* * *
Тонгги саболарда – не инжа фириб,
Юрагим тўлиғдир титроқларига!
Урён дарахтларим совуққотмасин деб,
Пичирлаб ўтаман қулоқларига...
Қақроқ танинггизга бахмал бўлойин,
Сўник новдангизга қадайин куртак,
Яна сизлар билан хаёл сурайин,
Самога бойлониб турайин жиндак!
Жимликдан ажралиб чиққан тўлқиндек,
Булутлар оралаб учган ёлқиндек,
Қўйнимга камалак рангларин жамлаб,
Сочилиб кетайин –
Қондек, толқондек...
Вулқондек кўзимда тадорик тузгай
Ғуссалар мажлиси, ғам анжумани,
Менинг жисмим энди баҳайбат бўздай
Балолар, садолар, зарблар маскани!
Қани – оромимдан айирган кенглик?
Шивирлаб ўтаман кўчама-кўча,
Қайда инсон зоти туш кўрган тенглик,
Ё етиб бўлмасми қиёматгача –
Дуркун япроқларга,
Гулгун чоғларга,
Хушбўй ифорларга,
Хил-хил боғларга?!
Қўлимни чўзаман гоҳ арвоҳларга,
Йўлимни бурганча бебок роҳларга!
Тунги қийноқларда не роҳат, мантиқ?
Умрим иборатдир талпинишлардан,
Кунма-кун
Руҳимда туяман оғриқ,
Қулоғим остида – пичирлашлардан...
© Муҳаммад Сиддиқ
* * *
Шу совуқ шамоллар –
Узлуксиз эпкин
Ёнимдан ўтсайди мамнун, исиниб!
Ҳадя этгим келар дунёга ҳар кун
Кўнглимнинг оғриқли мусиқасини...
Айтгим келар –
Бағрим ичра ўртанган
Фалакнинг сержунбуш ҳикоясини,
Зулматга енгилган,
Ғурбатга кўнган,
Қисматдан ранжиган диллар сасини!
Шу кўзлар аксида – мен ҳам бир ўксик,
Ўйларга толганман сукутлар ичра,
Ёнганман рўёлар қафасин бузиб,
Неча бор заволга, риёга учраб?!
Бораман – ичимга аламни зичлаб,
Тим қора осмонга учқундек сачраб,
Умримни қаричлаб,
Йўлимни ўлчаб,
Илигим қамчилаб,
Қалбим қирғичлаб!
Бўлак-бўлак айлаб бору йўғимни,
Уфқлар ортига талпинаман гоҳ,
Кўрсатгим келади Ҳақ даргоҳини –
Дуч келса бирорта ичиккан нигоҳ...
Шу мудҳиш ўйинлар сўнгига етса,
Биз севган насимлар қайтса изига,
О, барча кудурат мен билан кетса
Ва қувонч югурса замин юзига!
Шовқинлар тинсаю,
Ҳар кун умидвор
Муждалар тафтида олсам исиниб,
Тақдиримдан мамнун боқиб, бахтиёр –
Тингласам ҳар кўнгил мусиқасини...
© Муҳаммад Сиддиқ
“Uni masxaraboz deb bilishardi. Lekin u ritsar edi.” Chaplin filmlarini qanday ko‘rish kerak?
Читать полностью…
Muhammadali Qo‘shmoqov. She’rlar
Muhammadali Qo‘shmoqov. “Issig‘dir so‘zing, o‘ylakim, yulduzing...”
Muhammadali Qo‘shmoqov. Go‘ro‘g‘li Chambili tobora obod.
Muhammadali Qo‘shmoqov. Muhabbatli dunyoning bir fidoyisi.
Muhammadali Qo‘shmoqov, Komiljon Jo‘rayev. “Lachplesis” eposi haqida. & Andrey Pumpur. Lachplesis – latish xalq qahramoni.
“Semurg‘” bitdi! Endi nashriyotga topshirsam bas. Eshakday ishlab bo‘lsa ham chiqaraman shu kitobni.
Читать полностью…
Charli Chaplin. Katta shahar chiroqlari (1931)
Читать полностью…
Xo‘sh, o‘tgan yili xuddi shu kuni o‘zimga o‘zim so‘z bergandim: yangi yil ichida tinmay mehnat qilaman, o‘qiyman, o‘rganaman, yozaman, deb. Imkon qadar erkinroq yashashga ahd qilgandim. Shunday bo‘ldi ham. Men uchun yangi dunyolar eshigi lang ochildi: musiqa ilmi, tasviriy san’at sehri va teatr zavqi! Bir kunim ham kitobsiz o‘tmadi. Yashinday tez o‘tdi bu yilim. Lekin ko‘p narsaga ulgurib qoldim deb o‘ylayman. Eng asosiysi, uchinchi kitobimni tayyorlaganim. Deyarli oxiriga yetib qoldi, yaqinda mundarijasini e’lon qilaman. Xullas, ijod mashaqqati, gashti bilan yashadim bu yilni. Shu tomondan ko‘nglim to‘q. Kimdir yangi mashina sotib oldi, kimdir uy. Men aytarli daromad ham qilmadim. Ochdan o‘lmaslik uchungina mayda-chuyda ishlar qilib yurdim. Garchi ko‘p narsa yo‘qotgan bo‘lsam-da, afsuslanmayman. Shunday bo‘lishi kerak ekan bo‘ldi. Evaziga esa bilim, she’r oldim. Bundan ortiq mukofot bo‘lmas! Shu o‘tgan rang-barang fasllarimdan, yaxshi-yomon kunlarimdan, sayohatlarimdan, erkin nafas olib yashaganimdan baxtiyorman. Shukr. Garchi ko‘zlagan natijalarimga erishmagan bo‘lsam-da, maqsadlarim sari intilishdan to‘xtamadim. Nasib qilgani-da, ortig‘i ortig‘ ekan. Vaqt esa qarab turmas, kimsan, lavoziming qanaqa, nimalar bilan bandsan, deb o‘tirmas ekan. Eplasang yashab qol, derkan. Qanday tusda, shaklda sinov va ko‘rguliklar tuhfa etishidan qat’iy nazar, bizga yengilmaslikni, kurashishni o‘rgatarkan. Shu tarafdan bir yilga ulg‘aydim. Anglaganim, baribir yillarimiz o‘z ixtiyorimizda, har bir lahzamiz o‘z qo‘limizda! Bizda bahosi yo‘q xazina – butun boshli umrimiz bor, uni yelga sovurib yuborishimiz ham, ko‘ngilga qarshi bormay yashab o‘tishimiz ham mumkin! Yangi yilni qarshi olarkanman, betakror xotiralarimga, bir-biridan g‘aroyib sarguzashtlarimga va eskirmaydigan yilimga xotirjam qo‘l silkiyapman! Sizlarni ham yangi marra, yangi sahifa bilan qutlayman. Uni istaganingizdek boyitishingizga tilakdoshman. Kirib kelayotgan yangi yilingiz siz sevgan ranglar, ohanglar va chehralarga to‘lig‘ bo‘lsin! Bayram muborak.
Читать полностью…
Chiltor chertayotgan barmoqlar raqsi, g‘ijjak nolasi, tanbur torlarining hikoyasi, doirasimon zarbli cholg‘u sadosi va gilam to‘qib kuylayotgan qalbning dilkash ovozi! Hammasi birgalikda qorishib, betakror mo‘jiza yaratmoqda. Tinglovchini mast qilgay! Bir eshitib ko‘ring-a, ruhingiz orom topadi.
👉 To‘qilgan tovushlar ijrosi
Shu saytga kirib “Izlam” ruknida chiqqan ilk kitoblar taqdimotini ko‘rsangizlar bo‘ladi. Hali montaj qilinadigan edi, tarqatvormanglar, deyishgandi. Bir yildanam o‘tib ketdi. Gap eshitsamam mayli endi, sizlargayam ulashyapman. Taqdimot juda zo‘r bo‘lgan.
Izlam | Taqdimot
Mana, yuqorida aytgan haligi spektaklimni videosi ham chiqibdi. “Eshak soyasidan chiqqan janjal”. Ko‘rib, bir maza qilib kulinglar!
Читать полностью…
* * *
Бироз чарчаб эдим,
Толиққан эдим,
Совуқ дунё ичра судраб танимни,
Сизни кута-кута қанча лат едим,
Чақирган эдим-eй Ҳаққа ялиниб!
Билсайдингиз –
Қанча соғинганимни,
Қанча оғриганим этолмам баён...
Ҳатто сезмабман ҳам қиш келганини,
Англамабман умрим бўлганин вайрон!
Ва етиб келгунча дийдорингизга,
Оппоқ чеҳрангизга, чиройингизга,
Не кўйларга тушдим –
Ўзим биламан,
Ҳозир йиқиламан...
Жим, пойингизга!
Қўзғатманг –
Осмонга термилиб ётай,
Майли, ғам-ғуссага ботай, кўмилай,
Иссиқ юрагимни тутайин сизга,
Сўнг ҳорғин жилмайиб қорга айланай!
Ёғишга шайланай –
Дарахтлар шохин
Макон этай қушлар сайрагунича,
Ювай армон тўла кўзларнинг доғин,
Азоб чекай улар яйрагунича!
Ва шодлик нелигин ҳис қилай бир зум,
Зулматнинг додини берай тўйгунча!
Хумордан чиққунча жар солай ҳар кун,
Овозим борича куйлай ҳар кеча –
Бизни йўқлаб келди ниҳоят қорлар,
Оппоқ кўйлак кийган гўзал дилдорлар,
Шу билан ўчсайди зора ҳар каснинг
Онгини қоплаган қат-қат ғуборлар...
Билсайдингиз –
Қанча уринганимни,
Қанча куйганимни сўзлаб беролмам!
Ҳаловат билмайман қачондан бери,
Нечун торлик қилар менга бу олам?!
Келинг,
Бу савашга дам беринг, қорлар,
Бу шабистон ичра шам беринг, қорлар,
Майли, яна минг йил ғам беринг ва лек
Озроқ толейимга ранг беринг, қорлар!
© Муҳаммад Сиддиқ
