4228
لنشر القصائد المنبريه في خدمة ابا عبد الله الحسين عليه السلام ودعما للشعراء والرواديد الخادم /غيث اللامي ******** للتواصل / @geath_95 ******** 07716408960
أنعى زين العابدين وشفيع المتقين
واهوى سيدالساجدين واهوى سيد الساجدين
=========================
انعه ياشيعي ابدموعك عالامام ابن الرساله
واذكر امصابه ابأنينك واذكر الظيم الجراله
عالجره بالغاضريه والمرض شلاله حاله
فاگد العتره الزچيه باليسردم دمعه هاله
ساكبآ دمع الخدود بين اصلاب القيود
بالدما تجري اليدين واهوى سيد الساجدين
=========================
حرگو اخيامه الاعادي والجثث عالغبر ضلت
ابلايه روس امطبريها والخيول اعليها داست
بس حرم وايتام تبجي والسياط اعليه لاحت
وابيسر مگيوده تمشي للگمر عباس نادت
واهوى ضامي وعليل واليتاما في العويل
نادو زين العابدين واهوى سيد الساجدين ==========================
والاشد واعظم مصيبه من رجع وابليله ظلمه
يدفن العتره الشريفه من وصل لحسين يمه
ناده من نحره الحسين ابلايه راس اويجري دمه
أيريده اوسده رضيعه هالطلب زيدله همه
دفن الاجساد يبكي دمعه في الخد يجري
ينعى مولانه الحسين واهوى سيد الساجدين
=========================
والاشد راحو سبايا للعين ابن العين
والرؤس اتقدمتهم روس الاطهار اوحسين
والگمر عباس راسه الزينب ايدير الجبين
وأبمجالس ال اميه الحره بنت الطيبين
ولهو في الشام موقف خطبة فيها يوصف
نورهم في العالمين واهوى سيدالساجدين
==========================
والي زيدله ونينه من رجع بالاربعين
الكربله ام المصايب ويه اطفال الحسين
لنه جابر معتنيهم ايواسي زين العابدين
الگبر ابوه اتعنو ابهم والقطيع الساعدين
نصبو فيهاالمأتم بالدما تبكي الفواطم
والعليل في انين واهوى سيد الساجدين
=========================
الشاعر خالد عامر الزيادي
ليلة ٢٥ /محرم الحرام /١٤٤٧
هجري الإثنين 21 \7 \2025
ليلة استشهاد الإمام السجاد ع
#جديد_محرم_الحرام_١٤٤٧هـ
ملاحظه /هذه القصيده على لحن قصيدة (لاتسال ماذا جرى)لمله باسم الكربلائي
آه واويلاه ياسجادها
يلبنيت اعله الصبر امجادها
آه واويلاه يلطحت ابغدر
مامثل صبرك يمن صبرك صبر
ياهو مثلك حمل لو عات اليسر
والأرؤس امعلگه أبعوادها
آه واويلاه يلحالك غريب
شلون شفت الأبو والخد التريب
مانلومك لون كل راسك يشيب
امصابك الهز الأرض واوتادها
آه واويلاه على هل الدموع
من نضرة حسين مكسور الضلوع
وطبرت الأكبر اوجاسم والشموع
أنطفت حين انطفه وگادها
آه واويلاه يالمالك مثيل
يلي جسمك بلمرض غادي نحيل
منهو مثلك قاد ثوره يلعليل
ومنهو مثلك صنع ثوره وقادها
آه واويلاه شتكذرك بعد
والشمر ربع على الصدر اوكعد
شلون شفته ويحز راسه من صعد
والعيون تشاهد من أبعادها
آه واويلاه على حرك الخيام
شلون ساعه البيها هجت هاليتام
وساعة الظيج اليردلها العمام
والعمام امدده بحمادها
آه واويلاه ومصاب الطفل
شنهو ذنبه أبسهم ظالم ينچتل
هذا المصاب الأبد ماينحمل
شلون گلبك حمل زين اعبادها
========================== الشاعر عادل خضير الكربلائي
ليلة ٢٥/محرم الحرام /١٤٤٧
هجري الإثنين 21\7 \2025
#استشهاد الإمام السجاد ع
#جديد_محرم_الحرام_١٤٤٧هـ
#تراث
آه لمـصـابك يـــزين أعــبادهــــا
زلزل العـالم وسـبع أشــدادها
ــــــــــــــــــــــــــــــــــــــ
تضـرب الوادم ابیعـگـوب المثل
شاب راسه وانحنه ظهره اونحل
ومن كثر ما ينحب اودمعه همل
بيضت اعيـونه اوزال اسـوادهــــا
ــــــــــــــــــــــــــــــــــــــ
اشراح منه اشذهب گلولي اشفگد
صـــار بي ما صــــــار دلاله انمرد
گالــو من اولاده الـعشــره ولد
باعته الدنيه على اولادها
ــــــــــــــــــــــــــــــــــــــ
ومطلع یعگــوبها اوعنــده خبر
عــدل يوسف ما عليه مر الخطر
وعشـــره عنده وما الواحد بالعشر
لو غــــده عنها يخـــل بعدادها
ــــــــــــــــــــــــــــــــــــــ
اشجاب یعگــوب النحيبه والونين
ما يجــادي سگم زیـن العــابــدين
يوم واحـــد اخــذمن خيمته البين
سلف والخيمه هــوت لعمادها
ــــــــــــــــــــــــــــــــــــــ
سبعطعش شاب من اخوته والعمام
بين شمس و چـوچــب وچـالبــدر تام
هــوت لاچــن عالسيوف وعالسهام
والتراب امسه يويلي وسادها
ــــــــــــــــــــــــــــــــــــــ
یشــوف شبان اهل بيته والشبول
چالضحايه امطرحه فـوگ الرمول
آه يا ويلي وعلـي اجثثها الخيــول
تلكد وامسـه عليها اطــرادها
ــــــــــــــــــــــــــــــــــــــ
يشوف ابوه احسين من عنده الجسم
بالمــواضي الگـــوم داعيته خذم
ما عليه كفارها خـلـت هدم
آه من شر العــده اوفسادها
ــــــــــــــــــــــــــــــــــــــ
ايشوف روس اهله على روس السمر
حاملتها اعــلــوج سفیان الكفر
ابراس ابو أمسه خــولــه يفتخر
عـد يزيد الرجـس وبن ازیادها
ــــــــــــــــــــــــــــــــــــــ
ایشوف عماته اوخواته امسلبه
وهنــد وسميّه ابملكها امحجبه
وجسم ابوه الخــامس من اهل العبه
اعله الثره اوراسه على ميادها
ــــــــــــــــــــــــــــــــــــــ
وچـم رضیع ایشوف يلعو اویضطرب
والعطش بحشــاه نيرانه تشب
جف حليب امه اوغده ابچيده ايحلب
سهم نمرود اوثمود اوعادها
ــــــــــــــــــــــــــــــــــــــ
وچم رضيعـه ما يفارجها السدر
وهيه متفــارج ثدايه امها التدر
لاچن امها ابكــتر والبت ابكتر
والثنين الخوف ذاب اچبادها
ــــــــــــــــــــــــــــــــــــــ
يبن من ابسيف ابـــوه الله نعبد
ونشكــــر ما زال سعيه ونحمد
جـــاوزت ياسيـدي ابحـزنك الحد حيث
حــــزنك للانــــذال اعيادها
ــــــــــــــــــــــــــــــــــــــ
مايبو محمد وياشبــل الحسين
نفســك تسكّن بچاها والونين
منهو منكم سطه اعلـه افراشه البين
سره السيف اشخاصكـم من عادها
ــــــــــــــــــــــــــــــــــــــ
ماسمعنه الكـم مشيب ولا كهل
عالوسايد مـات بمــراض العلل
انفوسكــم طيبه و عادتها الچتل
حيث لن نلتوا الشهاده امرادها
ــــــــــــــــــــــــــــــــــــــ
سيدي ما دونك الســـان الحزن
صــاح واخرس وگطع لوم اللسن
الجتــل میراث من والد لابن
استارثنه ارواح من اجـدادها
ــــــــــــــــــــــــــــــــــــــ
والچتـل للزلم بحــدود السيوف
فخر عز وشــرف بي ذل ماتشوف
لاچن احچيلي گبـل يوم الطفوف
بالحـــروب الماضيه وطــرادها
الشاعر المرحوم عبود غفلة
#اللهم_عجل_لوليك_الفرج
نعي للامام السجاد عليه السلام..
يجابر كربله بيهه الدهر دار
لسه من الخيم جن ريحة النار
وابين الحوافر ماتت إزغار
اويلي شصار بينه بذاك لِنهار
يجابر والحرم واطفال بالبَّر
واحتركت خيم عالتُرب تِنجَر
جم حافر ابصدر حسين من مَر
وآنه اباب خيمه اسمع تِكَّسَر
كص راسه الشمر بالسيف بكفاه
وعمتي فوك تَلَّه اتصيح ويلاه
نِفَزِّع بالكمر وندهنه ماشِفناه
وشلون الدهر يم النهر خلَّاه
بجسمه اسهام لاجن سهم بالعين
تنزف بالدمه وماشافت احسين
يجابر عالترب مطروحه جفين
انضربت هامته وجن احنه ميتين
يجابر كَيدَونه صرنه اسرى اجناب
جثيره ابواب هَمنَه ونِسد ياباب
ركبنه اعله الهزل واحبابي بتراب
وجرح البلكلب لتظن أبد طاب
دخلونه اليزيد وبينه فُرحَت شام
لا جِفن الطفل من الرُعُب نَام
يزيد هواي جان بكلبه اي ضَام
فرحان وتِشَمَّت تبجي الايتام
ردينه ورُقيه ويانه لا مَترِد
بيهه جروح من الكَثرَه لا مَتعِد
بيبان المنيه وياهو بيهه إتسِد
راحت يم ابوهه حتى ماتِبعِد
..............
ابو مريم الاسدي ..
متحزمِين للأربعينية
مشتاگـيّن للأربعينية
ــــــــــــــــــ
تحَضِرت للخِدمة والله كُل مَواكبنة
كُل سنة اعله الوعدْ هذا بكُل عَزيمتنة
حسين يستاهل تعبنة وهالتحزَمنه
وخدمة الزوار نِعمة وهذا واجِبنه
متحضرين للأربعينية
مشتاگـيّن للأربعينية
ــــــــــــــــــ
رَفت الراية العظيمة راية الخدمة
وطلعت الزوار تمشي صوبْ أبو اليمة
نحمِد الربْ ونشكره لوافِر النعمة
شرف من نخدِم الزاير حتلوا چلمة
منْتظرين للأربعينية
مشتاگـيّن للأربعينية
ــــــــــــــــــ
باجر بهاي المسيرة نخدِم بفطرة
والخِدم اسمه تسجله فاطمة الزهرة
واليحب لازم يقدم خاطر العشرة
هذا سر من الله هذا حب أبو العترة
مخلوقيّن للأربعينية
مشتاگـيّن للأربعينية
ــــــــــــــــــ
هذا درب الجنة هذا والخدم زائر
يبقى ربحان بحياتة والله مو خاسر
ما يضيع التعب هذا والأجر حاضر
خدمة حسين العظيمة تشبه العاشر
متطوعين للأربعينية
مشتاگـيّن للأربعينية
ــــــــــــــــــ
يله يا زاير يغالي اطلب إِتمنه
لو تريد الجنة يمك اعتبُر جنة
من قلب صافي بخدمتك والله مو مِنه
نفرح بيوم النضيفك نخدمك يَمنه
ممنونيّن للأربعينية
مشتاگـيّن للأربعينية
ــــــــــــــــــ
هاية معجزة المواكب ثامن العجبة
تسهل الخدمة بوَحَدها ماكوا كُل صعبة
واليقدم من يقدم ينطي من قلبة
واليجي زاير طريقة ماَ يحسْ غُربة
معروفِين للأربعينية
مشتاگـيّن للأربعينية
ــــــــــــــــــ
الشاعر زين العابدين الشمري
هاي زينب ياهو چان ينولها؟
شلون بأرض الطف تميل حمولها
_
أحمولها مالت بأرض طف الكدر
ونالها چَف الهظُم عگب الگمر
تسهر ويه دموعها وهذا السهر
بلا خيّمها والدمع محصولها
_
شلون هذا الضيم عالحره سده
من خدرها للمشي ويه العده
ياهو من اخوتها يمها تناشده
حسره عدها الخويه وين تگولها
_
ياهي مثل ام الحزن شالت حمل
ياهي عاشت حره ويشدها الحبل
ياهي كل أخوانها خلصو چتل
ياهي عافت عالترب مكتولها
_
هاي زينب والمدامع هامله
ثاكله ومتكفله أشچم ثاكله
شخلت بحال العقيله كربله
خذت كل قوتها منها وحولها
_
خذت قوتها لمن راح العضيد
الچان گبل الچلمه يعرفها شتريد
صوبوها من تصوب بالحديد
وعذبوها من أجته خيولها
_
آه يا دولابه شيراوي الزمن
خله بت الزهره محتاره بضعن
يا وطن يرحم گلبها يا وطن
يسد عينه وما يعاين طولها
_
سيد مرتضى الياسري
للحزن هاشم بنت صيوانهه
والعّلي السجاد يوم أحزانهه
~
اليوم من شجرة محمد چن فرع
فارگ الدنيا اوعليه هل الدمع
مات من كثر المصايب منفجع
وحزنت اعليهه الارض واكوانهه
~
المر على السجاد ما شافه بشر
آه يا حاله شعمل بيه الدهر
چم گلب هاليوم لمصابه انكسر
الدار هاليله انهدم بنيانهه
~
زين العباد المرض هد حيله
اولا اخو ظل عنده وإيتچّيله
راحه ما شاف ابنهاره أو ليله
وكربله بروحه دوت نيرانهه
~
شنهي حاله ألعاش لوعات الطفوف
وشاهد العباس مگطوع الچفوف
بعينه مرسومه بقت ذيچ الحتوف
والمصايب بالگلب نيشانهه
~
عينه بالدمعات ظلت سايله
عاشت ابروحه مصيبة كربله
شاف ابو اليمه طريح اعله الفله
عيونه سالت بالدمع نهرانهه
~
آه من زينب مشت وي الغرب
ظل علي السجاد مجروح الگلب
عالغيور شلون هالموقف صعب
ضاع ميزان العدل واوزانهه
~
خل نواسي فاطمه اعله اولادهه
فگدت العتره علي السجادهه
والسمه تبچي اعله زين اعبادهه
وسدت شيوخ العرب ديوانهه
~
حيدر بشار الدراجي
( ميمر كربلائي ، السيده زينب ويزيد )
خطبة فخر ، والكل حضر ، بين المَلِك واخت الگمر
يزيد يتباهه عله الصــــار ، كـــل ظنّــه راح تهابــه
**********************
بين الخليفه المو خليفه تشوفه
وبين الأميره بنت أميـــر الكوفه
دار الحديث بخاتِـمه معـــروفه
يحچي بعزم ، صاير شهم ، ومتجمعه يمّـه المو زلم
وكــــل زمــرته ملتمّيــن ، شمـــر او وحوش الغابه
**********************
گال الرمـح بأجساد اخـــــوتچ صلّه
گالت هــــلا بكلشي اليجينه من الله
انضحّيله كلشي وكلشي منّه انحصله
أمرَه فرض ، مــانعترض ، نعمه وانشالت من أرض
هيچ انرفع راس حسين ، والباري يدري أسبـــــابه
**********************
گال آنــه ذابــح كافِلچ وارجــــاله
گالتله لـ الله يـــروح هيــچ احلاله
وكون انت زلمه احجيها گوم گباله
گبل الفخر ، عندك خبر ، من الحومه مامرلك خطر
ماتدري كل هذا الجيش ، بالشرده خوش ذيــــــابه
**********************
گاللها آنـــه ، وگـالت بلا آنـه
أمنا الزچيه وأمكم انتو فلانه
سجّلكم التاريخ چـي ويــانه
ماننمحي ، بيت الوحي ، ومابيكم انتو اليستحي
واحنا اهل بيت حسين ، وكلمن يرِد لاصلابــــه
**********************
گاللها شفتي الله شصنع وسوّه
بــأخوانچ وأهلـچ وگالت فدوه
إحنا الله من إختارنا چي نسوه
منّه الأمر ، والنا الصبر ، جلّ جلاله ومقتدر
يعرفنا شننطي عله الدين ، والهذا صرنا أحبابه
**********************
گاللها اخوتچ عـالارض متـوذره
وحسين متطشّر بطـول الغبره
گالتله خير ومن نوزعه إنطشره
كلشي بسعر ، لاتفتحر ، باچر ايبين المنتصر
منهن الزلم والنسوان ، تلزم سره عله ابوابه
**********************
گام وتفاخر لچــن مــــــا لاگتله
وگامت ام عون وگعد من گامتله
گالتله كلمه وسكت من گـــالتله
اتمعنو ، انتم شنو ، اهلك منو واحنا منو
من تصفن الهن ييزيد ، بوجهك تصعد انگابه
**********************
كد كيدك وإسعى السعي المنتظره
مــــاتوصل الحجم الحسين وقدره
گبرك تــراب وگبره يصبـــح حضره
يالمو كلِف ، مالَك عرف ، شجابك علينا ونختلف
طينتنه طين أهل البيت ، وطينتـكم الچــذابــه
**********************
كرار الجوراني
ميمر
كلمن گصد زار حسين باجر يزوره بگبرة
..................
هاي الرواية بالكِتُب مَذكوره
من زار أبو الأكبر يگِصده يزوره
يوم اليموت بگبره يصبح نوره
حاشاه يعوفه بلا نور ما يترك المنتظرة
..................
نال الشفاعة الزارة صافي النية
ناجح بحبه والأجر من مية
ما يرجع آلة بحاجته المقضية
بالدفتر البي زِوار اسمه تسجله الزهرة
..................
كُل خطوة تِسجل اجُر محسوبة
هذا المشي يِطيح جميع ذنوبه
كلمن گُصد عن معرِفة لمحبُوبة
حصل رُضىٰ الباري وصار ربه يعلي بقدره
..................
قال الإمام الصادق يوصُفنه
اُرحم اللهي برحمِتك شيعتنه
وتِلْكَ الوجوه الي إِجت تتعنه
ما توصل لجسمه النار كل من حياها الذِكره
..................
يالمِعتِني وبِيدك ترِف الرَاية
من جوده يرويك الگمر من ماية
هوَ الشِجاع الحارِس المشاية
كافل جميع الزوار حارِسها عِندِ الحضرة
..................
الله تِقَبل بالدرُب مَسعاكُم
يلي مشيتو الحُجة يتلگاكُم
نفسهَ الامام المهدي يمشي وياكُم
صوب الإمام المذبوح يمشي ويهلْ العبرة
..................
نصِ الرواية ومن ذكرها الباقِر
لو يعلمْ بفضل الزيارة الزاير
مات اشتياقاً من أجُرها وحاير
جنة عدنْ لليمشون كُل خطوة حِجة وعْمره
..................
الشاعر زين العابدين الشمري
شتلگه ياموت وعليمن جاي اله
هناك روحه مادريت بكربله
يم اهاليه هونك عليه
""""""""""'''''''''''''''''''''''''''''''
بزين العباد عله هونك بس نفس باقي تره
روحه ماتلگاها عنده للطفوف امسافره
شگد هظم شاف بحياته حگها منه مهاجره
شگد حمل حجي الشماته شماتنوح مخدره
من ظهر عاشر محرم لليسر
من چتل اهله وسبيهم منكسر
وبلي مر بيه هونك عليه
........................................
والقتل عاده عليهم والشهاده الهم مصير
لچن موعاده خدرهم وي غرب تمشي وتسير
ويل تريد الروح منه أنه اگلك لاتحير
اگصد الطف ها يموته تلگه روحه اعله الحصير
تلگه لسه الروح بالظامي تلم
تطوف نحره وتشبگه وساعه تشم
وجيتك ليه هونك عليه
...........................................
المرعليه مامر عله أحد وشد من گطع النحور
شافت عيونه يوسفه سياط بمتون الخدور
ونفس هاي عيونه شافت عمته تطب القصور
وبل حبال مجتفيها عمداً گبال الفجور
الما سمع صوت الها جار ولا علم
مجتفه وتتشمت أشباه الزلم
يل توافيه هونك عليه
............................................
بهل خبر ياموت اگلك بالمسير ويل عده
عل هزل للشام وصلو ولگو شام معيده
بالضحه دخلو عليها وكلها جانت مسعده
للنسه گربو عليهن روس اخوته اوالده
حته كلها تشوف زينب والخدر
گامن وبجفوفهن سون ستر
النظره ترميه هونك عليه
............................................
شوف اثر گيد بجفوفه من السلاسل يل ممات
الشام عدها تمنى موته من الهظم والنايبات
تعنو بخدره الخرابه رادو بذلة تبات
وعله راس حسين أبيه فارگت أخته الحياة
شافها وناده اعله عمته بحسرته
عمه شيلي اختي تراهي ميته
من يعزيه هونك عليه
......................................
ها يموت انظر لحاله يلتفت يمنه ويسار
تمنى واحد من اخوته والگلب بخوانه صار
تطلب جفوف الجنازه تشيعه وتطلبه ثار
مجتله ليش العشيره كبارها وي الزغار
ياهو ليشيعه واخوته مذبحه
حگ عليه لمن تنوح النايحه
يلي تلفيه هونك عليه
"""""""""""""""""""""""""""""""""''''''
خادمكم قاسم المالكي
قصيده بحق الامام زين العابدين عليه السلام
عمري ياشيعتي قصة حزن
عمري كل لحظه بي طعنه انطعن
عمري وي دمعي صب حتى الجفن
عمري
**********
انه زين العابدين وهذا حالي ضيم دهري
ابهمي عشته
ويالحزن سهران گضيت الليالي ودمعي يجري
ابهمي عشته
خالي من جلمة فرح بسنينه خالي طول عمري
ابهمي عشته
وي طولي جروحي ممتده وخيالي وناره صبري
ابهمي عشته
گلبي جمره وتهيج ابنبضته
گلبي ضيم المصايب فتته
گلبي ابدنيه المآسي منسجن عمري
**********
الشفته مامر اعله واحد غيري مثله بالبرايه
شنسه منه
مصحف الاحزان بلساني ارتله آيه آيه
شنسه منه
والحزن موثوب هوه وحتى ابدله ولا احچايه
شنسه منه
بكل معانيه صرت للناس امثله بلا نهايه
شنسه منه
بيه للحزن صاير مستقر
بيه باقي لمن شاب وكبر
بيه. دولاب ضيمه مايعن عمري
**********
اربعين اسنينه يعگوب العمنه اليوسف ابنه
امنالبواچي
يوم واحد من مصابي ايعادلنه لولفنه
امنالبواچي
عشر من جروحي اظن لو صوبنه موتنه
امنالبواچي
هوه يدري ابنه الذيابه ماكلنه وما توانه
امنالبواچي
وآني جدامي عودي منذبح
وآني راسه اصدله اعله الرمح
وآني شاهدته ظل بلا دفن عمري
**********
نوح لبنه اللي عصا هاج بحنينه ولان صبره
بالشدايد
وآني شفت اطهر جسد ومسلبينه انهشم صدره
بالشدايد
ياالهي صحت بحكامك رضينه وطوع امره
بالشدايد
بذاك طوفان الالم صبري السفينه وروحي جمره
بالشدايد
صبري ماواحد ايحمله گدر
صبري ايوب مثله ماصبر
صبري بسكوت خلاني اون عمري
**********
عاشت الاحزان مثل انفاسي بيه مرمرتني
للمنيه
والاشد واصعب رزاياهه عليه الصوبتني
للمنيه
نايبات جروح يوم الغاضريه الشيبتني
للمنيه
وفاجعة سبي الفواطم لآل اميه رافگتني
للمنيه
وحدي وطوگ الحديد برگبتي
وحدي وآني الوج بعلتي
وحدي بالفاطميات امتحن عمري
**********
سيد محمد الميالي
استشهاد مولاي زين العابدين عليه السلام
و الحيره البعيونه لسان حال
سولف قصت اهله بكربله السجاد
والحيره اضهرت بعيون اهل بيته
يوم العاشر العاشه فلا يرتاح
ويگللهم هذاك الموت مريته
،،
انه العاش بذاك العاشر
شفت الموت بكسر الخاطر
من الخيمه اسمع والينه
مكسور حسين بلا ناصر
من اتشوف الوالد وحده
عطشان ومتفطر چبده
والاصعب من ناده خوانه
ومحد من اخوانه العنده
،،
انه ابن الحسين المات عطشان
عشت بكربله وانفاسي دخان
ا يا كربله الغصه البلگلوب
شلون انعيش من طاحو الوليان
كربلاء ... لا زلتي كرباً وبلاء
_
عشت امصايب ومانسه ذاك اليوم
يوم الهدت الخيل وي خياله
فرن بالبراري بحيره مدري شلون
طلعت مني واخذت گلبي ووصاله
،،
هاي الحيره وهاي اجروحي
شفت الراس وطلعت روحي
لو مذبوح احسن ماباقي
الوالد ليش اصبح مذبوحي
الله يساعد گلبي وعيني
من شافن مذبوح حسيني
معميات ولا هل منضر
فراگه الخله ابجيها اسنيني
،،
حگي لو متت بس موش مسموم
من حرگ الخيم يا ناس ملجوم
زاد الضيم يوم العمتي طلعت
كون الروح تطلع والله مهضوم
كربلاء .. لا زلتي كرباَ وبلاء
____
يا طف النوايب والحجي الموزين
يشمت عدونه بعد ابو فاضل
كسرو ضهر ابوي بطيحت العباس
مو بس والدي كسرو ضعن كامل
،،
لا عباس ولا جفينه
مگطوعات وسهمه بعينه
من مرونه بعمي الكافل
شفته ابلا راس مخلينه
هذا الموت الموت ناسي
شيب گلبي وشيب راسي
يم الماي وشفته مفطر
عطشان وطايح نوماسي
،،
بهذا الحال كلبي والله تعبان
يوم العاشر و وياي نسوان
عليل وشدو احبال اعله اديه
كل ما التفت ماالگه خوان
_
أخر لحضه وسدوني برمل حار
يهلي اتمنا اموت اعلى الوطيه
مثل اخواني من نامو عله الگاع
واتگطع وصل وسهام بيه
،،
سهم مثلث كون بنحري
مكسوره ضلوع بنص صدري
هيج اتمنا الموت بحيره
الف واكثر جرح اليجري
هيج اتمنه الموت المرني
يحرك داري وهم ياخذني
بالعاشر مثل اهلي الضاعو
كون بضيعتهم ضيعني
..
اركض بالبراري وافگد عيون
وتنطر هلي بلكت يردون
كون بموتي اواسي وحده ياناس
تعمه العين لو تذكر ام عون
____
اللهم عجل لوليك يارب الفرج
#احمد محمود
جرحك بيك يسافر وين
وتنزل حمره دموع العين
فكرك يم الخيمه يروح
لو يم المذبوح حسين
ويلي شافت عينك كل جروح العاشر
وشفت صدر حسينك عثر بي چم حافر
بغربه عشت أسنينك وأنته باقي تكابر
صعبه أتهيد... يالسجاد... حسراتك وأهاتك
شفت شلون.. نار الگوم.. تتلاهب بخيماتك
والنسوان.... بين الخيل... خواتك وعماتك
ماهمتك علة البدن،،، أصعب جرح جرح الظعن
وأربات الخدور أنسبن
وا ويلاه
ظهر العاشر موقف چان
تشيب من عنده الرضعان
خدر الله وطلعن ياحيف
غربه تصد ركضة نسوان
دوت نار الخيمه وركض طلعن كلهن
أطشرن بالهيمه ،، حامي ماظل ألهن
العاشر ويا ظيمه جروحه من يحملهن
أگبال أجناب.. تهظم حيل.. من تركض العلويه
بيكم عال ... چم خيال.... بالسوط طگ أبنيه
مسبي تروح.. تمشي وياك ..عمتك هم مسبيه
مسبي الظعن والله زمن،،،، الما طلعن اليوم أطلعن
وأربات الخدور أنسبن
وا ويلاه
بحبال أمچتف وأصفاد
بـيـن الـيـدفـع والجلاد
حيره تخلي أچفوفك وين
فوگ العله وحيلك باد
السبي بيك شخله وأنته وشل حيلك
تزيد بيك العله ،، لـو طفل يوميلك
جمر طافي برجله وماگدر يشكيلك
أطفال هواي.. لكل حفاي.. وشچم جدم محترگه
متون ازغار ... شيحملن... والطگه فوگ الطگه
بلا حماي ...والمرعوب ... يركض وعمته أتشبگه
وعيونهم لا ما غفن،،، ياويلي عطشان الظعن
وأربات الخدور أنسبن
وا ويلاه
ذاكرتك متروسه أآلام
وحلامك ماهنه أحلام
الكلمه الجرحت گلبك حيل
أشفت وگايل( أخ الشام)
الشام طلع روحك،، وگلت آخ بيومه
تموت وأنته جروحك تنزف ومالومه
تموت وانته بنوحك بالغرب وهمومه
شسوه الشام ..خاطر هيچ.. صاير سبب وناتك
تخفي أسرار ..كلها جروح.. آ ياعظم شوغاتك
بغربه تموت.. تالي وياك ..هم تندفن لچماتك
وبـ ليت أمي شگد محن،،، كلفات صعبه ينحچن
واربات الخدور أنسبن
وا ويلاه
✍️حسين حمدان الدلفي
#اللهم_عجل_لوليك_الفرج
خاف يقيد لساني التراخي وما جاوب عله الهل من مناصر
الما يفزع يطفي شله بالماي بالك تصطنع بيها المشاعر
العناكب تستغل گلب الحياطين من تبدي الفوانيس اتعذر
خاف يدير عنك وجهه الحسين وما تلگة بشر يجبر خواطر
عينك على جروحك دوه........ واستبعد اوهام الهوه
لا ياخذك بعيد
الحب بالمواقف ينعرف.... لو عن خيمهم تنجرف
تتلذ بري يزيد
وازي عينك وابجي ع الصار
بخيم هاشم شبت النار...... وين يا جرحي المفر
متانيتهم نوگ وحبال
والدخان مضيع أطفال.... كل گلب صابه الخطر
(هضيمة وتبرد الروح...... عزيز الزهره مذبوح)
...............................................................
اخذ قيمة وجود من التوابيت يا تابوت اجه بقيمة حصيره
استغفر ليدك من تراب الأبواب خافن داگ بيدك باب غيره
لنفرض يا جرح مر بيك نسيان البارد بيها ذيج ايامك السود
لازم تنتفض من وعكتك هاي وتگود عيونك لصحنه اسيره
بالباب دنگ واعتذر
وجهه اسود الما منكسر.... لذيج الرزيه
من الخيمة خدر الله طلع
مذعور في حالة هلع .... بالغاضريه
ابلغ من النار..! الخيول
ادوس عدل ادوس مجتول........سكته بالطف الوداع
الفرگة اخشن من الحبال
السبي يحصد راحة البال.... وفرض ع الخدر الضياع
..........................................................................
لا تگطع صلة نزفك يجرحي اكتفائك بالمضه يعني الهزيمه
خاف يساومك يا جرحي الضماد وتدور وي الحسين الغنيمة
من تشوف تثگل جفة الهاك احذر لا يعثرك ماي وجهك
خاف يغرك اسمك بين الأسماء واسم زينب غريبه شكد هضيمة
يا خاطر الخيمة انكسر.... بت حيدر ادور مفر
من عگب الخيام
عگب الكفل تحرس عده ..... يسد وحشة الماي النده
هاي من الأوهام
بيا عذر يتحجج الماي
سلب من المهد الراي.... جرح يل ماله شفه
راعي ستر الكون عريان
والورد بالخيمه عطشان....هنا عله الدنيا العفه
...............................................................
من يموت النهر ما يحزن البير نفس الطينه بس فرق اتجاهات
اتخذ من توبة الحر درب معبار مجهولة الدروب ال بالمتاهات
خشب لو طاهر اصله منبر يصير لو يصبح رماد بنص تتناير
منا وبتدت قيمتها الأمثال إِليخلف نفل يا جرحي ما مات
يا جرحي بالك تنغلب.... واتبع آثار الدرب
قله اليدلون
يتنفس حروره الجرح...... شالو طبيبه اعله الرمح
هد حيل العيون
البگة براس الورد والهيل
اجبير هاشم داسته الخيل .... بالخيم صار انكسار
كون ينفذ صبر العيون
بالبراري اطلعت ام عون.... ذكريات الخيمه نار
............................................................
دنگ يا جرح من تسمع خيام وخلي دموعك بخدك هويه
احذر لا ترافك خيط مذموم لئن انته جرح صاحب قضيه
اتعوذ يا جرح من غفله الراي واتجرد من افكار التراخي
يم كل شامخ استصغر مقامك حسين بكربلا ادوسه اعوجيه
يا جرحي امامك ع الثره..... من الگفة انحز منحره
لا يهده الك بال
توكل على الله وانكسر.... يا جرحي بجفوف الخدر
مستوطن احبال
وين ما تندار لجمات
الخيم شبت والكفل مات....رحمة ما عنده العدوو
طفل يركض طفل مشدوه
والهدوء هنانه مكروه..... زينب بلايه اخووو
...................................................................
مرتضى عامر الشمري
شهادة مولانا زين العابدين صلوات الله وسلامهُ عليه
الجرحه ماينفع دوه .. الذبحو أهله بنينوه
_*___
يادوه شتنفع لعلتي بعد مالك كل نفع
يادوه؟ ينفعه الأخوته منصرع يم منصرع
أوالده يلمه بحصيره وتسأل عيونه بدمع
هذا چف عم هذا خنصر هذا ألمن ياضلع؟
المثلي ذبحوله أهل .. تكثر بروحه العلل
أشما تتداوه من المرض .. الضله والموته سوه
_*___
شينفع الحرگو خيامه وطلعلوه مخدره؟
يادوه يضل ماله چاره العمته تمشي ميسره
مگطع اچفوف الكفلهه عمي سبع الگنطره
يادوه گلي شينفعه المثلي تنطگله مره؟
مگيده عمته بحبل .. وصاعده فوگ الهزل
ودعتهم ع رمح .. ونه دلالي أنچوه
_*___
ماله طب گلب اليشاهد عوده طاح من المهر
ومن كثر ماصدره شال أسهام ماضله صدر
البالحوافر شاف عوده صدره مسحوگ أشكثر
يادوه يطيب كسرته وألمن يضل ينتظر؟
گلبه واگف مايدگ .. الشاف أبو من ينسحگ
شله بعيونه بعد .. المات بعيونه الضوه
_*___
ياگمر يضوي عتمته المثلي فاگدله گمر؟
غرب بصهوة جواده ومارجع من النهر
عمتي بدت دمعها وشوبحت كتره النضر
وعمه عمه هذا ياهو؟ تنشد الضهره نكسر
عمه زين العابدين .. عمه اخذني للحسين
گودني يم مصرعه .. بلكي موتتنه سوه
رسول رياض
مات من طف كربله وأحزانه
أبو الباقر والحزن عنوانه
==========
ضيم من طف كربله شاف الألم
شاف شامت من اجه يحرگ خيم
شاف عبد الله انذبح من السهم
روحه لحبابه تحن لهفانه
==========
جان شاهد عالمصايب والجره
شاف ابوه احسين حزوا منحره
الجرحته زينب غريبه ميسره
والنذل أعلن عليه طغيانه
==========
حيل ماعنده وصعد فوگ الهزل
ويده ياوسفه يعت بيها الحبل
يطيح من الناگه لو جره النذل
مابقه واحد عدل بخوانه
==========
زين الاعباد وتمرمر ياخلگ
صدره بالحسره علئ الحره احترگ
جفه للناگه بحبل ويلي انشبگ
وسفه يتمرجل ابن مرجانه
==========
والهضم أكثر بعد طاري السبي
بغربه مسبيه يصد بت النبي
علي السجاد وينادي ياعلي
جدي احظر ياعلي ويانه
==========
لإبنك احظر ياعلي بهذا المحل
تحظر الينخاك أعرف يالفحل
هاي وادم جدي ماعدها خجل
عمتي ياجدي تره عطشانه
==========
الشاعر الأستاذ علي النائلي
ليلة ٢٥/محرم الحرام /١٤٤٧
هجري الإثنين 21\7 \2025
ليلة استشهاد الإمام السجاد
عليه السلام #موشح
#جديد_محرم_الحرام_١٤٤٧هـ
آنه العِليل الما رَحَمني ٱزماني
ذِبحَـوا أبوي بكــربله وخواني
ـــــــــــــــــــــــــــــــــــــــــــــــــــــــــــــــ
شِفتِ المصـــايب يا خَلَـگ بعــيوني
حِرگــوا خِـيَـمنا وبالحَــبِل چتفـوني
شِتمــوهَا عَمْــتي وَانَه هَم شِـتموني
ماعندي حَـيل ٱمنِ المَرَض شافـوني
بهاي اليِتامى والحَرَم حِرت آني
ذِبحَـــــوا أبوي بكربله وخـواني
ـــــــــــــــــــــــــــــــــــــــــــــــــــــــــــــــ
آنه العِــليل وحــــايِر بهالــــعَيلة
مفزوعة الٱطفال ودَمعها ٱتسِيلَه
وَيّ الرباب ورَمـلة ناحَـت لِيـــلة
وزيـنب تِگِلّي جابَـوا الهِــــــزيلَة
مَيّت يَرَيت ولا شِفِت عَساني
ذِبحَـوا أبوي بكربله وخواني
ـــــــــــــــــــــــــــــــــــــــــــــــــــــــــــــــ
شِفتِ المرار بسَفرتي الأليمة
رِحلَة عذاب ونايبة وهِضيمة
ضِربَوا رُقَيّة وسكِينة اليَتيمة
أحقاد أُمَــيّة مدفونة وقديمة
والجَدّة هِنـدَة والنّهَج سُفياني
ذِبحَـوا أبوي بكربله وخواني
ـــــــــــــــــــــــــــــــــــــــــــــــــــــــــــــــ
لَرضِ الغُـرُب لَمّن وُصَـل ظعَنّه
شِفنـه النواصِـب كِلها تِنتِظُرنَه
وادِمهه بِحجـارَة حِقِــد رِمَتـنَه
ماكوعَشـيرة النّغـرَت وحِمَـتنَه
كِل هذا وَانَه ٱمحزّم بإيماني
ذِبحَوا أبوي بكربله وخواني
ـــــــــــــــــــــــــــــــــــــــــــــــــــــــــــــــ
لمَجلِــس يزيد الطاغية وَدّونَه
يِنفي الرسالة والوَحِي بظنونَه
بنَظرَة شِـماتَة اليَمّـه يِنظِرونَـه
سَبّ الزچية الطـاهرة وأُبـونَـه
وَانَه الحديد برُگبتي وأدماني
ذِبحَـوا أبوي بكـربله وخواني
ـــــــــــــــــــــــــــــــــــــــــــــــــــــــــــــــ
بِتنــاهَه ذيــچ الليــلة بالخــرابـة
دَلّالـــي يِــنزف مِن كِـثُـر عـذابَـه
طفلة ويَتيمة ٱتصيح أريدَن بابـه
شــافَت أبـوها ومِــن بَـعَـد غِيابَه
موقِفها فَجّر حَسرِتي وبَچّاني
ذِبحَـوا أبوي بكـربله وخواني
ـــــــــــــــــــــــــــــــــــــــــــــــــــــــــــــــ
گضّيتَه عُمري ما نِسيت الـعاشِر
دمــعي أبـد ما فــارَگ المَحـاجِر
مِن عَملَةِ الطّف گلبي لَسّه شاجِر
بَس هُوّه عاش وماتت الضّـمايِر
زَين العِباد آنه الحِزِن عِنواني
ذِبحَـوا أبوي بكربله وخـواني
ـــــــــــــــــــــــــــــــــــــــــــــــــــــــــــــــ
خِلصَت حَياتي الهَم يِدولِب بِيّة
كِـــل لِيلة أنصُـب بالـحِزِن عَزِيّة
تالـي الســموم بكِل عِرِگ سِـرِيّة
للبــاري أمشـي والنّفِس مَرضِـيّة
يا شيعة ٱذكروا ٱمصيبتي وأحزاني
ذِبحَـــوا أبوي بكـــربله وخـــــواني
ـــــــــــــــــــــــــــــــــــــــــــــــــــــــــــــــ
الشاعر الأستاذ ستار عذاب الحچامي
ليلة ٢٥/محرم الحرام /١٤٤٧
هجري الإثنين 21\7\2025
ليلة استشهاد الإمام السجاد عليه
السلام #جديد_محرم_الحرام_١٤٤٧هـ
نزله للامام السجاد
.
.
.
خيــمه لو رمــح لو نــبلـه لو حــافر
ياهو اليوجعــك منهن يـــبو البــاقر
***
جــروح هواي بــيك اتجـاوزت الفين
ياهــو اليوجــعك منهــن يبعــد العين
امتون الحره عمتك لو ضلوع حسين
ومــن صدرك الحـــافر ياضـــلع كاسر
***
بصدرك ياضلع مكسور ومـهــشم
يــزين العابـدين الـــياهي تـتـألم
للحــفــاي ركــضن لـــو للمــخيم
المــن لسه يـهمل سـيدي النــاظر
***
لهسه يهل الـــك ناظـر ولا ينــشـف
يالبالطف سبو من عندك المـصحف
آ يــا عملة اهــل الشـام يوم الطف
اعله عمـاتك لمــن بحجارها تشامر
***
مشامرها ســـوالف يوجعـــنك حيل
يريدن حيل وانتــه منيـلك هالحيل
راح الحيل من سحگت ابوك الخيل
ولســـه ترن بذانــك غـــارت العاشر
***
بذانـك لسه كلمة غــافي عبدالله
دللــول الولد لا يگــعد اســم الله
سهم حرمله من ابمــنحره صــله
اونـات الربـاب التــكــسر الخاطر
***
يكــسر خاطرك خــد عمتــك ذابل
من گد ما بچــت لفراك ابـو فاضل
الممشه للســبي يوجــع بـــلا كافل
طبيعيه اعله زينب من تضل حاير
***
طبــيعيه دموعــك والله ما تـنلام
شــفت آلام مامــرت على الايـــام
هيــه اگليله قابــل طبـــتك للشام
مگيد على الناگه امـفــرع وحاسر
***
مگيد عله النــاگه والـگلب مـحروگ
عله المثلك چبيره وادري لا متـلوگ
شــكبرها وطببو نسوانكــم بالسوگ
شــماته سوگـــهم مابي ابــد نــاصر
***
حيدر تركي الكربلائي
لاستشهاد الإمام علي بن الحسين زين العابدين عليه السلام
سيدي ومولاي زين العابدين
كربلا اسوت ابحالك والسنين
صارت عليك الطفوف
اشد من ذبح السيوف
كربلا اسوت ابحالك والسنين
★★★★★
ماشفت مثل الطفوف ولاتشوف
امسلحه على حسين ملتمه الالوف
انذبحت بدور الهواشم بالسيوف
صفوف يوم تعسكروا بعد الصفوف
اشتدت العله على الجسم النحيل
من بقيت ابغربتك . بالطف عليل
الهظم بجروحك يطوف
اشد من ذبح السيوف
كربلا اسوت ابحالك والسنين
★★★★★
خانك الحيل وعجز حيلك تگوم
وحمره ارض الطف دمه وحر وسموم
علخيم هدت عساكرهم تحوم
شمس آل البيت غابت والنجوم
منعتك زينب عليك الشر يحوم
علامامه تخاف واركان العلوم
بين حسره وبين خوف
اشد من ذبح السيوف
كربلا اسوت ابحالك والسنين
★★★★★
حيل ميلات النوايب من تميل
خلت دموعك جمر علخد تسيل
كل مصاب ابوزن نايبتك قليل
يوم مر عليك ابد ماله مثيل
لااخو ظلك ولا عم وقريب
راح ابواليمه انذبح راح الحبيب
فراگ ابو اليمه العطوف
اشد من ذبح السيوف
كربلا اسوت ابحالك والسنين
★★★★★
ظالم بسوط الحقد لمن لفاك
لاحك إچم سوط منهم ماخطاك
وذني مسبيات عماتك وراك
الف رميه القهر والشامت رماك
ماكو بس عدوان ماظلك صديق
ادير وجهك المن بهذا الطريق
عيونها عليك الالوف
اشد من ذبح السيوف
كربلا اسوت ابحالك والسنين
★★★★★
شوكت من جور المصايب تستراح
چم عزيز الماتظنه يروح راح
صدر ابوك تلگته اسهام ورماح
وعمك بصف الشريعه هناكه طاح
الذكريات وياك من همها تنوح
وين منها اتصير لوعنها تروح
وضحكة الشامت تشوف
اشد من ذبح السيوف
كربلا اسوت ابحالك والسنين
الشاعر حسن لعيبي الحريشاوي
خويه العدو ولانه
بالهيمه طلعانه .. بالبر ركضنه
وارقيه عذبوها
وسكينه روعوها .. لحكو يهلنه
يابو المحنه وينك
رد ليه خويه عينك .. بس احضرلنه
طبو علينه .. واحنه شبدينه
فرينه حوافي خويه انولينه
___
يبن امي هذا حالي
ماضل بعد دلالي .. لا ضل كفيلي
عالركضه خويه مكدر
اتلاكه ويه عسكر .. ويهده حيلي
اشكي المن وخيالي
بين يخويه تالي .. ياخويه ويلي
ماضل محامي .. يحمي خيامي
وابن امي لكيته بالصحره ضامي
___
محد فزع اليه
من جتفو اديه .. وكلولي اركبي
هزله ورخيه عرجه
من هالمصيبه شرجه .. ماعرفه دربي
اختك غريبه صارت
الدنيا وعليها دارت .. كسرولي كلبي
جا يمته ارتاح .. كضيت الصفاح
الدللني بدلاله من المهر طاح
…
شحجي وعدو خذانه
ما ادري يا حمانه .. بهالديره شلكه
شام وسبي وخرابه
يا كلبي يا عذابه .. الخوه تحركه
الديوان اجي اسيره
لا خوه لا عشيره .. متنطره ملكه
يمته تجوني .. راحت عيوني
من ادخل تجوني جانت ضنوني
——
محمد عيسى المنصوري
الحسن يم الصحن حاظر
يرحــــب بــــيــك يالزايــر
يوم الاربعينيه.. يوم الاربعينيه
~
يم باب الصحن مولاك متحزم ابچفيه
ينادي گوم ياعباس ياشيخ الاعـزوبيه
يخويه خلي نتعاون بيوم الاربعـــينـيه
اني الدمعه اجريها وانت التقره لطـميه
انه الگهوه اوزعها
وانت الرايه ترفعها
يوم الاربعينيه.. يوم الاربعينيه
~
جاي امن البقيع ايصيح شايل رايتي الخظره
ٱنه الحسـن يازوار اجــــيـت ابلـهـفه للحـظـره
جــــبـت ام البنين اوياي واسمع ناتج الفـــكره
تطبــخ هيه زاد احسين وٱنه الافـرش السفره
بسمهه السفره مبروكه
بديهه ابساطنه اتحوكه
بيوم الاربعينه.. يوم الاربعينيه
~
اجيت ابني مضيفي اهنا واتلگه الگصد لحسين
هلا بخطار ابو اليمه وتنامون وســط هالعيـــن
عين الغطه وعين افـراش يلي الكربلـــه ناويـن
هلا وكل الهلا بكل عام اصيح بصوتي للماشين
هلا بزوار ابو اليـــــمه
ونتفاخر ابهل خدمــه
يوم الاربعينيه.. يوم الاربعينيه
~
اصيحن يبني ياجسام گوم وارفع الرايـــــــه
تجي وعمامتك خضره وتفرح المشايـــــــــه
وتنطي فكره للشبان من تفرش امصلايــــــه
درب احسين درب الله صافي مثل الامرايـه
يوليدي الصلاه واجــــب
فرض عالشاب والشايب
يوم الاربعينيه..يومالاربعينيه
~
اجيت الكربله مشتاگ الزينب كون الاگيها
وجروح اليسر والسوط بدموعي اداويـــها
وانشد عن رقيه وين وين انتي دفـــــنتيها
ماتت ادري فوگ الراس فكد احسين ماذيها
عفتيها ابلاد الـــــشام
ازغيرونه ابتراب تنام
يوم الاربعينيه
يوم الاربعينيه
~
الاستاذ محمد الجماسي + حيدر بشار الدراجي
( شوط كربلائي عن حب الحسين )
سبحان الخِلق لحسين ، عشگ بصغاره وكباره
بحيث الماله ناصر چان ، إنــس وجــان زواره
***************
سبحان الخلق الحسين ، الماظل واحد ينصره
سبحان النِصر الحسين ، وبدّل وحدته بحضره
سبحان الوِضَع لحسين ، ذِكــر بـالعالم بأسره
من كـل بقعه بالكوكب
من كل دين كل مذهب
واجــب للسبط ينحَـب
سبحان التِـرك أديــــان * يم حسين محتاره
***************
سبحان الحِرَس الحسين ، وخـلّـه زايّره بعينه
وخلّـه كــربله بكل عــام ، تستوعب مـلاييـنه
وخلّـه تِـخــدم الــــزوار ، بــس الوادم الزينه
وخلّـه المعجزه بـزاده
وخلّـه المعجزه مراده
وسواها الخَدَم قــاده
سبحان الخلَـق لحسين * اخوه عباس وأنصاره
***************
سبحان الخِلَق عبــــاس ، للكلفـــات راعيــها
بحيث الحاجه للمحتـاج ، من ينطيها ينطيـها
وبحيث الصعبه للـــزوار ، من يگظيها يگظيها
سبحان الخِلَق چفّه
التارس كربله وكـفّه
الشابع مرجله وعِفّه
سبحان الجَـعَل عباس * لأجل حسين تصياره
***************
سبحـان الـزِرع لحسين ، بشر كل عام تمشيله
بحيث الشايب بممشاه ، يسبگ جيل مو جيله
وخلّـه الزلم والنســوان ، مــن اتذكره تبچـيله
طفل تــوّه الــوكت جــابه
بچـه عله حسين ومصابـه
ومواكــب ينصـــب ابّـابـه
سبحــــان الزِرع لــحسين * عشگ بالكون وأكتاره
***************
هنيال الوطـن بحسين ، وهنيـــال الشعب كِـلّـه
نِـحمِــد الله مِن خـلّاه ، بنص هذا الوطـن وأهله
چـا غير احنا مخلوقين ، لأبـو الهيهـات للـذلّـــه
سبحان الله واسلوبــه
العــاف الكون ودروبه
وخـلّـه بنصنه محبوبه
الحنّـان والمنّـــان ، جَعل هذا الوطن داره
***************
سبحــــان الكِتَب لحسين ، مواكــب تنّصب لاجله
بحيث التعب لاجل حسين ، من يخدم يصير احله
بحيث الغـــالي يم حسين ، مــن يمشي يصير اغله
سبحان الكِتَب كلشي
وگال الاجــر لليمشي
چنّــه زارنــي بعرشي
سبحان القوي الجبار * العلّه حسين وأسواره
***************
سبحان المِنَح لحسين ، الخلود العالي والمنصِف
لهدا وكون من نختـار ، مـــو أي واحــــد انكلّف
لأن اليدخــــل التاريخ ، مو بالصوت بـــالموقف
لازم نفهـــم ونعلـــم
الموقف مايظل مبهم
لمّــن ينكتب بـــالدم
هالصار الحسين حسين * ويزيد الضايعه اخباره
***************
وأبد مـاتخلص السبحان ، لــو وصّفته كل عمري
محّد يدري شنهو حسين ، لان بــس الله بي يدري
كل الادري بِـيهْ حسيـــن ، اميري وسيدي وذخري
ومــاصار الأمر توّه
مـن آدم ومن حوّه
السيد عالبشر هوّه
وهوّ سيد التاريخ * وشما كتبت أحباره
***************
كرار الجوراني
( وصية من ام البنين الى العباس )
خبر عاجل ، من تقاتِل ، فلا اريدك ، ترد كامل
أَنه امّك ، وأحشمك ، يبو فاضل
*******************
يبني مـــاخذني ابـــوك آنــــه القضيتين
يبني الاولى بــت فحــول وبـــت ميامين
والقضيّــــــه الثانيـــه يحبيّــب العيــن
يدري عندي الغالي يرخص لاجل الحسين
علي يدري ، فده نسري ، على حسينه ، أنه وبزري
وطلبني ، وخطبني ، يبو فاضل
*******************
من رگـبهـم ســوّي مَعبَــر عـالنهر فوت
ومن شَـعَـر هاي الشوارب عَـمّـر بيـوت
و الّلي ينوي يشوف زينب ذبحه بسكوت
حتى مايطلع الهــاي النيّـــه أي صــوت
مناحرهم ، شواربهم ، الك يبني ، بمناصبهم
بعددها ، يـ گدها ، يبو فاضل
*******************
انت واخوانك اگلكم هــا يالحيود
نَـيمو عبدالله بمچانه وكفّو الزنود
وگبل لا يگعد اريد الجيش مفگود
كون يهتز المهَد من ركض الجنود
تركضوها ، تشردوها ، و عجاجتهم ، تعلّوها
بركضها ، بأرضها ، ، يبو فاضل
*******************
يبني عباس أرد اخبرك واستمع زين
الشمر لو گال ابن اختنا گله بأمرين
گلّــه بلغتني اعله هايه ام البْـنيــن
على اولاد الزهره ولدي عدها ثلثين
وثلث كامل ، لابو فاضل ، على حسينه ، وصبح كافل
تردهم ، زلمهم ، يبو فاضل
*******************
يبني اوّصيك عله زينب من تحــاچيك
دنّــگ وگللهـا إبشــري مـــن توّصيك
يبني وشمــا إلهـــا تنطـي الله ينطيك
عيونك چفوفك ضلوعك أي جزء بيك
إلك بيّـه ، هالوصيّـه ، تموت انته ، وتظل هيه
وصيتي ، قضيتي ، يبو فاضل
*******************
كرار الجوراني
الشايف مصايب كربله
تلگاهه روحه معلعله
بالهيمة ماتوا كل هله
اويلاه
الشايف اخوته مذبحة
جلمة يخوية تجرحة
وبگلبة صوت النايحة
اويلاه
عمت عيني اليعيش طفوف والعاشر
ما يگدر يضم دموعة عل الهيمة
اليسمع صوت ضلع حسين ما يرتاح
وصل صوت الكسر بحسين للخيمة
يا دمعة التشافي جروحة وتطيبة
وكل لحظة يبوية يصيح يا ضيمة
الشاف اخوته بلاية روس فراگهم يكتل ترة
الحاير بروحه وعيالة تبقة روحه موجرة
وين ابوي حسين طايح ماكو حل بهل ضهر
الگال يا عمة اشردن يا فشل تركض مرة
السلام على زين العابدين
___
الطر ال عليه ليل اهدعش
مو روحة لا گلبة انهش
ويشوف ابوه طوله انفرش
اويلاه
من يا جرح احجي أنه
كل لحظة تعبر جن سنة
بين الزلم كل الضنة
اويلاه
اليشوف الحرم ركضت على الصحرة
وتركض بالفلة النسوان بالعاشر
حمرة عيونه مو بيضة هظيمة اهناك
بين الجيش و ضعونه بقة حاير
المن يلتفت يا صوب هاي خيول
اجتهم عل الخيم والجيش ضل داير
جيش يركض عل المخيم وماكو لا والي وعلم
عمي يا عباس وينك صاح حرگوهه الخيم
وآنه متعلعل يعمي مات حيلي من طحت
جفوف طاحت يا حرام وطاح بعيونك سهم
السلام على زين العابدين
__
اليمشي مكسور بهزل
ومگيدة جفوفة بحبل
درب اليسر لا مو سهل
اويلاه
صعبة ترة بيت النبي
واليستحن اهل العبي
وياهن مشة تالي بسبي
اويلاه
هظيمة وماكو واحد گال اهل البيت
جا زحمة بنات الزهرة صعدن نوگ
ما خلص كتلهم غاد يالسجاد
صفية وخولة ماتن بالدرب مو سوگ
جا شيصير گلبه الشايل اشجم ااخ
نار الخيمة بضلوعة وبقة محروگ
يا حرام وهاي هيمة ومات بيهه جم طفل
يبجي المن يا مصيبة والدرب ما ينحمل
هاي ديرة وغاد ديرة ياهي اصعب عالحرم
هو هذا الشام ويلي والجفوف بنص حبل
السلام على زين العابدين
__
اليدخل الشام بكسر
ويه الضعن ذاك الضهر
ما تطفة جمراته عمر
اويلاه
عيد وطبل شام وفرح
بعينه الدمع طاح وطفح
جم مرة من عدهه انذبح
اويلاهه
ذبحوا گلبة من صاحوا ادخلوا السوگ
وتلگاهم طبل واحجار عدهم عيد
وفوگ ارماح روس اهل النبي المختار
باهلك يا علي شام الضيم وين يريد
وسفة ووگفت النسوان بين الناس
والسجاد يصفگ ايد فوگ الايد
اليدخل القصر بضعونه شتلگه روحه امن الهظم
اشلون شاف اهله وخواته ياا كسرته و الحرم
يا مايلة الدنيا اويه الزينب وگفت بذاك القصر
يا غريبة وهاي صعبة مو اميرة بنص خيم
#محمد فرج الحريشاوي
رجوع الضعن إلى كربلاء
أجيتك خويه من ابعيد
تلكاني اني زينب هاي
عفتك من رحت عطشان
كوم اشرب جبتلك ماي
كوم أنكت تراب الكاع
ماحن گلبك لملكاي
صار هواي ماشفتك
وماشايفني صار هواي
يبن أمي إلك حنيت
ومانسيتك وهل جيت
ملكة شلون احسبه يصير
أجيلك وانته مالاكيت
واخااا وامصيبتااا
—————————-
اجيتك من تعب روحي
واساهر ليلي وسط البر
أموت بدربي ماهميت
خسرتك چا بعد شخسر
اليمشي بنوكي أكله أسرع
بعد ما اكدر أتصبر
لو مو شوكي إلك يحسين
الصحره بسرعه ماتنطر
أريد اوصلك اباي حال
حره من الحبل بحبال
المهم يبن أمي أوصلك
عليه الدرب يكصر طال
——————————
سنه لو يبقه ممشه النوك
وسنه لو ممشه ليل انهار
والف مره أطب للشام
واضل احتار إلك واحتار
عذر يم گلبي ما خليت
زماني شما عليه اندار
ارجعلك أو ما انساك
وابجيلك بجي الماصار
رحت منعوني ما شوفك
بس هل مره ماعوفك
ارجعتلك ها إدي يحسين
تحن المست اجفوفك
—————————
من ذاك الضهر لليوم
مامليت بس ابجيك
وأنود من الصبح لليل
بمكاطر دموعي انعيك
ما فكر الصار اوياي
وروحه ورجعه أفكر بيك
ومحد يمي بس النوك
سولفتلهن بطاريك
يانوك اني اخوي حسين
واني الي علي تبجين
اني الجرحي نار بليل
تشوفه وماتحسه العين
محمد باقر الكعبي
درة حليبي تبدت وما مش راي
والماي ماضوكه بعد ماريد ماي
ست شهر وسهم النحر فت الروح
السهم اكبر من نحر ابني هواي
جيبولي ابني وكلشي ماريد
افراكك الصوم وشوفتك عيد
طوله زغير كد هوه الايد
يبن كلبي
انكسر كلبي يبن كلبي
صحت ربي
اخذ روحي صحت ربي
_
من الرمح نزلوه شويه شويه
خافن اشوفه منجرح مابيه
در صدري ويريد اللولد ياويلي
علويه ابنها عالرمح علويه
راسه ترف مو مال الارماح
ولو مالت العين الرمح طاح
وصوتي بعد من الهضم صاح
صحت كافي
نزلولي عبد كافي
على شفافي
دلوله على شفافي
___
كلولي موتي ولا عبد ما يرجع
شيرده لامه واهو بهيمه مكطع
طاح ابتسامة بيتنه النكشخ بي
راسه على ارماح الثكال اترفع
شيردك وما الك عنوان
يكولون عد حسين طفل جان
ومن العطش شو صار ذبلان
ذبل جسمه
من كد ما عطش جسمه
يريد امه
اعرفه انه يريد امه
___
عيفولي عبد الله يوادم نايم
ومن عمره يا هل الناس كلبي هايم
عبد الله بعده زغير مو مال حروب
حته على رجله بعدا ابد ما كايم
وحسين شاف اوليده ورتاح
شويه عبد من ايده هم راح
وحسين كام يكض بل الصفاح
سهم نحرا
يذبح امه سهم نحرا
يضل ضهرا
محني حسين يضل ضهرا
___
محمد عيسى المنصوري
يزوار على الوعد تلگوني
ــــــــــــــــــ
من البحر صوب النحر افرح ترى بزواري
يم القبر اني انتظر مِيتْ هلا بخطاري
صوتي اعتلى من كربلة حياكم الله لداري
يوم الحشر هذا الأجر وانتم ترى من انصاري
يالاحرار يوم الحشر بعيوني
يزوار على الوعد تلگوني
ــــــــــــــــــ
سيل الجمع ما ينگطع والراية تسبُگ راية
فوج وعدد مني المدد وانظر على المشاية
قلبي انتظر يا هو الحضر وي المواكب هاية
روج الأرض مثل النبض يا شيعتي الوفاية
يالاحرار يوم الحشر بعيوني
يزوار على الوعد تلگوني
ــــــــــــــــــ
دفتر وفة وعن معرفة يسجل حبيب الحاضِر
يملي الأسم حتى الرسم اعرف قلب كل زاير
والبي ذنب قادم محب امسح ذنوبة وغافِر
يگضي الصعب والـ بالقلب والعنده حاجة وحاير
والاسرار مگضية للوافوني
يزوار على الوعد تلگوني
ــــــــــــــــــ
هذا التعب كلة انحسب شكراً لكم خدامي
ماي انفرش درب العطش واسيتوا قلبي الضامي
شاب وكهل طفلة وطفل فرحتوا كل ايتامي
هاي العبي عن السبي هنه الطفنها خيامي
بالاصرار والتضحية تحبوني
يزوار على الوعد تلگوني
ــــــــــــــــــ
تحيون أمر طول العمر لمن اجيتوا لبابي
هذا الوعد والمعتقد انتم يشيعة احبابي
يهل الصدك يهل العشك انتم مطر بعَتابي
مثل القِدم اجرِ الخِدم كلكُم سوّة بِحسْابي
بالإِيثار والمعرفة تواسوني
يزوار على الوعد تلگوني
ــــــــــــــــــ
من اي زمن من اي وطن يتعنى جَاي وعازِم
طاف واسعى عالمشرعة لهاي الزيارة وهايم
لو بس نظر نال الفخر نال الكرامة القادم
من جد وجد قلبه انسعد يوم القيامة السالم
ترى النار ما توصل الخدموني
يزوار على الوعد تلگوني
ــــــــــــــــــ
الشاعر زين العابدين الشمري
#الامام #علي #السجاد ع
مصابك جرحي
عـذابـك ذبـحي
يبو الـباقر يمهـمـوم
اعـد اجـروحك
واساعد نوحك
دليلك ادري ملجوم
ــــــــــــــــــــــــــــــ
بالدموع •• ابدي اكول
مصابك جرحي والحسره ماتموت
علـيك بكـل وكـت عـبـره ماتموت
حزين ابكلـبي الك كسـره ياتموت
دمعاتي تنزل والحزن ••
بعيوني يرسم غربتك
مولاي أشوفنك جرح ••
كلـش جبيره حـيـرتك
شـايف ابوك الـينذبح ••
وشايفها توكع خيمتك
طول الزمن ماتنكطع ••
حفرت اخدودك دمعتك
شفت بعيونك
تـفـر اضعونك
عليل وكلبك يكول
يزينب صبرج
مصايب دهرج
اخوج ترضه الخيول
••••••••••••••••••••
بالنياح •• هذا صوت
شفت عـباسك الـواكـع عالفرات
طفه نوره القبل ساطع عالفرات
جرح ويشـيب السـامع عالفرات
مولاي يالشايف هظم ••
مثله ولا مر عالبشر
اجفوف الحميه امكطعه ••
عليهن يون حتى النهر
عباس غيرة حيدره ••
اعظم كفيل اعظم كمر
من غاب ماضلت خيم ••
عنده اخو ظهره نكسر
جروحك صاحت
يزينب طاحت
جفوف الغالي عباس
جبيره الحيره
يشيخ الـغيره
صحت ومهبط الراس
•••••••••••••••••••••
بالحبال •• جتفوك
رحت ويه الحرم شايل ياجروح
أشـوفن دمعـك السايل ياجروح
بسياطه يضربك العايل ياجروح
للكوفه من طب الضعن ••
كلبك تحس بيه ينعصر
مثل السهم وسط الگلب ••
ضحكات عدوان الخدر
نسـوان كـلها مـجـتفهه ••
وعاشن عـذابات اليسر
امن الكوفه للشام الضعن ••
يطلع قصر ويطب قصر
بأمر هالـعسكـر
بحبل من تنجر
غربتك صعبه مولاي
كيضت ايامك
تنوح اخيامك
وتون من تنظر الماي
•••••••••••••••••••••
يالغريب •• يالحزين
كرب موتك جرح عينك ياحسين
مصايب خلصت اسنينك ياحسين
غـريب ومـاكـو الـيعينك ياحسين
أسبلت الـيدين وكلت ••
للـباري اروح ابـغـربتي
عايش متاعب بالسبي ••
لا ماحصل من حيرتي
آنـة الغـريب الـمنهظم ••
ومايوم نشفت دمعتي
ما انسه منحر منذبح ••
لآخر انفاسي وموتتي
الأخير أنفاسك
يكول حساسك
حسينا واحـسيناه
ذبيح وضامـي
يحـزن ايـامـي
غـريبـا واغـريبـاه
•••••••••••••••••
بالجروح •• والعويل
ننوح وتـجري يـادمعه ياغريب
الزمن نار الـعمر شمعه ياغريب
العوالم كـلـهه منفجعه ياغريب
مظلوم خلـصت الـعمر ••
وبعد الدفن هم مظلوم
مـهـدوم كـبرك سـيدي ••
وأنفاسك لهسة اهموم
أرض البقيع ابكل حزن ••
ضـلت تون ابكـل يـوم
صاحت الزهره بالـدمع ••
ويلاه عله ابني المسموم
طلبنه الواحد
يجينه الـقائد
بدينه نبني الكبور
يجي خطارك
بدمـع يتبارك
ننوح براحه ونزور
•••••••••••••••••••
تمت بعون أسد الله الغالب
العبد الذليل علي الكعبي
خويه ما بيه اعله كيفج رمل نايم باالجرح
خلي جفج جوه ضهري انترست اجروحي ملح
مجانج بكلبي زينب ماخذه هسه الرمح
وصَلَتْ اعليه الحوافر من خلص فرض الذبح
ميت اني بس كضيت الصفاح
من الشمر حركوا الخيم صاح
بيش الحوافر طالبه حسين
غير اليموت ينام مرتاح
مجبل الليل بضلامه لمي اخيج وذره وذره
ودوري بلكت بالمخيم ضال من الماي كطره
رشي ماي اعله الترابه تجوي يا زينب الصحره
___________________________..
شلت راسي من الترابه وعاينت حال الخدر
گمت بس طحت اعله وجهي من ألم سيف الشمر
احترگ گلبي ويه المخيم من صهل يمه المهر
اسمع رقيه تنادي بويه رد طفي الجمر
من جستي جلدي وكزبر الضوك
حسيت جفج يختي محروك
شلون الحبل باجر يشدوه
وعگب المهابه يلفي السوگ
ما متت يختي بذبحهم متت من حركوا خيمجن
ولا تحشمن اني ميت وبعد يا هو اليفزعلجن
مطشرات بكاع هيمه و يكسر الخاطر وضعجن
____________________________
((فاجابته السيده قائله))
فاجدة الراي واجيتك وياهو ينطيني نشد
بالجثث ضليت ادور و انمرد كلبي مرد
فكلي حضنك خل اشبكك بلكي اموت وما ارد
وين ارد وما اكو خيمه ولا اكو فزاعه تهد
للذبح ماخذ دمك متاع
ومو سلعه راسك ليش ينباع
جا كلب اخيتك يصبر اشلون
من تشوف دمك تارس الكاع
لام الوادم حنانك وانته لموك بحصيره
والشمر لابس عباتك فرهدوا بخت العشيره
حركوا كلب حسين صاحوا طكوا بنيته الزغيره
____________________________
يلي ما خلص دعائك خلصوك من الطعن
شلون اشبكك والله حيره انته ما عندك حضن
اسمع ونينك و اكولن موش الحسين اليون
ساحكة الخيل بلحيتك وانه ساحكني الحزن
يا كلبي ون حسين مجتول
وداسوا بخت هاشم بالخيول
اليابس لسانه بذمت الماي
بس التحركه النار شيكول
جايبه الماي واجيتك لا تكول اختي نستني
بحلمي ما عفتك يخويه ليا سبب رحت وعفتني
و تيهت درب المخيم هلبت تكوم و تزتني
____________________________
مرتضى عامر الشمري
صارلهه زينب يخوتي هواي
لانايمه ولاشايفه أفياي
سلبو حلمنه من العيون
خاف الحلم بيه نشرب الماي
مسيت العافيه عليكم يخوتي
الذبحوكم أمس يردون موتي
وياموتت المره خويه يحسين
ميته وحادي ضعني يگلي موتي
مسيت العافيه عليكم يخوتي
ديره .. ديره .. فرو الدنيا بضعنه
ديره .. ديره .. نطيح محد يفزعلنه
ديره .. ديره .. خلافكم ميته المحنه
@@@@@@@@@@@@@@@@@@
وي الخرابه شنهي أم عون
ضلمه وبناتك خايفه شلون
شينيم المچتوفهه أديهه؟
ومو يم اخو ماتغفه العيون
امرافس خلصت روحي يروحي
ومايخلص يخويه عليك نوحي
وعلي گوه علعيني رايحه حسين
تتدري بزينب أله تگلهه روحي
امرافس خلصت روحي يروحي
شوغه .. شوغه .. وعلي مامرتاحه ليلي
شوغه .. شوغه .. أوگع ويرگض يجيلي
شوغه .. شوغه .. علي يگومني علحيلي
@@@@@@@@@@@@@@@@@@
امكابح گضوهه ويانه الغروب
ويدعولنه بشلعان الگلوب
والسوط خويه هواي طماع
چادود صار وهوه متعوب
أسولـف بـيـك ونـه عللهزيله
ودور ماكو واحد وشتكيله
تمنيت امن أخوتي يگرب حذاي
بسمي يصيحلي ويفرش شليله
أسولـف بـيـك ونـه عللهزيله
ركضي .. ركضي .. صيحو أيسي منخوتج
ركضي .. ركضي .. زينب يسمعون صوتج
ركضي .. ركضي .. من يصير اليوم موتج
@@@@@@@@@@@@@@@@@@
للكوفه طب ضعن الاجاويد
وتلگته الوادم هواديد
الله ولحد خويه يحسين
صاحو يزينب جيتج عيد
وصلنه وكل عرف مامش لگينه
العرف يحسين ماضل بس عبينه
أركضن يله اركضن خلص الليل
وصار مناوب عليكم بچينه
وصلنه وكل عرف مامش لگينه
وحده .. وحده .. عمه لاتبچن سويه
وحده .. وحده .. خايفه يرگضون ليه
وحده .. وحده .. وتوگع الطگه برقيه
رسول رياض
"" گعديه""مولاتي زينب (عليها السلام) لمولاي ابا عبدالله (عليه السلام) طريق #السبي