5285
الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
كُتِبَ الصيامُ لأجلِنا
واللهُ ألطفُ بالعباد
الصبرُ في إبحَارِنا
أجرٌ اذا نفدَ المِداد
نحنوُ لهُ . . بحُنُوِه
مرحى به فالوعدُ عاد
وتسابقت ارواحنا
سرجٌ على ظهرِ الجياد
عند الموائدِ دعوةٌ
صعدت بإلحاحِ الرجاء
أقمِ الصلاةَ ولُذ بهِ
شهرٌ من الرحمنِ جاء
يا باغيَ الخيراتِ أقبل
بابُهُ .. نحوَ السماء
اقرأ ورتل .. وارتقِ
رمضانُ للساعي وعاء
#محمد_المهندس
الله أكرم .. هل ترى
أهلاً به "رمضان كريم"
شهرٌ أرقَ من الصَبا
رَوحٌ ورَيحانٌ مقيم
الخيرُ خيلٌ سابقٌ
والجودُ خيالٌ هميم
أبشر به من مَقدمٍ
لقياهُ في الدنيا نعيم
كُتِبَ الصيامُ لأجلِنا
واللهُ ألطفُ بالعباد
الصبرُ في إبحَارِنا
أجرٌ اذا نفدَ المِداد
نحنوُ لهُ . . بحُنُوِه
مرحى به فالوعدُ عاد
وتسابقت ارواحنا
سرجٌ على ظهرِ الجياد
عند الموائدِ دعوةٌ
صعدت بإلحاحِ الرجاء
أقمِ الصلاةَ ولُذ بهِ
شهرٌ من الرحمنِ جاء
يا باغيَ الخيراتِ أقبل
بابُهُ .. نحوَ السماء
اقرأ ورتل .. وارتقِ
رمضانُ للساعي وعاء
كل عام وأنتم طيبين وتصومو وتفطرو على خير
#محمد_المهندس
يا يمه هووووووي
رمضان كريم
…
اشتقت لي ناسك
احساسهم احساسك
بتخاطفو الضيفان
اهلا تعال بي جاي
حرم تعال بي جاي
ما بسددو البيبان
في عيون يتيم بكااااااااي
واهه ا يمه
من شوقك الشواي
بركه النسيتيها
نار منقدك جواي
بتذكرك يمه ..
يلاك نشربو شاي
شايا مدنكل حااااار
زي التقول مو شاي…
☕ #ابراهيم_جابر
ريحة البن ☕:
شهر الرحمة جانا
حباب رمضان حبابو
كتر ربي خيرو
سعيد آل الله جابو
لمتنا الحنينة
بى اكلو و شرابو
العيلة و اهلنا
الحاضرين و اللى غابوا
مرة فطورنا برة
فاتحين حوشنا بابو
و مرات بالمحبة
اخوى عازم صحابو
سودان الكرم
الجود قاعد يهابو
#عاطف_شمبات
🌛
نسوان فريقنا مع العواسة و طرقة الآبري.. و كم جردل رقاق.. و الشفع يسرقو من كراتينن.. و يجروا على الزقاق.. رمضان كريم يا يمة هوي رمضان كريم يا نعمتي.. رمضان كريم ليكم و لي كل الرفاق.
#ريحة_البن
#رمضان_كريم
#محمود_الجيلي
خاف من لفة الدنيا
ودوران الزمن والحال
بقت مضمونا في غُنية
مسافة يستريح البال
ملازماك باقية ليك كُنية
دا غير القالو فيك والقال
كتييير دنيانا في مُنية
اريت اصبحنا عال العال
#عاطف_شمبات
أنا لسه عشمانه الظروف
تقدر تشيل وجعي وأساي ..
الدنيا ضاقت بي شديد
هم السواد شايلاو براي ..
واقفة وبقع من دون أحس
واعية ومغبية بالجواي ..
#ايمان_متوكل
ما عندي غير الله
يسمع أنين صمتي
ومن همّي أتحلّ
ما عندي غير الله
………………..
ما عندي غيرو يشيل
مني الألم والضيق
ويديني راحة البال
ويهديني نورو طريق
وينشلني من البي
أنا لسه فيني غريق
ويرجع بلدنا أمان
واللمة في الحلة
………………..
ما عندي غير الله
……………….
مين ضامن الأيام
ومين عارف البكرة
واليوم ألم ساعات
والثانية زي جمرة
البال دوام مشغول
فكرة بتشيل فكرة
ونار الصبر بتقيد
وفي نارا أتقلى
…………..
ما عندي غير الله
…………………
كل اللكانوا معاك
يوم ما وقعت مشوا
وحتى الوعود ذاتا
طلعت كلام و حشو
خلو التراب يابس
والنيل بزيد عطشو
يا قلبي ما ليك غير
بالذكرى تتسلى
وما عندي غير الله
#محمود_الجيلي
إنت أقوى من الظروف القاسية و الهم و المرض
ريك بريدك
ياكا صابر في البلا .. يا الما حصل يوم إعترض
إنت أقوى من الأنين المر.. و من الخوف.. و من دمع العيون
و أنت أقوى من الضلام و الوحدة و الهم و السكون
و أنا ياني جمبك توب غطاك .. و أنا غير معاك أنا وين أكون ؟؟!
يوم التحس بالوجعة .. تلقاني الدوا
يوم التحس بالكتمة .. تلقاني الهوا
يوم التفتش ريدة .. تلقاني الهوى
يوم التكوس لي كسرة .. تلاقاني الرغيف و اللقمة .. ما بتبيت قوى
يوم التفتش ليّ .. تلقاني الحبيب الصاحب ..المحبوب .. أخوك ود أمك .. أقرب من
خيالك ليك .. ماسك بالحنان إيديك .. طول السكة .. طول ما الله يدينا النفس و القدرة
.. ديمة نكون سوا..
#محمود_الجيلي
ماشاء العمر بهواك،
ماشاء الدرب بمشيك ..
ماطال الغياب برجاك،
بي طول الصبر برشيك ..
سميتك (سلام) هنداك،
اذاً واجب علي أفشيك ..
انا الشايف برق حنداك،
إذاً وعد الطراوه وشيك ..
#محمد_الشيخ
أديني نُص بالِك ،
او رُبعِك الخالي ...
وأنا غيمة ببقالِك ،
أو تِلتِك ال حالي ...
و أنا ما بقول مالِك ،
و ردك يكون مالي؟!
أنا في المدين مالِك ،
أو غارك أوحالي ...
وانا ما رجيت فالِك ،
يا بالك الغالي ...
في التوهة عقبالِك ،
في الروقة عُقبالي ...
أنا متا قبالِك ،
هاك عيشي قُبالي ...
في ضِحكك أطفالِك ،
في حزني أطفالي ...
في ليلِك الحالِك ،
ونسة مُشاط حالي ...
أها انتي كيف حالِك؟!
#محمد_الشيخ
#الجاي_خير 💚
لا بد بكرة نفرح ،، تملأ البهجة روحنا ..
و نعانق الشوارع عايدين من نزوحنا ..
عامرين بالمحبة ،، تعمر بينا سوحنا ..
وحاتك نحنا قادرين نتسامى في جروحنا ..
#احمد_البلال
أقول " أحبكِ "
لكنها لا تُضيء .
ولا تمسحُ الحزن بيني و بينك
لا تجبر الحرب أن تنتهي
لا تُعيد العناقَ لصدري
وليست تعوّضنا لحظة من غيابٍ
ولا دمعة أو ألمْ
و لكنها ما نحارب من أجلهِ
ما نصرُّ على أن يكونَ
أقول " أحبكِ "
لا خوفَ من بعدها
لا طريقَ يخون
و لا يعرف القلب معنى الندم
.
#محمد_عبدالقادر
أيا رب التخلّي
ذي المدينة أفلتتني
و ارتطمتُ بقسوةٍ بجدار أحزان الوداع
فقدت حبّاً آخراً لابدّ من فقدانهِ
و خسرتُ ما يكفي من الذكرى
ترى هل من مزيد؟
يا ربِّ
ما جدوى البقاء إذا تخلّت عن أغانيها المدينة
عن محبّيها
و صارت تنتشي بالموت
ترغبُ أن يقبّلها الجنود
و أن يعانقها الحديد ؟
.
#محمد_عبدالقادر
بين مصطفى و محمود
سر الوتر و العود
صوت الحنان لو غاب
صوت الحنين موجود
ذكراك ما ذكراك
في كل يوم بتعود
بين مصطفى و محمود
سر البخور و العود
كلما إحترق بيفوح
لو راحوا من العين
فوقنا بتحلق روح
صوت دندنات و وطن
لسه الجرح مفتوح
و لسه القلوب تسمع
تغريد بلابل الدوح
و صوت الكمنجة أنين
و لسه الوتر مجروح
#محمود_الجيلي
هووووووي
ارحكن ...
الشمس دارت وشيها
إتحسبنن من التشِنِّف والنجيهة
و امرقن للناس قدحكن
الليلة كان يوم حااااااار علينا
الله يقسم لينا أجرو
و لطفو بالمرحوم بندعي
و ها الهجيرة إن شاءاللَّه يبرد فيها قبرو
البتاكلن .....
والبتدعن.....
والبتحكن
إن شاءاللَّه نتلم في فرحكن ...
اصلها بتدي وبتاخد
و القدر ما منو مهرب
يوم بتصبح عامرة عمرة
ويوم بتخرب
الجعان ادنو ياكل
والعِطش ادنو يشرب
صدقة لي روح الغوالي الفاتو وفراقم جرحكن ...
ارحكن.....
#الرحاميد_او_الرحمتات
رمضان كريم عليكم و ربنا يتقبل الصيام و القيام 💜
#نهي_الكباشي
رمضان كريم على كل زول
واللمة في برش الفطور
وصدى التراويح في العقول
والناس بتتباشر فرح
لمو المواعين والطبول
والسهرة لي وش الصباح
مختومة بي قومو السحور ❤️
#اسلام_النحاس
هلا هلالو بشري ونور الاكوان
واهلا بي قدومك يا شهر رمضان
فيك الجنة تفتح و تغلق النيران
ومرحبتين حبابك جيت بلاكيزان
#نزار_سراج
رمضان كريم
وتصمو وتفطرو علي خير
لفة الطرقة
بي تحِل عندي مليون
الف فرقة
لمّ خوتنا الحميمة
للظروف تبقالنا درقة
ايدي في ايدك نصوم
شهر رمضان فيو محبة
قادرة تمسح سيل هموم
من جبين ضنك الحياة
تبرد الحر والسموم
جانا رمضان شاري خيرو
في تفاصيلنا الرحيمة
هاكِ آبري معاو رُقاق
عادة عندنا جد قديمة
ناولو بُن قول ليهو ساي
مرة جيب جك العصير
و ناولو سيرمس فيهو شاي
بُكرة ح يجيب ليك فطير
لمة الناس في الشوارع
للسابلة مقطوع الطريق
اللي فكر فيها بارع
حظو من فكالو ريق
جوة سودانا النريدو
قيمة عالية من المحنة
يلا نرسل في بريدو
نحن دار نبنيك جنة
#عاطف_شمبات
أنا خائف يا صديقي
من الزمن الكارثي
من الزمن المبتلى بالدموع
أخاف على ضحكة لم تجدْ بيتها مثل قلبي
أخاف عليّ بألا أراكَ
و ألا نعود بنفس الملامحْ
نعم يا صديقي
أنا متعبٌ
غاضبٌ
أنت مثلي
على الرغم من أننا عاشقانِ
بريئان من ذكرياتِ الدماءِ
و من زمنٍ دمويّ المصالحْ
أنا خائفٌ يا صديقي
#محمد_عبدالقادر
رغم البُعاد
بقول ليك بسيطة
محل كنت قاعد
حنين لسة دافي
جمال الحياة
ف الامور الوسيطة
بحبك ... تصدق؟!
وحاة الله جد
وليك شوق خرافي
وطنا البِشفق
بموت فيك مِيتة!!!
حنين ليك مِدفق
علاقة نخيل
بين جريدة وسبيطة
#عاطف_شمبات
الله فينا
قادر يمسح خوف وجعنا
والحكايات الحزينة
الله لي بلدي الرزينة
والله لينا
نحن همنا كان صغير
كنا كايسين المحبة
التسامح والسكينة
كنا دايرين نبقي واحد
ننبذ الفرقة اللعينة
كان هدفنا عمار بلدنا
نطرد الغل والدغينة
فجأة خشت يد غريبة
قامت الحرب اللعينة
أعذرينا
نحن يا خرطوم بقينا
لانا فارزين الصباحات
لا النهارات والسمايم
لا الشمس بتطل علينا
لا الغمائم
والمطر عشق الحرازات
شفتي وجعتنا الدفينة
اشتهينا زحام شوراعك
دقة أجراس الكنائس
والمآذن في جوامعك
اشتهينا حلاوة النيل
قنقليز بالشطة طاعم
دقة الدوم والتفاصيل
نحن راجعين المغيرب
نسمع الحزن النبيل
اشتهينا الحوت يغني ما بلومكم
كيف الومكم ياخي شوف ديل
نحن مشتاقين نشوفكم
لوم شنو اليقدر علينا
جيبي طيفك طمنينا
كيف شوارع جبرة بالله
شارع الستين وناصر
بحري كيفها وكبري شمبات
بلغي امدرمان سلامنا
باقي فاقدانا الحنينة
والحقينا
نحن يا خرطوم ودرنا
أبقى عافية ورجعينا
#ماجدولين_سعد
الناس محتاجة الكلمة الطيبة
وما ناقصنا عتاب أو لوم
الناس مليانة عذاب و أنين
ما تزيدوا هموم القلب هموم
#محمود_الجيلي
إشتقت للخرطوم
إشتقت يا الخرطوم
شوق ينعزل كوم كوم
اشتقت لي ريحتك
لي شارع الجامعة
و العربي نص اليوم
لي جلسة عصرية
وقهاوي ضل الدوم
شارع المطار عمران
والمك نمر مزحوم
يلا الشغل بدري
شيل الورق و اجري
اشتقت يا بحري
لي قطعة الكُبري
مشتهية جوطة السوق
الجو دا حرّ يلحم
و مُصّرة دار تقري ؟
مُصرة دايرة اقرأ
شارع الصحافات كيف
إشتقت لي جبرة
الشعبي يا الخرطوم
ود عم سعد قشرة
مشتهية مشوارو
و لي عزلة الفستان
الطرحة و القمصان
اشتقت يا خيان
لي مشية امدرمان
مشتهية شارع النيل
و الجمعة في شمبات
و يا توتي كُل جميل
يا العاكسة في اللمبات
شوارعك التاريخ
ما يكون بطلهن مات
يا جامعة الخرطوم
اشتقت للقاعات
ضل الشجر وارف
القعدة بالساعات
عقد الجلاد صيحي
يا السُكسك المنضوم
اشجيني في روحي
لسة القلب مصدوم
#نهي_الكباشي
بحبك فطره دون اسباب
وظلمك لي متواصل
بتسكن في شغاف الروح
وديمه عليّ متحامل
وعااارف انو مابيدك
اعيش من غير عشم باكر
ولكن قلتا بس اهديك
مراره الواقع الحاصل
بالامس القريب جدا
سقط آخر قناع منك
كشف لي قبحك الظاهر
ومعليش ياوطن جدا
اذا كلماتي اتعدن
فاحسن فاصل ونواصل
#نصر_محي_الدين
يااااا ...
الحواري
الفي قصادك
انتكت اخر
المواويل
ياخي
بهواك
لينا كلنا
سنطة
او تمرة
وقناديل
اول امبارح
مأمنك
الصبايا
بكينا ياهو
وين من الدمع
المناديل ؟؟
قلبي
ماشاف
غير اخوي نان
إنكشف كيف
ضهري منك . . !؟
وتنسرج لي
بعضنا الخيل
قلنا
كلنا
ما هوانات
نان براك كيف
عاد ابوك
فيل . . .؟؟
مش
حليب
اماتنا واحد ؟؟
واختلاف السحنة تأويل ؟؟؟
ويا البحب شرقك
وغربك
لي شمالك
او جنوبك
روحي بتميل
يا مساجد
يا كنايس
يا مصاحف
ويا اناجيل
يا هضاب
يا صحراء
يا تل
يا تراب
مشتاق
لي يا نيل
ياخ سلامتك
شدة
بزول
يا صباح
شيل عتمة
الليل
دمت طيب
ودمنا
سالمين
كللللنا . . . .
كللللللللناااا . . . .
كللللللللللللنا . . . .
كان ديل
وكان ديل . . .
#بدورك_مسالم
#احمد_البلال
أسفي لكل القارئين:
ها عدت للبيت الكبير وها لقيت الأصدقاء.
ونسيت أصوات الرصاص
وكل ألوان الدماء.
ونسيت خطوات النزوح،
نقاط تفتيش العذاب،
ونظرة القلب الأخيرة ،نحو بيتك، ثم تمضي للعراء.
قد كان كابوسا صحوت غسلت وجهك بالتعاويذ الأثيرة والدعاء.
بيض العمائم في اللقاء تعانقت!
قد عاد بيتك للضيوف صباح يوم الجمعة الغراء يجمعنا الطعام.
قد عاد مشيك للطريق
وعدت أنت
وعاد صوتك للكلام.
قد عاد للطفل التعثر
عاد لليل النيام.
ورجوت وقت غيابنا ألا يطول؟
ورأيت أهلك بعد دهرٍ واقفين على الطلول
هل غاب بيتك عن خيالك لحظةً
خبر النوافذ، صحن جارتنا الشهي، شواء كبش العيد، (من بالباب يطرق)، هل لدى الجيران نورٌ، هل تعود الكهرباء؟
قد غبت حتى شاخت الطرقات وانحنت الظلال
قد غبت حتى أقفر الميدان لا المريخ أمرخ ،غبت، لا اكتمل الهلال
لا في ربيع المصطفى قرعوا الطبول
ها عدن للقرع الطبول وها لقيت الأصدقاء
افرح! لقد عدنا!
لقد طبنا وقد طلع الصباح
ما بال وجهك كالحا
أثر الجراح على يديك ولا جراح
اضحك وقم نمضي إلى الترهات واللهو المباح
سنعود نتلو سورة الفتح المبين نصيح حي على النجاح
أتعيش آثار الهلاك إذا نجونا
كل من ماتوا على أكتافنا تمشي النعوش بيوتنا
الذكرى
القبور
هل قد نجونا أم نجا الموتى وبرزخنا النشور
ونسيت شكل الحزن أم كنه السرور
الحرب نافذة الجحيم
الحرب تذكرة الذهاب
الحرب نائحة الجيوب
الحرب أخت الحرب بنت الحرب والدة المبير
في الحرب تغتصب النساء
في الحرب لا يأتي الصباح ولا يعيش الأبرياء
في الحرب أطفال الشتات سيسألون متى نعود، ولن يعود الميتون إلى الحياة
ستظل روحك في البعيد، ترى الوجوه على الغمام وحين تشربك المياه
ستعود لكن لن تعود.
لا أنت أنت ولا البلاد هي البلاد.
#محمد_عبدالواحد
صلاني زماني التيه والغدر
النار و الضيق
ضيق الاحلام
و نار التانين
تيه الصلصال
و غدر الاقدار
وادركت بوعي
فكر التسليم ما الإستسلام
و مشروع السعيّ
فصليت الناس عمق الإحساس
ما القشريات
وريتم بيّ لجم الوسواس
ما الفطريات
سويتني براي ما كنت الزي
ولا كنت نبي.
#امجد_اسماعيل
المُسَبَّك في خِصالو
والمعجّن بي دلالو
' قلبي لاعب بيه مالو '
ما رأت حسنو المرايا
اتشاكست حسنو الزوايا
ليه قدمتا النوايا
مالو هسي البين سعالو
' قلبي لاعب بيه مالو '
ما شكيتك إلا ليك
ما بكون انا الا بيك
بكره بركب شوق أجيك
هم قلبي وهمهمالو
'قلبي لاعب بيه مالو'
المسهد في الأرايك
قلبي مضنى أديني رايك
في بلوزك ولا رايك
سيدي حن علي وحالو
'وقلبي لاعب بيه مالو'
قلت هل البين حِلالو ؟!
وروحي ان سالت خِلالو
أسأل الراكب خُلالو
' قلبي لاعب بيه مالو '
#محمد_الشيخ
طالت وطوطوت صبر الصبرهم هش
ونحن صبرنا سلبة ونوعنا ما بنغش
طالما جيشنا نازل في الصراصير رش
نحن وراهو يا الملكة وقريب ننفش
حسب تاريخ جدونا وما وصل لي علمنا
ما انخلق البشنق ويفتخر بي ظلمنا
الراجي المليشية تقدمو ويحكمنا
بعد طي السجل خلي اللجي ويبلمنا
#ودمسيخ