12613
مرحبا.. بتمنى تستمتعو مع الروايات وكمان م تنسو تشاركو القناة مع اصحابكم 😍 لطلبات الروايات و الاقتراحات ارسلو لي في اليوزر 👇 @reema_albodiry
ازيكم مساء الخير
وحشتووووووني والله كلكم فردا فردا و وحشتني الروايات ان شاء الله كلكم بخير وفي مكان آمن
بعد ما استعديت لرجعة قوية للروايات جات الحرب وكل شي جاط بس ان شاء الله واكيد ح نرجع زي زمان واحسن
عايزاكم تتابعوني في الفيس ونتفاعل مع بعض ونبدا تاني نرجع لرواياتنا نطلع حبه من مود الحرب (بالمناسبة انا لسه في حتته الضرب ما طلعت دعواتكم بس تتسهل لينا)
المهم دا حسابي حق الفيس
https://www.facebook.com/profile.php?id=100002941448144&mibextid=LQQJ4d
لا حول ولا قوة إلا بالله إنا لله وإنا إليه راجعون
إنتقل الكاتب أحمد محمدنور إلى رحمة الله غرقا
ربنا يرحمك ويعوض شبابك الجنه شهيد بإذن الله
بمناسبة عيد الأضحى المبارك عيدكم مبارك وكل عام وأنتم بخير مِن العائدين والفائزين تقبل الله منا و منكم.💓🥰
Читать полностью…
عيدٌ سعيدٌ .. وأيامٌ مباركةٌ
وموعدٌ يغمرُ الأرواحَ بالفرحِ
تقبّل اللهُ منكم كلَّ صالحةٍ
وخصّكم بعظيمِ الأجرِ والمِنَحِ
🌹💜
منى : اي والله حليلها ربنا يرحمها ان شاء الله ويغفر ليها ، أنا مفكرة بكرة اقول لصلاح يجيب لينا خروف نضبح ونوديهو كرامة لناس الخلوة الجمبنا ديل والمساكين الحولينا
خديجه : خير ما سويتي يا زولة وأنا متبرعة اسوي السليقة طوالي
منى : كتر خيرك ربنا يجزيك خير
خديجه : وبرضو لروح فطين ما تنسيها
منى : هييي واي على سيرة فطين ذكرتيني شي مهم من امس أنا بفكر فيهو
خديجه : اجي شنو ؟
منى : زمان عمتي فطين الله يرحمها كان جنها تقعد جمب حيطة الباب دي وقدر ما اقومها تكون مصرة انو تقعد ، وكم مرة شفتها بتحفر زي البتنكت في حاجة
خديجه : اجي ! كيف الكلام دا تحفر في الواطة يا ربي عندها شنو ؟!
منى : بري ما عارفة لكن والله قلبي ماكلني لي كم يوم وبحلم بالحيطة دي وحاسة وراها شي
خديجه : اي والله بتذكر اكت رشتنا بالتراب بسفنجة أمك الله يرحمها هي تاريها كانت بتحفر !
منى : ما بعيد والله
خديجه : هههه كان كدي نمشي نجيب كوريك ولا حاجة نحفر بيها ههههه يمكن نلقا كنز
منى : ههههه نادي ناس انوسة وتوتة خليهن يحفرن معانا نقسم ليهن معانا ههههه
خديجه : ههههه لو عرفن فيها كنز وشنو يجنك جاريات جري هههه نمشي نشوفهن لو ما نايمات
خديجة مشت جابت ليها حاجة تحفر بيها ، وجن معاها بناتها لقن منى جهزت حاجة برضو للحفر
وبدن كلهن يحفرن ....
ايناس : عمتو منى نحنا بنفتش في كنز ؟
تماضر : حنلقا دهب كتير زي في التلفزيون صاح ؟!
منى : هههه والله ما معروف كلو وارد
خديجه : انتن احفرن في سكات عشان لو لقينا كنز ما ندي معانا زول
تماضر : هسس هسسس خلاص اسكتو
منى : ههههه
بقن يحفرن قريب نص ساعة بس ماف حاجة ، بعد فترن وخلاص استسلمن كوركت تماضر :
_ لقينا الكنز ! لقينا الكنز !
خديجه : اجي وينو !؟
منى : وين يا توتة ؟
تماضر جرت الصندوق الكان مدفون ورفعتو
منى : سبحان الله هههه طلع بالجد في كنز
خديجة : كدي افتحيهو
منى : فاتح !
فتحن الصندوق لقن فيهو عملات كتيرة قديمة شديد ولقن ورق حالتو رثة شديد وحبة هتش كدا
خديجه : هي دا شنو ؟!
منى : بري علمي علمك وشوفي الورق دا مأكول كيف شكلو ليهو سنين طويلة لمن اتهرد كدا
خديجه : يكون دا ورق الارض يا ربي ؟
منى : كدي افتحيهو براحه هههه حاولي جمعي الفتة دي يمكن تتطلع منها حاجة
خديجه حاولت تجمع الكلمات الفي الورقة وفعلا طلع دا ورق الارض حق فطين
منى : سبحان الله شوفي الدنيا دي كيف ؟ قعدو طول عمرهم ساكين في الاراضي والقروش في النهاية مشو خلوها ! وبعد دا كلو اريتو جاب عمار
خديجه : فعلا والله هسي العملات دي لا نافعة ولا حتى ورق الارض نافع عشان الزول يعرف مكانها ويرجعها ، سبحان الله ، ساي ولدو كراهية من ولا شي ، غايتو ربنا يرحمها ويغفر ليها ويوسع مرقدها ما شفنا منها حاجة كعبة
منى : اي والله ، عشان تعرفي القروش دي بت كلب كيف !؟ خلت أمي الله يرحمها وفطين في خلاف سنين وسنين وبعد دا ما استفدنا شي ربنا يسامحهن يا رب
نطت تماضر وقالت ببراءة :
يعني هسي ماف كنز يا عمتو منى ؟ حفرنا ساي ؟
منى : هههه ما تخافي حبيبتي أنا دي بديكم كنز
خديجه : هسي حنعمل شنو ؟!
منى : ولا شي بس الا نشيل العملات الغريبة دي نوديها المتحف القومي ههههه
خديجه : على قولك ههههه
خديجه ومنى شالن الصندوق ورجعو كل شي لمكانو
انتظرن لمن صلاح جا وحكن ليهو ...
صلاح : سبحان الله ! معقولة ياخ ؟!
منى : اي والله شكلها بالجد الورق الزمان بفتشو عليهو أمي وناس عباس يحليلها هي دفنتو قايلا كدا حتحافظ عليهو هههه
صلاح : والله سبحان الله ! ياخ حاجة غريبة
خديجه : ابدا عادي والله ، أمي زمان بتحكي لي انو كانو بيحافظو على دهبهم وقروشهم الخايفين عليها بدفنوها وماف زول بعرف مكانها
منى : اي سمعت بحاجة زي دي
صلاح : هههه هسي لا أرض لا غيرو لو وديتوها لزول او حكيتو ليهو بضحك فيكم
منى : اصلا هههه ما شايف الطلاسم دي هههه
غايتو مغامرة
صلاح : هدي القروش راحت ساي عشان كدا ماف داعي للحقد والغل
منى : اي والله صاح الله يهدي أخواني ديل ويخلونا نعيش كلنا في بيت واحد كأسرة وما نتفرق
صلاح : امين ان شاء الله ياخ راسهم الناشف دا
بعدو ضحك وقال ليها باستهبال :
وانتي ناوية تقعدي معانا لمتين يا الاخت ههههه ؟! ما ناوية تطيري بعد كدا بيت راجلك تفضي لينا البيت دا ؟
منى : كويس يا معفن بكرة تفقدني سامعة يا خديجه قلة ادبو ؟!
خديجه : ههههه يخسي عليك يا صلاح منوية كان عرست تاني نقول يا منو ؟!
صلاح : هههه بالجد ما بنقدر نستغنى عنها والله
منى : احم احم قول كدا من البداية ههههه
_____
الصباح ....
البيت كلو عرف بموضوع الصندوق وكلهم جو يتشمشرو من منى ...
منى لمن شافتهم متلمين قالت ليهم :
ههههه البركة في تماضر وخشمها الخفيف الخلتكم تتلمو تاني
خديجه : غايتو غلبتني كلو كلو الله يستر الخبر ما يكون وصل الجيران هههه
اسعد : صحي لقيتو ورق الارض ؟
منى : اي لكن ما نافع مقطع وما ظاهر منو اي شي
السر : خسارة ياخ هسي كان مع البيت وسعر الحواشات اي زول طلع ليهو حاجة كويسة
* ااا معليش أنا نسيت انك هنا قايلا
_ قايلا شنو ؟! اسمعي يا بت الناس أنا فاهماك كويس وعارفة الفي راسك شنو ! وأنا وانتي فاهمين الحاصل كلو فما تعملي فيها درويشة ، ما بتخجلي ؟ واحد قدر عمك ولا خالك تفكري فيهو كدا ؟
* هو ود خالتي ما عمي ؟
_ افرضي ! مش اكبر منك ؟ امشي العبي بعيد شوفي زول مناسب ليك في السن انتي لسه صغيرة
*دا كلو بس عشان عاوزاهو يشوف تلفوني ؟!
_ اسمعي هنا ما تتغابي فيني وفتحي عينك دي كوووويس وعايني لي ! شفتي أحمد خط أحمد ، وبيتي دا ما تخشيهو الا لمن تستأذني ، أحمد في ؛ أحمد ماف ؛ دي حاجة ما بتخصك ، اي بيت ليهو حرمتو أمك ما علمتك ما تنتهكي خصوصية زول ولا شنو ؟! وشفتي الاوضة دي ما تهوبي ناحيتها حدك العريشة وبس ، دايرة اي حاجة من أحمد انتظريهو لمن يجي بيغادي وقوليها ليهو ما تجي تكابسي للناس نص الليل
بدور قزت كوعها لابتهال وجهزت نفسها عشان تكشف عن وشها الحقيقي بس قطع كلامهن دخول أحمد للبيت ...
أحمد اتخلع لمن شاف ابتهال وزاد استغرابو لمن شاف التنشنة الحاصلة بينها وبين بدور ..
ابتهال : أحمد ازيك ! كيف قيلت ؟!
أحمد وعلامات الدهشة كلها ظاهرة فيهو :
_ الحمد لله ، بدور كيفك ؟
بدور : الحمد لله أنا
ابتهال قاطعتها وقالت :
* أحمد بدور دي منتظراك من قبيل قالت تلفونها فيهو مشكلة عليك الله بعد ترتاح شوفها ليها
أحمد : جدا
ابتهال : خلاص حبيبتي بحلها ليك انتي امشي نومي بعد كدا ، وصحي نسيت قولي لخالتو مرام خالتو ابتهال قالت ليك سفنجتها مشت وين شكلو في حرامية ايام البكا شالنها معاهن
بدور دي النااار ولعت فيها بس ما لقت نفسها الا ومجرورة من ابتهال نظام بتوصل فيها وكدا
ولمن بعدن من أحمد قالت ليها :
* حسك عينك تاني اشوفك بيجاي والا والله اكسر ليك كرعينك واشيلهم ليك ، وتلفونك برسل واحد من الشفع يطيرو ليك ويلا مع السلامة
وقفلت الباب في وشها وهي مبسوطة .....
مشت على غرفتها لقت أحمد واقف مخلوع وبعاين للبيت البقا نضيف ...
ابتهال : لا حول ولا قوة الا بالله معقولة اغيب شوية اجي القا البيت كوشة ؟!هسي الله يسالك كنت بتنوم فيهو كيف ؟!
أحمد : قلتي لي تغيبي شوية ؟! دا كلو شوية ؟! هنت عليك قدر دا ؟
ابتهال : وأنت الطيب يعني ؟! ما ياهو كنت مهمشني طيلة ايام البكا زي البتكلم مع الحيطة وقدر ما اعتذرت ليك عامل فيها تقيل ولا خلاص عشان لقيت البديل ؟!
أحمد : بديل شنو !!
ابتهال رفعت التلفون حق بدور بعدو قالت :
* ناس صلحو لي تلفوني ديل !
_ ههههه بدور ؟! يا بت بدور دي شافعة ساي أنا اكت كنت في الجامعة كان يادوب هي اظن في المدرسة
* شافعة لكن شافعة مسلطة أنا بفهم ليك بنات الزمن دا كويس ؛ الواحدة ما تلقا ليها واحد جاهز ووجيه طوالي تلف حولينو مهما كان سنو
_ هههه بغض النظر عن الاطراء بس فكرك مشا لبعيد والله هههه
غمز ليها وقال :
_ هههه لكن لسه لينا في الريدة ما كبرنا شديد كمان
، وبعدين طالما لسه بتغيري معناها لسه بتريديني
* هههه كدي خليك من دا اقعد اول شي نوريك دا ، عشان قلبي دا يبرد
_ اها
* اول شي افتح تلفونك دا
_ فتحناهو ههههه
* وكمان مسجل رقمها يا أحمد ؟! خيانة عينك عينك لا خجل لا حيا
_ هههه ها العويرة دي خلي الدراما عادي يعني بعدين هي السجلتو ما أنا
* بركة الله يسجلوها مع ناس خرج ولم يعد !
_ أمك بقتك دعاية كمان هههه
* اسكت خليني نتم
_ اها
* امسح رقمها دا سريع واحظرها كمان ، لو دايرة منك شي التتكلم بالدرب اصلها ملصقة فينا شكلو سنتين ما حتمرق
_ جدا نمسحو هههه كل شي ولا زعلك
بعدو ابتهال شالت تلفون بدور فتحتو عيونها اتوسعت لمن لقتها مسجلاهو " حبيب القلب "
* عاين الما بتخجل ؟! مسجلاك شنو تحبها شنو اقول ليها غايتو الخجل انتهى كلو كلو وب علي من بنات الزمن دا الخجل نسنو كلو كلو !
_ هههه والله كلام
* انت كلامك براك اصبر خليني اتم شغلي بس وافضى ليك
مسحت رقم أحمد من تلفون بدور وبعدو ختتو في الدرج ...
_ اها حاسة بشنو كدا ؟
* مرتاحة نفسيا كدا ، وبعدين ما شفتها جات تتلبد وتعاين بالقدة تخيل بس
_ معقولة ؟
* اي والله عشان كدا اختصرها النوع دا ما بيمشي الا بالعين الحمرا
_ هههه خلاص انسينا منها ، الرجعك شنو ؟
* دا بدل تقول لي نورتي بيتك ، او مشتاقين هولتي او تكشكر لي على الاقل
_ هههه اكيد نورتي لكن افهم انو خلاص صافية !
* لا ان شاء الله صافية وان شاء الله دايما صافية
_ امين
بعدو أحمد وابتهال استمتعو بوجبة حلوة وقضو ليلتهم بالونسة والسمر واي واحد فيهم بيحكي للتاني عمل شنو ايام ما كانو متشاكلين، واخيرا رجعت المياه الى مجاريها ، وعلاقتهم رجعت زي الاول واحسن كمان
______
في جهة تانية بدور كانت زعلانة شديد لمت شنطتها بليلها داك وسط تحانيس من مرام بس ابت كلو كلو تقعد وحتى تلفونها ابت تشيلو ، وركبت ركشة ورجعت بيتهم وارتاحو من همها .....
_____
منى وخديجة كانن قاعدات في الجزء حق ست النفور وبتونسن ...
خديجه : والله يحليلها خالتي كانت عاملة لينا موضوع ولمة، هسي ما بنتلما نهائي لا جمعة لا غيرو
غفلت عيونها وداهمها النوم ، صحت مخلوعة صلاة الصبح ، بقت تصحي في أمها عشان صلاة الصبح ...
* أمي ، أمي ! قومي الصبح اذن بعد دا
أمي !
حاولت تكضب نفسها وحاولت تمحي الافكار الجاتها فجأة بقت تهز في أمها شديد بس ما كان في استجابة !
طلعت منها صرخة الم وهي بتقول :
* أمي الحقوني اصحي يا أمي عليك الله اصحي ما تخليني براي أنا ما بقدر اعيش من غيرك عليك الله ما تمشي تخليني
صوت صراخها وصل بيغادي، ناس البيت كلهم جو جارين ، صلاح جا قعد جمب راس أمو وبقا يبكي والباقين ما مستوعبين اصلا ...
صلاح : انا لله وانا اليه راجعون ، انا لله وانا اليه راجعون
_
انتشر الخبر في كل ارجاء الحلة واتملا البيت كلو بالناس خاصة انو ست النفور كانت مجاملة وبتصل الناس كلهم
كان الكل متصبر لحدي ما دخلت ست البنات ومعاها بتها ، جات جارية على منى الكانت البتبكي وقلدتها وبقن يبكن سوا
* حليلها أمك يا منى حليلها الحنينة حليلها فاتت خلتنا يا منى تاني نقول يا منو ؟ الليلة واشرك يا ست البنات الليلة واااااا مصيبتك يا ست البنات ، احي يا اختي الصغيرة احي يا الصغيرة الفتي خليتيني براي
الليلة يا حليلها أمك يا منى احي احي احي يا الله
حليلك الما شفتي عرس صلاح ولا شلتي اولادو حليلك يا الما عرستي لمنى حليلك يا الحنينة احي يا الله ، وب على يا منى وب علي خلاص خلتنا برانا يا منى خلتنا برانا
بعد ما الناس كانت ساكتة جات ست البنات جرست ليك النسوان كلهن وبقن يكوركن ....
جا صلاح جاري من الصيوان ضرب الباب شديد وقال :
_ يا جماعة ادعو ليها واقرو قران بطلو البتسو فيهو دا بتعذبوها !
طوالي النسوان سكتن....
_
كان خبر وفاة ست النفور صعب شديد على كل أولادها وكمان كانت صدمة كبيرة لكتير من الناس ،
اليوم داك كان كئيب شديد ، اتلمت الطيور في الحيطة وبقت تفتش عن العيش الناشف الكانت بتفتفتو ست النفور ليها
وحتى كدايسها الكانت مربياها بقن قاعدات جمب عنقريبها وما اتحركن من جمبو
اما منى دي كانت منهارة عديل وتشيل وتبكي ، حالها زي حال صلاح وأحمد الكانت الصدمة عليهم كبيرة واكتر من غيرهم
مر اليوم الاول ببطء شديد، ما كان في اي كلام بين ناس البيت الا عن الضيوف وخدمتهم ....
وكذلك اليوم الثاني والثالث ما كان في اي شي غير اصوات النواح والبكاء
__
بعد تلاتة ايام البكا ناس البيت رفعو الفراش ، و الضيوف خفو و بقو قاعدين ناس البيت براهم ...
منى كانت قاعدة لسه بتبكي وحولينها نسوان اخوانها ...
خديجه : يا بت منى خلاص بتعذبيها استغفري
منى : ما قادرة يا خديجه ما قادرة
ابتهال : اقري ليها قران يا منى البكا ما بفيدها
مرام : الله يرحمك يا خالتي
سعاد : الله يرحمها يا رب
بدور : ربنا يرحمك يا خالتو ستنا يا رب
اتصبري يا منى عشان أخوانك ديل ما يتجرسو ما شفتي أحمد حالتو كيف ؟! يبكي ساااي
مرام : فعلا صلاح وأحمدكل ما يشوفوك بتبكي بيتجرسو عشان كدا حاولي اتصبري وادعي ليها
منى : ان شاء الله ربنا يرحمها ويغفر ليها يا رب
خديجه : ايوا كدا خليك قوية
__
ابتهال وكمان أمها باتن اول تلاته ايام وبعدو رجعن البيت .
اما ست البنات لمت شنطتها وشنطة بتها وقالن راجعات ....
مرام طوالي جاتهن جارية وبقت تحرش في بدور
وقالت ليها :
_ ها العويرة دي تمشي لشنو ؟ بالعكس بيتي ، ابتهال الهبلة مشت بيتهم دي فرصتك ، عارفة أحمد الايامات دي مجروح ما لاقي البطبطب عليهو دي فرصتك كوني الحنينة واقيفي معاو واكيد ما حينساها ليك
* دي قولتك !؟
_ اي يا بت خلي أمك ترجع براها قولي ليها بقعد كم يوم اساعدهم وارجع
* سمح ههههه والله طلعتي خطيرة
_ ههههه اوع تنسيها لي يا بت خالتي عارفاك اكاله ونكارة
* ههههه لالا ما بنساها ليك ، كلو يهون في سبيل أحمد
_ ههههه سمح ورينا شطارتك
_
مرت الايام على بيت الاسرة وكانت الاجواء ملخبطة بين ناس حزنانين ، وناس بيدبرو في المكايد ،
وناس مستغفلين وراحو فيها بسبب غباءهم ،
مع مرور الايام رجعت الحياة لطبيعتها في البيت ورجع الكل لاشغالهم .....
خديجه ومنى كانن بتونسن ....
خديجه : يا بت منى انتي ابتهال دي مشت تاني بيت اهلها لشنو ؟!
منى : بري
خديجه : العويرة مشت لشنو ؟ أنا كلمتها البعد ما حل !
منى : اي والله ربنا يهديها
خديجه : لالا أنا بعدين بغشاها بشوفها مالها !
منى : اي كويس
_
خديجه فعلا مشت زارت ابتهال في البيت ، استقبلتها كويس وبعدو طلعتها غرفتها وبقن يتونسن ....
يتبع.....
هنادي : كدي بنفكر ما تشتغلي بأبوك دا بنحلها ليك
ابتهال : حتتحل كيف ؟ خلاص شكلو حيطلقني
هنادي حست بانو بالجد اتهورو وزادو الجرعة بس ما اظهرت دا لبتها وفضلت ساكتة وهي بتراقب في بتها البتبكي
أبو ابتهال : اعتذري ليهو بس ، اضربي اعتذري وحلي القصة
هنادي : ليه قال ! معرسة ولي عهد بريطانيا ونحن ما عارفين ؟! يا بت ها خلي عندك كرامة ، أنا هسي بلقا ليك حل بس انتي اصبري لي
هنادي اتكلمت حبه مع بتها وبعدو قامت ، أبو ابتهال استغل الفرصة واستفرد بابتهال ...
* يا بتي الخلاف ما في صالحكم انتو لسه شباب والعمر قدامكم بكرة تبقى الخلافات دي ذكريات،
اعتذري ليهو مافيها حاجة الاعتذار حيزيد من قيمتك عندو وحتكبري في نظرو شديد ، بعدين أمك دي بتتكلم ساي هي بس عشان متعلقة بيك وانتي بتها الوحيدة ما لاقية موضوع فمتبرمجة بيكم انتي وأحمد
_ لكن هو الغلطان ما أنا وبعدين أنا عندي كرامة
* ماف كرامة بين المرا وراجلها دا كلام أمك قاطعاهو من راسها دا ههههه ، خليك واعية الزمن بقا صعب ونحن ما دايمين ليك خلي وراك سند
_ بعد عمر طويل ان شاء الله
* الموت حق علينا كلنا ، وأنا أحمد دا لو زول كعب كان أنا بنفسي طلقتك منو ؛ بس هو زول مسكين وما عندو عوجة ومن دخل على اسرتنا دي ما سمعنا ولا شفنا ليهو شينة وانتي ادرى براجلك ، أنا كنت ساكت الفترة دي كلها قلت واعيين وبحلوها ، ههههه لكن طلعتو شفع كل واحد مخو اصغر من التاني
ابتسمت ابتهال رغم الحزن بعدو قالت :
_ ان شاء الله بحاول اعتذر ليهو
* ههههه ايوا كدا دي بتي ابتهال البعرفها ربنا يصلح حالكم ويستركم ان شاء الله
_ امين يا رب
* وأمك دي خليها علي ، بس سدي دي بطينة ودي بعجينة ومشيها بس هههه
_ ههههه ان شاء الله
_____
بالليل كدا ست النفور صحت من النوم ، منى تكلتها عشان تطلع الحوش ، رغم خوف منى عليها من البرد بس ست النفور كانت مصرة اصرار شديد انو تطلع برا ، منى نفذت ليها طلبها وفرشت ليها سريرها وساعدتها لمن رقدت.....
كان عندها ذكريات جميلة مرتبطة بالشجرة دي ،
اتذكرت قبل سنوات كثيرة لمن جات أول مرة للبيت دا ؛ كانت عروس الوقت داك ، و كانت صغيرة في السن ولسه بالها في اللعب ......
( قبل سنين طويلة )
اتذكرت اول ما دخلت بيت شيخ الهادي عينها وقعت في الشجرة ، شيخ الهادي لمن شافها بتعاين للشجرة ضحك وقال :
_ ههههه عارفك يا المزيونة بتدوري تعلقي فيها حبل تعملي بيها طوطحانية
ابتسمت ست النفور بخجل ودنقرت راسها وقالت :
* لالا أمي قالت لي بقيتي كبيرة على اللعب
قال ليها بابتسامه بشوشة ما فارقت وشو :
_ ماف زول بكبر على اللعب وارح يا المريودة نربطها
سوا
قالت بفرح :
* بالجد يا الهادي ؟
رد ليها بنفس اللهفة الكانت عندها :
_ اي وارح
فعلا مشو جابو حبل وربطو طوطحانية ، الهادي شالها وختاها في الطوطحانية وبقا يلزها ، كانت مبسوطة شديد وبتضحك باعلى صوتها ....
قال ليها : مبسوطة يا السمحة ؟!
ردت ليهو :
* شديد يا الهادي أنا ما قايلا العرس دا حلو كدا تاني كل مرة نعرس سمح ؟
اتعالت قهقهاتو وهو بسمع في كلامها ، ضحك لمن قعد في الواطة بعدو قال ليها :
_ قلتي لي العرس حلو هههه طيب يا ستهم المشكلة وين كل مرة نعرس واعمل ليك احلى حفلة
قالت ليهو :
* طيب ما هندا انت طيب ليه بنات اهلي قالو لي تسمعي كلامو ولو هرشك او قال ليك اعملي اي شي تعمليهو ؟!
قال ليها :
_ ههههه ديل كضابات ساي ما تشتغلي بيهن
أنا عمري ما حاهرشك وحاختك في عيوني ديل
ابتسمت بخجل بعدو قالت :
* اها ما حتطوحني تاني ؟
قال : ههههه جدا اطوطحك الليل كلو لو عاوزة
الهادي كان هين لين على ست النفور ، احترم صغر سنها وسايسها وكبرت على يدو ، كان صابر عليها جدا لحدي ما اتعلمت مسؤولياتها كلهن .
كان بريدها شديد وما بناديها الا بستو ، المريودة ، السمحة ام عجن وغيرها من الاسماء المحببة لقلبها .
كانت كل يوم ترجاهو جمب الباب تتعلق في رقبتو لحدي ما يشيلها ويركبها الطوطحانية ويديها طوطيحة ويتونس معاها ويغني ليها
يوم كدا جا لقاها ليك بتقطع في حبال الطوطحانية
جا سألها :
_ مالك يا المريودة بتقطعي فيها ؟
قالت ليهو :
* أمي شاكلتني قالت لي كبرتي عليها
قال ليها :
_ ههههه ما تقطعيها بنطوطح بيها بالدس تاني وغمز ليها
ابتسمت وقالت :
* سمح
مرت سنينهم والشجرة دي بقت حته ثابتة لونستهم بالنهار و سمرهم بالليل ...
الهادي كان شاعري جدا ، ولمن يدور يطلب من ست النفور حاجة بقولها ليها بشكل طريف ، فكان دايما لمن يكون عاوز شاي بقول ليها :
يا السمحه هوووي ماتعايني لي بنظرتك
بمشي وبفوت والله بموت
وأنت بتموتي بوحدتك
قومي خلاص ملحوق أنا
وملحوق السبب لي عنا
وسويلي شاي أحمر خفيف
ما تتقليو قلبي بيقيف
بهبهان واديهو بس حبه حنان
وجيبيهو لي ما تشوفي شر
قاعد هنا أنا منتظر
ست النفور طوالي تتكشم وطوالي تجر بمبرها جمبو وتجيب المنقد تولعو وتسوي ليهو شاي مظبوط
بعد يشرب الشاي كان برضو بشاغلها ويقول ليها :
الريحه تثبت حرفتك
عجبتني ريحه خمرتك
تتكشمي وتتبسمي
ابتهال : وانتي من رايك شنو ؟
خديجه : والله حاساها ما بتكضب المرض بكون ظاهر والتمثيل ظاهر غايتو ربنا يشفيها
ابتهال : ان شاء الله ، اها وتاني حاصل شنو ؟!
خديجه : ولا شي بس متنشنين وسعاد ومرام مقويات راسهن ويشيلن ويحرشن
ابتهال : يا ساتر في مرض المرا ؟! صحي الدنيا دوارة توريك معادن الناس في الضيق
خديجه : اي والله ، المهم يا ستي كنت عاوزه اوعيك وانورك ، انتي عارفة أحمد زول الله وطيب مشكلتو أخوانو بمشوهو على كيفهم
وأحمد والله من يوم مشيتي ما شفتو بضحك لا بتونس بس سارح ومهموم واتكلمت معاو انو يرجعك قال لي بيضرب ليك وما بتردي ؟!
ابتهال : ماعارفة اقول ليك شنو والله
خديجه : ما تقولي شي بس فكري في كلامي ، وطبعا ما لي حق احكم منو الغلطان فيكم لانو انتو ادرى ، بس فيها شنو لو الناس اتنازلت ونست ؟! الحياة ما بتمشي لو وقفتي في كل صغيرة وكبيرة وانتي المرا مفروض تكوني احرص على بيتك
ابتهال : ان شاء الله حافكر في الموضوع دا
خديجه : اي فكري ولو احتجتي حاجة طوالي اتصلي علي ، كفاهو قرصة اضان وخلاص بعد كدا ارجعي عزبتي الراجل هههههه
ابتهال : هههههه ان شاء الله ، هييي ما بدري مالك قمتي اقعدي اتغدي معانا
خديجه : بدري من عمرك حبيبتي ، بري والله ما قعد اتغدا بدري كدا هههه ما بستغنى والله من اكل خالتو هنادي الطاعم بس الليلة نتيجة البنات نمشي نشوف نهاية النبح والقراية شنو !
ابتهال : ههههه ربنا يوفقهن ان شاء الله
خديجه : أمين يا رب
خديجه ودعت ابتهال وطوالي طلعت ، مع طلعتها جات أم ابتهال جارية .......
*قالت ليك شنو ؟! احكي لي الشمارات أحمد مرسلها ولا ست النفور ؟
_ اييييك يا أمي انتي ماعارفة حاجة الحاصل كتير وكبير ، كبير شدييييد
* اجي كدي تعالي احكي لي كل شي من الالف للياء
_ سمح
ابتهال حكت لأمها الحاصل كلو ، اثناء حديثها كانت بتتغير ملامح أمها بين الاستغراب ، الفرح ، التعاطف وغيرها من المشاعر المتلخبطة
انسجمت احاسيسها وطلعت كلها في جملة واحدة مغزاها :
* بركة تستاهل دا حق الناس عليها ، ان شاء الله تجن جنون كدا لمن تفط سطور مش سطر ، وتقعد تلقط الوسخ من الكوش شاحدة ربي ، الله يخلص حقنا منها
ابتهال انصدمت من ردة فعل أمها وقالت بحزن مخلوط بالغضب :
_ حرام عليك يا أمي في النهاية مرا كبيرة ، ربنا يشفيها وبعدين مالي ومالها أنا مشكلتي مع أحمد ما معاها
* يا بت هااا هو غير عوارتك دي ماف شي خاليك قاعدة هنا معاي شهر زي المطلقة
_ أنا ما عاوزة اقعد زي المطلقة خلاص
* يعني شنو !؟
_ يعني راجعة بيتي
* ماف ليك رجعة بعد كل الخططنا ليهو دا ؟
_ وينا ثمارو يا أمي ما ياهو قاعدة ساي منتظرة مصير مجهول ، أحمد حاول معاي كم مرة وأنا قافلة الباب في وشو وريني حيصل لي كيف ؟ وحنصل لاتفاق كيف ونحن بعيدين من بعض ؟!
* طيب سمح ارجعي وزاتو منها تحضري القسمة ما ياكلو حقك في البيت ، واسمعي هنا اوعك تتعاوري خليك فالحة شيلي حقك على داير المليم
_ غايتو يا أمي حيرتيني معاك
* الدنيا دي بقت صعبة دايرة الزول يقالع ما عاوزة الزول يبقا أهبل بقا فيها البقاء للأقوى
_ اها وأحمد حيرضى يرجعني ؟!
* ليه ما يرضى هو طاريك ؟! بس رسلي رسالة قولي ليهو تعال عاوزة ارجع او اي شي ، وامشي اتظبطي في الكوفير وتعالي والله يرجع ونص كمان
_ اااف ان شاء الله ياخ أنا عارفاهو حمقي خايفاهو يتخذ موقف
* لا ما تخافي بخلي أبوك يناديهو عديل ما اظن يرفض ليهو ، وانتي زي ما وصيتك يجي يلقاك نجفة وبعد كدا انتي وشطارتك اخير اتنازلي حبة عشان ما ياكلوك العقارب الهناك ديك
ابتهال ما كانت مقتنعة بكلام أمها بس مشتها عشان اخيرا وافقت ترجع لحبيبها وزوجها الكانت كل يوم
بتتعذب عشان هي بعيدة عنو
ارسلت رسالة لأحمد كان محتواها :
"" أحمد كيفك كفارة لأمك سمعت انها تعبانة شوية ، بتقدر تجيني اليوم ؟ ""
انتظرت بشوق عشان تشوف ردو ، عيونها لمعو لمن شافتو قرا الرسالة بس خاب ظنها لمن جاها الرد منو في رسالة محتواها :
"" لأ ما مافاضي ""
ابتهال حست بغصة في قلبها وحست انو الدموع حتخنقها ، الخوف اتسلل ليها بقت تقول في نفسها :
* يا ربي البعد خلاهو يجفى ؟ يعني خلاص اتعود علي بعيدة وبقيت ما فارقة معاو ؟!
أنا زاتي استاهل الخلاني ابالغ قدر دا شنو ؟! استغفر الله العظيم يا رب
ابتهال قضت يومها بالتفكير وعضت اصابعها ندما على السوتو ، بقت خايفة انو تكون خسرتو للابد
بقت تحاول تتصل عليهو وهو بفصل الخط
ضحكت من بين دموعها الكانت مغطية وشها وقالت :
* ههه عاوز تتسدى فيني ! ما مشكلة يا أبو حميد
نشوف زعلك نهايتو شنو؟!
يتبع....
* أخوك بالغ يا الزبير ما صاح منو الكلام دا أمكم مرا كبيرة ياخ !
_ اي والله لازم نخليهو يعتذر منها بكرة دي ، حق الأم كعب لمن تزعل
* اي وأنا زاتي حاتكلم مع سعاد ومرام يبطلن البسون فيهو دا ويخلن التحريش
_ احسن تخليك برا ما عندنا شغلة بزول
* والله ما اسكت ليهن جهجهونا بمواضيعهن الما بتخلص دي لازم اتكلم
_ بطريقتك اقفلي لي النور دا الصداع كسر راسي ، ياخ البيت دا كرهنا حياتنا الله يمرقنا منو
* حاضر حاقفلو
____
اما أحمد وصلاح فمرقو برا البيت غضبانين واي واحد مشى على جهة عسى ولعل ينسو الحصل
وما رجعو الا لمن الليل دخل
____
اسعد وسعاد ...
سعاد : وب علي اصلي ما اتوقعت الموضوع يصل لهنا عاد أمك دراما كوين
اسعد : أنا عارف دا بيحصل عشان كدا قلت للسر ما يستعجل
سعاد : بري والله أنا لاوزت عديل من الشغلة نشوف بكرة حيحصل شنو
اسعد : فعلا خلي بكرة لبكرة
______
بعد ما استقر جسد الكل في السرير واستعدو للنوم تاني سمعو صريخ منى
.....
* أمي ! أمي عليك الله اتكلمي معاي ! أمي
الباقين جو جارين مخلوعين ! وبسألو في شنو
صلاح : في شنو مالك بتصرخي ؟!
* أمي ما قعد تتكلم ولسانها راجع لورا
صلاح : لا حول ولا قوة الا بالله !
صلاح عمل لأمو الاسعافات الاولية عشان ما تبلع لسانها وبعدو نقلوها المستشفى
عملو ليها فحوصات ورقدوها ليلتها ديك في المستشفى
صلاح امر الكل يرجعو البيت لانو الصبح كان قرب وخلا معاها منى ، وفعلا دا الحصل
كان في نوع من التنشنة ومن شدة حساسية البمرو بيهو ما كان في زول عندو الجراءة يتكلم ، بعد اطمنو على أمهم رجعو البيت وما حصل نقاش تاني
______
ست النفور رقدوها زي يومين في المستشفى وبعدو خرجوها البيت ، طيلة فترة قعادها في المستشفى ما فتحت خشمها بكلمة ، حاولو معاها كتير انو يخلوها تتكلم بس ماف فايدة ، وحتى بعد رجوعها للبيت برضو ما كان في استجابة بس سرحانة ، حتى جبنتها الكانت بتحبها خلتها ، نومها بقا كتير ، كلامها معدوم ، ودموعها في عيونها .
منى وصلاح كانو دايما بحاولو يتكلمو معاها ويحاولو يطلعوها من الصدمة بس ماف اي استجابة !
مرت الايام وحالة ست النفور بتسوء جدا ، وكل ما تسمع نقاش عن البيت وعن الورثة حالتها بتسوء أكتر وأكتر .
منى كانت متأثرة بمرض أمها وبرضو نالت من التعب والاكتئاب الكان كافي يبقي جسدها هزيل .
سعاد ومرام اغتنمن فرصة مرض ست النفور وبقن
يزيدن في جرعة التحريش ، اما اسعد والسر فحدث ولا حرج ؛ مرض أمهم ما كان مؤثر معاهم وكانو بقولو انو مستهبلة وبتعمل الحركات دي بس عشان يغيرو رايهم .
الزبير وأحمد كانو تايهين في النص وما عارفين هم مع منو !؟
فجأة وبلمح البصر البيت العريق الكان كلو فعاليات واحتفالات ومناسبات يتقلب لمكب للاحزان ، فجأة الاخوان يسنو نواجزهم ويتشبثو بيها على المال وينسو الرابط الأخوي ينسو العشرة والتضحية وينسو العيش والملح !
______
وسط كل الاحزان دي كان في ناس بحاولو ينقذو المركب قبل ما تغرق منهم خديجه القررت تحاول عسى ولعل تنجح ....
خديجة قررت انو تتكلم مع سعاد ومرام وتنصحهن ، رسلت بتها ايناس تناديهن يجن في البرندة الكبيرة وفعلا دا الحصل . بقن متلمات خديجه ومرام ومنى وسعاد ....
خديجه : يا جماعة الخير انتو براكم شايفين ست النفور عيانةوتعبانة كيف ! فبقترح انو تأجلو موضوع القسمة دا شوية اقلاهو لمن تقوم بالسلامة
مرام: لالا يا زولة ، لو قامت بالسلامة ما بتريحنا ولا حتخلينا نقسم
منى بغضب : اخجلي دي خالتك قبل ما تكون أم راجلك ! نسيتي ليها السمح كلو خلاص ؟ نسيتي لمن لمتك من الشارع ؟!
مرام : لا ما نسيت ، ما نسيت لمن عرستني للسر وأنا ما عاوزاهو ، وما نسيت لمن كانت بتمشيني على كيفها ، وما نسيت كل كلمة حارة طلعت منها ، وأي بقولها بالفم المليان انو اخير نقسم وهي ما واعية كدا عشان لو وعت ما حتخلينا
منى : حسبي الله ونعم الوكيل ، نسيتي السمح واتذكرتي بس دا ؟ !
سعاد : هسي انتن جبتننا عشان تتحسبنن فينا ؟!
خديجه : لا جيبناكن عشان تحكمن عقلكن ، وعّن السر واسعد ديل بكرة أولادكم يكبرو يعملو ليكم نفس العملوهو، انتن عندكن الأولاد والبنات ماشاء الله بعد عمر طويل الزمن حيعيد نفسو
مرام : السر ما عاوز نقاش واتخذ قرارو
سعاد : وبرضو اسعد ما حيخليني اتدخل
منى : هسي بقيتن تخافن ؟ سبحان الله !
سعاد : لا دقيقة تعالي النسألك انتي مالك عاملة الشريف الرضي؟ ماياهو ست النفور دي ريحتك ما بتطيقها اكت تجيبي ليها اكل بتدفقو في البلاعة يجينا جاري بهناك ! ما شفتي القمصان والهدوم البتجيبيهن ليها وبتعملن قطع مسح وتمارات ؟ ولا ما زهجتي من النهر ؟ والله نحنا كنا معززين مكرمين في بيوتنا لا أبو هرشنا لا أم ضربتنا جينا كلو شفناهو هنا في البيت دا
مرام : عايني يا خديجه اختصر ليك كلامي وكلام سعاد في حاجة وحدة تنازل ما بنتنازل ونصيبنا حنبيعو انتو بطريقتكم
" بعدو مرام وسعاد قامن وخلن منى وخديجه براهن"
منى بقت تبكي وخديجه بتتكلم معاها ....
منى : ما قادرة اصدق ؟ ديل أخواني معقولة ؟
#وصية_الشيخ_الهادي
بقلم: أمل طارق
الجزء 13
(بعد مرور اسبوع )
بداية يوم جديد وصباح جميل ، ست النفور كانت مبسوطة بجمال الجو وحضرت حاجات جبنتها ، وبدت تردد مع الاغنية الاشتغلت في الراديو بكل شجن ....
جاتها منى شايلة الجمر ختتو في المنقد وبعدو ختت البن غلتو تمااااام وهي مستمتعة بصوت أمها الجميل في الغناء وبدندن معاها ، عملن جبنتهن وشربنها وبقن يتونسن .
في عز ونستهن دي السر واسعد جو ، كان ظاهر من وشهم انو ورا جيتهم دي شي كبير
السر : صباح الخير
منى : صباح النور ، اقعدو نكب ليكم جبنة مظبوطة
اسعد : كبي لينا بمناسبة البشارة الجايبنها ليكن دي
ست النفور : بشر اها بشارتك شنو ؟
السر : المحامي الليلة ناداني واستلمنا ورق البيت وانتهت كل الاجراءات القانونية وبكدا البيت بقا باسمنا
ست النفور : هيييي خبر السرور اجري يا بت جيبي لي مطبقتي نكرم بالمناسبة دي
السر اخد سكتة شوية كدا بعدو قال بصوت متحفظ ومتردد :
الكرامة خليها فد مرة مع الرحول
ست النفور : رحول شنو ؟!
اسعد طلع الورقة الكان محتفظ بيها للوقت المناسب ووراها لأمو
اسعد : هدي الورقة حقت التنازل ودي ...
ست النفور قلعت الورقة منو قبل ما يتم عاينت فيها ثواني بعدو قالت :
يا بت منى اقري لي ما شايفة مكتوب شنو ؟!
منى شالت الورقة وقرتها اتوسعت عيونها لمن شافت المكتوب وما نطقت بحرف وبقت تعاين لأخوانها
ست النفور : اجي يا بتي مالك اتبكمتي !؟ مكتوب شنو ؟
منى : البيت اتباع !
ست النفور : بيت شنو ؟!
منى : بيتنا دا اتباع ومفروض نسلمو بعد ٣شهور لمن نوفق اوضاعنا
ست النفور ما صدقت السمعتو وجاتها صدمة كانت كافية انو تخلي ضغطها يرتفع
منى : أمي أمي ردي يا أمي، بسم الله ، بسم الله
امشي نادي صلاح
اسعد والسر بقو مخلوعين وواقفين بس ، منى تاني كررت كلامها لمن لقتهم مهجومين
منى : امشو نادو صلاح ، اصلو دا كلو منكم
اسعد : ااا كويس كويس
صلاح جا من بيغادي شاف أمو وكشف عليها وادوها كم حاجة بلدية كدا خفضت ليها ضغطها
اما ست النفور من الصدمة ما كانت قادرة تتكلم بس كانت راقدة وتعاين فوق، ومنى تبكي وتتكلم معاها بس ماف فايدة ....
______
بعد الحصل لست النفور قامت شكلة كبيرة بين الاخوان ....
صلاح : دا شنو السويتوهو دا ؟ ليه ما كلمتونا واصلا منو السمح ليكم تعملو خطوة زي دي من غير رضانا ؟
وبعدين كيف رضو ليكم من غير موافقتنا ؟
السر : دا اجراء مبدئي ، يعني ماف حاجة لسة مسجلة ، بس نحنا حنسجلو ولازم كلكم توقعو وتوافقو لانو دا حق والحق مافيهو عيب
أحمد : بغض النظر عن اي شي حصل ؛ لكن احسن شي لانو أمي عارفها ما حترضى الا نختها أمام الأمر الواقع
السر : وبعدين كلنا موافقين
منى : ما كلنا أنا ما موافقة ومستحيل اوافق
السر طوالي جاط ليك فيها :
انتي شغلتك شنو في كلام الرجال كمان ؟ ماف زول استشارك ؟
صلاح : كيف شغلتها شنو دي ما أختك ولا شنو ؟!
منى : خليهو بقا يسمع في تحاريش مرتو لمن بقا زيها !
ما كملت جملتها الا ولقت السر هجم عليها وبقا يضربها
صلاح مسكو وزحاهو منها بعدو قال :
دي النهاية يا أخواني ؟ القروش تخلينا نتشاكل ؟ ونضرب بعض ؟ ما بتخجل دي أختك يا زول
الزبير : طالما ما بتعرف تمسك لسانها تستحق تضرب
صلاح : ودا أنت الحالة الكبير ؟ بدل توعيهم ؟
الزبير : أنا زهجت من أمك ، وزهجت من البيت دا ، وزهجت منكم ، و زاتو بناتي فترو من أمك ومن معاملتها الكعبة
أحمد : اخير لينا البعد ، وأنت ومنى وأمك اشترو ليكم شقة في اي مجمع سكني وخلاص
منى : غايتو ربنا يسامحكم في العملتوهو دا ! ما شفتو أمي مصدومة من وريتوها ؟!
السر : بتتصدم شوية وبتقوم الجديد شنو !
منى : بقيتو قلوبكم قاسية يا أخواني بقيت ما بعرفكم
السر : قفلي خشمك دا عشان ما أجي اكسرك وما تدخلي اطلعي برا مدام ما عاجبك الكلام ما توجعي راسنا
منى : طالعة
منى طلعت منهم وخلتهم ليك يتشاكلو ، في النهاية ما طلعو بأي شي وكان نقاش عقيم جدا
______
المسا ....
ست النفور قامت على حيلها اخيرا لبست توبها وشالت هدومها كلهن دخلتهن في شنطة ...جاتها منى تعاين ليها باستغراب وقالت :
* يا أمي مالك قمتي من السرير ؟ ضغطك لسه ما استقر وبتلمي في هدومك ماشة وين ؟!
_ أولادي طردوني من بيتي البقعدني شنو تاني ؟
* روقي يا أمي ، صلاح بحلها
_ يحل شنو ؟ هم ما دايرين قعدتي معاهم ، أنا ان شاء الله أموت وارتاح وترتاحو مني
* بعد عمر طويل ما تقولي كدا ! أنحنا ما بنقدر نعيش من غيرك
منى بقت تبكي وتحنس في أمها ، صوت البكا وصل لناس بهناك جو جارين
* أمي عليك الله اقعدي ماشة وين بالليل دا ، أمي يا جماعة قولو حاجة !
السر : أمي بطلي الدراما البتعملي فيها دي
_ دراما ؟ كويس يا ود بطني الليلة ماني قاعدة في البيت دا ولا دقيقة
اسعد : منى دخليها عليك الله جوة ما ناقصين
_ ماني داخلة !
السر : حتمشي وين يعني ؟ماف زول حيستقبلك
يستقبلوك كيف وانتي كعبة مع اي زول ؟! ما مخلية زول ما مشاكلاهو ! ما مخلية زول ما كاسرة خاطرو ! لو مشيتي لزول حيشمت فيك وبس
زوعة في بيت أمها لمن تجي تلقاني معرسة لولدي ست ستها
مرام : زي دي ما بنفع معاها اللين خلي يصقعها بأختها طوالي ههههه
منى : مرام عليك الله بطلي كلامك دا وشوفي ليك شغلة تنفعك
مرام : سكتتتت
______
مر اليوم عادي ، بين الضيوف والشغل وغيرو ، لحدي ما جا المسا موعد اجتماع الاسرة
ست النفور كانت قاعدة بتشرب في جبنة وتتونس مع مرام ، مرام كانت شايلة تلفون وبتوريها في صور بنات
_ لالا دي سمحة
* سمحة وبس ! دي أبوها لواء
_ الصلاة على النبي
* أما دي أمها عندها سلسلة مطاعم
_ مششششم ديل البنات التمام تقول لي بت السعودية المفلهمة
* يا خالتي كمان ماشاء الله ستات بيوت وبيعرفن يطبخن حتى أنا كم مرة مشيت ليهن وضقت اكلهن
_ هي ديل البنات التمام
بعدو وجهت كلامها لأحمد الكان سرحان
_ تعال يا أحمد شوف دا
أحمد :نعم يا أمي
اتحرك عليها ، اتوسعت عيونو لمن قالت ليهو :
_ اعزل ليك عروس من ديل
ضحك ضحكة استهبال بعدو قال :
شكلك غلطانة هههه مفروض تنادي صلاح
_ منو القال ليك ؟! صلاح عروسو جاهزة انت التعزل حتقعد من غير ولد لمتين ؟!
__ أنا اعفيني لا داير أعرس لا شي شوفي لصلاح
صلاح حب يلطف الجو من التنشنة الحصلت وقال :
ههههه يا حجه شنو ياخ تنسيني أنا ! ولا ماعاوزاني أعرس ؟ حركتك ما واضحة
_ هههه أنت ما بتتوصى على العرس عارفاك طاريهو هههه من صغير تحب سيرتو
منى : كدا صلاح حلاها ليك يا أمي خليهو يشوف صور البنات ديل يمكن وحدة تعجبو
_ شوفهن هديل لو وحدة عجبتك طوالي نعرسها ليك
صلاح شال التلفون قلب بسرعة كدا بعدو قال :
لالا ديل كلهن ما الاستايل الدايرو
_ ههههاي ويا أخوي استايلك شنو عان الفلهمة !
منى : بري فلهمة السواد ما تعرف على شنو ؟على الصلعة التلمع دي ولا شي تاني ؟! ههههه
صلاح : دي الغيرة
مرام : ههههه تتشوبر ساي أنت ، اصلا ديل لأحمد ما ليك
صلاح باستهبال : أحمد شنو يا زولة أحمد معرس شوفو لي أنا دا المسكين الوحيد
منى : يا شيخ حننتني والله امشي كدا ولا كدا ، قال وحيد
_ سمح يا صلاح بنفتش ليك أنت امرنا ل الله
بدت ونسة جميلة ومرحة بين صلاح وأمو واتناسو تماما موضوع أحمد
أما أحمد ما صدق طوالي انسحب من القصة ..
اخدو ونستهم وبعدو اتفرقو على بيوتهم
_______
"" مرت الايام ومع مرور كل يوم كان بيكبر الخلاف بين افراد الاسرة ، كل يوم والتاني نقاش ، كل يوم والتاني قصة ، غير المشاكل الفردية الحاصلة زي مشكلة أحمد وابتهال الكل ما يحاولو يصلحوها تتعقد زيادة
وبدت المشكلة الكبرى في اليوم الاتجدد فيهو النقاش عن الورثة ...لكن المرة دي كان بحضور اولاد عم الهادي والمحامي ... ""
كان يوم عادي وهادئ وجميل وست النفور كانت مبسوطة بالجو ، اخدت رقدتها في ضل الصباح وشربت جبنتها بمزاج ، لحدي ما جو اسعد والسر
...
اسعد : أمي كيف اصبحتي ؟
_ تمام الحمد لله انتو مالكم ما مشيتو الشغل اجي الليلة الجمعة وأنا ما عارفة ؟
السر : عندنا موضوع قلنا نقضيهو
_ خير
اسعد : ضربنا لاولاد عم ابوي جو التلاتة وكمان جبنا المحامي وهسي قاعدين في الصالون
_ اها والمطلوب ؟
السر : بس تجي معانا تسلمي ونشوف المحامي حيقول شنو
_ خير البس توبي واجي
اسعد : ان شاء الله منتظرنك ، أنا بمشي بنادي أحمد والزبير وصلاح يجو معانا
_ تمام
______
ست النفور فعلا لبست توبها ومشت الصالون سلمت على الموجودين وبعدو قعدت ...
عباس : أنحنا يا جماعة من جهتنا متنازلين عن اي
شي كتبو لينا الهادي ونحنا ما بنشيل حق زول ، ولمن وصانا على فطين وصانا عشان بس تعيش معاكم ، بس ربنا اراد انو ياخد امانتو وماعندنا اعتراض في حكمو
السر : كتر خيركم ما قصرتو
صلاح : فيكم الخير والله دا لو زول تاني كان طمع
ست النفور : ما عشان شبعو زمان من قروش الهادي بقو ما عاوزين
عباس : انتي لسه زي ما انتي غايتو ربنا يهديك
صلاح : خلاص يا أمي !
ست النفور : سكتتتت
المحامي : أنا حاجهز الاوراق بتاعت التنازل واي شي
وان شاء الله الاسبوع الجاي بجيب ليكم الشاري الحيشتري البيت
ست النفور : شاري شنو يا أخوي ؟ أنت حدك معانا ترجع لينا حقنا من الحرامية ديل وتاني تشيل اتعابك وتتخارج
السر : كيف بيت منو ! البيت دا لازم يتقسم بعد كدا واي زول يشيل حقو
ست النفور : ماف بيت حيتقسم ارجوني اموت وقسمو براحتكم
صلاح : كدي يخوانا اول شي نعمل التنازل وبعد كدا نتفاهم
بعدو اتكلم مع المحامي واتناقشو في أمور التنازل والامور القانونية الاخرى
بعد اتفقو طوالي مرقو كلهم مع المحامي وخلو ست النفور بهناك تهرج
_ أنا يقول لي نقسم؟ يقسم شنو أقول ليهو
أخوك الفقري دا
منى : يا أمي روقي صلاح مش قال ليك بس حيتنازلو ؟
_ ايي لكن ما مرتاحة للقصة
منى : انتي بس روقي
_ وينا مرام ؟ الليلة الا امسح بيها الواطة هي المحرشاهو أنا عارافاها كويس
منى : يا أمي معليش خليها عشان حامل وعارفة الحمل متعبها
_ برا حمل برا قرف ، كلنا حملنا وولدنا وبطني دي شالت ٦مالي ما سويت جنس سواتها دي ؟!
الوحدة أول ما تحمل تتهابل فينا وتحوم ماسكة كرشتها وتلوك اليوم كلو زي غنم الاشلاق
أم ابتهال وابوها قعدو شوية وبعدو استأذنو ومرقو
هنا بدت القطيعة بين النسوان ...
ست النفور بدت تتكلم :
_ ابتهال التصبر لي تلفون ما تضرب ؟
مرام : عاد يا خالتي ابتهال بالغت شكلو في مشكلة بينها وبين أحمد ومشكلة كبيرة وما بعيد يكون طلقها ما شفتي أبوها جاي خجلان وبيتكلم مع أحمد براحة ؟!
_ ان شاء الله يوم الهنا والمنى لو طلقها نرتاح منها العاقر ونفرح بولدي دا اشوف جناو
منى : مرام بطلي البتعملي فيهو دا انتي الموت دا ما متذكراهو ولا شنو ؟ بعدين ربنا بيسألك من حق الناس بطلي تحاريش واقعدي بأدبك
مرام : ما شغلتك فيني بقول الدايرة اقولو
_ هوي ها ما تشتغلي بيها دي هبلة ، نشوف نسوان أخوانك ديل حيدخلوك الجنة
منى : يا أمي بالذمة هسي ابتهال دي عيبها شنو ؟ نضيفة ومرتبة وشايلة أحمد في عيونها وما بتسأل زول ولا حصل ردت ليك كلمة ليه تسمعي تحاريش الحاسدين
مرام :أنا حاسدة يا منى ؟! سامعاها يا خالتي بتقول شنو ؟
_ يا بت هاا ما تشتغلي بيها وبعدين تعالي هنا الدنيا دي كلها عزت الا هي ...اهل نسوان أخوانك ديل كلهم جو والقريب والبعيد جا في نفس اليوم ، عارفني مجاملة وبصل الناس
منى : خلاص جو اهلها
_ بررري أنا حاسة بإنه في الموضوع ما شفتي أمها تشيل وتحمر لي
منى : ربنا يصلح الحال ان شاء الله مع المصايب البتجي ورا بعض دي
_ ان شاء الله
انتهت جمعتهم واتفرقو لبيوتهم
_______
مرام والسر كانو بتونسو ...
* جسمي مكسر من الخدمة أمك كل دقيقتين قومي سوي قومي سوي
_ اممممم
* أنت يا السر هسي بعد فطين اتوفت الحيرث الجزو حقها منو ؟
_ والله ماعارف الا نسأل محامي لكن في الغالب اولاد عم أبوي لانو هم الموصيهم عليها وما بعيد يكون كاتبو بأسمهم
* والله دي مشكلة اوع تسكتو ليهم طوالي جيبوهم يعملو تنازل دا حقكم انتو يارثو الغريب ليه ؟!
_ اي الله يستر ما يطمعو غايتو عباس ما عندو مشكلة بس عندو اخوانو ديل ما معروف لانو بنسمع بيهم ما حصل لاقيناهم
* كان كدا لازم تخلصو الموضوع دا سرعة عشان ما يحرشهم زول ويجو يقالعوكم في حقكم
_ لالا أنا ان شاء الله من بكرة طوالي حاشوف محامي
* ان شاء الله
_______
أما سعاد واسعد ....
هسي كدا البيت حيكون حقنا ونصيبنا حيزيد
ونقدر نشتري لينا بيت كويس
** هوي ها ماف زول يسمعك يشيل حالك اصبرو شوية خلو عمتكم تتم الاسبوع على الاقل
لالا الموضوع دا ما بستحمل ممكن عادي فجأة اولاد عم أبوي يجو يمرقونا والمشكلة المتضررين نحنا لانو الجزء حق فطين ياهو حقنا وجزو من ناس حق مرام
** اي والله كان كدا قوة العين وجبت انتظرو بس تلاتة يوم وطوالي اتكلمو
سعاد : كويس متشجع ، أنا حقي دا الا الكزو لكز غايتو بس الحمد لله
مرام : ههههه بس أهم شي مقتنع
سعاد : اي والله
____
في بيت ناس ابتهال .....
هنادي : مالك يا العويرة تبكي ليها شنو ؟
ابتهال : يا ماما ليهو اسبوع ما سأل عني وأنا عارفاهو زعل خليني اضرب ليهو وارجع بس
هنادي : ها العويرة دي يضربو الضريب ان شاء الله ، حتضيعي تعبنا كلو ، خليهو يا بت اصبري كان ما جبتو ليك راجع
ابتهال : ما عارفة قلبي ماكلني عليهو
هنادي : ما بليدة ، عايني ما توجعي لي راسي بالبكا عاوزه ترجعي البسي توبك واتخارجي ليهو خلي أمو تذلك صباح ومسا
ابتهال : طيب اعمل شنو ؟!
هنادي : أنا بوريك تعملي شنو
هنادي ورت بتها خطتها واتفقو على تنفيذها
__
المسا ....
اتلمت الاسرة كلها بعد الغدا وبقو قاعدين في الحوش يتونسو ويشربو في الشاي
السر : اها يا أمي ما فكرتي في الموضوع ؟
_ موضوع شنو ؟
اسعد : بيع البيت !
_ عاينو كلامي ما بعيدو قسمة ماف ، ارجوني أموت وشيلوني جنازة من هنا وبعد ترتاحو مني تعالو بيعو وقسمو براحتكم
خديجة : ربنا يطول في عمرك يا خالتي ، براحة اهدي
_ اهدى كيفن واولادي بعد عمري دا كلو عاوزين يتخلصو مني ؟ لا أحسن ودوني دار العجزة وارتاحو
السر: انحنا ما بنقدر نقعد في الضيق دا ذنبنا شنو؟
اسعد : والمحامي استشرتو قال بظبط الامور دي ويجيب لينا شاري للبيت يصبر علينا لمن نطلع ونوفق اوضاعنا
_ وكمان كلمت محامي؟
السر : انحنا جادين في الموضوع دا وما فيهو تراجع
طوالي ست النفور قامت على حيلها وبدت تكورك :
_ أخر عمري أنا تلو يدي يا ما نافعين تسمعو في كلام الحريم خيابة السواد عليكم ، شفتو البيت دا أنا ما طالعة منو الا جنازة غير كدا اعملو الدايرين تعملو
صلاح : اهدي يا أمي ضغطك برتفع
_ ما بهدا ما سامع اخوانك بقولو شنو ؟!
قطع حديثهم صراخ منى الجاي من الغرفة ..
* الحقوني يا صلاح ، السر ، زول يجي
يتبع ....
لكلِّ شدة مُدة ، ولكل ضيقٍ مُتسع ،
هكذا هي الحياة ،
يتعاقبُ فيها نهارٌ مُضيءٌ ،
وليلٌ مُظلم ، تارةً يُخالجك الألم ،
وتارة يُصالحك الأمل ،
واللَّه دومًا في هذه وفي تلك معك ،
فالحمدلله في السراء وإن قصُرت ،
والحمدلله في الضراء وإن طالت ،
اللهم احقن دماءنا وأحفظ بلادنا ،
واصلح جميع أحوالنا وأمنٌا في بلادنا ،
إنّ الذي مَلأَ اللُّغاتِ محَاسِناً
جَعل الجَمَالَ وسَرّهُ في الضَادِ
[ أحمد شوقي ]
#اليوم_العالمي_للغة_العربية
رواية: كيف أكتب بكائي
بقلم: اوزي
متابعة ممتعة 🌸❤️
كل عام ومحولو الأحاسيس لأحرف بخير .
#اليوم_العالمي_للكُتاب
اما اسعد وسعاد فما قدرو على قروش الاقامة و رجعو السودان وبقو يدافرو في المعيشة ...وبقو خجلانين شديد انو يرجعو لاخوانهم او يطلبو مساعدة منهم ، فاضطر اسعد يسوق مرتو وبناتو ويسكنو عند أهل مرتو ، ومشى من الضيق الكان بقول عليهو للاضيق منو ، ومن تحكم ست النفور لتحكم أهل مرتو ، وكان ممشنو على كيفهم عشان قاعد معاهم ...وسامع أم سعاد دايما تنقنق ، راجلك دا ما عندو دم ؟ منبطح في حقنا لشنو؟! واخوانو عندهم بيوت حدادي مدادي ؟! وسعاد تسكتها ،
كان بسمع الصوت بس بعمل رايح واقتنع انو دا كلو عقاب من رب العالمين على السوهو في أمهم زمان
مرت السنين ومنى بقا عندها ولدين وبت وصلاح عندو تلاتة اولاد ، أما ابتهال وأحمد فربنا ما رزقهم بس اتصالحو مع الموضوع شديد وبقو عايشين حياتهم عادي وسعيدين جدا ، وكانو دايما بقدر الامكان بحاولو يلمو الشمل ويسالو من اخوانهم ، وحتى لمن سمعو انو اسعد والسر في ضائقة مالية رسلو ليهم قروش مع زول من غير ما يعرفو منو الرسلها ، وبقو يراقبوهم من بعيد ويسألو من اخبارهم ....
وبكدا انتهت قصتنا ، اي زول حيشيل العبرة الطلع بيها لانو العبر كتيرة وما محصورة ، بس اهمها انو غضب الام لو لف الزمن ودور ما حيريحك .
وانو الحقد والحسد بيقتل صاحبو وبيرهقو وببعد عنو الناس ، زي ما ست النفور خسرت الناس بقسوتها
وكمان السر واسعد خسرو اخوانهم بسببو ، وانو القروش زي ما هي سبب سعادة ممكن عادي تبقا سبب تعاسة وقطع رحم واي زول في الدنيا دي بياخد حسب نيتو .
وزي ماعارفين انو حبوباتنا الزمان ديل عندهن عادات وتقاليد ما بقدرن يخلنها ولو انو في بعضها غلط بس حاجة اتربن عليها ومتمسكين بيها شديد ، فنعذرهم شوية لانو حاجة ما بارادتهن ، ونربي روحنا نحن الجيل الجديد على عادات وتقاليد جديدة تكون مبنية على التسامح ورفض العنصرية والقبلية ونربي اولادنا عليها .... ونزرع الكلمة الطيبة فيهم لانو البيتكسر عمرو ما بتصلح .
تمت ....
٢١/ يونيو / ٢٠٢٠
نتلاقى إن شاء الله في رواية جديدة
ابقو عافية ❤️
أمل طارق ❤️
منى : انتو لسه مصرين على القسمة يعني ؟
مرام : اي اكيد البقعدنا في الخرابة دي شنو ؟
منى : هسي عليكم الله صندوق فطين دا ما علمكم شي ؟ ولا كانت اشارة من رب العالمين يمكن ؟ توريكم انو القروش ما كل شي وانو خربت نفوس الناس زمان ما تخلوها تخرب بيناتنا تاني
مرام : عايني يا منى نحنا من الاخر كدا ما عاوزين الشراكة عاوزين ننفصل ونستمتع حبة فترنا ياخ
ابتهال: انتو زمان كان مشكلتكم ست النفور هسي ست النفور مشت ربنا يرحمها معليش يعني على الاسلوب ، بس تاني القسمة لشنو ؟
سكتو كلهم لانو ماعارفين يجاوبو كيف !
منى : عاينو الدايرين تعملوهو اعملوهو والبتشوفوهو سوهو أنا نبحت بما فيه الكفاية وأمي كمان الله يرحمها نبحت ومرضت بسببكم وبسبب قوة راسكم
وبكرة تندمو على القرار دا
خديجه : يا جماعة استهدو بالله وفكرو فيها بالعقل عشان ماف زول يندم ، هدا البيت وااااسع وكبير وممكن نتساعد كلنا نكسر جزو جزو نبنيهو يشيلنا زي العجب وبكرة الاولاد يكبرو ونخلي ليهم ، الزمن دا ما زمن بيع والله بكرة تندمو
السر : لالا نحنا زمان القصة دي حسمناها وحتى ادينا كلمتنا للزول الحيشتري وبالكتير بكرة بعد بكرة حيجي يشوف البيت ويورينا السعر
منى : سمح البتشوفوهو
وسكتو كلهم على كدا
_______
مرت الايام على بيت الاسرة بسرعة شديدة ، وفي يوم وليلة فجأة لقو نفسهم مودعين البيت العاشو فيهو طفولتهم ، بيت أمهم الربتهم فيهو وتعبت عشانهم ، البيت الكان وصية من أبوهم انو يعيشو فيهو كلهم بسلام ووئام ، خلو القروش تعميهم واختارو الفرقة ....
منى ما كان عندها حل غير توافق لانو دا حق وعاجلا او اجلا كان حيتاخد ، ودعت البيت بالدموع واصرت شديد انو تشيل عنقريب أمها معاها وفعلا شالتو ....
اتقسمت الورثة كلها بين الاخوان واي زول شال حقو ، منى وصلاح اشترو بحقهم شراكة شقة صغيرونة كدا قدرهم ، سعاد واسعد كانو مجهزين اوراقهم وطوالي دقو خروج ساقو بناتهم وسافرو السعودية ، الزبير وخديجة اشترو ليهم شقة صغيرونة جمب ناس منى ...
أما أحمد وابتهال فسافرو السعودية واستقرو هناك
، ورغم انو اسعد وسعاد كانو هناك بس سعاد رفضت اي تواصل معاهم وكانت بتطرد ابتهال لمن تجي تزورها و ما بتكلم اسعد انهم جو ومفهماهو انو هم قطعو علاقتهم بيهو ....
مرام مسكت السر عليها وحمتو يتواصل تاني مع اخوانو وبرضو اجرو ليهم بيت في حته سكنية راقية ، و بسبب غباء مرام بقو مشلهتين من بيت ايجار لبيت ايجار ودا كلو عشان بارت البرستيج والفلهمة ....
انقطعت العلاقة بين الاخوة لمدة طويلة شديد
، صلاح كان بحاول يتواصل معاهم بس ماف زول كان بيرد غير أحمد والزبير ...
اما مرام وسعاد فكانن ما عاوزات تواصل تاني نهائي مع الاسرة ومسحن تلفونات الناس ومنعن رجالهن انو يتواصلو مع اخوانهم لانو كل وحدة كانت مفتكرة انو لو اتواصلو حيشحدو راجلها قروش ....
صلاح بعد كم سنة اتزوج زميلتو في الشغل وللاسف ما حضر العرس غير الزبير وأحمد ومنى ..
ولمن ضرب ليهم يعزمهم ردت على التلفون سعاد وقالت :
* لا دايرين نحضر عرس لا غيرو أنا عارفاكم فجأة بقيتو تحبونا عشان اغتربنا وبقا عندنا القروش دايرين تسفو راجلي زي ما زمان كنتو بتعملو ....
ودا كلو واسعد ما عارف والعارفو او بالاصح المفهماهو ليهو سعاد انو ناس منى قطعو علاقتهم بيهو وبقو ماعاوزين تواصل
اما مرام فما ردت اصلا وقفلت التلفونات وكمان السر رد وقال : ما فاضي !
في حاجة كانت ما مفهومة ومبهمة كيف قدرو السر واسعد انو يقطعو علاقتهم كدا !؟ ديل اخوانهم ؟!
بس اكيد الراجل البسمع تحاريش النسوان دي نهايتو !
صلاح ومنى لمن لقو انو اسعد والسر ما عاوزين معاهم درب خلوهم وبقو عايشين حياتهم عادي ، وبتلمو هم ومعاهم ناس الزبير واحيانا ناس أحمد لمن يجو اجازات
مرت السنين وانقطعت اخبار اسعد والسر تماما ،
ومنى اتزوجت زميل صلاح في الشغل اسمو مازن شغال محاسب في المستشفى ، زول كويس واخلاقي ورايد منى شديد وخاتيها في عيونو
بعد فترة سمعو انو السر قبضوهو في شيكات عشان مدين ودا كلو بسبب مرام البعزقت قروش الورثة يمين وشمال وقضتها تياب وهدوم وفسح ، وانو ولدها الكانت الحامل بيهو اتوفى بعد كم شهر من ولادتو ، ورجعت المشاكل بينها وبين السر من جديد بس المرة دي ما لقت البدافع عنها ولا لقت زول يصالحهم وبراها طبزت عينها بيدها وخسرت الناس ، وخسرت راجلها اهلو وعزوتو بسبب طمعها وتحاريشها وزي ما وجعت قلب أم ربنا عاقبها ...
اما السر فندم شديد وسف التراب ولمن فتش عن أخوانو ما لقاهم لانو لمن جوهو وحاولو يلمو الشمل رفض براهو وقطع اي تواصل ، حياتو اتجهجهت وبقا محاط بالمشاكل من كل ناحية وبقا يشيل ويسدد في الديون ، ومرام باعت دهبها عشان يعيشو وكمان عشان يطلع من الحراسة .وبقو حايمين من بيت ايجار لبيت ايجار
#وصية_الشيخ_الهادي
بقلم: أمل طارق
الجزء 15
خديجه : هيي يا ابتهال بالغتي يا بت أمي ! ليه راجعه تاني ؟!
ابتهال : ياخ زهجت من أحمد طول ايام البكا مهمشني زي كأني ما بتكلم معاو ، تخيلي كم مرة احرجني !
خديجه : معليش عشان موت أمو مؤثر عليهو ؛ وبعدين انتي يختي كترتيها براك ما حرام عليك؟! قاعدة شهر كامل بعيدة منو قطعتي نفسو بالجري وراك
ابتهال : اها اعمل شنو ؟! خليهو مش عاوز كدا هو الدايرو اليعملو
خديجه : يا بت ها انتي عويرة تخلي راجلك ؟ وبعدين ما شفتي بدور ولا شنو حايمة حولينو اليوم كلو !
ابتهال : بت خالتو قصدك ؟ اي شفتها ايام البكا مالها ؟!
خديجه : يا بت ها اتنفضي كدا وارجعي بيتك البت دي أنا ما مطمنة ليها ، هي ومرام يتوشوشن اليوم كلو ، وانتي عارفة اي شي تدخل فيهو مرام نهايتو شنو براك !
ابتهال : كيف يعني ؟! البت قصدك دايرة أحمد ؟! لكن هي نان ما صغيرة ما ظنيت
خديجه : يا بت خافي من بنات الزمن دا اكتر شي ديل مفتحات يا بت أمي ما زينا ههههه ، وبعدين عيني دي ما بتكضب شوفة عيني تعاين لأحمد ساي وتتراشق جنس رشاقة ؛ شي اجيب ليك شنو وشي تناول فيهو وماسكة خدمتو تشيل وتتجارى بيغادي
، ويوم داك لقيتها شحدتو سفنجتك مبرطعة بيها ههههههه
ابتهال : وب علي ودا كلو وأحمد ما قال شي ؟!
خديجه : ما شغال بيها هو ، بس كلمتك غايتو قومي اتنفضي وامشي شوفي راجلك وبيتك وبطلي العوارة ، الزعل ما حيفيدك ، والرجال ما مضمونين ههههه
ابتهال : بري خوفتيني التصبر لي المعفنة دواها عندي ، اصبري خليني ماشة الم هدومي
خديجه : ماشه وين ؟! ههههه
ابتهال : حجل بالرجل معاك طوالي راجعة بيتي
خديجه : سمح راجياك سرعة ههههه
ابتهال مشت لمت هدومها كلهن وودعت ناس أمها وركبن هي وخديجه أمجاد ورجعن البيت .....
ابتهال طوالي مشت على بيتها لقتو ليك مليان غبار وأحمد مجدع الهدوم كلها في الارض وقالب الدنيا كلها
عاينت للحته بزهج بعدو قالت :
* ايييك هسي الزول يبدا من وين زاتو ؟
ربطت طرحتها وبدت في النضافة ، انتهت من النضافة وطوالي دورت بخور ، بعدو مشت استحمت من تعب النضافة ، لبست احلى ما عندها وبعدو قفلت بيتها وقالت تمشي تسلم على ناس بيغادي ومنو تخلع مرام وبدور ....
فعلا مشت لقتهن ليك قاعدات مع منى وخديجه وسعاد واتهجمن شديد لمن شافنها ...
منى : هييي يا ابتهال وين يا زولة ؟ مشتاقين عديل
ابتهال : ههه منوية ازيك ان شاء الله كويسة
" بعدو سلمت على الباقيات "
منى : والله الحمد لله مالك طولتي كدا ؟ ومالك ما وريتينا جاية ؟
خديجه : جات معاي من قبيل بري قايلاها جاتكم
منى : يخسي عليك تتلبدي لشنو هههه!!؟
ابتهال : والله لا اتلبدته لا شي بس قلت ادخل اغير واجيكم بجاي ، بس لقيت ليك أحمد عامل لي البيت كوشة هههه ، اعصابي باظت لمن نضفت حتى ارتحت
منى : وب علي اسكتي ساي فقدناك والله ، راجلك جننا جن بالطلبات بركة الجيتي تستلميهو ، وفضحنا فضيحه ايام البكا الا طبلنا البيت بالمفتاح شدة ما وسخان ههههه
سعاد : اي والله صحي البيت من غير مرا ما بنقعد
بدور : والله أنا كنت حانضفو حتى لاحظت أحمد بقح قلت اظن من التراب يحليلو نايم في البرد برا ، لكن بس ما اتذكرت اشيل منو المفتاح
ابتهال : تسلمي حبيبتي لكن المفتاح أحمد ما بيديهو لاي زول ، حتى منى دي ما بخليها تخش اوضتنا
مرام : والطراك لينا شنو يختي ؟! ماكنتي مكندشة بالمكيفات الجابك لغرف الموية والبلاعات شنو ؟!
ابتهال : اجي بيتي كمان اخليهو ؟!
مرام : هههه ما قلنا شي لكن لو مكانك بسوق أحمد يمشي هناك مش اجي في المزبلة دي ؟!
ابتهال : بري بيتي والله واتعودت عليهو تصدقي طيلة فترة ما أنا قاعدة عند ناس أمي ما كنت مرتاحة التقول ما عشت فيهو طفولتي هههههه
خديجه : فعلا والله هسي أنا زيك هههه سبحان الله
اتونسن حبة وبعدو اتفرقن ....
_____
مرام : مششششم خلاص جات الحرباية العملناهو كلو حيضيع
بدور : يعني خلاص أحمد تاني ما حيشتغل بي ؟!
مرام : هو اصلا متين اشتغل بيك يختي ؟ ياهو بننفخ في قربة مقدودة لينا اسبوع وحاجة ولسه ما انجزتي
بدور : يعني اعمل ليهو شنو مثلا ؟! ما ياهو متقاطعة فيهو اليوم كلو وكمان متواصلة معاو واتس تاني شنو ؟!
مرام : والله انتي هبلة ! يا السمحة مفروض تكرهيهو فيها مش تقعدي تتفرجي عليهم وهم بلمو في الشمل ويداو الجروح
بدور : لالا ما حاخليها تاخدو مني بعد تعبي دا كلو والله
مرام : ها نشوف !
______
بالمسا ....
ابتهال جهزت شعورها لاستقبال أحمد ، اتأكدت انو كل شي في مكانو ، وحضرت سفرة جميلة من الحاجات البحبها ، سمعت صوت برا طوالي لمعت عيونها وفتحت الباب من غير وعي ...
لقتها ليك بدور ! اتخلعت وتاكت الباب حبة ومرقت ليها
_ في شنو خلعتيني ؟ مالك متلبدة انصاص الليالي ؟! عاوزة حاجة ؟
* ااا لالا بس جيت قايلا أحمد جا كنت عاوزاهو يشوف لي حاجة في تلفوني
_ افرضي جيتي لأحمد بتجي داخلة ليهو اوضة النوم ؟! ولا بتجي متلبدة زي الحرامية كدا ؟ وبعدين في باب بالمناسبة ! هداك ليهو ممكن تخبطي فيهو على فكرة
خشمي إتحرق☕️ من بسمتك
يا السمحه شايك☕️ دا سمح
بس ما بفوت يوم طلتك ♥️
استمر حبهم بالسنين وزاد اكتر لمن ست النفور رزقت بأول طفل وسموهو " الزبير "
الهادي انبسط شديد و ضبح الثيران وعزم الناس ، وكرم للحلة كلها ، وكان في كل ولادة لست النفور بعمل كدا ، غير انو بملاها بالذهب كل ما تجيب ليهو ولد
حياتهم كان حلوة شديد لحدي ما في يوم جات فطين ، فطين كانت بتحقد على ست النفور لأنو شايفة انها شالت أخوها منها ، وزاد حقدها لمن كانت بتشوف حب الهادي ليها
اتفقت مع شيخ يعمل ليها حاجة تخلي ست النفور تسقط وتاني ما تلد ، في الوقت داك ست النفور كانت حامل بطفل سابع ويادوب في شهورها الاولى ، فعلا الشيخ اداها حاجة شالتها وختتها لست النفور في الاكل وبسببها سقطت الطفل ، وكمان الداية قالت ليها تاني ما بتلدي !
ست النفور زعلت زعل شديد خاصة انها كانت لسه شابة كانت ما فاهمة كيف دا يحصل ؟! بقت لافة على الدكاترة ما خلت حتة وما خلت مكان ما مشتو وكلهم نفس الجواب !
بعد فترة عرفت انو السبب في الهي فيهو دا هي فطين، ومن هنا بدت الكراهية بيناتهن ، شيخ الهادي كان واقع بين نارين بين حبيبتو البريدها وبين اختو الدرويشة
كان احيانا يسايسهن واحيانا يزهج منهن ولحدي نهاية حياتو ما حصل غلط على وحدة فيهن ...
وحتى في الورثة ضمن حقهن الاتنين عشان ما يحتاجن زول من بعدو ....
حاول بقدر الامكان يطيب النفوس بيناتهن بس ما قدر ؛ عشان كدا كتب وصيتو عسى ولعل تطايب النفوس بعد موتو
في اليوم المات فيهو الهادي ست النفور اتغيرت بقت زولة تانية خالص قررت تقسي قلبها عشان الدنيا صعبة ، كانت بتخاف على أولادها من الهوا الطاير وحتى وهم كبار ما كانت بتخليهم يبيتو برا البيت نهائي ، عافرت وتعبت شديد عشان تحافظ عليهم
اتحملت كلام الناس واتحملت مصاعب الدنيا البتواجه كل مرا من دون زوجها
بدت تتذكر في الذكريات الجميلة دي وتارة تضحك وتارة عيونها تدمع . حتى الذكريات ما كانت مرتبة في ذهنها فمرات تتذكر حاجات حلوة واحيانا كعبة واحيانا حاجات ما مفهومة
فجأة اتذكرت المهلبية الكان البحبها شيخ الهادي شديد اخدت نفس عميق وهي بتقاوم في الالم بعدو جاها صوتو لمن كان بقول ليها :
_ مهلبية يا سلااااام ، أنتي عارفة يا ستو أنا المهلبية دي ما باكلها الا عند اتنين ؛ عندك وعند أمي الله يرحمها ، وبعد موتها بقيت بحب تسويها لي لانها بتذكرني بيها ولانو يدك طاااااعمة
اخدت نفس عميق بعدو جاها صوت بتها منى من بعيد ، حست بحاجة باردة في جبهتها ، فتحت عيونها ببطء وهي بتعاين ، لقت أولادها حولينها ومنى كانت قاعدة جمبها وبتسوي ليها في مكمدات ،
جسمها كان بينتفض من الحمى ، ونفسها ضعيف
منى قالت ليها :
* يا أمي انتي سامعاني ؟! قومي النوديك الدكتور حمتك دي قوية ! صلاح مشى يوقف أمجاد جاي هسي
"ست النفور هزت راسها بمعنى لا "
منى : ليه يا أمي ؟! عشان تبقي كويسة قومي
هزت راسها بقوة تاني وقالت بصوت متقطع :
_ للللاااا
كانت دي اول مرة تتكلم فيها بعد شهر كامل
منى : هييي البركة الاتكلمتي يا أمي ، يلا قومي معاي ساعديني نمشي نوديك الدكتور
جو عليها السر واسعد والباقين عشان يتكلوها
زحتهم منها وقالت :
_ ما دايرة لا دكتور لا دايرة اتحرك من تحت الشجرة دي خلوني بس
حاولو معاها كتير بس اصرت شديد على موقفها ، وست النفور معروفة لمن تقول لا يعني لا والنقاش انتهى
عاينت لمنى وقالت ليها :
سوي لي مهلبية يا منى نفسي فيها
منى : طوالي يا أمي اي حاجة نفسك فيها بسويها ليك بس انتي اسمعي الكلام
_ قلت ليك بس دايرة مهلبية ومعاها شاي احمر خفيف
* حاضر يا أمي
اما الباقين بقو قاعدين وبعاينو بس ، حاولو كم مرة يقنعوها انو تمشي الدكتور بس رفضت تماما فسكتو في النهاية ....
منى سوت ليها المهلبية والشاي وجابتهم ، لقتها متكلة على السرير وبتتنفس بصعوبة
_ ختيهن في رجلي
* حاضر
_ جيبي لي المعلقة دي
* هاك
ست النفور بقت تشيل من المهلبية وتحاول تاكل ، كانت يدها بتتهز شديد طوالي منى مسكتها من يدها وساعدتها تاكل ، اكلت المهلبية وشربت الشاي وبقت راقدة
كان كل اولادها حولينها ومحتارين وما عارفين يقنعوها كيف ؟!
رفعت راسها وقالت ليهم :
_ عاوزة منكم طلبين !
أحمد : قولي يا أمي
_ احلفو لي هسي انو كلكم حتنفذوهن
بدو يحلفو ليها بالدور ، بعدو قالت :
_ الطلب الاول عاوزاكم تعفو لي وانا عافية ليكم كلكم واحد واحد
والطلب التاني تمشو كلكم بيوتكم خلو جمبي بس منى
كلهم قالو ليها عافين ليك ، بس ماف زول اتحرك
قالت بنهرة :
_ قلت ما عاوزة زول معاي غير منى !
منى هزت ليهم راسها بمعنى امشو وفعلا بدو يتحركو بخطوات متثاقلة لحدي ما اتفرقو وخلو معاها بس منى
قبلت على منى قالت ليها :
_ منى يا بتي تكليني النمش الحمام
* حاضر
تكلتها لحدي ما دخلتها الحمام ومرقت بعدو ساعدتها رقدت
_ قومي اطفي لي النور دا عليك الله
* حاضر
_ الله يرضى عليك دنيا واخرة يا بتي يا منى عافية منك وراضية عنك
* امين
منى فضلت مساهرة جمب أمها وكلها قلق عليها
#وصية_الشيخ_الهادي
بقلم: أمل طارق
الجزء 14
المسا ......
البيت كان صاني ، هدوء ما اعتادوهو أهل البيت ، كان هدوء مخيف جدا ، قطع الهدوء دا صوت جري الشفع ولعبهم
جو جارين حفيدات ست النفور نحو غرفتها ، لقوها متكلة في كتف منى ، ومنى كانت بتأكل فيها ، وكان ظاهر عليها التعب والارق
وقفن البنات بعيد يتفرجن في المنظر ..
رحمه : يعني هسي حبوبة حتموت ؟!
ايناس : ما تقولي كدا عيب !
رونق : ان شاء الله تموت زاتو
ايناس : عيب يا رونق حاكلم ليك عمو صلاح
رحمه : ارح يا رونق ماما قالت لينا ما تمشو بيغادي
رحمه و أختها مشو بيتهم وخلو ايناس وتماضر واقفات لسه ، ايناس وتماضر مشن الاتنين جمب حبوبتهن ومسكن يدها .....
تماضر : عمتو منى
منى : نعم حبيبتي
تماضر : حبوبه مالها !؟
منى : حبوبه تعبانة شوية
ايناس وجهت كلامها لست النفور وقالت :
_ حبوبه انتي حتبقي كويسة ان شاء الله جيبي راسك نرقي ليك زي ما ماما بتعمل
تماضر : ايي صاح لمن اكون عيانة ماما بتقرا لي قران وطوالي ببقا كويسة
ست النفور كانت بتراقب فيهن بصمت ودموعها جرن
تماضر طوالي مسحت ليها دموعها بسرعة وقالت :
_ حبوبة ما تبكي عليك الله ، هسي بقرا ليك قران بتبقي كويسة ، عمتو منى ! انتي زعلتيها ؟
منى ما قدرت تمسك دموعها وبقت تبكي....ايناس عاينت لأختها بعتاب وقالت :
_ عجبك يا تماضر ؟ زعلتي عمتو منى كمان
منى : ما زعلت منها تعالي حبيبتي اقري لحبوبة قران عشان تبقا كويسة
تماضر ابتسمت ابتسامة بريئة وبعدو ختت يدها في راس ست النفور وبدت تقرا في القران ، كانت احيانا بتلخبط الايات او تنسى بس ايناس ومنى كانن بصلحنها
اما ست النفور كانت بتراقب بس بصمت ، حاسة بالندم ، كيف ضميرها سمح ليها تظلم بنات خديجه بالطريقه دي ؟ كيف بعد السوتو ليهن طيلة السنين دي هن لسه بالبراءة والنقاء دا ؟!
دموعها ما كانت عاوزة تقيف ، مدت يدها حضنتهن شديد وهي بتبكي ...بادلنها الحضن وقلدنها بعدو قالن ليها : _
تماضر : ما تبكي يا حبوبه هسي الوجع بزح
ايناس : حتبقي كويسة والله
منى : حبيباتي ادعو ليها عشان تبقى كويسة وترجع زي اول
ايناس : ماما زاتها قالت لينا ندعي ليها
منى : اي تمام كلنا ندعي ، اها الليلة النتيجة كانت كيف ؟
تماضر : انا جيت الاولى وايناس جات التالتة
ايناس : امشي يا كضابة انتي الجيتي التالتة !
منى : ههههه المهم جيتو في العشرة الاوائل ما مشكلة ، الهدية ان شاء الله محفوظة
ايناس وتماضر قعدن في حجر حبوبتهن وبقن يتكلمن معاها ، هي ما كانت قادرة تتكلم بس كانت متفاعلة مع ونستهن بكل حواسها ، اخيرا ضحكتها نورت وشها خاصة مع كلام تماضر الكان طريف جدا
اتمنت لو ما ضيعت سنينها في الحقد والغل وانو من زمان لمتهن عليها
اما منى فكانت مبسوطة شديد بتحسن وضع أمها ؛ لانو ليها فترة ما ابتسمت ، وكمان فرحتها زادت لمن شافت معاملة ست النفور المتغيرة اتجاه بنات خديجه .
قعدن فترة يتونسن ، قطع ونستهن صوت دق باب الاوضة ....
منى : اتفضلي خديجة ازيك ؟
خديجه : اهلين مساء الخير
منى : مساء النور
خديجه : هيي واي انتن بيجاي ؟ وأنا افتش من قبيل ، تعبتو حبوبة انزلي يا بت تماضر من رجلينها
منى : هههه خليهن غيرن ليها جو من قبيل يتونسن
معاها
خديجه : خالتي ازيك كيف بقيتي
ست النفور هزت راسها بمعني الحمد لله لانها ما كانت قادرة تتكلم
خديجه : جبت ليك مديدة بعملوها اهلنا بتشيل الجسم وتبقيك تمام التمام انتي بس جربيها
منى اتناولت منها الصحن ختتو في التربيزة عشان تتجنب الاحراج اذا ست النفور رفضتو زي عادتها ؛
بس اتفاجأت بانو بقت تأشر ليها عليهو ، منى طوالي شالتو وهي ما مصدقة وقالت :
* دقيقة نجيب ملعقة
قاطعتها خديجه وقالت : لالا شربيها ليها عديل ما مشكلة
خديجه مسكت من منى الكورة وبقت تشرب في ست النفور وكل ما تدفق من خشمها تقشها ليها بطرف توبها ، انتظرتها لمن كملت وبعدو ناولتها موية ،اتونسن هي ومنى شوية وبعدو ساقت بناتها ومشت .
اما ست النفور بعد المديدة دي اخدت نومة طويلة ما صحت منها الا بعد العشا
_______
في جهة تانية أحمد كان راجع البيت ، تلفونو دق وكان المتصل أبو ابتهال ....
* الو أحمد يا ولدي كيفنك ؟!
_ الحمد لله يا حاج
* اها البت دي ما كفاها ! ما بتدور بعد كدا تجي تسوقها ؟!
_ والله يادوب راجع البيت والوالدة تعبانة شوية عشان كدا انشغلت ، بشوف ان شاء الله لبكرة لو قدرت بجيكم
* كفارة ليها
_ كفر الله سيئاتك
* خلاص يا ولدي ما مشكلة قلت اشوفك وافقدك
_ تسلم يا حاج تشكر
* الله يسلمك
______
أبو ابتهال بعد قفل الخط طوالي ابتهال وأمها دورن فيهو ....
هنادي : اها قال شنو ؟ جاي ؟
أبو ابتهال : والله ما اظن قال مشغول ، لكن كان ما أخاف الكضب كلامو دا كلام زعل ؛ شكلو زعلان
ابتهال : كلمتك يا ماما خلاص قفل مني تاني البرجعو شنو ؟
هنادي : ها العويرة دي قمتي تتنايصي فيني خلاص ؟
أبو ابتهال : اها دي نهاية عدم سمعان الكلام وقوة الراس ، شوفي حتعملي شنو ؟! هو ولد مهذب لو زول تاني كان ما رد لي زاتو
ونسوان أخواني نسو لأمي الدهب الاشترتو ليهن والحاجات الكانت بتديها لأولادهن وبناتهن ؟
لكن دايرة اسألك انتي ليه رغم كل شي ما كرهتي أمي
خديجه : يا بت هااا أنا الحمد لله ما بكره زول واي نعم أمك كانت بتجرحني بكلامها بس في النهاية مرا كبيرة ، وأنا عارفة انو اي شي كانت بتعملو كان نتيجه لتربية معينة ومعتقدات ماشين بيها ناس زمان ودا بشوفو في أمي برضو عندها حاجات خط أحمر يعني ما حاجة بارادتهم
منى : والله انتي ماف زيك وجد أمي ظلمتك والزبير اختار والله
خديجه : يا بت أنا أمي موصياني والكلام دا حاقولو ليك تعملي بيهو ولو ربنا مد في الاعمار برضو حاوريهو لبناتي ، انو البت لمن تجي بيت زوجها بتعكس تربية بيتهم في كل كلمة وفي كل فعل
يا عكستي حاجة كويسة يا اتحامقتي وعكستي حاجة كعبة ، وأنا أمك دي عافية ليها دنيا واخرة وربنا يقومها بالسلامة ان شاء الله
منى بصوت مخنوق من البكا : ربنا يجزيك خير على قدر ما بتجبري بخاطر الناس
خديجه : امين جمعا
هسي سعاد هينة لانو شكلها بتتقاوى بمرام ممكن استفرد بيها وانصحها ، وكمان الليلة ماشة لابتهال اشوف مشكلتها شنو عيب ليها قريب شهر ، يمكن لو رجعت لأحمد ربنا يهديهو لانو بريدها وبسمع كلامها
منى : اي والله طولت يا ربي مالم ؟! مع جوطة أمي نسيت موضوعها
خديجه : هسي يتلقي سوء تفاهم بسيط ، كدي لمن امشي واجي اشوف بحصل شنو
منى : ان شاء الله
خديجه : ماعارفة هل الموضوع دا وقتو هسي ولا لا
بس سمعت انو الهادي ود حسن طلق سماح وحصلت بيناتهم مشكلة كبيرة
منى : ربنا يصلح حالهم اصلا أنا زماااان طلعتهم من راسي وبقا ما بهمني امرهم
خديجه : عجبتيني صراحة يا منى وربنا يكملك بعقلك ويديك ود الحلال ان شاء الله
منى : امين
استمرت ونستهن لفترة بعدو خديجة استأذنت عشان تمشي تزور ابتهال
ومنى كمان مشت على اشغالها ....
_______
في بيت ابتهال .....
أهل ابتهال استقبلو خديجة كويس واتونسو معاها حبه ، بعدو جاتها ابتهال سلمت عليها وبقو يتونسو كلهم ، مرت دقايق وطوالي أبو ابتهال وأمها مشو خلوهن براهن عشان يأخدن راحتهن ....
خديجه : كيفك عليك الله ؟ وكيف حالك ؟ ودي شنو الغيبة دي ؟
ابتهال : والله الحمد لله ، انتو كيفكم ؟ والبنوتات كيف مع القراية ؟
خديجه : والله الحمد لله كلنا كويسين ، ياهو نقابض مقابضة للمزاكرة تعب شديد ههههه هسي الليلة ماشة اجيب النتيجة نشوف حاصل فيها شنو هههه
ابتهال : ربنا يوفقهن ان شاء الله
خديجه : اها وانتي مالك صحي ؟
ابتهال : أنااا مالي ؟!
خديجه : أنا والله معتبراك أختي الصغيرة وجيت دايرة اسمع منك وكمان دايراك في طلب
ابتهال : اتفضلي !
خديجه : اول شي مالك ما رجعتي البيت لهسي ؟ حاصل شنو ؟
ابتهال : والله ما اكضب عليك ، لكن أنا وأحمد شوية مختلفين
خديجه : شوية شنو يا بت ليكم قريب شهر ؟ دي مشكلة شنو الخلتكم تبعدو قدر دا ؟!
أنا ماعاوزه اعرف الحصل بيناتكم لانو دي حاجات خاصة وانتو ادرى بيها بس جيت اوريك الحاصل لأحمد
ابتهال : مالو !
خديجه : لا هو ما فيهو شي ما تخافي ، لكن حاصلة مشكلة كبيرة في البيت والبيت حيتقسم شكلو ولسه الامور ما اتضحت
ابتهال : وبعلي دا كلو حاصل ! وست النفور وين ؟ مالها ما حسمت الموضوع زي كل مرة ؟! تلقيها مرقتكم من البلد بالنقة والكواريك ههههه
خديجه : ست النفور وووين يا ابتهال انتي ماعارفة حاجة ؟! ست النفور من يوم السر واسعد جابو ليها خبر القسمة وهي ما ضاقت عافية كل يوم ضغطها مرتفع وجارين بيها المستشفى ومرة كانت حتبلع لسانها عديل وكلام ما بتتكلم
ابتهال : لا حول ولا قوة الا بالله ، ست النفور الواحدة دي ما غيرها ؟
خديجه : اي والله حالتها تحنن الصدمة داخلة عليها دخلة شينة وبقت ما بتتكلم نهائي تتكلمي بعاها تهز ليك راسها وحالتها ما بتطمن الله يستر بس
ابتهال : لا حول ولا قوة الا بالله وأولادها وين ما يعالجوها ؟!
خديجة : صلاح ومنى واقفين فيها ومتابعين مع الدكاترة ، بس اسعد والسر بعمايلهم بزيدو في حالتها سوء ؛ مصرين اصرار شديد يقسمو البيت وهي من تسمع سيرة القسمة تتعب غايتو ما عارفة دا ابتلاء ولا دا شنو ؟! قلوبهم بقت قاسية شديد على أمهم ، اما الزبير دا أنا زاتي تعبني يوم يسمع ويوم يطنش
ابتهال : للدرجة دي يعني حالتها كعبة ؟! اصلي ما قادرة استوعب !
خديجه : يا بت اسوء بقت ما واعية تهذي بالليل وتمشي تحوم الحيشان دي وتتكلم بكلام غريب وكم مرة ومرة قبضوها من الشارع ، بقينا نقفل البيبان عديل لمن نجي ننوم عشان ما تغفلنا وتمرق ، دا كلو كوم ويوم قبضناها تاكل في صابون الغسيل
ابتهال : اجي كيفن الكلام دا ؟!
خديجه : والله زي ما قلت ليك قرشت ليك صابونة الغسيل دي زييييين زي البتاكل في أكل الا جينا قلعناها انا ومنى منها ، واي شي جمبها تدخلو في خشمها
ابتهال : سجمي يا دي ما تكون جنت أولادها ديل ما يشوفو ليها صرفة دكتور نفسي او اي شي
خديجه : صلاح شاف ليها دكتور والله وما قصر بس الباقين خاتنها مستهبلة وبتعمل حركات عشان يخلو الموضوع بتاع القسمة
_ دا كلام شنو يا ود بطني ؟خلاص بقيت تشوفني كعبة ؟
اسعد : أمي عليك الله الدنيا ليل ما ناقصين حركات
الزبير : خشو خشو ما تقدونا كرهتونا البيت دا زاتو الزول لا يقدر ينوم لا يرتاح اليوم كلو انتي وبتك تكوركن
_ سامعة يا منى سامعة ؟ البخليني اقعد مع ديل شنو
كرر يا ست النفور خسارة الولادة وخسارة التضحية بعد بقيتو رجال جيتو تتقاو فيني ؟ حسبي الله ونعم الوكيل فيكم يا ما نافعين
اسعد : ياخ اتقي الله انتي شنو الما ساواهو في الدنيا دي نحن ديل فترنا عديل من القعاد معاك عاوزين نرتاح من النقة الكتيرة دي ياخ ارحمينا
منى : دا شنو يا جماعة انتو نسيتو نفسكم ولا شنو ؟ دي أمنا ؟!!!
صلاح : عيب عليكم البتسوهو دا ؟ دي أمك يا زول ؟!
السر : ما عشان هي أمنا نحن ساكتين للان ، بس خلاص زهجنا وقرفنا من نقتها الكتيرة والمشاكل الما بتخلص
_ بري بري يا السر بقيت ما ولدي البعرفو !
الزبير : يخوانا خلاص اي زول يمش بيتو
_ ماني متحركة من هنا ، انتو نسيتو نفسكم ولا شنو ! أنا الضحيت عشانكم وعشان تكبرو بعت دهبي وبعت الدنيا عشان تبقو رجال تشيلوني لمن اكبر وتسندوني لمن اميل ، لكن كسرتو ضهري الله يأذى اليوم الجبتكم فيهو
السر : ياخ السيرة دي حفظناها حفظ وما دايرين منك اي شي تاني بس ادينا حقنا وخلاص ، ماف زول قادر يعيش معاك افهمي ياخ !
_ كلهم عاوزين يعيشو معاي أنت براك الما عاوز اطلع طوالي
السر : يعيشو شنو ياخ اتقي الله يا شيخة ! الزبير كرهتي مرتو وبناتو بكلامك الحار ، أحمد طفشتي مرتو من البيت وخليتيهو مجهجه في بيتو وادخلتي في حياتهم خربتيها ، اسعد ممشياهو على كيفك وهو المسكين عشان رضاك يعمل الدايراهو كلو ؛ طلقتي من المرا المسكينة دي زمان ، وهسي قريبات دي كنتي دايرة تقتلي بناتو وبرضو ساكت وما اتكلم ، احفادك البتقولي عليهم احفادي ديل علمتيهم الجفا بقو بخافو منك ، حصل سمعتي باحفاد بكرهو حبوبتهم ؟
وأنا اول شي مدخلة في حياتي من عرسي ولحدي اسي لشغلي دا اخترتيهو لي انتي ، صلاح بسبب كلامك طفش من البلد دي الا جا بالحناسة وهسي تلقيهو ندمان انو رجع ، منى منعتيها من الجامعة وبقيتي مقعداها جمبك بس تخدم فيك اليوم كلو وبعد دا تجي تقولي ضحيتي ؟!
بعد كلام السر حصلت سكتة مخيفة بعدو ست النفور بقت تبكي
_ احي يا الله جا اليوم الاولادي يقيفو ضدي ربنا ينتقم منكم حسبي الله ونعم الوكيل
مشت على السر بغضب وبقت تلز فيهو بيدها وبتقول :
_ اطلع من بيتي قوااااام ، اطلع انت ومرتك ما عاوزاك ولا عاوزة اشوفك تاني ، لا ولدي لا بعرفك
منى وصلاح كانو بحاولو يهدو في الموقف بس الباقين كانو بس بتفرجو زي العاوزين دا يحصل !
وفي لحظة غضب السر لز أمو لحدي ما رجعت لورا
منى في اللحظة ديك مسكتها
كلهم بقو مهجومين وصلاح هجم على السر وبقو يتضاربو لمن بقا فيها دم
صلاح : دي أمك يا بليد !
الزبير والباقين حجزوهم من بعض
ست النفور بقت تصرخ : اخر الزمن بقيتو تضربوني زي الشافع ؟ احي يا الله وب عليك يا ست النفور اريتني لا ولدت لا كبرت لا شلت اريتني مت قبل ما اشوف الشوفة دي
السر : ما بطلع من البيت دا لانو عندي فيهو حق
الزبير : خلاص يا جماعة الموضوع دا انتهى اي زول يمشي بيتهم
" بعد نقاش طويل اتفرقو على بيوتهم "
______
منى كانت قاعدة جمب أمها الكانت بتبكي بحرقة
_ احي يا منى أنا ما قايلة أولادي بكرهوني !
أنا كان ما رايداهم ما بخليهم يسكنو معاي ، أنا دايرة لمن أموت يكونو جمبي لكن شكلي ما ربيت احي يا شبابي الراح فيكم وجيتو كسرتو ضهري ، أنا أولادي يضربوني ويعلو صوتهم علي زي الشافع ؟!
منى بس بتبكي وقاعدة جمب رجلين أمها
* أمي عليك الله ما تبكي
_ انتي صحي أنا ظلمتك لمن حميتك الجامعة ؟ وصحي أخوانك ديل بكرهوني ؟
* يا أمي ما تقولي كدا أنا عافية ليك كل شي ، وعارفة انك ما عملتي شي الا لمصلحتي
_ احي يا الله ان شاء الله أموت قبل ما يجي اليوم الامرق فيهو من بيتك يا الهادي
يا الهاددددددي ما شفت أولادك عملو فيني شنو ! حليلك أنت الخليتني براي ، حليلك يا الحنين الخليتني برايييي
الليلة أول مرة أحس بالضعف ، حاسة نفسي ما عندي أولاد حليلك يا الهاددددي تجي تشوفني وتشوف أولادك البقو يدقوني وينهروني زي الشافع الصغير، حليلك تشوف باعو شقا عمرنا البنيناهو طوبة طوبة حليلك يا الهادي ، الله ياخدني قبل ما امرق من بيتك يا الهادي الله يقتلني يريحني من الهم دا
* يا أمي ما تدعي على نفسك عليك الله
_ احي يا منى احي قلبي واجعني يا منى يا بتي قلبي واجعني شددددديد
استمر بكاء ست النفور ومنى لفترة طويلة ، لأول مرة تنكسر قدام الكل وتظهر دموعها ، بالرغم من انو كانت بتبكي كتير في السر بس ما حصل اظهرت ضعفها قدام زول ، قضت ليلتها ديك بالبكا والنواح
______
في جهة تانية ...
مرام والسر ...
* كان عاوزه تطلعنا من بيتنا اجي ؟ أمك دي غايتو شكلها خرفت
_ مرام أنا أخلاقي في نخرتي نومي وخليني أنوم
* سمح سمح سكتتت
_____
اما خديجة والزبير ...
منى : معليش زمنكم غير زمنا
_ زمنكم زمن اليابا والله ، كدي امشي جيبي لي موية سكر باردة جابو لي هبوط الله ياذاهم
منى : حاضر
منى مشت جابت موية السكر ادتها أمها وبقت قاعدة جمبها .
اما ست النفور فكانت زعلانة شديد وتشيل وتدعي
__
ناس السر مشو مع المحامي عملو اللازم وفضل كم اجراء قانوني بينتهي بعد كم يوم كدا وبعدو البيت يبقى كلو باسمهم ....
رجعو وهم مبسوطين ، وتاني ماف زول جاب سيرة للموضوع دا
يتبع ....
ان شاء الله خير
______
اما ست النفور فكانت قاعدة وتفكر في موضوع تاني خالص سرحت وهي بتفكر ...وبقت تقول في قلبها :
" يا ربي فطين بتكون داسة ورق الارض والبيت وين ؟ "
قاطعها صوت منى وهي بتقول :
* أمي هاك اللبن
_ ختيهو في التربيزة
* حاضر
_ انتي يا منى عمتك الله يرحمها لمن جات جابت معاها شنو ؟
* ااا جابت كيس خيش كدا وفيهو هدومها كان شايلو ليها عم عباس
_ كدي جيبيهو لي
* حاضر لكن ليه ؟!
_ انتي بس جيبيهو
منى مشت جابت الكيس وكلها دهشة ...أمها شالت الكيس وبقت تنكت لقتو كلو مليان هدوم
_ متأكدة بس ديل حاجاتها ؟
* اي ما جابت شي غير هدوم
_ طيب شيلي شيلي رجعيها قلبي اتقبض جني وجن هبيش حاجات الميتين
* حاضر
ست النفور بقت تفكر وتقول في قلبها :
" تكون ودت الحاجات دي وين يا ربي؟ غايتو يا فطين لا ريحتينا وانتي حية لا انتي ميتة "
______
في بيت ابتهال ...
هنادي : عاد ست النفور الله لا كسبها ما شفتيها جنس افترا ، وطبعا سالتني منك وعدم جيتك دي حرقتها في قلبها خاصة لمن قلت ليها اسالي أحمد ههههههه
* وب علي يا ماما تاني البحلني منها شنو كلمتك اخير امشي
هنادي : ما تشتغلي بيهم ديل ناس معقدين ، اوع يعلموك عقدهم دي
* طيب الجا منو؟ ولقيتو منو معاهم !؟
هنادي : بري لقيناهم براهم
سكتت شوية بعدو قالت بصوت واطي ومتحفظ :
* وأحمد لاقيتوهو !
هنادي : اها رجعت حليمة لعادتها القديمة ! خلاص حنيتي يختي ؟ اي لاقيناهو الغتيت يعاين لي ساي ولا هببتو شلت الفاتحة مع النسوان وقعدت بعيد ..لكن شايفة أبوك بتكلم معاو
* ماعارفاهو قال ليهو شنو ؟
هنادي : مالنا ومالو يقول الداير يقولو ، اسمعي هنا بطلي هبالة وركزي في خطتنا وبكرة من الصباح تلبسي توبك تمشي عادي تعزي زي الضيفة تقشري وتمشي فاهمة ؟
* اجي القشرة شنو في بيت البكا ؟
هنادي : مششششم انتي من زمن الناس بتمشي مخلوعة ولافحة توب من طرف ؟! يا بت ها بقو وحات الله يجوك ممكيجات ، وست النفور دي زاتها لمن جات عزتني في عمتي الا الريحة شاماها من باب الشارع
* سمح بمشي بكرة ان شاء الله
هنادي: اوع تحتلي ضيفة بس البركة فيكم والفاتحة وتقولي أمي منتظراني ماشين حته وتتخارجي
* حاضر
_____
أما خديجة والزبير ....
* ربنا يرحمها والله ميتتها سمحة نطقت الشهادة ربنا يذكرنا الشهادة ان شاء الله
_ اي والله، أمين
* يحليلها منى ولفت عليها غايتو اخدت اجرها طيلة ماهي معتنية بيها
_ اي لكن كلو لخير ، كدا الشفقة البعملو فيها أخواني بخلوها بعد بقا البيت كلو حقنا ان شاء الله بس جماعة عباس ما يطمعو
* ما ظنيت لانو لو دايرين قروش كان من زمااان جو طالبوكم وقلعو نصيبها ، وهسي عزو بالتلفون وماف زول جاب سيرة
_ ان شاء الله بس ربنا يستر
* امين
انتهى اليوم على ناس البيت بهدوء وكان الحزن مخيم على اغلب افراد الاسرة
_______
الصباح ...
بيت الاسرة اتملا بالضيوف العاوزين يعزو ...كانو كلهم قاعدين في امان الله لحدي ما ظهرت ابتهال وسط النسوان وبتشيل في الفاتحة
ست النفور اتفحصتها بنظرات كلها وعيد بس ابتهال ما ادتها اهتمام وبقت تشيل الفاتحة مع الموجودين ،
لحدي ما وصلتها شالت معاها الفاتحة
قعدت بالجمبة زي الضيفة والنسوان يتوشوشن
جابو ليها الموية شربت حبة وطوالي وقفت على حيلها
** معليش يا خالتي أمي دي منتظراني في العربية ماشين مشوار
ست النفور عاينت ليها باستفزاز وقالت :
_ امشي ساي اصلك ما جاية عزا ولا طارياهو شكلك
ابتهال طوالي ودعت ناس البيت ومرقت ..لاقاها أحمد جمب باب الشارع عاين ليها نظرة عتاب بس هي ما ادتو اي تعبير في وشها وقالت :
** أحمد البركة فيكم في عمتك وان شاء الله اخر الاحزان
_ اللهم امين مفتكرك رجعتي !لكن شايفك مارقة !
** وارجع ليه ؟ أنت جيت قلت لي ارجع ؟مش جدعتني ولا سألته عني !
_ لسه مصرة انو أنا الغلطان !؟ عارفة مشكلتك شنو ؟! انك بتسمعي كلام أمك وحتخربي حياتنا كدا وطالما دخل فيها زول تالت معناها عمرها ما حتتحلا
** أمي مالها يا أحمد ؟ وبعدين منو القال ليك عشان كلام أمي ؟ أنا خلاص تعبته من العيشة دي انت المفروض تفهم انو أمك دي ما زولة عشرة وماف زول بقدر يعاشرها ولا حتى يسكن معاها ، حياتي كلها معكرة بسببها ، انتو عاملنها محور الكون وهي ممشياكم على هواها اي نعم هي أمكم وواجبكم انو تهتمو بيها ماعندي مشكلة بس ما ممكن تمشينا نحنا زاتنا على هواها
_ وأنا ذنبي شنو ؟ أنا مقصر معاك في شنو ؟
** هسي ما وقت نقاش وشايف براك ناس البكا يلا أنا بستأذن مستعجلة
_ كويس يا ابتهال ان شاء الله ربنا يهديك وننسى الحصل ونكمل
** ربنا يهدي الجميع
ادتو نظرة ما بتقل عن نظرتو المعاتبة وبعدو مشت
_____
في جهة تانية ست النفور بقت تهرج
_ عاينيها عديمة الحيا جاتنا لابسة الأحمر والأصفر في بيت البكا الما بتخجل
مرام : بالغت النصيحة كان اقل شي تقعد حبة ما تمشي طوالي الرفع ما رفعوهو
منى : ماقالت عندها حاجة يمكن ...
_ يا بت منى برا يمكن برا قرف معاك والله جيتها دي ولا تعتبر جية وأنا خاتاها ليها المعفنة ، وخليها مر
#وصية_الشيخ_الهادي
بقلم: أمل طارق
الجزء 12
منى بقت تكورك لناس البيت عشان يلحقوها
جوها جارين كلهم ...لقوها قاعدة جمب عمتها وتبكي
* صلاح مالها يا صلاح ؟!
نفسها متقطع من قبيل ارح نوديها الدكتور يا صلاح !
صلاح من خلال خبرتو في الحالات دي عرف انو فطين بتحتضر بس ما وراهم وفضل ساكت ...مشى قعد جمب راسها وبقا يلقنها في الشهادة
وسط بكاء منى والحاحها عليهو وهي بتقول :
* يا صلاح مالك قعدته!؟ قوم قوم نوديها الدكتور
اما الباقين فكانو مخلوعين وساكتين بس ... خديجة طوالي ساقت الشفع ودتهم بيغادي عشان ما يخافو
والباقين بس بقو قاعدين بيحاولو يلقنو فطين الشهادة ...
وبحمد الله نطقت الشهادة وانتقلت الى رحمه مولاها
منى بقت تبكي وتصرخ ...وصلاح بيهدي فيها
_ يا بت منى ادعي ليها بالرحمة والمغفرة بطلي البتعملي فيهو دا خوفتي الشفع
يلا يا جماعة بعد كدا اطلعو لحدي ما نشوف حنعمل شنو !
طلعو كلهم وهم برددو "انا لله وانا اليه راجعون "
_____
مرت الساعات لحدي ما انتهت مراسم الغسل والدفن وغيرو ....حوش البيت اتملا بالنسوان وفجأة بعد ما كانو صابرين يجوهم نسوان من الجيران يقلبنو صريخ وكواريك ...
ست النفور طوالي نهرتهن وقالت :
_ هي هاااا انتن بطلن البتعملن فيهو دا ، اقرن ليها قران ولا ادعن ليها برا كلاااام فااارغ ، تلقيكن ما حافظين المعوذتين زاتو !
النسوان طوالي قامن على حيلهن وخلن الدردقة وقعدن بهدوء
ست النفور كانت قاعدة في عنقريبها وجمبها منى وحولينهن النسوان قاعدات
وجهت كلامها لمنى وقالت :
_ ابتهال وينها يا بت ، الناس تقول شنو ؟
منى ردت وسط دموعها :
* بتكون ما عارفة
_ قومي اضربي ليها بلا ياخدها
* حاضر
منى مشت اتصلت على ابتهال وكلمتها وبعدو جات راجعه ...وياهو اليوم مر مع العزا والناس ودخلة ومرقة
______
في جهة تانية في بيت ابتهال ...
_ وب علي وينو توبي ؟
* مالك يا بت ولابسة توبك ماشه وين؟
_ عمة أحمد اتوفت ، وشكلو ماتت من قبييييل لانو دفنو
* الله يرحمها ، وانتي يختي مالك متلبسة ماشة ليها شنو ؟!
_ كيف يعني ؟الليلة بياكلو لحمي معقول لمن يدفنو أحمد ما يوريني ؟!
* راجلك الفقري دا غتيت كان يوريك لكن اسمعي هنا من محلك دا ما تتحركي حامشي أنا وأبوك نعزي ونجي
_ اجي يا ماما كيف ما امش!؟ والله يعملوني لبانة
* كدا ، مش ما وراك أحمد خلاص ما طالبك عزا وحماتك أنا بتصرف معاها بقول ليهم عيانة راقدة وبتجي بكرة ولا اي يوم بتصرف
_ لالا اخير امشي
* لالا أقعدي أنا عارفة راجلك المستهبل دا يغشك بيجاي بيجاي تتهابلي ترجعي قبل ما نتم البديناهو
_ يعني اخليهم في وقت زي دا وهم محتاجين لي؟
* يا بت ها محتاجين شنو ديل ولا فارق معاهم انها ماتت تلقيهم فرحو هسي البيت بقا حقهم انتي ما فاهمه شي اسمعي الكلام واقعدي قبلك
_ حاضر حاتوكل بس ربنا يستر
______
الليل جا والناس بدت تخف والبيت بقا شبه فاضي ...وبقو ناس البيت بس الموجودين
كانو كلهم متلمين في الحوش الكبير حولين ست النفور ....
ست النفور عاينت للكل نظرة تفحص كدا بعدو قالت :
_ انتو وينا ابتهال ؟مش كلمتيها يا منى ؟
ردت منى :
* اي كلمتها
_ أحمد !مرتك دي مالها ؟
أحمد : هااا مالها ؟! ، أنا والله مع اللخمة نسيت اكلمها
_ افرض انت نسيت ، كلمتها منى ولا شنو ؟!
مرام : عاد بالغت لمن دفنو هي ما تمد راسها ولا حتى تضرب تعتذر !
منى : يمكن حصل ليها ظرف يا جماعة
_ وانتي مالك قال بتدافعي عنها ؟ بري بت السواد لا بتعرف الواجب لا بتعرف الاصول
صلاح : يا جماعة عليكم الله اسكتو نحنا ميت لينا زول تقعدو تتشاكلو تضحكو فينا الناس ؟!
_ سكتتت
في اللحظة دي دق الباب .....
صلاح : اتفضل !
""جو داخلين أبو ابتهال وأمها ""
هنادي : السلام عليكم يا جماعة
صلاح : وعليكم السلام اتفضل
أبو ابتهال : الفاتحة
شالو الفاتحة كلهم على روح فطين وبعدو سلمو وبقو قاعدين ...
_______
ست النفور : انتي يا هنادي ابتهال دي ما كفاها خليها تجي
هنادي : بري ما ماسكاها لو دايرة تجي التجي بس هي زعلانة قالت
ست النفور : تزعل لشنو ؟
هنادي : اسألي أحمد بري أنا زاتي ماعارفة
ست النفور : ايوا قلتي كدي ! سمح
وبقن قاعدات يحمرن لبعض
______
أبو ابتهال مشى قعد جمب أحمد وبقو يتكلمو ...
أبو ابتهال : يا أحمد يا ولدي ياهو دا حال النسوان كلنا صابرين ناقصات عقل كبر عقلك انت
أحمد :يا عمي أنا ما عندي مشكلة ترجع ولو الليلة دي قالت بترجع بدور عربيتي وبرجعا بنفسي معززة مكرمة وننسى الحصل كلو ، لكن بتك ما عاوزة
أبو ابتهال : اي عارفها ، أنت سايسها والله تاني تغلط أنا دا أكون مشاكلها ، بعدين الناس ما تقيف في اي شي ، كدا الحياة ما بتستمر وانتو لسه في بداية حياتكم لو من هسي عملتو كدا بعدين حتعملو شنو ؟
أحمد : والله يا عمي كلامك دا كلو على العين والراس وأنا بس تروق الامور دي شوية وتروق أمور البيت دي شوية واجي اسوقها ، ومنو زاتو تكون راجعت نفسها
أبو ابتهال : ان شاء الله يا ولدي ربنا يصلح بيناتكم
أحمد : أمين
فعلا جا شافها وطوالي ساقوها المستشفى ...كشفو عليها وعملو ليها تحاليل وادوها خافض للحرارة وبعدو رجعو البيت
طول الليل فطين كانت بتهلوس وبتهذي وبتخلع منى بكلامها الما مفهوم ...
عدت الليلة ديك صعبة شديد على منى الما قدرت تنوم وكمان على فطين
______
في جهه تانية سعاد واسعد كانو بتناقشو ...
* يا اسعد هسي حنعمل شنو ؟! حننسى الموضوع ؟
_ لا طبعا أنا حاتكلم مع السر ونشوف حنبقى على شنو
* اي حاولو أنا اتعشمته والله ، وبعدين ما تزعل مني فترته ياخ من المشاكل ومن كلام أمك الحااااار وبناتي زاتهن فترن
_ ان شاء الله خير
______
اما مرام والسر ....
غايتو أختك منى دي فقرة فقارة لو سكتت الموضوع دا بمشي تمام التمام
__ منى شنو كمان التدخل دا كلام رجال ما عندها شغلة فيهو
تاني لو اتكلمت اديها في راسها اوع تسكت ليها انحنا ناقصين كمان !
__ المشكلة هسي في أمي دي
أمك ما مفروض تقيف ليكم في حقكم ، تقيفو كلكم وتختوها أمام الأمر الواقع
__ الا كدا هسي تقريبا كلنا متفقين
اي والما موافق بطريقتو قلبنا انقطع انحنا من النبحي والمشاكل والمهاترات ، والبيبي كمان الفي الطريق دا ان شاء الله يكون وشو حلو علينا وتتحل ويربى في البيت الجديد
__ ان شاء الله
** طبعا ما وريتك طلعت صور رهيبة من الفيس ، بيوت عارضنها للبيع شوفها عشان بعدين نعزل منها
__ طيب جيبيها
مرام والسر اخدو ونستهم وبدو يحلمو ببيتهم المستقبلي وبالعز الحيعيشو فيهو لو اتقسمت الورثة
______
اما خديجة والزبير ...
* يا الزبير أنت الكبير الواعي وعي أخوانك ديل ما صاح
_ والله أنا ما شايف فيها حاجة ، وانتي مالك فجأة بقيتي عاوزة القعدة مع أمي ؟ ما ياهو من عرسنا ما ضقنا منها غير المهاترات والشكل
* أنا ما عاوزة القعدة بس خايفة من الحيحصل ، انتو كأخوان حتتفرزعو وماف زول حيجيب خبر التاني ، وغير كدا قروش الورثة مهما كانت كتيرة بكرة تكمل ويقعدو يتلفتو وخاصة انو وضعهم في الشغل ما تمام وعندهم الاولاد ولسه مشوار ، هنا اقلاها بتتشايلو المعيشة ومستورة
_ والله أنا ما مقتنع بكلامك دا ومتاكد انو احسن لينا القسمة
* والله براحتكم لكن الموضوع دا بالذات ما بستحمل مهاترات عاوز الناس تبقى متفاهمة واقعدو فيهو براحة أول شي اقنعو أمكم وبعدين اعملوهو وياهو ترا كدا كدا كان حيتقسم
_ صاح كلامك في دي ، والله أنا زاتي بقيت ما عارف الصاح شنو والغلط شنو المهم نتخارج
* ربنا يقدر الفيهو الخير
_ أمين
________
أما أحمد فكان راقد في الحوش وبتذكر في كلام ابتهال القالتو ...قلبو اتقبض للحظات لمن اتذكر اسلوبها معاو كان كيف ، كان كل ما يعاودو الحنين ويمسك التلفون عشان يضرب ليها يتذكر كلامها وطوالي يقفلو ...
في النهاية قفلو ونام
______
أما ابتهال فكانت حالتها ما بتقل عن أحمد، كل ما قلبها يحن ليهو وتمسك التلفون عشان تعتذر تتذكر كلام أمها وطوالي تخليهو ، كانت حاسة باحاسيس ملخبطة من شوق ، خوف ، كبرياء ، وعناد ....
انتهت ليلتها ديك وهي نايمة جمب تلفونها وفاتحة الشات على أخر محادثة بيناتهم ....
______
الصباح ....
منى صحت من النوم عاينت لسرير فطين لقتو فاضي ...خافت شديد وطوالي اتنفضت ...بقت تفتش عليها وما لقتها ، لاقتها أمها في الحوش
قالت ليها :
_ هي يا بتي مالك مهجومة كدي ؟
* فطين وين يا أمي ؟
_ بري ما بعرفها بتكون بيجاي ولا بيجاي حتكون مشت وين مثلا ؟!
* ماعارفة أمس كانت محمومة شديد الا وديناها أنا وصلاح المستشفى
_ بري ما صحيت بيكم
* اي سقناها قريب لوحدة صباحا كنتي نايمة
_ ايوا ، خلاص كوسيها خليها تجي تترزع خلتك تتشاقي لمن عضامك ظهرو وموية وشك اختفت كرر علي
* كدي بشوفها في العريشة
اتحركت منى نحو الجزو التاني من البيت وبقت تفتش وعينها جات واقعة على فطين الراقدة في الارض جمب باب الشارع
كانت الشمس حاااارة شديد ...استغربت وقالت في قلبها :
* وب علي راقدة في الحر دا كيفن ؟
وطوالي مشت عليها رفعتها وودتها الغرفة ...
ادتها تأكل وبعدو نادت صلاح جا كشف عليها وطمنها أنو اتحسنت ، وطوالي طلع على شغلو
________
في جهة تانية سعاد ومرام اتلمن على بعض وبقن يتونسن ويقطعن سوا ...
سعاد : انتي يا دي ابتهال وينها ؟ومالو أحمد اليومين دي ما عاجبني
مرام :بري وحات الله خايفة يكون طلقها
سعاد : قولك كدا ؟
مرام :اي يا اما أمها اللسانها طويل دي تكون سمعتو كلام ، انتي ما بتعرفيهو زول ونسة وضحكة هسي يحليلو مهموم وساكت
سعاد : اي والله ، هن لاقياتنو وين عليك الله ؟! صابر عليها وهي ما بتلد
مرام : لالا اصبري لي اصلا عندي ليهو عروس
سعاد : سجمي ! انتي جادة؟
مرام : اي جادة مالو ود خالتي وانا زي اختو بفتش ليهو عروس زي الورد
سعاد : بري أنا لا معاك لا شي ، شي ما برضاهو لنفسي ما برضاهو لغيري وابتهال ما شفت منها شي عشان اخرب بيتها
مرام : انتي بس اطلعي منها أنا بتصرف
سعاد : اها والسر قال شنو بعد كلام أمو ؟
مرام : بري مصر على موقفو شديد وقال بعدين في الغدا تاني حيفتح الموضوع