Telegram-канал hoday_sher - هۆدەی هەڵبەست: Неотсортированное

هۆدەی هەڵبەست

31 мая 2023 17:44

🌿💫

#تراژێدیی_سەیدەوان

2⃣
جا با بچینە سەر داستانی #سەیدەوان.
«ڕەبی خودایە ئەتۆ هەوری ڕەحمەتێ بێنی لە لای قیبلەی موبارەک. لە داوێنی فەڕەنگییان. لەسەر قەبری پیر خدری هەڵبژێری.
کێ دیویەتی لەسەر سێ کوڕان ڕا بووک بچنەوە ماڵی بابیان بەکیژی؟»
عەبدولعەزیزی داسنی، سێ کوڕی ئەبێ بە ناوی «سەیدەوان» و «نێچیروان» و «مەلکەوان». سێ کوڕی گەنج کە کاتی ژن هێنانیانە، وە سێ بووکیان بە ڕۆژێک بۆ دێنن. عەشیرەتی داسنی هەموو لە شایی و زەماوەند بەشدارن، مەلکەوان شەوی هەوەڵ پەردووگیر ئەبێ و ئەمری و خەفەتێکی گەورە ئەخاتە سەر دڵی باوکی، بەڵام عەبدولعەزیز کوردە، سەرۆکی خێڵی داسنییانە، چۆن ڕوویی هەیە بە عەشیرەتەکەی بڵێ:
«دەستی دیلان بەردەن و بڵاوەی کەن!»
ڕاستە کە کوڕ مردن پشت شکێن و بڕست بڕە، بەڵام ئەی سەرۆکی چی؟ ئەی پیاوەتی و میوان خۆشەویستی چی لێ بکا؟ عەبدولعەزیز دەنگ ناکا و هەڵپەڕکێ و زەماوەند هەر دەمێنێ. تا شەوی دووهەم دەشتەوانان هەواڵی دەدەنێ کە نێچیروان لە ڕەوەزی تووش و چڕە هەڵدێراوە و مردووە. دیسانەوە باوکی کۆس کەوتوو برینی ئەکولێتەوە، وە خەم بە هەموو گرانییەکەوە ئەکەوێتە سەر دڵی، وە بیر ئەکاتەوە دوو کوڕی جوانەمەرگ بوون، ئەم زەماوەندە شوومە ئەم بەهارە بێ فەڕە، بێ فەڕ و دزێوە، چی بکا؟
ئایا لەگەڵ ئەوەشا کە تەرمی دوو کوڕی لەبەر دەستییەتی، زەماوەند هەر بمێنێ؟ ئەگەر بە داسنییان بڵێ: من زەماوەند ناگێرم و ئێوە هەڵپەڕکێ بوەستێنن، چی پێ ئەڵێن؟!
ئاخۆ ناڵێن: «عەبدولعەزیز پیرە، خەرفاوە و پیاوێکی ئاخرشەڕە؟»
ئەمانە ژێر دەستی خۆی؛ بێ جیاوازی کوڕە داسنی کوڕی ئەون و هەموو ئەوڕۆ لە شادی ئەوا بەشدارن. میوانن، گەڕی هەڵپەڕکێ گەرمە، کیژ و کوڕی داسنی خەریکی ڕۆینە و سوێچکەیی و چۆپی و سێ جارەن. ئاخۆ بچێتە ناویان و بە پڕمەی گریانەوە بڵێ: ئەی کوڕ و کیژی داسنی دیلانەکەتان بەردەن، لەباتی شایی، شین بگێڕن، مەلکەوان و نێچیروان مردن، وە ئێوە بە دوو زاوای نەماو شایی ئەکەن؟! بەڵام نا، عەبدولعەزیز کوردە، ئەوانەش میوانن، ڕەوا نییە زەماوەندەکەیان بشێوێ. ئەی دڵی پەژارەداری چی لێ بکا؟ ئەم هەموو خەم و دەردە بۆ کوێ بەرێ؟

درێژەی هەیە

@hoday_sher