـك يم علي الاكبرشفتهــا
ووحـده يمكن يم ابوفاضل جستها دنكَت بس مالــي حيـل ومـاشلتهـا
شفت يمها جفوف عباس وطحت
عفيـه ظلت روح بيـــه ومــامتت
ظالــه المن مــامتت مــن ودعتـنـــي
ــــــــــــــــــــــــــــــــــــــ
خنصرك مـكَطوع لــو مشتبهه آنــه الكَص اصبعك ريته لايهنه بزمانه
ويـــن حطه وليش مــارده لمجـانـه شفتـــه لابس محبسك مــن سلبـانـه
وفـوكَ مـاسلبنه طكَنـه وشتمانــه
وين مـارحنـه النذل يفتـر ورانـه
مـاكفــاه جدامنـه الشعبت حـركَ
بلايه وجعت كَلب يتوجه ويطكَ
سلبتـك نفس الجفــــوف السلبـتنـي
ــــــــــــــــــــــــــــــــــــــ
بيش ألمك عندي بس هاي العبـايـه
وآنه محتــازتها بــاجــر للسبـايـه
كَلت اغطيك بعلم ساجي الضمايــه
اتعـذر العبـاس هـم مـاعنده رايــه
والله هدت حيلي يحسين الرزايــــه
خويه نار وخيل ومصايح ردايــه
خويه اجيتك كَوه اجرن بالجدم
حتــى مــابيــاش اردن للخيــم
عفيـه خـوش اجدام عنـدي وشـايلتنــي
رائد الناشي
واويلاه يبن امي. واويلاه يبن امي
وحدي وابن امي رميه صعبه مابين الغرب
الهظمه من شافوني وحدي. امشي واعثر بالدرب
################
يوم حرگوه المخيم. العسكر بلايه رحم
حاله ماتوصف عجيبه وحته جبريل انهظم
أظلمت الدنيه عليه. وجسمي باللوعه الظم
حيره كلهه تصيح زينب. موقف ايدوهن صعب
##############
طولي شافته العساكر. ونار بحشاي اشتعل
مرامه العيون الجرحني. وأبد ماخله أمل
ومن وصلت حسين اخيي. راسه عن جسمه انفصل
من كثر عظم المصايب چا وكع يمه الگلب
###############
مو كسر واحد انظره. دلوعه كلهه مكسره
عله كبر الغاضريه نعمة الله مطشره
چفوفه مگطوعه ابواليمه. ويلي حته خنصره
يانفس طه محمد. دمه يجري عله الترب
##############
اه يارمح ابن كاهن. المنه دلالي انفطر
من مرد ثلثين چبده وطلع ويلي من الظهر
وصدره متساوي ويه ضهره. بيه چم حافر عثر
اخذ كل حيلي ابو الأكبر. ودمعي من حگه يصب
##############
الناس داست نعمة الله. احساس مابيهه انعدم
الدنيا مطرت دم لجلنه وحيل الاسلام انهدم
عاينت روح الزچيه. كلشي منه ماسلم
والحرم ويه اليتامه. ياوسف شبعو ضرب
###############
الخادم عبدالمعين الشمري
قصيدة ثگيلة لسان حال زينب ع تكلم جسد الحسين ع ليلة الوحشة
.........................
خويه نام
ريته يا نوم العوافي
خويه نام
بالگلب ضل جرحي دافي
خويه نام
و الدمع عالوجنه صافي
💔💔💔
نام خويه اعلة الترابه اشبيدي اعليك
لا راس عندك يالولي واگعد واحاجيك
عمية عيني و حايره بيمن اغطيك
امسلبيك الگوم حتى محبس ايديك
خويه نام
عسن هالنومة هنية
خويه نام
جيت اون يمك اشوية
خويه نام
و اللمن اوصالك بدية
💔
جيت الم الطشراه الخيل منك
وجيت محتامة يخويه ارد اشمك
شلون يحسين ارتوي لو ما احظنك
عطش گلبي ابساع بس خافن الجمك
خويه نام
گوة خل يصبر دليلي
خويه نام
لا تهم يا بعد حيلي
خويه نام
امصيبتك هضمتني ويلي
💔
نام يا نوم العوافي و اني اسهر
وحشة هالليلة علية شلون اصبر
و گلبي ابنومتك خويه حيل يسعر
و حالها النسوان ضلت حيل تقهر
خويه نام
و لا تهم يمي العلاوي
خويه نام
شبعن اهموم و بلاوي
خويه نام
راسي من البجي خاوي
💔
خاوية اوداعت اعيونه ما الي حيل
الخاطر الخوة اجيتك خوية بليل
حن دليلي و ردت يمك دمعتي اتسيل
اشكي ضيمي و انظر شسوتلك الخيل
خويه نام
بلكي من الألم تهدة
خويه نام
و الشمر لو هد اردة
خويه نام
شدتي ما منها شدة
💔
شدتي صعبة و عليها شادة احزام
عيني اوداعة اعيونك ابد متنام
شلون تغفة اعيوني ضاعو مني الايتام
و بيهن التبجي ابوجعها لا متنلام
خويه نام
اعذرني خليني اگومن
خويه نام
بالفلة ابجي و احومن
خويه نام
من الصبح باجر اروحن
-------------------------------------------------------
*بقلم خادمة اهل البيت ع ✍آلــشــا؏ـرة رغــد ام وسام*
ذمة عدم حذف الاسم وغير مبرئ الذمة كل من ياخذ من الكلام وينسبه له
اليوم زينب تحتار هاي المسيه
تروح مسبيه شلون وي ال اميه
اليوم زينب تحتار وتون حزينه
تشوف عباس شلون گطعو يمينه
اتصيح وبعالي الصوت رايح ولينه
وراح عنه العباس بلغاظريه
شلون اصبر وحسين حدر الحوافر
وانه بجفوفي حبال عنكم وسافر
ريت لا جه عاشور لاشفنه عاشر
ولا شفت هذا الصار والمر عليه
لاعدي خيمه ولا دار لاعدي خوه
اليوم بجفوفي حبالي مشوني كوه
ولجمر لو تدرون جا شنهو سوه
يجوي بجدامي وحيف افرك بديه
تكول يم جف عباس جابوني اشوفه
اتحسرت فوك الكاع وشلون اعوفه
من شفت سهم العين صابتني خوفه
ايست كلت الراح لا ماله اجيه
ايست من عباس راحت جربته
شفته جثه عله الكاع بس ماوصلته
كلت مايدري الصار من شتمو اخته
تمنت وياه الموت بطف سويه
ابو سلام الجابري
ليلة الوحشه
جبت الليل ادور عالولد وين
تعّبـنـي ولـگـيته يمك حسين
وحشة ليل والخوف
يمك واصل ازحوف
++++++++++++
يحسين انه مو للماي الك عطشانه انته
جابولي وشفت بالماي عبد الله ونبلته
مد إيده صحت عطشان؟لا هز راسه شفته
يمه الحظنج اشتاگيت حاچاني وسمعته
ظلمه الليل امشي واسأل الليل
ماشايف ولد گد حافر الخيل
فوگه اكماطه ملفوف
يمك واصل ازحوف
+++++++++
وره الخيمه وخيمنه ارماد شألگه وهيه ظلمه
بيـن الدخنه والعطاب مهده شلون المه
ضعيفه نبرة العطشان سمعته اهنا ييمه
جيت اعله اتجاه الصوت عطرك گمت اشمه
يحسين الولد يم مصرعك جاك
كل هاي المسافه اشوصله هناك
عينه گدرت اتشوف
يمك واصل زحوفه
+++++++++++
بطريقي ولن هدم بلگاع مامسلوب بعده
ماخذته الحوافر غاد الجسمك گلت ارده
رفعته وكله دم وتراب والمفتوك اشده
انترس عگدات صار زغير جسمك ماهو گده
يحسين اعله جسمك ماظن ايصير
لكن هـم لگيتك صايـر ازغـير
كلشي البيك مكشوف
يمك واصل ازحوف
++++++++++
عبد الله اعله صدرك نام من مديت اديه
ارفعه وماقبل ينشال صوته ايرد عليه
يمه الحضنچ اشتاگيت بس هاي الزچيه
شبگتني اويه جسم حسين جاي اتلولي اليه
دللول الولد بحوالك اشصار
گلبك حار يمه والرمل حار
حالك ماهو معروف
يمك واصل زحوف
++++++++++
زينب هل اجت يحسين تمشي بالمعاره
صاحت وينج بهالليل تعبتني الدواره
نيتج ابنج اترويه ماكو بنحره چاره
ساعه ارتاحي والمصباح عالهزل اساره
ماعدنه وكت خيط الفجر لاح
منّـه ايسي ما يرجـع الـراح
وراچ احبال الاچفوف
يمك واصل ازحوف
ثائر الربيعي
المنشد والملحن علاء الفهد
نعي ليلة الحادي عشر ( الوحشة )
وحدة السيدة زينب سلام الله عليها
بقت زينب وحيده وما بقه وياها
بس الليل يمها ورافگ إعداها
—————————
إشوحشه الليل لو چان الظلام يسود
وعجت خيل وصياح وسلب وجنود
تنطر بت علي باچر نهار إيعود
الشمس باچر هزل تطلع مع إضواها
—————————-
الشمس باچر مظلمه وما يبين إشعاع
خجلانه الشمس باچر تصد ع الگاع
تحامي زينب تريد وخدرها الضاع
وما تدري الخدر ما لحظه عافاها
————————-
الخدر باقي وي زينب هذا واقع حال
لچن منهو الحماها بليل ذاك الطال
جيش عيال ومرعوبه بعد لعيال
يا مگوه صبرها شعظم تقواها
————————-
رغم ذاك الجرى وكل اللفه عليها
ولا خيمه البگت للعيله تأويها
ما غمض جفنها بليل تدريها
تحرس بالحرم وإهيه بمصلاها
————————-
تِحرس والحراسه تريد واعي يدور
وعارف كل مچانه شرط بناطور
غريبه بت علي أبعاد الأهل ودور
وما تدري الطلابه منين ملفاها
————————
فزعه تفازعن مدري الخلاص منين
اعله بت حيدر تلافن چن يطلبن دَين
هذا بسوط ، شامت ، وأدها صد العين
الأمضه من الضرب وأكثرهن أذاها
الشاعر: أبو زينب الظالمي
المنشد والملحن علاء الفهد
نجفية (ليلة العاشر)
#ثكيل كعديه
اخر ليلة وي اهل الشهامه ..باجر ياعلي كلها يتامه
. باجر يبو الحسنين ..... دنيه بدون الحسين
. باجر ياعلي كلها يتامة
****
...............
ياعلي برهبة العاشر ...... وبرعب هاي المسية
ليك متوجه واريدك ...... تحظر ارض الغاضرية
كلبي ياكرار خايف ..........والحزن خيم علية
هاليلة اخر ليلة الي .... وي اخوتي وتالي هلي
احضرني بوية ياعلي...... باجر فراك ومنية
. باجر بس رعب ياحيدر وخوف
. باجر ماكو في بس في السيوف
وكل مااديرن العين..... دنيه بدون الحسين
****
ويلي من ليل الموادع .......كله حسرات ومدامع
وشاهدت يابوية منظر ...... هيج بكلبي المواجع
حسين لم العيله كلها ....... موادع الميت يوادع
ومن عينه تجري دمعته ... وكامت رقية وحضنته
وشمته بنحره وسالته ... وكون هيه شحجت سامع
.. روحي ويه روحك ياضوه العين
. تدري معلكه يابوية يحسين
وين انطي الوجه وين .... دنيا بدون الحسين
**
بعيني اصد اهله وصحبته ..... باجر بدمهاخضيبة
وعالتراب اكبالي اشاهد .... ياعلي صرعه الشبيبة
الاكبر وجاسم ضحاية .......وليله وي رمله غريبة
يابو الحسن خوف ورعب ... شبان باجر عالترب
النسوان ياحيدر غرب ... والاشد من هالمصيبة
. باجر من يظل حسين محتار
. وكلها اعله التراب ازغار وكبار
وتلتم عليه صوبين..... دنيه بدون الحسين
*
بويه بعيوني اشاهد ......باجر مصيبة العاشر
وانظر بعيني لااخيي...... الوحدة بكربله حاير
يلتفت يمنه ويسارة ..........لامعين ولامناصر
اصحابه واهله اعله الثرة ... مثل الضحاية مطشرة
بس واحد الي يناصره .... بالمهد ويصيح حاظر
. عبدالله ينادي بصوت وياك
. مايسوه العمر والله بلياك
وابكه بين نارين ...... دنيه بدون الحسين
***
للحجر بعيوني اشاهد ......باجر يصوبه بجبهته
وسهم المثلث اشوفه ........ تنجسم منه جبدته
والشمر كدام عيني ........ بسيفه من يحز ركبته
وشاعظم بعد من هالجرح .. كدامي اخيي ينذبح
وراسه يرفعوه عالرمح...وتسحك الخيل اعله جثته
. لو جاني قميصه بحافر الخيل
. اصرخ ياعلي ياحامي الدخيل
وصلوا للصواوين ...... دنيه بدون الحسين
****
. المصيبة
ريت يابالحسن باجر ......... لالفه ولامر علينه
الخيم بالنار تسعر ......وحرم نبكة بلا ولينه
للسبي اسمع يحيدر ...... من يصيح الحادي بينه
. . لاوالي باجر لاخيم
. و درب السبي ضعن الحرم
. وجم شده اشوف وجم الم
لليسر تالي حرمكم .....والشمر حادي المسيرة
الشاعر سيد اياد الغالبي
•••~•••(•«﷽»•)•••~•••
"اللهم عجل لوليك المنتقم الفرج"
فزاعي ليلة العاشر... الوداع
مولاتنا زينب ص
بحيرته ماكو ابنادم احتار😭💔
وشلون اوداع... يخواني تودعوني
چا هيچ بساع.. لــوّحيدي تخلوني
ـــــــــــــــــــــــــــــــ
يخوتي بطيف عمري لو خلص يقضه
اميرتكم وحيده اتضل منــــو اليرضه
احس گلبي عليكم هل سكت نـــبضه
هيچ الموت صـــــــاير كلمن اوحـضه
باچر لو صار... بالهيمه يرگضوني
وشلون اوداع... يخواني تودعوني
ـــــــــــــــــــــــــــــــــ
لتميتــــو وكعــــــدتو كلكم ابـــخيمه
بطاري اوداع تحچو. والـــــدمع غيمه
مشابگ صــــــار كلمن سولف ابضيمه
مـو خـــوف الــذبحني والله الهضيمه
اتمنه ابـساع... الموت ولايشوفوني
وشلون اوداع... يخواني تـودعوني
ــــــــــــــــــــــــــــــــــــــ
عدو الـــــوداع هذه الليل ســــــاعاته
كل لحظه التــــمر تچوّيني جــــمراته
اگولن لـــــــيش وكتي ضدي فــزعاته
خـــلاني غــريبه ابوسط شـــــــــماته
باچر يا حيف... عالــهزّل يصعدوني
وشلون اوداع... يخواني تـودعوني
ـــــــــــــــــــــــــــــــــــــــــ
يليل اشبيك طـــــــول خل اودعـــهم
حچي الينگال اخـــوتي أرد اعـــاتبهم
كل عمري الگضيته عايشه ابــــسدهم
باچر وين اروح امهـــلني انـــــشدنهم
مامش فـــزاع...لو رادو يــــطگوني
وشلون اوداع... يخواني تـودعوني
ـــــــــــــــــــــــــــــــــــــــــــــ
افتر بالخيـــــــــم واجذب الف الحسره
اجيت الخيمة ابن امي گعـــــــدت كتره
طول بطول احظنه وگمت اشـــم نحره
فراگ احسين يصـعب حيـل ما گـــــدره
گبالي يذبحوا.... وانه بعرجه يسبوني
وشـــلون اوداع... يخواني تـودعوني
ـــــــــــــــــــــــــــــــــــــــــــــ
تمت بفضلهم ص
✍️ياسر الزيادي
لحن واداء
الرادود الحسيني ابوجليل الدردوشي
مجلس العاشر
قصيدة ليلة العاشر
خادمكم عبدالهادي العريفاوي
ياليل الاوداع والعيله حزنانه
ضاع الخدر ضاع والدمعه عنوانه
زينب والايتام بالفاجعه تنام والعيله حزنانه
--------------------------------
النوايب عالعقيله الليله تحملها
والباري بطفوفه بأمره نزلها
صبرج عالنوايب منهو يحملها
وكل هاي الشدايد ربج يحلها
ياليل الاخطار طف كربله يشهد
واليسمع اخبار دلاله يتمررد
يحركون الخيام بالفاجعه تنام
والعيله حزنانه
-----------------------------
اخوج بكربله من ينكطع نحره
وعله صوب الشريعه جفوف متوذره
محتاره العقيله وشابجه العشره
ونيران الخيام بكربله اموجره
بالحومه وتصيح وين الكفل وينه
ويجاوب الريح مكطوعه جفينه
يادهري وشظام بالفاجعه تنام
والعيله حزنانه
------------------------------
زينب بالطفوفه بحسره مالومه
وعيالك عكب عيناك مهظومه
وبعاشر طفوفك واضحه اعلومه
نايم ياولينه ومو محل نومه
نسمع الك صوت من نحرك المذبوح
سولفلك الموت لرب العلى تروح
ويسبونه للشام بالفاجعه تنام
والعيله حزنانه
------------------------------
مااكدر يخوتي انكل اجدامي
واشوف حسين اخوي المنذبح ظامي
ويم صوب الشريعه زادت الالامي
نوبه اكصد عليهم نوبه ليتامي
اكعد يالحسين الحره مسبيه
للكوفه ماشين من يفزع اعليه
وادور الأيام بالفاجعه تنام
والعيله حزنانه
---------------------------------
لراضي الشام امشي وتدري بي حالي
مامرت يخويه وخطرت أبالي
راسك عالرمح ياخويه يبرالي
نوبه انظر عليك ونوبه لعيالي
فوك الرمح صاح نحرك يبو اليمه
ليك الكلب راح واحزاني ملتمه
كل جسمك اسهام بالفاجعه تنام
والعيله حزنانه
قصيدة ليلة الوداع
خادمكم عبدالهادي العريفاوي
هالليله حسين مودعينه
يوم العاشر من يحمينه
-------------------------
من يوكع باجر واليها
زينب شنهو اليجري اعليها
اخته وبعياله يوصيها
بالحسرات وتسجب عينه
-----------------------
لو اصبح باجر يالحرره
ساعات اعله كليبج مرره
يوم العاشر واضح شرره
والموقف باجر ياذينه
------------------------
برض الطف وحدي تخلوني
باجر يطفن نور عيوني
واعداك خلافك يسبوني
من ديره لديره تودينه
----------------------------
يازينب عينج ليتامج
باجر لو حركوها خيامج
مسبيه وياطول ايامج
وحتى السجاد مكيدينه
-------------------------
تكله الكافل شنهو اخباره
تسأل والمدمع يتجاره
زينب برض الطف محتاره
صبرج زينب الله يعينه
-----------------------------
والكافل مايرجع جوده
مكطوعات ثنين زنوده
واعداج التوصل لحدوده
وتنادين الكافل وينه
-------‐---------------------
ياويلي العامود براسه
يندب زينب كل احساسه
والحسره بآخر انفاسه
يم صوب الشاطي تودعينه
-----------------------
يختي وخيل ادوس بصدري
يعينج الله بكطعة نحري
باجر من يتطشر خدري
يازينب ونتي تبارينه
يوم العاشر من يحمينه
---------------------'------------------
في ليلة الوداع للإمام الحسين عليه السلام
◼️◼️◼️◼️◼️
الوداع الوداع يبوالاكبر. الوداع
الوداع الوداع يبوالاكبر. الوداع
◼️◼️◼️◼️◼️
خويه هالليله الاخيره .. .الوداع
فركتك صعبه وكسيره .. الوداع
وين هاشم والعشيره. ... .الوداع
الوداع الوداع. يبوالاكبر. الوداع
✍🏻سلمى أم جعفر
◼️◼️◼️◼️◼️
ريت ليلتنه طويله ... الوداع
لا صبح نوره يهيله .. الوداع
الليله نسمع بس عويله... الوداع
الوداع الوداع..يبو الاكبر الوداع
✍ام اسعد الشمري
◾◾◾◾◾◾
ياغريب الغاظريه... الوداع
ياعزيز امي الزجيه.. الوداع
من الصبح امشي سبيه.. الوداع
الوداع الوداع.. يبو الأكبر الوداع
✍️العلويه أم منصور
◾◾◾◾◾◾
آه يبن حيدر علي الوداع
فدوه الطول الولي الوداع
عيالك وإني انولي الوداع
الوداع الوداع يبو الأكبر الوداع
✍️ام كرار مناذره
◾◾◾◾◾◾
يالحنين شلون بيه. الوداع
لو رحت من بين اديه . الوداع
وابقى بارض الغاضريه. الوداع
الوداع الوداع يبو الأكبر الوداع
✍️ام علي الموسوي
◾◾◾◾◾◾
خلي اودعك ياخليلي الوداع
ياعمد بيتي ودليلي. الوداع
ريت كون يطول ليلي الوداع
الوداع الوداع يبو الأكبر. الوداع
ام ✍️ علي الموسوي
◾◾◾◾◾◾◾◾
تمت بفضل الله وعونه بأقلام خادمات الحسين في رابطة سيد الشهداء عليه السلام غير مبري الذمه من يحذف الاسماء أو ينسبها له
قصيدة ليلة العاشر زينب تودع الحسين عليهم السلام لسان حال السجاد ع
~~~
ليلة اوداع الحسين
تخلص ابهم او ونين
اه يزينب. اه يزينب ٢
💔💔💔💔💔💔
شفت عمتي شلون تبجي اتودع ابولياها
حاير وعبره ابصدرها تصب دمع عيناها
شفتي ابوي يحاجي عمتي وعالحرم وصاها
كلها يازينب اصبري وبهده حاجاها
يكلها باجر من اموت
الشمر لخيمج يفوت
اه يزينب اه يزينب ٢
💔💔💔💔💔💔
حسين كلها يالعقيله اتحملي شنهي اليصير
باجر اطيح العمايم وجثتي، تبقه عله الهجير
تحترگ باجر خيمجن والامر كلش خطير
والزلم تنجتل كلها والصبر يصبح أسير
باجر اتغيب الرجال
وأبو فاضل عالرمال
اه يزينب. اه يزينب ٢
💔💔💔💔💔💔
لصبح مانام عودي وگام ينضر عالحرم
لسمه يرفع اعيونه ويرمق ابحسره وألم
طلع يتفقد ابويه ويلكط اشواك الهشم
ايخاف تسحگهن رقيه من تفر من الخيم
خاف تسحگ عالارض
اتموت من كد الركض
آه يازينب اه يزينب ٢
خادمة اهل✍️ ام ابراهيم الحلفي
💔💔💔💔💔💔
والصبح لوصار يختي امشي باجر للحرب
لاتطلعن من خيمجن اتشوفجن يختي الغرب
مايضل الجن محامي والامر يصبح صعب
انه اطيح اعله الوطيه انحرم من الشرب
الخيل تسحگ عالصدر
گلبي باجر ينكسر
اه يزينب اه يزينب
ام محمد الساري
💔💔💔💔💔💔💔💔
خويه اودعك شنهو كلبي وادري ماترجع إلي
آه يبت أمي يزينب سمعي يااخر هلي
خويه لميلي بناتي عكبي خافن تنولي
أني اعرفنجن يزينب مثل والدنه علي
علثره ابكه طريح
اسمع ايتامي تصيح
آه يزينب آه يزينب ٢
✍🏻،،،،ام كرار مناذره
💔💔💔💔💔💔💔
يابن امي شلون حالي واسمع اني بهالكلام
حرمه خويه ويقل عزمي لوتفر مني لأيتام
وين اروح وانطي وجهي لون حركوها الخيام
ردني يالوالي لنزلنه شلون بعد اسكت وانام
كلها هذا اخر وداع
تنسحك باجر أضلاع
اه يا زينب آه يا زينب. ٢
ام✍️ علي الموسوي
💔💔💔💔💔💔💔
تمت بعون الله باقلام شاعرات رابطة سيد الشهداء عليه السلام غير مبري الذمه من يحذف الاسماء أو ينسبها له
نزلة ليلة العاشر…..
حاضر… عـــنه ماغـــاب
حاضر… دمــــعه سچاب
حاضر… يحسب احساب
صاحب الثار صاحب الثار
~~~
حاضر المهدي عزانه يهل الدمــــــــوع
ويسمع التوديع كله وگلبه موجــــــوع
يصيح الله وياك جدي بصوت مسموع
والهجن باچر نوت تطحنهه الضــــلوع
بلكي… ايـــطول الليل
بلكي… تبــــطل الخيل
بلكي ... ودمعته اتسيل
صاحب الثار صاحب الثار
~~
حاضر المهدي مجالسنه وعــزانه
وتحت هذا المنبر امحدِد مــكانه
يسجل الاسماء ويـسدد خــطانه
وبالحشر باچر يگول الضامن انه
الطم… لطمتك فوز
الطم… وبأمن جوز / على الصراط
الطم… عازه للعـوز
صاحب الثار صاحب الثار
~~
هالامر لازم يشيعي تعـــــــتقد بي
حاضر المهدي العزه ابالك تـــخليه
من تطب شوفه بخيالك سلم عليه
بعظم اللهُ الاجـــــــــر لازم تواسيه
يعني ... الليله مولاك
يعني … حاضـر وياك
يعني … نـــــاده حياك
صاحب الثار صاحب الثار
~~
كل گلب شيعي يمهدي الليله مكسور
ويعتذر منك امــامي لو بــده اقصور
يندعيلك بالصلاة ومن يجـــي ايزور
يصيح حيل بلهفه وين انت يمنصور
عجل… هايمـــحبوب
عجل… داوي الگلوب
عجل… نور الــدروب
صاحب الثار صاحب الثار
~~~
كل محب عينه اعله دربك ياإمامي
يصيح وينــك يامـــرادي وياغرامي
بجاه هاي الليلة عـــــــندك ياهيامي
اطلع واخذه انــــتقامك وانـــتقامي
اطلع… وارفع الواك
اطلع… كلنـــه وياك
اطلع… واحنه يمناك
صاحب الثار صاحب الثار
~~~~
الشاعر سيد فليح الموسوي ✏
رئيسية/ ليلة الوداع 2024
شفتها بليلة العاشر
حزينه وتكسر الخاطر. اويلاه
تودع اخوتها مهضومه
تصيح وتبچي مالومه. اويلاه
٠٠٠٠٠٠٠٠٠٠٠٠٠٠٠٠٠٠٠٠٠
رجع بية الزمن للطف. حلم بس شفته بالعين
وداع ام الخدر زينب. شفتها تودع حسين
حزينه امگبّعه بهمها. تون من لوعة البين
طبت خيمة ابن امها. تودعه وبيها نارين
نار اوداعه وغيابه
ونار جروحه ومصابه اذا راح
اخوها وكعدت تنشده
غريبه وتنسبي بعده. اذا راح متنساه اويلاه
٠٠٠٠٠٠٠٠٠٠٠٠٠٠٠٠٠٠٠٠٠
سمعتها تگلّه يبن امي اريدن منك جواب
صدك باجر يذبحونك. صدك يسلبني سلّاب
اشوف بسهم المثلّث يخويه گبالي تنصاب
بحوافر خيلهم خويه يطشرونك بلتراب
عسن لا طر صبح باجر
ولاشوفن اثر حافر. بلظلوع
مثل ما كسروا الزهره
اشوف بعيني چم كسره. بلظلوع اثر آه اويلاه
٠٠٠٠٠٠٠٠٠٠٠٠٠٠٠٠٠٠٠٠٠٠
صدك ياخويه اسمعها. فقط هالليله ويّاك
صعب يحسين توديعك. صعب يالغالي فرگاك
توصيني وتودّعني. أنه وكل اهلي بحماك
بعد وضحت غداً زينب. سبية بولية اعداك
أنه الماشافوا خيالي
سبية عله الهزل تالي. الى الشام
وحگك يا ضوه عيوني
اموت ولا يودّوني. الى الشام. بلاياه. اويلاه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اخوها حسين جاوبها. اسمعه ودمعي سچاب
يگلها يختي يازينب. اقاتل دون الاحجاب
اذا ما ينسفك دمي. وذا ما راسي ينصاب
يرد دين الشرك والذل يموت الحق ولكتاب
ابد ما بايع الظالم
ابد للذلّه ما ساوم. أنه حسين
عزيز لآخر انفاسي
اخوج ومااطخ راسي. أنه حسين سمعناه. اويلاه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠
گبل فجر الحزن طلعت. شفتها تريد عباس
تلگّاها بهلا يختي. هلا يارفعة الراس
عظيمه وكعدت كباله. بأبوها الوالي تنقاس
صدك رايد تودّعني. وظل بلايه حـرّاس
جبتني امن الوطن آيه
كفيلي وبيدك الرايه. يعباس
اذكرك بالعهد جيتك
يمن صيت الوصي صيتك. يعباس نخيناه. اويلاه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اسمعه يگلها يازينب. بچيتي وآنه موجود
قسم باجر اراويهم. سقر وعيونج شهود
امية وكل عساكرها. وعددها شما بقى يزود
اگص رگابها بسيفي و رد اسحگهم اردود
يويله اليوصل خيامج.
اذبحه بسيفي كدامج. تأمرين
يزينب آنه كفّالچ
احامي خيامي وطفالچ تأمرين. بعد لا اويلاه
سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
خويه يا عباس انادي وماتسمعوني
ترضه اروح و يالشمر وسياطه بمتوني
اني مكسورة ظهر وانته نايم عالنهر
ماتسمعوني
ــــــــــــــــــــــــــــــــــــــــــــــــــــــــــــ
ارد أسولفلك يبو الغيره الجـرالي بالشمر وبسوطه خـويه انشده بالي
وينـه عباسج يكلـــي ولغــــوالي وينه يــا بت فاطمـــة عـــــز الليالي
انتي ها لساعه سبيتي شوفـي بعيونج
وين أخوتج وين أخوتج خل يسمعونج
وعيني شبحتلك نظر وانته نايم عالنهر
ماتسمعوني
—-------------------------------------------
والله يا حالـــة سكيــــــنه الالمتني اسمـــع تنادي يعمــــي واعدتني
تدري ياعباس بالجرح الهضمني شعجب مـــو طبعك وتتخله عني
ضلت اتنادي ودمعها يحرك احشاها
هيه مجروحه بضماها وجودك ادواها
وصبري ياخوية انكسر وانته نايم عالنهر
ماتسمعوني
—------------------------------------------------------
خويه شحجي عن مصيبتها رقيه لحضه لحضه تندبك وتصد اليه
تكَلي يا عمه شعظم هاي الرزيــه لا ابو اليمي ولا عــــم رد عيلــه
جني راح ابقى يتيمه امفاركه احبابي
يعني من هسه استعد الوعة مصابي
حايره وتاه الفكر وانته نايم عالنهر
ماتسمعوني
—---------------------------------------------
خويه بس عين الشماته اتصد اليه واني مجتوفه بحبل وامشي سبيه
تدري من كثر الضرب اشكف بديه شلون ساعة يبن ابوي اتمر عليه
وانــي ما بين الاعادي مـــن يحاميني
حتى ارض الله الوسيعة ضاكت بعيني
اني مسلوبه الخدر وانته نايم عالنهر
ماتسمعوني
—-------------------------------
يا المها الغاضريــــه ويــــا المها خويه بس هم ومصايب شفنه منها
ظلت اطفال او تون ما تخفي ونها منهو بعدك يا ولينه ايحامي عنهــا
من بعد سلب الحراير حركـــو خيمنه
وصعبه نضرات الشماته الما تفاركنه
صحنه لاوين المفر ونت ه نايم عالنهر
ماتسمعوني
—-------------------------------------------------
نسألكم الدعاء
خاد ال محمد / ابو باقر المالكي
موشح لمصرع الأمام الحسين عليه السلام (وين راس حسين)
وين راس حسين وين ضلوعه
الله واكبر صاحت المفجوعه
راس ابو السجاد ماهو وخنصره
جوه الخيول الضلوع امطشره
وين ابو الحسنين وامي الطاهره
خل يشوفون العده مجموعه
وين راس حسين وين اضلوعه
خل يشوفون الشماته امجمعه
خل يشوفون الفواطم ضايعه
خل يشوفون الجنازه امگطعه
والجروح امكشفه وموجوعه
وين راس حسين وين اضلوعه
ضلت اجروح الغريب امكشفه
النار شبت والفواطم خايفه
عيني مشبوحه عله ازنود الوفه
عالشريعه امطرحه ومگطوعه
وين راس حسين وين اضلوعه
عالشريعه اچفوف اخوي امطرحه
عيني ماينشف دمعهه وشابحه
وين اروحن وين اسوي الفاتحه
والمناحه واللطم ممنوعه
وين راس حسين وين اضلوعه
منعو اعليه المناحه واللطم
گلبي يحمل يامصيبه ياهضم
ضل علي السجاد بس جلد وعظم
من يباوعلي تهمل ادموعه
وين راس حسين وين اضلوعه
بس يباوعلي تخنگه عبرته
امچتف اوجعان صعبه حالته
من يتچيله وضحايه خوته
اگباله جابو روسهم مرفوعه
وين راس حسين وين اضلوعه
جابو العدوان روس اعله الرماح
مايعن گلبي ولاساعه استراح
ضل علي السجاد مكسور الجناح
والسلاسل عالضهر مطبوعه
وين راس حسين وين اضلوعه
لشاعرة اهل البيت
ام هجران العمارچية
غير مبري الذمه من يمسح اسم الشاعره او ينسب الرثاء لشخص اخر
جارت اعليه الليالي الولي راح
حرمه اظل ابلايه والي الولي راح
كل اخوتي ابهل المسيه
امذبحه بالغاضريه
الولي راح
ــــــــــــــــــــــــــــــــــــــــــــــــــــــــ
الدنيه ظلمه ابهل المسيه اخلاف اهلنه
والحزن خيم عليه او لا تأأنه
راحو اخواني اديه اهل المحنه
من بعد ذيچ الليالي وين صرنه
عيني عميه اولا أشوف
امگطعه اگبالي الچفوف
وانه بس الهم صفالي الولي راح
حرمه اظل ابلايه والي الولي راح
الولي راح
ــــــــــــــــــــــــــــــــــــــــــــــــــــــــ
ضاعت احلى ايام عمري أبلحضه ياناس
راح اخوي الچان يمي او راح عباس
شلون اروح ابلايه اخوتي ويه الارجاس
من عذاب المر عليه شيب الراس
اشلون اروح اويالغرب
صعبه والموقف صعب
حرت المن اشكي حالي الولي راح
حرمه اظل ابلايه والي الولي راح
الولي راح
ــــــــــــــــــــــــــــــــــــــــــــــــــــــ
انه جيت ابزود اخوتي اهل الحميه
باجراعلى الناگه اروح امشي سبيه
اشحالهه العافت اخيهه اعلى الوطيه
ابلايه والي او بالحبل مچتوفه اديه
امچتفه اوبيدي الحبل
انه اروح اعلى الهزل
ما اجت هاي اعلى بالي الولي راح
حرمه اظل ابلايه والي. الولي راح
الولي راح
ــــــــــــــــــــــــــــــــــــــــــــــــــــــــ
امشي واعلى الزان اشوفن روس اخوتي
ضاعت احلمي او گمت اتمنه موتي
صرخة ايتامي ابهظم تجرح سكوتي
والدمع يجري اعلى خدي واخفي صوتي
اتحيريت ابهل زمن
گلبي مايحمل محن
وانه يا ظيم الجرالي. الولي راح
حرمه اظل ابلايه والي لولي راح
الولي راح
ــــــــــــــــــــــــــــــــــــــــــــــــــــــــ
لشاعر اهل البيت عليهم السلام
خالد عامر الزيادي
قصيدة.. ليلة .11 . محرم الحرام.. 1445.. ( أينَ المُستقر )
في ليلةِ الحادي عشر _ لا ادري أينَ المُستقر
غريبه _ مصيبه _ اني زينب
===================
راح أودع "" كل أخوتي "" وعيني اتسولف جرح
شاب راسي "" بالمصايب "" اعزاز كلبي تنذبح
وين جانت هاي اليه كربله
وين ما انظر اشوفن حرمله
عالنهرِ مذبوحٌ قمر _ لا ادري أينَ المُستقر
غريبه _ مصيبه _ اني زينب
=================
ماكو خيمه "" وين اروحن "" دنيا ظلمه بلا ضوه
من رقيه "" تريد ابوها "" مات بانفاسي الهوه
تكلي عمه ارد اشمن منحره
واني كتلها ظلوعه مطشره
الى متى هذا القهر _ لا ادري أينَ المُستقر
غريبه _ مصيبه _ اني زينب
==================
بهدوة الليل "" تنعه ابنها "" خاطري تِكسره الرباب
واني شحجي "" بيه جمره "" بعد شحمل ياعذاب
تكول عبدالله أنفطم بالدم تروه
اني مشتاكه لعيونه وينه هوه
كالنجمِ في ليلِ السحر _ لا ادري أينَ المُستقر
غريبه _ مصيبه _ اني زينب
==================
بين ليلى "" ام الاكبر "" جانت اجواء المصاب
بين رمله "" تنعه جسام "" ونطفه شمع الشباب
صار بالطف مجلس دموع وبكاء
مستهل احزاني يبدي كربلاء
لم ينتهي هذا السفر _ لا ادري أينَ المُستقر
غريبه _ مصيبه _ اني زينب
==================
اني ام عون "" امشي للشام "" ويّني وين السبي
هذا أسمي "" السبيه "" جرح تل الزينبي
حتى موتي يِروي عني طول الايام
يكول زينب باليسر موتتها بالشام
والثأرُ عندَ المُنتظر _ لا ادري أينَ المُستقر
غريبه _ مصيبه _ اني زينب
===================
الخادم _ ابو فدك الشامي ✍
نعي
ليله الوحشه
الدهر ضيم ومصايب وآلمالي
وصل لمّي الزجيه وآلي مالي
وحشه الليله وآنه وآالي مالي
غريبه بلا اخو بالغاضريه
ـــــــــــــــــ
المصايب بالطفوف اهواي خيمات
عليّه وصحت يم حسين خي مات
وحشه ومابقت للخدر خيمات
احتركَت خيمة اخواني عليّه
ـــــــــــــــــ
نعي
الوحشه
الليله وحشه وبس حرم ويّايه
حسين ماهو ولا جفيل الرايه
اطفال كلهه تريد يلفي ابمايه
اطفال والله العطش حيل اذّاهه
ــــــــــــــ
لاخيم عندي وحرت يا بالفضل
وين انيم الحرم شيهود الطفل
هيج بيّه ايصير لا ما تنعقل
الكفل زينب بالغرب خلّاهه
ـــــــــــــــــ
الليل مظلم والعده تغير وتصول
وانه يمي بس حرم جا شرد اكَول
خويه باجر سفرتي وياهم تطول
الزمن هاي المحنه الي راداهه
ــــــــــــــــ
الشاعر محمد حسن ضيغم
المنشد والملحن علاء الفهد
نعي اليله الوحشة
-------------------------------------------
عـلـى دربك اناطر واهمل العين
شلون تعوفي بهل حال يحسين
وين انطي الوجه ياخوي لاوين
غريبه ابن طغيان آل اميه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
تعال شوف حالي من اجه اليل
اودارت عـلـينه الـزلـم والـخـيل
خويه اشلون تبقه ابغير تغسيل
اريد اناعك ياروح الزچيه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
ظـــل ابـالـي مـنك اخــر اوداع
مـــن گتلي ياخويه ردي ابساع
انته اخر انفاس اوحاضن الگاع
ماتدري يخويه عصار بيه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
شيب راس اختكم والعـمر راح
ماظل شهم عدها اليوم ماطاح
اوحـزو روسكم جابوها لثرماح
شيصبرل الروح گلي بهل رزيه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،كلمات ابو ماجد الشغانبي
(ليلة العاشر /او الحادي العشر)
لسان حال الزهراء لولدها الحسين
شعدها الخيل وياك
داسن حتى الواك
يا يمه شعدهن ويجسمك
اطشرك وترد اتلمك
ركضن فوگك ركضت خايف ماهمهن گلبي
شالن منك مدري اشالن وراسك ضل مسبي
صحت اعليهن بِعدن عنه لطشرن تعبي
صحت بقُوتي وما سمعني
وانت اتاشر وخرن عني
بالممشه يِرِجَن كاع الله
ليش بدم وجهك متنحي
تروح وترجع بيك
والشوك ايأذيك
بكل كاع الطف نثرن دمك
اطشرك واترد اتلمك
.
.
.
.
اوگع فوك الصحره التچوي كلما تمشي الخيل
ويوگع گلبي بين ضلوعي وگعَت دمعه بليل
محد حَس بيّه وگال امه داسن فوگك حيل
بثواب الله توزع جسمك
من شعرك يايمه لجدمك
بچفي جِبت الماي البارد
اشرب يالشالع گلب امك
عطشان الدلال
واشرب محد كال
ليش الوادم نهبت هِدمك
اطشرك وترد اتلمك
.
.
.
.
آثار الحافر بالوائك مو بس جسمك ذاك
كل ما تتوجع من عنده اتوجع وياك
منْ گد ما داس عله ضلوعك وي كاعك ساواك
ومن الدوس اتخرب لونك
ما جِبتك حتى يطشرونك
شيضل بگلبي يالغالي
وبگلبك حيل ايدوسونك
احجي بدمع العين
والكم هذا حسين
البطف والطف ايلجمك
اطشرك وترد تلمك
.
.
.
.
أصْطفن عشره بصف عشره وسَدَن وجه الگاع
أطشر عطرك من جاسنك ياعود النعناع
ومو بهداي الركضه بسرعه سَوَن بيك اوداع
للخيمه عشره يودنك
والعشره الإخره يرجعنك
فتحن ميدان اعله ارسومك
وتعبن من گد ما داسنك
طگ ضلعك والصوت
بنص الخيمه يفوت
والوادم من شافت حلمك
اطشرك واترد اتلمك
.
.
.
.
منِ الرملّه تسوي اوساده يا ابن الاحضان
مذبوح وضل يرجف جسمك من ركضت نسوان
والخيل الغارت عالنسوه هم فتحن ميدان
وانسحگت بالهيمه اطفالك
وردت داست فوگ اخيالك
تلم عيالك بنتي الطاحت
لو ياروحي تلم بوصالك
يمه ضلوعك وين
حاجيني يحسين
شبيها الخيل؟ الورده تشمك
اطشرك وترد تلمك
عبدالله الشويلي
ليلة ١٠ محرّم:
لَيْلَةُ الْعَشْرِ أَتَت تُبْدِي النَّحِيبْ
وَغَدَتْ تَبْكِي عَلَى الْمَوْلَى الْغَرِيبْ
فِي أَمَانِ اللهِ يَا نِعْمَ الْحَبِيبْ
سَوْفَ تَمْضِي دَامِيَاً يَا بْنَ الْبَتُولْ
لَيْلَةُ التَّوْدِيعِ تَبْكِيهَا السَّمَاءْ
وَنِدَاءُ الْعَرْشِ آهٍ كَرْبَلَاءْ
كَرْبَلا لا زِلْتِ كَرْبَاً وَبَلاءْ
صَرْخَةٌ يَبْقى صَدَاهَا لا يَزُولْ
زَيْنَبٌ مَا حَالُهَا بَيْنَ الْخِيَامْ
هَلْ دَعَتْ يَا لَيْلُ فَلْيَبْقَ الظَّلَامْ؟
أَمْ مَشَتْ تَبْكِي أَسَىً نَحْوَ الْإِمَامْ؟
كَعْبَةُ الْأَحْزَانِ بَلْوَاهَا تَطُولْ
فَغَدَاً يَهْوِي عَلَى حَرِّ التُّرَابْ
مُهْجَةُ الزِّهْرَاءِ تَعْلُوهُ الْحِرَابْ
حِينَمَا تَدْعُوهُ لَا تَلْقَى جَوَابْ
وَعَلَيْهِ الْخَيْلُ مَيْدَانَاً تَجُولْ
سَاعَدَ اللهُ غَدَاً أُمَّ الرَّضِيعْ
حِينَ سَهْمُ الْبَغْيِ يُرْدِيهِ صَرِيعْ
دُونَ مَاءٍ سَوْفَ يُسْقَى بِالنَّجِيعْ
بِئْسَ قَوْمٌ مَا رَعَوْا حَقَّ الرَّسْولْ
أَيُّهَا الْمَوْعُودُ قُمْ أَنْتَ السَّبِيلْ
وَاسْحَقِ الْعُدْوَانَ ثَأْرَاً لِلْقَتٍيلْ
كَيْفَ تَنْسَاهُ عَلَى الرَّمْضَا جَدِيلْ؟
ظَامِئَ الْقَلْبِ رَوَى حَدَّ النُّصُولْ
جَدُّكَ الْعَطْشَانُ شِمْرٌ قَدْ عَلَاهْ
دَاسَه فِي صَدْرِهِ لَمَّا أَتَاهْ
وَاحُسَيْنَاً ذَبَحُوهُ مِنْ قَفَاهْ
فَمَتَى الثَّأْرُ وَإِدْرَاكُ الذُّحُولْ
الشاعر حسن خنافر العاملي
ليلة الوداع…… لحن يخيمات
يالجروح باچر حيل تلچمن يالجروح
بس هل ليله يمنه حسين ويروح
باچر عل تراب انشوفه مذبوح
………………………….....……..
يجروحي اصبرن عل ألم لو حلت المصيبه
لمــن اودع كل هلـي وبوحدي اضل غريبه
باچــر جثثــــهم عل تـرب امطعنه وسليبه
باچر يحرگون الخيم وگلبي الهظم يصيبه
على الگاع باچر كل اهل بيتي على الگاع
تعمه اعيونه لو صار الوداع
وسفه اشلون اودعكم يالسباع
…………………………………..…
ابن امي چان الچن ضمد بيه ينگطع نزفچن
يجروحـــي اذا غــاب الولــي اتحملن ألمچن
من زغري عانيت الألم وسط الگلب شلتچن
مـا جربت طـــعم الفـرح يهمومي اشكثرچن
بالاحزان خلصت العمر كله بالاحزان
لسهام النوايب صرت نيشان
گلبي امن الهظم والنوح مليان
………………………………………
آخر مسه اليله يمر بيه اگعد اويه اخـــوتي
مـا ضــن اشوفنـهم بعــد آه اشكـــبر بلوتي
ريته يجي گبل الصبح اتمنيته هسه موتي
لو حشمت باچــر منـو يحـظر يلبي صوتي
بالطفوف آ يالوعة الوعه بالطفوف
لو شفت العليل ابحبل مچتوف
وخيول العده عل خدر اطوف
………………………………………
التوديع اشد وصعب امر ماينحمل عذابه
لمن تودعلك اخــو وتـــدرك الــم غيـــابه
باچر نضل بس الحرم لا اخوه لا صحابه
ولو حشمت يهل الشيم محد يرد جوابه
مطاعين كلهم عل ترب وسفه مطاعين
لا عباس يفزعلي وله حسين
ابقه امحيره ودم تهمل العين
………………………………………
باچـــر اضـل متحـيره بالنســوه واليتــــامه
وسوط الشمر فوگ المتن يتركله چم علامه
تنشدني خــــوله اشعطله والــدنه وشعلامه
محتـــــاره اگللهه انچتل لو يرجع بســـلامه
ينشدون كلهم عنك اطفالك ينشدون
سود امن الظرب ومرمه المتون
مـــن كثر الألم گامو يونون
……………………………………...
الخادم
كامل السعيدي
وصايا الإمام الحسين لزينب عليهم ألسلام
خادمكم عبدالهادي العريفاوي
يازينب يازينب يازينب
خويه اوصيج بخبر جدا مهم
ونتي يختي العالمه ونعمه العلم
خويه باجر عمري بالطف ينختم
والجسد فوك الثرى تشوفينه
----------------------‐------
خويه حسين خويه حسين خويه حسين
والله صعبه اعله الابو يوادع هله
كلبي يجفل من نوايب كربله
هذا اسمها لو اظن كرب وبلا
بالنوايب طبعج يجازينه
------------------'-------------
يازينب يازينب يازينب
خويه صبرج من يطر وجه الصبح
كل اهل بيتج عالغبره ذبح
هو غير الموت بالطف مايصح
شوفي خوج حسين وتودعينه
-------------------------------
يازينب يازينب يازينب
يختي باجر تحترك كل الخيم
يالعقيله وانتي عينج عالحرم
اعله الشريعه يطيح شيال العلم
هذا يختي اللي يصير اعلينه
------------------------------'-------
خويه حسين خويه حسين خويه حسين
خويه دلالي يبو اليمه التوه
شبيها من اسرار ديرة نينوى
خويه كون تصير موتتنه سوه
ولا اشوف اعداك من تسبينه
-----------------------------
يازينب يازينب يازينب
يختي يازينب الج بس الصبر
ولأوامر ربنا باجر ننتظر
من تودعيني وتروحين بيسر
عفيه صبرج يختي الله يعينه
-----------------------------
يازينب يازينب يازينب
خويه باجر كلها تنوي اعله الرحيل
ونتي يمي ونوبه يم صوب الكفيل
من اشوف دموعج كبالي تسيل
اعله الكفاله البينج ومابينه
-----'---------'-------------------
يابو فاظل يابو فاظل يابو فاظل
انه خوي حسين سولفلي الخبر
اعله الكفيل يطيح يم صوب النهر
وتدري ظهر حسين ياخويه انكسر
والأشد من تنكطع جفينه
------------------------------
يازينب يازينب يازينب
لاتجين ارجوج يم المشرعه
خويه صعبه اعليج هاي الفاجعه
من تشوفين الجفوف مكطعه
والكفيل اسهام طفت عينه
-------------------------
والله ليله ...... بيهـــــه آلآم ومناحــه
والله ليله ... كَلبي ضل تنزف جراحه
والله ليله ... ما اشوفن بيهـــــه راحه ... والله ليله
ـــــــــــــ
ليلة العاشر جرح يدّي بدليلي
اكَبال اخوي حسين دمعة عيني سيلي
باجر يروح واحس وياه رحيلي
وراح اصيح بصوت منك آ يليلي
دمعي يجري ... شلون باجر ما اشوفه
دمعي يجري ... ابن امي اموت ولا اعوفه
دمعي يجري ... المحنه احجيهه بصراحه ... والله ليله
ــــــــــــــــــــ
بعيني لو شفته يريد ايودّع اخته
تصير ونّت روحي يم الغالي سكته
اقره جلمات الوداع ابنص نظرته
مكّدر انظرله لما ايودّعهه بنته
تذوب روحي ... بالخيم لو ودّعاني
تذوب روحي ... بالحجي يعجز لساني
تذوب روحي ... طير وتكسّر جناحه ... والله ليله
ــــــــــــــــ
بخيمتي من يكَعد اكَبالي ابونينه
يكَلّي اودعج جيت زينب يالحنينه
ادري بيج من القهر روحج حزينه
والله مكَدر آنه احط عيني ابعينه
ريت اموتن ... ولا يجي اليوم الاودعه
ريت اموتن ....عمري يمّه ايذوب شمعه
ريت اموتن ... وليلي ما يطلع صباحه ... والله ليله
ــــــــــــــ
ليلة اموادع حبيبي وي الغوالي
حسين خويه شلون اضل ابلايه والي
عصر عاشر ما يضل عزّي ودلالي
شلون بيّه لو يردّ المهر خالي
الظليمه ... يصيح مهرك من يجيني
الظليمه ...كَبل دمعي اتطّيح عيني
الظليمه .... موتتي امن اسمع صياحه .. والله ليله
ـــــــــــ
خويه باجر لا كمر لا خيمه عندي
الخيل تسحكَ صدرك ودمعي اعله خدّي
قصّتي ودرب السبي اعرفهه تبدي
راح اضل ابكربله يبن امي وحدي
وراح اودعك ... عالهزل يل ودّعتني
راح اودعك ... يشبه المنحرك متني
راح اودعك .... سهم حزنك كَلبي لاحه ... والله ليله
ــــــــــــــ
الشاعر محمد حسن ضيغم
نعي للوداع
~
لميت اخوتي ودعتهم
للموت يازهره جبتهم
يوصون يحبيبه بحرمهم
~~~
تصبرين ياروحي وجويه
وتوادعين أهل الحميه
وباجر يهلنه شلون بيه
ام ✍️ علي الموسوي
💔💔💔💔💔
ياروح كولي اشكد تصبرين
يصعب عليج اوداع الحسين
احجّي ويه خوتي لاتنامين
~~~
يحسين احس باجر غريبه
والصبر گلي، امنين اجيبه
گلبي، فلا يبطل لهيبه
ام ابراهيم الحلفي
💔💔💔💔💔
باجر ييمه اتهد مصايب
وحده على وحده النوايب
اتفسر جبل فركه الحبايب
~~~
كلبي جلد وحدي احملتها
يروح الكفل واني اكفلتها
متغسله ادموم وعفتها
✍ام اسعد الشمري
💔💔💔💔💔
يمه كتلني افراگ الوداع
وخلافهم کلشي حلو ضاع
ظيمي لفاني ابگلبي اوجاع
___
ماريد اودعكم يالخوان
منهسه گلبي صبح حيران
وباجر اصير ابين عدوان
✍🏻 ام زينب الأسدي
💔💔💔💔💔
تمنيت باجر يمّي أمي
ولها البچي واللطم سهمي
وتعيني عالجرى وهظمي
~~~
يا ريتها تشاركني بلواي
عالمنذبح ما شارب الماي
وبخيلهم طاحنته اعداي
✍🏻العلوية أم منتظر
جمال الدين
💔💔💔💔💔
عين العمه يعزاز گلبي
من ودعوني تاه دربي
هالوداع ماريده ربي
__
صبر عليه يا ابن امي
وگلي يخويه لاتهمي
گلبي انفطر والنوح سهمي
✍🏻 ام زينب الأسدي
💔💔💔💔💔💔💔
تم بفضل الله وعونه بأقلام خادمات الحسين في رابطة سيد الشهداء عليه السلام غير مبري الذمه من يحذف الاسماء أو ينسبها له
قصيده للوداع
~~
اروحن وين .....باجر من تطيحون
بس نسوان بارض الطف تخلون
~~~~
باجر وين اوديها النساوين
باصرني يبعد الروح يحسين
ردني لديرتي يبن امي هالحين
خاف علينه عدوانك يهجمون
ام ✍️ علي الموسوي
🔰🔰🔰🔰🔰🔰
يهجمون العده يحرگون الخيام
وتفر الحرم وتفر، الايتام.
بين الگوم. خويه اعيالك اتنام
تدري اعداك خويه مايرحمون
خادمة اهل✍️ البيت ام ابراهيم الحلفي
🔰🔰🔰🔰🔰🔰
من بعدك يخويه اتهيم العيال
شلون ابحالهم من رجب الجمال
تعل يحسين خويه وشوف الطفال
زغار من الضرب كلهم يخافون
✍️الشاعره كريمه البو حلوه
🔰🔰🔰🔰🔰🔰
لارحتو يوالي منهو وياي
بديار الغرب وتهيل عيناي
بس عليل عندي مالي حماي
وكبالي اشوف اخواني يونون
✍️ام كرار مناذره
🔰🔰🔰🔰🔰🔰
اخاف من الصبح لوهل عليه
اظل بلاولي واصفج بديه
عمله عملتج يالغاضريه
باچر عالرمل اهلي يصبحون
✍️العلويه ام منصور
🔰🔰🔰🔰🔰🔰
درب اليسر خويه بعيد عنكم
وظل يحسين دوم انه باملكم
وانه الغاليه وعمت ولدكم
كفيله عيالكم وحدي و ترحون
✍️ ام محمد الساري
🔰🔰🔰🔰🔰🔰
تمت بفضل الله وعونه بأقلام خادمات الحسين في رابطة سيد الشهداء عليه السلام غير مبري الذمه من يحذف الاسماء أو ينسبها له
ليلة الوداع 2024
آخر ليله يمنه. نشكيله بألمنه
باجر من يلمنه. لو حركو خيمنه
عكب أهل الحميه أعظم كل رزيه
ما بين آل اميه مهضومة وسبيه
____
يالفواطم گومن امشن. لخيمة ابن امي السمح
هذه آخر ليله بيها نشوفه باجر ينذبح
خل نودع حسين اخونه ومانعوفه
نسهر وياه للصبح كعبه ونطوفه
يمنه بس هالليله باجر ما نشوفه
خل نودع حسين ابو الروح العطوفه
نشكي بدمعة العين. كلنه بخيمة حسين
لمن تهجم الخيل. نشرد نتّجه وين
نسأل عن وضعنه ياهو اليبقه النه
ياهو اليدري بيه. مهضومة وسبيه
____
ندخل الخيمه بدمعنه. نكعد گبال الامام
نودعه بدموعه المصيبه. ونختصر باقي الكلام
نگلّه باجر لو عفتنه شلون بينه
آل اميه خيمنه تحركهن علينه
كل ستر ما يبقه باجر بس عبينه
شلون لو چتفوا يبوالاكبر ادينه
باجر جم مصيبه. بعيون الغريبه
راسك من تشوفه. والجثه سليبه
لا يطلع صبحنه. لا ينزف جرحنه
صعبه الهاشميه. مهضومة وسبيه
____
طبّن لخيمة اخوهن. زينب وكل الحرم
ابواليمه ستقبلاهن. حچن بدموع الألم
صدك باجر تنذبح وتسحگك الخيل
عالرمح راسك نشوفه ودمك يسيل
لا فكر لا راي عدنه ولايضل حيل
خويه من يجمع شملنه لو يجي الليل
بذبحك ياولينه. احسبنه انسبينه
عالهزّل سبايا. نتستّر بدينه
ترضاها العقيله. عالناگه الهزيله
التشبه للزجيه. مهضومة وسبيه
____
لا تلچمن گلبه كافي. حسين مجروح الگلب
گومن امشن للكفلنه. وجابنه بطول الدرب
گومن امشن نعتني لعباس اخونه
شلون بينه انگله باجر يبن ابونه
آل اميه لو طحت كلهم يجونه
تقبل يسلبون بينه الحاربونه
ونشوف الفجيعه بچفوفه الگطيعه
يوگع راسه مهشوم. باجر عالشريعه
يقبل كمر هاشم. يسبون الفواطم
اخته الفاطميه. مهضومة وسبيه
____
من سمع عباس اخوهن. غضب وهتز اللوه
گلها يا زينب ابشري. إلا زلزل نينوه
آنه كافل خدرج وحامي الفواطم
بكربله مو ملحمه اصنع ملاحم
إلا اترس گاعها جسوم وجماجم
يختي زينب وآنه كدها كمر هاشم
صاحن يا گمرنه. تسلم يا ذخرنه
مادام انت عايش. نتباها بخدرنه
لكن من نفگدك نفكد عزنه بعدك
والأكثر اذيه. مهضومة وسبيه
سيد زيد الفحام
__________
نزلة/ ليلة الوداع. 2024
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠
كل جرح لابد اله فتره ويطيب
إلا جرح الرايد يودع حبيب
واني هاي الليله بجروحي اشيب
راح اودع حسين بدموع ونجيب
يهضم وكلش صعب. جرح الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠٠
شلون اودع حسين يا عالم شگول
ودري باجر تسحك بصدره الخيول
ريت ليل العاشر اعلينه يطول
ولا يروح حسين والهيبه تزول
اول جروح الحرب. جرح الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠٠
شلون اودع الكافل وحامي الظعن
چفوفه يم شاطي النهر يتكطعن
كبل ابوالغيره يذبحوني عسن
ولا اشوف چفوفه دم يتسايلن
خَلّه دمعي دم يصب. جرح الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠٠
ليلة اوداع اخوتي ليلة جرح
راح أظل سهرانه وبچي للصبح
باجر ابن امي وحبيبي ينذبح
وراس اخويه حسين ينشال برمح
بسمه بعيون الغرب جرح الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠٠
آنه مو أي مره زينب بت علي
من يعوفوني خوتي منهو الألي
جابني العباس گلّي ادلّلي
لا تعوفيني غريبه يا هلي
يعصر دموعي غصب. جرح الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠٠
هذه آخر ليله ملتم الشمل
كلها باجر تنذبح حتى الطفل
والمصيبه الكبره والماتنعقل
انسلب ياوسفه ونجر بحبل
علّتي بطول الدرب. جرح الوداع
اعظم جروح الگلب. جرح الوداع
سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠