Telegram-канал sudanes0 - ارث سوداني: Unsorted

ارث سوداني

12 May 2019 09:47

الشريعة السودانية:
يا زول أنا ما دايرك تصلي بي, أنا داير كهربا , داير موية, داير تعليم, داير صحة, موضوع ربط الشريعة مع الحكومة ده موضوع غريب وانا ما فاهمو.
حا أحكي ليكم قصص خيالية حصلت كتير جدا في السودان(حصلو لي حكاهم لي زول):
القصة الأولى:
في معاينة لمهندس كهرباء في أحد المؤسسات الحكومية السودانية, سألو المتقدم للوظيفة:
1- حافظ قدر شنو من القرآن؟
2- من هو اصغر قائد في الاسلام؟
3- سمع اية الكرسي؟
وبعد ما يسمع آية الكرسي و بغض النظر عن مقدراتو في المجال الكهربي يقبلوهو عشان يشتغل في أجهزة اشتروها من بلد غير مسلم,و اخترعها وصنعها نظام هندسي أجنبي ما سجد لله سجدة. ويجيبو المهندس الاجنبي الكافر ده, عشان يدرب أولادنا و يصين الأجهزة لما تبوظ.
.
القصة الثانية:
في معاينة لوظيفة طبية سودانية, سعادتو خالد بيسأل الطبيب المتقدم للوظيفة:
1- صليت الصبح الليلة حاضر؟
2- سمع لينا آيات من سورة الواقعة؟
وبعد كم سنة سعادتو خالد, يتعب و صحتو تتدهور, وما يرضى زول يعمل ليه العملية, إلى يسافر لبلاد كافرة ويعمل ليه العملية كافر اجنبي ما سجد لله سجدة.
….
قريت القصتين الفوق ديل؟ اقراهم تاني لما زول يقول ليك حكومة و شريعة واسأل نفسك التلاته اسئلة التالية:
1- وانت خاشي الطيارة اذكر اهم تلاته مهارات بتتمنى انو كابتن الطيارة تكون عندو, إذا كان انو يكون حافظ سورة معينة من القرآن واحدة من المهارات دي, أنا بعذرك وانت بتتكلم عن ربط الشريعة بـالحكومة.
2- وانت راقد في غرفة العملية, عملية قلب مفتوح, حياة أو موت, اذكر تلاته علوم أو قوانين عاوز الجراح يعتمد عليهم أثناء العملية. إذا كانت الشريعة واحدة من العلوم فانا بعذرك لما تقول لي حكومة و شريعة.
الاسئلة الفوق دي حارة شوية فيها حياة و موت, كدي خلينا نديك السؤال التالت, سؤال خفيف وخلينا نشوف تمسكك بإدخال كلمة الشريعة في العندو علاقة والما عندو علاقة قدر شنو:
3- العامل الحا يعمل ليك سيراميك الحوش في بيتكم, اذكر ثلاثة حاجات عاوز تعرفهم عنو عشان توافق انو يزبط ليك سيراميك البيت؟
…
جاوبت الاسئلة الفوق دي بكل صراحة؟
يلا أنا بتمنى في الحكومة الجاية دي يكون في وزير كهرباء بعرف كهربا وإدارة, وزير صحة بعرف صحة وإدارة, وزير إعلام مهني بعرف إعلام وإدارة, ووزير اقتصاد بعرف اقتصاد وإدارة....
الوزراء الفوق ديل كان صلو الصبح ولا لا ؟ كان مشو الجامع ولا لا ؟ كان حفظو القرآن ولا لا ؟ أنا بالنسبة لي والبهمني, إني عاوزهم يهيئوا لي و يهيئوا لي اخواني السبل والظروف البتخلينا نقدرنصْلي الصبح حاضر, و يهيئوا لينا السبل عشان نقدر نمشي الجامع , يهيئوا لينا السبل عشان نقدر نحفظ القرآن ونصوم.
الحكومة ما مهمتها ولا حا تقدر اصلا انو تدخلنا الجنة, الحكومة مهمتها انو تهيء لينا السبل والظروف وتدينا حريات عشان نقدر تنفكر و بالجد نقدر نصل لعلاقة حقيقية مع الخالق.
قلت حقيقية ليه؟ وقلت حريات ليه؟ عاوز تعرف ليه قلت الكلمتين ديل؟ وعاوز تعرف كيف الحكومات ممكن تشوه الأديان؟ اقرا الجملة التحت دي؟؟
الله أكبر…
حسيت بي شنو؟ إذا اتربيت زيي في نظام الانقاذ فغالبا, حتكون كوركت وانت بتقراها, وما حتكون حسيت بي حاجة وانت بتقرا الجملة الفوق دي لانو الجملة الفوق دي بقت شعار حكومة استخدمت الشريعة السودانية عشان تعطل بيها أغلى ما نملك… مخنا.
الله أكبر…
ربنا سبحانه وتعالى أكبر واعظم واجل من كل شي ممكن يخطر في بالي, اكبر من اعدائي, اكبر من مشاكلي, اكبر من ظروفي, أكبر من أي حاجة ممكن تشغل بالي, عشان كده ممكن اشتكي ليه أي زول مهما علا, أي هموم مهما كبرت واي ظروف مهما صعبت. وانا بتذكر الحاجة دي في حضرتو عشان ما يشغل بالي وما يملأ نفسي غيرو إذا وقفت قدامو وناجيتو.
.
لسع ما مقتنع خليك معاي دقيقة, حديثين:
الحديث الاول:
روى الترمذي (3801) وابن ماجة (156) عَنْ عَبْدِ اللَّهِ بْنِ عَمْرٍو، قَالَ: سَمِعْتُ رَسُولَ اللَّهِ صَلَّى اللهُ عَلَيْهِ وَسَلَّمَ يَقُولُ: (مَا أَقَلَّتِ الْغَبْرَاءُ، وَلَا أَظَلَّتِ الْخَضْرَاءُ، مِنْ رَجُلٍ أَصْدَقَ لَهْجَةً مِنْ أَبِي ذَرٍّ).
.
يعني مافي زول شالتو الأرض ولا أظلتو السماء أصدق من أبي ذر, لكن خلينا نشوف لما أبا ذر طلب منصب الرسول صلى الله عليه وسلم قال ليه شنو؟
الحديث الثاني:
عن أبي ذر الغفاري رضي الله عنه قال: قلت: يا رسول الله، ألا تستعملني؟ [أي توليني عملاً عاماً]. قال: فضرب على منكبي ثم قال صلى الله عليه وسلم: "يا أبا ذر، إنك ضعيف، وإنها أمانة، وإنها يوم القيامة خزي وندامة، إلا مَن أخذها بحقها وأدّى الذي عليه فيها". رواه أحمد.
.
الخزي والندامة دي في الشريعة السودانية بيفلقو ليها بي كرسي.
ارحمونا الناس جعانة والكهرباء قاطعة.
.
.
نورين,
11-5-2019
#اعتصام_القيادة_العامة