5870
خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
*ليلة العاشر يعني…*
ليلة العاشر يعني… دمعة وي دمعة تسيل
ليلة العاشر يعني… زينب تودْعِ كفيل
ليلة العاشر يعني… ومدمع الحرّه يسيل
ليلة العاشر يعني… تبچي زينب عالغريب
ليلة العاشر يعني…تودع الليله الحبيب
ليلة العاشر يعني…تبدي آهات نحيب
ليلة العاشر يعني…تسعى زينب بالخيام
ليلة العاشر يعني… ظلها وَي ليل وظلام
ليلة العاشر يعني… تودع الحورا الإمام
ليلة العاشر يعني… عبدالله نحره منفطم
ليلة العاشر يعني… باچر يصيبه السهم
ليلة العاشر يعني… تْوَدْعه أمه بالخيم
ليلة العاشر يعني… جاسم خضابه التراب
ليلة العاشر يعني… وحنته من الدم خضاب
ليلة العاشر يعني…ليلى ناحت عالشباب
ليلة العاشر يعني… تقبّل چفوف الگمر
ليلة العاشر يعني…الكافل بجنب النهر
ليلة العاسر يعني… زينب تروح بأسر
ليلة العاشر يعني… والشمر فوق الصدر
ليلة العاشر يعني…والسهم وسط الصدر
ليلة العاشر يعني… حسينها مفري النحر
ليلة العاشر يعني… راس الحسين برماح
ليلة العاشر يعني…والجسد كفنه الرياح
ليلة العاشر يعني…غسله من دم الجراح
نعي ليلة الوداع.. ليلة العاشر ..
آه ياليلة وداع الغالي
بس بالموادع بقت آمالي
لمي يازينب عليه عيالي
خل اودعكم واريح بالي
..............
آه ياليل الوداع شگد صعب
اخذ روحي وداعك وذاب الگلب
شلون بيه باجر بصحبة غرب
بدون عباس شيخلصلي الدرب
............
زينب بالموادع مانسوهه
اجو اخوتهه للخيمه اعتنوهه
زينب بت علي تبجي لكوهه
عليمن عالنواعي ناشدوهه
............
اجو لام الحزن عباس وحسين
للخيمه اجوهه همه الاثنين
من شالت نظرهه وشافت الزين
صاحت هله بيكم ياضوه العين
............
تگل الهم هله بسباح گلبي
هله بعيني التدليني عله دربي
شالت راسهه وصاحت يربّي
الهي شلون بيه بدون اخوتي
..............
زينب تعاين لعباس الكفيل
ساكته ودموعهه عله الخد تسيل
تگله باجر ما اشوفك مستحيل
من اصيحن ماتجاوب صوتي
............
الخيمه جانت ظلمه وشويه الضوه
تشابگو ودموعهم خلطن سوه
خل اشمكم حيل ماريد الهوه
انتو روحي ودنيتي وآمالي
............
عله هونج ياعزيزتنه عله هونج
تاذينه تره دمعة عيونج
عونج باجر عالالم عونج
الج باجر يبقه ربنه العالي
............
تگله لحسين ياخويه وصيه
الك عندي امانه من الزجيه
كالتلي لون تدنه المنيه
نفذيهه الوصيه وموش تنسين
............
گالتلي يزينب شمّي نحره
وبوسيلي اخيج فوگ صدره
وانظريلي عله عيني شلون نظره
نظرة وحده راح يموت ابنهه
............
سيد علي المدنيخادمة آل محمد✍🏻
قــصـيده لــوداع الامـام الحـسـيـن ع
الـــيــوم اوداع وي اهـــل الحميه
بـاجـر بـس جـثـث فــوك الـوطيه
اليوم اوداع وي زينب المهضومه
تـعـوف خوانها مذبوحه بالحومه
الـلـه يساعـدج عالسبلو اهدومه
تـهـل دمـعـاتهن عـالوجن مجريه
التـمـو بالـخـيـم هل حان الاوداع
ويــا كــلب الـعقـيـله حـيل مرتاع
بـاجــر عـالـتـرابه تـضـل الاسـباع
وي عـبـاس هـاي الخــوه مكضيه
صــار اوداعــهــم والـحـره حزنانه
كــلــهـا تـنـذبـح الحسين واخوانه
تـبـجـي الـيــل زيـنـب كله تعبانه
تــمـشـي خلافهم عالنوك مسبيه
طــب حـسـيـن ودعـهــم الاعـيال
تـتـباجــه اليـتــامه بـدمــع همال
حـسـره بلـكلـب لامـن حجه وكال
عـكـب وداعـهـم مـاضـل عزم بيه
انفل حـزام ابو اليمه انـهدم حيله
بــاجــر بــالهـيــم تركـض مداليله
وراســه عــالـرمح مذبـوح ويشيله
حــان افــراكـهــم مـن غير وعديه
تــــمت بقــــ✍🏻لم خادمه أهل البيت عليهم السلام
✍🏻الشـــاعره الكبيره العلويه ام كنـــان الهاشمــي
لا أجيز من يحذف اسم الشاعره أو من ينسب القصيده له غير مبرئ الذمه أمام الله وأمام الزهراء عليها السلام ع
قصيدة ( ليلة العاشر محرم الحرام 1446)
( من يواسيني )
ليلة العاشر هاي .. من يواسيني
تحترك باجر خِيّم .. وعالنهر سَيّد الماي
من يواسيني
------------------------
اني زينب يادهر .. ماشفت راحه .. لا تعذبني
لو رحل عني الكمر .. غاب مُصباحه.. ما تشاهدني
يامصيبه هالشهر .. تنزف اجراحه.. والله تفجعني
جم ذبيح وعطشان .. اتشوفهم عيني
مابقى عندي إمل .. تنذبِح كُل الإهل
لاكفيلي ورجواي .. من يواسيني
-------------------------
شلون ياليل الألم .. بالله حاجيني.. اني محتاره
وبدليلي جم سَهم .. من يحاميني .. ساعة إخطاره
والخيم هاي الخيم.. انظر بعيني .. تشتعل ناره
امن الصُبح هاي النار .. والله تاذيني
آه ياليل القَدر .. صابني سَهم الدهر
باجر وماكو افياي .. من يواسيني
------------------------
والفواطم تنتظر .. ماتنام اعيون.. الليله سهرانه
والصبر ضاع الصبر .. بالغريبه شلون.. ليش حزنانه
والكلب يلهب جَمُر .. باجر يعطشون.. منهو ويانه
عكب عين العباس .. من يحاميني
لو مِشه راعي العلم .. تعطش اطفال الخيم
بالعطش مات اضماي .. من يواسيني
---------‐---------------
كربله يوم الضِمه .. جمرة احزاني.. ما تفاركني
ياجروح ويا دِمه.. تنزف اخواني.. من تِشيبني
ياعلي يافاطمه .. حايره اني .. وشكبر حِزني
ياهلي اني أم عون .. دارت اسنيني
يافاطمه إندعي .. ياعلي يهل مدمعي
شكد صحت اني هواي .. من يواسيني
-------------------------
الخيل بالعاشر تره.. تسحك الإطفال.. تنظر اعيوني
والظلوع إمكَسِره .. ياصبُر ياحال .. لو تِنشدوني
جم نحر فوك الثره .. والدمع همال .. ينخطف لوني
الخيل آه امن الخيل .. تسحك احسيني
ظَهره باجر ينكسُر.. يرجع وخالي المُهر
بالطف غُربه دنياي .. من يواسيني
-------------------------
الخادم _ ابو فدك الشامي ✍
على لحن ( سدوا الماي الماي )
لطميه ليلة الوداع ليلة العاشر من المحرم الحرام
➖➖➖➖➖➖➖
الليله وداع وي أهل الكرامات
زينب لجل اهلها اتسيل دمعات
➖➖➖➖➖➖➖➖➖
زينب لجل اهلها امساهره الليله
مذهوله ودمعها من دم اتسيله
تبجي والحرب عزفت. مواويله
كلبها عالاخو من الحزن مات
((اتودعينه //كل غالي الليله ))
خادمة اهل البيت ام ابراهيم الحلفي
➖➖➖➖➖➖
اليوم وداع وياكم يل حباب
مايبطل يدمع العين سجاب
هم ضلو ضحايه فوگ التراب
من وداعكم بالگلب كسرات
((وياكم هاي اخر اليله ))
العلويه ام علي
➖➖➖➖➖➖
للوليان زينب حيل مابيها
اليوم بياگلب اتودع اهاليها
باجر عالترابه يضل واليها
حكهه من تون لاهل المروات
(الواليها//وتهل الدمعه)
✍️ ام حسين العامري
➖➖➖➖➖➖
اشلون اصبر وبيش الكلب اصبرنه
كل غالي وشهم هالليله اودعنه
ولو طر الفجر باجر واشوفنه
مذبوح الولي فوك ثره يبات
((وافكد كل عزي// وخواني))
ام حيدر العباديه عماره
➖➖➖➖➖➖➖
اليله وداع وياكم يا الاخوان
وگلبي من الهضم يحسين خلصان
اودعكم يخوتي ابگلب لهفان
صعب افراكم هايالحيادات
(يهد حيلي //ووداع الغالي)
✍️ ام ايه العامري
➖➖➖➖➖➖➖
زينب علئ بقو دموع تجريها
بس اليوم يم حسين واليها
باجر بل يسر ام عون تاليها
من وداع اخوها تهل دمعات
((الوالي فراگه ياذيني))
العلويه ام علي
➖➖➖➖➖➖➖
تمت بأقلام شاعرات رابطة قتيل العبرات
غير مبري الذمه من يحذف اويغير اويتلاعب بالكلمات او يحذف اسماء الشاعرات وينسب الكلام له
✍️ فزاعي سريع للوداع✍️
الليله تنادي بت علي
يصعب او داع اخواني
✍️➖✍️➖✍️➖✍️
الليله حيره حيرتي
شلون اودع خوتي
يا لوعتي ويا هضمتي
ووداعهم اذاني
✍️➖✍️➖✍️➖✍️
ووداعهم ما ينحمل
بس الدمع ظل يهمل
باجر الغالي ينكتل
تبدي وياي احزاني
✍️ ام حسين العامري
✍️➖✍️➖✍️➖✍️
طول ياليل موادعي
خليني اصبن مدمعي
باجر يطول ملاوعي
من تنفكد ولياني
ام ✍️علي الموسوي
✍️➖✍️➖✍️➖✍️
باجر دليلي. ينفجع
عالخيم يهجم هلجمع
وعيوني اتهل. الدمع
وحدي وتهد. عدواني
✍🏻ام زهراء الزيداويه البصراويه
✍️➖✍️➖✍️➖✍️
العدوان توليها الحرم
ماعندي والي بالخيم
مذبحه كل. الزلم
ونار تحرك صيواني
ام ✍️ علي الموسوي
✍️➖✍️➖✍️➖✍️
يحرگون صيواني الكفر
وبعبينه يتلاهب جمر
وتاليها نمشي لليسر
ويصفى الحزن عنواني
✍🏻ام زهراء الزيداويه البصراويه
✍️➖✍️➖✍🏻➖✍🏻
تمت بأقلام شاعرات رابطة قتيل العبرات
غير مبري الذمه من يحذف اويغير اويتلاعب بالكلمات او يحذف اسماء الشاعرات وينسب الكلام له
قصيده للعباس عليه السلام ليلة وداع زينب
لا تنسيني. ..... لا تنسيني
بالخوه البينچ والبيني
💔💔💔💔💔
يا زينب بالخوه الحلوه
لا تنسين ايام الخوه
وفراكچ يم طاهر كوه
وعليچ الدلال تچوه
من الموت أصعب..... دمعچ لو صب
دمعچ يازينب ياذيني
💔💔💔💔💔
تاذيني دموعچ يا زينب
وعليچ الدلال تعذب
من كطع زنودي والله أصعب
دمعچ يا بنت حيدر لوصب
فوك سهامي..... فوك آلامي
ماأحمل دمعج تدريني
💔💔💔💔💔
يا زينب لو دمعچ نازل
ذكر وكولي يا ابو فاضل
انا الكافل وابقى الكافل
وخدرچ يا زينب لا ما يذل
لو كطعوني ..... لو دفنوني
احضر خويه من تندبيني
💔💔💔💔💔
يا بت عودي حك أيامي
ذكريني وحني على آلامي
آنسي چفوفي وأنسي سهامي
لتعتبين بحق الضامي
شاغت روحي...... وكل جروحي
يالحره عتابچ يچويني
💔💔💔💔💔
ما أصبر لا يا خال آبني
ما عاتب وانت الجايبني
شلون ببين الغربه تذبني
وكاعد هالساعه تودعني
لا تتعذر .....كلبي تكسر
دخيلك يالعباس ارجعني
💔💔💔💔💔
لو تدرين بكلبي شلونه
وانا ادري بزينب محزونه
يفداچ العباس عيونه
وأكلبلچ هالطف وكونه
بطلي عتابچ...... خفي وداعج
مسحي دموعج ياضي عيني
💔💔💔💔💔💔💔💔💔
بقلم ✍️ خادمة الحسين أم علي الموسوي غير مبري الذمه من يحذف الاسم اوينسبها له
اجنوبي بقفلة االهوسه
ليله وداع الحسين مع اعياله
~~
اليله حسين يذرف دمع الوادع
ياليلة العاشر، ليلة. اوجاع
💔💔💔💔💔💔
اليله ابو علي يفتر عله اخيمه
يصب دمعات عينيه وزينب تكلمه
تحب نحره العقيله ابشوگ وتشمه
((وتگله اختك.... لتخليها ))
خادمة اهل✍️ البيت ام ابراهيم الحلفي
🔰🔰🔰🔰🔰🔰
اضمك. وين يبن امي حرت وين
عن سيوفهم حاجيني يحسين
بين ضلوعي خويه لوله بالعين
((اكعد يالهيبه وحاجيني ))
ام ✍️ علي الموسوي
🔰🔰🔰🔰🔰🔰
حاجيني يبعد الروح والريه
خلي ايدك يخويه املازمه اديه
مني لو مشيت وما بعد جيه
((خالشبع شوف// من اعيونه))
✍🏻 ام زينب الأسدي
🔰🔰🔰🔰🔰🔰
حاجيني يماي العين يبن امي
يخويه بسواد الليل شو يمي
باجر عالوطيه موذر ومدمي
تخلوني//محتاره بهمي
✍️ ام حسين العامري
🔰🔰🔰🔰🔰🔰
باجر وين تروحون وتخلوني
عميه يبن ابوي لأجلك عيوني
جنتو وياي خوه وماتعيفوني
((مامرت هالفركه بالي ))
ام ✍️ علي الموسوي
🔰🔰🔰🔰🔰🔰🔰
تعوفوني وحيدة أبين الاجناب
شيصير ابحاله خويه اليفگد احباب
امصاب الطف ابد مامثله امصاب
((جمرات الطف تلهب روحي ))
✍🏻ام زهراء الزيداويه البصراويه
🔰🔰🔰🔰🔰🔰🔰
مامرة الفرگه ابالي يخواني
اودعكم اوداع الماله ثاني
اجيت الكربله والظيم لاگاني
(( واحتار لوحدي اتخلوني))
خادمة اهل✍️ البيت ام ابراهيم الحلفي
🔰🔰🔰🔰🔰🔰🔰🔰
تمت بفضل الله وعونه بأقلام خادمات الحسين في رابطة قتيل العبرات غير مبري الذمه من يحذف الاسماء أو ينسبها له✍🏻
🙏🏻🙏🏻نسألكم الدعاء 🙏🏻🙏🏻
هوسات للوداع
ودع عيلته المظلوم وزينب حالها شلونه
تدري حسين بس هالليل لو صبح يذبحونه
يظل متوسد التربان والمنحر يكطعونه
خل نشبع سمر ووداع خويه حسين خلونه
بس هاي الليله//ا وياكم يا خواني
✍️ ام حسين العامري
🧿🧿🧿🧿🧿🧿
خلي اشبع سمر وياك خلني اتعاين الطولك
خاف ياعزيز الروح يبن امي يذبحونك
يبعد عيوني اريد وياك شلي بدنياي من دونك
عشت سنين اني وياك عمر مافارك عيونك
شلون اتوادع هسه وياك //وادري بذحك باجر
ام ✍️ علي الموسوي
🧿🧿🧿🧿🧿🧿
شلون اوداع بين احسين واعياله
يهد حيل الجبل يامصعب احواله
لوطر الفجر تتذبح ارجاله
وحته العلم راح يطيح شياله
وداعه وي العيلة // خلص حيلي واذاني
العلوية فضيلة الموسوي
🧿🧿🧿🧿🧿🧿
روحي اتلوج ممروده آيا اليل الوداعيه
يبن امي یخويه حسين افراگك يصعب اعليه
لاتمشي يبوالسجاد اگعد يمي اشويه
اريدك لصبح وياي اشوفك گبل المنیه
(( ماخذ روحي گبل الموت//حسين افراگك
✍🏻 ام زينب الأسدي
🧿🧿🧿🧿🧿🧿
يا ليل الموادع لاتمر ابساع
ارد اشبع شوف من حلوين الاطباع
وصاني اخوي حسين وانه الگلب مني ارتاع
باجر تفل خوتنه وتضل اجسادهم عل گاع
(( حامي العيله اتگلي + زينب ياهو يحاميها
ام ستار الكعبي
🧿🧿🧿🧿🧿🧿
تمت بأقلام شاعرات رابطة قتيل العبرات
غير مبري الذمه من يحذف اويغير اويتلاعب بالكلمات اويحذف اسماء الشاعرات وينسب الكلام له
خادم الك يحسين حد المنيه
هيهات اعوفك يوم يبن الزجيه
✍️ ام حسين العامري
اليله العاشر أبعاشور اليله آه يليله
باچر كلهم أيطيحون باچر تنسبي العيله
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اليله عاشر أبعاشور أحسين أيودع أعياله
يگلهم هذا أخير أوداع يويلي وعينه همّاله
حرم وأطفال گام أتنوح وأنت أتصور الحاله
يعين الله الحسين أبهاي
جبل بس منهدم حيله
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يعين الله الحسين أبهاي مو هيّن ترى المنظر
رمله أتودع أبجسام وليله ودعت الأكبر
أويلي أويا وداع الصار زينب ويّه المشكّر
يعاين زينب العباس أودمعه من دمه أتسيله
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يعاين زينب العباس دمعهة أعله الوجن يجري
يگلها أشبيچ خويه أم عون گولي يا بعد عمري
تگله أشلون أذا ترحون وضلن حايره أبأمري
تروح أنت ويروح أحسين
الحمل چا ياهو ليشيله
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
تروح أنت ويروح أحسين چا يا هو اليطفي النار
باچر كلكم أتروحون الهواشم كلها والأنصار
شسوي لو لفتني الگوم باچر مايصح نغّار
يگلها آخر نفس وفديچ غيرچ ياهو الفديله
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يگلها آخر نفس وياچ وفديلچ چفوف أوعين
باچر من يصير أزماط أزلزل زينب الصوبين
هز يمها العلم ويگول عد عيناچ يخت أحسين
الفكّر واليريد أيعيل بيچ ام عون ياويله
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
الفكّر واليريد أيعيل بيكم زينب أشحدّه
تعرفين الگمر لوصال منهو اليگدر أيردّه
ما أعوفچ وعوف أحسين باچر بالحرب وحده
لخلي كربله تذكار جيل أيسولف الجيله
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
كلمات الشاعر والرادود عدي البصراوي
آه يوليدي.. شسوت بأمك مصايب كربله
آه يوليدي.. عگب فيك ما اضل مدلله
__
يالرحت للماي بس ماي السراب
يمه سهمك نابت بگلب الرباب
يبني نشاب الاجه ريت اعمى كون
ويخطي نحرك يلولد وبنحري صاب
امن ايدي ليد حسين سرت امن الخيم
وچان عطشان اعله نحرك چم سهم
واني ادري الراح يتخطى اعله موت
آه يعزي ومن رحت عزي انهدم
آه يوليدي.. شلت ايده ولا يذبحك حرمله
آه يوليدي.. عگب فيك ما اضل مدلله
____
يبني اطيحن عالمهد ورجع افز
ادري خالي بس گلب امك يهز
يبني عاده ومتني متعود عليك
وعاده اگول اوليدي نايم لا يفز
ريت اداويك ويصح ليك الدوه
يبني يالمفطوم حتى امن الهوه
چلمه اليمه ردت اسمعها عاد
وضاعت اليمه اسلبتها نينوه
آه يوليدي.. ماكو ابعيني مثل رسمك حله
آه يوليوي.. عگب فيك ما اضل امدلله
__
الله لا ينطيه يا يمه الضمه
عطشاك ونحرك ايروي السمه
عميه ريت اعيوني كون ولا اشوف
من وريدك جيتني مخضب دمه
ما صرت دون البعمرك يبني شاب
برد حضني يالنمت فوك التراب
يبني واليفرغ حضنها المن تعيش
شاب گلبي اعليك مو بس رمشي شاب
آه يوليدي.. رخصت عمري وبس عمرك غله
آه يوليدي.. عگب فيك ما اضل مدلله
_
ياهو ينشدي اگله الولد نام
وصرت اسكت ياهو يحچي بالخيام
هيج شادهني يعبدالله عليك
وكلشي يوجعني بغيابك كلشي گام
صرت بيني وبين روحي اعليك اصيح
وهيج امك گامت تگوم وتطيح
وگلت باچر تكبر وتچوتي اتصير
وباچر اعله ارماح اشوفنك ذبيح
آه يوليدي.. گطعيت انياط كل العايله
آه يوليدي.. عگب فيك ما اضل امدلله
__
ساعت حصت النار يصبح هل مهد
شلون ما ناغيك لا لولي بعد
بيا علي ويا علي ست اشهر كضيت
بعيني تكبر وين رايح يالولد
حتى ما لحگت تكبر لا مشيت
بسرعه اجيت ومني ابسرعه مشيت
احلم بساعت التلزم چف ابوك
وتمشي. مو للموت يالضلعي حنيت
آه يوليدي.. الما حضه السانك بگطره اتبلله
آه يوليدي.. عگب فيك ما اضل مدلله
__
خاف اروح وما احصلك طبيب
الجرحك الماله ضماد ولا يطيب
آه يا اول ولد والاول عزيز
حالت النسوان مثلك ما تجيب
شلون لو عنك مشيت ابهازله
وانته عالتربان تبقى بكربله
شلون بشلون امشي جسم ابلايه روح
ريت اضل يمك وبيك امعلعله
آه يوليدي.. عاجر ابدونك تسير القافله
آه يوليدي.. عگب فيك مااضل امدلله
__
حسين سعد البهادلي
محرم الحرام1446
طلعته بيدي امن الخيم چي عطشان
عبدالله ايروونه
يبست لهاته والگلب يرجف چان
من العده ايذبحونه
آه~ من گد الضمه.. تفطرت شفته ولسانه منفطر
آه~ وضايع مبسمه.. ريت من عمري الولد انطي عمر
حُسين حُسين.. گتله عبدالله وشفت دمعه يهل
حُسين حُسين.. عنده اخر شي بقه بس الطفل
گلي يالرباب.. ترسي عينچ بالولد
گلي يالرباب.. خاف مايرجع بعد
گلي يالرباب.. ومن علي يخله المهد
____
راح وحلم عندي الولد گطرة ماي
يرحمونه ويشربونه
ساعه وشفت رد بالمهر فاگد راي
حسين وتبدل لونه
آه~ من رد للخيم.. طاح الحسين وطحت وي طيحته
آه~ مذبوح بسهم.. جاب عبدالله ودمه تصب رگبته
حُسين حُسين.. اوليدي ابدل نحري بنحره اريد
حُسين حُسين.. وانذبح كون ابداله امن الوريد
ويتيه السهم.. بطيف مايندل يجيه
ويتيه السهم.. اسم الله والزهره عليه
ويتيه السهم.. وريت ما نسمع بچيه
____
ضليت اسكت البلخيم من يحچون
نايم اگول الغالي
وضليت اهز وما بقن بيه متون
مهدك ييمه الخالي
آه~ يالبعدك زغير.. بيا ذنب حضني فرغ منه خذوك
آه~ ما شفتك چبير.. وتلزم ايدي وأيد تلزم جف ابوك
حُسين حُسين.. گلي نام اوليدچ اشويه ويفز
حُسين حُسين.. وداعت الأكبر عمر اسهر اهز
نايم لا يفز.. گمت أللولي بالخيم
نايم لا يفز.. واحلم اوليدي سلم
نايم لا يفز.. وينده احلامي السهم
___
ياتعبي ورباي وسهر تالي الليل
وما لحگ ايتم حلمي
لباچر گلت فدوه اله ايروح الحيل
من يمشي ويگول اسمي
آه~ مذبوح الحلم.. وطشر النشاب ست اشهر هدر
آه~ كون اگدر ألم.. عمرك ويالضل حليب امك يدر
حُسين حُسين.. ياشريچ امصابي اشكبره المصاب
حُسين حُسين.. ارد اموتن شنهي ضلتها الرباب
حضن امك برد.. كون وياك انذبح
حضن امك برد.. يبني اموتن للصبح
حضن امك برد.. ونفرش حضن الرمح
__
حسين سعد البهادلي
محرم الحرام 1446
ليلة العاشر..( عبد الله الرضيع )
يمه نام .. سهمك وغافي بوريدك
والظلام .. خــيـم اعليه واريــدك
هذا وكت التغـفه بيه يمه عله صدري
ويـن ادورك تـــاه يـا عـبد الله فـكري .. بالظلام
……………………………
هذا وكت ارضاعك ودر صدري يمه
ويـن ادورك كربلـه يولــيدي ظلـمه
اعـثـر ابـين الجـثث عـبد الله زحمه
ضاع عطرگ بالحرگ ما گمت اشمه
انته وين .. بيا كـتر دليني صاير
بالدخان .. ضعت وبعج الحوافر
ضعت وشلون الگه جسمك والله مدري
ويــن ادورك تـــاه يـا عـبـد الله فـكري .. بالظلام
……………………………
يمه من ابـعيد ناغيني ارد اسمعـك
بلـكـت انـدلك يـعـبد الله واتـبـعـك
حيل مشتاگه يروحي وارد ارضعك
خاف باچر امشي يوليدي واودعك
الــــوداع .. يا حبيب امك يغالي
كلشي راح .. تعبي ومساهر ليالي
ياحـرامـات الـلـبــن ضل هسه يجري
ويـن ادورك تـــاه يـا عـبد الله فـكري .. بالظلام
……………………………
ويـن نـايــم ارد اجـي يا يـمـه يمـك
ارد اطلـع من رگـبـتك بـيـدي سهـمك
يمه اريدن شيبي اصبغه بفيض دمك
وخاف هاي الخيل تمرد يمه جسمك
ارد اجــيـك .. حـتـلـو يا يـمــه باللـيل
عليك اخاف .. تنسحگ يوليدي بالخيل
بـلـيـل اجـيك وفوضت للباري امري
ويـن ادورك تـــاه يـا عـبد الله فـكري .. بالظلام
……………………………
يبني يالما عيني شبعت شوف منك
النـار ما تـطـفه بـدليلي الا احـظنك
ليـش فـارگـنـي زمـاني يـمــه عـنـك
ريـت يـمـه ابگـلـبي السـهام الرمـنك
ريت اموت .. شلي بالدنيا بـدونك
نظره اريد .. يمه من نظرة عيونك
نظرتـك تطفي يـيـمه بروحي جمـري
ويـن ادورك تـــاه يـا عـبد الله فـكري .. بالظلام
……………………………
بحظني متعود گبل يوليدي اخليك
خالي مهدك يمه واني ارد اهـز بيك
نايـم بهـيـمه يروحي خايـفـه عليك
حـار يوليدي الرمل وادري يجـويك
والـتـراب .. يـمه لا ياكـل اخدودك
ردلي عاد .. تواسي ليه بذبح عودك
فراگـكـم كـاسـرلي يمـه حـيل ظهري
ويـن ادورك تـــاه يـا عـبد الله فـكري .. بالظلام
……………………………
فـراگ ابـوك امصيبة يا يمـه چـبـيره
تهنه من بعده وصفت حيرتنه حيره
لا اهـــل ضلـيـنـه بـعـده ولا عـشـيره
وعالـنـهر مـذبـوح عـمـك ابــو الغـيره
خايفات .. والشمـر يفـتر علينه
معذبات .. حـرم يايمه شبـدينه
حـرم ضليـنه بمدامـع حـسره تـجـري
ويـن ادورك تـــاه يـا عـبد الله فـكري .. بالظلام
الشاعر عقيل الحسناوي..
.
▪️يا ام الرضيع▪️
نخوه للرباب عليها السلام
نخوه يا ام الرضيع
اقضي حاجاتي سريع
جيت احلفك بالزجيه
وليدها ضامي الاميه
ابذبيح الغاضريه امصابه والهم الفجيع
———-
بجاه طفلج وي مصابه
لوعته وهمه وعذابه
همي اتسدين بابه للنخه ورايد جميع
———
جيتك ابدمعه جريه
انتظر منج عطيه
ابجاه من جثتَه رميه
والجرى اعليه ومريع
——-
انخيتك امرادي اريده
اعليج بالضامي ووليده
واللي مد الليله ايده
ابجاه خالقنه السميع
———
ابجاهج الليله دعينه
وماترد ابهم ادينه
اتفضلي ستي علينه
وزيدي بالخير الوسيع
———-
بقلم:بنت الشمري
قصيدة رثاء عبدالله الرضيع ع السلام
خادمكم عبدالهادي العريفاوي
عبدالله وليدي شلونه ساكت مايحجي وياي
شو ذبلانات عيونه من فيض الدم يروونه ساكت مايحجي وياي
---------------'------------
وكت الفجر من تكعد تناغيني
كلشي اتعرف مابينك ومابيني
خالي المهد يبني وغبت عن عيني
من فركتك بس دمعتي تسليني
راح ومارد اوليدي زادت نبيران احشاي
ليش الطفل يذبحونه من فيض الدم يروونه ساكت مايحجي وياي
-----------------------------
انته الأمل غيرك بعد ماعندي
بس الحزن وسط الكلب ظل يحدي
لمن يجن ليلي واظلن وحدي
من فركتك حالي بحزن متردي
ليش اتأخر ماجاني زادت بالطف بلواي
بلكت ماي ويسكونه من فيض الدم يروونه ساكت مايحجي وياي
--------------------------
هلبت يرد ابني واظل اتنطر
واتصبرت من فركتك مااكدر
انخه علي وجفه القلعها لخيبر
هالنايبه اعله امك مثلها مامر
خابت منك آمالي عبدالله يارجواي
من هالناس الملعونه من فيض الدم يروونه ساكت مايحجي وياي
-------------'------------
تعيش بحزن أمك اظن تاليها
وسيف الدهر مااعتقد يخطيها
تتنطرك تالي العمر تفديها
انه امك ومااعتقد ناسيها
هاجت يوليدي جروحي ماظل عد امك راي
وسفه وليدي يجيبونه من فيض الدم يروونه ساكت مايحجي وياي
----------------------------
بدمعه وحزن امك تظل منتظره
ماتنتهي وسط الكلب هالحسره
بكليبي عنوان المصيبه شكبره
ليش الطفل سهم المنيه بنحره
تترك امك ياوسفه ماظنت منك هاي
ربهم لا ميخافونه من فيض الدم يروونه ساكت مايحجي وياي
محرم الحرام #1445هـ
(( عبدالله الجرح الثاني ))
……………………………………………………………
ما طاب جرح المحسن وبسماره
والنوب جرح الثاني اعظم ناره
عبد الله جرح العتره •• نامت النبله ابنحره
عبدالله يا عبدالله
……………………………………………………………
شهود الجريمه المؤلمه
في ذبح محسن فاطمه • زينب والحسين
بيهم اخوهم ظل جرح
بس الظلام وكل صبح • ما مر على العين
ابعبد الله حيل اتعلقو • واطّول يمه الگعده
يناغونه والهم يبتسم . تنرسم ورده ابخده
حسين ويهفيله الهوه . وزينب تهز ابمهده
ما مات محسن عدل معتبرينه
يشوفون صورة فاطمه ابنص عينه
عبدالله روح الزهره •• نامت النبله ابنحره
عبدالله يا عبدالله
…………………………………………………………
ابغض النظر حجه او ولي
بس هم ابو و هم منملي • حب ومشاعر
يشوف ابنه ميت بالبچي
من ايده رايد ينسگي • وحسين حاير
يشوف ابنه يتلوه ابعطش . يا ناس كلش صعبه
مايدري شيسوي الـ عبد . ظل ما يوچّد دربه
مو بالحوافر يا خلگ . اهنا انداس ابگلبه
ويگله يا بعد العمر يوليدي
لو ينشره مايك لبيع اوريدي
واشفافك المتفطره •• نامت النبله ابنحره
عبدالله يا عبدالله
…………………………………………………………
عبدالله مقتل وحّده
يا ناس لا صار و سِده • ابكل الطوايف
وأتخيّل الموقف عدل
ماخذ اوليدك للچتل • واعليه خايف
بحضينك و ضاوي الولد . امن البدر احله واحله
وبلحظة تنظر منذهل . شچّت ابنحره النبله
وازغار اديّاته وصُبح . بيهن أگماطه ايحلّه
يحسين الله ايعينك الهل شوفه
مات ابنك وداير عليك اجفوفه
الحضنك بقت بيه حسره •• نامت النبله ابنحره
عبدالله يا عبدالله
……………………………………………………………
رد بيه ويخط بالجِدِم
امغطّيه بطراف الهِدِم • ومحدب اعليه
ويخط وراه دم الطفل
وياه غده ايفور الرمل • وتبچي الارض ليه
محتار لو شال السهم . تنفصل خاف الرگبه
امشعّب و داير بالنحر . مثل العصابه امعصبه
مو زين ما مات الولي . الله يساعد گلبه
كل طفل ورد وياس يمه إتخلّه
بس ابن الحسين انفطم بالنبله
طبگة جفن يا عمره •• نامت النبله ابنحره
عبدالله يا عبدالله
…………………………………………………………
ما نست حايط والجذع
ومحسن اخيها المنصرع • مهضومه زينب
شافت اخوها المنجرح
ينطيها ابنه المنذبح • وگابلها ينحب
للخيمه وأحتارت تطب . لو بالعبايه اضمّه
ابهل الحال لو تنظر اله . يحسين تنجن امه
حسبالها ايرد بالعذب . مو يرد فايض دمه
يا يمه وين الضحكه وين ارسومك
وانصبغن اهديماتك امن ادمومك
وين العصابه الخضره •• نامت النبله ابنحره
عبدالله يا عبدالله
…………………………………………………………
اكثر جرح بيه انفطر
گلب الامام المنتظر • ويبچيله من دم
ايعيش الرضيع ابمهجته
والسهم چنه ابچبدته • منه إيتألم
يطلع و يرفع هالطفل . وينادي كل الوادِم
ما ذنبه وبنبلة حقد . راس وجسم متجاسِم
موش ابوساده ابنص مهد . وسط الرمل ظل نايم
مانام ليلي واذكر ادميعاته
ولجود عمّه شابح اعويناته
رايد ولو بس گطره •• نامت النبله ابنحره
عبدالله يا عبدالله
…………………………………………………………
✍️ ( سيد خضر الزاملي )
قصيده ثكيله على الوداعيه
حان الوداع يـخوتـــي حان الـوداع
خدري من بعد الغوالي يصبح ضياع
خدري يبقه ياهلي
وحده مايل محملي
حــــــــــان الواع حــــــــــان الواع
━━━━━━━━━━━━━━━━━━━
خدري باقــي الوحــده مايـمي اهلـي
حملي راخي يخوتي ضل راخي حملي
ادعي انه يطول والله خويــــــــــه ليلي
من بعد عيـــــــناك ابقه بالله شلــــــــــي
شلي خويه بعيشتي
وحدي مايمي خوتي
حــــــــــان الواع. حــــــــــان الواع
━━━━━━━━━━━━━━━━━━━
خويه ووداعك ثكيل ومااحملـــــــــه
من تودعني تخلي بكـــلبي علــــــــــه
والله تدرون اليفارك صعبه اهلــــــــــه
خويه خلي ينتضر وشويــه گلــــــــــه
ليش مستعجل عليك
وانه روحي بين اديك
حــــــــــان الواع. حــــــــــان الواع
━━━━━━━━━━━━━━━━━━━
ليش مستعجل يخويه وبــــــــــرحيلك
وانتضر لاتبتعد عيني اعله عيــــــــــنك
تــــــدري واليتام تبجي وي بنيــــــــــنك
حيف بس ليله تضل تخلص سنينــــــــك
حيف بس اليله يمي
خويه ابقه عليك امي
حــــــــــان الواع. حــــــــــان الواع
━━━━━━━━━━━━━━━━━━━
يكلهـــــــــه ماكدر اضل يازينب اهناا
كلهه متحلفه اعله كتلي عداي واللــه
من بعد عباس ارحل انـــــــــــه ويـاا
يختي شوفه مكطعات جفوف الگاا
حيل تفجعني المصيبه
صحت زينب ياغريبه
حــــــــــان الواع. حــــــــــان الواع
━━━━━━━━━━━━━━━━━━━
صدك ابقه الوحدي وحدي غريبه
كلبي مــايبـــطل ابد لا لا نحــيبه
كلبي ليك اشتاك والشوفت حبيبه
صعبه خويه عليه تدري هل مصيبه
حيل تكتلني ياوالي
لاتودعني ياغالي
حــــــــــان الواع. حــــــــــان الواع
━━━━━━━━━━━━━━━━━━━
🔴اڵـــشــاعـــره آلــــّ؏ــلّويِـــــه🔴
ام رقـيــه المـوسـويــه ال قطب الديــن
نزله .. اعكيلي. ( ليلة العاشر ) محرم الحرام.. 1446..
ياليل العاشر احزاني
-------------------------
بس هاليله ويّه احبابي
باجر يبدي اني امصابي
ياليل احزانك يم بابي
اني زينب لا تنساني
------------------------
ياليل شعندك وي زينب
ارحم حالي كلبي شَيّب
جرحي ينزف روحي تنحب
تتذبح كلها خواني
--------------------------
ابن امي حسين ايِذبحونه
بالخيل بصدره ايِسحكونه
بالحافر ظَهره ايِهِشمونه
هذا احسيني دم شرياني
-------------------------
لو راح الكافل يادهري
هذا العباس وكل عمري
منهو بعده يِكفل خِدري
لو راحت عني ولياني
-------------------------
باجر كل خيمه ماعندي
هاي الغُربه بالطف تِبدي
دخان إخيامي هم ضِدي
و اكبالي تلهب نيراني
-------------------------
الخادم _ ابو فدك الشامي ✍
#محرم1446
#قصيدة_ليلة_العاشر
قصيدة بكل حروف الهجاء من الالف للياء (هجائية الاحزان) كل نص يختص بشهيد من شهداء الطف
تبكي لكَ السماء بأحرفِ الهجاء
حسرة ودموع بكل حرف من الألف للياء
------------------------------------------------
الالف اهات والم اعــله الوجوه اتنظرة
البــاء بين بالــكَلب وبعيني بانت عبرة
التاء تبقى وتنذكر وتاذينا تبقى العشرة
الثاء ثائر ثورتــك ثبـتت ثكَل العترة
يا ذابِــــلَ الشـِـــــــفاه وزينبً تراه
كل چلمة دمعة تنذرف من الالف للياء
------------------------------------------------
الجيم جربة والجرف جفـفن جاري عيونة
الــحاء حدب وانحنة حكَة لحامي ظعونة
الخاء خليــتة وخيم خي خلفك ايتانونة
الــدال دارت دنيتة ودار العدو من دونة
عــباسُ انتَ ايـن استوحدوا الحُسين
نايم يوسفة اعله الجرف من الالف للياء
------------------------------------------------
الــذال ذبحة بيا ذنب بالذبح ذابل واصفر
الـراء روحة ما روت راد الــشرب مايكَدر
الزاي زحمة اتزاحمت وزادت ازلام العسكر
السين سار وما سلم وسفة بسيوف اطبر
للحتفِ قد مـضى الاكبرُ قضى
امطبر وابــد مايــنعرف من الالف للياء
------------------------------------------------
الشين شاب وشمعتة شبت وشاب الشافة
الصاد صـابر ياصبر صارن صحاري شفافة
الضاد ضاعت ضحكتة الضّمةَ مضيع اوصافة
الطاء طايح منـطبر طب للطف وماخافة
لم تُثنهِ الحشود بنفــــسهِ يجود
حتى العدو بي يعـترف مــن الالف للـياء
------------------------------------------------
الظاء ظل ابلا ظنة ابظربتة اتظعظع حَيلة
العين عاين عالطفل عينة بعتب تشكيلة
الغين غافي وانغدر غفلة وغـدة يناغيلة
الفــاء فرفرح مافرح فز ابفـزع يبچيلة
سهمُ القضى رماه مُحتَضناً اباه
چـتالة كَلبة ما يرف من الالف للـياء
------------------------------------------------
القاف قاتل وانقـتل قربان قربى اتقــدم
الكاف كلها اتكاتـفت كربلة انكتبت بالدم
الــــلام لــلَّه وللنــبي وللدين لازم نلتم
الميم موقف مُنتصر موقفهم وما ينضم
انصــــــارُك الآبــــــاة بِموتِنا الحياة
لجلك فلا يغمض طرف مــــن الالف للياء
------------------------------------------------
النون نيران ونـسه ونوح اوّنيـن ومدمع
الهـاء هودج عالهزل هاي الهضيمة التفجع
الواو وين الواعدچ وحدچ ولاهو اليسمع
الــياء ياهو ايركبچ يــم اليـتامة ويفـزع
نّادِيْ على النيِاقْ يا أخوَتيِ الفِرَاق
اعذركم وادري الظرف مـن الالف للياء
*
أسالكم الدعاء #رائد_الاسدي
قصيده ليلة العاشر للوداع
وزن ..هجري
~~~~
جلجل العاشر ضلامه والحسين بخيمته
واجتمع ويه الصحابه يريد يلقي خطبته
➖➖➖➖➖➖➖➖
من بده ليل الوداع حسين ناده يخوتي
ياصحابي ويانصاري العده طلبت ركبتي
هذا ليل ودنيا ضلمه واني منطي رخصتي
واليروح وداعة الله والمصيبه مصيبتي
مودع بالله ورسوله خل يشد كحيلته
ام ✍️ علي الموسوي
➖➖➖➖➖➖➖
هذا ليلتنه لاخيره وهاي ساعات الوداع
وليريد يعود منها خله يتهيئ الساع
باجر يصير القتال والجثث تترس الكاع
والحرم تبقى أسيره وكل الاطفال بضياع
مني مبرين الف ذمه الراد يرجع ديرته
ام ✍️ علي الموسوي
➖➖➖➖➖➖
حسين ناده كل بنينه.. وصحبته وكل هله
بصوت ناده هايخوتي... هايهالي المرجله
الكوم طلبت ولله راسي... هالامر مابدله
بصوت واحدكلهه صاحت... هايبن عقد الوله
ارواحنه كلها فداء... وشال كلمن رايته
✍️ ام حسين العامري
➖➖➖➖➖➖➖
شالو الرايات كلهم واجو يمه معتنين
هوسو يم ابو سكينه بالنفوس امبايعين
للله والأمرك نطيع اشلون نرجع يا حسين
لا ابد لا مانعوفك يبن أمير المؤمنين
شافهم نعمه الصحاب ويلي سألت دمعته
ام ستار الكعبي
➖➖➖➖➖➖➖
شافهم نعم الصحابه.. كفو منهم والنعم
شالو الرايات كلهم... شدو اهناك الحزم
صاحو فدوه يبن فاطم... الك كل هاي الزلم
اوياك نبقى للمنيه.. فوت كلبك لايهم
تنومس حسين بحجيهم... والنعم من صحبته
✍️ ام حسين العامري
➖➖➖➖➖➖➖
تمت بفضل الله وعونه بأقلام خادمات الحسين في رابطة قتيل العبرات غير مبري الذمه من يحذف الاسماء أو ينسبها له
مربعه للوداع
~
يايوم الوداع لروح هدمها
من توادعت زينب وي ابن امها
~~~
زينب هالمسيه تهمل الدمعه
محتاره وتنادي يمه يالبضعه
بين احبابنه ياهو النودعه
خواني ييمه شلون أودعها
ام ✍️ علي الموسوي
➖➖➖➖➖➖
اجه حسين وكعد يتوادع وياهه
تجري من دمه وتسيل عيناهه
جرت بالعتب ونوب شافاهه
تسولف بالحزن وحسين يسمعها
✍️ام زهراءالفاطميه
➖➖➖➖➖➖
يسمعها الحسين ابليلة العاشر
ويكلها يخيتي ذبحتي باجر
يبت امي عليكم جيشهم داير
وعيالي الشمر بسوط يضربها
✍🏻 ام زينب الأسدي
➖➖➖➖➖➖
يايوم الوداع ايهدم الحيل
طلعت هايمه مانامت اليل
تكله اوياك اضلن كون ماشيل
ولراحو اهلها شنو ضلتها
ام علي السماوي
➖➖➖➖➖➖
تودعه والدمع ينزل عله خدها
تودع حسين اخوها والحزن هدها
زينب بالوداع الله يساعدها
كل العيله ابو السجاد جمعها
خادمة اهل ✍️البيت ام ابراهيم الحلفي
➖➖➖➖➖➖
شيصبر الكلب لو ودع إبن أمه
وإني من الزغر وياه متعلمه
بعد شلي ابحياتي اخلاف ابو اليمه
سمعته ايصيح زينب روحي سلاها
ام كرار مناذره
➖➖➖➖➖➖➖
تمت بفضل الله وعونه بأقلام خادمات الحسين في رابطة سيد الشهداء عليه السلام غير مبري الذمه من يحذف الاسماء أو ينسبها له
قصيدة وداع الإمام الحسين عليه السلام
اليله حسين صار يودع عياله
ويحاجي العقيله بدمعه هماله
💔💔💔💔💔💔
گعد يم العقيله ودمعته ابعينه
ابو اليمه يون ويفجع اونينه
بيد الگوم خويه لاتخلينه
يون مكسور گلبه ومنشده باله
خادمة اهل✍️ البيت ام ابراهيم الحلفي
💔💔💔💔💔💔
توصيني ياخويه ابلمّة اعيالك
اسكت الحرم خويه واجمع اطفالك
وشلون الشمر ياخويه لو جالك
خويه حسين ما اصبر بهالحاله
✍🏻بتول الكربلائية
💔💔💔💔💔
خويه حسين لتخليني وي عدوان
هاي الگوم ماترحم ابد نسوان
ظل اوحيد اخوي وگلبي شب نيران
مكسور الظهر ومذبحه رجاله
علويه أم منصور
💔💔💔💔💔💔
يوصيها بناته سكنه ورقيه
يكلهه لو رحت مابعدلي جيه
وادري وي الغرب تمشين مسبيه
كفيله أنتي يزينب وي جتاله
ام كرار مناذره
💔💔💔💔💔💔
الليله وداعهم اهات وي أحزان
و يكلها يزينب داري النسوان
تراني يم طهر راح انذبح عطشان
يوصي باليتامه ويوصي باطفاله
✍🏻سلمى أم جعفر
💔💔💔💔💔💔
بطفاله يوصي اخته الخاتونه
يعاين بالوجوه امغورگه اعیونه
اوصيجن اصبرن لو ايذبحونه
ومن بعد الذبح تفزع الخياله
✍🏻 ام زينب الأسدي
💔💔💔💔💔💔💔
تمت بفضل الله وعونه بأقلام خادمات الحسين في رابطة سيد الشهداء عليه السلام غير مبري الذمه من يحذف الاسماء أو ينسبها له
للوداع
~~~~
زينب هالمسيه توادع الغالي
ياشوفي وضواي حسين يالوالي
~
زينب هالمسه ماهودت ساعه
توادع بالعزيز اليصعب وداعه
من عدها الدليل مطبكه ضلاعه
تودعني بغرب ماجانت بالي
🌼🌼🌼🌼🌼🌼
تخلوني وحيده يابعد عيني
اموادعكم كلف يحسين ياذيني
شنهي الراي اكعد خويه حاجيني
تراني اخلافكم بالظيم ياحالي
✍️ ام حسين العامري
🌼🌼🌼🌼🌼🌼
مهظومه العقيله وماكو كل چاره
كاتله القهر والدمع يتجاره
لجل حسين شنهي تسوي محتاره
تگول الموت گبل حسين اشوالي
العلويه ✍️ام منصور
🌼🌼🌼🌼🌼🌼
ما جان اعله ابالي نودع الهيبه
لو راح ابن ابوي امنين انه اجيبه
یاصعبه فرگته صارت امصیبه
اضل طول العمر الحزن يحلالي
✍🏻 ام زينب الأسدي
🌼🌼🌼🌼🌼🌼
يحلالي الدمع هليله والونه
خال ابني حنين و مشبعت منه
باجر يا عزيز امي افگدنه
هاذه افراگنه يحسين للتالي
ام ✍️ستار الكعبي
🌼🌼🌼🌼🌼🌼
ابن امي العزيز اشلون اعوفه
جرح كلبي بعد ياهو اليروفه.
بحر الجود اليلنشفت اجروفه
اصيحن ياهلي محد رحم حالي
خادمة أهل البيت ام ابراهيم الحلفي
🌼🌼🌼🌼🌼🌼🌼
تمت بفضل الله وعونه بأقلام خادمات الحسين في رابطة قتيل العبرات غير مبري الذمه من يحذف الاسماء أو ينسبها له
قصيده لليله الوداع لسان حال الحسين يوصي السيده زينب عليها السلام
ــــــــــــــــــــــــــــــــــــــــــ ـــــــــــ
المستهل👇👇👇
خويه ظلي بخيمتج
والعيال برگبتج
أمانه أمانه
والعـــده لوهضمتج
خويه ظمي دمعتج
أمانه أمانه
ــــــــــــــــــــــــــــــــــــــــــ ـــــــــــ
خويه زينب صعبه باجر لويـمر
خويه زينب حالي يهظم مايسر
خويه زينب راح اعوفج لليسر
ادري صعبه حالتج
خويه حامي عيلتج
أمانه أمانه
ــــــــــــــــــــــــــــــــــــــــــ ـــــــــــ
ادري صعبه عليج ايام السبي
خويه عينج عل أرامل والعبي
حيل ياذيني يشوفج اجنبي
فراكنه هز خيمتج
والعيال بذمتج
أمانه امانه
ــــــــــــــــــــــــــــــــــــــــــ ـــــــــــ
ياوظعجن يابناتي من اروحن
وزينب تلم باليتامه وانه اشوفن
حيل اتألم عليــــجن من تنوحن
زينب وياحيرتج
كل بناتي بصايتج
أمانه امانه
ــــــــــــــــــــــــــــــــــــــــــ ـــــــــــ
انتي خيتي وياي جيتي لكربله
ريحت امي بيج ونتي مدلله
غصب اعوفج يالحنينه بالفله
انه روحي نادتج
يالحنينه وصتج
أمانه امانه
ــــــــــــــــــــــــــــــــــــــــــ ـــــــــــ
خويه لو شفتيني مابين العده
عاري ابقى جسمي محد وسده
من اروحن علـي يبــقى وحده
بس علي يسد وحشتج
ابني يمسح دمعتج
امانه امانه
ــــــــــــــــــــــــــــــــــــــــــ ـــــــــــ
بالقلم المتواضع لخادمه الحبيب الملا ام سيف الدين غير مبري الذمه من يحذف الأسم وينسب الكلام له أهدي ثواب هذه العمل الى مولاي صاحب الزمان
(نعي)
----------------------
زينب يا علي لليله احتارت تتجه لا وين
مره تلملم العيله ومره تتجه لحسين
ومره اتصيح يا كرار عن بنتك غبت جا وين
ظربوني يبويه بسوط وسمعوني حجي لموزين
--------------------------
مابين الغرب زينب ليلة وتجري المدمع
تصيح بصوت ياكرار افزع ياعلي افزع
مني فرت الايتام بالبر ياعلي شجمع
وكفيلي على النهر مطروح احشمنه ولايسمع
--------------------------
انه ام الخدر زينب لمحد شايف خيالي
مابين الغرب ضليت تالي ياعلي تالي
يظربوني واصيح المن اخوتي مذبحة كبالي
وسلبنه يبوية الجيش وانه بعازة الوالي
--------------------------
(الشاعر/عباس الصالحي)
ليلة عبد الله الرضيع ع
عبد الله يبني لا تروح من أيدي ..
يالوجهك أحله من الكمر يوليدي ..
ليش يبني الغالي .. ظل مكانك خالي
............................
طبع كل أم على أبنهه تبني آمال شكثر ..
تذرع بطوله وتكمطه أصبع أصبع موشبر ..
أتكول كل صبح ومسيه الحمد لله والشكر ..
وتقره يم راسه دعاء وتقره آيه من الذِكر ..
لو يبجي تمسح دمعته من خدوده ..
تحس بأمان وبالأمل بوجوده ..
يالضواك أيلالي .. ظل مكانك خالي
...................................
ياحبيب أمك يغالي جنت ألوليلك وأظن ..
تكبر وغصنك يوّرد باجر وأنسه الحزن ..
جنت أناغيلك وألولي لحد مايغفه الجفن ..
العمره ست أشهر يعالم والله مو مالت دفن ..
مو للدفن عمرك يماي أعيوني ..
جنت آنه أكولن بيك ياخيعوني ..
يكبر أبني الوالي .. ظل مكانك خالي
...................................
العطش يبّس لهاته وذابله أرسوم الطفل ..
بحسره يوليدي أشوفك والدمع عالخد يهل ..
بحضن أبوو عبد الله غافي وفززاه سهم النذل ..
وآنه أدعي يا آلهي ردلي عبد الله عدل ..
مرفوعه أيدي وأدعي يا معبودي ..
شلال دمعي يجري فوك أخدودي ..
ودعت آمالي .. ظل مكانك خالي
...................................
هذا آخر يوم لأبني من الصبح أشعر وأحس ..
وأبني لا راضع حليبي ولا شرب ماي من أمس ..
منحره ضاوي ويلالي ويعكس بنور الشمس ..
بسهم المثلث بنحره صوبوه أهل الرجس ..
كطّع دليلي هالسهم وأبتوته ..
جي ماخذ من أيدي أعز ياقوته ..
الأوّلي والتالي .. ظل مكانك خالي
....................................
وحشه والكاروك خالي يبجي وينوح المهد ..
وآنه أحسب دمعه دمعه عمرك شكد يالولد ..
أبد ماجان على بالي تروح من أيدي أبد ..
غفله سهم الموت أجاك وفرهد أيام السعد ..
أبحضني أشوفك كل وكت كدامي ..
ما فاركتني أبصحوتي و بأحلامي ..
يابزر دلالي .. ظل مكانك خالي
.................................
يانظر عيني وحياتي يبني يا وجه الصبح ..
فاهيه الدنيه بغيابك وأنت للدنيه ملح ..
كون أحطه بمزهريه الورد مو مالت ذبح ..
منحرك خليني أشمه كبل مايعله برمح ..
أشلون أشمّك والرمح مالوحه ..
مو للرمح عمرك تره المرجوحه ..
دمعتي تحلالي .. ظل مكانك خالي
...............................
حيدر مطر العبادي
عبدالله ماي العين امك انه امك
اكعد يبعد جـــلاي جيت انا يمك
*
اكعد يماي العــين وفتح عيونك
ليش المنيه بساع غمضت جفونك
شتسوى بعد دنياي يوليدي دونك
وشيطفي جمر الاه شيطفي همك
*
ماشوف عدهه ذات كوم اللعينه
بنبلة غدر ذبحوك كلهم ضغينه
ودمك رماه ليفوك عودك ولينه
وماوكع فوك الكاع عبدالله دمك
*
ابجي ونوح اعليك وبكلبي حسره
وعبراتي لجلك دوم عبره اعله عبره
الفاكد عزيز الروح يبني شيصبره
احنلك حنين النوك وتمـــــنه اشمك
*
عبدالله بيك البين بالطف فجعني
خله الحزن والاه بــــعدك اجني
اليوم المنيه وياي زيـــــدلي وني
ووجهي الطمه حيل لومرني اسمك
*
مصابك يحز بالروح ومصاب الحسين
خلولي نص حشاي خولي جرحين
جرحك وجرح حسين صعبات الاثنين
وحالتي بعدك هاي جيت انا اعلمك
*
المات ابنه بالدلال ناره سريه
يبقه يجر حسرات حد المــــــنيه
والونه اله اوي النوح تصبح سجيه
ريتك ترد لحظات وبصدري اضمك
*
خادم اهل البيت / ابومحمد العاشور
قصيدة للطفل عبدالله الرضيع.ع.
تون ام الطفل ونت حمام الدوح
تكله يبني ليش تعوفني وتروح
✍✍
يا عبد الله انت دنيتي يبني
صواب الصوبك يا ريته صوبني
يوليدي الدهر عكبك ترى ذبني
وما ظنيت اشوفك يا الولد مذبوح
✍✍
ذبحوك الكفر مدري شنو ذنبك
لا رحموك يبني ولا اتقوا ربك
ولا اطوك ماي وبردوا كلبك
ضربوك بسهم خلوا ابوك ينوح
✍✍
رد حسين بيك الصوب المخيم
ونحرك فوك زند حسين يكطر دم
من شفتك ييمه حيلي اتهدم
عنك ليش يبني غيبوهه الروح
✍✍
ابدال الماي يبني بالدمه رووك
ييمه اشكال كلبك يبني من ضربوك
شنو ذنبك ترافس بالرجل خلوك
يبني خاب ظني يا عزيز الروح
✍✍
خذاك البين يمه وغربت لبعيد
الدنيا اعليك ظلمه يا هلال العيد
ابجي اعليك يمه والدمع شيفيد
اضل اعليك اون يبني بكلب مجروح
✍✍
تناغيني يعبد الله بعد هيهات
ترد اردود الي يبني ويرد الفات
يسباح الكلب شخصك تلوه ومات
ما اكدر اشوفك والدمه مسفوح
✍✍✍
تمت بعون الله وبحمده بقلمي المتواضع خادمة الحسين ع أم علي الحسناوي.. الفاتحه إلى شرف النبي وعترته الاطهار عليهم السلام وإلى أرواح المؤمنين جميعاً والى روح والدي وروح خادمة الحسين ع أستاذتي المرحومة العلوية ام حسام 🙏🙏
قصيده كعده ل عبدالله الرضيع ع السلام
خادمكم عبدالهادي العريفاوي
---------------------------
ياطفل جابوه صريع هذا عبدالله الرضيع
امه صاحت من بعيد ابني مكطوع الوريد
هذا عبدالله الرضيع
----------------------------
عفيه صبر أمك يغالي من اجيت بفيض دمك
وبو اليمه بحضنه شالك جابك لزينب يسلمك
ومن شفت زينب ييمه وهيه عن عيني تظمك
مشتاكه روحي لشوفتك امك تراني الربتك ليش ال أميه جازتك
سدد النبله ويألمك
بالسهم صار الفطام هذا عد الله حرام
من اسألك يايزيد ابني مكطوع الوريد
هذا عبدالله الرضيع
------------------------------
من خذاك حسين مني وكاصد لذاك الملا
ونته شربت ماي تطلب يامصيبة كربله
بالسهم يكطع وريدك ألله يلعن حرمله
تخسه الجيوش الظالمه من نحرك يفيض الدمه حضرة مصابك فاطمه بالطف سلت جم معضله
عالجثث كامت تطوف جم صريع اللي تشوف وتسأل بيوم الوعيد
ابني مكطوع الوريد هذا عبدالله الرضيع
--------------------------------
عيني تتنطر تردلي مااجت هاي اعله بالي
شنهو عذره المرد كلبي هذا ياربي سؤالي
غفله راح وليدي مني والمهد ياوسفه خالي
يوليدي مو عقلي انذهل ياوسفه جن خاب الأمل شوف الدهر بيه شعمل
والصخر يبجي اعله حالي
شلون يوليدي عفتني وبغيابك دوهنتني
والدهر مني شيريد ابني مكطوع الوريد
هذا عبدالله الرضيع
---------------------------------
شنهو عذره الكطع نحرك يبني يم سيد البريه
بالحشر يبني تشوفك فاطمه الزهره الزجيه
جم مصيبه اللي لفتها من أراضي الغاضريه
دلالي يوليدي انمرد تاه الفكر مني وشرد
راح اصبر ليوم الوعد
اشتكي لرب البريه
باجر يكول القلم منهو سدد بالسهم
ربنا عالدنيه شهيد ابني مكطوع الوريد
هذا عبدالله الرضيع
🌑السلام على الرباب ورضيعها
🏴لوّن اعليك دهري يالولد يبني
🏴ما لوم الخلگ لمن تعاتبني
يمر الليل سهرانه والوليلك
يطر الفجر يايمه واناغيلك
كل يوم انتظر وعيوني تربيلك
هذا الحال هو اليّ يتعبني
ساعه الزم اگماطك بيدي أشدنه
وساعه المهد يوليدي أهزنه
أرد اردود اشمه ونوب احضننه
واكولن ياوسف فرگاگ شيبني
من تسمع ونيني الناس والوفاد
تعاتبني وتگلي عاد بسچ عاد
على فگدك ييمه حرميت الزاد
تعال وشوف دهري شلون دولبني
رحت عطشان يبني ماشربت الماي
واجاك السهم ويلي وگطعالي إحشاي
ترد دامي النحر مفطوم يارجواي
مصابك ياوليدي العگل سالبني
تظل صورة ضحكتك وسط عين امك
متبارح خيالي و عايشه بحلمك
شلون اصبر ييمه ويا عظم همك
آه امن الهجر والهجر عذبني
#سمير_الصالحي
#النجف_الأشرف
————————————-
🏴مناغاة الأم الثاكلة لرضيعها ..
⚫️يبني وينك
أمك واشتاگ اشمك
⚫️يبني وينك
لويصح أندفن يمك
⚫️يبني وينك
ماترد يوليدي لامك
⚫️يبني وينك
چنت اناغيلك يروحي
⚫️يبني وينك
ضحكتك تشفي جروحي
⚫️يبني وينك
كثر همي وزاد نوحي
⚫️يبني وينك
صدگ نحرك گاطعينه
⚫️يبني وينك
بالوريد مصوبينه
⚫️يبني وينك
أبگه ولهانه وحزينه
⚫️يبني وينك
من اهز مهدك ييمه
⚫️يبني وينك
عطرك يفوح وأشمه
⚫️يبني وينك
أحضِنه ولصدري اضمه
⚫️يبني وينك
مساهره والنوح فني
⚫️يبني وينك
أندبك عبدالله يبني
⚫️يبني وينك
فرگتك زيدت وني
⚫️يبني وينك
من ألوليلك وأنعه
⚫️يبني وينك
أهجسك صوتي تسمعه
⚫️يبني وينك
تنزل من عيوني دمعه
⚫️يبني وينك
آه ياشمعة سنيني
⚫️يبني وينك
بعد مايبطل حنيني
⚫️يبني وينك
أنطر وما اظن تجيني
#سمير_الصالحي
#النجف_الأشرف
قصيده للطفل الرضيع عليه السلام
+++++++++++++++++++±++
گلب امك صبح مجروح
عبداللة الطفل يبني
+++++++++++++++++++±++
اگعد يبني تالي الليل
اصرخ والدموع اتسيل
على فرگاك اصيح الويل
اومايبطل ابد وني
+++++++++++++++++++±+
لعد مهدك اهزنه
خالي من اشوفنه
تظل ابگلبي الونه
يلي ارباك شيبني
+++++++++++++++++++±++
راح التعب راح ارباي
ماوحده ابتلت بلواي
مثل الطير رف عالماي
عطش گلبك امروعني
+++++++++++++++++++±++
نص الليل افز وانعي
ميسوره اوكلف وضعي
شدعي الحرمله شدعي
من شوفتك يحرمني
+++++++++++++++++++±++
گلت حسين لو ذبحوه
اوليدي يكبر ايخلوه
من دم النحر رووه
تالي خاب كل ضني
+++++++++++++++++++±++
يادنيه فجعتيني
ذبحوا يمي اجنيني
عطشان اويبجيني
مصايب دهري اذني
+++++++++++++++++++±++
اصيحن يالولد يمه
اظل لفراشك اشتمه
علي دهري رمه سهمه
سهم غدار فارگني
+++++++++++++++++++±++
تمت بعون الله للشاعره خادمة الامام الحجه عجل الله فرجه ام منذرالحجار ✍✍✍