Azattyq - Азаттық

23 июня 2023 15:36

Рудный әкімі тұрғындардың интернетте жазған пікірлерін қағазға шығарып алып, "желіде қорлағаны" үшін жауапқа тартатынын айтып, қоқан-лоқы жасады

Қостанай облысы Рудный қаласының әкімі Виктор Ионенконың тұрғындармен кездесуінен видеоны Press.kz сайты жариялады.

Видеода әкім Рудный тұрғындарының ағаштарды кескені үшін шенеуніктерді балағат аралас сөздермен сынап жазған пікірлерін қағаз түрінде көрсетеді.

"Міне, осындай қорлайтын пікірлер көп. Оларды зерделей бастасаң, бәрінде сұрақтар болмай шығады. Сондықтан пікір жазбас бұрын, оның себебінін анықтап алсаңыздар. Екіншіден, не туралы айтып жатқаныңды білу керек. Ағаштарды кесер кезде оны қалай жасау керегін бес рет ойладық. Адамдардың көбі не болып жатқанын білмей жатып қорлайды, кейін олар бұның мәжбүрлі шара екенін түсіне бастағанда әңгімелеспейді" деді Ионенко.

Видео: Press.kz

t.me/azattyq

Azattyq - Азаттық

23 июня 2023 14:06

Қаңтарда оққа ұшқан отбасының өліміне қатысты сот: прокурор айыпталушыға 7 жыл түрме сұрады

Бұл жөнінде құқық қорғаушы Бақытжан Төреғожина хабарлады. Сот Алматы гарнизонының әскери сотында өтіп жатыр.

Прокурор "билік өкілетін асыра пайдаланды" деп айыпталған Алматы облысындағы 18 404 әскери бөлімінің қызметкері, қатардағы жауынгер Данияр Егембаевты 7 жыл бас бостандығынан айыруды сұрады.

Былтыр 8 қаңтарда Нұрболат Сейітқұлов пен Алтынай Етаева және олардың 15 жастағы қыздары Нұрай Оразыхан Талдықорған қаласында кешкі тоғыздар шамасында жеке көліктерімен кетіп бара жатқанда арнайы жасақтың оғынан қайтыс болған. Данияр Егембаев Нұрболат Сейітқұлов пен оның қызы Нұрай Оразыханның өліміне қатысты істе айыпталушы танылған. Алтынай Етаеваның өліміне қатысты іс жеке өндіріске шығарылған.

t.me/azattyq

Azattyq - Азаттық

23 июня 2023 13:03

📱 "Тиктокта өте көп отырамын. Не істеймін?" Интернетке тәуелділікті жеңудің алғышарттары

Азаттықтың "Жаншипа" психологиялық подкасының 15-эпизодында интернетке, әлеуметтік желіге тәуелділік мәселесін талқыладық. Желіге тәуелділікті қалай жеңеміз? Бала интернетке тәуелді болса, ата-ана не істеу керек? Желіге тәуелділіктің белгілері қандай?

Міне, бұл сұрақтарға 20 жылдан аса тәжірибесі бар психолог Алтыншаш Матаева жауап берді. Эпизодты мына платформалардан тыңдай аласыз 👇🏻

🎙Apple podcasts
🎙Google Podcasts
🎙Spotify
🎙YouTube
🎙Азаттық сайты

t.me/azattyq

Azattyq - Азаттық

23 июня 2023 12:01

"118 заңсыздық және 47 млн теңге залал": Маңғыстауда "Өзенмұнайгаз" бен оның мердігерлеріне қатысты тексерудің қорытындысы жарияланды

"ҚазМұнайГаздың" баспасөз қызметінің хабарлауынша, тексеру нәтижесінде "Өзенмұнайгаз" бен оның мердігерлерінен 118 заңсыздық пен сәйкессіздік анықталған.
Компания мәліметінше, 7 факт бойынша материалдар құқық қорғау органдарына беріліп, 10 факт бойынша қызметтік тергеу жүріп жатыр. ҚМГ 101 мәселе бойынша жауапты тұлғалар тәртіптік жазаға тартылатынын хабарлады.

"ӨМГ-ның жалған түрде сырттан жұмысшыларды жалдағаны туралы ақпарат тексерілді. ӨМГ-ға келтірілген алдын ала шығын көлемі 47 млн теңге шамасында екені анықталды. 2022-2023 жылдары ӨМГ және "БерӘлі Маңғыстау company" арасында жасалған келісімшартқа сәйкес, орындалған жұмыс актілеріне талдау жүргізілді. Соның нәтижесінде 311 бригада-сағатқа (27,8 млн теңге) артық істегені, сонымен бірге 69 млн теңге көлемінде жұмыс орындалмағаны анықталды. Нәтижесінде 97 млн теңге артық төленді" деді арнайы комиссия.

ҚМГ-ның айтуынша, ӨМГ-да азаматтардың жұмысқа орналасу алгоритмі де бұзылған. "Сирек қолданыстағы мамандық иесі ретінде жұмысқа қабылданған 238 адамның 17-нің біліктілігі жоқ болып шықты. 33 адам қысқа мерзімде компаниядағы өзге қызметтерге ауысып кеткен. Осылайша сирек қолданыстағы мамандық ретінде жұмысқа орналасу штатқа кірудің амалы ретінде пайдаланған" делінген хабарламада.

Тексеріске жұмыссыз қалған "БерӘлі Маңғыстау Company" кәсіпорны мұнайшыларының наразылығы себеп болған. Сәуірдің ортасында олар жұмыс беруді талап етіп Астанаға барды. Бір тәулік энергетика министрлігі алдында қонған мұнайшыларды полицияның арнайы жасағы күштеп ұстап әкеткен. Мұнайшылардың наразылығынан кейін келіссөз басталып, екі айға созылды. Маусым айында ғана "Өзенмұнайгаз" компаниясы наразылыққа шыққан мұнайшыларды жұмысқа орналастыру туралы есеп берді.

t.me/azattyq

Azattyq - Азаттық

23 июня 2023 10:57

Жерорта теңізінде жүздеген босқын Грекияға жете алмай суға батты

Бұл туралы Пәкістан федералдық тергеу агенттігі бейсенбі күні Reuters ақпарат агенттігіне хабарлады.

Марқұмдардың туыстарының айтуынша, мигранттар мінген кеме Ливиядан Грекияға қарай жүзген.

Бұның алдында ресми түрде 82 адам өлді деп танылған, 104 адам тірі қалғаны жарияланған. Тергеушілер қаза болған босқындардың кімдер екенін анықтап жатыр. Теңізге батқандар бұдан да көп болуы мүмкін.

t.me/azattyq

Azattyq - Азаттық

23 июня 2023 09:49

Польша Тәжікстанда оппозициялық топтың жазбасына "лайк басты" деп айыпталған азаматты еліне депортациялады

Тәжік азаматы Сорбон Әбдірахимзоданың адвокаты Богумив Зигмонт Польша билігі Адам құқықтары жөніндегі Еуропа сотының шешіміне қарамастан, азаматты депортациялағанын айтады. Енді оны Тәжікстанда ұзақ түрме жазасы күтіп тұр дейді адвокаты.

Freedom for Eurasia құқық қорғау ұйымының өкілі Ләйла Назгүл Сейітбек Twitter парақшасында Әбдірахимзоданы әскери ұшақпен Польшадан Болгарияға жеткізгенін, онда ол уақытша ұстау мекемесінде отырғанын мәлімдеген.

Сорбон Әбдірахимзоданы өз елінде қандай бап бойынша айыптап жатқаны белгісіз. Сорбонның туыстары оппозициялық "Группа 24" тобының материалына "лайк" басқаны үшін қуғын көріп жатыр дейді.

t.me/azattyq

Azattyq - Азаттық

23 июня 2023 08:47

Ресейге электронды тауар жөнелткен қазақстандық бір компания туралы 👇🏻

Алматыдағы "Elem Group" компаниясы соғыс басталған соң 20 күн ішінде құрылған. Жұмыс орны қарапайым, шағын кеңсе көрінгенімен, Statsnet деректер базасының мәліметінше, компанияның былтыр 9 айдың ішіндегі кірісі 6,5 миллиард (14 миллион доллардан асады).

ImportGenius, Sinoimex базаларындағы кеден деректері бойынша, компания биыл қаңтарда Ресейдің Санкт-Петербург қаласында орналасқан “Стрелой Е-Коммерц” деген компанияға кемінде 300 рет жүк тасымалдаған. Оның 273-і АҚШ “өте маңызды” деп сипаттаған екі мақсатта қатар қолданылатын тауар тобына кіреді.

Elem Group компаниясын ресейлік кәсіпкерлер Владислав Жиляев пен Кирилл Туляков құрған. Кирилл Туляков Ресейдегі тауарды импорттаған “Стрелой Е-Коммерц” компаниясы құрылтайшыларының қатарында да бар. Ашық дереккөздер “Стрелой Е-Коммерцтің” Ресейдегі мемлекеттік компаниялармен байланысы барын көрсетті.

t.me/azattyq

Azattyq - Азаттық

23 июня 2023 07:57

Соғыс және санкция: Қазақстан фирмалары Ресей қорғанысына қалай көмектесіп жатыр?

Соғыс басталғалы Қазақстан мен Қырғызстаннан АҚШ-тың Texas Instruments, Analog Devices сияқты алпауыт компаниялары өндірген, екі мақсатта пайдаланылатын тауарлар импорты артқан.

Кеден есебіне қарағанда, екі ел компаниялары Ресейге микрочип, телекоммуникация құралдары мен басқа да электроника түрлерін жіберген. Украина әскері ресейлік зымыран, танк, тікұшақ, дрондар мен радио жүйесінен осы бөлшектерді тапқан.

Азаттық жаңа зерттеуінде Қазақстан мен Қырғызстаннан екі мақсатта пайдаланылатын экспорттық технологиялар алып отырған ресейлік фирмалардың бұрын Ресейдің қорғаныс өнеркәсібіне, Батыс елдері мен Украинаның санкциясынан зардап шеккен мемлекеттік ұйымдарға электроника сатумен айналысып келгенін анықтады.

🔗Зерттеуді оқыңыз

t.me/azattyq

Azattyq - Азаттық

23 июня 2023 06:59

⚡️ Журналист️ Думан Мұхаммедкәрім "экстремизмді қаржыландыру" ісі бойынша екі айға қамауға алынды

Бұл туралы Азаттыққа оның адвокаты Ғалым Нұрпейісов хабарлады. Айтуынша, қамау туралы сот 22 маусым күні кешкі сағат 22:00-да өткен, сағат 23:00-де Мұхаммедкәрім Талдықорғандағы тергеу изоляторына этаппен жіберілген.

Журналист Мұхаммедкәрім "экстремизмді қаржыландыру" және "тыйым салынған ұйымның ісіне араласу" бабы бойынша күдікті деп танылған. Істің қозғалуына журналистің қуғындағы экс-банкир Мұхтар Әблязовтан сұхбат алуы түрткі болған деп айтылады.

t.me/azattyq

Azattyq - Азаттық

23 июня 2023 06:00

Көкшетауда "қаланың көкейтесті мәселелерін көтеріп жүрген" қоғамдық кеңес мүшесі ұсталды, деп хабарлады Kokshetau Asia сайты.

Полицияның хабарлауынша, 21 маусымда қоғамдық кеңес мүшесі Мәлік Ахметқалиевтен “тінту кезінде ақ түсті синтетикалық зат табылған”. “Есірткі заттарын заңсыз сақтау” (296-бап, 4-бөлік) бойынша сотқа дейінгі тергеу амалдары басталған.

Көкшетаудың кейбір тұрғындары Мәлік Ахметқалиевті қаланың маңызды мәселелерін көтеріп жүрген белсенді ретінде сипаттайды.

“Өте шыншыл азамат. Жергілікті шенеуніктерді сынап жүретін. Заң жағынан өте сауатты жігіт” деді Қуаныш Оспан есімді тұрғын Азаттыққа.

Астаналық белсенділердің бірі Азаттыққа жуырда Ахметқалиевпен кездескенін, қаладағы жүздеген млн теңге бөлінген кейбір жобалардың жүзеге аспау мәселесін қозғағанын айтты.

t.me/azattyq

Azattyq - Азаттық

23 июня 2023 05:00

Ұлты корей Қазақстан азаматының Оңтүстік Кореяға сапары

Всеволод Хван Оңтүстік Кореяға көшу жоспарымен барып, 6 айдан кейін Қазақстанға оралған. Азаттыққа берген сұхбатында ол жаңа елге не себепті үйрене алмағанын әңгімелеп берді.

t.me/azattyq

Azattyq - Азаттық

22 июня 2023 15:31

Азаттық зерттеуі, Мұхаммедкәрімнің қамалуы, күмән тудырған заң – AzatNews

📌 Ресей Қазақстан мен Қырғызстан компанияларын қалай пайдаланып отыр? Санкция тізіміндегі тауарлардың Ресейге тасымалданып жатқаны жөнінде Азаттық зерттеу жариялады.

📌 25 күн әкімшілік жаза өтеп, бүгін бостандыққа шығуға тиіс журналист, белсенді Думан Мұхаммедкәрім тағы 48 сағатқа қамалды. Ол қылмыстық істе куәгер статусынан күдіктіге айналды.

📌 Азаматтардың дерегін алмасу туралы келісімді ТМД елдері бірінен соң бірі ратификациялап жатыр. Ресей мен Қазақстан мақұлдаған заң енді Қырғызстанда да күшіне енді. Құқық қорғаушы заңнан қауіп көреді.

🔗КӨРУ

t.me/azattyq

Azattyq - Азаттық

22 июня 2023 14:21

"Жарнама бизнесіне қатысым жоқ"

Алматы әкімі Ерболат Досаев қала көшелеріндегі жарнамалардың басым бөлігін орнатқан компанияның құрылтайшылар құрамынан әйелі Гүлнәр Досаева шығып кеткенін мәлімдеді. Еgov порталы оның сөзін растамайды.

"Сіз Алматы қаласының әкімісіз. Қала көшелеріндегі жарнамалардың басым бөлігін сіздің әйеліңіз Гүлнар Досаева құрылтайшыларының бірі болып табылатын компания орналастырған. Бұл жерде мүдделер қақтығысы бар деп ойламайсыз ба?" деп сұрады Азаттық тілшісі.

Ерболат Досаев былай жауап берді:

"Компания бұрын құрылған. Басты әріптесі – жарнама саласындағы көшбасшы компания. Негізгі үлес сіз айтқан 4 құрылтайшы арасында бөлінген. Алматы әкімі болып келгенімде бұл мәселе туындайтынын түсінгенмін. Былтыр желтоқсанда екі жеке әріптес – менің әйелім мен Гаухар Қаппарова өздерінің үлестерін (әрқайсысына 15 пайыз тиесілі) өзге серіктеріне сатып кетті. Сол себепті былтырдан бері жарнама бизнесіне қатысым жоқ" деді Досаев.

🔗Толығырақ сілтемеден өтіп оқыңыз

t.me/azattyq

Azattyq - Азаттық

22 июня 2023 12:53

⚡️ Ресей Қазақстан компанияларын қалай пайдаланып отыр? Азаттық зерттеуі

Азаттық радиосының бірнеше қызметі бірлескен зерттеуі Украинада соғыс басталған соң Қазақстан мен Қырғызстанда ашылған компаниялар ресейлік компанияларға сатуға тыйым салынған электронды тауарларды экспорттап жатқанын анықтады.

Зерттеу сауда-саттықтағы күдікті схеманың қалай жұмыс істейтінін, олардың артында кім тұрғанын баяндайды. Екі мақсаттағы тауарлардың импорт-экспортының құбылуын да көрсетеді.

Зерттеудің толық нұсқасы бүгін сағат 17.00-де YouTube-арнамызда шығады.

🔗КӨРУ

t.me/azattyq

Azattyq - Азаттық

22 июня 2023 12:20

ШҚО-да газ баллондарын толтыруға арналған бекетте жарылыс болып, екі адам зардап шекті

Шемонаиха қаласында болған жарылыстың салдарынан 2 адам күйіп қалған, 5 техника жанып кеткен.

ТЖМ өрт сөндірілгенін хабарлады. Өртті сөндіруге бес техника, 12 адам жұмылдырылған.

Видео: ТЖМ баспасөз қызметі

t.me/azattyq

Azattyq - Азаттық

23 июня 2023 15:26

Ұсталған белсенділер, тіркелмеген көліктер, аш қалған ит-мысық - AzatNEWS | 23.06.23

📌 Қазақстанда шетелдік көліктерді тіркеу мәселесі тағы да дауға айналып барады. Тұрғындар 2022 жылдың қыркүйек айынан кейін әкелінген машиналарды да жеңілдетілген тәртіппен заңдастыруды сұрайды.

📌 Журналист, белсенді Думан Мұхамедкәрім 2 айға қамалды. Оны полиция Талдықорған қаласындағы тергеу изоляторына жеткізді. Көкшетау қаласында да жергілікті билікті сынаушы Мәлік Ахметқалиев ұсталған. Белсенділердің жақтастары бұл істердің саяси астары бар деп есептейді.

📌 Шымкентте қараусыз қалған үй жануарларын ұстайтын орталықта ит-мысық қырылып жатыр. Еріктілер оларды құтқарып қалу керегін айтып, дабыл қағады.

🔗КӨРУ

t.me/azattyq

Azattyq - Азаттық

23 июня 2023 13:45

"Біздің көлігімізді де заңдастыр!". Алматыда бір топ адам халыққа қызмет көрсету орталығына жиналды

Жұма күні жиналғандар елде 2022 жылдың 1 қыркүйегінен кейін әкелінген 200 мыңға жуық көлік барын айтып, оларды да заңдастыруды талап етті. Былтыр 5 қыркүйекте Армениядан жеңіл көлік әкелгенін айтқан Таласбек Жанарбекұлы енді машинасын айыппұл тұрағына қойып қоя ма деп қорқады.

"3 қыркүйек, 5 қыркүйек, сол қыркүйектің аралығында кірген машиналар бар. Кейін кірген машиналар бар. Оның бәрін кіргізді. Сақтандыру полисін жазғыздық. Айыппұлын да төлеп жатырмыз. Енді сол көліктерді заңдастыруды талап етіп келіп отырмыз. Егер біздің көлікті заңдастырмайтын болса, онда былтыр 1 қыркүйектен кейін шекараны жауып тастауы керек еді" дейді Жанарбекұлы.

Құзырлы орган өкілдерінен жиналғандарға ешкім келмеді. Өзін "процесстік орталықтың бастығымын" деп таныстырған азамат оларды оңаша шақырып, арыз жазуға кеңес берді.

🔗Сілтемеден өтіп оқыңыз

t.me/azattyq

Azattyq - Азаттық

23 июня 2023 12:26

Бас прокуратура: Жарты жыл ішінде азаптау ісі бойынша күш құрылымдарының 17 қызметкері сотталды

23 маусымда бас прокуратура 2023 жылдың алғашқы алты ай ішінде атқарған жұмысын қорытындылады. Ведомство мәліметінше, жыл басынан бері азаптау фактісі бойынша күш құрылымдарының 35 қызметкеріне қатысты іс сотқа жіберілген, 17 қызметкер сотталған.

Прокуратура хабарламасында азаптау істерін тергеу әдісі Стамбул хаттамасының стандартына сәйкестендірілгені жазылған. Одан бөлек прокурорлар қылмыстық процестің заңдылығын қадағалауды жүзеге асыру барысында 512 адамды негізсіз күдіктен қорғап қалғанын жазған.

"Прокурорлардың бастамасымен 197 адамға қатысты үкім заңға сәйкес тексерілді, осы ретте 156 сотталушының жағдайы түзетілді, оның ішінде 8 адам ақталды" делінген бас прокуратура хабарламасында.

Фото: Бас прокуратураның баспасөз қызметі

t.me/azattyq

Azattyq - Азаттық

23 июня 2023 11:17

Қытай ұшақ құрастыру жобасынан Ресейді шеттетті

2017 жылы Қытаймен бірігіп жүзеге асырыла бастаған CR929 кең корпусты лайнер құрастыру жобасы Ресейсіз жалғасады.

Бұған дейін Ресей өзінің бөлшек өндірушілерін ұсынған, алайда Қытай Еуропа мен АҚШ-қа ұшу кезінде көбірек қауіпсіз саналатын батыс тасымалдаушыларының өнімін алғысы келген.

2022 жылы маусымның соңында CR929 ұшағын құрастыру жобасына қатысты түсініктеме берген вице-премьер Юрий Борисов "Қытайдың біздің қызметтен бас тартуы жиіледі" деп мәлімдеген.

t.me/azattyq

Azattyq - Азаттық

23 июня 2023 10:26

"Әдеп кеңесін жұмыстан қуатын құрал етті". Сотта жеңген мұғалімнің хикаясы

"Педагог мәртебесі" туралы заң қабылданғаннан кейін мектептерде педагогикалық әдеп кеңесі деген жаңа орган құрылған. Оған ұстаздың педагогикалық әдеп сақтау мәселелері бойынша жүгінуге болады деп белгіленген. Бірақ басшылық қаласа, кеңес мұғалімді бақылауда ұстайтын, тіпті оны жазалайтын құралға айнала салады дейді кейбір белсенді ұстаздар.

Алматы облысы Іле ауданы Қараой ауылының тұрғыны Еркетай Шайхина былтыр желтоқсанда мектептегі әдеп кеңесінің талабымен жұмыстан босатылған. Мұғалім "жұмыстан заңсыз шығуыма басшылыққа жақпаған белсенділігім себеп болды" деп есептейді. Ол аудандағы өзі істейтін және өзге мектептерде басшы қызметте ротация жүргізілмейтінін, мұғалімдерден заңсыз қаржы жиналатынын, т.б. мәселелерді көтерген.

Еркетай Шайхина жұмыстан заңсыз шығарылғанын айтып, сотқа жүгінген. Жарты жылға созылған сергелдеңнен кейін мұғалім мектептегі бұрынғы қызметіне қайта кірісті. Себебі мұғалім мен мектеп әкімшілігі арасындағы дауды қараған сот жақында істі Шайхинаның пайдасына шешті.

Азаттық тілшісі Нұртай Лаханұлының бүгінгі мақаласынан оқыңыздар👇🏻

🔗Сілтеме

t.me/azattyq

Azattyq - Азаттық

23 июня 2023 09:28

Адвокат Ғалым Нұрпейісов: Әблязовпен сұхбатын "сылтау" ретінде пайдаланды

Бүгін Алматыда қамауға алынған журналист️ Думан Мұхаммедкәрімнің ісі бойынша баспасөз мәслихаты өтті. Адвокат Ғалым Нұрпейісов тергеушілер журналистің қуғындағы экс-банкир Мұхтар Әблязовпен сұхбатын "сылтау" ретінде пайдаланды дейді. Айтуынша, журналистің ісіне сұхбаттың ешқандай қатысы болмаған.

"Конституцияның 20-бабы бойынша әрбір адамның ақпарат алуға құқығы бар. Бұл біз бен сіздің ақпарат алу құқығымыз. Бұл ақпаратты іздеуге журналистердің құқығы бар. Думан журналист ретіндегі міндетін орындай отырып, осы ақпаратты жинап, оны алу құқығымыздың жүзеге асуына көмектесті" деді адвокат.

Адвокат Ғалым Нұрпейісовтің сөзінше, Думан Мұхаммедкәрім “экстремизмді қаржыландыру” бабы бойынша заңсыз қудаланып жатыр.

Баспасөз мәслихатында қоғам белсендісі Рысбек Сәрсенбай журналисті қолдау комиссиясы жұмыс істейтінін айтты.

t.me/azattyq

Azattyq - Азаттық

23 июня 2023 08:05

💸 Экспорт көлемінің артуы туралы

2022 жылы Қазақстанда Еуропадан компьютер импорты былтырмен салыстырғанда (310 миллион доллар) жеті есе өсіп, 1,2 миллиард долларға жетті.

Қазақстаннан Ресейге компьютер экспорты да былтырмен салыстырғанда 2300 есе өсіп, 300 миллион долларды құрады.

t.me/azattyq

Azattyq - Азаттық

23 июня 2023 07:31

Зеленский Ресейді Запорожье АЭС-іне теракт дайындап жатыр деп айыптады

Украина президенті Владимир Зеленский "террорлық акт" дайындап жатқаны туралы оған украин барлау қызметі мәлімет бергенін 22 маусымдағы видеоүндеуінде айтты.

"Радиацияның мемлекеттік шекарасы жоқ екенін тағы айтамын. Оның қай бағытқа тарайтынын жел бағыты анықтайды. Біздегі мәліметті барлық одақтасымызбен бөлісеміз", - деді украин президенті.

Кремльдің ресми өкілі мұны кезекті "өтірік" деп атады. Ресей президентінің баспасөз хатшысы Дмитрий Песков жақында ғана МАГАТЭ өкілдері сол жерге барғанын, олар АЭС ісін жоғары бағалағанын атап өтті.

t.me/azattyq

Azattyq - Азаттық

23 июня 2023 06:44

Шетел көліктерін заңдастыру мәселесін қозғамақ болған белсенділердің бірі Асхат Берсалимовтің үйіне бүгін таңертең полицейлер келген

Белсенді жұма күні "Саялы" ықшамауданындағы автоЦОН-ға барып, алматылық автожүргізушілермен шетел көліктерін тіркеу мәселесін қозғамақ болған. Берсалимов Азаттыққа "бұл наразылық, митинг емес, автоЦОН-ға сұрақтарымыз бар, сол үшін барамыз" деп айтқан.

Полиция белсендіні таңертең үйінен шыққанда күтіп тұрған. Видеода полиция қызметкері "сізбен жеке сөйлесуіміз керек, шақыру қағазы бойынша келіп тұрмыз, жұртты "заңсыз митингіге шақырғаныңыз" үшін" дейді.

Белсенді қазір автожүргізушілермен бірге халыққа қызмет көрсету орталығында жүр.

Қазақстанда заңсыз жүрген шетел көліктерін жеңілдетілген тәртіппен тіркеу 1 шілдеде аяқталады. Соған байланысты Атырау, Ақтау, Орал қалаларында халыққа қызмет көрсету орталықтарында ұзын-сонар кезек пайда болған.

t.me/azattyq

Azattyq - Азаттық

23 июня 2023 05:42

Астана соты соғысты айыптаған суретші Дәурен Макинге шыққан үкімді өзгертпеді

Апелляциялық шағымды сот 20 маусымда қараған. Сот үкімі сол күні шыққан.

Апелляция алқасы шағымда келтірілген сараптама "қарама-қайшы жасалған" деген тұжырыммен келіспеді. Сот мұны бірінші инстанциядағы сот тексерді деп санайды.

47 жастағы Дәурен Макин "терроризмді насихаттау" бабы бойынша айыпталып, 7 жылға бас бостандығынан айырылған. Оның адвокаты Жасұлан Қауменов апелляциялық шағымында соттан үкімнің күшін жойып, Макинді босатуды сұрады. Сотта суретшінің әкесі мен бауыры Әділет те осыны сұрады.

Прокурор Сапаев Макиннің кінәсі бірінші инстанциядағы сотпен дәлелденгенін айтып, үкімді өзгеріссіз қалдыруды сұрады.

t.me/azattyq

Azattyq - Азаттық

22 июня 2023 15:51

22 маусымдағы маңызды жаңалықтар дайджесі:

📌 Журналист Думан Мұхаммедкәрім 48 сағат қамауға алынды

📌 Ресей Қырғызстанның сүт және балық өнімдеріне шектеуді алып тастады

📌 Алматыда полиция Oyan, Qazaqstan! белсендісін ұстап босатты

📌 Сенат электросамокатты пайдалануды реттейтін түзетулерді мақұлдады

📌 Досаев "әйелім жарнама компаниясындағы өз үлесін сатып жіберді" дейді. Еgov порталы мұны растамайды

📌 Алматы тұрғыны полиция көлігінде қайтыс болды

t.me/azattyq

Azattyq - Азаттық

22 июня 2023 15:03

Forum 18 дін бостандығын қорғаушы норвегиялық ұйым тәжік діндары Мұхаммади Рахматулло қандай айыппен сотталғанын анықтады

Мұхаммади Рахматулло бұрын Тәжікстанда тыйым салынған "Салафия" ағымы жетекшілерінің бірі болған. Биыл наурыз айында Душанбе соты оны 8 жылға колонияға отырғызған.

Forum 18 ұйымының хабарлауынша, Мұхаммади Рахматулло 12 адамнан тұратын топқа заңсыз діни дәріс берді деген айыппен ұсталып, соның негізінде сотталған.

Ұйым мәліметіне қарағанда, осы топта дәріс алғандар алты жылдан тоғыз жылға дейінгі аралықта сотталған. Олардың сотының қалай өткені белгісіз.

Мұхаммади Рахматуллоның туыстары Forum 18 ұйымына Рахматулло "оқушыларға намазды қалай оқу керектігін ғана үйреткен" деп айтқан.

Тәжікстанда діни білімді мемлекеттік оқу орындарында ғана алуға болады.

t.me/azattyq

Azattyq - Азаттық

22 июня 2023 13:59

Полиция Айдос Темірғалиевті босатты деп хабарлады Oyan, Qazaqstan! қозғалысы Телеграм-арнасында

"Оған қарсы әкімшілік істі қозғай алатынын ескертіп, түсініктіме жазғаннан кейін полиция басқармасынан босатып жіберді. Қамауда шамамен 4,5 сағат болды" деп жазылған қозғалыс хабарламасында.

Заң бойынша, полиция азаматтарды хаттама толтырмай үш сағаттан артық ұстай алмайды. Елде құқық қорғаушылар мен белсенділер полицияның бұл ережені жиі бұзатынын айтады.

t.me/azattyq

Azattyq - Азаттық

22 июня 2023 12:31

Атыраудағы "Дина" сауда базары маңындағы өрт сөндірілді, зардап шеккендер жоқ

Бұл туралы Азаттыққа Атырау облысының төтенше жағдайлар департаменті хабарлады.

Ақпаратқа қарағанда, базар маңындағы аумағы 1600 шаршы метр болатын әмбебап дүкен өртенген. 800 шаршы метр аумақты өрт шалған деп айтылады.

Azattyq - Азаттық

22 июня 2023 11:40

Атыраудағы “Дина” сауда базары маңындағы дүкендердің бірінен өрт шықты

Бастапқыда "Ақ Жайық" сайты өрт "базардан шыққанын" хабарлаған. Кейін базар әкімшілігі мұны жоққа шығарды. Ізінше төтенше жағдай министрлігі де базардың өртенбегенін растады.

Куәгерлердің айтуынша, өрт шамамен түскі сағат 13:30-да басталған. Сатушылар дүкеннен тауарларын шығаруға тырысқан.

Азаттық тілшісінің мәліметінше, өрт сөндірушілер мен полицейлер базар жанынан арнайы штаб құрған.

Азаттық облыстық төтенше жағдайлар департаментінен ресми жауап сұрап, сауал жолдады.

Видео: "Ақ Жайық" сайты

t.me/azattyq