7626
خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
✿
ابو ذيه ونعي للعليله ع
وره ضعون الاهل العين تربه
هدم حيلي جفاهم صرت تربه
التضل بلا اهل شلون تربه
تون صبح ومسه ونه شجيه
✿〰✿〰✿〰✿〰✿〰✿〰
وره ضعون الاهل تربي العيون
جفوني وبعد ليه مايردون
بقيت انده وراهم مايسمعون
مرض وفراك حيل اوجر بيه
✿〰✿〰✿〰✿〰✿〰✿〰
جفوني الاهل ودلالي نطر
تحن روحتي لشوفة ابو الاكبر
لجيتهم بقيت متانيه وانطر
هلي كلهم جفوني وبعدو عليه
✿〰✿〰✿〰✿〰✿〰✿〰
مشاكه لحنانه الروح ملهوفه
مايرجع بعد وتكحل بشوفه
تناشدني عله الغايب ضيوفه
شكلهم راح مايرجع بعد ليه
✿〰✿〰✿〰✿〰✿〰✿〰
اسد الباب لومفتوحه اخليهه
غايب مايرد للدار راعيهه
تعزيني داره مدري اعزيهه
تذوب الروح لمن يمر طاريه
✿〰✿〰✿〰✿〰✿〰✿〰
بقلم الشاعره ام رائد زوين
#قصيده_رئيسيه_للعليله ع
مايرد غايب دمع/ لاوحق كسر الضلع
حمل ضعنهم / بعد شيردهم
خلافهم صعب. الوضع
───✤◐►🖤◄◐✤───
لون صبيتن دمع يعيون خنياب
ما تكحلجن بعد شوفت الحباب
النواظر لا تضل مشبوحه للباب
يطول سفرهم/ احباب النودهم
عليهم دليلي. منصدع
───✤◐►🖤◄◐✤───
بيهم شكد اتوسلت اوماخذوني
بخاطري هلي كسرو تعذروني
كلمه ضلي يالعليله سمعوني
وحدي بقيت بدارهم/ مادري شنهو خبارهم
صوتي بعد ماينسمع
───✤◐►🖤◄◐✤───
بعدهم الديران وحشتها رهيبه
اليواسي غربتي منين اجيبه
لدربهم ضلت عيوني مريبه
عيني ع الباب. منتظره الحباب
شلون روحي. تقتنع
───✤◐►🖤◄◐✤───
انتظر طارش من هلي يوصلني
عليهم ولالحضه. بطل وني
غيابهم هد. حيلي. وعادمني
ماضن يردون خابت الضنون
ولاواحد. عليه. رجع
───✤◐►🖤◄◐✤───
تستجن شلون المايمها اهلهه
الحزن بجفاهم هدهه وكتلهه
خبر منهم العليله ماوصلهه
اشهون هالمصيله. تضل الدمعه سجيبه
ماينحمل هذا. الوضع
───✤◐►🖤◄◐✤───
بقلم العلويه الشاعره ام رائد زوين
───✤◐►🖤◄◐✤───
#قصائد_في_خدمة_الخطباء
#محرم_١٤٤٦
#اليوم_الأول
[قصيدة عمودية]
دع عنك صفوَ العيشِ دع عنكَ المنامْ
واسكب دموع الحزن في الشَّهرِ الحرامْ
هذا المُحرّمُ في السَّماءِ هلالُهُ
قد صوّرَ المأساةَ في صدر الظّلامْ
فكأنّهُ رسمَ المصارعَ كلَّها
وكأنّهُ من خلفها رسمَ الخيامْ
أضحى سُكونُ اللّيلِ بعضَ نياحةٍ
لجروحِ جسمٍ لم تَذُق بعدُ الْتِآمْ
لفرارِ أيتامٍ وسلبِ عقيلةٍ
وصهيل خيلٍ أرعبت آلَ الكرامْ
فهنا من النّيران فرّت طفلةٌ
وهناكَ أخرى تتّقي سوطَ اللّئامْ
بكتِ النّساءُ فضجَّ كلُّ الكون بال
آهاتِ إذ نزلَ البلاءُ على الأنامْ
ومشت عزيزةُ حيدرٍ بين الملا
قسرًا إلى كوفانَ ثمَّ إلى الشِّآمْ
لا يومَ في دهرِ المَصائبِ كالّذي
فيهِ غدَت زينُ النّساءِ بلا مُحامْ
حقٌّ على كلّ الوجودِ رثاؤها
حقٌّ بكاءُ المؤمنينَ على الدّوامْ
#عظم_الله_أجوركم ◾️
فاطمة علي رزق
اسألكم الدعاء
برنامج محرم الحرام 1446 هــ
قصيدة بحق العليلة ع (5)
لو صحت بويه الصده اسمع يجاوب راح
والدي ناعي الحزن ساعة غيابك صاح
كلبه الحنيّن رحل. مابقه بس الامل.
من غيابك صاح
………
عايش بين جفوني. ومتعودات عيوني
صوره بعيني ومن حبه تحضنه الجفنين
عيوني كبال عيونه. لوني يشبه لونه
وحتى شفافي ولاتطبك لو كلت حسين
متعوب من هذا الوكت. بس شحلاته
ويموت بالدنيا على. طاري بناته
لو طلع ساعه ورجع كتله الغياب هواي
ومن اجيبن ماي اله يتحسر اعله الماي
كباله اموت من الخجل. مابقه بس الامل
من غيابك صاح
………
يسولف لو صاح اسمي. تذكريني بوجه امي
راحت يبنيتي وعافتنه ايتام زغار
عن الطف يحچيلي. يصبرني ويدعيلي
اول مره أحسّن كلبي هواي احتار
صاح استعدو للسفر. وحسره بدليله
من كتله اروح آنه اسمعت. لا يالعليله
اتسائلت ليش وشفت ويه الجواب دموع
انتي اسمچ فاطمه الوادم تكسر ضلوع
حيلي وي دمعي نزل. مابقه بس الامل. من وداعك صاح
…….
كلت اكسر خاطرهم. ويحنون لبتهم
من خذت هدومي ونمت بهودج عباس
من طر فجر الفركه. چا مت من الحرگه
نزلوني ويدرون بكلبي شكد حساس
ودعت ابوي وچا وكف. دلالي نبضه
الشبگه الاخيره لو سنه. تمر چنهه لحظه
من مشه الحادي صحت ها ياهلي تردون
كلهه سكته بس شفت نازل دمع ام عون
كلبي رف جفني ذبل. مابقه بس الامل
من وداعك صاح
…….
بهالوحشه المو سهله. لاميته ولاعدله
يابيت اهلي اسأل وين ايامي الحلوات
راحو عالباب اكتب. احچي ويامن واعتب
وفركاهم يوجع كلبي وحچي الشمات
يامغرب بلايه دمع. ياليل انامه
يايوم اكلهم حمدُ لله عالسلامه
كلشي ظل بلا طعم بس ظل طعم فرگاه
مابقه بس النفس كلشي خذاه وياه
جاوبت كلمن سأل. مابقه بس الامل. من وداع صاح
……..
وين سنيني الحلوه. بيهم جانت تسوه
يادنيا ولو رجعو للملكه انطي عيون
لكن آ يادهري. كاسر كلبي وظهري
انا لله ومدري بروحي انه شلون
ابچي وامل من البچي. وشيفيد نوحي
مكتوب الي بعمري التعب. خلصانه روحي
من يكله بفركته راح العليله تموت
لا يجي خافن يجي يلكاني بالتابوت
قصتي وكل الحصل. مابقه بس الامل.
من غيابك صاح
…….
نسألكم الدعاء
حسين صادق العقابي
#شور_للعليلة
أنا وحسين عين بعين صرنا ودمعت عيونه
ما جنت ادري كلمن بي مرض اهله يعوفونه
الما يأخذ بجفها حسين منوه الياخذ بجفها
ضعن نظراته بس عالكاع مدنگ حتى ميمونه
ابو فاضل بچه شفته
ما باوعلي من صحته
مديت ايدي وي گلبي
وضم چفه الگبل بسته
چَلبت بجدام حسين بس ما رضه ياخذني
ارجع وارد اركض حيل ام عون لو ردتني
تتلفت اعليه النوگ بچيتها وبچتني
.
.
.
اول مره اشوف اهلي يوازوني على ادموعي
ومن اسمع بكلمة خيل احس تتكسر اضلوعي
بأمر حسين كلها تروح جبير ازغير ما يبقى
طلع حتى الضوه البالبيت واني وحدي عافوني
إخذوني اگللهم
وعافوني ومشو كلهم
حتى اعبايت الزهره
اخذوها وبچيت الهم
شما اسدن بجفي البيت تنفتح كل بيبانه
وادموعي تكتب عالگاع بتكم ترا تعبانه
ازحف ازحوف وي النوگ لو كالوا امشي ويانه
.
.
.
.
أنه الما راضيه وزعلان گلبي بهاي طلعتهم
الزلم غيم عليها الموت اظن بس روس رجعتهم
نحر عبدالله مدري شبي مثل وجهي انخطف لونه
اطيح اگبالهم ضليت وتطيح اگبالي دمعتهم
شَرَبت الطفل بيدي
يگلي عايني اوريدي
صاح حسين من شافه
آه يا بويا يوليدي
شما صَعِد اهدومي حسين ينزلها من الناگه
ما گدر ياخذني وياه وما اگدر اعله افراگه
بيا اله كلشي يكول مشتاگه اضل مشتاگه
.
.
.
.
نِثرت اثار رجل حسين على وجهي وعلى احجابي
رَكْضت خايف اركض ليه من يندگ علي بابي
التجاعيد البوجهي تكول شفه من العطش ذبلت
من گطعتهم لهل اليوم على شدتهن اثيابي
وعلى رجعتهم أمن أسأل
متاعي وَحَده ينحل
احلم بالضعن حاير
يشبهني وعلي معلعل
واحلم بواحد عطشان وتحاوطه الخياله
ايد بضهر ايد بسيف ويتلفت اعله لعياله
يفزع بربعه الميتين وولا واحد اليبراله
.
.
.
.
بهدوء الليل اسمع صوت يشبه ممشه خيل البر
بحوافرهن تصدرَ أصوات مثل قاروره تتكسر
واشم دخان مال اخيام محترگه وبشر تركض
واشوف اجفوق مگطوعات وخيام محاوطه بعسكر
ومره احلم ضعن مسبي
وروس مگطعه وتربي
اعله حرمه جبيره مجتوفه
واصيح اسم الله من گلبي
بالحلم واحساسي يگول چن هالمره علويه
تشبه العمْتي ويا ناس بس عَمْتي ما مچويه
مو عمِتي هاي ام عون هاي المره محنيه
عبدالله الشويلي
انكسر كلبي اعلى طفله تبّجي حالتها
تناطــــر كاعـــده وكتلتنــي كعدتها
* * * *
شفت طفله حزينه وتكسر الخاطر
شفت مجرى دمعها بالوجه حافر
اباب البيت كعده كاعــده تناطــــر
تعاين للدرب شغلتنـــــــي قصتها
* * * *
لعب بيها القهر بالكوه تتكلم
لتحت العين لو صديت تتألــــم
بدت هالات سوده امن التعب والهم
حسرتها تفت الروح حسرتــــها
* * * *
كمت امسح دموعي بطارف ثيابي
ومنو هاي اسألت كلولي يصحابي
بنت حسين كالــــوا هـــاي يعرابي
كل الناس هاي الطفلـــــــــه بجتها
* * * *
مريضه والمرض كلش قسه وياها
والهذا السبب والدهــــا خلاهـــا
لجن افراك ابوها حيـــــل آذاها
كل يوم اليمر تتراده صحتها
* * * *
صار هواي إله لاجن أمل عدها
وهالكعده غدت كل يوم تكعدها
ما تقنــــع بعد ما يرد والدهــا
مشتاكه تشوفه افراكه موتها
* * * *
تترجه يجيها وتنتهي الفركــــه
وتركض ركضه تتلكاه وتشبكــه
وشايلها الحنين اعلى الصدر يبكه
وهي هاي الاماني العدله خلتها
* * * *
عليله امن المرض ذبلت ورد ذبلت
ومرمرها البُعد من راحــوا أوظلت
اتراده الحال من ضيم الهجر ملت
الشافاها يظن وصلــــــت منيتها
* * * *
سلام المشعل
بحق مولاتي العليله
سمعت الغالي گل العمتي زينب
سمعته ورمح شجني وگلبي شيب
صحيح افراگهه مابيه حيله
مو مالت سفر بنتي العليله
سمعته ورمح شجني وگلبي شيب
$$$$$$$$$$$$$$$$$
نعصر گلبي وجرن دمعات العيون
وحال الظيم حالي
اكوم واگعد ودلالي من شاط
همت مدري شجرالي
كلشي بداخلي مهظوم مخنوگ
واحس حن وبچالي
اعاين للمچان النجتمع بيه
ودمعي بوحده سالي
حلم لو يقظه هذا السمعته
كلام ايطر دليلي ماهظمته
العيشه بدونهم لا مستحيله
مو مالت سفر بنتي العليله
$$$$$$$$$$$$$$$
نگلت اجدامي بالحسرات والاه
ورحت صوب العقيله
بعد ما سلمت والوجهه مخطوف
الدمع واضح مسيله
شبكتني وتگلي عمتج تروح
فدوه يالعليله
عزيزه وغاليه ياعمه تبقين
الأمر ماصح بديله
شيخ الطايفه هالامر يمه
مايرجع الي صبري يعمه
حملي لو وگع منهو اليشيله
مو مالت سفر بنتي العليله
$$$$$$$$$$$$$$$
وصلنه الغالي وانا گلبي محتار
بألم شاجر نحيبه
بعد ماسلمينه اگعدنه
اسمعه الكله هيبه
تفضلي شتامري ياسلوة الروح
الجرح انا طبيبه
گالتله العليله ناويه تروح
ولاتبقى غريبه
يگلهه الأمر اصعب
حالتهه عصيبه
شلون تسافر وحالتهه صعبه
حچاها واحس دم من سال گلبه
يزينب هالامر محد بديله
مو مالت سفر بنتي العليله
$$$$$$$$$$$$$$$$
شفت شدو محاملهم العزاز
وكل منهم تحضر
راسي مدنگه وعيوني اتسيل
عله هاي الفرگه مگدر
اجن سكنه ورقيه حل الوداع
هذا اوداع الگشر
اول خطوة من عافوني الاحباب
كل حلمي تطشر
بعد ماظل أمل وي ظعن الاحباب
جرح الفرگه هد الروح ماطاب
كلفه الفرگه كلش مو قليله
مو مالت سفر بنتي العليله
$$$$$$$$$$$$$$$
من سار الظعن ماظل بعد راي
بس افرك بديه
اباوع بالهظم متروسه العيون
ودموعي جريه
تفلش كلشي بيه وسوده الاحلام
هاذي أعظم رزيه
عليله والبعد ياكل بالظلوع
تمنيت المنيه
مثل ماي وتبده الامل ياناس
گبل حلي كبرت وشيب الراس
حتى دموعي من تصب ثگيله
مو مالت سفر بنتي العليله
$$$$$$$$$$$$$$
الخادم عبدالمعين الشمري
قصيدة بحق العليله
ظاع الحلم. لمن مشت بالليل الضعون
ظاع الحلم تجري دمه مهظومه العيون
الوحدي ظليت ظل موحش البيت
$$$$$$$$$$$$$$$
بداخلي نار. وفكري محتار. شاب راسي بالعجل من ودعوني
بداخلي انعي. ويجري دمعي يطحن بروحي الجمر من ماخذوني
لحظات الموادع سهم. ياحيرتي بنص گلبي
مختنگه وهمومي جبل فوگ المرض ياربي
متعوبه مو من المرض من الموادع تعبي
وشگد صبر. يراد الي بفراگ الاحباب
وشكد صبر لمن مشو چتال الغياب
ابچي وتأذيت. ظل موحش البيت
$$$$$$$$$$$$$$$
حيرة وهموم. محاربه النوم. بدون اهلي كمت اتمنه المنيه
الحرمه صعبه. ابين غربه. وكل اهلهه من مشو للغاضريه
بساع البنيه تنهظم. لاعمهه لا اخوها
وحدهه بس تجري الدمع. والاهل مايجوها
عالجمر لمن تنتظر مرسال من ابوها
بدار الغرب والحرگه مارحمت صدرها
بدار الغرب. فوك المرض يصعب أمرها
يابويه عانيت. ظل موحش البيت
$$$$$$$$$$$$$$$$
هواي الجروح. وتطحن الروح. الفارگ اعزازه يظل ياكل بروحه
صحت ياموت وبعجل فوت
العايش بدون الأهل كثرت جروحه
ماي وتبده بالعجل. من اهلي ضيعوني
بعده بأمل گلبي يحن. ومشوبحه عيوني
محتارة بس افرك بدي. دمعه والم ظنوني
شاب الگلب من الهظم وسفرة الطويله
شاب الگلب. هذا البعد مابيه حيله
من حكي ونيت. ظل موحش البيت
$$$$$$$$$$$$$$$
وحدي بالدار. وگلبي شب نار
لا سكينه ولا رقيه البقن يمي
الصفنه آلام. ارماح وسهام
وذكرت عبدالله اخويه وزاد همي
من چنت اهز مهده بشغف. وعله المتن اشيله
يرتاح گلبي بشوفته وهمي بعجل يزيله
ايام راحت ياوسف والرجعه مستحيله
بس الدمع. والحيل باگته المصايب
بس الدمع. بعد الأهل شفت العجايب
من اهلي أيسيت ظل موحش البيت
$$$$$$$$$$$$$$$$
الخادم عبدالمعين الشمري
گعدت الحره ام عون. يم العليله
تبچي بگلب محزون. المدمع تسيله
شده وشيحلهه. ياعمه تگلهه
المدمع تسيله. المدمع تسيله
$$$$$$$$$$$$$$$$
زينب ليله التوديع گلبهه منجسم نصين
تگلهه صبري ياعمه اهلج عالسفر ناوين
انتي حالتچ صعبه. علهذا التعب متگدرين
ابوچ حسين من قرر. ابيت اهل الرحم تبقين
حالتچ تدمي الروح. كلش عصيبه
ارسوم المنايا تلوح. ولون المصيبه
بهظم ماكو مثلهه. يا عمه تگلهه
المدمع تسيله. المدمع تسيله
$$$$$$$$$$$$$$$$
من سمعت حچي زينب. يذوب الصخر من الحال
تغير لونهه بسرعه وهمهه جبال ماينشال
شلون اصبر الفرگه إسهام. أبد ماترحم الدلال
أظل بوحدي ياحيره. اهي مو چلمة التنگال
اظلم اشوف البيت. عمه بعدكم
ميته چنت ياريت. ولا فارگتكم
گعدتگم شيملهه. ياعمه تگلهه
المدمع تسيله. المدمع تسيله
$$$$$$$$$$$$$$$
حظنتهه بألم ودموع. وگلبهه من الهظم مالوم
السفر يراد حيل وراي. عليه وهالامر محتوم
ياعمه بصبر اوصيچ. شدي الصبر من هاليوم
القدر لابد تقبلينه. الطارش من يجيب علوم
بالغاضريه الناس تفزع علينه
وراعي الوفه العباس اموذرينه
ولروحي تسلهه. ياعمه تگلهه
المدمع تسيله المدمع تسيله
$$$$$$$$$$$$$$$$
ماصح كل عذر لارأي ابوچ عله الترب مطروح
وبيه الف وتسعميه. كلشي بداخله مجروح
راسه عله الرمح ينشال. ودمه عله الأرض مسفوح
بحوافر خيلهم ينداس. ولجل الوحي ظل اينوح
وحته الطفل ينصاب. ينگطع راسه
بچفوف ليث الغاب. ماتت أنفاسه
روحي ايموت املهه. يا عمه تگلهه
المدمع تسيله. المدمع تسيله
$$$$$$$$$$$$$$$
من تفزع علينه الگوم. يحرگون الخيم بالنار
وعماتچ بذاك اليوم. بطفال وحرم تحتار
نتراكض ابين الخيل وعمچ عالنهر طشار
وشسولفلج ببوج حسين. بكل الطف اله اثار
ياعمه بين اجناب. ايچتفون ادينه
والشكر ذاك اليوم. يحدي الظعينه
منو جروحي يشلهه. ياعمه تگلهه
المدمع تسيله المدمع تسيله
$$$$$$$$$$$$$$$$
الخادم عبدالمعين الشمري
#مجالس_محرم_الحرام_١٤٤٦هـ
لــ 💫
مولاتي ام البنين (عليها السلام)
💫💫
الله رزقني بخدمته .. وهواي اشكرنه
الف انعم الله من اخدمت .. سيد الجنه
للخدمه اشد اوزاري .. وقرايه اسوي بداري
لسيد الجنه
🔵🔵🔵🔵
من خالي ظل وجه السمه .. أربع اقمار انطيته
اول گمر اسمه انكتب .. رب الوفه بجنسيته
چنه علي احساسه ترف .. يتفايض بحنيته
بالكون ماتلگه مثل .. عباسنه بتربيته
انذرته فدوه لفاطمه .. وهواي اشكرنه
الف انعم الله من اخدمت .. سيد الجنه
بالطف رسم آثاري .. وقرايه اسوي بداري
🔵🔵🔵🔵
موسى الكيلم بسيرته .. بهارون شد آزاره
والله لمحمدنه علي .. خلاه يبات بداره
وبكربله ابني الگمر .. الله لحسين اختاره
مو غار لو عصه لزم .. كض سيفه بي شن غاره
وبالرايه هوس عالنهر .. وهواي اشكرنه
الف انعم الله من اخدمت .. سيد الجنه
وبس عالحسين اخباري .. وقرايه اسوي بداري
🔵🔵🔵🔵
بجفوفه زينب من مشت .. عباس مثل السبحه
ماطاحت من ايده أبد .. شايف جبل هد صرحه ؟
چن طير واكف عالخيم .. ويفيي الها بجنحه
بعينه بسهم من انجرح .. خجل الدنيا بجرحه
وفّه ونعم من خوّته .. وهواي اشكرنه
الف انعم الله من اخدمت .. سيد الجنه
ماتنطفي اعليه ناري .. وقرايه اسوي بداري
🔵🔵🔵🔵
يسموني آنه ام الوفه .. للزهره فدوه احبابي
ام البنين و أفتخر .. ماارده ليدگ بابي
ويه الزجيه انصب عزه .. مصاب الحسين مصابي
على حسين حتى بالگبر .. الطم وسود اثيابي
خادمه الكلمن يخدمه .. وهواي اشكرنه
الف انعم الله من اخدمت .. سيد الجنه
واقره عليه اشعاري .. وقرايه اسوي بداري
🔵🔵🔵🔵
الگال ماكو بهالسنه .. لطم وعزاء يخصنه
خيجيبه دربه وياخذه .. وبحچيه لايخبصنه
مانصيد بالماي العكر .. بالعسل نشمر شصنه
الماكل بماعون الشمر .. گلوله لايوصلنه
واليحضر بكل تعزيه .. اهواي اشكرنه
الف انعم الله من اخدمت .. سيد الجنه
والبالعزه خطاري .. وقرايه اسوي بداري
🔵🔵🔵🔵
علي حسين المنصوري
مقدمه
يامن نويتو ترحون. گبل السفر سمعوني
انه بنص نهاري وبيتي صار اضلم
شما حاول اضمها الدمعه ماتنظم
اخذوني يبويه الدنيا ماترحم
ذبلانه وعليله بكل مكان ارهم؟
اخذ مكان زغيرون يهل الرحم جربوني
انه اتمنيت اموتن ياالابو احسلي
خواتي اعله الهوادج من يصيحلي
مكانچ هذا ويانه يگللي
وچف عبدالله شاله يريده يوصلي
مدالي چفه تشوفون. عينه تصد لعيوني
**
شنهو يصير اذا وياكم انه ارحل
خلي امشي مشي لوما يصح محمل
لو ساعه انتظرني بضعنك اتعطل
منا للعصر بلكت بعد اذبل
ماريد اتعب اليمشون. لو رادو يصعدوني
**
اسأل ضلتي باالدار شنهيه
وانه الوحدي وكل اهلي ماهيه
البيت يضل خرابه بغير راعيه
وسفرتكم احس ما الها تاليه
مااشوف اليه اتردون. وبغربتي تعوفوني
**
مشيتو والدرب خطواته جرحني
ورقيه وعمتي راحن مشن عني
بسوالفهن اگولن هم يذكرني
بساعات الوداع هوايه بچني
مدري اهلي من يلتمون. وكت المسه يذكروني
**
سعد العبودي
سافروا عني ونسوني ومااجوني.
وبين دمعاتي وحسرتي ضيعوني
اغله الاحباب. عني غياب.
مااجوني
حملوا ظعن المناية وتاريكيني
وآنه بعيون الدمع يبجي حنيني
كتله يابوية تجي لوما تجيني
كلبي لاجمني بسفركم تهمي عيني
شفته نزلت علوجن حمرة دمعته
والجواب اعرفته حالا من سكته
يعني ميعود كلبي ممرود
مااجوني
احجي وي الدار انوح وناري بيه
هنانه جان حسين يكعد وي رقيه
هنانه جنت اشتم ركبة ابن الزجية
والله لو اندل رحت للغاضرية
بين جدرانج يدار اسمع حسرتي
ومن مشوا عني الاحبهم وحشه صرتي
كولي يادار. كلبي شب نار
مااجوني
كولي يدار الاحبهم هم يجوني
واكعد وياهم واكولن مانسوني
شكد طويل الليل ويهيج شجوني
ياكلب يذبح حنين الفاركوني
مارجع منهم جواب ورد اليه
خاف ابوي اتمرضت عنده رقيه
شنهي الأسباب ماكو اجواب
مااجوني
تربي عيني اعله الدرب يوصل خبرهم
بلكي طارش جايني ايخبرني عنهم
جائز احبابي نسوني مااظنهم.
عمري راح اكضي اعيش انا ابأملهم
آنه عافوني وحيده وي الاماني
مااصدك يرجع ويصفه زماني
صارت احلام. ذيج الأيام
مااجوني
اه يادار الاحبهم وشبكالي
انه فاركت ابحياتي اغله غالي
بعد ماترجع ابد ذيج الليالي
ولايرد حسين ويشوف الجرالي
مايجيني يشوف دمعاتي الاكتها
ويسمع الونه الابد مافاركتها
الدنيا يحسين. بي صفت وين
مااجوني
يالعفتني وسافرت هايالعفتني
وبين جمرات المدامع ودعتني
غيرتني الفركه بعدك غيرتني
وبين مرضي وبين فركاك اتركتني
انه وي الدار اسولف واشكي حالي
خالي يادار الاحبهم ليش خالي
ياهوى الروح. كلبي مجروح
مااجوني
عندي وردة وجنت اساكيها بدمعتي
كلت من يرجع ابوي انطيه هديتي
تكبر الوردة واحس تكبر حسرتي
ليمت ايعود واقدمله وردتي
تكبر الوردة وامل وي روحي يطلع
حتى اقدمها لبوي بيوم يرجع
راحت ايام. وردت ايام
مااجوني
من اجه الناعي ونعى دمعاتي صبن
هدم اركاني واحس رجليه ماتن
طاحت الوردة من ادية وكل شي سكن
واظلم الكون واحس اعظامي بادن
يااهل ياثرب يصيح احسين ذبحوه
صحت لو ميت اريده اليوم جيبوه
بس احاجيه. واشبك اعليه
مااجوني
شاعر اهل البيت: حسين العبودي☆●#
محرررم 1444 هـ ( فاطمة العليلة )
بمان الله تردولي بمان الله
اويه عبدالله ترجعولي بمان الله
دعيت المغربية . يربي احفظ رقية
بمان الله
افرشت دمعي .. ودعيت آنه السلامتكم
يربي ادعي .. تردون الحبيبتكم
گمت أنعي .. واشمن بيدي ريحتكم
هلي يالرحتوا من دنياي صحت اهواي الله اوياكم
دعائي ابكل وكت وابصوت كون الموت ما يدناكم
الهجر ذابحني يالأحباب يم الباب گمت انعاكم
لون بيدي أرافگهم لون بيدي
ويجي عيدي واشابگهم لون بيدي
رفعت اشگد ادية . يربي احفظ رقية
بمان الله
__
على بابي .. كتبت اشگد اساميكم
يغيابي .. صحت للموت اتانيكم
على اثيابي .. عطركم ظل واشم بيكم
أرشن عتبتي بدموع والموجوع گلبي اعليكم
أريد اشتم هواكم حيل وكت الليل وين اللگيكم
ردت طارش يمركم ريت واتمنيت يوصل ليكم
رسايلكم أناطرها رسايلكم
أون الكم وادورها رسايلكم
واصيح ابكل مسية . يربي احفظ رقية
بمان الله
__
تعالولي .. صحت يهلي تعالولي
تردولي .. ردت واختي تجيبولي
ولا لوي .. بعد عبدالله ما لولي
صحت عبدالله بس خلوه لتعذبوه واتعذبوني
الحضن خالي من امناغاه أحچي اوياه بس خلوني
تعود چفي يشبگ بيه وايغطيه بين اعيوني
حبيب اختة رحل گوه حبيب اختة
يجي ردتة اشكثر توه حبيب اختة
رغم حزن اللي بية . يربي احفظ رقية
بمان الله
__
على صدرة .. أبوي اشگد اريد اغفة
انه ابكثرة .. أحن كل يوم اكظ چفة
شنو عمره .. اليفارگ بالزغر ولفة
أبوي الما نسيتة ابيوم ردتة الدوم يبقى اوياية
عدل ميت ولا أدريه شنهو البيه حرت ابهاية
ترك بنتة العليلة اتلوب كل اغروب دمعي اهواية
البلا والد تون تالي البلا والد
الگلب فاگد نفَس غالي البلا والد
اوية دمعاتي الجرية . يربي احفظ رقية
بمان الله
__
رجف گلبي .. انه ابظهرية العاشر
كثر تعبي .. واحس اهلي بلا ناصر
صحت ربي .. ببوي الغالي وشصاير
انكتب فوگ التراب إحسين طايح بين خيل او خيمة
وحيد اموذر اعله الگاع طاح ابساع وسفة ابهيمة
واخية ابإيدة راد اهواي ينطي الماي چم ايتيمة
وعد خية ابو فاضل وعد خية
إله امية يرد شايل وعد خية
بجاه الراح اخية . يربي احفظ رقية
بمان الله
حيدر الحلفي
قصیدة:رساله
ـــــــــــــــــــــــــــــــــــــــــــــ
رساله حزینه..من ادموع العلیله
کـتبها ابونیـنه..گلبها التشـتکیله
بدت تکتب..لچن تعتب..علیمن ماخذوها
مـدامعها...تلـوعها...عـلیله و فـارگوها
رساله رساله
ــــــــــــــــــــــــــــــــــــــــــــــ
کتبت اسطور الرساله من دمعها الما نشف
یاهلي عفتوني شمعه ذابت ابنص الکهف
گلبي یوجعني علیکم حاضن اجروحه و رجف
یا جرح یلهیني عنکم بس أحشْمکم نزف
تحاچي گلبها..بعدماکو وسیله
یسجل عتبها..گلبها التشتکیله
بچت سکته..غفت حته..ابحلمها ما لفوها
تعاتبهم...تراقبهم...یجوها و ما اجوها
رساله رساله
ــــــــــــــــــــــــــــــــــــــــــــــ
نایبات الدنیا تجرح من یجي وکت الغروب
عین عالباب و تناطر عین تشبح عالدروب
اتصیـح یا اهـلي تعـالو نـارکم بـیْه تلوب
اشلون عفتوني علیله گلبي من ناره یذوب
مواقد دمعها...تشب ماتطفه لیله
گـعد یسـتمعها..گلبها التشــتکیله
دمع خدها...ثگل عدها...تألمها المدامع
گلب طفله..الحزن کله..تشوفه ابعین واقع
رساله رساله
ــــــــــــــــــــــــــــــــــــــــــــــ
ضّلت اتحاچي صورهم لیش دون اللي مشن
ما خذیتوني ابضعنکم الله لا ینطي الزمن
آنه بتکم لو نسیتوا عفتو طفله ابهالوطن
وین عبدالله و رقیه اعیوني اعلیهم عمن
تسولف أملها...سمه الفرگه ثجیله
یسکّـن وجلــها..گلـبها التشـتکیله
ابأسامیهم...تنادیهم...تحشّم بالغوالي
یولیاني...یخوّاني...منو الیرحملي حالي
رساله رساله
ــــــــــــــــــــــــــــــــــــــــــــــ
صاحت اشتاگت عیوني عندي چان اشگد خوات
هسه لو أجیبن أسمهن شو أحسْن حایرات
مدري آنه الروحي ضاعت لو خواتي الضایعات
احنه سـترالله سـترنه مو بنات امیسّرات
حزنـها الـتلوحه..گلبـها ما یـشیله
یضمها ابجروحه..گلبها التشتکیله
تگول أفجع..من المدمع...وداعي وي خواتي
أحن الـهن...مشـن کلهن...بقیت ابنایباتي
رساله رساله
ــــــــــــــــــــــــــــــــــــــــــــــ
هذه واقع و هیه تعلم ما یرد کل الزمل
عالثره توگع زلمهم بین السیوف و نبل
تدري عمتـها سبـیه ترجـع ابچفها حبل
ابناگة العباس راحت بس ترد اعله الهزل
تضیّع عمرها...عله الرحله الطویله
یعظّم اجرها..گلــبها التــشتکــیله
اعله گد الهم...منو الیهتم...یوصّل هالرساله
لأهالیها ...یواسیها...ابذبح لحسین و آله
رساله رساله
ــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري...المحمره
قصیدة:مشکوره یأم البنین
ــــــــــــــــــــــــــــــــــــــــــــــــ
مشکوره یاأم الوفه یاأم البنین
ــــــــــــــــــــــــــــــــــــــــــــــــ
یل جبتي عباس الگمر مشکوره
نعم الأخو ونعم العضید أبدوره
صـولاته ضـلت بالزمن مـذکوره
عاشوره منّـه و هوّه من عاشوره
نعم الولد جبتي وبکبرته أتعبتي
مشکوره یاأم الوفه یاأم البنین
ــــــــــــــــــــــــــــــــــــــــــــــــ
مــا طلــگن و لا جــابن الوفّــایه
مثلچ ولد من زغره عنده احچایه
کــل الفــخر یاأم البنیــن أبــهایه
ابضعن الحسین أبنچ یشیل الرایه
أبنچ رفـع راسچ حي الله عبّـاسچ
مشکوره یاأم الوفه یاأم البنین
ــــــــــــــــــــــــــــــــــــــــــــــــ
بس أنتي جبتي هیچ أخو الخوّانه
یفــدیهــم ابدمــه و یعــظّم شـانه
لمّن ســمع ضــنوة علي عطــشانه
شال الشریعه و یمـها ذب ذرعانه
جاب النهر بیده یم خیمة اعضیده
مشکوره یاأم الوفه یاأم البنین
ــــــــــــــــــــــــــــــــــــــــــــــــ
ماشفــنه أم عـدها وِلِـد تهـدیهم
واتـگـول لو عنـدي الف افـدیهم
بس انتي اولادچ نجـحتي بیـهم
یکفي الفخر لحسین باچي اعلیهم
کل أربع أولادچ جابولچ أمرادچ
مشکوره یاأم الوفه یاأم البنین
ــــــــــــــــــــــــــــــــــــــــــــــــ
باچر یجـازیچ الحـسین أبروحه
عندچ أجر عند الله گد أجروحه
یل جبتي عمرچ بالصبر مذبوحه
نعم الله لو عینچ بچت مسموحه
باچر یکض أیدچ یشفعلچ أولیدچ
مشکوره یاأم الوفه یاأم البنین
ــــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري....المحمره
#جديد_محرم_
#للشاعرة_ام_رائد_زوين
✿〰✿〰✿〰✿〰✿〰✿〰✿
قصيده مقدمه للعليله ع
انه وجروحي بقيت بدارهم
ونتظر بالكن تمرني خبارهم
✿〰✿〰✿〰✿〰✿〰✿〰✿
راحو احبابج يروحي شيردهم
بعد. مايرجع. للديره. ضعنهم
للمنايه مشو. ايسي. منهم
عليج ياروحي يطول غيابهم
✿〰✿〰✿〰✿〰✿〰✿〰✿
بقت اطوف بخيالي ذكريات
هاعدل حسين هاياروحي مات
هابقت زينب متحتاره بيتيمات
شلون وحدها تباري عيالهم
✿〰✿〰✿〰✿〰✿〰✿〰✿
بويه يحسين دلالي نصدع
ليش منكم ليه ماواحد رجع
النواظر دم تهل لا مودمع
والجفو مادري شنهو الصابهم
✿〰✿〰✿〰✿〰✿〰✿〰✿
خابت الامال ليه مايردون
رويحتي بغيابهم ها تقنع شلون
افراك احبابي وابد ميهون
بالدار ماشوفن بعد انوارهم
✿〰✿〰✿〰✿〰✿〰✿〰✿
شيرد السكنو بديره غريبه
عليج موهينه يروحي هالمصيبه
تعمي الناظر الدمعات السجيبه
شلون اصبر ومادري حوالهم
✿〰✿〰✿〰✿〰✿〰✿〰✿
بقلم الشاعره ام رائد زوين
#قصائد_في_خدمة_الخطباء
#محرم_١٤٤٦
#اليوم_الأول
(وزن النّصّاري)
١/عَلى نيّة مُواساةِ الزّچيّه
بْمُصاب حسين بارض الغاضريه
تِصُبّ دموع عين الجعفريّه
وتشبّ بْكل گلُب نار المُصيبَه
٢/نِحضَر كل سنه بْسودِ الملابس
وْنِحيي بالبَچي هاي المَجالس
نِبچي عْلى اللّي مات وْثغرَه يابس
وقَليله عليهْ دمعتنا السّچيبَه
٣/نِواسي فاطمه بالطّاح ظامي
وْمن كِثْرِ الطَّعَن كل جِسمَه دامي
كلمن لَجْله يِصرَخ "وا إمامي"
ويِسَمِّع فاطِمَه الزّهره نَحيبَه
#عظم_الله_أجوركم ◾️
فاطمة علي رزق
اسألكم الدعاء
برنامج محرم الحرام 1446 هـ
قصيدة بحق ام البنين ع (7)
الليله اجي زاير واقره الفاتحه
و كبرچ تبلله ادموعي الطايحه
لعالم اجروحج اسافر
……..
شد حيله بعيوني الدمع .. والروح الچ مشتاكه
والدنيه بيه اتمايلت. .جن هودج اعله الناكه
المهدي أنه ومن غربتي .. وي غربتچ اتلاكه
وسولفنه شلعان الگلب .. بحسينچ وبفراگه
اني وانتي بلا اهل ضلينه
كلمن ينام ودمعته بعينه
بجفني دمعي يبقى حاير
...................
كالولي عالباب انتهه عمرج وضهرج مايل
ومن لاح الحسين العطش صبح احساسج ذابل
تبجين وانتي بلا نفس وعالچفن دمعج سايل
وانه ابچي من دم عالنحر مثل البچه اعله الكافل
اليوم نتلاكه بدموع اثنينّه
ام وابنهه وننحب اعلى احسينّه
عشت عمري .. بكسر خاطر
............
لارض المدينه من اجت زينب وگلبج يسأل
هالضعن ليش ابلا زلم وعالنوگ مامش محمل
عالوجه طحتي من الهضم من سولفَت عالمقتل
ودم الحسين من الذبح والسحك بالطف وشل
الشمر ماكفا الحافر داسه
كبال علوياته شايل راسه
من جرحنه بيوم عاشر
...............
چان انتظارج بي حلم... ترجع ايام العشره
يلمكم حسين بخيمته ... چن سبحة امه الزهره
خلصتي عافيتج نذر ... بس ماكضت هالسفره
تاليهه طشرهه الوكت .. كلمن ورمحه ونحرهه
وانه بالدنيه انتظاري بلوعه
چن گلب مسجون چوه ضلوعه
عالمصايب .. بس اكابر
..............
بالعاده لو مات الولد .. بالدفن تحضر امه
ولو ماتت الام الابن .. يحضر بدمعه وهمه
نعشج طلع وبلا ولد .. عاف بدليلج لجمه
گلبج ياام الاربعه ... هالليله الله يرحمه
في امان الله ييمه ادعيلي
بالفرج هالغربه هدت حيلي
ب اه يومي. .. ودمع باجر
لعالم اجروحج اسافر
………
نسالكم الدعاء
حسين صادق العقابي
1446 هـ
#قصيدة_ليلة_العاشر
كأني بالسيدة زينب تخاطب الحسين ع
و تقول
لا تفكّــــــر بالصَباح
نام يالغالي استراح
و عالحـــرم لا يظل بالك
انه خيمتــــــهن بــــدالك
نام يالغالي استراح
ــــــــــــــــــــــــــــــــــــ
لا يظل بالـــــــك عليــــنه
خوية و شما بينه صار
ربّنه يحــــــوينه ابرحمته
و عينه ترعـــالي الزغار
عالخيـم كســرة ابنظرتك
شنـهو يعـــــني بيها نار
أمْسَح ادمـــوعك يغــالي
و لا تــزودني انكــــسار
كربلا و شــــما تكون
سهلة و لعينك تهون
و اختك اتعوضه دلالك
انه خيمتــــهن بـــدالك
نام يالغالي استراح
ــــــــــــــــــــــــــــــــــــ
شو دمعتـــــــك عاليتامة
حسرة حسرة تنحدر
عالجمر لو حتى سحگوا
يطفه تالــــيته الجمر
ابتســم راويني ثغــــــرك
خويه و أكسـبّلك أجر
تدري بيَّه شگــــــد احبك
و انكسر مـــن تنكسر
روحي تتحول سراب
من اشــوفك بالعذاب
يالحَنيـــن اذّاني حــــالك
انــه خيمتــــــهن بـــدالك
نام يالغــالي استراح
ــــــــــــــــــــــــــــــــــــ
لا تظــــــل ابهذا وضعك
و لحــــضن اختك تعال
وينه نحـرك ارد ابـوسه
و ارد اشم عطر الجلال
خويه و امشينه لبناتك
نقره ايـــــات الـــــدلال
قُل اعوذُ مــــن سبيهن
و قُل اعوذُ امن الحبال
شو رجع دمعك يسيل
ويـــنّه او ويـن الهزيل
لا تهم و شما جـــــــرالك
انــــه خيمتــــــهن بدالك
نام يالغالي استراح
ــــــــــــــــــــــــــــــــــــ
اقره بعيونك ســـــــــوالف
منّـــك اسمعــــــهن اريد
شبيها يا خــوية الشــريعة
و منّها ليــش اترد وحيد
ابدمعتــك مرسومة جربة
و راية طاحت مـن بعيد
الله ليــــــگول و دخيــــله
ذنّي بــس لا للعـــــضيد
كافي لا مـاريـد اشوف
كافل اخته ابلا چفوف
خوية ضــــــم عنّي خيالك
انــــه خيمتــــهن بــــــدالك
نام يالغالي استراح
ــــــــــــــــــــــــــــــــــــ
شوية عينك خلها تغمض
خويه و ادخل للخـــــيام
نـــــــام حتى ابليـل باچر
احنه هـــــم نگـــــدر ننام
بالصـــــــلاة و بالعــــبادة
نگضي شوط امن الظلام
و لو جِسر جنـــدي يرده
علي الســــجاد الامــــــام
باچـــر انه و البنات
وين ما نتعـب نبات
صبري هذا مــن خلالك
انه خيمتـــهن بـــــدالك
نام يالغالي استراح
ــــــــــــــــــــــــــــــــــــ
كافي خوية ارتاح كافي
مــــــا بقه شَــي للصُبـح
ضُمّه حيلك خاف باچر
راح تتـــــــعب بالــــذبح
و انه گتـــــــلك لا يهمك
عوفه لام عــــون الجرح
و لا تعاين عالهـــــــزيلة
و انته صاعد عالـــــرمح
إلرمـــح ما بي امان
گلبه ميت من زمان
خوية لو فــوگــانه شالك
انه خيمتـــــهن بــــدالك
نايم يالغالي استراح
ــــــــــــــــــــــــــــــــــــ
الحمدلله
#علي_حسين_الكناني
الســلام علــى أّم البنين الطاهـــره
الســلام علــى أّم البنين الطاهــره
*
يــا سلام الله على الطيبــه الجليلـه
علــى الضحت أربعــه دون العقيـلـه
الوفيــه الصابــره الحــره الاصيلـــه
الكلها بالطــف بالمـواقــف حاضــره
*
يــا ســـــلام الله علـــى أم الامــاجــد
ألألها تاريخ الفخر لــي هسـه شاهـــد
أربعـــه أنطــت مـا بقه تچايـه واحـد
فــدوه لأبـن الــزهـــره كلهـم عالثــره
*
عجزت أبحور الشعر توصف بحرها
شمعه لحسين وحسن نذرت عمـرها
بالمــدامــع وصّـت الغـــالي گمــرها
يبنــي بـالك تبقــى زينـــب حــايـره
*
قـدّمــت أربــع كــواكب من سمـاها
الباري بالطف عـز قدرها وكــرمـاها
والمجــد طـول الزمــن بيهـا إيتباها
بحـــر جــــود وللمــواقــف حاضـره
*
للكــرم شــــلال طافـح بيــن أديـهـا
بحـــر زاخـــر مــــا تـــرد اليعتنيــها
تگضي حــاجاتك لـون تقـسم عليـها
بالحسـين وعطــش گلبــه ومنحــره
*
قــاضيه الحــاجات هـاي أم الكرامه
ضحت بكل شي لأجل نصر ألإمامـه
الشفيعــه الشـــافعه بيـوم القيـــامه
إلنّــه توگــف بالشــدايـد حـــاضـره
*
الشاعر
موسى البديري
عنوان القصيدة / #وين_حظنك_وين_اديك
اليوم الثاني /العلية عليها السلام
بابه بابه.. وين حظنك وين اديك
بابه بابه.. انشد الطارش عليك
عليله ودعتني
گلتلك ماخذتني
بابه بابه..وين حظنك وين اديك
****
بويه شفت الباب حسبالي اجيت
ازحف اعله الباب بالگوه اعتنيت
من اجيتك مالگيتك دم بچيت
اني فاطمتك عليله مانسيت
روحي روحي.. طالعه تريدك تجيك
روحي روحي.. هي كلهه بين اديك
جبيره فارگتني
گلتلك ماخذتني
بابه بابه.. وين حظنك وين اديك
****
گمت احس بعمري يمشي عالسريع
من خذتهم ماعفت يمي الرضيع
واني ورگه وطيح عيوني الربيع
واني لمرك طايعه وبويه اطيع
وأنه وأنه..هم عليله بلادواي
وأنه وأنه.. ينتظر شامت وراي
والدنيا مرضتني
گلتلك ماخذتني
بابه بابه.. وين حظنك وين اديك
****
لحظة إدراك انتهت عندي الحياة
وگمت اشوفك رايح الدرب الممات
وسجني صاير شمتك والذكريات
چنت انامن اغفه وبحظنك ابات
هيجي هيجي.. شلون گلبي يستراح
هيجي هيچي.. منطي صدرك للرماح
غريبه من عفتني
گلتلك ماخذتني
بابه بابه.. وين حظنك وين اديك
****
گون اصيرن ريشه وبراس الكفيل
حتى اروح وياك للطف الثكيل
ماخذتني بهودجك وي العليل
حتى انطي عيوني لعيونك سبيل
نوحي نوحي.. بدارك ودمعي يسيل
نوحي نوحي..ماخذتني ويه العليل
شبگتك شابگتني
گلتلك ماخذتني
بابه بابه..وين حظنك وين اديك
****
كمت احس بروحي كله بكربله
من طلع هودج يشيل العايله
عبدالله گلي شلونه شفته مبلله
لوصدگ گاطع رگبته حرمله
يمه يمه..شلون عبدالله يموت
يمه يمه.. والسهم نحره يفوت
بهجرك تعبتني
گلتلك ماخذتني
بابه بابه..وين حظنك وين اديك
***
بويه احس بالبيت مالايگ الي
اهلي راحو واني وحدي بلا هلي
كون تأخذني وي خيتي بمحملي
بويه امشي عليك محبوبك علي
هايه هايه.. لحظه واخرهه وداع
هايه هايه..وانتهي ويبدي الضياع
المن سلمتني
گلتلك ماخذتني
بابه بابه..وين حظنك وين اديك
#خادم_رقية_عليها_السلام
#الشاعر_مهند_الدريساوي
نزلة/ العليلة
#حظنك_الدافي
احرك الباب اقنع الروح
ابوي حسين يمته يعود
"""""""""""""""""
اشوف الدنيه تزهيلي چان حسين ابوي وياي
اثاري الدنيه رمشت عين عليه اتحزمت دنياي
عطشت الشوفتك يحسين مااعطش واريد الماي
عليله وگلبي ينزف شوگ بس حظنك يصير دواي
اگولن جاي تهده جروح
ابوي حسين يمته يعود
"""""""""""""""""
ادز حچايه ويه الريح بيهه جروحي وونيني
تعال الحضنك اشتاگيت تعال احظني دفيني
عليله وتيهيت ادواي بويه حسين دليني
بچي الفاكدات ابچيت عليك وتنعمي عيني
يبعد العين أخذني النوح
ابوي حسين يمته يعود
""""""""""""""""
لاطارش يمر بالدار واسمع بس خبر منكم
لاميتين يمي هنا اشوفنكم واشيعكم
شلت بهودجك من شال مااريدن أودعكم
دزلي يبويه الريح تشممني عطر الكم
يوالينه الدمع مفضوح
ابوي حسين يمته يعود
"""""""""""""""""
ابن حثلم سمعته يصيح مات حسين وأولاده
سمعته يندب العباس ميت كافل الساده
ناس بلا رحم ذبحوو بغضاً بيه وأجداده
هذا الذنب الشكبره يبقه برگبته گلاده
يطارش ليش عنه تروح
ابوي حسين يمته يعود
"""""""""""""""""
اجاني الطارش ودگ باب گال حسينچ توذر
وبسيفه الشمر مگفاه حزه وگاطع المنحر
وگلالي صدر لحسين بدوس الخيل يتكسر
لطمت اعله الوجه وبچِيت ابوي حسين يطبر
جبير الدار شو مذبوح
ابوي حسين يمته يعود
"""""""""""""""""
وين اهل الرحم والناس اليوم الكربله خذوني
خلوني اشم حسين واشبع منه خلوني
اريد بصفه اموت اليوم اريد بصفه دفنوني
عليله وطلبتي بدنياي وي ينحره يذبحوني
وداع احزان منه يفوح
ابوي حسين يمته يعود
#خادم_رقية_عليها_السلام
#الشاعر_مهند_الدريساوي
لسان حال ام البنين عليها السلام
يحفر بگلبي الفراگ
والروح الهم تشتاگ
ومنين اجيب الصبر ياناس
بعد الحسين امدنگه الراس
@@@@@@@@@@
اصد لظعنوهم وابچي خذت كل حلمي وياها
هجرهم اول المشوار. كل اظلوعي احناها
اباوع والهظم فتني. العتب للروح اذاها
صوتي اخنتگ مالومه بعد هيهات يرجاها
محنيه ماظل حيل من گد الفراك
روحي تون وتنوح. كل لحظه تشتاگ
شيبت مني الجفون
ودم ظل تسيل العيون
ماظل أمل سابني وهواس
بعد الحسين امدنگه الراس
@@@@@@@@@@@@
اموادع بالدمع والآه. وخنجر يأكل بحيلي
ارچعت والهم يمشيني يدار وياي دم سيلي
ياتالي هلي يحسين. يالتسوه سهر ليلي
بس انت أمل دنياي. من بعدك كثر ويلي
تتكسر العبرات وكل ليلي مانام
لو مرن الساعات بگليبي سهام
شهگ واطيحن عالگاع
ضاع الحلم بعدك ضاع
والورد دونك يمه منداس
بعد الحسين مدنگه الراس
@@@@@@@@@@@
هيه الفرگه مو هينه الهجر چتال شيجرعه
حالي من بعد عيناك. يايمه اختلف وضعه
الحسره تگودني والنوح. والياويلي والدمعه
احس عطشانه حيل هواي. ينهر العافيه ونبعه
اصفن عليك بشوگ وفرك بديه
وأرجع واگولن راح مامنهه جيه
الدار ظلمه بلياك
بحساسي وشلون انساك
ياكل بروحي جرح الاحساس
بعد الحسين مدنگه الراس
@@@@@@@@@@@
وشل حتى النظر مني. ابحر بالدرب مرات
اجو لا ما اجو واسكت الگعده من ترد هيهات
زمان الشوم طشرنه. وظلن بس الحچايات
وصوركم تارسات البيت وتذبح صدري الحسرات
اذكرك ونهار وأيدي عله خدي
وشلون اگظي الليل محتاره وحدي
يانبض گلبي يحسين
ياروحي ياضوه العين
بعدك يهشم بيه چن فاس
بعد الحسين مدنگه الراس
@@@@@@@@@@
الخادم عبدالمعين الشمري
أبدور الهواشم والنعم حياهم
ألله ومحمد وعلـــــــي وياهم
كلهم حمية
............................................
بسملة وقربان خـــــــــــــوه وآية العز والأباء
قدموا بالطف ركبهم وجسدوا معنــــــى الوفاء
كتبوا بدمهم رواية مــــــــــــــن ملاحم كربلاء
ورسموا أخيام وشريعة وجربة وأجفوف ولواء
ومثل الشمس خالد يضل ذكراهم
ألله ومحمد وعلـــــــــــــي وياهم
كلهم حمية
.................................................
من وحـــــــــــــي عرش الوفية فاطمة أم البنين
جانت أحروف الوصية آيــــــــــــة الفتح المُبين
أستبشر حسين وتبختر عـــن يسار وعـــن يمين
من قــــــــــــره بعيون أخوته يا حبيبي يا حسين
أحزام الضهر بالشدة يا محلاهم
ألله ومحمد وعلــــــــــــي وياهم
كلهم حمية
......................................................
نزلوا وشدوا عزمهم يا علـــــــــــي وكت النزال
ورجت الكــــــــــاع بحملها تبين أصناف الرجال
وكفوا وعباس هـــــــــــــوس وأبتدى سوح القتال
رفت الراية وعجيبة أهنانه يتولد ســـــــــــــــؤال
عباس من نزلوا شنـــــو وصاهم
ألله ومحمد وعلـــــــــــــي وياهم
كلهم حمية
........................................................
أبتدت تدوي المعاره وبينت حدهــــــــــــا الركاب
عـــــون عبدالله أويه جعفر كتبوا أحروف الجواب
وقعوا بالــــــــــــدم عهدهم وترسوا أعيون التراب
لحد ما طاحوا ضحاية وصبــــــغ شيبتها الخضاب
هوس كمر هاشم ورف ألواهم
ألله ومحمد وعلـــــــــي وياهم
كلهم حمية
.......................................................
حان وكته كمر هاشم وأرتجل شال اللــــــــــوه
ولمع فقاره أخو زينب وأنكطع حتــــــــى الهوه
هندس الكون وضلامه وأرتعب طــــــــف نينوه
والزلم لاوين تشرد صحرى وأتلاكي ضـــــــوه
جرة النفس كوه الكمر خلاهم
ألله ومحمد وعلــــــــي وياهم
كلهم حمية
.................................................
قرب ميعاد المنية وحـــــــــــــــــان ميعاده النذر
ولازم العباس دمــــــــــــــه أيحني جف أم الخدر
فاطمة عدها الوصية وربته الزينب ذخــــــــــــر
وتدري ضهر حسين باجــــــــر عالشريعه ينكسر
الهذا الوكت حيدر علي رباهم
ألله ومحمد وعلـــــــــي وياهم
كلهم حمية
...............................................
خادم خدمة الحسين
الشاعر
محمد الموالي
الليلة الثالثة
#قصائد_محرم _ع_١٤٤٥_ه
العليله
يا آل الله يكتل فرگاه
لاخذني الموت لارحت وياه
يمته احسين ايرد الي
____
زغيره او اهلي عافوني ابنار العلّه والفرگه
لا عـنــدي صـبـر ايـوب ولا بـيهم امل ملگه
ذبلانات اعيوني ياعالم رحموني
گلبي المشتاگ كاس المر ضاگ
وينك يحسين مو كافي افراگ
يمته احسين ايرد الي
____
طالـت غيـبـة احبابي گلـب ماعـندي يـتحـمل
لا طارش وصل منهم ولا درب الطفوف اندل
ماعندي كل چاره دمعي جف مداره
ماضلت روح تعبني النوح
لا وده اخبار لا طيفه ايلوح
يمته احسين ايرد الي
____
عيني اعله الدرب وانعه يريته يسمع اونيني
اشـوغ ابـكـل مغـربيه يبـويه اشــعطلك عني
يا اغله امن انفاسي هجرك شيب راسي
ابنيتك يحسين شيبها البين
وانت ابهل ليل مااعرف وين
يمته احسين ايرد الي
____
مر بيه حلم يحسين اسويعه او كحل اعيوني
عليه خل اسولفلك واشوفك حالتي او لوني
لا بالماي اتهنه لا للزاد اتدنه
كل ليلي هموم وانشد لنجوم
احسين بيا حال او يرجع يايوم
يمته احسين ايرد الي
____
عليه ضاعت اخبارك مثل عافيتي من ضاعت
مناشير او تگص بعضاي هيچي ابنيتك لاعت
يل امّرمر حالي ليل انهار ابالي
هم ليه اتعود ؟ واتهنه اردود
وانسه الشوغات وايام السود
يمته احسين ايرد الي
____
اناطر دربك اچم ادوب واضل اعله الدرب لشگد
يبويه الموت وازاني واحس حيلي تعب وانهد
ما احسب نتلاگه كلمن ضل بشواگه
من عني امشيت ابموتي حسيت
اخلافك محتوم لوما رديت
يمته احسين ايرد الي
____
ابو فاطمة الطائي
وين تردون بضعنكم وين بويه يحسين
*
عني مشيتو بويه وجزيتو
واشكد صحت وراكم بس ما اجيتو
من سارن النوك جن كلبي مبيوك
وكل ما يبعد ضعنكم يتكاثر الشوك
ضليت اون عليكم وصفك باليدين
وين تردون بضعنكم وين بويه يحسين
**
انشد عليكم روحي انه بيكم
حته الهوه الاشمه ياخذني ليكم
اكعد عله الباب وترجه الاحباب
حسرات اكضي ليلي وبكلبي الصواب
عكبك طحت اعله وجهي بالعتبه مرتين
وين تردون بضعنكم وين بويه يحسين
***
انه العليله وياهو اشتكيله
رحتو وليلة سفركم ما منها ليله
يمته ترجعون وشلت العيون
غير بويه انه العزيزه عدكم تكولون
ريضو صحت وراكم ودموعي بالعين
وين تردون بضعنكم وين بويه يحسين
***
نار بدليلي وسهرانه ليلي
تدري الهجر كتلني وهد بويه حيلي
عفتوني وحدي ودمعي اعله خدي
رحتو وضلن صوركم بس هنه عندي
كلش طول سفركم يالعني ماشين
وين تردون بضعنكم يابويه يحسين
**
بيه الحمل مال وتغير الحال
وجدمي ضل بجفاكم بالكوه ينشال
بطيفي شفتكم وتذكرتكم
كل عمري بويه تدري ما زعلتكم
حادي الضعن يكلي لازم ترجعين
وين تردون بضعنكم وين بويه يحسين
*
بيه الوكت دار وكلبي يشب نار
وحشه وضلت عكبكم ما تنطب الدار
لميت الهدوم وترجه كل يوم
ومن عادت اليتاني ما يعرف النوم
ضلمه الدنيه شفتها عكب البعيدين
وين تردون بضعنكم يا بويه يحسين
*
تمت
تحسين الخفاجي
عفتوني عفتوني ويحبابي ضيعتوني
تانوني تانوني مو راح تعمه عيوني
يهل المحنه يهل المحنه
**
بيدي الهدوم وكلبي ملجوم بلكت اكسر خاطر الحادي ويردلي
وحدي بالدار وفكري محتار ليش محد امشي ويانه يكلي
كل ساع اطيح اعله الوجه ويكلي ابوي اسم الله
تدرون مو يم المرض ضل بالي يم عبد الله
بجاني بجاني والحادي ما صاحاني
خلاني خلاني من دون كل اخواني
مغربين اهلنه يهل المحنه
****
من تروحون اصبر اشلون يهلي تكتلني بجفاكم كعدت الباب
ليش اليروح ياخذ الروح ينعصر كلبي عصر لو طال الغياب
اشلونج يكلولي الخلك وانه يبويه اشلوني
والدنيه كلها من رحت طلعت تره امن عيوني
نتلاكه نتلاكه مدري اشوكت نتلاكه
مشتاكه مشتاكه وطول ابوي افراكه
ونه اعله ونه يهل المحنه
*
وحدي ضليت واظلم البيت والحزن دك باب بيتي وصاحباني
تغير الحال ودمعي همال انه ابوي اعله الهجر ما عوداني
ليش اليتاني اعله الدرب تيبس الدمعه بخده
من وحده اخلص يا هلي والنوب اطيح بوحده
سهرانه سهرانه عيني امن امس سهرانه
حزنانه حزنانه ومن امن القهر ذبلانه
كل شيبي منه يهل المحنه
*
وحشه الليل تاخذ الحيل ينكطع سباح كلبي من تكطعون
ذيج الايام صارت احلام يهلي اطيب امن المرض لو بس ترجعون
بالطيف يابويه امس وكت المسه اتلاكينه
اشلونج كلتلي بددمعتك وكتلك ابد مو زينه
تدريني تدريني افراك الاهل ماذيني
ناسيني نايني وبغربتي مخليني
ضايع املنه يهل المحنه
****
عكب الاحنان كلبي خلصان وجرحي عالحيطان من راحو رسمته
صار الغروب وسدوا لبوب وانه بالباب انتظرهم وبجي سكته
محد اجاني من هلي واحجيله ضيم البيه
والحادي عني من مشه ما كال هاي بنيه
يالغالي يالغالي يابويه عاين حالي
دلالي دلالي اعليك انفطر دلالي
ومكوع ضنه يهل المحنه
*
تمت
تحسين الخفاجي
اخر عتاب . ماكو جواب
——
ياللي طالع بالضعن ارد اروح اوياكم
اسرج الخيل وامد بالخيام افراشكم
بويه لو رحتو بعد كلي وي الكاكم
الله ينساني اذا بويه لحظه انساكم
وكت الغياب. ماكو جواب
——
عيني ما نامت ابد ما تشوف اعيونك
بويه روحي اتحيرت خايفه ايذبحونك
لون ما بيه بعد بس اكول شلونك
لا رساله ولا خبر. وصلت امن اضعونك
بعد العتاب. ماكو جواب
——
بويه ذابحني المرض بس مرض فقدانك
بيا ارض وبيا وطن ماعرف عنوانك
خاف بويه بكربله ارد اشوف امجانك
تبجي بعدك سبحتك وي بچي قرآنك
حتى الكتاب. ماكو جواب
——
وي رقيه اتوسلت خل اروح اوياهه
اختي اغله امن العمر والله ما انساهه
ليش بويه الفاتحه دمعتي تقراهه
يعني اكو موت وبعد اختي ما الكاهه
صاح التراب. ماكو جواب
——
ما نمت ساعه ابد خايفه ومرتابه
اي وحك دم فاطمه والضلع ومصابه
بيتك اظلم بس بقه بويه فاتح بابه
والفقير اللي سئل ما يشوف اجوابه
وين المجاب. ماكو جواب
——-
بويه اخاف امن القدر من يمر ابالي
كل اخوتي بالذبح ما يضل كل والي
ساعد الله دمعتك ياحبيبي الغالي
تشوف ولدك للاسف عالترايب تالي
دم الشباب. ماكو جواب
——
بويه شخبار الضعن والخدر والحاصل
صدك زينب تنسبي والله ما تستاهل
لا اراديه البچي اينادي يابو فاضل
ليش زينب عالهزل انته انته الكافل
ام الحجاب. ماكو جواب
——-
حمزه السماوي
قصیدة:أربع نشامه
في حق ام البنین س
ـــــــــــــــــــــــــــــــــــــــــــــ
خل یسمع المیدان..مني البشاره
ربـیت أله شـجعان..کلـهم غیـاره
أربع نشامه و فُرّاس
ودّت الک أم عباس
کلهم غیاره
ــــــــــــــــــــــــــــــــــــــــــــــــــ
خل یسکت اگبالي الصوت
بأولادي گــلبـي مـبـخـوت
عندي أربـعه احیـود الیوم
مـتنـسیـه بیـهم بـالمـوت
مـن الـزغــر هـالـفــرسـان
یـمها الهـوه ایخاف ایفوت
بـیهـم عــزم داحــي الـباب
گـول و فـعلـهم مـنعـوت
ذوله أربعه و سوح الحرب.. تعرف نوایه البیهم
وگفـتهم اتسـجل أسم..بالحومه عن ماضیهم
بنت أبدوي والراد...یعرف قراري
خـل ینـظر الأولاد...بیـهم وقـاري
نبراس و یتبع نبراس
ودّت الک أم عـباس
کلهم غیاره
ــــــــــــــــــــــــــــــــــــــــــــــــــ
مـا خـلّفت مــثلي النـاس
هیچ اربعه و شالت راس
یکــفیني لـو کلهـا اتـگول
خــیعـونـچ أم الـعبـاس
آنـه أم الما عـاف السـیف
من زغره و یمـلک نوماس
من حگی و لو افـخر دوم
اتـزامـط بـأبني الـفَراس
من حگی افخر بالولد..و آنه اربعه اولادي
ما جابن و لا ینجبن..مثلي أمّـهات الوادي
هیچ انجبت آیات...فنّه الوصلهم
ذوله اربعه و هیهات..اربع مثلهم
اشرف ضیاغم بالناس
ودّت الک أم عـباس
کلهم غیاره
ــــــــــــــــــــــــــــــــــــــــــــــــــ
آنــه ابــرباهــم تـعـبیـت
یامـا ســهـرت و حنّیــت
بـس الحــمد لله الــیـوم
شفـت الـثمر مـن ربــیت
لا تـعــتـقد یـالـمــیـدان
راح انـحـنیلک لو جــیت
أبعبدالله وعون و عـباس
وأبـجـعفر صـوبک هدّیت
ما تنحني العدها ظهر..متحزْم ابفرسانه
بأربع حزم متحزّمه...بأبني الگمر واخوانه
سوح الحرب عنوان...تعرف زلمنه
بالطــف گـمر عدنان...رافـع عـلمنه
های اربعه و ماتنقاس
ودّت الک أم عباس
کلهم غیاره
ــــــــــــــــــــــــــــــــــــــــــــــــــ
کل واحـد البــیهـم حیـد
ما بیهــم شــک و تـردید
راحــوا یخــلّون الگــوم
یم خیـمة لحسین اعبید
لـو زیــنب اتــرید الــمای
بس تحچی یمهم شترید
اولادي و أنعــم مـن گال
مایصــعب یمهــم لبـعـید
بس کافي زینب بالخیم.. تطلب نهر من عدهم
ایشیلون کل المشرعه... و فنه الي یوصل حدهم
ماي النهر مـلزوم...مایحچي حاشه
اربع سقایه الیـوم...تروي العطاشه
بیهم شجاعه و نوماس
ودّت الک أم عبــاس
کلهم غیاره
ــــــــــــــــــــــــــــــــــــــــــــــــــ
خل نفرض اصواب البیـن
مـن عــندي یاخـذ لحنیـن
فـدوه أربعــتهـم مقــبـول
بس ســالم أیـرد لحـسـین
آنــه أم الـوصــیت ابــهاي
عالحـاجب ما تـعله العـین
یــولیــدي لعـضیدک کـون
یـم الــشط تگــطع چفیـن
وصْیته یبني ابکربله...توفي الوعد بوریدک
أنسه الحیات ابلا أخو..ولاتنسه یوم اعضیدک
کلشي و لا مذبوح...اسمع حبیبي
والنایحه و النوح...تصبح نصیبي
اربع وِلد رفعة راس
ودّت الک أم عباس
کلهم غیاره
ــــــــــــــــــــــــــــــــــــــــــــــــــ
خـل تنــذبح هــالأبـطال
وبیـهــم تمــوت الآمــال
بس لا أشــوفن بالــعین
زینــب تچــتفها أحبــال
بت حیدر و ستر الکـون
تهظـمني لـو بـین ارجال
دگلــها صــدره الــعبـاس
والرایــه الزیـنب تفـصال
رایة علي ابچف الگمر...لا ما تطیح الرایه
یاخذها چف المنتظر...واترفرف ابهالثایه
غیرة علـي الکـرار...ابدمهم سریّه
زینب تضل عتبار...حامي الحمیه
حد الشرف ماینداس
ودّت الـک أم عـباس
کلهم غیاره
ــــــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري
قصیدة:دموع المهدي عج
ـــــــــــــــــــــــــــــــــــــــــــــ
وصل شهر المـعظّم
وجناح الدنیا اظـلم
یمـهدي عــظّـم الله
لکَ الأجــر ابمـحرم
ــــــــــــــــــــــــــــــــــــــ
یابوصالح..ها وصـل موعد نیاح الغاضریه
یابوصالح..عظم الله اجرک ابدمعة رقیه
یابوصالح..یامکان ابکـربله تنصب عزیه
یابوصالح..بالمـخیّم لوله تـل الزینــبیه
وصل وکــت الــمناحه
علی احسین و جراحه
ســمعــنه مــنک الآه
لکَ الأجــر ابمــحرم
ــــــــــــــــــــــــــــــــــــــ
هذه حالک..کل محـرم دمعتک تصبح رخیصه
هذه حالک..وانته روحک عالحزن دایم حریصه
هذه حالک..أتّاني امک تنشر ابچفها قمیصه
هذه حالک..احسین مذبوح و جرح گلبه خلیصه
تشــم ریــحة دمــائه
اذا تــنــظر ردائه
أبثیابه املطخه أدماه
لکَ الأجــر ابمــحرم
ــــــــــــــــــــــــــــــــــــــ
یل ونینک..یـعله اکثر یم علایم یامصیبه
یل ونینک..للسـبي لو للذبـح لو للنـهیبه
یل ونینک..یستقر یم جثه مسحوگه و خضیبه
یل ونینک..خطوه خطوه یتبع الراحت غریبه
تـضـل بــأبي وأمـي
جروحک کلها تدمي
مـصابک انــته ویّاه
لـکَ الأجـر ابـمحرم
ــــــــــــــــــــــــــــــــــــــ
هیّه صعبه..تدري ماتوا کل هلک بالطف ضمایه
هیّه صعبه..والتراب ایلامس اجسوم الضحایه
هیّه صعبه..المثل ابوفاضل یصیر ابلا رایه
هیّه صعبه..عالنـهر چفـین تـوگع بالبدایه
سهم عینه و چفوفه
الـک تشـرح ظـروفه
من أیده طایح الواه
لـکَ الأجـر ابـمـحرم
ــــــــــــــــــــــــــــــــــــــ
یامصیبه..ماتـوا اشـگد من شبیبة آل هاشـم
یامصیبه.. وین الأکبر طاح جسمه و وین جاسم
یامصیبه..یا طـفل لمّن عطش رد نحره سالم
یامصیبه..مات عبـدالله و هوت کل العـمایم
رجع ظعن العقیله
عله اظهور الهزیله
تنادي الحـره أحّاه
لکَ الأجر ابمـحرم
ــــــــــــــــــــــــــــــــــــــ
کلمات خادم الحسین ع
عبدالامیرالناصري..المحمره