Telegram-канал awladana - أسرتي سر سعادتي: Неотсортированное

أسرتي سر سعادتي

18 сентября 2024 22:06

2- المهام الروتينية

في مهام كده بتعمليها بصورة دورية مش محتاجة ابداع ولا ابتكار ولكنها بتشغل حيز كبير من يومك وبتاخد من مجهودك زي مثلا؛

✅ المهام المتكررة: يعني المهام البسيطة اللي خطواتها واضحة ومش محتاجة خبرة كبيرة.

زي ترتيب البيت اليومي، أو تحضير الفطار واللي ممكن تفوضي ابنك او بنتك فيها..

✅ المهام اللي مش أولوية: يعني الحاجات اللي مهمة بس مش أساسية علشان تقدري تفرغي وقتك لحاجات تانية أهم.

زي تنضيف المطبخ بعد الغدا، بدل ما تفضلي تعملي كل حاجة بنفسك، ممكن تفوضي ابنك الكبير إنه يلم السفرة ويغسل الأطباق، وبكده يبقى عندك وقت تعملي فيه الحاجات الأهم.

✅ المهام المتعلقة بتعليم أو تنمية مهارات ولادك

وتفويض المهام هنا هيحققلك هدفين، أولهم إن الشغل هيتم بمجهود اقل، والتاني إنك هتعلمي اولادك المسؤولية.

زي إنك تفوضي ابنك ياخد اخته في اوبر للتمارين ويشير اللوكيشن معاكي، أو تخلي الولد يتعود يذاكر لوحده وأنتي تتابعيه آخر ربع ساعة وتشوفي انجز إيه..

✅ المهام اللي تناسب نقاط قوة أولادك: يعني المفروض توزعي المهام اللي تناسب كل واحد فيهم، عشان تنجزوا الشغل بكفاءة.

لو ابنك بيعرف يستخدم المكنسة الكهربائية، خليه يساعدك في تنظيف البيت، أما لو بنتك بتحب التنظيم والترتيب، ممكن هي تهتم بالهدوم وترتيبها.

استني رايحة فين 😄

احنا مش هنروح نفوض كده مرة واحدة، يا اما هنفشل زي كل مره وهتكون النتيجة جملتك الشهيرة؛

واللهي مانتوا نافعين 🙆

ولكن في البداية تبدأي تدربي الولد على تحمل المسؤولية، زي بالظبط المدير ما بيدرب الموظف الجديد علشان يقدر يحمله المهام. 👌

بعد كده، تبدأي تسحبي نفسك من المهمة خطوة خطوة، لحد ما تحسي إنه بقى قادر ينفذ المهمة بمستوى متوسط، وهنا دورك يبدأ يتحول لإشرافي وإرشادي..

بس خلي بالك انك مش هتوصلي للمرحلة دي إلا لما تحققي شروط التفويض كاملة، علشان تتجنبي المشاكل اللي ممكن تحصل..

تعالي معايا الكومنت الجاي علشان نفهم إزاي نحققها 👇