4228
لنشر القصائد المنبريه في خدمة ابا عبد الله الحسين عليه السلام ودعما للشعراء والرواديد الخادم /غيث اللامي ******** للتواصل / @geath_95 ******** 07716408960
في رثاء طفلة الحسين رقيه (س)
احچيلك • أنـــــــتظر طيفَك يمر
وابچـيلك • بويه ذابحــني الهجر
واشكيلك • ابزينب شسوَه الشمر
(احچيلك )
°°°°°°°°°°°°°°°°°°°°°°°°°°°°°°°°°°°°°°°°°°
اشهَگ ابعبـــــرة حزن/ المـــايعرفك مايحِن
وانـــــه دمك
آه يـَــــاشوگي عليك/ لهفتي لچفُوف ايديك
خذنـي يمك
واگف ابفكري لگيت/ روحي اترد لو أجيت
بسْ أشمك
بويه محتــــــــار العقِل/ مايشبهونك شڪِل
ويـــن أضمك
انحييلك • لو تمرنـــــه يا شمس
وانعيلك• ابگلبي اليـــوم وأمس
وبديلك • عتبي لو جَانه الرجس
(احچيلك )
°°°°°°°°°°°°°°°°°°°°°°°°°°°°°°°°°°°°°°°°°°
المَلگه اتريد الچفوف / وانت مذبُوح بسيوف
شلون احضنك
جسمك امگطــــع ألفّ / روحي الروحك ترفّ
وين أبوسك
اتمنى بس نگعد سوَه / بيــــدي حطّلك دوَه
ابروحي المك
الشفِتك اسگيها ماي / وبالعبي نسوي فِيــّاي
ضُمني اگلك
انسوِيلك • شطوط ماي من البحَر
نفــديلك • الگلب قبـــــــــل النظر
نهــديلك • وننـــــذر الجيتك دَهر
(احچيلك )
°°°°°°°°°°°°°°°°°°°°°°°°°°°°°°°°°°°°°°°°°°
بويــــــه ذبلانِه صرت / دَم عله چفوفي شفت
الحبل گصني
طفله وبهـــــــاي العمُر / ابواهس سنين الزغُر
الوكت ذبني
الطرق رايـــــد يرع /وعالنياگ ابيـــــا شرع
عذبــــــنّي
حاضره ويــــــــــا الكفر / رايـــــده عون ونفُر
گوم ردني
امشيلك • ياذخر حيــدر علي
ادعيـلك • بس تــرد سالم الي
انحييلك• يا بجيــت كل هلي
(احچيلك )
°°°°°°°°°°°°°°°°°°°°°°°°°°°°°°°°°°°°°°°°°°
مــــرَه احسب للفجر / مــــــرَه انطُر للعصر
الهيبـــه ردته
ردت انسِه ومانسيت / وداعتك لجلك عميت
وابچي سڪتِه
امصلا افــــرش للصَلا / اغلا انتَ من الغلا
ابروحي شفته
العالم ابعيني سوَاد/ الحسره تـــاڪل بالفؤاد
اتــــردلي يمته
اعــميلك •اعيون لجلك لو ردِت
اضحيلك • مرَه طولك لو شفت
ادخيـلك •ردلي يـــــابويه متت
(احچيلك)
°°°°°°°°°°°°°°°°°°°°°°°°°°°°°°°°°°°°°°°°°°
ويا العده نمشي ابيسر/ والضعَن يحدي زجر
بگلبي جمرَه
عـــالدلال امعودَات /وعالنيـــــاگ امربطات
القصه مرَه
امدنگه امشي اويا البنات / بالخرايب بايتٓات
الغربه خطره
ابعزتك حــدّ الممات / علمتني اعله الحيات
ابقَه حــــره
انوديلك • ارواحنــــــه لجلك ثمن
ارحيلك •فــــــاجِعه ابگلبي اندفن
يرضيلك •اموت واهدومي الچفن
(احچيلك)
°°°°°°°°°°°°°°°°°°°°°°°°°°°°°°°°°°°°°°°°°°
ڪ. حيدر مكي النصاري
²⁴محرم ¹⁴⁴⁷
حسين
ياگلب بعد ،، ذر الدمع ،، واكضيها بونين
ابجي من صدك ،، للمنصرع ،، وخوانه ميتين
لا تهم ابد، ،، وبجي بوجع،، من تسمع حسين
،،،،،،،
روح ،، عيش الطف الصاير جمره بداره
صار ،، لازم تعرف كل مايجري اخباره
عيش ،، دمعه وصرخه وكون تعيش بناره
،،،،،،
ضج بالدموع ،، والضلوع ،، داسوها
ويه الحسين، ، نساوين، ، اخذوها
شبت النار، ، بالخيام، ، حركوها
>>>>>>>>>>>>>>
تبجي فاطمه .. واهل السمه .. لو هل الهلال
عاشور اجه .. والمابچه .. ماعايش الحال
گلبه يحترگ .. وصط الخيم .. لو شاف الاطفال
،،،،،،،
نار .. هاي الضلت مشتعله بنص خيمه
وين .. ضاعو اطفال ام عون بيا هيمه
ماي .. ماكو بذاك الحر العاشو ضيمه
،،،،،،،
مات الحسين .. بعد وين .. ممشاهم
هضمت اعيال .. والاطفال .. وياهم
صوت الطبول .. والخيول .. بچاهم
>>>>>>>>>>>>>>>
يله يا گلب .. هذا الدرب .. عيش بمصابه
باقي بس جسد .. وبلا رحم .. سلبو ثيابه
تالي منذبح .. راسه برمح .. واهله بخرابه
،،،،،،
نوح .. لا تضل ساكت ترا زينب سبوها
ليل .. ضلمه صارت من بعد طيحت اخوها
موت .. صعبه يا گلبي صدك لو طلعوها
،،،،،،،
من الخيام .. ع الشام .. مو سهله
طبو السوگ .. ع النوگ .. الهزله
وراس الحسين .. ع رماح .. مد ضله
>>>>>>>>>>>
يا گلب تره .. بت حيدره .. امدلله هواي
تالي بالقصر .. ام الصبر .. ماعدها اي راي
ندبت الحسن .. وام الحسن .. بس گومو وياي
،،،،،،،
ليش .. ليش يا يمه صعب ضيم العليه
جان .. اسمي اميره واصبحت هسه سبيه
حان .. وكتي والاصعب ترا احبال البديه
،،،،،،،
يمه عباس .. بلا راس .. ودعته
العلم طاح .. شمر صاح .. طيحته
گطع جفوف .. بالطفوف .. عاف اخته
>>>>>>>>>>>>
اللهم عجل لوليك يارب الفرج
احمد محمود
نزله
بالغرب وحدي عمه يالمهدي احضر لعمتك
ــــــــــــــــــ
حيرتي يوليدي حيرة ودهري متحزم الي
ومن اريد انهض انادي يا محمد يا علي
جفني غيمة من المادمع بالهظم من يمتلي
روحي قربان يصبرها قربتاً من تبتلي
بالحمد ابدي عمه يالمهدي احضر لعمتك
ــــــــــــــــــ
عمه يالمهدي بغيابك وانته تسمع قصتي
من وكع شايل علمنا مني وكعت دمعتي
أظهر وشوف الجرالي عمه وانظر حسرتي
قلبي ما يحمل مصيبة وحزني يشرح حالتي
والزمن ضدي عمه يالمهدي
احضر لعمتك
ــــــــــــــــــ
عمه من حرگو خيمنه بلا خيم ظل الخدر
ياصبر ينفع جرحته ويادمع يكفي الصبر
من بعد عزنا وفخرنا وي ابو فاضل عمر
جابوا النوگ الهزيلة وصعدونه بكل زجر
والغرب يحدي عمه يالمهدي احضر لعمتك
ــــــــــــــــــ
تدري يالمهدي من اجينة لكربلة من أرض الوطن
لا نخاف ولا نبالي بهالسفر يبن الحسن
والله حاطتنة السلامة وبس أمان اعله الضعن
وهسه نمشي بلا سلامة من غدر هذا الزمن
يا نفع يجدي عمه يالمهدي
احضر لعمتك
ــــــــــــــــــ
من بعد موت الهواشم والله ما ظل كل أمل
لا عشيرة ولا حماية وغربة ما واحد سئل
عالرمل ذبحوا أهلنا وهسه احنا بلا اهل
وضاگت الدنيا الوسيعة عمه من عودي انجتل
مابقوا عندي عمه يالمهدي
احضر لعمتك
ــــــــــــــــــ
اني أكابر عالمصايب والألم نفس الألم
قلبي من ذبحوا اخوتي يحترك وي الخيم
وعيني من دمعتها صارت جنها جود وبي سهم
ولدي فدوه اعله الترايب حيلي لحسين انهدم
فدوه كل ولدي عمه يالمهدي احضر لعمتك
ــــــــــــــــــ
يمتى تظهر يا فرجنا وتأخذ بثار الذبح
وبظهورك يا علمنا وامرك بحق يتضح
والضلامة الحنا بيها عمه والهم بنشرح
ينجلي لليل المصايب باجر وانته الصبح
ياشمس وعدي عمه يالمهدي احضر لعمتك
ــــــــــــــــــ
الشاعر زين العابدين الشمري
يزوار على الوعد تلگوني
ــــــــــــــــــ
من البحر صوب النحر افرح ترى بزواري
يم القبر اني انتظر مِيتْ هلا بخطاري
صوتي اعتلى من كربلة حياكم الله لداري
يوم الحشر هذا الأجر وانتم ترى من انصاري
يالاحرار يوم الحشر بعيوني
يزوار على الوعد تلگوني
ــــــــــــــــــ
سيل الجمع ما ينگطع والراية تسبُگ راية
فوج وعدد مني المدد وانظر على المشاية
قلبي انتظر يا هو الحضر وي المواكب هاية
روج الأرض مثل النبض يا شيعتي الوفاية
يالاحرار يوم الحشر بعيوني
يزوار على الوعد تلگوني
ــــــــــــــــــ
دفتر وفة وعن معرفة يسجل حبيب الحاضِر
يملي الأسم حتى الرسم اعرف قلب كل زاير
والبي ذنب قادم محب امسح ذنوبة وغافِر
يگضي الصعب والـ بالقلب والعنده حاجة وحاير
والاسرار مگضية للوافوني
يزوار على الوعد تلگوني
ــــــــــــــــــ
هذا التعب كلة انحسب شكراً لكم خدامي
ماي انفرش درب العطش واسيتوا قلبي الضامي
شاب وكهل طفلة وطفل فرحتوا كل ايتامي
هاي العبي عن السبي هنه الطفنها خيامي
بالاصرار والتضحية تحبوني
يزوار على الوعد تلگوني
ــــــــــــــــــ
تحيون أمر طول العمر لمن اجيتوا لبابي
هذا الوعد والمعتقد انتم يشيعة احبابي
يهل الصدك يهل العشك انتم مطر بعَتابي
مثل القِدم اجرِ الخِدم كلكُم سوّة بِحسْابي
بالإِيثار والمعرفة تواسوني
يزوار على الوعد تلگوني
ــــــــــــــــــ
من اي زمن من اي وطن يتعنى جَاي وعازِم
طاف واسعى عالمشرعة لهاي الزيارة وهايم
لو بس نظر نال الفخر نال الكرامة القادم
من جد وجد قلبه انسعد يوم القيامة السالم
ترى النار ما توصل الخدموني
يزوار على الوعد تلگوني
ــــــــــــــــــ
الشاعر زين العابدين الشمري
كربله انترست ابزوار احسين .. فتحت بيبانها
ــــــــــــــــــــــــــــــــــــــــــــ
گبل لينال الشهــــــــاده ابو اليمه ابكربله
ارض الاطفوف اشتراها رادها مـدفن أله
وصه اهلها بالخدامه وهمه اهل هالمسأله
زلم عدنه ويدري بيهم للضــيافه امشكّله
بالزياره خل تجي الملاين .. حسبو الحسبانها
ــــــــــــــــــــــــــــــــــــــــــــ
عالحدود الخدم وگفو رحبو بخطارهم
خــل تجينه الدول كلها والله ياحياهم
عــــام كامل ننتظرهم لو بده ممشاهم
ياهلا ابكل الجناســـــي ننتظر ملگاهم
سفرة ام عباس تكفي الصوبين .. والكرم عنوانها
ــــــــــــــــــــــــــــــــــــــــــــ
هله بالاحسا واهلها ياهله بأهـل القطيف
هلا بالبحرين كلها وهله بكل زاير شريف
العراق اليوم كله صـــــار ديوان ومضيف
امولمه السفرة الچبیره وکلمن بحضنه رغیف
حسين خدامه تره معروفين .. مشمره ذرعانها
ــــــــــــــــــــــــــــــــــــــــــــ
البصره طلعت كل ثقلها بين مشاي وخدم
اتوزعو نصين اهلها لو مشي لــــو بالخيم
وازدحم درب العماره جِدم ويطگ ابجِدم
والمضايف بالسماوه للكــــــرم رفعت علم
السفره من بغداد والحد الفاو .. مددو جنحانها
ــــــــــــــــــــــــــــــــــــــــــــ
واسط وذي قار تنـطر لزمو احـدود الدرب
الزاد والم كل وكتهم حضرو اكل وشــرب
يخدمون اللي يجيهم من لسان ومن گلب
چنه بين اهله اليجيهم ابد ميحس ابغرب
ابيوتهم صارت موكب زوار .. شيدو بنيانها
ــــــــــــــــــــــــــــــــــــــــــــ
ولد ابو طلبه النشامه والله منهم والنعم
يخــــدمون السنــــه كلها زلم يانعم الزلم
وابـن بـابـل لوتـحــزم بـالتـعــب لامايهم
ديالى لو مليون زاير طَبها ماتطلب دعم
كل سنه وشيعة علي ابو حسين .. فاتحه ديوانها
ــــــــــــــــــــــــــــــــــــــــــــ
حيدر بشار الدراجي
عرش الاميرة
( دخول عرش هند زوجة يزيد الى الخرابة )
ضجّه بالشام وغَرابه
عرش جابو للخـرابه
حاله ماصارت گبل مستغربيها
عرش إلمن والأميره مچتّـفيـها
بالخرابه ، بالخرابه
********************
ليلــه بلـيالـــي الخـرابه ، اليتعب بنصها الصنم
صارت اعله الباب ضجّه ، روّعــت كــــل الحرم
فجأه لَـن داخــــل علينا ، عرش مشيـول وخدم
وكِلنه صدّينـه عله زينب ، بس تذكّـرنــه الخيـم
مو الزينب هالعـــرش مانعْرفه
بيـا عرش ترهم أميـــره مچتّفه
وابتسمنه اعله الأمل من إختفه
تروح حيره وتجي حيره
بيا عرش تــرهم أسيره
إبتسمناله وبچيناله عله إديـها
عرش إلمن والأميره مچتّـفيها
بالخرابه ، بالخرابه
********************
رحت عالباب وخَدمها ، أســـــأل ومتألّــمه
گلـــت دزّتـني الأميره ، منهو هــاي القادِمه
جاوبـَو زَوج الخليفــه ، الأميـــــره الفاهِمَـه
رحت أركض للأميـــره ، العالِمه المو سالِمه
يــــا أميــرة حيدر وخير العمل
تريد اميرتهم تجي تشوف الأهل
هنــا عرفناه العرش المن وصل
على زينــــب طبّـبوها
وتذكِّرت شي من ابوها
خويه يـ ام كلثوم گالت شايفيها
عرش إلمن والأميــره مچتّـفيها
بالخرابه ، بالخرابه
********************
طبّــت وعـرفتها زينــب ، اعليّــه گامـــت وانتچت
ومسحت الدمعه بحبلها ، وهمست بأذني وحچـت
الطفــله التْـوِن سكّـتيها ، وسكّـتي التـوهــا بچــت
لأن تعرفنــــــا الأميـــره ، وخاف تشمَت بينه إجت
گالت احچيلچ خبر واتحمّــلي
هاي چانت خادمه ابّيتي و إلي
هاي دللها شكثر حيـــدر علي
لحّــد يجـــــاوب عليها
اني اجـــــاوب وأعتنيها
لأن محّــد راح يتحمّل حچيها
عرش إلمن والأميره مچتّـفيها
بالخرابه ، بالخرابه
********************
سألت من اي بلد انتم ، يالإجيتو من السبي
گالت إلها من المدينة ، يــاهنِد كل هالعبي
گالت هواي المــدائن ، يــــامدينه بمطلبي
گالت إلهــا من مدينة ، أحمد وطـــه النبي
گالـــــت تعرفيـــن منزل فــاطمه
وحسن وحسين وگمر حامي الحمه
وزينـب الچنــت آنــه إلهـــا خادِمه
گالت إلها آنــه زينب
ماعرفتي وما اتعجّب
النايمه بهاي الخرابه شيبقى بيها
عـــرش إلمن والأميره مچتّـفيها
بالخرابه ، بالخرابه
********************
عالحسين انتي سـألتي ، وراسـه يمكم بالقصر
وعن ابو فاضل سـألتي ، جسمه عالشط ينتظر
وعله زينب هاي زينب ، توني اجيت من اليسر
لطمت بخدها الأميـره ، وگالـت من الله العذر
ركضت المجلس يزيد وتستعر
وگام غطّاها وحچتله يــــا سِتر
تغطّي بيّـه وزينــب بلايــه خدر
وسفه زينب هيچ أمرها
تسولف الناس بخـدرها
آخ لـــــو عباسها يشوف ويجيها
عـــرش إلمن والأميره مچتّـفيها
بالخرابه ، بالخرابه
********************
كرار الجوراني
السيده زينب ع اتخاطب الأمام الحسين ع
نعي مفجع
كـون الـونـيـن اطـيّـب الـجـروح
يـــمـــك اونـــن وَنّـــت الــدوح
ونـصـب عَـزه وصيوان بـالـنـوح
يـحسيـن حـد ما تـطـلـع الـروح
كـون الـونـيـن الحالـك ايـفـيـد
وَنـي عـلـيـك اجـيـب الـبـعـيـد
لاچـن بـعــد هـيـهـات يـاحـيــد
اجروحك ألمهن ماضن ايـهـيـد
كـون الونيـن ايـفـيـد يحـسيـن
چـان ابونيني امـلـي المياديـن
وضـمــاد اسـوي دمـعـت العين
ونــوح دون الـوكـت وكــتـيـن
*------------------------*---------------------*
✍خادم الحسين ع
الشاعر رعد الجريخي
ركضت وكاض ضهري == بگـلب تعبان تدري
اعله كبره حسين يعثر هاي غربه
بنص الغربه وايطـيح == الله اوكـبر ايـصـيح
حسـين اعـليك يوكـف راح گلبـه
شاهد الله عباس == اعله خوك تشمتت ناس
وكلهه ابوجه اخيك مـات صعبه
وحكك خـويـه عـباس +++ مـن يـمـك ولا روح
شيردني لذيج الاخيام +++ وانـت كبالي مذبوح
بنفسـي يا اخي كـوم +++ شبعت اعليك اجروح
ويلي == يم تعب حسـين ابـهل حال
ويلي == كمت اشويه وضهري اتمال
ويلي == كسري اعلـيك ايـهد اجـبال
اخي اخي === قـلـت حيـلتي
اخي اخي === وبانت كسرتي
===========================
اعله راسك صافن هواي === تكوم اشلون وياي
ابـ علي لمن اشيلك حاير امـنيـن
كلـبي ايـنود يـمـك === اشما حط ايدي الجمك
يـكون اليـوجـعك يـندار بحسين
وحك الخوه والبيك=== ميت حركه اعليك
شما باوع لعـينك اصـفگ العين
احط ايدي اعله كلبك === وكلبك شفته مو زين
يوكف ينبـض اشـواي === مـو تعبـته الحـسين
فـدوه كـوم عـبـاس === ونـرجـع احنه الاثنـين
ويلي === وعز اعـيونـك ياخـوو ام عون
ويلي === مـن اتكـوم امـشيـك اعـيون
ويلي === وكلبي الضامي اعليك ايهون
اخي اخي === قـلـت حيـلتي
اخي اخي === وبانت كسرتي
===========================
(العباس )اعليك عباس === رد يمشيب الراس
ترضاهه اعله اخوك انصاحله اوحيد
يسيد وجه الحسين === يشيخ اهل الصواوين
اشيـفـيد المـاي بعدك خويه شيفيد
طلبه وكلـبي اعـذره === اخـيّــك گـــوم مــره
وخل اتشوف ناس ابضـهري اعضيد
شريد امن الله يا خوي === تمشي كبالي بس هاي
وركض اركض للـخـيام === وصـيحـن جبته وياي
علي كول وهسه عباس === تـرد ابـخـير يعـضاي
ويلي === بــعد ادمــوع وحـرگ انـيـاح
ويلي === گـام وگـلـت ابـ خير {وطـاح}
ويلي === منـهـه ومـا بـعـد انه ارتــاح
اخي اخي === قـلـت حيـلتي
اخي اخي === وبانت كسرتي
===========================
الآن انكسر ضهري === وقلـت حـيلـت امـري
وشمت بيه عدوي اكبال وادم
وادم كلهه شـمات === اخـوك اتصـيحلي مات
لا تبقى اعله راسه اتكوم لازم
اشما تحجيله ميكوم === ومن الخـوه محروم
حرمناك امن اعز اخوان هاشم
تسمع يابو فاظل === الحجي هاذه اعله بختك
يخو الماله ضهر كوم === وارجـع دونـه لـختك
وخذوهه كبالي عباس === وبــدوهـااا جـربتك
ويلي === كـسـروو كلـبي اعـليك اهواي
ويلي === ارجـــع لـســكـيـنه ابــلا راي
ويلي === لا جــربــه ولا انـــتَ اويـــاي
اخي اخي === قـلـت حيـلتي
اخي اخي === وبانت كسرتي
===========================
راح ارجع للخيام === ابـ تعب وابعثرت اجدام
واصـيحن مـات ابو فـاظل اطلـعن
امن افرعهه عباتي === يلـطـمـن كـل خـواتي
عليـك امـن البجي لـعـيون يـعمن
طولي هاذه والحيل === يـصيـرن مـاي للخيل
اعله اخوك ارماح بعد اشويه يدون
امن اطيحن يا بوفاظل === خواتك ياهوو الهن
وبعد اشويه الاخـيام === يروحـن خـويه كلهن
خدرهن صعبه يا خوي === يطـلع يـا خـدرهن
ويلي === اعله الـتل زيـنب مـن تطـلع
ويلي === الــ عز كـلـبـك لا مـا تـرجـع
ويلي === واعـله الــخــوه دم تــدمـع
اخي اخي === قـلـت حيـلتي
اخي اخي === وبانت كسرتي
===========================
سجاد ابراهيم الكعبي
حزني عاشور،، عمري منذور
للحسين ومصابه،، دمعي فاتحله بابه،، وللجزع باب
كلها ساعات،، وتعله الآهات
للخيام الغريبة،، وللجسوم السليبه،، الفوگ التراب
كبل لا يوصل محرم ناصب بگلبي عزاء
ونيّتي بهاي الليالي دمع نصرة لكربلاء
بيوم عاشر أدمي راسي وبلطم مالي اكفتاء
هذا شهرك ماكو أعظم عندي من شهرك،، حسين
بهل الليالي ما أدور بس رضاة امك،، حسين
--------------------------
أنه كل عام،، بهاي الأيام
مصيبتك حيلي تهدم،، طيحتك گلبي تلچم،، ضامي عريان
من اسمع الصار،، وانته محتار
مابين خيمة خواتك،، مابين صرعه فراتك،، وانته عطشان
حيرتك بين المخيم والهوه جنب الفرات
وحيرتك بيدك رضيعك جبته لأمه ضامي مات
وحيرتك حرگ الخيام وركضن بهيمة البنات
حيرة ياهي المنهن اكثر شالعه گلبك،، حسين
بهل الليالي ما أدور بس رضاة أمك،، حسين
-----------------------------
اقل شي كون،، أعمي العيون
وناري تبقى بدليلي،، لغربتك فدوه حيلي،، بهذا المصاب
مصابك اچبير،، وهذا تقصير
ما عميت النواظر،، وانته عالشاطي باجر،، تشوف العذاب
آخ يا باجر كسرتك من عضيك يُستجار
وطيحته يعني بعيونك ينگلب ظلمه النهار
ولو هوه ساقي المخيم تبقى عطشانه الزغار
من تطيح الرآية يعني ينكسر ظهرك،، حسين
بهل الليالي ما أدور بس رضاة أمك،، حسين
-----------------------------
كربلة جروح،، ودمع مسفوح
لا مايخلص بچيها،، والسبعة ناحت عليها،، بدمع سچّاب
الزهرة بمصاب،، وفوگ التراب
عدها ابن ويلي عاري،،ظل بشموس الظهاري،، بدم الخضاب
دمعي ويه الزهرة باقي شما بقى بيها ونين
تبچّي كل اهل السمه بشهگتها لو صاحت حسين
وانه ويه الزهرة انوح شما مشت بيه السنين
بيك مفجوعة ولگتّك منگطع نحرك،، حسين
بهل الليالي ما ادور بس رضاة أمك،، حسين
----------------------------------
شلون نرتاح،، وعالرمح راح
راسك ويه السبيه،، وجسمك اعله الوطيه،، بحافر انداس
هااي متصير،، زينب تحير
بالظعن تحدي اجانب،، تالي تدخل خرايب،، جبيرة ياناس
قبل ما صارت يوادم بالعرب هايه محال
الهاشميه شلون تالي تمشي مچتوفه بحبال
اعليها محروگة خيمها وابو اليمه اعله الرمال
عگب ذيج العشرة بالله شلون ودعتك،، حسين
بهل الليالي ما ادور بس رضاة أمك،، حسين
----------------------------------
حسين علي التقي
اللهم أجعل محياي
دمعةً للحسين
في عزاء الحسين
على حب الحسين
------------------------
اللهي أجعل حياتي خدمته وحبه
واجعلني وجيهاً مرتجي بدربه
اللهـي اجعلهُ اول زائـر الـقـبـري
واجعلهُ شفيعي بساعتي الصعبة
اللهم أقبل عذري
ياسميع الدعاء
وألهمني البكاء
على حب الحسين
------------------------
اللهي لا تزغ قلبي عن الخدمة
وخلي گلبي بس حسين ملتزمة
لا تشغلني بالدنيا عن اجروحه
ولا تسلبني دمعي لجرح ابو اليمه
اللهم اشْدُدْ أَزْرِي
بمصاب الذبيح
وأجعلني قريح
على حب الحسين
-----------------------
اللهي لا تُنَسّيني مصاب الطف
وعلى المثلي اللهي بكربله اتلطف
وأشغل كل جواريحي بهوى الحسين
و أزرقني دمع لمصابه ماينشف
اللهم أجعل ثغري
بذكره لهجا
وقلبي هائما
على حب الحسين
------------------------
اللهي أجعلني منن يسعدُ فاطم
لمرضاها مطيعاً خادماً لآطم
ليّن قلبي حينَ العِبرة والعَبرة
وأجعل كفي في كف الهدى لازم
اللهم قوّي على
سعيي للرضاة
وأرزقني حياة
على حب الحسين
------------------------
اللهي أزرقني نصرة آخر العترة
كحّل عيني منه سيدي بنظرة
ثبتلي قدم صدق بظل غيابه
أنتظار ام البنين أرزقني انتظره
اللهم أكحل عيناي
بأمام الزمان
وبهِ المستعان
على حب الحسين
-------------------------
حسين علي التقي
في حق الإمام السجاد( ؏) أيام السبي
عله الغيــرِه السَلام
امگيّد بيــــد اللئام
وينـــــــه الي رافگني ويگلّي بسلامه
هاظمنِي امشي اويا العده وبلا كرامه
يرمي ابڪلامه سهَام
ذاك الذبَـــــــــح إِِمام
ــــــــــــــــــــــــــــــــــــــــــــــــــــــــــــــــــ
شايـِــل خلگ گد الأرض بس يا هظيمه
علويه وترافگ كفُــــــر امصيبه عظيمه
لكنــــــــــــها هيبتنه كفو تمشي حليمه
اتردد باسم عبـــــــاس ثورَه مو سليمه
الگـــالت اذلّ اشام
گول وفعِل تــــمام
مشتريــه عزّه الها تصَافحها الشهامه
محروسه بت حيدر نيَاشين الفخَامه
عله الغيــرِه السَلام
ــــــــــــــــــــــــــــــــــــــــــــــــــــــــــــــــــــ
تمشي الأميره بالضعن اتصفي الحساب
حسين هو حسينها وتــــــرجع للمصاب
اتگلي عمــــــــــه اليسر مايرحَم أحباب
وجهي اديره امدنگه ماتشوفـه الجناب
الشرف أكبـر وسَام
ماريــــدن أي مقَام
نتــــــوڪل اعله الما إله ابداً ختــامه
ونشهگ عشگ حيدر علي ابو الإمامه
عله الغيــرِه السَلام
ـــــــــــــــــــــــــــــــــــــــــــــــــــــــــــــــــــــــ
مرَاكض بنات حسين وسط الحومه هزني
وهاج الحـــــزن بيمن تلوذ وظهري مَحني
دامي السمِه إِبراس ابوي اگبـــــالي هَدني
وجْزع مصيبه امچتف اعله النـاگه سبني
الدنــــيه چن ضَلام
جرح وحـــــزن ألام
ابچف الزغار من الحبل صارت عَلامه
بُعــــــد المسَافه جـرح اخدود اليتامه
عله الغيــرِه السَلام
ــــــــــــــــــــــــــــــــــــــــــــــــــــــــــــــــــــــ
ابذمة كفر نمشي انـــه وعمتي سبايه
انلم بالحزن نشگف سياط من البدايه
انچن باليتامه ومستعز بيـــها الرعايه
ابوكت الضلام بلا ضوه نفرش عبايه
ابدمي ســـــرَه الإلهام
أحرص ابروحي ايتام
ابطيفي اذا مرني العزيز ابلايه هَامه
يجيني ويشوف الخِـــدر كلهن نيامه
عله الغيــرِه السَلام
ـــــــــــــــــــــــــــــــــــــــــــــــــــــــــــــــــــــ
ابوجه الليالي نـــوگف انسولف حزنه
ننعى سويّـه امصاب ابواليمه سندنه
ذبلن اعيوني ما اشوف الطف عمتنه
والناگه هزّله اعثـــر وطيحن عذبتنه
نبات ابلا خيـــــــــام
ينــــــظر علينه العام
ياريـــــت عم الساده ذاك ابو الجهامه
ايحَشم الهاشم تجـــــي تحظر عمامه
عله الغيــرِه السَلام
ـــــــــــــــــــــــــــــــــــــــــــــــــــــــــــــــــــــــــــ
الشاعر: حيدر مكي النصاري
¹⁷محرم ¹⁴⁴⁷
مولاتي العليلة ع
راح أنتظرك ،، وأصبر ما باليد كل حيلة
يذبح هجرك ،، تدري بحالي وآنه عليلة
يـدواي وبـفراگك علتي
راح اشتاگ لچلمة بنتي
يارب صبرك،، تدري بحالي وآنه عليلة
-----------------------
آخر ليلة حد وجه الصبح أنطر
گعدت انه وخواتي بسفرته انفكّر
نسيت العلة گد ما گلبي مستبشر
گلت هسه ابوي بهودجي ايحضّر
من الفرحة ماحل نومي
يم ارقية امخليه هدومي
وانطر فجرك،، تصعدني من قبل العيلة
-------------------------
خـلّـص لـيـلـي وانـه لهاي ملهوفة
يجي باجر واخلي چفوفي بچفوفه
أشبگتني ودمعتك يابويه مذروفه
أحجي بگلبي كتلك كبرت الخوفه
من گتلي بهاي تعذريني
گتلك أكدر ياضيّ عيني
لا ما أتعبك،، والرايحله أكدر أمشيلة
---------------------------
حسيت برحيلك ماله أي رجعة
لأن آخر نظرتك جانت بدمعة
حلفتك اخذتي بداعت البضعة
ساكت بس أنينك سمعته السعبة
لونك يتغير كل ساعة
وصَبّرت بگلبك وأوجاعه
گلبي يعذرك،، الله وياك وكل تسهيله
--------------------------
گـتـلـك راح أتاني منك اخبارك
ودارك يعني گبري بغيبتك دارك
خليلي اعله بختك واحد امبارك
بعد حزني وهمومي ويامن اتشارك
يالماخذهم كلهم غفله
خليلي امبارك عبدالله
بي من عطرك،، بفراگك يابويه أشكيله
---------------------------
الهوى يخنگي بويه بالنفس جارح
أحـس بـهـذا دربك للـذبـح رايح
شفت الغربة بعيونك وألم سارح
تـصـدلهم عطاشة والظعن نارح
وتصد لظعنك بالهيمة
وزينب محتاره بلا خيمة
ينزف جرحك،، وحوافرهم بويه ثگيلة
----------------------------
حسين علي التقي
حيرة مولاتي ام البنين ع
والله حيرة
من تروح اعزاز گلبك
وعازتك الهم جبيرة
والله حيرة
بهل الظعن كلمن تحبه
رايح وتعرف مصيرة
والله حيرة
من تظل بعازة أهلك
الدنيا بعيونك زغيرة
من گلبك ايگرّصك عليهم
بكل دمعة تتذكر حچيهم
بس تدري مامش رده ليهم
الفراگ اشلون. كابوس احلام
كل لحظة اتصير. بفرگاهم عام
--------------------------
بسد ضياعك
اتاني ياگلبي بهجرهم
ودمعك ابليلك متاعك
بسد ضياعك
حته بيتك هم يغربك
تحس گاعك ماهي گاعك
بسد ضياعك
تخيب كل آمالك گلبك
وگلبك اعله الغربة طاعك
بكل مغربيه ايضيع حيلك
و ايوشّـل الـدمـعـات ليلك
تـتـمنه يـم بـابـك خـليلك
من يلفي الليل. ماتدري لوين
يزرعك بالشوگ. وتزگيك العين
-------------------------
شلون بلوة
أبـالــك ايـام الـمـحـنـة
وتبقى بس للماضي تهوة
شلون بلوة
ابيت الاحلام التحبهم
تبني تطلع گاعه رخوة
شلون بلوة
من تعيش ايام سودة
ويمر طيف ايام حلوة
شيمحيها بالراس التفاصيل
الخلت نهاري يشابه الليل
الخلت احلامي نار وصهيل
من تغفه تشوف. وين اليآذيك
تگعد مجبور. الهم ايبچيك
-------------------------
أمنياتي
هودج بظعن الفواطم
وياهن اگضي كل حياتي
أمنياتي
اشگف اسياط ويه زينب
وبالسمش تحمرّ عباتي
أمنياتي
بالخرابة ويم رقية
أهناكه لاگتني وفاتي
أمنيتي جانت امشي اسيرة
ويه زينب ادخل ديرة ديرة
وبالشام لحظاتي الأخيرة
هناك اتمنيت. بطبت الظعون
بدروب الشام. ميته ويه ام عون
------------------
شلون دنيا
هاي بالله شلون دنيا
تنسبي الجانت أميرة
شلون دنيا
تروح حرة بعز خدرها
وترجع بهزلة أسيرة
شلون دنيا
الخلت ام عون لوحدها
بلايا خيمة ولا عشيرة
هالدنيا من تفتر هضيمه
تخلي العزيزة بلايا خيمه
ومشتها ويه الماله قيمه
دنيا ويه ام عون. ماخلت حيد
المهيوبة شلون. تدخل ليزيد
---------------------------
حسين علي التقي
مولاتي أم البنين ع
آنه ام البنـيـن ودمـعـي يـهـلـي
رافگني الحزن من شالو أهـلـي
بليلي إيوچ حنيني
لحسيني وبـنـيـنـي
---------------------------
آنـه أم الـفـاگـدّه اظعـون الـمـحـنـه
من المدينه روحي شالت ويه ظَعنه
بصبر يايعقوب چم يوسف أتـانـي
ايرد قميص حسين حلمي وأشمنه
أتاني اثمنطعش كوكب مشالي
والبظعنه مشو كـلـهـم غـوالـي
يبارحـنـي ونـيـنـي
لحسيني وبـنـيـنـي
----------------------------
حيـلـي راح امن السهر ومن المتانه
ضوه يثرب راح ظعنه وشح ضوانه
تـغَـربت دور المدينه أخـلاف وجهـا
يـا وطـن يآمنه وحسـيـن الچـفـانـه
بـعد يا وطن والـشايـل وطـنّـه
أنه وبيتي عگب حسين ضِعنه
الأمـان أمفارگينـي
لحسيني وبـنـيـنـي
----------------------------
بليلي أصفن عالنجم وأذكر خطاهم
وصرت أگله ريت انه نجمه بسماهم
يانجم لـيـل الظعن أعكسلي صـورة
خل أشوف شحالهم شنهي الدهاهم
ينجم الليل دليني بـمـكـانه
ومشتـاگه أصد لعيونه آنه
شگد عطشانه عيني
لحسيني وبـنـيـنـي
-----------------------------
آنه كـل عمري نذر أبقـى بخدمته
ولـو أمـرني بالبقاء أخدمـلـه بنته
بالنيابة عني گلت لولـدي خـدمـوه
طيحو دونه ولا تظل بالغربة أخته
طيحو گباله كونه يرد سالم
ولايبقى الظعن بالهيمة هايم
المهم سالم يجيني
لحسيني وبـنـيـنـي
----------------------------
شگد يحبون الحسين وبيهم أدره
وخوفي ليقصرون وياه ولو ذرة
أنه مربيتهم نـذر بـس لخـيـامـه
بيهم أفخر حته يم فاطمة الزهرة
ميقصرون أدري عن نصرته
بس خوفي ترد مسبيه أخته
وسبيها يعمي عيني
لحسيني وبـنـيـنـي
-----------------------------
حسين علي التقي
للحزن هاشم بنت صيوانهه
والعّلي السجاد يوم أحزانهه
~
اليوم من شجرة محمد چن فرع
فارگ الدنيا اوعليه هل الدمع
مات من كثر المصايب منفجع
وحزنت اعليهه الارض واكوانهه
~
المر على السجاد ما شافه بشر
آه يا حاله شعمل بيه الدهر
چم گلب هاليوم لمصابه انكسر
الدار هاليله انهدم بنيانهه
~
زين العباد المرض هد حيله
اولا اخو ظل عنده وإيتچّيله
راحه ما شاف ابنهاره أو ليله
وكربله بروحه دوت نيرانهه
~
شنهي حاله ألعاش لوعات الطفوف
وشاهد العباس مگطوع الچفوف
بعينه مرسومه بقت ذيچ الحتوف
والمصايب بالگلب نيشانهه
~
عينه بالدمعات ظلت سايله
عاشت ابروحه مصيبة كربله
شاف ابو اليمه طريح اعله الفله
عيونه سالت بالدمع نهرانهه
~
آه من زينب مشت وي الغرب
ظل علي السجاد مجروح الگلب
عالغيور شلون هالموقف صعب
ضاع ميزان العدل واوزانهه
~
خل نواسي فاطمه اعله اولادهه
فگدت العتره علي السجادهه
والسمه تبچي اعله زين اعبادهه
وسدت شيوخ العرب ديوانهه
~
حيدر بشار الدراجي
هله تنگل هله
صاحت كربله
يزوار الحسين
يزوار الحسين
ـــــــــــــــــــــــــــ
فتّحت بيبانها.. وافرشت ذرعانها
كربلاء.. كربلاء
توسعت للزاير .. محد يظل حاير
كربلاء.. كربلاء
من گلب ولسان نادت هله بــــــزوار الغريب
الحـمدلله عـالسلامه ليش طولتـو المغيـــب
عام كامل انتظركم جرحي بيكم خل يطيب
احمد الباري الرزقني وصار الي بيكم نصيب
هلا ابهذا الـــــرزق
گعدنا اعلى الطرق
يزوار الحسين
يزوار الحسين
ـــــــــــــــــــــــــــ
الله خصها بهل رزق ٠٠ قبله صارت للعشق
كربلاء.. كربلاء
هالكره الارضيه.. شدت اله النيه
كربلاء.. كربلاء
موسم الحجاج مره اتـــــلث ملاين العدد
وهيئة الحج والوزاره اتحير وتريد المدد
واحـــنه كل هاي المواكب سهله مابيها شدد
اسبعطعش مليون زايـر كربله صارت مهد
يحيرون العقل
ولا واحد يمل
يزوار الحسين
يزوار الحسين
ـــــــــــــــــــــــــــ
كربله چنها الحسن.. تنطي ماتطلب ثمن
كربلاء.. كربلاء
سفره بيها تنفرش.. الأكل منها ينـتـعش
كربلاء.. كربلاء
چن مضيف الحسن صارت ماتشيل اسماطها
كله تــــخـسر من تــــــزامط كربلاء بزماطها
السفره ابـــــوجــسام بيده چنه هوه الحاطها
عالارض بـيـده الكريـمه ابـــــو محمد خاطها
تِسد عين الشمس
وابــــد ماتنطمس
يزوار الحسين
يزوار الحسين
ـــــــــــــــــــــــــــ
طلعت المشايه.. رايه تسبگ رايه
كربلاء.. كربلاء
على الباري اتوكلو.. لبو اليمه اتحزمو
كربلاء.. كربلاء
خلو الدنيا بظهرهم واختلف حسبانهم
فرغت بيوت الخدامه واغلگو بيبانهم
رادو الخير الربعهم فزعوا جـــــيرانهم
للمضيف وللضيافه حسين هوه الجابهم
يخدمون بصـــدگ
وگلبهم محــــترگ
يزوار الحسين
يزوار الحسين
ـــــــــــــــــــــــــــ
هالمواكب والخدم.. نصبت اهناك الخيم
كربلاء.. كربلاء
عدها مو من العمر.. هاي ايام وتمر
كربلاء.. كربلاء
والله من تـرجـع لهلها تـشبع احزان وقهر
وتنتظر للسنه الجايه وتنتظر شهر بـشهر
صارت الهم هالزياره رزق من رب البــشر
كل سنه وتطلع ربعنه امن البحر حد النحر
بصحن راعي العلم
يگعدون الخدم
يزوار الحسين
يزوار الحسين
ـــــــــــــــــــــــــــ
حيدر بشار الدراجي
كون ايطــول بينه الگاع ممشاها
وعسن ياشام ارضچ ما وصلناها
ـــــــــــــــــــــــــــــــــــــــــــــــــــ
بثگل حزني مشيت بلوعه وبحسره
وعفت النعمه فـوگ الگاع متطشره
انه العفت الأهـــل متوسده عالغبره
ضحــــايه امخضبه ياوسفه بدماها
ـــــــــــــــــــــــــــــــــــــــــــــــــــ
عسن درب السبي ماتخلص أيامه
انه بروس الهــواشم رافعه الهامه
عگب فرگاهـــــم آنه الليل مانامه
شيگضي الليل عالعافوها ولياها
ـــــــــــــــــــــــــــــــــــــــــــــــــــ
اموت اولا اطب الشـــام مسبيه
وعيون الأجـــــانب تنظر اعليه
ويگلولي علمــــــكم وين راعيه
اگول الهُم كفيلي العُهده ادّاها
ـــــــــــــــــــــــــــــــــــــــــــــــــــ
کون الشام ابد ما نوصل حدوده
شماته شگد سمعت هناك موجوده
اظن بالصبر موش بحبل مگیوده
وساعات الصبر للشده ردناها
ـــــــــــــــــــــــــــــــــــــــــــــــــــ
اخاف اعله رقيه تموت لو خوله
وتنعاد المصيبه والبچـــــي يعله
ومصاب حسين بيه حيل ماخله
ولخوتي العين ابد مانشف مجراها
ـــــــــــــــــــــــــــــــــــــــــــــــــــ
حيدر بشار الدراجي
هالمــــــــواكب والخيم بالاربعين
فاتحه ومنصوبه لجلك يا حُسين
ــــــــــــــــــــــــــــــــــــــــــــــــــــ
آنه زينب واعتنيت الكـــــربله
بربعينك والمدامـــــــــع هامله
وشفت وادم للخدامه امشكله
وكلهـــــــم اينادون للزاير هله
وبمحبتك يبو اليمه هــــــــايمين
فاتحه ومنصوبه لجلك يا حُسين
ــــــــــــــــــــــــــــــــــــــــــــــــــــ
هاي فاتحتك يبن حامي الحمه
ظلت آلاف السنين وقــــــائمه
ماتطيح وخـــدم عدنا امحزمه
من تخلص ادموعهم تبچي دمه
خــــــويه بيك من الازل متعلّقين
فاتحه ومنصوبه لجلك يا حُسين
ــــــــــــــــــــــــــــــــــــــــــــــــــــ
يالبقيت اعلى الثره ابحر الهجير
وبالدفن شالوك ياخويه ابحصير
ياچبير الســــــــاده يا أبن الامير
هــــــــاي فاتحتك مثلها مايصير
الســـــــــاده والعوام بيها قائمين
فاتحه ومنصوبه لجلك يا حُسين
ــــــــــــــــــــــــــــــــــــــــــــــــــــ
عِرف كلهم وابد مـــابيهم غريب
مثل يومك هالامر خويه عجيب
من ينصبون الخيم عالم رهيب
تبدي بالفرحه وتخلص بالثغيب
ومن تطيح اخيامهم يبدي الونين
فاتحه ومنصوبه لجلك يا حُسين
ــــــــــــــــــــــــــــــــــــــــــــــــــــ
شلون بيهم من يهـــــدون الخيم
خويه واحد يشبك الثاني الخدم
كل دعــــــــاهم ربي ثبتلي القدم
اعليك بالعباس شــــــــيال العلم
على هالخدمه نظل طول السنين
فاتحه ومنصوبه لجلك يا حُسين
ــــــــــــــــــــــــــــــــــــــــــــــــــــ
حيدر بشار الدراجي
من ترف الراية
حانت المشاية
ــــــــــــــــــ
من ترف راية ضريحك بالسما للعالي
يعني ننصبها المواكب للخدم يالوالي
تجي ازحوف لكربلائك سيدي يالغالي
كل سنة تزود المواكب بالزمان الحالي
نعمه منك هاية
حانت المشاية
ــــــــــــــــــ
كعبة للزوار گبرك من تجي وتطوفك
الف عمره والف حجة ازيارتك بطفوفك
تصيح لبيك وتردد هالجموع احروفك
تمسح بعطفك عليهم وبحنان اجفوفك
تقرأ ليهم اية
حانت المشاية
ــــــــــــــــــ
الملائك بأربعينك تنزل وي انصارك
تعزب وي اهل الخدامة ترحب بخطارك
بالكرم بيبان صحنك تنفتح كل دراك
وبالشمس مولاي انته تضلل لزوارك
ضللت بالصاية
حانت المشاية
ــــــــــــــــــ
لهفة مشاية بطريقك بالعشگ خدامك
بيوتهم تخلى ويجونك لان تخلى اخيامك
هالمواساة لجنابك ولعظيم أيامك
هالمشي بلكت يخفف سيدي من أسهامك
درعك احنه وثاية
حانت المشاية
ــــــــــــــــــ
المواكب سفرة وحدة والخدم جف واحد
هذا يعمل ذاك يطبخ ماكو واحد كاعد
كلها قادة بالمواكب مو فقط بس قائد
حسين سلطان اليخدمة والعشگ بي شاهد
شاهد الحب غاية
حانت المشاية
ــــــــــــــــــ
يالطريقك جنة الله الخدم كلها بخيرك
هذا مايك هذا زادك كله من تدبيرك
هذا من جيسك حبيبي وماكو منة غيرك
تروي كل عطشان گاصد من عذب مي بيرك
وبثوابك ماية
حانت المشاية
ــــــــــــــــــ
حسين مشاية لحضرتك تمشي لجل اعيونك
ولجل زينب بالمسيرة من مشت بضعونك
حرم واطفال بطريقك والله ما ينسونك
ازغار واكبار وشباب بدربك يگصدونك
الك جم اولاية
حانت المشاية
ــــــــــــــــــ
هلا بالزوار انته تصيح بأجمل صورة
ستبشروا زوار گبري أذنوبكم مغفورة
يالبذلتوا بأربعيني أجهودكم مشكورة
الزارني باجر أجيلة بگبرة روحي تزورة
هالعهد بحجاية
حانت المشاية
ــــــــــــــــــ
الشاعر زين العابدين الشمري
( آخر ليله للامام السجاد قبل مماته مع ولده الباقر عليهم السلام )
غمّض عينه ، و مد چفّينه ، وگال حچايه
كــون الأكبر ، لــو عبدالله ، الــيوم ويايه
*****************
خلَـص آخـــر فـرض للزين والعـــــابد
و حَل فرض الممات الحضرت الساجد
تذكّـر كــــل اخــوته ومـــاعبــر واحـد
وبچـه وهنـــا عرفتـــه تذكّــر الـوالــد
گال اتمنّيت اخواني يحملوني
گال اتمنّيت اخواني يغسلوني
گال اتمنّيت اخواني يدفنـوني
نـزّل راســه ، وظل إحساسه ، يقــره بهـايه
كــون الأكبر ، لــو عبـــدالله ، الــيوم ويايه
*****************
ثلث مرات اغمه اعليه وفز غفله
تخيّــل گـلّي لو ويّــانه عبــدالله
چان ويّـاك شــال جنازتي وصلّه
لكن يــا حلم أمشيـله ونحصله
عبدالله تخيّــل كبــران ويـــانـــه
ياخذني الگبري ويمشي بممشانه
يقبّل تـابوتي بشفتـه العطـشـانه
عمكم ريتـه ، وتمنـيـتــه ، يرتّــل آيـه
كــون الأكبر ، لـو عبدالله ، اليوم ويايه
*****************
يمحمّـــــد يگـلّــي آه يمحمّــــــد
أنسه يــامصيبـــه بكــربله وأبـــرد
يمحمد أمــوت ومـا أنسه المشهد
من يركض شمر فوگ الصدر يصعد
مشهد من حسين ينـــازع شفتـه
ويركض شمر گباله ويرفس جثته
ويقبض بلحيتـه گبال عيون إخته
شفناه گاعد ، فوگ الوالد ، آه يــربـايه
كــون الأكبر ، لـو عبدالله ، اليوم ويايه
*****************
يمحمّـد يگلّـي جسمي تــاليتـه
ينزل گبــره كـامل بيد اهل بيته
ابوي انه بحصيره جسمه خلّيته
ومثل الـزاد من الگـــاع لمّـيتـه
لمّيت حسين شويّـه عله شويّـه
ودوّرت ضلـوع أندلـهـا وماهيّـه
وشي ويه الحافـر راحـت مسبيه
ضيم البيّـــه ، صار شويّــه ، الچـان هوايه
كــون الأكـبر ، لــو عبدالله ، اليــوم ويـايه
*****************
يمحمّـد يگــلّـي رحمـة البـــاري
يابويه أمـــوت وانتـــو بأكتـــاري
يمحمّــد ابــوي وانتـــه بي داري
ثلث تيام جسمه عله الترب عاري
ياوسفه حسين بفزعه يطشرونه
ياوسفه حسين بفزعه يلـمّــونه
ياوسفه حسين بفزعه يدفنــونه
وحدي وبيدي ، شلت عضيدي ، شنهو الغايه
كــون الأكبــر ، لـو عبــــدالله ، اليــوم ويايه
*****************
كرار الجوراني
وَمَا مُحَمَّدٌ إِلاَّ رَسُولٌ قَدْ خَلَتْ مِنْ قَبْلِهِ الرُّسُلُ أَفَإِنْ مَاتَ أَوْ قُتِلَ انْقَلَبْتُمْ عَلَى أَعْقَابِكُمْ
هذا النبي بدمعة يصيح
يوليدي يحسين الذبيح
تالي امتي انگلبت عَلَيَ
وباجر ترة دمك تُبيح
رسول الله اشكثر وصاهم اعله حسين
هذا ابني ونفس ريتي ونضرهه العين
اكتلوني أنه قابل واجرعة السم
بس حسين وعيالة شنو مسوين
الوصية اعليكم وادري
تنقلبون على بزري
وتنجمعون ضدهم سيف
دم حسين من دمي
البيه يصير مو همي
اليهمني حسين آآه يا حيف
حسين ااه
اقْتَرَبَتِ السَّاعَةُ وَانْشَقَّ الْقَمَرُ
بوية حسين جرحي سهل
فدوا العمر خلني انكتل
بس الجرح باجر سحگ
بصدرك فرس يسحل سحل
يوليدي عمت عيني عليك اهواي
عگبي تموت جبدك يابس اعله الماي
لا ناصر يجي ينصرك تضل وحيد
فوگ الغبرة تالي تموت ماكو فياي
طبرت راسي والجتال
راح تصير تالي انبال
ويشلع گلبك الحافر
علي وابجيلك ودمعي
يبوية تصيح جا ضلعي
يكاسرني الضلع كاسر
حسين ااه
إِنَّا أَعْطَيْنَاكَ الْكَوْثَرَ فَصَلِّ لِرَبِّكَ وَانْحَرْ إِنَّ شَانِئَكَ هُوَ الأَبْتَرُ
وليدي حسين دم الگلب
ضلعي انكسر من الضرب
مو بيدي لو بيدي اضل
ولا باجر تعيش بغرب
يوجعني الضلع يمة وعليك اندار
واشوف بعينك الغربة وتضل محتار
وانت زغير يا جبدي وغريب تعيش
ونفس الكسرة يا يمة وهذيج النار
باجر نار بخيامك
تطحن خيل بعضامك
وتتلفت على النسوان
اجيلك يمة واتعثر
تحجي تريد ما تگدر
زينب راحت الديوان
حسين ااه
قَالَ سَنَشُدُّ عَضُدَكَ بِأَخِيكَ وَنَجْعَلُ لَكُمَا سُلْطَانًا
حزام الضهر يابو علي
نعم الاخو ونعم الولي
جبدي طلع من الوجع
وانت التگول شباقي الي
هسه انت حضرت بموتي والهظمة
منو يحضرك وقتهه اهناك وتحشمة
تلم الحيل بس توگع على سهامك
السهم جازي الصدر من ضهرك تلزمة
ياخوية القدر مكتوب
فوگ الغبرة تبقة تلوب
وكسرك واضح بعينك
الا من ناصر ويفزع
وزينب بالفلة تطلع
حرگوهه الخيم وينك
حسين ااه
يَا أَيَّتُهَا النَّفْسُ الْمُطْمَئِنَّةُ ارْجِعِي إِلَىٰ رَبِّكِ رَاضِيَةً مَّرْضِيَّةً فَادْخُلِي فِي عِبَادِي وَادْخُلِي جَنَّتِي
عگب السحگ عگب الرمح
بألف وتسعمية جرح
غير العطش غير الوذر
ارجع أنه تالي بذبح
ملك الموت ما يگدر يگول منين
اكض الروح هو شباقي عد حسين
مطحونة ترة اعضامة ولحم مشلوع
بس موقف شدهني بهجمت الصوبين
من طلعن خواته اندار
شاف خيامة بيهه النار
يا ضيعتنه اخته تصيح
ماباقي عظم منه
وخوات حسين يردنة
يوگف بس يرد يطيح
#محمد فرج الحريشاوي
#شجاعة_قمر_الهواشم #شوط_كربلائي
يــوم الـجـــرد الـبـــتــــار رجـفـهـه الـزلـم والخــيـل
تعنه لـسـاحـة الــمــيــدان وصاحوا مـن بعيد ادخيل
*---------------*---------------*
يـعرفـون الـگـمـر عـبـاس زوده امـجـرب اوسـيـفــه
مايخطي الضرب بالروس وطـبـعـه ايـلـگـط ابكيفـه
مـن يــوم الـحـسـن لليوم يـتـانـي يـاخـذ ابـحـيـفـه
مـــا نـــاســـي هـــذاك الـــيـــوم
يـذكـــر دفـــنـــت الــمــســمــوم
عـــبـــاس ونـــــزل لـلـــــگـــــوم
نــهـار الــعــاشــر ابــزوده عــلـيــهــم بــدّلاه ابـلـيـل
*---------------*---------------*
قــيـامـة كـربـلـه قــامــت بـطـل وتـخـيّـل الـحـومـه
يـاهـو الـگــابــلاه ايـمـوت ابسيفه ايـشـوفه محتومه
شـيّـال الـعــلــم مـذخــور ٱلْــهـٰـذ الـمـوقـف اويـومـه
إحــــــزام وظــهــر لــحــســيــن
حــــيــــد و لازم الــصــــوبــيــن
إتــفــر الــــعــــســــاكــــر ويــــن
راواهــم يـمـيـنـه الـمــوت يشـبـه نـفـخـة ٱسـرافـيـل
*---------------*---------------*
كلها اتحيرت هــــالــيــوم وزلـمـه الثـبـتـت اجدامـه
إجـاهـه امسرفن الـذرعان ورخّـه ابـحـومـتـه لْـثـامـه
مبخوت الـسـلـم مبـخـوت و فــر امـدنّــگ الــهــامــه
الـوصـلّـه ابـروحـه مـا يــســلــم
ســـيــــفــــه لـلــعــده امــعــلــم
جــمــعــهــم يــعــرف ويــعــلــم
صـولات الگـمـر لـو صـال غـضـب وٱتـنـزّل السجيل
*---------------*---------------*
شـبـيـه المـرتضى الـكـرار الـضـربــه او لا يـثـنّـيـهـه
الـمـراجـل تـشـهـد لعباس وٱتـلـوگ اعـلــه راعـيـهـه
الـرايـه اتـفـاخـرت بِـسمه تـرف وحـگـهـه منطـيـهـه
بـــــركــــان انــفــجــر بــالــــزود
وتــفــخــر رايــــتـــه والــجــــود
مــشــهــود الــفــعــل مــشــهــود
هــذا الــيــشــبــه الـكـرار خـالسهه الـزلـم والـخـيـل
*---------------*---------------*
للعـسـكـر طـلـع مـغـضـب ونـار الــغــيــره بـعـيـونـه
عـلـيـهـم تـيّـه الـمــشــراد ودخـيـل الـكـل يـنـادونـه
ما يـرحـم ضـرب سـيـفـه أبـــو فـاضـل يـعـرفـونــه
مــحــد يــــقــــتــــرب يـــگـــدر
مــــن ســيــفــه الـسـلـم يُــنــدَر
وارث مـــــرجــــلــــــة حــــيــدر
صـگــار الــزلــم مـعـروف خـلّاهـه الـرگـاب اتـسيـل
*---------------*---------------*
✍️خادم الحسين ع
الشاعر رعد الچريخي
أستجداء الدموع من مولاي الرضا ع
يمولاي الرضا ادخيلك عبدك گاصد اعتابك
دخيل برئفتك مولاي طالب حزني من بابك
تحّيي محجر اعيوني بنظرة برئفة أعجازك
يمهيج اصل المصيبة
اطلب دمـع للـغريبة
يالضامن اضمن دمعتي
حزني بس بابك يجيبة
عبدك يتاني طلبته ابابك دخيلك
هالعين مدمعها برد جاي اشتكيلك
حزمني شو چنه برد گلبي لحزنكم
يصحه بضمانك سيدي بس مدله ايدك
ياسيدي الرضا ياسيدي الرضا
------------------------
عـزائـي استفتحه بذكرك واتذكّر مواساتك
اشوفه بس حزن عمرك من اقره برواياتك
گلت يبن شبيب أبچي وسالت قبله دمعاتك
يبن شبيب ابچي كتله
كلمن يحب هذا فعله
هالعين المن وجدها
لو ما بچت بيها علّة
هالعين چاا شنهو نفعها بالله هالعين
لو ما نزل منها دمع لمصاب الحسين
والبشر لو ما كسر گلبه لهل المصيبة
مـعـنـاهـا ماعنده گلب لاذمة لا دين
--------------------------
حرگتك للطف ابغيرة وتخلّص مأتمك حرگة
انطيني غيرة يا مولاي لأم اخيام محترگة
خل اسحگ شكو بيه للي اضلوعه منسحگة
خليني أبچي لغربته
الطلعت خواته بذبحته
ودارت عيونه لخيامه
وشافاها محترگه بأخته
غايّرة اعيونه لخيمته وشالته غيرة
وما شاله حَيله لرجعته شيخ العشيرة
گام و وگع فوگ الوجه من شاهد أخته
تطفي الخيم واهل الخيم مذهولة حيرة
--------------------------
گـلـت يبن شبيب ابيوم أبچو للبقى وحده
الـظـل يتلفت بهيمة لا صحبة وأهل عنده
الصاح ورد صدى صوته وآلآف العده ضده
ناده ادركوني يصحبي
وماعنده نـاصـر يّلـبـي
وبـس العليل ابخيامـه
وأخته على حاله تربي
ظـل بـغـربـتـه ويـنـتـظـر واحد يهدله
حـشّـم اخـوتـه ولـلأسـف محد فزعله
وبـيـن الـنـهـر ومخيمه حيرت عطاشه
يوصل الماي وماشرب خايف عله أهله
------------------------
بچيكم واللطم مولاي حِچّة اعلينه عفتوها
لأن ام الحجج فاطم كل مجلس تشوفوها
دمعها شما يطول انتم تذكروها وتواسوها
چيف الي ذبحو ابنها
دايم عزاها وحزنها
وانتم بچيتو لبچيها
اعله الي تغرب ظعنها
الـطـلـعـت تنادي يـأم حـسـن ليه تعالي
يـايـمـه شـوفـي كربله اشسوت بحالـي
خواني طريحه اعله الارض وانه غربيه
حـرگـو صواويني ورگض فـرت عيالي
------------------------
حسين علي التقي
مولاتي الزهراء ص تخاطب المواسي
بأيامي الـحـزيـنـه
وينه اليدمي عينه
آنه ام الـمـصـيـبـة
واليبچيلي اعينه
---------------------
هلّت ليالي الفاجعه
و اوليدي باجر مصرعه
كلمن يجيني بمدمعه،، دموعه ذخر
واليبچي عيني تشاهدّه
اليقرالي ماني الوالدّه
اليسعدني باجر اسعدّه،، يوم الحشر
اليحضر المجلس ويهمس بگلبه الحزن
واليواسيني ينطيني دمعه اعله الأبن
بالـقـيامه أجـيـلـه بـگـلـب مـطـمـئـن
بهل المجلس عبرتي
لحسيني ومهجتي
اليحظرله مواسي
مشمول بـنـظـرتـي
------------------------
أجر الدمع ماينوصف
واليتعب بأجره ضعف
بسيماء وجـها ينعـرف،، كلمن نِحَب
لا تهتم لكمن حچه
وتذكر أبني شگد بچه
من طاح اخيه وانتچه،، ظهره انحدب
تذكر امصيبة ابني وحيد بـغـربـتـه
خلصو اصاحبه واخوانه ظل بحيرته
ينادي هل من مناصر وشحت نصرته
بمصيبة حبيبي
المن جرحه مشيبي
اليّنصرني بدموعه
أجره من نصيبي
--------------------------
شهر النوايب خيّمتي
بهاي المجالس نصّرتي
ما ينحرم من نظّرتي،، كلمن جزع
سلماً لمن سالمكم
وين العليها منفطم
لمصيبة احسيني بهظم،، گلبه انفجع
وينه اليدور ويـنطر لـشـهـر الألم
وينه اليناصر وشاعر بحرگ الخيم
دمعته بعينه لحسينه ولراعي العلم
بس همه عزائه
ومابطل بُكائه
دمعته ويه أمامه
وعايش كربلائه
---------------------------
خدام يالعدكم علم
احظر عزاء المنلچم
ابني البقه بلايه هدم،، فوگ الترب
احظر بضلعي المنكسر
ما أكدر الطم عالصدر
وتدرن خدي منسطر،، من الظرب
مثل المضيعيه ادور بواچي المنجرح
بكل عزه حاضره ودمعتي لا ماتشح
وينه اليهل دموعه على ابني المنذبح
يبقى دمعي حاظر
للـمـا ظـلّـه نـاصـر
وتنلچمني ضلوعي
من اسمع بالحوافر
--------------------------
حسين علي التقي
عله الغيــــــــرِه السَلام.
.
حسين اول مره أندبه،، عني صعبه،، تروح
بده الطف بيه بنظرته،، و بدمعته ،، جروح
شگد كلتله بويه اخذني،، لا تخلني،، أنوح
تـدري يـابـويـه الـفـگـد يهضم تره
لـو عـفـتني ونـار گـلـبـي امـوجـره
صـعـبـة دونـك بويه أظـل امحيرة
بعيني شفت اضعون أهلي مهاجرة
شلون راح،، تمشي وتعوف العليلة
شلون راح،، أصبر جروحك ثگيلة
شلون راح،، الجنت اغفه بفي شليلة
لا تروح بويه تذبحني فرگتك
لا تروح وتترك بهالحيرة بنتك
----------------------------
انـه مـامـتعود بُعـدك،، گلبي عندك،، صار
الطفلة من تحب ابوها،، من اخوها،، تغار
يلي ماخذ كل اخوتي،، يلفي موتي،، اختار
أنه معلولة وتـريـد لـوحـدي أظل
لون ميتة ولا شفت هذا الـحـصـل
گبالي عيني انشالت احمول الأهل
وخـذه ثـلـثـيـن العمر دمعـي النـزل
گبالي شآل،، ظعن شايل عمري كله
گبالي شآل،، وخله فوگ العلة علة
گبالي شآل،، وبس نواعي الضيم خله
يل مشيت وعايف ابالي ضحكتك
لا تروح وتترك بهالحيرة بنتك
----------------------------
شصار بيه وانه طفلة،، وبيه علة،، شلون
صعبة من أفگدلي غالي،، بس مشالي،، ظعون
آخ يـفـارگ اليـحـبـني،، خـذه مـنـي،، عيون
مشو وعيوني طفه بيهاا ضوه
شگد تمنيت امشي وياهم سوه
خذو من عند النفس حتى الهوه
راحـو و عـافيتـي فارگها الـدوه
راح ابوي،، صار هندس بعده بيتي
راح ابوي،، وماخذ ابظعنه عافيتي
راح ابوي،، ومـالـفـت بعده منيتي
شكد هويت موتتي بساعة طلعتك
لا تروح وتترك بهالحيرة بنتك
-----------------------------
ضايعه روحي بهجرهم،، ردت منهم،، حيل
صـعـبـة بـفـراگ الغوالي،، يشل حالي،، الليل
حسين بحلامي اشوفه،، ترض ضلوعه،، الخيل
شـمـا انـام الليل ايگعدني الحلم
چن ببوي من العطش ماظل رسم
أتطـشـر الخيل بضلوعه وانه ألم
وعلى حـرگ خيامـه گلبـه منلچم
چنه طاح،، بهيمه ماكو احد ينصره
چنه طاح،، من الطعن وجروحه كثره
چنه طاح،، وداست الخياله صدره
بالاحلام شفت خيل اعله وجنتك
لا تروح وتترك بهالحيرة بنتك
-----------------------------
گمت احومن خاف طايح،، خدره رايح،، خاف
خاف عمتي انگال اسمها،، تالي ظلها،، انشاف
و بظعنها تمشي أسيرة،، ديرة ديرة،، طاف
خاف صارت عمتي مابين الغرب
احس عطشانه وتدور اعله الشرب
خـاف كـافلهـا انغدر نص الدرب
خاف صعدت تله مدمعها يصب
والخيام،، خاف شحت ماي بيها
والخيام،، خاف فرغت من وليها
والخيام،، خاف محترگة عليها
بويه خاف للسبي مآخوذه أختك
لا تروح وتترك بهالحيرة بنتك
---------------------------
حسين علي التقي
حـمّـلـن نـوگ الـسـفـر گدامي
والمرض حسيته بآد اعظامي
ردته أكلهم وحـدي لتخلونـي
ووصل للساني رچيف اجدامي
عثرة،، صار بلساني الحچي
حسرة،، بزاوية همي انتچي
كسرة،، وداعهم خلّص بچي
من ردت اكلهم،، بيه لسفرهم،، بس حالي يهضم
مابيه أگوم
كسرو دليلي ،، ماظلي حيلي،، من ذاكه ليلي
مامرني نوم
بويه حسين بويه حسين
-----------------------------
ردت اقنّع وآلدي اعله الگومه
اسحگت گوه اعالجدم ملچومه
أمـشـي گـدامـه ويـديـر اعيونه
رحت اخلي هدومي ويه هدومه
غربة،، وانه كاتلني الهضم
بويه،، گلته كلشي لاتضم
صعبة،، انه منك انحرم
من هسه اشوفك،، حزنك يطوفك،، صعبة اعوفك
بويه وغلاك
حاجيني چلمه،، لاعيني تعمه،، گوه ألزمه
دمعي بگفاك
------------------------------
گلت ما ينساني وانـه ابـالـه
وين ايريد ايخلني باليحلاله
ولو أمنيتي اصعد ويه ارقية
شما كمل هودج أصير گباله
بفكري،، گلت ماينساله احد
كسري،، خايفه ايكمل العدد
صبري ،، خلص والحيل انمرد
لكل هودج امشي،، دمعي اعله رمشي،، ماخله كلشي
وصعدو سوه
خوفي نساني،، گباله اتاني،، تعبي خذاني
وضاگ الهوه
------------------------------
وشـلّـتـهـا اعيوني وانه بحيرة
ماكو حل گبالي وامشي لغيره
گلت اروح لعمي واشكي همومي
أدخيله عندك گتله يابو الغيرة
عمي،، ترضه أظل مدوهنه
بهمي،، الليل مانمته بهنه
حلمي،، امشي وياكم انه
ويه الفواطم،، دلالي هايم،، ياگمر هاشم
سويلي حل
ياكون اسافر،، اوياكم واهاجر،، تعمه النواظر
لو وحدي أظل
-----------------------------
گمت اشوفن عمّتي اتحن ليه
أجت شبگتني وتصبّر اعليه
عمه اروح اوياكم؟ وگالتلي
شلون اشوفچ بالهزل مسبيه
كاسر،، خاطري حالچ صعب
باجر،، عمه نمشي يادرب
آسر ،، تره وبظعون الغرب
ياعمه باجر،، تعمه النواظر،، نمشي ونكابر
فوگ الهزل
اكبر هضيمه،، ماعدنه خيمة،، بظعني جريمه
يحدي النذل
-------------------------------
حسين علي التقي
عيني بفگدكم سهرانة تظل عيني بفگدكم
من ودعتكم چفني ما غمض من ودعتكم
مهظومه منكم يعزاز الگلب مهظومة منكم
لـمـة شـمـلـكـم أحـنلهـا شكثر لـمـة شملكم
ذبلت عيني من يوم المشيتو
وخذيتو گـلبـي ويّاكم خذيتو
ويلااه يهلنه ظعنهم مغترب ويلااه يهلنه
-------------------
يـعـزاز گـلـبـي ذبّـاح الـهـجـر يـعـزاز گـلـبـي
ماشوف دربي من كثر البچي ماشوف دربي
حسيته مسبي گلبي ويه الظعن حسيته مسبي
ماخذني تعبي جدمي أمورم وماخذني تعبي
يـومـيـه الجدم طر المدينه
هلبت ألگه أثر من الضعينه
--------------------
آنـه ام الـبـنـيـن ومضيعه أربـعـة آنـه ام البنين
مشغول بحسين كل فكري لچن مشعول بحسين
مدري مشو وين بدروب الفله مدري مشو وين
بـس لا مـطـاعين كلهم عالثرى بـس لا مطاعين
گلبي اعله الظعن ظل ايتلاشة
گـلـب أم واحس كلهم عطاشة
--------------------
تعبانه وأسال مامنهم خبر تعبانه وأسـال
والدمع وشّل ونيني ما خلص والدمع وشّل
والـحـيـل هدّل من كثر النشد والحيل هدّل
جدمي تعلعل ألحگ كل ظعن جدمي تعلعل
ياظعن اليمرني أنشد عليهم
اگلهم ماسمعتو شصار بيهم
--------------------
صاح ابن حثلم يهل يثرب بعد صاح ابن حثلم
والشوف غيّم أركضتله بلاوعي والشوف غيّم
صار ايتلعثم عـرفـنـي أم الـولـد صار ايتلعثم
گلي انذبح هم التتانينه بصبر گلي انذبح هم
الله يـعـظـم أجـرچ يـأم البنين
التانينهـم خـلـصـو مـطـاعـيـن
---------------------
حسبالي عدلين مذعوره اركضت حسبالي عدلين
ويه النساوين ثـاري بس عليل ويه النساويـن
عـبـاس چـاا وين طايح عالنهر وچفوفه الثنين
يـا أم الـبـنـيـن وعـزيـزج مـنـذبـح يا أم البنين
مذبوحه الزلم فوگ الوطيه
وزينب بالظعن ردت سبـيـه
---------------------
حسين علي التقي
مولاي السجاد صلوات الله علیه
عمري انگضى بهم
إمن الخيمه للسم…راحه ماشفت دوم
بـس أنعـى ويـلاه
ويـاكـربـلـه آآآآآآه ….من عاشر الشووم
من طاح ابوي اعله الثرى وأنه انضره صوبه العدو غار
يـاعـمـه فـرن صـيحـت مـا لـحگت شفت الخيم نار
عمتي بطلعتـي اتحيـرت وبيني صفت ومـا بين الـزغار
بنص خيمنه أجت خيل آل اميه
شنسـه والجمـر عـذَب رقـيه
وآنـه همـي كـلـه الغـاضـريـه
حگي لو هظم تخلص حياتي
گبالي بالفله يـركضن خواتي
بيهـا كـربـله ردتـه مـمـاتي
آآآآآآه يا كربله آآآآآآه
آآآآآآه يا كربله آآآآآآه
••••••••••••••••••••••••••••••••••
دم يبجي لـو حـن
ويگضي العمر ون. الگلبه غيره مجروح
شما غمضت هـل
دمعـي ورسم تـل فـوگـه عَمِتي اتنوح
تفزع ببـوي إعله الخيم وانه ابألم وبيه الصبر مات
گاملهه شفته من سمع گام أوگع شفته ثلث مرات
نـزلتله بس خيل الغرب ما تنغلب تودعه اوكتها فات
يـاهي ودعت هيجي اخـوها
جوه حـافر الخيل ابـن أبوها
وعنه ع الهزل غصبن خذوها
وانـه انظره ومـا بيدي حيله
ع الترب بقى ومحد اليشيله
وشيبت قـهر عمتـي العقيله
آآآآآآه يا كربله آآآآآآه
آآآآآآه يا كربله آآآآآآه
••••••••••••••••••••••••••••••••••
كلشي خذه الطف
ولا خـيـمه لاجـف وحيرة السبي اشلون
آنـه الـبـدي شـد
حبـال اهله ونهد گلبه من العيون
بجف عمتي شديت الحبل وبيد الطفل شرد انسه ياحال
لختي رقيـه إمـن أوصلت بحيره صرت دمعي دمه سال
گـالـتـلي وبـنـبـرة حـزن خويـه خشن بـدلـي الحبـال
يگضي بس قهر عمره المماته
العلهـزل نـظـر بـاتـن خـواتـه
والسـبـي الحرگ گلبه وحياته
ودعت أهـل والدنيا حومـه
العلـرمـل فـلا تسمه نـومه
ودمعي مانشف والهذا يومه
آآآآآآه يا كربله آآآآآآه
آآآآآآه يا كربله آآآآآآه
••••••••••••••••••••••••••••••••••
گـلـت آنـه يـاريـت
ع الـدنـيا ما جـيت ..مـن دخـلـنه للشـام
دمعـي بقهـر صـب
خدر اهلي من طب .. القصره والحجي سهام
الشـام الترك بيـه كسر طول العمر شسوه بهلي الشام
ألنـه الملك گـاع وسمه وخدر الحمه تـالـي بخرابـه نـام
ضعن اهلي خلص بالغرب شگد بالدرب بيدي ادفنت أيتام
چـم گلـب يبس من الرزيـه
ودفنت بدي خـولـه وصفيه
وع الطشت غفت اختي رقيه
ماشفت هنه بس حزني شايل
الهسه بيدي اثر من السلاسل
وحنيت الظهـر مـن المهـازل
آآآآآآه يا كربله آآآآآآه
آآآآآآه يا كربله آآآآآآه
••••••••••••••••••••••••••••••••••
بدمعي رحت جيت
نـزور اهـلـي رديت…وتطفى نار الفراگ
الـرد الـهـلـه يـزور
ويـلـگـاهـم اگبـور …شحاله وهو مشتاگ
طشن ركاض بكربله..بنص الفله .. تجري الولي عين
مناشغ غدن يتناوبن..مـافـتـرن.. أنهدن بالونين
أعيون الرباب اتحيرت..وتلفتت.. يمشي الجدم وين
ابلا ولد مشت وفراگه حسره
والمصيبه أجت ما تلگه گبره
يـكتل الفـگد للـتوه عـمـره
من گبـر گبـر يفتـر جـدمها
وكـل گبـر تجي يكبر ألـمها
يطلع الأسم مـو گبـر ابنـها
آآآآآآه يا كربله آآآآآآه
آآآآآآه يا كربله آآآآآآه
••••••••••••••••••••••••••••••محمد الربيعي••••
وينه المحب وينه
خلي تهل عينه
بمصببة المسموم
السجاد والينه السجاد والينه
ه ه ه
ليلة حزن ليله الم. ليله وداعيه
ويه الحبيب الماغفت ساعه مآسيه
ويه الشفاه الذابله وعيونه مجريه
ويه المگيد عالهزل وعماته مسبيه
خلينه نبجيله
وبالدمعه نوفيله
انصاره واحبابه
ومصابه ماذينه السجاد والينه
ه ه ه ه
وينه المحب لبن النبي المابطل الدمعه
ولو شرب ماي بكل وكت بالمدمع ينگعه
عايش مصايب كربله وصارن عليه فزعه
الودع حياته بكربله هالليله خنودعه
راحت اهاليه
وعياله مسبيه
وعاف البطل عباس
عالترب وحسينه. السجاد والينه
ه ه ه
صايم نهاره والمسه عابد بساعاته
ومن يفطر الماي العذب يفيض ويه دمعاته
الينذبح جدامه الابو ماتهده حسراته
وفوك الهزل ويه العده مسبيه عماته
الاطفال والنسوان
وراس الابو عالزان
وتفتر عليه اعداه
والگيد بيدينه. السجاد والينه
ه ه ه
السجاد عاش النايبه بالعاشر بعاشور
شاف الابو وشاف الاخو الكل عالترب منحور
بيده دفن ال النبي ورد عالسبي مكسور
الله يعينه اشگد حمل من الظلم والجور
اليدفن ابو بيده
للعمر ميريده
اليفگدله مثل حسين
شيسوي بسنينه. السجاد والينه
ه ه ه
شهر المحرم صوبه بالخامس وعشرين
سموه وگطعو جبدته للساجد بن حسين
بفراش موته ومانسه للطف يدير العين
عالترب مرمي والده وكل اخوته ميتين
هالليله خنودعه
باللطمه والدمعه
ونحضر عزاءه دوم
هالواجبه علينه السجاد والينه السجاد والينه
==========================
الشاعر ابو احمد الهنداوي
ليلة ٢٥ /محرم الحرام /١٤٤٧
هجري الإثنين 21 \7 \2025
ليلة استشهاد الإمام السجاد ع
#جديد_محرم_الحرام_١٤٤٧هـ