567148
ရန်ကုန်ခေတ်သစ်သတင်းဌာနသည် ၂၀၁၈ ခုနှစ်၊ ဇန်နဝါရီလ ၁ ရက်နေ့တွင် စတင်ထူထောင်ခဲ့သော သတင်းဌာနဖြစ်ပါသည်။ https://yktnews.com/
ပုလော၊ ရှပ်ပုံကျေးရွာသို့ စစ်ကြောင်းထိုးလာသော စစ်တပ်ကို တိုက်ခိုက်မှု စစ်သား ၁၀ ဦး ထိခိုက်သေဆုံးပြီး တော်လှန်ရေးရဲဘော် ၁ ဦး ကျဆုံး၊ စစ်တပ်၏ လက်နက်ကြီးဖြင့် ပစ်ခတ်မှုကြောင့် ပြည်သူ ၁ ဦးသေဆုံး
ရန်ကုန်၊ ဖေဖော်ဝါရီ ၁၆
တနင်္သာရီတိုင်း၊ ပုလောမြို့နယ်၊ ရှပ်ပုံကျေးရွာသို့ ဝင်ရောက်လာသော အကြမ်းဖက်စစ်တပ် စစ် ကြောင်းကို တိုက်ခိုက်ခဲ့ရာ စစ်သား ၁၀ ဦးထက်မနည်းသေဆုံးခဲ့ကြောင်း မြိတ်ခရိုင်အမှတ် ၁ တပ် ရင်း - ပုလော PDF တပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြား သည်။
ဖေဖော်ဝါရီလ ၁၃ ရက် နံနက် ၈ နာရီခန့်က ပုလောမြို့နယ်၊ ရှပ်ပုံကျေးရွာအုပ်စုသို့ စစ်ကြောင်းထိုး လာသည့် ဖက်ဆစ်စစ်ကောင်စီတပ်ကို ရှပ်ပုံရွာထိပ်၌ တော်လှန်ရေးပူးပေါင်းတပ်ဖွဲ့မှ တိုက်ခိုက်ခဲ့ ကြောင်း၊ မွန်းလွဲ ၁ နာရီခန့်တွင်လည်း ရှပ်ပုံကျေးရွာ ၊ ဆီတောင်အနီးတွင် ထပ်မံတိုက်ခိုက်ခဲ့ရာ စစ်ကောင်စီတပ်သား များအထိနာပြီး ပြန်လည်ဆုတ်ခွာသွားကြောင်း သိရသည်။
ဖေဖော်ဝါရီလ ၁၄ ရက် နံနက် ၁၀ နာရီ ၃၀ မိနစ်တွင်လည်း ပုလောမြို့နယ်၊ ရှပ်ပုံကျေးရွာအုပ်စု၊ ရေချိုကျေးရွာသို့ တောလမ်းမှတဆင့် ဝင်ရောက်လာသော အကြမ်းဖက်စစ်တပ် စစ်ကြောင်းကို တော်လှန်ရေးပူးပေါင်းတပ်ဖွဲ့မှ တိုက်ခိုက်ခဲ့ရာ အပြင်းအထန် တိုက်ပွဲဖြစ်ခဲ့ပြီး တော်လှန်ရေးတပ် ပေါင်းစု၏ တန်ပြန်ထိုးစစ်ကို မခံနိုင်ပဲ အထိနာသွားသော အကြမ်းဖက်စစ်တပ်သည် လေကြောင်း ၊ ရေကြောင်းမှ ပစ်ကူယူကာ ကယ်ထုတ်ရန် ကြိုးစားခဲ့ကြောင်း သိရသည်။
ညနေ ၃ နာရီ ဝန်းကျင်၌လည်း အကြမ်းဖက်စစ်တပ်က Mi 2 ရဟတ်ယာဉ်ဖြင့် ဗုံးအလုံး ၂၀ ကျော်ကျဲ ချခဲ့ပြီး ရေတပ်ကပါ လက်နက်ကြီး များဖြင့် ပစ်ကူပေးခဲ့ကြောင်း၊ ထိုကြောင့် စစ်ကောင်စီတပ်သား များ ထွက်ပြေးလွတ်မြောက်သွားခဲ့ကြောင်း သိရသည်။
ယင်းတိုက်ပွဲဖြစ်စဉ်များ အတွင်း စစ်ကောင်စီတပ်သား ၁၀ ဦးထက်မနည်း ထိခိုက်သေဆုံးကာ ဖက်ဆစ်တပ်၏ လက်နက်ကြီး ရမ်းသန်းပစ်ခတ်မှုကြောင့် ပြည်သူ ၁ ဦး သေဆုံးပြီး ၁ ဦးထိခိုက် ဒဏ်ရာရရှိခဲ့ကြောင်း သိရသည်။
“ပုလောမြို့ကနေ ထွက်လာတဲ့ စစ်ကြောင်းပါ၊ တိုက်ပွဲတွေအတွင်းမှာ စကစဘက်က ၁၀ ဦး ထက်မ နည်း ထိခိုက်သေဆုံးပါတယ်။” ဟု မြိတ်ခရိုင်အမှတ် ၁ တပ်ရင်း - ပုလော PDF တပ်ဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
အဆိုပါ တိုက်ခိုက်မှုကို ပြည်သူ့ကာကွယ်ရေးတပ်မတော်၊ မြိတ်ခရိုင်အမှတ် ၁ တပ်ရင်း၊ ကရင်အမျိုး သား ကာကွယ်ရေးတပ် (KNDO) ၊ တပ်ရင်း ၇ နှင့် မဟာမိတ်တပ်ပေါင်းစုတို့မှ တိုက်ခိုက်ခဲ့ခြင်းဖြစ် ပြီး မြိတ်ခရိုင်အမှတ် ၁ တပ်ရင်းမှ ရဲဘော် ၁ ဦး မြင့်မြတ်စွာ အသက်ပေးလှူခဲ့ရပြီး ရဲဘော် ၂ ဦး မစိုး ရိမ်ရ ဒဏ်ရာရရှိခဲ့ကြောင်း သိရသည်။
ဓာတ်ပုံ- တနင်္သာရီတိုင်းတွင် စစ်ယာဉ်တန်းတစ်ခုကို တိုက်ခိုက်ခဲ့စဉ်။ (ပုံအဟောင်းဖြစ်ပါသည်။)
အောင်လံမြို့၊ မကျည်းကုန်းရပ်ကွက်တွင် လူငယ်တစ်ဦးကို စစ်မှုထမ်း ဆင့်ခေါ်ရန် သွားသည့် ရဲတပ်ကြပ်ကြီး ကျော်သူရနှင့် အပေါင်းအပါ ပျူစောထီးကို အိမ်ရှင်က ဓားဖြင့် ခုတ်သတ်၊ အိမ်ရှင်နှင့်မိသားစုဝင်အားလုံး လွတ်မြောက်
ရန်ကုန်၊ ဖေဖော်ဝါရီ ၁၆
မကွေးတိုင်း၊ အောင်လံမြို့နယ်၊ မကျည်းကုန်းရပ်ကွက်တွင် စစ်မှုထမ်းဆင့်ခေါ်ရန် သွားရောက်သည့် ရဲတပ်ကြပ်ကြီး ကျော်သူရနှင့် အပေါင်းအပါ ပျူစောထီးကို အိမ်ရှင်က ဓားဖြင့် ခုတ်သတ်လိုက်ပြီး အိမ်ရှင်နှင့်မိသားစုဝင်အားလုံးမှာ ပြည်သူ့ကာကွယ် ရေးတပ်များ ထိန်းချုပ်သော နယ်မြေသို့ ရောက်ရှိ လွတ်မြောက်သွားပြီဖြစ်ကြောင်း မကွေးမြို့မှ ဒေသပြည်သူများနှင့် တော်လှန်ရေးသတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ ဖေဖော်ဝါရီလ ၁၅ ရက်နေ့ ညနေပိုင်း အောင်လံမြို့မှ ရဲတပ်ကြပ်ကြီး ကျော်သူရနှင့် အပေါင်းအပါ ပျူစောထီးတို့က မကျဉ်းကုန်းရပ်ကွက်သို့ ရောက်ရှိလာပြီး စစ်မှုထမ်းရမည့် လူငယ်တစ်ဦးကို လာရောက် ခေါ်ဆောင်ကြောင်း၊ ထိုအချိန် စစ်မှုထမ်းခေါ်ဆောင်ခံရမည့် လူငယ်၏ နေအိမ်မှ အိမ်ရှင်အမျိုးသားက ဓားဖြင့် ထွက်ရှိလာပြီး ရဲတပ်ကြပ်ကြီးကျော်သူရနှင့် အပေါင်းအပါ ပျူစောထီးတို့ကို ဓားဖြင့် ထွက်ခုတ်ရာ နှစ်ဦးစလုံး ပွဲချင်းပြီး သေဆုံးသွားကြောင်း သိရှိရသည်။
" ရဲတပ်ကြပ်ကြီး ကျော်သူရ နဲ့ ပျူစောထီးတစ်ဦးက မကျည်းကုန်းရပ်ကွက် ထဲကို စစ်မှုထမ်းဖို့ သွားခေါ်တာ။ လက်နက်လည်း မပါဘူး။ အရပ်ဝတ်နဲ့ပဲ သွားကြတာ။ လူငယ်ရဲ့ မိသားစုကလည်း စစ်မှုထမ်းဖို့ လာခေါ်မယ်ဆိုတာ သိထားတယ်။ အခြေခံလူတန်းစားမိသားစုထဲက ဖြစ်တော့ ရှောင်တိမ်းဖို့ကလည်း အဆင်မပြေဘူး။ အဲဒီတော့ လာခေါ်တဲ့အချိန် ဓားနဲ့ ထွက်ပိုင်းတာ။ ရဲတပ်ကြပ်ကြီး ကျော်သူရနဲ့ ပျူစောထီးကတော့ ပွဲချင်းပြီးပဲ။ ခဏကြာတော့ လူနာတင်ကားနဲ့ စခ၊ ရခတွေ ရောက်လာတယ်။ ခုတ်တဲ့သူရော၊ မိသားစုရော အကုန်လုံး လွတ်မြောက်သွားပါတယ်" ဟု ဖြစ်စဉ်ကို အသေးစိတ်သိရှိထားသော ဒေသပြည်သူတစ်ဦးက ပြောဆိုသည်။
ဓားဖြင့် ခုတ်ခံရ၍ သေဆုံးသွားသော ရဲတပ်ကြပ်ကြီး ကျော်သူရမှာ အသက် ၅၂ နှစ်ရှိနေပြီဖြစ်ပြီး ဖေဖော်ဝါရီလ ၁၇ ရက်နေ့တွင် သဂြိုလ်မည်ဖြစ်ကြောင်း၊ ၎င်း၏ အောင်လံမြို့ နေအိမ်တွင်နာရေး ပြင်ဆင်ထားကြောင်း သိရှိရသည်။
ရဲတပ်ကြပ်ကြီး ကျော်သူရသည် စစ် အာဏာမသိမ်းခင်က လောင်းကစား၊ မူးယစ်ဆေးဖြန့်ဖြူးသူများထံမှ ဆက်ကြေးကောက် ခံနေသူဖြစ်ပြီး စစ်အာဏာသိမ်းမှုဖြစ်ပွားချိန်တွင် ဆန္ဒပြပြည်သူများကို အကြမ်းဖက်ဖြိုခွင်းခြင်း၊ ဖမ်းဆီးသတ်ဖြတ်ခြင်းများ ကျူးလွန်ခဲ့သူဖြစ်ကြောင်း၊ ရဲတပ်ကြပ်ကြီး ကျော်သူရ ဓားခုတ်ခံရ၍ သေဆုံးသော သတင်း ထွက်ပေါ်လာချိန်တွင် အောင်လံမြို့တစ်မြို့လုံးမှ ပြည်သူများ ဝမ်းသာနေကြကြောင်း သိရှိရသည်။
"ရဲတပ်ကြပ်ကြီး ကျော်သူရက နာမည်ဆိုးလွန်းတော့ မနေ့က သူသေပြီလည်း ဆိုရော တစ်မြို့လုံးက ဝမ်းသာတာပေါ့" ဟု ဒေသပြည်သူက ဆက်လက်ပြောဆိုသည်။
ဖေဖော်ဝါရီလ ၁၂ ရက်နေ့ကလည်း ရန်ကုန်တိုင်း၊ ဒေါပုံမြို့နယ်၊ ကြည်စုရပ်ကွက်တွင် စစ်မှုထမ်းစာရင်း ပြုစုရေး သန်းခေါင်စာရင်း မိတ္တူများ လိုက်လံတောင်းခံနေသည့် ရပ်ကွက်အုပ်ချုပ်ရေးအဖွဲ့ကို အိမ်ရှင်က ဓာတ်ဆီဖြင့် လောင်း၍ မီးရှို့တိုက်ခိုက်မှု ဖြစ်ပွားခဲ့သည်။
ဓာတ်ပုံ- ဓားဖြင့် အခုတ်ခံရပြီး သေဆုံးသွားသည့် ရဲတပ်ကြပ်ကြီး ကျော်သူရ။
မင်းလှမှ စိတ်ဝေဒနာရှင် ကိုမိုးဝင်းအောင်ကို စစ်တပ်က စစ်မှုထမ်းတပ်သားအဖြစ် ဖမ်းဆီးပြီး စစ်သင်တန်းကျောင်းပို့၊ ရန်ကုန်တွင်လည်း ပစ္စည်းအဟောင်းဝယ်သူကို သူခိုးဟုစွပ်စွဲပြီး စစ်တပ်ထဲသွင်း
ရန်ကုန်၊ ဖေဖော်ဝါရီ ၁၆
ပဲခူးတိုင်း၊ မင်းလှမြို့နယ်တွင် စိတ်ဝေဒနာ ခံစားနေရသည့် ကိုမိုးဝင်းအောင်ကို စစ်တပ်က စစ်မှုထမ်းတပ်သားအဖြစ် စု ဆောင်း ဖမ်းဆီးပြီး စစ်သင်တန်းကျောင်းပို့ဆောင်ကာ စစ်သင်တန်းတက်ခိုင်းနေပြီဖြစ်ကြောင်း ကိုမိုးဝင်းအောင်နှင့်ရင်းနှီးသော မိတ်ဆွေများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဇန်နဝါရီလ ၂၁ ရက်နေ့တွင် မင်းလှမြို့နယ်၊ တောင်လိမ်ကျေးရွာတွင် နေထိုင်သော စိတ်ဝေဒနာ ခံစားနေရသည့် အသက် ၃၃ နှစ်အရွယ် ကိုမိုးဝင်းအောင် ၊ ကိုသံချောင်းနှင့် ကိုငဇော် တို့ကို ပဲခူးရိုးမပေါ်သို့ စစ်ကြောင်းထိုးလာသည့် စစ်တပ်က လူသားဒိုင်းအဖြစ် ပေါ်တာဆွဲ ဖမ်းဆီးသွားခဲ့ကြောင်း၊ ယင်းနောက် အဆိုပါ ဖမ်းဆီးခံရသူ ၃ ဦးကို ဖေဖော်ဝါရီလ ၅ ရက်နေ့တွင် အကြမ်း ဖက်စစ်တပ်က မင်းလှမြို့နယ် အုပ်ချုပ်ရေးမှူးရုံးသို့ ခေါ်ဆောင်လာခဲ့ပြီး တစ်ဦးလျှင် ငွေကျပ် သိန်း ၃၀ ဖြင့် ပြန်ရွေးရန် အကြောင်းကြားကြောင်း၊ ငွေကြေးဖြင့် ရွေးယူမှုကြောင့် ကိုသံချောင်းနှင့် ကိုငဇော် တို့မှာ ပြန်လည် လွတ်မြောက်လာခဲ့သော်လည်း စိတ်ဝေဒနာရှင်ကိုမိုးဝင်းအောင်မှာမူ စစ်သင်တန်းကျောင်းသို့ အပို့ခံလိုက်လိုက်ရကြောင်း သိရှိရသည်။
"မင်းလှမြို့နယ် ထွေအုပ်ရုံးမှာ မိသားစုတွေက လိုက်ထုတ်တာ ကိုသံချောင်းနဲ့ ကိုငဇော်ကို ပြန်လွှတ်ပေးတယ်။ ကိုမိုးဝင်းအောင် ကို စစ်မှုထမ်းဖို့ စစ်သင်တန်းပို့လိုက်ပြီ။ ကိုမိုးဝင်းအောင်က အရပ် ၄ ပေခွဲပဲ ရှိတယ်။ စိတ်လည်းမနှံ့ဘူး။ သားစိမ်း၊ ငါးစိမ်းတွေလည်း စားတယ်။ တစ်ချက်တစ်ချက် စိတ်ထဖောက်သွားရင် ထိန်းလို့မရဘူး။ သူ့ကိုတော့ ပြန်လွှတ်ပေးစေချင်တယ်။ သူ့အမေကတော့ သူ့သားစိတ်နဲ့ အိပ်ရာထဲလဲနေတယ်" ဟု ကိုမိုးဝင်းအောင်၏ မိတ်ဆွေက ပြောဆိုသည်။
အလားတူ ဖေဖော်ဝါရီလ ၁၃ ရက်နေ့ နံနက် ၄ နာရီခန့်အချိန်ကလည်း မင်းလှမြို့၊ ကံဦးကွက်သစ် ရပ်ကွက်တွင် နေထိုင်သော လူငယ် ၁ ဦးသည် ၄င်း အလုပ်လုပ်ကိုင်နေသော မြို့မစျေးအတွင်းရှိ ကုန်စုံဆိုင်သို့ စျေးရောင်းရန် သွားရောက်စဥ် စစ်တပ်က စစ်မှုထမ်းခိုင်းရန် ဖမ်းဆီးသွားခဲ့ကြောင်း သိရသည်။
ထို့အတူ ရန်ကုန်မြို့၊ သင်္ဃန်းကျွန်းမြို့နယ်၊ ၁၆/၃ ရပ်ကွက်တွင် တွန်းလှည်းဖြင့် ပစ္စည်းအဟောင်းများ လိုက်လံဝယ်ယူနေသော အမျိုးသား ၁ ဦးကိုလည်း ရာအိမ်မှူး လေးနိုင်က ရိုက်နှက် ဖမ်းဆီးပြီး စစ်မှုထမ်းခိုင်းရန် စစ်တပ်ထဲသို့ ပို့ဆောင်လိုက်ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၁၄ ရက်နေ့ သင်္ဃန်းကျွန်းမြို့နယ်၊ ၁၆/၃ ရပ်ကွက်တွင် တွန်းလှည်းဖြင့် ပစ္စည်းအဟောင်းများ လိုက်လံဝယ်ယူနေသော လင်မယား ၂ ဦးကို ရာအိမ်မှူး လေးနိုင်က ခိုးရာပါ ပစ္စည်းများ ဝယ်ယူသည်ဟုဆိုကာ ရိုက်နှက် ဖမ်းဆီးခဲ့ကြောင်း၊ ထိုသို့ ဖမ်းဆီးပြီးနောက် အမျိုးသမီးဖြစ်သူကို ပြန်လွှတ်လိုက်ပြီး အမျိုးသားဖြစ်သူကို စစ်မှုထမ်းရန် စစ်တပ်ထဲ ထည့်သွင်းလိုက်ခြင်းဖြစ်ကြောင်း သိရသည်။
" ၁၆/၃ ရပ်ကွက်မှာ တွန်းလှည်းနဲ့ ပစ္စည်း အဟောင်းတွေ လိုက်ဝယ်နေတဲ့ လင်မယား ၂ ဦးက Air con အဟောင်းကို တင်ပြီး လာတဲ့ အချိန်တွင် သူခိုးပစ္စည်း ဝယ်လာတယ်ဆိုပြီး လေးနိုင်က စွပ်စွဲ ဖမ်းဆီးပြီး ရပ်ကွက် ရုံးခန်းခေါ်သွားတယ်။ လင်းမယား ၂ ဦးလုံးကိုလည်း ပါးတွေ နားတွေ ရိုက်ပါတယ်။ အမျိုးသမီးဖြစ်သူက အိမ်ရှင်ဆီကနေ ဝယ်လာတဲ့ အကြောင်း ရှင်းပြတာကို လက်မခံဘဲ အတင်း အဓမ္မကို ရိုက်နှက်တာပါ။ အမျိုးသမီးက အိမ်ရှင်ကို လိုက်ပြပါမယ့် ပြောလဲမရဘူး။ မင်းတို့ နောက်ကို လိုက်ကြည့်စရာ မလိုဘူးဆိုပြီး အမျိုးသမီးကို ၁ သိန်းသွားရှာလာခဲ့လို့ပြောပါတယ်။ အမျိုးသမီး ဖြစ်သူက ကျွန်မသွားရှာ လာခဲ့မယ်ဆိုပြီး နံနက် ကြတော့ ပြန်လာတော့ နင့်ယောကျာ်းကို စစ်မှုထမ်းဖို့ ပို့လိုက်ပြီလို့ ပြောပါတယ်။ အမျိုးသမီး ဖြစ်သူက ငိုလိုက်တာဆိုတာ လူမြင်မကောင်းဘူး။ လေးနိုင်က ရပ်ကွက်ထဲမှာ အပြစ်မဲ့ ပြည်သူတွေ ငွေမရှိတဲ့လူတွေကို အနိုင်ကျင့်နေတာပါ" ဟု ဒေသပြည်သူ တစ်ဦးက ပြောဆိုသည်။
အကြမ်းဖက်စစ်ကောင်စီတပ်က စစ်မှုထမ်းအပတ်စဉ် ၁၀ အတွက် နိုင်ငံတစ်ဝန်းတွင် ပေါ်တာဆွဲ ဖမ်းဆီးမှုများ လုပ်ဆောင်နေပြီး ယခုစစ်မှုထမ်းအပတ်စဉ်တွင် စစ်သားအရေအတွက် ၄၀၀၀ ဝန်းကျင်သာ ရရှိကြောင်း နေပြည်တော်စစ်မှုထမ်းဆင့်ခေါ်ရေးဗဟိုအဖွဲ့ထံမှ သိရှိရသည်။
Khit Thit သတင်းဌာန ဖေဖော်ဝါရီ ၁၆ ရက်နေ့ ရုပ်သံသတင်းအစီအစဉ်
By ရန်ကုန်ခေတ်သစ်
ဒီကနေ့ ဖေဖော်ဝါရီ ၁၆ ရက်နေ့မှာ ရန်ကုန်ခေတ်သစ်သတင်းဌာရဲ့ This Week ရုပ်သံအစီအစဉ်ကို ထုတ်လွှင့် သွားမှာဖြစ်ပါတယ်။ဒီအစီအစဉ်မှာ တစ်ပတ်အတွင်း မြန်မာနိုင်ငံမှာ ဖြစ်ပေါ်ခဲ့တဲ့ သတင်းတွေထဲကမှ ထူးခြားတဲ့ သတင်းတွေကို ရွေးချယ်ကောက်နုတ်သုံးသပ် တင်ဆက်ပေး ထားတာလည်း ဖြစ်ပါတယ်။
https://www.youtube.com/watch?v=DY9deFOSrSU
ပုသိမ်ကြီးမြို့ အခြေစိုက် ခလရ ၄ မှ ပြည်သူ့စစ် ၂ ဦး သေနတ် ၂ လက်ယူဆောင်လာပြီး အလင်းဝင်
ရန်ကုန်၊ ဖေဖော်ဝါရီ ၁၅
မန္တလေးတိုင်း၊ ပုသိမ်ကြီးမြို့ အခြေစိုက် ခလရ ၄ မှ ပြည်သူ့စစ် ၂ ဦး သေနတ် ၂ လက်ယူဆောင်လာပြီး အလင်းဝင်ရောက်ခဲ့ကြောင်း မန္တလေးခရိုင် ပြည်သူ့ကာကွယ်ရေးအဖွဲ့က ထုတ်ပြန်ထားသည်။
ဇန်နဝါရီလ ၂၅ ရက်နေ့တွင် ခလရ ၄ တပ်ရင်းမှ ပြည်သူ့စစ် ၂ ဦးသည် သေနတ် ၂ လက်ယူဆောင်လာပြီး အလင်းဝင်ရောက်ခဲ့ခြင်းဖြစ်ကြောင်း သိရသည်။
အဆိုပါ ပြည်သူ့စစ် ၂ ဦးသည် MA1 သေနတ် ၂ လက်၊ ကျည် ၄၁၇ တောင့်နှင့် ကျည်ဘောက် ၆ ခုတို့ ယူဆောင်လာခြင်းကြောင့် မန္တလေးခရိုင် ပကဖ က ဂုဏ်ပြုငွေ ၁ ဦးလျှင် ငွေကျပ် ၁၀ သိန်း ချီးမြှင့်ခဲ့ပြီး လွတ်မြောက်နယ်မြေကို ပို့ဆောင်ထားပြီး ဖြစ်ကြောင်း သိရှိရသည်။
မန္တလေးခရိုင် ပကဖ အဖွဲ့အနေဖြင့် အလင်းဝင်ရောက်လာသူများနှင့် ဝင်ရောက်လိုသူများကိုလည်း ကြိုဆိုလျှက်ရှိပြီး မန္တလေးခရိုင်အတွင်းရှိ စစ်ကောင်စီ လက်အောက်ခံ ပြည်သူ့စစ်များ၊ တပ်မတော်သားများ၊ ရဲများ အလင်းဝင်ရောက်လိုလျှင် မန္တလေးခရိုင် ပြည်သူ့ကာကွယ်ရေးအဖွဲ့ကို ချိတ်ဆက် ဆက်သွယ်နိုင်ကြောင်း အသိပေး ထုတ်ပြန်ထားသည်။
မြိုင် ကန်နီရွာတွင် မွန်းမံ သင်တန်းတက်နေသော ပျူစောထီးများကို လက်နက်ကြီးများဖြင့် ပစ်ခတ် တိုက်ခိုက်မှု စစ်တပ်ဘက်မှ ထိခိုက်မှုရှိ
ရန်ကုန်၊ ဖေဖော်ဝါရီ ၁၅
မကွေးတိုင်း၊ မြိုင်မြို့နယ်၊ ကန်နီ ပျူစောထီးရွာတွင် မွန်းမံ သင်တန်းတက်နေသော ပျူစောထီးများကို လက်နက်ကြီးများဖြင့် ပစ်ခတ် တိုက်ခိုက်ရာ စစ်တပ်ဘက်မှ ထိခိုက်မှုရှိကြောင်း ဗစ်တာ ပြောက်ကျား တပ်ဖွဲ့မှ ကိုဗစ်တာက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၁၄ ရက်နှင့် ၁၅ ရက်နေ့တွင် ကနီပျူစောထီးရွာ၌ သရက်ကန်ရွာ၊ သရက်ကွရွာ၊ ဝက်ပုတ်ရွာ၊ တွင်းမရွာနှင့် ကန်နီရွာမှ လက်နက်ကိုင် ပျူစောထီး အင်အား ၁၂၀ ခန့်သည် မွန်းမံ သင်တန်းတက်နေစဉ် တော်လှန်ရေး တပ်ဖွဲ့များက ၂ ရက်ဆက်တိုက် ၁၈၀ မမ လက်နက်ကြီး ၅ လုံး၊ ၆၀ မမ လက်နက်ကြီး ၉ လုံးတို့ဖြင့် ပစ်ခတ် တိုက်ခိုက်ခဲ့ခြင်းဖြစ်ကြောင်း သိရသည်။
ယင်း တိုက်ခိုက်မှု အတွင်း ပျူစောထီးများ မွန်းမံ သင်တန်းဝင်း အတွင်းထွက်ပြေးမှုများရှိပြီး ထိခိုက်မှုများရှိကာ သေဆုံးမှု အရေအတွက် အတိအကျကို အတည်ပြုနိုင်ခြင်းမရှိသေးကြောင်း၊ ထို့ပြင် အကြမ်းဖက် စစ်ကောင်စီ တပ်သားများကလည်း ၆၀ မမ လက်နက်ကြီးများ၊ လက်နက်ငယ်များ၊ စက်လက်များဖြင့် ပြန်လည် ပစ်ခတ် တိုက်ခိုက်ခဲ့ပြီး တော်လှန်ရေး တပ်ဖွဲ့ဝင်များ အထိအခိုက်မရှိ ဆုတ်ခွာနိုင်ခဲ့ကြောင်း သိရှိရသည်။
"စစ်ခွေး သေစာရင်းကတော့ အတည်မပြုနိုင်သေးဘူး။ ၁၄ ရက်နေ့ နံနက် ၈ နာရီ ၃၀ မိနစ် ကနေ ၁၀ နာရီ ၃၀ မိနစ် ထိ ၁ ကြိမ်၊ ၁၅ ရက်နေ့ နံနက် ၈ နာရီ ၃၀ မိနစ်ကနေ ၉ နာရီ ၃၀ မိနစ်ထိ ၁ ကြိမ်ပေါ့။ ၂ ရက်ဆက်တိုက် သွားရောက် တိုက်ခိုက်ခဲ့တာပါ။ ပျူခွေး လက်နက်ကိုင် ၁၂၀ ခန့်ရှိတဲ့ မွန်းမံ သင်တန်းကို ပထမ ရက်ကတော့ ပျူရွာဘက်က လက်နက်ကြီး၊ စက်လက်နဲ့ လက်နက်ငယ်တွေနဲ့ ပြန်ပစ်တယ်။ ကျနော်တို့ ရဲဘော်တွေ အထိအခိုက်မရှိ ဆုတ်ခွာနိုင်ခဲ့တယ်" ဟု ဗစ်တာ ပြောက်ကျား တပ်ဖွဲ့မှ ကိုဗစ်တာက ပြောဆိုသည်။
အဆိုပါ တိုက်ခိုက်မှုကို ဗစ်တာပြောက်ကျားတပ်ဖွဲ့၊ လျှပ်စီးပြောက်ကျားတပ်ဖွဲ့၊ လင်းမွှေ အဖွဲ့ မြိုင် ပကဖ၊ အညာမြေ ပြောက်ကျားတပ်ဖွဲ့၊ ပခုက္ကူခရိုင် တပ်ရင်း ၂ နှင့် ပြည်သူ့လွတ်မြောက်ရေး ကျောင်းသားတပ်တော်တို့က ပူးပေါင်းလုပ်ဆောင်ခဲ့ကြောင်း သိရသည်။
တောင်ပိုင်း စစ်ဒေသတွင် တစ်ပတ်တာအတွင်း တိုက်ပွဲပေါင်း ၁၈ ကြိမ် ဖြစ်ပွားပြီး စစ်ကောင်စီ တပ်သား ၅၀ ကျော်သေဆုံးကာ စစ်သုံ့ပန်း ၂၇ ဦး ဖမ်းဆီးရမိ
ရန်ကုန်၊ ဖေဖော်ဝါရီ ၈
တောင်ပိုင်း စစ်ဒေသနယ်မြေတွင် တစ်ပတ်တာအတွင်း တိုက်ပွဲပေါင်း ၁၈ ကြိမ် ဖြစ်ပွားပြီး စစ်ကောင်စီ တပ်သား ၅၀ ကျော် သေဆုံးကာ စစ်သုံ့ပန်း ၂၇ ဦး ဖမ်းဆီးရမိခဲ့ကြောင်း သိရသည်။
ဖေဖော်ဝါရီလ ၁ ရက်နေ့မှ ၇ ရက်နေ့ထိ ပြည်သူ့ကာကွယ်ရေးတပ်မတော်၊ တောင်ပိုင်းစစ်ဒေသ နယ်မြေတွင် တောင်ပိုင်း စစ်ဒေသ၊ ပြည်သူ့ကာကွယ်ရေးတပ်မတော် (PDF) ၊ KNU-KNLA၊ BPLA၊ FFD နှင့် အခြား တော်လှန်ရေး ပူးပေါင်းအဖွဲ့များ ပူးပေါင်း၍ အကြမ်းဖက် စစ်တပ်ကို တိုက်ခိုက်မှု ၁၈ ကြိမ် ပြုလုပ်ခဲ့ကြောင်း သိရှိရသည်။
ယင်း တိုက်ပွဲများအတွင်း အကြမ်းဖက် စစ်တပ်ဘက်မှ ၅၀ ဦးနှင့် အထက် သေဆုံး၍ ၂၀ ဦး ဒဏ်ရာရရှိခဲ့ကြောင်း၊ စခန်းသိမ်းတိုက်ပွဲအနေဖြင့် တောင်ပိုင်းစစ်ဒေသ၊ အမှတ် ၂ စစ်ဒေသခွဲ၊ ဗျူဟာ ၂၇ တပ်ရင်းတပ်ဖွဲ့များ၊ နဂါးဖြူစစ်ကြောင်း၊ တောင်ညိုစစ်ကြောင်း၊ LDF၊ ပြည်သူ့ကာကွယ်ရေးအဖွဲ့ (ပကဖ)နှင့် မဟာမိတ်များဖြစ်သည့် KNLA၊ BPLA၊ FFD ဒရုန်းအဖွဲ့တို့ ပူးပေါင်း၍ ဘီးလင်းမြို့နယ်၊ မဲပလီဗျူဟာစခန်းကုန်းအား ဖေဖော်ဝါရီလ ၁ ရက်နေ့တွင် သိမ်းပိုက်နိုင်ခဲ့ပြီး လက်နက်ခဲယမ်းများကိုလည်း သိမ်းဆည်းရရှိခဲ့ကြောင်း သိရသည်။
မဲပလီဗျူဟာစခန်းသိမ်းတိုက်ပွဲတွင် ဖမ်းဆီးရမိသော စစ်သုံ့ပန်း ၂၇ ဦးကို လိုအပ်သည့် ကျန်းမာရေး စောင့်ရှောက်မှု ပေးထားလျက်ရှိပြီး ထွက်ပြေးလွတ်မြောက်သွားသူများကိုလည်း တော်လှန်ရေး ပူးပေါင်းတပ်ဖွဲ့များက လိုက်လံ ချေမှုန်းလျက်ရှိကြောင်း၊ အဆိုပါ ထိတွေ့ တိုက်ပွဲများအတွင်း ပြည်သူ့ကာကွယ်ရေး တပ်ဖွဲ့ဝင် ၄ ဦး ကျဆုံးခဲ့ပြီး ထိခိုက်ဒဏ်ရာရသူ ၁၈ ဦး ရှိကြောင်း သိရှိရသည်။
နောက်ပြန်မလှည့်ကြေး ဒီတော်လှန်ရေး လူထုသပိတ် စစ်ကြောင်းက စစ်အာဏာရှင် ချေမှုန်းရေးဆန္ဒပြ
ရန်ကုန်၊ ဖေဖော်ဝါရီ ၈
ယင်းမာပင်မြို့နယ်တွင် နောက်ပြန်မလှည့်ကြေး ဒီတော်လှန်ရေး လူထုသပိတ် စစ်ကြောင်း ဦးဆောင်ကာ "အထွေထွေဖိနှိပ်မှုကို အံတုကြ ဘုံရန်သူကို ထွက်ပေါက်မပေးနဲ့ "စာသားများကိုင်ဆောင်ကာ ဖေဖော်ဝါရီလ ၈ ရက်နေ့တွင် စစ်အာဏာရှင် ချေမှုန်းရေး ဆန္ဒပြခဲ့ကြောင်း သိရှိရသည်။
ဖယ်ခုံမြို့နယ် ပြည်သူလုံခြုံရေးတပ်ဖွဲ့က လမ်းပိုင်းဆိုင်ရာ လုံခြုံရေး စစ်ဆေးမှုများ ပြုလုပ်ပြီး စစ်တပ်၏ လေကြောင်း တိုက်ခိုက်မှု အန္တရာယ် ကင်းရှင်းရေး သတိပညာပေး ဟောပြောပွဲများ ပြုလုပ်
ရန်ကုန်၊ ဖေဖော်ဝါရီ ၈
ရှမ်းပြည်နယ်တွင် ဖယ်ခုံမြို့နယ် ပလဖ က လမ်းပိုင်းဆိုင်ရာ လုံခြုံရေး စစ်ဆေးမှုများ ပြုလုပ်ပြီး စစ်တပ်၏ လေကြောင်း တိုက်ခိုက်မှု အန္တရာယ် ကင်းရှင်းရေး သတိပညာပေး ဟောပြောပွဲများ ပြုလုပ်ခဲ့ကြောင်း ဖယ်ခုံမြို့နယ် ပြည်သူလုံခြုံရေးတပ်ဖွဲ့ - PK Police မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖယ်ခုံမြို့နယ်အတွင်း ပြည်သူများ လမ်းပိုင်းဆိုင်ရာ ယာဉ်အန္တရာယ် ကင်းရှင်းရေးနှင့် စစ်တပ်ထုတ်ကုန်ပစ္စည်းများ သယ်ဆောင်ခြင်း မပြုလုပ်ရန် ဖယ်ခုံမြို့နယ် ပြည်သူလုံခြုံရေးတပ်ဖွဲ့ - PK Police မှ ရဲဘော်များက နေ့စဉ် စစ်ဆေးမှုများ ပြုလုပ်နေကြောင်း သိရသည်။
ထို့ပြင် ပြည်သူများ လမ်းပိုင်းဆိုင်ရာ ယာဉ်အန္တရာယ် ကင်းရှင်းရေး အသိပညာပေး လက်ကမ်းစာစောင်များ ဖြန့်ဝေနိုင်ရန်အတွက် ရန်ပုံငွေလိုအပ်လျက်ရှိပြီး လှူတန်းလိုသော ပြည်သူများ အနေဖြင့် https://www.facebook.com/profile.php?id=100093882293832 ကို ဆက်သွယ် လှူတန်းပေးရန် မေတ္တာရပ်ခံကြောင်း ဖယ်ခုံမြို့နယ် ပြည်သူလုံခြုံရေးတပ်ဖွဲ့ - PK Police မှ တာဝန်ရှိသူ တစ်ဦးကပြောဆိုသည်။
အကြမ်းဖက် စစ်တပ်က ဖယ်ခုံမြို့နယ်ရှိ ကျေးရွာများကိုလည်း လေကြောင်း တိုက်ခိုက်မှုများ ပြုလုပ်နေ၍ ပြည်သူများ လေကြောင်း အန္တရာယ် ကင်းရှင်းရေးအတွက် ဖယ်ခုံမြို့နယ် ပြည်သူလုံခြုံရေးတပ်ဖွဲ့မှ သတိပညာပေး ဟောပြောပွဲများလည်း ပြုလုပ်ပေးနေကြောင်း သိရသည်။
Khit Thit သတင်းဌာန၏ ဖေဖော်ဝါရီ ၈ ရက် ညနေပိုင်း ရုပ်သံသတင်းအစီအစဉ်
By ရန်ကုန်ခေတ်သစ်
ဒီကနေ့ ဖေဖော်ဝါရီ ၈ ရက် ညနေပိုင်း တင်ဆက်ပေးမယ့် သတင်းတွေကတော့
ထိုင်းနိုင်ငံကနေ ကျားဖြန့်ငွေလိမ်ဂိုဏ်းတွေကို နှိမ်နင်းမှု အစီအစဉ် တစ်ရပ်အနေနဲ့ မြန်မာနိုင်ငံ နယ်စပ်မြို့တွေကို ထိုင်းဘက်ကနေလျှပ်စစ်မီး နဲ့ လောင်စာဆီတွေ ဖြတ်တောက်လိုက်တဲ့နောက်မှာပဲ မြ၀တီမြို့မှာ စစ်တပ်လော်ဘီ အမျိုးသားရေးအစွန်းရောက် သူရိန်မင်းထွန်းဆိုသူဦးဆောင်ပြီး ထိုင်း ကုန်စည်တွေကို သပိတ်မှောက်ရေး လှို့ဆော် နေပြန် သလို ၊ ကျားဖြန့်ငွေလိမ်ဂိုဏ်းတွေကို ကာကွယ် ပေးထားတဲ့ စစ်တပ်လက်အောက်ခံ BGF တပ်ဖွဲ့ဝင်တွေပါ ပြည်သူအယောင်ဆောင်ပြီး ပါဝင်ဆန္ဒပြနေ တယ်လို့ မြဝတီမြို့နေပြည်သူတွေက ရန်ကုန်ခေတ်သစ်ကို ပြောပါတယ်။
အကြမ်းဖက် စစ်ကောင်စီက မြန်မာတစ်နိုင်ငံလုံးမှာရှိတဲ့ လူငယ်တွေကို နည်းမျိုးစုံနဲ့ ဖမ်းဆီး ပေါ်တာဆွဲပြီး စစ်မှုထမ်းခိုင်းနေပေမယ့် အကြမ်းဖက် စစ်ခေါင်းဆောင် မင်းအောင်လှိုင် ရဲ့မိသားစုတွေ ကစပြီး စစ်ဗိုလ်ချုပ်တွေ ရာထူးကြီးထိပ်ပိုင်းအသိုင်းအ၀ိုင်းရဲ့ သား သမီးမြေးမြစ်တွေဟာ စစ်မှုထမ်း စာရင်းထဲမှာ မပါဝင်ဘူးလို့ စစ်တမ်းတွေအရ သိရပါတယ်။
ကရင်နီပြည်နယ်က မိုးဗြဲမြို့တိုက်ပွဲမှာ အကြမ်းဖက် စစ်ကောင်စီတပ်သားတွေရဲ့ မသာအလောင်း ၅ လောင်းနဲ့အတူ လက်နက်ခဲယမ်းတွေပါ တော်လှန်ရေးတပ်တွေက သိမ်းဆည်းရရှိထားပြီး ၊ တိုက်ပွဲ အတွင်း စစ်ကောင်စီဘက်က အမျိုးသမီး စစ်သည်တချို့ကိုပါ အသုံးပြုနေတာကို မြင်တွေ့နေရတဲ့ သတင်းအပါအဝင် နောက်ဆုံးရသတင်းတွေကို တင်ဆက်ပေးပါမယ်။
https://youtu.be/KOHRSkoSoj0?si=jtLboKs83CYYv9P9
စလင်းတွင် စစ်သင်္ဘော ၁ စီးကို ကြားဖြတ် တိုက်ခိုက်မှု စစ်ကောင်စီ တပ်သား ၁ ဦးသေဆုံး၊ မြိုင်ရှိ လင်းကတောရဲစခန်းကိုလည်း လက်နက်ကြီးများဖြင့် ပစ်ခတ် တိုက်ခိုက်
ရန်ကုန်၊ ဖေဖော်ဝါရီ ၈
မကွေးတိုင်း၊ စလင်းမြို့နယ်တွင် အကြမ်းဖက် စစ်တပ်၏ စစ်သင်္ဘော ၁ စီးကို ကြားဖြတ် တိုက်ခိုက်ရာ စစ်ကောင်စီ တပ်သား ၁ ဦးသေဆုံးခဲ့ကြောင်း စလင်းမြို့နယ် ပြည်သူ့ကာကွယ်ရေးအဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၇ ရက်နေ့ မွန်းလွဲ ၁၁ နာရီ ၃၀ မိနစ်ခန့်တွင် စလင်းမြို့နယ်၊ စလင်းမြို့ တညောင်တိုက်နယ်အတွင်း မင်းဘူးဘက်မှမြစ်ကြောင်းအတိုင်း ဆန်တက်လာသော စစ်သင်္ဘော ၁ စီးကို တော်လှန်ရေး တပ်ဖွဲ့များက ကြားဖြတ် တိုက်ခိုက်ခဲ့ခြင်းဖြစ်ကြောင်း သိရသည်။
ယင်း တိုက်ခိုက်မှု အတွင်း အကြမ်းဖက် စစ်ကောင်စီ တပ်သား ၁ ဦး သေဆုံးပြီး ၆ ဦးထက်မနည်း ထိခိုက်ဒဏ်ရာရရှိခဲ့ကြောင်း၊ တော်လှန်ရေးတပ်ဖွဲ့ဝင်များ အထိအခိုက်မရှိ ဆုတ်ခွာနိုင်ခဲ့ကြောင်း သိရှိရသည်။
"စစ်ခွေး ၁ ကောင် သေဆုံးပြီး ၆ ကောင် ထိခိုက်ဒဏ်ရာရပါတယ်။ ကျနော်တို့ ရဲဘော်တွေတော့ အထိအခိုက်မရှိ ဆုတ်ခွာနိုင်ခဲ့ပါတယ်" ဟု စလင်းမြို့နယ် ပြည်သူ့ကာကွယ်ရေးအဖွဲ့မှ တာဝန်ရှိသူ တစ်ဦးက ပြောဆိုသည်။
အဆိုပါ တိုက်ခိုက်မှုကို စလင်းမြို့နယ် (ပကဖ) နှင့်ပူးပေါင်းတပ်ဖွဲ့များဖြစ်သော ဒေါင်းစစ်အောင် LPDF ၊ မင်းဘူးခရိုင် လက်ရုံးအဖွဲ့၊ ဧရာဘီလူး LPDF နှင့် Triger Frighter LPDF တို့က ပူးပေါင်း လုပ်ဆောင်ခဲ့ကြောင်း သိရသည်။
ထို့ပြင် မကွေးတိုင်း၊ မြိုင်မြို့နယ်တွင်လည်း အကြမ်းဖက် စစ်ကောင်စီ တပ်သားများ တပ်စွဲထားသော လင်းကတောရဲစခန်းကို လက်နက်ကြီးများဖြင့် ပစ်ခတ် တိုက်ခိုက်ခဲ့ကြောင်း ဆားလင်းကြီးအခြေစိုက် လက်နက်ကြီးတပ်ပေါင်းစု မဟာမိတ်ညီနောင်များက ပြောဆိုသည်။
ဖေဖော်ဝါရီလ ၁ ရက်နေ့တွင် မြိုင်မြို့နယ်၊ လင်းကတော ရဲစခန်းကို ဆားလင်းကြီး အခြေစိုက်လက်နက်ကြီး တပ်ပေါင်းစုမဟာမိတ်ညီနောင်များက လက်နက်ကြီးများဖြင့် ပစ်ခတ် တိုက်ခိုက်ခဲ့ခြင်းဖြစ်ကြောင်း၊ ယင်းတိုက်ခိုက်မှု အတွင်း အကြမ်းဖက် စစ်ကောင်စီ တပ်သားများ ထိခိုက်သေဆုံးမှု အခြေအနေကို အတည်ပြုနိုင်ခြင်းမရှိသေးဘဲ တော်လှန်ရေး တပ်ဖွဲ့ဝင်များ အထိအခိုက်မရှိ ဆုတ်ခွာနိုင်ခဲ့ကောင်း သိရသည်။
ဖလမ်းမြို့တိုက်ပွဲတွင် စစ်တပ်က စစ်မှုထမ်း တပ်သားသစ်များကို အသေခံ တိုက်ခိုက်ခိုင်းပြီး ထွက်ပြေးသူများကို ပစ်သတ်မည်ဟု ခြိမ်းခြောက်ခဲ့
🟥 စစ်မှုထမ်းသင်တန်းဆင်းပြီးလျှင် မိမိမြို့ရွာများတွင်သာ လုံခြုံရေး လုပ်ရမည်ဟု လိမ်ခေါ်ခဲ့ပြီး တပ်သားသစ်များကို ရှေ့တန်းသို့ပို့ဆောင်ခဲ့
ရန်ကုန်၊ ဖေဖော်ဝါရီ ၆
ချင်းပြည်နယ်၊ ဖလမ်းမြို့ တိုက်ပွဲတွင် စစ်တပ်က စစ်မှုထမ်း တပ်သားသစ်များကို အသေခံ တိုက်ခိုက်ခိုင်းပြီး ထွက်ပြေးသူများကို ပစ်သတ်မည်ဟု စစ်တပ်အရာရှိများက ခြိမ်းခြောက်ခဲ့ကြောင်း စစ်သုံ့ပန်းများက ဝန်ခံ ပြောဆိုလိုက်သည်။
ယနေ့ ဖေဖော်ဝါရီလ ၆ ရက်နေ့တွင် ဖလမ်းမြို့သိမ်း စစ်ဆင်ရေးတွင် ချင်းညီနောင်နှင့် မဟာမိတ်အဖွဲ့များက ဖမ်းဆီးရမိသော ပြည်သူ့စစ်မှုထမ်း များ၏ ထွက်ဆိုချက်ကို ဗီဒီယိုနှင့်တကွ ထုတ်ပြန်ခဲ့ပြီး ယင်းဗီဒီယိုတွင် အသက် ၁၉ နှစ်အရွယ် စစ်မှုထမ်း တပ်သား မောင်မြတ်မင်းခန့်နှင့် အသက် ၃၁ နှစ်အရွယ် စစ်မှုထမ်း တပ်သား မောင်တင်မျိုးအောင် တို့က အထက်ပါအတိုင်း ပြောဆိုခဲ့သည်။
"ကျွန်တော်တို့ ဒီလို ထွက်မပြေးနိုင်ရင်တောင်မှပဲ ဒီလိုလက်နက်ချဖို့ အခွင့်အရေးကြုံလာခဲ့တာတောင်မှ လက်နက်ချလို့ရှိရင် အထက်က လူတွေက လက်နက်ချတဲ့ လူမှန်သမျှ ပစ်သတ်မယ်လို့ ပြောလို့ ခြိမ်းခြောက်ခဲ့လို့ ကျွန်တော်တို့ လက်နက်မချခဲ့ရတာပါ။ သူတို့နဲ့လည်း ကွဲလာရော လက်နက်ချနိုင်ခဲ့ပါတယ်။ ကျန်ခဲ့တဲ့ လူတွေ အကုန်လုံး ဒီမှာပါလာတဲ့လူတွေ အကုန်လုံးကိုရော လွတ်လွတ်လပ်လပ်နဲ့ နေနိုင်စေချင်ပြီးတော့ ကျန်ခဲ့တဲ့ လူတွေလည်း အလင်းဝင် လက်နက်ချဖို့ ဖိတ်ခေါ်ချင်ပါတယ်။ ဒီဘက်ထဲကို ကူးပြောင်းဖို့ ဖိတ်ခေါ်ချင်ပါတယ်" ဟု စစ်မှုထမ်း တပ်သား မောင်မြတ်မင်းခန့်က ပြောဆိုသည်။
အကြမ်းဖက် စစ်တပ်က တောင်တွင်းကြီး အမှတ် ၇ စစ် အခြေခံလေ့ကျင့်ရေးတပ်တွင် ပေါ်တာဆွဲ ဖမ်းဆီးထားသော လူငယ် ၂၃၂ ဦးကို စစ်မှုထမ်း စစ်သင်တန်း ၃ လ တက်ခိုင်းပြီး ဖလမ်းမြို့သို့ ပို့ဆောင်ခဲ့ကြောင်း၊ စစ်မှုထမ်း လူငယ်များမှာ ဖလမ်းမြို့ရှေ့တန်းစစ်မြေပြင်သို့ ပို့ဆောင်ခံရမည်ကို မသိရှိခဲ့ဘဲ လေယာဉ်ဖြင့် ဖလမ်းမြို့သို့ ရောက်ရှိလာခြင်းဖြစ်ကြောင်း သိရသည်။
"မင်းဘူး ခလရ ၈၈ ကို စုဆောင်းရေးမှာ တစ်လ ပို့ပါတယ်။ တစ်လပို့ပြီးတော့ တောင်တွင်းကြီး အမှတ် ၇ စစ်အခြေခံလေ့ ကျင့် ရေးတပ်မှာ သင်တန်း ၃ လတက်ရပါတယ်။ သင်တန်းဆွဲခံရတဲ့ လူ ၂၃၂ ယောက်ရှိပါတယ်။ ကျွန်တော်တို့ သင်တန်းဆင်းတော့ ၈၃ ယောက်ကို ကလေးမြို့ကို ပို့ပါတယ်။ ၅၁ ယောက်ကတော့ ကလေးမြို့ ခလရ ၈၉ ကို ပို့ပေးပါတယ်။ အဲဒါပြီးတော့ ဖလမ်းမြို့ကို ကျွန်တော်တို့ကို ပို့ပေးပါတယ်။ ကျွန်တော်တို့ကို ဖလမ်းမြို့ကို ပို့မယ်ဆိုတာလည်း မသိဘူး။ ကျွန်တော်တို့ကို ၃ ရက်ပဲ ကြာမယ်ဆိုပြီးတော့ လေယာဉ်ပေါ်ကောက်တင်ပြီးတော့ ဖလမ်းမြို့ကို ပို့ခဲ့ပါတယ်" ဟု စစ်မှုထမ်း တပ်သား မောင်မြတ်မင်းခန့်က ဆက်လက်ပြောဆိုသည်။
ထို့ပြင် အသက် ၃၁ နှစ်အရွယ် မောင်တင်မျိုးအောင်ကလည်း စစ်မှုထမ်းဥပဒေထဲတွင် တစ်ဦးတည်းသော သားများ မပါဝင်ဟုဆိုကာ အုပ်ချုပ်ရေးမှူးက ရပ်ကွက်ရုံးသို့ လိမ်ခေါ်လက်မှတ်ထိုးစေခဲ့ကြောင်း၊ ယင်းနောက် သွေးစစ်ရန် အုပ်ချုပ်ရေးမှူးရုံးသို့ လိမ်လည် ခေါ်ဆောင်ပြီးနောက် စစ်တပ်ထဲ ထည့်သွင်းခံလိုက်ရခြင်းဖြစ်ကြောင်း သိရသည်။
"စစ်မှုထမ်းဥပဒေထဲမှာ တစ်ဦးတည်းသော သားတွေ မပါဘူးဆိုပြီးတော့ အမေကို ဆန္ဒပြုဖို့ လက်မှတ်ထိုးခိုင်းတယ်။ လက်မှတ်ထိုးပြီး သိပ်မကြာဘူး ၁ ရက် ၂ ရက်နေ့တော့ ပါလာတယ်ဆိုပြီးတော့ ကျွန်တော်တို့ကို သွေးစစ်ဖို့ ၅ မိနစ်နဲ့ ပြီးမယ်ဆိုပြီးတော့ ဥက္ကဋ္ဌ ရုံးကို ခေါ်တယ်။ ခေါ်ပြီးတော့မှ ၉၁၀ စုဆောင်းရေးတပ်ကို ပို့လိုက်တယ်။ ၉၁၀ တပ်ထဲမှာပဲ ၁ ရက်ခွဲ ၂ ရက်လောက် ကြာပြီးတော့ သိပ်မကြာဘူး လေ့ကျင့်ရေးသင်တန်းကျောင်း တတက ၁၃ သပိတ်ကျင်း တွင်ငယ်ပေါ့ ပို့ခဲ့တယ်။ အဲဒီမှာပဲ ၃ လလောက် စစ်သင်တန်းတက်ခဲ့ရတယ်။ သင်တန်းကနေ ချက်ချင်းပဲ ကလေး ခလရ ၈၉ ကို တန်းပို့လိုက်တယ်။ ကလေး ခလရ ၈၉ နဲ့အတူတူ စစ်ဆင်ရေးလုပ်နေရတယ်ပေါ့။ ဖလမ်းမြို့ကို ရောက်ပြီး သိပ်မကြာပါဘူး" ဟု မောင်တင်မျိုးအောင်က ရှင်းပြသည်။
အဆိုပါ စစ်မှုထမ်း တပ်သားသစ် လူငယ်များသည် ဖလမ်းမြို့သိမ်းတိုက်ပွဲအတွင်း ချင်းညီနောင် နှင့် မဟာမိတ်အဖွဲ့များ၏ တိုက်ခိုက်မှုကြောင့် တောတောင်များ အတွင်း ထွက်ပြေး တိမ်းရှောင်စဉ် စစ်သုံ့ပန်း အဖြစ် ဖမ်းဆီးနိုင်ခဲ့ခြင်းဖြစ်ကြောင်း၊ ၎င်းတို့ကို လက်ရှိချိန်တွင် ချင်းအမျိုးသားအဖွဲ့ချုပ်၊ ချင်းအမျိုးသားကာကွယ်ရေးတပ်ဖွဲ့ (CNO/CNDF)က ကောင်းမွန်စွာ ထိန်းသိမ်း စောင့်ရှောက်ထားကြောင်း သိရသည်။
ကလေးမြို့နယ်တွင် သပိတ်စစ်ကြောင်း ၂ ခုပူးပေါင်း၍ စစ်အာဏာရှင် ဆန့်ကျင်ရေး ချီတက် ဆန္ဒပြ
ရန်ကုန်၊ဖေဖော်ဝါရီ ၆
ကလေးမြို့နယ်တွင် ကလေးမြို့လူထုတိုက်ပွဲဦးဆောင်ကော်မတီက ယင်းမာပင်-ဆားလင်းကြီးရွာပေါင်းစုံ သပိတ် ဦးဆောင်ကော်မတီနှင့်အတူ စစ်အာဏာရှင်ဆန့်ကျင်ရေး လူထုသပိတ်ပြုလုပ်ခဲ့ကြကြောင်း သိရှိရသည်။
ဆိပ်ဖြူမြို့နယ်၊ ကျောင်းရွာအနီး စစ်တပ်ဂိတ်ကို ၂ ရက်ဆက်တိုက် ဒရုန်းဖြင့် ဗုံးကျဲတိုက်ခိုက်မှု စစ်သား ၁ ဦး သေဆုံး
ရန်ကုန်၊ ဖေဖော်ဝါရီ ၆
မကွေးတိုင်း၊ ဆိပ်ဖြူမြို့နယ်၊ ကျောင်းရွာအနီးရှိ အကြမ်းဖက်စစ်တပ် ဂိတ်ကို ၂ ရက်ဆက်တိုက် ဒရုန်းဖြင့် ဗုံးကျဲတိုက်ခိုက်ခဲ့ရာ စစ်သား ၁ ဦးသေဆုံးခဲ့ကြောင်း နယ်စည်းမခြား ဖရီးဒမ်း ဖက်ဒရယ် စစ်ကြောင်းမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ဖေဖော်ဝါရီလ ၁ ရက် နံနက် ၈ နာရီမှ စ၍ ဆိပ်ဖြူမြို့နယ်၊ ဆော - ဆိပ်ဖြူကားလမ်းဘေး ကျောင်းရွာ တောင်ဘက်ရှိ အကြမ်းဖက်စစ်တပ် အထိုင်ကင်းစခန်းကို ဖေဖော်ဝါရီလ ၂ ရက် ညနေ ၄ နာရီအထိ ဒရုန်းဖြင့် ဗုံးသီး ၁၅ လုံး အသုံးပြု၍ ကျဲတိုက်ခိုက်ခဲ့ရာ အကြမ်းဖက်စစ်သားများ နေထိုင် ရာ ကင်းစခန်းပေါ်သို့ တည့်တည့် ကျရောက်ပေါက်ကွဲပြီး စစ်သား ၁ ဦးသေဆုံးပြီး အများအပြား ဒဏ်ရာရရှိခဲ့ကြောင်း သိရသည်။
“နားလိုက်၊ ချလိုက်နဲ့ ၂ ရက်ဆက်တိုက်ဗုံးကျဲချခဲ့တာပါ။ သေဆုံးထိခိုက်မှု နောက်ဆက်တွဲ သတင်းကတော့ မသိရသေးဘူး။ စခတွေကို ကပစ ၂၁ ထဲ သယ် သွားတာတော့ သိရတယ်။ အထိနာတော့ လက်နက် ကြီး တွေ အရမ်းပစ်တယ်။ Paramotor စက်တပ် လေထီးနဲ့ ပတ်ကြဲတယ်။ ပြည်သူတွေထိတယ်၊ နွား ၄ ကောင်သေတယ်။ ရဲဘော်တွေတော့ အထိအ ခိုက်မရှိပါဘူး” ဟု နယ်စည်းမခြား ဖရီးဒမ်း ဖက် ဒရယ် စစ်ကြောင်းမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ထိုသို့ တိုက်ခိုက်ခံရမှုကြောင့် ဒဏ်ရာရ စစ်သားများကို ကပစ - ၂၁ တပ်ထဲသို့ ကားဖြင့်သယ်ဆောင် သွားခဲ့ကြောင်း၊ ထို့နောက် ကပစ - ၂၁ တပ် ထဲမှလက်နက်ကြီးများဖြင့် ရမ်းသမ်းပစ်ခတ်ခြင်း၊ စက် တပ်လေထီး (Paramotor) ဖြင့်ဗုံးသီးများကျဲချခြင်း၊ ရမ်းသမ်းပစ်ခတ်ခြင်းများကြောင့် ကျွန်းမကြီး ရွာမှ ပြည်သူ ၃ ဦး အပြင်းအထန် ထိခိုက်ဒဏ်ရာရရှိကာ နွား ၄ ကောင်လည်း သေဆုံးခဲ့ကြောင်း သိရ သည်။
စစ်ကောင်စီ၏ ဂိတ်စခန်းကို နယ်စည်းမခြားဖရီးဒမ်းဖက်ဒရယ်စစ်ကြောင်းက ဦးဆောင် ပြီး ဆိပ်ဖြူအနောက်ပိုင်းဇုံ ၁ (ပကဖ) AK တို့ ပူးပေါင်းကာ တိုက်ခိုက်ခဲ့ခြင်းဖြစ်ကြောင်း သိရသည်။
နေပြည်တော်၊ ဒက္ခိဏသီရိတွင် ချိုင်းကျေးရွာအုပ်ချုပ်ရေးမှူးက လူငယ်များကို စစ်မှုထမ်း ကင်းလွတ်ပေးမည်ဟု ရုံးသို့ လိမ်ခေါ်ပြီး စစ်ထဲထည့် ၊ လက်ပံတန်းနှင့် သာယာဝတီတွင် လူငယ် ၂၀ နီးပါးကို စစ်တပ်က ပေါ်တာဆွဲ ဖမ်းဆီး
ရန်ကုန်၊ ဖေဖော်ဝါရီ ၆
နေပြည်တော်၊ ဒက္ခိဏသီရိမြို့နယ်တွင် ချိုင်းကျေးရွာ အုပ်ချုပ်ရေးမှူးက လူငယ်များကို စစ်မှုထမ်း ကင်းလွတ်ခွင့်ပေးမည်ဟု ရုံးသို့ လိမ်လည်ခေါ်ဆောင်ပြီး စစ်တပ်ထဲ ထည့်သွင်းခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဇန်နဝါရီလ ၃၀ ရက်နေ့တွင် နေပြည်တော်၊ ဒက္ခိဏသီရိမြို့နယ်၊ ချိုင်းကျေးရွာတွင် အုပ်ချုပ်ရေးမှူး ဇော်ဝမ်းက ကျေးရွာသား ကိုချမ်းလင်းမောင်ကို စစ်မူထမ်း ကင်းလွတ်ခွင့်ပြုမည်ဟု ဆိုကာ ကျေးရွာရုံးသို့ လာခဲ့ရန် လိမ်လည်ခေါ်ဆောင်ပြီး စစ်တပ်ထဲသို့ ဖမ်းဆီး ထည့်သွင်းခဲ့ကြောင်း၊ ကိုချမ်းလင်းမောင်သည် မိဘများကို လုပ်ကိုင်ကျွေးမွေးနေသူဖြစ်ပြီး လက်ရှိချိန်တွင် မိဘများလည်း သားဖြစ်သူ စိတ်ကြောင့် ပူဆွေးနေကြကြောင်း သိရသည်။
"ဒက္ခိဏသီရိမြို့နယ်၊ ချိုင်းကျေးရွာမှာ မိဘတွေကဆင်းရဲတော့ မိဘတွေကို လုပ်ကိုင်ကျွေးမွေးနေတဲ့ ကိုချမ်းလင်းမောင်ကို အုပ်ချုပ်ရေးမှူး ဇော်ဝမ်းက စစ်မှုထမ်း ကင်းလွတ်ခွင့်ပြုမယ်ဆိုပြီး ကျေးရွာရုံးကို ခဏလာပါဦး ဆိုပြီး လိမ်ခေါ်ပြီး စစ်တပ်ထဲ ထည့်လိုက်တာ ကောင်လေးရဲ့ မိဘတွေလည်း အဲစိတ်တွေနဲ့ ပူဆွေးနေကြတယ်" ဟု ဒေသပြည်သူတစ်ဦးက ပြောဆိုသည်။
ကျေးရွာ အုပ်ချုပ်ရေးမှူး ဇော်ဝမ်းသည် မူးယစ်ဆေးဝါးများ ရောင်းချပြီး ချမ်းသာနေသော ပျူစောထီး ဇော်ထူးနှင့် မိုးဝင်းတို့နှင့် ပူးပေါင်း၍ ချိုင်းကျေးရွာအတွင်း လောင်းကစားဝိုင်းမျိုးစုံကို လုပ်ခွင့်ပေးထားကြောင်း၊ ဇော်ဝင်းသည် ၎င်း၏ ဆွေမျိုးများမှ လွဲ၍ ကျေးရွာအတွင်းနေထိုင်သော ပြည်သူအားလုံးကို စစ်မှုထမ်းရန် အမြဲခြိမ်းခြောက်နေသူဖြစ်ကြောင်း သိရသည်။
ထို့ပြင် ပဲခူးတိုင်း၊ လက်ပံတန်းမြို့နယ်နှင့် သာယာဝတီမြို့နယ်တွင် အကြမ်းဖက် စစ်တပ်က လူငယ် ၂၀ နီးပါးကို ပေါ်တာဆွဲ ဖမ်းဆီးခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၄ ရက်နေ့ မွန်းလွဲ ၂ နာရီခန့်တွင် လက်ပံတန်းမြို့နယ်၊ ရေလျှံကျေးရွာ၌ နေထိုင်သော ကိုမျိုးသူရ၊ ကိုသင်္ကြန်မိုးနှင့် အောင်ချမ်းသာကျေးရွာ၌ နေထိုင်သော ကိုဝင်းနိုင်(ခ)အညာသား တို့သည် ဗောဓိပင်အုပ်စု၊ ချောင်းဆုံကျေးရွာရှိ အာဝါဒေးဝိုင်းသို့ သွားရောက်စဥ် အကြမ်းဖက် စစ်ကောင်စီတပ်သားများက ပေါ်တာဆွဲ ဖမ်းဆီးခဲ့ခြင်းဖြစ်ကြောင်း သိရသည်။
ယင်းနေ့ မွန်းလွဲပိုင်းကလည်း လက်ပံတန်းမြို့နယ်ရှိ ကျုံလဟာ-ဓနင်းကြီး ဆက်သွယ်ရေး လမ်းပိုင်းတွင် အိမ်စီးကား ၁ စီးနှင့် ဖောကား ၁ စီးပေါ်မှ အရပ်ဝတ် ဝတ်ဆင်ထားသော အကြမ်းဖက် စစ်ကောင်စီ တပ်သားများကလည်း လမ်းသွားလမ်းလာ လူငယ် ၁၅ ဦးကို ပေါ်တာဆွဲ ဖမ်းဆီးသွားကြောင်း၊ ဖမ်းဆီးခံရသော လူငယ်များသည် ဓနင်းကြီးရွာ၊ စိန်တုန်းရွာနှင့် တခြားရွာက လူငယ်များဖြစ်ကြောင်း သိရှိရသည်။
အလားတူ သာယာဝတီမြို့နယ်၊ သုံးဆယ်မြို့၊ အရှေ့လက်ပံခုန်ရပ်ကွက် အုပ်ချုပ်ရေးမှူး ဖိုးတာ နှင့် သုံးဆယ်ရဲစခန်းမှ ရဲများက ဖေဖော်ဝါရီလ ၃ ရက် ည ၁၀ နာရီခန့်အချိန် ဖားကူးလမ်းတွင် နတ်ပွဲကြည့်နေသည့် အသက် ၃၀ ခန့်အရွယ် လူငယ် ၂ ဦးကို ပေါ်တာဆွဲ ဖမ်းဆီးသွားကြောင်း သိရသည်။
ရွှေဘိုတွင် မန္တလေးဂိုဏ်းချုပ်သာသနာမှ ဘုန်းတော်ကြီး ဖာသာရ်မာတင်ဒေါနယ် အသတ်ခံရမှု ထိထိရောက်ရောက် အရေးယူရန် ခရစ်ယာန်အသိုင်းအဝိုင်း လိုလား
ရန်ကုန်၊ ဖေဖော်ဝါရီ ၁၆
စစ်ကိုင်းတိုင်း၊ ရွှေဘိုမြို့နယ်တွင် မန္တလေးဂိုဏ်းချုပ်သာသနာမှ ဘုန်းတော်ကြီး ဖာသာရ်မာတင်ဒေါနယ် အသတ်ခံရမှု ထိထိရောက်ရောက် အရေးယူရန် လိုလားကြကြောင်း မန္တလေးကက်သလစ်ခရစ်ယာန် အသိုင်းအ၀ိုင်းက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဖေဖော်ဝါရီလ ၁၄ ရက်နေ့ ညနေ ၆ နာရီအချိန် မန္တလေးဂိုဏ်းချုပ်သာသနာမှ သက်တော် ၄၄ နစ်ရှိ ဘုန်းတော်ကြီး ဖာသာရ်မာတင်ဒေါနယ် (Fr. Donald Martin ရဲနိုင်ဝင်း )ကို ရွှေဘို ခရိုင် ကံကြီးတော ကျေးရွာ ၊ လုဒ်မယ်တော်သခင်မ ဘုရားကျောင်းတွင် ဒေသ လက်နက်ကိုင်တပ်မှ လူတချို့က သတ်ဖြတ်ခဲ့ခြင်းဖြစ်ကြောင်း သိရှိရသည်။
"ဒီလို ဘာကြောင့်သတ်သလဲ။ ခရစ်ယာန်ဘုန်းတော်ကြီးတစ်ပါးကို လက်နက်မဲ့ သာသနာ့တာဝန်ထမ်းဆောင်သူကို ဘာအကြောင်း ကြောင့် သတ်သလဲ။ အဲဒီအပေါ်မှာတော့ သတ်ဖြတ်မှုအတွက် ကျူးလွန်သူတွေကို တာဝန်ရှိသူတွေက ထိရောက်တဲ့ အပြစ်ဒဏ်ချမှတ် အရေးယူပေးဖို့ သက်ဆိုင်တဲ့ အဖွဲ့အစည်းတွေကို တောင်းဆိုပါတယ်။ မန္တလေးကက်သလစ်အသိုင်း အဝိုင်းမှာ ဆရာတော်ရဲ့ သတင်းကို ကြားပြီး ခရစ်ယာန် ဘာသာဝင်တွေအကြား စိတ်နှလုံး မချမ်းမြေ့ရဘူး။ ဒီလုပ်ရပ်ကို မေ့သွားတာမျိုး မဖြစ်စေဘဲ ထိထိရောက်ရောက် အရေးယူစေချင်ပါတယ်။ အင်မတန်မှ ရုပ်ဆိုးအကျဉ်းတန်လွန်းပါတယ်" ဟု မန္တလေးကက်သလစ် ခရစ် ယာန်သာသနာမှ အမည်မဖော်ပြလိုသော ခရစ်ယာန်သာသနာပြု ဆရာတော်တစ်ပါးက ရန်ကုန်ခေတ်သစ်သတင်းဌာနထံသို့ ပြောဆိုသည်။
အသတ်ခံလိုက်ရသည့် ဘုန်းတော်ကြီး ဖာသာရ်မာတင်ဒေါနယ်မှာ အေးချမ်းစွာ နေတတ်သူဖြစ်ပြီး သာသနာတော်အကျိုးကို အဓိက ကြိုးစား သာသနာပြုနေသူဖြစ်ကြောင်း၊ လူချစ်လူခင် ပေါများပြီး မန္တလေးဂိုဏ်းချုပ်သာသနာတွင် လူသိများသူတစ်ဦးလည်းဖြစ်ကြောင်း သိရှိရသည်။
ရွှေဘိုမြို့နယ်ပြည်သူ့ကာကွယ်ရေးတပ်ဖွဲ့တစ်ဦးကမူ ခရစ်ယာန် ဘုန်းတော်ကြီးအသတ်ခံရမှုအတွက် ကျူးလွန်သူများကို ဖမ်းဆီး ထိန်းသိမ်း စစ်ဆေးမှုများ လုပ်ဆောင်နေသည်ဟု သိရှိရသော်လည်း အသေးစိတ် မသိရှိရသေးကြောင်း၊ ယင်းအမှုအခင်းကို ခရိုင်အဆင့်နှင့်တိုင်းအဆင့် တိုက်ရိုက် ကိုင်တွယ်မည်ဟု မျှော်လင့်ရကြောင်း ရန်ကုန်ခေတ်သစ်သတင်းဌာနထံသို့ သုံးသပ်ပြောဆိုသည်။
တရုတ်၊ကူမင်းမြို့ ဆွေးနွေးပွဲ မတိုင်မီ စစ်ကောင်စီက နောင်ချိုမြို့နယ်အတွင်း တိုက်ပွဲဖြစ်ပွားခြင်းမရှိဘဲ လက်နက်ကြီးနှင့်လေယာဉ်ဗုံး ၁၇၅ လုံးဖြင့် ပစ်ခတ်တိုက်ခိုက်
ရန်ကုန်၊ ဖေဖော်ဝါရီ ၁၆
တရုတ်နိုင်ငံ၏ ကြားဝင်မှုဖြင့် ကူမင်းမြို့ တွင် အကြမ်းဖက် စစ်ကောင်စီနှင့် TNLA တို့အကြား ဆွေးနွေးပွဲ မတိုင်မီ စစ်ကောင်စီက နောင်ချိုမြို့နယ်အတွင်းသို့ တိုက်ပွဲဖြစ်ပွားခြင်းမရှိဘဲ လက်နက်ကြီးနှင့်လေယာဉ်ဗုံး ၁၇၅ လုံးဖြင့် ပစ်ခတ်တိုက်ခိုက်ခဲ့ကြောင်း TNLA က ယမန်နေ့ သတင်းထုတ်ပြန်သည်။
ယမန်နေ့ ဖေဖော်ဝါရီလ ၁၅ ရက်နေ့ နောင်ချိုမြို့နယ်အတွင်းသို့ အကြမ်းဖက် စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ တောင်ခမ်းမှ လက်နက်ကြီးဖြင့် ပစ်ခတ်ခြင်း ၊ Y-12 လေယာဥ်ကို အသုံးပြုပြီး ဗုံးများကျဲချခြင်း အပါအဝင် လက်နက်ကြီးနှင့် လေယာဉ်ဗုံး ၁၇၅ လုံး ပစ်ခတ်တိုက်ခိုက်ခဲ့ကြောင်း သိရှိရသည်။
ယမန်နေ့ နောင်ချိုမြို့နယ်အတွင်းရှိ နာဆွေကျေးရွာ၊ အုမ္မတီးကျေးရွာ၊ ညောင်နီကျေးရွာနှင့် တောင်ရွှေကျေးရွာတို့ကို တောင်ခမ်းစခန်းရှိ ခမရ ၄၀၆၊ တပ်ရင်း ၃၅၄နှင့် တပ်ရင်း ၉၀၂တို့ မှ လက်နက်ကြီး အလုံးရေ ၁၃၇ လုံး ပစ်ခတ်တိုက်ခိုက်ခဲ့ကြောင်း၊ အလားတူ ယမန်နေ့ မွန်းလွဲ ၂ နာရီ ၃ မိနစ်အချိန် စစ်ကောင်စီတပ်မှ Y-12 လေယာဥ်ဖြင့် နာဆွေကျေးရွာအတွင်းသို့ ဗုံး
၃၈ လုံး လာရောက်ကျဲချခဲ့ကြောင်း သိရှိရသည်။
တရုတ်နိုင်ငံ၏ ကြားဝင်မှုဖြင့် TNLA နှင့် အကြမ်းဖက် စစ်ကောင်စီတို့အကြား အပစ်အခတ်ရပ်စဲရေး ဆွေးနွေးမှုများကို ဖေဖော်ဝါရီလ ၁၆ ရက်နေ့ ပြုလုပ်မည်ဖြစ်ပြီး ယင်းသို့ ဆွေးနွေးပွဲမစတင်မီ ၁ ရက်အလို စစ်ကောင်စီက TNLA သိမ်းပိုက်ထားသော နေရာများကို လက်နက်ကြီး၊ လေယာဉ်ဗုံးများဖြင့် ပစ်ခတ်တိုက်ခိုက်ခြင်းဖြစ်ကြောင်း သိရှိရသည်။
အလားတူ ဖေဖော်ဝါရီလ ၁၀ ရက်နေ့ကလည်း TNLA သိမ်းပိုက်ထားသော မိုးကုတ်မြို့ကို စစ်ကောင်စီတပ်က လေကြောင်းအသုံးပြုပြီး ဗုံး ၂၀ ခန့် လာရောက်ကျဲချတိုက်ခိုက်မှုကြောင့် ပြည်သူ ၅ ဦး သေဆုံးခဲ့ပြီး ၁၉ ဦး ထိခိုက်ဒဏ်ရာရရှိခဲ့ကြောင်း သိရှိရသည်။
ဓာတ်ပုံ- ဖေဖော်ဝါရီလ ၁၀ ရက်နေ့ မိုးကုတ်မြို့ကို စစ်တပ်က လေယာဉ်ဖြင့် ဗုံးကျဲချခဲ့စဉ်။
ပြည်ပသို့ တစ်လလျှင် အလုပ်သမား ရာဂဏန်း အရေအတွက်သာ စေလွှတ်ရန် အလုပ်သမားဝန်ကြီးအသစ် ချစ်ဆွေက ကန့်သတ်ပိတ်ပင်
🟥 ပြည်ပအလုပ်အကိုင် အေဂျင်စီ တစ်ခုလျှင် လိုင်စင်ကြေး ငွေကျပ် သိန်း ၅၀၀၀ ငွေပေါင်တင်ရန်ညွှန်ကြား
ရန်ကုန်၊ ဖေဖော်ဝါရီ ၁၆
မြန်မာနိုင်ငံမှ ပြည်ပနိုင်ငံများသို့ လစဉ် အလုပ်သမား စေလွှတ်မှု အရေအတွက်ကို စစ်ကောင်စီ၏ အလုပ်သမားဝန်ကြီး အသစ် ချစ်ဆွေက ကန့်သတ်လိုက်ပြီး ပြည်ပအလုပ် အကိုင်အေဂျင်စီ တစ်ခုလျှင် လိုင်စင်ကြေး ငွေကျပ် သိန်း ၅၀၀၀ ငွေပေါင်တင်ရန် တောင်းခံလိုက်ကြောင်း ပြည်ပအလုပ်အကိုင်အေဂျင်စီပိုင်ရှင်များက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ ရန်ကုန်မြို့တွင် စစ်ကောင်စီက အသစ်ခန့်အပ်လိုက်သော အလုပ် သမားဝန်ကြီးအသစ် ချစ်ဆွေက ပြည်ပအလုပ်အကိုင် ဝန် ဆောင်မှုလုပ်ငန်းရှင်များအဖွဲ့ချုပ် (MOEAA)နှင့် တွေ့ဆုံစဉ် ထိုသို့ ပြောဆို ညွှန်ကြားလာခြင်းဖြစ် ကြောင်း သိရှိရသည်။
ပြည်ပအလုပ်အကိုင်အေဂျင်စီများအနေဖြင့် အလုပ်သမားဝန်ကြီးဌာနထံသို့ လိုင်စင်ကြေးအဖြစ် ငွေကျပ် သိန်း ၅၀၀၀ ငွေပေါင် တင်သွင်းရမည်ဖြစ် ကြောင်း၊ ပြည်ပအလုပ်အကိုင်အေဂျင်စီများအနေဖြင့် ချမှတ်ထားသော စည်း ကမ်း၊ အမိန့်နှင့် ဥပဒေများကို မလိုက်နာပါက အဆိုပါငွေပေါင်တင်ထားသော လိုင်စင်ကြေးငွေများကို ပြန်မပေးဘဲ သိမ်းဆည်းမည်ဖြစ်ကြောင်း သိရှိရသည်။
"ပြည်ပအလုပ်အကိုင်အေဂျင်စီတွေက အရမ်းတင်းကျပ်တဲ့စည်းမျဉ်း စည်း ကမ်းတွေအောက်မှာ အလုပ်လုပ်နေရတာ ဘယ် လို လုပ်ပြီး လိုင်စင်ကြေး ငွေပေါင် သိန်း ၅၀၀၀ ပေးနိုင်မလဲ။ အခုတောင် ပြည်ပအလုပ်အကိုင်အေဂျင်စီတွေ ရပ်နားနေတာဆိုတော့ ငွေပေါင် သိန်း ၅၀၀၀ တင်ရမယ်ဆိုရင်တော့ လုပ်မယ့် အေဂျင်စီတောင် ရှိပါတော့မလားမသိဘူး။ သိန်း ၅၀၀၀ တော့ တင်ဖို့ အရမ်းခက်ခဲမယ်ထင်ပါတယ်" ဟု ပြည်ပအလုပ်အကိုင်အေဂျင်စီပိုင်ရှင်တစ်ဦးက ဆိုသည်။
ထို့ပြင် စစ်ကောင်စီက ပြည်ပသို့ စေလွှတ်မည့် အလုပ်သမားအရေအတွက်ကိုလည်း ကန့်သတ်လိုက်ပြီး လိုင်စင်ရ အေဂျင်စီများအနေဖြင့် ထိုင်းနိုင်ငံသို့ တစ်လလျှင် အလုပ်သမားအရေအတွက် ၂၀၀ ဦး၊ ဂျပန်နိုင်ငံသို့ တစ်လလျှင် အလုပ်သမားအရေ အတွက် ၂၀၀ ဦးနှင့် မလေးရှားနိုင်ငံသို့ ၁၀၀ ဦး စသည်ဖြင့် နိုင်ငံအလိုက် အလုပ်သမားစေလွှတ်မှုများကို ကန့်သတ်လိုက်ကြောင်း သိရှိရသည်။
လက်ရှိတွင် အသက် ၁၈ နှစ်မှ အသက် ၃၅ နှစ်အတွင်း အမျိုးသားများကို ပြည်ပနိုင်ငံများသို့ သွားရောက် အလုပ်လုပ်ခွင့်ပိတ် ပင်ထားပြီး အမျိုးသမီးများနှင့် အသက် ၃၅ နှစ်အထက် အမျိုးသားများကို ပြည်ပသို့ သွားရောက် အလုပ်လုပ်ခွင့်ပြုဆဲဖြစ် ကြောင်း သိရှိရသည်။
"ဒီလို အရမ်းတင်းကျပ်တော့ ပြည်ပအလုပ်အကိုင်အေဂျင်စီအလုပ်တွေကတော့ အရမ်းကို ခက်ခဲသွားမယ်။ ပြည်ပ ထွက် အလုပ်လုပ်မယ့် အလုပ် သမားတွေလည်း အတော်ခက်ခဲသွားမယ်" ဟု ပြည်ပအလုပ်အကိုင်အေဂျင်စီပိုင်ရှင်က ပြောဆိုသည်။
စစ်ကောင်စီက ထိုင်းနိုင်ငံဆိုင်ရာ မြန်မာသံအမတ် ချစ်ဆွေကို ၂၀၂၅ ခုနှစ် ဇန်နဝါရီလ ၃၁ ရက်နေ့တွင် အလုပ်သမားဝန်ကြီး အသစ်အဖြစ် ပြောင်းရွှေ့ ခန့်အပ်လိုက်ကြောင်း သိရှိရသည်။
ဓာတ်ပုံ- စစ်ကောင်စီ၏ အလုပ်သမားဝန်ကြီးအသစ် ချစ်ဆွေ။
မြန်မာနိုင်ငံတစ်ဝန်း စစ်ကောင်စီတပ်ဖွဲ့ဝင် ၇ ဦးသေဆုံး
ရန်ကုန်၊ ဖေဖော်ဝါရီ ၁၅
မြန်မာနိုင်ငံတစ်ဝန်း ဖေဖော်ဝါရီလ ၁၅ ရက်နေ့ ရရှိထားသော အချက်အလက် များအရ စစ်ကောင်စီတပ်ဖွဲ့ဝင် ၇ ဦးသေဆုံးကြောင်း ပြည်သူ့ကာ ကွယ်ရေး တပ်ဖွဲ့များ၏ ထုတ်ပြန်ချက်နှင့်ပြောဆိုချက် များ အရ သိရှိရသည်။
ရန်ကုန်ခေတ်သစ်အနေဖြင့် နေ့စဉ် စစ်သား သေဆုံးမှု စာရင်းများကို ထုတ်ပြန် ရာတွင် ဒေသကာကွယ်ရေးတပ်ဖွဲ့များ၏ ထုတ်ပြန်ချက်များနှင့် ပြောဆိုချက် များကို စုစည်းဖော် ပြရခြင်းဖြစ်ပြီး မြေပြင် အခြေအနေတွင် အမှန်တကယ် စစ်သားများ သေဆုံးမှု ရှိ၊ မရှိ ကွင်းဆင်း အတည်ပြုနိုင်ခြင်း မရှိသည်ကို သိစေအပ်ပါသည်။
လောင်းလုံးမြို့ပေါ် လဝကရုံးရှေ့ရှိ စစ်တပ်ဂိတ်ကို ဝင်ရောက် ပစ်ခတ်မှု စစ်ကောင်စီတပ်သား ၂ ဦးသေဆုံး
ရန်ကုန်၊ ဖေဖော်ဝါရီ ၁၅
တနင်္သာရီတိုင်း၊ လောင်းလုံးမြို့ပေါ် လဝကရုံးရှေ့ရှိ အကြမ်းဖက် စစ်တပ်ဂိတ်ကို ဝင်ရောက် ပစ်ခတ်ရာ စစ်ကောင်စီတပ်သား ၂ ဦးသေဆုံးခဲ့ကြောင်း DNLA ဖက်ဒရယ်ဓူဝံကြယ်တပ်ခွဲမှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၁၀ ရက်နေ့ မွန်းလွဲ ၁၂ နာရီခန့်တွင် လောင်းလုံးမြို့ပေါ် လဝကရုံးရှေ့တွင် ဂိတ်ချ စစ်ဆေးနေသေ အကြမ်းဖက် စစ်ကောင်စီ တပ်သားများကို DNLA ဖက်ဒရယ်ဓူဝံကြယ်တပ်ခွဲ မှ တော်လှန်ရေး ရဲဘော်များက ဝင်ရောက် ပစ်ခတ် တိုက်ခိုက်ခဲ့ခြင်းဖြစ်ကြောင်း သိရသည်။
ယင်း တိုက်ခိုက်မှု အတွင်း အကြမ်းဖက် စစ်ကောင်စီ တပ်သား ၂ ဦးသေဆုံးပြီး ထိခိုက်ဒဏ်ရာရရှိသူများလည်းရှိကာ အရေအတွက်ကို ဆက်လက်စုံစမ်းလျက်ရှိကြောင်း တော်လှန်ရေး ရဲဘော်များ အထိအခိုက်မရှိ ဆုတ်ခွာနိုင်ခဲ့ကြောင်း သိရှိရသည်။
"လောင်းလုံးမြို့နယ်၊ လဝကရုံးရှေ့မှာ ဂိတ်ချ စစ်ဆေးနေတဲ့ စစ်ခွေးတွေကို ကျနော်တို့ DNLA ဖက်ဒရယ်ဓူဝံကြယ်တပ်ခွဲက ဝင်ရောက် ပစ်ခတ်တိုက်ခိုက်ခဲ့တာ စစ်ခွေး ၂ ကောင်သေဆုံးတယ်။ ထိခိုက်ဒဏ်ရာရရှိတဲ့ အရေအတွက်ကိုတော့ ဆက်လက် စုံစမ်းဆဲနေပါတယ်" ဟု DNLA ဖက်ဒရယ်ဓူဝံကြယ်တပ်ခွဲမှ တာဝန်ရှိသူ တစ်ဦးက ပြောဆိုသည်။
ပေါက်မြို့နယ်အတွင်း စစ်ကြောင်းထိုးနေသည့် စစ်တပ်က ရေပြာရွာအနီးရှိ နေအိမ်များကို မီးရှို့ပြီး ပြည်သူပိုင် ပစ္စည်းများကို စိတ်ကြိုက် ခိုးယူသွား၊ ထောင်နှင့်ချီသော ပြည်သူများ ဆက်လက် တိမ်းရှောင်နေရ
ရန်ကုန်၊ ဖေဖော်ဝါရီ ၈
မကွေးတိုင်း၊ ပေါက်မြို့နယ်အတွင်း စစ်ကြောင်းထိုးနေသည့် အကြမ်းဖက် စစ်တပ်က ရေပြာရွာအနီးရှိ နေအိမ်များကို မီးရှို့ပြီး ပြည်သူပိုင် ပစ္စည်းများကို စိတ်ကြိုက် ခိုးယူသွားကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၈ ရက်နေ့တွင် မြို့င်မြို့နယ် စက်မှု ၂ မှ ထွက်လာသော အကြမ်းဖက် စစ်တပ်စစ်ကြောင်းသည် ပေါက်မြို့နယ်၊ ရေပြာရွာ အနီးရှိ ပြည်သူပိုင် နေအိမ်များကို မီးရှို့ဖျက်ဆီးခဲ့ကြောင်း သိရသည်။
ထို့ပြင် နေအိမ်များရှိ ပြည်သူပိုင် ပစ္စည်းများကိုလည်း အကြမ်းဖက် စစ်ကောင်စီ တပ်သားများက စိတ်ကြိုက်ယူဆောင်သွားပြီး လက်ရှိချိန်တွင် စစ်ကြောင်းသည် ပေါက်မြို့နယ်ရှိ ကုက္ကိုယ်စု ပျူစောထီးရွာကို ဝင်ရောက်သွားကြောင်း သိရှိရသည်။
အကြမ်းဖက် စစ်ကောင်စီ တပ်သားများ စစ်ကြောင်းထိုးနေ၍ ထောင်နှင့်ချီသော ပြည်သူများလည်း ဘေးလွတ်ရာ ထွက်ပြေးနေရပြီး ကျေးရွာအတွင်းရှိ နေအိမ် ပျက်စီးမှု အခြေအနေနှင့် ပြည်သူများ ထိခိုက်မှုရှိမရှိကို အတည်ပြုနိုင်ခြင်းမရှိသေးကြောင်း သိရသည်။
"မြိုင်ကို ရိက္ခာလာပို့တည်းက ပါလာတဲ့ စစ်ခွေးစစ်ကြောင်း စက်မှု ၂ ထဲမှာ တပ်စွဲထားပြီး အခု ပေါက်မြို့နယ်ထဲကို စစ်ကြောင်းထိုးနေတာ ဒီနေ့ ရေပြာရွာအနီး တစ်ဝိုက်က ပြည်သူပိုင်နေအိမ်တွေကို မီးရှို့ဖျက်ဆီးတယ်လို့သိရတယ်။ နေအိမ်ထဲက ပစ္စည်းတွေလည်း စိတ်ကြိုက်ယူဆောင်သွားတယ်တဲ့ အခု ညနေ ၆ နာရီ ခွဲမှာ ခွေး စစ်ကြောင်းက ကုက္ကိုယ်စု ပျူစောထီး ရွာကို ဝင်သွားတယ်လို့ သိရတယ်။ နေအိမ် ပျက်စီးမှု အခြေအနေနဲ့ ပြည်သူတွေ ထိခိုက်မှုရှိမရှိတော့ မသိရသေးဘူး" ဟု ဒေသ ပြည်သူ တစ်ဦးကပြောဆိုသည်။
အဆိုပါ အကြမ်းဖက် စစ်တပ် စစ်ကြောင်းသည် မြိုင်မြို့နယ် အတွင်း ပြန်လည် ဝင်ရောက်လာနိုင်သောကြောင့် ပြည်သူများ အနေဖြင့် စစ်ရေး အသိ စစ်ရေး သတိထားဖြင့် သွားလာကြရန် ဒေသတွင်း တော်လှန်ရေး တပ်ဖွဲ့များက အသိပေးထုတ်ပြန်ထားသည်။
ဓာတ်ပုံ - ၂၀၂၂ ခုနှစ် ဒီဇင်ဘာလ ၇ ရက်နေ့တွင် အကြမ်းဖက် စစ်ကောင်စီ တပ်သားများ မီးရှို့ဖျက်ဆီးနေသော ပေါက်မြို့နယ်၊ လယ်လန်းရွာ (ပုံအဟောင်းဖြစ်သည်)
ဆားလင်းကြီးမြို့နယ်တွင် ရက်ရှည်စစ်ရှောင်စခန်း ၂နေရာကို ထမင်းတစ်နပ်လှူဒါန်း
ရန်ကုန်၊ ဖေဖော်ဝါရီ ၈
ဆားလင်းကြီးမြို့နယ်တွင် ရက်ရှည်စစ်ရှောင်စခန်း ၂ နေရာမှ စစ်ရှောင်ပြည်သူများကို အညာပစ်တိုင်းထောင်လေးများအဖွဲ့က အလှူရှင်ကိုယ်စား ထမင်းတစ်နပ်ကို သွားရောက်လှူဒါန်းခဲ့ကြကြောင်းသိရှိရသည်။
စစ်တွေမြို့အနီး လက်နက်ကြီး ပစ်ခတ်သံများ ကြားရ
ရန်ကုန်| ဖေဖော်ဝါရီ ၈
ရခိုင်ပြည် စစ်တွေမြို့အနီး ယမန်နေ့ ဖေဖော်ဝါရီလ ၇ ရက်နေ့ ည ၁၀ နာရီကျော်အချိန်မှစတင်၍ ကျယ်လောင်သည့် လက် နက်ကြီးပစ်ခတ်သံများ ကြားရကြောင်း စစ်တွေမြို့ခံများက ပြောသည်။
စစ်တွေမြို့ခံများက နေရာအတိအကျ မသိကြသော်လည်း အမြင့်ကျွန်းနှင့် ပါဒလိတ်ဘက်တွင် ဖြစ်နိုင်ကြောင်း ခန့်မှန်းပြောဆိုနေကြသည်။
"မနေ့ညက လက်နက်ကြီးသံတွေ ၁၀ နာရီကျော်လောက်မှာ စကြားရတယ်။ ဘယ်သူတွေ ပစ်တာလဲတော့ မသိဘူး။ တော်တော်ကို အသံမြည်တာ။ ၁၂ နာရီကျော် ၁ နာရီလောက်မှာ လေယာဉ်သံတွေကြားရတယ်။ ဟိုက်စကီးဆင်းတာလည်း ကြားရတယ်” ဟု ပြောသည်။
အာရက္ခတပ်တော် AA အုပ်ချုပ်ရေးအဖွဲ့ဝင်တစ်ဦးက စစ်တွေမြို့အနီးရှိ စစ်ကောင်စီတပ်ရင်း၊ တပ်စခန်းအချို့ကို AA က လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း ပြောဆိုသည်။
"စစ်တွေမြို့ကို လက်နက်ကြီးတွေနဲ့ ပစ်ခတ်နေတယ်။ ထိုးစစ်စတော့မယ်” ဟု ပြောပြီး ဖုန်းချသွားသည်။
စစ်တွေမြို့အနီးတွင် စစ်ကောင်စီနှင့် AA တို့သည် လက်နက်ကြီး အပြန်အလှန် ပစ်ခတ်မှု မကြာခဏ ရှိကြပြီး စနိုက်ပါဖြင့်လည်း အပြန်အလှန်ပစ်ခတ်မှုရှိကြောင်း သိရသည်။
စစ်တွေမြို့ကို အာရက္ခတပ်တော် AA က ထိုးစစ်ဆင်ရန် ဝိုင်းရံထားသလို စစ်ကောင်စီကလည်း တပ်အင်အား အများအပြားဖြည့်တင်းကာ ခုခံစစ်ကို အခိုင်အမာ ပြုလုပ်ထားကြောင်း သိရသည်။
(Western News သည် ရန်ကုန်ခေတ်သစ်သတင်းဌာန၏ မဟာမိတ်ဖြစ်သည်။)
ကန့်ဘလူခရိုင် အမှတ် ၄ တပ်ရင်း ၏ "ခွေးရူးမောင်းမယ့် ၅/" ကမ်းပိန်းတွင် ပြည်သူများ ပူးပေါင်း ပါဝင်ကြရန် မေတ္တာရပ်ခံ
ရန်ကုန်၊ ဖေဖော်ဝါရီ ၈
ကန့်ဘလူခရိုင် အမှတ် ၄ တပ်ရင်း၏ "ခွေးရူးမောင်းမယ့် ၅/" ကမ်းပိန်းတွင် ပြည်သူများ ပူးပေါင်း ပါဝင်ကြရန် မေတ္တာရပ်ခံကြောင်း တပ်ရင်းတာဝန်ရှိသူက ရန်ကုန်ခေတ်သစ် သတင်းဌာနထံသို့ ပြောဆိုသည်။
ကန့်ဘလူခရိုင် အမှတ်(၄)တပ်ရင်းနှင့် HTM - Here Together Myanmar တို့ ပူးပေါင်းပြီး အညာမြေမှာ သောင်းကြမ်းနေတဲ့ ခွေးရူးမိစ္ဆာတွေကိုအမြစ်ပြတ်ချေမှုန်းဖို့ ခွေးရူးမောင်းမယ့် ၅/ ဆိုတဲ့ ကမ်ပိန်းလေးကိုပြုလုပ်လိုက်ရပါတယ်။
ကမ်ပိန်းရဲ့ အဓိက ရည်ရွယ်ချက်ကတော့ အညာမြေမှာ တော်လှန်ရေးအရှိန်အဟုန်မြှင့်တင်ပြီး စိုးမိုးနယ်မြေတွေချဲ့ထွင်နိုင်ဖို့အတွက် လိုအပ်တဲ့ လနခဲယမ်းတွေဖြည့်တင်းနိုင်ရေးအတွက်ပဲဖြစ်ပါတယ်။
ဒါကြောင့် မိဘပြည်သူများအနေနဲ့ တတ်နိုင်ဘက်ကနေ တတ်နိုင်သလောက် ဝိုင်း၀န်းကူညီကြဖို့ မေတ္တာရပ်ခံတိုက်တွန်းအပ်ပါတယ်ခင်ဗျာ။
ဒီကမ်ပိန်းလေးမှာ ပါ၀င်ချင်တယ်ဆိုရင် ကျွန်တော်တို့ရဲ့ page messenger ကနေဖြစ်ဖြစ် Telegram channel ဖြစ်တဲ့
/channel/KB4Telegram ကနေဖြစ်ဖြစ် လာရောက်ဆက်သွယ်နိုင်ပါတယ်ဗျ။
အောက်ပါ နိုင်ငံတကာ Fundraiser များကနေ တဆင့်လည်း ဆက်သွယ်လှူဒါန်းနိုင်ပါတယ်ဗျ။
https://www.facebook.com/share/p/1S7zC9QLHr/
အိမ်နီးချင်းနိုင်ငံများနှင့် နယ်စပ်မျဉ်းပေါ် အားပြုရပ်တည်နေရသဖြင့် တိုင်းရင်းသားတော်လှန်ရေးတပ်များအပေါ် အမြင် မတိမ်း စောင်းရန် NUG ယာယီသမ္မတ သတိပေး
ရန်ကုန်၊ ဖေဖော်ဝါရီ ၈
စစ်အာဏာရှင်ကို တော်လှန်နေသော တိုင်းရင်းသားတော်လှန်ရေး မဟာမိတ်အဖွဲ့များမှာ အိမ်နီးချင်းနိုင်ငံများနှင့် နယ်စပ်မျဉ်းပေါ်တွင် အားပြုကာ ရပ်တည်နေရသဖြင့် တိုင်းရင်းသား တော်လှန်ရေးတပ်များအပေါ် အမြင်မတိမ်းစောင်းရန် အမျိုးသားညီညွတ်ရေးအစိုးရ-NUG ယာယီသမ္မတ ဒူဝါလရှီးလက ပန်ကြားသည်။
ယနေ့ ဖေဖော်ဝါရီလ ၈ ရက်နေ့တွင် ကျင်းပပြုလုပ်သည့် အကြမ်းမဖက်အာဏာဖီဆန်ရေးလှုပ်ရှားမှု - (CDM လှုပ်ရှားမှု) ၄ နှစ်ပြည့် အထိမ်းအမှတ် အခမ်းအနားမှာတွင် ၎င်းက အထက်ပါအတိုင်း ထည့်သွင်းပြောကြားခဲ့ခြင်းဖြစ် သည်။
“တိုင်းရင်းသားမဟာမိတ်တွေနဲ့ ပတ်သက်ပြီး ကျွန်တော်တို့ရဲ့ သဘောထားအမြင်တွေကို မတိမ်းစောင်းရအောင် အနည်းငယ် လက်တို့ သတိပေးချင်တာ ရှိပါတယ်။ အားလုံးသိကြပြီးဖြစ်တဲ့အတိုင်း ကျွန်တော်တို့ နဲ့ အတူ ပူးပေါင်းလှုပ်ရှားနေတဲ့ တိုင်းရင်းသားလက်နက်ကိုင်မဟာမိတ်တွေဟာ အိမ်နီးချင်းတွေရဲ့ နယ် စပ်မျဉ်းတွေပေါ်မှာ အားပြုပြီး ရပ်တည်နေကြရတာတွေ ရှိပါတယ်။ ဒါကြောင့် ကျွန်တော်တို့ နိုင်ငံအပေါ် မှာ ကျရောက်တဲ့ ပထဝီနိုင်ငံရေး အကျပ်အတည်းကြားမှာ မြေဇာပင်မဖြစ်ရအောင် ဒေသတွင်း နိုင်ငံရေး ရာသီဥတုကို ကြည့်ပြီး တော်လှန်ရေး လီဗာ အဖိအဖော့ပြုလုပ်ကြရတာ ရှိပါတယ်။ ဒါကြောင့် တစ်ခါ တစ်ရံနည်းနာအရ အလှည့်အပြောင်းလုပ်ပြီး ကျင့်သုံးရတာတွေ ရှိနေတယ်လို့ နားလည်သဘောပေါက် ထားဖို့ လိုပါတယ်။ နည်းနာအရ အပြောင်းအလဲတွေ လုပ်တာဟာ ပန်းတိုင်နဲ့ ရည်မှန်းချက်ကို ပြောင်းလဲ ပစ်လိုက်တာ မဟုတ်ဘူးဆိုတာကိုလည်း ကျွန်တော်တို့ သတိချပ်ဖို့ လိုပါတယ်။” ဟု NUG ယာယီသမ္မတ ဒူဝါလရှီးလက ပြောကြားသည်။
အမျိုးသားညီညွတ်ရေးအစိုးရမှာ တော်လှန်ရေးအစိုးရ ဖြစ်သောကြောင့် တော်လှန်ရေးကို တော်လှန် ရေးနှင့် တူအောင် လုပ် ဆောင်ရပြီး အားသာချက်၊ အား နည်းချက် ဒွန်တွဲဖြစ်တည်နေကြောင်း၊ လုပ် ဆောင်ခဲ့သည့် တော်လှန်ရေးလုပ်ငန်းစဉ်များထဲတွင် အရေးကြီးလုပ်ဆောင်မှုခဲ့မှုများ ပါဝင်ကြောင်း၊ အရေး ပေါ်ဖြစ်စဉ်များအတွက် ဦးစားပေးလုပ်ခဲ့ရမှုများရှိကြောင်း၊ CDM ဝန်ထမ်းများ အပေါ် အပြည့်အဝ မကူညီနိုင်ခဲ့မှုများကို နားလည်ပေးရန်၊ ၄ နှစ်တိုင်တိုင် မလျှော့သော ဇွဲလုံ့လ ၊ မဆုတ် မနစ် ကြိုးစားအားထုတ်မှုများဖြင့် တိုက်ပွဲဝင်နေကြသည့် CDM သူရဲကောင်း အားလုံးကို ဦး ညွတ် ဂုဏ် ပြုအလေးပြုပါကြောင်း ၎င်းက ပြောဆိုသည်။
“တော်လှန်ရေး ခရီးလမ်းမှာ ပြည်သူကို အခြေခံတဲ့ လုပ်ငန်းတိုင်းဟာ အရေးကြီးတယ်ဆိုပေမယ့် အဲဒီ အရေးကြီးတဲ့ လုပ်ငန်း စဉ်အတွင်းကနေ ဦးစားပေးလုပ်ဆောင်ခဲ့ရတဲ့ လုပ်ငန်းစဉ်တွေ ရှိပါတယ်။ အထူး သဖြင့် ခုခံတော်လှန်ရေးကိစ္စမှာ အရေးပေါ်ဦးစားပေးလုပ်ဆောင်ရတာတွေ ရှိပါတယ်။ ဒါကြောင့် ကျွန် တော် တို့ အနေနဲ့ CDM လှုပ်ရှားမှုမှာ ပါဝင်သူ အားလုံးအပေါ်မှာ လိုလေသေးမရှိ အပြည့်အဝ မကူညီနိုင် ခဲ့တာတွေ ရှိတယ်ဆိုတာကို ကျွန်တော် ဝန်ခံပါတယ်။ အဲဒီအတွက်လည်း ကျွန်တော်တို့ အစိုးရတစ်ဖွဲ့လုံး က ကိုယ့်ကိုယ်ကိုယ် အားမလို အားမရ ဖြစ်မိပါတယ်။ ကျွန်တော်တို့လည်း CDM လှုပ်ရှားမှုမှာ ဇွဲနပဲ သန် သန်နဲ့ ပါဝင်ခဲ့သူတွေ အားမလို အားမရဖြစ်တာလည်း ရှိကောင်းရှိမယ်လို့ ယူဆပါတယ်။ ဒါဟာ ကျွန် တော့်အနေနဲ့ ဆင်ခြေပေးနေတာ မဟုတ်သလို မျက်နှာလွှဲခဲပစ်လုပ်နေတာလည်း မဟုတ်ဘူးလို့ ပြော ချင်ပါတယ်။” ဟု ယာယီသမ္မတဒူဝါလရှီးလ ပြောကြားသည်။
ထို့ပြင် အမျိုသားညီညွတ်ရေးအစိုးရ၊ ပြည်ထောင်စုဝန်ကြီးချုပ် ဦးဆောင်၍ ပြည်သူ့ကာကွယ်ရေး အဖွဲ့- ပကဖ ၊ ပြည်သူ့အုပ် ချုပ်ရေးအဖွဲ့-ပအဖ ၊ ပြည်သူ့လုံခြုံရေးအဖွဲ့-ပလဖ ယန္တရားများ ပိုမိုကောင်း မွန် လာစေရန် ထိန်းကျောင်းပြုပြင်ပြောင်းလဲမှုကို စနစ်တကျလုပ်ဆောင်နေကြောင်း သမ္မတက အသိပေးပြောဆိုသွားသည်။
ရန်ကုန်တွင် လုံခြုံရေး တင်းကျပ်သည့်ကြားမှ စစ်အာဏာရှင် ဆန့်ကျင်ရေး လှုပ်ရှားမှု ပြုလုပ်
ရန်ကုန်၊ ဖေဖော်ဝါရီ ၈
ရန်ကုန်တွင် လုံခြုံရေး တင်းကျပ်သည့်ကြားမှ စစ်အာဏာရှင် ဆန့်ကျင်ရေး လှုပ်ရှားမှု ပြုလုပ်ကြောင်း သိရှိရသည်။
ယနေ့ ရန်ကုန်တွင် စစ်ကောင်စီက လုံခြုံရေးအင်မတန်တင်းကျပ်ထားသည့်ကြားမှ “စစ်အာဏာရှင်ကိုတော်လှန်နေတာ သင်တိုနဲ့မဆိုင်ဘူး ကျော်သွားကြပါ၊စစ်မှုထမ်းဖို သွားကြပါ” စာသားဖြင့် လူစည်ကားရာ စျေးတစ်ခုတွင် ပြည်သူလူထုကို လှုဆော်သည့် လှုပ်ရှားမှုတစ်ရပ်ပြုလုပ်ခဲ့ကြောင်း သိရှိရသည်။
အဆိုပါ လှုပ်ရှားမှုကို ရန်ကုန်တော်လှန်ညီနောင် ၄ဖွဲ့ နှင့်စမ်းချောင်းပင်သပိတ်စစ်ကြောင်း(SC Strike)တို့က ပူးပေါင်းဆောင် ရွက်ခဲ့ခြင်းဖြစ်ကြောင်း သိရှိရသည်။
စစ်အာဏာသိမ်းပြီးသည့်အချိန်မှစ၍ ယခုကာလအထိ ပြည်သူလူထုအပေါင်း ရင်ဆိုင်တွေ့နေရသည့် အထွေထွေကျပ်တည်းမှု၊ မလုံခြုံမှု၊ ဖိနှိပ်ခံရမှု၊ အခြေခံလူ့အခွင့်အရေးများဆုံးရှုးမှုအပြင် အတင်းအဓမ္မ စစ်သားစုဆောင်းမှုများ၊ ပေါ်တာဆွဲမှုများ စသည့် အခက်အခဲအကြပ်အတည်းပေါင်းများစွာ၏ အဓိကလက်သည်တရားခံမှာ မင်းအောင်လှိင်ဦးဆောင်သည့် အာဏာရှင်တစ်စုကြောင့်ဖြစ်ကြောင်း၊ အခက်အခဲ အကျပ်အတည်းများစွာမှ လွတ်မြောက်ရန် စစ်အာဏာရှင်စနစ်အမြစ်ပြတ်ချုပ်ငြိမ်းသည်အထိ ရသည့်နည်းလမ်းဖြင့် တော်လှန်ရန်မှလွဲ၍ အခြားမရှိကြောင်း၊ ထိုကြောင့် ပြည်သူလူထုကြီးအနေဖြင့် စစ်အာဏာရှင်စနစ်အမြစ်ပြတ်သည်အထိ အင်တိုက်အားတိုက်ဖြင့် ဆက်လက်ဝန်းရံ တော်လှန်ပေးကြပါရန် သပိတ်အင်အားအားစုများက တိုက်တွန်းနှိုးဆော်သည်။
နယ်သာလန်နိုင်ငံ The Hague မြို့ရှိ နိုင်ငံတကာ ရာဇ၀တ်ခုံရုံး (ICC) နှင့် The Hague မြို့ရှိ တရုတ်သံရုံးရှေ့တွင် မြန်မာစစ်အုပ်စုကို ဆန့်ကျင်ဆန္ဒပြ
ရန်ကုန်၊ ဖေဖော်ဝါရီ ၆
နယ်သာလန်နိုင်ငံ The Hague မြို့ရှိ နိုင်ငံတကာ ရာဇ၀တ်ခုံရုံး (ICC) နှင့် The Hague မြို့ရှိ တရုတ်သံရုံးရှေ့တွင် နယ်သာလန်ရောက် မြန်မာများ စုပေါင်း၍ ဖေဖော်ဝါရီလ ၅ ရက်နေ့တွင် အကြမ်းဖက် မြန်မာစစ်အုပ်စုကို ဆန့်ကျင်ဆန္ဒပြခဲ့ကြကြောင်း သိရှိရသည်။
အမေရိကန်ရောက် အထောက်အထားမဲ့နှင့် သက်တမ်းလွန် မြန်မာများကို မြန်မာပြည် ပြန်လိုလျှင် သက်သေခံလက်မှတ် ထုတ် ပေး မည်ဟု စစ်ကောင်စီသံရုံး ကြေညာချက် ရိုးသားမှုမရှိဘဲ တော်လှန်ရေးသမားများကို ဖမ်းလိုစိတ် အပြည့်ရှိနေဟုဆို
ရန်ကုန်၊ ဖေဖော်ဝါရီ ၆
အမေရိကန်ရောက် အထောက်အထားမဲ့နှင့် သက်တမ်းလွန် မြန်မာများကို မြန်မာပြည်လိုလျှင် သက်သေခံလက်မှတ် ထုတ် ပေးမည်ဖြစ်ကြောင်း အမေရိကန်ပြည်ထောင်စု၊ ဝါရှင်တန်ဒီစီ အခြေစိုက် စစ်ကောင်စီသံရုံးက ထုတ်ပြန်ကြေညာသည်။
ဖေဖော်ဝါရီလ ၅ ရက်နေ့ နေ့စွဲဖြင့် ထုတ်ပြန်ကြေညာသော စစ်ကောင်စီသံရုံး၏ ကြေညာချက်တွင် အမေရိကန်ရောက် မြန်မာ နိုင်ငံသားများအနေဖြင့် အကြောင်းကြောင်းကြောင့် နေထိုင်ခွင့် ဗီဇာစသည့် တရားဝင် အထောက်အထား သက်တမ်းကုန်ဆုံးခြင်း စသည်တို့ ကြုံတွေ့နေရပါက အထောက်အထားမဲ့ နိုင်ငံခြားသား နေရပ်ရွှေ့ပြောင်းသူအဖြစ် သတ်မှတ်ခံရကာ ပြည်နှင်မည့် အနေအထားများ ဖြစ်ပေါ်လာနိုင်ကြောင်း၊ အကယ်၍ နေထိုင်ခွင့် အထောက်အထားမဲ့ သို့မဟုတ် တရားမဝင် ရောက်ရှိနေသူများအနေဖြင့် အမေရိကန်အစိုးရက ပြည်နှင်ချိန်မှ ထွက်ခွာခြင်းထက် ကြိုတင်ထွက်ခွာသင့်ကြောင်း စစ်ကောင်စီသံရုံးက ထုတ်ပြန်ထားသည်။
မြန်မာနိုင်ငံအပြန်ခရီးအတွက် မည်သည့် ခရီးသွားလက်မှတ်အမျိုးအစားမျှ မရှိပါက (သို့မဟုတ်) နိုင်ငံကူးလက်မှတ် သက် တမ်း လွန်နေပါက မည်သူမည်ဝါ ဖြစ်ကြောင်း သက်သေခံ လက်မှတ် လျှောက်ထားနိုင်ပါကြောင်း၊ လျှောက်ထားရန် ပုံစံနှင့် လိုအပ်ချက်များကို သံရုံး၏ ဝက်ဆိုက်မှ ရယူဖြည့်စွက်၍ ဆက်သွယ်ဆောင်ရွက်နိုင်ကြောင်း စစ်ကောင်စီသံရုံးက ထုတ်ပြန်သည်။
"စစ်တပ် သံရုံး ကြေညာချက်ကတော့ သိပ်တော့ မရိုးသားဘူး။ ဘာလို့ဆိုတော့ အမေရိကန်မှာ အထောက်အထားမဲ့မြန်မာတွေကို မြန်မာပြည်ပြန်ခိုင်းနေတာ။ ဘယ်သူက ပြန်မလဲ။ အမေရိကားရောက်ဖို့ဆိုတာက လွယ်တာမဟုတ်ဘူး။ အခုလည်း ဖမ်းနေတာက နယ်စပ်က ခိုးဝင်တွေကို အဓိက ဖမ်းနေတာပါ။ မြန်မာတွေအကုန်က လေယာဉ်နဲ့ တရားဝင် ဝင်လာကြသူတွေချည်းပဲ။ ပြီးမှ ဗီဇာ သက်တမ်းလွန်တာ၊ ခိုလှုံခွင့်တင်ကြတာ။ ဒါကိုလည်း စစ်ကောင်စီသံရုံလည်းသိတယ်။ သိသိနဲ့ ဒီကြေညာချက် ထုတ်တာက အမေရိကန်အစိုးရကို မြန်မာနိုင်ငံသားတွေ ဖမ်းမိရင် သူတို့ တာဝန်ယူမယ်ဆိုတာမျိုး ကမ်းလှမ်းတာ။ မရိုးမသား ကြေညာချက်ပါ" ဟု အမေရိကန်ပြည်ထောင်စု၊ မယ်ရီလန်းပြည်နယ်တွင် နေထိုင်သူ မြန်မာနိုင်ငံသားတစ်ဦးက ပြောဆိုသည်။
စစ်ကောင်စီက အမေရိကန်နိုင်ငံသား ရွှေဝါရောင် ဆရာတော် နတ်ဇောကို မြန်မာပြည်ပြန်လာစဉ် ၂၀၂၄ ခုနှစ် နိုဝင်ဘာလအတွင်းတွင် အင်းစိန်မြို့နယ်တွင် ဖမ်းဆီးခဲ့ပြီး အကြမ်းဖက်မှု တိုက်ဖျက်ရေးဥပဒေ အပါအဝင် ပုဒ်မ များစွာဖြင့် ဖမ်းဆီး တရားစွဲဆိုထားကာ အင်းစိန်အကျဉ်းထောင်တွင် ချုပ်နှောင်ထားသည်။
အုတ်ဖိုမြို့ရှိ စစ်မှုထမ်းဟောင်းရုံးကို ဖောက်ခွဲ တိုက်ခိုက်မှု စစ်ကောင်စီ တပ်သား ၁ ဦး သေဆုံး
ရန်ကုန်၊ ဖေဖော်ဝါရီ ၆
ပဲခူးတိုင်း၊ အုတ်ဖိုမြို့ရှိ စစ်မှုထမ်းဟောင်းရုံးကို ဖောက်ခွဲ တိုက်ခိုက်ရာ စစ်ကောင်စီ တပ်သား ၁ ဦး သေဆုံးခဲ့ကြောင်း ပဲခူးရိုးမအခြေပြု ရွှေဂဠုန် -စစ် ကြောင်း စစ်ရေးတာဝန်ခံ ဂျာနူးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၅ ရက်နေ့ နံနက် ၄ နာရီ ၃၀ မိနစ်ခန့်တွင် အုတ်ဖိုမြို့၊ မြို့မ ရဲစခန်းအနီးရှိ စစ်မှုထမ်းဟောင်းရုံးကို ရွှေဂဠုန် - စစ် ကြောင်း တပ်ဖွဲ့ ၁ မှ တော်လှန်ရေး ရဲဘော်များက ဖောက်ခွဲ တိုက်ခိုက်ခဲ့ကြောင်း သိရသည်။
ယင်းတိုက်ခိုက်မှု အတွင်း အကြမ်းဖက် စစ်ကောင်စီ တပ်တပ်သား ၁ ဦး သေဆုံးခဲ့ပြီး တော်လှန်ရေး တပ်ဖွဲ့ဝင်များ အထိအခိုက်မရှိ ဆုတ်ခွာနိုင်ခဲ့ကြောင်း သိရှိရသည်။
"အဲရုံးမှာက စစ်မှုထမ်း အင်အားကတော့ စစ်မှုထမ်း ကားသမားအပါဝင် ၇ ကောင် အမြဲ ရှိပါတယ်။ ရဲစခန်း နားဆိုတော့ ရဲတွေလဲ လာတတ်တယ်။ ကျနော်တို့ မိုင်းက ကြိုထောင်ထားတာပါ။ မိုင်းကွဲ ပြီးတာနဲ့ စစ်ခွေးတွေ ရဲခွေးတွေ မြို့စောင့်အင်အား အကုန်နီးပါး ကြောက်လန့်ပြီး ၄၀ နီးပါး ရောက်လာကြပါတယ်။ သူတို့ ပိတ်ဆို့ ထားတဲ့ ဂိတ်တွေတောင် ဒီတိုင်းထားခဲ့ကြတာ ကျနော်တို့ ရဲဘော်တွေ ပြန်ဆုတ်ဖို့ အသာ ဖြတ်ခွင့်ရ ခဲ့ပါတယ်။ သူတို့ မြို့ထဲ ကို သေချာပိတ်ဆို့ ထားရဲ့နဲ့ မြို့လယ်ခေါင် မြို့မရဲစခန်း နား စစ်မှုထမ်းရုံးကို မိုင်းခွဲခံရတဲ့အတွက် အရှက်တွေကွဲတာပေါ့" ဟု ရွှေဂဠုန် - စစ်ကြောင်း စစ်ရေးတာဝန်ခံ ဂျာနူးက ပြောဆိုသည်။
အဆိုပါ စစ်ဆင်ရေးကို “၆၄-နှစ်မြောက် ကချင်တော်လှန်ရေးနေ့ အထိမ်းအမှတ်” အဖြစ် ဂုဏ်ပြု ဆောင်ရွက်ခဲ့ခြင်းဖြစ်ပြီး ပဲခူးရိုးမ တော်လှန်ရေးတပ်ဦး ဗဟိုဦးစီးအဖွဲ့၏ အစည်းအဝေး ဆုံးဖြတ်ချက်အရ “ကဖူဂနောင် စစ်ဆင်ရေး” အဖြစ် အကောင်အထည်ဖော် ဆောင်ရွက်ခဲ့ခြင်းဖြစ်ကြောင်း ရွှေဂဠုန် - စစ်ကြောင်း စစ်ရေးတာဝန်ခံ ဂျာနူးက ဆက်လက်ပြောဆိုသည်။
ကျောက်ကြီးမြို့နယ်ရှိ ဘုန်းကြီးနှင့် ကျေးရွာများကို စစ်တပ်က ဒရုန်း၊ လက်နက်ကြီး တို့ဖြင့် ပစ်ခတ်မှုကြောင့် အသက် ၁၆ နှစ်အရွယ် မိန်းကလေး ၁ ဦး သေဆုံးပြီး သံဃာတော် ၁ ပါးနှင့် ပြည်သူ ၁ ဦး ဒဏ်ရာရ
ရန်ကုန်၊ ဖေဖော်ဝါရီ ၆
ပဲခူးတိုင်း၊ ကျောက်ကြီးမြို့နယ်ရှိ ဘုန်းကြီးနှင့် ကျေးရွာများကို အကြမ်းဖက် စစ်တပ်က ဒရုန်း၊ လက်နက်ကြီး တို့ဖြင့် ဗုံးကျဲ ပစ်ခတ် တိုက်ခိုက်ရာ အသက် ၁၆ နှစ်အရွယ် မိန်းကလေး ၁ ဦး သေဆုံးပြီး သံဃာတော် ၁ ပါးနှင့် ပြည်သူ ၁ ဦး ဒဏ်ရာရရှိခဲ့ကြောင်း KNU ဗဟိုက သတင်းထုတ်ပြန်သည်။
ဖေဖော်ဝါရီလ ၂ ရက်နေ့ မွန်လွဲ ၁ နာရီ ၁၀ မိနစ်ခန့်တွင် အကြမ်းဖက် စစ်တပ်က ကညှင်ကျိုး ကျေးရွာအတွင်းကို ဒရုန်းဖြင့် ဗုံး ၃ လုံး ကျဲချ တိုက်ခိုက်ခဲ့ရာ ကျေးရွာနေပြည်သူ အသက် ၅၂ နှစ်အရွယ် ဒေါ်ကြူကြူ ထိခိုက် ဒဏ်ရာရပြီး နေအိမ် ၄ လုံး ပျက်စီးခဲ့ကြောင်း သိရသည်။
ဖေဖော်ဝါရီလ ၃ ရက်နေ့တွင် အလှိုင်ကျေးရွာကို ပိန်းဇလုပ် အခြေစိုက် အကြမ်းဖက် စစ်တပ်၏ ခလရ ၂၆၄ တပ်ရင်းက ၁၂၀ မမ လက်နက်ကြီးများဖြင့် မီးလောင်ဗုံးများ ပစ်ခတ်ခဲ့ရာ ကျေးရွာအတွင်း နေထိုင်သော အသက် ၁၆ နှစ်အရွယ် မစုမွန် ထိမှန် သေဆုံးခဲ့ပြီး နေအိမ် ၂ လုံး ပျက်စီးခဲ့ကြောင်း သိရှိရသည်။
ဖေဖော်ဝါရီလ ၄ ရက်နေ့ နံနက် ၉ နာရီခန့်တွင် ခလရ ၂၆၄ တပ်ရင်းက ထပ်မံပြီး တောင်ခင်ကျေးရွာအတွင်းကို ၁၂၀ မမ လက်နက်ကြီး ၂ လုံး ပစ်ခတ်ခဲ့ရာ ကျေးရွာဘုန်းကြီးကျောင်းအတွင်း ကျရောက်ပေါက်ကွဲခဲ့ပြီး သက်တော် ၆၀ နှစ်ရှိ ဥူးဇင်းဥက္ကံသ ဒဏ်ရာရရှိကာ ဘုန်းကြီးကျောင်းလည်း ထိခိုက် ပျက်စီးခဲ့ကြောင်း သိရသည်။