11030
لنشر قصائد مناسبات اهل البيت
الليله الثانيه
.
.
.
عهد والعهد .. نضل للابد
وحــق فــاطـمه
خدام خدام
***
ابوكت من چان لاتحچي تره الحايط اله اذان
ابوكت ممنــوع تتنــفــس اله ابأمـر من افلان
ابوكت من تمشي للمجلس ترد وبابك السجان
الخدمه ماتــركناها مشـــينه بشـان يرفع شان
قسم بالخيم .. قسم بالقيم
قـــسم بالدمـــه
خدام خدام
***
مرينه بضروف اهــواي بس ماعفنه ابوالاكبر
مــن چانت مواكبنــه كل نــص سـاعه تتفجر
من چان اليروح يـــزور ثــمن لزيـارته المنحر
نطينه في سبيل يعيـش عالي وشامخ المنبر
صرح يعتلي .. بعلي وياعلي
وحــق الســمه
خدام خدام
***
الخدمه مركب الاحـرار والخدام بيــها اشراع
بكل موزمه نتحزم ونـــدري التعب لا ماضاع
الدلــيل بهالحچي لمــن ثلثيـــن العراق انباع
لبــو فتــوة السـيد خدام أبـــو اليـــمه سباع
زلــم والنعم ..عطاء وعزم
على الخاتمه
خدام خدام
***
عهد لحسين أبو اليمه نخــدم بالــرخه وبالضيج
نقلد البحر من يهدء ونقـــلده الــنوب من ايهيج
الوبـــا نتــــذكره لمــن ســـوو هــاله اله وترويج
كسرنه شــوكه كرونه وركضنه ركضــة طويريج
الحچي موسهل .. الحچي بالفعل
اهــل مـــوزمه
خدام خدام
***
عن هـالخدمه لا والله مافـــد يــوم نتنـــازل
الحاول راد يبعــدنه تعــب وشكـثر ما حاول
لليسوه العتب نعــتب وللمايــسوه نتـــجاهل
المهم حسين أبو السجاد كون وياه منتفاشل
بتفاني الخدم .. تداوي الألم
الجروح الضمه
خدام خدام
***
الخدمه للحبيب حسين اعظم شرف يالوادم
لذلك نلــگه جبرائيل اول مـــن صــبح خادم
اليگلك خــدمة احســينك عبـوديه تره واهم
لهذا ربـــع أبو اليمه ولا بيهـم شخـــص نادم
ابد مانمل .. ابد مانچل
ولا نـــادمـــه
خدام خدام
***
حيدر تركي الكربلائي
اللهم لك الحمد على ما أخذت ولك الحمد على ما أعطيت
انعى اليكم خادم الحسين ع ( ابن اختي)
الشاب محمد علي
اسئل من الله ان يرزقنا الصبر
الليله الثانيه
نزال
.
.
.
خـدمتك رفــعه اباعبدالله
حلـــيف الدمعه اباعبدالله
***
يمالك روحي و العـيــن يــكل احساسي
الوحيد انتـــه يالحسين تعيــش ابراسي
عشــگتك من چـنت طين عشگ عباسي
مثل حــب المحامل .. التـحب چف ابوفاضل
هيـــچ اتعلقت بيك .. يكلشـــي البــيك كامل
ابكمالك اسعه .. اباعبدالله
حليف الدمعه .. اباعبدالله
***
اجيتك خالي الايدين وترست ايديه
جـزاك شلون ومنــين يبــو الحـــنيه
مــثـــلك ما أكو اثنيـــن بالانســانيه
مثيلك ماكو بالكـون .. يالمساوي ابنك بجون
نطيت الي يسلبـون .. ونـطيـت الي يخدمون
العـدوه وربعه .. اباعبدالله
حليف الدمعه .. اباعبدالله
***
اذا ابديلك اعيـون احســها شويه
يالمخــجل اليــنــطون بـــلا منيه
نطيت عيون ومتون وحياة رقيه
عطائك قـل نظيره .. يبو الخيمه الجبيره
منو يحسين يـرضه .. تروح اخته اسيره
عجيب بطبعه .. اباعبدالله
حليف الـدمعه .. اباعبدالله
***
اليخدمـك يابوالاحرار قـوي بشخصيته
التــشــوفه فايــض إصرار تـكبـر صيته
تحســبه احساب الأنصار على تضحيته
اليــقدم الك قطره .. بحر تنطيه الزهره
وباچــر لمن يـموت .. جنــه يصير گبره
مُقدر وضــعه .. اباعبدالله
حليف الدمعه .. اباعبدالله
***
وحـقك يابو الاحسان يبعد عيوني
احب من گلب ولسان ولا يغيروني
ابـوح اويــن ماچــان الك بـجنوني
صريع بلايــه انفـاس .. وتعزب لسه بالناس
الما جن بيك يحسين .. عقل ماعنده براس
اليحب من نفعه .. اباعبدالله
حليــف الدمــعه .. اباعبدالله
***
انوح اعليك كل يوم ياعظـــم عبره
عشت مكروب مهموم الك وبحسره
يمن بالخــيل مهـشوم خزانة صدره
يبعــد عــيوني والروح .. الك كــل هــاي الجروح
عشگتك عدل يحسين .. وعشگتك وانته مذبوح
اليحب اترفعه .. اباعبدالله
حليـف الدمعه .. اباعبدالله
***
حيدر تركي الكربلائي
الليله الثانيه
.
.
.
امير الخدمه ياناس ولـي نعمتنه عباس
بعدد خـــدام ابـو الـيمه
نشــكرك يابو الاحساس
***
يالمعلمنه ان الـحــب بــــداياته تكــون العين
ومن ثم اليحب ايكون الخله باسط الچــفين
الگلب يتحمل الواحد ومايــرهم يشيل ثنين
مثل گلبك يبو فاضل مابـي غير بس حسين
ارزقنه نذوب كل يوم لجل الصدره مهشوم
لجــل الظــل عالتراب
نخلي الطف بالانفاس
***
صحره گلــوبنه وانتــه الغيـــم بچفــك اتمــطره
صفار ارواحنــه العطشه بخــيرك تنگـلب خضره
انطينه من الي بگـــلبك حنان وشــوگ للحضره
وبـــذرة حــب أبو اليمـــه ازرع بينــه هالـــبذره
نمي بينه عاشور وقــربنه للنــحور
عيــشنه الطبـــگ دوم
وخل ندگ على الراس
***
اذا لاسامح الله بيــوم غــفلنه انــته وعــينه
دروب المــغريات هــواي بدرب حسين دلينه
الـــزمـــنه يبـــو فاضل فـــدوه لاتــخـــلــينه
من اتهدنه وعــيونك انــتهيه وانـــته تدرينه
اشغلنه بدمعة العين وخلينه اويه الحسين
وفوگ اخدودنه كون
الدمعة تصير نبراس
***
قوي الخدمة الغالي يبـوفاضل جوارحنه
نعم وشدد عزائمنه بخـدر الغاليـه صحنه
لتــبدلونه فدوه بخدم ثانيـــن لـو طحنه
خاف الزهره من نوگــع باچر ماتسامحنه
وياكم كون مو يوم وياكم نبـــقه للدوم
تريد نصــير خدام
تريد نصير حراس
***
الناس العــاقبه اتدور واحنــه نـدور الخدمه
الجرح حسين وفقنه نروفه وكــون منلچمه
اليعيش بحب أبو اليمه يعيش بخير وبنعمه
يالمعــلمنه علــمنه البنـــيناه كــون منــهدمه
يمنطي حسين العيون انياله المثـــلك ايكون
الترزقه كـربله يصير
مثــلك هـوه حساس
***
حيدر تركي الكربلائي
قصيده گعده للامام الصادق ع واستقبل محرم
.
.
.
صرخه صرخه / بهاي الليالي الصادقيه
صرخه صرخه / لهل الگلوب الحسينيه
العاشــور باقـي ايام
للخدمه شدو احزام
صرخه صرخه
--------
ويــن ارباب المجالس ويــن اصـحـاب القضيه
دعوه بسم الصادق الكم نحيي ذكرى الغاظريه
وكمــا قــال اقــــرؤها بالـطـــريـــقه الـــعراقيه
(امرر على جدث الحسين وقل لأعظمه الزكيه)
(يا اعظــما لازلــت مــن وطــفاء ســاكبةً رويه)
وخلو المدامع هامله .. وابچو على احسين وهله
الهشمو صدره بكربله .. بالــجـــــياد الاعــــوجيه
صرخه صرخه / الكل شخص للعطشان عاشق
صرخه صرخه / يقــره بحــزن جعــفر الصادق
رســـــاله للـخــدام
للخدمه شدو احزام
صرخه صرخه
----------
جعفر الصادق امام الفقـــه والحب والفضيله
يگول غير حسين احنــه ابد ماعـــدنا وسيله
الينطي للعطشان صم احسين يترسله شليله
والـــراد دنيــه واخـــره .. ليفرط ابهالجوهره
اليـخدم ابــو اليمــه تره .. چفة اعماله ثچيله
صرخه صرخه / من صادق اهل البيت الكم
صرخه صرخه / يتــــقبـل البــــاري عـملـكم
يامن خــدمتو العام
للخدمه شدو احزام
صرخه صرخه
-------
اتخرجت اربــع مدارس من تحــت ايده التقيه
الـــحنبلـيه الــشافعـــيه الحـــنـــفيه المـــالكيه
لچن كل هذا والصادق بــقه امواضـب عالعزيه
وهالحچي للي اتخلفو .. ومن تالي عود اتثقفو
ضد الحسين اتوضفو .. انفــاسهـم تبــقه بعثيه
صرخه صرخه / حي الله اصحاب الضمائر
صرخه صرخه / بعيونهم شـــوكه الــشعائر
امشو ورفعو الهام
للخدمه شدو احزام
صرخه صرخه
--------
عفيه ولــد احســين عفيه ابــد ما چلــو وملو
وبالصبر وكت الشــداد ابصبــر ابو اليمه تحلو
عن قــضيتهم الأم ابكل زمـــن لا مـــا اتخــلو
الصادق العتره قلدو .. اصروح الشعاير شيدو
وتغربو وستـــشهدو .. لـــچن مــاخـــنعو وذلو
صرخه صرخه / نبقه بمســـيرتنه نواصل
صرخه صرخه / وبصاية الله وابو فاضل
والله وســـبع تنـعام
للخدمه شدو احزام
صرخه صرخه
-------
نبچي امام الجعفريه الـجرعه المنصور ســـمه
مثل مانبچي المصايب والده حسين ابو اليمه
وعهد ننطي لبو الكاظم هالـــدرب احنه نلزمه
عالخدمه لامانبتـــعد .. ومن عزمه قوه نستمد
العاشوره باللحظه نعد .. حتى ابو اليمه نخدمه
صرخه صرخه / وقعنه لجل حسين بالدم
صرخه صرخه / واحدنه مخــلوق المحرم
بــينه العــــزم مادام
للخدمه شدو احزام
صرخه صرخه
حيدر تركي الكربلائي
مقدمة الليلة الاولى
.
.
.
جوابــي لليــسئلون .. اختـــصـره بكـــلمتـين
احب ياناس عباس .. واحب ياناس الحسين
گالو مستـفيد؟
گلت الهم اكيد
احب ياناس عباس .. واحب ياناس الحسين
---------
طفل وايام عمــري چــانت اشــويون
وتلـــوليلـي امــي بگـلـــي يالمــيمون
ربيت ابيت بيه طول السنه ايلطمون
وبالاسود اهلي اذكر چانو ايكـشخون
وكل ماشاهدت مــنبر ملامــح وجـهي تتغير
البيــئة بيـتهم عاشور ينسه شلون ابو الاكبر
رضعت احـــزان عاشور .. على اعتاب المخيم
لذلـــك حـــب الحســين .. لهسه يجــري بالدم
نافــذ بالـوريد
گلت الهم اكيد
احب ياناس عباس .. واحب ياناس الحسين
---------
ربيت ابسلف غيره وشيـخنه النوماس
ومــضايــفنه الحســينيات ياهالـــناس
مـــو إي ايــــد گــالـولي هــلـي تنـباس
وبست بس ايدي ابوي وعتبـة العباس
والـــيــتربه بالحـــظره اكيـــداً يرتفـــع قـدره
ولو رادت تزغره الناس ابو فاضل تره ايكبره
ابصحن عبــاس ياناس .. كبرت وعـله صيتي
اليــسئل بيتـــكم ويــن .. اگلــه الصحن بيتي
گالو مــو بعيد
گلت الهم اكيد
احب ياناس عباس .. واحب ياناس الحسين
---------
عندي احسين اسمه اجمل الاسماء
واحــب هذا الاسم مـن الالـف للياء
گالـــولي مرائــي وتـــعلـــم الزهراء
انه ابن الطبگ والبــچي وعاشوراء
احسيناوي الجزع ثوبي ولامــــاغيـــر اســـلوبي
ابچي شـــلون ما ابچي وتدوس الخيل محبوبي
قدوتي بحب الحسين .. شكــو انســان خير
مثـــل كاظم المنظــور .. ومثل حمزه الزغير
حچيك موجديد
گلـت الهـــم اكيد
احب ياناس عباس .. واحب ياناس الحسين
---------
مرات العــصر صـدري احسه ايضيج
واگصد للــرفيج الماكو مثــله ارفـيچ
ما امشي مشي اشــواگي مــن تهـيج
اركــض لبـو اليمه ركضــة طـويـريج
اركض واوگـع وانذل عاديــه ولا ازعـــــل
اريد ابهاي اواســيها الركضت حافيه للتل
فدوه العيـن الحسين .. خـــل اشما يگولون
واذا گالولي مجنون .. نعم هوه اني مجنون
مجنون الشهيد
گلت الـهم اكيد
احب ياناس عباس .. واحب ياناس الحسين
---------
السفر گالولي نعمه وراحه نفـسيه
اشـعندك كاضي عمرك بالحسينيه
مايـدرون عــندي ســــفره لـــيليه
الصحن عباس اخو زينب المسبيه
منـــاي واحـله ايــامي الگـمر لو شفــته گدامي
ضامي الشوفة الشباچ يمه وجاي احس ضامي
هنـــيئا للـــيشمون .. عطـر صحن ابو فاضل
يعيشون ويموتون .. اهـــل غــيره ومــراجل
وياهـــم تـريد
گلت الهم اكيد
احب ياناس عباس .. واحب ياناس الحسين
---------
حيدر تركي الكربلائي
قبــلت عنــي لـــو ماقبــلت الوادم
المهم يحسين بعيونك اضل خادم
***
المهم رايك وغيرك مومهـم رايه
يالمــرايه الــذي مامــثلك مرايه
عــن لا نـبتعد وتـطول الحچايه
المالازم خدمــتك كلشي مالازم
*
ما طب بالعمق لكـن رؤوس أقلام
بس انــته الوحــيد اتقيم الـخدام
التقبله مو شرط معروف بالاعلام
المهم معروف عند الطاهره فاطم
*
اليخدمك مو شرط آن يرتقي المنبر
يـجوز اليكنس بمجلسك حضه اكبر
هـــنيئــاً لليـــعرفك ياابــــو الأكـــبر
واليــوصل الـــهاي الـمـــرحله عـالم
*
اليوصل مرحله بحبك تـقـلده الناس
واكيد ايوقع ابصك خـدمتـه العباس
العدل ويــاك يمشي وما يطخ الراس
وحـــق حمــزه الزغيــر هـذا ما نادم
*
مايندم الگـــلبه بخدمتـــك نـابـض
القابض عالخــدامه عالـجمر قابض
الماحـافظ محبتك دينـــه ماحافظ
واليفـــتهم حـــبك يــُعـتـبر فــاهم
*
والــيفتهم حـــبك يفتـــهـم عــاشور
اليحس بوگفة التل خاطـره مكسور
اليفتر عالمـجـــالـس فـــرة النــاعور
تحسبه احساب الأكبر ابنك وجاسم
*
العايش عمره كله ايســولف بطرواك
حشه تنسى الذي كل عمره ماينساك
يبــو السجـاد تــــدري تــايه ابــلايك
من تعـــوفني تدرينــي اضـــل هايم
*
عليك ابـــداعــة السلـــبو تراچيها
اسلب كلشــي بس الخدمه خليها
وجــمرتك بيـــه فــدوه لا تطفيها
وي جــمرة احــزانك انا مــتراهم
*
حيدر تركي الكربلائي
للبقيع
.
.
.
يابو صالح .. بينه لوعه وبينه نار
يابو صالح .. عـالزيـاره وعالـمزار
لامـنـايــر لاقــبــاب
والبقيع اصبح تراب
يابو صالح
_____________
مـن كـثر ماشوگ بينه نارنه يالمهدي تلهب
الله يشهد بينه وجت چنها نار اخيام زينب
المـراقد سـيدي مـن هـدمـوها
اظلوع احسين چنهم كسروها
البقـيع استـفردو بيـهـا اولـوها
مثل عمتك يمـهدي مـن سبوها
يابو صالح .. والشـمر رد من جديد
يابو صالح .. امتونها ايـزورگ يريد
جايب ابسوطه عذاب
والبقـيـع اصـبح تـراب
يابو صالح
_____________
مظلمه اگبور البقيع وچنها ليلة وحشه بيها
وراح تـذكر حـال عمتك انته من اتمر عليها
يشبــه حـال زيـنــب والنـساوين
مـن ظـلت وحيـده وتهـمل العين
اتصيح ويرتفع من عدها الونين
لاعـبــاس يــبـرال ولا احــســين
يابو صالح .. صوت اذا تسمع حنين
يابو صالح .. هـذا صـوت ام البـنين
تبچي بس عدها عتاب
والبقـيع اصـبح تــراب
يابو صالح
_____________
اي وحق ادمـوع قبــة زيـنب ودمعـات ناسك
شيبت روس المراقد مثل ماشاب انته راسك
اعيونك سيدي من البچي راحن
مـنارات البقــيع ابيــوم طــاحن
مـنارات الحسين اويـاك نــاحن
عجـل طلعتك يالـمهـدي صاحن
يابو صالح .. صحن ابو اليمه يصيح
يابو صالح .. بالبقيـع ابــنـي ظــريح
قبته ابعلـو السحاب
والبقيع اصـبح تراب
يابو صالح
_____________
اتبـَلل اتـراب البـقيع ابكـثر مـادمعـك تـهله
وحزنك اعله اگبور اهلك سيدي وياك صله
مـايـوگـف ابـد الـهـم بكـائك
اوياهم مسـتمر انته ابلقـائك
نحلفـك يالحـبيـب ابكـربلائك
من اتـزور اذكـرنـه ابـدعـائك
يابو صالح .. اذكرنه يمهم يالحبيب
يابو صالح .. الــك الله يـستــجـيب
يالدعائك مستجاب
والبقيع اصبح تراب
يابو صالح
_____________
يامن ايـدك بـاب الله يمـته باب الله نـقبَله
يمته يامهـدينه تظـهر لاتـظن الغـيبه سهله
على اغـيابك يمـهـدي الله شـاهد
اگلوب الشيعه چن صارت مواگد
يــايـوم وتــحـت ظـلـك نــجــاهد
ونبنـي بالبـقيــع احـنـه الــمـراقد
يابو صالح .. ونبني گبه الفاطمه
يابو صالح .. گـبه تـوصل للـسمه
يمته يخلص هالغياب
والبقـيع اصبـح تـراب
يابو صالح
_____________
حيدر تركي الكربلائي
هي خيرا من الف شهر
لاتنسو هذه الليله ولي نعمتنا الامام الحجة عج
من دعواتكم
كما واسئاكم الدعاء لي ولوالدي
والمؤمنين والمؤمنات من شيعة امير المؤمنين علي ع
نزال الليالي العلويه
.
.
.
حيدريون .. نعـم يا اهـل خيـبر
حيدريون .. ونحذو حذو حيدر
***
يخيبـر لو الكون ابابــك اتـجمعه
وكيــانك يزدهــر والوادم اتــبعه
باچر من يجي صاحبنه بالجمعه
بابك احنه وي چرچوبته انشلعه
حيدريون .. وفيــنا العــزم كـبر
حيدريون .. ونحذو حذو حيدر
***
اذا العـــالم ابأســره الكـــم مـــوقع
تحلـــمون بحــلـم وايــاكم انطـــبع
لا مــو انتــو الاكبـــر منكــم انجزع
امن احرورة گصصنه خيــبر انموع
حيدريون .. لــديــن الله نثـــأر
حيدريون .. ونحذو حذو حيدر
***
علي والدنـه حيدر روسـكم شــيب
وعلى طول الزمن تاريخكـم تعــب
مــو مرحب اسئلـــو لا ابــو مرحب
عاصف صرصر ولحــصونكم خرب
حيدريون .. كأنــا ريــح صرصر
حيدريون .. ونحذو حذو حيدر
***
الوالــكم اكــيداً ما اله احچــايه
ابمدينة النبي من عدهم اهوايه
عــدا انسان واحـد ثابـت ابرايه
وبزردومكم ضــل عــلـي سلايه
حيدريون .. ورثنــاها ونــفــخر
حيدريون .. ونحذو حذو حيدر
***
اليگول الشيعه ضـلو مالهم قاده
نگلـــكم ماعرفنه موت الوساده
ولاده تـــضــل الشيـــعـه ولاده
نعــم مادام بيــنه تنبـض الساده
حيدريون .. فلا نخـفى ونــدثر
حيدريون .. ونحذو حذو حيدر
***
اليتســـتر وباني الـبيتــكم حائط
وهوه ابامتحانات الشـرف ساقط
اكيــد المحتويكم محــتواه هابط
يجيكم يوم صافيكم يــرد خـابط
حيدريون .. تمرسنـا علـى الـكـر
حيدويون .. ونحذو حذو حيدر
***
حيددر تركي الكربلائي
شهادة الامير
.
.
.
دنيــه مابــيها علي حامــي الدخــيل
كــون مـن هالــدنيه يالـــوادم نـشيل
***
الدنيه من غير ابو الحملـه ابلا ونـيس
عـلي ابونه انحــسبه مو حسبة رئيس
جيب هيـچ انسان طيــب وانته قيس
انگــف تحــت كتره وكتـنه مــن يميل
***
تحت كتره انگف لان كـــتره نـظـيف
مثل حيدر ويـن اكــو واحـــد شريف
علــي حبــيـناه مـــو لجــل الرغـــيف
چيـــه بوكـته مابقــــه واحــد ذلـــيل
***
بوكــته مو بس خـير حتـــى الكبرياء
اويــه الطحـــين انطــاه علـي للفقراء
إي بحيـــث انـــته تحـــسهم اغنـــياء
بخير حيــدر جيـــب واحدهم ثگــيل
***
ابجـيبه واحدهـم تحـس شــايل الكون
ومـن تسئله شلــون يحچـيــلك شلون
عـــلـي للــماعنـده عــون ايصيــر عون
الصار عـونه علـــي ياهـــو البــي يعيل
***
علـــي عــون ونخــوه للمــاله مـعين
بوكـــته عشـــنه معــززين مكــرمين
علـــي ديـن المايــتبـــعه مـــاله دين
الســـالفه مــــارايـد الــهـا اي دلــــيل
***
الســـالفـه مو ســالفة واحـــد يحــسن
ولادراســــه حـــتـــه ياخـــذلـــه درس
علي شـمس الله شيظم وجــه الشمس
امنيــن تلــگله المثـــله وتــدور بـــديل
***
علي بــس هــوه الچبـــير الـكـل زغار
الصحره صفره شــجابها يك الخـضار
الدنــيــه وبـلايـــه علــي الدنــيه گفار
علــي حيــل هـــواي والـــبـاقي قلـيل
***
علــي يــكفيه مــات هــوه وبالصــلاة
علــي ماتـعنــيله شـــي هـــاي الحـياة
علــي هــــوه البــاقيـــات الصـــالحات
علــي ومثـــله مايجـــي لامستـــحيل
***
حيدر تركي الكربلائي
تعديل👇👇
اعمال ليلة القدر
.
.
اول الاعـــمـــال هــاي اللـــيله
الحيدر اهشم هالصدر وابچيله
الليــله اعمال الــقدر
تبــتدي بلطم الصدر
هالليله
______
ليـــلـة اعمـــال وتهـــجد تــبتـــدي بالــنيه
وانـــي اللـهــم نــاوي ابـــتــدي بلــطـــميه
اغتـسل بدمـوع عيـني عيـني چيه شيعيه
ابثوب الاسود لازم اگصد لقرب احسينيه
قبل متشيل المصاحف ناسي
كــون بالقـامــه اطــَبر راسي
الليله ماعندي عذر
تبـتدي بلطم الصدر
هالليله
______
( انـا انـزلـناهُ ) لازم اقـــره هــاي الـسوره
وسورة القدرِ احـسها مثلي چـن مكسوره
كــوداً الـقران طـاح وهــامــته مـطــبوره
الليله قـران الله ويـنه ويـن غايــب نوره
استغفرت بس روحي احسها ابحيره
صـدري چــن مخنــوگ بالتـكـــبيـــره
ابروحي الهموم اشگثر
تبـتـدي بلــطم الصدر
هالليله
______
الليله اريده صدري كـون امن اللطم يتكسر
وگبل ماون على روحي العلي اون واتحسر
شلــي بالاعــمال وانـي مابچـــيت الحــيدر
ابـلا ادموعي العلي هايه اعمــالي ماتـتقدر
ادموعي لو بخدودي مايتبدن
ابـد ما اقــره دعـاء الجــوشن
وادري دعوات العمر
تبـتدي بلطم الصدر
هالليله
______
هـامـت الـكرار مصـحف هالـبشر يدروها
وفـاتـحـة قـران حـيدر زيـنـب ايسـموها
ولــذلــك ال امــيه هــامـــته طـــبــروها
حـــتى باچـر بنته زينب عالهزل يسبوها
كــل قصدهم تـنربط ذرعانها
ومحـد ايحاميها من اخوانها
وعالجــثث لمـن تمر
تبـتدي بلطم الصدر
هالليله
______
شـلون ما احـزن الليـله وزينــب ابحـسرتها
اتشوف ابوها الموت يمه وتشتعل جمرتها
بالله باچــر ويــن تخــفي بكــربله عــبرتها
مــن تحـَول عالــشريـعه وللـگـمـر نـظرتها
شــلون لــو نــادته يـــا كــفالي
من يحل عگبك يخويه احبالي
هيـــه لــمن تنــكسر
تبـتدي بلطم الصدر
هالليله
______
حيدر تركي الكربلائي
تجليبه لأمير المؤمنين ع
يراعي البيت بيــتك هالبقه خالي
ودمع ام البنيـن اخــلافـك ايلالي
------
علي ومنين اسولف بيك يارجواي
يبو بيتـي العــفو لا اســف مـولاي
كلمــة خادمه ابيتــك عليــه هواي
اعذرنــي اتجرءت ويـــاك يالغالي
-------
العبد من يحچي وي مولا يدنگ الراس
هــيج اويــاك انـــه يـــا اعـــز الـــناس
حتـــى ايشـــوفنــــي ويتـعلم العـباس
ويســــوي ياعلـــــي البــــالك وبــــالي
---------
يزين وعلمتني شلون اســوي الزين
وگتلي الراد يكبر صــيته بالـــدارين
خلي ايعوف كلشي وينتمي لحسين
وصيتـــك ضامتــها بــوســط دلالي
---------
ولــــدك اربعتهـــم والســبع تنعام
خام وعلى ايدي فــصلت هالخام
الزينــب ناذرتهم ياعلـــي خـــدام
وحتى ايضل خدرها بكربله عالي
---------
شو غــافي يبــو حچايات مملوحه
الماشماك نسـمـــه تخـــتنگ روحه
الـشاف ام البنــين يگـول مذبوحه
ساكــــت ياعــلـــي لا اول وتـــالي
--------
يـــذاك المحد ايدانيـــك ياصــنديد
يابو الغوث يابو الحمله ويـن اتريد
يعيد الله وتريد اتعــوفنــه ياعــيد
بعد بـــس مصابي وحزني يــبرالي
---------
الدنيه اخلاف عينك موحشه وضلمه
ينعمه ومـن اديــــنه انباگـــت النعمه
علي وحقه العليك امـن البچـي يعمه
مكانك من يضــل يابالحســـن خـالي
--------
مكانك من يضل خالي يصيب اگلوب
وگلب ام البنين ابسـاعه تدري يذوب
يالتمر بيه كله اغــروب اجـه الغروب
وتدريبــه شيســــوي الفاگــد بحــاله
--------
حيدر تركي الكربلائي
مقدمة
.
.
.
اشــهدُ ان علــياً .. حجة الله علي
نــور الله علي
اسم الله علي
__________
علي مستقبل حــياتي وحــاظر وماضيها
دنــيتي ابـــلـياه اصــلاً دنيـــه ماســـميها
احچايتي ومابيها هوه مستحيل احچيها
السالفه مملوحه حـيل العلي حــاظر بيها
وما ابــالغ من اگــولن .. رحمة الله علي
نــور الله علي
اسم الله علي
___________________
علي بسـمات اليـتامه وكلـشـي اليمــلكونه
علي مـن گــد ماعــزيز العــافيه ايســمونه
علي شايل رحمة الله وكون تحچي متونه
تشبـع الوادم الفــقره بـس تشـوف اعيونه
الهالسبب روحي تحبه .. غيرة الله علي
نــور الله علي
اسم الله علي
___________________
الفقره بس حــيدر ابوهــم واني واحد منهم
وبس علي بالدنــيه كلــها هــوه يســال عنهم
گبـــل ميونون همـــه عـــلي ايـــون الـــونهم
ابچاله احس الفقره والله ملوك صارو چنهم
يهـوه باب الفقره هــوه .. باب الله علي
نــور الله علي
اسم الله علي
___________________
علــي بعد الله ونبـــيه علـــي هـــوه الاعــلم
علي من بطن امه مسلم موش شايب واسلم
اعليه احسـن بـي رحيم وعلي من امي ارحم
مــا اوافــي علــي انـــه شكـــثـــر ما اتــكــلم
انه شــموصلني واحـــچي .. سر الله علي
نــور الله علي
اسم الله علي
___________________
علي مدري ياهــو سمــاه البطين الانزع
كلــشي سامــع عنـه لكن ماسمعته يشبع
علي ماكو اقوه منه علي هــوه الاشــجع
لچن من ينظر يــتيم ابساع عــينه تدمع
ولهــذا انــه اهــوه .. لطف الله علي
نــور الله علي
اسم الله علي
___________________
ابلا علي مسكين اشعر واكسـر انـه الخاطر
بدنيــتي مــالي مـعـين ولا الــي كــل ناصر
خاطري مكسور اجيت وعلي وحده ايجابر
المثلي ينطي وجـها وين اوين يگصد باچر
تايه الماعنده حيدر .. وجهة الله علي
نــور الله علي
اسم الله علي
___________________
حيدر تركي الكربلائي
مولد الامام الحسن ع
.
.
.
جمال أعيونك ايات .. يقــران الكـرامات
اليشوفك لازم يگول
صــلاوات صـلاوات
***
يبــاء البســمله اســمك .. كــلشي حاير برسمك
رسول الله مــن شمــك .. راســاً طابت جروحه
حسن واية حسن شايل .. جمالك مرحله واصل
مثلـك يابــشر كامل .. اليشوفك تنخطف روحه
يكلشي الجاي والفات .. يالمــتوصفه كلمـات
اليشوفك لازم يگول
صــلاوات صــلاوات
***
الشمس واضواء هالديره .. گبالك تطلع ازغيره
وجهــك ويـــن متـديـره .. النهار انوارك اتكمله
نــورك منطـــلق للنــور .. يالماخذ عقول الحور
المهدك گصدته وتزور .. واجت لگماطك اتقبله
الملك لزمت سراوات .. ابتـهالات ومنـاجات
اليشوف لازم يگول
صـلاوات صـلاوات
***
جبـــرائيل من كــبر .. على باب الوصي حيدر
كلشي الجيتك استـنفر .. يســمع رايد اخبارك
نولد گالو سبط احــمد .. وكـون الله الك عيد
الفرح لايحصى لاينعد .. وتجــمهرنه يـم دارك
بدينـه وهالبـدايات .. فرح وبلا نهايات
اليشوفك لازم يگول
صـلاوات صــلاوات
***
الكرم وي مولدك اقبل .. يالـــمـــأصـــل يالمـــعدل
يفاضل انته بل افضل .. حسن وافضالك الحسنى
يمنبــع للعطـايا انـــته .. مـــثلـك والله ماشــــفته
وسـام الجود حصـلته .. وصـــيتـك بــاقي لايفنى
يبو چفوف السخيات .. يمجـــزل للعطيات
اليشوفك لازم يكول
صــلاوات صـلاوات
***
السماء السابعه اتنادي .. الــف مبــــروك هــــادي
انولد انسان مو عادي .. نولد شيخ الزلم صاحت
نولد ونولدت البـسمه .. وگـــــرت عيــــنـها امــه
سمه الله وجهت كلمه .. وبسمــات الفـرح لاحت
الارض واهل السماوات .. تــوزع ابتــسامات
اليشوفك لازم يكول
صــلاوات صــلاوات
***
بنــي هاشــم سوالفهم .. الفــرح لاح بشفايفهم
كـــل أنسـان شايفـــهم .. يهنـــي وهــم يهنونه
فرحتك يالحسن نفحه .. فتحـت للفرج صفحه
يامن مــولدك صــرحه .. بعلو النجمه يشوفونه
تهـانينـه قــليلات .. ومتوصفها كـلمات
اليشوفك لازم يكول
صــلاوات صــلاوات
***
حيدر تركي الكربلائي
انست رزيتكم رزايانا التي
سلفت وهونت الرزايا الآتيه
وفجائع الايام تبقى مدة
وتزول وهي الى القيامة باقيه
الليله الثانيه
.
.
.
الحيــاة مرحــله الوجــوه راحله
الخلـود للذي
يعيش كربله
***
كلــشي اله مـــدة نفاذ ومايضــل شـي قائم
كلشي يفنى ويبقــه وجــه الله والطف دائم
البي يعيش الطف سـوالف هوه هـذا الخادم
المارضـــه بسبـي العقـيله عـنه ترضى فاطم
البكاء قصته الخلود حصته
هنيــئاً لـمن
ونينه اعتله
***
ابــن ادم شگد مايطول تنتهي ساعاته
والف هنياله الي سخــر للطبگ دمعاته
العايش حسين ومصابه ولوعت بنياته
مستحيل الزهره تنسه جمرته ولچماته
بكتاب فاطمه هــُناك قائمه
الي اسمه انكتب
هنــــيــئاً الــــــه
***
اكـــو ناس حسين خدمــو وانســـه طاريــهم
احـــنه ناسيهـــم ولكــــن هـــــوه مانــاسيهم
العندى شهره الماله شـهره بدفتــره مساويهم
حسين مـن ينطيله خادم الباقي هم ينطيهم
القياس مو حچي القياس بالبچي
اليذوب بالعــزه
الحسين يقـبله
***
حسين اول عشگ خالــد والدليل خيامه
اشتعـــلت بعــاشر ولسه واجـــه بخدامه
يروح عام ويجـــي عـــام ومانــمل أيامه
الناس من الالم تهرب واحـنه نــهوه آلامه
جـراح نينوى كمــا هالهـوه
بقاء للابد
ولانهــمله
***
يالخدمت حسين صدگ تنــذكر تضحيتك
علي باچــر عالصراط ايــوقـع بجنســيتك
باچـر بجنة الباري شكـــبره يصبح صيتك
يلي شخصيتك حسيني افخر بشخصيتك
تعيش بالدمع تموت ترتفع
اليعيش هالوضع
رفـــيع مــــنزله
***
حيدر تركي الكربلائي
الليله الثانيه
.
.
.
ما الحــبُ الا للــحبيــب الاولي
وانتــه اول الحبيتــهم يابوعلي
مستحيل ابتعد عنك
الله لايحرمني مـنك
الله لايحرمني مـنك
ياحسين
***
شكــراً الكــل الضـروف العــرفت بيـــنك وبيني
شكراً الكل شخص مؤمن على حبك فتح عيني
الينچــوي يســتاء حيل وانـه اريــدك تچــويني
بنص خيمكم يــبو الأكبر فضل منــك تخــليني
من خيــر چــفك انتــه ماليني ملي
وما سوته امي فضلك السويته الي
وما تملـني اعرفنك
الله لايحرمني منك
الله لايحرمني منك
ياحسين
***
مثلك انسان بحياتي ماشفت من عنده ثاني
لاطـردني ولا هجـرني ولانــساني ولاجفاني
ابــتعد سـهــواً ولكـــن نادمن ارجــعلك اني
رغم اخطائي ولكن گــلبك الدافـي حتواني
من كلشي ماكو سيدي سويتني
مشكور يـلي بخــيمتك خليتني
عيوني يعمن لو جفنك
الله لايحرمنــي مـــنك
الله لايحرمنــي مـــنك
ياحسين
***
ياحنين الماكو منـه ويا احـــن مـــن گــلب امي
انت التقومني اذا زل عن طريق الخدمه جدمي
ولـهذا انســـه كلـــشي بما فــيها حـــتى اســمي
الـه انتـــه المانســـيته اسمـــك مخـــلي بـــدمي
والمختصر عن لا تطول المــسأله
الحب انته اخــر شي وانتــه اوله
سوالفي مايشرحنك
الله لايحـرمني منك
الله لايحـرمني منك
ياحسين
***
سيدي ويانور عيـني بعاشــرك عيشنـي جـمره
ولو شفتني ردت اطفه عليه انـفخ من الحضره
الناس تتغزل بناس وشــعر تقــره بروح خضره
وبـيك مـن اتغــزل انــي مقتـلك يحـسين اقره
منطــيك من الذر يبو اليمه عهد
واعدتك وما اخلف اوياك الوعد
فدوه الك ذني البچنك
الله لايـحرمنـــي منـك
الله لايـحرمنـــي مـنك
ياحسين
***
بالگــلب مالك شــريك وماالــك قــط كفواً احد
السانـي يابو اليمه بسمك كل صباح ومسه ردد
كلشـي خل يـبرد بروحي اله حزنك زحمه يبرد
يالمگــطع عالتـراب الـحـــار بالصــحراء امــدد
عايش لچــن يحسين عايشـلك جرح
دلالي وي راسك احسه اعلـــه الرمح
وبعده يصرخ احبنك
الله لايحرمــني مـنك
الله لايحرمــني مـنك
ياحسين
***
حيدر تركي الكربلائي
الليله الثانيه
.
.
.
تروح ناس وتجي ناس .. وانــته ذاك المـاتغير
انته انته أبو الأكبر
ياحسين
***
ذاك انته الفتـحت عيـوني گدامه
ذاك انته اليـوزع لـســه بخــيامه
بشر مثلك ابد لا ماشــفت مولاي
اليذبحــونه نطاهم قبــل خدامه
ياحنين شــگد حنين .. صاحي جسمك لو موذر
انته انته أبو الأكبر
ياحسين
***
تصعد ناس بس موعالرمـح تصعد
وتنزل ناس بـــس عالغـبره ماتمتد
مـثلك مايمـــر يحســـين بالتاريخ
يــالأوحد شبــيهك بشـــر لم يولد
ياقتيل ابلا مثـــيل .. شما اجالك انته تكبر
انته انته أبو الأكبر
ياحسين
***
يارب التـواضـع وانتــه سيــد الكون
يالساويت الأكـبـر ويـه عــبدك جون
يالصدرك وسيــع بكــل وكـت مولاي
هوه انچان صاحـي انچانه مطحون
بكل زمان وكل مكان .. بصدرك انته تلمنه تگدر
انته انته أبو الأكبر
ياحسين
***
كلمة حگ نگــول وانتـه كلك حگ
جديد بكل وكـت يحسين ماتعتگ
انته حسـين انــته ومايـغيرك شي
كاشــخ لو بحــافر ثوبــــك امــزگ
عالحرير او عالحصير .. باقي شخصك ماتأثر
انته انته أبو الأكبر
ياحسين
***
غيـــور ومازلــت سلطان للغيره
غيور ومن اجلنه اختك ايسيره
يالماعيــرتنه بفضــلك بـفد يوم
مـثلك وين مثلك يـنوجد حيره
ياچبير اعله الهجير .. عدل انته لو مطشر
انته انته أبو الأكبر
ياحسين
***
حيدر تركي الكربلائي
نزلة الليله الاولى
.
.
.
مادگ بــاب غيـــرك وانـته تــدريها
ابابــك حاجــتي يحسيــن ابديــها
***
مــادگ بــاب غيرك سيدي واســئل
أخــاف اتفشــل وماتــقبـل اتفــشل
اليدگ بالبوب هذا الوكت ينذل ذل
مـــاسويتــــها ولانــــاوي اســـويها
***
ماســـويــتها بـزودك يـــراعي الخير
اليعوفك ياحسين اشيلگه عند الغير
يالبخـــيرك شبــع مولاي حتى الطير
اسولف بيـــك ياهــي وياهي اخليها
***
يالــتارس شـليلي وخــيـرك اتطــشر
يالمتروس مـــن جسـمك شـليل البر
الينــطي هواي يزغر وانـته شو تكبر
أيـــدك بالعــــلو مــحــــد يـــساويها
***
يباب الله الوسيع المانســد ابــيوم
يالتشتري ماي الوجه قبــل الـسوم
اليوم وياي هيــچ وباچــر وللـدوم
احمـولي اعله الصحن كلـما اتچيها
***
اهمومي اثكال وتعنيـتلك مايوس
وتخلــبصت بيه وضيعيت الروس
الفارغ مارحتله جيــت للمــتروس
هـــيه الخابطـه أنتــه التـــصفيها
***
تصــفيها وتگلـــي بيــهـا لاتهـــتم
وانته المشـــكلاتي دومـك محزم
تدري باليـجول بخاطــري وتعـلم
گبل مايــمك احچــي تفـتهم بيها
***
گبل مايمك احچي تگلي مگضيه
بشر مامــرني هيـــج ولايمــر بيه
يـــبو رقيه عـــليك ابـداعة ارقيه
جــمرتك بيـــه اريــدن ماتطـفيها
***
كلـــمة انطيــتك ومــا اخلف الكلمة
اي شي دنيـوي ما اطلبه بس خدمه
اريد عـيوني كون مـن البچــي تعمه
عليـك بـــداعة الســـلبو تــراچـــيها
***
حيدر تركي الكربلائي
مقدمة الليلة الاولى
.
.
.
مو شهر نبچي دهر .. اويه الأمام المنتظر
على مگطوع النحر
حسين
***
حسين مـو فتـره وجيـــزه وتــنتـهــي أيـامه
حسين قصه ابلا نهــايه تبتـدي امـن اخيامه
قصه بيهـا السوط شيخ وشـايخ اعله ايتامه
وبيها جسم حسين مرمي امكسرات اعظامه
خيلــهم مارحـــمته .. روحه رده سحگته
وساوته صدر ابظهر
حسين
***
امحرم اتلاثيـن يـوم ويـگضي عند الوادم
ونبقه نبچي السنه كلهه احنــه ويه القائم
نبچـي ذاك الذي بجسمه مابقى شي سالم
عالرمـل والرمـل حار وعــلى وجــهه نايم
جروحه اذا فوك الألف .. اشيبقه بي من النزف
دمـه عالغبره انتـــثر
حسين
***
نبجي عالعطشان دم ونحزن اعله مصابه
ولهـــذا المهدي لســـه دمـعتــــه سچـــابه
والتكتــــلك بالقــضيه شـــغلــة الســـلابه
البِجـسمه الفيــن طبره شيــبقن من ثيابه
امسردات امن النبل .. واللــي سلبـــهن نذل
عاري ضل ابهالاثر
حسين
***
لو خمس تالاف عمر اشـعـيب الله انطانه
نبچي وشما نبچي تبـقى اعيونه عطشانه
عالذي امن العطش شفته امفطره وذبلانه
الـطبگ بينـه كل دقــيقه تــشتـــعل نيرانه
التنشف اعيونه دمع .. باللــطم يكسر ضلع
للذي صاير وذر
حسين
***
امن السـنه للسنــه عاشـــر مـو فــقط هالعــشره
نطبـــخ ونلطـــم ونبـچـــي ولبـــو اليــــمه نـقره
حسين بالطف خيل عشره طحـن طحنت صدره
ومن كثــر سحـگ الحوافر تــرس جسـمه الـغبره
بجسمه صله اشكم سهم .. بجسمه ويلي شگد الم
فاق الحدود وعبر
حسين
***
حيدر تركي الكربلائي
للبقبع
.
.
.
مـــنـــارات.. الــمــزارات .. الســماوات
بچت من دم عليها
_____________
لأن علــويه البقــيع وتعـتبـر قـــدسيه
ابلاتــردد شمــر قـرر يسـبي هالعلويه
والمثل هالگـاع زحـمه تنـوخذ مسبيه
ولـسه ماردت اسيـره عنــد ابن تيميه
جراحات .. الــمــزارات .. الســماوات
بچت من دم عليها
_____________
اللجمه الاولى ام البنين اتعنو ايهدموها
چيف من كربـله ثــار امــربع ايطلبـوها
بغضــاً ابعباس هــمه بالــثـره ســـاووها
فـرصه ثارات البقــيـع ولازم يــوفـــوها
رويـــات .. الــمــزارات .. الســماوات
بچت من دم عليها
_____________
من هــوت هاي المــناير هـوت چن السبعه
اعيونها مــن البــواچي بيــها ماضـل دمعه
ظلمه هسه وابو صالح يـحترچ چن شمعه
على كسر اظلوع گــبر الحسن كاسر ظلعه
معـــانات .. الــمــزارات .. الســماوات
بچت من دم عليها
_____________
مهــبط الاملاك گــصدو بابــها ايحــرگونه
وبالصــبر بعــل البـقيع امــگــيد ايعـرفونه
امن الدمع گبر ابو الزهره مغورگات عيونه
حـقه كــودا شــاف خدها لــمن يسـطرونه
ويلچمات .. الــمــزارات .. الســماوات
بچت من دم عليها
_____________
زمـــره للتــخريـب جايــه وللــذبح عـــنايه
اتغيــضهم فوگ البـقيـع العـلي تخفگ رايه
تــره بالتاربخ محــد ســوه هيــچ اســـوايه
اگبور اهل البيت وسفه اويه الثره مساويه
اعله رايات.. الــمــزارات .. الســماوات
بچت من دم عليها
_____________
فكرو بامر البقيــع شـلون تخفي انفاسه
گــام واحـد گال منهم كون نگـطع راسه
حتى لاواحد يــزوره اولاتگــصده نـاسه
اتهدم اول ما شمرهم عله صدره وداسه
نهــايـات.. الــمــزارات .. الســماوات
بچت من دم عليها
_____________
حيدر تركي الكربلائي
يهدى ثواب هذه القصيده
لروح خادم الحسين العم ابو عباس الجبوري
للبقيع
.
.
.
انته يالجرحك وسيع .. نـدري ثـارك مايضيع
يمته يالمهدي تصيح
يالــثـارات الــبـقيــع
__________________
يمــتــه يالـغايـب تجـيـنه يـالغـيابك عـجـبه
صــار كل جمـعه البقـيع اويـانه يقره الـندبه
لشـوكت نـبقـه الغيابـك يــوم يـوم انحـسبه
شـوگـنـه يالـمهـدي زاد وعـالـنـجـوم انكــتبه
وندعي يارب ياسميع .. نـدري ثـارك مايضيع
يمته يالمهدي تصيح
يالــثـارات الــبـقيــع
__________________
الحاكم الـموعد ظهورك ظـل يعد انـفاسه
وخـل يفيدونه الحمايه وزمـرته وحراسه
كلــمن اتعــنه وتعـده عالبــقيــع وجــاسه
الـهــدم طابـوكه تـهـَدم كون باچــر راسـه
عالجسـَر ردك سريع .. ندري ثارك مايضيع
يمته يالمهدي تصيح
يالــثـارات الــبـقيــع
__________________
الگال اهدمها المراقد على الشيعه وخاوه
هـذا بطـران اليريد اويــه الجــبل يـتلاوه
جـبل احــنه وهمه تــل وابــد ما نتــساوه
اعروشهم هشه يمهدي ومن تجي تتهاوه
تهوه تيجان الجميع .. ندري ثارك مايضيع
يمته يالمهدي تصيح
يالــثـارات الــبـقيــع
__________________
البقيع امـتاني شخـصك والظـهور ايريده
عيده من تظهر يغايب وانته تدري بعيده
انشــالله اتــرد بالسلامه والبــناء اتعــيده
والـيمد ايده اعله مرقـد انــته تكسر ايده
وللحكم سيفك يذيع .. ندري ثارك مايضيع
يمته يالمهدي تصيح
يالــثـارات الــبـقيــع
__________________
إلبقــيـع اعــليهــا سيــطر زمــره وهــابيه
يمــته يامهـدينه تصـبح هـالارض شيعيه
واليــجي زايــر يشوف اقــبابها الذهبــيه
هـيه علويــه وجريمـه تنــسبـي العـــلويه
گلبك اعليها فجيع .. ندري ثارك مايضيع
يمته يالمهدي تصيح
يالثارات البقيع
_______________
حيدر تركي الكربلائي
مقدمة عزاء
.
.
.
دعــوات اليــتامه .. تــرجـع بالـسـلامه
اللهـــم اميــن
ياروح الامامه
_____
ياعـلـي يالـبــيك عـطر الدنـيه كـلـها
الثـانـيه ابفـرگاك يالـغـالي اشــثگلها
ياهـو عگبك يمــسح الدمعه النهـلها
ها يحـلال الــشـدد هــاي اشــيحلها
واحدنه كلامه .. ترجـع بالـسلامه
اللهـــم اميــن
ياروح الامامه
_____
ندعي الــك وگــلوبنه مشــتعله بالنار
ازغــار اديـنـه ياعلي وجروحك اكبار
بالله ياهــو ايجــيرنه ياحامــي الجار
گــوم امــسـح روســنه ويـنك يكــرار
حسينه ابندامه .. ترجـع بالـسلامه
اللهـــم اميــن
ياروح الامامه
_____
اعليك نسأل كلشي بس مانسمع اجواب
مـــو سهــل يا بالحـسن تدريــبه الـغياب
اَزغــر الايـتام راسـه امــن الـهظــم شاب
بالـتراب انـشم لان غــايــب يبــو اتـراب
امعيشنه ابكرامه .. ترجـع بالـسلامه
اللهـــم اميــن
ياروح الامامه
_____
انــدور امـن الـبارحـه شـو مالگـيناك
مـا امـتانــيـن الخبــز احـنـه تنــيـناك
اشعـجب ماگلـتنه حتـى انروح وياك
مانـريــد الــعيـشــه ياحــيدر بلــــياك
احتاجينه ابتسامه .. ترجـع بالـسلامه
اللهـــم اميــن
ياروح الامامه
_____
الــوادم اعلـيكم يطبــون ويـطــلعون
اشصار يابو حسين وشبيهم ينوحون
نــسأل اعــليك وحــسافه مايگــولون
وعلــى عتـبـة بابكـم فــرغنــه العيون
أذتــنـه المــلامه .. ترجـع بالـسلامه
اللهـــم اميــن
ياروح الامامه
_____
صارلك يومين شـو مامـاسـح الـروس
گـوم مـو عالـگـاع فـوگ اگلوبنه دوس
فدوه رحنه الگـلبك البالرحمه متروس
صدگ سـيف ابهامتك ياعلي مغروس
الشهر الله وصيامه .. ترجـع بالـسلامه
اللهـــم اميــن
ياروح الامامه
_____
حيدر تركي الكربلائي
شهادة الامير
.
.
.
سؤال شنــو ســـويت ياقـــمبر
سؤال وخـادم صرت عد حيدر
يالمتــوفـق الــهـاي
ارشدنه عــلى الراي
ياقمبر
***
السؤال الاول انسئلك .. علي شوصلك يم دربه
رتبــة خدمتـه صعــبه .. شلــون ونــلت هالرتبه
عبد انته وعبيد احنه .. انصحنه شلون ونعجبه
يالــطبـــيــت دلالــــه .. بــيــا صوره نطب گلبه
سؤال اشتراك امنين والينه
سؤال بـلكي اويـاك يشرينه
ابلياه نتعب اهواي
ارشدنه على الراي
ياقمبر
***
السؤال الثـــاني ياقمبر .. العلي لمن صرت خادم
ابشنو غذاك حامي الجار .. ورأسـاً اصبحت عالم
خشن هــم لبســك مثــله .. عــلي لو لبسك ناعم
يقمـــبر بالـــذي اتـعــبده .. علي هم يشبه الوادم
سؤال من السواها وانته ادره
سؤال خليفه مصاحب الفقره
ياهو المثله شراي
ارشدنه على الراي
ياقمبر
***
السؤال الـثــالث الاصعـب .. نسـئلك لچــن نترجاك
من انـطه الحسن وحسين .. مثلهم انته اهم انطاك
شكثر شـايل عطــف گلـبه .. يقــمبر حيــدره مولاك
بحيث انته الفقـط خادم .. اويه اولاده علي ساواك
سؤال الخـادم منظره امبهذل
سؤال ونحسـك كــلش امدلل
الشافك صاح مولاي
ارشــدنه عـلى الراي
ياقمبر
***
السؤال الرابع انسئلك .. شويه اسئله شخصيه
العبوديه العشت بيــها .. هـــم مثـــل العبوديه
اذا فكــر علي يعتــقك .. بيــك اتفـارگه اشويه
بيك اتفـارگه لحــظات .. مــقابل عمــر حــريه
سؤال علــي هــم ينشــبع منه
سؤال ياهو احله علي الجنه ؟
بشمس وندور افياي
ارشــدنه علـى الراي
ياقمبر
***
السؤال الخامس ونختم .. اشلـون اخلدت بالدارين
اكيد امن اخدمت حيدر .. يقمبر هم خدمت حسين
علي هم علـــمك تبــچي .. على زينب لطمت العين
عالتـــنســبي بالكــوفــــه .. سويــته عـــزائـك وين
سؤال شگد مـــن هــاي تتعذب
سؤال على حسين وعلى زينب
حسين الماشرب ماي
ارشــدنه علــى الراي
ياقمبر
***
حيدر تركي الكربلائي
لشهادة امير المؤمنين ع
.
.
.
كافـي مـوكـسرتي الظلوع
بـويه زينب بـسـچ ادمـوع
دمعتچ چنها نـهـر .. خلـت ابخـدچ أثــر
بـويـه زينــب
_____________
اشـبيـچ يابـويـه يـزينـب ليـش عيـنـچ حـمره
ليش كل هذي البواچي ابراسي بس هالطبره
شلـون لـو شفتـي اخـوچ حسين فوگ الغبره
وبذنـچ اتسـمعين مـن الـخيل تطـحن صـدره
گلبچ ابهالساعه شـيگول
لـَمن اتشـوفين الخــيول
اتساوي صدره اويه الظهر .. خلـت ابخـدچ أثـر
بويه زينب
_____________
ليـش كل هـذي البواچي وانـه يمـچ گـاعد
آلمـتـني ادمـوع عيـنچ بـويـه الله الـشـاهد
ارد انصحچ بويه زينب ابچي بس الـواحد
الشمر لوشفتيه يبويه فـوگ صـدره صاعد
حتــى لـو تعــمين العــيون
للحـسين اعـيـونـچ اتهــون
ادري دمعات النظر .. خلـت ابـخــدچ أثـر
بويه زينب
_____________
جرحي بس واحـد يزينب بـويه لا مو ميه
وحرگت اخدودچ دموعچ بالبواچي اعليه
اشلون اخوچ اتشـوفه عينچ جثته مرميه
من يصـيح الشـمر بسمـچ يالله يالمـسبـيه
وانتـي مـوبـيـدچ تظـلين
اويه الشمر لازم تـروحين
اتمَوت اجروح الدهر .. خـلـت ابـخـدچ أثـر
بويه زينب
_____________
انــه للــعبــاس گتــلــه بـويــه لـَـتخلـــيها
اختك امن اتريد ماي امن العيون ارويها
بـويـه زينب والـشريعـه بالـچ اتگـصديها
رايحـه العباس اگـعـده فــدوه لتـگـوليها
يستحي مگطوع الچـفوف
عالشريعه طـولچ ايــشوف
وظهره الحسين انكسر .. خلــت ابخـدچ أثـر
بويه زينب
_____________
جرحي بس من صوب واحد ينزف اتشوفينه
ولجـل جـرحي دمــع عـينچ من دمــه اتهلـينه
حســـين باچــر عالتــراب امطــبر اتعــوفـينه
اچفــوفــچ امـربطه بويـه وبـيمـن اتــداوينه
عـلى جسـمه من تمـرين
مــا الومــچ لوتمــوتــين
الظعن من ابجسمه مر .. خــلـت ابخـدچ أثـر
بويه زينب
_____________
اخوانچ ومن تغفه عيني جسمي ميتركونه
ابـچـي عالـيـبقه ثــلاث ايــام ميــدفــنـونه
عــادت الميـت يبــويــه بـچــفــن ايلـــفونه
وبـس الحسين ابحــصيـره لـَمـن ايچفنونه
يختلف عالمـوته الحسين
لاغـسل وبـلايه تچـــفين
ابدفنته جاچ الخبر .. خــلت ابخــدچ أثـر
بويه زينب
______________
تمت والحمد لله في ١٤ / ٦ / ٢٠١٧
حيدر تركي الكربلائي
شهادة امير المؤمنين
.
.
.
الغامرني بحنانه .. دلوني بمكانه
علي وين .. علي وين
_____
الولا مــره تأخـر .. إله يوميـن ومامر
اتـأخــر والـســوالــف تاكــل بــروحي
ابو روح الحنيــنه .. اذكره من يجينه
يشــمني ومن يشمني تخمد اجروحي
امامي / نســاني اليتـم ذله
امامي / مدلل عايـش بضله
امامي / تردلي روحي لوگله
علي
محتاج الامانه .. دلوني بمكانه
علي وين .. علي وين
_____
جبيني من يلــوحـه .. احس بيده ملوحه
بزمـــن كلشــي اشــوفــه ماصــخ اگــبالي
لمن شح كلشي طيب .. بقالي هالحبـَيب
بــس بحظــنه احــسن راســي شــو عالي
احسه / رحمه شگد علي شايل
احسه / كلــش الخاطــري باذل
احسه / ايحبني بگد ابو فاضل
علي
البس هوه بزمانه .. دلوني بمكانه
علي وين علي وين
______
گبل ما افتح ايدي ..بشليلي ايخلي عيدي
اليتـــم مــــر وعلـــي حـــلاهـــن ايــــامه
اليتيم المايذكروه .. بزمن حيدر يحسدوه
اشـگد چـــان ابــو الحمـلـه مــدلل ايـتامه
حياتي / ابلياه تخلص اتمنه
حياتي / چانت وي علي جنه
حياتي / المــن عــگبه اتعــنه
علي
الچان الحب كيانه .. دلوني بمكانه
علي وين .. علي وين
--------------
علـــي هــــوه العشــــيره .. الشكو وادم فقيـره
شــــيــــخ الفــقـــره اسمعـــهـــــم يســـــمـــونه
الدليل الشوفته طگ .. الرمش من البچي انشگ
المــــثلي بــــس عـــلي الــي يمـــسح اعــــيونه
احبه / المخلوق امن الحنيه
احبه / مــعروفه امـــغزر بيه
احبه / اشهگ لو مـــر طاريه
علي
البس الله بلسانه .. دلوني بمكانه
علي وين علي وين
_______
صرت من گد مصابي..اشم كل لحظه بابي
عطــــر چــــفــه لهـــــسه ابابـــنه طــــابع
احس چــفي توفـــه .. ينــاس ابلايه چفه
ومــثل چـــفي احسه استشـــهد الجـــامع
اتاني / والحســـبات اتدولـــبني
اتاني / وادري اغيـــابه ايعذبني
اتاني / لأعظم شخصيه اتحبني
علي
والحامي حمانه .. دلوني بمكانه
علي وين علي وين
---------
يل الوجوه الحزينه.. علي گلولي وينه
يتيـــم وحــــقي انـــشد عــــلّي رباني
ابو چفوف السخيه .. اشو مــامر عليه
مابــــيه يــــناس احمــــل يتــــم ثاني
سؤالي/ يا هل وادم حاچوني
سؤالي / عالبيه رحــمه دلوني
سؤالي / ابلياه ميـت تدروني
علي
مشتاگ الاذانه .. دلوني بمكانه
علي وين علي وين
---------
حيدر تركي الكربلائي
شهادة امير المؤمنين
.
.
.
ابچي براحتچ يم راس ابو حسين
باچـــر بالســـبي ممــنوع تبـــچين
السوط بدمـع العيون
اهناك ايطـَيح امتون
يزينب
--------
خيمــة جاهچ انــهدمـت .. الهدمها سيف ابن ملجم
ونزل دمعچ على خدودچ .. مــن گد الخجل محرم
صـحـــتي ياعلــــي بــويه .. عگـــبك بيـــتنه مظلم
يـــأســـلام الله واليـــنعـاك .. بـــس البصدگ مسلم
ودعي حيدره اشگد ماتگدرين
باچر مــن على الناگه تودعين
اوداع الاهل ميــهون
اهناك ايـطيح امتون
يزينب
---------
احچي براحتـــچ وياه .. وهلي اشما گدرتي ادموع
الرايحلچ چبير الشـــان .. مـــو هين تره الموضوع
الله يلوم اليلومچ .. البچي الراعي البخت مشروع
بـس اهــناك يازينـــب .. بالطـــف البـــچي ممنوع
فوگ الگاع اخوتچ من تشوفين
مامسموحلـــچ بالطـــف تـونين
وتره حداي الضــعون
اهناك ايطــيح امتون
يزينب
--------
البيت ابلا نفس حيــدر .. بيـــت ابـلايه حنيه
حگچ فـــاگده امـــعدل .. ابچي ونوحي ليليه
الرايح مو شخـص عادي .. ابو الساده يعلويه
ولــــو باچــــر يعـــلويه .. يصيحولچ يمسبيه
التـــتنخين بـيه راسه عالرماح
منو اليفزعلچ وحاديــــچ ذباح
الحچي اشما كان ويكون
اهناك ايطيــــح امتـــون
يزينب
----------
اليفـگد والــده الوادم .. لمــن تهــمل عيــونه
الذي بگلوبهم رحـــمه .. يصــبرونه ويـسلونه
بس بالسبي يازينــب .. اليهل دمعه يظربونه
مو بس الخيم تـُسلب .. الدمع ايضا يسلبونه
يتـبده الحچــــي وتلـــمه الـــسياط
وازغر جرح بالطـــف ما اله اخياط
اليحرگ واليسلبون
اهناك اتطيح امتون
----------
علي وياه اخذ حــيلـچ .. من ايــدچ علي مـن راح
البيت ايطيح من كيفه .. عمود البيت بس لو طاح
تـــعـزي بــــعــــزاء الله .. حسين بدمعته من صاح
باچر خويه من تبــچين .. بالســـوط الـمتـن ينلاح
احسبي احسابچ الهاي المصيبه
تـــره باچــــر تصــيرين الغريبه
ولليســــبيچ قانــون
اهناك ايطيح امتون
يزينب
-------
حيدر تركي الكربلائي
موشح للامير
.
.
.
الليله وحشه الليله مدري شلونها
ابلا عــلي الوادم انخـطفت لونها
-----
موحشه وتخنگ الروح اشهالامر
الليله چن الليله الاولى البــالگبر
رايدلها صــبر واحــنه ابلا صــبر
اخلاف حيــدر منچـفي ماعونها
… ..
اخلاف حيدر سالفــه وماتنحچي
ابچينه والمكسور شيفيده البچي
المـــاله بالدنيــا ظهــر لاينتـــچي
الشيعه عگـبه اعليــمن ايتچونها
__… .
علي رقه وعاطفه وطيبه وعفو
علي وحــچاياته متــروسه دفو
علي بس هوه كــفو وماكو كفو
علي الدنيـــا شـــالته بعـــيونها
-------
على وبلايـــه علي انضيــــع الـطريج
راكبين بمــركب وشـــب بيه حـــريج
انضل نموت . انطيح ياخذنه الغريج
وبــين هــــاي وهـــاي شـــتحـــلونها
-------
بـين هـــاي وهـــاي عيشـــتنه تعــب
الفرح من اوجـــوهنا اخلافـه انسلب
الماي اذا شح عالخصار اصبح حطب
الـــنار بيـــنه وماكــــو اليطـــفـــونها
-------
نار هجــر افراگ حيــدر ماتهيد
العيد راح ولحد ايسولف ابعيد
بالعرب تايـــه الماعنــده عجيد
الطايفه ابلا شيــخ شيسـمونها
____
اليتم چان ابضنــتي بـــس للـــزغار
الزيـــن ثــاري لو مــشه ايتـم الكبار
الدنيه صفره اليوم مدفون الخضار
احبابه بالــنوح وبچــي ايگــضونها
-------
احبابه بالدمعات والون والنحيب
موغريــبه المات حــزناً عالحبيب
مالنه بالزين يــــاوســفه نصــيب
شـــمعته وسفه العـــده ايطفونها
-----
حيدر تركي الكربلائي
لميلاد الامام الحسن ع
.
.
.
انه محبوبي .. محبوبي .. محبوبي الحسن
انه محبوبي .. محبوبي .. محبوبي الحسن
__________
اعليه اسئلو الوادم .. امسودن انه وهايم
واليـريـد ايـشوفني .. ايـصـير مثلـي لازم
مثلـي كـون افعـاله .. الحسـن ساكـن بـاله
المــامجـرب روحـه .. لايـــگـــول اشـمـاله
هواي گالولي .. گالـولي .. گــالــولــي لـمن
انه محبوبي .. محبوبي .. محبوبي الحسن
__________
الله يدري بغايـتي .. من حچيت احچايتي
البعض صـَدگ بيـه .. چـيـف بيـضه رايـتي
أكـو ميــصـدگـوني .. الحـجة الله اجـنوني
حچو عني اهـوايه .. كـــوداً ايــكــرهــوني
ولليحبوني .. اچفوفي .. اچـفوفي انـدعن
انه محبوبي .. محبوبي .. محبوبي الحسن
__________
بالحـسن محـبـوبي .. المـايعـجـبه اسلـوبي
انــه اريــد اعـلنــها .. لايــــگـــرب صـــوبي
أبتــعــد گــالـــولي .. وانـــه ادري ابـــذولي
واعــرف ابنـيتــهم .. همــه مــن حلــفــولي
ظنهـم اتنازل .. اتـــنــازل .. اتـــنــــازل لان
انه محبوبي .. محبوبي .. محبوبي الحسن
__________
بعـيني اشوفـن أيه .. وبسـمــه امـسـمايه
المــاقـبــل لايـقــبل .. كل شخـص وبرايه
المـاعــرف معــناها .. گـــَلــي لاتــقــــراها
خـوفــي لافــسرها .. ومنـه يـزعــل طاها
دومـي اقراها .. اقــراها .. اقــراهـا بشجن
انه محبوبي .. محبوبي .. محبوبي الحسن
__________
امجدي جـاي ابــابه .. انـــي مـثـل احـبابه
والحــســن ادريـــبه .. مــــايــــرد طــــلابه
چــفي مـــن مـديته .. خــالــي مــــارديـته
بيدي صـك انطــاني .. وبي شفاعه اقريته
اعرفته يشفعلي .. يشفعلي .. يشفعلي اذن
انه محبوبي .. محـبوبي .. محبوبي الحسن
__________
الماوصـل لـي ابحـبه .. هــــذا هــــوه وربه
لايــشــــهـــر بـــيــــه .. السمعه جدا صعبه
ناصــبي اليبــغضني .. وابـــد لاميـــحـبني
عـلى اقــل احـچايه .. اجبـال بيــها يــبني
رايــد اعلنــها .. اعلـنهـا .. اعــلــن للــزمـــن
انه محبوبي .. محبوبي .. محبوبي
حيدر تركي الكربلائي