Telegram-канал seerawqass - 👦🏻 سيرة وقصص للأطفال 👧🏻: Неотсортированное

👦🏻 سيرة وقصص للأطفال 👧🏻

01 ноября 2023 18:18

#سيرة_امهات_المؤمنين

🌙 الحلقة 5 🌙

🌴تابع السيدة عائشة رضي الله عنها

🌻كان ياما كان و مايحلي الكلام
إلا بذكر النبي .... محمد عليه الصلاة و السلام ..

🌼اللهم صل علي سيدنا مُحَمَّد

🌻 بعد مقلب العسل حصلت مواقف كتير جدا للسيده عائشة مع الرسول صل الله عليه وسلم

🌻في يوم من الايام الرسول اشتكى لباباها على حاجات ضايقته منها

🌻 و جه ابوها ابو بكر اتخانق معاها علشان هي زعلت الرسول صل الله عليه وسلم و ضربها جامد

🌻فزعل الرسول من ابو بكر و قاله انا مش عايزك تعمل كده.. انا كنت عايزك تتكلم معاها بالعقل

🌻فلما مشي ابو بكر الرسول قعد يهزر مع السيده عائشة و يقولها شفتي انا دافعت عنك ازاي و وقفت بينك و بين باباكي و قعد يضحكها

🌻 و لما رجع ابو بكر لقاهم قاعدين يضحكوا فقال يا رسول الله دخلوني معاكوا و انتوا بتضحكوا زي ما دخلتوني و انتوا بتتخانقوا

🌻وبالرغم من الغيرة الكتير اللي كانت عند السيده عائشة على الرسول و حبها ليه لكن كانت مؤدبه جدا

🌻الرسول قلها انا عارف امتى بتكوني مبسوطة مني و امتى بتكوني زعلانه مني

🌻قاتله و ازاي بتعرف

🌻قالها لما بتكوني مبسوطه مني بتقولي لا و رب محمد و لما بتكوني زعلانه مني بتقولي لا و رب إبراهيم

🌻قالتله عندك حق بس انا مش بعرف اهجر غير اسمك بس يا رسول الله

🌻و كمان السيده عائشة اتعلمت من الرسول الزهد يعني إيه الزهد؟

🌻يعني يبقى عندك كل حاجه و تسيبها بمزاجك لو مثلا عندك فلوس تديها للفقرا كلها من غير ما تسيب لنفسك حاجة منها ولا تشتري بيها حاجة لنفسك

🌻فكانت السيده عائشة بتحكي ان كل لما يجي للرسول فلوس او دهب من الغزوات يوزعها كلها على الناس الفقراء وما يخدش منها حاجة لنفسه

🌻و اي حد يطلب منه اي حاجه يديهاله

🌻و كانت بتحكي ان بيمر عليهم شهر ورا شهر ورا شهر من غير ما يفتحوا النار علشان يطبخوا و كانوا بيعيشوا على التمر و الماء بس

🌻و كل فين و فين لما كانوا ياكلوا لحمه او يشربوا لبن

🌻و السيده عائشة بتقول لما كان الرسول بيحفر الخندق وغزوة الخندق طبعا كلنا فاكرينها كان الرسول رابط على بطنه حجر من كتر الجوع

🌻و في يوم من الايام جت واحده فقيره شايله بناتها الاتين و السيدة عائشة اديتها 3 تمرات راحت الأم أعطت كل واحده من بناتها تمره و جت تاكل الثالثه بناتها كانوا خلصوا التمرة بتاعتهم و شبطوا فيها علشان ياكلوا التمره بتاعتها فراحت قسمتها نصين و اديت كل واحده نص

🌻فالموقف ده عجب السيده عائشة و حكته للرسول و الرسول قالها ان ربنا كتب الجنه للست دي و التمره دي حمتها من النار

🌻و بردو السيده عائشة بتحكي ان كان الرسول بينام على حصير و الحصير ده سجاده معموله من الخوص زي ورق النخلة اللي لونه أخضر و كانت ناشفه اوي

🌻فقلت يا رسول الله لو حطينا حاجة طريه عليها مش هتعلم في جسمك كده

🌻فرد عليها الرسول و قالها احنا مالنا و مال الدنيا انا مجرد راكب فيها قعد شويه تحت شجرة علشان الظل و بعدين مشي و سابها

🌻فاتعلمت السيده عائشه الزهد من ابوها ابو بكر و زوجها الرسول صل الله عليه وسلم

🌻وفي يوم كان عندها ٧٠ألف درهم وزعتهم كلهم على الفقراء والعبايه اللي كانت لبساها كانت مقطوعه بس مكنتش بتشتري حاجه لنفسها و بتوزع كل حاجة على الفقراء

🌻و في يوم من الايام اما الرسول صل الله عليه وسلم مات و مسك الحكم معاويه بعت للسيده عائشة 100 الف درهم فأخدتها و وزعتها كلها على الفقراء

🌻و كان عندها خادمه اسمها بريره فقالتلها بريرة ممكن نشتري بدرهم من دول لحمه ناكلها و نفطر بيها علشان أنت صائمة

🌻فردت عليها السيده عائشة و قالتها لو فكرتيني كنت اشتريت

🌻و في يوم من الايام لما كان النبي مشغول اجتمعت امهات المؤمنين و اتفقوا انهم يروحوا للرسول و يطلبوا منه يزودلهم مصروف البيت

🌻فزعل النبي منهم و سابهم كلهم و كان عنده اوضه و هي اوضه عاليه زي الدور التاني كده

🌻فقعد فيها و سابهم كلهم و فضل كذا يوم قاعد فيها لوحده لغايه ما ربنا نزل سورة الاحزاب الآيتين 28 و 29

🌻و كان ربنا بيقول لأمهات المؤمنين في سورة الأحزاب اختاروا يا اما تفضلوا مع الرسول و تسمعوا كلامه يا اما الرسول يطلقكم و تعيشوا زي ما انتوا عايزين

🌻و طبعا كلهم اختاروا الله و رسوله و الدار الآخرة

🌻و لسه في حاجات تانية كتير هنحكي عليها حصلت مع السيده عائشة بس دلوقتي جه معاد النوم

🌻تصبحوا على خير يا حلوين

🌻وصل اللهم على سيدنا محمد
🌼🌻🌼🌻🌼🌻🌼
/channel/seerawqass