Telegram-канал ff12ff - خـواطـر قـصـيـرة🌸: Неотсортированное

خـواطـر قـصـيـرة🌸

24 июля 2025 15:33

اللهُمَّ لا تجعل قلوبنا يمسها ضرّ وأنت ربُّها .🌸

خـواطـر قـصـيـرة🌸

23 июля 2025 17:39

الحمدلله على ابتلاءٍ لا يعلمه أحد، ولا أستطيع البوح به لأحد، ولا يملك حله أحد إلا الله وحده.
ابتلاء عظيم في نظري، لأنه سكن أعماقي، وسُدّت فيه كل الأبواب، إلا باب الله.
سنين بتمر، وشهور وأيام وليالي ثقيلة...
ليالي بكيت فيها حتى ما بقتش قادرة آخذ نفسي من الحزن والضيق،
ليالي حسّيت إني مش هقدر أكمّل لتاني يوم.
ومع ذلك… عدّيت.
عدّى ربنا بيا، بلُطفه ورحمته.

أنا مش بس بصبر، أنا باحتسب… وباختار إني أكمّل، رغم كل التعب، لأني عارفة إن ربنا شايف، وسامع، وبيُدبّر.

بقالي فترة متعلقة جدًا بسورة يوسف، لكن المرة دي مختلفة…
ببصّ لها كأنها بتتكلم عني،
عن قلب بيصبر، وعن فُقد لا يُعوّض إلا بالله،
عن انتظار طويل، وسنين ماحدّش حاسس بيها إلا اللي عاشها.

سيدنا يعقوب… صبر سنين على فُقدان ابنه، وفضل قلبه متعلق بيه رغم السنين،
وقالها ببساطة موجوعة: "إنما أشكو بثي وحزني إلى الله".
تخيلت كام ليلة نامها والدمعة في عينه، وكام مرة نادى باسم يوسف وهو بيبكي!

وسيدنا يوسف… اللي كان طفل صغير، واتباع، واخوته سابوه في البئر، ومكث في السجن ظلم،
كل ده، لأنه في الآخر ربنا كان بيعدّه، لمكانة ماكانش هيوصلها إلا بالطريق الصعب ده:
"وكذلك مكنا ليوسف في الأرض".

اللي حصل له، كان عين الخير، رغم إنه ما كانش باين وقتها.
واللي بيحصل لنا دلوقتي… يمكن يكون الخير اللي مش شايفينه، بس ربنا شايفه وده الاهم ، رب الخير لا يأتي إلا بالخير .

كل ده بيخليني أتمسك، وأقول:
ما دام الله هو المدبر… فكل اللي بيحصل، بيصبّ في مصلحتي، حتى لو وجعني.

الاستفادة الحقيقية من الكلام ده كله إننا نصبر ونحتسب، لأن ده سلاحنا الوحيد، وحلّنا الحقيقي، لحد ما ييجي وقت اللي ربنا شايفة مناسب لينا … الوقت اللي فيه الفرج، والعدل، والتعويض اللي يليق بقلوب تعبت وسكتت وسلّمت أمرها لله.

الحمدلله .