5870
خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
دكت اطبول الحرب حل القتال
وبرزت الأنصار كلهم للنزل
تعنو وصارت عيايه ومغبره
سبعين لاجن قاتلو ابلا محال
حسين عنده نصار كلها مسنعه
خلو روس وجثث متكطعه
هاي تربات اليحب بلواقعه
حسين انصارك هد بينه
صاحو وبصوت اتعنينينه
نجيب العسكر والشط لينه
نجيب الطائر بالجو
لو اشر بيده
@@@@@@@@@@@@@@@@@@
لف حبيب عمامته وهد مرتجل
وكال هاذ الجيش شدو بلحبل
هوه هاذ اليوم يوم المفخره
هنا تبين إلزلم ما تبقى عدل
هدو عله الميمنه وعل ميسره
الجيش والخياله لزموهم سره
الحومه خلوها قيامه الاخره
عابس شك هدومه وناده
فدوه نروح الشيخ الساده
هدو كل واحد بعناده
زلم حسين اليوم تبين
@@@@@@@@@@@@@@@@@@
سمعو بزينب تخاف من النصار
وگبت عمايمهم وادوت نار
وهوسو يم خيمت الحر مفرعين
ااركاب نطي للخدر يا بنت الخيار
عيب تبقه ركاف فوك جسامنه
مادام زينب خايفه من اجدامنه
كومو طيحوها يخوتي اخياامنه
ذبو رباط وعلكوها
الحومه اليوم يطيحوها
ومعمايم منهم شالوها
شلون تخاف الحره
وحنه اركبنه طيح اليوم
@@@@@@@@@@@@@@@@@@
روس خلو كربله وكثر الدمه
صريخ واصل صوتها لسابع سمه
ذب صليبه وهب من شاف الحسين
الله يكون ابعونه من شافه انعمه
من حبيب اتعلم شلون العشك
دره بيضه وكلبه بلحب يدك
تريد تعرف بصدك همه الصدك
لحسين انطو معنه الصحبه
لكابلهم رد واكف كلبه
وليشرد ما يندل دربه
خياله شردت من عدهم خياله
خادم القصيده
عباس اللامي
اليوم شيبة كربله وشبانها
تحزمت والخيل طگ اعنانها
****
وصلت لحد الركب دم الرگب
ورگة الموت انقرت والكل شطب
خيولهم تسحگ زلم سحگ الگصب
وهاي اول مره نار بلا حطب
فايره ونسمع رجيف اسنانها
****
دلهمت وسيوفهم برگت برگ
والگرب يم نارهم هم يحترگ
زلم عالعفيه ابد ما تنسبگ
يوم طبوا عالزلم صار الخفگ
لهسه ما ساكت بعد ميدانها
**
فزعه فزعه تگابلو والطف هله
وبيسو بنحورها ذيج المله
الليله هاي الليله بس للمرجله
وحگها تشيم اراضي كربله
وتنحسد بين المدن بمچانها
****
هز حبيب الرايه لمثگل العزم
والشگر صهلت وطبتها الزلم
وفگره بين اسيوفهم من يلزم
مو فقط بس ينذبح لا ينعدم
والوجود احسين عالي بشانها
**
اخذ من انصار الحسين العبر
وراح انقل جزء وتجسده الصور
بيهم الشگ روحه من گد الفخر
وبيهم الراجع ندم للمستقر
اعيون ابو اليمه أصل عنوانها
**
كلمات
علي خزعل الصالحي
هوسات للإمام العباس عليه السلام …
ـــــــــــــــــــــــــــــــــــــــــــــــــــــــــــــــــ
يابوالشـــــيمة يا عباسي
دومك خويه رافع راسي
وإنته ٱحزامي يا نبراسي
مِنّ الغيرة .. دمك حامي
ــــــــــــــــــــــــــــــــــــــــــــــــــــــــــــــ
خويه ٱعلينه دارت كلهه
هـاك الراية گوم ٱحملهه
شوف أم عـون المـدللهه
چفوف الحيرة .. تصفج بيهه
ـــــــــــــــــــــــــــــــــــــــــــــــــــــــــــ
هاي العيلة گوم ٱرويهه
الشدة ذراعك التّـــلويهه
كـرّة حـيدر وكُر بيــهه
هاي اطفالي .. تنطر جودك
ـــــــــــــــــــــــــــــــــــــــــــــــــــــــــــ
هاي ٱسكـــينة تنشد وينه
عمـي الــكـافل امتــانينه
بچف الغيرة خل يسگينه
مايك وينه … صاحت سكنة
ــــــــــــــــــــــــــــــــــــــــــــــــــــــــــ
گلـــبك داوي تلــهب ناره
عگبك خويه شنهو الچارة
من عدواني شنوا غـــارة
عوف الشاطي … يابن حيدر
ـــــــــــــــــــــــــــــــــــــــــــــــــــــــــــ
بقلم الأستاذ / ستار عذاب الحچامي
تحجي دنيانه اعله جودك يابو فاضل
شاهدك بالطف زنودك يابو فاضل
ترفع الراس. انته عباس يابو فاضل
=======================
حاير امنين ابدي اوصفك والله حيره
زغير اني وانته اسمك وحده ديره
زينب توصفك بدر ذيج العشيره
انته كافل وحده عالعالم اميره
تمشي غيره بنص وريدك يابو فاضل
شحجي وحسينك عضيدك يابو فاضل
تنكط احساس. انته عباس يابو فاضل
======================
لو حجينا اعله الشجاعة انته فارس
ماكو بالزود لحضرتك اي منافس
بابو فاضل والله تاريخك مدارس
نرفع الروس ونذكرك بالمجالس
انته بس اسمك حضاره يابو فاضل
صارن اجفوفك مناره يابو فاضل
يشمك الياس. انته عباس يابو فاضل
======================
حتى التراب التسحكه اترسه هيبه
انته مو ثامن عجيبة اول عجيبه
الغيم لو ناديته ينزل مو غريبه
يعشكك حسين ويجلك يا حبيبه
شوفة اعيونك علامه يابو فاضل
زينب اتحس بالسلامه يابو فاضل
عطرك انفاس. انته عباس. يابو فاضل
=========================
شرف التاريخ اسمك من تخلد
وكفتك عالنهر بالطف ايه تشهد
قمة بالايثار شخصك مالك اي حد
جفك يباهي الخلائق بي محمد
منين ما صدلك مأثر يابو فاضل
بالمواقف كلها حاضر يابو فاضل
ايه تنباس. انته عباس يابو فاضل
========================
انته ابو الجود وطفوفك تبقى شاهد
جيش جنك وحدك انته وهمه واحد
لن اخوك الحسن جان وعلي الوالد
الجيش من طكَة يمنتك كله شارد
والعزم عندك عقيده يابو فاضل
للسمه اليشرد تصيده يابو فاضل
تبقه نبراس. انته عباس يابو فاضل
===================
حكَنه لو بيك انتفاخر وانتباها
الغيره رادت غيره منك وانتباها
الكابلك ينشغل فكره وانتباها
الجنه تفخر بيك باجر وانتباها
ربنه كلشي مخلي عندك يابو فاضل
وفي وما اخلفته وعدك يابو فاضل
قبله للناس. انته عباس. يابو فاضل
===============حسين المحامي
محد اخذ حجيي وخسر // اعطش دهر تروي بنهر
تضحيتك الامك فخر // يعباس
**
ضحي يبني بكلشي ضحي بعينك بجفك براسك
من الزغر ناذرتك انه للحسين بكل حواسك
خدمه هايه وفخر عندك بيهه تتباهه اعله ناسك
افزع بروحك يروحي لو عطش لحسين جاسك
حان الوفه وحل موعده //طش ع الخيم جفك نده
بالصحره صيرلهم مطر.//يعباس
*
حسين تارس بالي اسمه وتارس عيوني امامي
حيل يمه اعليك ازعل لوسمعت حسين ضامي
ريحتني بحجي الغيره من گلتلي رغد نامي
اطمأنت روحي كلش عطش مايوصل خيامي
لو للخيم يوصل عطش // اعتبري شالوني بنعش
ضلت على الله وعالقدر // يعباس
**
يمه تحت اجدامي جنه وبين ادين حسين موتك
استغل هل فرصه واركض لاتخليهه تفوتك
شمايلوحك سهم اصرخ حسين احبه بعالي صوتك
لوتحس روحك مقصر ثوب بنحرك واخوتك
كلي فخر من انسأل // مارد الج واحد عدل؟
يل تعبي بيكم ماخسر // يعباس
**
ماادليك الحقيقه انه اعرفك انته تندل
تدري بالماينطي روحه لجل اخوته هذا ينذل
السهم عزبله عينك خلي وجه السهم يخجل
لون ماگطعت ادينك يابو فاظل والله ازعل
بفي وجهك امأمنه الخيم // لايوصل الزينب سهم
ماارضه اذا واحد عبر // يعباس
**
عالضعن طش امنياتك يمه وانسه وحده وحده
الزلم تنقاس بمواقف كلمن وفعله اعله كده
لاتجامل ماي بل طف وطينته خلهه اعله خده
فياي صير اعله المحامل ووجه عين الشمس سده
خطواتك امشيهه بحذر // بالك يمس ضعنك خطر
راح انتظر منك خبر // يعباس
**
اكطع اجفوف الوفائي وخلي يكبر بيك اسمي
ومن اذكرك راح اشكرك حققت يايمه حلمي
مقصره مطيه حسين ولدي كون انطي حتى دمي
شكبره حضي تگلي زينب كعدي يم عباس يمي
ترفعلي راسي لو متت // شكرآ الك ماقصرت
بتظيحتك اسم امك كبر // يعباس
**
محمد خضير الزيدي
زلزل الكاع عليهم من تطب
يمه عباس يعرفونك صعب
====================
يمه اوصيك واعرفنك شهم
سيف الحسين وابد ماتنثلم
تشتري الموت يخيال الزلم
تخزر الجيش زلمهم تنهزم
ويه الدموم دمعهم خليصب
يمه عباس يعرفونك صعب
===================
ازآر وعيد معاجز حيده
سوي الطفوف كانها الاخره
وزع الموت عليهم بالسره
وازرع الكاع جنود مطشره
بالملمات تَكَشفّها الحجب
يمه عباس يعرفونك صعب
==================
اعرفك زين واعرف امروتك
تحلف الناس ييمه ابغيرتك
امك لهاي يكافل ربتك
تبذل الروح لاخيك رادتك
بالبطولات ابد ما تنغلب
يمه عباس يعرفونك صعب
=================
امك وبيك افاخر وابتشر
اعرف ارباك وانه البيك افتخر
فارس وحيد وابد ما تنكسر
ترعد اتصير اذا تسمع خدر
غيرتك نار تجويه الترب
يمه عباس يعرفونك صعب
=================
تعرف اعداك اذا مرك زعل
انته تربات علي الحيد الفحل
ساعة الموت ولا تعرف وجل
جنه بالغيض يجي وياك الاجل
مشنقة موت يسيفك ينّصب
يمه عباس يعرفونك صعب
==================
نينوى تصيح اريدن واستمع
منك اخبار صرت لختك درع
نخوتك نار تذوبهم شمع
كون الانفاس عليهم تنكطع
عالشياطين تظل تمطر شهب
يمه عباس يعرفونك صعب
=================حسين كاظم
يا ابا الفضل
القصيدة : بالطف اشوفك عباس
محرم الحرام 1446 هــ
▫️▪️▫️▪️▫️▪️
بالطف اشوفك عباس قائـداً ونصرا
وللخيــم فـــيّ ومــاي ساتراً وسترا
ياعبــــــــــــــــاس يابا الفضــــــــــــل
ــــــــــــــــــــــــــــــــــــــــــــــــــــــــــــــــ
بالطــف اشوفـك مهيوب شيخ الزلم بالحومه
معــروف صيتك عبــاس مثل الكمر ونجومه
بيوم الكلت يمــي الماي زدت النهر معلومه
من مثلك ايلـــوح الغيم منه تخاف اخصومه
للخوه جفـــك عبـاس حارساً وذخرا
وللخيــم فـــيّ ومــاي ساتراً وسترا
ياعبــــــــــــــــاس يابا الفضــــــــــــل
ــــــــــــــــــــــــــــــــــــــــــــــــــــــــــــــــ
يابطـل ياخـــيّ حسين للحرب كشخة ساده
من تخزر اتهز الجيش ورجفه تصيب القاده
ولو شـاف طولك عباس يكضيها كله اشــراده
يالجفك يعــادل كـــوم سبيعن الـــف وزياده
انه اختك وردتك دوم شامخاً وفخرا
وللخيــم فـــيّ ومــاي ساتراً وسترا
ياعبــــــــــــــــاس يابا الفضــــــــــــل
ــــــــــــــــــــــــــــــــــــــــــــــــــــــــــــــــ
يابا الفضــل تمطر غيض بس ارعد ايهابونك
سل سيفك وصيح بصوت فنهم اذا يدنونك
انـه اختك وروحـي اوياك ومأمنه بين اعيونك
للخـــوه قدمت ادروس جان الوفه مضمونك
من نذكر اسمك سكاي غيمــةً ونهرا
وللخيــم فـــيّ ومـــــاي ساتراً وسترا
ياعبــــــــــــــــاس يابا الفضــــــــــــل
ــــــــــــــــــــــــــــــــــــــــــــــــــــــــــــــــ
شايل نهر فوك العين يعرك شهامه وخوه
كلب اليشوفك عباس ينبض شجاعه وقوه
بالغيره عنوانك صــار للغيره تبقى القدوه
ولمثلك ايحير النــاس تارس حياتــه امروه
يالمنطي للعيله اهـواي ناظراً وعمرا
وللخيــم فـــيّ ومـــــاي ساتراً وسترا
ياعبــــــــــــــــاس يابا الفضــــــــــــل
ــــــــــــــــــــــــــــــــــــــــــــــــــــــــــــــــ
ام الوفـــه ام عبـــاس مشكوره والله اهوايه
نذرت سنينك لحسين زود وفعـــل وكفايـــه
وفت عهدها ابهل يوم وانطتنه هاي احجايـه
من يرفع الرايه حساس يحلى رفيف الرايـــه
ماتحلــى الا العبــاس رايـــةً وصبرا
وللخيــم فـــيّ ومــاي ساتراً وسترا
ياعبــــــــــــــــاس يابا الفضــــــــــــل
ــــــــــــــــــــــــــــــــــــــــــــــــــــــــــــــــ
الشاعـر : فيصل عاشــور المنصوري
ابوذيات نعي لأبالفضل العباس ع
يخويه الرايه طاحت مال اخينه
رحت والگيت جسمه مالـخـيـنه
ومـن مـهـره يزيـنب مال اخينه
بدون اچفوف طاح اعله الوطيه ..
تعـب من النزف حيلـه وگـل باه ـ قل حيله
اشيلـه اشلـون حيرني وگـلبـاه ـ
السهام ابظهر وبصدره وگـلبـاه
رمح نصين طـر گـلبه يخيه..
عله الناگه ودرت وجهي ورايه
شفت جود الكفل طايح ورايه
شني شوره بسبي زينب ورايه
اضل لويرضه اروح اني سبيه..
شني الحصلته من فرگاك وجناي
غير اسياط خويه وسطر وجناي
الشمر من وج خيمنه النوب وجناي
احترگت وليلى گام اطفي بيه.
الامام الحسين ع يخاطب ابا الفضل ع
خبر موتك وصلني وصار علماي
عگبك ياهو خويه يشيل علماي
نايم لا تـضــل عـباس عـالماي
بعـد سـاعـه تـدوس الخـيل بيه..
موتـك خله گـلبي بجـرح يدماي
هدم حيلي وشلـّل صابالي يدماي
طحـت بيدك عـلم عباس (يد ماي)
العـلم والمــاي مـارجـعـن الــيـه..
الشاعر عقيل الحسناوي
بين الخيام شكد صحت دخيلك
شوفتك ماي بس عطش رحيلك
--------
سكتة وسولفت نضراتي وياك
يل حتة شمسنة تغازل لواك
رايح للنهر والموت يتناك
بطعم الماي واكثر عندي طرواك
رايح بعيد وسكنة تندعيلك
شوفتك ماي بس عطش رحيلك
-------
يالوجهك نلقبة بسمة حسين
علة درب الشريعة انشبحت العين
سمعت الموت يركض ياخذ الزين
من عدها وبقيت اصفك ب الايدين
رايد تروح وابقة اشتكيلك
شوفتك ماي بس عطش رحيلك
--------
مو واحد اعيوني تشوفك هواي
ياماي التجيبة وضحكتك ماي
انسة الدنيا لمن تكعد وياي
اختك ودعتها وفكدت الراي
تدري بالكون مايصح مثيلك
شوفتك ماي بس عطش رحيلك
--------
بوجه حسين اقرة كل الاخبار
اذا شفتة تغير اشتعل نار
لزم ضهرة وصحتلة سولف شصار
ماكلي وركض للشاطي محتار
بخوف حسيت وصعبة اعتنيلك
شوفتك ماي بس عطش رحيلك
--------
رجع دم اعلة جفة ويلطم الراس
صاح ابجي يزينب راح عباس
اخيج مات يعني مات الاحساس
حكها اليوم من تضيك الانفاس
صعبة يلكون بالكلب بديلك
شوفتك ماي بس عطش رحيلك
--------
بعيدة المشرعة وماضل بعد حيل
بسيف المو عطر ذبحوك ياهيل
بعد ساعة لخيمنة توصل الخيل
بدخان وحرك استقبل الليل
شفت الرماد وفكرت اجيلك
شوفتك ماي بس عطش رحيلك
--------
الشاعر / سيد معتز الحسيني
أَصْحَابِ الصِّدِگْ..........وَارْبَابِ الْعِشِگْ
مُسْلِمْ..حَبِيبِ..وْعَابِسِ..وْجُونِ..وْزُهِيرْ
أَقْطَابِ الْوِفَه...................أَهْلِ الْمَعْرِفَه
شَوْذَبْ...سَعِيدِ...وْنَافِعِ....وْحُرِّ....وْبُرِيرْ
وَآنَه ادِّعِيهَه مْحَبِّتَكْ...وَاجِبْ أَكُونِ بْخِدْمِتَكْ...
يَا حُسِينْ...يَا حُسِينْ...
-----------------------
الْيِحِبْ مِنْ گَلْبَه مُو بَسْ يِحْچِي بِلْسَانَه
تِدَوْرَه شْمَا تِدَوْرَه هْنَانَه وِهْنَانَه
فَقَطْ يَمِّ الْيِحِبَّه تِلْگَه عِنْوَانَه
يِعِيشِ وْيَاهْ كِلْ أَفْرَاحَه وَاحْزَانَه
يِتْنَفَّسْ هَوَاهْ.............وِيْدَوِّرْ رِضَاهْ
مَا عِنْدَه بِالدِّنْيَه شُغُلْ عَنِّ الْحَبِيبْ
وِبْطَفْ كَرْبَلَه...............لِلْحُبْ قَافِلَه
نَامَتْ عَلَى حَرِّ الثَّرَى دُونِ الْغَرِيبْ
هَاذَه دَرِسْ مِنْ صُحْبِتَكْ...وَاجِبْ أَكُونِ بْخِدْمِتَكْ...
يَا حُسِينْ...يَا حُسِينْ...
-----------------------
(سَعِيدِ) اللِّي تِلَگَّه دُونَكِ سْهَامَكْ
مِنْ خِلْصَتْ صَلاتَكْ طَاحْ گِدَّامَكْ
يِگِلَّكْ يَا حَبِيبِي فِدْوَه لَاجْدَامَكْ
أَرُوحَنْ بَسْ تِرِدْ سَالِمْ عَلَى خْيَامَكْ
لَاچِنْ هَلْ وِفِيتْ.......يَحْسِينِ وْرِضِيتْ
لُو تِرْضَه خَلْ تِمْطُرْ عَلَى عْيُونِي سِهَامْ
يِحْلالِي بَعَدْ........................يِزْدَادِ الْعَدَدْ
مَا دَامَكِ انْتَه بْعَافِيَه وْخِيرِ وْسَلامْ
لُو بِيدِي شَايِلْ رَايِتَكْ...وَاجِبْ أَكُونِ بْخِدْمِتَكْ...
يَا حُسِينْ...يَا حُسِينْ...
-----------------------
أَنَا وْيَه النَّاسْ أَگُولِ حْسِينْ مَحْبُوبِي
لَاچِنْ تِخْتِلْفْ عَنْ دَرْبَكِ دْرُوبِي
أَذْنِبْ وِانْتَه لِتْطَّيِّحْهِنِ ذْنُوبِي
وْتِجِيكِ سْهَامْ يَا بُو الْيِمَّه مِنْ صُوبِي
أَرْمِيكِ شْكِثُرْ...وَارْجَعْ أَعْتِذُرْ
چِي إِنْتَه طَيِّبْ خَيِّرِ مْسَامِحْ كَرِيمْ
تْگِلِّي يَا هَلَه...عُذْرِي تِقْبَلَه
مَتْرِدْنِي عَنْ بَابَكْ يَبُو گَلْبِ الرَّحِيمْ
يَالْمَا تِعُوفِ لْعَافِتَكْ...وَاجِبْ أَكُونِ بْخِدْمِتَكْ...
يَا حُسِينْ...يَا حُسِينْ...
-----------------------
(حَبِيبِ) شْگَدْ بِچَالَكْ مِنْ خِلَصْ عُمْرَه
لِأَنْ هَجْرَكْ صَعُبْ يَا مُهْجَةِ الزَّهْرَه
وَانَا أَنْسَاكْ لَا يُومِينْ لَا عَشْرَه
الْهَجُرْ عِنْدِي وِسَافَه شُو سَهِلْ أَمْرَه
چَا يَمْتَه أَصِيرْ........عَبْدَكْ لِلْأَخِيرْ
وَاتْنُومَسِ وْأَتْهَنَّه يَحْسِينِ بْهَوَاكْ
وَادْعِيهَه بْهَيَامْ....مُو بَسْ بِالْكَلَامْ
يَا لَيْتَنِي يَا سَيِّدِي كُنْتُ مَعَاكْ
كُونَ انْلِچِمْ لِمْصِيبِتَكْ...وَاجِبْ أَكُونِ بْخِدْمِتَكْ...
يَا حُسِينْ...يَا حُسِينْ...
-----------------------
يَمَنْ ضَحِّيتْ لَجْلِي وْقَدَّمِتْ طِفْلَكْ
أَنَا خَجْلَانْ مَدْرِي شْقَدَّمِتْ لَجْلَكْ
عَجِيبَه بِالشَّمِسْ عَارِي يِظَلْ مِثْلَكْ
وَانَا بْدِنْيَايْ أَتْفَيَّه تَحَتْ ظِلَّكْ
چَمْ مَرَّه گِلِتْ...........يَا يُومَ الْتِفِتْ
عَايِشْ تَرَانِي مِلْتِهِي وِانْتَه تِصِيحْ
لِخْيَامِي تَعَالْ...........هَالدِّنْيَه زَوَالْ
مَاكُو أَهَمْ مِنْ جَنَّةِ حْسِينِ الذَّبِيحْ
رَايِدْنِي أَدْخِلْ جَنِّتَكْ...وَاجِبْ أَكُونِ بْخِدْمِتَكْ...
يَا حُسِينْ...يَا حُسِينْ...
-----------------------
#الأصحاب
#محرم_١٤٤٦هج
الشاعر حسن خنافر العاملي
قال مولانا امير المؤمنين علي ابن ابي طالب (ع)
«طريق الحق موحش لقلة سالكيه»
#محرم_2024
#ليلة_٥_محرم_١٤٤٦هـ
#ليلة_سفير_الحسين_ع
مسلم الحق دوم موحش هالطريق
طوعة بس وياك مـا ضلك صديق
**١
عـمـك الـكــــرار وضـح فــي مقال
كلـمـة الحـق هي التبــين الــرجال
اخــــــذ من الكوفة يا مسلم مثال
تـجـمـعـــو الاف بــس بــــلا فعال
لوحــــــدك ضليت سـاعات النزال
طوعـــــة بس وياك ضلت للقتال
هــــي للحق هـــــم للباطل رفيـق
**٢
ناس اهــل شيطان والـيـهـا الكفر
عـافــت الاسلام ردت لـــــلـحــفر
لان حــق الناس مـن عـنــدك تفر
لـــــــوحدك عافوك ما ضل لو نفر
طوعه بس الحازت اوسام الضفر
خذت عشرة و هـم ناتـجهم صـفر
هـذا حـال اليمسك بـركـن الوثيق
**٣
لوحــــدك ضليت مـــا عـندك دليل
يالـغـــــريب بـدار غربة و دنيا ليل
اباب طوعة وكفت دمـعاتك تسيل
انطيني ماي و الج يتسجل جميل
جزاج عند المصطفى وربنه الجليل
انـــه مسلم كـلـــــت والوالد عقيل
انـــــه مسلم والـــدي لحيدر شقيق
***٤
كالــت اهلاً بـيــك يا طيب الحسب
يـابـن اخي المرتضى و افضل نسب
ياللي علمه الــكــون منكـم مكتسب
اليحبكـم نـجـح و الضدكــــم رسب
الكوفة اهـــــل خذلان لا مـا تـنسب
طوعة بــــس وياك بـاجر تـنـحسب
ناصرة ويـــــاك فـي وقـت المضيق
*٥
انــته نور و حاوطك جـيش الظلام
ابـحـجـر يرمـيــك و بـــنـار و سهام
و الـي جـان ويـاك اخـلـف بـالـكـلام
صار ضــدك و استل اعليك الحسام
طوعة بـس المـيزت مـعـنى السلام
بطاسه مالت ماي حصلت عـالوسام
او وســـام الشرف بـس الهـا يليق
***٦
الطبــرت الكرار في وضــع السجود
عادة عــد هـالناس تخـلــف بالوعود
حــــــاوطــوك بغدر و بغـل و حـقود
نسو انـتـه الحـيد ابــن ذيـج الأسود
طوعة بس تشجعك وسط الحـشود
گـــــــوم بـيـن يـبـن سادات الوجود
ياهو انــتـه و ياهو مرجانه الطليـق
***٧
مـــو جديد الغدر من ذيـــج السنين
ابـتــدى من الباب و ضلوع و جنين
التطلب بثارات من بـــدر و حـــنين
اليوم غـــدرو بـــيك باجر بالحسين
ربـع وي حسين و اخــــوان و بـنين
انته طوعة وياك بـــس هي المعين
صدگ وكفــت رغم كل هذا النعيق
***٨
نــــــاس وي الـباطل اعـالحق تجور
بلا حمية تعـيش مـا بــــــيها الغيور
جـثـتـك يالحــيد من فــوگ القصور
انرمـــــــــــت للگاع ضــل دمها يفور
جــثـــتــك وي هـــاني بالكوفة تدور
بـالـحـبـل يـنـجـرن ابــدال الـــــقبور
بدال دفنـك تنسحب في كل طريق
***
كلمات: عباس شريف الخفاجي
عباس خله الحومه
من كل كتر ملزومه
................
بالحرب.. يرتجز.. صاعد اعله الشگره
مبتسم.. ونعم.. ابن ابو ليعبره
واليجي.. للكمر.. اله يكسر ضهره
اخو زينب.. نار يلهب.. من يطب للحومه
مايثني.. وجيش يفني.. البطل هاي اعلومه
منه الشرد مالومه
من كل كتر ملزومه
......................
مايهم.. للعدد.. شما كثر كدامه
هاشمي.. لوزعل. وبيده شد الثامه
ينرعب.. هل عدو. وهامه تضرب هامه
ابن حيدر.. هذا قسور.. صولته المعروفه
اليسمع اسمه.. من مكانه.. تصير بيه الخوفه
مشرد الزلم من يومه
من كل كتر ملزومه
...........................
لوغضب.. يرتعد.. الكاع كوه تشيله
بنضرته.. لو خزر.. تصيح كلهه ادخيله
واليطب.. للحرب.. امن الكمر ياويله
كله همه.. وحار دمه.. يشتعل بركانه
من يقاتل.. الله يستر.. من يكف اردانه
الطاح مابي كومه
من كل كتر ملزومه
........................
مرجله.. بوالفضل.. بس اله تحلاله
من يهد.. مايرد.. ايعيل بالعياله
بنبرته.. وصيحته.. ايطيح الخياله
عالجماجم.. سيفه كاحم.. زاد بيهه عناده
هذا طبعه.. وبقتاله.. ايفور دم الساده
عن الكمر معلومه
من كل كتر ملزومه
........................
للنهر.. من وصل.. ودك عليه الرايه
تخورست.. هل زلم.. ماكو اي حجايه
العلكمي.. بجربته.. داره هوه ومايه
كمر هاشم.. بالمراجل.. منهو يوصل زوده
واخته زينب.. شادتله.. علك فوك ازنوده
خله الزلم مالومه
من كل كتر ملزومه
........................
كربله.. تفتخر.. بيهه طب الكافل
بالوفه.. منتصر.. وعالضلم ميجامل
بنخوته.. وغيرته.. بگلبه زينب شايل
هلله هلله.. بالمعارك.. من يسل بتاره
كلهه صاحت.. ابن حيدر.. شن علينه الغاره
خيل بزلم مردومه
من كل كتر ملزومه
محمد هادي العقابي
مــن سفرة الكوفه مارد ابوها
ما حملت الفركه وميته لكوها
ميته بدمعها ،، مسلم فجعها
١
حميده تكول كافـي الفركه اذتني
بغيابك ليش اضـــل عدله تموتني
يمـر دونك فـراغ الـلـيـل ويعتني
انه الميته بدمعها الناس شافتني
دمعـي جـرح خـدي وبلل جفوني
بويه انته كل اهلي وهلي نسوني
محد سمعها ،، ميته بدمعها
٢-
منو يعوضني ابوي الراح من عيني
انـه الميته بدمعها وبـاكـو اسنيني
مـــن ابــــرد بـعــد مـحـد يغطيني
تـرد لـو مـا تـرد لحضاني حاجيني
كــوه انــه لازمته بـضلوعي كلبي
ماعندي حب ثاني بس انته حبي
بنيتك وضعها ،، ميته بدمعها
٣
رسايل شوك الك وديت بس سكته
اذا مـــات الـعـزيـز تـعـيش سالفته
ويموت مــن القهر والهم كلب بنته
بـسـك مـــــن غيابك كلـبـي تعبته
هجرك هدم روحـي وهتز كياني
وبدموعـي غركانه ومحد اجاني
طفت شمعها ،، ميته بدمعها
٤-
التموت وهيه عدله شلون موتتها
مثل كسرت ظـهـر مـا تهده علتها
حميده بـطـول ذاك الليل دمعتها
عــدله والمصيبه مــيـتـه سوتها
بس بالحجي عدله ماتت حميده
ما ريده كــل عمري مسلم اريده
افهم وجعها ،، ميته بدمعها
٥-
تكول الناس اصبري وحسبي لجيته
ومـثـل جـيـت هـلال الـعـيـد تانيته
شوكت يـرجـع ابوي ويرحم ابنيته
الموت انـه بغيابك شــوف شافيته
شكد حاولت بويه ماصحلي ملكه
والدنيا بغيابك مـــا تـسـوه خنكه
محني ضلعها ،، ميته بدمعها
حسين عبد الجليل المالكي
احنه من وادي الغياره.........ياحسين
وداعتك رهن الاشاره..........ياحسين
لوحة السماء
خطت الدماء
*******
عالعهد نبصم اجينه بكطعت الراس
احنه من عالم الذر وهذا مقياس
ارواح ننطيهه ومهجنه ثابت الساس
ابدمنه عاهدنه العقيله يدري عباس
تشهد علينه الزجيه..........يا حسين
وياك نحجز عالمنيه..........ياحسين
صحبة الوفاء
خطت الدماء
*******
مثل أصحاب الكهف والدنيا بسكوت
نامو بحضن المنايا وعرفو الموت
ظلوا الالاف السنين ومانفع صوت
هذي أنصار ابواليمه چنهه ياقوت
كامل وعندك عددنه .........ياحسين
وياك مانخلف وعدنه............ياحسين
رايته الولاء
خطت الدماء
*******
من حبيب اخذ العلم وفهم دروسه
راح يم باب المخيم يلقي هوسه
راسه مسقط كربله صارت نفوسه
صار ابن ظاهر فخر شعت شموسه
كاتب بحزت وريده ..........ياحسين
طاعتك فرض العقيده..........ياحسين
لوحة الفداء
خطت الدماء
*******
عابس انعد ابحياته من المجانين
شكك اهدومه وينادي بهل الملايين
صار كل دكة نبض مكتوبه يحسين
صار مضرب للمثل بجنونه للبين
عابس انجن بحياته ..........ياحسين
وياك حقق امنياته ...........ياحسين
يرتوي الآباء
خطت الدماء
*******
من برير اخذ الشجاعه وعيش مهيوب
اسمه موجود ابضياء الجنه مكتوب
يكول بس حسين غالي وعندي محبوب
مهجته ابحب الامامه صارت اتذوب
يا ملك وانت اميره .........ياحسين
وياك ماخاين ضميره .........ياحسين
مصدر البقاء
خطت الدماء
*******
من زهير اخذ الوفه شوف المراجل
بسيفه يستعرض قتاله بكل وسائل
الشمر من شافه لبد بساحه نازل
اشتبه حسباله وصلهم ابو فاضل
ياملك واصل مكانه ..........ياحسين
چان مهيوب ببزمانه..............ياحسين
عشقي كربلاء
خطت الدماء
*******
عوسجه شيخ المراجل يبدي يومه
يكلب الطف لو نزل تعرف خصومه
يرتجز چفك غضب راسمله حومه
صار مفتاحه الطفوف وبي نجومه
انت واحد ماكو ثاني...........ياحسين
زارع بدمك اماني ........ياحسين
يعتلي النداء
خطت الدماء
*******
تمت بعون الله
خادمكم ....يوسف الفتلاوي
الانصار احمد العكيلي
لهنا بعد يصحابي وفيتو
رحله طويله وبيها عانيتو
والليله ارجعو منين ماجيتو ..
………………………
إِتّخْذوً الليلَ جمل إِستقبلوهه بصدمه
گالو اعذرنه سيدي انعوفك بوحدك زحمه
الما ينطي دمه فدوه الك المن ايرخص دمه
خدامك ومنك فضل تقبلها هاي الخدمه
شنهي العمر لو يگظي من دونك
شنهي الشمس .. تضويلنه عيونك
والعاهدك ما يگدر ايخونك ..
……………………
جربنه باجر بالحرب واحد يسابگ واحد
بسيف برمح حتى بحجر بيمن نحارب رايد
عابس يهد بلا درع مجنون طبعه يعاند
مشتري الموت وغايته لخاطر حبيبه يجاهد
لو جن جنونه عابس ايذلهم
يشمر قميصه من يقاتلهم
وگبالي فنه اليوگف ايگلهم
……………………
جون الگظه ايام العمر عايش بخير جفوفك
نعمه ويسر يمك بقه و بالعسر صعبه يعوفك
باجر سعيد بكل فرض لمّن تصلي يشوفك
يتلگه السْهام بصدر انفاسه بس حروفك
فرصه احنه منتظرينها بلهفه
وشگد بخيت الباجر اتكلفه
وبهيجي شده الصاحب اتعرفه
……………………
ويّاك حد گطع النفس صاحو زهير ومسلم
امنيته الانصاري وهب ينذبح دون المسلم
يقسم حبيب بشيبته حيلي صدگ متهدم
بس اعله مودك بالحرب تلگاني بالمتقدم
اصحابك احنه و گد الحجايه
كل مصلحه ما عدنه لو غايه
تلگانه باجر كلنه وفايه
…………………
عباس گله سيدي كلمن يعوفك يخسر
انه و اخوتي فدوه الك للغالي نفدي المنحر
لو كلنه نتگطع وصل واعله الرمل نتطشر
احنه يبو الاكبر تره مو اعز من الاكبر
باجر اذا تنگطع جفيني
والسهم شفته نابت بعيني
بلكت اوافي لزينب بديني
…………………
من فاطمه شنهو العذر لمن نعوفك يحسين
صحبتنه مو عبرة وكت وانت اتعرف ربعك زين
طمّنها زينب بت علي وما تعله عالحاجب عين
سور احنه نوگف عالخيم والشمر يوصلها منين
بايعها روحه اليوصل اخيامك
راكع ذليل انجيبه گدامك
انت الامير و كلنه خدامك
حسين طبو للحرب صحبانه
الهلا والحياهـــم اعله السانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هـــلا يامـــن بالحرب مالك نضيـر
ياحبيب گلوبنه وشيــــــخ الچبير
هلا بهاي الشيبـــه الطفي السعيــر
يبن ضاهـــــــر تسلم ويسلم زهير
بيكــــــــــــم گلوب الحرم فرحانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا صاح بعابس وحي الله جــون
وضلو السبعيـــــن الف يتراعشون
اليوم طبهم عابس وطــب بجنون
الموت لجـل حسيــن گاللهم يهون
حسيــن راواني العشگ بالوانـــــه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا بهاني ومسلم وعمرو وشبيب
الخلو جروح الگلـــب منهم تطيب
هلا بالحــر القريـــب المو غريــــب
هلا بيحيئ المازني وجبله الحبيب
الگلــــــــب بيكـــم مبتشر يخوانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا بسيـــــف البالحرب مايستراح
هلا بكردوس اليحـب طـگ الرماح
هلا بأسلم والسبط كل حيله صاح
هـــلا بكلمن بالحرب لعيوني طاح
هــــــــــلا ببطال الوغئ وشجعانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا يالبيكم اشــــــد عزمي وگفاي
هـــــــلا يالشوفتـــكم تعادل الماي
هـلا بسلمان اليسـد عوزي وضماي
وبرير المشتري المــــــوت الرضاي
الصحبه هاي الصحبــه ماخسرانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا بيكـــــــم والهلا اعليكـم قليل
هلا بالأدهم ابـــــو السيف الثجيل
هــــلا بربعي الدوم ماألهــم مثيـل
اليوم ضلـــــت كربله تموج وتميل
الزلــــــم منكم هاكثــــــر فحطانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا يالتمشــــون وي دم الوريــــد
بيكم الوي اليوم ابو ذراع الحديد
هلا برايــــة حنضله اوراية سويد
هلا بالنصراني والطائي وسعيــــد
بيكــــــــــــم الطف اسعرت نيرانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هــــــلا بالضحولي بالغالي ونفيس
وهـــــــــب ماقصـر ولاقصر انيس
هلا بعبد الله وهلا وحي الله قيس
هــــــــلا بكلمن عايش بوجـــــدانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
مصطفئ الصالحي
،،،فزعة الانصار،،،
(الانصار )
مجلس بسم العطشان
نصبو وسط الميدان
انصاره ...انصاره
........١..........
والله تهظم .يثلم اشفافه العطش ياناس صعبه
والله تهظم .المنخلق ماي الله لجله مايشربه
جان مجلس والدمع ترجم حجيهم
بلكت يمر بيهم ويشرب بجيهم
بجف مالطمو بحساس
خاف يمرهم عباس
واخباره ..انصاره
.......٢........
مستهلهم .باجر ايظل الهوه معقوله وحده
مستهلهم .كل طفل يعطش يمد شفته علئ خده
باجر النار بخيم زينب تسافر
باجر ادوس علئ ابو اليمه الحوافر
هيه التهظمهم وين
زينب وبلايه حسين
محتاره ..انصاره
.......... ٣.........
العمايم .كبل لازيينب تسولف شمروهه
العمايم بيهه جا شيصير اذا باجر سبوهه
عابس وجون وحبيب ابن مظاهر
اسسو اول عزاء بهلشعائر
اول مائتم بلكون
وربع حسين يحظرون
خطاره ..انصاره
.........٤.........
سولفلهم .كلشي كلب حسين وشلون المنيه
سولفلهم .ومن وصل عباس صاح انطيك اديه
ركظو العباس كالوله انتخينه
واحد انطه اجفوفه والثاني انطه عينه
وياك الحد الهيهات
خنرف وي الريشات
كلغاره ...انصاره
.........٥.......
المصيبه .بحرك الخيام الخدر من ينتخيله
المصيبه ..من يجتفون بحبل جف العقيله
من تدوس علئ الصدر خيل ال اميه
من تطيح علي الجمر باجر رقيه
سمعو بلترجيات
زين وعابس مامات
سطاره ....انصاره
........٦.........
بلمخيم .باجر وتسمع كسر بظلوع اخوهه
بلمخيم ..حتئ تطلع كالو عليهه احركوهه
باجر بكل الجثث زينب تمر
الينحلف بخيالهه اطب القصر
صاحو زينب نفداج
خيجتفون امنه وياج
نطارهه ....انصاره
...........
بشار السامي
هوسات للأنصار …
ـــــــــــــــــــــــــــــــــــــــــــــــــــــــ
فزعة غِيرة كلهم فِزعَوا
يَم الخيمة مِنّ ٱجتِـــمعَوا
والمحشومة خافت سِمعَوا
وسفة ٱعلينه .. زينب خافت
ــــــــــــــــــــــــــــــــــــــــــــــــــــــــ
صاح بـصوته ضنوة ظاهر
أفدي حسيني من كل خاطر
بنص الحـومة أهتــف باچر
إلنه ٱشتاگت … أدري الجنة
ــــــــــــــــــــــــــــــــــــــــــــــــــــــــ
يَم الخيمة هوّس هوسـة
جيش الكوفة إلاّ ٱندوسه
بسيف الغيرة نگطع روسه
باچر شوفي ... عابس ياهو
ــــــــــــــــــــــــــــــــــــــــــــــــــــــــــ
يابت حيدر ٱتسمعيني
عَمّچ آنه إبن القــــَينِ
مخلّي حسينچ آنه بعيني
يَم الخيمة … فِنّه اليوصل
ــــــــــــــــــــــــــــــــــــــــــــــــــــــــــ
يالمحشومة إحنا ٱهنانة
جَون ودومي خادم آنه
لبن الزهرة ننطي ٱدمانه
وتشوفيني … يوم العاشر
ـــــــــــــــــــــــــــــــــــــــــــــــــــــــــــ
بقلم الأستاذ / ستار عذاب الحچامي
#محرم1446
كافل
بس ابو فاضل
الهاشمي الباسل... أبا الفضل
قائد
من ظهر قائد
هوه بس واحد... أبا الفضل
صمصام السماء … محراب الوفاء
حمال اللواء.... كبشٌ للفداء أبا الفضل
قسور ومـن ظـهـر قسور طالع
الخوذة والريشه منارة وجامع
ياهو مثله هوا بعده بظهر أبوه
الگمر ضوه بنور وجهه الساطع
___.
القاهر
الناصح الناصر
الخوتّه مئازر ...أبا الفضل
الغاضب
لو نوة أيحارب
بخزرة الحاجب... أبا الفضل
ريشاته النصر... قتال الكفر
يكر وما يفر ... يذبح بالخزر ...أبا الفضل
صـار حـيـل الله القوي بيمينه
طفح عرجه الهاشمي بجبينه
دخيل خزرة عينه لو حان النزال
الشرد من سيفه يذبحه بعينه
__
يندم
الطگه مايسلم
امن أيده لجهنم... أبا الفضل
كاسر
جم خشم ماذر
شگد زلم ناحر ....أبا الفضل
حلاّل الشدد... أيات الوعد
مامثله أحد... نهتفله المدد... أبا الفضل
الراجفه أتحل لو نزل للحومه.
شهم حيد ومرجله وجيدومه.
لو غضب والغيظ يطفح يعني گول
ينـفتح بـاب القـيـامه بـيومه.
،__
رايه
بيها دگ ثايه
من حچه أحچايه ... أبا الفضل
يكتل
للحرب يدخل
بشاربه يفتل.... أبا الفضل
يغدو بالسقا .. في سوح الوغى
يوم الملتقى... والموت رقا..... أبا الفضل
مـن يـطب يتـلثم أبچفيته
أيدمر الجيش أوله وتاليته
من يطب عالحومه مايبقى شجاع
يامحارب گدر يوصل صيته
__""_
هايم
عبده وخادم
القاضي والحاكم ...أبا الفضل
بلطفه
وارتجي بعطفه
مغرم بوصفه.... أبا الفضل
كفال الخدم ... يتناثر شيم
من أيده النعم... شيال العلم.... أبا الفضل
باب للرحمه التصب عالخدمه
بشكره يتجسد دوام النعمه...
عنه مو معصوم گالو وانا أگول
بذكره يتجلى كمال العصمه.
__$$_"
✍️#حسين #حمدان #الدلفي
اجـيتك للنـهر واعـتب گـوم انـهض تـلگاني
غريبه ودمعتي حمره وراحوا كلهم اخواني
»»»»»»»›»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»
1️⃣
ظلام وغربه تعميني وشوف خيامي محترگه
وحـشه الدنيا بغيابك احس بروحي مخـتنگه
ادورك يا گـمر هاشم وكـلبي يصيحك بـشهكه
~~~
ضواك مـسافر ورايـح
ويـن ابـيا كـتر طـايح
اريدك والحزن واضح
~~~
ادورك يا امـل روحـي واريـد اتبـرد احـزاني
»»»»»»»»»»»»»»»»»»»»»»»»»»»»»»»
2️⃣
ادورك بالجـثث واعثـر وامـيز عـطرك ولونك
اشوفك يا كمر واضـح ضـاوي الدنيا بعيونك
اريدك تعرف احـوالي اصدلك وأسأل شلونك
~~~
أقرب واسـمع اونـينك
العلامه السهم البعينك
يخويه وتـعبت الوينك
~~~
حزينه والدرب يجـرح وبعدك راحـت الواني
»»»»»»»»»»»»»»»»»»»»»»»»»»»»»»»
3️⃣
وصلتك مختلف حالي طـايح عالارض طايح
تباوعلك غصب عيني أشوفك والحزن واضح
شعجب ما تعرف بزينب وعنها بهلوكت رايح
~~~
اصد الجسمك ابخوفه
تعمه عيوني ما اشوفه
الگفيل مگطعه جفوفه
~~~
وحالك تعب احـوالي هـضمني وحيل بجاني
»»»»»»»»»»»»»»»»»»»»»»»»»»»»»»»
4️⃣
اسولف واشرح احـوالي لو تحجيلك دموعي
يعايف زينب بحيره نخيتك وانت موضوعي
دكـوم انـهض يـكفالي طاحن بعدك ضـلوعي
~~~
انـهـض يا گـمـر زيـنـب
راسـي والگـلـب شـيب
انحب وانت هم تنحب
~~~
ضاگت بعدك الـوسعه وكثره والله عدواني
»»»»»»»»»»»»»»»»»»»»»»»»»»»»»»
5️⃣
اعاتب والعتب جارح وانت مگطعه جفوفك
يروحي وحنت تريدك وعيني رادت تشوفك
اودعك وارجع بشوگي ونسافر باجر نعوفك
~~~
غـربه والشـمر يـحدي
وتـنزل دمـعتي بخدي
غير الحـسره ما عندي
~~~
الزمن بخلافه شيبني امشي بغربه خلاني
»»»»›»»»»»»»»»»»»»»»»»»»»»»»»»
6️⃣
الحادي ونيته يـسافر باجـر يا درب نـمشي
وبعـدك تنـهضم روحي أبيض بالقهر رمشي
يريته الموت يلفيني الناگه تنـحسب نعشي
~~~
راسـك عـالرمـح شـفته
واحجي بدمعتي سكته
وروحـي ابـكربله مـيته
~~~
ولا انسه الحصل بيه وعاجز وصف الساني
»»»»»»»»»»»»»»»»»»»»»»»›»»»»»»»»»›»»»»»»»»»»»
محمد خشان ✍️.
»›»»»»»›»»»›»»»»›»»›»»»»»»»»»»»»»»»»»»›»»»»»»»»
دمع عيونك يسوه الماي
عوف اجفوفي واحجي وياي
خويه بأخير ايامي //اعذرني عفتك ضامي
**
يمحلي ماي المشرعه ومخلي بي طعم ولون
وبرياگك يعيش العطش ماشارب الماي شلون
لجفوفي لتباوع بعد فدوات كطعتهه تهون
اليكسرلي ضهري مو رمح من الشماته يضحكون
الشيب بشعرك جنه الغيم
ميت جنك شابع ضيم
محني عمود اخيامي // اعذرني عفتك ضامي
**
حاسبني ابنك مو اخو عشرتنه ماجنه اخوان
عفتك شباب بخيمتك لحظات شفتك كبران
يل تارس اعيوني السهم متقصد يلوحك جان
اشبگني اريد اتنفسك عطشان يشبگ عطشان
متعبك وني وضهرك مال
موذر جسمي شلون انشال
وطولك ذبل كدامي // اعذرني عفتك ضامي
**
بكل حيلي خويه من صحت ادركني شفتك يمي
مو مره اموتن لا الف كون اسمع اليبن امي
اعذرني لوبس قصرت وجروحي ترست جسمي
حلمي يخويه احجيهه الك والموت حقق حلمي
وصتني امي بزغري هواي
گل لحسينك يامولاي
يلجمني جرح اسهامي // اعذرني عفتك ضامي
**
هوه الجفوفه مگطعه ماعنده واهس ملگه
اعذرني چي ماگمت الك صدري السهام تخنگه
عن جسمي ياخويه ابتعد خاف الخيول تسحكه
المتربي بجفوفك وسف مابي مجان تشبگه
تباوع بيه ودمعك طاح
بيني وبينك بس ارماح
محيرك يجسمي الدامي // اعذرني عفتك ضامي
**
بهاي المسافه امن النهر للخيمه خلص عمري
ادركني صحتك من طحت يابو علي من مهري
اتلگه بيش الكاع اذا كثره الاسهام بصدري
حيره اعله ضهري لوطحت طالع رمح من ضهري
هاي اجروحي كلهه تهون
كل تفكيري يم ام عون
ضعني بقه ابلا حامي // اعذرني عفتك ضامي
**
محمد خضير الزيدي
شمسويه بيك الخيل والناس
معقوله هذا انته يعباس
حاجيني عالجفين وسهم الي صاب العين
**
يا ابوفاضل بيه ضاگت واخو مثلك وين اكو
انته غير احزام ظهري ليش شمتّ العدو
عازة الخوان عازه ينولي الماعنده اخو
استوحدوني خويه عگبك وبعد لحسينك منو
بطيحت الرايه طاح الحسين
دليني خويه اليوجعك وين
وبگلبي احس نارين وسهم الي صاب العين
**
حسين صاحو مات اخيك كلت ابو فاضل عدل
غيرة الله براسك انته تنطي روحك مو سهل
ما مصدك تمشي عني وتنجتل يا ابالفضل
مال ظهري من عفتني ومال وياي الحمل
عباس اشوفنك جنت جيش
تتركني وانه بعازتك ليش
ظهري انكسر مرتين وسهم الي صاب العين
**
الرايه من مالت شفتها ملت كلي ونحنيت
صحت توه انكسر ظهري المصرعك اركض اجيت
من المخيم للشريعه خلص عمري وشيبيت
بحجري من خليت راسك ليش نزلته وبجيت
ياهو الك بآخر انفاسك
وياهو اليخلي بحجره راسك
الحيل اجيبه منين وسهم الي صاب العين
****
ياهو انته من گلتلي خويه كل حيلي انهدم
عين شفت السهم بيها وعين جامد بيها دم
تحيرت خويه وعذرتك اهنا يشيال العلم
عينك اويه السهم تطلع منها شيطلعه السهم
بالعمد راسك حيل ممرود
ولا عين لا جفين لا جود
والرايه طاحت وين وسهم الي صاب العين
***
انته اخوي وانته جيشي وخويه من عندي خذوك
طول عمرك ماعفتني وعن اخيك فرگوك
بيك شمسوين خويه وليش هيجي گطعوك
انته ذاك الگمر جنك حيل خويه غيروك
شسوت يخويه بحالك اعداي
مو الاولي متغير اهواي
صوب دليلي البين وسهم الي صاب العين
***
والله دنيه وفرگتنه وجنه ابد ما نفترگ
انته جنت النفس خويه لوعفت ريتي اختنگ
الخيل من يبعدها عني صدري لمن ينسحگ
وخويه زينب ياهو الها الخيمه لمن تحترگ
عباس گلي بزينب شلون
يسبونها وتروح المتون
ومجتفه الايدين وسهم الي صاب العين
****
تمت
#ميثم #العمري
قصيدة في شهادة أبي الفضل عليه السلام .. لسان حال زينب ع …
ـــــــــــــــــــــــــــــــــــــــــــــــــــــــــــــــــــــــ
صوت أسمعت من جانب الضفّة
طـــــايح كفيلِچ وٱنگطع چـــفه
ـــــــــــــــــــــــــــــــــــــــــــــــــــــــــــــــــ
گلبي ٱنخمش من روحتك هايه
يَـمّ النــــــهر دَگّــــيت إلك ثاية
تسگي العطــاشا چــانت الغـاية
ولخــيامي ترجع رايد بلهـــفة
ـــــــــــــــــــــــــــــــــــــــــــــــــــــــــــــــــ
گالو معـــاجز ســوّه بيــمينه
غيرة وشرف يتلاهب ٱجبينه
بالحـومة تـشبح للخيم عينه
وهيبة محمد بالوغى ٱتحِـفّه
ـــــــــــــــــــــــــــــــــــــــــــــــــــــــــــــــــ
صوت ويگلي طاح أبو الغيرة
معــناها زيـــنب إختك بحِيرة
چـن يوسف آنه وواگع ٱبّــيره
مو سهلة خويه وفرگتك كلفة
ـــــــــــــــــــــــــــــــــــــــــــــــــــــــــــــــــ
گالو خِزَر ماي النــهر خــزرة
ويگلّه جودي العيلة منتظرة
ما ضوگك آنه وداعة الزهرة
حاشاني منك أشرب الغَرفة
ــــــــــــــــــــــــــــــــــــــــــــــــــــــــــــــــ
هـاتف يگـلّي چفوفه مبتورة
بدر العشيرة ومنخسف نوره
وحـسين حاير منـهدم سوره
مجروح أخوك وما وگف نزفه
ـــــــــــــــــــــــــــــــــــــــــــــــــــــــــــــــــ
صوت ويصيح الكافل ٱتگنطر
ومكسور ظهره ظل أبو الأكبر
فرگــاك تذبــح خـويه ما أگدر
مسبية عنك أمشي يا وسفة
ــــــــــــــــــــــــــــــــــــــــــــــــــــــــــــــــ
بقلم الأستاذ / ستار عذاب الحچامي
ابزودك يعباس ابزودك
طلع مــن الخيمه ناوي
زلم يذبح للعــــــلاوي ابزوده
سمعو العباس مجـبل
علي گالو راح يحمل عــوده
اتگرمت وادم جدمهه
ووادم اليبست بدمهه اشهوده
غير حته العدله طمها
الزلم ضوگهه طعمها ازنوده
من يوصل يعباس لحدودك
+++++++++++++++
اتعله ابن هاشم عليـــــهم
طيح اسيوف امن اديهم بيــده
الحرب حربه ومن يچهبه
الخيل زلمــــــــــتهه تذبه اتريده
زينب اتحـــــــيي الكفلهه
هلا بالفحط فحـــــــــلهه البيده
علي يشطر زلـــــم خشنه
اعضام وادم صفــت منه اوليده
موسيف شايلك موت بزنودك
++++++++++++++++
شوّر العـــــــــباس بيهم
همه اجــــو ماراح ليهم رادهــه
العركه يم الخـــيم تنجر
حدر زينب زلــــم شمّـر شــادهه
رايه شدهه وأجــه راهي
گال اشــوف الزلم ياهي اسيادهه
ابن زلـــــــمه ودبچ بيهه
وركّــــــب المهره عليهه وگـــادهه
والروس ظلت عالگاع اشهودك
++++++++++++++++
ثنّــــه عالحومه وگسمهه
وراد ياخـــــــذهه بزلمهه وخيلهه
امن الهواشم گـال فشله
بضهري ضلت زلم كلــفه بحيلهه
الجيش ذله وعاف نصه
لبو الاكبر هـــــاي حصه ايشيلهه
علي وجاسم عــزل الهم
الف كل واحد حصصهم ويـــلهه
والخيم محميه بزود من زودك
++++++++++++++++
گـــــــــــصد للماي وتعّنه
صــــــــــورته بينت چن خناگهه
الماي صافي وطلع شكله
هدل جرف النــــــهر كله وراگهه
شكو خشم العـله ايفركه
ســـــــبع ومنشف العركه ارياگهه
الخيل والخـــــياله شلهه
الزلم للكوفه سحــــــلهه وساگهه
والماي يتراجف حيل من جودك
شاكر الصيمري
عن لسان انصار الامام
الحسين عليه السلام
يجمعنه هلمصير النصرت الغريب
علميمنه زهير علميسره حبيب
كلنه عشك للحتف
الواحد يقابل الف
النصرت الغريب
★★★★★
انا حبيب اوالدي مظاهر
دمي لجل نسل الرسول الطاهر
ايماني يسعه يتبع المشاعر
احمد الباري ماتركني حاير
للموقف السليم ياراحة الظمير
مسلم ونافع صاح وي عابس وزهير
علدنيا والله العفا
بگلوب كلها وفه
النصرت الغريب
★★★★★
اني زهير وصارمي بيميني
صافي العقيده ثابت بيقيني
روحي فده للموت لجل حسيني
للموت اهلا ياسيوف خذيني
كل عمري بالحياه متقوي بالدليل
ماارتبط واصير بالموقف الذليل
انا وحبيب ابعهد
واحد نضل للابد
النصرت الغريب
★★★★★
عابس آنا الي ماردت حياتي
عندي حلم طول العمر مماتي
لاجل الصنعلي والبنالي ذاتي
اتكطع وصل للدين امنياتي
كل حبي للحسين وصلني للجنون
عن فطرة واعتقاد ما اعرف الظنون
امشي على هلدرب
يامحله وكت الحرب
النصرت الغريب
★★★★★
نافع انا وقوسي يعاهد سهمه
كلنه فده لحسين فدوه الأسمه
عن وجه ابوالسجاد أزيل الغمه
واليوم وكت الوفه ويوم الهمه
وبكل فخر سعيت النصرت الحسين
عن معرفة الجهاد وبلفطره واليقين
لحوض الرسول اقترب
يسگيني من العذب
النصرت الغريب
★★★★★
بصوت الشرف يوم اعلنوا للزهره
جينه نوافي بكل عزم للعتره
هذا جمعنه عن عقيده وفكره
من حسين لوصدر امر ننتظره
اكتبنه بالدماء اسطورة الوجود
للابد كربلاء ماتنتهي بحدود
لحسين كل الأمر
ونضحي هذا العمر
النصرت الغريب
الشاعر حسن لعيبي الحريشاوي
الامان البي عشت.. حسيته وياك
يعباس الوكت.. خلاني انعاك
الحياة بعيني صحره
غيابك خويه كسره
خلاني انعاك
.......................
عطشتك ياعذب.. ولاريحك يهب
وحك خوتنه مشتاگه
الحناني دِمعت الناگه ... الهزيله وبجت
كلف والله الحمل.. عله ضهور الهزل
بلا جفك يعباسي
الخجل خانكهه انفاسي ... ودمعتي الحجت
جنت الاخو .. البي احتمي .. وطولك عَلم
واني بهضم.. بيه ولا .. گلبك عِلم
انته طحت.. وانه استقر.. بيه الألم
ذكرتك.... ندبتك.... خسرتك
عليك شكد صحت.. بيه الوكت عال
الف موته متت.. من شفت الحبال
يحيلي انطاك عمره
غيابك خويه كسره
خلاني انعاك
.............................
گمر روحي جنت.. وغدر بيه الوكت
خذاك بلحضه من عيني
يخوي وهيبة اسنيني ... ولاضل امان
انه الگلبي انجرح.. اوشلت منه الفرح
عشتهه بصوره ايامي
خيم محترگه كدامي ... واشوف الدُخان
ريتك تجي.. تشوف الجره.. بذاكه العصر
ماكو گلب.. من عدنه ضل.. مامنكسر
صوتي طلع.. ناديت الك.. وكت اليسر
الحبيبه.... غريبه.... عجيبه
يبلكي بهل صبر.. اسمع خبر زين
بحلم ريتك تمر.. وتفزز العين
ولو مانمت مره
غيابك خويه كسره
خلاني انعاك
...............................
عليك انه احترك.. الگلب بسمك يدك
يكافل خدري وضعوني
ذبل عودي انخطف لوني ... يريتك تشوف
اميره ابلا وطن.. بطرك غربه ومحن
انه زينب يخو زينب
اضل اليا وكت اتعب ... اويراودني خوف
خوفي تره.. ضل بالكلب.. من كربله
الهسه اشم.. ريحت حرك.. واتخيله
حرك الخيم.. ماينسي.. والعايله
سبوهه.... ولوهه.... اضربوهه
مشينه بقافله... والغربه يحدون
ورقيه مدلله... وصوط اعله المتون
والمهه بروحي جمره
غيابك خويه كسره
خلاني انعاك
.........................
دمع عيني يهل.. الك يابه الفضل
انه الحرموني من ضيك
يخيمه واكعد ابفيك ... يساكي ضماي
عله افراكك اون.. ولامل الحزن
نده كلماتك الروحي
بعد شيطيب اجروحي ... وشماته وراي
كلشي انتهه.. وراح الامل.. لمن رحت
وتيسرت.. وتعذبت.. وتغربت
ليلي اليمر.. مابي كمر.. يحمي الأخت
زماني.... رماني..... خذاني
انه بدرب اليسر.. مني العمر ضاع
ولا واحد مسح.. خطواتي عالكاع
الأثر ضل وانته ادره
غيابك خويه كسره
خلاني انعاك
محمد هادي العقابي
انه غالب هوه الريح
مسلم وسيفي تصريح
ياحيدر..........ياحيدر
●●●●●●●●●●●●●●●●●●●●●●
راح اخلي الجيش حيره بلا عزم
مسلم وسيفي حصد بس الزلم
راح اطشرهم ورجعهم والم
بخزرتي يموت العدد خل تفتهم
انه كاتب على الهام
رافع ديني الاسلام
ياحيدر.............ياحيدر
●●●●●●●●●●●●●●●●●●●●●●
انه مترهي وعلي وسط الحروب
لو وصلت الجيش گدامي يذوب
بيدي اخلي الجاي يستسلم يتوب
المايلوحه السيف خالي من الذنوب
مسلم وبالحرب عيد
ما أطخ راسي ليزيد
ياحيدر.........ياحيدر
●●●●●●●●●●●●●●●●●●●●●●
راح اطب الحرب وستنگي الرؤؤس
اني امشي عالجثث وبكيفي ادوس
مسلم واكتب عهد گطع النفوس
باچر الكوفه ابعلي تصبح عرووس
انه ما شايل اسلاح
امشي بكيفي مرتاح
ياحيدر...........ياحيدر
●●●●●●●●●●●●●●●●●●●●●●
راح اخلي الموت بالحومه ازدحام
راح انطيهم خبر عاجل ونام
بكيفي اخلي الآجل دنگلي احترام
بدمهم ابرد لو عفت واحد حرام
صرخه وتعلى بالصوت
اشحده اليوصل ايفوت
ياحيدر.........ياحيدر
●●●●●●●●●●●●●●●●●●●●●●
راح اسويهم مثل عاد وثمود
ما ارحمه السيف لو قل بالجنود
راح ابدلهم ولبسهم جلود
انه مثل الگمر راح امحي الحشود
عزريل اعله يمناي
صوره واهزم اعداي
ياحيدر...........ياحيدر
●●●●●●●●●●●●●●●●●●●●●●
تمت بعون الله تعالى
الشاعر ●●يوسف الفتلاوي
موعد الاحرار.. باجر ايصير اللقاء اويه المنايه
موعد الاحرار.. بكربله تبدي الحياة امن النهايه
يخيمتنه ونطوفك
نموت ومانعوفك
...................
الاهل عفناهم احنه.. يئغله من اهلنه
عمرنه بنصرتك نقطف ثماره
تجاره الدنيه بيهه.. بعد مانشتريهه
ينبضات الگلب حبك تجاره
نتنفسك يحسين.. ياهوه الريه العذب
وبصمنه بالجفين.. والله غيرك مانحب
المايعرف الحب الصدك.. غريب ايعيش
ياامان الناس.. ماكو بالدنيه امان بلاوجودك
ياامان الناس.. الله خالق كاعه والبيهه اعله مودك
اجيناك الطفوفك
نموت وما نعوفك
......................
عليك الباري صله.. وجودك رحمة الله
انخلقنه انصار الك يابو الشفاعه
حلمنه وكل املنه.. نشوفك راضي عنه
نصيح بمحضرك سمعاً وطاعه
يحسين الك انصار.. اعلينه تشهد نينوى
ماعدنه كل اعذار.. مايمر بيك الهوه
سبعينك بوكت الشدد.. غضب بركان
تمشي هل ايام.. والوحيد الخاسر الماشافه گلبك
تمشي هل ايام.. والله هنياله اليضل دوم اعله دربك
تنفسنه بحروفك
نموت وما نعوفك
...................
المنايه نعتنيهه.. ركض نركض عليهه
ولايرمش جفن عين اليحبك
الخدمتك كلش نكدر.. انتوذر ونتطشر
ايتضمد كل جرح لمن نندبك
واحدنه ثكل اجبال.. ماتهزه العاصفه
يامصنع الابطال.. علمتنه اعله الوفه
مانخلف وياك الوعد.. ينور العين
اليموت ايعيش.. انته غيرت الطبيعه وكلهه تشهد
اليموت ايعيش.. من تسد عينه بجفوفك ذكره يخلد
يمن سالم نشوفك
نموت وما نعوفك
......................
اجينه ايرف علمنه .. شنريد وانته يمنه
صرت وسط الگلب تسري بدمانه
قسم بالله وخيامك.. تطيح اركاب امامك
ولاينزل شبر واحد لوانه
جيش العده سبعين.. هل الوف محيره
أحياء بس ميتين.. دنيه خسرو وآخره
اصحابك احنه وبس الك.. يرفعة راس
ياحسين وياك.. كلشي واضح والأمل كله بطفوفك
ياحسين وياك.. احله ساعات العمر لمن نشوفك
نقبلهه جفوفك
نموت وما نعوفك
.......................
خبر جانه وسمعنه.. وبله عمايم طلعنه
حزينه ام الخدر كالو عليهه
للخيام اعتنينه.. نطمنهه بحجينه
وعرضناهه المواقف بين اديهه
هوسنه بالحك دوم.. مانطيح وننكسر
يا زلمه هذا اليوم.. يوصل احدود الخدر
من دمنه تربت كربله.. تصير اخضاب
لآخر الانفاس.. احنه انصار وخدم ونته ابونه
لآخر الانفاس.. مانزل عن هل درب لو كطعونه
علينه انته خوفك
نموت وما نعوفك
محمد هادي العقابي
العشگ عباده
حيّ عالشهاده يالانصار
ــــــــــــــــــــــــــــــــــــــ
اصطفو من اجل الصلاة احسين قد قام العزم
وكربله اطلابه چبيره والعرك بس للزلم
بالبيارغ هوسوله وللحرب شدّو حزم
مومهمه الدنيه كلهه احسين بس هوه المهم
ماخلص مداده
حيّ عالشهاده يالانصار
ــــــــــــــــــــــــــــــــــــــ
البشر مهما يعمّر يجي يوم الموتته
بس دجيب اليفهملهه ومايثگل خطوته
اكو ماوفقهم الله للحسين ونصرته
وانتم الصنتو الامانه والتحقتو ابثورته
والمنادي ناده
حيّ عالشهاده يالانصار
ــــــــــــــــــــــــــــــــــــــ
واحد وسبعين شيبه خضبوهه امن الدمه
الناس فوگ الگاع تمشي والشهيد اعله السمه
هايه جنه امن الكرامه وهايه حّسن الخاتمه
علي الايروي عطشكم والشفيعه فاطمه
والقتل سعاده
حيّ عالشهاده يالانصار
ــــــــــــــــــــــــــــــــــــــ
بالحشر لامام ينفع لا ولا تنفع بنين
اله حب حامي الحميه الينفع وحب الحسين
الما نصر هاي العقيده يعتبر ماعنده دين
ياحبيب ابن مظاهر انته شيخ العاشگين
وانته ابو الاراده
حيّ عالشهاده يالانصار
ــــــــــــــــــــــــــــــــــــــ
يالله ياعابس اجتك فرصه هاي امن الذهب
گوم شگلهه قميصك والذبح كلش وجب
وينه جون الكله غيره واسلم التركي اووهب
احسين لو باوع عليكم ينمسح منه التعب
گومو للقياده
حيّ عالشهاده يالانصار
ــــــــــــــــــــــــــــــــــــــ
هدو السبعين كلكم عاصفه ابنص البحر
الله باعلهم رحمته واشتروهه بالنحر
صفّو الرايه اعله رايه شدو الظهر بظهر
الزاد حبهم للحسين وراحو بأجمل سفر
حققو مراده
حيّ عالشهاده يالانصار
محمد الجماسي
#اللهم_عجل_لوليك_الفرج
العشگ عباده
حيّ عالشهاده يالانصار
ــــــــــــــــــــــــــــــــــــــ
اصطفو من اجل الصلاة احسين قد قام العزم
وكربله اطلابه چبيره والعرك بس للزلم
بالبيارغ هوسوله وللحرب شدّو حزم
مومهمه الدنيه كلهه احسين بس هوه المهم
ماخلص مداده
حيّ عالشهاده يالانصار
ــــــــــــــــــــــــــــــــــــــ
البشر مهما يعمّر يجي يوم الموتته
بس دجيب اليفهملهه ومايثگل خطوته
اكو ماوفقهم الله للحسين ونصرته
وانتم الصنتو الامانه والتحقتو ابثورته
والمنادي ناده
حيّ عالشهاده يالانصار
ــــــــــــــــــــــــــــــــــــــ
واحد وسبعين شيبه خضبوهه امن الدمه
الناس فوگ الگاع تمشي والشهيد اعله السمه
هايه جنه امن الكرامه وهايه حّسن الخاتمه
علي الايروي عطشكم والشفيعه فاطمه
والقتل سعاده
حيّ عالشهاده يالانصار
ــــــــــــــــــــــــــــــــــــــ
بالحشر لامام ينفع لا ولا تنفع بنين
اله حب حامي الحميه الينفع وحب الحسين
الما نصر هاي العقيده يعتبر ماعنده دين
ياحبيب ابن مظاهر انته شيخ العاشگين
وانته ابو الاراده
حيّ عالشهاده يالانصار
ــــــــــــــــــــــــــــــــــــــ
يالله ياعابس اجتك فرصه هاي امن الذهب
گوم شگلهه قميصك والذبح كلش وجب
وينه جون الكله غيره واسلم التركي اووهب
احسين لو باوع عليكم ينمسح منه التعب
گومو للقياده
حيّ عالشهاده يالانصار
ــــــــــــــــــــــــــــــــــــــ
هدو السبعين كلكم عاصفه ابنص البحر
الله باعلهم رحمته واشتروهه بالنحر
صفّو الرايه اعله رايه شدو الظهر بظهر
الزاد حبهم للحسين وراحو بأجمل سفر
حققو مراده
حيّ عالشهاده يالانصار
محمد الجماسي
#اللهم_عجل_لوليك_الفرج