Behzod Fazliddin

25 октября 2024 07:38

Бунча катта кетмасанг, Ҳақиқат,
барибир, сотиласан-ку!

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

24 октября 2024 06:51

“Гулистон”да ишлар эдим. Маҳмуд Саъдий деган ходимимиз бозорда китоб айирбошлаётган экан, милиция ушлаб олиб кетибди. У жуда билимдон, китобхўр; биз уни Шайх деб атар эдик…
Менинг илтимосим билан милиционер идорага келди, ёшгина лейтенант экан.
Гапни узоқдан бошламоқчи бўлдим:
– Ибн Сино Бухоронинг китоб растасида Форобийнинг Арастуга шарҳларини топиб олганда хурсандчилигидан бир зумга ҳушини йўқотган экан…

– Форобий деган шоирни эшитганман, у ҳам сизда ишлайдими?

– Йўқ, бизда фақат Шайх Саъдий ишлайди.

Ҳазил-мутойиба ўтмади. Аниқ гап қилдим:
– Бу йигит уйланганида келинни ошхонага тушириб келган. Чунки уч хонали уйининг ҳамма хоналари лиқ тўла қитоб бўлган. У шунақа китоб жинниси.

– Жиннилигига справкаси борми?

Асқад Мухтор “Тундаликлар”идан.

#Иқтибос #Устозлар #Ижод_ва_эътиқод

@Behzod_Fazliddin

Behzod Fazliddin

22 октября 2024 08:55

Худойим, барибир, раҳмим келади
Ўзига сиғинган “худоча”ларга...

© Беҳзод Фазлиддин @Behzod_Fazliddin

#Эски_дафтардан

Behzod Fazliddin

20 октября 2024 07:31

Бошқаларнинг вақтига жуда кўп хиёнат қиламиз.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

18 октября 2024 09:29

#Иқтибос

ҲИЛМ

Ҳилм деб бўлар-бўлмас ишга аччиғланмайдурган, арслон юракли, юмшоқ табиатли бўлмоқни айтилур.
Ҳилм инсонларнинг табъидан хусумат, адоват, ғазаб, ҳиддат каби ёмон хулқларни йўқ қиладурган ҳар кимча мақбул бир сифатдур.

Ҳилм илми ахлоқ юзасидан инсонга энг керакли нарсадур.

Нафснинг роҳати, қалбнинг матонати, фикрнинг саломати, виждоннинг ҳаловати ҳалим табиат бўлмоқ ила ҳосил бўлур. Чунки ҳалим кишилар ҳар қанча қувват ва қудрат соҳиби бўлса ҳам, ўзидан ожиз кишиларга шиддат ила муомала қилмас. Фикри саломат кишиларнинг қалби ҳалим, табъи карим ўлур. Зероки, вужудимиздан пайдо бўладирган афъол ва ҳаракотимизнинг манбайи ҳавас ва орзудур. Бу ҳавас ва орзуга фақат ҳилм ила ғолиб келурмиз ва бу васила ила тўғри йўлга кируб, яхши хулқ соҳиби, дин ва миллат ходимларидан бўлурмиз.

Дунёда чин инсон бўлмак учун ҳаваснинг қўлига нафснинг жиловини бермайдирган, бўлар-бўлмас нарсалардан аччиғланмайдурган, совуққонли, юмшоқ табиатли, мулойим сўзли, ҳалим ва сабрли бўлмак лозимдур...

Расули акрам набиййи муҳтарам афандимиз: «Алҳилму саййидал ахлоқ – Ҳилм хулқларнинг саййидидур», – демишлар.

Суқрот ҳаким: «Шиддат ила муомала қилган кишиларга ман виқор ва ҳалимлик ила муқобила қилурман, чунки ҳилм шиддатни, хусуматни паст қилур. Лекин кишини ожиз ва хорлик даражасига тушурадурган ҳалимликдан ман безор», – демиш.

Бу сўзга қараганда, саховатнинг ифроти исроф ўлдиғи каби ўринсиз ерда ҳилм истеъмол қилмак инсоннинг виқор ва эътиборини поймол қилур. Шунинг учун ҳилмият ҳудудидан – чегарасидан чиқмай, ғазаб, ҳиддат каби ерларда ҳилм истеъмол қилуб, нафснинг ҳароратини паст қилмолидур. Лекин тепса тебранмайдурган, туртса тинг этмайдиган бўлуб, ғайрат, шижоат ўринларига ҳам мулойимлик ишлатув ҳалимлик ҳудудидан ошуб, бўшлик, анқовлик дунёсига чиқмакдур. Бундай ҳалимликдан қочмак, ҳазар қилмак керак...

Абдулла Авлоний

“Туркий Гулистон ёхуд ахлоқ”дан.

#Миллат_мунавварлари

@Behzod_Fazliddin

Behzod Fazliddin

17 октября 2024 09:42

Ҳар хил экстрасенсу азайимхонларнинг айби йўқ: улар алдангиси келганларни алдайди.

© Асқад Мухтор

@Behzod_Fazliddin

Behzod Fazliddin

16 октября 2024 07:49

Қўйиб берсанг, қотилнинг ҳам ўз ҳақиқати бор...

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

14 октября 2024 14:01

Ўзимдан буюкроқ Қалбим бор десам,
Ўша ҳам бировнинг мулкига ўхшар...

© Беҳзод Фазлиддин @Behzod_Fazliddin

Behzod Fazliddin

13 октября 2024 06:44

Маърифатпарвар бойлар кўпайиши керак.
***
Агар одамлар жон ҳар лаҳзада айрилиб қолиш хавфи бор омонат эканини англаб етганида, аллақачон бир-бирларини кечириб юборган бўлармиди...
***
Яхшиликни кўзлаб аччиқроқ гапираётган одамнинг оғзига урманг! Ширинсўз ёлғончилардан эса узоқроқ юринг.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

12 октября 2024 07:39

Ўзига ишончни кибр, ишончсизликни андиша деб ўйламанг.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

10 октября 2024 12:56

Зўр бўлсанг, тилингни ўзлари ўрганиб олишади.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

08 октября 2024 15:24

Шовқинчи дунёга малолсан, дўстим,
Бундай жамиятга уволсан, дўстим...

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

07 октября 2024 12:38

Ўзини ўзи жадидларга менгзайдиганлар кўпайибди. Миллат учун бошни дорга тутишни-ку гапирмай қўяверайлик, ҳеч қурса, ижод майдонида жиндай бўлса ҳам жадидлардек жасорат кўрсата олдикми ўзи?!
 
#Йўл_йўлакай #Таҳрирсиз_хаёллар #Ижод_ва_эътиқод

@Behzod_Fazliddin

Behzod Fazliddin

05 октября 2024 07:17

Катта охурлардан ем еб юрган отларга ҳам осон тутманг, бир кунмас-бир кун уларнинг ҳам бўғзига бехос пичоқ тортилиши бор...

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

03 октября 2024 16:14

Ҳаммасига чирт юмиб кўзни,
Шартта учиш керак – вассалом!

© Беҳзод Фазлиддин @Behzod_Fazliddin

Behzod Fazliddin

24 октября 2024 13:42

Сени узоқлардан излаб адашдим,
Дук-дук уриб турган юрагимсан, Бахт!..

© Беҳзод Фазлиддин @Behzod_Fazliddin

Behzod Fazliddin

23 октября 2024 12:08

***
Бардош либосининг иплари тиғдан,
Амаллаб кийдингми, ечишдан не наф?
Кўзингни яширма кўнгли мунглуғдан,
Сева олиш шараф, севилиш шараф.

Дақёнусдан қолган бу даҳри дунда
Бир янги заррадай кўзга илинсам.
Муродим гуллари очилган кунда,
Не тонг, яшаш учун маҳкум қилинсам!

Сўнгги нафасгача эшиклар очиқ,
Ўз ҳолидан ўзи гумонда гумон.
Наздимда, кўрмаган бу қадар Ошиқ
Бир томчи Дийдорга ғарқ бўлган жаҳон...

2008 йил

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

20 октября 2024 15:04

***
Яшайсан де, ўлмайсан деб айт,
Айтгин: Умринг кетмас шамолга.
Ахир қуёш ботмоқда бу пайт,
Кун айланиб борар заволга.

Оҳ, қўрқаман, хавотирдаман,
Кўрганларим туш чиқмасми деб.
Энди олам бўлганда чаман,
Икки қўлим бўш чиқмасми деб.

Яшайвер де, севавер дегин,
Чекинмасин юракдан ғайрат.
Ишончимга куч-қудрат бергин,
Руҳ булбулин бетиним сайрат.

Ўтса ўтди, бўлса бўлгандир,
Не десам ҳам жон аччиғида.
Жуда бахтли бўлгим келганди
Кўзларимнинг очиқлигида.

Яшайсан де, ўлмайсан деб айт,
Айтгин: Умринг кетмас шамолга.
Гарчи қуёш ботмоқда бу пайт,
Кун айланиб борар заволга...

2010

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

18 октября 2024 14:41

Томчилаб-томчилаб бўлмоқда адо
Ўз-ўзига ҳадди сиғмаган кўнгил...

© Беҳзод Фазлиддин @Behzod_Fazliddin

Behzod Fazliddin

17 октября 2024 14:41

Календарга қараб ёзмайман,
Кўнглимнинг ўз тақвими бордир...

@Behzod_Fazliddin

#Йўл_йўлакай #Таҳрирсиз_хаёллар

Behzod Fazliddin

16 октября 2024 15:05

ЭЪТИРОФ

Осмонларга учмоқ истасам,
Елкамдаги қанотим – Тилим.
Дунёларни қучмоқ истасам,
Менинг учқур Ғиротим – Тилим.

Мен булбулга ҳавас қилибман,
Сенсиз нўноқ қарға эканман.
Мен дулдулга ҳавас қилибман,
Сенсиз чўлоқ йўрға эканман.

Гарчи содда шеърлар тўқидим,
Гарчи сўзга айладим ихлос;
Мен ўзимни ўзим чўқидим,
Сени яхши билмаслигим рост.

Меники шу яланғоч сўзлар,
Ночор буни замонга йўйдим.
Қаён боқмай, шундай оч сўзлар,
Наҳот сени унутиб қўйдим?

Забонимни тилиб кетдими
Ўзга боғнинг барг – ниналари?
Навоийда қолиб кетдими
Сўз мулкининг ганжиналари?

Хорижий тил – жаҳонга кўприк,
Пайти келса, бу ҳам бир иқбол.
Ўз тилингда сўз кетганда лек,
Дудуқланиб турсанг… Бу не ҳол?!

Юрагимни тешади ўқлар,
Сенсиз менинг эртам куларми?
Она тилим, мендай дудуқлар
Фарзандликка ярай оларми?

Бас, дардингни олмасдан туриб,
Ўзга тилни уқмайман, Тилим,
Сени яхши билмасдан туриб,
Хорижга ҳам чиқмайман, Тилим!

2002 йил

© Беҳзод Фазлиддин @Behzod_Fazliddin

#Тушларингдан_чиқиб_келдим китобидан.

2008 йил сурати.

Behzod Fazliddin

15 октября 2024 12:53

#Кайфият #Лаҳзалар

***
Шамоллар абадий, ёмғирлар мангу,
Биздан сўнг ҳам оппоқ қорлар қолади.
Шаксиз, яшайверар қувончу қайғу,
Изҳорлар, иқрорлар, зорлар қолади.

Минг йилларки, аслин ўзгартмас тоғлар,
Салобати ўша, виқори ўша.
Таровати сўнмас дилоро боғлар –
Ҳануз тошқин ҳислар талпинган гўша.

Бехос такрор-такрор чорладим, чоғи,
Япроқлар тизилиб келди сўзимга.
Қобирғаси синган хазонлар оҳи
Оҳангдор ҳасратдек туюлмас кимга!..

Шунчаки тақлидга ўхшарми бу ҳол –
Демангиз, бу фақат илҳом онлари.
Руҳимда яшади шундай безавол
Ҳаёт деган шеърнинг қаҳрамонлари.

Шамоллар. Ёмғирлар. Дарёлар. Тоғлар...
Азал нафасини келтиргай абад.
Япроқлари оят ўқиган боғлар...
Табиат тилида илоҳий суҳбат.

2011

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

2015 йил. Дўрмон сурати

Behzod Fazliddin

13 октября 2024 15:21

Ғажишга шай турган бўриларни ҳам
Чақиргим келади биродарликка...

© Беҳзод Фазлиддин @Behzod_Fazliddin

Behzod Fazliddin

12 октября 2024 14:29

Осмон мени қўйиб юборса,
Ёмғир бўлиб сизга қайтаман...

© Беҳзод Фазлиддин @Behzod_Fazliddin

#Сен_қачон_гуллайсан

Behzod Fazliddin

11 октября 2024 09:03

***
Ёлғон, ёлғон, ёлғон ҳаммаси,
Фақат иймон, фақат иймон ҳақ.
Ҳар манзилда фано ҳамласи,
Аро йўлда жонинг муаллақ.

Қўллар қисқа, орзулар майиб,
Қонга тўймас армон ханжари.
Нечун олам борар торайиб
Ўсган сари, улғайган сари?

Парво қилма, фарёд айлама.
Кунларингни нурга қондиргин.
Чуқур кетма, ортиқ ўйлама,
Фақат ёнгин, фақат ёндиргин.

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

09 октября 2024 12:06

ИЗОҲ

Ўзимни яширдим – ўзимдан қочдим,
Ҳечликнинг бағрида яйрай деб бир оз.
Аммо, нелар қилай, нафас олсам ҳам –
Чиқиб келаверди “Мен” деган овоз.

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

08 октября 2024 08:57

Ислом инсонни чекламайди, тартибга солади.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

06 октября 2024 14:09

Ё учиб кетмайди, ё ерга тушмас,
Яшаб бўлмайди-да бу юрак билан!

© Беҳзод Фазлиддин @Behzod_Fazliddin

Behzod Fazliddin

04 октября 2024 07:41

Қобирғаси синган хазонлар оҳи
Оҳангдор ҳасратдек туюлмас кимга?!

© Беҳзод Фазлиддин @Behzod_Fazliddin

Behzod Fazliddin

03 октября 2024 10:20

Одамларга табиатан ожиз томонлари, турмушидаги камчиликларини эслатавериш билан Яратганга ношукрлик қилишларига сабабчи бўлиб қолиш мумкин.
Шу боис уларга имкон қадар шахсиятидаги яхши жиҳатлар, ҳаётнинг ёруғ томонларини кўрсатинг, шу орқали Худонинг ҳикматини ҳис қилиб, шокир бандалардан бўлишига ёрдам беринг.

***
Ёнимиздагиларга табассум билан боқишимизнинг ўзи ҳам эҳсон бўлгандан кейин меҳрибон ва раҳмли Раббимиз бизни қанчалар бой қилиб қўйганини тасаввур этаверинг.

***
Англайдиган, фикр юритадиган одам учун хатолар ҳам буюк мураббийдир.

#Йўл_йўлакай #Таҳрирсиз_хаёллар

@Behzod_Fazliddin