2347
Ҳурматли канал кузатувчилари! Бу ерда Ўзбекистон халқ шоири Иқбол МИРЗОнинг шеърлари, шоир ижодидаги янгиликлар, фото ва видео тасвирлар билан танишиш имкони мавжуд.
ЯНГИ ЙИЛ
Қор заррасин тутиб қололмас нигоҳ,
Гоҳ зарра нигоҳдан бағрим тилинди.
Қор ёғсин – ёпилсин изларинг, гуноҳ.
Янги йил, яхши йил бўлиб кел энди.
Қорми – кул остида милтирайди чўғ,
Кетганлар жон узиб кетмаганлар, йўқ!
Сенга етганлар бор, етмаганлар йўқ,
Янги йил, яхши йил бўлиб кел энди.
Деҳқоннинг уйини тўлдир буғдойга,
Сабр бер мискинга, инсоф бер бойга.
Тинчлик, кўнглитўқлик шоҳу гадойга,
Янги йил, яхши йил бўлиб кел энди.
Қирқ йилда бир йигит келар оламга,
Йигит юрагимни кўмма аламга.
Яна қирқ йил хизмат қилай онамга,
Янги йил, яхши йил бўлиб кел энди.
Арчажон, юмшатгил игналарингни,
Кел, ташла, аразу гиналарингни.
Кўкка чиқай босиб зиналарингни,
Янги йил, яхши йил бўлиб кел энди.
Кўк тоқига ҳилолчироқ илинди,
Ёруғ ғуссаларга ошно дил энди.
Киприклар ҳам оппоқ атиргул энди,
Янги йил, яхши йил бўлиб кел энди.
✍️ Иқбол МИРЗО
ҚАНДАЙ ЗЎР УСТОЗИМ БОР ЭДИ
Қандай зўр устозим бор эди, дўстлар,
Кибру ҳаво, ғийбат бегона эди.
Дурга айланарди у тутган сўзлар,
Эркин Воҳид эди – ягона эди.
Саломлар йўлларди турли давралар,
Эртага устозга айтаман, дердим.
Бир кун имкон бўлса, ишдан кетиб, шарт
Ёнига бутунлай қайтаман дердим.
Сиз кўрганмидингиз у зотни, дўстлар,
Сиз ҳам китобларин излармидингиз?
Синчков кўзларига тушганда кўзлар
Ҳазрат Навоийни эслармидингиз?
Ғўрман-да, ўтаман ғўралигимча,
Эл меҳрин устозга сўйламабман ҳам.
Тасаввур қилмабман кадарни ҳечам,
Бир кун кетади деб ўйламабман ҳам.
Улуғ шоирларнинг андуҳи буюк,
Сурури ҳам сиғмас Баҳри Муҳитга.
Eтти ёт оролда кумушсоч бир турк
Саломлар йўллади Эркин Воҳидга.
Азада тўкмаган ёш қалқди, дўстлар,
Дил сўзларни тезроқ айтгим келяпти.
Эртароқ тугаса қани бу сафар...
Устозим ёнига қайтгим келяпти...
✍️ Иқбол МИРЗО
НИМА ҚИЛАЙ
Нима қилай, баргдан гул кўп чаманзорда
Ўхшашингни тополмасам нима қилай?
Гулбаргича дил бўлмаса сен дилдорда,
Юрагингни ўполмасам нима қилай?
Нима қилай, қоракўзим, нима қилай,
Икки олам ора ўзим, нима қилай?
Қошларингдан пора кўксим, нима қилай,
Кўзларингни тутолмасам нима қилай?
Дард берарда сахий, бахтга хасис менга!
Зардаларинг, аччиқларинг лазиз менга.
Сен турган жой пойтахт менга, азиз менга,
Фарғонамга кетолмасам нима қилай?
Не сайёдсан, не жаллодсан, не золимсан,
Тиғида нур ярқираган ҳилолимсан!
Умидимсан, орзуимсан, хаёлимсан...
Ўйлаб ўйга етолмасам нима қилай?
Бир бандиман, сенки ҳурсан, нима қилай,
Кўкда бўлсанг, ерда юрсам нима қилай?
Шу ҳолимга яхши кўрсам нима қилай,
Ўхшашингни тополмасам нима қилай?
✍️ Иқбол МИРЗО
2005
🇺🇿 Президент Шавкат Мирзиёев 22 декабр куни Республика Маънавият ва маърифат кенгашининг кенгайтирилган йиғилишида жадидлар тўғрисида сўз юритди.
🌐 @Iqbol_Mirzo_ijodi
ДИЛИМ ХУФТОН
Дилим хуфтон, кундузимни тундай қилиб,
Учрашувга келмади у, шундай қилиб.
Хўрликларим келиб кетар туриб-туриб,
Энди уни унутайин қандай қилиб?
Исмимни ҳеч айтолмасди, уяларди,
У жилмайса, кун чиққандай туюларди.
Исмин айтсам, оламга нур қуйиларди,
Энди уни унутайин қандай қилиб?
Кўзим юмиб очсам агар, соғинардим,
Чекиб дардлар, ёзиб хатлар соғинардим,
Бармоқларин ўпиб, баттар соғинардим,
Энди уни унутайин қандай қилиб?
Дилим хуфтон, кундузимни тундай қилиб,
Ваъдасида турмади у, шундай қилиб.
Балки, бир кун сўзларини унутарман,
Кўзларини унутайин қандай қилиб?
Худо, дейман, ғамга тўлсин юраклари,
Мени ўйлаб, адо бўлсин юраклари.
Бировларни севмай ўлсин юраклари...
Энди уни унутайин қандай қилиб?
✍️ Иқбол МИРЗО
2004
БИР ПАЙТЛАР...
Тизза бўйи ёғар эди қор,
Уч-тўрт марта томни курардик.
Гуллар чизиб музларди анҳор,
Терлаб-пишиб чана сурардик.
Жиддий эди табиат — ота,
Тўғри, феъли бироз тор эди.
Улов камёб, кўплар пиёда,
Кўпчиликда виждон бор эди.
Кечикмасдан келарди баҳор,
Ўз вақтида гуллаб бодомлар.
Шафақларга берарди оҳор
Истараси иссиқ одамлар.
О, бор эди руҳимда жило,
Қулоғимда ҳамон кулгиси.
Эслаб қўйсам рангланар дунё,
Исмин айтсам, келар гул иси.
Бошин тўлғаб, кўк — мовий шамол,
Ўш пиримга бориб қайтарди.
Ғунча қучган капалак беҳол
Мангуликка қўшиқ айтарди.
Илиққина ёз ёмғирлари
Узиб-узиб қуйилар эди.
Инсоннинг бор эди сирлари,
Ҳаёт сирли туюлар эди.
Кеча... Кўнгил соғ эди кеча.
Кеча ойдин эди ўй-дардим.
Кеча осмон сувини ича
Энди ўлмайман деб ўйлардим.
Совидими Тангри бизлардан,
Ахир саноғида бор эдик!
Нечук мадор кетди тиззадан?
Қаримасдан туриб ҳоридик...
Асли мендан кетди оқибат,
Оқибат мен кетдим ўзимдан.
Мана, бугун соҳиби санъат
Гулпардани олди кўзимдан.
Бугун юрак бошин босган қор
Бугун хаёлларим фаромуш.
Бугун табиатим беқарор,
Бугун қалбим, руҳим аро қиш.
Бугун ҳасса билан қўзғаб чўғ,
Ўз қўйнимга қўл соляпман мен.
Давр-павр билан ишим йўқ,
Ёшлигимни қўмсаяпман мен.
✍️ Иқбол МИРЗО
«Муҳаммад Юсуф»
✍️ Иқбол МИРЗО
🎙 Меҳригиё ДЎСАНОВА
🌐 @Iqbol_Mirzo_ijodi
ЎЗБЕК
Манглайга кафт қўйиб олисга боқсам,
Эдилдан кўринар бўйларинг, ўзбек.
Туш каби жимирлаб минг йил оқса ҳам,
Номинг айтар Энасойларинг, ўзбек.
Нуҳ тўфони, демак, қисмат шамоли,
Кимнингдир камоли, кимнинг заволи.
Саргашта кун кўрдинг оҳу мисоли,
Шундан ҳамон мунгли куйларинг, ўзбек.
Дили қонга тўлиб, кўзлари – ёшга,
Алп Тегин бир ҳикмат чегирди тошга:
“Бизнинг қайғумиз йўқ боладан бошқа…”
Болангга боғлидир ўйларинг, ўзбек.
Бир замон оловни илоҳ билган эл,
Қуёшга қарашни гуноҳ билган эл,
Ҳар бир босқинчини қўноқ билган эл,
Ёвга сўқмоқ бўлган кўйларинг, ўзбек.
Исмингни айириб кечди асрлар,
Хонликни бекликка бўлган не сирлар?
Кентларга сочилган ўрда, қасрлар…
Қумдан қорилганми лойларинг, ўзбек.
Дил қўзғалса, элни тўхтатиб бўлмас,
Сел қўзғалса, гилни тўхтатиб бўлмас.
Занжир узган қулни тўхтатиб бўлмас,
Тиғ бўлди ҳар битта мўйларинг, ўзбек.
Бўйнингдан кетган йўқ ҳали дор изи,
Қўй, қора кунларнинг ўчсин қораси!
Сен борсан – Темурнинг улуғ вориси,
Осмонингга қайтди ойларинг, ўзбек.
Катта қишлоқ экан Париж, Лондон, Рим,
Даламни соғиниб эзилди кўнглим.
Дунё гўзали – сен, қадоққўл синглим,
Гўзалдир ўнгиган кўйлагинг, ўзбек.
Ҳафталаб йўл қараб сарғаймас Кумуш,
Тоғни толқон қилди бобомерос мушт.
Тин олди довонга боқиб Алпомиш,
Тоғларни қўпорди ёйларинг, ўзбек.
Қўлингни кўзимга сурай, отажон,
Ёнингда ул бўлиб юрай, отажон,
Яхши кунларингни кўрай, отажон,
Совимасин қўлда чойларинг, ўзбек.
Онажон, ҳаволи боғлар муборак,
Ҳандалак банд берган чоғлар муборак.
Келин юзидаги доғлар муборак,
Буғдойларга тўлсин уйларинг, ўзбек.
Сунбула – тўкинлик, тўйлар мавсуми,
Бир қўзғалиб олар боғбоннинг хуми.
Асли бир сатрдир шеърим мазмуни:
Тўйларга улансин тўйларинг, ўзбек!
✍️ Иқбол МИРЗО
2004
УДУМ
Рустам Қосимжоновга
Жаҳонгир боболар шавкати-шони
Хаста кўнгилларни шод этиб келган.
Эл, ёвқур ўссин, деб ўзбек ўғлони
Рустам достонларни ёд қилиб келган.
Ақл ҳамда кучдир ғолиблик шарти,
Миллатин кўтарар миллатнинг марди.
Шунда бегонанинг бўлса ғам-дарди –
Адолат ўтиниб, дод қилиб келган.
Жаҳон тожин кийиш – удум ўзбекка,
Руҳи омон, оти сапчийди кўкка.
Гоҳо Рустамжондек бир ўзи якка
Тенгсиз рақибларни мот қилиб келган.
✍️ Иқбол МИРЗО
2004
🇺🇿 18 ноябрь — Ўзбекистон Республикасининг “Давлат байроғи тўғрисида”ги қонуни қабул қилинган кун
📱@Iqbol_Mirzo_ijodi
СИЗ…
Мудом ёруғ бўлсин дарчаларингиз,
Менга кўчиб ўтсин барча дардингиз!
Мен сизни авайлаб чарчамадим ҳеч,
Сиз кўнглим оғритиб чарчамадингиз.
Гоҳо ёмон қараб, гоҳ қарамасдан,
Гоҳо ёлғон кулиб, гоҳ кулиб ростдан,
Гоҳо эркаланмай, эркаламасдан
Сиз кўнглим оғритиб чарчамадингиз.
Кимнинг қўлини сал узоқ тутдингиз,
Қайгадир кетдингиз, шошиб кетдингиз.
Ёнимдан кўрмаган бўлиб ўтдингиз,
Сиз кўнглим оғритиб чарчамадингиз.
Ёш бола эмасдим, кўпни кўргандим,
Ҳамманинг устидан кулиб юргандим.
Лек сизга боладек қаттиқ ўргандим…
Сиз кўнглим оғритиб чарчамадингиз.
Хоҳласанг оласан, агар шоҳ берса,
Қаёққа борасан, Тангри – Ҳақ берса.
Нима ҳам дер эдим, Сизга завқ берса…
Сиз кўнглим оғритиб чарчамадингиз.
✍️ Иқбол МИРЗО
2004
ҚАРАЙСАН
Маҳлиёсан кўзгуга,
Сочларингни тарайсан.
Қарамайсан кўнглимга,
Менга қачон қарайсан?!
Четга қараб пичирлаб,
Четга қараб куласан.
Ўйинчи қиз, шаддод қиз,
Бунча ўйин қиласан.
Қалқиб чиқар кўкка ой,
Қалқиб чиқар юрагим.
Сенга керагим борми,
Йўқми сенга керагим?
Мен қолиб бировлардан
Ҳолу аҳвол сўрайсан.
Қарамайсан кўнглимга
Менга қачон қарайсан?
Кўзингни бер кўзимга,
Бу шунчалар қийинми?
Севги сенга эрмакми,
Севги сенга ўйинми?
Сенга қараб қолганман,
Қалбимга ўт қалайсан.
Қарамайсан кўнглимга
Менга қачон қарайсан?
✍️ Иқбол МИРЗО
2004
МУҲАББАТ
Муҳаббат, бу – ялт этган нигоҳ
Ва ҳаловат абас, дегани.
Муҳаббат, бу – ўзингни севмоқ
Ва ўзгага ҳавас, дегани.
Ҳаёт иси келар исмидан,
Ҳаётингни кесса-да зимдан,
Муҳаббат, бу – куй тўла зиндон,
Атиргулдан қафас, дегани.
У – қуёшдир, ета олмассан,
У – кўз ёшдир, тута олмассан.
Муҳаббат, бу – кета олмасдан
Жон талашган нафас, дегани.
Субҳидамда куйлаган каптар,
Эсда турмас чиройли гаплар,
Муҳаббат, бу – титраган лаблар,
Азр дегани, араз дегани.
Тарихларни бузган қудрати,
Ёруғликдан ўзган суръати.
Муҳаббат, бу – бахтнинг сурати,
Бахтнинг ўзи эмас, дегани.
✍️ Иқбол МИРЗО
СУМБУЛА
Яна яхши кунлар бошланди,
Сувларингиз тинди, сумбула.
Мен сизни кўп яхши кўраман,
Сиз севасиз кимни, сумбула?
Икки кўздан баробар томган
Ёшдек кетиб борар турналар.
Ёниб, эриб, кўзёш бўларман,
Сизга етиб борар турналар.
Ярми яшил, ярмиси сариқ
Капалаклар айланар бошда.
Сумбулажон, сувингиз тиниқ,
Чархпалаклар айланар бошда.
Яна яхши кунлар бошланди,
Мен кимларни яхши кўраман?
Сумбулажон, сиз менга берган
Севгиларни яхши кўраман.
Зумрад-зумрад сувларингизда
Хаёл сурар шоир балиқлар.
Турналарни кўргандир балки,
Балки мени соғиниб йиғлар.
Яна яхши кунлар бошланди,
Айтинг, кимни яхши кўраман?
Сизни яхши кўргани учун
Мен ўзимни яхши кўраман.
✍️ Иқбол МИРЗО
2004
21-oktabr – O‘zbek tili bayrami kuni!
"Ota tilim, o, ona tilim"
Iqbol Mirzo she'ri.
She'rni Iqbol Mirzo va Buxoro davlat pedagogika instituti jamoasi o‘qidi.
🔊 НИМА ҚИЛАЙ
✍️ Иқбол МИРЗО
🎤 Алишер АЧИЛОВ
🌐@Iqbol_Mirzo_ijodi
28 декабрь — Ўзбекистон Қаҳрамони, Ўзбекистон халқ шоири Эркин Воҳидов таваллуд топган кун
🌐@Iqbol_Mirzo_ijodi
📝 Иқбол МИРЗО — «Жадидлар»
🌐 @Iqbol_Mirzo_ijodi
«Чарчамадингиз»
✍️ Иқбол МИРЗО
🎙 Шаҳзодабону ИСМОИЛОВА
🌐 @Iqbol_Mirzo_ijodi
🔊 ЁДИНГДА ҚОЛМОҚЧИ ЭДИМ
✍️ Иқбол МИРЗО
🎤 Баҳодир МАМАЖОНОВ
🌐@Iqbol_Mirzo_ijodi
❤️🔥БУНЧАЛАР…
Қуёшга интиққан каби ғунчалар,
Юрак сокин-сокин қўнғироқ чалар.
Нима деб куйлайди қўнғироқчалар?
Бунчалар севдирдинг мени, бунчалар?
Оҳу қарашлими, жоду қарашли,
Либоси ярашли, нози ярашли,
Бунча яхши бўлдинг, бунчалар яхши!
Бунчалар севдирдинг мени, бунчалар?
Эртаклар ҳақиқат эканими бу?
Юракка кўкрак тор келганими бу?
Ё висол ё ўлим деганими бу?
Бунчалар севдирдинг мени, бунчалар?
Ой – кўкка таваккал чертилган танга,
Ҳолбуки, ҳар икки олам бир менга.
Айт, нима ёмонлик қиловдим сенга?
Бунчалар севдирдинг мени, бунчалар?
✍️ Иқбол МИРЗО
АЙТГИЛ, ДЎСТИМ
Бошинг эгиб таъзим айла, шукрона айт
Сени гулдек эркалаган чаман учун.
Осмонларда юрган бўлсанг, тупроққа қайт,
Айтгил, дўстим, нима қилдик Ватан учун?
Кўзи қора, юраги оқ шу эл учун,
Тупроқ учун, шу юрт учун, чаман учун,
Улуғ инсон бошлаб берган шу йўл учун,
Айтгил, дўстим, нима қилдик Ватан учун?
Элдан кетиб эл бўлганни ким билади,
Дон ахтарган гўштхўрларга ем бўлади.
Дил қонаса, она тупроқ эм бўлади,
Айтгил, дўстим, нима қилдик Ватан учун?
Қачонгача қорнинг ўйлаб ўтадирсан,
Қачонгача кўкдан чалпак кутадирсан?
Ахир Ватан битта, сен ҳам биттадирсан,
Айтгил, дўстим, нима қилдик Ватан учун?
Бунча бино қўйма заррин чопонларга,
Саратонда япроқ бўлгин деҳқонларга.
Суянгани таёқ бўлгин чўпонларга,
Айтгил, дўстим, нима қилдик Ватан учун?
Ҳеч кимдан кам эмассан, кам бўлмагайсан,
Ерда қолсанг, офтоб бўлиб кулмагайсан.
Қачон белни маҳкам тортиб боғлагайсан?
Айтгил, дўстим, нима қилдик Ватан учун?
Шу сойлардан сувлар ургин юзингга сен,
Бир бор назар солгин босган изингга сен.
Шу саволни бериб кўргин ўзингга сен:
Айтгил, дўстим, нима қилдик Ватан учун?
✍️ Иқбол МИРЗО
2004
СЕНГА ХАТЛАР ЁЗДИМ
✍️ Иқбол МИРЗО
🎙 Раъно ТОЖИБОЕВНА
🌐 @Iqbol_Mirzo_ijodi
🇺🇿 ЎЗБЕКИСТОН БАЙРОҒИ
Қалбимиз тўла сурур,
Тўтиё юрт тупроғи.
Ҳилпираб турар мағрур
Ўзбекистон байроғи.
Ранги – ҳаёт мисоли,
Юлдузлари, ҳилоли.
Мустақиллик тимсоли —
Ўзбекистон байроғи.
Гумбазларда, юксакда,
Пештоқларда, фалакда,
Кўнгилларда, юракда
Ўзбекистон байроғи.
Ифтихор дилимизда,
У йўлдош йўлимизда.
Юксалар қўлимизда,
Ўзбекистон байроғи.
✍️ Иқбол МИРЗО
🎵 Мусахон НУРМАТОВ
🎙 Хоразм вилояти Урганч туманидаги 38-сонли мактабнинг мусиқа фани ўқитувчиси Назарбек Жуманиязовнинг мусиқа фани тўгараги ўқувчилари
📱@Iqbol_Mirzo_ijodi
БИЛСАНГ ЭДИ...
Кел, деганда, ноз қилмасдан келсанг эди,
Гул берганда, қайрилмасдан олсанг эди.
Ўзинг қандоқ яхшилигинг биласан-у,
Сени қандай севишимни билсанг эди!
Бу дунёга озиб-ёзиб бир бор келиб,
Наҳот ўтсам ҳижронларда бағрим тилиб?
Сен юрасан дардим билмай, қадринг билиб,
Сени қандай севишимни билсанг эди!
Музни қандай куйдиришни биласан-а,
Суймаганни суйдиришни биласан-а,
Лайлолардан қолган ишқни биласан-а,
Сени қандай севишимни билсанг эди!
Чора истаб бечораман мен чорасиз,
Феълинг сабаб иккимиз ҳам оворамиз.
Ичи қора қиз экансан, э қора қиз!
Сени қандай севишимни билсанг эди!
Етти иқлим, сув-ҳавони биласан-у,
Бешта қитъа, ер-самони биласан-у,
Менга қара, ҳар балони биласан-у,
Сени қандай севишимни билсанг эди!
✍️ Иқбол МИРЗО
2004
СОҲИБЖОННИ СОҒИНИБ
Ажал деди:
- Кўп куйинма, бас,
Битта дўст деб мунча дод солдинг?!
Фарёд урдим:
- Сен битта эмас,
Биттагина дўстимни олдинг!!!
✍️ Иқбол МИРЗО
КИРИБ БОРАЁТГАН МАҲАЛИМ КУЗГА
Кириб бораётган маҳалим кузга,
Кўнгил чак-чак ёғди, кўнгил тинмади.
Гулдастадек хушбўй, хушрўй бир қизга
Юр, бахтли бўламиз, десам кўнмади.
Лолазор мисоли доғ эди бағрим,
Неча йил бу даштда чечак унмади.
Шудрингдек товланиб кетди-да меҳрим,
Юр, бахтли бўламиз, десам кўнмади.
Мен куздан баҳорга ҳатламоқчийдим,
Гулламоқчи эдим, яна бўлмади.
Яна бинафшани ҳидламоқчийдим,
Юр, бахтли бўламиз, десам кўнмади.
Дарадай ҳувиллар эди қучоғим,
Кўзим ва қучоғим бирдек тўлмади.
Менга ишонмади, тушунмади чоғим,
Юр, бахтли бўламиз, десам кўнмади.
Бу, балки, энг сўнгги журъат, қасд эди,
Бахт қуши айланиб ўтди, қўнмади.
Қаерга бўлса ҳам кетсак бас эди,
Юр, бахтли бўламиз, десам кўнмади.
✍️ Иқбол МИРЗО
2004
МАЛОЛ КЕЛМАСИН
Сизга севгим келмасин малол...
Пушкин
Юзимизга ёпманг эшигингизни,
Биз келган чоғларда шамол келмасин.
Эгаллаб олмаймиз бешигингизни,
Сизга муҳаббатим малол келмасин.
Нозик таъбингиз ҳеч бўлмасин хира,
Келсак сўрамаймиз сиздан йўлкира.
Сизга оғирлиги тушмайди сира,
Сизга муҳаббатим малол келмасин.
Шунақа беқарор туриш-турмушим,
Турмушим ўйласам келади ғашим.
Ғашланиб қарайди тағин бу кишим,
Сизга муҳаббатим малол келмасин.
Сиз ухласангиз ҳам ой сочар зиё,
Юлдузлар боқади ойга маҳлиё.
Сўраб севинг, деган қонун борми ё?
Сизга муҳаббатим малол келмасин.
Севги ҳам бир бисот – зардан зиёда,
Бисотим отда-ю, ўзим пиёда.
Яшасак яшабмиз биз ҳам дунёда,
Сизга муҳаббатим малол келмасин.
✍️ Иқбол МИРЗО
2004
🇺🇿 ОТА ТИЛИМ, О, ОНА ТИЛИМ
Қат-қатингда кўринур феълим,
Юрагимсан, қалбим ва дилим.
Бирлаштирдинг, халқ бўлди элим,
Ота тилим, о, Она тилим!
Билга қоғон ҳайқириғи сен,
Қошғарийнинг чақириғи сен,
Тенгриқутнинг адл туғи сен,
Она тилим - ягона тилим!
Сенда сурон солмишди Темур,
Сенда собит қолмишди Темур,
Бир сўз-ла юрт олмишди Темур,
Она тилим - мардона тилим!
Тойғоқ, Араб-Ажамдан то Чин
Қанот ёйдинг мисоли лочин.
Хуросонда очдинг қулочинг,
Она тилим - дурдона тилим!
Алишернинг илкида чечак,
Кимга меҳнат, кимгадир эмгак.
Шайбонийдан армонли эртак,
Она тилим - афсона тилим!
Ўралтовлар қайраган тилим,
Ҳинди элда яйраган тилим,
Сандувочлар сайраган тилим,
Она тилим - мастона тилим!
Соғинганлар сени деб адо,
Видоларда берурсан садо.
Яхши сўзсан, мен сенга гадо,
Она тилим - шоҳона тилим!
✍️ Иқбол МИРЗО
ПАХТА
Курсдошларимга
Дала. Мезон. Қизлар. Тарози.
Пахсали дуволлар. Исмсиз қирлар.
Юлдуздек титраниб учган овозим,
Тиззани қучоқлаб ўқилган шеърлар.
Олов теграсида қайнаган ўлан.
Юракдек қонталаш чинор япроғи.
«Севсам, ўлдирарлар. Севмасам, ўлам...»
Ва ҳисобчи қизнинг нигоҳи...
У кунлар ўтдилар, бироқ ўйласам
Қуёш имиллайди, куним ўтмайди.
Энг машҳур ҳофизнинг қўшиқлари ҳам
Ўша ўланларга етмайди.
Тошкентнинг тошлари эзар танимни,
Тошқатор йўлларда ризқимни тердим.
Бугун сени қанча соғинганимни
Ҳисобчи қиз, ўзинг ҳисоблаб бергин!
Ҳасратларим оғир, қўйсам синдирар
Ҳар қандай тарози паллаларини.
Бунда юрагимни ахир ким билар,
Ким кўрган Ёзёвон далаларини?!
Олисда исмимни айтиб норози
Ерларга эгилар нонбеҳи шохи.
Дала. Мезон. Қизлар. Торози
Ва ҳисобчи қизнинг нигоҳи...
Иқбол МИРЗО