639
كل الخدم تنهان شفناها بالعين بس بكرامة تعيش خدام الحسين
https://youtu.be/9FDYmSKk7Mo?si=n1zONkmFBjFJqMF7
Читать полностью…
ليله الحادي عشر...
لمة عزه
ليلة أوداع ومصيبه
بين محبوب وحبيبه
ياحبيبي ياحسين/نور عيني ياحسين
_____________________
آنه جيتك خويه والنار بعباتي
خويه والدخان غير كل صفاتي
من گلتلي سلمّت بيدچ بناتي
وبوكتها آنه حــسيت أبمماتي
آنــه زيـنب تــعرفوني
العيله أخليها بعيوني
تدري گلبي شگد حنين/نور عيني ياحسين
_______
من بناتك خويه عندي ودعتهن
ساعة الحرگوا خيمنه جمعتهن
خويه وأعله النوگ بيدي ركبتهن
والله وبـطول الـدرب مافارگتهن
حاضنه سكنه ورقيه
أيدي بيديهن سـويه
من مشينه ميگيدين/نور عيني ياحسين
_______
خويه أمشي عليك ضلع أمي الزچيه
ليــش أصــيح ومــاترد أنــته عـــليه
آنـــه راح أمــشي يــبو إلــيمه ســبيه
بس ردت چـلمت وداع وهـاي هـيه
ردت أودعه ولو مره
قبل ليگطعون نحره
ردت أبوسه من الجبين/نور عيني ياحسين
_______
آنه شــحمل يا رزيـه ويا مـصيبه
بعيني أشاهد جثتك خويه سليبه
والگمر يم النهر جثته خضيبه
وآنه بين أعداي محتاره وغريبه
هــل دهر باليني بلوه
عالمصايب ذبني گوه
بالحزن عشت السنين/نور عيني ياحسين
_______
رحتوا عني وأصــفگ يساري باليمين
زيــنب آنــه أويني أو وين الدواوين
شــاهدت مـوقف فلا تنساه هالعين
گبال عيني يزيد يضرب ثغر الحسين
بالعصه كسّر سنونه
والـيتامــه يــنظرونه
وأرتفع صوت الونين/نور عيني ياحسين
________________________
الشاعر(أسعد قاسم الكريعاوي)
فزاعي يوم العاشر
وآويلي على المظلوم
_______________
يـــوم العاشـر بعاشـور
ناديت بـگـلب مـجمور
من شفت الأخو منحور
ومن نحره يفيض دموم
وآويــلي عــلى المظلوم
______
حـــرت ألمن أدير العين
من ذبحوا أخويه حسين
والكـــافل بـــلا چــــفين
ناديت بگلب مهموم
وآويلي على المظلوم
______
زينب آنـــه ياهــل ناس
طحت أبوليت الأرجاس
چــا وينه البطل عـباس
نـاديته يـخويه گــوم
وآويلي على المظلوم
______
گوم ألحگ يوالينه
مـارحمونه أعادينه
لا ترحل يبو سكينه
گلبي من الحزن مجسوم
وآويـــلي عــلى المظلوم
______
بدمعه نادته أرقيه
بويه ألــحگ إعليه
باگـوا مــني ترچيه
ومن أذني جرت الأدموم
وآويــلي عـــلى المظلوم
______
راســك عـالرمح رفــعوا
وجسمك بالحقد داسوا
يــحسين الـخدر ســلبوا
مارحمتنه هاي الگوم
واويلي على المظلوم
______
من ماي العذب حرموا
وبــطف كــربله نــحروا
هــذا أحسينكم ذبـحوا
من ماي العذب محروم
وآويــلي عــلى المظلوم
______
ياويلي أنـذبح عـطشان
ونـايم عــاري عـالتربان
ويمّه الصحبه والخوان
وخيول الإعادي تحوم
وآويلي عـلى المظلوم
______
مــثلوا بالأخـــو تمثيل
رضـــوا جــثته بالخيل
ماظل عند أخونه حيل
صدر ياخلگ مهشوم
وآويلي على المظلوم
______
كون أتشاهده الزهره
من حز الشــمر نحره
ومتربع عــلى صــدره
هذا الطاهر المعصوم
وآويلي عــلى المظلوم
___________________
الشاعر (اسعد قاسم الگريعاوي)
نزلة
للطفل الرضيع ع
أستعدي للمصاب~~~~هلله هلله يالرباب
مات عبدالله الرضيع/مات عبدالله الرضيع
__________________________
شاله أبوه حسين بيده
وناده ماي الأبني أريده
وحرمله صابه بوريده
وللحياه بعد أشيعيده
رمش عين حسين شاب/هلله هلله يالرباب
مات عبدالله الرضيع/مات عبدالله الرضيع
_____
بكربله أول مصيبه
سهم عبد الله يصيبه
زاد أبو اليمه نحيبه
وصارت الدنيه كئيبه
شلون يحمل هالغياب/هلله هلله يالرباب
مات عبدالله الرضيع/مات عبدالله الرضيع
_____
شافته سكنه ورقيه
ودمعه من عدهن جريه
وأصرخن سوده عليه
ريت سهم البين أليه
وتسلم أنته من الصواب/هلله هلله يالرباب
مات عبدالله الرضيع/مات عبدالله الرضيع
_____
يعينها الله شلون أمه
شاهدت من نحره دمه
منذبح بيد أبو اليمه
صاحت بلهفه ييمه
يمُه ماأحمل عذاب/هلله هلله يالرباب
مات عبدالله الرضيع/مات عبدالله الرضيع
_____
چم مصيبه آلي سبنها
للرباب أو عذبنها
شحالها من غاب أبنها
ظل يدُر إعليه لبنها
بهذا ماحاسبه حساب/هلله هلله يالرباب
مات عبدالله الرضيع/مات عبدالله الرضيع
_____
طفل ست أشهور عمره
وگلبه من العطش جمره
هل ضمّه للسانه فطره
وأنگطع عبد الله نحره
گلبه من العطش ذاب/هلله هلله يالرباب
مات عبدالله الرضيع/مات عبدالله الرضيع
_____
بيا ذنب عبد الله ذبحوا
وأعله راسه الرمح رفعوا
گبال أمه وأهله شالوا
جسمه هم ياناس سحگوا
وأندفن تحت التراب/هلله هلله يالرباب
مات عبدالله الرضيع/مات عبدالله الرضيع
_________________________
الشاعر (أسعد قاسم الكريعاوي)
أساسية للطفل الرضيع ع
إلى أصحاب الحوائج وطلب الذريه أهدي هذه القصيدة لهم...
هذا صبرك مايضيع//أنخه عبدالله الرضيع
أطلب ومد الأدين // مايردها والحسين
__________________________
لو ردت تتشافه علتك أله صلي ركعتين
توجه وأهدي صلاتك هذي الطفل الحسين
بس گبل لتصلي أقره فاتحه لأم البنين
فاتحتها أمجربيها وعدنه ياعالم يقين
يلي ذريه تريد // مطلبك ماهو بعيد
لو ذكرت أم البنين//مايردها والحسين
_______
يالذي علتك چبيره وأيست من كل طبيب
أنخه عبدالله واندبه بجاها ظنك مايخيب
وگله ياعبد الله آني خادم حسين الغريب
أي مهد لمن أشوفه حيل أفجع بالنحيب
بجاه ابو أليمه عليك//حط على راسي أديك
من تحطها عل جبين// مايردها والحسين
______
صح طفل عبدالله لاچن يمتلك شئناً عظيم
مو عجيبه بفضل ربه هالطفل يشفي العقيم
أنته أدره يآ ألآهي وانته بالعندي عليم
ربي ألك مديت أديه أدري بيك انته كريم
رافع أيدي للسماء// ألعلتي رايد شفاء
العله صارلها سنين//مايردها والحسين
______
نذر ياعبد الله أنذر لو تفّرح مهجتي
راح أسميه أعله أسمك وراح أحضنه بلهفتي
نفسي أأذن بذنه وأفراح نفسي أخبّر صحبتي
بجاه عبد الله يربي لا تردني بطلبتي
طفل لو عندي يصير//أنذُره خادم زغير
وعد والحر وعده دين//مايردها والحسين
______
لو جريت أدموع عينك والطفل من تذكره
شلون أبوه حسين شاله ونار گلبه موجره
گماطه عبدالله تگطع حين صابوا منحره
مارعوا حاله يويلي بچف أبوه دمه جره
رفرفت روح الرضيع //ومنحره أصبح قطيع
لو بچت لمصابه عين//مايردها والحسين
______
تدري عبدالله شجراله من العطش گلبه أنجسم
عمره ست أشهر يعالم بسهم مسموم أنفطم
وتدري هم حزوا وريده وسفه منهم ماسلم
وبرمح رأسه تعاله چبير نحره أعله السهم
جثته فوگ التراب// شافته عيون الرباب
حلفه بگطع الوتين//مايردها والحسين
________________________
الشاعر(أسعد قاسم الكريعاوي )
الليله العاشره...( نعي )أو لمة عزه
بمزج التراث لمة عزه
ليلة أوداع ومصاب/والصبح يبدي العذاب
والفرح ضاع/بلحظة وداع
__________________
ليلة العاشر فلا تحصل مثلها
زينب بهذا المسه تودع أهلها
باچر أمن الزلم محد يبقى ألها
لا أبو اليمه ولا حتى الكفلها
ياليل طول ساعاتك / ياليل أحمل آهاتك
لو ودعت الوليان / تتولاني العداون
وين أروحن خويه وين/گلي بعدك ياحُسين
والفرح ضاع/بلحظة وداع
_____
ودعيهم يالعقيله ودعيهم
ومن مناحرهم يحره قبليهم
أخوتچ عالگاع باچر تنظريهم
خيل أميه بلارحم تسحگ عليهم
يامحلى الوداع أبهل مسيه
وعلوم المنيه
بين الفاطمي والفاطميه
كلشي بحسين أنتهه/مابقت راحه وهنه
والفرح ضاع/بلحظة وداع
_____
خلي أبو اليمه المسه يودع بناته
آخر الساعات هذي في حياته
خل يبوسن چفه ويطلبن رضاته
من العطش باچر تره تنشف لهاته
~
گومن بنات النبي خيطن خيمچ عبي
هاي الزلم ماتظل /باچر وراچن سبي~
باچر أخيول العده/للحُسين أتفرهده
والفرح ضاع/بلحظة أوداع
_____
وخلي أم عبد الله هالليله تودعه
من صدرها الطاهر وخلي ترضعه
هالطفل باچر تره يختلف وضعه
حرمله بسهمه تره نحره يگطعه
~
أهز مهدك يعبد الله
وأعاين عالمهد خالي/يبني وثمر دلالي
أهز مهدك يعبد الله~
يالرباب أبنچ تره/بسهم ينطر منحره
والفرح ضاع/بلحظة أوداع
_____
ليلى خليها تودع علي الأكبر
هايه أم وحقها لو مدمعها يكثر
تشوفه باچر الأكبر وراسه مطبر
وصله وصله عالثره جسمه تطّشر
~
يالعايش بعيوني وروحي
من بعدك شيداوي جروحي
شلون أتصبر / آه يالأكبر ~
ليلى لازم تستطبُر/من تشوفه منطبُر
والفرح ضاع/بلحظة أوداع
_____
ورمله خلي الجاسم تودعه بلهفه
وخلي تعجن حنته وتحني چفه
وعمه الحسين وأبو فاضل يزفه
عالأرض باچر تره تشوفين نزفه
~
جسام ياضنوتي رايح رايح أمن عيوني
مارحمني الدهر/ أنته نور البصر
رايح رايح أمن عيوني~
رمله باچر تنظره/محنه من دم منحره
والفرح ضاع/بلحظة أوداع
____________________
الشاعر (أسعد قاسم الكريعاوي)
لمة عزه
حوار الأمام الحسين مع ولدهُ علي الأكبر عليهم السلام
واويلاه طاح الأكبر/واويلاه گلبي تحير
_____________________
هذا الأكبر نور عيوني
سل سيفه وطب للميدان
ظليت أنظر عيني بعينه
چن گلي بويه عطشان
هاك أشرب من دمعة عيني
حتى المدمع هم خلصان
گلبي وگلبك مثل الجمره
يوليدي ومثلك لهفان
واويلاه لسانه تفطر/واويلاه گلبي تحير
_____
رد لحسين وضمه الصدره
آخر مره يودعه حسين
يوليدي لو ترحل عني
وين الگه مثلك لا وين
طُب للخيمه أو ودع أمك
ودعها وبوس الچفين
خلها تضمك خلها تشمك
خل تشبع منك هالعين
واويلاه تصيح الخدر/واويلاه گلبي تحير
______
ودع أمه ولنها دگله
يالأكبر لتظن أنساك
كل تعبي وكل ليل أسهرته
بهاي اللحظه راح أوياك
يامن ضميتك بعيوني
ومابين الرمشين أغطاك
لحظات وراح أنظر جسمك
متخظب من فيض دماك
واويلاه بيش أتصبر/واويلاه گلبي تحير
______
طب للحومه وظلت أمه
تدعي للباري المعبود
ياربي أحفظلي الأكبر
سالم ريت الساعه أيعود
ياجامع يوسف وي أهله
ردلي الأكبر ليه ردود
ناديتك وأنته إلي تعلم
بحالي وبگلبي الممرود
واويلاه لو مايحضر/واويلاه گلبي تحير
______
لحظات ولن عاد الأمه
عطشان ويتمنى الماي
قطرة ماي أشرب وأتعنه
أتقوه بيها أعله أعداي
يايمه الحر هدم حيلي
جيتچ وأتخطه بجدماي
دگله أشرب من ماي عيوني
ياضي عيني وهاي وهاي
واويلاه حاله تغير/واويلاه گلبي تحير
______
رد للحومه وبين العسكر
لصوبه حسين تصد عيناه
لحظات ولن طاح الأكبر
وتخظب من فيض أدماه
الله يساعد گلب حسينك
وشكبره صبره والله
چم محنه چم صوره يشاهد
چم حسره بصدره وچم آه
واويلاه نايم بالحر/واويلاه گلبي تحير
_____________________
الشاعر (أسعد قاسم الكريعاوي)
نزله لعلي الأكبر ع
يبويه/ راح أطبن للحرب
يبويه/وآنه عطشان الگلب
___________________________
بويه يحسين أندعيلي يل دعائك مستجاب
حتى أسحگ عالأعادي وأگطع بسيفي الرگاب
آنه وارث هالشجاعه من علي داحي الباب
وآنه أشبه أبو فاضل بس بعدني بويه شباب
يبويه/ والله لأگلبها گلب
يبويه/وآنه عطشان الگلب
_____
آنه ترباتك يابويه ومايخوفني يزيد
تحت أجدامي أدوسه هوه وجيوشه أريد
آنه الأكبر آنه بويه وعمي ذو بأساً شديد
أحنه أسياد الهواشم والله مانصبح عبيد
يبويه/والله لسحگهم غصُب
يبويه/ وآنه عطشان الگلب
_____
بويه أسمحلي أقاتل وأنتصر عالظالمين
والله ماأگدر أشوفك حاير وگلبك حزين
أنطيني راسك خل أقبله وخل أقبلها الأدين
خل أكون أول شهيد الطايح بچف الحسين
يبويه/لا دمع عينك يصُب
يبويه/وآنه عطشان الگلب
_____
بس طلب عندي يبويه لو أطيح أعله الترُب
بويه لاتحزن عليه ولا دمع عينك يصُب
أدري فگد أبنك يبويه عالگلب كلش صعُب
خلها تاكلني السيوف ولا أظل ضامي الگلب
يبويه/خلي راسي ينضرُب
يبويه/وآنه عطشان الگلب
______
بويه خليني أودعك ضمني حيل أعله الصدُر
يل لسانك بويه يابس وآنه گلبي منفطُر
العطش هد حيلي بويه وأشعر بگلبي جمُر
مالي طاقه أصبر يبويه وأنظر جيوش الكفُر
يبويه/مايصح ماي الشرُب
يبويه/وآنه عطشان الگلب
______
بويه أمي شلون بيها من تشاهدني تريب
ماأظن تصبر يبويه لو لگت جسمي خضيب
أمي راح أتظل بعدني للمناحه والنحيب
بويه ماوصيك بيها خلها تصبر يالحبيب
يبويه/موادعي كلش صعب
يبويه/وآنه عطشان الگلب
_________________________
الشاعر ( أسعد قاسم الكريعاوي )
نزله
لعلي الأكبر عليه السلام
هذا عباس البطل
لو علي الأكبر نزل
عنه خبرونه بعجل
شو خذها بالسره/چنه جدة حيدره
____________________
هذا منهو إلي أرتجز
من بني هاشم برز
والعدو شافه وعجز
يگول ياهو الينظره/چنه جدة حيدره
_______
سوه بالطف زلزله
وصوته عالحومه عله
وينه شمر وحرمله
وسيفه بيده يشهره/چنه جدة حيدره
_______
بجيشه ناده أبن سعد
يعني نخلص من أسد
يطلع الثاني أشد
مثل سبع الگنطره/چنه جدة حيدره
_______
بيده سيفين وهجم
والشمر شافه أنهزم
بعد متشيله الجدم
ياشمر الأكبر تره/چنه جدة حيدره
_______
سوه خوفه بالزلم
وگله ياشمر أفتهم
أستاذي عباس الشهم
حدنه بالك تعبره/چنه جدة حيدره
_______
هاشمي أباً وجد
وبجماله ماكو احد
أحلى من يوسف بعد
مُخ زليخه إيحيره/چنه جدة حيدره
_______
للحرب لمن يطُب
مثل أبو فاضل صعُب
وچان يگلبها گلُب
الميمنه عالميسره /چنه جدة حيدره
_______
بكر أبن غانم نزل
يم الأكبر بس وصل
بل عجل راسه أنفصل
وطوه الأكبر دفتره/چنه جدة حيدره
_______
بيده شايل ذو الفقار
يدور القاده الكبار
وما يدور عالزغار
البيده يوگع يشمَره/چنه جدة حيدره
_______
الدم تطاير للسمه
بلحظه لنها مغيمه
ومطرت أعليهم دمه
عاد حملة خيبره/چنه جدة حيدره
_______
عمره چان أثمنطعش
فطّر السانه العطش
وجسمه عالگاع أنفرش
وهامته مطّشره/چنه جدة حيدره
_______
وحده الأكبر بالطفوف
ودارت أعليه الألوف
بالرماح وبالسيوف
شلون أوصف منظره/چنه جدة حيدره
_______________________
الشاعر ( أسعد قاسم الگريعاوي )
أساسية للقاسم ع
آه يوليدي / ياجسام
رحت أمن أيدي/ياجسام
يايمه شگد داريتك/تتركني ماظنيتك
_________________________
يامحلى طولك جاسم ويامحلى رسمك
وعين الله من شر الحسد هيه التحرسك
يوليدي أخاف أمن العده تطفيلي شمسك
وهذا الشمع يصبح دمع وأنحب أبعرسك
خاف الشمعه /ياجسام
تصبح دمعه / ياجسام
بيوم العرس حنيتك/تتركني ماظنيتك
______
تتمنى كل أم يكبر الإبن وتنظره
تفرح بعرسه وسوره الوسواس تقره
ليش أبني بيوم العرس ينگطع نحره
وراسه على رأس الرمح رفعوا وانظره
شفته وگتله/ياجسام
أمك رمله / ياجسام
تنظُر ليها تمنيتك/تتركني ماظنيتك
______
كل ظني تكبر يبني وبعيني أشوفك
أفرح أبعرسك وأنظر الحنه بچفوفك
ياشمعة سنيني شكثر حلوه حروفك
أتمنى وياك أندفن ماريد أعوفك
بعدك تدري/ياجسام
شلي بعمري/ياجسام
تدفني بيدك ريتك/تتركني ماظنيتك
______
ياما تعبت وساهرت متنام عيناي
وبعيني ضميتك ييمه بهاي وبهاي
يافرحتي أنته الوحيد بهاي دنياي
ياوسفه راحت فرحتي وكل تعبي ورباي
گلبي كسرته/ياجسام
من فارگته / ياجسام
بعيوني يل ضميتك/تتركني ماظنيتك
______
يم الولد راح الولد منچ يا وسفه
من دم وريده ومنحره حنيله چفه
شمع الفرح هذا المسه خليها تطفه
وخلينه بدموع وحزن جاسم نزفه
أزغير بعدك /ياجسام
نمت أبلحدك/ياجسام
من دمعاتي رويتك/تتركني ماظنيتك
______
رحت ورحل كل التعب يوليدي وياك
جدك محمد بالحشر هوه إيتلگاك
وآنه يجاسم لاتظن فد يوم أنساك
وداعت شبابك للمنيه أبقى أنعاك
عشت بروحي/ياجسام
يا مذبوحي /ياجسام
واسيني يل واسيتك/تتركني ماظنيتك
______________________
الشاعر (أسعد قاسم الكريعاوي)
نزله أو لمة عزة
يامهجتي وروحي
يادمعتي ونوحي
يابلسم جروحي
ياضنوتي/ياضنوتي
__________________________
بيضت وجهي ومشيت/ عفيه بوليدي السبع
أگبال أبو اليمه بقيت. / راسي عالي ومرتفع
شمعت سنينك طفيت/أنته أحلى من الشمع
يامن العمك حميت/صرت إلـه مـثل الدرع
عفيه يبعد أمك
موت أعله چف عمك
وأتحنه من دمك
ياضنوتي/ياضنوتي
_______
أعترفلك من تروح/راح أظل بس للنحيب
يمتلي گلبي جروح /من أشوفنك خضيب
روح للعطشان روح/أنصره حسين الغريب
والعمر كله يروح /فدوه لحسين الحبيب
ياشمعة أسنيني
يبني ونظر عيني
بعُدك يبچيني
ياضنوتي/ياضنوتي
_______
ياتعب ذيچ السنين / يلي رباك الحسن
رادك تعين الحُسين /لمن إيطيح أبمحن
حان وكتك يالحنين / أبرز العمك لإن
حاير وحيده وحزين/ظل غريب أبهالوطن
نادي أنه حاضر
لتظل يعم حاير
آنه ألك ناصر
ياضنوتي/ياضنوتي
_______
يبني ياجاسم أريد/من تطب سوح الحرب
لا يهم ثگل الحديد / عالدرع خلي الگلب
لا ترد ليه وحيد / الخيمتي سالم تطب
أرد أشوفنك شهيد/ودمك أيصب عالترب
أرد أنظر أدمومك
متلطخه بهدومك
حتى أنحب اليومك
ياضنوتي/ياضنوتي
_______
يلي فضّلت الممات/يبني عن يوم العرس
بالوفه والتضحيات/ أنطيت للعالم درس
ماتحجبه الذكريات/الينطي لحسين النفس
بدون أبو اليمه الحيات/والله ماتسوى فلس
هنياله اليخدمه
وإلي نطه دمه
لحسين أبو اليمه
ياضنوتي/ياضنوتي
_________________________
الشاعر(أسعد قاسم الكريعاوي)
الليله الثامنه
قصيدة للقاسم أبن الأمام الحسن عليه السلام طريقة. يامحلى الوداع ابهالمسيه ....
الله أشجره بالغاضريه
أرويلك قضيه
زفوا جاسم بثوب المنيه
____________________
هل مصباح عاشر والمنيه تحوم
بخيام الهواشم
برز شبل الحسن يم عمه المظلوم
وأعله الحومه عازم
صاح بصوت ياعم لاتظل مهموم
أموتن وأنته سالم
يلمع وجهه چالماس
يشبه عمّه عباس
ونفس المرجله ونفس الحميه
زفوا جاسم بثوب المنيه
______
يگله يبن أخويه رد على أمك
للخيمه تريدك
ماتگدر تشوف أعله الأرض دمك
وتشاهد وريدك
گله أمي گالت انصره العمك
هالساعه أريدك
هيه اللبستني
وصيه سلمتني
وهاك أنظر يبو اليمه الوصيه
زفوا جاسم بثوب المنيه
______
من شاف الوصيه حسين ابو اليمه
ظلت تجري عينه
حِضنه بلهفته وأعله الصدر ضمه
ويقبله بجبينه
ألتفت صوب المدينه حسين لبن أمه
ويگله بونينه
وصلت هالأمانه
بمكتوب الأجانه
الأمر سلمته إنه الرب البريه
زفوا جاسم بثوب المنيه
______
أخذ أذن النزال وطب على الحومه
مثل البدر يلمع
صعدت غيرته وتغيرت أرسومه
حاشه لنه يرجع
ومن دم منحره متلطخه أهدومه
وفه بدمه المرضع
مكتوبة الشهاده
من يوم الولاده
ومن جده النبي حصل هديه
زفوا جاسم بثوب المنيه
______
حضر عنده الحسين أو وسده الصدره
والدمعه أعله خده
گعد يمه ويعد چم طعنه چم طبره
وياجرح اليشده
حمل جسمه الغريب وخنگته العبره
ولخيامه يرده
زادت رمله ونها
من شافت أبنها
رايح يالولد وأمك سبيه
زفوا جاسم بثوب المنيه
______
ماراعوا شبابه ولاصغر سنه
ولا ذيج المهابه
ياسيوف الغدر لا لا تگطعنه
شاب بعز شبابه
ماشاف العرس لاشاهد الحنه
وِأتحنه بخضابه
راحت ذيج الأحلام
وي دمك يجسام
يبست حنتك بچفوف أديه
زفوا جاسم بثوب المنيه
______
والفگدت ولدها توجهت لله
ليصبر گلبهه
دگوم وتگعد أعله الونه وأعله الآه
وتتذكر تعبهه
تنسه الروح والدنيه ولا تنساه
وتحبه ويحبهه
والميت أبنها
خلي أتزيد ونها
علگيله الشمع كل مغربيه
زفوا جاسم بثوب المنيه
____________________
الشاعر(أسعد قاسم الكريعاوي)
نزله
لإبي الفضل العباس عليه السلام
كلها صاحتله مدد/يابو فاضل ياأسد
الحذر منه الحذر/هذا عباس الگمر
__________________________
من نزل عباس للطف والعساكر گصدته
گاعد أمثني ركبته يملي ماي بجربته
لن نظر هاي العساكر عالشريعه حاطته
بس رفع راسه ونظرهم ألف طاح بخزرته
دهورت حال العده/وأبو فاضل وحده
والوگع بيده أنشطر /هذا عباس الگمر
______
حومرت عين أبو فاضل ولاح بعيونه الزعل
وناده ياعزريل ألحگ أحسب أموات بعجل
مو عجيبه ولا غريبه هذا إبن خير العمل
والفحل گلي شيخلف شي أكيدن هم فحل
نفس شمرت حيدره/إبنه فوگ الگنطره
للشمر وصلوا الخبر/هذا عباس الگمر
______
والشمس غطت نفسها حين نظرت للگمر
زلزل الگاع وفطرها من نزل من المهر
ماجرد سيفه عليهم فقط يسطرهم صطر
ولذلك گطعوهن بالغدر فوگ النهر
هذا أبن أم البنين/وأبن أمير المؤمنين
لا شمر ظل لا عمر /هذا عباس الگمر
______
يكتل بنظرات عينه هذا عباس الشهم
ولذلك عالشريعه صوبوا عينه بسهم
وبالعمد عباس راسه ليش ياناس أنهشم
حتى مايگدر يوصّل ماي لأطفال الخيم
گطعوا أچفوفه وسف/وبعمد راسه أنخسف
ومن العيال أعتذر/هذا عباس الگمر
______
هذا كل إلي أكوله عالگمر لا مو رياء
واليشك أبهل المصادر خلي يگصد كربلاء
خل يشوف أشگد حوائج تنگضي أباب الرجاء
ميه بالميه بحضرته ينقبل كل الدعاء
گبته بطف كربلاء/تسطع أبعلوا السماء
وجهه يسطع عالنهر/هذا عباس الگمر
_______________________
الشاعر(أسعد قاسم الكريعاوي)
لمة عزه
حوار بين الأمام الحسين ع والعباس ع
الوداع الوداع خويه عباس الوداع
_________________________
اليوم أودعك يابو فاضل والمدامع هامله
چنه مانفترق خويه وفرقتنه كربله
شلون أرد خويه الخيامي وشعتذر للعايله
بداعتي عباس أحلفك خلي جسمك أحمله
الوداع الوداع خويه عباس الوداع
______
وسفه مابينك وبيني حال ياخويه الممات
خويه ياعباس بعدك والله ماريد الحيات
الوفه العندك يخويه چان من أجمل صفات
وچنت لمن أنده أسمك أنظرك من كل جهات
الوداع الوداع خويه عباس الوداع
______
خويه من شاهدت حالك طايح أعله المشرعه
ردت أضمدك بس شضمد جثتك متگطعه
لو أضمد خويه راسك السهم شيطلعه
وچفك المبتور گلي ياگمر شيرجعه
الوداع الوداع خويه عباس الوداع
______
شلون أعوفك يابو فاضل وأنته نايم عالنهر
يالچنت خويه وعضيدي أنته وحزام الظهر
تدري بعدك يبو الغيره الظهر مني أنكسر
هاك شاهدني يخويه وأشعمل بيه الدهر
الوداع الوداع خويه عباس الوداع
______
شاب أجيتك ياعضيدي وشيبتني ياحنين
أصبحت يعگوب چني من ترك يوسف حزين
شلون لو تنظر وضعنه فاطمة وأم البنين
لاشك إيصيحن يعينك الله يبني ياحسين
الوداع الوداع خويه عباس الوداع
______
گبل لاترحل يخويه وصيه الك عندي وسلام
خويه سلملي أعله أختنه لمن أترد للخيام
وگلها يتعذر كفيلچ جسمه مملي بالسهام
مگطع العباس گلها مختصر هذا الكلام
الوداع الوداع خويه عباس الوداع
_________________________
الشاعر(أسعد قاسم الكريعاوي)
لمة عزه أو أساسية
حوار بين الأمام الحسين وزينب لفراق العباس ع
حسين مكسور الظهر
من رجع من النهر
والعقيله شافته/أسم الله خويه تلگته
______________________
من رجع من يم عضيده أبو اليمه
تلگته زينب وبالمدمع تكلمه
إسم الله يبن أمي تگله وهي تلزمه
وثوب أبو اليمه أنصبغ من فيض دمه
خويه شنهي إلي حصل
وينه خويه آبوالفضل
خاف صابوا هامته/إسم الله خويه تلگته
من رجع من النهر
________
يختي شحچيلچ على العباس أخونه
من رحت يمه وشفت حال أبن أبونه
بالسهم مصيوبه يازينب أعيونه
وراسه بالعامود يختي صوبونه
ريتها عيونچ تشوف
من نظرته بلا چفوف
ويمه جوده ورايته/أسم الله خويه تلگته
من رجع من النهر
________
مگطع العباس أخونه وصله وصله
يوگع أمن أيدي يزينب من أحمله
التنگطع منه چفوفه ماهي سهله
حرت ياچلمه التواسيه وشگله
والله يازينب حرت
گمت من يمه وطحت
والله أخويه بعازته/أسم الله خويه تلگته
من رجع من النهر
________
من أجيت المصرعه منهو نشدني
يختي يازينب أخويه وماعرفني
گلي منهو أنته وبعد شتريد مني
گتله آنه حسين وبلهفه شبگني
عينه مصيوبه بسهم
الثانية ممليه دم
من حضني بلهفته/إسم الله خويه تلگته
من رجع من النهر
________
ردت أحمله للخيام الفاطميه
ماقبل خجلان من سكنه ورقيه
گلي خويه حسين لا تزعل عليه
خوفي تنظرني وتموت الهاشميه
من تشاهد هالوضع
زينب أختي تنفجع
إعليچ چانت لهفته/أسم الله خويه تلگته
من رجع من النهر
________
من وصلت المشرعه شفت العجايب
رحت عنچ شاب يختي وجيت شايب
ظهري ماأگدر أعدله من النوايب
أستعدي يختي زينب للمصايب
حفظي الأيتام وحرم
من يحرگون الخيم
أخته لمن سمعته/إسم الله خويه تلگته
من رجع من النهر
_______________________
الشاعر (أسعد قاسم الكريعاوي)
https://youtu.be/WNN-X6S6T-w?si=f-35JAFOcSGBucGd
Читать полностью…
ليلة الحادي عشر
أساسية
زينب مع الأملاك
يزينب وحّــدچ والـدنيه ليل
يزينب وأنتي حرمه بلا كفيل
ظلمه صارت دنيتچ / وين طاحوا أخوتچ
يزينب يزينب
________________________
ليلة الحــادي عــشر ظـــلن وحدهن
زينب وكــل الحــرم مـــاوالي عدهن
ذبــحوا الأخـــوان وأنــذبحوا ولدهن
وبهذاك الليل بس دمعه عله خدهن
يزينب حـايره بعيله وحـــرم
يزينب وحرگوا أعليها الخيم
حين حرگوا خيمتچ / وين طاحوا أخوتچ
يزينب يزينب
_________
نزلت أملاك السمه بليلة المقتل
لن أجه الزينب ملك ينعه إيتوسل
يگلها جيت أحميچ وبخدرچ أتكفل
دگــله للــعباس روح أترخـص أول
يزينب صح ملك اني لچن
يزينب أرتـعد مـــنّه وأون
خاف أجيبن سيرتچ / وين طاحوا أخوتچ
يزينب يزينب
_________
يگلها يازينب دخيل الله ودخيلچ
ماأروحن وحـدي أنـه يـم كفيلچ
أمــشي ويايه يــزينب وأنـدعيلچ
لو عـلگ تنطيني لو شيلة عليلچ
يزينب أنـــه خــليني وراچ
يزينب دخلچ آنه وبحماچ
وشحيني برايتچ / وين طاحوا أخوتچ
يزينب يزينب
_________
كل ملك منهم نزل يحمل مهمه
ذاك غطه بجنحه جثت أبو اليمه
واحد يدور على أوصاله ويلمه
وذاك نام بطوله وبنحره يشمه
يزينب شلون شاهدتي أنبتر
يزينب مـن الــحسين النحر
عاري بالحَر عزتچ / وين طاحوا أخوتچ
يزينب يزينب
_________
فـــطرس اللــيله نــزل لــحسين عـــناي
غطه جسم حسين من حّر الشمس هاي
وصــــــار مــيكائيل للأيــــتام حـــــــماي
ونـــزل جــــبريل الرقـــيه جـــايب الماي
يزينب چف رجلها محترگ
يزينب بخيلهم لا تنسحگ
من رقيه نادتچ / وين طاحوا أخوتچ
يزينب يزينب
_________
لو مشت بالليل زينب يم أخوها
يمشن أوياها الملائك يـسندوها
يمدن الجنحان لــمّن يضربوها
لإن لا يـــمها مُــحامي ولا أخوها
يزينب بعد ساعه وتذهبي
يزينب أنـتي وعيالچ سـبي
صيحي وأنتي بغربتچ / وين طاحوا أخوتچ
يزينب يزينب
______________________
الشاعر( أسعد قاسم الكريعاوي )
لمة عزه
نـفتتحُ الـــعَزاء بـالنوحِ والأنين
ونلطمُ الصدور عَليكَ ياحُسين
_________________________
هذا شهر الدمعه هذا حسين هاي أيامه
ويــحترگ لجله گـلبنه مـثل حرگ خيامه
وبــمثل هـــاي اللــيالــي تنولــــي أيتامه
وتنذبـــــح أولاده كـلها وأخــوته گــدامه
في أرضِ كربلاء تبكيكَ كُل عين
ونلطمُ الصدور عليكَ ياحُسين
_______
هذا شهر الحزن جانه والدمع والفاجعه
ظهر أبو السجاد باچر ينكسر عالمشرعه
وجـثت العباس ظــلت عـالنهر متگطعه
وتفگـد أم عــباس بالطف ألبنين الأربـعه
فــحاملُ اللـواء مُـقطّع اليدين
ونلطمُ الصدور عليكَ ياحُسين
_______
شهر لوعات ومصايب والحزن بي واضـح
ليلى شافت علي الأكبر عـالثره مـن طايـح
يعينـها الباري تـعالــى الـمنها أبــنها رايـح
وشاهِدت بالعين رَمله بدمه جاسم سابح
بكفكَ الشباب قضوا مُستشهدين
ونـلطمُ الصدور عـليكَ ياحُـــسين
_______
شـهر بـي عـبد الله چبده ينفطر من الضمه
وبـسهم مـن أبـن كاهل هالطفل نحره نرمه
حسين الله يعين گلبه الهل مصيبه المؤلمه
ترس چفه مـن وريـده وشـالها الرب السمه
طفلٌ قضى صريع والسَهمُ بالوتين
ونـلطمُ الصـدور عـليكَ ياحُــسين
_______
شهر حُرگه وشـهر دمعه وشـهر ونّـه ولـوعه
زحمه من فاطمه الشيعي لو ينّشف أدموعه
حـسين فوگه خيول عـشر عالصدر مجموعه
وچــل قـواريـر إيتكـسرن أبــو الـيمه ظـلوعه
وزيـــنبٌ تـراك وتلـطمُ الجبين
ونلطمُ الصدور عليكَ ياحُسين
_______
كُـل عزيز بگلب زينب هـالمسيه بـلحظه راح
بعينها شـافت أهـلها جـسومهم تنزف جـراح
طــعن بــسهام وخـناجر وبـسيوف وبـالرماح
وزينب أمست بعد أهلها طير مكسور الجناح
سـيدةُ الـنِساء مـنظرهُا حَـزين
ونلطمُ الصدور عليكَ ياحُسين
_________________________
الشاعر (اسعد قاسم الگريعاوي)
حوار أم الرضيع مع ولدها
أناغيك / وتناغيني
أحاچيك/وتحاچيني
السهم فُطمك/يبعد أمك/يعبد الله
____________________
يازهرة زماني ويانظر عيني
يعبد الله عسى لا طالت سنيني
غبت عني بغيابك من يواسيني
صفگت إيساري يبني أعليك ويميني
الدهر غدرك/وخلص عمرك
أنحفر گبرك / بگطِع نحرك
نحت يمك/يبعد أمك/يعبد الله
____
حسبتك تكبر وبالشده تبرالي
لاچن خابت أبفرگاك آمالي
سهم نحرك يريته بعيني ياغالي
ولاشوفن يعبد الله المهد خالي
بچه مهدك/على بُعدك
ذبل وردك /وحگ جدك
أختفه نجمك/يبعد أمك/يعبد الله
____
يمن ضميتك بروحي وحميت أسمك
وأخاف أعليك لو مر الهوه يمك
أذا أسمع بچاك الصدري أنه ضمك
وسف يوليدي أشوفك سابح بدمك
تناديلي / وكت ليلي
صحت ويلي/نهدم حيلي
رحل رسمك/يبعد أمك/يعبد الله
____
يعبد الله عگب عينك شلي بدنياي
أريد أتوسد بكترك يضي عيناي
أصيح بصوت وتگطع هرش چبداي
آنه أم الرضيع الماتهنه بماي
رحت مني/وكثر وني
تعذبني / وتشيبني
شكبر همك/يبعد أمك/يعبد الله
____
أشحال حسين من شاف الطفل ودماه
تغير وجهه حيل ودم تهل عيناه
يهوميله الرضيع بيسرته ويمناه
سمعت حسين صاح بصوت واويلاه
أبو اليمه / نظر دمه
صرخ بسمه/ونِعه يمه
ندب أسمك/يبعد أمك /يعبد الله
______________________
الشاعر (أسعد قاسم الكريعاوي)
نعي أو لمة عزة ليلة العاشر
ليلة وداع وآحُسينا وآحُسينا
____________________
ليلة العاشر أبو اليمه فلا نام
گاعد ويتفگد ويفتر عالأخيام
هوه والعباس والأكبر أوجسام
يبعدون الشوك عن رجلين الأيتام
ليلة وداع وآحُسينا وآحُسينا
_____
يگله للعباس أبو اليمه أخيه
تدري هذا الشوك شيسوي برقيه
زغيره رجليها يبو فاضل خطيه
بنتي ماتحمل ولا شافت أذيه
ليلة وداع وآحُسينا وآحُسينا
_____
گبال عيني باچر أنظركم ضحايه
توگع أنته وتوگع بكترك الرايه
والحرم كلهن تره يروحن سبايه
وتصبح أمصيبتنه ماألها نهايه
ليلة وداع وآحُسينا وآحُسينا
_____
باچر أنظر جاسم وأنظر للأكبر
عالأرض وبدمه واحدهم تعفر
حتى عبد الله بسهم ياخويه ينطر
هالطفل من الضمه لسانه إيتفطر
ليلة وداع وآحُسينا وآحُسينا
______
تنچتل كل الزلم باچر يعباس
جسمي بخيول آل أميه خويه ينداس
وعالخيم تهجم يبو فاضل الأرجاس
وبجسمنه مايظل ياخويه هالراس
ليلة وداع وآحُسينا وآحُسينا
______
مايرحمون العده أطفال الحسين
لاشرف لاغيره عدهم عالنسواين
زينب وكل الحرم تدخل دواوين
لن يزيد إيگلها چاوين الگمر وين
ليلة وداع وآحُسينا وآحُسينا
___________________
الشاعر(أسعد قاسم الكريعاوي)
لمة عزه للأكبر ع
عالأكبر دم تجري عيوني
عالأكبر دم تجري عيوني
_______________
آنه أم الأكبر عينوني
بمصابه الليله واسوني
شفت أوليدي بهاي عيوني
عالغبره ومنّه حرموني
عالأكبر دم تجري عيوني
_____
شفت بعيني براسه الطبره
وطاح الأكبر فوگ الغبره
وشفت الظالم من حز نحره
ياريت بداله ذبحوني
عالأكبر دم تجري عيوني
_____
عطشان وذبحوا گدامي
وذبحوا وياه كل أحلامي
من بعده شلي أب أيامي
ماعيش بدونه يدروني
عالأكبر دم تجري عيوني
_____
بدموعي وسهري ربيته
وبعيوني وگلبي خليته
من طاح بحزني ناديته
عدوانه بعده تولوني
عالأكبر دم تجري عيوني
_____
ماعيش ولا أصبر دونه
أبني وچا ليش يذبحونه
لابيدي وغمضّت عيونه
مسبيه من عنده أخذوني
عالأكبر دم تجري عيوني
_____
يامحبوبي وصعب فراگه
تدريني الحضنك مشتاگه
راسك گدامي أعله الناگه
مكشوف وبيك إيئلموني
عالأكبر دم تجري عيوني
_____
لجل الدين ولجل حسينك
يالأكبر ضحيت سنينك
ومثل حسين أنته مگطعينك
لو أبچي إعليه لتلوموني
عالأكبر دم تجري عيوني
___________________
الشاعر(اسعد قاسم الگريعاوي)
نزله
هذا الأكبر لو علي/
هذا الأكبر
___________________
شجاع الأكبر أبن حسين ياناس
عمره أثمنطعش ومحير الأرجاس
شتريده يكون گلي العمه عباس
وعلي متروس غيره وكله نوماس
الضده يوكف يبتلي/
هذا الأكبر لو علي/هذا الأكبر
_____
كبار أمن الفوارس چانت دگول
علي رد أنبعث هذا ممعقول
نشوفه بكربلاء إيصول ويجول
علي بحملاته رجف حتى الأخيول
صوت بالطف يعتلي/
هذا الأكبر لو علي/هذا الأكبر
_____
صفن عزريل من شاهد هل أفعال
شاب أزغير بس ذل قاده أبطال
يروحون آل أميه كلها الأنذال
العلي الأكبر فده والشسع الأنعال
يادفاتر سجلي /
هذا الأكبر لو علي/هذا الأكبر
_____
رغم ثقل الحديد ونار چبده
أجو عشرين ألف ياناس ضده
وعلي الأكبر يقاتل چان وحده
قتال المرتضى الكرار جده
حاشه لنه ينولي/
هذا الأكبر لو علي/هذا الأكبر
_____
نشاهد وگفته وگفت أبو حسين
شجاع ويشطر العدوان نصين
يواجهم علي صفين صفين
أبوه حسين شافه وتدمع العين
ناده ودموعه تهلي/
هذا الأكبر لو علي/هذا الأكبر
_____
من الخيمه عليه أدموع تنصب
مدامع ليلى أمه وعمته زينب
ودليل حسين عل أكبر تعطب
من شاهد أوليده بدم تخذب
صاح لأمه أتحملي/
هذا الأكبر لو علي /هذا الأكبر
___________________
الشاعر (أسعد قاسم الكريعاوي)
لمة عزه
يبني علي/ماينجلي/حزنك ييمه بيه
_________________________
عنك مشيت ميسره/وعالغبره مرمي عفتك
جثتك ييمُه أمطشره/بعيوني هاي شفتك
تعبي وسهر ليلي وجمال إعيونك
بلحظه أجني بساعة الذبحونك
بعدك شباب بيا ذنب چتلونك
مو تدري ماأگدر أعيش أبدونك
دمك جره/فوگ الثره/وآنه رحت سبيه
يبني علي/ماينجلي/ حزنك ييمه بيه
______
جسمك بقه فوگ الترُب/وبرمح شالوا راسك
ومن الرمح دمك يصُب/فدوه رحت لأنفاسك
طول الدرب أسمع ييمه ونينك
تنظر عليه وماتغمض عينك
ليش برمح عالي العده أمخلينك
راسك أمامي يبني ومكشفينك
جرح الگلب/كلش صعب/مايشفه للمنيه
يبني علي/ماينجلي/ حزنك ييمه بيه
______
سوده عليه بكربله/ عطشان مات أوليدي
ملعون شمر وحرمله/ذبحوا فرحتي وعيدي
ميته عسه ولا أنظره بهل حاله
دارت عليه من كل جهه الخياله
صاروا زلم عالأكبر الچتاله
لو مالعطش محد گدر يدناله
أبني سبع/وبلا درع/يسحگ جيوش أميه
يبني علي / ماينجلي/ حزنك ييمه بيه
______
يشبه رسول الله النبي/ياعالم أبني الأكبر
مات ومشت أمه بسبي/وي عمته والخدر
مثلي مره بكل النسه ما توجد
عدها ولد طبق الأصل مُحمد
صوت وشكل هيبه وجماله تجسد
بس ياوسف فوگ التراب اتوسد
شينفع بعد/راح الولد/وميرد بعد إليه
يبني علي /ماينجلي/حزنك ييمه بيه
______
من بين أديه يل رحت/وأصفگ أثنين أديه
وياك يوليدي ردت / تلفي إلي المنيه
يل تشبه الهادي محمد جدك
شلّي بحياتي يالولد من بَعدك
ماأگدر أتحمل يالأكبر بُعدك
يلّي رحت مني وبعد شيردك
يل مبتسم/مرلي بحلم/أمك تره خطيه
يبني علي / ما ينجلي /حزنك ييمه بيه
_____________________
الشاعر ( أسعد قاسم الكريعاوي )
الليله التاسعه
نزله
شجاعة علي الأكبر ع
هذا الأكبر هذا الأكبر
ما يتعذر هذا الأكبر
________________
طب للحومه ويسعر جبده
يسحگ هذا العسكر وحده
منهو يگدره وحيدر جده
حاشه يخاف وجده حيدر
هذا الأكبر هذا الأكبر
ما يتعذر هذا الأكبر
___
من حيدر وارث كل عزمه
وراث صولاته وحتى إسمه
والعباس الضيغم عمه
وشحجيلك يالسامع أكثر
هذا الأكبر هذا الأكبر
ما يتعذر هذا الأكبر
___
شافه العباس وهد بيهم
ناداه ها ياعمي أعليهم
زلمه اليشرد من أيديهم
واليوگع عدهم يتوذر
هذا الأكبر هذا الأكبر
ما يتعذر هذا الأكبر
___
شد عاليمنه وشد عاليسره
صاير چبده مثل الجمره
وحسين أمن بعيد أينظره
والأكبر يسحگ عالعسكر
هذا الأكبر هذا الأكبر
ما يتعذر هذا الأكبر
___
ماهاب الجيش ولاخافه
إنه أشبه جدي بأوصافه
ليه إيصد كلمن ماشافه
نفس الصوره ونفس المنظر
هذا الأكبر هذا الأكبر
ما يتعذر هذا الأكبر
___
منكم هاليوم آخذ حيفي
وفرسان أتصيدهه بكيفي
وبكرابه مايرجع سيفي
وأجعلها الطف تشبه خيبر
هذا الأكبر هذا الأكبر
ما يتعذر هذا الأكبر
___
كل ظالم هاليوم أنكله
من عدنه هيهات الذله
لحسين شحدك توصله
خل يسمع كلمن يتجسر
هذا الأكبر هذا الأكبر
ما يتعذر هذا الأكبر
____________________
الشاعر (أسعد قاسم الكريعاوي )
نزلة للقاسم عليه السلام
يعريس يعريس أمك نادتك
يعريس يعريس الليلة حنتك
_________________________
رمله يمه صاحتك/يبني هذي ساعتك
شد يجاسم همتك/حسين يوليدي غريب
أنصر حسينك أريد/وأبد لتعوفه وحيد
أصرخ وألعن يزيد /ويه عابس وي حبيب
أريدك أريدك ترفع هامتك
يعريس يعريس الليلة حنتك
_______
أنطيني يمُه لامتي / ولبَسّيني إعمامتي
خلي أرفع هامتي / وهامتچ يم الحُسين
آنه صح عمري زغير/لاكن الموقف چبير
الموت أولها وأخير/ منين أحنه خائفين
يجاسم يجاسم طفوا شمعتك
بعريس بعريس الليله حنتك
_______
گلها يُمه أدللي /ماأرد آنه وعلي
فرحي بيه وهلهلي/لمن أوگع عالتراب
دگله أعرف ماترد/وللشهاده مستعد
يبني أحصدهم حصد/يبني يازين الشباب
شفتها شفتها صعدت غيريتك
يعريس يعريس الليلة حنتك
_______
أنه بثياب العرس/أرد اضحي بالنفس
وللعدو ما أنتكس / حتى باچر أنذِكر
عَليّ بيه هامتچ / نشفي يمه دمعتچ
حزميني أبرايتچ / حتى بيها أنتِصر
ثجيله ثجيله ييمه مصيبتك
يعريس يعريس الليلة حنتك
_______
بيك أنه متنومسه/وجهي أبيض هالمسه
بيك يم خير النسه /وراسي عالي ومانزل
يبني ياتعب السنين/ أنه أعرفك ماتلين
قَبِل چفوف الحُسين/وقَبِل إيدأبو الفضل
عمامك عمامك باسوا جبهتك
يعريس يعريس الليلة حنتك
_______
يگلها قبل أمنيتي/هاچ أسمعي وصّيتي
هلله هلله بعمتي/إعليها گلبي منخطف
من تشوفين النذل / يربط أيديها بحبل
أصرخي ياأبالفضل/ يعتني ألها زحف
غريبه غريبه آنه وعمتك
يعريس يعريس الليله حنتك
_______________________
الشاعر (أسعد قاسم الكريعاوي)
أساسية
للقاسم عليه السلام
آنه أم وفاگده زين الشباب
وينه إليواسيني بهذا المصاب
يمه ياجاسم رحت من بين أديه
والله ماأنساك يالغالي عليه
آه يجسام آه يجسام
_________________________
يمه ياجاسم يروحي لاتظن گلبي نساك
من رحت عنك يسيره گلبي بالليل أعتناك
يالرحت من بين أديه وراح كل تعبي وراك
ريت دمي يسيل يبني ولاشفت ينزف دماك
ياوسف ذبوحك بيوم العرس
وبثياب الفرح نايم بالشمس
جاسم بيوم العرس شاف المنيه
والله ماأنساك يالغالي عليه
آه يجسام آه يجسام
_____
مو وكت نومك يجاسم شو حلتلك نومتك
اليوم وكت الزفه يمه وأعجنتلك حنتك
حضروا بعرسك عمامك والمنيه حضرتك
رماح وسيوف وعساكر ليش صارت زفتك
من عسا لاطال بعدك هالعمر
وأندفن وياك يبني بفد گبر
وقبه تصبح إلنه بأرض الغاضريه
والله ماأنساك يالغالي عليه
آه يجسام آه يجسام
_____
من طلع من المخيم يزهي بثياب العرس
چنه يوسف من جماله تخجل تشوفه الشمس
صاح لجل حسين عمي آني أضحيله النفس
أنصر حسين وعضيده وأنطي للعالم درس
أني تربات الحسن روحي فداء
باچر يعلگولي شمعه بكربلاء
والشهاده ثوبها أمفصل إليه
والله ماأنساك يالغالي عليه
آه يجاسم آه يجسام
_____
يمه يمّكمل يجاسم يلي رباك الحسن
رادك تناصر عضيده لمن إيطيح أبمحن
أنته أديت الوصيه وغالي أديت الثمن
تلگه باچر كل صفاتك بالحشد يتجمعن
عدنه چم جاسم مقاتل بالحشد
مدد ياأبن المچتبى ينادي مدد
والنذر دمه لجل أعظم قضيه
والله ماأنساك يالغالي عليه
آه يجسام آه يجسام
______
ياحسين وحق شباب القاسم وحق العليل
مانعوفك يبو اليمه هاي أكبر مستحيل
يلي ضحيت أبعيالك شما نقدملك قليل
نبقى ننعاك ونذكرك نستمر جيلا ً لجيل
ياحسين وياك وقعنه العهد
احنه منعوفك يبو إليمه أبد
والله تستاهل بچي يبن الزچيه
والله ماأنساك يالغالي عليه
آه يجسام آه يجسام
______________________
الشاعر (أسعد قاسم الكريعاوي)
أساسية
ملمع للعباس عليه السلام
حانَ يوم اللقاء~~حُسين
في أرضِ كربلاء~~حُسين
مستعداً أن أهاجم/فأنا بدرُ الهواشم
في أرض كربلاء~~حُسين
______________________________
هذا يابو اليمه يومي / وآنا عباس الغضنفر
چنت أعدله ساعه ساعه/حتى أصولن عالمعسكر
هذا يوم ألبي وعدني / خويه أبونه الوالي حيدر
أنا جاهز وأنا حاضر / وبيه نار الغيره تسعر
أخي أأذن إلي~~حُسين
فناري تسطلي~~حُسين
إنني عالحربُ عازم/ فأنا بدرُ الهواشم
في أرض كربلاء~~حُسين
______
لن أبو الأكبر يگله / أنطيني يابو فاضل إيدك
خل أضمك خل أشمك/وضم على صدرك عضيدك
للشريعه أتعنه وأگصد / العيله عطشانه وتريدك
مو مهم ماي التجيبه / المهم سالم أريدك
فقالْ الكافلُ~~حُسين
أنني فاعلُ~~ حُسين
لستُ أخاً أني خادم/فأنا بدرُ الهواشم
في أرض كربلاء~~حُسين
______
تعنه عباس الشريعه/بيده رايه وبيده جربه
شاهد الآلاف العساكر/مدري أكثر من تحسبه
حاوطوه أبكل عددهم/ ظنهم الكثره ترعبه
دار ظهره وهز چفوفه/كل عددهم مايعجبه
حاطه فيهِ ألوف ~~ حُسين
وجردوا السيوف ~~ حُسين
في الشِدائد ثغري باسم/فأنا بدرُ الهواشم
في أرض كربلاء~~حُسين
______
عن ظهر مهره ترجل / وعاالنهر ثنه ركبته
تقربوا يمه الأعادي / وجهه إعليهم نضرته
من رفع راسه نظرهم /ميه طاحت من خزرته
أمكاثر أسهام أعلى صدره/لن سهم طاح بجربته
فنادى من بعيد~~حُسين
ستظلُ وحيد ~~حُسين
وأعتذاري للفواطم/فأنا بدرُ الهواشم
في أرض كربلاء حُسين
______
تاج راسي أنته وعضيدي/ياحسين أنته وأمامي
أعتذر منك يخويه / ما أرد بعد الخيامي
گطعوا أچفوفي وعيوني/بيها سهم البين دامي
الزينب وسكنه ورقيه / خويه وصلّي سلامي
هَشّموا هامتي~~حُسين
قَطّعوا جثتي~~حُسين
لم يكُن شي مني سالم/ فأنا بدرُ الهواشم
في أرض كربلاء~~حُسين
_______________________
الشاعر (أسعد قاسم الكريعاوي)
أساسية
لسان الحال مع العباس ع
ياأبالفضل/أهجم عليهم يابطل
ياأبالفضل/لتخلي من عدهم عدل
منك تره الكل تنهزم/صدگني مابيهم زلم
ياأبالفضل/ياأبالفضل
____________________
ياأبالفضل ذوله الإمامك چم ألف
والله فلا بيهم شجاع ولا كلف
لمن سمع بيك الشمر لونه أختلف
منك تره ظل الشمر يرجف رجف
ياأبالفضل/يل ينظرب بيك المثل
ياأبالفضل/خلصنه منهم بالعجل
بعز الظهر شافوا نجم/صدگني مابيهم زلم
ياأبالفضل/ياأبالفضل
______
عالمشرعه خلي جثثهم چل جبل
سوي سواتر للخيم يبن الفحل
بيهم حقد من التي گادت جمل
من شاهدك شمرإبن ذي الجوشن ختل
ياأبالفضل/دور عليه جيبه سحل
ياأبالفضل/ لا يخدعك مابي أمل
من منحره لزمه لزم/صدگني مابيهم زلم
ياأبالفضل/ياأبالفضل
______
ماي النهر سويله چاره يابدر
غيّر مساره وخلي بخيامك يمر
والي يمنعك شوّفه أنجوم الظهر
بچفوفك أسطرهم يبو فاضل سطر
ياأبالفضل/عطشان عبد الله الطفل
ياأبالفضل/ وأتنختك سكنه بخجل
ياكافل أعيال وحرم/صدگني مابيهم زلم
ياأبالفضل /ياأبالفضل
______
حاشه ترد سكنه بطلبها مستحيل
من جربتك برد گلبها ياكفيل
وزع النهر بثواب أبو اليمه سبيل
وشيبقه منه بجربتك أسگي النخيل
ياأبالفضل/ماي الذي بجودك عسل
ياأبالفضل /والمّنه يشرب مايمل
وألي على خيامك هجم/صدگني مابيهم زلم
ياأبالفضل /ياأبالفضل
______
زلزلها كون الكربله وأعلن حرب
خلي يعض أصبع ندم كلمن گرب
سوي اليعجبك ياگمر سوي التحب
ماغيرك اليكشف على حسين الكرب
ياأبالفضل/أنته فحل وابن الفحل
ياأبالفضل/وأنته إبن خير العمل
شمرت علي أنته ونعم/صدگني مابيهم زلم
ياأبالفضل/ياأبالفضل
_____
يحلالك الشعر أمن أنظمه والوزن
مجبور ألك أكتب شجاعه مو حزن
شعر وقوافي بأسمك الطاهر حلن
أجمل لحن يطلع إذا بيك ألتقن
ياأبالفضل/كل مشكله بسمك تحل
ياأبالفضل/وبذكرك إيطيح الفصل
وحگ أسمك البي ينقسم/صدگني مابيهم زلم
ياأبالفضل / ياأبالفضل
____________________
الشاعر (أسعد قاسم الكريعاوي)
نزله
شجاعة العباس عليه السلام
وجهك يبو فاضل گمر/شع وبزغ يم النهر
نوراً على نور أرتجل/حي على خير العمل
__________________________
لمن وكف عالمشرعه والنهر صدله بالطرف
يتلاطم أمواجه غده من الگمر يرجف رجف
خّيم عليه أبهيبته چان أرزگ ولونه أختلف
مد أيده يترس جربته لن النهر كله نشف
حين إلي ثنه ركبته/وبالنهر خله جربته
ماي النهر كله حمل/حي على خير العمل
___________
لمن رفع راسه نظر هاي الأعادي حاطته
گام أعله طوله وأبتسم ثاري العدد ماعجبته
يتخطه بأجدامه ومشه وطرفه أبد مايلفته
سبعين ألف فارس وصل عالمشرعه وماهمته
ناداهم وذاع الخبر/هاليوم أوذركم وذر
للحومه أبو فاضل نزل/حي على خير العمل
___________
بچفوفه يصطرهم صطر يمنه أعله يسره وأنفرد
كلها تنادي ياگمر هونك علينه ياأسد
طول بعرض شفنه البطل عالمشرعه يحصد حَصِد
ناده يعزريل أختصر لا لا تظل تحسب عدد
ميه أعله ميه يشمره/شگد العدد محد دره
ماكفت أوراق وسجل/حي على خير العمل
___________
صعدت الغيرة وأرتجز وبنظرته لاح الزعل
يشبه علي وكت الحرب بالمعركه لمن نزل
فحل الفحول المرتضى وأبنه أكيدن هم فحل
يتلفت يدور الشمر وينه يگلهم شو ختل
شمر وعمر وي حرمله/لبسوا عبي في كربله
صاحوا أجتلونه بعجل/حي على خير العمل
___________
عباس أنه أو وين الزلم وين البطل خله يجي
خله يواجهني الشمر مو بس يثرثر بالحچي
لا خالي هوه ولا أبد لا بالذهب آنه أنغري
كل عقله وياه أنتمي وأترك أبو اليمه الإبي
تعرفني ياشمر أمن أطب/للحومه أگلبها گلب
بعيوني لو لاح الزعل/حي على خير العمل
___________
أحنه الهواشم ياخلگ بينه شجاعه أمن العلي
كلمن يضدنه بالحرب خاسر يرد منها وعلي
خل يستمع شمر وعمر وي حرمله بن كاهلي
إني أنا العباسُ في الميدانِ من يأتي إلي
ماطول حي اني وعدل/لحسين ماواحد يصِل
كلها تسميني البطل/حي على خير العمل
___________________________
الشاعر (أسعد قاسم الكريعاوي)
هذا العباس/هذا العباس
لو علي بكربله
هذا العباس
غيره ونوماس/غيره ونوماس
عباس ومرجله
________________________
عباس البطل يشبه علي أو وارث صفاته
مايهتز جبل وكت الحرب باقي بثباته
حيدر بالأمس حامه النبي من كل جهاته
واليوم الگمر لحسين إخوه ضحه بحياته
مرفوع الراس/مرفوع الراس
والله مانزله
مرفوع الراس
غيره ونوماس/غيره ونوماس
عباس ومرجله
_______
من زغره أسد شهم كلف حيدر يشوفه
بساعة مولده ضمه علي وقبّل چفوفه
راده للحُسين أبكربله ذخر وطفوفه
ويدري للخدر عباس أبد لا مايعوفه
شحدها الأرجاس/شحدها الأرجاس
توصل للعايله
شحدها الأرجاس
غيره ونوماس/غيره ونوماس
عباس ومرجله
_______
زلمه ومن ظهر زلمه الگمر والكل شهوده
يفنيها العده بسيفه لون عنده زنوده
عالشاطي أنكسر ظهره أخوه حسين أعله موده
وصاح بحسرته راح الإخوه بعد أشيعوده
لا ماينقاس/لا ماينقاس
الأخ حزنه شيحمله
لا ماينقاس
غيره ونوماس/غيره ونوماس
عباس ومرجله
_______
مافارگ أخوه أحسين أبد حد المنيه
حتى أبموتته يمه أندفن بالغاضريه
روحه بروحه مشدوده كفيل الهاشميه
أبن أم البنين الطاهره الحره الوفيه
لآخر أنفاس/لآخر أنفاس
رايه مآبدله
لآخر أنفاس
غيره ونوماس/غيره ونوماس
عباس ومرجله
_______
من نذكر أبو فاضل نشم عطر الرجوله
يتقشعر بدنه لو فقط إسمه نگوله
سيفه وراسه حار وما نذكره بالسهوله
والزاره بضريحه محنته وهمه يزوله
ودگول الناس/ودگول الناس
يحل اكبر مُشكله
ودگول الناس
غيره ونوماس/غيره ونوماس
عباس ومرجله
_______
چفوفه من هون عالمشرعه صارن مناره
يرتاح الذي ألهن يصد وكت الزياره
ورايه العل نهر طاحت أمس كتبت عباره
إن الكافلَ رمزَ الأخوةِ والغيارهَ
بابه الينباس/بابه الينباس
بي شفه القبّله
بابه الينباس
غيره ونوماس/غيره ونوماس
عباس ومرجله
______________________
الشاعر (أسعد قاسم الگريعاوي)