11030
لنشر قصائد مناسبات اهل البيت
أنا أتشارك 'تجليبه الوادم وين وصلت' معك
Читать полностью…
نزال الليله الاولى
.
.
.
الوادم وين وصلت وانته بعدك وين
گلت الهم بعدني بـاقي ويــه حسين
***
باقــي ولازلــت بمـسار بالمنـبر
ما اتزحــزح واتــرك ابـو الاكـبر
مـن باب التطــور گــالو اتـطور
گلـت شلون گالو نشف العينين
***
گــلتلهم بـعدني بدمعــتي اتعــبد
اتطــور نعــم بــس گلبي مايبــرد
اكشــخ أي ولكــن اكـشـخ ابأسود
واتطيـن ولا استنــكف من الطين
***
احط بخدي طيـن وابد ما اخجل
ولعيـون ابواليمــه كلــشي اتحمل
اذا مــو كربـــلائــي انــي اتكــربل
الحسين ولايتي لتگلي انته منين
***
الحسـين ولايتــي والخيمگه والـــتل
وعاشــگ أي نعم بس عاشـگ المقتل
الفـــرات يوشـــل ومدمــعي مـاوشل
موطـف بــيه عالعطـــشان لا طفــين
***
گالو كافي بــسك تبچــي عالعطشان
كافــي النـاس وصلــت للگــمر يفلان
گلــتلهم نعــم بس مــو گــمر عـدنان
الماوصلو لخـــو زينب تــره متيــهين
***
گــالولي كفــايه مـــرافگ الـيبــچون
لازم كل شخص كارزمـه عنده تكون
ياكــارزمه وانـــي الــي شبه مجنون
عـقل مايبقــه بيه الطبـگ من يحين
***
هذاك انه الذي عقــله بـقــه وشــاله
هــذاك انــــه الـــذي ممــــرود دلاله
راس حسين شمر اعـله الرمح شاله
مدري شلون ويحسبوني عالعـدلين
***
مدري شـلــون ماميــت لهالســاعات
وضلوع ابواليـمه بــخيل مسحوگات
ونسوان الهواشــم وســفه مسـبيات
بلا رايـه مشــن للســبي ولا چــفين
***
حيدر تركي الكربلائي
نزال
.
.
.
ياناس هالشـــرايين .. اليجري بيهن حسين
ابــو عــلــي
***
كريات الدمه البالناس بيـض وحمر ماكو اكثـر
وكريات الدمه العندي علي وحسين أبو الأكـبر
غـير حســين ميلوگ يجري بنص العروگ
حبيبي واغله معشوگ
أبو الحـــنييه
حــنانه غامــر الكون حنانه الي شمل جون
بي ما انجـن شــلون
حبيــب ارقيه
اول مــــره مذبـــوح .. يأخذ من عدل روح
حسين الولي
***
ديني حسين ابوالاكبـر وما اتخـــله عن ديني
لذلك شلتـه عن الـناس وضمـــيته بشـراييني
عن هالحچي ليطول خلي الناس شتگــول
انه عن حالي مسؤول
بمزاجي اتصرف
گلـبي وانــا حـر بي اليـــعجـــبني اخليه
المايعجـــبني الـغيه
الحبيبي تـــوقف
كان الحب ولا زال .. واحد ساكن البـــال
ياسائلي
***
بخلايه الدم يعيش حسين نعم في كل خليه اسمه
وكلــــما حلـــلو دمــــي لگـــــو بالـــدم أبو الـــــيمه
الگال امبـــالغ بــهـــاي اكله حســــين دنــــياي
حسين الهـــوه والماي
وزيد اعليــــها
بجزيئـاتي وخـــــلاياي اشــــعر عايــش وياي
هواي وكـــلش هواي
واضل احچيها
ميطــيح امــن اللــسان .. وما احب غيره انسان
وغيره شلي
***
حب حسين مو صدفه عشگته من چنت بالذر
لذلك هل عشـــگ اصــلي والـباقي تـرى مـزور
من وجداني حبيــت وعن الغـــير صـــديت
وغــيــره ماتمـــنيت
حبيب الزهـــره
خلـــيتـــه بـالعــيون وبي أصبحت مـجنون
واگلــــه دوم مـمنون
امن اطب للحضره
محبوبي البالطـــفوف .. حالف غيره ماشوف
هوه الولي
***
فكري يسرح هـــوايه حــقيقه بهالامـــر حاير
النظر دققـــته ولگيت فكـري ماخــذه العاشر
عشت مهموم مكسور من احـــزان عاشور
وحق كاظم المنــظور
وقصايد حمزه
وحق لوعــات الخيام وحــق أيـــام أيــام
وحق عبدالرضا الخام
وتـراثه وكنزه
شما تبچيله العيــــون .. اضل لحسين مديون
ياعاذلي
***
روحي وكربلـه وعاشـور عـــلاقة حب آلاهـــيه
جــــزء مـــنـــي مــــيتجزء مـــسير الاربعيــنيه
عايش كربله حساس وجاعلها اويـه الانــفاس
قدوتي بهاي عبـــاس
امير الخدمه
نشــــأت وماتــخليت ترعرعــت وتربــيت
ابيت يـحب اهل بـيت
ولي النعــمه
اهلي اهل التعزيات .. غذوني الموالات
شكراً هلي
***
حيدر تركي الكربلائي
قصيدة ليلة ام البنين
.
.
.
فلسفة هيامـك تنتظر امامك كما ام البنين
انما الحب انتظار
يمـتزج بالانكسار
كما ام البنين
***
عيش الطف سنة مو يوم يامن تنتظــر غايب
ذوب المرحلــه يسموك بامامه المنتظر ذايب
لوعمرك سنه وتنطر لتمـــل لوصــرت شـايب
بأنتـــظار الفرج خل عنـــدك يقين
حــتى تنــــعد انتــه عالمــنتظرين
في زمان الـــغيبه قــلد ام البنــين
شلون چانت تنطر حسين الحنـين
ولازم التـــحبه كل وكت تندبه كما ام البنين
ومدمعك ليل ونهار
يمـتـــزج بالانكـسار
كــما ام الـبنين
***
بك اين استقر الشــوگ گــلــب ام البـــنين يگول
بالطف صاحي لو يحسين جسمك داسته الِخيول
اجاوب سيـــدي دونك يـــبوالســجـاد مامعقـول
ارني الطلعه الرشيده مـن تصيح
ينغمي اعليه وعله الغبره تــطيح
الينتظر لو هيج لو لا مـو صحيح
كون تشعـر لوعــته لوعــة ذبيــح
المنتظر امامه خده بي علامه كما ام البنين
وتشعر بدلاله نـار
يمتزج بالانكـسار
كما ام البنين
***
كن مثل الذي كانت تگول حسـين بنـــفاسي
بنفسي انته من غائب لم يخلو من احساسي
بنفسي امنية شائـــق يشـــتاگك يعـــز ناسي
كله زحمه اخلافك اشتم الهوه
انا ذاك العگبك اگلــيبه انــچوه
ابـــرضوى ام طـوى ام نـينــوه
اسئل ومحــد يگــلي ها هــوه
هوايه دوريته وسفه مالگيته كما ام البنين
الروحه عاشت بالمرار
يمـــتــزج بالانــكســار
كـــما ام البــنين
***
ليت شعري يالــــغايب تـــگله يوصلـــك للطف
احارُ سيدي اليمتى ودمعـــي بخدي مايـــنشف
يمصحف فاطــمه يايوم ترد واقراك يالمصحف
مدله ايدك واحــچي ويـاه بالوصـال
كله عطــــشـانتلك عــــيوني تــــعال
اشوكت تروينه الصدى تــدريبه طال
اشوكت بس ياهو اليجاوب هالسؤال
حيره وشيحلها حيره وشثـگلها كما ام البنين
الشوگه مابي اي خيار
يمــتـــزج بالانكــــسار
كما ام الــبنين
***
انطي الغايـبك كلشـي امن اكبر شغــله للذره
مثل ماانطت ام عباس ولدها وتشعر مقصره
اليبذل كلشي للمهـدي تـلزمه فاطمه الـــزهره
ابـذل ومن تبـــذل بلايــه امـتنان
دور اعله المهدي انته بــكل مكان
وكله وين الــگاك ياراعـــي الزمان
بلا حــنانك دنيتــــي بلايه حــنان
ابچي عالمحنه لاتـــدور جنه كما ام البنين
ولوگلت انته البدار
يمــتــزج بالانكسار
كما ام البنين
***
حيدر تركي الكربلائي
مقدمة ليلة ام البنين
المستهلات الموجوده في نص القصيده
تقرء كما قرؤها اساتذتنا
.
.
.
واجب احنـه نــتذكر .. شقرو خدام ابوالاكبر
عن ام البنين
***
قصايدنه أرث بي حقنه نتباها
كتبناها وقرينــاها وحــفظناها
دم ارگــابــنه احـــنه نطــيناها
يحمزه وداعتــك لا مانسـيناها
انا ام البنــين ودهـري ذبـــني
حگي لو صحت يحسين يبني
فكد الاربعه يهون وحسين السباني
سؤال انطرحه عالمنبر .. شقرو خدام ابوالاكبر
عن ام البنين
***
ترعرعنه وكبــرنه وصرنه بالخـدمه
الفضل يرجـــع الى خــدام ابواليمه
عن ام البنـــين اشگــد قـــروه همـه
مـــن راحـت الگــبــر الـــطاهره امه
ام البـــنين الــــــحره مهظومه تجري العبره
يم بت محمد هاليله
تحچي اويه گبر الزهره بالنـايحـه وبالحسـره
يم بت محمد هالليله
اتشارك حزنها
لمــصاب ابنها
ومن نسمعها نـــتأثر .. شقرو خدام ابوالاكبر
عن ام البنين
***
بقــــــران الوفــه ام الوفـــه ايه
اليقراها يجــب ان يحظر قرايه
ام اربع شــــباب احـــيود وفايه
گالت وستمع مضمون الحچـايه
انا ام الـــــبنين الفاگــــــده اربــــع شباب
فدوه لتراب الحسين فدوه لتراب الحسين
گول وانته ماتخــسر .. شقرو خدام ابوالاكبر
عن ام البنين
***
عند ام البنين حسين أساس الدين
لذلك وصــت العــباس بـــي مرتين
تــگـــله لاتـــرد لو مايـــرد حســـين
يگـــلــها ادللــــي يايــــمه لتبــالين
يمه اطمنچ عليه گطعتهن اديه
وفيتج بعـيني / وجــفيني / وسنيني / يم المشرعه
ياحره ربيتي/ وضحيتي/ ونطيتي/ لحسـين اربعه
اليسمع دمعه يتفــجر .. شقرو خدام ابوالاكبر
عن ام البنين
***
تبقى مدرســـتنه الــنــفـتخر بيها
ام اربـــع بنــين امــنه نســــمـيها
تبچينه على الضـــامي ونبجــيها
يبني گلوبــنه من اتنادي تچـويها
ام البنــين تنادي يبني ويروح الهادي
ضحيتلك شباني من حـــبك وايـــماني
يبني ويروح الهادي
***
حيدر تركي الكربلائي
ميمر للعليله
.
.
.
الطف نينوه / لمن نوه/ شو گمت احس شح الهوه
سالــوفة الطـف يانـاس يخنگنــي احــس طـاريها
***
ناوي الرحيل الچن هــوه الريـه حسين
اسمعت الحچي ورأساً خمشت الخدين
مــثل ام الاثــنيــن ويــروحلـها اثنــين
شو فرفحت/واركض رحت/وبحضن ابو اليمه طحت
بنـــيتـــك عليـــله مـــعـقــــول بــديـــارك تخـــلـيها
***
معقــولـه ما مـعقـوله الله الـساتر
رايـــد ابويـــه الكــربـلاء يـهــاجر
خاف بمكاني اهناك يغفــه الحافر
الحافر صلف/ وصدره ترف /بس لا يسحگه وينخسـف
بطـــف كربلــه هنـــاك الخيـــل الهالـــنايـــبه مدربيــها
***
عـن كربلــه گالــو حچـي ماينـــگال
راس الچبـير اعله الرمح من ينشال
معــنــاتــها شـــدو نســاءه بــحــبال
بذاك الدرب / كلشي صعب / اسهــل امـر هــوه الضرب
والصــعبــــه هــاي النــــسوان يـــسألوها عـــن واليـــها
***
الطف والبواچي ثنيـنهن يـردن حيل
وانه عـــليـــله وعايـشــــه بالــياويل
ليل الحزن شيخلــصه لو جاني الليل
الطف كربله / الراحو هله / يانـــاس مـــن يتـــحـمله
ايــون بالنــهار وباللـــيل وعـــينه البچـــي عامــــيها
***
معلـــوله وتعــــنيـــت يمـــه اتلـــوه
وحسيت خدي امن الدمـوع اتچـوه
اتگــــوه گــتله بيـــــمن انـه اتـــگوه
حيلي رگد / فكري شرد / گـبل الضـعن بالطف گعد
جثــة ابويــه العطـــشان متخـيله افــيـي اعـــليه
***
فكري شـرد وتخــيلت شنهـــي يدور
خيل وعساكر على خيام اهلي اتدور
اوالي الحـرم عالگــاع لـــكن منحـور
امن تخيلت/ راسي شلت / وحسيــن گدامي شفت
اشبگـــني صحت من تـــروح بنـــتك منـــو يداريها
***
تبده الحچي گبالي وسمعت المضمون
يــردون اهلــــي الكربـــله يرتــــحلون
دمعاتي يمهـم طيـَـحت مـــدري عيون
دمي نشف / حيلي رجف / دلالي مدري شگد وگف
مـن صــــرحولي ماشـــين الطـــف كـــربله اواديها
***
حيدر تركي الكربلائي
قصيدة ليله العليله
.
.
.
كلشي راح الـغالي وامــالي ودلالي كلشي راح
كلـشي راح بـدنيــتي مـــحد بقالي كلشي راح
باقي بس ثوب ابــواليــمه
ومن يهزني الشـوگ اشمه
كلشي راح
***
اول ليـــلــه بالـــفرگه .. بــدت وزدادت الحرگه
اشهگ عالابو واشعــر .. تطـلع روحـي بالشهگه
علــيلـه وشدتي شده .. تفــور احــزاني واتبـده
ياهــل وادم الـغـــالي .. مــكانه الخالي شيسده
غريبه / عگب حسين احس روحي غريبه
اجيبه / الصبر من ياكـــتر گــــلولي اجيبه
مصيبه / على راسي احس طاحت مصيبه
كلشي راح علـي وعبـــدالله ورقيه كلشي راح
كلشي راح منين اجتنــي الغاضريه كلشي راح
كلشي يمــي الـجان نعمه
مـن يهزني الشـوگ اشمه
كلشي راح
***
العلـيله فاطــمـه انــي .. اليوم احچي على احزاني
الزمن من راح ابوي حسين .. بــلا رحـــمـه تـولاني
اول مابــــده غـــــيابـــه .. جرت دمــــعاتي لـهابه
وكلشي البيه احسه يصيح .. اه يحسين ومــصابه
اريــده / ابويه الكـــــله حــــــنيه اريــده
وحيده / اول تالــي يــــتركني وحــــيده
بعيده / صدگ ياناس ارض الطـف بعيده
كلشي راح نحره عطره وحتــى صدره كلشي راح
كلشي راح هم يـــرد ثـــاني واخبـــره كلشي راح
اكتب اعله الــــگـاع اسمه
ومن يهزني الشـوگ اشمه
كلشي راح
***
صدره المنخلق للـشـم .. وعطره للجرح بلسم
مكان الاغفه بي ياناس .. خـاف هنـاك يتهشم
اصيح بلهفــتي يـــابه .. كلـــما اشــتم ثـــيابه
كلشي حاسبه والصار .. لاماحـــاسبـه حــسابه
اكلمه / وكـت المــــغربيه الــــثوب اكلمـه
واشمه / واكــــله وين راعــــيك واشـــمه
اضمه / على عيوني وعلـى صدري اضمه
كلشي راح ضل وجــوده وضل حــنانه كلشي راح
كلشي راح الهالســـــبب خـــالي مـكانه كلشي راح
وراح من هالثوب اعمــه
ومن يهزني الشوگ اشمه
كلشي راح
***
الغالي بكلشي ياذيني .. العاشت صورته بعيني
كلساعه احترگ لجـله .. وماصــــح اليطـــفيني
ياهــالنـــاس گلـــــوله .. اذا للطـــف تروحــوله
يالماتنســه للـــتذكــير .. عنـــدك طـفله معلوله
اعاني / بغــــيابه هـواي گلـــوله اعاني
زماني / ستقوه اعلــــيه ياوسفه زماني
اتاني / انـه لشــــوكت ابـــــقه اتــــاني
كلشي راح ابيت اهلي الچان جنه كلشي راح
كلشي راح وبقه البيت بلا مــحنه كلشي راح
باقي محـــــرابه واكلــمه
ومن يهزني الشوك اشمه
كلشي راح
***
ياهو الي سمـع وني .. عن وناتي يسـألني
واگلهم ذكريات اهلي .. ياهل الـناس اذني
كاتلني القهـر والـــهم .. كلمــا عنـهم أتكلم
مـــو عن علتي اتألـم .. عليــهم انـــه اتألم
چبيره / اشعر حسرتي كلش چبـيره
اديره / النظر المن عگب اهلي اديره
بصيره / ياهل ناس انطوني بصـيره
كلشي راح صافــــنه بالــــدار وحــدي كلشي راح
كلشي راح وكلشي ماضل والله عندي كلشي راح
والدي ابذاكرتي وارسـمه
ومن يهـزني الشوك اشمه
كلشي راح
***
حيدر تركي الكربلائي
مقدمة ليلة العليله
.
.
.
ياكهف المحنه وريحة حسين
عطشانه يعمه تشــوفچ العين
زينب يعمه
زينب يعمه
***
عطشانه .. الچ ياعمه مو للماي عطشانه
والهــانه .. الريحة شيلتچ تدريني والهانه
شـــوگـي المغــربــيه يهــيج
وصدري امن المحنه يــضيج
ومـــــــن داري لحــــد دارچ
اركـــض ركــــضة طـويريج
عليله وبالعليله انتــي تدريــن
عطشانه يعـمه تشــوفج العين
زينب يعمه
زينب يعمه
***
معميه .. گمت ماشوف عگبچ چــني معميه
مسبيه .. وگبل سبيچ احــس ياعمه مسبيه
الهجر صح الهجر كلمه
ولكن يســــبي ياعـــمه
والمن الهجر مكـــسور
شي عــادي اذا يعـــمه
يالچنتي تصــبحيني وتمســين
عطشانه يعـمه تشوفــچ العين
زينب يعمه
زينب يعمه
***
اتحسر .. على حچاياتچ الحلوات اتحسر
مااگدر .. اضل ابلا حـنانچ والله مــااكدر
علـيلـه ومـا الي قــدره
ذبلت وصـايره صـفره
عودي المايهـزه الريح
هسه النــفس يـكسره
شعوري اختصره وحــساسي بكلمتين
عطشانه يعمـــــه تـــــشوفچ العـــين
زينب يعمه
زينب يعمه
***
اتــألم .. مو مــن المرض من هجرچ اتألم
مايرحم .. البعد عمه يزينب والله مايرحم
اَلملم روحي گوه اگدر
والنوب ارجع اتــطشر
المصيبه لا انتــي يمي
ولا يـــمي أبو الأكــبر
تسأليني اعله حالي حالي مــوزين
عطشانه يعـــــمه تـــشوفج العين
زينب يعمه
زينب يعمه
***
يسمونه .. يتيم الفارگچ عــــمه يســمونه
بعيونه .. تضل مغرغره الدمعات بعيــونه
وضعي اخـلافچ اتـبدل
وعنچ عمه ياهـو اسـئل
شوفي من البچي بعدچ
وداعــت كافلـج وشــل
اسئل ياهو كل الساده ماشين
عطشانه يعمه تشوفج الــعين
زينب يعمه
زينب يعمه
***
ايامي .. اخلافچ گمت احسها اخر ايامي
احلامي .. گبل موتي التقي وياچ احلامي
وترديلي باحـسن حال
وبيدچ ماكو اثر لحبال
حسين اليمشي گدامج
ويمشي بظهرچ الكفال
وين الله ورسول الله تردين
عطشانه يعمه تشوفج العين
زينب يعمه
زينب يعمه
***
حيدر تركي الكربلائي
شور او ثگيل
.
.
.
جروحك كثره ماتلتم .. گـــــــول منين تتألم
من الصـــدر المهشم
لو من جرح الِمـخيم
* * *
يارب الخــيم طايـح وفوگك طاح چم حافر
ياسلــــــطان هيـبتنه بحالك يالاخـو شصاير
ياجـــــــابر گلب زينـب صـاير تكسـر الخـاطر
الحافر خاطري يحسين مدري صدرك الكاسر
حيره منـــين اشبگنك وضمك
حيره شلون من صدرك اشمك
حيره وخاف يالــــغالي الچمك
هلبت بيــــك تتكلم .. گـــول منــين تتألم
من الصــدر المهشم
لو من جرح المخيم
* * *
يحساس الورد زحمه المثــلك عالترب خده
يـــالتتبده حنيه كلشي بجســــــــــمك تبده
شلـــــونك يالذي شلونك أسأل هم الك رده
گـــبل شوية اكو واحد اباب خيامـك اتحده
صاحو عالتراب حســــــين نايم
صاحو عالخيم صـــــاحو غنايم
صاحو والضعن بالصـحـره هايم
الوادم خويه ماترحم .. گـــــــول منين تتألم
من الصـــدر المهـشم
لو من جرح المــخيم
* * *
عالم خيمتي المـورق صـار بغيـبتك اصفر
وتطشر حلم عمـــري لمن شفتك مطـــشر
تلم روحك تحسسني تگلي بخير ابوالاكبر
عن لا اعثر اگبالك تخاف يشوفني العسكر
شلونك وانه اعــَرف بحالك شلون
شلونك والعده گبالك يضــــحكون
شلونك متني من همـه يضــــربون
تدري بحيلي يتهدم .. كول منـــــين تتألم
من الصـدر المهـشم
لو من جرح المخيم
* * *
يلـي مفرهده ثيابك حيـــــلي مثلك تفرهد
اليوم المر على زينب يابو اليـمه يوم اسود
شفت السلبت جسمك تــمر عالخيمه تتعمد
واحــــد عيد بجبتك الثاني بمـحبسك عيد
ويلي عيــني شافتــهم مجبلين
ويلي يـــرد گالـــو لاتحــــــلمين
ويلي الشمر عفناه يذبح حسين
الجرحك يادوه يرهم .. كول منـــــــين تتألم
من الصــدر المهـشم
لو من جرح المـخيم
* * *
الخيمه الي خذت گلبك خويه حترگت الخيمه
والچانو تـحت ظلــــــــــها هسه ســكنو الهيمه
غيمة خيرك التمـــــطر ماضـل مــنها هالغـــيمه
اليعطشلك تره ويموت حـقه يموت مـن ضيمه
ضامي تلگه كــــل انسان يشتاگ
ضامي يموت خويه من الاشواگ
ضامي الشــوگ يابو اليمه حراگ
ياريت انگلب بلسم .. گول منـــــين تتألم
من الصـدر المهشم
لو من جرح المخيم
* * *
حيدر تركي الكربلائي
نزال الليله الثانيه
.
.
.
فاليضج الضاجون
واليعج الـعاجـــون
قتل الحسين
***
قُتل كلمــــــة شـــكثر بيها مصـــاب
كلمة صعبه وتهدم گـــلوب الاحبـاب
هاللـه هاللـه حسـين نايــم عالتـراب
شهالمصاب المثله مايحصل مـصاب
ياتــــرى أي قـتــــيـــل
قد حنى عرش الجليل
قُتل الحسين
***
قُتل المــــا الـه والـي ولا ســــــنــد
وكالحـســين انســان مامقتـول ابد
الخيـل والـخيال فوگـاه من صـــعد
صدره من سحگت حـوافرهه نسرد
مزقــت صدر الرسول
اعوجـــيات الـــخيول
قتل الحسين
***
قتــــــل وأي دمٌ قـــد اســـتبـــيح
والظليـــمه گام ميــمـونه يصــيح
مو جريح وحــتى يتداوه الجريح
حسين فوگ الگاع يازينـب ذبـيح
دمه قد اســــتـــباح
رأسه فـــوق الـرماح
قتل الحسين
***
قتل وخل نخــتصر كـل الكـلام
قتل بطف كــربله اليــوم الامام
عالحرير المثــل أبو اليمه يــنام
مو على الغبره وتغـطيه السهام
جسمهُ امسى سليب
لهــف قلبي للغــريب
قتل الحسين
***
قتل والـحومه صــــارت بيـــها عيد
امن اعـتله شمر الخنه صدر الشهيد
لزم شيـــبه وصاح أبو اليــمه وحيد
اليــوم اذبحه امــن الوريــد وللوريد
جرد السيف اللعين
وابتدى حز الوتـين
قتل الحسين
***
قتــل وصاح البعـض عدنه سؤال
شنــهو بعد القتــل وهذا الــقتال
الشمر گــام وگال جيبولي حــبال
عگــب ابوفاضل بعــد ماكو دلال
كافل الــخدر قتيل
لا كفــاله لاكفــيل
قتل الحسين
***
حيدر تركي الكربلائي
قصيدة الليله الثانيه
.
.
.
سافرت عبر الزمــان الديره بيها ازمة امان
اول انـسـان التـقـيته
عالــثره مگطع لگيته
وكربلا چان المكان
***
الف واربعمــية الأعوام الـخلت
وشلت بـس دمـعتـي ماوشـلت
ارجعت للماضي بـفكـري .. الواحد وسـتين هجـري
چان حيل هواي صبري
ومن وصلت تبدد
وصلت ولگيت المصيبه .. جـثـت حسـيني سلـيـبـه
وزينـب تنـادي الـغريـبه
الخدر خويه تفرهد
حرت مـاادري شگـول حسين ساحگته الخيول
ثاري الانسان الاجيته
عالثره مگــطع لكيـته
وكربلا چـان المـكان
***
دراما چــانـت لكــن درامـــة ذبــح
حسين مرمي وراسه مرفوع برمح
تحيـرت ياهــو الاكلــمه .. راسه اكلم مدري جسمه
مدري مــن الــگاع المه
عمت عيني مطشر
علــى چـف أيـده ابــاوع .. بچفه بس اربع أصــابع
خنصره السلاب گاطع
ويلي ياهالــمنظر
ومن على التــل اسمـعت عــدل خـويه لو مــتت
الشفته صعبه لو حـچيته
عالــثره مگــطــع لـــگيته
وكربلا چــــان المـــكان
***
سافـرت اكتشـــــف مــــاذا بالطــفوف
ردت اشوف وريتني اعمه ولا اشــوف
حسين ابوالسجاد شفــته .. امن الضمه مفطره شفته
تغيــر وگــــوه عـــرفته
بالحسين شصاير
ذاك وجهه الچـان يزهر .. اتغير من الشمس والحر
انته معقــوله ابوالاكبــر
شسوه بيك الحافر
بجبهته صاير خسوف من حجر أبو الحتوف
موقـــف ولا مانـسيته
عالثره مگطـع لــگيته
وكربله جـــان المكان
***
فرق توقيــت الأرض عن الســماء
هيچ فرق الدمعه في طف كربلاء
اتشوف خلك ماله احــد .. جسمه عالغبـره توسد
عادي چبـدج لو تمرد
لان چبده مصوب
والمثـلــث صـاب گـلـبه .. والله صعبه والله صعبه
گضه ابوالسجـاد نــحبه
الهذا اون وانحب
بعد هالــسفره الحياة بعيني احسنها مــمات
وما اوفي شما بچـيته
عالثره مــگطع لگيته
وكربلا چان الــمكان
***
في خضـم الـطف ســوالف لاتـطاق
على سلب حسين چـن صاير سباق
السمه صاحت وخرو عنه .. ثوبـــه شــتريدون منه
اسهامـــكم مــو شگـگنــه
عاندو يردونه
والهدف من سلب جثــته .. رادو يـــراوون اخــــته
رادو يـموتـــوها سـكته
وهذا اليقصدونه
وهيه زيــنب من تمـوت تنتهي الثــورة بســكوت
تصيح تعبي الي جنيته
عالثــره مــگطع لـگيتـه
وكربلا چـــان المـكان
***
حيدر تركي الكربلائي
الليله الثانيه
.
.
.
يا اول حبيب عالغبره سليب تذروه الرياح
يالصــدرك وطئــته الخيول
بوصـافك شحچي وشأكول
معـــــــقوله الماخذ العـقول
تذروه الرياح
***
هذا انته الحســــين النوره لا يوصف
هذا انته شعـجب شو صدرك مخسف
هذا انته التارس جسمه صحره الطف
معقــوله يـبوالاكــبر
بلا فيّ نايــم بهالحر
ياللميتــني بگلــبــك گلــي شـلون تتــطشر
يمــــك واگف وحاير
هاي بجسمك شصاير
المرن فوگك يركضن بيهـن فوگ الف حافر
وكل هذا الجمال نايم عالرمال تذروه الرياح
تعبيري بمــصرعك خجـول
بوصافك شحـچي وشأكول
معقــــــــوله الماخذ العقول
تذروه الرياح
***
سولفـــتك ويمـحله السـالفه بأسمك
سولفتك واخذني الشوگ يم جسمك
ســـــولفتك وجيت بلـهفــه اشتــمك
اجـــــيتك بيه مابيه
اجيت وميته رجلـيه
يـبو رقيـــه تلـگـــاني علـــيك ابـــداعة ارقـــيه
اشبگني رايد انه انحب
يالمـــتـرب يالمســــلب
بخيالي وردت اموت اني شلون وشافتك زينب
وجسمك بالعراء مســـلوب الرداء تذروه الرياح
يم جســـمك واگف بذهول
بوصافك شحجي وشأكول
معـــــــقوله الماخذ العقول
تذروه الرياح
***
حبيــتك يأول بــشر من الذر
حبيتك يبـعد عيوني ابوالاكبر
حبيـتك عـدل مولاي ومـوذر
احبـك مو كلام السان
احبـــك يا أعـز انسان
احبك من چنت عايش واحبك يالعلى التربان
يالمتروس بيك البر
كلما جاك شـو تـكبر
تتغيــر النــاس هــواي بــس انته المتتغــير
يا اغرب غريب بخيـــامه اللهيب تذروه الرياح
يالـــــذكــرك باقي مايـزول
بوصافك شحچي وشأكول
معقـــــــوله الماخذ العقول
تذروه الرياح
***
اتعثر اجــيتك يا بعد روحي
اتعثر وگامت تكثر جـروحي
اتعثر لمن شفتك يمـذبوحي
حيــــره وياك شتكلم
ومن كل صوب تتألم
جسمك غطه وجــه الگاع وانا بخيــرك اتنعم
واجب احچي بالطافك
يامن يابسه اشـــــفافك
الشافك على هذا الحال حقه يموت من شافك
يالجسمك صريع يالــراسك قطيع تذروه الرياح
يشـرحلك مدمعـي الهطول
بوصافك شحچي وشأكول
معــــــقوله الماخذ العــقول
تذروه الرياح
***
يالطـــايح شما ناديك ناديني
يالطــايح مروتك ويـن دليني
يالطايح خلافك تنعمي عيني
اريد اشــــتم عطر نحرك
واحط راسي على صدرك
وابچي ودمعتي بلكت منها يرتوي ثغرك
بلكت تروي بالمدمع
بلكي ونبضتك اسمع
العلويات منتظـرات هيـچ وللخيم ترجع
والمـــثلك قليل يرجع مستحيل تذروه الرياح
يا اول واخــر الفصــــــول
بوصافك شحجي وشأكول
معـــــــقوله الماخذ العقول
تذروه الرياح
***
حيدر تركي الكربلائي
قصيدة الليله الاولى
.
.
.
نخدم واحنه الممنونين .. وشما سوينه مقصرين
غير انته حسين ويحسين
مــــــنو المثـلك مــــــنو
* * *
وعيونك ماقبل اللوح .. وقعنالك يالـــــمذبوح
وگـــنالك من چـــنه تراب
نعم
مومالت يوم ويوميــن .. بالخدمة وياك مطولين
وصرنالك ياروح الـروح
خدم
مو برادتنه اجينه الخدمــــــتك تدرينه
هذا كله الفضل يرجـع الـك يابوسكينه
شكراً عالتوفيق الفات .. وشكراً عالتوفيق الأت
غير انته حسين ويحسين
مــــــنو المثـلك مــــــنو
* * *
عمر ابن ادم حيل زغير .. والهذا نحس بالتقـــصير
خاف نموت ومنوفيــــك
صعب
ميوفن ذني الدمـــعات .. يلي اضلوعك مطحونات
وبيــــنه نيــران التقـصير
تشب
انچان يابواليمه انته تعـــدنه من خـــدامك
زيد كل عاشور بينــه جـــمره من خـــيامك
خلينه موبس هاليوم .. خلينه ابابك للدوم
غير انته حسين ويحسين
مــــــنو المثـلك مــــــنو
* * *
الخدمه شويه وانته هواي.. يامن محروم امن الماي
عيشنه بحبـــــك مولاي
ضــــمه
عطشنه الجــية عاشور .. وحسـسنه شلون المنحور
وحول دمــعات الخـــدام
دمـــــه
اليرتقي بحبك يشوف الدنــيا چنها العــــــاشر
ويحس كل ظهريه يركض عـلى صدره الحافر
الخدمه ارزقنه مو أيام .. ارزقنه نخدمك كل عام
غير انته حسين ويحسين
مــــــنو المثـلك مــــــنو
* * *
خدمة شخصك رفعه وشان.. ياسلطان اعله الـتربان
يموصــــــل خدامــــك ويــن
عجــب
العجبه مكبر حيل الـناس..وباقي انته جثه ابلا راس
يالخـــــــيماتك صـــــارن ليش
لهــب
الف شكراً يالعجـــــــيب ويالـعــــطائك اعجب
لبســتنه امن الحــــــرير وثوبك انته مــــسلب
يااكرم واحد مذبوح .. يالمتصدق حتى بروح
غير انته حسين ويحسين
مــــــنو المثـلك مــــــنو
* * *
خــدام الغيـــر يـنزلــون .. وشـــو خدامك يتـــعلون
يالراســـك متعـلي فـــوگ
رمح
فضلك ينرد مومعقول ..وشرح افضالك حيل يطول
يامــــــن للـخدام ابنيـــت
صرح
عيشتنه معـــززين مـــــــــــــكرمين واكثر
ورحلك انته يبو اليمه فرهدوه العـــــسكر
مطلبنا انضل احنه وياك .. نـترجــاك ونتــرجاك
غير انته حسين ويحسين
مــــــنو المثـلك مــــــنو
* * *
حيدر تركي الكربلائي
مقدمة الليله الاولى
.
.
.
حسين / كلشي شـوية وانته هـــواي
حسين / مثلك ماشـايف مـــــــــولاي
حسين / الوجهك يعطش حتى الماي
***
يأكبر انته مــــن كلشي يالمـــــالك نـهاية وحد
يموضوع الله من اطريك موضوعك فلا ينسد
يالمتواضع بكلشي بحيث الكون بــــــيك انشد
نزلت المســتوى الحافر حتـــــى وادمك تصعد
حسين / سنين وصـــــــافن انـه بهاي
حسين / مثـلك ماشـــــــــايف مولاي
حسين / الوجهك يعطش حتى الماي
***
الكون بطـــــوله وبعرضه بتـفاصيله ومعانيه
اويه اصــــبع ايد عبدالله يطــلع كلش شويه
منصف كون اليقارن بتضــــــحيتك يبو رقيه
يراعي الموجرح واحـد يراعي الف وتسعميه
حسين / عليك الحــــــافر رايح جاي
حسين / مـــــــــثلك ماشايف مولاي
حسين / الوجهك يعطش حتى الماي
***
يا اعظم ذبيح انته ومثلك مايصــــــير وصـار
من حقه المجد يندار نحرك ويـــــــــن مايندار
الوادم تنطي لله زغار وانته تضحي بس بكبار
زغير بـــــكربله ماكـــو ازغـارك كــــبرتها الــنار
حسين / الدينك بـــــس انته الشـراي
حسين / مثـــــــــلك ماشايـف مولاي
حسين / الوجهك يعطش حتى الماي
***
يالمعطش الوجود انته الشوفت وجهك الصافي
أي يالغافي بــــــــس شلــون انته عالرمل غافي
اليخلع گلــــــبه من حقه والكــبرك يجي حــافي
تلگه بداخله خيـــــمات وجمـرها لــسه ماطافي
حسين / يالعالغبره ابلايه فـــــــــياي
حسين / مـــــــــثلك ماشايـف مولاي
حسين / الوجهك يعطش حتى الماي
***
كلشي اشتاگلك حـــــــقه وبسمـك كلشي يتنفس
والما شم هـوه الحضـره طبيـعي انچان يتيــبس
المايتحسسك يحســــــين مدري شلون يتحسس
الوجود بكبره چن محبس وانتــه شذرة المحبس
حسين / أي يا اخــرتي ودنـــــــــياي
حسين / مـــــــــثلك ماشـايف مولاي
حسين / الوجهك يعطش حتى الماي
***
حيدر تركي الكربلائي
الليله الاولى
قصيدة الگعده
.
.
.
الدنيه ابلا خدمتك والله يحسين
لاما تسوه فلسين
عالدنيه السلامه
من غير الخدامه
ولاما تسوه فلسين
***
بسم رب كل الاشــياء وبسـم رب حسين نبدي
من المهدي اوياك احنه يبو اليمـه الى الــمهدي
احنه ناس نعيش حزنك مانعيش بحــلم وردي
ايام ونستنه الصدگ .. في مجلسك من نحترگ
ابلا حبك وهذا العشگ .. لانجــيب اولا انـــودي
محروگين احنه ابنار الخيام
بلكي اتعدنه خدام
وهالعيشه ابندامه
من غيــر الخدامه
لاماتســوه فلسين
***
الخيـــمتك يامـــن جـبتـــنه الــف شــكـرا يبــو اليمه
الخدمه نعمه وبعدك انته اتفيض فوگ الخــدم نعــمه
الــرايده انــتــه وتحـــبه مـــن يـزل جــدمه تــلــزمه
الدرب الصواب اترجعه ..اليجري اعله مودك مدمعه
غير انته امامه ومرجعه .. ولو تركته ينـــسه اســمه
لو ماچفك المگطوع اصبعه
الزل جدمه اشيرجعه
وكل هاي الكرامه
من غـير الخدامه
لامتــسوه فلســــين
***
نكــبـــر بجـــالــك ولــكــن احـــنه ذولاك الشــــويه
اتـطـــشنه دنـــيانه وتلمـــنه يمنتــــك يـــابو رقــيه
انحبـــك وداعة البالطــف طحــنته خـيل اعــوجيه
وروح امك وذاك الصدر .. نخدم نضــل طول العمر
مـــو للـــثواب وللاجـــر .. انــريد مرضــاة الــزچيه
احنه وياك مادورنه جنه
يــاراعي المحــنه
الجنه يالمـــلامه
من غير الخدامه
لامتــسوه فلسين
***
اتضكنه مـرات الضروف وتنفـــرد بينــه المتاعب
إي بحيث الشاب بينه من تشــوفه تگــول شايب
ننكــسر من جانب احنه انخضر احنه بغير جانب
زرعك جذوره امغلـــغله .. من گاعه محد خلخله
الســاگيته دمـعــة كربله .. مايـهــزنه المصـــاعب
ترباتك نعم ذولاك احنه
المافد يوم طحنه
خـــدام الامــامه
من غير الخدامه
لامتــسوه فلسين
***
احچايه گلناها وبقيــنه من زغرنه عالحچايه
مانعوف الخدمه احنه حتــى لوتنگطــع هايه
رايه اخذناها امن اهــلنه والولدنه ننطي رايه
خدام ونضـــل للابد .. يحسين منطينك عهد
الله ورسول الله شهد .. امن الــبدايه للنهـايه
وفقنه السنه سيدي بعاشور
نبچيلك يمنحور
وربعك هالنـشامه
من غير الخــدامه
لامتسوه فلسين
***
حيدر تركي الكربلائي