شوط كربلائي للاكبر ع..
اول مرة ابو اليمه حمرة دمعة عيونه
ومتمدد عله طوله بنص البر يشوفونه
..................
حسين الما تهزه الريح جبل يذبل بجه لحاله
يشوفه امدد عله الكاع ونور بصفه يبراله
جنه يسولف ويه النور ودمعة عينه همالة
سوالف كلبه مسموعة
الكلمة تكسر ضلوعه
الصورة اباله مطبوعة
اثاري ابنه العله التربان لذلك منخطف لونه
..................
بده يسولف ابو الاكبر وابنه امدد بكتره
يالاكبر يا علي يبني شكلك وانته عالغبره
شعجب رجلك تطر الكاع وتطلع بالسمه الكمرة
ما تعرف شبيه احساس
ما ينوصف والعباس
لون مثلك تملكه الناس
متشوفه الشمس هيهات لحظة ما يخلونه
..................
يل طالع كمر للكوم بس الوادم الغشمه
انخسف بدرك لمن حاطوك يكشخة عين ابو اليمه
الجان بشوفتك يرتاح يلمك ثلمة وي ثلمة
العليك يخاف ما تطلع
هسه يشوفك مكطع
كاعد ينعه بالمصرع
ويون ون الثكاله عليك خابت بالظنه ظنونه
..................
عله الدنيا العفه بلياك يواهس كلبي موته
فاهي كلشي من دونك المحلي العمر انته
يصورة جسمك عله الكاع كلب الدنيا لاجمته
ينور عيون ابو السجاد
مجانك ما إله سداد
خلافك كلبي بس رماد
حكه يحترك كلبي بسهمك من يصوبونه
..................
انكسرت هيبتي وظهري وفرحو لمن شافوني
هذاك الما يهمني الموت نزلت دمعة عيوني
وحمرة من البواجي عليك رايح ليش من دوني
يماي عيوني يالاكبر
شلون اتحمل المنظر
وليدي كبالي وموذر
المثلك بس نشمه وموش وصل جسمه يلمونه
..................
تمددت بكتر طولك هيجي الله واموت وياك
وراح النور البوجهي ذبل وجهي عكب فركاك
الف طف اليمر بيه ولا لحظة تمر بجفاك
يكسرة خاطر حسينك
كوم ولا تسد عينك
قصر ما تمت سنينك
شعلامه الموت الك محتام سوية جاينه كونه
..................
الخادم.. حسين الغالبي
٧ محرم ١٤٤٤
6/8/202 2
للإمام الحسين ع..
الطف كريم يعرفك تدلله
رايد حضن يالغالي وانطيته اله
امطشر بطول وعرض كربله
يا حسين.. يا حسين..
...............
اكبلت للطف وعرف يا بو علي عنوانك
شيخ الكرم جان وانس غركت ابحر احسانك
لا حاتم ولا مثله الف عادلها جف ميزانك
جا هيه مو بيد الخلك الله المكبر شانك
من اول جدم والديرة شمت كرم
الطف يريد تطلعه من العدم
واقبلت انته ووقعتله بسهم
يا حسين.. يا حسين..
...............
الطف يريد من العدم اتطلعه يابو اليمه
وطماع بيك شكد رغب عطرك يريد يشمه
كاعه جبيرة وانته بس واحد شلون تضمه
وماكتله ما ترهم ابد هالشغلة عندك زحمة
ابشر كلت وافكاره متحيرة
وظل صافن كبالك صدك يا ترى
اشلون ترهم يا شبل حيدرة
يا حسين.. يا حسين..
...............
كتله بسيطة ولا تهم لتكول ما معقولة
اليكصدني يعرف عادتي يكول انكظت محلولة
الواكف كبالك تره ساعات ويخر طوله
يتبده جسمه عله الرمل ما يلكه اليفزعوله
ومن يبدي شمر براسي سيفه يحز
ساعتها ينحل عندك اول لغز
كلبك الزمه من الخبر لا يفز
يا حسين.. يا حسين..
...............
اتعودت مارد احد يتعنه اليه زاير
وانطي اليجيني بلهفته ياخذ مراد الحاير
لهذا السبب بعد الذبح قررت يوم العاشر
اطشر بطول وعرض عن لا ارد الحافر
اخيول عشرة ووصلت لجثتي
دخلت مضيفي وداست بعتبتي
قدمت جسمي وافرشت شيبتي
يا حسين.. يا حسين..
...............
خيل اعوجية عشرة الي حضروهه تصعد فوكي
تدوس دوس الحاقدة تمرد جميع عروكي
لا دم اليبقه ولا جسد اتطشر انه وشوكي
بكل شبر من كاعك وذر واعليه يطر شروكي
تشرق شمس جسمي على ساحتك
حته الوذر تكفي لجل شبكتك
ميت حسين وما يرد طلبتك
يا حسين.. يا حسين..
...............
الخادم.. حسين الغالبي
27/7/202 2
٢٧ ذي الحجة ١٤٤٣
اساسية للعليلة ع
أخذ اهلي ومشه وانطاني ظهره
وانه كلبي الحنين انطاه عمره
أبويه الما مش يصحلي مثيله
اول مرة يتركني عليلة
..................
بحياته حسين ما سواهه وياي.. ما منطيني ظهره
مو طبعه الجفه حيرني مولاي.. شنهي الراح يجره
راح الجان دوم الشبكتي جاي.. وما خبرني عذره
اخذهم كلهم وخلاهه دنياي.. من دون اهلي صحره
راح ومن شفت اهلي عله النوك
بعدني الظعن اشوفه وكلبي محروك
ليلة وبجفاه شلون ليلة
اول مرة يتركني عليلة
..................
اخذ مني ابو فاضل واني احبه.. كافل كلبي هوه
واخويه الاكبر الرافكه بدربه.. اعوفه شلون كوه
وجاسم كال يبقه حسين كربه.. بيه الظعن يضوه
عيوني عالطفل خلاهه تربه.. كلبي شكد تجوه
وين اليسوه راح وباقية انه
شيصبره كليبي لو هاج بحنانه
طفله ومنهه راحت هيجي عيلة
اول مرة يتركني عليلة
..................
انطاني ظهره كلبي انطاه عمره.. ميعيش بغيابه
جفاني ومن يجافي الحزن يبره.. بعد ما كول بابا
كتلني الشوك من ابعد بصحره.. واكعدت عله بابه
انحب واصرخ وظليت بره.. لن بيتي خرابة
شعندي ابيت ما بي ريحة حسين
وبس حايط شما تندارلي عين
طفلة وهمي تسحك كلبي خيله
اول مرة يتركني عليلة
..................
بدال حسين صار الونس حيطان.. ما شوفنه يمي
وياهو يسد مكان الجانو حنان.. المن اشكي همي
بقيت انطر خبر عن ذاك المجان.. البيه يكلي اقدمي
بلهفة شوك كلبي عليه عطشان.. وباستعداد جدمي
كلي يوصل ويرسلي مرسال
اول مرة يوعد والوعد طال
ادري حسين متعذب دليله
اول مرة يتركني عليلة
..................
يربي سترك من الصاير وياه.. ما معقولة ينسه
شنهي الجره ليه وهيجي خلاه.. راح وراح حسه
كظيت ايامي وكفه وربي انخاه.. يرب لا شر يمسه
وكونك رايد لوالدي تبلاه.. أريدن موتي هسه
شلي بدنيا كوني ما اشوفه
وكل صبحية ماقبل جفوفه
من هسه الكلب مهدود حيله
اول مرة يتركني عليلة
..................
الخادم.. حسين الغالبي
23/7/202 2
٢٣ ذي الحجة ١٤٤٣
أساسية للزهراء ع
البير شيب من كلتله السالفة
وأنعم الله جدامي ظلت واكفة
رويت .. واول حجاية إلي
بديت.. جايك ميت علي
بديت.. بديت..
.............
لبير أسراري اكبلت .. سولفتله عالزجية
وابتديت بكلمتي .. جيت ميت هالمسية
يبير السوالف ثجيلة بوصفها
ملك موتك تشوفه بس من حرفها
اجيتك اخفف جروحي ونزفها
ولو جرحي ولا ضماد يوالمه
وشيفيده المنه راحت فاطمة
احير.. شلون اسولفلك صعب
احير.. بيه ما باقي كلب
احير.. احير..
...........
جنت انه بحجرتي.. ولن سمعت الصوت عالي
اطلعت كلبي انلجم.. ثاري طايح ليه غالي
ردت بابي اوصل مسافة قليله
اريد الجدم يمشي ما بيه اشيله
القلع خيبر هنانه ماهوه حيله
الناس تقسم وحك قالع خيبرة
هسه شو طاحت على بابه مرة
اصيح.. فاطمة شنهو الجره
تصيح.. محسن ابنك عالثره
تصيح.. تصيح..
...........
لبابي بالكوة اوصلت.. لنهه مدفوعة عليهه
وره الباب شكد دمه.. وشفت محتركات اديهه
شفتها الأميرة تلوج بالمها
الكبل جانت أحلامه يوصل اسمها
بسياطه ضربها وصفعها وشتمها
وذيج الجذوع الثكيلة ابابها
ما تهمها همها بس حجابها
اجيت.. لجن حيل اتاخرت
اجيت.. وللشماته اتحضرت
اجيت.. اجيت..
..........
من اجيت انظر زلم.. يله افزع يكلولي!
واوصلت لام الحسن.. لجن ما امشي عله طولي
نظرت الزجية وكلت بلكي احلم
انه ابيتي يمته الورد ناكع بدم
حمل كلبي حسرة بحرارة جهنم
حامي جاري اسمي عند الوادم
شلون هيج ابيتي توكع فاطم
عجيب.. انظر شصار بهلي
عجيب.. لسه ما ميت علي
عجيب.. عجيب..
.........
يا هضيمة اكبر بعد.. ومحسن ابني وياهه طايح
وكلي شيصبر علي.. شكبر جرحه وكلشي مالح
تره وليدي لا شم هوه ولا ضوه شاف
بأمان الله كاعد دم امه عليه طاف
شعز منه ونكول عليه لا مينخاف
يا جنين المثله لا ما واردة
يفز كلبه بكسر ضلع الوالدة
حرام.. بعده ما بادي العمر
حرام.. من بطنها للكبر
حرام.. حرام..
.........
البير جن شفته انصدع.. ما تحمل هالمصايب
اتبده وترابه وكع.. كلبه حيل عليه ذايب
يكلي انه عليك متت هالمسية
يعينك إلهي بوداع الزجية
فكدهه بحياتك سوه ويه المنية
الله كون يرزقه موت الفاكد
ومثل فكدك ما سده عله اي واحد
ممات.. راحة للفاكدله خل
ممات.. وفاطمة بلاية مثل
ممات.. ممات..
............
الخادم.. حسين الغالبي
يا صاحب الزمان عج
اعتذاري
الك يا أكثر ابن آدم يستحق هالاعتذار
يمته أعمالي تدليني عله بابك
واستحق شوفة جنابك
جنتك ظلت ورايه
وكلبي يمشي لصوب نار
يمته افك حبال ذنبي
ويبقه شيطاني بغربته
وتجي انته
تجي من ذيج الصحاري البيهه خليناك وحدك
وانته موش ولام صحرة
احنه ظلمة وانته كمرة
احنه شوك وانته زهرة
احنه نغفل وانته ادرى
فدوة يا باقي السفينة
ألزم بايدك ادينه لا نتوه بهل بحر
يا ابن ذاك اليباوع
شاف دين الله بمتاهة كام فازعله بنحر
السنة كلهه وانه اعرفك بس محرم وبصفر
انه المقصر وياك شما كلت
انه لو فعلا احبك دوريتك
موش هيج اتاخرت
وانه لو فعلا اجيتك جا لكيتك
المؤمن الكلبه دليله يندل دروب العشك
حسين كدما يحب الله راحله بيوم الطبك
الخادم.. حسين الغالبي
كعدية ل عبد الله الرضيع ع
على طور (هاي دار النوايـب)
ليش خالي المهد هاي المسية
وحشة صارت علي شتهز ادية
صفه مهده خالي منه
وين راح حسين ابنه
ام تدور عله ابنهه رد عليه
............
دورت يحسين عنه ماهو عبد الله بمجانه
واشعر بكلبي لجمني جنه احس هايج حنانه
جان صدري دافي لابني هالصدر بردت احضانه
عبد الله وينك يالولد .. شمعرفك بغير المهد
ترجعلي لو مترد بعد .. يل جنت ملك بزمانه
وين رايح يعبد الله وعفتني
جان بيتك يالزغيرون متني
وهسه اشوف المهد خالي
وانته ماشوفك كبالي
اكبل لمهدك وارجع خلية
...........
كلي يحسين شحصله شلون ردلي بهيج حالة
كالو بايدك خذيته كلي يعيوني شجراله
بيا شريعة الطفل مذنب ليش جفك عالي شاله
كالولي مي تطلب جنت .. وبدونه يالغالي ارجعت
الله اليعينك ما متت .. لمن راسه عليك ماله
شلون كلبك تحمل والله صعبة
بحضنك تلولحت لابنك الركبة
هذا يا ماي التجيبه
والسهم ماخذ نصيبه
الما تلوحه الشمس لاحته امية
............
كمت اصيح بعالي صوتي عبد يبني وين انته
وانخمش كلبي اخبروني ذياب امية ماكلته
سالم كماطه لجنه حاضن النبلة بركبته
شرهمهه للنبلة حضن .. ترفة وتشيخ عله الكطن
اولامك مناغه ومتن .. ما عرفتك تغفه سكتة
شلون غافي بلايه مناغه وايدين
مهدك تهزه يله تغمض العين
نومتك هاي شثكلهه
وانه ما مرتاحتلهه
مدري ليش واحس نومة منية
...........
جنت اهز مهده والولي والطفل تغمض عيونه
هسه وحشة ومهده خالي وشتهز ايدي الحنونة
هزت سهام المنية بركبته وانخطف لونه
لولتله نبلة حرملة .. كمطته بالدم كربله
بلا رحمة جدام المله .. برمح راسه يرفعونه
كون رمحه رفع راسي بداله
ولا اشوف الولد هيجي جراله
والرضيع كبال امه
شلون تحمل يجري دمه
ليش اخذتي غفل يالغاضرية
...........
الخادم.. حسين الغالبي
أساسية للإمام الحسين ع
ثمن ديني هواي غالي
حسين راسه برمح عالي
صبحه طشه عله الليالي .. وانحيه الدين
..............
بهت دين الله ورسوله ورجعت الناس لهبل
شافهه حسين بمتاهة وجنه شاعر وارتجل
حمل همهه وحمل هدمه والظعن وياه حمل
شافهه الكيعان صبخة وعود للثورة شتل
شتل عود وخضر الطف
جنه فلاح الهه كيف
كربله رادته وانزف .. ليهه الحسين
..............
الصلاة جانت ثمنهه سهام بكليب الصبح
ولو ردت اتوضه اذكر دم الحسين اليسح
بكثر تسبيحة الزهرة واكثر بجسمه الجرح
وما رفع ايده يكبر رفع راسه عله الرمح
هيجي صلاهه صلاته
سبح باهله وبناته
تشاهد وسلم حياته .. وغمض العين
..............
ثمن صومي حسين صايم ثلث تيام العطش
حرملة اذن حسين بجبده المثلث فرش
طلع من ضلوعه فطرة لمن الحافر نبش
حسين اول صايم يظل ضامي والدين انتعش
تعيد الناس بسلامة
حسين عيد باليتامة
وصله بس بلا عمامة .. ومو ركعتين
..............
ثمن حجي حسين منطي لسه خالد هالاثر
ما رمو شيطان بالطف الكعبة شمروهه بحجر
سعت خيل الاعوجية بين ضلعه والنحر
طافت بجسمه لحدما خلت بصدره حفر
الضلع لبيك ناده
ولابس احرام الشهادة
لجن ما رد لبلاده .. انجسم نصين
.............
حسين علمني اخمس وانطي عن طيبة نفس
حسين خمس حته ايده وانطه خنصرهه خمس
حسين زكه وانطه هدمه وما بقه شي يلبس
بجسمه ابو اليمة تبرع لمن رادته الشمس
الشمس عطشت جسم عاري
فارشه حسين بصحاري
هيج المعزب يداري .. بالدواوين
.............
هالثمن غالي علينه ولازم نوفي الثمن
الحافظ عله الدين جنه يجبر اللي اتكسرن
يفرح حسين اليشوفه بكلبه ذني اتوطنن
وكون بيهن يخشع شكد ما عيونه عليه بجن
كون يرفع راس امامه
مو رمح بس بالتزامه
وفايز بيوم القيامة .. الوفه هالدين
..............
الخادم.. حسين الغالبي
مقدمة للامام الحسين ع ..
ليلة العاشر..
مذبوح // مذبوح // هالليلة قران
@ @ @ @ @ @ @ @ @ @
اللية كوكـب يـبـعـث لكوكـب نداء
أحــســن الله لــك هـــذا الـعـــزاء
وكلهه مفجوعة كلب اهل السماء
شافت مصاب السبط مطرت دماء
هاليوم // هاليوم // تنحب هالاكوان
@ @ @ @ @ @ @ @ @ @ @
ويلي وا ويلي عله حسين الشهيـد
من فكد بالطف ابو الفضل العـضيد
انكسر ظهره وصبح ضامي ووحيد
وبـديـار الغــربـة عـن اهله بـعــيـد
مكتوب // مكتوب // يكظيهه حرمان
@ @ @ @ @ @ @ @ @ @ @
من العـطش يابس لسانه هالامير
وماكـو يـمه واحد ولا مـن نصيـر
هوه القه الحجة بس مات الضمير
ورغم كل هذا رفض يصبح أسيـر
يا حيف // يا حيف // عز الله ينهان
@ @ @ @ @ @ @ @ @ @ @
منـتـظـر مـوته وصرخ يـله تـعـال
مـا يـعــيـش بـذلـة لا هــذا مـحـال
كثرت جروح الولي ودم منه سال
ياهـو يـتـرك لو يـشد هذا السؤال
وجروح // وجروح // ظل بيهه حيران
@ @ @ @ @ @ @ @ @ @ @
حضر السيف الشمر بالطف يصيح
راح اخـلصـك يا حسيـن وتسـتريح
عـن ألـف زادت جـراحه هالجـريح
تالي حـزو مـنحـره واصـبح ذبـيـح
وحسين // وحسين // ما مثله انسان
@ @ @ @ @ @ @ @ @ @
الخادم .. حسين الغالبي
اساسية للاكبر ع ..
جبل الايمان تحضر – مثل الايثار الأكبر
هو ذا علي الصبي – من شبه طه النبي
كأبيه حر أبي – لا يخشى الا الله
@ @ @ @ @ @ @ @ @ @ @
صح بعـده شباب وما قوه عـوده
وشباب اهل العبه لو زامط بزوده
لبني عمرو العلى الكـلفـات معـهـوده
طبعهه ما تفر بالحومة موجوده
منهم قد أخذ طباعه – نبل تقوى وشجاعة
فخصاله واضحة – وفعاله راجحة
ولغيره ناصحة – لا يخشى الا الله
@ @ @ @ @ @ @ @ @ @
حس دين الله محتاجه ونوى يطلع
لأن مـتغـذي ايمانه بـطهـر مرضع
ما حـسب حساب لعـمـره وتـطـوع
ودع أمـه يــدري مـا بـعــد يـرجـع
طلب الاسلام شبابه – فامتثل الأمر وجابه
أعداءه الغاصبة – أرجعها خائبة
فاغتاضت الناصبة – لا يخشى الا الله
@ @ @ @ @ @ @ @ @ @ @
بـرز لـيـهـم ولا هـاب الـعــده الـظــلام
وخطب بيهم خطاب الفارس الضرغام
كـال الـيــوم أطـخ الـهـام وي الـهــام
وعـلي تـشـهـد عـيـن الله الأبد مـتـنام
صدق بالفعل مقاله – خلد في الطف قتاله
شبل الحسين انتفض – بمقاله قد وعض
بالذل عيشا رفض – لا يخشى الا الله
@ @ @ @ @ @ @ @ @ @ @
شهر سيفه ودخل للمعركة بعزمه
راد بنفـسه درس المرجلة يعـلمه
كام الجـيش تـتطـاشر جـثث زلمه
والأكبر خصمه منه ما أخذ ثلمة
أطلق للسيف عنانه – أسرج للحرب حصانه
قد حضر الحاطمة – للزمرة الظالمة
لا لم ترد سالمة – لا يخشى الا الله
@ @ @ @ @ @ @ @ @ @ @
هجم هجمة سبع وأعداءه متحيرة
تشهدله الطـفـوف وموقـفه تذكره
محال بـمعـركة واحد هـزم زمـرة
وقـوانيـن المعارك يـمه متـغـيـرة
ندرت أمثال علي – لا ليس قتال صبي
رغم اللسان الصدي – قد قاتل المعتدي
ولدينه يفتدي – لا يخشى الا الله
@ @ @ @ @ @ @ @ @ @ @
حارو بالأمـر رادو يـقــتـلونه
شافو بالوجه صعـبة يوكفونه
لكو حل ويـناسـبهم يغـدرونـه
تانو لحظة تغفل عنهم عيونه
اقترب الفرس اليهم – وسهل الأمر عليهم
كان المقال متى – والوقت ها قد أتى
غدرا أصابو الفتى – لا يخشى الا الله
@ @ @ @ @ @ @ @ @ @ @
الخادم.. حسين الغالبي
اساسية للاكبر ع ..
وحشة // يوليدي بعدك هالعمر
وحشة // يوم الأجل أبقه أنتظر
وحشة // ما باقي بكليبي صبر // وحشة
@ @ @ @ @ @ @ @ @
تـتـعــب الأم بـرباهـه لـيـلة لـيلة
ولو هـوه مس الولد عـنه تشيله
صعبة ما تتجازه لا بل مستحيلة
الهه لـو كلبه شـلع والله قـلـيـلة
يبني // ما ردتك تجازي التعب
يبني // ردتك تطفي هاللهب
يبني // نار بدليلي تستعر // وحشة
@ @ @ @ @ @ @ @ @ @
ما حسبت حساب أمك آه يالأكبر
من رحلت بعز شبابك ظنك أكدر
أستمر عادي بحياتي وكلت تدبر
صلت جروحي عليك وكلبي كبر
يمه // يلي عفتني وما ترد
يمه // كل ظنك أحمل هالبعد
يمه // وجهك أشوفه بكل كتر // وحشة
@ @ @ @ @ @ @ @ @ @
خــاطــبــت رب الـجـلالـة اخـذه عــمــري
مـا رحـم بـيــه وقــســه يـا ربـي دهـــري
كمت أحس بأنفاسي ضاكت خنكه صدري
وانـتــه يـا ربـي العـلــيــم وبــيــه تــدري
يا رب // هالمطلب تحقق الي
يا رب // موتني لو يرجع علي
يا رب // يحلالي بغيابه القبر // وحشة
@ @ @ @ @ @ @ @ @ @
لا صبر بكليـبي باقـي لاكـو راحة
فـركـتك يوليدي لجـمـتـله جراحه
ليلي يـنعـد بسنة وما طـر صباحه
والعمر أصبح حزين وبس نياحة
جرحي // من لحظة فراك انولد
جرحي // ما يرحم بحالي أبد
جرحي // يلجمني كلما تنذكر // وحشة
@ @ @ @ @ @ @ @ @
ظـلـمـة هالدنـيا بغـيـابـك والله ظـلـمة
بعطرك أحضن يا حبيبي وأبقه أشمه
وبحلاة الروح حـيـل لصدري أضـمه
كـلـبـي يـتخـيـل وجـودك ناده يـمـه
روحي // متعلمة عليك وتحن
روحي // تذبل اذا ليلي يجن
روحي // متعلقة بيك شكثر // وحشة
@ @ @ @ @ @ @ @ @ @
الخادم.. حسين الغالبي
نزلة للقاسم ع .. موشح
خل عمري بين ايدينك @@ يا سيدي
من يسرتك ليمينك @@ يا سيدي
@ @ @ @ @ @ @ @ @ @
سيدي هايه وصية والدي
كلي يوليدي امامك تفتدي
المات حق بموته عمره يبتدي
فدوة لترد الطلب يا سيدي
خليني اقاتل دونك @@ يا سيدي
خليني اقر عيونك @@ يا سيدي
@ @ @ @ @ @ @ @ @ @
لا تمانع جي انه زغير العمر
انه من بيت الشجاعة والصبر
يصح جبير بهالمواقف يعتذر
يعني ابدا ما نقيس عله الكبر
وانه اعرف بمقياسك @@ يا سيدي
تريد اللي يرفع راسك @@ يا سيدي
@ @ @ @ @ @ @ @ @ @
انه صح زغير بعيون الزمن
لكن انته تدري شيربي الحسن
من بني هاشم شباب يصح وطن
لو ينصرك بيه تنزاح المحن
لو وحدك انته يشوفك @@ يا سيدي
حد الذبح ميعوفك @@ يا سيدي
@ @ @ @ @ @ @ @ @ @
خل اجرد سيفي وادخل للحرب
خل اشوفك شنهي افعال المحب
انته امامي اللي ينورلي الدرب
الموت بين ايدينك احلى من العذب
ارخصني اجرد سيفي @@ يا سيدي
خليني اخذ حيفي @@ يا سيدي
@ @ @ @ @ @ @ @ @ @
انه من ايدك لايدك كل وكت
انه البي اللي تريده شما ردت
اسمحلي مولاي انه هالمرة اطلبت
وانته الحسين الكريم انه اعرفت
حققلي هاي امنيتي @@ يا سيدي
ارد ارد حق تربيتي @@ يا سيدي
@ @ @ @ @ @ @ @ @ @
انه رباني ابويه عله الوفه
واورثت منه شجاعة وعاطفة
كتله دون حسين عمري لو طفه
انه واعدته وابد ما اخلفه
رجلي عله رجلك عمي @@ يا سيدي
جسمي ويه جسمك مدمي @@ يا سيدي
@ @ @ @ @ @ @ @ @ @
الخادم.. حسين الغالبي
اساسية للقاسم ع.. شيعتي
على لحن (هذا الغريب منين) باسم الكربلائي
دمعة وحزن وشموع.. حته الصخر مفجوع
عالقاسم المظلوم.. من العرس محروم
................................
ارد اسولف مني اسمعو يا خلك هاي القضية
بعده جاسم عمر وردة و يطلع بوجه المنية
بكل شجاعة وما تردد سيف هز الغاضرية
ينصر الضامي الشهيد حسين ابن حامي الحمية
لا رجعة ابد لا خوف.. ابن الحسن معروف
كباله العدو مهزوم.. من العرس محروم
................................
من برز للحومة جاسم رايد لعمه ينصره
شسع نعله من تكطع دنك عليه جته طبره
خصمه معروف بصفاته مو شجاعة من يغدره
بكل حقد دارو عليه وغايب بهل لحظة بدره
ناده يبو السجاد.. حاطوني هالاوغاد
طير المنية يحوم.. من العرس محروم
................................
ضحه للدين بحياته ومو مهم عنده شبابه
توجه بعزم لمماته ولا ابد حسب حسابه
حنته دم الشهادة والعرس أصبح مصابه
مو سهل فكده عله أمه رمله تشكي من غيابه
شنهي العمر معناه.. لجل العقيدة انطاه
عبرة لشباب اليوم.. من العرس محروم
................................
كلشي عافه وأخذ درعه ثوب عرسه ما يلبسه
ظنته يعود الهه سالم رمله تانت ماكو حسه
ظلت بخيمتهه تنحب كطعت الظنة عله عرسه
تالي بالخيمة تشوفه مغسل بدمه وتلمسه
يوليدي يا جسام.. منك ثلث تنعام
من رمله راح النوم.. من العرس محروم
................................
الخادم.. حسين الغالبي
مقدمة للقاسم ع.. تجليبة
الكلب مفجوع.. نهل دموع
على القاسم.. على القاسم
...........
ملجوم الكلب هالليلة بجروحه
بلا ما نحجي وحده يعتلي نوحه
واحدنه قليلة لو نطه روحه
وصامت كلشي بس صوت البجي مسموع
...........
نواسي ام الشباب نهلهه دمعتنه
بكلبنه نشعل لجسام شمعتنه
نكلهه نذكره وما ننسه عادتنه
باذهان اليحبونه الاسم مطبوع
...........
تظن بعد الحرب سالم يرد ليهه
بعد تربيته رادته يباريهه
لن يكلهه اذكريني ويوصيهه
وراسه تشوفه تاليهه برمح مرفوع
...........
رفع راس الحسن كدام اخوه حسين
فداه بروحه من صار بخطر هالدين
عادتهم بني هاشم قتل ميتين
لجل هذا البطل يا شيعة اشعلو شموع
...........
كلما نذكر مصابه يبجينه
ترك عرسه وبذل نفسه لجل دينه
برز للحومة ينصر عمه ويعينه
ولجل الحق صبح عمره ثمن مدفوع
...........
الخادم.. حسين الغالبي
نزلة للعباس ع ..
للخيم طك غيرة / الماي اخذ تفكيره
ابو فاضل / ابو فاضل
@ @ @ @ @ @ @ @ @ @ @
شاف بالخيمة طفل/ يصيح ها يابا لفضل
يابسة ارياك المخيم الحكلهه
انته بس انته الامل/ الزم الجربة بعجل
المشرعة بهمت الهواشم اكصدلهه
الحال ميسر العدو/ ونعلم بشخصك كفو
لهل سبب نادينه باسمك انته الهه
سيطر علينه العطش/ وكلب الاطفال انتعش
سمعت بطاري ابو فاضل رد املهه
هالامر ظل عندك / واحنه ننطر ردك
ابو فاضل / ابو فاضل
@ @ @ @ @ @ @ @ @ @ @
هزته غيرة علي/ وصاح هالشغلة الي
يمي صارت خلهه تبشر هالعطاشه
لا وحق حامي الحمه/ ما يظل طفل بضمه
وانه كفال الظعينة حاشه حاشه
واعدتكم هالوعد/ وانه ما اخلف ابد
يخلف شلون اللي بالحق عمره عاشه
كولو صاير هالامر/ ما ادور أي عذر
راح اجيكم انه والمي انتماشه
اخذو مني حجاية / راح اجيبه ويايه
ابو فاضل / ابو فاضل
@ @ @ @ @ @ @ @ @ @
يحوس ماي براسه ظل/ جربته بمتنه حمل
وكال يا ويل الفرات شلون يعصه
صارت بذمته الخيم/ وانطلق راعي العلم
اليوكف كباله لبقاءه ماكو فرصة
كلهم السبعين الف/ الشافه وجهه ينخطف
صار يمنه الجيش نصه ويسره نصه
طرهم وماهو يهم/ يدري ما بيهم زلم
الجان عالي صوته هسه صوته ينصه
النهر ماكو انفاسه / جي وصل عباسه
ابو فاضل / ابو فاضل
@ @ @ @ @ @ @ @ @ @ @
عالجرف اول جدم/ حطهه عباس بعزم
نزل الجربة بيمينه وكلهه ترسي
بجفه شال شويه مي/ كال لا يحرم علي
شلون كبل حسين اشرب لا ينفسي
الماي ذبه وما شرب/ رغم يم شفته كرب
وظل ينادي لنفسه ابدا انسي انسي
خل اموت من الضمه/ دون ضنوة فاطمة
ولا اعيش وليل عار عليه يمسي
حيدر مربيني/ وهذا مو من ديني
ابو فاضل / ابو فاضل
@ @ @ @ @ @ @ @ @ @
كام من يم النهر/ بالمخيم جم نفر
ينطر يردلهم الجربة بيمينه
صوب المخيم رجع/ واحد بسيفه طلع
كال ماي اليوم مايوصل سكينة
كطع جفوف الشهم/ وخله راسه ينهشم
حالة صعبة وبيهه بس الله اليعينه
دمه من عينه طفح/ حلم الاطفال انذبح
ليش يا سهم المثلث تدمي عينه
الجربة هم ما سلمت / من السهم واتبدت
ابو فاضل / ابو فاضل
@ @ @ @ @ @ @ @ @ @
الخادم.. حسين الغالبي
اساسية للعباس ع ..
حديث كفي أبا الفضل ع
يابو الغيرة حاشاك // تهون العشرة وياك
نعرفك – نعرفك
جنه بيدك زغار // ما نعـرفها الأخـطـار
نعـرفـك – نعـرفـك
ـــــــــــــــــــــــــــــــــــــــــــــــــــ
جـفـوفـك نفـتخـر يا أغـلى انـسان
يامـن منه بينه
تربينه احنه بيدك يابو الاحسان
جنت تحن علينه
فـضـلـك ما نـكرنه بـمر الأزمان
والله ما نـسـيـنه
تـربات الهـواشم عـدنه ايـمان
من عـتـرة نـبـيـنه
فـضلك لـف الـركاب // يابـن داحي الباب
نذكره – نذكره
شلون نرده نحتار // ما نعرفها الأخطار
نعرفك – نعرفك
ـــــــــــــــــــــــــــــــــــــــــــــــــــ
كـبـرنه وياك وبكـل شي تـبعـناك
يا بدر العـشـيـرة
سـيـفـك باقـي عـدنه منه ذكـراك
بـيـنه من تـديـره
كظـيـنه أيام حلوة واحـنه بحـماك
جف ايدك أميرة
بحيث الحاربك نفسه اللي ينخاك
لن بيدك مصيره
والله جانت أيام // مرت جـنهه أحلام
سريعة – سريعة
هذا حكم الأقدار // ما نعرفها الأخطار
نعرفك – نعرفك
ـــــــــــــــــــــــــــــــــــــــــــــــــــ
طالت يالحـنين العـشـرة لليوم
ما تـنكرهه ندري
اقـبـل هـالعـتـب للكلبه مالوم
بيه همومه تـسري
جفـك يـشتكي لجفـك هالهموم
خلص كله صبري
ترضه يابو فاضل أبقه مهضوم
بيدك هذا أمري
عليك أقسم بالحسين // نزلت دمعة العين
ولينه – ولينه
ما نقبلهه الأعذار // ما نعرفها الأخطار
نعرفك – نعرفك
ـــــــــــــــــــــــــــــــــــــــــــــــــــ
تـرضاهه تـكـطـعـنـه هالـسـيـوف
ما تـقـبـلهه حاشـه
كلب أطـفالك انته تدري ملهوف
يا ساقي العـطاشه
يـنطـر جـيـتـك بالجربة ويـشـوف
بالماي انـتـعـاشـه
ندري اليرتوي متوصفه الحروف
طاير جن فراشه
كـطـعـونه يـوفاي // انـسه جـيـبة الماي
نخبرك – نخبرك
ندري صعبة الأخبار // ما نعرفها الأخطار
نعرفك – نعرفك
ـــــــــــــــــــــــــــــــــــــــــــــــــــ
كطعــونه بغـدر أعداء الاسلام
هل تجري دمانه
ما رحموهه أبد عطشانه الأيتام
الحك يا حمانه
غـدرو ماكـو رحمه ذوله ظـلام
مـبدأهم خـيانه
كالو عالمبادئ بـس بالاعـلام
ظاهـرهم ديانـه
شنهي ذنب الأطفال // بيهم هالعطش طال
جريمة – جريمة
وسـفه عالزمن دار // ما نعـرفها الأخطار
نعـرفك – نعرفك
ـــــــــــــــــــــــــــــــــــــــــــــــــــ
ما نكدر نعـوفـك لحـظـة عـباس
موهينه عـشرتـك
جان وداعـتـك ما ينحني الراس
مرفـوع بخـدمـتـك
طاح عـلينه من هذا الزمن فاس
والعـلة بـفـركـتـك
ما يجرحنه دمنه بكد الاحساس
من نترك حضرتك
حان الليلة الوداع // بالرجعة الأمل ضاع
وداعا – وداعا
نودعك والكلب نار // ما نعرفها الأخطار
نعرفك – نعرفك
ـــــــــــــــــــــــــــــــــــــــــــــــــــ
الخادم.. حسين الغالبي
للعليلة ع..
اول مرة أمد ايدي وتردها انته
يل ما زعل بنيته
اموت بفركتك سكته
يالحسين.. يالحسين
.............
عودتني عله الدلال
ليش من كتلك تعال
ليه ما صديت عني درت وجهك
كتلك المن رايحين
ما تجاوب يالحنين
ما ترد عليه ليش انطيت ظهرك
ها يبويه بفعلك شرايد تكلي
لا تكلي نروح احنه وانتي ظلي
ما متعودة هيج تسوي يالغالي
ولا مرت على بالي
بعيني دمعتي تلالي
يالحسين.. يالحسين
.............
جفي مديته لاديك
واقسمت بالله عليك
اخذ جفي ويه الظعن خليني امشي
اتفاجئت رد جفي ليش
يعني ما رايدني اعيش
كبل لا مني تشيل تشيل نعشي
هاي اول مرة هيجي تسوي بيه
يل بدونك الفظ أنفاس المنية
اول مرة (لا) تحجيها بلسانك
وتعوفه فارغ مجانك
للمتعودة باحضانك
يالحسين.. يالحسين
.............
يل حياتي بشوفتك
الما مزعل بنيتك
عجب عني تروح فجأة تعوفني شلون
زغيرة وبلياك اموت
ولا عفت عبد الله صوت
يرد عني وحشتي وما تبجي العيون
ما مصدكه حسين عافاني ابقه وحدي
بس حياطين ودمع يجري عله خدي
عجب قرآن حنية قسه ويايه
منو يفسرها هالاية
دين بركبتي هايه
يالحسين.. يالحسين
.............
بنية وتفارك ابو
حكي ما اعرف شكو
انه وفراكك شنو طفلة زغيرة
اليفكد يحن ويحس
نهار بس بلا شمس
الراح مني جبيرنا شيخ العشيرة
المثل أبويه كون ما ينفكد لحظة
واللي عاش بحضنه هذا شكبر حظه
هسه اتغيرت صار شكبر جرحه
بدونه يطر عليه صبحه
عافه ورايح لذبحه
يالحسين.. يالحسين
.............
يلي رايح عني هاك
اسمع شيجره بجفاك
يذبح بنيتك فراكك ما تحمله
الاجل يمهه يحوس
وخيل المتانه تدوس
تدوس صبري وخلت بكل ضلع خلة
بويه والمثلك يروح ومثلي بنته
حكهه من تموت بس تموت سكتة
رايح لله تنطي رويحتك فدوة
وادري بروحتك تسوه
بس الصبر مو كوه
يالحسين.. يالحسين
.............
الخادم.. حسين الغالبي
31/7/202 2
١ محرم ١٤٤٤
اساسية للعباس ع
راح الغالي راد يجيب الرخيص
لاجانه الرخيص ولا الغالي
يزينب عظم الله أجرج بعباس
وعظم الله أجري بظهر خالي
جفوفه طاحت وعين.. يعني مات الحسين
راح الجان بيه الراس عالي
...........
من شح ماي المخيم دك صدره ابو الغيرة
كال اسمحلي يا مولاي بهاي الطلبة الزغيرة
لون ما تقبل امحي الكوم واطير الروس الجبيرة
خلني للنهر امشي واروي الظلت بحيرة
كتله بهاي اسمحلك يعباس
بس تترس الجربة وترجع النه
يل كلك شهامة وغيرة واحساس
كونك ما ترد نموت كلنه
منك ما مش اثنين.. يعني مات الحسين
راح الجان بيه الراس عالي
...........
راح الغالي راد يجيب ماي وجربته بظهره
جيش بكبره كله يخاف محد كرب بكتره
اخونه الهيبة ابو فاضل طر بزوده هالزمرة
ومحد معترض دربه خاف يلوحه بالنظرة
وصل يم الشريعة ومد ادينه
بارد مايهه بس رفض جنه
رجع بداه وكال حسين عطشان
ما اشرب كبل ما يروه منه
لون تقبل هالايدين.. يعني مات الحسين
راح الجان بيه الراس عالي
...........
ترسهه جربته وعاود رايد صوب المخيم
مكشوف الدرب محد الكباله وكف يندم
لذلك من وره نخلة تجرأ واحد اتقدم
وضرب عباس بجفوفه فتح باب لمسيل الدم
اول مرة ينلاح ابو فاضل
وطاحن عالثره يمينه وشماله
كمل مشيته حاضن الجربة
صعبة حالته راعي الكفالة
يمشي بلايه جفين.. يعني مات الحسين
راح الجان بيه الراس عالي
...........
حاضن جربته ويمشي وتوصل سالمة اتمنه
ما همه شنو البي صار ولا الطايح سأل عنه
شافوه ركض لخيامه ولمن حسو اتدنه
اجه سهم العده جتال صاب الجربة البحضنه
السهم لو فايت بكلبه ولا فات
بالجربة العزيزة البيهه روحه
سهم عذب اخونه ومات عباس
وصار الماي هوه اكبر جروحه
ماي وما مش منين .. يعني مات الحسين
راح الجان بيه الراس عالي
...........
وكع بين العده عباس وسيفه تجه إله شوية
بايد حيله مو من خوف جي متبدية المية
شلون يرد للمخيم تنطر سكنة ورقية
لا يكدر يباوع ليج ولا يكدر يصد ليه
الماي اتبده واهوه اتبده وياه
وكع من مستحاه شيكول لينه
اهو ساقي العطاشى وواعد بماي
شيجاوبها لو سألت سكينه
ها عمي العذب وين.. يعني مات الحسين
راح الجان بيه الراس عالي
...........
زحف جاي لخيمنه يكول رايدكم تعذرونه
عذرا ما وصلكم ماي خادمكم تشوفونه
كطعت هالحديث سهام واحد صوب عيونه
وصابو راسه بالعامود حدما غيرو لونه
باخونه عظم الله أجرج يخيتي
بقيتي بلا كفيل شلون حيرة
وعظم الله اجري وظهري ممدود
وحشة وبعد وجهي المن اديره
وحدي والله المعين.. يعني مات الحسين
راح الجان بيه الراس عالي
...........
الخادم.. حسين الغالبي
24/7/202 2
٢٤ ذي الحجة ١٤٤٣
موشح للهلال..
يا شهر جرحي على هونك تعال
تدري بجروح المصاب شكد ثكال
..........
يا هلال شمالك استعجلت الي
يلي من تكبل علي تاخذ هلي
منك اسمعها يريت ادللي
وما تهل بسرعة بس هذا محال
..........
يلي باوصافك شبه حدبة كمر
من تهل علينه تكسر جم ظهر
حسين راح وراحو السبعة وعشر
راحت الناس اللي تنعد بجبال
..........
اهلي راحو ما بقالي اي حمه
مكبرتنه انته وفلا ترد زلمه
ظلو بكاعك جثث متخذمه
وظلت بصحرائك اربات الدلال
..........
انته خليت الستر يصبح خيام
وحته هاي الخيم حركوها اللئام
سهامك انته وحرملة نفس السهام
حرملة بقوس وسهامك بالحبال
..........
جم هلال الطلع واحنه بالخدر
اتعودينه بس على كلمة ستر
انته اجيت وجبت نظرات الشمر
وهسه صرنه فرجة لعيون الرجال
..........
شثكل جرحي المن وراك وما يطيب
ظعن أهل بيت النبي أصبح غريب
منين ما اندار اسمع بس نحيب
وشيلزمه لو نزل دمع الأطفال
..........
حسين الغالبي
رقم.. ١٢٢..
22/7/2022
٢٢ ذي الحجة ١٤٤٣
للزهراء عليها السلام..
يا زهراء يا زهراء يا زهراء
يا زهراء يا زهراء يا زهراء
.........................
هذا صوت المحسن بغيرته جاي
ربي لو تاذنلي واطلع بهاي
امي ميضربوهه انه حماي
ابن حيدر انه وتعرف عداي
ولو.. طفل.. اكدر عله الناس
فقط.. رجل.. والأرض تنداس
جا يحلم الباب الرجس يلفيهه
ولا يكدر حجاية وان يحجيهه
ولو حيدر موصه وتقيد بيهه
موش موصه انه بكيفي
.........................
لون اطلع ليهم والزم الباب
جان شافو بيه وجه ابو تراب
ارد اشوفن ياهو يدوس الأعتاب
واهليتي تصير بطش الركاب
وإذا.. حطب.. جمعو لأمي
افز.. غضب.. محترك دمي
صبري بفعلهم طلع من ماعونه
متلمهم الكاع الهم زغيرونه
خيرهم بكوكب زحل يلكونه
حاشه جهنم تدنه الجنة
.........................
ما مقدر ليه بالوكت ذاك
العمر ما ناوشني وكالي هاك
ردت لو بس ساعة يكلي حياك
جان ما يتجرأ ابن صهاك
ولا.. كدر.. يهجم عليهه
الزلم.. تظل.. بس اساميهه
جا عرفتهم شنهي باب الزهرة
لكن وسف ينسمع صوت الإبرة
عيب ايتسمه زلمة راعي الفكرة
لو زلمة يكابلني بسيفه
.........................
لون الله مسهل واطلع بساع
جان ما كفتهم كل سمه وكاع
امي اوكف ليهه وكفة سباع
والتقرب منهه ينحسب ضاع
الزغر.. عذر.. ما نعرفه شلون
ولد.. علي.. جبير وزغيرون
واحدنه يفرح والحرايب عيده
ومثل الرضيع بكربله يحرك ايده
بكماطه ينظر والده بالبيده
يفز غيرة ويكطعله كماطه
.........................
الله ما قاسملي جرة الأنفاس
وبيه حسرة شكدهه لا متنقاس
ردت حيدر بيه يرفع الراس
ثاري ربي محضر كمر عباس
صبر.. علي.. يعوضه الباري
الكمر.. تره.. يطفي كل ناري
يوم الضلع لو حاضر اتمنينه
جا رجع الوادم لذيج الطينة
بس الله ضمه لدوره ويه حسينه
والمهدي يرد ياخذ ثاره
.........................
ما تحقق حلمي ما عشت يوم
امي نزفت دمها وصار الي هدوم
عليهه شيصبرني يكتل اللوم
بعد ما مولود ومتت ملجوم
العمر.. عكب.. امي ما اريده
الذي.. فكد.. الصبر شيفيده
امي اللي يرضه الله بس برضاهه
ياهو الذي يكدر على فركاهه
وياهه موتتنه وعلي شمحلاهه
ونتلاكه يم حوض الكوثر
.........................
الخادم.. حسين الغالبي
فاتحة الطف
خلصنه الدفن خل ننصب الجادر
بس وين وظعنه عله الهزل ساير
انه ادريهه الجوادر تنصب بالكاع
بس ويانه كلهه اختلفت شصاير
ليش عله الهوادج تلطم النسوان
ومامش بينهه وبين العزه ساتر
اول فاتحة مو يم اهلهه تصير
تمشي ويمشي وياهه الكلب شاجر
اول فاتحة الظل بيهه ملج الموت
يبجي وكاعد كبال الجسد حاير
اول فاتحة وميتهه ظل عريان
ولا في الحصل وعله الجسد كاسر
اول فاتحة وبيهه العراضة خيول
بصدر الميت يدبجون بالحافر
اول فاتحة وميتهه المعزب
عزب جسمه ما تانه لطبخ باجر
اول فاتحة وبيهه الترب ماعون
وجسم الميت عله الكاع متناثر
اول فاتحة بيهه الرمح تابوت
والجتال بالتشييع هم حاضر
اول فاتحة يوزعون بيهه سياط
بفنجان السياط اشربنه جم عاشر
اول فاتحة وجمر الدلال خيام
ولكينه الكلب الأسود بالخيم فاير
اول فاتحة وخسرانه كبل الموت
الربح بيهه الشماته وكسرة الخاطر
اول فاتحة وما تكف ثلث ايام
من الطف للحشر بالفاتحة نساهر
الخادم.. حسين الغالبي
نزلة للامام الحسين ع ..
يا خويه – خلي ايدك بديه
يا خويه – نهز الغاضرية
ــــــــــــــــــــــــــــــــــــــــــــــ
حضر سيفك اليوم يا خويه وعضيدي
خل نحمل على الكوم ايدك خلهه بيدي
كله ابشر يمـولاي انه الحومة عـيدي
وابقه بعهـدي وياك لو كطعـو وريدي
تدريني – نعم الأخ لأخيه
ــــــــــــــــــــــــــــــــــــــــــــ
يا خويه يعـباس أرض الطف تـناطر
زلزلهه يبو الجود من جوه العـساكر
خل تشهدلك الناس سيفك خله حاضر
جن حيدر ابو اتراب لو مر عالنواظر
طب ليهم – يا سيف المنية
ــــــــــــــــــــــــــــــــــــــــــــ
احنه لحيدر اشـبال خـل يفـرح ابـونه
ويحـسب هـالحساب لو قـرب عـدونه
مـوشـغـلـة عـدد هاي لا مـيخـوفـونـه
صح احنه بس اثنين والاف اليجونه
بالايمان – نهزمهم سويه
ــــــــــــــــــــــــــــــــــــــــــــ
خل جيش العدو يهاب صولتنه المجيدة
صولة عـزة وايـثار مـبـنـيـة بـعــقـيـدة
احنه اللي نطـر هـام ونقـرب البعــيـدة
والـواجهـنـه ابـد لا مـيـنـفـعــه يـزيـده
ظل مخدوع – بالزمرة الردية
ـــــــــــــــــــــــــــــــــــــــــ
خـل نكلبهه الطـفـوف والظالم نعـلمه
للحـرية الـدروس نـنـشـرهـه بالأمـة
عـيشة ذلة مـنـريـد والحـرية جـلمـة
اليعرفهه اذن راح يرخص الهه دمه
وهالشعـلة – تضوي للبرية
ـــــــــــــــــــــــــــــــــــــــــ
عـباس اطـلب الماي يا بدر العـشـيـرة
عـطشانه هالاطـفال ما تحمل زغـيـرة
ولشخصك يـوفاي ما شـفـنه نـظـيـره
شما نطلب يبو الزود وجهك ما تديره
ونعرفك – ما ترضه الاذية
ـــــــــــــــــــــــــــــــــــــــــ
الخادم.. حسين الغالبي
اساسية للامام الحسين ع ..
على لحن (ليلة وحدة) باسم الكربلائي
والله صعبة مصيبتك والله صعبة
انته كعبة لشيعتك انته كعبة
هو صبرك خله قدرك يرتفع لاعلى سماء
@ @ @ @ @ @ @ @ @ @ @
كلهه متعلقة بمحرم مو مثل باقي الشهور
تبجي بالدم لمصابك تلطم عليك الصدور
تذكرك انته وبنينك منكم انكطعت نحور
يا عظم هاي المصيبة شيبت راس الدهور
يبقه ذكرك للابد يبقه ذكرك
تحيي امرك شيعتك تحيي امرك
وعله بابك في مصابك تندبك صبح ومساء
@ @ @ @ @ @ @ @ @
من شفتها الناس حادت عن الاسلام الاصيل
حايره بدنياهه صارت للهوى كامت تميل
ارخصت كل شي تملكه وعالارض دمك يسيل
لهل سبب لازم نكول شما نقدملك قليل
عل بذلته بكربله عل بذلته
صابر انته سيدي صابر انته
ما يهمك يجري دمك لدينك تريد البقاء
@ @ @ @ @ @ @ @ @ @ @
كلت ابد لا ما ابايع يا يزيد انه الحسين
عندي غايه وعندي مبدأ ارضي اله العالمين
ثبتت اركان دينك قدمت اهل وبنين
وانحفظ مذهبنه بيك وثابت بطول السنين
حيرتنه ثورتك حيرتنه
علمتنه عله النصر علمتنه
بكل زمان وكل مكان باسمك يصير النداء
@ @ @ @ @ @ @ @ @ @
من جنينه اثمار طفك فهمت الناس الحياة
رفضت تعيش بمذلة وحارت وياهه الطغاة
درست الطف وفنونه وعرفت اسباب النجاة
تضحية وهمة وارادة وتثبت لحد الممات
تضحياتك اثمرت تضحياتك
من صفاتك ماخذة من صفاتك
للبرية الغاضرية اسست معنى الفداء
@ @ @ @ @ @ @ @ @ @ @
الخادم.. حسين الغالبي
نزلة للاكبر ع.. عكيلي
هذا الشاب من أهل العصمة
................
يشبه هادينه باوصافه
وكلمن عاشر طه وشافه
من شاف الاكبر ما عافه
يتذكر جده ويشمه
................
شبل حسين وهذا الاكبر
يضحي بعمره وما يتاخر
وبلا خوف يلاكي المنكر
درس الموقف راد يعلمه
................
درس الموقف تصبح ناصر
تعين الحق وسيفك شاهر
تبعد عن دينك كل جائر
لدين الباري العمر تسلمه
................
بعمر الشبان أصبح عمره
لكن راد يوضح فكرة
يحتاج الدين لهل ثورة
والغافل عن أمره يفهمه
................
لازم صوته الكل يسمعه
كل شاب بخطواته يتبعه
ويواسي الزهراء البضعة
من يضحي لدينه بدمه
................
بوجه الباطل سيفه يسله
عمره بلا طعم ويه الذلة
متهمه الكثرة ولا قلة
رايد ينقذ دين الأمة
................
ميفكر بالدنيا التفنه
متحضر لأيام المحنة
هيهات الذلة ومو عدنه
علمنه نردد هالجلمة
................
من حسين تفرع وردة
باذل نفسه ووفه بوعده
ولا موت اللي يفرق عنده
باستشهاده العمر يختمه
................
الخادم.. حسين الغالبي
اساسية للاكبر ع ..
شوغبت والدنيا ليل @@ ما اشوفك
درب المفارك طويل @@ شلون اعوفك
وينك يالاكبر-----وينك يالاكبر----وينك يالاكبر
@ @ @ @ @ @ @ @ @ @
مو طبعك تغيب شعجب / هالليلة غايب
هاي العلامة منهه اشم / كثرت مصايب
جاوبني يوليدي تره / دلالي ذايب
تتعذب امك يالولد / لو ما تجاوب
انتظر منك جواب @@ ارحم امك
انه ما احمل عذاب @@ ارد اضمك
وينك يالاكبر-----وينك يالاكبر----وينك يالاكبر
@ @ @ @ @ @ @ @ @ @
لأحضاني جنت انته ترد / كل مغربية
لاجن اشم ريحة هجر / هاي المسية
يالاكبر فراك الولد / ما مثله اذية
ادعي الله اموت وما ترد / ميت اليه
دعوة الام تستجاب @@ هسه ادعي
خل يغطيني التراب @@ يطفي شمعي
وينك يالاكبر-----وينك يالاكبر----وينك يالاكبر
@ @ @ @ @ @ @ @ @ @
بح صوتي يبني وماكو رد / شنهي اللي صاير
الرية تتنفس جمر / وانه اكابر
الحمد لله لهل وكت / وكليبي صابر
لاجن بعد ما اضمنه / شيسوي باجر
ارحم كليبي تعال @@ يله يبني
جاوب عليه السؤال @@ لو تحبني
وينك يالاكبر-----وينك يالاكبر----وينك يالاكبر
@ @ @ @ @ @ @ @ @ @
وحي المصايب رد علي / ها يأم الاكبر
كافي سؤالج عالابن / رده تعذر
اخذته المهرة للعدو / بذاك المعسكر
الله يصبرج عالخبر / جسمه توذر
كطعو اوصال الولد @@ والله شاهد
لا تنطرينه بعد @@ ما يعاود
وينك يالاكبر-----وينك يالاكبر----وينك يالاكبر
@ @ @ @ @ @ @ @ @ @
مو خبر جانت صاعقة / نزلت على الراس
ما عندي كلمة مناسبة / واوصف هالاحساس
ميتة انه والظل الجسد / بي بس الانفاس
ظليت ادور عن هدم / عن كلشي ينباس
كلبي يدفع بالضلوع @@ يطلع يريد
وهيه ما تكفي الدموع @@ راح الوليد
وينك يالاكبر-----وينك يالاكبر----وينك يالاكبر
@ @ @ @ @ @ @ @ @ @
الخادم.. حسين الغالبي
نزلة للقاسم ع .. موشح
شكد عجيب القاسم بافعاله
والطفوف اتحيرت بالحالة
@ @ @ @ @ @ @ @ @
هذا شبل المجتبى وبي شارة
غطت ارض المعركة انواره
والطفوف بشغلته محتارة
هوه فارس قبله صار خياله
@ @ @ @ @ @ @ @ @
نفذ وصية ابوه بعمه
البيهه كله انه اريد تخدمه
من يضحي وينتشل هالامة
لمن تصير العقيدة وشالة
@ @ @ @ @ @ @ @ @
الهدف دين العباد اصلاحه
قبل سيفه هالعقيدة سلاحه
ومن دخلهه هلهلتله الساحة
تعرف بجسام كد اقواله
@ @ @ @ @ @ @
ما يهمه الموت وباي ساعة
يكشخ بثوب المنية اطباعه
لجل دين الله العمر هل باعه
واشترى رضوان ربه وناله
@ @ @ @ @ @ @ @
يا شباب البل معارك عيده
مالت ارض الغاضرية بيده
والنعم من الحسن ووليده
بهذا عمره وشرد الخيالة
@ @ @ @ @ @ @ @ @
صال بين العسكر وما هابه
الطريق عله الخصم سد بابه
والرعب محد يعرف اسبابه
زالت الغبرة وخطرهم زاله
@ @ @ @ @ @ @ @ @
رغم ما هوه شباب بعمره
اليضربه بسيفه يصبح ذكرى
يدخل انذار اليشوفه يشهره
موت اكيد بضربته الجتالة
@ @ @ @ @ @ @ @ @
هالشباب ويه الصعاب اتوالم
غيره ماكو صمد مثله وقاوم
موقفه مضرب مثل للعالم
ندرت بهذا الوجود امثاله
@ @ @ @ @ @ @ @ @
الخادم .. حسين الغالبي
نزلة للقاسم ع ..
القاسم ع مخاطبا ابيه الحسن ع
ارتاح بتربتك @@ مكظية طلبتك
ووليدك يالحسن يوفيلك الدين
@ @ @ @ @ @ @ @ @ @
كلمن ادى دوره / فوك هالمعمورة
والخلص بشعوره / يطير من الفرحة
وانته من اديته / دورك الحبيته
كلت لو تاليته / ويه الحسين وجرحه
وصيت باخيك @@ كتله وليدي يمك
هذا ابني ينصرك ويقرلك العين
@ @ @ @ @ @ @ @ @ @
وصيتك ادريها / واعي شنهي البيها
بعيني انه مخليها / من الزغر وليومي
لحظة لحظة متاني / واكبرت بايماني
هالامر خلاني / حته افز من نومي
كل ساعة يجيني @@ ما غمضهه عيني
ساعة عله يسرتي وساعة عله اليمين
@ @ @ @ @ @ @ @ @ @
ارتاح وانته بقبرك / لا لتشغل فكرك
واللي كتله ينصرك / هذا هل عد عينك
ابنك اللي تعرفه / منتظرهه بلهفة
جنك انته بوصفه / تحارب وبيمينك
بكبرك انته ترقد @@ وانه بسيفي ابرد
متحضر للحرب سرفت الايدين
@ @ @ @ @ @ @ @ @ @
الحرب جن عيدي / وسيفي هذا بايدي
لو صحت يوليدي / جاوبت مكظية
انته المربيني / يعني لتوصيني
هالطبع تكويني / يبقه ثابت بيه
انطيتك كلمة وحدة @@ وانه اليوفي وعده
ما ريده هالعمر بس يثبت الدين
@ @ @ @ @ @ @ @ @ @
راح انفذ وعدي / راح اطب جن جدي
عمي اهم من عندي / خل اموت ابداله
ما تهم سنيني / المهم حسيني
ويبقه ثابت ديني / ولا عداه تناله
صوتي بقوة ناده @@ اتمنى الشهادة
هنيالي انحسب ناصر للحسين
@ @ @ @ @ @ @ @ @ @ @
الخادم.. حسين الغالبي
اساسية للقاسم ع .. هجري
على لحن (علامات الفجر) باسم الكربلائي
يا من بعمر الشباب اشعـل شمع
الليلة ونة رملة بالطـف تـنسمع
غاركة ابحر الحزن – تنحب لفكد الابن
@ @ @ @ @ @ @ @ @ @
الليـلة نـتـذكـر مـصـيـبة جاسـم بعـمـر الورد
بعز شبابه وكمر يضوي نوره حته من البعد
أمـه مـا جـانـت تـطـلعـه خايـفـه لا يـنحـسـد
لاجـن الأقـدار شـاءت يـتـرك أمـه وما يـرد
وابتدت قصة مصاب ابن الحسن
واقـتـرب وعـد المـنـية والمحـن
ليل المصايب يجن – تنحب لفكد الابن
@ @ @ @ @ @ @ @ @ @
ودع أمه بلايه رجعة والدمع منهه يصب
طلع من ذاك المخـيم سيفه شاهر للحرب
نيته عمه ينصره وماكو رجعـة بهالدرب
الأجل مـنه تـدنه خطوة خطوة يـقـتـرب
كله عمي ارخصني فدوة لنصرتك
خـل أعـلـم هــالــدرس للغــدرتــك
سيدي رايد اذن – تنحب لفكد الابن
@ @ @ @ @ @ @ @ @ @
جاوبه حسين بدموعه ينطرك يبني العرس
كله يابو اليمه فـدوة لجلك نرخـص النفـس
واجب علينه نضحي ونمحي آثار الرجـس
وظلمة الباطل تزول وتعـله للحق الشمس
لأن دين الباري غارك بالفتن
انكلبت الدنيا وتغـيـر هالزمن
كلشي بالشر مقترن – تنحب لفكد الابن
@ @ @ @ @ @ @ @ @ @
مالت الحومة بوجوده وخصمه فر بكل كتر
حارو شلون بشبابه وطـشـر أبطـال الكـفـر
كـلمـن اتـقـدم تـراجـع كـال أخاف وأعـتـذر
ماكو مـنـفـذ يـدخـلـوله هالأمر رايد صـبـر
والوضع ظل عله حاله مستقر
عـجـب أتـباع الضلالة هـالأمـر
قتلته سهلة تظن – تنحب لفكد الابن
@ @ @ @ @ @ @ @ @ @
شسع نعله من تكطع فرصة الباطل اجت
غـدرت بجاسم يويلي وهسه يله اتقدمت
دارت عـليه الأعادي والسيوف تـكاثـرت
طبرو الهامة الشريفة والدماء تـناثـرت
صبح مرمي عله الوطية بلا ذنب
صابر عـله جروحه بالله محـتسب
الأجل صوته يرن – تنحب لفكد الابن
@ @ @ @ @ @ @ @ @ @
نـاده يا عـمـي وداعـا وأعــتــذر لو قــصــرت
لحـظـتي يحـسـيـن حانت كـلشي أملكه قـدمـت
ما حسبت حساب عمري من مماتي ما خـفـت
خـوفي لو تبقه وحيـد ومنهو ينصرني صحت
كله يبن المجـتـبى مـنـك نعـم
انته وفاي العهد وانته الشهم
دمعه نازل عالوجن – تنحب لفكد الابن
@ @ @ @ @ @ @ @ @ @
شاله أبـو اليـمه لخيامه وموقـفـه شـكـد ألمه
عـكـب ما فـارس تـركهم رجع جـثـة مخـذمـة
تـلكـته رملة وتـنادي بعـيـنـي يا ريـت العـمـه
وما أشوف وليدي هيجي غارك بفيض الدمه
ها يجاسم يل عفتني وما ترد
والفرح كلما قـرب شو يبتعـد
ظلت تنوح وتون – تنحب لفكد الابن
@ @ @ @ @ @ @ @ @ @
ظـلـت تحاجي ولـدهه يـبـنـي تـدري بحالـتـي
ما أبـطـلهـه البـواجي حـته تـنـشـف دمعـتـي
آنه بعـدك شنهي عـمـري يا حياتي ومهجتي
وحشة هالدنيا وحزينة وآنه أعيش بحسرتي
ويشتكي من ونتي ليـل الهجـر
داري من دونك صبح يبني قبر
أذكر أيامك وأحن – تنحب لفكد الابن
@ @ @ @ @ @ @ @ @ @
الخادم.. حسين الغالبي
نزلة للعباس ع..
كلهه تباوع عالعباس
محتارة ظلت هالناس
تتلفت بس عله الراس
ما تلحك
......................
بالعيون نظرة ما بيهه رضه
بالعيون اندار عباس ومضه
بالعيون تخزر انظاره الفضه
حرامات كال والراية ترف
حرامات سيفي بالدم ينتلف
حرامات همه بس سبعين الف
ذوله شويه واني هواي
وصوب الماي اتعنه الماي
وسباع البيهم حفاي
وكت الطك
......................
مشه هناك عالنهر خيم نهر
مشه هناك والزلم حفرت حفر
مشه هناك ما بقه منهم اثر
غرف ماي نشفت رياك الزلم
غرف ماي الجيش كله منهزم
غرف ماي يطشهم بخزرة ويلم
شال الماي بجفه وكال
مو من طبعك يا كفال
تشرب و شفاف الاطفال
تتشكك
.......................
لمن كام جافي هالماي العذب
لمن كام كبل اخوه ما ينشرب
لمن كام صار لخيامه الدرب
تلكوه رادو يخلوه يرد
تلكوه وبده برجليهم برد
تلكوه عسكر وفر من فرد
ديدن عدهم مو شجعان
ما عدهم قوة ايمان
ظلو بس ثرثرة لسان
مو عالحك
.....................
وكت خوف عود جم زلمه طلع
وكت خوف تعثر اجدامه ويكع
وكت خوف صك السنون انسمع
يعباس صاح واحد وبهمس
يعباس كوه سمعو منه حس
يعباس الماي خيمة ما يمس
كلهم وينه الكال اليوم
درب الخيمة علي ملزوم
من الحفرة خله يكوم
بابه اندك
...................
شهر سيف وابتده فرض الظهر
شهر سيف سبحته جيش الشمر
شهر سيف خلص وساجد شكر
لون ظال ما يظل واحد عدل
لون ظال البل ظهر هم ينجتل
لون ظال ملك الأموات ويمل
ما يلحكله ملك الموت
واحد للثاني يدز صوت
حضر يا خويه التابوت
بدمي اغرك
..................
الخادم.. حسين الغالبي
نزلة للعباس ع ..
شايل بيده راية // سيفه بجفه آية
معروفة صولته بالحومة عباس
ـــــــــــــــــــــــــــــــــــــــــــــــــــ
يوفي راد وعوده / هالصفة معهوده
بيده راية وجوده / ومنتظرته سكينة
للفرات اتعنة / ولو تقرب منه
من يمنعه فنه / خله يطلع وينه
والجيش بكثرته // خافو من نظرته
من قرب للنهر كتموهه الأنفاس
ـــــــــــــــــــــــــــــــــــــــــــــــــــ
من كصد للحومة / أصبحت مهمومة
جن علي برسومه / بصولته المعروفه
سمعت بأخباره / لو شهر بتاره
بس رعب آثاره / والمنايا تطوفه
تهز الثايه رجله // يا كاع التحمله
فارس من يرتجز يرعبهه الأرجاس
ـــــــــــــــــــــــــــــــــــــــــــــــــــ
العده متهمه / ماكو بيهم زلمه
الشافه راسه يضمه / خايف من عيونه
سيفه من يشهره / ترتعد هالزمرة
والوجوه الصفرة / خايفة ومحزونة
من يمر عليهم // جن موت ويجيهم
ما يخفه هالأمر واضح هالاحساس
ـــــــــــــــــــــــــــــــــــــــــــــــــــ
للنهر جم فارس / دوره واكف حارس
لاجن أصبح يائس / من تقرب ليهم
جن رعد من طبهم / صوته بس يرعبهم
جم ألف يحسبهم / كافي اصبعه عليهم
هذا اصل الشجاعة // معروف بطباعه
من غيره بالحرب صارلهه مقياس
ـــــــــــــــــــــــــــــــــــــــــــــــــــ
آية أصبح سيفه / والمنايا بكيفه
حيل يكرم ضيفه / ما يرد خطاره
بدربه كلمن يصبح / ينتهي للمذبح
هيجي سيفه صرح / وياهو ياخذ ثاره
آية وعالشريعة // هزت هالوسيعة
هالآية نازلة ومعلومة للناس
ـــــــــــــــــــــــــــــــــــــــــــــــــــ
بالحرب أنزلهه / وجفه من رتلهه
العده زلزلهه / وحارت الخيالة
هوه جاهم وحده / والألوف الضده
دورت عالشردة / منهو ظل كباله
ويسوي اليريده // عباس الصميده
والباطل والكفر بجدامه ينداس
ـــــــــــــــــــــــــــــــــــــــــــــــــــ
الخادم.. حسين الغالبي
اساسية للعباس ع..
الحسين ع ينعى العباس ع
طيحتي وي طيحتك صارن سوية
النهر ماخذ حيلي كله مو بديه
شمتت الناس .. خويه عباس
النهر ماخذ حيلي كله مو بديه
................
فراكك صواب .. والكلب شاب
مو بدي عباس يكتل فكد الاخوان
مثلك منين .. يحصل حسين
اليمنع شفافه المية وهوه عطشان
الله سواك .. وكالي هاك
يلوكلك هذا الاخو ما مثله انسان
بيش اجازيك .. بروحي افديك
وهل جزاء احسانك النه الا الإحسان
سكنة رادت ماي وانته جنت وفاي
طحت كلك بلكي تسلم جربة الماي
لا اجه الماي .. ولا جنت جاي
النهر ماخذ حيلي كله مو بديه
...............
موقف الماي .. ايالم هواي
الماي عطشان وشرب عباس كله
صفنت الروح .. كلبي مجروح
وانعكد حبل الصبر ياهو اليحله
مو شخص طاح .. جيش وسلاح
طيحة العباس لا مو طيحة سهلة
يصيح الحسين .. كوم يحسين
يا وكت يامر وانته اسف تكله
هاي اول مرة بيهه اسف تكول
وبعد ما ينشاف منك خويه هالطول
حان الوداع .. والامل ضاع
النهر ماخذ حيلي كله مو بديه
...............
يابو فاضل .. الظهر مايل
رحت يا خويه عله بختك ها يكفال
باد حيلي .. اه يويلي
عليك حيلي منهدم جن هدمة جبال
وين رايح .. ليش طايح
طحت يا عباس مني طيحة عكال
شيخهم عود .. حزامي ممدود
حضن اخوك شلون عفته وشابك رمال
لو مخليني اجيب الماي بيدي
ولا اشوفك هيج طايح يا عضيدي
ريته يرجع .. الوكت وامنع
النهر ماخذ حيلي كله مو بديه
...............
يالجنت ماي .. وعشت وياي
هسه ناشف منك وباقيلي التراب
يطيح التراب .. ويبقه العتاب
ليش يا ماي انشفت سديت الابواب
طحت وياك .. وانه بلياك
كتاب بس الورقة بيضة بكل الكتاب
يا حزامي .. صرت ضامي
وكمت يسره ويمنه اروح ويه الهوه الهاب
مو فقط انته الطحت لا طاحو اثنين
عالشريعة حسين طاح بصف الحسين
انته اني .. الجاك اجاني
النهر ماخذ حيلي كله مو بديه
...............
شلون احمل .. والله تكتل
تكتل عيون الشماتة الشافت حسين
جنه محتار .. عالجره وصار
يا وكت هذا عله ظهره يخلي الايدين
بدو يحجون .. وبشره العيون
كالو وهزو اديهم الاخو وين
شرد اكلهم .. وكلشي منهم
جاوبت خطار عنده سهم بالعين
وكلشي راح يموت تالي بهل مسية
تشيع جنازة الخوة الغاضرية
ويعله هالصوت .. لسالفة موت
النهر ماخذ حيلي كله مو بديه
...............
الخادم.. حسين الغالبي
