4231
✔️ 𓆩cнαииєℓ𓆪 ♡♡:♡♡ 𓆩 كم تمنيت ان تكونِ روما 𓆪
يالصوره ماتحجين ويه اليحاجيج،
هم انتي مثل هواي مامش رحم بيج.
بدايتهن دفو ايامك واخرهن،
بواجي وتيهت شرهن وخرهن..
صوّرك غاد عن عيني وخرهن..
اريد اغفى شكو مجلبات بيه.
#بشار_الاسمر
مشيت وياك وادري بروحي مغلوب،
وجانن كل خساراتي برضاتي..
كسرة خاطري ودموعي والليل..
وحتى الوجع جان بمشتهاتي..
ردت اوصل لاخر نقطه وياك،
لاخر حل احس بي ترضى ذاتي..
حتى من ارجع من العشره مخذول..
الوم بروحي موش معثراتي..
#صباح_الطائي
شكد وجوه الآكي ومن ارد للبيت،
تضل ببالي بس الماملاكيها..
#شجاع_الحليحل
خسرانه رجعت من هذيج امالها،
جرحوا احساسي السولفولي احوالها..
يكولون هسه عيونها وذيج الجفون..
الدمع بيهن كلشي ما خلالها..
يكولون تحلم بيه رجعت من جديد،
الكبل ما قبلت اضل ببالها..
ثروه ما عندي وكدرت انطيها روح..
عمري ما فكرت بستغلالها..
الرخصتني ودورت عـ اليشترون..
الراحت وضل بالگلب تمثالها..
يكولون نبرة صوتها تحس بيها خوف..
وابتسامتها الدمع يغتالها..
باحلامها خطوط المخالب واضحات،
موقعلها على الحلم جتالها..
الوادعتني وراحت لكوكب بعيد..
الظاهر الكوكب رفض ما شالها..
الما عرضتلها ولا كلتلها ليش،
كلت ميخالف تروح بفالها..
*العلمتني شلون اكول الله كريم..
الدنيا تفتر ما تضل بحالها..
الجنت الملها الندى ولمتلي ليل،
انطيتها عيوني وعصرت اوشالها..
الجانت تغمض بخصلة مستحاي..
وجنت اخاف عيون صلفه تنالها..
المثلت دور النوارس بالبياض..
تلونت حتى بسواد خيالها..
راحت وكلبي الترف شوفها خير،
و وادعتي وسوت اليحلالها..
استكثرت بيه الوفى واني الوفيت..
حسبت تالي الوكت يصفالها..
تصورت ينطون الاحلام ببلاش..
تاخذ وما تنطي شي حسبالها..
يكولون رجعت وضال بواهسها قيد،
ماكو مفتاح اليفك اغلالها..
واني كلتلهم بعد مابيه حيل..
ابني يوميه قصر برمالها..
كلولها تدور غصن توكف عليه،
للخريف انطيت غصني الشالها..
ارضت الدمعه كَلت عصة هواي..
ومُهرت احساسي عثر خيالها..
كلولها شال الهوى من الذكريات،
والبقى من العشره بس اطلالها..
كلولها تدور حلم مضمونه بي..
هواي احلام التغر اشكالها..
كلولها يكول اني ناسي..ومن زمان،
وهي زين اتذكرت هنيالها.
#ايهاب_المالكي
ها دخن دليلي عليك هاواي،
ارق من الندى وللنار هاواي..
ببعد الله واشمك عطر هاواي..
فكيف من اجبل وتجبل عليه.
قسم بالنزل وحي الله فراشه،
فأهدىٰ الليث ابن عمه فراشه..
احوم كبالهم حومة فراشه..
الجريمه بمكنسه ينشون بيه.
عهد قديس احبك صنته وانه،
عرس ضبعه ويه دهري صنته وانه..
ينام الليل..يغفى..صنته وانه..
حريجه ودوت بخيم كاوليه.
#رحيم_الركابي
گلبي المسرد كام يبجي على مبجاك،
بجيك طلع للغير وانه ابجي وياك..
تبچني بجفك وجفي بجوياك،
واذا جويتني اتونس بجوياك..
بجيت وگلبي المسرد بجه وياك..
طلعت تبجي على ولفك مو عليه.
#بشار_الاسمر
عليمن بين گلبي وعقلي محتار،
بهاي وهاي اباوع روحي خسرت..
لا حظ لا بخت لا دنيا تندار..
لا شافتني عين وبيه عثرت..
صار سنين اطك حجار بحجار،
واول ماشعلت النار مطرت..
#سيف_الغزالي
مرات الوطن غربه،
من ما اكعد بصفك..
من ماترضى اكض جفك..
من تكلي مااعرفك..
وانه الواصل غميجك ذاك..
ومن مايّك تغير حيل،
ضليت اغرك بجرفك..
#سيف_زهراوي
احلم تمرني حلم،
بس كون مااصحى..
والليل انحته صنم واركعله كل العمر..
بس لايطل صبحه..
يالمنخلق من لغز،
وبس اخرس اليعرفك وجفوفه متكطعه..
"ياهو الفهم شرحه..
من الامل صفحه بقت،
وانكلبت الصفحه..
ومن صبري باقي صَرح..
بس الصرح من رمل..
والروج اجا جن نسر وانقض على صرحه..
جفي اللواه الزمن،
شجره وجذعها انكسر..
ياثمر التطرحه..
من كبل لا احشمك،
مرخوص لوما تجي..
من عيونك اقرا الحجي..
ما حاجه الي توضحه..
يالساكن بنص قصر،
حُبك ربه ويه الفقر..
وتعتني الك شوغتي..
واربط ببابك علك..
من هدمتي الملحه..
گلبي على بابك رهم،
ممنون الك فهمه..
وللناس كله لسن..
ماتتعب تنصحه..
كله الوكت مو الك..
والشايلك بالصدر لك بطل تجرحه..
ولو عاندك مارجع..
غنيله طور الحزن..
يتلاشه مثل الحلم بس يسمع البحه.
#ميثم_فالح
انه بديره عراقيه،
حتى جروحي ورديه..
الهوى يشتاگ للريه..
الغزل ينكال بسكوت..
انه شمدريني ماتدري،
انه عذري العشگ عذري..
كلمة صوت مكتوبه بورق متطلع أي صوت..
اسمك غيّم يتبعني،
بنقاط حروفه نكعني..
والمبلل عشگ ميخاف..
اذا تمطر علّيَ شوگ..
كوه بدنيتي مكايش،
عشت ميت متت عايش..
عقل مرجع گلب طايش..
بكت مدري انه مبيوك..
كالوردِ أحيا فيكِ انتِ مائي،
لِذا أُعلن اليكِ انتمائي..
عِطرُها..الورد فيهِ مُعجبٌ يُغازل..
قَلبَها..بحرٌ وقَلبي يحتويهِ ساحل..
غَيرُوها..لا أرجو يوماً أرى أو أُقابل..
#المطوري
احس گلبي اليحبك طير،
طاح بشبچة الغربه..
بعيد انت وبعيد اني،
وكل واحد نصب تمثال..
للثاني بوسط گلبه..
#الكاطع
لفاني وكال انه مغرب وراحيل،
وكسرني بروحته وماضل وراحيل..
سمعت الشامت يصيح ورا حيل..
وتمنيته يرد ويسكته اليه.
كتلك امن بفركاك،
بس انت النهر بالروح..
ولغيرك سواچي صغار..
وغيرك من يمر عـ البال،
حسبت ضيج يمحيها الفرح وتروح..
بس انت شيزيحك ثار..
#عمار_سالم
امس زرت الرسايل كلها باليل،
وشفت بيهن كلام اتمنى ينعاد..
عين مغروكه وحركتها الدموع،
وبقيت بوحده اركز عين صياد..
#هاجر_العنزي
شلعت افادي كون انشلع فاداك،
وعفتني يالجنت بالروح فاداك..
بشرني الرحت ويا فادك..
لو اخذ حاجته ورداك اليه.
#عبدالرضا_خلباص
الليالي الحسبه لفراشي ودنها،
وتروح الفرحه من بالي وادنها..
اطلع من هلي مدرعم ودي انها..
عليج..وعوزي يتمضحك عليه.
#رضا_الغرابي
اسولف بأسم غيرك واسمك المقصود،
اليعفوك تستحي من تجيب طاريه..
مو بس عاشكگ متعود امشي وياك..
ويكتل هجر اليحاجيك يوميه..
من انكطعت اخبارك واني والدخان،
انقلاب على الهوى سوينه بالريه..
لعبت بخلقة الله من كطعت وياي..
حلو وجهي وعفت شحه بمعانيه..
الباكك مو سبع انت الردت تنباك،
والواسوني احس تشمتوا بيه..
كطعوا نومتي الحلوه بخبر موزين..
اهلي انباكوا وربعي الحراميه..
لا وكفت الدنيا وما مشت شبرين،
وماحب كبل كلمن كال مكضيه..
والله ونكتت ايدك من جنت تغتاض..
بدا يعبرني حتى البيده عوجيه..
المهم وياك الي عتبه وگلب مكسور،
وظهر عوده انحنه وصواب بالجنحان..
من تكلي هم تكدر بدوني تعيش..
ماجنت ادري تقصد جايّك هجران..
عمري بغيبتك باقيله مشوارين..
للدكتور مره ومره للدفان..
وخايف من اموت يهز ادينه الدوود..
الهجر خلاني ثوب وذكريات انسان..
يسرّي الكل ربع ساعه اريد احجي،
ومدري شلون اجره لخانة النسيان..
نقطة ضعفي شاماتك الجنها اسرار..
لان تنشاف بس من توكع القمصان..
وين انساك جربت السمر والبيض،
ملهوف اعتنيهم بس ارد فشلان..
وكل العاشروني مفاركين احباب..
مانسوني عينك بس نسوا بيه..
دخيل الله الزلم من تعشگ بلا راي..
ماتفرق على المأخوذه فصليه..
#رائد_ابو_فتيان
زعلان منه لخاطره،
ولخاطره ما سامحت..
مَر على بالي ودنكت..
لا اشرتله ولا صحت..
زعلان منه ومن نمت..
من الشوگ ميت صبحت..
عيونه واحلامه وصفنته ولهفته،
ودن عليه وما رحت..
و وصيت روحي اياج..
تنطينه وجه لمن يجي..
ان صالحت او ما صالحت..
اعصابي سواهن حبل،
ويتمرجح بواهس طفل..
و ما جنت اخلي بخاطره..
وماكتله ياما تمرجحت..
اخطاء ابد ما تنغفر،
ومتطيحله وما تنمحي..
واصفن واعاين طيبتي..
يا طيبتي شكد طيحت..
زعلان منه لخاطره،
ولخاطره ما سامحت.
#جبار_رشيد
المشكله بروحي حنينه،
وجنت اضن گلبج مثل گلبي يحن..
جنت اضن.. ياريت ابد ماجنت اضن..
انتي يا اول سراب وينشرب،
گلبي سد بابه على غيرج..
مثل سدة عين ميت والقفل ماله الترب..
شرد اقارن..غيرج يشد بالي مااضن،
انتي كائن يشبه اخر ورده من نسل الجنائن..
انتي وين وهمَ وين..
ماطفت لعيون معجب جنت ادور دمعه دين..
گلبي تدري الدمعه فشله..
شلون تنطي لعين عين..
الخذوج بديرة اهلج صلوا محبتج قصر،
شمالهم ماباوعولج طولج الماي اليخر..
ليش وصفوج بگمرهم الگمر مابي خصر..
مرتبه مكفاها روحج،
مثل دورة حسن دارت..
-الفرگه مدري شلون صارت..
وانتي عشتي ببالي لحد ما..
كمت احس الدنيا غارت..
غني يا شماتي غني..
اني مو جنه وخذوا تفاحه مني..
وصرت مدري شلون چني..
#المطوري
اجلبنك يليلي وبعد مامش حيل،
نوم الناس شبعت واني شابع ويل..
عـالراح وجفاني وخله دمعي يسيل..
لا دعوه التجيبه ولا بجي يجيبه..
اجلبنك يليلي ١٢ تجليبه..
اجلبنك يليلي وشفته بيه يخون،
عليه هانت عشرتي ودمعي كام يهون..
داس بوسط روحي وكلت يلا يمون..
يذب العيب بيه وبي الف عيبه..
اجلبنك يليلي ١٢ تجليبه..
*اجلبنك يليلي وراح حتى الصوت،
بس صياح گلبي يسمعه ياهو يفوت..
مااعرف اسولف مدري اضل مكبوت..
مصيبه السكته صارت والحجي مصيبه..
اجلبنك يليلي ١٢ تجليبه..
اجلبنك يليلي وراسي راح يطيح،
واحس اطفال رضع بيه جاي تصيح..
كمت بالماي اغصن واختنك بالريح..
اكمل عود عمري بهذا تعذيبه..
اجلبنك يليلي ١٢ تجليبه..
اجلبنك يليلي وبعد ماكو احد،
ومثل شد الاحبال الحزن بيه انشد..
والله البركان يخمد واني مااخمد..
امد ايدي على گلبي واسمع نحيبه..
اجلبنك يليلي ١٢ تجليبه.
#فاطمه_محراب
امس باليل سولفنه وذكرناك،
وذكرنه سوالفك ذيج الحنينه..
شعبالك نسينه من عبرناك..
وما سلمنه حسبالك نسينه..
لا تره انت هواي غلطان..
من شفناك دنكنه وبجينه..
شمس ملكاك واحنه عيونّه صغار،
ومنو كبال الشمس يفتحها عينه..
ومنو يشوفك ويصبر مايحاجيك..
گلب ينرادله بكد المدينه..
حرب جبنه العمر والباقي شوغات،
ورغم قوتنه بس يمك رخينه..
نحط عـ الورد اسمك عطره يزداد..
ونشم عطرك ونصحى شما غفينه.
#عمار_الدراجي
انه الوكته غفل وبليل جاما،
وحطني برحة التنور جاما..
شفتني تلوج بيه النار جاما..
شلتني ولحكت عـ الضال بيه.
#عباس_العبادي
ثكيله حجايتج والنهايات اخلاق،
عرفتيمن قبل احسن من اخلاقي..
مو بيج بجروحج مانطيت بيوم..
يعيبون على جرحج كلت لا راقي..
دسألي يا مكان البيه مامطعون،
منج..حتى اكلج والله ماباقي..
تتهميني احجي عنج يالضميرج مات،
يا ورده انتي كبلج تهمت الساقي..
كلامج شكك بصدري الحجي المضموم..
ودمع شكك خدودي..
وشكك اوراقي..
لتتشاقين كتلج بي جرح منصوب..
وتزعلين واكلج عذراً تشاقي..
وترجعين واعرفج راجعه تطعنين..
واكلج مو مهم..لطعنتي اشتاقي..
حيلج ويه جرحي من اوكع تشدين..
ويسألوني واكلهم شدت نطاقي..
واكول اليحب يصبر،
والجروح تهون..
ولو مو بالسهوله تنسي الكلمه..
ونرد نحلم نجبر خاطري المكسور..
وهَم الفركه بلكت نكدر نلمه..
وترجعين على جرحي الوارم تسحكين..
وتسبحين بفرح من يسبح بدمه..
هسه انتهى كلشي،
ومات ورد الشوگ..
ومايسوه بعد خاطر نجي نشمه..
هاي المره كلش ناوي عـ النسيان..
ومسامح وراضي وباري كل ذمه..
بس بيمن احلفج بعد لترجعين..
گلبي لسجن حُبج بعد مااسلمه..
روحي لغير گلبي،
گلبي شلج بي..
گلبي يحب صدك شلج بهالنعمه..
روحي وبيد الله مسلمه..لتخافين..
مو گلبج وحقج گلبي لمسلمه..
لان شوفني ذله وانه الماطخ راس..
ومشاني درب ماجنت متعلمه..
عموماً هايهيه..الحمد عالمكتوب،
خلينه نتفارك والحجي نضمه..
شسألوج..شحجيتي..مو مهم تهون..
سألوني وكلت..
ما صارت القسمه.
#ميثم_فالح
شلونك،
الحمدلله زين هيَ شلونها..
الجنت افرفح حتى اشوف عيونها..
الجانت امنيتي ابوس بابهم..
اتحدى واحد مثلي هلكد حابهم..
جانت امنيتي اعوضها الي فات،
واعدل لخاطرها وارجع للحياة..
شكد احبها الله يشهد ماادري،
ادري دون اسباب كسرت خاطري..
ضلت بنفسي اكلها بدونها،
حتى عافيتي تغير لونها..
حتى راحة بالي عافت بالي..
گلبي من نبضاته احس بي خالي..
كلشي واكف بيه بس سنيني،
تمشي و ليم بابها توديني..
كلشي يعتك بيه بس جروحها،
اكثر من الروح احبن روحها..
كون اعرف جا رسمت طيوفها..
وجان ذبلت الشعر بحروفها..
شوكت مااعقل اضل مجنونها،
وادعي من الله يضل يصونها..
الحمدلله زين..
هيَ شلونها.
#ميثم_فالح
ابعث رسايل شوگّكم وتعطلت بالسطر،
واسمك شبيه الوشم مانمسح بالمطر..
يالحملتني ذنب..ذنب اليغني بصفر..
وادم تصدر كتب،
بس اني اصدر قهر..
انت الجواز الذي..
حارمني من السفر..
#كاطع_المياحي
احن لگلبك الما حن،
واتلذذ بهجرك والوصل وياك..
واذكرك وابتسم وانوب ارد احزن..
حلاة الذكرى من وياها دمعه تطيح..
شفتك تبتسم ركعه بصلاة الون..
سلام لگلبك الما حن،
وسلام لدمك البارد..
يالـ ما كتلي اجيك شمالي افشل الروح..
ليش اكشخ وانطرك جني متواعد..
اذا محتاجني اتعنى..
حرك شوكك الراكد..
واذا ماشيت غيرك ناس..
واذا بأحضانهم كاعد..
انه بس حاولت ليش انحسب خوان..
ما دام الله يدري بگلبي بس واحد..
وصنت زرعك وانه بروحي مواسم جوع،
ومن سنبل ودادك كرصه ما حاصد..
انه غراني فيّك من جنت حطاب..
والمهيوبه امددها..
لمن جنت اخلي بكل جذع نيشان..
اختاريتك الشجره الاكعد بسدها..
يالماخذني دولاب وهوى اترجاك..
بوجهي الدنيا لتسدها..
هاي الروح طفله ودللتها بيوت..
وادم خبزه ما عدها..
ولك تكسر هواي گلوب من يضيع معضدها..
والي يمك گلب من تبتعد رجعه،
والك بيه حنين أمام طيوره يفزن بسرعه..
دنطيني مجال اتفاهم ويه الناس..
كل ما اريد اسولف تنزل الدمعه..
تعودتك هوى معَلم..ما ينشم،
اذا ميطوف برديه..
و لا ضيجت خلكي وياك..
تطلب واني اكول الدنيا مكضيه..
اضمك وين ما بيه..
انت بروحي و يشوفوك..
دكه بوجه عُربيه..
تزعل ينخطف لوني،
ويمدد جرف بعيوني..
بسرعه يبين شبيه..
الزلف لمن يبوسه الشيب..
علّيٌ زعلانه ترجيه.
#رائد_ابو_فتيان
للسلف من رديت وابجي على فركا،
شيبت حتى الحاط باروكه فوكا..
#حسن_الخيكاني
شمعه گطرني الصبر فوك الصواني،
وخيط بس الخيط يمعود صفيت..
#الكاطع
واحد شفته بالصدفه،
كلش بيك شبهته..
صارت عيني بعيونه..
راد يروح وكفته..
مو بس مره لا اكثر،
هاي الحاله تتكرر..
بكل انسان صادفته..
وجهك ليش ماضلي مكان كبالي ماشفته،
حتى مرايتي المفروض اطلع اني مو انت..
#باهر_الجنديل
اقروني الكتاب يموت،
اذا عـ الرف بقى مجلد..
انه مثل الجرح مااطيب،
اذا ماانشبك وانشد..
#احمد_المطوري