Telegram-канал mehrob_uz - Mehrob.uz: Неотсортированное

Mehrob.uz

05 июля 2025 06:05

24. Магар: «Аллоҳ хоҳласа», дегин. Қачонки унутсанг, Роббингни эсла ва: «Шоядки Роббим мени бундан яхшироққа яқин бўлишимга ҳидоят қилса», дегин.
Инсоннинг ҳар бир ҳаракати, иши, ҳатто нафас олиб-чиқариши ҳам буткул Аллоҳнинг иродасига боғлиқдир. Аллоҳ таоло хоҳласа бўлади, хоҳламаса бўлмайди. Шунинг учун инсон бу ҳақиқатни бир лаҳза ҳам унутмаслиги, келажакдаги режа ва ишларини Аллоҳнинг хоҳишига боғлаб гапириши керак.
«Зинҳор бир нарсани: «Буни эртага албатта қилгувчиман», дема, магар: «Аллоҳ хоҳласа», дегин».
Яъни, келажакда бирон иш қилмоқчи бўлсанг, доимо «Инша Аллоҳ, қиламан», деб айт. Чунки келажак сенга нисбатан ғайбдир. Сал ўтиб нима бўлишини ўзинг билмайсан. Шунинг учун келажакдаги ҳар бир ишни « Аллоҳ хоҳласа, қиламан», деб зикр этгин. «Инша Аллоҳ» дейишни:
«Қачонки унутсанг, Роббингни эсла».
Яъни, унутиб қўйган бўлсанг, ёдингга тушиши билан дарҳол эсла:
«...ва: «Шоядки Роббим мени бундан яхшироққа яқин бўлишимга ҳидоят қилса», дегин».
Доимо яхшироққа яқин бўлишни умид қилгин ва шунинг учун ҳаракат этгин.
Бу танбеҳ инсон Аллоҳни унутиб, ҳамма нарсани ўзим қилавераман, деган нотўғри эътиқодга бориб қолмаслиги учун лозим. Лекин мусулмонларда келажак ҳақида ўйлаш, режа тузиш, қатъият билан уриниш беҳуда экан-да, деган салбий тушунча пайдо бўлмасин. Чунки мусулмон инсон келажак ҳақида фикр қилиши, режа тузиши, тадбирлар ишлатиши матлубдир.
Айни чоқда, Аллоҳнинг ирода ва хоҳиши инсоннинг ирода ва хоҳишидан доимо устун туришини, унинг хоҳлагани эмас, Аллоҳнинг хоҳлагани бўлишини унутмаслиги керак. Агар режалаштирган иши амалга ошса, Аллоҳ Ўзи ёрдам берди, деб шукр этади ва ҳовлиқиб кетмайди. Мабодо амалга ошмай қолса, Аллоҳнинг хоҳиши шу экан, деб сабр қилади ва ноумид бўлмайди.
Ҳозиргача каҳф эгаларининг ғорда қанча муддат ухлаганлари айтилмаган эди. Келаси оятда бу нарса очиқ айтилади:

@mehrob_uz