1065
شعر ، وشعر فقط / أنا لو اني في حياتي مخير ؟ ماكان خليتك وأنا خاطري فيك ! \ للتواصل @sh3r00_bot
^
تبي الصراحه توقعتك تعايدني
ماكنت متخيل ان العيد ماجابك
كنت احسب انك ولهت وحيل فاقدني
ما كنت متخيل اني ارخص أحبابك
^
قرب " هلال العيد " حسب المواعيد
ومع رؤيته يبقى القرار المصيري
كل ينقص فـ الشهر يوم ويزيد
ويُقول محدٍ جايب العلم غيري
وأنا أنتظر رؤية قمر فـ أول العيد
ماهوب موجودٍ بـ كشف العجيري
^
ماجيتك أعلمك كيف المشاعر تدار
جيتك بقلبٍ سليم ونيّةٍ صافيه
أنا شعفني هواك.. وجنّة الحب نار
وعيني من النوم مطروفه ومتجافيه
شعاف بدوٍ هواهم من هوى أمّ الحوار
لاباردوا قد ليالي القيظ متقافيه
أقبل إلى شفتني على وشك الانهيار
وأقوم مثل المريض إلى أونس العافيه
^
لأي المحطات ياخذنا قطار الحياة
ماهو بفارق مادام الموت ماله مفر
حبيبتي ليه ناصل؟ عمرنا وش وراه؟
يهرب من آخر محطة من يحب السفر
^
يبقى غلاها بنت الاجواد راكن
باقصى معاليق الحشا يرتوي بي
شفني ولو ماحرك الوقت ساكن
عندي امل بالله وحلمي وشيبي
يمكن عقب ضيق الفضا والاماكن
( ربي يعوضني بها في مشيبي )
يكفي وهي ماهي نصيبي ولكن
(للحين ادعي جعلها من نصيبي)
^
عن البال، ما راحت طواريْك لاجل تْعود
مثل : كل ليلة طيش مرَّت على تايب
طبيعي بِأنّ الناس .. تستشعر الموجود
وأنا أستشعرك موجود، وأستشعرك غايب
^
طرّف الليل ، وأنسام الهبايب هبايب
ليت مسباح كفّي خصلةٍ من شعرها
^
سيّد الليل وأنفاس الفجر والمغيب
من شرا شوف عينك ماشكى غشّها
لو عصافير حيّك ماتشوفك حبيب ؟
ما بنت في نوافذ غرفتك عشّها :)
^
بري حالي ليت مثله بغاليه استشار
ولا تركني كل مره بعده ، أذوقها
انقطع وحبال الأخبار من دونه قصار
والله مدري هو تحت الارض ولا فوقها
^
ماكان عادي تجرح الروح وتروح
لو قلتلك من طيبة القلب عادي
وبابي على كثرة خطاياك مفتوح
لو شفتني عن عزة النفس غادي
فضفضت لك يوم إنك أقرب من الروح
وكني وأنا افضفض لقلبك معادي
أنا هذاك الي من الضيقة ينوح
ماني هذاك الي ليا ضاق هادي
علمتني إن الحب جارح ومجروح
وعلمتك إن الحب ود وتهادي
^
مع كل لحظه بدونك اشعر بغربه
كنك وطن ما اعيش الا على ترابك
'
تعال يامن وطت رجلي على دربه
رجوعك اعظم عذر القاه لـ غيابك!!
^
على حسن ظني بهم : ما بقى ظن
أضيق بـ الذكرى .. وفيها / أتنسم !
أنا ( قليل الحيلة ) اللي اذا : حن !!
يفتح على بعض ( الصور ) ويتبسّم
^
ياللي تبون الجديد. قلوبنا عادت
تنزف لكم من دماها ما يسليكم
محاولاتي على الكتمان ما فادت
وانتم تبون الجديد الله يهديكم
^
يافاقدين أحبابكم وش تسوون
لا مدت الذكرى الحزينة يديها
كيف نتجاوز حزننا ماتعرفون
بعض الطواري موجعة مانبيها
دايم على بال المواجع يمرون
مافيه ضحكة مالهم صوت فيها
ياليتهم عن ضيقة الفقد يدرون
ودروبهم وشلون دايم نجيها
من كثر ماصاروا على البال يطرون
حتى خطاياهم ولهنا عليه
^
وحيد لكن ماشعر أني فعلا وحيد
لو كان منتم معي لكن ربي معي
على فراش النعي احيان يولد قصيد
ياللي تحتاجون القصيد انا بحاجة نعي
كل مايطيب وجعي جيتو تبون الجديد !
تدرون بأن الجديد اللي تبون ، وجعي !
^
بااادر وكلم صاحبك لا تخليه
هو خابر انك تنتظر وانت خابر
ادعس على جرح الجفاء كان تغليه
خل التعزز والثقل ،، لا تكااابر
يشفع لزلته معك زين ماضيه
كانك تحب الصدق ماهوب عابر
عاده على قيد الحياه اتصل فيه
ماافيه جوالات تحت المقاابر
^
الا وجودي وجد من فارق الخلان
وتناحت به الاقدار عن دار مضنونه
حياتي بدونه مثل بيتً بلى سكان
كساه الغبار وعشعش الطير بركونه
^
لا الهجر مرضيني ولا الجرح مألوف
خذيتني .. من راحتي ل المضرة
ما عاد في قلبَك على أحلامنا خوف
ولا عاد في صدرك من الشوق ذرّة
^
إن كان ماتبغين درب المواصيل
ومشاعرك في تالي الوقت عيّت
وشلون ترتاحين في نومة الليل؟
وفي ذمتك قلبً من الشوق ميّت
^
للحين و الفرقا سبب موتي
و أنا الحزين " اللي تبكّينه "
و للحين و اسمك عالق بصوتي
صوتي هذاك، اللي تحبّينه
^
قومي وبسم الله عليك، من المضره والقسى
الناس مابه قلبٍ ياحبيبتي ما لاعتّه
بس اقري أذكار الصباح واقري أذكار المساء
وانا تراي مودعك من لا تضيع وداعته
^
في كل مبدا عام تاقف ساعة أحلامي عليك
أعيش بك حتى ولو ما عاد اشوفك واسمعك
وفي كل عام أقول نفس الأمنيه وأنا احتريك
متى الزمان اللي خذك مني بيجمعني معك
^
تتابعت خلف الشهور !.. الأسابيع
والشوق واقف .. و الحنين متركّي
خل السكوت يسود كل المواضيع
أنا أكبر من اللوم .. ومن ، التشكّي
من أبسط حقوق الكلام إنّه يْضيع
الواقع أصدق !.. من يقيني وشكّي
لا تنتظر منّي !.. ( عبارات ) توديع
ما عندي ألّا الضحكة .. اللي تبكّي
^
"ليلةٍ من طولها كنْ ثوانيها ليال
ما تمر.. لو ساعتي غيَّرت توقيتها
من يعيش شعورها يحسب انِّه فالخيال
خل عاد اللي لا سولفت له طريتها
اعتق شْعوري و أذِّن وارِحنا يا بلال
الفجر كنِّي من العام ما صليتها "
^
غلاك بضميري واضحٍ ماعليه غبار
تشيل الغلا نفسي وانا عاجز امنعها
يقولون ماودّعك! قلت الفراق وصار
الانسان روحه تنسلب … ما يودّعها
^
على السهر لا يشره السهران
يا رمشي الشرهه على رمشي
و الراحة اللي تلزم .. الإنسان
ما تنطلب بالنت من (نمشي)
و كل شيء يمشي لكن الخذلان
هو والله اللي ماهو بـ يمشي
^
غصب عن هذا الجفا أبقى : حبيبك
ما أبي أنجو ... أنا محتاج أغرق
ٰ
علّم ( الصبح ) اللي ما وده يجيبك :
إني انتظرك معَ كل شمس تشرق !
^
لا تخاف القلب ما يرتد عن سلمه ودينه
لو تقفي عن نظر عيني بشوفك في خيالي
انت عندي مثل عاقاً ما يبر ب والدينه
لو يوريهم نجوم القايله ،، بيضل غالي
^
الشيخ ساعة قرأ بالفرض طمّني
قرأ وراء الفاتحة "والليل إذا يغشى"
أمّنت سري بصدر الليل لكني!
نسيت أحرّص نهاري والنهار أفشى
من هو يشيل الحظوظ المايلة مني؟
كل ما تمنيت وقفة ، طول الممشى
ما للأماني طريق لواقعي كنّي
أطرم تمنى يقول ( أحبك ) لـ طرشى
^
كل لحظه كانت بقربك عظيمه
عيّا يكررها الزمن بعد ممشاك
ما عاد لـ التاريخ معنى و قيمه
عدّا على قلب عجز ما تعدّاك
مشاعري بين إنتصار و هزيمه
من ليلةٍ فيها عرفتك لـفرقاك
ممنون لكل الليالي القديمه
اللي بها صوتك ووجهك وملقاك